[Поморское полемическое сочинение XVIII в.]

 

Изъявление, яко не всякое по действию и виду крещение есть правое, и истинное. Но токмо от православных православно действуемое, есть спасително.

 

Хотящим что от прочитаемых объимати, ниже малое глаголемых претекати подобает. [Бесед. евангелск. на Иоанна беседа 55]. «Сего бо ради испытовати писания повелени быхом. Понеже видятся многая аще и от себе сущая удобна, много во глубине разумение имети сокровенно».

«Ибо писания ведый, якоже ведати подобает, ничим же от бывающих соблажняется» [2 Тимоф. глав. 3, нравоуч. 8]. [понеже] «Велие зло есть [еже] неразумети писании, от них же пользоватися подобает, от сих повреждаемся» [на деян. в нравоуч. 34-м]. Глаголет сия божественный Златоуст.

Тако убо нецыи, или предсудителных каковых мнений, или от невнятия и неразсуждения глаголюще и утверждающе, аки бы от всякаго, и всякое действуемое в три погружения с приглашением божественных троических ипостасей крещение, есть приято и очистително грехов. Приводяще во утверждение себе от словес вселенскаго учителя, Иоанна Златоустаго, пишущаго в толковании божественнаго апостола Павла, к коринфяном первом послании в главе 1, беседе 3, на стих 13, реченная тако. «Но не сие взыскуемое бе, ового крестишася, но в чие имя крестишася. [и ниже] и да не речеши бо глаголет, кто крести, но в сие имя. не бо крестивый, но призываемый в крещение взыскуется. [и паки, на стих 14, нижше] Велие убо есть крещение, но велие то не крестяй творит, но призываемый в крещение. [и ниже] Велие убо есть паки глаголю крещение, и кроме крещения невозможно царьствия получити. Но может то и не зело доблии муж сотворити».

И сими словесы утверждающе свое мнение глаголют: яко от всякаго крестившаго, аще кто во имя Отца и Сына и Святаго Духа, крещен есть, той истинный и совершенный христианин.

Но инии чтуще святая писания, и разсмотряюще свойство разума, сице показуют: Яко тое крещение спасително и истинно есть, аще три сия имать.

Первое. Да будет креститель православный.

Второе. Крещающиися сторона в истинно, и в православной вере утвержденный.

Третие. Крещение с верою православною по установленному чину действуемое.

Аще ли единое сих оскудеет, не может быти крещение право, и крещенный истинный христианин.

И предлагается: Первое.

Яко за лице крестителя неправославнаго крещение действуемое, аще и в три погружения не приемлется. О чем явственно зрится в правилех апостольских, 46, и 47, и 68. И собора Карфагенскаго в толковании правила 73. Зде аще имянно по видом еретики и не означаются, но обще в роде полагаются. А, [по разсуждению ведущих разум писания] что свойственно есть роду, то свойственно и виду. И посему, что не приемлется в род, то не приемлется и в вид. Но крещение от еретиков отвергается в роду, убо крещение от еретиков не приято и в виде*.

[*(сноска) — Род, и вид, называется зде, не грамматически, но риторски и философски. Например. Род называется животное, а виды онаго, человек, скоты, звери, птицы, мухи, черви, гады, рыбы, и все что имеет дыхание, и само собою движение. И еще: Род есть растущее, а виды, древа, цветы, травы, овощи, и прочая. Так род есть еретик, а вид, ариане, несториане, македониане, павликиане, евномиане, наватиане, и прочия. И так, где что означается имянно, сие принадлежит к виду, а где поминается вообще, то следует к роду. Пример смотри в песни святых триех отроков. Где первое глаголаша: Благословите вся дела Господня Господа. Зде является род; Потому, что все твари, под наречением вся дела заключаются. А в прочих стихах виды твари означаются. По сему и о прочем разсуждать должно.]

Следуя апостольскому учению и повелению Агриппин епископ Карфагенский [бывший по воплощении Христове в лето 207], устави всякаго еретика крестити. Тако святый Киприан Карфагенский епископ, с осмиюдесять четырьми епископы, соборне устави, от всякаго еретика крещенных, приходящих к правоверию крестити. Тако восточная церковь о том, во Иконии, во Фругии, собор сотворше, уставиша ни едину тайну у еретиков, ниже крещение в тайну вменяти. О сем Фирмилиан епископ Кесарии Каппадокийския к Киприану писа. Дионисий Александрийский, такожде о сем изволении епископ восточных возвести.

Тако перваго вселенскаго собора, в 19-м правиле, приходящих от павликиан повелено есть крестити. И хотя зде не объявляет, какое чинодействие в крещении у павликиан было, но от истории церковных признавается, яко было трехпогружателное. Посему, егда по воплощении Господни в лето, 266 «собраша мнози епископи, на собор во Антиохию, услышавше о богохулном учении Павла Самосатскаго, тогоже града епископа. Первейшии между ими бяху Фирмилиан Кесарии Каппадокийския, Именей Иеросалимскии, и инии. Сии исповедание веры святыя о Бозе в Троице едином, и о вечности Божества Христова истиннаго, на хартии послаша к Самосатскому, вопрошающе его. Аще с нами тако исповедует, якоже они от предания святых, и апостольскаго учения и писания божественнаго прияша; Он же им солга, глаголя, яко тако с ними верует. И оставиша его отцы на епископстве. И по прешествии шести лет, в лето 272, на собор Антиохийскии второе собрашася седмьдесять епископ, иже Павла Самосатскаго епископа у того же града, иже к ереси своей возвратися, в заблуждении Артемонове обличеннаго, яко божество Христово хуляше осудиша, и с престола низложиша, и прокляша».

Отсюду познати мощно есть, яко Павел Самосатскии, в три погружения крещаше. Того ради в течении шести лет не возмогли познати его ереси. И аще бы Самосатский в противность пятидесятаго правила святых апостол, не в три погружения крестил; то могли бы ересь его познати, и по первом на него соборе, в приобщение, не прияли бы. А яко сего неучиниша, посему зрится, яко и крещение у него в три погружения бяше. Понеже, аще бы не в три погружения было, то не умолчали бы о его крещении, но возвестили бы, яко же упоминается в правиле осмом, втораго вселенскаго собора, о евномианах, савелианах, и фругах, едином погружением, а не треми крещающих.

Тако собор Лаодикийский правилом осмым, повелевает, фотиниан, и четыренадесятник, под миропомазание приимати. В толковании же оного повелевается тех крестити. Тоже о фотинианах показуется и у Тимофея презвитера. Зри в Кормчей старопечатной лист 634, на обороте. Тако собора вселенскаго втораго в правиле седмом, повелевается, наватиан, и других еретиков приимати под миропомазание. Великий же Василий, в первым правиле, наватиан крещение глаголет быти, неимущее Святаго Духа. Но по уступки, а не по силе онаго приимати повелевает. А в 47-м своем правиле исправляя глаголет. «Воздержники и апотактити да крестиши: Аще бо и глаголют яко во Отца и Сына и Святаго Духа крестихомся, но понеже злу творца Бога нарицающе, хулят по Маркионову учению, не крещени же неприятни».

О сем в толковании подробнее изъясняется тако. «В первом убо правиле своем, по смотрению словесе воздержник и наватиан глаголемых чистых, великий сей светилник церковный, прият крещение. и повеле токмо святым миром помазовати их, егда приходят к соборныя церкве вере, и ереси своя проклинают. Зде же исправляя, еже по смотрению онамо прият, повелевает воздержники, и прочая крестити».

Отсюду познавается яко наватиане, воздержники, вретищники, и апотактиты крещены были, в три погружения: того ради [по уступке, а не по апостольским правилом] под миропомазание приимахуся. Аще бы не в три погружения были крещены, и приималися, то явственно был бы Великий Василий, сопротивник пятидесятого правила святых апостол, и подлежал бы извержению.

А яко бывала в крещении еретиком уступка, [или снисхождение] ради примирения, поминает сие святейший Тимофей архиепископ Александрийский, тако [Кормч. лист 606]: «Вопрос. Почто обращающиися еретики к соборней церкви не покрещеваем; Ответ. Аще бы се было, небыся человек скоро обращал от ереси покрещения стыдяся. Обаче и возложением руку презвитерску и молитвою, вести приходити Дух Святый, якоже свидетельствует деяния святых апостол». Подобно и Тимофей презвитер глаголет. «Зрим же ныне в великих и соборных церквах, рекше патриархиах, и митрополиах и прочих, яко армены и яковиты, и несторианы, и прочия безглавныя, и подобныя им обращающыяся в православную веру божественным миром помазуют, а не крещают, творят же их проклинати началники их. И се вообразися ныне вин ради благословных и нуждных».

Из сего примечателно есть, яко [не по правилом, но по уступке], не крестиша некиих еретиков ради их стыдения, и дабы тщателнее обращались от ереси, и присоединялися к правоверным. И тем бы самым скорее истреблялась оная ересь, и уничтожилось до конца тое душевредное учение. И тако Тимофей презвитер великия церкве, наконец глаголет сице: «Мы же вся сия разсмотривше, должни есмы обычаю последовати ныне держащему в митрополиах и патриархиах».

Но в России обычай был непременный всегда, всех еретиков крестити. Тако бо святейший Филарет Московский патриарх, следуя апостольскому, и святых соборов, и богоносных отец учению, с собранным с ним освященным собором подтверди, глаголя сице. «Аз по малей силе моей, елико благодать Святаго Духа настави мя, вседушно попекохся о сем, и правила святых апостол, и святых отец прилежно смотрях со вниманием, и истязовах со испытанием. Того ради, да уведят вси людие, всея российския земли, яко вси еретики, различных еретических вер, не имут права святаго крещения, еже водою и Духом Святым. И того ради от всех еретических вер различных приходящих к православию христианскаго закона, подобает совершенно крестити святым крещением, по преданию и содержанию святых вселенских патриарх, еже утвердиша по правилом святых апостол, и святых отец».

Зде является, яко Филарет патриарх утверждая содержащийся в России православныя церкве обычай, а ктому же имея и от предместника его святейшаго Ермогена патриарха наставление; учинил о приходящих из польскаго и литовскаго государства, разсуждение, како их приимати, где усматривается, яко не токмо за содержание ересей, но и за согласнаго с еретиками крестителя, крещение неприемлемо есть. Пишет бо тако: «А которой белорусец скажет, что был он в иной вере, и пришол из иной веры в совершенных летех, и крестился в христианскую веру в Литве от рускаго попа, а тот поп которой его крестил, молит Бога за папу, и таковаго совершенно крестити, и латынское и еретическое отрицание ему говорити, и молитвы все говорити, и младенческое отрицание, такожде что и еретику, для того что крещен от отступника, которой молит Бога за папежа».

Зде разсмотрити должно, что глаголет святейший Филарет: А которой белорусец был в иной вере, и познавши яко неправо верует, того ради пришол из иной веры, бывши уже в совершенных летех, и крестился в христианскую веру в Литве, от рускаго попа, явственно яко от униата, а не от настоящаго папежника. Ибо униаты аще и отдались в совершенное повиновение римскому папе, и склонились на всю его волю; но однако саны и обряды восточныя греческия церкве не все отвергли. О чем явственно зрится в книге о вере, московския печати, во главе 24, где служение на кислом хлебе отправлять им униатом позволено было. Но как о виде чинодействия в крещении умолчано, по сему без сомнения разумевать должно, яко и крещение на воли их униатов, то есть в три погружения, или иным видом действовати уставлено было. А при том, и Филарет патриарх о униатах каковым крещение действуют не воспоминает. От чего примечателно есть, что униаты тогда, хотя и все папу за верховную власть по данной католикам присяге, почитали, но не все прежде бывшее в православии навыкновение крестить в три погружения оставили. Ибо Филарет патриарх, прибыл в Польшу в лето 7119, [по счислению бывшему в тамошних странах 1611] а отступление униатов было 1595 лета. По сему до прибытия его толко за 16 лет. Когда же из Польши возвратился Филарет, и по вступлении на патриаршеский престол в Москве, собрал в лето 7129 собор, после отступления униатов чрез 26 лет. То в толь малое время, не дивно хотя и не всем находящимся в Полше, но некиим униатам, иметь саны и обряды в священнослужении грековосточныя церкве. Ибо Филарет патриарх, разсматривая чинодейства имеющаяся в Польше, в соборном изложении глаголет: «Инии подкланяются под папино благословение, и в два пути ходят, ови суть светом евангелиа, ови наипаче и мнози тмою еретичества, и влаются во всяком ветре учения, противна истинней вере христианстей».

По сему усматривается, что не все униаты, отвергли вся обряды греческия церкве. Как и самыя содержащии православие уже некоторыя начали от апостольских и святоцерковных предании, несколко или по недоразумению, или по слабости уклонятся от истины, и навыкать тамошним папежским обрядам. О чем Филарет и разсматривати повелевает. Кто, како крещен, в три ли погружения; или обливан; По этому, с таковым и поступати наставление творит. Но как дошло ему разсуждати о униатах, тогда уже неразсматривая вида крещения, но крестителя, глаголет, а которой поп его крестил, молит Бога за папу, за что и называет его отступником, яко отступил от своего законнаго православнаго пастыря, и пристал к отлучившемуся и отлученному от православных сочленовения, и согласился к его исповеданию. О каковых и преподобный Никон Черногорский в 63-м слове, своея книги пишет: «Яко отделившиися ниже крестити, ниже рукополагати могут. Понеже не имут благодати Святаго Духа, инем подати, от нея же сами отпадоша. Того ради крещенных от них паки крестити повелено есть». Сему согласует и преподобный Матфей канонист в составе В, глава первая. И сия убо о действуемом у еретиков трехпогружателном крещении вкратце показася. Яко есть непричастно Святаго Духа. Неимеющее же Святаго Духа, не может быти спасително. О каковых божественный Златоуст в толковании к галатом послания, в главе 3-й, на стих 14, вещает: «Никто же бо от проклятых иному преподает благословение, егоже сам лишися». И святый Афанасий Великий Александрийский [в слове 3 на ариан]: «Не бо глаголя просто Господи, сей дает, но со именем и веру имея праву». И паки: «Не мудрствующыя же право, яко речеся, ниже веру здравствующую имущыя, неполезну имут и от них даемую воду скудствующую благочестием, яко и кропящемуся от них паче сквернитися в нечестии неже избавлятися». Карфагенскаго же собора правила 73 толкователь глаголет сице: «Иже второе крестити кого крещение первое приимша от правоверных, различная правила отрицают. Токмо аще не будет от нечестивых еретик крещен: тех бо крещение сквернение есть паче, а не крещение». Тоже и в Потребнике болшом в главе 75, на листу 649 явствует.

Паки: Аще кто и не еретик, но восхитив недарованная, сиречь, не священник, будет же крестити чином священника, таковаго крещение за истинное не приемлется, но яко не крещен вменяется. И повелено есть таковых крестити паки. О сем смотри в книге Матфея правилника состав, В, глава 3. И Потребник болшой в Номоканоне правило 203, лист 707, и лист 715.

От сих показании явно есть, яко крещение аще и по чину действуемо есть, но за недостоинство крестителя неприемлимо. Недостоинство же зде не грехи разумей. Но аще ли креститель есть или неправомудрствующии, или недозволенным чином действующии. И тако зде взыскуется лице. Кто крестил; а не оное едино, в чие имя крестил; Обаче божественнаго Златоуста [вышеприведенным] словесам непротивно есть по сему: Понеже святый апостол Павел в первом послании к коринфяном пиша, яко неции велемудрствущии начаша вводити раздоры, и разсечения, и называхуся по имени учителей, того ради, и обличает их глаголя. «Возвестися бо ми о вас, яко рвения в вас суть. глаголю же се, яко кииждо вас глаголет: аз убо есмь Павлов, аз же Аполлосов, аз же Кифин, аз же Христов. Еда разделися Христос; еда Павел распятся по вас; или во имя Павлово креститися;».

На сие божественный Златоуст толкование полагает, изъявляя Павловых словес разум. «И не рече: еда ли Павел крести вас; (крестил бо есть многих) но не сие взыскуемое бе, от кого крестишася, но в чие имя крестишася; Понеже бо и сие виновно бысть распрям, еже от крестивших нарицатися, и сие исправляет глаголя: Еда во имя Павлово крестистеся; И да не речеши бо, глаголет, кто крести, но в чие имя. Не бо крестивыи, но призываемыи в крещение взыскуется. Сей бо оставляет грехи, и даже до сего поставив слово, не ктому прочая поведает».

И паки словеса апостола Павла: «Благодарю Бога яко ни единаго [же] от вас крестил, точию Криспа и Гаиа». И на сие толкование Златоуста: «Что велие мудрствуете о еже крестити, идеже аз и благодарю яко не сотворих то: Сие же глаголяй, низлагает строителне яже о сем гордыню, не силу крещения (да не будет) но кичение о еже крестити велемудрствующих. Первое убо, внегда показати яко не их есть дар. Второе же, внегда благодарити Бога сего ради. Велие убо есть крещение, но велие то не крестяй творит, но призываемый в крещение. Понеже еже крестити, ничесоже есть елико к человеческому труду, но и много меншее есть от еже благовествовати. Велие убо есть паки глаголю крещение, и кроме крещения невозможно царствия получити: но может то, и не зело доблии муж сотворити. А еже благовествовати много требует труда».

И сия божественнаго апостола, и святаго Златоуста словеса, ясно и чисто зрятся в каком разуме написана суть. Ибо апостол писал о тех, которыя разделялись и называли себя различными названиями. По любви к своим учителем. И сия апостол запрещает творити, глаголя. Понеже не во имя Павлово крестились. Тако и Златоуст изъясняя вещает. Не сие взыскуемое бе, от кого [то есть, от Павла, или Аполлоса, или Кифы] крестишася, но в чие имя крестишася. И да не речеши бо, глаголет, кто [или Павел, или Аполлос, или ин кто] крести, но в чие имя. Не бо [Аполлос, или Павел] крестивый, но призываемый в крещение взыскуется.

Из сих словес всякому мощно есть усмотрити: яко божественный Златоуст, о правоверных крестителях, а не просто о всяких глаголет. Тако бо и Богослов Григорий вещает. [слово 40] «Тебе не всяк достоверен во очищение, точию да будет кто от сочетанных, и не проявленно пореченных, ниже церкве чуждь. [и ниже] Тако да будет тебе всяк креститель, аще и житием преимуществует; но крещения же сила равна, и совершеннотворен тебе всяк подобне, тоегожде верою воображен».

И зде показуется от словес святаго Богослова, аще и не испытословити о житии крестителя, но о вере его и мудровании должно знати. Да не вместо овцы с волком содружатися и получити язву, а не исцеление. Ибо крещаху Христовы апостолы, крещаху по них епископи, и презвитеры, крещаху и простии [не чином священническим, но якоже простым достоит] но православнии. Убо и крещения сила есть равна. [евангелие на крещение] Понеже, на всякаго человека крещающагося отверзаются небеса, и призывает его в вышнее жилище. сходит же нань и Дух Святый, ащели и чувственныма очима невидим сый, несть достойно неверовати.

Посему явствуется, яко не от всякаго крестителя [но токмо от православного] действуемое крещение есть право и истинно. Убо от еретиков, и ложне творящагося священником есть неприятно, и отвержено.

К сему, второе.

Не приемлется же крещение, аще с мыслию неблагочестивою бывает. Яко же агаряне своих детей повелеваху бывшим у них христианским священникам крестити, не ради веры во Христа, и не очищения ради грехов, ниже наследия ради вечнаго блаженства. Но да бы злосмрадием не воняли. И понеже не с намерением истинным крещены, но яко некое чарование [оныя агаряне] вменяли крещение. Того ради аще кто от таковых восхощет присоединитися к православным, паки их крестити, повелено есть. Читай о сем Матфея правилника состав В, глава 3. Севаст Арменополь, книга первая, сечение пятое, надпись 1. и в книге третией, о сем доволно показуется.

По сем: Третие.

Не приемлется крещение, аще не по уставленному чину действуемое. о чем показуется пятидесятым правилом святых апостол.

Первое. Аще кто крестит не в три погружения.

Второе. Аще кто крестит в едино погружение, яко в смерть Господню даемое.

Третие. Аще кто крестит, яко же латини, вместо страдателнаго глагола, крещается, глаголет действителный глагол, крещаю тя аз. о сем смотри в Потребнике болшом лист 576. и Кирилове старопечатной лист, 239.

Четвертое. Аще кто крестит, в девять лиц, то есть изглаголав во имя Отца, и Сына, и СвятагоДуха. и погрузит. И паки, тожде второе изглаголав, погрузит. И паки третие тожде рекши, погрузит. И сие крещение не приято; Смотри о сем, правило святых апостол четыредесять девятое. и Стоглав глава седмаянадесять.

Пятое. Аще кто крестит обливанием, и сие отметается, яко не прообразующее тридневнаго погребения, и воскресения Христова: Яко же глаголют святии отцы. О сем воспоминает Златоуст, в толковании перваго послания, к коринфяном в беседе, 40, главе 15, на стих 29. Иоанн Дамаскин, в книге 4, во главе 10. Тако в толковом поучительном евангелии в праздник на Крещение Господне, изъясняется сице. «А еже трижды в воду погруженым бывати, и возгружаемым: тридневное Христово погребение являет.» и прочая. И яко таковому помянутому поливателному крещению в церкви православных приятия несть. зри в Потребнике болшом, на листех 588 и 589. И яко оное не есть православных предание. зри в том же Потребнике, в проклятии люторския ереси, на листе 603, на обороте.

По сему, и вся несогласная правому исповеданию крещения: Аще действуемая от неправомудрствующих еретиков. Аще восхитившаго самопроизвольно чин священника, и крещающаго не якоже простым достоит, но чином иерейским. Аще крестивших с мыслию неблагочестивою. Или крестившихся не по уставу, и чину преданному от святых апостол, и богоносных отец: отметна суть, и не прията, и не спасителна: яко не имущая Святаго Духа, и не всыновляюща крещаемаго в число чад Божиих. И не токмо ползу, но и тщету наносящих. По гласу самого началника веры и совершителя Христа Господа. «Аще кто не родится водою и Духом, не может внити в царствие Божие». Тако законопреступно крестити кого второе, того, аще кто крещен был прежде от правоверных. о сем являет святых апостол правило, 47. и Карфагенскаго собора, в толковании 47 правила.

По сему, всяк благоразумный, желающии души своей приобрести спасение, должен с великим и прилежным радением, прилагати тщание, и знати о своем уповании: Како верует; и чие есть чадо; тоя ли жены, юже виде тайнозритель, облеченную в солнце [Христа], и имеющую луну [спасителное крещение] под ногама своима. и увенчанную дванадесятозвездным [апостольских догматов] венцем. И аще мнится [кто] тоя жены быти сыном, да разсмотрит, — аще имать одежду [святаго крещения] чисту, [от еретических примесов] и достойну небеснаго чертога. Ибо разсмотрителен есть Жених: «Вшед бо видети возлежащих, виде ту человека не оболчена во одеяние брачное, и глагола ему, друже, како вшел еси семо, не имыи одеяния брачна; он же [егда сотворися безгласен, и не можаше оправдитися] умолча. Тогда рече царь слугам, связавше ему руце и нозе возмите его, и вверзите во тму кромешную, ту будет плачь и скрежет зубом». Невозможно бо, не имеющем на себе одежды брачныя, святаго православнаго крещения, внити в царствие Божие. Того ради опасно внимати подобает, да не прелстит кого тая жена, яже седит на звери червленнем, облеченная в порфиру, и червленицу [владычества, над уклонившимися в суесловная развращения], и позлащенна златом, и драгим камением и бисерами [прелестей и лукавств хитрословия]. имущая чашу златую, полную мерзостей и нечистоты [ересей и богопротивных предании] блужения своего. Да не привлечет кого в след себе, лстящи высокостию чинов, и гремящи славою премудрости плотския, и тем гонящи, и попирающи малое Христово стадо: аще и без видимых благолепием цветущих храмов жителствующих. Но на пажитях евангельских, апостольских, пророческих, соборных, и святоотеческих пасущихся. И еже что возможно простым [в неимении, а не презрении священных лиц], действовати, действующих. Аще бо во времена древняя простии правовернии в неприсудствии священников по нужде учаху, в силу пятаго надесять правила, святаго апостола Павла, вещающаго тако [Кормч. лист 26 об.]: «Учитель аще и мирский человек будет, искусен же слову учения, и нравом чист, таковый да учит. Будут бе рече вси научени Богом». По учении же и крещаху. [Номоканон лист 724] «Ибо [ведах сие известно, яко сам] Господь наш Iсус Христос многим апостолом священства не имущим, повеле крестити». Следующе сему повелению Христову мнози правовернии, ревностию о Христове вере разжегшеся, и данный от Владыки талант, не в землю нерадения и лености погребающе, но торжником, яко злато искушено, словеса евангельския, и богодохновенных учителей предлагающе, в церковную породу, иноверных ввождаху. Такови бяху, ихже от множества мало нечто воспомянем. Яже поминаются в книгах церковных, в них же написуются жития святых. Начнем же от повестей яже имеются в Прологах.

Месяца сентября, в 7 день. Святый мученик Созонт, пастырь сыи овчии, учаше еллины, и крещаше.

В 9 день. Святый Феофан проповедаше веру Христову, и многия народы крести.

В 11 день, святии мученицы Диодор, и Дидим, многих неверных к Богу обращающе крещаху.

В 21 день, святый мученик Приск, многих еллин учаше и крещаше.

Октября, в 4 день, святии мученицы, Гаии, Фавст, Евсевий, и Херимон диакон, многих еллин учаху вере Христове, и яве и тай крестиша.

В 27 день, святый мученик Марк, и иже с ним, учаху неверныя, и крещаху.

Ноября, в 5 день, святый мученик Галактион, крестил обручницу свою Епистимию, и раба ея Евтолмиа.

Февраля, в 17 день, святая Мариамия, сестра святаго апостола Филиппа, в Ликаонии учаше и крещаше.

В 23, день, святый Александр мних, крестил старейшину града, и многое множество людей.

Марта, в 5 день, святый мученик Конон, отца своего и матерь, и невесту свою, и потом и многих крестил.

В 13 день, святый мученик Александр, многих еллин крестил.

В той же день, преподобный Аннин чудотворец варвара огласил, и крестил.

В 19 день, святый мученик Хрисанф, крестил обручницу свою Дарию.

Апреля в 15 день, святый мученик Сава, многих крестил.

Маия, в 14 день, святый мученик Максим, многих крестяше.

В 22 день, святый мученик Василиск, многих крестил.

Июня, в 10 день, преподобный Феофан, блудницу крестил.

И прочии святых повести являют, яко не токмо крещаху мужие и жены, простии, но и крестити повеление имеется. Темже благовременно есть рещи словеса имеющаяся в Пролозе, в 28 день, августа, гласящая тако: «Где убо суть глаголющии, простецем уже нам при напасти не мощно крестити, не сущу тамо иерею». В подтверждение же сего пишет, и в Номоканоне. «Обаче не второкрещаются, иже от причетник, или от простца инока, или диакона, или от отца самого, или христианина некоего православнаго, и по нужде, не сущу священнику, то крещени суть, но точию аще не рука еретическая бяше первее».

Сие чтуще нецыи глаголют, яаще и подобает крестити еретиков, но священнику, а не простому. Сего ради, понеже на конце правила написано, аще не рука еретическая бяше первее, то крещени суть. Сиречь, аще бы простец крестил еллина, а не приходящаго от ереси. И сим мнением объяти, боящеся в неприсудствии православных священников, от правовернаго простца крещение прияти. И тако, в безвестии и сомнении пребывающе безнадеждно спасение свое полагают.

И ниже разсмотряюще свойство речении правила, сие предлагают. Не от простцев, креститися, по крещении еретичестем, правило сие возбранение творит, но в сходственность шестьдесять осмаго правила, святых апостол повелевает крестителя зрети, да не будет на нем рука еретическая. Ибо апостольское, 68-е, правило явственно свойство оных речении являет, имеющееся тако: «Дващи поставленый, и с поставльшим его да извержется, аще не будет токмо еретическая рука первая. Толкование. Аще который епископ, или презвитер, или диакон, второе поставление приимет от кого, перваго возненавидев, да извержется сам, и поставивый его, аще токмо не прилучится, яко от еретик поставлен бу первие. Ибо от тех крещении не крещени, и поставлении, не причетницы». Преподобный же Никон Черногорский, в 63-м слове, своея книги, в толковании на помянутое шестьдесят осмое апостольское правило, глаголет: «Разве аще объявлено есть, яко от еретик имать рукоположение. от таковых, бо поставленом, или крещенным, ниже верным, ни причетником, мощно есть быти». А Матфей правилник, в составе Х, в главе 24, на сие же правило пишет: «Иже второе от кого хиротонию приемшаго епископа, или причетника изметати повелевает, и того, и хиротонисавшаго. аще сведаше с ним, разве аще от еретик хиротонию приял бе, отметаем бо таковых, якоже крещение, сице и хиротонию: не бо освящение сия, но скверну веруем исходатайствовати».

Божественный же Златоуст глаголет тако [Маргарит, в слове о лжеучит.]: «Врази бо неприязни церковныя еретицы, ничим же разни от прочих поган незнающих Бога». Тако в Кормчей [правило 8 втораго всел. соб.], в приятии ко крещению еретиков евномиан, савелиан, и фругов, сравнивает с погаными еллины. Но еллин простии крещаху. То кое возбранение может быть простому крестити, приходящих и от ереси; И понеже святое крещение вся грехи очищает, яко же святый Кирил Иеросалимскии, в поучении огласителном третием, о крещении глаголет. «Вся бо елика тобою сотворена простятся, аще и любодеяние, или ин кии либо от таковых невоздержный вид. Что более еже распяти Христа; обаче и сему во очищение есть крещение».

И в поучении 18, глаголет: «Прешедшыя убо душевныя и телесныя язвы исцеляет Бог чрез крещение».

И аще вся грехи крещением очищаются, то могут очиститися и ереси. И якоже еллин не имеет на себе православнаго крещения, тако и еретик. Темже аще еллина нечестиваго, крестити простцу невозбранено, по сему мощно, и еретика.

От сего разумевается, яко сомневающиися от простца православное крещение восприяти, тии не иным чим, но токмо или безразсудством объяти, или боятся страха, идеже несть его. Аще бо в таковое время егда бяху православнии священницы, аще и не везде: но и тогда в неприсудствии их простии крещаху. Кольми паче, аще неслышится о них нигде, возможно простым крестити.

Да речет, сомнящиися от простолюдина креститися: лучше ли в неизвестном уповании отъити от сея жизни непросвещену; и не токмо непросвещену, но еще и ересьми очернену; Или креститися от православнаго христианина, и получити порождение водою и Духом.

Аще же кто хощет воистинну спастися, той да отложит сомнение, да отженет неполезный страх, и да приимет благое разсуждение, с любовию хранити евангельская, апостольская, и святоотеечская повеления, и содержания, получения ради жизни будщаго века, Аминь.

 

Показание, яко крещение действуемое от еретиков, и еретическое, аще по наименованию и различествует, но по разуму едино есть.

 

Безразсудность есть порок, доводящии многих к пагубному самомнению. Как и явственно сим показуется. Читающе нецыии, святая, святых апостол, и богоносных отец соборная, и особь положенная, правила, и видя написанное, яко вне православныя церкве, от инославных действуемое крещение именуемое различно: овогда еретическим, овогда действуемым от еретиков. И так находя в речениях сих разность, заключают, яко бы и в разуме имеется тожде. И уверяют, яко крещение еретическое есть то, которое не в три погружения. что и подтверждают, правилом осмым, втораго вселенскаго собора, и прочими. Так же и из книги о правой вере, в главе при конце тоя положенной, о святом крещении.

Крещение же от еретиков глаголют, подобно быти по виду своему православным, то есть трехпогружателное.

И еретическое крещение глаголют, отметно есть: а действуемое от еретиков, приято.

Но в самых святых правилах, обретается сему совершенно противное. Тамо бо еретическим именуется и то, которое бывает действуемое от еретиков. Невзирая на то каким образом оно действуемо бывает, как и явственно показуется в Кормчей, в правиле апостольском, четыредесять шестом тако. «Крещение и жертву еретическую, прием святитель не священ. Толкование. Епископ или презвитер, или диакон, аще не похуляет ни ругается еретическому крещению, но приемлет крещеннаго от сих, или приносимая от них на жертву, сиречь на службу приемлет, таковый да извержется от сана. Кое бо сочетание Христови к диаволу; или кая часть верному с неверными».

Матфей же канонист яснее в составе А, в главе второй тако глаголет. «Четыредесять пятое, святых апостол правило, помолившихся со еретики епископа, или презвитера отлучает. Повелевшим же неким от них яве клирическая содевати изметает. Четыредесять шестое и приемших онех крещение, от онех яве крестившихся, или елика на жертву приходит, изметает».

И 47, апостольское же в Кормчей тако. «Второе крещаяй крещеннаго истинным крещением, и непокрещеваяй оскверненаго от зловерных, таковый святитель не освящен. Толкование. Несть достойно дващи крестити человека. Аще же который епископ, или презвитер крестит кого второе совершенным крещением, да извержется от сана. Суть же нецыи иже по прилучаю прежде благоверно крещени бывше, отвергшежеся Христа волею, или неволею, и осквернени бывше, и таковыя миром токмо помазуеми освящаются. И иже не крестит совершено второе, первое крещение приемшаго от еретик, но приимет его яко верна, да извержется от сана».

Подобне, и Матфей правилник, в составе В, в главе первой, глаголет: «А иже злочестивых от нечестивых оскверненнаго паче. нежели крещеннаго, ничтоже сумнящеся покрещевати». И тех же святых апостол правило, 68, в Кормчей: «тако: дващи поставленый, и с поставльшим его, да извержется, аще не будет токмо еретическая рука первая. Толкование. Аще который епископ, или презвитер, или диакон, второе поставление приимет от кого, перваго возненавидев, да извержется сам, и поставивый его, аще токмо не прилучится яко от еретик поставлен бе первие. Ибо от тех крещении, не крещени, и поставлении не причетницы».

Сие же правило у преподобнаго Никона Черногорскаго, в 63-м слове, книги его имеется тако. «Аще который епископ, или презвитер, или диакон второе поставление приимет от невернаго, да извержется и той и поставивый его, разве аще объявлено есть яко от еретик имать рукоположение, от таковых бо поставленым или крещеным, ниже верным ни причетником мощно есть быти».

Матфей же канонист в составе, Х, в главе 24, сие апостольское правило тако полагает. «Шестьдесять и осмое святых апостол правило, иже второе от кого хиротонию приемшаго епископа, или причетника изметати повелевает, и того хиротонисавшаго. Аще сведяше с ним, разве аще от еретик хиротонию приял бе, отметаем бо таковых, якоже крещение, сице и хиротонию: не бо освящение сия, но скверну веруем исходатайствовати».

В толковании же на правило, 73, Карфагенскаго собора, имеется сице. «Иже второе крестити кого, крещение первое приимша от правоверных, различная правила отрицают. Токмо аще не будет от нечестивых еретик крещен: тех бо крещение сквернение есть паче, а не крещение».

И тако, из сих вышепредложенных, и прочих таковых же правил показуется, яко оная речения, крещение, от еретиков, или еретическое, аще по буквоначертанию своему и разновидны, но по разуму единако суть.

Того ради всякому правомудрствующему должно есть следовати писанию святых, а не своесмысленным толкованиям, которыя не имеют праваго разсуждения, без него же вся мрачна и темна суть.

Ибо по учению Лествичника [слово 26, лист 222], разсуждение есть, тме светилник, заблуждьшим возвращение, невидящих просвещение.

Сие и всякому желающему спастися имети делжни есть, да во истинном свете ходя непоткнулися.

Но просвещаем светилником светлым, истиннаго разсуждения, достигнет в немерцающий свет вечнаго блаженства, егоже наслаждаются в православней вере добродетелно жившии, и от Христа Спасителя за то награждение получившии, идеже веселятся, и веселитися будут во веки безконечныя, аминь.

 

На отлагающих святое крещение.

 

Везде, и всегда разсуждение потребно есть, не токмо в телесных деяниях, но и в духовных. Якоже, хощет ли кто устроити дом, токмо разсуждает како утвердити основание, создати стены, совершити кров, и внутрь подоболепно украсити: Тогда отлагает страх, и не размышляет о сем, аще возгорится дом, и в пепел превратят здания, или и пришедши вода и потопит. Но аще бы кто о сем помышлял, убо оставил бы дом неустроен, и жительствовал бы, якоже зверие, без покрова.

Тако восхощет ли кто сотворити себе одежду, той избирает себе потребное, разсуждает о веществе, из чего, и како ю сотворити. Не размышляет же, да не снедят ю молие, или да не раздерется, и в ветхость приидет. Аще бы о сем размышлял человек, и боялся сего, не бы имел одежду, но отложивше попечение о своей плоти, пребывал бы яко скот, кроме оныя.

Аще тленная на потребу нашу творим, не боимся будущих бедствии, кольми паче усердное тщание имети подобает, о духовных.

Суть убо нецыи, знающии истину, и о православии радеюще, сами же кроме правыя веры пребывающе, боятся восприяти святое крещение. Боятся же ради вин различных: овии глаголют, да прежде наслаждуся в мире, упокою плоть, и в старости восприиму крещение, и тем очищуся всех грехотворении.

Друзии глаголют, аще бы и восприял аз святое крещение, но куплями житейскими объят, не могу исправити должности христианския. Понеже жительствую посреде мира, со многими людми обращаюся, ктому же не могу разлучитися брачнаго сожития, с лицем несогласным в вере, и изрушитися бремене чадородия. Прочии же, и всеусердное желание имут, но от супружников своих возбраняеми, и препятствуеми, и тако пребывают вне православныя веры. Сия, и сим подобная, творимая препятия, многих и кроме спасителнаго омовения от жизни сея в некончаемый век отлучиша. Тамо же где вселяютися, кое утешение, и отраду получают, неизвестно.

Глас же евангельский гремит престрашно, паче громов многих, глаголя: «Аще кто не родится водою и Духом, не может внити в царствие Божие».

Зде зрится отвсюду страх, отвсюду трепет: умрети некрещену, страшно лишитися царствия Божия; Приступити ко крещению, боязнь вышеявленная препятствия наводят.

Но что же тогда сотворит, отлагающий святое крещение, человек; егда объимет его скорбь, егда нападет болезнь, егда время сокращенно жизни будет, и места способна не обрящется, и действителя неимение, и случай невозможный. Егда ослабеют члены, яко ни руки воздети, ни на ногу стати, и свяжется язык, уста заградятся, и провещати отрицания сатаны, и обещатися Христу не могут. Егда слух затворится, очи потемнеют, и сам собою владети не возможет. Многим же и изступление ума бывает, и незнание не токмо кого, но и самого себе. Каково будет тогда, о прощении грехов, попечение; Каково покажет к восприятию святаго крещения тщание; егда ему неявлен уже будет дар, неведома благодать. – Тако ко отлагающим святое крещение глаголет, святый Григорий Богослов: «Крестимся днесь, да не заутра понудимся, и не отложим благодетельство, яко неправду, ниже возжидаим мнози быти зли, да многше простимся, ниже будем христокорчемницы, и христокупцы». Тако и божественный Иоанн Златоуст, вещает: «Темже да не времене ждем, да не когда медляще и отлагающе отъидем тщи и пусты толиких благ». Яко же о некоем юном пишет святый Григорий Нисский, который некрещен был, и от варвар люте уязвлен, и уже к смерти приближився, суетный вопль издавал: «Горы и лесы крестите мене, древеса, камение, и источницы дадите благодать». Но страх ли обдержит, со многими людми обращения; Зде убо сравни, аще согрешиши и восхощеши покаятися, можеши ли в болезни, на одре лежай и неединосогласными обстоим, покаяние сердцем сокрушенным, и духом смиренным к человеколюбцу Богу принести; Воистину можеши. Аще ли не имаши крещения, то в болезни егда около одра предстанут сродницы, нелюбящии правыя веры, не отступит муж или жена, несогласное разумение имеющии, и не попустит исполнити желанию по вере болящаго; Что тогда возможет сотворити; Годствует зде еже святый Григорий Богослов глаголет [слово 10]: «Лучше некогда мала осквернитися твоими народными, нежели же всячески отпасти благодати».

Тако и святый Иоанн Златоустый вещает [в бесед на деян. нравоуч. 10]: «Иже бо все на Бога возвергии, и по крещении согрешаяй, якова же леть есть человеку сущу, каяйся же получит человеколюбие: А иже аки ухищряя Божие человеколюбие, отшед непричашен сея благодати, неотрочно имети будет томление».

Объемлет ли боязнь, како с лицем несогласным в вере, бракосопряжения и чадородия неотлучное пребывание. Той да слышит верховнаго апостола Павла законополагающаго тако [коринф. 1, глав. 7, зач. 137]: «Аще который брат жену имать неверну, и та благоволит жити с ним, да не оставляет ю; и жена аще имать мужа неверна, и той благоволит жити с нею, да не оставляет его. Святит бо ся муж неверен, о жене верне, и святится жена неверна о муже верне: Понеже убо чада ваша нечиста суть: ныне же свята суть. Аще ли неверный отлучается, да разлучится». – На сие святый Златоуст толкование творит [коринф. 1, глав. 7, ст. 15, бесед. 19]: «Что же есть, аще ли же неверный разлучается, сиречь, аще повелевает ти жрети, и приобщатися того нечестию ради брака, или обратитися вспять, лучше расторгнутися браку, а не благочестию». И паки: «Аще бо не крамолует, пребывай рече (имать бо и приобретение), пребывай и поучай, и советуй, и увещавай. Ни един бо сице учитель укрепити возможет яко жена, и ниже нужду возлагает ей, и всячески истязует от нея вещь, да не паки тяжчайшую соделает, ниже отчаятися повелевает, но оставляет ю в недоумении висящую неявлением будущаго, глаголяй: что бо веси жено, аще мужа спасеши;».

Доволно бо зрится таковых случаев, како едина часть православна, с неверным, и еретиками сожительствовали, и чадородие имели. И како верные жены, пред мужи идолопоклонниками, и еретиками утаивали православную веру; како они ядяху, и пияху, и возможно ли им было соблюдати во всем особность; ибо о житии их повести являют, домовных же их деянии не показуют. Но святоцерковныя законы, таковых не отвергают, и яко истинных и верных своих чад имеют, и с любовию приемлюще присвояют.

Но коль трудно есть, и зело трудно агньцу посреде лютых волков пребывати: тако, и христианину между инославными водворятися. Чесо ради остерегая великии апостол глаголет [коринф. 2, глав. 11, ст. 3, зач. 191]: «Боюжеся, да не како якоже змия Евву прельсти лукавством своим, тако истлеют и разумы ваша от простоты, яже о Христе». Темже и подтверждая глаголет [евреем, зач. 334]: «В научения странна и различна не прилагайтеся». [коринф. 1, зач. 166] «Но стоите в вере мужайтеся, утверждайтеся». [евреем зач. 326] «Не отложите убо дерзновения вашего, еже имать мздовоздаяние велико. Терпения, бо имате потребу, да волю Божию сотворите, приимете обетование».

Святый же Иоанн Златуост глаголет [на деян. во нравоуч. 10]: «Да не будет убо нам впасти в нужду толику, даже бы согрешати по крещении: обаче аще и было бы что такое, ниже тако да отчаемся. Понеже: Покаяние есть, и многую имущее крепость, и зело во гресех погрешеннаго, аще восхотел бы, могущее свободити от греховнаго бремене, и беду приемлющаго устроити во утверждении, аще и в самое приидет злобы дно» [евреем, нравоуч. 9, и 12] и, «Никтоже убо от пришедших в последнюю злобу да отчает себе». [ниже] «Убо велика есть покаяния сила: зане якоже снег содевает нас, и якоже волну убеляет аще и предварив грех вшед омочит нашы душы». «Тако, очистим себе от всякия скверны, плоти и духа, творяще святыню в страсе Божии» [коринф. 2, зач. 182].

И тако не должни боязни ради чтобы не впасти в грех, отлагати святое крещение, и быти всегда в сомнении о своем спасении. Но паче прибегнути к премилосердному Создателю нашему, и искупителю Христу Господу, и на Него всегда упование свое возлагати, и не отлагати святаго крещения, прославляти же его житием, верою, и исповеданием, во все дни живота нашего, аминь.

Добавить комментарий