1. Послание на Выг Феодосия Васильева.

Господи, Ісусе Христе, Сыне Божий, помилуй нас.

Ведомо буди вашей братской о Христе к нам, грешным, любви, о нашем общем и братском совете к вам о церковных догматех, о них же бяше яко же прежде, тако и ныне у вас с нами пря и смущение.

Первое: о титле, иже на животворящем Христове кресте, еже Пилат написа о слове Христове: «Ісус Назарянин Царь Іудейский», о ней же внеслося мудрование от вашей страны, будто тоя титлы на дщице у креста Христова ныне писать христианом и имети неподобно. И от того в ваших странах — в христианы вниде дерзость тое титлу на крестах стирати. И ныне мы слышим от вас на беседе, что впредь о той титле, глаголете, такова мудрования и сомнения, по прежнему, самем вам не имети и инем не вносити, и поклонение кресту Христову с таковою титлою творити; а которые люди тое титлу потерти и дерзнули, ино глаголете, яко не по вашему приказу. И мы слыша от вас сия глаголы, ищем: да покажете нам сие на деле, ради церковнаго примирения, чтобы ваше общее братское о Христе собрание имели впредь образ креста Христова с тое вышеписанною титлою у себя в часовне; а тот христианин, который в вас и после общаго вашего с нами бывшаго примирения тое титлу дерзнул потерти без вашего повеления, о нем же вам известно, да повелит ваша любовь ему тое титлу на том же кресте паки вообразити, да не будет к тому и впредь во иных таковыя дерзости.

Второе: была у вас с нами пря: егда приидет от неверных муж с женою совокупився законным браком преже познания христианской веры, и по познании веры и по святом крещении — глаголали вы: к тому первое то их брачное совокупление не наречется законный брак и без втораго венчания по крещении, от христианскаго священника, по тому их первому браку в законную жену ему имети невозможно. И ныне мы, будучи с вами обще на беседе, прилежно смотрели во апостольском и отеческом предании: и то их первое брачное совокупление законный брак нарицается и без втораго венчания в церкви имеется. И мы о сем ищем от вас в примирении, да не будет впредь у вашей любви на той законный брак зазора и порока, да не будем апостольскому и отеческому преданию противиться паче же хульницы.

Третие: о ядении с неверными, яко по апостольскому и отеческому преданию не подобает верным христианом с ними вкупе ясти и пити и из их сосудов, яко же и вы на беседе с нами согласно о сем глаголете. И впредь ищем от вашея любви, яко же вам, тако и нам с неверными ни пити, ни ясти, и брашна их не приимати, и сосуды про них во всех христианех особые имети, а из христианских сосудов ясти и пити им не давати, яко же свидетельствует о сем в Патерице Киевопечерском: «не ясти с ними, ни пити из единаго сосуда… Тем же: просящим у вас дайте им Бога ради ясти, но в их сосудех, аще ли не будет у них сосуда, — в своем дати и потом, измывше сосуд, дати молитва». И пониже сего пишет: «брашна их не приимати».

Четвертое: слышали мы от вас на беседе, яко прияты от вас постриженные от еретик старцы, и по проклятии своих ересей те старцы паки по прежнему в том же старческом образе пребывают без христианских священноиноков пострижения. И о сих ищем мы от вашея любви в примирении, чтоб тем старцам, стриженым от еретик, в иноческом образе не быть, но отложа, бельцами спасение содевать себе, да не внесется в церковь пострижение от еретик.

Пятое: да от вас же прияты иноки, иже от простых старцев пострижены, а не от священников, и те старцы у вас начало соборное содержат и действуют, на трапезе хлебец богородичен вынимают, и духовное дело творят, крестят, и на покаяние приемлют, и воду богоявленскую раздают, а овы из них и постригают во иноки от своего образа. И о сих ищем мы от вашея любви в примирении, чтобы те иноки пеклися токмо о своих душах; а вышеписанныя действа творити отстали: понеже в прежния времена аще где смотрительныя вещи и обретаются, еже случилося быти постриженным и от простых инок, но такова вышеписаннаго действа, еже на трапезе хлебец богородичен вынимати, и крестити, и на покаяние приимати от таковых инок творение не обретается. Бывшим же иноком, постриженным от священноинок, аще и случилося кого где пострищи, а како и каким чином постригали, и такова устава впредь во свидетельство иным постригати не обретается же. К тому же и смотрительных случаев во обдержный устав кому приимати такожде от божественнаго Писания возбраняется.

Шестое: совершаются у вас всенощныя бдения чрез устав святых отец: понеже без священников, и без пяти всенощных хлебов, и без пшеницы, и вина и масла, яже имети устав повелевает. Простым же иноком и со христианы инаков устав в старчествах, ин указ изложен, еже како пети всенощныя. И о сем ищем вашея любве: аще похощете сверх утрени пети и всенощная бдения, и то да поются, якоже в старчествах пишет.

Седьмое: да у вас же всегда во исходных поклонех из келий, такожде и в приходных поклонех, входя на службу, полагается после седми поклонов лишний поклон осмый, не по уставу святых отец. Аще ли в субботу и в неделю, такожде и в праздники, в них же несть по уставу земных поклонов: то у вас, исходя от службы, во исходных поклонех в начале полагается два поклона в пояс, а третий в землю, в келию же приходя после «Достойно» на «Слава и ныне» три поклона в пояс, а поклон по счету в землю же полагается всегда, якоже и в приходных.

Осмое: да вы же в начале всякой службы начинаете стихом: «За молитв Пречистыя Твоея Матере и всех святых, Господи, Ісусе Христе, Сыне Божий помилуй нас» — не по уставу святых отец.

Девятое: в начале Полунощницы, в седмичные дни, поклоны полагаете в пояс не по святых отец уставу, и то на «Слава Тебе, Боже наш», а не на молитве «Боже, очисти мя грешнаго», на ней же святии повелеша три поклоны земныя полагати.

Десятое: да у вас же уложено пред Часами не по уставу святых отец, на молебнах и на панихидах, глаголати начало псаломщикам: «аминь. Царю небесный», а не Трисвятое, якоже святии уставиша. Такоже и на Часех глаголют псаломщики ваши не по уставу же святых отец — в начале «аминь, Трисвятое», а не «Царю небесный», якоже святии уставиша.

Первое-на-десять: у вас же после Полунощницы, егда не бывает Утрени, уложено глаголати не по уставу святых отец: начало первому часу: «аминь. Царю небесный», а не «Приидите поклонимся» 3-жды, якоже святии уставиша. А третий час тогда начинают по стисе от настоятеля глаголати не по уставу святых отец: «аминь. Приидите поклонимся», а не «Царю небесный», якоже святии уставиша.

Второе-на-десять: почто вы не веруете печатным церковным книгам Московскаго государства, иже суть печатаны до Никонова пременения, при благочестивых царех, такоже и при патриарсех, им же супротивно мудрствуете: сами глаголете и прочих обучили Евангелия, и Апостолы, и Прологи чести, такожде во Октаех и в Минеях говорити, и в Святцах имена святых воспоминати — идеже напечатано имя «Иоанна Предтечи» или «Иоанна Богослова», или «Иоанна Златоуста» и прочих святых, ему же имя «Иоанн», у вас везде глаголется «Иванн»: аще случится глаголати «Иоанна», и вы глаголете: «Иванна», или: «Иванне, моли Бога о нас», или «от соборнаго послания Иваннова» или: «от Иванна святаго Евангелия чтение». И сия ваша сопротивность святым царственным печатным книгам зело нас ужасает, чесо ради вы имя «Іоанна» нарицати не имеете и иных в сомнение вводите.

Третие-на-десять: да у вас же по уставу, иже в «Сыне Церковном» рук не распростирают на приятие фимиама, но крест, его же человецы на себе носят, из пазухи вынимают и, в руках держа, кадити его предлагают, а не сами той фимиам, по «Сыну церковному» — яко дух жизни, приемлют.

2. Послание в Польшу Андрея Денисова [2-е послание]

Понеже убо по нашей с вами беседе о церковном деле, господине Феодосие, изволили вы примирение свое к нам имети в шести статиях, просяще у нас к вам на письме послушания, еже мы, прочетше, советуем вашей любви, в чем примирительное к нам и прочим христианам имети любовное о Христе совокупление.

Кто где от правоверных, по обычаем древним, благочестивых православных царей и святейших архиереев, еже в них, по преданию святых апостол и святых отец, по старопечатным книгам, кресту Господню подпишет «Царь славы, Ісус Христос, ника», кроме Пилатова написания, и сие бы вам ересию, якоже на беседе дерзали, впредь бы не нарицати и сомнение в христианы о том не вводити. Но и наше намерение, еже извещаем: мы кресту Господню, и до ныне и впредь, аще и с титлою где во христианех, поклоняемся. Аще ли что впредь о том яснейшее Писание изыщется, тако и по вашему с нами глаголанному совету мудрствовати, и ныне же бы о том друг на друга клеветою и составом не высокомудрствовати бы паче, еже подобает во смирении о спасении мудрствовати.

Что с вами прежде пря была о брацех: кои люди крещены до отступления веры от священников благоверно, и после венчалися у еретиков, иже прежде у вас обычай был их оправдати, а ныне от святых правил та признали вкупе с нами, и приговорили вы, яко брак их неприятен, и без венчания детородием жити им невозможно, чтобы вам в вашем духовенстве сущим таковым известие сказав, утвержати чистым житием жити. А которые от вас крещены, прежде крещения венчалися от еретик, и по вашему к нам извещению, вы им по крещении крепце запрещаете о том, чтобы чадородием вместе не жили и одрами бы муж с женою особлялися, и приглашаете им Господне слово: «горе непраздным и доящим в тыя дни», и то им приричете, что вы, духовники их, простые люди, а не священники, и очищати их вам молитвами не пристойно, а кои вашего запрещения не слушают, рождают детей, а вы им того в грех не ставите и молитвы тем родильницам даваете: и от того слабость велика в христианы входит и смущение. А и на те браки, в нашей с вами беседе не обрели вы нам яснаго Писания, как в вашем письме написано, чтобы без второго венчания крещшимся вышереченным в церкви законный брак имеется. И о сем молим вашу любовь, чтобы вышереченная слабость крепчайшею цельбою вам поцелити.

А что в ваших письмах и о простых брашнах, от неверных покупаемых, привожено неведомо из какого эпитимейника: «аще кто вкусит что снедно жидовско, или болгарско, или срацынско, а неведая, поста осмь дней, а поклонов как ему отец укажет; аще ли ведая, то два лета»: и сей ваш привод противен священным правилам. Понеже в Номоканоне печатном в правиле 133 пишет: «аще кто пойдет на праздник варварский или еретический и снесть в той день с ними от них жремая за душу их или спразднует им, два лета да не причастится, по седьмому правилу, иже во Анкире святаго собора». И у святых убо, кто жремая от неверных брашна снест, два лета епитемий. У вас же и простыя их брашна подобны жремым поставлены суть. Молим вас отложити вышемерное то мудрование, да не досада будет и апостольскому, еже на торжищах купити, повелению, разнствовати же от идоложертвенных повелевшу; тако же и древним христианом, иже во время Иулиана, отступника царя, на торжищах покупали брашна: тако же и Антонию Великому, и Савве Освященному, и Макарию Желтоводскому, иже от неверных приносимая брашна, хлеб, и сыр, и мед, и прочее приимали. Подобне же и у самех вас, у прочих христиан, по нужде брашна у неверных покупая, ядутся. Да вышереченным мудрованием хуление скверноядства и против жремых осуждение да не наведется. А еже с неверными не ясти, и брашна их кроме нужды не покупати, и сосуды особь от них имети, и у нас сие благодатию Божиею соблюдается. Иже от вас прочитаемый Эпитимейник, в нем лгано о 5 вселенском соборе, яко бы был на нем Ориген еретик и у Евсевия Самосатскаго вырвал из рук письмо, а святое Писание повествует: Ориген был за много лет до перваго вселенскаго собора, о чесом летописец свидетельствует и от жития Златоустаго познати мощно. А Евсевий бяше между первым и вторым собором при Мелетие, патриарсе Антиохийстем. И есть сия явственная ложь о пятом вселенском соборе, от некоего лжесловца оболгано. И в том же Эпитимейнике написано правило, не вем откуда, иже Феодосий нам, на беседе будучи, прочитал, разум же правила таков: дьяк живый с женою без венчания и, аще венчается, и по венчании презвитером да поставится. В Номоканоне же печатном правило 179 возбраняет священство таковому: аще кто прежде венчания растлит обручницу свою. И сие правило в Эпитимейнике противно божественным правилам святых отец. Но иное кое-что неведомо с коих книг в ней писано. И в беседе будучи, предлагал вам познати о ней сие несогласие; вы же и сие тщалися оправдати любопрением. Молим вас отложити вам таковое мудрование, еже ложное вышереченное оправдати и по неизвестной книге управляти людей, но сосвидетельствуя ю со святыми правилы, из коих книг, или от коих святых в ней правила писаны, и свидетельствованное прочитати, а ложное отложити.

На беседе будучи предлагали вы нам совет, что повелеть отлогая иноческий образ, — бельцами ходити тем, кои с обещанием к Богу кроме молитв облекшеся в православии во иноческий образ; а наипаче тем, кои прежде были еретические постриженники, и по проклятии тоя ереси и по отложении еретическаго пострижения облеклися со обещанием к Богу во иноческий образ. А ныне в письме пишете, яко у нас прияты еретические постриженики. У нас явственно возвещено вам, что Гаврилов отец, отложа еретическое пострижение, потом со обещанием к Богу облекся в христианстве во иноческое одеяние. А егда мы в Русе в прошлой године с тобой, Феодосием, виделися, тогда ты Гаврилу Евтихиеву, — сам он свидетельствует, — по его молению обещался его отца вышереченнаго в братстве прияти и, отложа от еретик постриженный образ, самому ему на себе положив иноческий образ, жити по Бозе иночески. А ныне, аки забыв тое свое слово, у нас тем образом во христианех облекшуся ему, обещаяся Богу, во иноческий образ, повелеваете бельцом ходити. Якобы тем образом еретическое пострижение приемлется, кое от вас отлагается. Но и в божетвенном Писании обретается, кои древле, кроме священных молитв во иноческия одеяния облекшеся, спаслися. Да и в правильной священноинока Матфея книге от состава 40, от главы 15, о иже кроме молитв иноческим одеянием облачающихся: аще ли кто и троелетие внутрь иноческим кроме молитв одеянием облечется, велико подымет осуждение, аще совлещися сего восхощет, яко ругаяся явственне ненаругаемым и неволею бо в сие одеятися понужден будет. И сему божественному Писанию внимающе, мы не смеем тем, иже кроме молитв иноческим одеянием со обещанием к Богу облеклися во благочестивой вере повелети совлещися и поругатися ненаругаемому иноческому одеянию.

Да от иноков, не священников сущих, постриженных, прежде с вами, Феодосием, согласие было от божественных Писаний: тех иноков в согласие вы к себе от нас, еже они крестили, и исповедали, и хлебец Богородичен выимали, и начинати им в службе, вы приимали, и явственне, со мною беседующе, сих согласие исповедывали; ныне же тех иноков от духовных дел отставити повелеваете, бельцам же, нам, при их службу молитвенную начинати присуждаете. Оставя братскую прежнюю по божественному Писанию любовь, аки распрю любя, вново уставляете, не обретшу на сие от Писания запрещения. Точию глаголете: «понеже в прежния времена аще где смотрительныя вещи обретаются, еже случилося быть постриженным и от простых иноков», и понеже пишете: «и смотрительных случаев во обдержанной устав кому приимати такоже от божественнаго Писания возбраняется». И ваши убо глаголы о иноцех сице. Мы же зело чудимся вашему мудрованию, яко святая церковь постриженных от иноков — не священников издревле приимала, когда и священноиноки были, якоже в житиях святых свидетельствуют. Преп. Антоний Великий пострижен от Павла препростаго, и преп. Паламон постриже пр. Пахомия Великаго, иже после же начальником бысть многим монастырем. И пр. Засима Соловецкий постриже Марка во иноки, и инии мнози подобни тем. И преп. Антоний Печорский приходящих ко иноческому житию приимаше и постризаше, яко же в житии его пишет. Но и в поучении святаго к братиям, иже к ним глаголаше: «се Бог вас совокупи, братие, и от благословения есте Святыя Горы, ея же игумен постриже мя, аз же вас постригох». И в послании Симона, епископа Владимирскаго, к Поликарпу Черноризцу Печерскому сице пишет: Илариона митрополита, и сам чел еси в житии св. Антония, яко от того пострижен бысть, и тако священства сподоблен. А вы ныне в такую нужду и то за смотрительные случаи оставливаете. А у самих вас егда мужа и жену крестите простые, а не священники, и егда они приживут детище, вы же простые и молитвами священническими очищаете, не сумняетеся, еже в божественном Писании такова смотрительнаго случая не видится. Обаче свое дело дерзостно, и в Писании не обретше, оправдаете: а иночество, аще и в божественном Писании есть, отставляете. Но мы не смеем возноситися над иноческий образ, православным им сущим, и, отказав им безвинно, начинати нам, бельцем, пение или в трапезе не дерзаем. Понеже и у Никона преподобнаго в книзе велицей в 16 слове написано: «Вопрос: христолюбец некий мирянин вопроси, аще понуждают мя отцы, к ним же прихожду, благословити предлежащая брашна, послушаю ли их, или ни? Ответ: не послушай, глаголя: ниже причетник есмь, ниже образ иноческий нося, но человек есмь мирянин, грешен, и паче меры моея есть, но простите мя Господа ради». А еже нам, по вышереченным, дерзати пред иноки и понуждати облеченных в православии и хотящих иночествовати иночеству поругатися и снимати: боимся и трепещем сея дерзости творити, чтобы не подпасти под святых отец клятвы, яже святая церковь проклинает всех иконоборцев, и иноческаго чина попрателей и разорителей. По вашей любви советуем отложити о иноческом образе христианском ваше мудрование, но яко же прежде с нами было ваше о иноках исповедание, держите и впредь то примирение.

О всенощном бдении, егда первое с тобою, Феодосием, свиделися в Старой Русе, тогда утвердили согласие: еже быти всенощному бдению, и в деревне негде с тобою вместе отпели всенощное, и после того с вами согласно о сем и доселе было; ныне же, аки раздор любя, повелеваеши таковое словословие Божие отставити, не приведши на то от божественнаго Писания никакого запрещения, точию глаголя, что без всенощных хлебов не возможно. А по Типику Соловецких Чудотворцев, в монастыре их во храме у Димитрия великомученника, на праздник его, и без всенощных хлебов всенощное исполняли. Да и у самого тебя, Феодосия, без священников не малыя службы: молебны и панихиды, и с молитвами иерейскими, и на вечерни лития, и на Пасху со кресты хождения, и отпевание мертвым с молитвами иерейскими и разрешительными служите; и как во Уставе писано — у игуменов прощение приимали и благословение, сие у тебе во обители братии подаваеши без сумнения. Точию едино всенощное славословие тебе не полюбилося, кое кроме иерейскаго действа у нас точно, вкупе вечерня со утренею, поется вместе. А во Уставе во главе 7 о бдениях всенощных, бывающих воскресных и во владычных праздницех, на кийждо месяц: бдения, пишет, вкупе же и со иными бывают всего лета — бдений 68, еже не подобает никакоже оставляти, и прочая. И паки пониже: есть и ино бдение к сим святому, ему же есть храм в обители, еже должно есть бывати и никако же оставляти в память его. В том же Уставе во главе 54 и 58, и в житии пр. Пахомия Великаго и Саввы Освященнаго, и в книге преподобнаго Никона, глаголемей Тактиконе, в слове 36, дает знати: яко бывают монастыри и без священников. Сих ради советуем вам и о сем отложити сопрение и держати по прежнему у нас с вами о бдении всенощном безразгласное примирение.

Будущи ныне в Старой Русе, Стефан Рушанин показал писание, тобою, Феодосием, посланное твоим детям духовным, Ивану и Андрею, яко они чрез твой указ крестят и исповедают, и на конце им ты написал: «понеже по святым правилом крещение от вас не крещение и исповеданнии ниже вяжутся, ниже разрешаются». И то в том твоем написании запрещаеши свыше архиерейской власти великою дерзостию, понеже по священнным правилом чрез архиерейской заказ подцерковниц где крестят и от подцерковника крещение кающихся приятно. А у тебя чрез твой, простаго человека, отказ, христианин, аще крестит кого, крещение неприятно. И по той грамотке твоей ученицы твои, Семен Григорьев с прочими, не приемлют от христианина крещеннаго. И то превеликое неопасное превозношение, возносящееся над священными правилы и вземлющееся вязати и решити выше архиерейскаго святительства, ныне познавше, мы видим и иная не в чин вашего простаго чина творимая от вас, о чем прежде тихостию советовахом вам отложити сия.

1. Рождающим женам даваете священническия молитвы.
2. Молитвы на исповеди прощальныя и разрешательныя.
3. Молитвы на исход души и над представльшимся.
4. На панихидах и на погребении молитва: «Боже духовом».
5. Молитвы  разрешительныя на погребении, глаголемыя властию иерейскою.
6. Мертвым в руки прощальная молитва, даваемая властию иерейскою.
7. Кладезям, без воды освященной, молитвы говорят.
8. Оскверншимся брашном молитва.
9. Молитва сосудам оскверненным.
10. На торжищах продаемым брашном молитву которую говорят? Понеже в Требниках торжищным брашном молитвы не поставлено видится.
11. В посты духовным детем молитвы поповския говорят.
12. Соли, меду и соту и на иныя потребы молитвы иерейския глаголют.
13. В баню ходящим молитву, не вем какую, дают, понеже в Потребниках печатных баням молитвы говорить не поставлено.

Да еще и сие различие признавается в вас: грамотные люди и простые за молитвы по вашему велению, поклоны полагают. А кои сподоблены духовнаго дела, тии вышереченныя молитвы иерейския на нуждныя людем потребы говорят, и тем у вас при простых людех духовные аки бы священническую власть имеют, от некоего им данную показуются. Видится и по вашему чину неприлично вам иерейския молитвы говорить, но по обыкности простых человек поклонами молитися, а наипаче яко в божественном Писании нигде сими молитвами простым человеком освящати прочих человек, или разрешати, или в руки давати прощальная повеления, или случая такова когда бывша не написано. А и во святом крещении молитвы иерейския от простых человек не глаголются, но и «Боже духовом», молитва иерейская, на каноне за единоумершаго говорить отказана. И в Номоканоне о духовницех пишет: вопрос: подобает ли благословити женитву, или отроча крестити, или дати роженице молитву? Ответ: священноиноку убо, аще и духовник есть, но не подобает благословити женитву, крестити же человек, яко иерей, имать власть, не возбранибося в нужду дати до сего токмо. Видится убо и по сему в вопросе о трех вещех вопрошает: 1) о благословении женитвы, 2) о крещении, 3) дати роженице молитву. В ответе же токмо о крещении в нужду попущено, — даже до сего токмо.

Кольми паче нам, простым, о сем поразсудити. Аще ли кому возмнится не возможно спастися, еже отложити вышереченная священническая действа, — помыслити подобает: како и нужнейши бы сего во отступление веры впадшим — миропомазание и молитвы очистительныя; тако же кто яст и пиет со еретики, и закона их и пения слушает, по проклятии ереси — молитвы иерейския. И за сия вся не плачем ли и воздыханием у вас от Бога милость испрошается?

Сия вкратце любви вашей предлагая, советуем отложити вышереченная действа и во инех мерах, чтобы нам смирением и любовию украшати себе же и друг друга, познавая меру своего чина. Еще же помятуя свои недостатки, у других не лютостию истязательства и находом клевет власти высотою дерзости, но помнити Глаголющаго: «научитеся от Мене, яко кроток есмь и смирен сердцем, и обрящете покой душам вашим».

3. О федосеевцах Андрея Денисова.

Господь наш Ісус Христос, Сын Божий, в святом своем Евангелии волны последних времен предрече: «и тогда соблазнятся мнози, и друг друга предадят, и возненавидят друг друга». И паки — «за умножение беззаконий изсякнет любы многих». Се, еже Спасом прореченное, не точию прежде, но и не меньше ныне видится, поелику и вящше умножившуся беззаконию, от изсякновения любви, волны на братолюбия останки благоверных волнуют. Вместо еже друг со другом совзыскаватися и сподтвержатися, ратовати и колебати неукротимо хлопочут. И вместо еже в Спасове любви христианом возгреватися друг о друге и в благоверии утвержатися, хулити и возстояти вооружают и волноватися колеблют. Еже неутешное плача ревнителем истиннаго благоверия вящше, нежели от внешних, рати предает, и жалость дому Божия снедает ны за толикую возставшую бурю от небратолюбивых мужей, дерзающих, яко словесы, тако и письмены, страждущих за имя Божие и за свидетельство Ісус Христово благоверных христиан и ни в чем не нарушающих отеческаго древняго благовернаго устава, за еретики огласити. И тако, иже в нас хранимое, истинное, несамочинное и не от нас зачатое, но древнее отеческое благочестие прелестию гаждати, дерзскими языки дерзают и дерзати научают. Тем же сим, мнящиися ревнители, коликое безместие и не пользу христианом подавают. И первое убо — раскол церковный, еже, по Златоусту: ничтоже тако раздражает Бога, якоже церкви разделятися; второе — от нравов стязания, смелостию дерзости их, укоряются уставы, иже у святых отец бывшие и от них преданные, — еже стерпимо ли будет отеческое поношение чадом церковным, и церковная ведущим; третие — колебание и мятеж христианом; четвертое — хотящим обращатися сомнение, а и внешним коликое возношение, а и своих недостатков неисправление, и непознание, но любви Спасовой заповеди попрание. И за сия вся что ино чаемо, точию Божий гнев, — како не узнаша дерзнувшие расколотворение творити сих всех, но и дерзающие хулою и ратию происходити? Еже слышавши, иже в нас сущие о имени Ісус Христове пустыннии скитяне, братски болезновавше и молящеся человеколюбцу Богу дати им смиренно чувство, еже не уповати бы во всем на ся, но и прилагати бы ухо к ближних полезному совету. Но понеже нужда хотящим меж ими и нами ведати нам показати распрения вину: се-же мы творя, даже наипаче отвещати будем, за отеческия предания, и по отцех, от детей своих обижаемым, поборающе. Сим полезная усоветовахом показанием творити, да и прочие христиане от стязаний и неведения не дерзнут наводити хулы на отеческие уставы и на тщания ревнителей истины и церковнаго примирения любителей. Вал расколу в ровенник да изрыется, и мир и общение, по апостолу, да возсияет. Тем же убо вонмите зде, о боголюбивии читатели и послушатели, еже за кои статьи от них дерзнутое расколотворение ныне, такоже и еже мы не на своих толкованиях и обычаях, но на древних отеческих и церковных готовых преданиях утвержаемся. О сем зде к разсуждению вашей любви предлагается.

Статия 1-я.

О надписании животворящаго креста, еже мы, по древнему святых отец преданию, пишем: «Царь славы, Ісус Христос, ника». Они же принуждающе писати к сему другое на досце Пилатово подписание: «Ісус назарянин, Царь Іудейский», знаменающе его четырьми писмяны: «I. Н. Ц. I.». Мы же о сем Пилатовом написании обыскание творим, — аще святии отцы писаше его на кресте? Зане елико мы обрели церковию святою свидетельствованныя древния распятия Господни,  и без воображения плоти кресты — на тех написания Пилатова не написано. А понеже никонияне оно написание на кресте пишут, и не токмо на новых нынешние иконописды, но и на старых приписывают, сего ради да не како, нам неведущим, от их будет где написано. Сих ради взыскуем утвержатися от древних, святых и благоверных царей и святейших патриархов и прочих благочестивых архиереов, надписании известно ведомыми, разум обыскания имуще сицев. Аще бо у святых обрящется то написание на крестах писано, то и писати произволившему будет тогда без сумнения отеческим, а не своим мнением подкрепляющеся. Аще ли не обрящется в древнем православии, у святых, на крестах, сего написания, дабы и нам не разгласным быти с церковию кафолическою, ведяще известно, яко Духом Святым уставы отеческие озарялися и просвещалися. Но иже с нами любопрящиеся и на нас возстающие глаголют: «почто обыскание о сем творити: святое Евангелие законополагает писати Пилатом написаную титлу на кресте; на что сего больши свидетельства»? И тако они на сем крепце утвержаются. Вонмите же внятно, возлюбленнии, сие мудрование. Аще бо  законоположило святое Евангелие Спаса Христа титлу, Пилатом написанную, на кресте писати, то еда святые отцы презрели  святое Евангельское законоположение, еже не писали тоя титлы на кресте? Их же колико и сколь великие богословцы, тако без Пилатова написания предаша кресты писати, вкратце зде их отчасти покажем. Устав, еже есть «Око Церковное», избран святыми отцы от многих Типик: Иерусалимскаго, и Святыя горы, и от Студитова, и от многих святых отец, и от вселенских святых собор, и предан святей Божией Церкви; в нем же, в чину о панагии, во главе 53-й, напечатан крест в лицах, надписание к нему: «Царь славы, Ісус Христос, ника». Вонмите зде: от вселенских святых собор и от прочих святых отец предано во всю вселенную Божией Церкви на панагии крест имети без Пилатова написания. Еда сии презрели Евангельское повеление, или не узнали его? Смеемо ли тако кому помыслити?

Еще же в книге Потребнике печатном, яже имать в себе духовнаго чина власть, рекше вся чины и последования, бываемая от иерей, яже глаголю: святыя тайны, предуставленныя от Спасителя нашего Христа и святых Его духоносных ученик и апостол и святых богоносных отец и учитель — освящения святым церквам и прочая. И в нем, в чину освящения церквам, напечатан крест, како его знаменовати на антимисех, надписание к нему: «Царь славы, Ісус Христос, ника». Тамож, на другом, водружальном кресте, тож надписание: «Царь славы, Ісус Христос, ника».

Разсудите и зде, боголюбцы: от самого Христа и от святых Его апостол и богоносных отец, во всю вселенную, всем Божиим церквам, на дву крестах, на антимисе и водружальном, надписание без Пилатовых писмен предуставлено быти. Еда и сии презрели Евангельское повеление? Смети тако помыслити или рещи кому?

В тетро-Евангелиях печатных, московских печатей, во Иоаннове Благовестии, в зачале 46-м, в начале перваго страстнаго евангелия на поле печатан крест, надписание его: «Царь Славы, Ісус Христос, ника», — без Пилатовых писмен.

На дорниках, в древнее благочестие, ими же просвиры печатали, на кресте надписание: «Царь славы, Ісус Христос, ника». В тех просвирах и Агнца закалали в тайнодействе Тела и Крови Христовы, а тожде бяху без Пилатова написания.

Древле, в благочестие, и доныне християне вси от святаго крещения на рамех у себя носят крест Христов, с благословным надписанием, по обычаю церковному, тоже не имеюще Пилатова написания.

Равноапостольный царь Константин устрои три кресты от чистыя меди, по образу, показанному на небесех от самого Христа, яко же в Пролозе, сентября в 14, написано, и нарече святыя их имена сице: «Ісус Христос побеждает».

На данном апостолом Иоанном Богословом преподобному Авраамию Ростовскому чудотворном Распятии надписание: «Ісус Христос, ника».

В Переславле-Залесском, в соборной церкви, в ризнице, крест с распятием сотворен по его подписи в лето 666 году, благоверным великим князем Георгием Владимировичем Долгоруким, а на нем на самой досце надписание: «Iсус Христос».

На Москве, в соборной Успенской церкви, на запрестольном кресте из Корсуня принесенном, на среднем кругу Распятие мусиею писано, надписание на досце «Ісус Христос».

Ту же на Евангелии, старописанном во олтаре, в часовничной лист Распятие, на нем надписание на досце: «распятие Господне», выше «Ісус Христос».

Ту же лежит крест, с Распятием, благословящий, с мощьми святых, сотворен серебром, и позлащен в лето 7155, и дан по ризе Господни; надписание на досце: «Ісус Христос», выше: «распятие Господне».

Ту же златосияющий, благословящий, крест с распятием и с мощьми святых, сотворен при царе Феодоре Ивановиче и при патриарсе Иове, повелением царицы, лета 7103; написание на досце: «Ісус Христос».

Тамо же, в крестохранительнице, драгоценный крест с Распятием, благословящий, вынизан жемчугом, в нем и часть животворящаго древа, и мощи Петра митрополита, и инех святых, сотворен при том же при царе Феодоре и патриарсе Иове, лета 7102; надписание на нем: «Ісус Христос».

В той же церкви, на ковчежце, в нем же риза Господня, крест с Распятием, на нем надписание: «Царь славы, Ісус Христос, ника».

Второй ковчежец, вящий, в нем же глаголют риза Господня из Грузин принесена; на нем на кресте надписание: «Царь славы, Ісус Христос, ника».

На Москве же, в соборной церкви Благовещенской, над Деисусом дванадесять праздников, меж ими Распятие Господне; надписание на нем: «Царь славы, Ісус Христос».

В притворе тоя церкви, у западных врат, вверху стенным письмом писан образ Распятия, на нем надписание: «распятие Господа нашего Ісус Христа».

В приказе Большой Казны стоит крест, сотворенный при царе Михаиле Феодоровиче, из сибирския меди; надписание на нем: «Царь славы, Ісус Христос, ника».

У инокописца крест списан со оного, иже сотворен с самаго животворящаго древа, на нем же Христос распялся, и пренесен к Москве при благочестивых царех; на нем надписание: «Царь славы, Ісус Христос, ника».

Вкупе рещи, по различным странам Российския державы, по градом и по монастырем, и в пресловущей обители Соловецкой у преподобных отец Засимы и Савватия и Филиппа митрополита, и прочих чудотворцев, при самех их ставленных кресты, яко же и медныя Распятия Иринарха, Ростовскаго чудотворца, и иныя древлероссийския медныя распятия и благословящие кресты: колико их множество виденные и свидетельствованы: которыя до Никонова пременения писаны и литы и кои точию от нынешних иконописцев не переписыванные, в них же во всех, яко же и в вышереченных порознь написанных, аще и различными надписании, прославляют Спаса Христа, но едино на всех, — еже без Пилатова написания, согласие.

Еще же преподобный Никон Черныя горы в книге глаголемей «Тактиконе» в слове 38-м предлагает: «Паки блюдох всюду честные кресты, надчертаемы — ов сице, ов же инако, а не в едино надписание; о сих убо аз недоумею: исках с трудом подобающее надписание, лучшее уведати, и сего ради написав, послах в соборную церковь патриархии антиохийския; они же, испытавше о сем опасно, списаша ми сице: яко лучше есть написовати святые и честные кресты «Ісус Христос, Сын Божий».

Вонмем, како и сей, толик и таков муж, иже все божественное, новое и ветхое, Писание ведый, ему же дар учительства, слова, Пречистая Богородица даде, яко же в Книге о вере на листу 197-м пишет. Еда и сей преподобный не знал в Евангелии написаннаго, что Пилат положи титлу на кресте? А ищет с трудом, како лучше творити надписание. И виждь, не дерзкое и не горделивое, не сам о себе дерзну что, но вопроси у отец в патриархии. Что же, в патриархии не ведали ли Пилатовы титлы, а не повелеша ее писати, но повелеша написати «Iсус Христос, Сын Божий».

Еще же и на распятиях у Антония Римлянина, в Великом Нове-граде, на самой досце, латинскими письмены, на едином сице изображено:

I H S
X P S ; та же и на другом:

X H S
I P S

К сему же и на Корсунских вратех, в Великом Нове-граде, на Распятии, греческия три слова написаны, яже искусне ведущие глаголют: на всех сих знаменают не Пилатово написание, а наипаче дает знати, яко не четыре слова и не те, ими же Пилатово написание знаменуется.

Паки же в Великом Нове-граде, на Волховском мосту, чудный крест сотворен, с Распятием, при благочестивом царе Иване Васильевиче и при святейшем и приснопамятном Макарие митрополите, его же во многих житиях российских чудотворцев списатели велика мужа в добродетели и в ведении божественнаго Писания и бодраго пастыря церкви Божией именуют; он же собра 12 Миней месячных Четьих, в них же книги Ветхаго Завета и толкования их списа: то и при толико славнейшем пастыре на оном чудотворном Распятии не написано Пилатово написание, но на самой досце: «Царь славы», и на прочих составех: «Ісус Христос, ника» воображено. Ту же другое Распятие, сотворено при царе Феодоре Ивановиче, на нем надписание то же: «Царь славы, Ісус Христос, ника».

Паки же в Минее августовой вышереченнаго митрополита Макария, в книге Козмы Индикоплова, крест воображен, на нем несть же Пилатова написания.

В той же Минее, на антиминсе воображен крест, надписание имеющ: «Царь славы, Ісус Христос, ника».

Но понеже не неведением покрываема мати наша церковь древняго благочестия, юже, по пророку Аввакуму, слава Спасова покрыла. Многим сущим неудобь разумеваемым речем в книгах и в подписаниих на святых вещех, или где како подписывати: тем же при благочестивых князех и царех во алфавите толкование и указание сказано. В нем же о кресте животворящем писано о подножии — чесо ради и како пишется? В нем же крест в лицах воображен, надписание его: «Царь Славы, Ісус Христос, ника». Под ним «ника» толковано сице: «ника» сказуется «победа на диавола и победитель врагом, а сам не победим ни от кого же»; и иныя речи около креста толкованы; а титлы, Пилатом писанныя, на кресте не написано. Ельма убо вси сии — в вышереченных от святых книг и от надписаний — показаннии святии апостолы, и святии соборы, и прочии богословцы, и благочестивии цари, и архиереи не писаша на честных крестах Пилатова написания?

А глаголющие, яко святое Евангелие повелело писать, придают тем, на вышереченных безчисленных святых, оглаголание, аки призревшим Евангелие Спаса Христа, и сами умудряющеся, аки свыше их, от Евангелия взяли писать; а наипаче, яко от неких толь дерзостныя износятся речи: «могли-де и древние не узнати, а святое Евангелие повелевает, — чесо ради не писати». Оле, дерзостнаго зде гласа, зазор на отец наносящаго, понеже и латини, и немцы, и никонияне на Распятиях пишут Пилатом написанную титлу. И толь тщаливи нынешние иконописцы, яко и на старых Распятиях приписывают. Еда и они лучше святых познали Евангелие Спаса Христа?

Но понеже убо во святем Евангелии от евангелистов, еже во время распятия Христова распинающие Его титлу или вину написаша, повествовано; тако же и у святых о том различная сказания; повеления же, еже впредь писати, не написано. И что ли о оном сказании тии сказующе на животворящем кресте надписание не Пилатовыми речьми, но яко же их Дух Святый просвети, тако богословию Спасу Христу на кресте изобразиша, яко же выше облак свидетельств достоверных, показахом.

Тем же и мы святая евангельская и прочих святых словеса лобызаем, прилагати же к ним свое толкование, коего повеления  там не написано, не смеем. Якоже во инех, сице и в надписании крестном, соблюдаем искушенная от толиких святых мужей в древнем благочестии и времен благоприятных: согласно с ними на кресте надписание пишем, потязания же наводити на их предание не смеем, свою немощь познавающе, ниже древних благочестивых царей и патриархов потязати дерзаем, ниже смеем умаляти от их написанное богословие на кресте, аки бы не совершенное; но точию соблюдати у их содержимая утвержаемся, слышаще и Мелетиево в 2-м послании утвержение: «Стойте, держаще отеческия предания непревратно, ни в чем же богоносных отец потязающе, но ниже Божиих людей православных потязати изволяюще».

А и принуждающие писати Пилатово написание, в других, со святых отец богословным надписанием, да покажут нам, древних, святых отец и благочестивых царей и архиереов, в печатных московеких книгах, или на Распятиях, толико свидетельствованных, яковы мы выше показахом, тако пишущих, и тако да утвержаются. Но и тогда бы не тако, с нынешним законоизглашением их; но не произвольным и мерным подобием, не наводяще стыда на отец своих.

Ныне же, от отеческих достоверных надписаний, нам не покажуще, на ны надходят, — показуют нам у белорусцев, во обоих беседах, в заставицах Распятия без верхней доски и со обвешением напечатанныя, и вопрошаеми от нас: мощно ли за истино почитати и кланятися такому кресту без верхняго состава? отвещающе они «повелеша почитати и кланятися». И сие не простии, но и навящшие учителие тако предают.

В житии же святаго Кирилла Философа, учителя словенскаго, написано: «егда его вопреки Анний патриарх: рцы ми, юноше, како кресту, разорену сущу, не кланяемся ему, не лобызаем его; а вы, аще лице до перси токмо будет, иконную ему честь творящ, не стыдитеся. Философ же отвеща: четыре бо части крест имать, и аще едина его часть убудет, то уже своего лица не являет». А они без четвертой части, верхней доски, крест совершен и поклоняем быти утвердиша и в свидетельство приводити не стыдятся.

Мы же на сих свидетельствах, разгласных со святыми, утвержатися не дерзаем: понеже есть в тех печатех и ино несогласие с московскими древними печатьми: пречистаго Владыки имя «Ісусово» в инех местех «Іисусом», и такожде «во веки веков» согласно с никонианским; и в Беседах на Деяние обливание в лицех напечатано. Зане тии печатники не под русскими благочестивыми цари и патриархи, но под польскими крали, аще и греческаго согласия держахуся, пребываху. Но Филарет, святейший патриарх, про их дает ведати, — многая в них виде несогласия церковная, в самых тех христианех, яже суть белорусцы в них нарицаются. И тако на сих свидетельствах утвержатися ненадежно. А наипаче с таковою смелостью, еже во время общаго собрания таково дерзостно изнесли законоизглашение — самый их настоятельствуяй: аще кто отныне, глаголаше, кресты честныя вообразив, подпишет к ним надписание: «Царь славы, Ісус Христос, ника», а Пилатом писанныя титлы не напишет, и то ересь, — не буди у нас с ними ни части, ни жребия, ни в сий век, ни в будущий.

Коль ужасно слышати христианским ушесам сицевы дерзостны глаголы, а наипаче известноведущим, яко святии апостоли и богоноснии отцы — о сем облак свидетельств — с тою святою богословиею без Пилатова написания писали кресты. А он отныне «ересью» назвал тако писати, и от части, и от жребия того отлучился. И ужасно убо словесное дерзнутие, ужаснейше же яко слово сие делом утвержаемо: яко и отлучаются от части и жребия благоверных христиан, иныя вины ко отлучению не имуще, точию что по древнему отеческому во всяком обычаи жити утвержаемся.

Ныне да разсудят боголюбивии, аще кому хулити или отлучатися за сие, еже пишет без Пилатова надписания: «Царь славы, Ісус Христос, ника» на кресте, — приражатися тем будет к вышепоказанных безчисленных лику богословцев и святых отцев, тако предавших святей Божией церкви.

Еще же и сие да вонмут, аще кии и зело ревнители о Пилатове написании: яко мы своих речей каких на то написание, или каковы законоизглаголанныя хулы свои, не полагаем, но утвержаемся на ясне изложенном у святых отец надписании; о оном же Пилатове, понеже у святых писано не виденном, обыскание творим, и за сие расколотворитися им, и в своей им ревности не для чего бы было, но будет им сие творити по некоей ненависти и клеветами дополняти свое расколотворение.

Статия 2-я.

После 666-го году, за святую веру страждущие, яко же в Поморье соловецкия и прочие отцы, такоже и около Нова-града страдальцы, велико опасение имеяху, чтоб тайнодействия какого от никониан не прияти. Сих ради и венчавшихся от них утверждаху в чистоте жити, и в закон онаго сопряжения не имети. Сему чину и по иным странам: около Волги елицы от них и прочих таин — крещения и рукоположения — не приемлют, — и доныне храниму. За рубежем же видался обычай: елицы в неведении веры венчалися, тех оправдати.

Исперва, аще и крещени и не в ведении посягли, оправдаша. Ныне же тех браки отвергше, стоят в некрещении за посягших, и от них крестившихся, надежду дают им, аще и чадородием живут, окроме епископскаго иерейскаго благословения. Утверждение же полагаху как Петр апостол в Риме крестил множество народа, писанное у Иосифа Волоцкаго, и паки: как Павел крестил, писанное в Кирилловой книги о новокрещенцах. Но понеже там о браце никакого объяснения несть, усоветовано с  ними о том было: до яснаго свидетельства обысковати о сих, а от обоих стран утверждати их девственным жити житием, ныне же они аки  некое объясненное свидетельство обрели, понуждают нас вышереченный брак оправдати и исповедание такое дати, якоже и они написали еже то их первое брачное совокупление законный брак нарицается и без втораго венчания в церкви имеется утвержается же мнение сие апостольским, еже к Коринфом: Павел мужу верну с неверною женою жити, аще волит, или верной жене с мужем новерным. Нам же видится сие апостольское их брака не подтверждает, понеже у них оба крестятся, а не едина часть и о их браке, еже как оба крестятся, еще же и о простых, ту ничего не написано, а наипаче яко Матфей Правильник в правиле 72-м 6-го собора в 3 составе о оном апостольском пишет: «якоже к Коринфом великий уставляет Павел, аще бо волит, рече, с неверным жити верная, или супротив паки верный с неверною, да не разлучается; освятит бо ся муж неверен о жене верней, и супротив паки; обаче зри, как и божественный апостол снисхождение творя: аще волит, рече, верная часть жити с неверною, яко же аще не волит, без сумнения — брак да разрешится, уповающе, яко начала ради бяху сия, и начаток проповедания. А еже днесь имящее, како есть мощно, иудеину или агарянину крещшуся, или крестившийся с неверовавшим? яко же и при патриарсе бысть Феодосии: прискавичар бо царский всяко патриаршим писменем распустися с женою, непокоряющеежеся мужеви, много молящуся благочестие прияти». И аще священными правилы воспрещено верному с неверной жити, почто сицевое приводити во свидетельство? да и то ко иному лицу, да еще и с такою смелостью, что и других принуждати, неосвященный от епископскаго и иерейскаго благословения брак оправдовати глаголюще: без второго венчания в церкви законный брак имеется; мы же на оправдание его не видевши яснаго свидетельства, оправдовати и надежды им жити чадородием подати не можем; а наипаче ясным церковным свидетельством без священнословия брак не приемлющим, в вышереченной правильной Матфеове книге, в составе 3, в правиле Василия Великаго 38, объявляя про прежнее и еже нам утверженное, глаголет. «Но тогда убо с пристанием единем брак стояше, в нас же не убо состоятися может кроме священнословия». И паки в Кормчей, в главе 43, лист 335: «и отселе не быти инако не именоватися законному браку и христианскаго строения достойну, аще не молитвы совокупляющихся, рекше жениха и невесту в любовь свяжут». И паки ниже, в тойже главе, лист 336: «елико же аще без священных молитв своя рабы на сочетание брака совокупляюще, не боголюбив брак составляют им, но блудническое смешение утвержают, их же бо не совокупи Бог священными молитвами призываем, тии вси сходятся на грех». И паки в той же главе, л. 336 об.: «и браки по первому неподобному даже и доныне держащемуся обычаю заматоревшуся подобает на тех священным молитвам быти». Еще в той же Кормчей — о тайне супружества, сиречь законнаго брака, в главе 58, лист 521, пишет: «изрядне же да весть иерей, яко супружества между восхищающим и восхищенною, егда сама восхищенная во власти восхищавшаго ю пребывает, такоже и потаенная и вся прочая супружества, яже не с благословением церковным, и чинным от своего си пастыря, си есть от епископа или от тоя парохии священника венчанием, при двух или триех поне свидетелей совершаемая по соборному уставлению и святых отец учению, незаконна, паче же беззаконна и ничтоже суть».

И понеже при толь крепких утвержениях святых нам невозможно пригласити их брака, не слышавши от них яснаго на него подкрепления, а наипаче без епископскаго и священническаго благословения; и во время сие простому нашему чину, не брачное, но плачевное.

Того ради против их речей и письма на беседе написано от нашей страны им сице: что с вами прежде пря была о брацех, кои люди крещены до отступления веры от священников благоверно, и после венчалися у еретиков, иже прежде от вас обычай был их оправдити, а ныне от святых правил признали  вкупе с нами и приговорили вы, яко брак их не приятен и без венчания детородием жити им невозможно, и чтобы вам, в вашем духовенстве сущим, таковым известне сказав, утвержати чистым жити житием. А котории от вас крещены, а прежде крещения венчалися от еретик, и по вашему к нам извещению, вы им, по крещении, крепце запрещаете о том, чтобы  чадородием вместе не жили и одрами муж с женою особлялися; а приглашаете им Господне слово: горе непраздным и доящим в тыя дни, и то им приричете, что духовники их — простые люди, а не священники, и очищати их вам молитвами не пристойно; и кои вашего запрещения не слушающе, рождают детей, а вы им того в грех не ставите, и молитвы тем родильницам даваете, и от того слабость велика в христианы входит, и смущение, а и на те браки, хотя бы и при священницех но в нашей с вами беседе не обрели вы нам яснаго Писания, как в вашем письме написано, что без второго венчания крещшимся вышереченным в церкви законный брак имеется. И о сем молим вашу любовь, чтоб вышереченная слабость крепчайшею цельбою вам исцелити.

Статия 3-я.

Но убо во время сие многоскорбное, гонительное, странствующим християном случается по нужде купити брашна на торжище. Они же за сие велико осуждение наводят в словесех и писмами, — беззаконное и нечистое сквернение именуют, и брашно то скверно и нечисто, и мотылами, и гноем нарицают, и ядущих сия и особь неприобщенных, мотылоядцами вменяют. И тако обхуливши, и сами не минуют его, но покупают и ядят.

На те же торжищная брашна молитву из Потребника говорят, которая не к тем брашном торжищным написана, да еще и поповская, а торжищным брашном никакой молитвы говорить не указано.

Да в письме их, что в нашу страну настоятельствуяй их привезе, написано: «за торжищная брашна 2 лете епитимии», противно святым правилом.

И яже кто к покупанию на торжищах брашна приведет во свидетельство апостольское речение: «все, еже на торжищи продаваемое, ядите, ничто же разсуждающе за совесть», — они же, в вышереченном письме, за сие к тем, тако глаголюще, хульствуют: «со иже вместе с неверными ядущими, едино нечестие вводите». И паки: «апостольское слово взем, яко волцы агньцу к себе поревая, рвете». И они убо такою дерзостию о сем происходят. Мы же ужасаемся их толикия дерзости, понеже и святии оно апостольское слово предлагают сице. От Бесед Апостольских к коринфом, лист 25: Апостол: «все, еже на торжищи продаемое, ядите. ничтоже сумнящеся за совесть». Златоустый же в той же беседе тако глаголет: «Аще бо не ведый, рече, яси, не подлежиши мучению; неведения бо прочее вещь, не гортанобесия, и не сего точию свобождает и подвизания, но и другаго, многу отраду и свободу им уготовляя, ниже бо разсуждати оставляет, сиречь истязовати и вопрошати: аще идоложертвенное есть, или не таково, но просто ясти все, еже из торжища. Ниже то навыцати, еже что есть предложенное, тако, яко есть мощно, и ядуще неведущему, свободитеся. Такова бо суть, яже не естеством злая, но от помысла творящая нечистое. Сего ради, рече, ничтоже сумнящеся: Господня бо есть земля и исполнение ея, а не бесовска, аще ли земля и плодове и безсловесна суть, Егова вся, несть ничто же нечисто: но инако нечисто бывает — от помысла и преслушания».

Преподобный Никон в Велицей книзе, в слове 62-м, в начале его, воображает: «о снеди подобающей, иже в мире живущим, и как достоит питатися християном?» И пониже, во оном слове, апостольское оно к коринфом предлагает: «Все, еже в разумнице продаемое, ядите, ничтоже потязающеся». К нему же и вышереченное Златоустово сказание написует.

Святый же Георгий в книзе Криницы, царства 44, Иулиана преступника: «Иулиан же скверный, обаче яве не стыдяся, на правоверствие вооружашеся, и первое бо сущим во граде внутрь и вне уду истоки жертвами скверными оскверняше, яко же приимет воду, уполучит и ненависть. Послежде же на торгу продаемая оскверняше: обливаше бо и хлебы, и мяса, и овощь, и зелие, и прочая. Елико над сими убо видящие християны стонаху и плакаху, обываемых приимаху ядь, апостольску же закону последствующе глаголющему: всяко продаемое на торгу ядите, ничим же испытающе за совесть».

И тако святии апостольское оно слово к покупанию на торжищах брашен предлагаху.

А они за сие глаголют, яко нечестие вводите, апостольское слово, яко волцы, агньцу к себе поревая, рвете. Пощади Господи, на кого будет сицевая нелепая хула!

И где бы о таком их вышемерии самем им поцелитися советом от божественных Писаний, они же и нас привлачают, глаголюще: «яко же у нас, тако и вам единако о том имети».

Мы же, видяще в божественном Писании — мнози святии и древнии христиане у неверных брашна, в случае на ядение, и покупали и приимали: боимся тако хулити, да не обрящемся святых хульники. Сего ради на беседе вкратце им тако от нашея страны написано: «Да что в ваших письмах и о простых брашнах, от неверных покупаемых, привожено неведомо из какого Епитимейника: аще кто вкусит что снедно жидовско, или болгарско, или сарацинско, а не ведая, поста осмь дней, а поклонов — как ему отец укажет, аще ли ведая, то два лета», — и сей ваш привод противен священным правилам. Понеже в Номоканоне печатном, в правиле 133-м, пишет: «аще кто пойдет на праздник варварский, или еретический, и снест в той день с ними от них жремая за душу их или спразднует им, лета два да не причастится, по седьмому правилу, иже во Анкире святаго собора», и у святых: убо кто жремая от неверных брашная снест, два лета епитимии; у вас и простыя их брашна подобны жремым поставлени суть: молим вас отложити вышемерное то мудрование, да не досада будет и апостольскому, еже на торжищах купити, повелению, разньствовати же о идоложертванных повелевшу. Тако же и древним християном, иже во время Иулиана отступника царя, на торжищах покупали брашна. Такоже и Антонию Великому,  и Савве Освященному, и Макарию Желтоводскому, иже от неверных приносимая брашна: хлеб, и сыр, и мед, и прочая приимали. Подобне же и у самех вас и у прочих християн, по нужде брашна, у неверных покупая, ядутся. Да вышереченным мудрованием хуление скверноядства, и против жремых осуждение, да не наведется. А еже с неверными не ясти и брашна их, кроме нужды, не покупати, и сосуды особь от них имети, и у нас сие благодатию Христовою соблюдается».

И понеже у их из коего Епитимейника привожено о брашнах, в нем и иная безместная лжа обрелася, — и на речах им было предложено о сем. Они же не точию ухо приложиша слышати, но и сопротив досаждаху нам. Того ради им на письме, под ту же третью статью, написано им тогда сице: «Иже от вас прочитаемый Епитимейник, в нем же лгано о пятом вселенском соборе, яко бы был на нем Ориген еретик и у Евсевия Самосатскаго вырвал из рук письмо; а святое  Писание повествует: Ориген бе за мною лет до перваго вселенскаго собора, о чесом летописцы свидетельствуют; и от жития Златаустнаго познати мощно; а Евсевий бяше между первым и вторым собором при Мелетие, патриарсе Антиохийстем, и есть сия явственная ложь о пятом вселенском соборе, от некоего лжесловца оболгано. И в том же Епитимейнике написано правило, не вем откуду, иже Феодосий нам, на беседе будучи, прочитал; разум же правила таков: диак, живый с женою без венчания, и аще венчается — и по венчании презвитером да поставится. В Номоканоне ж печатном, правило 179, возбраняет священство таковому, аще кто преже венчания растлит обручницу свою. И  сие правило в Епитимейнике противно божественным правилом святых отец. Но и иное кое-что, не ведомо с коих книг, в ней писано. И в беседе будучи,  предлагали вам познати о ней сие несогласие; вы же и сие тщалися оправдати любопрением. Молим вас отложити вам таковое мудрование, еже ложное вышереченное оправдати, и по неизвестней книге управляти людей. Но, сосвидетельствуя ю со святыми правилы, из коих книг, или от коих святых в ней правила писаны и свидетельствованное прочитати, а ложное отложити».

Статия 4-я.

За одеяние иночества в християнстве было беседовано им от Писания на беседе, а по беседе против их письма написано им сице: «На беседе будучи, предлагали вы нам совет, что повелеть, отлагая иноческий образ, бельцами ходити тем, кои с обещанием к Богу, кроме молитв облекшеся в православии во иноческий образ, а наипаче тем, кои прежде были еретические постриженики, и по проклятии тоя ереси и по отложении еретическаго пострижения, облеклися со обещанием к Богу во иноческий образ; а ныне в писме пишете, яко у нас прияты еретические постриженники. А у нас явственно возвещено вам, что Гаврилов отец, отложа еретическое пострижение и потом, со обещанием к Богу, облекся в християнстве во иноческое одеяние. А егда мы в Русе, в прошлой године, виделися с тобою, Феодосием, тогда ты Гавриле Евтихиеву, — сам он свидетельствует, — по его молению, обещался его отца вышереченнаго в братство прияти и, отложа от еретик постриженный образ, самому ему на себя наложив иноческий образ, жити по Бозе иночески. А ныне, аки забыв то свое слово, у нас тем образом, в християнех, облекшуся ему, обещаяся Богу во иноческий образ, повелеваете бельцами ходити, яко бы тем образом еретическое пострижение приемлется, кое от нас отлагается. Но и в божественном Писании обретается [на поле: Патерик Египетский, глава 10, житие Аполинарии]: кои древле, кроме священных молитв во иноческая облекшеся, спаслися. Да и в Правильной священноинока Матфея книге, от состава 40, главы 15: иже кроме молитв иноческим одеянием облекающихся, аще ли же кто и троелетие внутрь кроме молитв одеянием облечется, велико подымет осуждение, аще совлещися сего восхощет, яко ругаяся явственне ненаругаемым, и неволею бо в сие одеятися понужден будет. И сему божественному Писанию внимающе, мы не смеем тем, иже и кроме молитв, иноческим одеянием со обещанием к Богу облеклися во благочестивой вере, повелети совлещися и поругатися ненаругаемому иноческому одеянию».

Статия 5-я.

Постриженных от не священников иноков приимали прежде, и ныне приимают. Точию ныне вново отставливают: от всякаго духовнаго дела, и не начинати им пения, но бельцем та вся творити. Против сего им отвещано вкратце сице: «да от инок, не священников сущих, постриженых прежде с вами, Феодосием, согласие было от божественных Писаний: тех иноков в согласие к себе от нас, — еже они крестили и исповедали и хлебец Богородичен выимали, и начинати им в службе, — вы приимали, и явствене со мною беседующе, сих согласие исповедывали. Ныне же тех иноков от духовных дел отставити повелеваете; бельцам же, нам, при их службу молитвенную начинати присуждаете. Оставя братскую прежнюю, по Божественному Писанию, любовь, аки распрю любя, вново уставляете, не обретши на сие от Писаний запрещения. Точию глаголете: «понеже в прежния времена, аще где смотрительныя вещи обретаются, еже случилося быти постриженым и от простых иноков», и пониже пишете: «и смотритетельных случаев во обдержный устав кому приимати такоже от божественнаго Писания  возбраняется». И ваши убо глаголы о иноцех сице. Мы же зело чудимся вашему мудрованию, яко и святая церковь постриженных от иноков, не священников, издревле приимала, когда и священноиноки были; яко же в житиях святых свидетельствуют: преподобный Антоний Великий постриже Павла препростаго; и преподобный Паламон постриже преподобнаго Пахомия Великаго, иже послежде начальник бысть многим монастырем; и преподобный Засима Соловецкий постриже Марка во иноки, и инии мнози подобни тем; и преподобный Антоний Печерский приходящих ко иноческому житию приимаше и постризаше, яко же в житии его пишет; но и в поучении святаго к братиям, иже к ним глаголаше: «се Бог совокупи вас, братие, и от благословения есте Святыя горы, им же игумен постриже мя, аз же вас постригох». И в послании Симона, епископа Владимирскаго, к Поликарпу, черноризцу Печерскому, сице пишет: «Илариона митрополита, и сам чел еси в житии святаго Антония, яко от того пострижен бысть, и тако священства сподоблен». А вы ныне в такую нужду и то, за смотрительные случаи, отставливаете, а у самех вас, егда мужа и жену крестите простые, а не священники, и егда они приживут детища, вы же, простые, и молитвами священническими очищати не сумляетеся, еже в божественном Писании такова смотрительнаго случая не видится. Обаче свое дело дерзостно, и в Писании не обретше, оправдаете, а иночество, аще и в Божественном Писании есть, отставляете. Но мы не смеем возноситися над иноческий образ, православным им сущим, и, отказав им безвинно, начинати нам, бельцем, пение или в трапезе не дерзаем. Понеже и у Никона преподобнаго, в книзе Велицей, в 16 слове, написано. «Вопрос: христолюбец, некий мирянин, вопроси: аще понуждают мя отцы, к ним же прихожду, благословити предлежащия брашна, послушаю ли их, или ни? Ответ: не послушай, глаголя: ниже причетник есмь, ниже образ иноческий нося, но человек есмь мирянин, и грешен, и паче меры моея есть, но простите мя, Господа ради. А еже нам вышереченным дерзати пред иноки и понуждати облеченных в православии и хотящих иночествовати — иночеству поругатися и снимати, боимся и трепещем сея дерзости творити, чтоб не подпасть под святых отец клятвы, яже святая церковь проклинает всех иконоборцев, и покаяния образа плачевнаго — иноческаго чина попрателей и разорителей. Но и вашей любви советуем отложити о иноческом образе христианском вышевоспомяновенное ваше мудрование; но яко же прежде с нами было выше о иноках исповедание; держите и впредь то примирение».

Статия 6-я.

Понеже нечего им к расколу вины на нас обрести; о всенощном славословии, — о чем прежде в согласии было и на беседе о сем ничего не говорили, — по беседе же на письме о том зазирают, не смотря себе, о чем им отвещано тогда сице: «О всенощном бдении, егда первое с тобою, Феодосием, свиделися в Старой Русе, тогда утвердили согласие, еже быти всенощному бдению, и в деревне негде и с тобою вместе отпели всенощное, и после того с вами согласно о сем и доселе было. Ныне же, аки раздор любя, повелеваеши таковое славословие Божие отставити, не приведши на то от божественнаго Писания никакого запрещения, точию глаголя, что «без всенощных хлебов не возможно». А по Типику Соловецких чудотворцев, в монастыре их, во храме у Димитрия великомученика, на праздник его, и без всенощных хлебов всенощное бдение исполняли. Да и у самаго тебя, Феодосия, без священников не малыя службы: молебны и панихиды, и с молитвами иерейскими, и на вечерни лития, и на Пасху со кресты хождение, и отпевание мертвым с молитвами иерейскими и разрешательными служите, и, как во Уставе писано, у игуменов прощение приимали и благословение — сие у тебя во обители братии подаваеши без сумнения. Точию едино всенощное славословие тебе ныне не полюбилося, кое, кроме иерейскаго действа, у нас точию вкупе вечерня со утренею поется вместе. А во Уставе, во главе 7, о бдниих всенощных, бывающих воскресных, и во Владычных праздницех, на кийждо месяц бдения, пишет: «вкупе же и со инеми бывают всего лета бдений 68, их же не подобает никакоже оставляти, и прочая. И паки пониже: «Есть и ино бдение к сим — святому, ему же есть храм во обители, еже должно есть бывати, и никакоже оставляти в память его». В том же уставе, во главе 54 и 58, и в житии преподобнаго Пахомия Великаго и Саввы Освященнаго и в книге преподобнаго Никона, глаголемей «Тактикон», в слове 36-м, дает знати, яко бывают монастыри без священников. Сих ради советуем вам и о сем отложити сопрение и держати, по прежнему у вас с нами о бдении всенощном безразгласное примерение».

По сих, тогда же написано им к познанию самех себя сице, надеющеся, по Соломону: «дай премудру вину, и премудрее будет».

«Будучи ныне, в Старой Русе, Стефан Рушанин показал писание тобою, Феодосием, посланное твоим детем духовным, Ивану и Андрею, яко они чрез твой отказ крестят и исповедуют. И на конце ты им написал: «понеже по святым правилом крещении от вас не крещени, и исповедании ниже вяжутся, ниже разрешаются. И тако, в том написании, запрещаеши свыше архиерейской власти великою дерзостию, понеже по священным правилом, чрез архиерейский заказ подцерковницы где крестят, и от подцерковника крещение кающихся приятно. А у тебя чрез твой, простаго человека, отказ християнин, аще крестит кого, крещение не приятно. И по той грамотке твоей ученицы твои, Семен Григорьев с прочими, не приемлют от христианина крещенаго. И тое превеликое, неопасное, превозношение, возносящееся над священными правилы и вземлющееся вязати и решити выше архиерейскаго святительства ныне познавше, мы видим и иная не в чин вашего простаго чина творимая от вас, о чем и прежде тихостию советовахом вам отложити сия:

1. Раждающим женам даваете священническия молитвы.
2. Молитвы на исповеди прощательныя и разрешательныя.
3. Молитвы на исход души и над преставльшимся.
4. На понахидах и на погребении молитва: «Боже духовом».
5. Молитвы разрешительныя на погребении, глаголемыя властию иерейскою.
6. Мертвым в руки прощальная молитва, даваемая властию иерейскою.
7. Кладезем без воды освященной молитвы говорят.
8. Оскверншимся брашном молитва.
9. Молитва сосудом оскверненным.
10. На торжищах продаемым брашнам — молитву которую говорят? Понеже в Потребниках торжищным брашном молитвы не поставлено видится.
11. В посты духовным детем молитвы поповския говорят.
12. Соли, и меду, и соту, и на иныя потребы молитвы иерейския глаголют.
13. И в баню ходящим — молитву какую дают? понеже в Потребниках печатных баням молитвы говорить не поставлено.

Да еще и сие различие признавается в вас: грамотные люди и простые и иные, за молитвы, по вашему велению, поклоны полагают, а кои сподоблены духовнаго дела, тии вышереченныя молитвы иерейския на нужныя людем потребы говорят. И тем у вас, при простых людях, духовные аки бы священническую власть имеют, от некоего им данную показуются, — видится, и по вашему чину, не прилично вам иерейския молитвы говорить, но, по обычности простых человек, поклонами молитися. А наипаче яко в божественном Писании нигде сими молитвами простым человеком освящати прочих человек, или разрешати, или в руки давати прощальная повеления, или случая такова когда бывша, не написано. А и во святом крещения молитвы иерейския от простых человек не глаголются, но и «Боже духовом» — молитва иерейская, на каноне за единоумершаго, говорить отказана, и в Номоканоне «О духовницех» пишет: «Вопрос. Подобает ли священноиноку благословити женитву, или отроча крестити, или дати рожанце молитву? Ответ: Священноиноку убо, аще и духовник есть, не подобает благословити женитву, крестити же человека, яко иерей, имать власть, не возбранибося в нужу даже до сего токмо». Видится убо, и по сему, в вопросе о трех вещех вопрошает: 1. О благословении женитвы, 2. О крещении. 3. Дати роженице молитва. В ответе же токмо о крещении, в нужду, попущено, даже до сего токмо. Кольми паче нам бы, простым, о сем поразсудити. Аще ли кому возмнится невозможно спастися, еже отложити вышереченная священническая действа: помыслити подобает, како и нужнейше бы сего во отступление веры впадшим — миропомазание и молитвы очистительныя, такоже кто яст и пиет с еретики, и закона их, и пения слушают, по проклятии ереси, молитвы иерейския. И за сия вся не плачем ли и воздыханием у вас от Бога милость испрошается? Сия вся вкратце любви вашей предлагая, советуем отложити вышереченная действа и во инех мерах, чтоб нам смирением и любовию украшати себе же и друг друга, познавая меру своего чина; еще и памятуя свои недостатки, о других не лютостию истязательства и находом клевет власти высотою дерзати, но помнити глаголющаго: «научитеся от Мене, яко кроток есмь и смирен сердцем, и обрящете покой душам вашим»».

Ельма убо солга надежда наша, вместо еже бы им познати себе и исправитися, приложиша к прежним шести статьям, ответу не написав за ся, возражати древния отеческие обычаи, у нас не самочинием коим, но от отец древних приятые, наипаче Соловецкия святыя обители, коему уставу во всем последуем, помняще и во Евангелии недельном и в неделю о православии глаголанная: вся церковная предания, писанная и неписанная, узакононная предания нам непреложно сохраняюще. Тем же, и противу их стязания, за отеческия чины вкратце зде отвещаваем.

О приходных и отходных поклонех.

Различные обычаи у святых отец бяху о сих поклонех. В Полууставе печатном, 4 поклона положено. Во Уставе же, при патриарсе Гермогене печатном, 4-же поклона. В «Старчествах» до «Достойно» 4 поклона велено, а по «Достойне» 2 поклона. В «Сыне Церковном» иным подобием. Во Иосифовских печатех 7 поклонов. Во Уставе Царь-Михайловском, при Иоасафе патриарсе, и в Триодех постных Иосифовских 8 поклонов, с целованием икон, положено. В Соловецкой и прочих древле обителех в России 8 поклонов без целования покладаху. От них же и у нас той чин содержится. В сих отеческих обычаех не подобало бы стязания заводити, да людьми колебати, да еще таким словущим учителем. А егда в пояс бывают отходные поклоны, тогда, отходя от церкви, 2 поклона в пояс, а 3 в землю. Тако в Соловецкой и прочих обителех бяше обычай. Но и во «Отечнике», собранном священноиноком Дорофеем, тако два поклона в пояс, а 3-й в землю, егда поклоны бывают, повелевает. Тако и у нас лепотной отеческой чин соблюдается, и всуе и туне сие порицати кто дерзает.

О замолитвовании.

В начале всякой службы, вместо еже «За молитв святых отец наших», молитва у нас, старец, от соловецких старцов по обычаю обители их, глаголет: «За молитв Пречистыя Ти Матере и всех святых», и молитва. Они же и сие замолитвование порицают, глаголющ: «то не по уставу святых отец». А и во всех Псалтырех печатных, в начале вечерни, положено зачинать тако: «За молитв Пречистыя Ти Матере и всех святых», точию ту молитва другая присовокуплена. А яко в Соловецкой обители начинали, тако и в Отечнике древнем написано: «За молитв Пречистыя Ти Матере и всех Святых, Господи Iсусе Христе, Сыне Божий, помилуй нас». А в «Сыне Церковном»: «За молитв Пречистыя Ти Матере и Святых Отец наших, Господи Ісусе Христе, Сыне Божий, помилуй нас» — написано. И тако сей зазор — на древних будет.

О поклонех в начале полунощницы.

Наедине в келии велено, выговоривши: «Слава Тебе, Боже наш», постояти мало, дондеже утишатся вся чувства, и потом 3 поклона до земли положити. И не точию в простые дни, но и в неделю такоже, яко же в полудестевом, при Иоасафе патриарсе, Каноннице ясно напечатано. Они же сами по единственному келейному чину не исправились. 1-е: выговоривши: «Слава Тебе, Боже наш», не постоят мало, дондеже утишатся вся чувства; 2-е: в субботу и в неделю те поклоны не по тому единственному уставу в землю, но в пояс полагают. А древний порицают соборной обычай, — не точию в Соловецкой обители древле, но и у всех благоверных россиян содержимой, кой и мы обычай имеюще, с прочими церковными поклонами в едино полагаем. И яко же соборной обычай церковь содержала о первых поклонех на полунощнице, тако дает в Уставе большом печатном, знати повелевает: аще прилучится Трех Святителей в среду или в пяток Сырныя недели (лист 452) полунощницу же поем, по обычаю, без поклонов, точию по «Честнейшу» творим 4 поклоны великих; такоже в Четыредесятнице в понедельник 1-я недели поста (на листу 938): и собравшеся в церковь, поем полунощницу без поклонов, токмо по «Иже на всяко время» в конец, 4 поклоны великия. На листу же 980, в четверток 5-я недели поста написано: «полунощницу же поем без поклонов в келиях, а приходные и отходные поклоны тогда земные». И тако, по Уставу Святых Отец, те первые поклоны в соборном пении особь от прочих церковных поклонов, в землю не велено покладать. Тем же, зазирати сему святых отец чину неприлично, всюду повсемственно державшемуся [А дерзающе хулити сей святых отец чин да внимают чииму чину вопреки ударяюще, дерзают].

О начале часов, молебна и панихиды.

Мы в начале часов «Царю небесный» глаголем; а панахида, егда по вечерни бывает, «Святый Боже» говорим; такожде и на молебне. Но токмо — егда молебен часы предваряет, тогда в Типице или Обиходнице преподобных отец Засимы и Савватия велено на молебне в начале «Царю небесный», а по молебне на Часех «Святый Боже». Тако благолепное чина у преподобных отец, яко же и во уставе, после полунощницы, на утрени велено в начале «Святый Боже»; а егда утреня кроме полунощницы начинается: «Царю небесный» глаголати. Убо преподобных Отец церковные обычаи содержати благолепно есть, по реченному от Христа ко святым апостолом: «слушаяй вас, Мене слушает».

О первом часе, егда кроме утрени бывает.

Еже у нас трудные братия от утрени после экзапсалмов отходят, отъити им на отхожие нужные труды, и в трапезе при онех трудниках говорят Часы: в начале первый Час, понеже не пет у них и к первому Часу начинают «Царю небесный», к последующим же Часом «приидите поклонимся», сему чину согласуют. Егда 1-й Час, особь от утрени, вместе с прочиши поется, — в навечерии Рождества Христова и Крещения, — тогда велено в Трефолоях и в Минеях в начале к первому Часу «Царю Небесный», к прочим же Часом «Приидете поклонимся» глаголати. А зазирающие нам да покажут поне едино Писание, егда без утрени 1-й Час говорится, како его начинати велено, и тогда тако да зазирают. Ныне же да устыдятся священнаго Евангелия, глаголющаго: «Оцежающие комары, вельбуды же пожирающе».

О имени Иоаннове.

Имя сие в древних печатех московских, и до патриархов, при митрополитех, и патриарсех при Иове, Гермогене, при Филарете, и Иоасафе, и во инех и при Иосифе, и меж патриаршествы, печатано под титлою сице: Иоанн, над о, или ω, или Õ титлу полагаху; а где без титлы, ту складом «Иван» печатаху. Во Уставе, ноября в 13 день, напечатано «Иванна Златоустаго», лист 258. Устав напечатан при Иоасафе патриарсе. Во Уставе, печатанном при царе Василие Ивановиче Шуйском и при патриарсе Гермогене в лето 7118 «Иванна Возлюбленнаго» лист 153, «Иванна Златоустаго» лист 132; а в предисловии того Устава, во многих местах, печатано «царя Василия Ивановича». В Потребнике иноческом, во многих местех, складом печатано: «Иван»,  на листу 214  во двух местех и на листу 219 на обороте; и на листу 223 на обороте же; и 234-м Златоуста; и на листех 235-м и 237-м. В Прологу печатном, Иоасафа патриарха, октября в 14 день, лист 189, и в 21 день, лист 225 и 226; и в 22 день, лист 233; и февраля во 12 день, лист 817. В книзе Кирилла Иеросалимскаго «Иван», лист 230. В книге Святцах печатаных, в полдесть с летописью, выданных из печати при царе Алексее и при патриарсе Иосифе в лето 7155, во многих местех «Иванна»: лист 116, декабря в 23; и октября в 5 день, лист 39; и октября в 14 день, лист 46; и февраля в 12 день, лист 166; и апреля в 30 день, лист 223, и лист 261, и 265 и 290. В Прологу Иосифа патриарха, печатном, сентябрской половине: октября в 14 день, лист 199, в дву местах; того же месяца в 21 день, лист 233, в трех местах; того же месяца в 22 день, лист 241; декабря в 21 день, лист 558; февраля в 12 день, на обороте лист 802. В Прологу Иосифовском, мартовской половине, маия в 15 день, на листу 389-м, в дву местах, и на листу 391-м. В Многосложном Свитке печатном, в полдесть, Иосифовском, в Зиновьеве слове, на листу 143, в дву местех «Иванна Богослова». В книге печатной в десть, в житии Сергиеве Радонежскаго, изданной при царе Алексие Михайловиче в лето 7155, во второе лето царства его, в 5-е лето патриарха Иосифа, и в той книге, во многих местах, печатано: «Иванн»: Лист 22, и 27, и 121, и 122, 124, и 127, и 143, и 156, и 158.

А которыя книги печатаны при царе Феодоре Ивановиче — Триоди и Октай, и в тех книгах назади, в летописи, напечатано сице складом: «при царе Феодоре Ивановиче». А яко же в прочитаниих древние отцы по обителем Соловецкой и в прочих Российских церквах свидетельствоваху — «Иванном» глаголаху. Тако сей древний церковной обычай и инеми свидетельствы подтвержается: в «певчих» во всех древних «книгах», в величаниих Богослова, и Предтечу, и Златоустаго, и прочих святых того имени, «Иваном» величаху; тако же и на праздники их, и прочих святых, их же имя «Иванн», во стихерах и славниках «Иванном» пели. И на иконах древних, где без титлы, на местех «Иванном» воображаху, яко же и на чудотворном Распятии, от Иванна Богослова данном Авраамию Ростовскому, воображено древними писмены Богослова имя «Иванн». Тако царския имена «Иванном именоваху: царя «Иванна Васильевича» в Стоглаве и летописных и в печатных в то время, на задней летописи, яко же и сына его «Феодора Иванновича». В Триодех и Октаех печатных, назади, в Минеи Четьи Макария митрополита, августовой, близ задней дски, речь жидовскаго языка преложена на русскую речь, неразумное на разум, иже во Евангелии, и во Апостоле, и во Псалтыри, и в Паремьи, и в прочих книгах: во оном преложении написано «Иван русски — благодать». Убо яко же бяше в России древний церковной обычай, тако, по обычаю Соловецкия обители, и глаголем: и не подобало бы им, для сего древняго отеческаго именования, тако страшитися, яко же у их в писме написано, вящше же и инех их на нас мнение сие устрашающее. Ельма же во Иоасафских последних и в Острожских печатех Иоанново имя без титлы «Иоанн» печатано не зазираем мы, аще кто Иоанном прочитает.

О кажении.

В «Сыне Церковном» не велено тако, яко они горе руце простирают, но стоящим, по Уставу, согбены руце к персем имущим, повелевает, егда священник или диакон кадит, руце распростерти, сиречь согбенныя к персем распростерти, а не горе подымати, яко же они творят. Тако бо древле не во время кажения, но, по печатем Филаретовским и Иоасафовским, во время святаго крещения горе простирали руце, егда отрицаются диавола, и прочая его — убо древле пред священническим и диаконским кажением рук горе не простирали. А они, неведомо по какому уставу, пред простых кажением руце горе простирают, да еще зазирают, еже у нас, по обычаю благоговейных прежде нас отец, кажением животворящий крест благоухания сподобляют; а и носяй его не не сподобляется же благовония фимиама. Аще ли хотят нас о сем воспретити, да покажут вам от Писания: како чин простых кажения предлежит, и тогда от отеческаго обычая нас да отводят; а не видевши о сем от Писания, нам надежнее послушати премудраго Сираха, глаголюща: «не отступай от заповедей старец, ибо тии навыкоша от отец своих».

И сия убо, с Богом помощником, против их стязания возответствовахом по разуму древних отеческих обычаев, показуем отныне самех их, разглашающихся с древними церковными чины.

1. В поясных поклонех на «Царю небесный» чрез древний чин полагаемый от них поклон: яве бо в Часословах напечатано на «Святый Боже» точию по 3 поклона. А что они мнятся великопостными уставы подтвержати сей поклон, то будет им и прочие поклоны по великопостному полагати: на   «Часех», на  Богородичных «что Тя наречем» и «Богородице, Ты еси лоза истинная», и на прочих по 3 поклона. А  понеже разнятся постные поклоны с поясными, всуе они извет сими творят, а ясно в Часослове и Служебнице Иосифа патриарха, на малей вечерни в неделю, напечатано древний церковной обычай: еже точию на «святый Боже» по 3 поклона, а на «Царю небесный» несть поклона, — пренебрегают.
2. В Часослове же напечатано на «Сподоби Господи в вечер сей», в начале, по 3 поклона полагати; они же в то время стоят, а полагают на «Благословен еси, Господи, научи нас оправданием Твоим».
3. На Полунощницах воскресных полагали они поклон на «Достойне»: а велено той поклон полагати проговоря «Отче Вседержителю», егда рекут «помилуй и спаси поклоняющихся Ти».
4. Во время поясных церковных поклонов, егда веленныя в землю бывают: на Часех, и на Полунощницах, и на ужине на «Честнейшую», поклон в землю полагают, чрез древний церковный обычай. А яко же древле в православии сей поклон не с келейными, но с церковными прочими  равно полагаху, показует Устав: егда прилучится Трех Святителей и попраздньство Сретения в среду и пяток Сырныя недели, такоже Предтечи и иных полиелеосных святых в Пост Великий, тогда приходные и отходные поклоны земные. Повечерницу же Большую велено пети без поклонов, а на ней трижды «Честнейшую» глаголется, токмо на последнем «Честнейшую» по 4 поклона оцыстники [очистники], тии бо в пост и на Господские праздники не оставляются, а на дву «Честнейшую» на тех Повечерницах поклонов, подобне прочим церковным, полагати не указано. Подобне и к четвертку великаго канона: Повечерницу малую и Полунощницу велено пети без поклонов, а на «Честнейшую» тогда поклонов полагати не указано, а келейные поклоны тогда вси земные. А что они утвержаются, еже на 9-й песни на «Честнейшую» поклоны земные полагают, и по сему бы им и объясненнее мощно знати древний обычай, понеже на Часех, и на Полунощнице, и на Повечернице, во Уставе не повелевает полагати поклонов. А егда на утрени на 9-й песне с песнию Пресвятыя Богородицы, тогда особый чин об них ясно Устав выносит: земные поклоны полагати, а в древле Соловецком Обиходнице письменном тогда по «Иже на всяко время» поклон в пояс полагати велит. И тако по сему не подобало бы древняго чина презирати.
5. А не точию на ужине на «Честнейшую» поклона земнаго у прежних благочестивых отец не было, но и на обеде на «Достойне» в пояс поклон полагаху, яко же во Обиходнице древле писанном Сергиева и Кириллова монастырей: велено всегда к «Достойну» земной поклон, точию за трапезою поклон в пояс полагати. Такоже и по Обиходнику Соловецких чудотворец дает знати, — повелевает по обеде и по ужине: егда речет келарь «За молитв», игумен ударит в кандию и братия вся возстанут, и стоят на своих местех, где кто сидел, и тако глаголют, по Уставу, на ужине и на обеде. И яве по сему, не земные поклоны полагаху, их же невозможно не выходя из-за стола полагати, но поясные, яже тако древний благочестивый обычай был.
6. А понеже вышереченные поклоны, во святых обителех в пояс бывшие, они, в землю полагающе, мнятся тем ревнители быти, еже бы и не прилично чрез святых обычай тако: на отпусте Часов и Вечерни, на «Слава и ныне», и «Святей Троице» по 3 поклона земные, в непразднственные дни, древле в благочестии полагаемые, презирают, — в пояс их полагают. А яко же бяше древлецерковный обычай, тако и во Псалтырях Иосифовских полудестевых, в них же о поклонех церковных, писанных на литоргии, на отпусте, сии поклоны до земли полагати велено, да и во Обиходнице Соловецких чудотворцев, на утрени Великия субботы, велено на отпусте поклоны земные, и по сем целование на первом Часе. Такоже и на Часех, на отпусте, написаны поклоны земные.
7. По Заутрени, егда первый Час глаголати, начинают «за Молитв святых отец наших», — чего ни в коих древних Уставех говорить не написано.
8. На многолетне, на конце, вместо еже по древним старопечатным книгам: «Вся христианы, Господи, спаси»: они же равно с никониянским прилогом, прилагают, глаголюще «Вся православные хрйстияны».

Ельма убо о сих их вышереченных недостатцех надеялися мы им тако исправитися, яко же и во инех, прежде бывших, братолюбием поцелишася, сице им с кротостию, по временем, братски по малу предлагахом. Ныне же они, не точию своего, от них зачатаго обычая держащеся, древняго отеческаго не приемлют, но и самые древние чины у нас, не от себе зачатые, но от древних благочестивых отец истиннаго благочестия, паче же от Соловецкия обители приятые, яко же выше показахом, возражают. И, толь дерзостно расколотворение учинивше, еже и последи в письмах, всюду от них разсылаемых, увы, прелестию гаждают и равно с никонияны отлучают, и кто бы их послушал, всем тако заповедают.

И понеже мы во всех, от них зазираемых, статиях, видяще свою неповинность, церковнаго же предания держашеся, надежно во отеческих законех пребываем, противу их неправеднаго отлучения, и неблагословения, и наводимыя клятвы, во ответ, от собрания святаго Иосифа Володскаго предлагаем.

От жития святаго Симеона, иже на Дивней горе: «Презвитер некий, завистию побежден бысть, проклял: и абие видев множество бесов, пришедших к нему, и связавше его опако рукама, яко немощи ему оттоле и святаго Евангелия прочитати». Виждь, яко аще кто не достойне проклянет или свяжет, себе проклянет и свяжет, якоже и пресвитер.

Святаго  Дионисия Ареопагита: «Яко аще святитель паче воля Божия отлучит, не последует ему Божественный суд».

Василия Великаго: «Аще кто творит кого без благословения быти безвременно, сам да будет без благословения».

Святаго Анастасия Синайскаго: «Егда входите в дом, глаголите «мир дому сему», и аще будет ту сын мира, мир ваш почиет на нем; аще ли же не будет достоин, мир ваш к вам возвратится; аще убо мир паки ко онем возвращается, зане же не обрести достойна себе, множае паче неблагословение и клятва возвратится на главу неправедно ту посылающаго, яко не по вине сущу оному приятию, к нему же послана бысть; всяк убо всуе не благословляя и проклинаяй, себе не благословляет и проклинает; глаголет бо Соломон: «яко же летающие птенцы, суетная клятва не вселится ни в единаго же, попущающу убо Богу, якоже рехом: настают безумные на мудрые и нечестивые на благочестивые, и неправедные на праведные, уничиживающе и обидяще».

Сия убо от многия скорби и туги, по разуму божественных писаний написавше, речем с божественным Иеремием: «кто даст главе моей воду и очима моима источник слез», да плачем нынешняго многомятежнаго волнения, колебания душам христианским. От многих же стязаний и клевет, в дерзостех, и сварах, и в сумнениих, деющиеся душам погибели. Ты же, — о, Царю славы, Христе Боже наш — призри на люди многоскорбные, различными волнами погружаемые, и просвети лице Твое на ны и помилуй ны, за молитв Пречистыя Ти Матере и всех святых, и Тебе славу возсылаем со безначальным Ти Отцем и с Пресвятым и благим и животворящим Духом, ныне и присно и во веки веком. Аминь.

4. Письмо Андрея Денисова Евстрату Феодосиеву

Вселюбезнейшему господину Евстрату Федосиевичу, с любезною ти и единоревнительною дружиною, всебратственно о Христе Ісусе радоватися.

Понеже паче бури сладчайшая тишина, и паче тьмы солнечное сияние, и паче слепоты видение, всякому любезнейша есть и сладчайша, — сице бурливаго раздору сладчайший мир, и темныя ненависти прекраснейшая любовь, весьма прелюбезнейша есть, и полезнейша, всякому здравейшему уму желательнейша суть, чесого вседушне искати апостольскими и пророческими вещаньми повелеваемы есмь мы, — вопиющу апостолу: мир гоните и святыню, и пророку заповедающу: взыщите мир и пожените и. Откуду и мы, грубии, яты сея любви люблением и сея церковныя сладости желанием понуждаеми, — брата отпустихом к вашей любви с писанием нашим, в котором добре разсмотритися и боголюбивым разумом разсудити, о мире церковном порадети просим твою любовь. И с посланным сим братии нашей, труды для мира церковнаго восприемлющим, яви любовь любве ради Божии, и что вашей любви разсудится противу нашего писания, мир или ответствование, благоволите по брате сем к нашей грубости отписать. Бог же мира и любви да даст мир и любовь в сердца ваша и наша, и сохранит ны от вселютейшаго диавола нападения. Аминь.

5. Послание на Ряпину мызу Андрея Денисова

Странствующим богорадне в новозавоеванных селитвах, о древнем благочестии подвизающимся, учащим и учимым, возлюбленным мужем и братии о Христе Ісусе, радоватися.

Ничтоже тако исконному врагу наветовати потщательно, яко еже церковное соединение разоряти и христианское совокупление расколати. О сем бо паче вселукавый подвизается и зельною яростию на христоименитое достояние дышет, в раздоры разсекая тело церковное; и иже друг другу спомоществовати и сболезновати долженственные, сия друг на друга всековарный лщении своими сражает, и ратовати и угрызати наваждает прелукавый, ведый преокаянный, яко в раздорах и в разгласиях многа волкоядина овцам произыти возможет, и в прогневание Божие может многия многажды сими вринути. Иже в словесех или в делех истинныи погрешающии, и в такова тимения вложити возмогает омраченный, яко не познавати своего им воистину сопротивления. Якоже на святаго Евфросина возставшие древле псковичи за пресвятую аллилуию —  возмнивши они иногда о истине ревновати, на истину ратоваша и хулиша грубосмысленнии. Чесо ради и божественный Златоуст, во еже на послание к Ефесянам в нравоучении 11 сице глаголет: «ничтоже тако раздражает Бога, яко еже церкви разделятися». И такова убо и толь тяжка расколов церковных беда — оле, жалостнаго плача! Не мину сие губительство бедне терпящих о благочестии христиан; не мину о церковном благоверии страждущих, о церковных преданий раздирающихся. Еже и ваше братство, в прешедшее время, жалостное разодрание со иже в поморских странах пустынножители, проповедасте. И мнози от иже вашея лобызающих тяжкими хулами (за оная, яже в нас безпременно и безприбавочно древлецерковная предания соблюдаема) навходяще, и грубе и несмысленне ересию, содержанная святыми, порицающе. За что не без плача минуем о таковых душах, — о, грубосте, в противление святым впадающим, — и слезим гибели таковыя и хулы таковых жалостне снедаемся, и Господа Бога молим просветити им умныя зеницы, во еже соглашатися с содержанием святых и не ратовати на древлецерковная предания. О чем и ваше братолюбие молим сболезновати о христоименитых людех. Что бо умствуют, иже грубостию последнею содержимии? в ересь тяжкую, глаголют, поморские пустынножители впадоша, не пишуще на животворящем Христове кресте четырьми буквами, сице: I. Н. Ц. I. знаменующими Пилатом написанную титлу «Ісус Назарянин Царь Iудейский». Оле, тяжкия таковыя хулы: услышим и вонмем, мужие и братие, вонмем и боимся, да не впадем в таковый злохулительства ров. Во всю вселенную, елико бяше священных жертвенников водружено [на поле: Большой Потребник печатной], предана от святых во всех церквах на антиминсе животворящий крест воображати и подписывати «Царь славы, Ісус Христос, ника». Сия же четыре буквы не предано воображати. Подобне и на водружальном кресте, тоже и на святом Агнце в тайнодействе Тела и Крови  Христове. Еще же и во Уставех на Панагиарном хлебе тако предано воображати. Сице убо преданием святейшею церковью предано и священными старописьменными книгами засвидетельствовано;  сице сам Христос равноапостольному царю Константину на небеси крест, кроме сих четырех букв, показа. Иже и он, по образу, показанному на небесех, три кресты сотвори, кроме сих четырех букв, якоже старопечатныя книги, Прологи, засвидетельствуют. Сице святый Никон Черныя горы в своей книзе [на поле: Тактикон, л. 197] от вселенския патриархи прия повеление кроме сих букв писати честныя кресты. Сице в российстей патриархии и архиепископиях и в монастырех, по повелению благочестивых святителей и прочих пастырей, до Никона бывших, и многих святых, на Распятиях кроме сих букв подписания имеются быти, о чем премножество свидетельств, и яже в другом от нас писании засвидетельствовано. Тем же гаждающие ересию не пишущие четыре сия буквы на животворящем кресте хульствуют на вышепоказанное святых церковное предание, и вопиющие — не имети  ни части, ни жребия за сия, грубостию своею, от части святых, тако вообразивших и предавших воображати святые кресты, отлучатися дерзают: аще ли еже приводят сеж в свидетельство от Евангелия, прочих святых писаний писанное о написанной Пилатом титле. И о сем, о друзи,  разсудите: тамо нигде четыре оныя буквы писати  не предано и воображати не написано, и за неписание их раздиратися не велено. А и к божественному Писанию прилагающие или отъемлющие, или развращающие что — весть ваше братство! — таковая кафолическия церковь осуждению предает. Ко священному же Евангелию кривосказательне прилагающие предание о четырех буквах, яже тамо не написано, и на древнецерковное предание ратующе, — како таковии сами подпадают под церковное святых запрещений осуждение! И сицеваго в христианех бывающаго душевредия оплакующе и скорбяще, мы, грубии, со слезами молим ваше боголюбие, елицех учительных, елицех миротворных, в состоянии мужей: умилитеся и разсудите смиренномудренно о сем жалостном христиан разорвании и душевредии.

А еже от вашея страны за покупание брашен в путех с торжищ осуждают ны тяжце, скверноядением сия и достойными отлучения укоряюще, хульствуют, и брашна покупаемая и христианским на трапезах Бога благодарением освящаемая, скверна и нечиста, — увы! — дерзостно именующие, противно апостолу Павлу, к Коринфом и Тимофею в посланиях о том пишущему, и сказателю тех божественному Златоусту и прочим многим святым; яко же и великий Афанасий, в странных сущему и требующему снеди, в корчемницах купити повеле, — яже вся свидетельства краткости ради оставляем; но от самех вас содержания кратко воспомним. Ибо у самех вас, возлюбленнии, в вашем согласии, кто может от торжищ без покупания брашен минути? ибо соль, мед, масло, калачи покупаете. Я аще скверноядства — с торжища покупаемая брашна, и отлучатися за то должны, по ваших суду; то сами вы вси таковым суждением, скверноядственных отлучением, осуждаетеся. О мужие, братие, разсудите неправаго и противнаго святых разсуждениям суда и самех себе тяжко осудительнаго. Или и поклоны за брашна у вас полагаются? но кто от святых за торжищна брашна поклоны полагати повеле? и аще у самех вас не по писанию сия творятся, како я за что прочие пустынножители от вашея страны всуе и туне, паче же за древнее святых содержание, осуждаются. Сих ради скорбяще мы такового душевредия, сим краткописанием молим ваше братство: воздвигнитеся мужие, братие воздвигнитеся боголюбным нравом, раскол сей, всеянный от супостата диавола, в христоименитых людех умирати, потщитеся, — тако с поморскими пустынножители, яко и с прочими благочестно согласными любовное свойство и о единосогласии христолюбное радение возымети и о церковном благочестии единоревностное усердие стяжати. Ибо и они, пустынножители, ваше братолюбие всесердечно лобызают и вседушне соболезнуют и Господа Бога о вас безпрестанно молят и о согласии церковном с вами всежеланно желают. Аще бо божественный Златоуст: «ничтоже тако раздражает Бога, яко еже церкви разделятися, аще и безчисленная будет содеявше благая, от иже тело Его пресецающих, не меньшую приимем казнь, ссецающе исполнение церковное». Како, возлюбленнии, не убоимся гнева Божия, за раскол церковный бывающаго и хотящаго быти? Или паки, сам Христос глаголет: «о сем разумеют вси, яко Мои ученицы есте, аще любовь имате между собою». И паки: «блажени миротворцы, яко тии сынове Божии нарекутся». То не востечем ли, возлюбленнии, к любовней благодати, не вожделеем ли миротворства ради быти сынове Божии. Ей, да даст нам Господь Бог, в плачевные сия и многоскорбные нам дни сию радость христианскаго согласия видети, и о благочестивых преданиях единогласно со святыми и между собою единодышущих; якоже древле по распре и разгласии между святыми Кириллом и Феодоритом и прочими восточными, паки любовное и единогласное соединение и о догматах единоумное разсмотрение. О, да подаст и нам Господь Бог сия восприяти. Аще ли же ваша любовь паки и паки имети будете несоглашение, за ради четырех оных букв, яже мы, не видевше у святых писанных, подобне им не пишем на животворящем кресте: то благоволите нам о оном надписании ясность показати и против письма и вопросов наших ответствовати.

1. Где в божественном Писании предано и велено четыре сия буквы сице: I. Н. Ц. I., вместо Пилатом треми языки и целыми речьми написанныя титлы на кресте писати?
2. Кое святое Писание повелевает два надписания на кресте писати, — едино: «Царь славы, Ісус Христос, ника», второе на дсце: «I. Н. Ц. I.»?
3. Еже у вас прочитаете о титле из Евангелия и Соборника и прочих святых книг, — кто от святых, до вас сие о тех четырех буквах во свидетельство приводил и писати я повеле?
4. Кто от святых толковников сия буквы тако толкова, якобы писати на досце креста за «Ісус» — I, за «Назарянин» — Н, за «Царь» — Ц, за «Іудейский» — I?
5. Каяждо буква — с титлою I или без титлы I предано воображати, и что обоим протолкование?
6. В Толковом Евангелии, о написанном Пилатом треми языки титле, пишет: «еже треми грамотами написанное являет бо Господа Царя быти, и по деянию и по существу богословия мудрости», и прочая. И вы четырми буквами единаго языка можете ли сию тайну изобразити и како изобразите, и по коему божественному писанию? — Сие нам объявите.
7. Еже Златоуст, в среду великую, о зависти жидовстей глаголет: «а егда Пилат на досце истину показа, гневаетеся и ставлясте писати, что глаголаху: не пиши «царь жидовск»». И паки ниже: «юродивыя беседы Филистимовы не ставлясте писати, а славления не писати Божия, ими же на небо правимы есмы». И понеже Пилат треми языки и целыми речьми, а не четырьми буквами титлу на кресте написа, а жидове, царство Христова неприемлющие и своим царем жидовским Христу нарицатися не любящие, тако глаголаху: не пиши «царь жидовск», и сие их неприятие царства Христова Златоуст обличаше оными глаголы. Вы же како и по коему Писанию на предание четырех букв писати — сия Златоустова речения проводите? Понеже святии писавше надписание кресту «Царь славы, Іс. Хс., ника, а четыре оныя буквы не писавше — еда истины и славления Божия не писаху? еда на небо не правимы суть?
8. От которых святых тако предано, еже бы всем имети на кресте сия четыре буквы «I. Н. Ц. I.» на знаменование Пилатом написанныя титлы, а кои христиане не будут имети написаны оны на кресте, пишуще «Царь славы, Ісус Христос, ника» — и с теми не имети ни части, ни жребия, и раздиратися за сие с православно живущими благочестивыми христианы?

И сия вся, мужие братие, смиренномудренно с любовию разсмотревше, потщитеся о сих со святыми единогласно дыхати, преданиям их повинующеся. Аще ли же что вам мнится лучше разсуждение имети, подвигнитеся на вышепоказанные вопросы ответствование написати, от божественных Писаний и от святых преданий, а не от своемнительных басней и от разсуждений нецерковных; такожде и не клеветами, и не примышлениями и лжами, молим вас, любезных христианом христиан, облагати, и не яростию и дерзостию осуждати прочие благочестивые, якоже от ваших, сами мы слышавше, зело грубо и несмысленно дерзают: погибшими  весьма православных за древлецерковная содержания, с клятвами кленущеся, безумне осуждают, сами погибающе хулою своею; и главою Храсту титлу, четырьми буквами пишему от них, грубогрубии именуют, и клевещуще лжут на пустынножителей, яко бы титлу с креста стирают и главу Христову (о буквах сих глаголюще) с креста снимают. Откуду явная, грубая ложь, ибо пустынножители на древних Распятиях и крестах тыя четыре буквы писаны не имеша, и на воображаемых от них, подписывающе подобне старопечатным книгам и древнеписанным Распятиям, подписывают. От новолюбцев же нынешних пустыннножители иконописания в пустынножительство не выменивают. Отуду, братие, явная ложь от вашея наносится страны, — с чего пустынножителям стирати тыя буквы, где не написаны прежде? разве и сия хулы на святых же касатися от вашея страны некаким образом будет, ибо святии, якоже в старопечатных книгах, тако на древних Распятиях, не воображаху на кресте. А по ваших усердию, подобало бы им быти, аки от Евангелия предано; святии же, по тех суждению, аки бы отняша сия. Тем же с плачем молим вашу любовь: помилуйте, помилуйте, возлюбленнии, тако свои души, яко прочие грубоумные, в дерзостех своих увязающие в тяжкия хулы. Умилитеся, братие, и о мире христиан попекитеся, — разсмотрите и разсудите, потщитеся, возлюбленнии, о согласии церковном, и миротворцы христоименитым людем будем, да сынове Божии быти получим по священному святому Спасову гласу: «блажени миротворцы, яко тии сынове Божии нарекутся». Да даст же, даст Царь славы, Сын Божий, вашему братолюбию и нам, грубым, единогласно со святыми и с друг другом любовно и глаголати, и мудроствовати. Ему же, всещедрому Владыке, Ісусу Христу, буди о всех честь, и слава, и поклонение, с безначальным Его Отцем, и со Святым Духом, ныне и во вся веки, аминь.