Соборное послание выговцев к польским федосеевцам о браке

[На поле: в лето 7216]

Богом блюдомей и благодатию Его сохраняемей церкви, яже в Державе Польской соблюдаемей, и всюду в вас, идеже христианство хранимо, распространяемей, — благочестия рачителем: словущему учителеви и общаго жития настоятелю духовному, Феодосию Васильевичу, со всеми учительными людьми и еже о Христе братиею, и боголюбивым христианским народом радоватися. От иже в севернейших странах, близ окиянския пучины, сожительствующих пустынножителей, иночествующих и учительных, и веякаго возраста христианскаго сословия: мирное духовное целование, во общую радость, ради единости веры в единаго Бога, и единаго и тогоже крещения христианскаго, благодатию Господа нашего Ісуса Христа во веки аминь.

Слышахом, яже в нас иноки и учительные люди и вси благовернии пустынножители и от нижеегородских стран церкви благочестивых случшияся учителныя люди, от пришедших от вашего благоверия нашей братии, яже в вас соблюдаемое христианство: ревность яже о чистоте благочестия; тщание яже о молитве, о посте и о девстве; любовь Божию и к ближнему; смиренномудрие, Христово подражание, зельное рачение к послушанию Божественнаго Писания; и текущее преизобилное учение по подобию вод речных, и неоскудеваемо, но и богатно преизливаемо, на хотящая душа человеческая; пастырьство, крепко оградою Писания стрегомо, и овец благопослушное и благочинное спребывание, милованием же и общения поданием цветуще, учительными же людьми украшено; иже церкви поборники, и христианству заступники, согласия же и мира доблии рачители; иже не своя обычая пасуще, но Писания и церковнаго Предания стрегуще, в написанных Писанием ополчающеся, в неписанных же церковным преданием и обычаем просвещающеся; сильнии же суще во еже за благочестие от Писаний борениих, смиренни же суще и кротцы и любовни, во еже спасение свое сострояти, по глаголемей церковней притчи, во мнозе совете, ведяще известно в смиренномудрых своих душах, божественному Писанию глаголющу: еже бо множицею свершенных муж оскуде, се отроча обрете, и еже премудрыя мимо тече, невеждам открыся, и еже учителем утаися, учеником найдеся. К сим прочее да постыдятся тии, иже, или вражды ради подкопывают церковную правоту; или, по грубости и упрямству страждут, хуляще и срамословяще случающимся недостатком, исправляемым, по Писанию, во мнозе совете; хотяще та содержати крепце, яко некий церковный догмат, яже во обычаи принятый, случающияся человеком недостатки, и виняще иже не гордым нравом, но с смиренномудрием, о церковном винограде пекущихся учителей, иже, что отвне прирастлое, истребляющих, и недостающее присаждающих; и таковии, яко дивящеся, глаголют, и пререкуют, почто преже сего не познаша в каковых любо, аще и в малых, вещех. И верховный убо апостол ІІавел, до третияго небеси восшедый, той во яже к Филипписиом послании глаголет: братие, аз себе не у помышляю достигнути, едино же; задних убо забывая, в предняя же простираяся. Сии же, яко превзошли уже третие небо и высочайше Павла превосходят, не смеют о себе мудрствовати, еже не у себе помышляю достигнувша. Еще же и другим, со смиренномудрием обыскующим и не единем, но во мнозе совете исправляющим, зазирающе, не услышаша дивнии они божественнаго Златоуста глаголюща, во яже к Римляном послании в беседе 22: темже и в потребу друг друга поставил есть нас Бог; аще бо и мудр будеши,  иного требуеши, аще ли же мнишеся не требовати, безумнейши всех был еси и немощнейши,  таковый бо и пуста себе составит помощи, и в них же аще согрешит, никоего же восприимет, ниже исправления, ниже прощения, и Бога прогневит гордынею, и многая согрешит. Есть бо, есть многажды и мудрому не сведати потребное, и безумнейшему обрести нечто от подобающих. Еже о Моисеи и его тести бысть, еже о Сауле и отроце его, еже о Исааце и Ревеце. Да не возмниши убо низложен быти, инаго требуя. Сие бо тя наипаче возвышает, сие крепко тя творит, сие же светлейша тя и твердейша. И сия убо Златоустово. Что же, они древнии святии мужие не сицевым ли шествоваша смирения путем, совопрошающеся друг от друга? Да аще и с кем приключися, и несрамляхуся, исправляеми когда. Сирин бо он, блаженный и велик муж, иже удостоивыйся свиток Божий ясти, иже провидяй будущая и страшнаго суда тайны прознаменуя, той таковый помолився Богови, дабы с таковым человеком случился, им же бы пользовался, — не блудницею ли поучен быв на землю всегда зрети, из нея же взят бысть и создася, и со всяким смиренномудрием и благодарением к Богу прият поучение. Что же, пречудный Макарий, помолися подобне Ефрему, не единим ли отроком, волы пасущем, такожде поучен бысть, како подобает яди причащатися,  да еще и поношен бысть им, рекшим ему: или паки осел еси, авва [на поле: месяца марта, в 13 день]. Что же, честный презвитер он, иже, великаго ради своего беззлобия и чистаго жития, сподобивыйся от божественныя благодати ангела выну зрети одесную олтаря стояща и служаща ему: не единым ли диаконом, пришедшим к нему от Константина града и служащем ему, исправление прият, о нем же толика лета от неведения согрешаше, речи некия северианския ереси приглашая над божественными тайны. Иже и предстоящему божественному ангелу, аки стязаяся, о нем же толика лета предстоя, и с ним служа божественная, замолчав ему таковое согрешение, противу слышал. Тако Бог есть оправдал, яко человеком от человек паки исправлятися: и сии убо сице навыкнувше, от Божия откровения, пользу друг от друга приимати. Но и в самех верховных апостолех обрящет, кто люботрудне прочитаяй божественная Евангелия. И тии бо, якоже человецы, исправляеми бываху, и не срамляхуся яве всем написати во святых Евангелиих те свои бывшия недостатки. Петр убо верховнейший и теплейший, иже услышавый от Господа: «блажен еси, Симоне, вар Иона», и обещание оно, еже основание церкви на исповедании его положити, и не по мнозе словеси слышит: «иди за мною, сатана, соблазн ми еси, не мыслиши бо яже суть Божия, но яже суть человеческая».

Ныне убо да престанут поимы творящии, и не к полезному, но к зазору и тщеславию взирающии и оклеветающии христианская сословия, яже во мнозе совете друг с другом совопрошающихся и недостатки исправляющих.

Аще ли и еще бывают научители горцы клеветницы и христианству мятеж творящии, и исправления во мнозе совете ненавидящии: да оглаголают убо и Петра, иже толикия тайны навыкий, и от Христа ублажаемый и бесы изгнавый, почто не позна, и глаголаше глаголы противныя Христову смотрению, им же и от Христа сатаною оглаголуется; такоже и прочих святых, иже во мнозе совете спасение свое строящих и потом научающихся. Аще ли дерзостно есть сие и богохульно на таковых святых дерзати таковая: како не безумия полно будет и дмения таковое мудрование, иже нам, множае отстоящим от толь таковых светил великих, нежели земли от небеси; и еще бы друг от друга совета не требовати, или требующим и пользующимся возбраняти и зазирати, да еще и в толикое тмострастное, рати и смущения и неведения изнаполненное, последнее время! И подобало бы таковым с церковию согласно глаголати и мудрствовати: вся церковная предания, писанная и неписанная, непреложно сохраняюще, и спасение творяще во мнозе совете, лобызати бы христианское согласие, яже божественными Писании и церковными предании утвержающееся и красующееся, и недостаточное направляемое.

Оставим же убо таковым от реченных и паче сих обретаемых божественных Писаниих и от вашего добляго учительства направлятися, или неисправленных сущих подкопников и подглядников в невежестве их и в непокорном обычае шеперяти, якоже изволиша. Мы же от божественных Писаний учимы есмы, и не срамляемся, когда в чесом исправляеми от боголюбивых своих братий, да и всегда требуем, и не глаголем в церкви, яко во всем вразумихомся, и испытахом закон Божий, но еще молимся и с пророком Давыдом в церковных и обычных молениих вопием к державному нашему Владыце и Богу: вразуми мя и испытаю закон Твой и сохраню всем сердцем моим, и сие даже до самыя смерти. И паки за неведение вопием: услыши мя в правде Твоей (а не в моей) и не вниди в суд с рабы Твоими; и сие чесо деля? зане не оправдится пред Тобою всяк живый.

Во яже бо апостольской, кафолической во святую единосущную Троицу вере, и в догматех церковных апостольских, и седми святых вселенских, и девяти поместных соборов преданиях, яже содержала греческая издревле и российская церкви до Никонова настатия; и во святых книгах напечатанных и писанных и неписанных обычных церковных преданиях, и во едином святом христианском крещении, а не еретическом, согласно и единогласно издревле и доныне, от отец наших и страдальцов священнаго чина и иноческаго полка, и учительных людей; и ныне от нас, грубых, исповедуется и проповедуется и без сумнения и какова обыскания содержится, и с вашею любовию, благочестивыми учительными людьми и прочим христианским народом, единогласно и согласно глаголем: един Бог, иже православными древними догматы проповедуемый и славимый, а не еретическими новинами; и едина вера, древняя  православная кафолическая,  яже из ребр Распятаго на трисоставном певге и кедре и кипарисе — едином кресте Владыки вашего Ісуса Христа, истекшая и единым трисоставным крестом утвержденная и освященная, и всегда освящаемая, и на лице своем единым истинным крестным знамением исповедуемая и прославляемая, и от ересей не оскверняемая, и никогда с ними мешаемая, и никакова с ними общения не имеемая: кая бо часть Христу с велиаром, или кая часть верному с неверным, ниже от них что приемлет; весть бо Писание, глаголющее: от нечистаго кто очистится, ниже от себе что им подавает. От самого бо Христа учима и повелеваема — не давати святая псом; тако же и в единаго Бога, в единости веры и о едином истинном кресте подаваемое, исповедуем едино крещение. О иной же каковы любо неправой церкви, во иный не животворящий крест ведущееся согласие, и от него подаваемое крещение не приемлем в единость веры нашея православныя, но со апостольскими правилы глаголем: ибо от тех крещений не крещены, и поставлений не причетницы. И сия убо, в добре верных христианех, ни изыскания, ни стязания требуют, разве яже от частаго от божественных Писаний прочитания, и изыскания яснейший и светлейший разум утвержается и обучения ко ополчением яже к сопротивляющимся рати укрепляется. А о яже во святей вере при настоящем житии и хранении, и во всяком заповедании християнскаго жительства, како с тем благочестия сокровищем до вышняго Іеросалима церкви царским шествовати путем, и чтобы на десно в безмерие какое, или на шуе в слабость кую не поползнутися: и сия убо и училися и учимся и учитися даже до смерти еще требуем, и к Богу с церковию вопием: вразуми мя и испытаю закон Твой; и паки: закону Твоему, Господи, научи мя; и еще: Господи, научи мя оправданием Твоим. Еще же и в чинех и уставех, церковных и келейных молитв к Богу приношение, и в крещении, и в покаянии, и в прочих нужных церковных тайнах, — зане от святых отцев кроме священников во время нужды творимо и впредь заповедано бывати, — и како в сих не многому совету и обысканию потреба? Еще же множицею, — каково чудо! — и неведению бывати в толь таковых тончайших вешех, еще же и нужнейших, без них же християнству состоятися невозможно. Понеже вечерню и повечерницу, полунощницу и утреню, и часы, и в крещении, и в покаянии, священник начинает иерейскою властию «Благословен Бог», и прочая, такоже и по «Отче наш» во ектениях, и на отпустах и во инех многих случаях. И аще начнем вся по нем творити, в безмерие впадем, и боязнь обдержит, да в восхищение недарованнаго не впадем. Аще ли от безумнаго страха запяти, вся отложим, то на шуй путь в темном и помраченном безумии обрящемся и всячески будем пусты и наги христианства. Сего ради глаголет Соборник: не уклоняйся ни на шуе, ни на десно, но путем царским шествуй. Подобне же и во яже других сожитий, и спребываниих, и сообщениих, и делех, о инех же глаголет: с неприобщенными приобщаяся и сам не приобщен; в других же: не осуждайте, да не осуждени будете. Да не потреба ли и зде многаго страха и боязни и опаснаго обыскания, и с советом искуснейших и Бога боящихся мужей, иже во дни и в нощи повыну о сих упражняющихся, да не како от какова неведения, ли во оскудение, ли в безмерие, от царьскаго пути совратимся и равно за обоя от Владыки и всех Бога осудимся. Сих ради не стыдимся, еще во учимых чину быти, и даже до смерти к Господу вопити: открый очи мои и разумею чудеса от закона Твоего; и сие чесо деля? Зане пришлец аз есмь на земли, не скрый от мене заповеди Твоя. И паки к зельному рачению последование псалма влечется, глаголя: возлюби душа моя возжелети судбы правды Твоея на всяко время. Убоятижеся напредвлекущих глагол псалма того подобает, наипаче тем, иже со смиренным мудрованием не хотящим учитися, и, по Златоусту, другаго требовати, еще же о взыскующих и исправляющихся укоряющим и в чужем оце мал сучец прежняго неведения, яже потом и исправления зрящим, во своих же очесех мысленных целаго бервна, надменнаго и грубаго мудрования и тмы неведения, и не прежде бывша, но еще и ныне пребываемаго, сего невидящим, зане грозен суд. Потом псаломник износит, глаголя: запретил еси гордым, прокляти уклоняющиися от заповедей Твоих, и к таковым убо во уврачевание довлеющая сицевая.

К вам же, о боголюбивии и братолюбивии церковнии питомницы, кое слово наше грубое довлеет к показанию вашего благочестия, и добродетельныя ревности, и смиренномудраго основания; ниже бо множае похваляти дерзаем, иже от Бога похваляемых и от Его благодати просвещаемых; ниже о каких советовати смеем к таковым, иже довольны суть и инех научати. Но понеже любовь Божия, совокупившая ны во едино упование вышняго звания, та устрояет во мнозе совете бывати нашему спасению, та убо и вся беззавистодержне дерзает и учитися, и учити, и советовати о полезнем и совета блага искати, та и понудила премудраго некоего рещи: дай премудрому вину и премудрее будет, — та и нас, ныне соборне собравшихся, возжгла огнем любовным о вашем преспеянии благочестия радоватися, и зело возрадоватися. Та же убо и понудила нас писати к вашей любви о привнесшемся обычаи в неких християнех вашея паствы, иже в неведении християнства спрягшиися с женами, и потом, по познании и по крещении, паки сожительствуют чадородием, кроме бываемаго на таковых браковенчания. К попущению же таковых сожительств приводится от вашего пастырьства свидетельство от слова преподобнаго отца Иосифа Волоцкаго, яже он, обличая немецкое заблуждение, писаше, оправдая иноческое девственное житие, в свидетельство же приводя святого священно-мученика Климента, Петрова ученика, яже он глаголет: Егда, рече, святый апостол Петр прииде в Рим, и егда Софию востави от недуга, иже бе царскаго рода, прииде ту царь ея ради и муж Софиин, синклит старейший римскаго града, и преже всех верова София и муж ея в Господа нашего Ісуса Христа; и вероваша в той день три тысящи, бысть во граде радость велия. И повеле апостол поститися всем четыредесять дней; и пришедшу времени крещения, крести всех: во имя Отца и Сына и Святаго Духа. Потом же всем повеле внити в церковь и повеле молчанию быти, и начат учити. И рече, осклабленным лицем: се Израиль новый, и се язык свят, очищен водою и Святым Духом, и ина многа глагола яже времени приключна. Потом же рече: братия и сестры! койждо якоже изволит да приимет сие житие, аще кто хощет истинное и чистое житие нетленныя светлости безплотнаго воинства — приимет девственную лепоту, и удаление мирских вещей, и приступит к нам, — аще ли же муж, аще ли жена, яко сестра София. И разделиша имение свое, и приступиша к нему от них 160, девственное житие прияша. Апостол же тех пострищи повеле, и в сукняны ризы черныя повеле одеяти их, и поясы усмяни поясати о чреслех их. И рече апостол: аще кто хощет воздержатися и легок на высоту быти изменою, да идет на особныя места тихая, ту да празднует молитвами, и алканием, и почитанием, и ума очищением; прочии же, по своему подобию, якоже кто изволит. И сия убо свидетельства приемше в руку, соборне разсматряюще, и не обретаем в них помогающее таковому сожительству ни мало. Принеси убо и ныне, с Богом Помощником да истяжем опасно та словеса святаго апостола Петра, к кому он рече: произволившим девствовати тако жити научи, прочии же по своему подобию, яко же кто изволит? И сих ради словес аще надежно крещшимся мужу и жене без венчания смешатися? Но понеже он, верховный апостол Христов, не к супружным точию вещая сия словеса, но ко всему народу, трем тысящам, в них же, толиком народе, лепо быти и супружным и несупружным, юношам и девицам, и детем малым, от них же, толикого множества народа, точию 160 действенное житие прияша, прочии же по своему подобию, яко же кто изволит. И аще без венчания кто возмнит сих ради словес жити, то не точию супружным, но и юношам девиц поимати без браковенчания попустит, понеже общее ко всем сие слово речеся, и явен блуд в церковную породу внидет тако.

Аще ли же кто восхощет отделяти супружных от несупружных, глаголя, якоже и глаголют: сии в неведении посягли, друзии же в ведении, — и сего разума во апостольских словесех онех,  поискав, не обрящеши, и разделяти их будет по некоему своему разсуждению, а не по апостольскому законоположению. Аще ли же глаголати кто будет, яко до крещения посягшии крещением освящаются, и того ради им сожительствовати попущается, по крещениих же сшедшимся без венчания невозможно, — и понеже по крещении сущим поимати жены без церковнаго чиннаго браковенчания мерзко есть и нечестиво и апостольскаго и отеческаго законоположения чужде, всякому ведомо есть, — покажем: откуда тии крепятся, иже до крещения совокупившияся — и по крещении смешатися им кроме церковнаго чиннаго браковенчания, понеже во апостольском законоположении и вышереченном свидетельстве того разсуждения не обрящеши, а от всех божественных Писаний яве показуется, яко ина тайна есть святое крещение, и другая есть браковенчание. Крещение бо супружных и не супружных  равно освящает и от Адамля первороднаго греха очищает и от всех прочих его богомерзких деяниих обмывает; а не мужа с женою во едину плоть совокупляет, но особо мужеви и жене подавается и от прежняго языческаго совокупления очищает, и Божие сыновство подает, и во Христа облекает крещаемаго: «елицы бо во Христа крестистеся, во Христа облекостеся», — апостольское священное слово нас научает и от ветхаго убо человека, тлеемаго в похоти, совлечеся крещаемый, в новаго же облечеся — Христа. И понеже первое кого сожитие с женою, до крещения, по ветхому бысть человеку, — всякому ведомо есть, — и понеже ветхаго совлечеся, совлечеся и деяний его; отста и от совокупления жены, иже не по церковному освящению ему даемыя, в новаго же облечеся, — не убо и оба вкупе, но особь убо муж, особь же жена. И от браковенчания исходят: ов больши, другая же меньши, ов глава жене, другая же покорение нося, и бывают оба в едину плоть, якоже священный чин церковный браковенчания нас научает. От крещения же оба исходят равно во Христа облечена, ни ов больши, другая же мние, о Христе бо Ісусе несть мужеск пол, ни женеск; крещение бо братство подает, а не телес совокупление. И зело бедовметно есть и страха полно таковым смешатися кроме церковнаго брачнаго освящения, а наипаче кроме всякаго яснаго свидетельства божественных Писаний. А еже апостол Петр на две жительстве уставляя человеческий род, по произволению коегождо сия глаголя, произволяющим девственное житие — тако жити научи, прочие же — по своему подобию, яко же кто изволит. И аще, таковаго ради слова, — зане ясне не речено о браковенчании, — кроме брачнаго освящения дерзати поимати жены, и аще таковым намерением начнем божественная Писания разсуждати, наипаче же та, яже в краткости некогда реченная, а с церковным прочим божественным чином же и уставом, ясне положенным от святых отец, не сочетати и потому не разсуждати: вся нам растлятся и горняя доле будут, дольняя же горе; не точию бо во апостольских речех тогда обрящеши кратко реченных, но и после того о поимании жен обрящеши. Яко же в житии святаго Николы в чудеси его, еже о трех девицах, их же хотяше отец за нищету блуду отдати; святый же Никола даяше ему тайным обычаем коейждо по узлу злата; и по первом мужа онаго приятии злата пишет: и тако едину от дщерей своих старейшую абие мужеви сочета, а еже с венчанием или без венчания, сего написати не приложи. И аще смеемо есть кому мудрствовати, краткореченныя ради оныя речи, яко древнии християне без браковенчания отдаяху мужеви дщери своя, не явно ли будет сие неистовство и ума изступление? Подобне же и в Соборнике печатном большом, в субботу сырную, в слове втором святаго Григория мниха о святем Аммонии пишет: сего Аммона реша от Далматии родом, ему же во время брака доспевшу сожительницу и не хотящу дают родителие благородну бо и красну, и тогова душевнаго благородия достойну, а еже с венчанием или без венчания, сие святый умолча. И аще и сих ради словес возможно будет кому неистовствовати и кроме соборнаго предания и церковнаго чиннаго браковенчания поимати жены, сие бо и от вас, и от нас, и от всякаго благочестиваго ненавидимо и гнушаемо есть, и, якоже выше рехом, многая привходит человеческому роду пагуба от невнимания кратких речей и несочетания к прочему церковному учительству. От сих бо невнимания и древнии в колику беду впадоша, от них же малая речем. Апостолу рекшу: во всяком языце бояйся Бога, делаяй правду приятен ему есть: и сих ради словес падаху мнози, мняще и без святаго крещения, и без правыя веры, боящемуся Бога и делающему правду прияту быти от Бога. Сего ради обличаются от многих инех божественных Писаний, наипаче же от преподобнаго отца нашего Иосифа Волоцкаго, в книзе его, в слове 5-м. Подобне же тому и в вышереченных, яже о супружестве жен, яже апостольскую речь списатель кратко написа: прочии же по своему подобию, якоже кто изволит. Не бо рече: изволит без браковенчания, но по подобию, и ко всем 3-м тысящам народу рече, в них же лепо бе супружным и не супружным быти. Помысли, и ныне егда бы где было три тысящи внове верующих, от народа градскаго и поселянскаго: в них же обрел бы супружных и безсупружных, юнош и девиц, вдовцов и вдовиц. А яко бяху тогда во апостольское первое учение и вдовицы, и сие обрящеши у апостола Павла к Тимофею написанное, еще же и от житий святых, в та времена бывших. И аще ко всем тем апостолу рещи безбрачно сопрягатися и без священия и благословения апостольскаго, или епископскаго, или иерейскаго смешиватися чадородием просто, колика беда произошла бы человеческому роду от таковаго разумевания!

А понеже вышеречении: яже от святаго Николы чудесы — сопряже мужеви дщерь свою; такожде и от Соборника — святому Аммонию сожительницу дают и не хотящему родителие, или вышереченная Петра апостола речь к трем тысящам народа: прочии же по своему подобию якоже кто изволит, — с венчанием ли или без венчания, сия вся от обоих умолчана быша. Подобне и таковых ради кратких и не ясне реченых речех смеемо ли бы ныне от нас попустити без всякаго иерейскаго благочестивых венчания и благословения супружным, каковым любо и где любо поимшимся, или в сродстве, или не в сродстве. Понеже в тех речех о всем том умолчано и разбора никакова не написано: или и не супружным поимати, где кто хощет, и сожительствовати и блудное жити житие и ничто же от безсловесных разньствующее? И колика беда спасению нашему от сего привнесется! Сего ради божественнии наши отцы, всегда нас от сомнительных отводяще, на ясная свидетельства приводят, на них же мощно кому непоколеблему и известну жизнь себе стяжати, якоже таковых ради и сим подобных словес вселенский учитель Василий Великий, в книзе о постничестве, в главе 268 глаголет: словеса святаго Писания, яже видятся сомненна и покрыта, изъявляются и открываются и толкуются явными и ясно реченными во инех местах св. Писания, а не явная мрачными и неявными разумевати, но явными — мрачная. Но и Максим, иеромонах пелопонисийский, в книзе своей Сечивце, главе 10-й, глаголет: добре глаголет Василий Великий, яко мрачная и неудобь разумеваемая божественнаго Писания подобает уразумевати иными явными и удобь разумеваемыми во иных местах божественнаго Писания глаголемыми, яко мрачная часть Писания изъявляется от явных частей того, а не явная мрачными и неявными разумевати, но явными мрачная. И где убо и кто известит о супружествах? Книга Кормчая, яже по существу своего правительства от святых отцев и имя себе стяжа, иже направляет всякаго ума человеческаго на шуе и на десно не уклонятися, но царским благочестия прямо шествовати к вышнему царствию путем: та убо о тайне супружества, си есть законнаго брака, в главе 51 сице ясне ведати дает [лист 521], глаголя: Супружества или законнаго брака тайна от Христа Бога уставлена есть во умножение рода человеческаго и в воспитание чад к славе Божией, в неразрешимый союз любве и дружества и взаимную помощь, и во еже огребатися греха любодеяния. Вещь сия тайны есть муж и жена, в приобщение брака честно, кроме всякаго препятия правильнаго, совокупитися изволяющии; форма си есть образ или совершение ея суть словеса совокупляющихся, изволение их внутреннее, пред иереом извещающая, да убо честно и без всякаго препятия правильнаго тайна брака совершится, парахильный иерей сия тощно вся да сохранит. О, сколь святолепно священнный церковный закон быти заповедует браку, кроме всякаго препятия правильнаго! К сим да угаснут тии — в правой вере мнящиися быти, а яже от еретик бывающия браки позволяющии, — зане не точию в брацех, но и вся вера их противна правилам апостольским и отеческим, иже под анафему вечную отсылают, новины убавки и прибавки ко святым церковным преданиям дерзающих. Еще же и всем нам познавати должно суть, яко образ или совершение брака пред иереом совершается, а не пред кем иным, яже от несвященных. И паки, в той же главе, пониже того, на листу 523-м, на обороте: венчанию и благословению супружества в церкви достоит совершатися, пред людьми. Зде разумеваемо есть, яко брак истинный, от Христа уставленный, и со иереом в церкви Божии совершается и кроме всякаго препятия правильнаго, а понеже сие крепко и утверждено, кроме сего состоятися не возможно. На конце священнаго онаго церковнаго законоположения пишет: сия вся предположенная учения от правил богоносных отец и их учений собранная кийждо парахильный священник всяко со опасением всяким хранити должен есть. И сия убо богодухновенное оно церковное предание яве и ясне показует нам незаблуждаемый путь, во яже о священных брацех, кия церковию приятыя и проповедуемыя: иже аще от Христа законоположенныя и чрез апостолы и святых отец во всю вселенную укрепленныя, им же и со иереом и в церкви совершатися повелевает. И не бо кто может обрести вину и рещи, яко во  время нужды и без церкви или без священника мощно браку совершатися, якоже и прочим свяшенным тайнам, — крещению и покаянию. Понеже духовнии святии апостоли и святии отцы ведуще известно, яко кроме крещения и покаяния спастися  кому несть возможно, яко же божественная Писания учит нас; без брачнаго же сопряжения возможно есть спастися, яко по апостольскому словеси: тщится произволивый тако угодити Богови, а не жене, а иже не тако — жене тщится угодити, а не Богу. И паки, по преподобну Ивану Лествичнику, подобен неимущему желез на ногах и прост итти к вышнему званию, точию же аще восхощет постом, и молитвою, и смирением, и трезвением ума тещи. Того ради крещению и покаянию, нуждным тайнам, и кроме священнаго чина и без церкви совершитися во время нуждных случаев попустиша. Браку же — точию единем чинным церковным освящением, кроме же того никакоже какое супружество в церковь приемлется, якоже в преждереченном церковном священном предании. Иже в Кормчей книзе на листу 522-м объявленне законополагает: Изряднее же да весть и иерей, яко супружество между восхищающим и восхищенною, егда сама восхищенная в власти восхитившаго ю пребывает, такожде и потаенная и вся прочая супружества, яже не с благословением церковным и чинным от своего си пастыря, си есть от епископа или от тоя парахии священника, венчанием при дву или триех поне свидетелей свершаемая, по соборному уставлению и святых отец учению, незаконна, паче же беззаконна, ничто же суть.

Что сих объясненнее священнаго церковнаго закона глагол: иже вся вкупе супружества бывающая кроме церковнаго чиннаго венчания, яко беззаконная отмещет и кому смети за толь таковым крепким церковным запрещением жити с женою смешатися беззаконно, кроме церковнаго чиннаго венчания? И да не глаголет кто, яко до крещения сшедшимся леть есть по крещении смешатися. Зде бо церковным законом, яко ножем истины, пререзуют вся изветы и единым словом заключают церковную тайну, глаголя: вся прочая супружества, кроме венчания, беззаконна. И елма глаголет: вся супружества, — к тому прочее ни единаго супружества оставляет быти в церкви, кроме чиннаго церковнаго венчания. И сицев убо ясный церковный закон: коль чист во светле совести послушающаго зрети! Устрояет церковныя тайны и ни откуду сумнятися и скитатися вне предел церковных попущает. А яже не ясне реченная: колико сумнение приносят, а наипаче егда кто не по прочим церковным, светле реченным, свидетельствам приимет, яко же и вышепомянутое, преподобным Иосифом реченное, апостольское слово. От них же какова последует беда, всякому, прилежне внимающему, вышереченная о том самом апостольском слове нашея беседы явленно есть. Елма убо нужно о сих воспомянути, яко преподобным отцем Иосифом Волоцким все оно составлено слово на церковных ратников лютеров и кальвинов, отмещущих иноческое девственное житие. Сего ради он, богоносный муж, низлагая онех злохитрый язык, многая от апостол и от наместников их, апостольских, приводя свидетельства, отвсюду оправдуя иноческое девственное житие, ратуя и повлачая непреподобное тех мудрование, и вся во оном слове обрящеши о иноческом чину глаголюща и борющася его с церковными и Божьими враги, — и сих ради и чин и действо его описует. О брацех же, где и прилучится рещи ему, малым и кратким словом глаголет: никая бо бе нужда преподобному оному мужу о браце объясняти; в церкви чину несуменну о том лежащу, и никто же бе сумняся или ратуяй тогда. Ниже неправедными лютеров и кальвинов языцы о сопряжении жен ратоваху, но о том еще зельне и стояху, мнящежеся онем сопротивлятися тому — иноческое девственное житие низложити блудными тех нравы и богоборными языки спешаху. Сих ради все составление онаго слова к тому зрит, еже утвердити иноческое девственное житие, а не о еже без венчания кого в супружоство до крещения, или по крещении сшедшихся попустити. Егда бо и самое оно воспомяну Петра апостола, яже в Риме три тысящи крести и 160 избра девственное житие, прочии же по своему подобию, якоже кто изволит: к сим словесем преподобный он муж светло воскрича, сице рекий: се убо всем разумно есть, яко иноческое житие предал есть апостол Петр. О брацех же умолча и, не объясняет, и где приидет ему рещи краткословием, ради того, яко они, развратницы, люторове и кальвини, на едино точию сопряжение жен все человеческое житие уставляху, иноческое и девственное житие отметаху. Показуя же он, богодуховный муж, яко две житии Христос и апостолы Его и святии отцы уставиша — иноческое девственное, и брачное сопряжение: сих ради словес о супружестве точию кратким словом везде  объемлет, об иноческом же не тако, но объясненне и продолжительне творит слово. По оном вышереченном Петра апостола надпомянутии, Марка апостола и Филона премудраго, самовидца Петрова, в свидетельство ко иноческому чину приводит. Таже, потом, и святаго Дионисия Ареопагита таинство иноческаго совершения пространнейши пишет. Та же, по сих, та апостольская и святаго Дионисия словеса вкупе объемлет, сице глаголя: и якоже святии и божественнии апостоли на две жительстве человеческое житие уставиша, на девственное и на супружное, тако же и святый Дионисий Ареопагит, хотящим жити девственное житие и Писанием изложи чин пострижению, хотящим же мирское житие и супружним быти, на воли коегождо положи; подобно же сему и святии и божественнии отцы наши законополагают и пишут: глаголет убо великий Евсевий: ибо Христова церковь две житии взаконевает и образа: овому убо выше естества и общаго и человеческаго жития кроме, ни брака, ни детотворения, вторый же,  иже браку причащается целомудренному и детотворению; та же, по сих, приводит божественнаго Афанасия и Василия Великаго, по сих же глаголет: подобно же тому и вси святии и преподобнии и богоноснии отцы наши и священноначальницы и пастыри, по апостольскому преданию, на две жительстве уставляют християнское житие: на целомудренное и на супружное. И во всех сих словесех преподобный отец не воспомяну венчания, но инде убо на воли коегождо, инде браку причащается целомудренному, другойцы же на целомудренное и на не супружное: и неуже кто, аще и зело бы неистовал  каким речением, прирек бы, яко и святии отцы без браковенчания сопрягатися уставиша? Яве бо и святых отец священный чин,  яко свещник воочию всякаго правовернаго предлежит — коим чином брак целомудренный и супружества состоится. Якоже в вышереченных глаголахом, яко со благочестивым иереом и в церкви бывает чин венчанием, а кроме того — яко беззаконен от церкви отмещется; и зело неправедно тем, иже и до крещения сшедшимся в супружество по ветхому человеку, а в новаго человека облекшимся, а на супружество браковенчания церковнаго и иерейскаго благословения не имеющим, а смешатися чадородием, а не реку сквернитися не по християнски; а уповати на та вышереченная краткая речения, и надеятися на та, чего там не написано, а объясненная и светле и не в покрове священнаго и церковнаго законоположения, и кроме того бывающим супружествам запрещения та мимо уши спущати.

И о сих убо преподобный Иосиф свидетельствовал. Упокоим ныне слово, да немногоглаголанием стужим прочитающим. (Хотяй же известно уведети, да прочитает все оно слово яже во Иноческом Потребнике напечатаное с листа 328 до 360 листа, и с Богом, Помощником обрящет разум, — о чесом бысть ему тщание писати, того ради о других не объясненне писаше. К сему же и в книге Кормчей главу 51, всю: и в ней да обрящет, как законнии брацы и супружества состоятся).

Ныне же и о сем речем, яже ко укреплению таковых сопряжений из Кириловы книги внимающих реченным во главе 44 о понурении новокрещенцов, глаголющих: яко не подобает малых детей крестити: против того православных ответ, на листу 224 на обороте сице глаголющ: А того ведети не хотят, яко и малых детей крестиша апостоли, или не помнят того, яко Христос не посла учеников своих к верным, но к неверным, их же потребно первое учити, потом же крестити, не токмо великих, но и со всеми домашними их, сиречь с женою и с детьми: яко же и ныне, егда кто от жидов, или от еллинов, или от иных неверных, возрастный леты, восхощет креститися, первое его православной вере научити и, научив, аще имеет жену и дети, привести его на то учением тем, дабы паки с женою и с детьми и, просто рещи, со всем домом своим святое крещение прияли; тако бо и апостоли твориша, яко же Павел и Сила приведоша в веру, стража онаго темничнаго, и крестиша со всем домом его; также и Криспа, начальника, и иных многих, якоже и сам Павел апостол свидетельствует, крестих же и Стефанинов дом; тому же подобно Иоанн Богослов крести Мирона и жену его с тремя сынми; и тамо же ниже приложи, яко единаго дне крести мужей двести и с ними вкупе жены и дети их; тако же и Анфипата судию с женою и с сыном. Сия бо суть неложная свидетельства, яко и апостоли дети крестиша, но и та свидетельства о крещении убо ясная, о супружестве же нимало надпомянутая. И како мощно хотящим с женами смешатися без браковенчания, на сия уповати, чего зде не написано? О том написано, яко святии апостоли крестиша мужей с женами и с домашними их. Тако и подобает глаголати и мудрствовати, яко крестиша и с малыми детьми; а како по крещении они начаша жити девственное или супружное житие, с венчанием  или без венчания, о том умолча списатель. Подобает и нам о сих молчаных ничтоже мудрствовати, паче же по церковному законоположению подобает мудрствовати. А что речено тамо, яко же и ныне егда кто от жидов или от еллин и от иных неверных, возрастный леты, восхощет креститися, — первое его православной вере научити, и научив, аще имеет жену и дети привести его на то учением тем, дабы паки с женою и с детьми и, просто рещи, со всем домом своим святое крещение восприяли. Подобне вышереченным, и сие речено слово, — повелевает православней вере научити и на святое крещение привести с женою и домашними, то подобает и глаголати и мудрствовати о святой вере и о святом крещении; да более же, что реченных не произносити слова. О браце и о супружестве умолча зде, молчи и ты. Хощешь ли глаголати о нем и учити, и не возбраняется: но не от своего разума, но от священнаго церковнаго предания, где о нем яве и ясне пишет.

И зде бо списавшему главизна она, о ней же нам есть слово, — не о брацех бе ему нужда беседовати, но на богоратныя оны языки глаголемых новокрещенцов ополчатися, иже возбраняющих детем святое крещение восприимати: о содержащей к борению словес нуждне, о том и объясняет, рекше о святом крещении, наипаче же о детином, о нем же и рать бе ему с суесловцы онеми; о совокуплении же брака молчит, об нем же не бе ему нужды в то время глаголати. ІІодобает и нам подобиться счинению онех словес божественнаго Писания: и учити и глаголати по них о святом крещении, и яко и малых детей подобает крестити и противляющихся теми словесы заущати. А яже о сопряжении мужей и жен тамо умолчано, не подобает и нам самосмышленне и бедовметне о сих глаголати, а наипаче дерзати тем смешатися и уповати на та, чего не написано.

А еще и при толицем страхе, апостольскому священному слову глаголющу: Аще кто растлит церковь Божию, растлит того самого Бог, зане от святого крещения человек бывает Церковь Божия чиста, свята и непорочна; аще ли кто ю блудно растлит в себе или в другом чьем лице, сам Бог грозным и яростным отмщением и Собою мстити хощет таковых, рекше нестерпимыми и прегрознейшими муками, в безконечных огненных и жупельных муках,  якоже нас божественная различная Писания учат о сих; не блуднейшима бо очима зрети подобает таковым и желати и радоватися,  аще откуду закрадется и попустится таковое им житие, но боятися и трепетати им подобает о сих, да не когда таковаго ради небраковенчаннаго смешения чужды обрящутся  зде соборныя апостольския церкве, в будущем же веце да не вне небеснаго Женихова чертога изгнани будут, зане осквернившии боготканную одежду святаго крещения. А наипаче при толиких страшных запрещениих, Господу глаголющу: горе непраздным и доящим в тыя дни; пророком оплакующим жениха и невесте, яже при последних временех; апостолу глаголющу: в вавилонское разорение глас жениха и невесты не услышится к тому в тебе: и богословцем отцем вещающим о таковых: яко имущия во чреве разсядутся; священный церковный закон яснейше трубы вещает: изряднее же да весть иерей, яко супружества между восхищающим и восхищенною, егда сама восхищенная в власти восхитившаго ю пребывает, такожде и потаенная и вся прочая супружества, яже не с благословением церковным и чинным от своего си пастыря, си есть от епископа или от тоя парохии священника, венчанием при дву или трех поне свидетелей свершаемая, по соборному уставлению и святых отец учению, — незаконна, паче же беззаконна и ничто же суть. И в Матфеове книге в составе 3-м, в правиле Василия Великаго 32, объявляет про прежнее и еже нам утверженное глаголет: но тогда убо с пристатием единем брак стояше, в нас же не убо состоятися может, кроме священнословия.

К сим прочее да умолчат в нынешнее, последнее и плачу достойное время вси тии, иже и хотящии и потящиися о том, дабы им в супружестве жен жити, и да гладким девства и чистоты шествуют путем. Аще ли же зело слабы и ленивы, к сицевым желатели же зельны и ревнители к сопряжению жен, и ни к церковным прочим законам такова усердия непоказующии, но брак, церковную тайну, всюду проповедующии, главизны от Писания те прочитающии, яко брак несть возбранен от Бога, яко жена помощница мужу дана, и еще: лучше есть женитися нежели разжизатися, — и сия горе и доле возвышают гласы, еще же и христианских ревнителей, учителей оболгующии, яко брак возбраняют, — сии да услышат от нас, грубых пустыножителей, да не клевешут и на нас напрасно: мы не возбраняем брака, почитаем девство паче брака, и зело советуем, по нуждному сему настоящему времени, не обремененным чистым путем тещи; аще же кто и не послушает, но хощет сопрящися, сопрягайся, не возбраняем, но точию по церковному преданию. И како? Слыши, что глаголет священный церковный закон в вышереченных: взыщи епископа благочестиваго, или от его парахии священника, и блюди, чтобы оба были благочестивы, зане священник от епископа бывает, и от его правим и наставляем и разрешаем, и его повелением вся тайны строит. К сему жених и невеста были бы кроме всякаго препятия правильнаго; к сим же да обрящеши церковь благочестивую, по благословению православнаго епископа освященную и от еретик не оскверняемую, и тако венчайся, и живи по Божию закону, якоже лепо православным християнам, и клеветы не сшивай на смиренных и безответных пустынников, яко брак возбраняют, се — и не возбраняют брака. Аще ли же кто правоверен и не может обрести ни епископа благочестиваго, ни с ним, ни от его благословляемаго священника, к сим же ни жертвенника православнаго: прочее в сопряжении жены, кроме сих, не дерзай, и ниже на нас оглаголуй: не мы сия, ими же брак состоится, отымаем, но закон: епископ, иерей, и церковь, в ней же венчание, но Божиими праведными судьбами. Будеши ли от невоздержания хулити для возбранения сопряжения? Ужаснися, на кого пойдет хульное твое слово? Понеже Его владычним священным церковным законам в сих уставех брак заключися, а кроме сих отнюдь не попустися, Его же судьбами той и отъяся. Прочее, аще и не воздержен еси, Законодавца убойся, Царя горних сил усрамися, священнаго церковнаго законоположения устрашися, яже объявлене вся супружества, кроме вышереченнаго церковнаго чиннаго браковенчания, яко беззаконны, отмещет. И к сим убо от нашего малоумия довольно мним во объяснение священныя сия браковенчания тайны.

К вам же, о боголюбивии церковнии питомницы, ты убо, о боголюбивый верше, Феодосие Васильевич, и прочии благочестивии во едином православия согласии пребывающии, учителей сословие вкупе с церковным причтом и со всеми яже о Христе братиею и боголюбивыми християны: сие наше беседование, яже мы дерзнухом от любве понуждаеми, сошедшиися соборне, и усоветовавшии писати к вашей любви, сицевыми беседами надеючися на вашу боголюбную любовь, зане известихомся, яко к единому зрите ко исправлению, яже к Богу благоугождения. И не вся убо, яже от нас писаная к вашему учителей сословию, — ни убо, и не буди нам таково безумно что дерзати, еже от Бога просвещенных, и инех научающих, многословием наказати. Аще и вам от преподобнаго смирения обыкновенно не точию учити, но и научатися, к вам убо точию в нашем писании, по премудрому некоему мужу, глаголющу: дай премудрому вину и премудрее будет. ІІрочая же ина убо яже от вас учимей дружине. Наипаче же во иже в небраковенчанном сожитии  пребывающим, овым и боголюбивым християном, их же и молим отстати от таковых. Другая же и ко иже зельне к беззаконному смешению прилежащих и брачитися еще произволяющих или и брачившихся, еще же и ратоватися и боротися со учительными людьми готовых сущих, к сим же и всегда подкопы и поимы деющих: во уврачевание таковым, мала и кратка словеса зде вписашася.

Но и во всех сих словесех несть бо, несть нам довольным быти таковых научити, но точию от себе что, поелику сила к полезному внести, и примеситися и ленивым к вашему бодрому учительству, прилежание вящше имети нам — кои же во християнех до крещения сшедшимся в супружество и по крещении без браковенчания чадородствующим. Молим же и вашу учительскую светлость, да исправите сия врачевскою вам от Бога даннаго хитростию. А яко же от вашея боголюбныя ревности отсечены от церкви, яже беззаконне по святем крещении брачившияся, к ним же не мало обрящет кто реченных в сем нашем свитце. Сице, боголюбезнейшии, потщитеся кои и до крещения в неведении сшедшиеся с женами, да по крещении обрящут ведение, да безместно девственно живут житие, да плевел без браковенчаннаго смешения истребится, очистятся церковныя нивы и чисто покажется от скотоподобнаго невоздержнаго жития благоверия село, и боготканная святаго крещения одежда не наветуется от браконевенчаннаго чадородия, и церковныя тайны не смесне да покажутся коеяждо своим действом и чином. Аще ли же что инако возмнится вашей любви, или укреплятися неким о таковых сожитиих, от таковых свидетельств Писания, то молим вашу любовь, да против сих беседований наших к нам отпишите и силу словес, яже аще возмнятся превосходити вышереченная свидетельства, да покажете. Да (будет) вся, яже от нашея грубости к вашему боголюбию, и от вашего благоразумия к нашему недостаточеству, — во мнозе совете спасение бывает. Яже от обоих разумений Божия усмотрено, Божия ради благодати сообщено, да единомышление от таковых возсияет и недостаточное кое у кого разумение да направится, и исполнится писанное. Брат братом помогаем, яко град непреборим. Да от сих наших, яже о благочестии подвигов, церковь да светлеется, и правовернии да просвещаются, противнии же да посрамляются, и бежат лукавии бесове. Во всех же сих да славится едино триипостасное Божество Отца и Сына и Святаго Духа, ныне и присно, я во веки веком, аминь.

Послание польских федосеевцев к поморцам о браке

Многочастне и многообразне, им же образом желает елень на источники водныя — сице желала и желает душа наша тщатися блюсти единение духа в союзе мира, им же едино тело и един дух. Якоже бо звани быхом апостолом во едином уповании звания нашего: един Господь, едина вера, едино крещение, един Бог и Отец всем, иже над всеми нами, такожде и над северными странами, елицы близ окиянския пучины Божия ради любви жительствующе, их же ныне даде Бог овы благовестники, овы же пастыри и учители к совершению святым в дело служения, в созидание тела Христова, дондеже достигнем вси в соединение веры и в разум Сына Божия, в мужа совершенна в меру возраста исполнения Христова.

В начале духовному настоятелеви еже о Христе общаго братства Даниилу Викуличу и по нем второму правителеви учительными словесы Андрею Дионисиевичу и со всеми прочими учительными людьми и еже о Христе с братиею, такожде и повсюду в вас иночествующим пустынножителем и учителем, и всякаго возраста христианскаго сословия рачителем, в них же православие хранится и христанство соблюдается, — от грешнаго и неключимаго во общем житии совещателя и от всей ми еже о Христе братии, учительных и простых и повсюду православных христиан, стократное поклонение и о Христе целование, во общую радость, аминь.

Изволися вам ныне, о блаженнии, якоже рекосте, от любве Божия совокупитися и собратися соборне, не только вам, но и из Понизовых городов учительным людем, и радоватися и зело возрадоватися вам огнем любовным, якобы о преспеянии нашего праваго благочестия; и паки да якобы тая же любовь, глаголете, и еще возжгла и понудила вас писати к нам, — аще мнится и от благаго быти предложения, но в лице нам с поношением, — соборное свое послание. И аз многогрешный, аще и мал сый разумом и убог смыслом, но братскою любовию в той же вере святых укрепляем, приях в руку с любовию соборное ваше к нам, грешным, послание и прочтох е со вниманием: и овогда подивихся, а иногда прослезихся, видя такову беду вашу, яже о нас. Еже бы болети и слезити нам, душею якобы и не любя, или не приемля наказания братня. О сем бо известно и истинно вемы: брат, братом вразумляем, яко град твердый бывает. Но зде показася и явися нам, яко не токмо ктому утверждается, но и все здание, и с основанием, — не яко бы наше, но апостольское и святых отец, — возводительными от вас словесы на ны разрушается, и до основания раскоповается; зане не токмо христиан живших и ныне сущих, но, по тому же, и святых отец прежде бывших и хранящих апостольския уставы от самаго воплощения Господа нашего Ісуса Христа и до ныне, то ваше послание и соборное наказание, в возводительных словесех на ны, яве в безконечных огненных и жупельных муках вашими словесы осуждает. Сего ради, аще и болезнование ми душа о сих отписати вам, да известится к вам о сих известно в словесех весь совет наш. Но понеже убо тесное разума и недоуметельное языка моего сведый, — мнаго леняхся, о блаженнии, яже выше силы моея начати и немощная дерзнути, якоже некии безстудни или дерзости уготованныя, иже сицевая дерзающих смотря беды. Аще, по апостолу, и вся ми леть суть, но не вся на пользу; и паки: вся ми леть суть, но не вся назидают. Аще бо Моисей, он божественный законоположитель, иже всякаго человеческаго видения отлучив себе и жития треволнение оставль и явление всякое вещественное отрясь, и души зрительное очистив, отвсюду к боговидению быв потребен; и еще к нам Бога Слова человеколюбное сошествие и Того пачеестественное воплощение в купине, и невещественнем огни видети сподобися, распаляющу убо и разжигающу купину и к своей светлости прилагающу и, непопаляюще же, ниже потребляюще, ниже убо своего ся естества изступающу; иже первый Сущаго и поистине Пресущественнаго суща научен быв Имени, и своих соплеменных предстательству от Бога поучаем, гугнива нарицаше себе и косноязычна, яко не могий послужити божественному совету и чести и святых явлению известити и ходатай быти Богу и человеком: и сия многажды помышлях и глаголах о себе, како аз, оскверненный всяким грехом и окалян в тине всякаго зла, нося же и помысла в себе многосмущенную бурю и ниже ум, ниже разум очищен имея, якоже зерцало к Богови Святому, к сим писати покушуся или словеса глаголати покажуся? Но обаче, иже в нас богоноснии отцы и разума истиннаго таинницы, се послушание быти уставляют, во яже паче силы неразсудно повелевающих послушати. И яко аще бы не страх и многа беда была — ярем преподобнаго послушания, паче же матерь всех добродетелей от себе отметнути, быхом безсловесне в яже суть паче силы нашея дерзнули. Такожде, егда и начнем с Богом глаголати, или рещи: беседовати к вам, да не возмнится, яко бы нам тщатися любопрение противу показати, или некако в словесех тщеславие являти, или покушающимся свести на безмерие в десная или на умаление в левая хотящим тещи самым царским путем к велией почести вышняго звания. Вам бо, вемы известно, яко бо оба та пути единаки суть к погибели, яко в низводящий на слабость в низоту, таков и возводящий на безмерие в высоту, и якоже погубляет возношение и славолюбие, тако низлагает сластолюбие и плотолюбие. Того ради и Златоустый глаголет [На поле: Маргарит, на иудея] не яко на деянное или якобы и глаголанное от кого смотрити подобает точию, но и вину бываемым искати. Еже бо по воли Божией бываемое, аще и зло быти мнится, всех добрейшее есть; а еже паче воли Божия, еже Он не хощет, аще и добрейшее быти мнится, всех злейшее есть и беззаконнейшее. Понеже многа суть таковых различия, такоже и образы безмерных начинаний, еже по слову или по виду дела якобы добра или красна или полезна являются, а вещию от воли Божии в ересь склоняют и анафемы подлагают. Яко обращающагося от греха не приемляй кто в покаяние — антихриста себе творит: такожде и Максим Киник — волк нарицается вместо пастыря, аще и вся грехи прощати готов согрешающим. И якоже глаголемии чистии за ересь свою погибают, тако и блудницы во огнь вечный отходят. И есть ересь разумоборцов, и есть ересь обычае-претыкатель, и есть ересь кривосказатель, и есть ересь словоистолкователь, также и раздорник. Сего ради о священных правилех наказует преподобный Никон християн — до кончины века хранити. И паки о сохранении и о соблюдении святых соборов и правил их глаголется в Кормчей, иже всяко отражает мнение и суетное сопротивословие: последуяй же, рече, прежде его святым собором — той собор свят есть; не последуяй же прежде его святым собором не свят, но осквернен есть и отвержен. Сия же вся преднаписанная глаголет изложения же и отвещания святых соборов. Аще кто от угодных богоносным отцем поколебает что, не ктому се смотрение нарицаем, но преступление предания вменяем и к Богу нечестие. И сия правила, яко же предрекохом, подобне и градстии законы сице глаголют, яко еретик есть и еретическим подлежит законам, аще и мало что уклоняяйся от православныя веры. Павел же апостол, и большее благобоязньство хотя вложити страшная глаголет: аще мы, рече, или Ангел благовестит вам паче преданнаго, проклят да будет. И сия чесо деля? Яко да не будет в нас зрения или обиновения на лица человеча. И о сих преупокоим слово дозде.

Принесем же ныне и настоящая к вам, о нем же нам повесть предлежит, — да изглаголем. Пишете вы к нам, о блажении, и сказуете о своей преискренней любви сицевыми словесы: понеже любы Божия, совокупившая ны во едино упование вышняго звания: та убо вся беззавистнодержне дерзает, — и учитися и учити, и советовати о полезных и совета блага искати; та и понудила премудраго некоего рещи: дай премудрому вину и премудрее будет, та же и нас ныне, соборне собравшихся, взожгла огнем любовным, — тажде убо, глаголете, — и понудила нас писати к вашей любви о привнесшемся обычаи в некиих христианех вашея паствы, иже в неведении христианства спрягшися с женами, и потом, по познании и по крещении, паки сожительствуют чадородием, кроме бываемаго на таковых браковенчания. К попущению же таковых сожительств приводится, — якоже рекосте, — от нашего пастырства свидетельство от слова преподобнаго отца Іосифа Волоколамскаго: якоже пишет [Иноческий Потребник] священномученик Климент, Петра апостола ученик, егда апостол Петр в Риме Софию востави от недуга, и прежде всех верова муж ея в Господа нашего Ісуса Христа, и вероваше в той день три тысящи; и повеле апостол поститися всем 40 дней, и пришедшу времени крещения, крести всех во имя Отца и Сына и Святаго Духа. И потом бяше им совет и поучение апостола, аще от них восхощет кто приити на девственное житие; и приступиша к нему от них 160 — девственное житие прияша; апостол же тех пострищи повеле. И паки рече апостол: аще кто хощет воздержатися и легок на высоту быти изменою, да идет на особная места тихая, да ту празднует молитвами и алканием и почитанием и ума очищением; прочии же по своему подобию, яко же кто изволит. И сия убо свидетельства, — рекосте вы, — яко вы, приемше в руку, соборне разсмотрящи, и не обретаем, — глаголете, — в них помогающее таковому сожительству ни мало. И паки, глаголющи апостольское слово: прочии же по своему подобию, якоже кто изволит, — толкуя, износите: и сих ради словес, глаголете, аще надежно крещшимся мужу и жене без венчания смешатися? И паки наказуете ны и о той же апостольской речи пишете: но понеже он, верховный апостол Христов, не к супружным точию вещая сии слова, но ко всему народу, трем тысящам, в них же, толиком народе, лепо быти и супружным и несупружным, юношам и девицам и детям малым, от них же, толикаго множества народа, точию 160 девственное житие прияша, прочии же по своему подобию, якоже кто изволит, — аще кто без венчания возмнит, сих ради словес, жити, то не точию супружным, но и юношам девиц поимати без браковенчания попустит, понеже общее ко всем сие слово речеся, и явен блуд в церковную породу внидет тако. И паки, еще повлачая ны, к тому глаголете: аще ли кто восхощет отделяти супружных от несупружных, глаголя, якоже и глаголют: сии в неведении посягли, друзии же в ведении, — и сего разума в апостольских словесех онех поискав, глаголете, не обрящеши, и разделяти их будет по некоему своему разсуждению, а не по апостольскому законоположению.

Оле дивство и велие чудо, — от собора вашего к нам, грешным, на апостольское законоположение страшнаго и крепкаго ответа! Яко бы и блудников и блудниц посягших, и в ведении в блуд впадших, разделяти их, глаголете, будет по некоему своему разсуждению, а не по апостольскому законоположению! Что же апостол сопротив вашего ответа глаголет? Или не весте, рече, яко прилепляйся сквернодейцы едино тело есть с блудницею, будета бо, рече, в плоть едину оба. И паки: не льстите себе, рече, ни блудницы (и прочих злобах исчет глаголя) царствия Божия не наследят. И в правиле 26-м В(асилия) Великаго о сем ведение показует, яко блуд не брак есть, ни браку начало, но грех и преступление закона Божия; якоже аще кто по блудодеянию совокупится с женою, да отступит от нея. Такоже и в Номоканоне правило 176-е являет: прелюбодей или явленный блудник не приемлется в церковь, ниже приносы его, аще не оставит греха, по 39 правилу Великаго Василия. Что к сим глаголати будете, яже о несупружных и в ведении посягших? Оглаголуя нас, поносяще рекосте: и разделяти их будет по некоему своему разсуждению, а не по апостольскому законоположению. И в том вы словеси, апостола Петра, тако и нас, многогрешных, возводительными словесы скверных и блуду учительных нарекосте. Понеже якобы Петр в своем учении, егда отлучашася на девство 160, прочим по сих, и несупружным, повеле, тако глаголя: прочии по своему подобию якоже кто изволит, — и на ны пишет, якоже и глаголют словеса ваша. Но мы, аще и многогрешна, но не тако неистови есмы, яже бы комуждо от них, яко мужем тако и женам, и якоже вдовицам так и вдовцам, и якоже юношам, тако и девицам, по святом крещении не разумети, по апостолу, по своему подобию законне пребывати.

Аще ли паки еже пишете на ны, зазрев нам по святом их крещении о разделе супругов, брачившихся от еретик, якобы о сих и глаголют нецыи от нас: и сии в неведении посягли, друзии же в ведении, а обои поганскими или еретическими браки. Вы же глаголете: и разделяти их будет по некоему своему разсуждению, а не по апостольскому законоположению. И о сих ведомо вам да есть — книга Феодора Вальсамона, правило 68: якоже рекло Писание, еже еретической брак несть брак, но блудилище, и аще обратятся ко истинней вере в соборной апостольской церкви, и крещеннии мvром помазуются токмо, и аще хотят жити совокупно, аще дети будут, — паки да венчаются в церкви. Что же к сим: еще ли и сей таковый брак, беззаконный, по вашему укору разделяти будет по некоему своему разсуждению, а не по апостольскому законоположению? О них же Златоустый, наказуя, опасает: врази бо неприязни церковныя еретицы, ничим же разни от прочих поганых, незнающих Бога, во вся роды погибели предадятся. И о том всякаго христианина такожде в Номоканоне и святый Тимофей Александрийский наказует: со еретики и к еретикам не ходи, за преслушание же того на таковых церковную казнь — апостольское 65-е правило поведает: вшедый в соборище иудейское, или церковь еретическую или поганску, и помолився с ними, аще убо есть мирский человек, да отлучится, аще ли причетник, да извержется, яко иудейская мудрствуяй. Кольми паче, аще христианин сый и по крещении дерзнет венчатися от жидов, или от поганых или от еретиков, то и от градскаго закона таковый конечней муце повинен есть.

Да вы же и еще пишете, понося нам, и якобы вопрошая, а сами уже по малу и ответы творите. И аще будет по ответам вашим Бог ны судити, то яве и апостолом и святым отцем леть есть за свои уставы с нами страдати. Аще ли ни, то блюдите, да не сами в сих постраждете за хулу и разсечение браков законных, якобы и доныне от познания веры показуется не приимати в церковь. Аще неции, невернии суще, законным браком совокупишася, и потом муж убо неверный приступит к вере, тако же и жена, и по крещении их тамошнее законное их брачное совокупление растерзаете и глаголете: зело бедовметно есть и страха полно таковым смешатися, кроме церковнаго брачнаго освящения. И паки приводя речи из чину браковенчания, от указа священником, коим венчати повелено, якобы сей брак, иже, невернии суще, законным браком совокупишася и, по крещении их, за смешение без браковенчания, якобы беззаконна отмещутся, — идеже сих ни едино слово во отметание помянется, или беззаконный той брак быти изглаголется. А вам смети оттуду, от себе и с дерзостию на ны, толковати сими глаголы: и да не глаголет, рече, кто, яко до крещения сшедшимся леть есть по крещении смешатися, — зде бо церковный закон, яко ножем истины, перерезует вся изветы и единым словом заключает церковную тайну, глаголя: вся прочая супружества, кроме венчания, беззаконна.

И паки, устояв на сем слове, якобы и на сей брак глаголется — такожде ему по крещении без венчания не быти, с дерзновением пишете: а ельма глаголет «вся супружества», к тому прочее не единаго супружества, — от сей речи толкуете, — оставляет быти в церкви кроме чиннаго церковнаго венчания. И аще бы мы, скудоумнии, от таковой речи сей на таковый брак что от хулы своей отрыгнули, и то бы нам не бяше чудно таковая изглаголати, якоже бо и апостольскою речью нас, пиша, повлачаете. Нам же убо, грешным, аще и не смысленни умом, устав той священником о брацех показуется: да не будет брак беззаконный, без венчания, в христианех меж юнош и дев, или вдов и вдовцов, и от избеглых, такоже и от похищения, и от насилия, или по любви, но тайным, без венчания, — та, яко беззаконна и ничтоже суща, отмещутся; того ради поставляются и свидетели быти, того ради и уставляет и венчанию быти в церкви, и при людех да будут. Те законные браки были кроме всякаго правильнаго препятия, о том и вся Кормчая свидетельствует. А к тем убо, аще нецыи, и не вернии суще, законным браком совокупишася, и потом крестишася, тамо во уставе и во всей Кормчей разсечения браку их несть.

Вы, же, много ратуючи на ны, и еще хулите тако: и зело де неправедно и бедно тем, иже и до крещения сшедшимся в супружество по ветхому человеку, а в новаго человека облекшимся, а на супружество браковенчания церковнаго и иерейскаго благословения не имеющим, — смешатися чадородием. И не вем, что тако к сим речем и с каковым умыслом прикрыв еще речь, пишете: а не реку сквернитися не по христиански. А еще и при толицем страхе, апостольскому священному слову глаголющу: аще кто растлит церковь Божию, растлит того самого Бог, зане от святаго крещения человек бывает церковь Божия — чиста, и свята, и непорочна; аще ли кто ю блудно растлит в себе или в другом чьем лице, сам Бог грозным и яростным мщением и Собою мстити хощет таковым, рекше нестерпимыми и прегрознейшими муками в безконечных огненных и жупельных муках; темже боятися и трепетати им подобает о сих, да не когда таковаго ради небраковенчаннаго смешения чужды обрящутся зде соборныя апостольския церкви, в будущем же веце да не вне небеснаго Женихова чертога изгнани будут, зане осквернившии боготканную одежду святаго крещения.

Слышим убо, о возлюбленнии, сии ваши к нам страшныя и зело воспретительныя о сих глаголы, и помышляем днесь, якобы аще и нам такоже прилучитися о сих, купно с вами возревновать. Пощади, Христе Боже! Тогда от Христа и от святых апостолов, такожде и от святых отец разума и от их предания в зело темен и глубок ров такова нечестия ниспасти бы было. Темже да принесем во свидетельство истинная словеса о сих вселенныя благовестника и учителя Павла; и аще разума в речах его недостатком своим не обымем, и мы вопросим о сих толкования учителя Златоустаго, и той открыет нам всяко.

Что же апостол о сих пишет? Имам убо похвалу, рече, во Христе Ісусе (в тех), яже к Богу. Не смею бо глаголати что, ихже не содея Христос мною в слушании языков, словом и делом, тако, якоже ми от Іеросалима и окрест даже до Иллирика исполнити благовествование Христово. Счисляй прочее, по Златоусту, и грады и веси, и языки и народы, не под Римляны самыми, но иже и под Варвары: не бо ми сквозе Финикию и Сирию и Киликию и Каппадокию да идеши путем, но и задняя вся помышляй — и Саракины, и Персы, и Армены, и иныя варвары. Сего бо ради рече «и окрест»: да не просто общим путем идеши токмо, но и всяким, и иже на Юг — Асию да обтечеши умом. А якоже многособрание чудес — единем словом мимотече, рекий: в силе знамений и чудес, в силе Духа Божия. Сице и грады неисчетныя, и языки, и народы, и страны: единем паки сим совокупи глаголом, еже «окрест». Сице же потщався, рече, благовестити, идеже не именовася Христос, да не на чуждем основании созижду, рече. Такоже являют и послания его благовестие — к Римляном, и к Коринфяном, и к Галатом, и к Ефесяном, и к Колосаем, и к Солунянам, такожде и к Евреом, и к Филиписиом. И от тех языков писаша убо к нему Фортунатом, и Стефанином, и Ахаиком, им же и той пишет, — и сие яви при концы послания, — не убо о всех, но о браце и девстве. Тем же и глаголаше: А о них же писасте ми: добро человеку жене не прикасатися. Писаше бо к нему, аще достоит удалятися жены, или ни? И к ним описуя и о браце законополагая, вводит и еже о девстве слово: добро человеку не прикасатися жене — аще убо доброе и зело преимущее ищеши, рече, лучше ниже отнюдь приобщатися жене. А оженившимся завещеваю не аз, но Господь, — понеже закон, известными словесы от Христа положенный, хощет прочитати, о еже кроме блудодеяния не оставляти жены. Сего ради глаголет: «не аз», а инде же «аз»; сия словеса имут различие. Да убо ниже егова человеческая быти непщуеши, сего ради наведе: мню бо ся и аз Дух Божий имети. Что убо еже оженившимся завеща Господь? Жене от мужа не разлучатися; аще ли же и разлучатися, да пребывает безбрачна, или да смирится с мужем своим; и мужу жены не отпущати. Понеже и воздержания ради и иных ради изветов и малодушия приключахуся бывати разделения: лучше убо, неже быти началу, рече; аще ли же и будет, да пребывает жена с мужем, аще и не смешением, но за еже никогоже другаго приводити мужа.

Сие убо, о возлюбленнии, добро бы, по апостолу Павлу и по Златоусту, и вам и нам в меру глаголати, и чистое скверным не нарицати. Горе бо оглаголующим доброе злом.

Аще ли же пишете к нам, поношая ны, глаголя: покажи же ми, откуду тии крепятся, иже до крещения совокупившиися и по крещении смешатися им кроме церковнаго чиннаго браковенчания; понеже де во апостольском законоположении, и в вышереченном свидетельстве, того разсуждения не обрящеши. Зде к вам о сих подаст апостол зело крепкий ответ: кождо в звании, им же призван бысть, в том да пребывает. О них же в правиле 72-м вселенский шестый собор свидетельствует: аще же нецыи, невернии суще, законным браком совокупишася, и потом муж убо неверный приступит к вере, жена же еще лестию одержима есть, и аще волит верен муж жити с неверною женою, или верная жена с мужем неверным, да не разлучается, по божественному апостолу: святит бо ся, рече, муж неверен женою верною и жена неверна мужем верным. И тако, рече Златоуст, во всех церквах, повелевая же апостол. Сего ради святии в Кириллове книге, аще и о крещении малых детей, от апостол уверяя, новокрещенцов наказуют, яко Христос не посла учеников своих к верным, но к неверным, ихже потребно первие учити, потом же крестити, не токмо великих, но и со всеми домашними их, сиречь с женою и с детьми, якоже и ныне егда кто от жидов, или от еллин, или от иных неверных, возрастный леты, восхощет креститися, первие его православной вере научати и, научив, аще имеет жену и дети, привести его на то учением тем, дабы с женою и с детьми, и просто рещи — со всем домом своим святое крещение восприяли. Тако бо и апостоли твориша, якоже Павел и Сила приведоша в веру стражника темничнаго и крестиша со всем домом его, такоже и Криспа начальника, и иных многих, якоже и сам Павел апостол свидетельствует, крестих же и Стефанинов дом. Тому же подобно и Иоанн Богослов крести  Мирона и жену его с треми  сыньми. И тамо же приложи, якоже  единаго дне мужей двести, и с ними вкупе жены и дети их. Такоже и Анфипата — судию с женою и сыном. Сия бо суть неложная  свидетельства, яко и апостоли дети крестиша.

И о брацех их супружества пишете к нам: умолчано зде, молчи де и ты. Но нам, грешным, невозможно суть уняти труб богоносных и чрез нас вопиющих Павла и со Златоустом по вселенней: кождо в звании, имже призван бысть, глаголют, в том да пребывает; глаголю же безбрачным и вдовицам, добро им есть, аще, рече, пребудут, якоже и аз; аще ли не удержатся, да посягают; а оженившимся, рече, завещаваю не аз, но Господь: жене от мужа не разлучатися; аще ли же и разлучится, да пребывает безбрачна, якоже и при Петре апостоле от трех тысяч, по святом крещении, 160 прияша девственное житие; прочии же по своему подобию, якоже кто изволит, рек апостол. Еже и выше к жене глаголется: аще ли же разлучится, да пребывает безбрачна, или да смирится с мужем своим, и мужу жены не отпущати. Понеже бо, пишет Златоуст, и воздержания ради, и иных ради изветов, и малодушия приключахуся бывати разделения: лучше убо ниже быти началу, рече; аще ли же и будет, да пребывает жена с мужем, аще и не смешением, но за еже никого другаго приводити мужа. Сия бо не суть препоны к благочестию. Жену имея неверну зван был еси, пребывай имея ю, и ради веры не изгоняй жену; раб ли сый призван был еси, да не нерадиши, аще и можеши свободен быти, но наипаче употребляй сего, сиречь наипаче работай; в необрезании ли сый зван был еси, пребывай необрезан; в обрезании ли сый веровал еси, пребывай обрезан. Се бо есть: комуждо якоже разделил есть Бог. Сия бо, рече Златоуст, не суть препоны к благочестию.

Вы же, о возлюбленнии, вся сопротивная сим и отметная, со всеми святыми ратующися, — аще кому покажется и от благаго предложения, — на ны писали есте, толкуя от себе. Да и от всех де божественных писаний яве показуется, яко ина тайна есть святое крещение, и другая де есть браковенчание; крещение де супружных и несупружных равно освящают, Адамля первороднаго греха очищает и от всех прочих его богомерзких деяниих обмывает, и от прежняго языческаго совокупления очищает, и Божие сыновство подает, и во Христа облекает. «Елицы бо во Христа креститеся,  во Христа облекостеся» — апостольское де нас священное слово научает, а не мужа де с женою во едину плоть совокупляет. И понеже де первое кого сожитие с женою до крещения по ветхому человеку бысть, — всякому ведомо есть; и понеже ветхаго человека, тлеемаго в похоти, совлечеся крещаемый совлечеся и деяний его, — отста де от совокупления жены, иже не по церковному освящению даемыя, в новаго же облечеся — Христа. Не убо де и оба вкупе, но особь убо муж, особь же жена, — яко бы они, по вас, уже и Христа разделили. И от браковенчания де исходят ов больши, другая же мене, ов глава жене, другая же покорение нося, и бывают оба во едину плоть, яко же священный чин церковный браковенчания нас научает. От крещения же оба де исходят равно во Христа облечени, и ни ов больше, другая же мние, о Христе бо де Ісусе несть мужеск пол, ни женск; крещение бо братство подает, а не телес совокупление. И зело де бедовметно и страха полно таковым смешатися, кроме церковнаго брачнаго освящения и сквернитися не по христиански. А еще де и при толицем страсе, апостольскому слову глаголющу: аще кто растлит церковь Божию, растлит того самого Бог, зане де от святаго крещения человек бывает церковь Божия чиста и свята и непорочна: аще ли де кто ю блудно растлит в себе, или в другом чьем лице, Сам Бог грозным и яростным мщением и Собою мстити хощет таковых, рекше нестерпимыми и прегрознейшими муками в безконечных огненных и жупельных муках; и яко зде таковаго де ради небраковенчаннаго смешения чужды обрящутся соборныя апостольския церкве, в будущем же веце вне небеснаго Женихова чертога изгнани будут, зане осквернившии боготканную одежду святаго крещения.

Зрите, о возлюбленнии, како ли не добре глаголет Писание, егда кто не боголепно словеса святых приемлет, в велик брег стремнины ниспадает. И паки вправду речеся, яко письмо убивает, дух же живит. Понеже по сих вышеписанных глаголех, не токмо мы, грешнии, или те христиане и с женами, но и апостол Павел и с прочими святыми приговорены быти зде чужды соборныя апостольския церкве, в будущем же веце вне чертога изгнанным глаголете быти в вышеписанныя неизглаголанныя муки, его же Павловыми глаголы и за его, Павловы же, уставы. Понеже он тем, иже аще нецыи, невернии суще, законным браком совокупишеся и потом приступиша к вере и крестишася, ссылаяся на Христа, устав им положил, глаголя: кождо в звании,  в нем же призван бысть, в том да пребывает; глаголю же безбрачным, рече, и вдовам: добре им есть, аще пребудут, якоже и аз; а оженившимся завещаю, рече, не аз, но Господь, жене от мужа не разлучатися, и мужу жены не отпущати. И не токмо якобы сам от Христа таков устав положи, но и к прочим иным уже и сам от себе такоже дерзая, якобы и страннее сих, а таков же и равен к имевшейся устав положи: прочим же глаголю, рече, аз, а не Господь, — аще который брат жену имать неверну и тая благоволит жити с ним, да не оставляет ея. Зде ли вонми, возлюбленне, брата, по Златоусту, зде глаголяй всякаго простовернаго, да не будеши ми глаголати оглашеннаго. Что бо есть творящее братство? Баня пакибытия, еже возмощи нарещи Бога Отца; темже оглашенный убо, аще и инок будет, несть брат; верный же, аще и мирянин будет, брат есть.

И да не зазрите ми, о возлюбленнии, продолжения слову, понеже бо довольно от вас наказан есмь не предлагати вам вкратце словес в разсуждение ваше. Того ради аще где о чесом якобы нам аще и благоразумна суть глаголемая, но нам сим братски не смеет рещи, понеже довольне от вас повлачими есмы. И не чудо, душа бо любопытлива в долзе словеси усыпати обыче. Темже сих ради да будут и да возвестится вам от нас яве и ясне апостольская законоположения, якоже и выше рекохом. Аще который брат жену имать неверну и тая соблаговолит жити с ним, да не оставляет ея; и жена, аще имать мужа неверна и той соблаговолит жити с нею, да не оставляет его. Что глаголеши? пишет Златоуст: аще убо неверный, да пребывает с женою, аще ли же блудник — не ктому? Идеже меньшее есть блуд от неверства? Меньшее убо есть блуд, но Бог твой их щадит зело. Сие и в жертве творит, глаголя: остави жертву и смирися с братом своим. Таже да не боится жена, яко нечиста бывши за смешение, — глаголет: святит бо ся муж неверен о жене верне и святится жена неверна о муже верне. И толкуя Златоуст о сих глаголет: и аще убо блудницы прилепляяйся, едино тело есть, благоявленно, яко идолослужителю прилепившаяся едино тело есть? Едино убо тело есть, но не бывает нечиста; но побеждает чистота женска нечистоту мужню и побеждает чистота вернаго мужа паки нечистое неверныя жены. Слышите, о возлюбленнии, како зде, по святом крещении, не токмо обе части, якобы верных, но единаго вернаго, а другаго еще суща неверна, а без чиннаго церковнаго брака венчания, противу вашего  толку,  якобы сопротивляяся вашему законоположению, той Павел и Златоуст смешатися и не боятися повеле; и не рече сицевым, по вашему: аще по крещении кто растлит церковь Божию в себе или в другом лице, растлит того самого Бог; ниже рече: яко оскверниша боготканную одежду святаго крещения. Но не бывает, рече, не чиста,  аще и едино тело есть со идолослужителем по смешении, но побеждает, рече, чистота женска нечистоту мужню и побеждает чистота вернаго мужа паки нечистое неверныя жены. Како убо зде победися нечистое, тем же и изволено бысть сопряжение, о блудней же жене несть оглаголуем изгоняяй ю муж? Зане убо зде надежда есть спасатися погибшей части брака ради. Внимайте, возлюбленнии, яко же глаголет: брака ради, а не еже бы, по вашему, блуда ради. Яже бо о блудней жене пишет тамо же, рече: брак уже разрешися, и тамо убо обои растлеваются, и того ради несть оглаголуем изгоняяй ю муж; зде же единаго грех. Яко что глаголю? Соблудившая единою есть нечиста: аще прилепляяйся блуднице едино (с нею) тело есть, и той бывает не чист, с блудницею смешиваяся; сего ради отлетает вся чистота. Зде же не тако, но како? Есть нечист идолослужитель, но жена несть нечиста. Аще убо приобщилася бы ему в том, в немже нечист бе, глаголю — в нечестии, имеяше и та нечиста быти. Ныне же инако убо нечист есть идолослужитель, в иной же вещи приобщается ему жена, в ней же несть нечист; брак бо есть и смешение телес, в нем же приобщение. И который бы, глаголет, рцы ми, вред, егда и яже благочестия цела пребывают, и толико богатство твоей чистоты! И несть бо, рече, телес нечистота, им же есть приобщение, но — произволения и помыслов. Таже и указание: аще бо нечиста пребывающи, рождаеши отроча же, не от самыя тебе, убо нечисто есть отроча, или отполу чисто? Ныне же несть нечисто. Таже и наведе: понеже чада ваша нечиста суть (были бы), ныне же (свята) есть, сиречь не нечиста. Той же свята нарече преизобилием и богатством речения, паки изгоняя сицеваго мнения страх. И тако во всех церквах повелевая.

Темже от сих словес, о возлюбленнии, хощу приседети Павлу и вам, да не будем развращени от благочестивыя мысли посланием вашим. Павел глаголет и Златоуст повелевает пребывати уже спряженным бывшим и не излишних браней вины вводити. Не токмо якобы обеим частем, бывшим неверным и потом верным и крещенным; но аще которая жена мужа или муж имать жену и неверну, да не оставляет ю; кождо бо в звании, им же зван бысть, рече, в том да пребывает, еже толкуя Златоуст: жену имея неверну зван был еси, пребывай и имей ю, ради веры не изгоняй жену, брак бо есть. Темже и изволено бысть спряжение и смешение телес, в нем же приобщение, и да не боится жена, яко нечиста бывши за смешение. Вы же глаголете: понеже первое де кого сожитие с женою до крещения по ветхому бысть человеку, всякому ведомо есть; и понеже де ветхаго человека, тлеемаго в похоти, совлечеся крещаемый, совлечеся и деяний его — отста де и от совокупления жены, иже не по церковному освящению даемыя; и зело де бедовметно и страха полно таковым смешатися, кроме церковнаго брачнаго освящения, и сквернитися не по христиански. Павел глаголет и Златоуст толкуя: но не бывает, рече, нечиста, брак бо есть, темже и изволено бысть спряжение и смешение телес, в нем же приобщение. Вы же глаголете и на сих: крещение бо от Адамля де первороднаго греха очищает и от всех прочих его богомерзких деяний обмывает, и от прежняго языческаго совокупления очищает; и да не глаголет де кто, яко до крещения сшедшимся леть есть по крещении смешатися; зде бо церковный закон, яко ножем истины, пререзует вся изветы и единем словом заключает «вся прочая супружества», кроме венчания, беззаконна; и яко таковаго ради небраковенчаннаго смешения зде чужды обрящутся соборныя апостольския церкве, в будущем же веце вне небеснаго Женихова чертога изгнани будут, зане осквернившии боготканную одежду святаго крещения. А Павел глаголет: кождо в звании, им же призван бысть, в том да пребывает. И Златоуст толкует: несть бо телес нечистота, им же приобщение и смешение телес, брак бо есть: и пребывати уже спряженным бывшим, и не излишних браней вины вводити. Не бо о иже никогда же сшедшихся беседует ныне, но о сошедшихся уже. Яко и вселенский шестый собор, в толковании 72 правила, свидетельствует: аще же нецыи, рече, невернии суще, законным браком совокупишася, к ним же апостол глаголет: а оженившимся завещаваю не аз, но Господь, жене от мужа не разлучатися и мужу жены не отпущати. О них же правило 1-е, святых отец в Гангре пишет: аще кто законныи брак порокует, и верну сущу жену и благочестиву и говейну, смешающуся же с мужем своим, ненавидит или поречет, глаголя, яко сия не может внити в царство небесное, да будет проклят. И паки того же собора правило 12 (14): аще которая жена оставляет мужа своего и отъити хощет, гнушающеся браком, да будет проклята. И не токмо о сих, законным браком совокупившихся обоих и потом крестившихся, таков закон Павлом и соборы положен. Но по свидетельству в толковании правила 72 шестаго вселенскаго собора глаголется: аще же нецыи, невернии суще, законным браком совокупишася. Темже слышите, о возлюбленнии, что глаголется: невернии суще, законным браком совокупишася, — а не блудом рекоша святии, якобы по вашему толкованию, — и потом убо муж неверный приступит к вере, жена же еще лестию одержима есть, и аще велит верен муж жити с неверною женою, или верная жена с мужем неверным, да неразлучается, по божественному апостолу. Таже глаголет Златоуст: да не боится жена, яко нечиста бывши за смешение; темже изволено бысть спряжение и смешение телес; несть бо телес нечистота, в немже приобщение, брак убо есть, — а не рече, по вашему посланию: блуд, или растлит его Бог, но: святится, рече апостол, муж неверен о жене верне и святится жена неверна о муже верне и: чада ваша нечиста суть, ныне же свята суть.

Вы же о сих вся сопротивная апостолу вашим посланием к нам пишете. Павлу глаголющу: и чада ваша свята суть; вам же, с Павлом любопрящимся: имущия во чреве разсядутся. И мы, о возлюбленнии, не имамы разума о сих, еже вы пишите: чада ли та, святая, по апостолу, ли матери их, имущия во чреве, разсядутся? И како разсядутся, да увемы: расколются ли, или инако некако разлопаются? — Еже мы не видим не токмо над теми же брачными женами и над их отрочаты, но и над блудницами женами и над их дочерями. Убо есть ли что сквернейшее диавола, пишет Златоуст, умыслившаго проповедь, ходатайствующую муку прияти покоряющимся? Зриши ли, коликими злыми подает, рече, своим си муку и томление им от проповеди и от трудов сих умышляет! И каков бы их враг и супостат онех спасению все тако устроил? Зриши ли, рече, яко истину ратуяй и ничтоже может, но себе уязвляет паче, аки противу рожну перый. Темже молю, рече, о всех благодарим Бога, яко нам и труды облегчил есть, и мзды возрастил, их же бо у вас, женившися целомудренно, наслаждаются мезд, не наслаждаются у них действующии, но действующии, рече, у еретиков казни блудящих быша повинны. Како? Все же бывает от еже неправым разумом творити что, но на оклеветание Божиих тварей и неизреченныя мудрости Его. Сего ради, опасая и наказуя, апостол глаголет: духа не угашайте, пророчествия не уничтожайте; вся же искушающе, доброе содержите, от всякаго вида зла огребайтесь, — не от сего, или от онаго, но от всякаго. Толкуя и Златоуст: вся искушайте, рече, и ложная и истинная, да со искушением разсуждаете; и онех отгребайтеся, и сих держитеся. Сице бо и оных зельная ненависть будет, и сих любовь будет, егда не просто, ниже без истязания, но со опаством вся творим. Якоже пишет Златоуст, убо последнее есть время, в последняя бо времена, рече апостол, отступят нецыи от веры, внемлюще духовом лестчим и учением бесовским, в лицемерии лжесловесник, сожженных своею совестию, возбраняющих женитися. Что убо, мы сие возбраняем ли? Рече: женитися не возбраняем не буди хотящим, но не хотящих подвизаем на девство; ино есть возбранити, и ино властелина оставити произволения; возбраняяй бо убо всячески сия творит, а иже аки на большее девство возводяй, не возбраняя женитися творим сия, но подвизая девствовати.

Вы же, о возлюбленнии, такоже в словесех пишите, якобы не возбраняя, глаголете, женитися; а сами и законныя, уже бывшия, браки, их же прияла и приемлет апостольская церковь, отреваете и зельне с возбранением расторгаете; а не послушающих вы о сем зело, видим, неправыми словесы (поносите) и непротивознаеми, якоже бы и стрелы пущаемы, или, но Соломону, клятву якобы птенцы на сих посылаемы, испущаете. Тем же несть добра похвала ваша! Нам же не чудо о сих. Понеже некий от святых глаголет: аще кому потреба бывает некоего древа криваго, аще не обрящет, рече, таковаго, тогда и правое туды кривит, куды ему надобно. Сице же и вы, о возлюбленнии, творяще, еже апостольское писание, приводяще по своему хотению, искривляете, еже рече апостол: не весте ли, яко храм Божий есте. Понеже бо о пресецающих церковь в прежнем беседоваше касается прочее и соблудившаго, иже отчу жену появшаго, явленне убо не у, непредельне же назнаменуя растленное того житие; и возводя грех от уже даннаго ему дарования, ниже и иныя посрамляет якобы: и вы разгордеете, рече, а не паче плакасте, да измется от среды вас дело сие соделавый. То бо наносит, глаголя: не весте ли, яко храм Божий (иже отчу жену появшаго) есте и Дух Божий живет в вас; аще кто храм Божий растлит, растлит сего Бог. Видел ли еси, пишет Златоуст, срамление слова? Но донележе лице не явлено есть, не тако тяжко есть глаголемое, — всем раздельшим запрещение — страх: растлит его Бог, сиречь погубит. Се же не проклинающаго есть, но пророчествующаго. Храм Божий есть свят, соблудивый же сквернав: таже да не мнится ко оному простирати слова, рек: храм Божий свят есть, наводит: иже есте вы. И сия вы свидетельства возведосте на ны, якобы и мы учим мачех поимати, и жен отчих за жен имети. И аще бы тако, вправду и поистине рекли есте: растлит сего Бог, и: блудницы царствия  Божия не наследят, таже и о блудней жене: несть оглаголуем изгоняяй ю муж: а о сих, о них же писали есте ин есть образ,  якоже глаголют святии: их же потребно первое учити, потом же крестити, не токмо великих, но со всеми домашними их, сиречь с женою и с детьми, якоже и ныне егда кто от жидов, или от еллин, или от иных неверных возрастный леты восхощет  крещатися, первие его православней вере научити, и научив, аще имеет жену и дети, привести его на то учением тем, дабы паки с женою и с детьми и просто рещи — со всем домом своим святое крещение восприяли. И по вашему посланию о сих людях: по крещении, то им не мужи, а сии не жены, якобы святое крещение разсекло и разрушило их браки — то уже пресекло им и все плотское их сродство. И аще бы кто того не хотел, а сродство или браки их расторгать, и детей их мужей, тако и жен от детей разлучать то спряжение их не мешало. Якоже вы ныне глаголете и то, чтобы сего свару более от того крещения на вселенней не было.

Егда при апостолех, и  при царе Константине и при Владимире князе, тако и при иных во ина времена, не только тысящи многия, но и тмы тем, якоже обносит Писание, по обращении их в христианскую веру, крестилися; а еже браки их, по крещении, расторгать, или сродство их разсекать отнюдь никто из них не дерзал, и за блудников их не поставлял, разве по совету восходящих на преимущее, сиречь на девственное житие. Якоже и апостол положил: кождо в звании, им же призван бысть, в том да пребывает; глаголю же безбрачным и вдовцам, рече, добро им есть, аще пребудут, якожо и аз; а оженившимся  завещаваю, рече,  не аз, но Господь: жене от мужа не разлучатися и мужу жены не отпущати; такоже: аще которая жена мужа или муж жену имать неверну, да не оставляет ю: якоже пишет Златоуст о них: брак бо есть и смешение телес, в нем же приобщение; таже: да не боится жена, яко нечиста бывши за смешение, и: пребывати, рече, уже спряженным бывшим, и не излишних браней вины вводити; не бо о сих никогда же сшедшихся, рече, беседует ныне, но о сшедшихся уже, — не рече бо аще кто хощет взяти неверную. О тех бо явственно в Номоканоне Потребника пишет, — правило 72-е шестаго собора повелевает, яко не подобает православному мужу еретичестей сочетатися жене, аще же и будет, неключиму вменяет женитьбу и законопреступен брак. Такоже и с латыни аще православная жена сочтется, с распутством брака и запрещению подлежит, по 20 главе 3 стиха еже в Матфеи: аще ни кто преступит уставленная, да отлучится. Того ради пишет Златоуст: не рече бо апостол: аще кто хощет взяти неверную, но: аще который имать неверную, сиречь аще кто, повнегда оженится и посягати, прият слово благочестия, таже другая часть пребысть в неверии, и изволяет спребывати, да не растерзается; несть бо, рече, телес нечистота, им же приобщение; толико богатство твоея чистоты, и чада ваша свята суть; который бо, рече, рцы ми, вред, егда яже и благочестия целая пребывают, и надежды будут благия о неверном; сих преизобилием и богатством речения изгоняяй сицеваго мнения страх; зде бо, рече, не ктому блужения вещь есть. Якоже вы, о возлюбленнии о сих рекосте и тяжестно писасте во отчаяние христианом, по святом крещении, за смешение мужем и женам без чиновнаго церковнаго браковенчания; аще де кто растлит церковь Божию, растлит де того самого Бог, зане де от святаго крещения человек бывает церковь Божия, чиста и свята и непорочна; аще ли де кто ю блудно растлит в себе, или в другом чьем лице, сам де Бог грозным и яростным мщением и Собою мстити хощет таковым, рекше нестерпимыми и прегрознейшими муками в безконечных огненных и жупельных муках, таковаго ради небраковенчаннаго смешения, и зде чужды обрящутся соборныя апостольския церкве, в будущем же веце вне небеснаго Женихова чертога изгнани будут, зане де осквернившии боготканную одежду святаго крещения; а наипаче де при толиких страшных запрещениях: Господу глаголющу: горе непраздным и доящим в тыя дни; пророком де оплакующим жениха и невесту, яже при последних временех; апостолу де глаголющу: в вавилонское разорение глас жениха и невесты не услышится к тому в тебе; богословцем де отцем вещающим о таковых, яко имущия во чреве разсядутся. Темже к сим простите, — ни в укор, ни в понос, но в правду отлагати вам: и аще о сих, по вашему толку, тако случилося быть, то несть вам ни в градех, ни в селех ныне внития в домы, егда те христиане, по святом крещении, по вашему толку, за смешение все блудницы быша, и того ради уже не благовестники, но обманщики миру бывают. Понеже по Великому Илариону, аще и не с блудники, но с мирскими токмо вертимся смешающеся, просим у них потребная и всехотительны есмы у таковых взимати и о гресех их обещающеся молитися, — укоризна бо, рече, зело велика и достойна трепета; помыслившу комуждо нас, аки чисту самому смети рещи не только, по вашему толку, к сим во христианех блудником, но к блудником и мира сего: дай же убо ты мне, а аз о тебе Богу помолюся; еда бо, рече, серафими есмы или херувимы, сами грехи оплетены, а ины отрешающе, или сами чисти еже ины омывающе, а наипаче тех, их же и сами вы изглаголасте, яко поити им в вечную муку: а по возвожденью словес, о таких людях Бог и пророком молитися отрече, кольми паче их и нам откажет. Или за свое дерзновение к Богу, записав имена их и взятия ради покушающеся умолити неприступнаго, небеснаго и страшнаго небеси и земли Творца? О, како не вемы ся, что творяще, а наипаче о сих, им же в конец отрекосте спасения надежду, тем же и они аще и дают милостыню своей ради пользы, но по неведению и якобы прельщающеся творят. Егда несть о их спасении надежды, гневает Бога и молитвенник о них, зане, якобы мзду приемый, не о благих делах, аки дерзновение имый, пририщет к Богу, цату или две во чпах [чпаг=карман?] свой прием, и, яко наемник за то, к Богу с дерзновением на молитву подвизается; а сам известную глаголет, яко пойти тем людем в вечную муку, зане де те люди осквернивши боготканную одежду святаго крещения.

Темже, о возлюбленнии, с любовию, паче же и со слезами, и не вем како, и тако о сих молю вас и, преклонь колена, покланяюся: да не со гневом отрините сих наших бедных словес и по всему к вам грубых. Паче же помяните писанное, яко случится кому и от любве порицати кого, или лучше обличение и с дерзновением паче крыемыя дружбы, да не братоубийца кто вместо братолюбца будет. И да познаем вас благочестивых и в разуме премудрых, яко обличение, по Соломону, токмо нечестивым бывает, — мозолие изми, того ненавидят, — вам же, премудрым, дати вина и о том уверяемся не быти без пользы. О нас же, грубых, да не подивите, аще не по вас, но и противно вас что глаголем; понеже пишет Златоуст: егда убо миримся о разрушении истины, прегрешно есть, рече, и неподобно зело, таковый бо мир не прииде Христос вложити, но противно паче; понеже бывает множицею и мир на повреждение и далече божественныя любви отгоняющ. Зане пишете и глаголете к нам на пресечение всего православнаго христианства, яко бы Господу глаголющу, по вашему толку, горе непраздным и доящим, за смешение по крещении женам с мужами, в тыя дни. Но несть сие тако. Аще случится приити на них и Страшному суду, якоже сам сый Христос во святом Евангелии Лукою и Матфеем благовестит: глаголю вам, в ту нощь будета два на ложе едином: и един поемлется, а другой оставляется; тогда два будета на селе: един поемлется, а другой остается; две мелюще в жерновах: едина поемлется и едина оставляется. Яве бо от сего разумеваем, рече Златоуст, яко раби и жены не повреждаются ничим, аще хотят добродетельны быти, елицы на селе, сиречь в мире сем обретаются, аще препростии и неучени, и не племенити родом же и богатством, славни и неславни, ови праведни, ови же неправедни; и праведни убо приемлются, неправедни же оставляются во огни и муках; мелющии же — суть множество жен, обаче и души, приемшии порабощения ярем, и, еже в немощи скончаша житие: суть бо жены неправедни и праведни, живущии бо, рече, о Господе, — на облацех возмутся на воздух и всегда с Господом будут; нечестивых же поженут огнем неугасимым. Сего ради и Павел глаголет: аще который брат жену имать неверну и тая соблаговолит жити с ним, да не оставляет ея, и жена, аще имать мужа неверна, и той соблаговолит жити с нею, да не оставляет его. И наказуя жену о сих, Златоуст толкует: да не боится жена, яко нечиста быти за смешение; есть нечист идолослужитель, но жена несть нечиста; аще убо приобщалася бы ему о том, в нем же нечист бе, глаголю же в нечестии, имяше и та нечиста быти; ныне же инако: убо нечист есть идолослужитель, в иной же вещи приобщается ему жена, в ней же несть нечист; брак бо есть и смешение телес, в нем же приобщение. О блудней же жене несть оглаголуем изгоняяй ю муж: зде же аще и идолослужительница жена, мужу праведное не погибает; и чада ваша свята суть.

Вы же, о возлюбленнии, пишете на сих зело неправедно, якобы богословцем отцем впреки сопротивляющися апостолу и Златоусту и вещающим о таковых, яко имущия во чреве разсядутся. Но той паки вселенский Златоуст, аки исходя к вам, о сих и ответ за христианы творит, сице глаголя: и блаженства же, яже от Христа, не инокам токмо речена суть, рече, зане вся вселенная погибла бы и оклеветали бы суровство Божие; аще же блаженства иночествующим токмо речена суть, а мирянину невозможно исправити я, той же брак попусти, убо той вся и всех погуби. Аще бо не мощно с браком, яже иночествующих творити, вся погибша и растлишася и в тесное затворена суть яже добродетели. Како же и честен брак, толико возбраняемый нам? Что убо есть рещи? Мощно, рече, и зело мощно и жены имущим добродетель проходити, аще восхощешь. Како? Аще, имуще жены, аки неимущи будем; аще не радуемся о стяжаниих; аще мира употребляем аки неупотребляющии. Аще же нецыи преткнушася от брака, да ведят, рече, яко не брак бысть преткновение, но произволение, зле употребившее брака. Зане вино ниже творит пиянство, но злое произволение и еже чрез меру употребляти. Якоже и о сих глаголется: горе бо, рече, во чреве имущим тогда, яко не могущим бежати, бременем чрева отягчаеми; доящии-же, милующии чада, не могуще их носити и спастися с ними, не могуще и оставити. А не якоже вы глаголете: за смешение их погибают купно с ними. Такоже аще и преподобный Ефрем пишет: когда издхнут младенцы на лонех матерних, умрут же и матери верху отрочат, тогда умрут отец и мати с чады вкупе; но и то умертвие их не телесное, но душевное. И инде сказует писание, еже умерших верных неверием, миролюбием и покорением князю тьмы века сего. А еже кому изволено бысть спряжение, к тому пишет Златоуст, со умерением брака употребляй и первый в царствии будеши и всех насладишися благих. Аще ли неверный  отлучается, да разлучится. Како же неверный разлучается? Сиречь аще повелевает ти жрети и приобщатися того нечестия ради брака, или обратися вспять: лучше расторгнутися браку, а не благочестию, тем же наведе, не поработися брат или сестра в таковых.

Видите ли, о возлюбленнии, когда и чего ради той брак их расторгается? Не бо святым крещением разрушается: ниже за крещение свое жена от мужа разлучается; но како же есть? Аще, рече, неверный разлучается, сиречь аще, рече, повелевает ти жрети и приобщитися того нечестия ради брака, или обратитися вспять: лучше же, рече, расторгнутися браку, а не благочестию. Тако бо и сами апостоли некогда, — Павел от Нерона, Андрей от Реафа и Фома от Миздия, за разлучение жен от мужей, пострадаша, якоже о них пишет Иосиф Волоцкий; яже выше и Златоустый зде толкует, глаголя: лучше расторгнутися браку, а не благочестию, и Павел глаголет: не поработибося брат или сестра в таковых. Аще на кождо день, рече Златоуст, биет и брани подает, сего ради лучше свободитися. Сие бо назнаменует глаголяй Павел: в мире же призва нас Бог. Он бо прочее вину подаде [к расторжению?], якоже и соблудивый. — Сие же вам свидетельство приносим, о возлюбленнии, — не бо о иже, по Златоусту, никогда же сшедшихся, но о сшедшихся уже, — да не будет вам глаголати: аще кто похощет взять и ныне неверную, да еще еретическим браком совокупитися, и, посему де, возможно им будет смешатися.

Ни убо, — о сих бо инаков указ из книги Матфея Іеросалимскаго [Матф. пр. 275], — счинение по составех, объятие всех вин людских, лист 98 [93?28?], — еже он пишет: 72-е шестаго собора сице уставляет: не леть буди да православен муж жене еретице совокупится, ниже убо еретику мужеви жена православная да сопряжется. Но аще и явится что сицево, от котораго бы бываемо, не тверд менити брак и беззаконное разрешати сожительство; не подобает несмесная смешати, ниже со овчатем волка соплетати и Христове части грешных жребий. Аще же преступит кто от нас уставленная, да отлучится: аще бо по градскому закону брак уставляется общение и наследие, божественныя и человеческия, како сосложатся друг ко другу, иже большим разнствуют, душевным усвоением сопротивно мудрствующе о вере? Темже и по разрешении неприкладнаго брака, и отлучитися приступающим сподобляет. Но сия убо он же брачне ныне быти совокупляющихся, иже единой убо стране еретическим прилежати преданием, другой же православною держащейся верою. Аще ли же и обе части, рече, егда брачне снидошася, исперва православных отчуждени бяху части, таже ов убо позна истину, другое же еще тьме нечестия работает, — не сего ради сожительство разрешается, якоже к Коринфом великий уставляет Павел. Аще бо волит, рече, с неверным жити верная, или сопротив паки верный с неверною, да не разлучается; святит бо ся муж неверен о жене верней, и сопротив паки. Обаче, зри, како и божественный апостол, снисхождение творя, аще волит, рече, верная часть жити с неверною; якоже не волит, без сомнения, брак да разрешится. Уповающе, яко начала ради бяху сия и начаток проповедания. Понеже зело мужи крамоляху тогда, того ради и жена, аще, пишет, имать мужа неверна, и той благоволит жити с нею, да не оставляет его. Не просто же спребывает неверному пишет Златоуст, но хотящему; темже рече Павел: и той соблаговолит, жити с нею, и к жене: что бо веси, жено, аще мужа спасеши? Сие паки стягается к еже: да не оставляет его. Аще бо не крамолует, пребывай, рече; имать бо приобретение: пребывай и поучай, и советуй и увещавай; ни един бо сице учитель укрепити возможет, яко жена. И ниже нужду возлагает ей всячески и истязует от нея вещь, да не паки тяжчайшую соделает, ниже отчаятися повелевает, но оставляет ю в недоумении, висящую неявлением будущаго, глаголяй: что бо веси, жено, аще мужа спасеши? Подобная к сим и к мужу пишет: аще который брат жену имать неверну и тая ж благоволит жити с ним, да не оставляет ея; аще и идолослужительница жена, мужу праведное не погибает; и что веси, мужу, аще жену спасеши? Того ради и пишет Златоуст: который бо, рцы ми, вред, егда и яже благочестия целая пребывают, и надежды будут благия о неверном. А еже днесь имящее: како есть мощно иудеину или агарянину крещшуся или крестившейся с неверовавшим (жити), к ним же якобы уже и моление и совет мног бяше прияти благочестье? Пишет Матфей Іеросалимский: яко же, рече, и при патриарсе бысть Феодоте, присковичар бо царский всяко патриаршеским, рече, писменем распустится с женою, непокоряющейся мужеви, много молящуся благочестие прияти. Слышите, о возлюбленнии, что и Матфей глаголет? «С женою, непокоряющеюся мужеви, много молящуся благочестие прияти»: таковым и патриарх Феодот токмо уже брак распрязает; к прочим же, им же спряженным бывшим и пребывающим в вере пишет апостол: да пребудут в надежде спасения своего, — обручих бо вас, рече, единому мужу, деву чисту. Оле, новых вещей! — пишет Златоуст: в мире сем девы пребывают прежде брака, по браце же не ктому; зде же не тако; понеже обучения есть время — настоящее время, будущее же — брака. Но аще и не суть девы прежде брака сего, после брака девы бывают. Тако вся церковь дева есть. Ибо, ко всем беседуя, сия глаголет и к мужу, и женам посягшим; но видим, что на Ся обручил есть ны. Которое вено? каковы и дары? Не злато, не сребро, но царство небесное. Тем же и глаголаше: о Христе молим, — и молит, егда невесту хотяше взяти, — сего образ бяху, — яже при Аврааме; ибо он отрока вернаго посла обручити отроковицу языческую. И зде посла Бог рабы своя, обручающия Сынови церковь, — пророки свыше сия глаголющия: слыши дщи и виждь, и забуди люди Твоя и дом Отца Твоего и вожделеет царь доброте Твоей. Видел ли еси и пророка обручающа: виждь и апостола со многим дерзновением сей глагол вещающа и  глаголюща: обручих вас единому мужу, деву чисту, — преставити Христу. Христос же глаголет: аминь, глаголю вам, яко не имать прейти род сей, дондеже вся сия будут. Род рече — не тогда сущий, но род весь христианский, верный; весть бо и род от единонравия именовати Писание: яко сей род ищущих Господа. Понеже мятежи и рати, и изменению рече быти стихиям и вещем, да непщуют нецыи, яко егда христианство разорится? ни, рече: не прейдет бо род сей христианский, небо и земля изменится, словеса же Моя и Евангелие Мое не разорится, но пребывают. Аще и вся двигнутся, но о Мне вера не оскудеет. Являет зде, яко церковь чистейшу имать всех тварей; ибо аще и тварь изменится, верных же церкви, и словеса ея и Евангелие никогда же.

А еже вы, о возлюбленнии, писали есте на отсечение брака, яко и пророком де оплакующим жениха и невесту, яже при последних временех; и апостолу глаголющу: в вавилонское де разорение глас жениха и невесты не услышится ктому в тебе. И аще в человецех на женихи сия глаголете, то зело несогласно с святым Евангелием пишете; понеже в том темном и падшем Вавилоне не токмо не услышится глас тех женихов, но, яко же во дни Ноевы, тако будет и во дни Сына Человеческаго: ядяху, пияху, женяхуся, посягаху, до него же дне вниде Ной в ковчег и прииде потоп и погуби вся. Тако же будет и в день, в онь же Сын Человеческий явится. Что же суть: и глас жениха и невесты не имать слышан быти в тебе ктому? О сем толковники яве от апостола возвещают: Христос есть жених всякой души, верующей во имя Его и творящей волю Его, ею же Себе возлюбил, ея же ради первым пришествием Своим и с небес на землю сошел; Той же есть и свет миру и светильник в темном Вавилоне, просвещающе светом заповедей своих всякаго грешника. И глас сего Жениха, аще и исходит в ушеса разбойника и блудника: приидите ко Мне вси обремененнии грехи вашими и Аз покою вы, понеже ярмо диавольской работы и тягости отъиму от выи вашея, — но не услышится глас Его. Такожде и гордым и гневливым глас Жениха, аще и исходит: приидите ко Мне и научитеся от Мене, яко кроток есмь и смирен сердцем и обрящете покой душам вашим; аще грешни есте, но не побеждает Мя бездна грехов ваших; всем бо обратившимся ко Мне и покаявшимся иго Мое благо и бремя Мое легко есть, — но не слышится глас Его, зане своим произволением удалилися за диаволом и возлюбили прелесть его, и тому служат и волю его творят; и того ради в день Страшнаго суда и в конец отымется глас Женихов от упалаго и темнаго Вавилона, и к тому уже милосердия Божия или призвания на браки, светильника света, пресветлаго лица Его, не узрит в веки; и глас Жениха, так и невесты не имать слышан быти; понеже возвратятся грешницы во ад и все языцы, забывающии Бога. Аще и глаголати будут: Господи, Господи, не веси ли нас, — Ты нас создал еси; Ты от четырех составов содействовал еси, нас счетав; Ты души в нас вложил; Тебе веровахом, Тя Бога исповедахом, Тебе познахом Содетеля, о Тебе знамения сотворихом, Тобою беси изгнахом; Тебе ради девствовахом, девство сохранихом, и плоть изсушихом; Тебе ради чистоту возлюбихом; Тебе ради пришельцы на земли быхом, и глаголеши: не вем вас, отъидите от Мене. Тогда отвещает к ним, глаголя: исповедасте Мя Владыку, но словесем Моим не покористеся; знамением креста Моего знаменастася, но то немилосердием без вести сотворихом; крещение Мое приясте, но заповеди Моя не сохранисте, тело девством изнуристе, но милостыни не имеете, о имени Моем бесы изгнасте, но братоненавистие от ваших душ не отринусте. И тако потом отъидут в вечную муку, и глас их не услышится во веки.

И по сих словесех к вам, о любезнии, в любовь склонение являем, к тому и молчание да покажем, ведая ваше в постничестве свершение и во учительстве изрядное остроумие. Аще же и изглаголася от вас, но вемы, откуду вам прилучися: сими бо уже безстрастни есте, таковых и других хотяще быти, яко же и рекло Писание: всяко бо животное любит себе подобное. Но добро вам, любезнии, аще и таковы есте, но о себе глаголати, аще и с дерзновением: по апостолу, хотящу, да вси человецы будут якоже и аз — сему и мы, аще и многогрешни есмы, советуем. О прочих же должно бы со апостолом и вам глаголати, да кождо свое дарование имать, ов сице, ов же сице; или где по случаю и к сим: что бо веси жено, аще мужа спасеши и что веси, мужу, аще жену спасеши? Точию коемуждо яко разделил есть Бог, кождо, якоже призван Господем, тако да ходит. И да не помышляйте, возлюбленнии, искус некий быти или ласкание, яже нами реченная. И аще ли не сице сия вся, и вы к нам о сих послание утвердите, да увемы вами, яже не тако глаголанная нами.

И здравствуйте о Господе, всечестнии отцы.