Житие и подвизи блаженнаго инока Кирила перваго Выгорецкаго пустынножителя. создавшаго прежде обители при реце Суне на острову Виданском во Олонецких пределех.

Праведник аще постигнет скончатися в покой будет: похваляему праведнику веселятся люди. множайше же веселие и прибыток, еже святым похваление приносити, полезно бо се, и зело утешно. похвала святым обыче на самого Бога восходити и превозноситися: и в лепоту не яко они таковая требующе, но яко Богу хотящу прославити угодники своя. яко же глаголет во святом евангелии, прославляющаго Мя пред человеки исповем его и Аз пред Отцем Моим небесным. и сих убо смотряя и аз: воспалихся желанием сердца, понуждает мя любовь отеческая, подвизает мя к беседе дабы написати, от многа времени желая от жития Христова подражателя дивнаго пустынножителя блаженнаго отца: но возбраняет недостоинство мое и грубость, понеже имея разум несовершен и всякаго невежествия исполнен; неучен грамматическаго и риторическаго разума, и ни единаго дела стяжах ко исправлению и свою немощь смотряя недостижну, и великому исправлению онаго старца взирая, аки безгласен и безделен в недоумении и ужасти быв не обретая словес потребных, подобных деянию его. како могу аз бедный в нынешнее последнее время таковаго отца житие списати, и неисчетныя труды его сказати, и деяния того и подвиги послушателем слышанна вся сотворити. немощно есть малой ладеицы велико и тяжко бремя налагаемо понести. сице и превосходит нашу немощь и ум подлежащаяся беседа. много и сам мятохся и размышлях в себе угодно ли се будет Богу и угоднику Его пустынножителю отцу Кирилу: но обаче молился всемилостивому всесильному Богу и пречистей Его матери пресвятей Богородицы, яко да вразумит и помилует мене грубаго и неразумнаго: яко да подаст слово мне во отверзении уст моих. не моего ради недостоинства, но молитв ради таковаго старца, и самого того призываю Кирила на помощь, и соосеняющую его благодать духовную, яко да поспешник ми будет, и слову пособник. не похвалы ради старца сия дерзнух писати, но себе на утешение и умиление, души своея и читающим и слушающим на пользу. Аще бо мужа свята житие списано будет то от того польза велика есть и утешение вкупе списателем и сказателем и послушателем, и сие кто слышав негли и поревнует вслед жития его ходити, и от сего приимет пользу; Пишет же Великий Василий, буди ревнитель праву живущим и сих жития и деяния пиши на сердце своем. виждь яко велит жития святых писати не токмо на хартиях, но и на своем сердце, пользы ради, а не скрывати и не таити, а дела Божия проповедати преславно; Аще бо и не писано будет старцево житие никакоже сие вредит того старца, еже не получити ему от нас воспоминания, их же бо имена на небесех Бог написа, сим ни кая же потреба еже от человек требовати писания и воспоминания, но мы сами от сего пользуемся, оставляющу толику пользу. и того ради сия вся собравше начинаем писати: да яко прочии иже не суть видели старца, да и тии почтут и поревнуют старцевой добродетели и его житию. Блажени бо рече не видевшии а веровавше. он бо добрый старец чюдный страстотерпец: без лености повсегда добрым подвигом подвизашеся, николиже обленися. мы же не токмо сами не подвизаемся, но и того готовых чюжих трудов еже в житии его ленимся возвестити писанием, и послушателем слышана сия сотворити, да не забвена будут толикая исправления его. но боюся усумняся, прикоснутися повести, не смею и недоумею како бы сотворити начаток первие подписанию яко выше силы моея дело бысть, но обаче надеюся на милосердаго Бога, и на блаженнаго старца молитву, прошу милости и благодати от Него и дара слову и разума и памяти. творит бо Бог елико хощет и может: еже могий даровати слепым прозрение, хромым хождение и глухим слышание и немым проглаголание: сице может и мое омрачение просветити и неразумие вразумити, и недоумению умение подати. Да убо о имени Господа нашего Исуса Христа рекшаго без Мене не можете творити ничтоже: сего Господа Бога и Спаса Помощника на помощь призываю, Той бо есть Бог наш Великодатель, несмысленным Наказатель, дая умение неумеющим на пользу просящим по силе нашей. И после старца Кирила сходу с монастыря Кириловой пустыни, тако оной монастырь называшеся. бых аз недостойный во оном монастыре при присланном игумене с Великаго Нова града Ефреме и при оставшихся от онаго Кирила старцах во оной обители живущих Иякове Лукичеве с товарищи. Хотя тогда уже и от благочестия неволею в новину приклоньшихся, токмо еще чин и устав оного старца Кирила держащих: видех их чюдное смирение и дивное послушание з безмолвием вся по чину на моление всех сходящихся во едину церковь по вся дни, и на единой же трапезе ядущих с безмолвием, токмо един чтец посреде столовой жертвенник читаше, и на трудех вси со смирением хождаху, и друг ко другу совопрошающеся и повелевающе. и вся службы еще по чину добре устроены храняще и беседовах со оставшими старцы и совопрошах их о старце Кириле и о житии его: они же мне со слезами начаша сказати поминающе оного старца учение, и житие и труды его и подвиги, и з бесы борение, и показующе и келию его. и прочих иноков соловецких выходцев Епифания и Варлаама, где оный Варлаам и погребен: како они пожиша преже монастыря пустынным житием; и аз видех и смотрях прилежно еще ми в юном возрасте, почюдихся и прославих Бога. и после того в сей пустыни живущу ми поминах видех онаго старца в земли погребенна, и воспалихся к нему желанием и начах поминати онаго старца где когда что слышах и писах на малые бумашки что когда спомню, и помышлях когда бы сие собрати во едину тетратку но сумняхся, и по времени видех книжицу малую писания руки дивнаго отца, Соловецкия обители, и за благочестие пострадавшаго, и чюднаго во исповедании о благочестии, и храбраго во страдании, в Пустозерском острове с прочими страдалцы протопопом Аввакумом, и с прочими, скончавшагося инока Епифания, како с ним поживе вышед из Соловецкой обители в пустыни на Суны реке и от многих иных достоверных мужей слышав како той старец Кирил в той пустыни поживе пустынным жестоким житием, и како ту обитель согради и церковь воздвиже Святыя Живоначальныя Троицы, и како братию собра, и како избеже из своея обители от гонителей, и како забеже в сию в Выгорецкую пустыню, и како поживе ту и скончася о Господе: и начах собирати вся писмена вкупе, но писано все не вдруг и не порядочно, перьвое после, а последнее перьво: и начах совокупляти воедино и разбирати по статиям, и написах в трех тетрадех самою простою речию: и начах о сем помышляти, како сие в люди показати: но помыслих отдати начисто переписать и приукрасити речи пристройнее, и молих и нудих некотораго христолюбца, он же приим мое моление и преписа а овые речи и приукраси добре, токмо еще вчерняв: и отдаст мне недостойному пересмотрети, аз же приях от его любезно и разсмотрих и прочтох, иныя статии пространих, а иныя смалих, и написах в славу Святыя Живоначальныя Троицы, Отца и Сына и Святаго Духа, ныне и присно и вовеки веком аминь: Но о сем прошу прощения смотрившех и читавших и всех христолюбцев предложения предословию.

 

О отечестве и о родителех блаженнаго

Есть убо во области великаго Нова града в пределе же Олонецкаго езера Онега на западней стране, село некоторое зело мало именуемо Суна, в нем же есть весь нарицаемая Андреев наволок. яже сего блаженнаго отрока родителие живяста от благочестивых родителей християнскою верою цветуща: отец его именем Ипатий Васильевич сын, мати его именем [..?] живяста по закону богоугодно, имением же и нужными потребами всяк довол имуще.

 

О рождении блаженнаго

В лето от создания мира 7116 родиста сего блаженнаго отрока, и радовахуся о рождении его яко благослови Бог ложесна мужеска пола. и огласивше его иерейскою молитвою, и того руками породивше во святей купели святым крещением и Карпом именоваша. отрок же растяше, от самых пелен крепляшеся духом о Господе в страсе Божии и наказании родителей своих присно. детских же играний и губительных глумлений, и празднословия всегда бегаше, яко темнаго ада и от бесед вредительных и пустошных яко от смертнаго яда поелику мощно охраняшеся, и прилежаше паче кротости и смирению и молчанию, от частых же снедей весма уклоняшеся, и посту паче внимаше нежели игранию и частым снедем, и пустошным беседам, яко же и прочии отрочата в мире прилежат. но сей всегда яко дряхл хождаше, всегда соводворяшеся со старейшими, слушая и внимая полезных, или сам наедине в молчании пребываше яко и родителем чюдитеся его чюдному смирению и разуму и кротости и воздержанию. в таковом еще детском возрасте. и помышляюще и глаголаху друг на другу что убо будет детище се, и радовахуся о сем и горяще к нему сильнее любовию.

 

О научении грамоте

Молчание и кротость стяжавшаго, на путь спасения наставляет: сам бо рече Господь: На кого призрю разве на кроткаго и смиреннаго и молчаливаго и трепещущаго Моих словес: что же творит дивный всея твари Содетель, присаждает сердце его к любви писания, да испытав е обрящет живот вечный, от теплоты мягкаго младенческаго сердца. приступает отрок к родителем своим и руце свои на выи тех воздвизает и тихо язык свой к молению со стыдением отверзает, кланяяся и падая на родительскую ногу просит благословения учитися грамоте от слепаго поселянскаго невежества: держай бо рало по Спасову гласу когда умудряется. но присно бо отцу его попечение и прилежание бяше еже землю делати и еже рыбу ловити, и того ради не внимаше отрока молению. но любящим Бога вся по апостолу приуспеют во благое, ибо по многом его молении по некотором времени умягчися нива сердца родительска и каменная поселянская в мягкость преложися: даяше отроку благословение к научению грамоте, и тако вдан бывает блаженный Карп во училище от дому своего яко за пять поприщь в село рекомое Кондолога к священнику: отрок же взяв от родитель благословение с великою радостию верою влеком и прилежанием наставляем не в долгом времени изучися букварь и часослов и псалмы Давыдовы читати добре навыче, и отпущен бысть в дом к родителем своим. Но место то где отрок живяше рекомое Суна прочих книг никакоже стяжа, зане грамотных людей не обреташеся в то время в селе оном. Но отрок яко елень желаше тещи на воды словес, часто прихождаше в село рекомое Кондологу к церкви Успения Пресвятыя Владычицы, к вышеписанному священнику, часто слушая божественныя литоргии, и церковнаго пения и чтения. и от онаго священника взимая книги, прочитоваше, и яко губа воду поглощаше божественных словес начертание. но и священник той, видя отрока смирение возлюби его, и часто наказываше ему по заповедем Господним жити. многажды даяше ему в церкви псалмы читати. отрок же вельми внимаше и учаше со всяким вниманием и прилежанием: и тако отроку преспевающу в духовных и телесных добродетелех, их же ради весма сладок и любезен всем являющеся. аще и кипяше добродетельми, обаче тяжко в себе вменяше еже с мирскими сожитие, но помышляше в себе во уме своем како Богу угодити, и коим ухищрением мира избежати, и часто о сем моляшеся Богу с великим усердием и слезами, и того ради непрестанно желаше всего себе отдать в любовь Христову, о сем вельми печаловашеся, дабы его кто наставил на таковое благое изволение: токмо сам в сердце своем таяше, и не смеяше сего никому поведати, бояся родителей своих да не уведано будет ими прежде времени: аще и хотяше бежати, но пути не веде, и на мнозе блудяше умом сам себе размышляя и глаголаше в себе: бедный Карпе, аще и сотвориша сия, да еще постигнет отец мой яко мощно ему сия сотворити и возвратит мя вспять и тем отца в скорбь вложу, себе же в срам и в студ мног и в поношение всем, а сам не управлен буду таковому рачению: и сего ради прежде времени не смеяше сего сотворити. но искаше прежде себе таковаго чина обрести, кто бы его к таковому делу наставил и путь показал, но не прилучися в то время таковаго человека обрести, или тако Богу изволившу, хотя его искусити мирским житием яко да искуснее явится; а сам на таковое дело бояся без благословения родителей и наставника дерзнути, да не како от диявола запят будет, или родителями возбранен будет, или своим малоумием не достигнет таковаго жития: себе в срам вложит и в поношение, а родителей на гнев и на скорбь подвигнет. отроку же растящу, и разсматряше в себе тленная и временная века сего, яко мимоходяща вся суть и непостоянна, и скорби исполнена, сего ради не внимаше сему житию много волнуемому, и тяжко себе вменяше еже с мирскими сожитие. и того ради непрестанно желаше, всего себе отдати в любовь Христову, всегда о сем часто моляше всемилостиваго Бога да устроит ему ко спасению путь. славу же и богатство вся яже в мире многомятежну и непостоятельну разсуждаше. и доброт земных жития обилие вся елика человеческая на земли, суетна и не суща разумев: деснаго пути емлется, научением божественных книг упражняется, пощение же любяше и сухоядение. празднословия же и смехотворения безчиннаго сквернословесных же и душевредных песен, юношескаго желания ослабляющих душу до конца ненавидяше бе бо благ и кроток всем, уветлив, нищелюбив же по премногу, наипаче же иноческий чин любя зело почиташе, яко и самем родителем дивитися таковаго опасения отрока и благонравия. видяще в юне возрасте и помышляюще в себе не яко от них рожденнаго, яко поистине от Бога дана, и непщеваху. и яко в меру мужа прииде возраст его.

 

О сопряжении брака

Родителие же его помышляху браку законному причташи и, а юноша присно желаше и помышляше како от всех к Богу угодити, и коим ухищрением мира избежати и упразднитися. и прииде к своим родителем с кротостию и со смирением и любовию отрекашеся, и глаголаше им от писания словеса самого Владыки и Бога, блажени чистии сердцем, яко тии Бога узрят; и апостола Павла глаголы, и женивыйся рече печется, како угодити жене; а неоженивыйся, печется како угодити Господеви, и иная многая словеса глаголаше от божественнаго писания, з жалостию и со умилением и со слезами. они же слышавше от него таковыя глаголы, и начаша его болши понуждати к брачному совокуплению, желающе его видети наследника дому их боящебося да некако избегнет от них на свое произволение, и з жестоким прещением понуждаху отрока: он же видя родительское непреложное устремление, к брачному совокуплению: того ради ратовашеся з борющимися помыслы: оттуду убо понуждаше его родительская воля: а от внутрь удержеваше его к сохранению девства. и нача о сем вельми скорбети и плакати, и глаголаше сам к себе. бедный Карпе, что ныне сотвориши, избери себе едину от сих, или волю родительскую сотвори, или родительския любви лишися. но хотяше воли Господни повинутися паче: ужасашежеся и родителем противитися да не постраждет что лютое яко же и древний мних Малх. иже не послуша родителей своих к браку его приводящих. последи же пленивших его принуждением, и во иночестве сый жене припряжеся: но аще и чистоту соблюде, обаче многая бедонаведения претерпе. сия поминая Карп плачася горько, и нехотя повинуется воли родителей своих; они же абие обретоша отроковицу, именем Татияну. яко в стяжании имения тако и в кротости нрава юноши соравня ему, юже по воли родителй сопрягоша ю с ним, по християнским обычаем законному браку: по реченному: честна женитва о всем и ложе нескверно. но юноша в то время возрастом бе шести надесяти лет, и тако пребывая з женою своею три лета по естественным пределом. она же приемши от него, и роди дщерь, юже и огласивше и крестиша и нарекоша имя Акилина.

 

О отвержении мира

Но юноша аще брака иго на рамо свое и возложи, и рожденныя от него дщери узою ногу своею связа: обаче искаше како бы ярем креста Господня могл поносити, покушашебося приточне едино око возвести на небо а другое оставити зрети на землю, но не можаше. невозможно бо по гласу самого Спаса: единому рабу двема господинома работати. подобне и тому о мирских прилежащу Богови угодити; и того ради многажды сокрушаяся душею в стонании сердца, яко увязе нога его в сетех мирскаго попечения. о теплыя любве к Богу Божия раба, приемлет бо во уме Спасово слово глаголющее: аще кто любит отца или матерь паче Мене несть Мне достоин, или жену или чада, несть Мне достоин. и сия словеса поминая сам в себе плачася глаголаше, что сотворил еси убогий Карпе: вместо нетленных тленная возлюбил еси. вместо свободы узами себе связал еси. о моего окаянства райскую доброту оставя, терние же и волчец жати изволив, царствия небеснаго славу презрев, в тленных мира сего прелестех валятися восхоте, легкое иго Владыки Моего отложив, тяжкое же бремя печалей мирских на ся возложих; кто имея и ум, не посмеется моему безумию: и тако укаряя себе по вся дни и часы. не даяше сна своима очима и веждома дремания, но непрестанно желаше отлучитися мира и похотей его. милостив же бяше блаженный, и часто послушая пророка Исаии глаголющаго: раздробляй алчущим хлеб свой и нищия бескровныя введи в дом свой: и того ради приимаше нищия, и странных под кров ввождая упокоеваше непрестанно, и с ними беседуя и вопрошаше о спасительных пустынных местех: и слыша от них о некоторой пустыни Юрьегорской, яже отстояше далече от мира, обретается в пределех Каргопольских. яко зело удобна есть ко спасению. ея же первый насельник бяше преподобный Диодор, и по нем братиям богоугодно живущим и труждающимся. и положи блаженный желание в сердцы своем во еже бы быти тамо.

 

О отшествии из дому родителей своих.

Не по мнозе времени во едину от нощей, всем домашним его, и супрузе, в глубокий сон сведенным бывшим: той же востав скоро взя с собою мало хлеба, и ризу юже всегда ношаше, изыде тайно из дому своего: на него же взирая со слезами ко Господу моляшеся глаголя, всесильный и страшный и от всея твари всеговейно покланяемый Боже и Содетелю Господи мой Исусе Христе изволивый прежде нашего ради странствововати на земли, да нас устранившихся приведеши к себе яко милосерд: Ты всемилостивый Спасе призри ныне от святаго Ти жилища славы Твоея на мене грешнаго и недостойнаго раба твоего, и даждь мне крепость и силу во еже победити вся смущающая мя помыслы, се бо оставляю дом, и родителей моих, и жену и чада имене Твоего ради: Ты же Источниче некончаемый радости сподоби мя вместо сих тленных получити нетленная и вечная благая, яже уготованна суть у Тебе Создателя моего праведным Твоим, и сердце мое воспали в сладчайшую любовь Твою, яко Тебе подобает слава со Отцем и со Святым Духом ныне и присно и вовеки веком аминь. И скончав молитву пойде в путь свой славя Бога. дошедшу же ему в пределы Каргопольския. и по смотрению Божию обрете спутника идуща в предреченную пустыню Юрьегорскую, с ним же пришед во оную пустыню, радовашеся яко сподобися видети желаемое ему пустынное место. Егда же время куроглашения бысть, в неже обычай имут мирския от сна воставати: но Карп в доме не обреташеся поискавше же его в домашних селениях, мняще да негли отведоша его камо некая домовная попечения; но единаче не обреташеся, и того ради в скорби велицей бяху родителие его и супружница: и день от дне провождающе искаху его во окрестных весех но не обретаху, и того  ради плакаху по нем яко по мертвом. отец же его видя сына своего неначаянное отшествие или огласнее родительской болезни рещи пагубу, большею печалию обложи свою душу. такожде и мати его, матерски кричаше женскими умильными гласы причиташе: такожде и супруга его горько вдовства и сиротства своего плакаше, дочь свою малую на руках своих держаше, всяческими умильными женскими гласы стоняше. и стекошася на их горкий плачь вси знаемии и сродственнии с соседи, и вси с ними горько кричаще поминающе его добрыя глаголы от божественнаго писания, како им сказоваше и поучаше их, и глаголаху к родителем: почто вы сие дело над ним не хотящу ему сотворили принудили его силою законному браку сочетатися: родителие же его начаша себе зазирати и каятися, и сугубый вопль к настоящему плачю прилагающе. понеже стрецаше старца лишение сына, яко обременение домашния чади, ибо жену имяше, и невестку со внукою, яже требоваху повседневней пищи и одеяния и прочих. Их же кроме тело пребывати не может. к тому же и земля делателя прошаше, и воды рыболова требоваху и пажити стригущаго их ожидаху, но обрести того не ведяху. Сими же всеми принужден быв Ипатий, и прияв к себе в дом в единожительство зятя своего Ивана со отданною в жену за него дщерию своею, с сестрою же блаженнаго отрока Карпа: и тако живяху мирскими пекущеся и о лишении сына своего сетующе всегда.

 

О пришествии на Юрьевы горы блаженнаго отрока.

Отрок же прииде во обитель Юрьевгорску еще живу сущу преподобному Диодору яко светилу сияющу в добродетелех. имея у себе в келии подобных себе учеников инока Прохора и другаго священноинока Иоасафа велика обоя по Бозе житием мужа блага и кротка, у отца своего в послушании живуща. яко звезды сияюща в добродетелех. пособствующе отцу во всяких правлениях. и посли отца своего обои строительствовавше во оной обители в монастырьских правлениях по стопам отца своего ходяще и добре правяще. и к ним приступает блаженный отрок Карп и молит и просит их отца своего преподобнаго Диодора молити о нем чтобы ему сподобитися отеческаго благословения и молитвы. да повелено ему будет во обители их пребывати некоторое время. оные же Прохор, Иоасаф видя отрока с великою верою и со слезами. приклоняются к молению отрока. и приводят его к преподобному Диодору, отрок же пад к честным его стопам с великим умилением и со слезами молит и просит о приятии его во обитель. отец же смотря на отрока прозорливым оком возлюби его и повелеваше ему во обители пребывати во всяком послушании и в трудех. отрок же радуюся и веселяшеся и благодаря Бога яко сподобился святаго благословение прияти и желание получити. нача жити блаженный отрок во всяком послушании, и в трудех, повинуяся настоятелю и братии: и кротостию нрава, пленяше всех сердца во еже любити его от всея души. и пребысть тако живый целое годищное время искушашеся, в трудех послушания, и восхоте иночества ярем на себе возложити.

 

О пострижении во иноческий образ.

Тем же приступает к настоятелю и учеником его любезно объемля тех нозе, землю же слезами омывая. просит облечен быти во иноческий ангелоподобный образ. слышавше же настоятель Диодор и ученицы его Прохор, Иосаф взявше его особь, распросиша по тонку: он же сказа им вся о себе подробну, и глаголаху ему: чадо любезное, тесноту сея пустыни непроходимыя видиши, и сущия в ней тяжкия труды уже искусил еси, иночества же иго како носят братия, можеши разумети. ты же юн сый, того ради не можеши подвига сего терпети: к тому же еще и родителей имаша болящих о тебе, и сожительницу с чадом плачющих отшествия твоего ради: негли некогда и твоя любовь воспалится к любви их, и восхощеши возвратитися к ним паки: и тогда последняя твоя презрению и посмеянию достойна будут. Слышав же Карп таковая увещания, прилагает к слезам слезы, и воплю вопль; и молит их глаголя, простите мя отцы да не тяжек вам буду за невежество мое, ибо вся ведый Господь настави мя приити к вашей святыни, и верую яко начало моего спасения от вас мне датися может: точию прошу вашу благостыню да облечете мя во иноческий образ, искусным вашим разсуждением: да приставите ко мне пестуна разумна могуща мя на добродетельныя пути наставити, от него же научився и идеже аще буду возмогу желаемый мне живот вечный получити, Господня бо есть земля и исполнение ея и на всяком месте владычествия Его, и тако мне милосердия Его, да не будет вами уничтожено прошение. и видевше же его непреложную веру, и усердие, возлагают нань иноческий образ, Кирила того преименоваша потчению тезоименита устроиша в текущее тогда от рождения его в двадесятое лето, повелеваша же ему по обычаю иноческому в послушании быти у некоторого обители тоя искусна инока добродетельнами сединами и разсуднаго нрава красотою сияюща, ведящаго окормляти новоначальныя; у него же Кирил живый, повиновашеся ему. не яко человеку но яко Богу, всегда часто беседоваше с настоятелем и ученики его совопрошающи о духовных дорбродетелех; и волею настоятельскою же и благословением тех во вся монастырская служения пореваше себе присно вся службы прохождаше кроме всякаго прекословия: и бяше образ не точию новоначальным, но и древним жителем, поживе же в таковом послушании украшая себе молитвами и постом и чернечества правилом два лета.

 

О обхождении блаженнаго по монастырем.

По сем возревнови строящей медвенныя соты трудолюбней пчеле, и на тоя по цвети на сем летание взираяй, возжела походити по разным иноческим обителем, да крепчайшыя образы спасения в души своей напишет, тем же приступив ко отцем и подвизающыя его мысли подносит к тех ушесам, и со всяким смирение просит от них отпущения. что нам отеческим сердцем щедрая любовь, аще и не малу тщету вмениша быти того от них отшествие. но обаче мысленныма очима провидяще хотящую на нем благодать Божию быти, отпускают его от себе, и молитвами и благословением наградивше. прирекоша же ему не отлучатися иноческаго правила. Той же не восхоте в дальныя страны отлучатися, да не виною не пресечется иноческое правило. пришед в Кожеозерский монастырь. его же укрепи пустынным своим безмолвным  житием. преподобный Никодим Кожеозерский при животе его и беседоваше с ним наслаждаяся духовных словес. походив и разсмотрив чины и уставы в той обители; и та обитель отстоит от мира в дальнем растоянии. пустынным житием тогда цветяше: И оттоле восхоте ити в под северную и на полунощную страну Понта окияна иже во оттоце окиянстем, на Соловецкий остров иже соградися честная киновия зданием и трудами и молитвами преподобных отец Зосимы и Саватия, с ними же и сожителя их преподобнаго Германа. восхотев в ней видети чина и устава мнишескаго и общежительнаго, како в ней просияша святых яко звезд в небеси, мнози тогда в нетленных мощах чюдесами процветоша: а иныя тогда, на Соловецком острове пустынном отшельническим житием живяху особно в горах и норах земных ведомыя, а мнози и неведомыя, оных Бог весть: и пришед хотяше насладитися жития их, и от того обогатитися: и помолився в соборной церкви и у гробов преподобных отец со усердием и с теплыми слезами. и прият бысть тоя обители настоятелем; и нача жити с верою и со усердием проходити трудами своими вся службы монастырьския с великим тщанием и смирением и послушанием, и всеми любим бысть тоя обители: и разсмотряше чины и уставы и здания монастырьския: и от гробов преподобных отец Зосимы и Саватия и слыша безчисленныя чюдеса и дивляшеся, и прославляше Бога: и часто беседоваше з боящимися Бога тоя обители честными духовными мужи и со отшельники, но сам в себе разсмотряше и внимаше и на сердце своем писаше: и поживе блаженный во оной обители три лета с великим усердием и вниманием прохождаше вся службы монастырьския, томяше плоть свою, и по молению и прошению блаженнаго, отпущен бысть от тоя обители з благословением отец ту живущих. и возвратися паки в Каргопольския пределы. и пришед близ града Каргополя, во Ошевеньской монастырь, кий созда своими трудами и молитвами Александр Ошевенский. аще и мощи своя под землею сокровенно имеет, но дивными чюдесы всех уверяет. помолися ту со слезами теплыми преподобному Александру, разсмотряя труды его и здания монастырьская, и чины и устав монастырьской; и отшед оттуду в Кенозерский монастырь его же созда преподобный Пахомий на Кенском устье и мощми своими осияет. и ту пребыв мало, разсмотряя; оттуду отъиде в пределы града Олонца: пришед же в Курженскую пустыню, идеже благоухает в земленых недрах преподобный Евфросин Андомский. и тамо смотряше иноческих уставов прилежно. и оттуду пошед в Муромский монастырь и прииде, его же земленую персть преподобный Лазарь положенными мощьми освящает. и ту пребысть неколико время опасно внимая постнических обычаев; Восхотев же и еще к северным странам уклонитися. и прииде в Палеостровский монастырь, его же чюдотворивый Корнилий созда. иже веригами своими отшельною в каменной горе пещерою под молитвенным храмом. тело свое положено быти уверяет. живый же тамо прилежаше прилежно о строениих монастырьских; но и оттуду по мале днех иде в Климецкий монастырь иже стоит при том же великом езере Онеге. его же созда преподобный и чюдный Иона трудами своими и молитвами. и тако быв единаче сам труждаяся, смотряше прочих иноков постническия труды. вся же сия монастыри по отшествии из Юрьевския пустыни приснопамятный Кирил шестилетнаго течения объиде. Потом прииде в монастырь рекомый Задню пустыню и ту пребываше два лета живый во всяком послушании к настоятелю и братии. от града же Олонца во Онежския пределы лежаше тогда путь через оной монастырь. отстояше же от монастыря того по оному пути село некое именуемое Святозеро. и место то бяше благом налияно, за седмь поприщь и неудобь проходимо. Кирил же молив настоятелю и братии да повелит ему оное блато премостити своима рукама в два древа. они же доброе его изволение видевше повелеша желаемое ему исполнити, еже и сотвори. пребысть же в том монастыре два лета: и потом восхоте во обитель великаго отца преподобнаго Александра Свирскаго ити.

 

О пришествии в монастырь Александров иже на Свире.

Да тамо быв недоконченныя труды и подвиги понесет, и совершенно да навыкнет постническим обычаем и иноческим нравом. и монастырьское строение, и чины и уставы церковныя, крепко в мысли своей вообразит. и пришед в церковь Живоначальныя Троицы и пад пред образом с великим умилением и со слезами. тако же и к раце преподобнаго чюдотворца Александра глаголя. виждь Господи труд мой да не вотще будет хождение мое. Ты мя Господи научи. и настави мя на путь спасения. и тако приступль к настоятелю молит его о приятии в монастырь. он же настоятель виде его смирение. и распрошав его. оной же Кирил все про себе исповедав и прият бысть в монастырь и нача жити во обители Олонецкаго солнца славнаго отца Александра. тогда усердие ко усердию прилагаше. пот к поту соединяше. слезы к слезам источаше. послушание к послушанию совокупляше. поваренныя службы и хлебопекарныя труды с радостию ношаше. лесосечения орания руку яти с радостию подъимаше. рыбным ловитвам и пустынных былия собиранию неленостно прилежаше. во всех бо искусен доблий сей блаженнаго послушания сын. пребысть же в таковом устроении во обители оной пять лет во всяком послушании проходя вся монастырьская службы со всяческим прилежанием и послушанием и вниманием, и разсмотряя и поминая труды и поты преподобнаго отца Александра и часто беседоваше со игуменом и с духовными старцы. совопрошая о общежительном и пустынном житии, и сказоваху ему вельми бо его любляху вси во обители за великое его смирение и послушание. И прииде ему в мысль посетити родителей своих. не для желания или угождения плоти своея, но для спасения родителей своих да вина им будет к вечному спасению и сам от них благословения сподобится, а оных на старость от печали свободит. и егда сицевую мысль от сокровища сердца своего во уши игумену и духовнаго своего отца отрыгну. тогда той немалу тщету возмнеша быти отшествию его от них. отсюду же жалеюще образ послушания его из обители отпустити. отнюду же боящеся, да не будет оный пленен любовию родителей своих и супружницы. Тем же увещают его глаголюще, почто чадо оставляеши спасительное место и в мирския жилища отходиши. уже бо единою умре мирови, почто к нему яко жив обращаешися. почто оставляеши покой и в некончаемыи безпокойство идеши; или не веси жалости родителей твоих, или не знаеши болезни бывающих о детех, их же всех в дому твоем имаши. и аще любовию тех пленишися увы коликая пострадати имаши. таковая увещания от игумена, и от духовнаго отца своего слышав Кирил, глаголет к ним. о прилежнии спасения моего снискателие отцы святии. милостив да будет вам Господь Бог яко толикое в пользу мою прилежание имаше. обаче да востанет от уныния ваша святотеческая мысль, и в веселие надежды да благоволит внити, понеже аще телом и отхожду от вашея святыни, но духом моим неотлучен желаю с вами пребывати. не бо ради мирских похотей умащающих тело во своя возвращаюся. но да посещу иже мя в болезнех рождьших, и вина спасению их да буду. имам законную заповедь на раме моем висящу: чти рече отца твоего и матерь. и апостолово запрещение глаголющее: аще кто не прилежит о своих ему паче о присных, сей и невернаго горши есть. сих ради хощу идти во своя си. да негли возмогу и родителя моя увещати в спасительное иноческое житие, точию молю вашу святыню. дати ми на путь благословение яко молитвы ваша хотению моему на совершение. слышавше же отци непреклонное его нрава, рекоша: благословен Бог хотяй всем спатися, и в разум истинный приити, той да наставит мя на путь спасения, и желание твое да исполнит по божественной Его воли. и Кирилу рекшу Аминь. и тако даде им о Христе целование и отъиде в путь свой.

 

О пришествии Кирилове в дом родителей своих.

Не помнозех днех достиже дом родителей своих. вонь же вшед и по обычаю мнишескому даде родителема своима еже о Христе целование. тии же видеша его иноческими одеждами многими же трудами и подвиги изнурена, абие с радостию плачь смесивше и с веселием рыдание совокупивше глаголаху: откуду нам се. яко прииде к нам надежда живота нашего, се бо уже шестьнадесят лет круг течения своего вращает, мы же не насладихомся прекраснаго твоего видения любезный сыне наш, не насытихомся пресладкаго твоего гласа. всежаланная утробо наша. но быхом яко нощьнии вранове на нырище бдяще, и яко птицы особящеся, с нощницами воююще плакахом лишения твоего крепкий подпоре старости нашея. ныне же видим тя сладкий наш свете. и о прибытии твоем к нам зело возрадовахомся. срадовашеся родителема и супружница его и дщи его аще и замуж отдана сликовствоваше, яко узре рождьшаго ю тихое лице. и тако всем веселящимся. пребываше блаженный в доме родителей своих не ослабевая нимало в трудех телесеных. иноческое правило присно исполняше. видевше же родители и супруга добродетельное его житие. и ктому не яко по плоти любимаго им быти вменяху, но яко велика отца почитаху. и не смеяху вопрошати его о отшествии из дому.

 

О отшествии из дому родителей своих на остров Виданский в лето 7148-го.

Минувшим же неколиким днем восхоте паки отъити блаженный впреди реченую великаго отца Александра обитель. призаповедано бо бяше ему тамошними отцы неукосневати в доме родителей своих, и того ради тщашеся немедленно отъити, да не пленится сердце его мира сего любовию; родители же его слышавше о сем. моляху его со слезами и с плачем глаголюще. возлюбленное наше чадо, еще ли хощеши к перьвым нашим болезнем приложити вторую печаль. почто неуврачевав сердца нашего перьвых печальных ран, вторыя болезненыя терны в душу нашу всаждаеши. или неразумеваеши естественных предел. повинися молим тя родительской нашей воле, иди в монастырь не далече от нас отстоящий, иже Вышеостровский именуется и пребывай тамо, можеши бо везде Богу угодити; аще ли не хощеши во оном монастыре жити, то иди в пустыню яже есте о Суну реку, и вельми всяко удобно ти будет ко спасению. ибо лесом и рыбною ловитвою изобильна есть. Аще ли и монастырь пожелаеши возградити всячески возможно ти будет. понеже поль и пажитей в оной пустыни при брегах тоя реки под изрядными лесами много обрести и нисчитати можно. и аще тамо поселение твое будет. негли и мы седины наши в недрех обители твоея погребем и ты спасению нашему виновен будеши. по реченному, изводяй достойное от недостойнаго, яко уста Моя будет. ибо яко же ты ныне аще послушаеши нас, тако и мы по воли твоей жити будем; Таковая от родителей своих слышав блаженный Кирил ужасашеся воли их противитися, да виною удаления своего не пресечет спасительнаго пути родителема своима. и того ради и нехотя повинуется родительскому наставлению, и тако взем от них прощение, и пойде со отцем своим Ипатием вверх по Суне рекою. дошедшим им до острова иже стоит на оной реце нарицаемый Виданской. его же видев Кирил возлюби место то зело и почиша на нем в той день. отстояше бо остров той от дому его за 12 поприщь. избрав же блаженный на острове том место красно. постави на нем крест Спасителя нашего. пред ним же пад моляшеся глаголя. Владыко Господи Исусе Христе Боже мой иже премногия ради благости Твоея благоволивый снити к нам и воплотитися от преблагословенныя Девы Марии. и за наше спасение пригвоздитися плотию на кресте, восхотевый; его же освятив крестною Твоею Владычнею кровию, сотворил еси всесильно и непобедимо оружие на вся видимыя и невидимыя враги. и дал еси нам творити образ того животворящаго креста на попрание всякаго супустата. и ныне Владыко  Святый посли благодати Твоея величество, на поставление мною крестнаго воображения. да под сению ея седя в пустыни сей побежду вся борющыя мя видимыя и невидимыя враги. Ты бо еси един безсмертен, и тебе славу возсылаю с безначальным Ти Отцем и с Пресвятым и Животворящим Духом вовеки веком аминь;

И тако помоляся отпусти отца своего в дом свой, сам же остася един ту. и постави келеицу малу и живяше в ней. бяше же тогда блаженный 37 лета. и нача труды к трудом прилагати, сечаше бо лес, и сжигая опрятоваше, сеяше и саждаше копая мотыкою, и тако в поте лица своего по писанному снедаше хлеб свой. не даяше бо по Давыду сна своима очима ни веждома дремания, ни покоя скраниям своим. но присно труждашеся днем телесными трудами томя себя, нощию же молитвенными бдениями удручашеся. и бяше зело жесток врагу.

 

О брани диявольстей на блаженнаго Кирила.

Зря же дух лукавый блаженнаго Кирила таковыми подвиги себе удручающаго юношеское свое тело. воста нань, и присно пакости ему дея, тако бдящему яко и сон тонкий сведеному многажды бо великия клопоты и звуки творяще, и шума ужасом тщашеся поколебати терпеливую душу. и всяко покушашеся от места его отгнати. Но адамантово Кирилово сердце, ни огнем рвения дияволя таяше. ни стыдению ярости его разседашеся. но пребываше непоколебимо. видя же себе диявол от терпеливыя души посрамляема взя с собою множество лукавых духов, с ними пришед ко блаженному лняше нань коварства своего злобу, умышляя како бы устрашити непоколеблемую мысль. о мечтания твоего лукавый велнаре, творит говоры безчислены, составляет кличи нелепотны, прислышает ропоты скверною словес помазанныя. крича и вопия ко блаженному: калугере калугере, почто в пустыню сию вшел еси, наше бо сие место есть. отъиди скоро отсюду, да лютою смертию умреши. никто же бо доселе дерзну в сию пустыню жити приити, ты же хощеши соодолети нас, но никакоже возмогаше диавол поколебати терпеливаго. мещет паки мечтания своего всеяростную казнь. и сам работая и бесов понуждая. келию блаженнаго до основания разорити. и тако зряху Кириловы чувственныя очи, келию от основания разоряему, мысленнии же разумеваху быти мечтание притворное. видя иже и диявол, яко не стрясеся Кирил конечною боязнию. и по обычаю безстудства своего на кончине с лукавыми своими слугами ухвати страдальца, и бияше его жестоко, глаголя, изыди изыди от места сего. и потом вземше его за ноги влечаху по сущему на том острове тернию, и ризы его терзающе раняху плоть его до крове. прещаху же ему смертию, и в воду вринути его хотяху и ярящеся глаголаху, аще не изыдеши от места сего, то подвигнем на тя злыя человеки, иже пришедше и не хотяща тя изжденут отсюду. Божий же раб мало в себе быв и виде ярость врага дышуща. и конечне погубити его грозящася. обратися блаженный на молитву и вопияше ко Господу глаголя, Боже Боже мой вскую мя еси оставил, се бо обыдоша мя врази мои, и на хребте моем делаша грешницы, раны и ищут душу мою изъяти ю. Ты же радосте моя избави мя от обышедших мя. возгорешабося яростию на мя, яко огнь в тернии, и не имею чим противитися им. разве имене Твоего Святаго: Ему же даждь славу да не речет враг мой. яко укрепихся нань. воскресни Господи помози мне. и избави имени Твоего Господи. диявол же не терпя молитвы Божия раба, отступи от него. и ктому мучити его не дерзаше. Кирилу же отверзостеся очи. и зря келию свою невреждену, яко же и прежде. аще убо и ощущаше раны на себе, но уповаше на Господа яко не оставит его доконца погибнути, и того ради паки нача на месте том жити. и не по мнозе времени постави блаженный близ на малой реки и мельницу, яже молоти и толчи сильна бяше. сотвори же и странно приимницу приезжающих ради молотья с хлебом. видевше его страннолюбие иже во окрестных селех и весех убозии прихождаху к нему часто. он же видя их, яко отец приимаше и покояше их, всяким изобилием в странноприимнице. во свою же молчальницу не впускаше никого, да безмолвие его праздными беседами не повреждено будет, хлеба же от трудов его растущаго и пенязей от мзды мельницею притязаемых оставляше себе точию зело на нужную потребу. прочая же вся нищим и убогим раздаваше.

 

О отшествии из пустыни блаженнаго Кирила в монастырь Александров.

По неколиком же времени восхоте блаженный Кирил идти во обитель великаго Александра да поклонитися святым мощем его. и от игумена и от отца духовнаго приимет благословение и прощение. и сицевую мысль поведа отцу своему Ипатию, часто бо посещавше его отец приходя к нему в пустыню и нося ему потребных от дому своего. он же с радостию от отца своего приимаше, и нищим раздаваше. и рече к нему егда отъиду ты же отче благоволи селение мое надсмотрять, точию молю вас и заповедь даю, да никтоже от вас до прихода моего в молчальную келию мою внити дерзнет но да обитает в странноприимнице моей. Сия рече ведый духа ратующагося с ним в келию его суща. и тако дав мир отцу, отходит во обитель великаго Александра, и тамо пребывая умедли, домашнии же его начасте посещаху селение его.

 

О лютой смерти зятя Ипатиева Иоанна.

Во едину же от нощей зять их Иоанн совокупився с женою своею по обычаю мирских, не омывся приеха в ладеицы с некоторым жителем тоя же веси на оной Виданский остров, и нивочтоже вменив Кирилово запрещение, вниде и с приехав с ним в келию его молчальную. егда же нощь приспе, тем же спящим. внезапу нападе на них бес живый ту и онаго Иоанна яко плотолюбным смешением помазаннаго, и не очищенна суща, подхватив удави. и лепотствующыя кудрявыя власы его одра с кожею, и остави его мертва. от таковыя же духа лютости, надуся Иоанново тело, яко же дебелейшая дельва. поигра бес и над другом Иоанновым, сломив ему руку и изнесе его из келии вонь в сени. и на том месте спа день и нощь, пробудивжеся не можаше на ногу своею стати, яко бы мстом напився, рукою ни мало владея и едва приполз в келию видети Иоанна. и узре его мертва, и красных власов лишена и надута подобием дельвы. устрашивжеся больма едва изыде ползый в странноприимную келию, и ту пребысть до полудня. мало же крепости приим, и во ум пришед, и приползе к ладеице, в ню же вшед и спустися на поводь рекою, и едва доплове к дому своему, и поведа Ипатию и домашним его вся бывшая. они же ехавше тамо с людьми, и обретоша яко же поведа человек той. и вземше тело обвивше веревками, и несоша на жердех в лодеицу, и привезоша его в село рекомое Кондологу к церкви. и сказаша сие чюдо, и видеша вси сие чюдо страшное и ужасошася. изкопаша яму и без гроба для толстоты положиша, токмо доски около подложше и погребоша его тако землею.

 

О испрошении благословения на церковное здание.

Блаженный же Кирил егда прииде во обитель великаго Александра прият бысть игуменом и братиею любезно. пребывая же тамо наслаждашеся от ту сущих отец духовных божественных словес и беседуя со игуменом и з духовным отцем, и прочими духовными мужи вся. сказоваше же им како увещания ради родителей своих вселися в пустыню близ дому его сущу, яже угодна есть к созданию монастырьскому. и есть ми рече отцы святыи желание поставити церковь в пустыни той во имя Святыя Живоначальныя Троицы. понеже во обители Юрьегорской идеже иноческий образ на ся возложих. церковь соборная есть во имя Святыя Троицы, такоже и в вашей обители. подобну и во своей пустыни хощу да будет церковь в славу Отца и Сына и Святаго Духа в Троице певаемаго единаго Бога. прошу же вашу святыню, дадите ми благословение на создание церкви оноя. ибо зело возлюбих по Давыду благословение дому Господня, и место селения дому Господня, и место селения славы Его. слышав же сия игумен, и старейшая обители тоя братия, видевше же и веру его изрядну, и даша ему благословение на создание церкви. В то же время потреба монастыря того понуди игумена ехати в великий Нов град. Кирил же моляше игумена да просит Спасителя иже тогда правяше престол великаго Нова града, да подаст ему благословение и грамоту и антимис на освящение церкви оноя хотящия от него создатися в предреченной пустыни. игумен же обещася во всем желание его исполнити. и тако наказавше его довольно о пустынном житии. и о прочих добродетелех, и отпустиша с миром. прием же блаженный от игумена и от братии благословение прииде в дом родителей своих радуяся и славя Бога, яко сподобися от отец благословен быти.

Отец же его Ипатий поведа ему случьшеся, о зяте своем Иоанне. он же сжалився о напрасной и горкой его смерти. и рече подобало бы вам отче мой, слово грешнаго мене старца исполнити, и во иную келию мою до прибытия моего не внити. понеже ратовавыйся прежде со мною дух дерзну яко же мнитися сицеву беду навести вам. но Божия воля да будет, яко же Господеви годе тако и бысть. и сия рек он, иде в помянутую пустыню, и пришед вселися в странноприимницу, во оную же келию не иде идеже пагубный дух живяше. не тако бо желаше ратоватися со вредящими тело духи, яко же хотяше преодолети вредящыя душу его помыслы. и нача жити яко же и прежде. труды телесными томя себе душу же молитвами питая. нищии  же и страннии прибегаху под кров его по обычаю, их же всех поелику возмогаше упокоевая любовию и милостынею удовляше.

 

О принесении от игумена к Кирилу святительския грамоты и прочих потреб церковных.

Времени же некоему мимошедшу; прииде из обители великаго Александра. посланный от игумена мних, и принесе к нему святительскую грамоту повелевающу убо по прошению его поставити церковь. и антимис для освящения и сосуды церковныя. а иныя потребы яже оный игумен собра у христолюбцев в великом Нове граде. и яже получи от Софийскаго святительскаго дому, и яже сам от своея обители посла на создание церкви, и образ малой Святыя Троицы. Кирил же вся сия приим от мниха славяше Бога. благодаряше же игумена за прилежание его, еже о нем. оного же мниха учредив яко же достоит и отпусти его во обитель.

 

О пришествии к Кирилу инока Епифания соловецкаго.

В лето же 7165 прииде к нему некий инок именем Епифаний, иже жил бяше прежде в Соловецком монастыре. его же приим Божий раб Кирил, со всякою любовию, и покояше его яко странника. беседующим же им друг со другом. поведа Кирил Епифанию вся яже о себе, и о лютой смерти зятя своего Иоанна, и о вогнездившемся дусе нечистом в келии его, и показа ему келию и рече. иди отче Епифание ты в мою келию жить где бес живет. Епифаний же слышав, и глаголя к Кирилы, благослови отче. и помози ми во святых твоих молитвах. да не сотворит мне диявол пакости, и рече Кирил, иди отче Христос с тобою. и Богородица и святии Его. да и аз грешный в молитвах буду помогать тебе елико Бог помощи подаст. и оба, помолившеся Богу. и рече Епифаний старцу Кирилы благослови мя отче, Кирил же его благослови изблагословением старцевым. пойде Епифаний во ону келию где бес живет, и имяше у себе Епифаний образ Пресвятыя Богородицы меднолитный, имеющи на деснице воображенна Сына Ея Господа нашего Исуса Христа. им же благослови его при изшествии из Соловков отец его духовный. и той образ и книги яже Епифаний взем с собою и пришед в келию, и абие нача у него сердце трепетати, и от многаго ужаса подрожа тело его, и кости сотрясошася. власы же главы его восташа, яко терние. обаче возлагая надежду на Бога и на пречистую Его Матерь вниде в келию и постави ону икону на стене, сам же кланяяся моляшеся Господеви Богу, да не предаст его губительному духу. и со слезами вопияше глаголя. Господи мой Господи, призри от высокаго Ти жилища славы Твоея на мое смирение, и пожени борющаго мя врага, не предаждь мене обидети хотящему, се бо скачет окрест мене яко лев, хотя мя поглотити, ты же Владыко виждь смирение мое и даждь славу имене Твоему. да не речет ратуяйся со мною, где есть Бог их. воскресни Господи помози мне и избави мя имени Твоего ради. и заступления ради пречистыя Ти Матери и всех святых яко благословен еси вовеки аминь. и по молитве приим кадило и наполнив е фимияна, и покади святый образ Богоматере, и книги, такожде и келию и сени, и нача пети вечерню и павечерню и каноны глаголати и прочее правило свое по обычаю совершив. и продолжая правило его до полунощи и больши [а сие было до праздника Богоявления Господня за два дни]. и утомися довольне. и знаменався крестным знамением и возлег опочинути и усну во всяком покои и тишине. не терпяше бо губительный дух пребывати в келии егда образ Пресвятыя Богородицы вниде. бе бо той благодати и святыни исполнен. и изгнав бысть бес из келии тоя. и тако пребысть до утрия во всякой радости и утешении; егда же нощный мрак дневным светом прогнася и бысть день. и тогда Кирил к Епифанию прииде, и купно с ним благодарныя молитвы воздаша Господеви Богу и Пречистей Его Матери за отгнание супостата их. и пребыша во оной келии купно живуще четыредесять седмиц, не ощутивше на ся бесовскаго нападания ни во сне ни наяве.

Потом создаша другую келию. мало пониже того места о ту жу Суну реку в наволоке яко за пол поприща, и во оную келию прейде жить Епифаний, и икону изнесе. живый же тамо Кирил делаше сосуды и даваше христолюбцем. от них же приимаше пищу, и тако питашеся, подаваше же Кирил и Епифанию от своих трудов яко стяжательнише его бяше егда же Епифаний от блаженнаго Кирила прейде жити во свою келию. Кирил же остася един. и паки бес яко же и прежде нача братися с ним. но Кирил жественно ратовашеся с велиаром, и вся его козни яко стрелы младенческия быти вменяше.

 

О пришествии инока Варлаама соловецкаго.

По днех же некоторых прииде к нему другий старец именем Варлаам. и той бяше отшельник соловецкаго монастыря. его же Кирил с любовию якоже и Епифания, и постави ему келию при той же реце Суне, отстоя шую от него яко едино поприще. он же нача ту жити, делаше же той сосуды, и даваше христолюбцем. и приимая от них мзду, питашеся. вельми же нестяжательное и жестокое житие прохождаше. имяше бо на себе едину сукняну рясу юже на нагом теле ношаше всегда без пременения, от поста же толико изнемогл бяше, яко едва мощно слышати глас его, егда к пришедшим к нему глаголаше. нечасто же и то творяше, и со всяким опасением. никого же бо в келию к себе пускаше, разве единаго Кирила. аще ли со иными с ким случашеся ему глаголати когда, и то зело кратко. ископа же себе подле келии своея ров, и внутрь его срубом огради. и содела гроб, и в рове той постави, и покрыв дсками. хождаше в ров той, и возлегаше во гробе, и плакаше по вся дни. и толико себе постом и подвиги и плачем истоми. яко едва костем и составом его во едином телеси держатися можно бяше.

 

О проречении Кирилу святаго старца Епифания, и о начале здания церкве, и о обители Виданския.

Но о цветех убо единых, и сладостно мне видится беседовати, о стебли же на ней же цвети висят, зазора полное дело есть оставити. ибо и моего слова основание на житии Кирилове положися, и ваши слухи к того повести исперьва протягнушася. и того ради оставив ныне, яже о соловецких отец кончине, и житии же блаженнаго Кирила. Егда убо виде Божий раб таковыми добродетельными отцы себе посвященна. и большую веру приложи к созданию церкве и к собранию братии, и по неколицех днех яви мысль свою отцу Епифанию, и яже о грамоте данной для поставления церкви, и о прочих потребных возвести. той же егда сия услыша, и яко прозорлив сый глагола ему, брате Кириле, Бог да наставит тя на истину свою. а еже церкви строити и монастыри возграждати, не нынешняго времене есть дело. понеже настоит мира сего князь, и поставленныя прежде сего церкви, запустети имут, ныне убо время приближается плача, а не благодушия. аще бо и воздвигнеши церковь, и монастырь соградиши, и братию собереши, но не долго имаши жити зде. приидет бо ти время, яко ни слышати о месте сем восхощеши. и того ради молю тя, пребуди опасаяся новин да спасеши твою душу. прочее же яко же Господь да наставит тя, тако и твори мене же прощению сподоби. слышав же сия Кирил от старца Епифания, оскорбися мало, яко хотению его не последствует отеческая воля. и глагола Кирил тако, отче боюся что долго замедлил удержати у себе присланное от святителя и от игумена вся потребы церковныя, за своими нуждами и недостатками замедлих. обаче шед к другому старцу Варлааму сказа вся яже о себе, и о желании своем. той же егда от уст Кириловых предлагаемыми беседами ушеса своя наполни и отмещемых от сердца его словес к созданию церкви, и монастыря веру уразуме. и нехотя вторицею опечалити помысла его яко же Епифаний. но некако яко бы утешая его в надежде глаголя. наше убо есть еже начати, Божие же совершити. Господня да будет воля. доньдеже хощет. дотоле да соблюдает церковь свою святую под кровом милости своея. ты же отче мужествуя буди в подвизе, не ратуя бо и аз на Епифаниево проречение. не пресекаю же и твоего усердия, но яко же ти годе тако и твори. а негли хотение твое и усердие Бог исполнит. монастырь соградиши, и братию собереши и спасающихся обрящется к Богу. буди по воли Его Спасителя нашего Бога что хощет и исполнит. Кирил же от словес старца сего аще мало и поутешися, но не ведяше что сотворити, яко же бо отсюду возбраняше ему Епифаниево проречение, и тако сими томяше себе надолзе. но обаче долговремянное его желание преможе увещания Епифаниева. К тому же и данное ему благословение игумена и братии от обители Александровы благословение, немалое уму его дерзновение подаде. Тем же скоро шед в дом отца своего просяше помощи на сограждение монастыря. отец же его слышав сия вскоре раздели имение свое и село и скоты на две части. и едину отдаде сынове своему. другую же остави себе, и дщери своей, ея же мужа удави бес. и бывшей сожительнице Кирилове Татияне, бывши некоторому мужу именем Григорию. послежде же сия родиша себе сына. блаженному же Кирилу внука, его же Иоанном нарекоша. егда же прия Божий раб от отца достойную часть имения. тогда шед обрете древодели искусныя художники, и ная их по намерению своему, церковь возградити. подобне и изографы некия умоли написати, во оную церковь, святыя образы. сам же с другими наемники нача лес сещи, и келию здати.

 

О нашествии завистников на Кирила.

Ненавидя же добра диявол пусти некоторых жителей села рекомаго Шуи. иже живяху в пределе того села. зовомо Мунозеро, в весех же имянуемых Перть на волок и Коньчезеро. собравшебося числом яко двадесять человек и больши, и истеша копия, и бердыши древянные, их же посмоливше тщахуся приуподобити к железным. инии же вземше дреколия и палицы, и приидоша ко блаженному Кирилу его же емше бияху оружиями своими и копиями грозу смерти показоваху, наконец же завязавше ноги его ужем, влечаху по земли глаголюще. изыди скоро от земли и наследия нашего, аще ли не изыдеши то лютой смерти предаем тя. он же жалостно моляшеся им глаголя. любезнии мои братия и друзи будите ко мне милостиви, и оставите мя плакатися грехов моих, Господня бо есть везде земля и исполнения ея буди же тако яко же по наследию отец ваших и к вашим пределом прилежати ей, но и наши отцы причастни суть общине сей. сие убо глаголя к вам не прю вложу. вем бо апостола вещающа. яко рабу Господню не подобает сваритися, но кротку быти и милостиву ко всем вся находящая терпети. тии же зверонравнии не внимаху глаголемых к ним. но единаче бияху его мучаше жестоко испытоваху да покажет им пенязи елико имеет он же елико имяше отдаде им. онем же возъярившимся бияху и наимники его. но той припадаше к ногам их вопия; помилуйте дражайшая моя братия, мене паче бийти а не их, неповинни бо суть тии. но елика аще творят, моим повелением творят, и тако суровии они волцы напившеся кроткаго агньца крове и пенязей и протчее обравше, и отъидоша кождо во свои си.

 

О испрошении повеления в население пустынное.

Блаженный же Кирил мало устрабився от ран и прииде ко отцу своему Ипатию поведая ему вся сотворшаяся. отец же его слышав сия даде ему совет идти во град Олонец к сущему тогда воеводе о испрошении повеления, во еже бы повелено ему было во оной пустыни, в прилежащих в ней потребных местех население имети. приим же Кирил от отца своего таковой совет и иде во Олонец и подаде воеводе прошение. да повелено будет место оно. идеже он хотяше монастырь возградити с прилежащими тому годными потребами и с рыбными ловлями, по объявлению описания его во владение отдати. а за то поелику достойно на всяко лето дань даяти в казну уятоверися. и присланную ему от святителя грамоту при оном своем прошении воеводе яви. воевода же воли святительской последуя посла некотораго управителя. и повеле ему попрошению Кирилову показанныя им места освидетельствовати аще тии кроме населителей обретаются. той же пришед и взя с собою из окрестных мест того села жителей. и со онем обрете вся оныя места по объявлению блаженнаго пустынею молчащыя. яже вся описав подаде воеводе. он же по прошению Кирилову даде на оныя места владительное повеление со определением легкия дани. насельником же живущим окрест места того запрети да не дерзают ктому пакости деяти Божию рабу; блаженный же Кирил приим от воеводы повеление, прииде паки во свою пустыню радуяся и славя Бога. и паки перьвое основание прилежным трудом обновляет, и начатое церкве и келии здание к высоте совершения вкладая под кров собирает, и тако Богу помогающу единым летом церковь оная создана бысть. прислаша же к нему из обители великаго отца Александра образ Пресвятыя Троицы местный. он же прием того радовашеся, и благодарныя молитвы возсылая Святей Троице. Тем же окрест его всем живущим христолюбцем назнамена день вонь же хотяше быти освящение церкви. слышавше же людие собрашася. и священницы и диякон и освятиша оную церковь, во имя Пресвятыя, и Живоначальныя Троицы. приде же к нему священноинок от некотораго монастыря, и живяше с ним служа в новоосвященном храме. начаша же к нему приходити. тако иноцы, яко бельцы желающе сожительствовати ему. он же всех с радостию приимаше. и начаша по оной реки пожни чистити. а готовыя у кого были начаша покуповати. а овыя христолюбцы своя пожни кладом ему отдаваху безденежно. он же вся себе совокупляше и распространяше великия лучи; помале же времени прииде и отец его Ипатий, и восприя на ся иноческий образ. и преименован бысть Иосифом. принесе же с собою и оставленную с ним имения своего часть, еже виде блаженный радовашеся духом, яко сподобися видети отца своего во иноческом образе собрася же всей братии иноков и бельцов во обитель блаженнаго числом до полуста и больше. егда же видех Божий раб еже о Христе братию умножившуся.

 

О создании монастыря в Виданской пустыни.

Созда хлебню, и столовую и около монастыря ограду устрой юже тарасами или триугольными клетьми укрепи. высотою в дванадесят бревен, и плашьями большими тесаными покры, и на углы малыя шатрики постави. и скотския дворы за рекою постави и  у дворов келии. содела же и мост чрез малую реку ко двору, идеже доилицы пребываху. и врата большыя в шахматы, болшим луженым гвоздием прибив и на двое растворять устрои. и подле другия малыя содела. и на вратах образы болшия написанныя постави. образ Спасов и Богородицы и Предотечи Иоанна. и назва тыя врата Святыми. поля распространи, и пажити разчисти. делаше же и пустынную землю, и нивы разширяя насеваше и оттуду хлеба множества приобреташе. яко благослови Бог обитель своего раба. ибо хранилища его бяху по Давыду отрыгающа от сия во ону, и воловие его толста. мельницу же от монастыря прочь повыше отнесе, за поприще понеже оной у монастыря быти не удобно. для приезду на мельницу окольних жителей, и устрой ю изрядне. видевши мати его, мужа своего во иноческий облекшася. восхоте и та пострижена бысть, и применовашеся Елисаветиею, и живяше в келии при дворе доилиц. потом прииде и Татияна бывшая блаженнаго сожительница. и та во иночестве Таисею преименована бысть, и живяше с материю блаженнаго; по сем и дочь Акилина и та оставиши мир пострижеся, и сообиташе матери своей и бабе, и с сыном ея малым Иоанном. радовашежеся сердце Кирилово о собрании своих ему во обитель его и благодаряще Бога яко исполнися желание его, и не всуе труд его бысть.

Бяше же блаженный во всем стаду своему изряден образ, не бо властию обладаше ряду по писанному, но образ бываше стаду. часто же наказоваше, и моляше братию и родителей своих, да попекутся о спасении душ своих, сам же присно себе удручаше постом и молитвами и терпением, вязаше своя похоти. и удаляшеся от всех утешений яко от нечистот, от праздности же яко от врага бегаше. празднословие же от уст его в безвестие отгнано бяше. учаше же и братию свою присно пребывати во страсе Божии, иже есть начало всякому благу. чистоту же толико заповедаше блюсти, яко несуща той вся добродетели. подобны будут праху от гумна жатвеннаго летящему. ропот и свары до конца истребляти веляше гнев от сердца яко терние исторгати, моляше зависти, яко самого диявола бегаше, наказоваше, гордости и тщеславия, яко ада и геены удалятися возвещаше. и елицы соблюдаху сия его завещания, вся тыя любляше, и единомыслены себе быти вменяше; елицы же или слабостию дряхлующе, или леностию распадающеся, или презорством возсвирепеющеся не соблюдаху повеления его. сих первие кротостию увещеваше. и неповинующихся с прещением обличаше и властельски запрещаше. противящихжеся многажды и наказоваше да и протчии страх имут. по реченному: овых разсуждающе милуйте, овых же страхом от огня восхищайте. сицевая блаженнаго исправления видев диявол яростию дышаше на Божия раба, и творяше многи пакости во сне и наяве. овогда бо на спящую братию нападая гнетяше, новых в воде потопляше, овогда бдящим помыслами стужаше. иногда же и доилицы в воде потопляше. вся же сия творяше завистливая утроба. да возможет от пути спасеннаго отвратити, и на Божия раба ненависть воздвигнути. но сладость жития его, и слово разума. вся сия преодолеваше. не яко бо строителя того братия имяху, но яко отца чадолюбива. в сицевом устроении видяще братия отца своего живуща, начаша молити его да идет к первосвятителю, и игуменства сан да восприимет. он же изволение сердец их хвалит, приятия же сана отричется. не яко не хотя послушати тех но поминая проричение Епифаниево, ждаше бо скораго от обители своея отлучения. и с любовию и кротостию отцу своему и братии отвещеваше. держим братия священника, того которой всегда печется о церковной службы, и о духовенстве, а мне довольно братие по вашему молению и сего строительскаго чину держати и правити. мы братие печемся о монастырском здании и о спасении душ своих, а не ищем большаго чину которой ныне нам неудобен восприяти. отец же его и братия слышавше от него сия, и даша ему на его произволение и разсуждение, видевше бо его самого в великом воздержании и в монастырском здании и во всяком чиноположении, добре вельми правяща и пекущася. сам же Кирил по вся дни з братиею вельми труждаяся без покоя, и хождаше по всем службам сам смотряше и уставляше. а в нощех отхождаше во свою безмолвную келию, и в безмолвии вся нощи без сна пребываше моляшеся Господеви со слезами и с плачем, о себе и о родителех своих и о братии и о здании монастырском и о чиноположении что бы добре устроити. сам же пребываше в великом воздержании и посте удручая и муча плоть свою всячески. понеже крепок бе телом, и силен, и мощен смыслен и разсудителен, в духовных и плотских. и виде отец его и братия вельми прославиша Бога. и сами тщахуся по заповеданию его по силе своей исполнити. но диявол видя его в таковом устроении, не преста ему пакости деяти, наведе на него брань велию, нача ему блудными помыслы стужати всячески во дни и в нощи, не даяше ему покоя. он же разуме вражия коварства. нача постом и труды плоть свою томити чрез день и два хлеба не вкушаше, труды же к трудам прилагаше, не дая себе покоя ни днем ни нощию, диявол же болми разжигаше, блаженный же на лес в пустыни и дебри хождаше плоть свою старческую томя во время летнее идеже камаров толпы и мух и оводов соньмы летаху и стрецаху тело его. но лютаго пламене угасити не возможе, и не удовляшеся тою мукою. преломив еловыя ветви. и бияше себе до пролития крове. сам же плакаше и моляся Господеви, о избавлении вражия лютости, и до того сам себе бияше тако утомляя падаше на землю и лежаше надолзе яко мертв, и востая отхождаше в монастырь. но сие и многократно творяше. пребысть же в таковом подвизе до толика яко победити ему вся вражия прилоги и обрести внутрь себе образ покоя мысленныя радости. немалу же пакости ему деяше враг наношением блудных помысл. о неусыпныя твоея лютости лютый человеческаго рода враже. како непрестая наступаеши на предваршаго единою услаждающаго тя любодеяния скверною узою, о мужественное сердце блаженнаго Кирила, яко мужествовати в таковых во всяких коварствах твоих, обыкшее храбро с велиаром боряшеся и преодолевая его лукавыя козни.

 

О явлении Пресвятыя Богородицы святому Епифанию, и о страдании его за благочестие.

Ельма убо Епифанию ту живущу, и от хотящих потрясти всю Россию новинах печалующу. является ему всех небес Царица Пречистая Богомати Дева, повелевающи ему идти в царствующий град Москву для обличения, хотящих новинами возмутити всю Россию. проричающи ему за древлеотеческия законы от новолюбителей пострадати. во исповедании же и в страдании обеща ему благодать свою и помощь даровати. Егда же Еифаний божественнаго света Божия Матере явлением наполнися, не смеяше надолзе молчанием покрывати своих устен но абие возвещает Кирилу яко любиму сущу и глаголет ему, отче любезный, аще и кипит изобилием обитель твоя но благоволи послушати пророка Давыда вопиюща. богатство аще течет не прилагайте сердца, ибо настоит время ныне тесноты а не пространства. по апостолу, рекшу, и хотящих благочестно жити о Христе Исусе, гоними хотят быти, ныне убо прииде время еже спасати комуждо свою душу и оплаковати своя мертвецы а не о здании обители пещися, сим поувеща святый Епифаний Кирила, и о новостех хотящих играти по России вкратце надвестив. такожде и з другим старцем Варлаамом, побеседовав и сказа все о себе и явление Царицы и Владычицы Матери всех Бога, и показа ему книги своя написанныя на обличение новолюбителей и по беседе дав им мир и себе на путь взяв от них благословение пойде к царствующему граду. известивжеся о новостех сеемых по России, яже вся описав подаде носящему багряницу судии, но лесть новолюбителей превозможе мужество скипетродержавнаго сердца. и того ради оный Епифаний осуждается языка отрезанием и сылкою, в Пустозерский остров[г?]. о светлости твоея благочестивый древлеотеческий догмате. отрезанный убо Епифаниев язык на земли лежаще, слово же проповеди во устнах казненнаго седяше и яснейши неврежденнаго языка всем древлеотеческое благочестие проповедаше. о каменныя твоея утробы лютое нечювствие, аще помрачившая тма солнце, и потрясший землю трепет не поколеба зависти жидовския на Христа моего изнесенныя, како можаше един безъязычный. биричь[?], и по отрезании языки яснейшее глаголя обратити окамененая сердца единою века сего прелестию омраченая. и тако убо Епифанию Пустозерскии мучительства постигшу и с великоревностным Аввакумом и великоверным Лазарем, и с премудрым Феодором, в недрех земныя темницы всельшуся, и поне колицех летех со инеми древлеотеческия веры проповедники, за отеческое благочестие во оном Пустозерском селении огнем  сожжену бывшу. о нем же пространную повесть оставлю, ныне же о блаженном Варлааме, восприемлю слово.

 

О преставлении инока Варлаама.

Егда убо многотрудный Варлаам безмолвия тишину в покой праведных Божиим судом, превести сподобися, и от здешних сует в невлаемое пристанище преселитися и дух свой в руце Божии предати удостоися. тогда блаженный Кирил мановением Божиим водим, любовию же понуждаем прииде посетити старца, но не обрете его яко же прежде, приник же во устроенный гроба дом и виде его тамо лежаща, и всяким благолепием спрятана, и уже о Господе преставльшася. кадильница же с углием и фимияном выше гроба в стене рва потчену; и абие неудержанным стремлением и испустися долу, и паде на отеческия перси любезно того лице и устне целуя вопияше. что оставляеши мя единаго, отче мой любезный, что отходиши от мене сладкое души моея веселие, что молком убегаеши не явися ми крепкий молитвениче пустынный. о моего сиротства последняго Епифаний оставив мя венца купити пойде. и Варлаам не сказався мне в неведомый путь убежа. но чесо ради тако сотвористе отцы святии, еда прозорливое ваше око усмотре некоторыя хотящия мне быти напасти, но тако ми странствия вашего да не оставити мя молитвами вашими, но присно осеняйте мя кровом заступления вашего, да возмогу и аз постигнути вас, и с вами купно насладитися уготованных праведным благих. и тако плачася почте отца надгробными песньми, и трудолюбивое его тело лежащее во оном гробе покрыв, перстию посыпа и возвратися во свою обитель.

 

О преставлении родителей Кириловых.

Во оная же вращения лет, родителие Кирилове удобривше иноческий образ покаяния и постничества трудами, и естественному долгу подклоняюще себе приложишася ко отцем своим. Кирил же видев родителя своея благочестно о Господе преставльшася. и тако отца яко матерь во времена, преставления ею, надгробными пениями удовлив, и телеса их в земленыя недра со гласом помяновения вкопав. возгласив вечную память, и живяше паки прилежаше обители своей.

 

О милосердии Кирилове к досадившим его.

Но аще убо странных приятием. и подобяшеся праведнику Аврааму. погребением же тех древнему Товии. обаче незлобием своим желаше поелику возможно последовати, и Владыце своему изволившему за спасение, от неблагодарных июдей, удалившися от Него языков распятися, ибо егда обитель его всяким изобилием гобзовати нача. тогда вси беднии со всех путей на стезю водящую в пустыню его совращахуся, на ню же крайняя нищета и скудость и врагов его наведе. о непостоянства твоего мирская суета. иже прежде совещахуся Кирила от пустыни гонити. тии ныне советуют како бы его умолити. пришедше бо ко блаженному прошаху от него потребных, аще бо глаголюще не помилуеши нас рабе Божий то глада гроб всех нас с женами и з детми вскоре покрыет. блаженный же, видев враги своя уздою нищеты ко обители его привлечения. и возрадовася духом глас Стефана мучеником первенца, от кроткия своея души кроткому Спасу вопияше. Господи не постави им греха сего, иже ми тии биением и ранами сотвориша. не онии ти мне сотвориша, но древний враг диявол, и тако моляшеся, награди оныя досадители своя всеми потребными. тии же стыдением очеса своя колесующе, друг на друга взираху удивляющеся вышеестественной мужа кротости. но Кирилова глава венчашеся терпением, ибо любяше той по заповеди Спасовой враги своя и добро творяще ненавидящим его, и моляшеся за творящыя ему напасти. сими же и прочими добродетельми изряден бываше образ собранному его стаду. и не единократно сие творяше, но трикратно. людем же со окрестных сел приложшим путь с волости рекомыя Кондологи чрез монастырь в село глаголемое Мунозерское. и с протчих тамо жилищь всегда прохождая, хождаху и в монастырь обночевахуся что оныя села в дальности от монастыря того растоянием отстояху. блаженный же Кирил веляше оных всех кормити и покоити во особой на то построенной келии. тако же и нищих всех упокоеваху, и кормляху, и милостынею их удовляху, и с любовию отпущаху, блаженный же Кирил о том велми печашеся, чтобы монастырь рапространити, и к монастырю какое угодье присовокупити, и рыбныя ловитвы многия учиниша на оной реки тонями и заколами, такожде и на Онегу езере ловитву присовокупити.

 

О являющихся по всей России новинах.

Что же потом, егда бы по многих трудех отцу опочинути, и по бесчисленных печалех возрадоватися, и по частых стужениях прохладитися. но обаче лютых неслыханных новостей премрачнейшая тма на просиятельнейший свет российскаго благочестия наступи и темныя отступления, облацы, древлеотеческое солнце застановиша, и грозная гонения буря суровыя, мучительства вихры на насажденый седмию соборами церковный виноград люте дохну. о несказанныя твоея обиды сладчайшая дщи Сионя, егда убо ненавидимый Анзерския пустыни пастырем Никон, потязаем законопреступления нашего, на всероссийский взыде, тогда взя к себе из Соловецкия обители с темницы, ссылнаго чернеца темных римских отступлений новорожденаго сына Арсения лжемонаха, его же яко свою утробу почте. и их же сам недомыслися сему навершити попусти, вся бо книги под именем правления небывалыми новостми насыпа, и церковныя обычаи и чины премени.  Оле терпения Твоего Христе Царю. трисоставный крест от олтаря, и от просфиромисания изгна в то же место от запада принесенный двочастный постави, двоеперстное сложение креста от десницы православнаго собора отсече, в то же место треперстное сложение всем сумнительное даде; христоподобное двема персты благословение от святительския руки отрину. небывалое же пятию перстами сложение на всероссийское народа чело воздвиже; седмопросфирное служение зазрением обложи. пятипросфирное в того место дерзостно устави; пресладкое Христа Спасителя нашего нареченное ангелом имя Исус, Иисусом пременова. и за сугубое аллилуия трегубити повеле, и в церковных чинодействиях против солнца вращатися приказа, и прочими новостями яко пепелом засыпа древлероссийския церкве пресладкое око.

 

О соборе Никона патриарха.

Хотя же слабое свое нововнесение утвердити, и неправедное лицемерием помазати. собра вся российския святители, и овых честьми века сего ослепи, овых же лестным ласканием разслаби, онех же грозою молчати сотвори других же прещением мук устраши, и ко всем явися яко Пардос, каждому особой вид от пестроты нрава его показоваше.

 

О Макарии митрополите Новгородском.

В таковом собрании случися быти и Великоновоградскому митрополиту Макарию седшему тогда на место Никоново, но той аще в седину возраста леты своими и не преиде, обаче прилежен бяше к писанию и ведяще церковныя законы добре егда же бысть на никоновом соборе сложися, сице и неволею боячись мук сану извержения и ссылкою заточением внесенныя Никоном новости прияти. ох прелести твоея душегубительная мирская славо, аще и сомнением томим, но книги новопечатныя взя с собою и привезе в Великий Нов град, яже узреша премудрости Божия его архиерейскаго дома казначей и ключарь. велми о том опечалишася, и приступльше моляху Макария глаголюще, молим тя, владыко не допусти сего новаго яда на сынов твоея паствы но скрый сие Никоново новолюбное жало в недрех земли общия нашея матери, яже присно помогает летающей от змия Исусове прекрасней Невесте. сия же слышав Макарий стыдом лице свое покрываше яко дерзну прияти новостию шумящия книги. и того ради повеле оныя затворити в едину от полат близ Софийскаго дому и двери тыя запечатлети, и бяше сокровен Никоновых новостей нож в каменых полаты тоя ножны, Арсениево жало хранящися в плинфенном сердце. тем же убо аще и шумяше Никоновых новостей гром в России, и противная древлецерковному содержанию, Арсениева блескания опаляху российских очес рясны, обаче во области Великаго Нова града, не тако играше пламень мучительства, яко же в прочих епархиях. зане Макарий митрополит удержа у себе новыя книги данныя ему от Никона. и в то время оной митрополит Макарий от Никона и от прочих новолюбителей многа прорицания и озлобления претерпе при животе своем. того ради и обитель блаженнаго Кирила не ведяше бедствоватися от новолюбителей.

 

О пришествии к Кирилу олонецкаго посадника Пуллоева.

В таже времена прииде во обитель ко блаженному Кирилу олонецкаго града посадник некто Пуллоев, да купит скота еже на потребу людем, той же от прародителей божественному писанию и яже о вере научен бяше, ведяше же известно и о просыпаных тогда от Никона во всю Россию несогласие, и сказоваше о том блаженному вся по ряду. Кирил же аще и слышал бяше прежде того от Епифания и Варлаама но не толь явствено, яко же от сего посадника, понеже краткою беседою от них ему предъявлено бяше. токмо еще в то время в Новоградской епархии при митрополите Макарии от Никона гром новостей не гремяше и людие в той Новоградской епархии аки спаху, того ради и Кирил не прилежаше и не внимаше. но сей же Пуллоев взем книгу святаго Ефрема Сирина, которая у него Кирила обретается в ней же обрете слово 105 подобно и Ипполитово слово О скончании и 30 главу в книзе яже О вере чтый. сказоваше ему вся поряду и отступлении римлян, и малыя России от восточныя церкве и о явльшемся тогда в Велицей России отступления повествоваше явствено. случися же тогда беседовати с ними некоторому старцу иже прежде того времени в пустыню ко блаженному Кирилу из обители Великаго Александра. и той поведаше им о себе како явися ему бес два краты в человеческом образе приходя в вечер и утро ко окну его глаголаше, почто старче от обители твоея к сему калугеру в пустыню сию пришел еси, или не видиши нужнаго его жития и скудости брашен, но возвратися во свой монастырь, тамо бо всякими потребами доволен будеши, и не по мнозе времени и вина тамо много будет. аз же прекрестився крестным знамением, и абие той невидим бысть. и тогда блаженный пребысть беседуя с преждепомянутым посадником четыре дни и отпусти его во свой дом с миром; отшедшу же посаднику. нача блаженный Кирил великое опасение от новин имети, и приходящих к нему священноиноков всячески искушая моляше от новин блюстися, и тако от всюду осмотряя веляше тем служити в церкви Святыя Троицы. учаше же и братию да не дерзнет яве ни в тай приимати новин дабы приятием тех конечное отступление нашию благочестию не наступило.

 

О Питириме митрополите Новгородском.

Егда же сяде на Великоновогородском престоле Питирим митрополит муж гнева и ярости полный и новостей любитель усердный. той Макарием прежде затворенныя темничники книги, глаголю Никоновския, на свет тогда Новгородския епархия испусти, и по всем градом и селом вымышленныя новости яко песок просыпа. и мучительства грозу яко суровую тучю возгреме. о немилостливаго лияния крове дражайших чад твоих Сионе, нектому проповедашеся восточный закон благодатный, но западный ратный всюду бо мучительства мечь играше. вся темницы во градех и в селех наполнишася християн, везде вязаху и толпами ведяху, и в темницы саждаху. цепи и вериги громо и звяцания своего каждую душу сотрясаху, тряски и хомуты вся преторы огустеваху. бичи и жезлие в крови исповеднической повседневно купахуся. проповедницы западних новин яростию а не кротостию дышаху, биением и ранами, а не учением увещеваху, лукавством и подъисканием, а не правдою к вере своей привождаху. и от таковаго их насильнаго мучения обливахуся вся грады кровию. утопаху в слезах села и веси, но крывахуся в плачи и в стонании пустыни и дебри. о многаго твоего терпения Христе Исусе, но и вся тварь стоняше и болезноваше и колебашеся не терпящи таковой лютости и мучительства, плакаше вся тварь о такой погибели рода християнскаго. по писаному в книге Ефрема Сирина о антихристе, вси отступиша от Бога Святаго, лестьцу веру яша приемше начертание за крест Спасов сквернаго богоборца християне же содержащии древлецерковное благочестие, везде и всегда всеми поругаеми и уничижаеми и гоними вязахуся. дондеже таковое зло и до Олонецкаго града, и в пределы того незапно влияся, и елицы тогда хотяху хранити древлецерковныя обычаи бегаху в непроходимых пустынях, не вядяху камо крытися, слышав же сия Божий раб Кирил ужасашеся велми, да горящий мучительства пламень следом клеветы не найдет на его обитель.

 

О крыемом благочестии в Виданской пустыни и о тоя благоплодии.

Елицы же хотящии хранити древлеотеческое благочестие. яко окрестных сел жителие. тако и страннии иже о обители блаженнаго слышаху, могущии вси прихождаху к нему присно наслаждающеся древлецерковных благочинных песней и кождо испытующе свою совесть причащахуся пречистых таин Христа Бога нашего, и тако отхождаху в домы своя радующеся целу пажити траву, и цветы яко густое руно стригущим их представляху. овцы их бяху многоплодны, и полки агнцев своих за собою вождаху. доилицы вместо чванцов водоносы млеков наливаху. волове их толстотою мяс одебелевахуся. кони и мнии легкою ногою и храбрым главы подъятием во всяком здравии со жребцем своим присно играху. гумна и житницы от насыпаных плодов распирахуся. дворовыя стены от множества вращаюся в них скота зыбахуся. рыбы же друга пред другою в мрежи и неводы монастырския яко погоняеми бежаху; бяше бо благословение Господне на главе Кирилове по реченному. благословя благословлю тя и множа умножю тя.

 

О нанесенной клевете новолюбцами на Виданскую пустыню.

На сия же два великия изобилия благочестие глаголю и на стяжание Кириловых имений, возведошася люте завистливая ока дияволе и миролюбцев. и едино убо яряшеся и последнюю благочестия искру в пепел терпения Кирилова крыемую угасити. другое же горяше стяжание его восхитити. и тако диявол и имения любителие проложиша след ко обители блаженнаго. иногда убо поповския старосты, иногда же приезжающии из Нова града приставы и недельщики заезжаху в пустыню Кирилову истязующе его и о благочестии и о службе церковней. той же свое благочестие даров даянием оберегаше. священноинока же служившаго во обители его скрываше от них яко бы его не имея у себе творяшеся. сие же творяше, да алчющыя о благочестии люди хлебом вечнаго живота насытит, ибо мнози от жителей его со исповеданием совести к надежде живота вечнаго в будущий век отъидоша. яже вся смотряюще диявол и миролюбцы. великою яростию надымахуся на обитель блаженнаго. В лето 7191-е случися некиим никоновых новостей любителем быти в Великом Нове граде. и палящии сердца их завидливый яд явити. не уснут бо яко же рече писание дондеже зла не сотворят. и тии убо бывшии прежде во обители блаженнаго архиерейскии посыльщики, яко окрестных сел и волостей поповские старосты подаше в архиерейский розряд писмянное объявление, о содержавшемся в Кирилове пустыни древлецерковном благочестии.

 

О послании из Нова града подъячего Семена Косого в Кирилову пустыню.

Слышавше сия архиерейскаго дому судии, послаша злодыхательнаго новин защитника подъячего Семена именуемаго Косого. с ним же приставов и недельщиков двенадесят чин. и повелеша ему по прибытии его во Олонецкия пределы, взяти с собою из окрестных сел и весей понятых, елицеми удовлятися можно и с теми людми повелеша ему идти в Кирилову Троицкую пустыню и тамо самого Кирила, и священноинока, иже в пустыни оной служаше, поимати яко злодеев веригами обложити, тако же и книги и сосуды церковныя обрати, и вся сия за крепким опасением в Нов град привести, прочая же стяжания хлеб и скот и иныя потребы монастырьския описав под смотрение, окрестным ителем ко определению отдати. Косой же прием повеление, скорее орлова летания тщашеся на гнездо блаженнаго Кирила напасти. бяше бо муж полный ярости и рвения, лихоимства же жерло широчайши бездны имяше, зависти же зрением убиваше вся яко лютый василиск. таковому убо суровому вихру, в село Суну вступившу, скорее молнии повелеваше служителем, летая по окрестным весем збирати люди. но он аще и не объяви има вины пришествия своего обаче людие села того уразумеша яко на обитель Кирилову сей наскочити идет. и дондеже, собирахуся людие.

 

О избежании Кирилове от обители его пришествия ради гонителей.

Лета от мироздания 7192-го года весною, утаився всех некто христолюбец, именем Мануил, именуемый Сканцев. бежа скоро прямо чрез пустыню во обитель блаженнаго, и не дошед обители обрет оного Кирила на трудех вне обители, явися токмо единому Кирилу, поведая ему пришествие Косого. и паки возвратися скоро, да не познан будет гонительми. старец же слыша пришедшаго мужа вышеписаннаго Мануила вельми опечалися нача помышляти в себе что сотворю, аще шед в монастырь поведаю сие братии всей, чтобы к запору и ко страданию огненому всем готовитися за древлецерковное благочестие, токмо на то ничто не приуготованно, и преже того всей нашей стране, ни от кого от отец таковаго образа в пути ко страданию таковаго не видехом, ни учения ни от кого таковаго не слышахом; а сами на таковое великое дело дерзати не смеем и братиям таковаго учения прежде сего не простирахом, аще помыслим заператце во отбой, то крепости таковой на то не приуготовлено, людей против такого многолюдства противитися будет невозможно никоими вымыслы. аще около монастыря и ограда крепка, токмо не высока, и оружии в монастыре на противление не имеется, и от писания сего не видехом, аще и слышахом о запоре Соловецкой обители, но тамо около монастыря бысть град крепкий каменной, и монастырь бысть от людскаго сожития во окиянских морских отоках и многолюдствен и грамотных и ученых людей множество, и на то вси со многаго времени со общаго совету самовольно приуготовись запершеся и вси за древлецерковное благочестие, разными муками и смертию скончашася яко крепкии адаманты, а мы беднии что сотворим еще у мене во обители стали и люди не единомыслены не вси внимаху о учении древняго благочестия. что градских и ученых людей грамотных не обреталося но все простые и поселяны, и не внимаху сему учению и неразумляхуся сему ни во что же сего полагаше. видя обитель свою всякими озобилиями обогащающуся, и ум их скланяшеся к житейским вещем а не ко страданию за древлецерковное благочестие, или к смерти. но что сотворю аз бедный старец и не вем. бросашеся сам о землю з горкими слезами вопияше. а уже день той к вечеру преклонися. старец же иде в монастырь в церковь и паде пред образом живоначальныя Троицы, плакаше горце со слезами вопияше [молитва]: Певаемый в Троице всемогущий Боже призри от святаго ти жилища славы Твоея на мене грешнаго и недостойнаго раба Твоего. и виждь Владыко беду мою. се бо обыдоша мя врази мои яко пчелы сот, и не вем что сотворити, аще оставлю благоволением Твоим собранное стадо, боюся да не буду вина погибели их. аще ли пребуду с ними, трепещу да не впаду в руце враг ищущих душю мою. ибо руце вражия мучительства и томления полны суть, и готовы на пролитие крове. аз же окаянный немощен есмь и слаб, и того ради не смею к предлежащим мукам вдатися. Ты же Господи мой и Зиждитель, покрый раб Твоих крилома всемогущия ти благости и мене грешнаго помилуй и спаси ими же веси судбами. Твое бо есть еже миловати и спасати, и Тебе славу возсылаю Отцу и Сыну и Святому Духу ныне и присно и вовеки веком аминь; И тако плачася изыде тайно из обители. с собою же взя точию часослов и псалтырь малую, имый на себе едину ризу юже ношаше, и куколь и секиру. а иное ничтоже взя. и тако побежа прямо пустынею, не ведый где главы преклонити. отшед же же мало от обители, воспомяну отца Епифания пророческия глаголы. весь облився слезами, подобный Фезвитянину глас вопияше; егда глаголя лучши есмь отец моих, иже вся оставльше бегают в горах и в пропастех земных. не могий же терпети разлучения от братии своея. моляшеся паки ко Господу, глаголя возми душю мою от мене, нежели живу отходити от любезныя ми дружины. порицая же и немощь плоти своея, глаголаше о окаянная душе моя. ни сама скорбей находящих на тя не терпиши, и на легкий путь страдания ног твоих не пускаеши, едино веси то еже ясти и пити, и прохладех жити яко свиния валятися. увы мне бедному, иже иногда других предводительствовашу, ныне же смрадный и от всюду страстнаго гноя полный, разве к Богу повинувшися. где ныне образ твоего первозданая доброта бедный Кириле, не вся ли в работе тления. ох бедство сего обиженая плотскими немощми владычице. душе моя но вскую прискорбна еси, и вскую смущаеши мя, уповая на Бога, яко исповемся Ему спасение Той есть лицу моему и Бог мой, сицевыми и подобными сему глаголы сокрушающуся бежаше в путь свой.

 

О пришествии Семена Косого в Кирилову пустыню и о разорении тоя.

Нощи же преполовившися утру еще глубоку сущу. прииде преждепомянутый Косый со многолюдством народа, ко обители блаженнаго. юже обступивше окрест. друзии же внутрь вшедше, вся старцы и бельцы поимавше связавше, и  мучаху их вельми, и испытующе о блаженном Кириле, и о священноиноке, иже у них во обители служаше. тии же глаголаху вечер когда спати идохом, тогда видехом строителя нашего и взяхом от него благословение, а нощию камо ся дел, о том нимало вемы, а священноинок прежде сего пред малыми денми, не вемы како отъиде. слышав же сия Косый зело опечалися, яко погреши надежды своея, обаче прочая вся яже ему повелена быша мучительства гордою рукою содела. иноков же и бельцев от уз свободив отдаде понятым. они же поручишася по них с подписанием. старца же Иякова именуемаго Лукичева с прочими ратными и бельцев три человека повелев оковати, и с собою их взя и имения монастырьския яже обрете разграби. хлеб же и скоты и прочая, их же невозможно с собою взяти, описав и остави под хранение окрестных сел и весей жителем с подписанием. сам же с своими, и с юзниками поеха в Нов град. бывшим же им тамо, и оных узников по обычной их мучительства суровости поувещаша, и ранами и озлоблением темниц до полугоду томяще. и тако к новинам и нехотящих их обратиша. и отпустиша паки в Кирилову пустыню. с ними же послаша некотораго из Новгородских монастырей игумена Ефрема, и с ним послаша указ з жестоким приказанием во весь Олонецкий уезд в погосты и в волости во вся к попам и к старостам и к десяцким. чтобы всячески сыскивали Кирила раскольника, и прислать за крепким караулом в Нов град в архиерейский розряд. и указы о старце Кириле по погостам разослали. и бысть о нем велик взыск, по следам куды бежаху. но Бог его покры, не могоша взыскати. той же приехав, и ту сущих в монастыре иноков и бельцов еликих обрете аще и с принуждением, но обаче к новинам приведе. бяше же той игумен Ефрем кроток нравом, и того ради некоторым возможно бяше и укрытися от него елицы аще точию хотели быша. поживе же неколико время игумен и не могий труда пустыннаго терпети по малу возвратися в своя си. старцы же оставшиися во обители Кирилове опасающеся напраснаго нападения, подчиниша себе под владение в монастырь рекомый Зеленую пустыню, и оттуду начаша приезжати монахи един другаго изменяюще, взирающе на начальника новин их Никона. простираху руце на грабление, сердце же в мужество ярости обращаху. ею же между братиею, яко копием храброваху. и тогда пострижеся и с веси Суйсарской некто именем Констянтин, преименова имя во иноцех Кирил, велми зубат, и нача старцов увещати, чтоб от оной обители Зеленецкой как бы мощно отходити, и нача старцов на склонение то увещати. не терпяще же таковых обид Кириловы пустынницы бывшии монахи. овогда прошениями еже к судиям, овогда же и сами о себе ратия борющеся, пребываху не починительни ко оному монастырю, и поставиша новопостриженнаго старцы Кирила строителем и шедше в Нов град просиша у архиерея чтобы быти под своею властию, и пребыша неколико время в своей власти. егда же сяде на престоле Великоновоградский архиепископ Феодосий, бывый архимарит невский. и той яко сребролюбив сый, воззре завистливым своим оком на оную Виданскаго острова пустыню и на прочия во своей епархии монастыри, и присылаше надзирати, или удобнее рещи обирати ону своя архиерейския дворяне. они же приезжающе, хлеб и скот распродаша. последи же книги колокола и иконы обравше в Нов град свезоша. место же тоя пустыни поля и пажити отдаша на оброк петровских железных заводов лантрату Григорию Муравьеву. он же посла ту своя люди с конми и с доилицами, и пребываху дондеже той Муравьев на оных заводах бысть. последи же даже и доднесь зело мали жителие тамо обретаются.

 

О пришествии Кирилове в весь имянуемую Слободу.

Блаженный же Кирил страхом гонителей гоним и любовию древлеотеческаго благочестия вперяем бежаше чрез непроходимыя пустыни по корельским селениям, и тако к северной стране Онега езера прииде, на место зовомое Повенец, и оттуду же на мирскую дорогу в некоторую весь именуемую Слободу яже прилежит ведущему в Поморския страны путю; пришед же ту обрете некоего страннолюбца именем Феодота и обита у нег неколико дней в тайне. мучительства же пламень больма разгарашеся, и яко некоторое моровое поветрие по всем селам и весем умножашеся. и того ради невозможно бяше укрытися, древлеотеческия законы хранящим. он же Кирил живяше в тайном месте в лесу неколико времени. боящежеся отец пребывати близ веси оной да не впадет в руце томителей.

 

О пришествии Кирилове в Выговскую пустыню.

Тем же молит введшаго его под кров свой страннолюбиваго Феодота да покажет ему в пустыни место могущее его от мучительския суровости укрыти. Феодот же сказа ему о тишине пустыни Выговския, яже отстоит от Выгозера яко 50 поприщ, и проводи его тамо. старец же видев пустыню безмолвную тишину, возрадовася духом, и благодари Бога наставльшаго его во отишее тоя приити. Феодот же приведе его в пустыню ту и постави с ним келиицу малу, ея же половину вкопа в землю, да не скоро обретена будет ходящими по пустыни той звероловцы. место же то, идеже оную хижу поткаша, ныне именуется Кирилова губа, против оной губы за рекою. отходящу же от него Феодоту моляше его старец да никому же о нем повесть. Феодот же глаголаше ему. в сицевой непроходимой пустыни жити хощеши откуду имети будешь отче пищу и одежду притяжати. вижу бо тя велми стара и нестяжательна. рече же ему старец, Господь Бог мой упование ми есть нань же надеюся, яко гора Сион не имать подвигнутися вовеки. той бо рече не пецытеся душею вашею, что ясте, ни телом вашим, во что облечетеся, ищите прежде царствия Божия и правды его, и сия вся приложатся вам. И тако рек отпусти его с миром. сам же остася един, единому Богу внимая дело же его бяше еже присно молитися, прилежаше же отчасти и о потребе телесном, рыбу ловя, и дуб со древия дерый яже изсушив толчаше, и с того хлеб себе творяше и тем питашеся. пребываше на том месте малое время и бояшеся да не найден будет мирскою чадию за звероловством ходящими, близ бо реки Выга место то бяше.

 

О преселении от Выга реки в внутренюю пустыню.

И того ради преселися вдалее от реки к востоку, яко поприще едино и болши, недостигая мало езера некоего. и ту постави себе келию и живяше в ней, и отхождаше от селения своего и идеже аще обреташе землю плод приносити, и ту сечаше лес, его же зжигая уготовяше нивы малыя. в ня же и сеяше закрывая мотыкою. и елико в другое лето возрасташе, и оттого приобреташе пищу, ядый по писанному хлеб свой в поте лица своего. Но что умножаю слово о телесных нуждах, не душа ли есть болши пищи и тело одежды. Простите же мя яко, плотолюбну сущу о плотских болши и беседующу ми, нежели о духовных. ибо елико сам сладостию болю, толико слыша отеческия седины, в таковых подвизех страждущия болми жалостию движюся.

 

О приходе к старцу в пустыню внука его Иоанна.

По мале времени внук его Иоанн естественыя жалости узами влеком, ово собою ово понуждением бабки своея, инокини Елисафети, и матери своей старицы Таисии, прииде в помянутую весь Слободу, вопрошая и испытуя о блаженном старце Кириле, со всяким тщанием и любовию. страннолюбивый же муж слышав сия от него, прежде испытав его, откуду и чесого ради про онаго старца вопрошаеши, оной же Иоанн сказа ему всю со слезами истину. Феодот же видя его естественою любовию горяща, взем его отведе в пустыню ко блаженному Кирилу. он же пребысть у деда несколько дней. старец же беседоваше со внуком совопрошающи о обители своей. оной же внук сказа ему с плачем всю истину. блаженный же слышав от него плачевную повесть, сжалися сердцем и умилися душею, нача велми скорбети и плакати на долг час о оставшихся в монастыре своем братии, приступивших неволею к новостям, и отступивших от древлецерковнаго благочестия. и едва от плача преста и нача наказовати, чтобы сия возвестил всем боящимся новин, бегати бы и крытися от них всячески, и удалятися от таковой лютости обладанной всю Россию. такожде и ты чадо велми блюдися, и своих стариц блюди. и по наказании отпусти его с миром в монастырь оной же. оной же Иоанн пришед в монастырь, поведа о блаженном, бабке своей инокине Елисафети, и матери своей старице Таисии. и протчим в монастыре сказа его наказание. они же слышавше сия и плакавшеся о своем согрешении.

 

О брани Кирилове с помыслы.

Настоит же ми нужда, и о духовных подвизех блаженнаго воспомянути: како боряшеся с помыслом своим и како ему помысл глаголаше: како ты старче бегун явися, оставил в расхищение, и в попрание благочестие, лучше было тебе с ними вкупе или жити, или умрети. и от такого помысла падаше на землю, плача горкими слезами на мног час, лежа аки мертв, востав от земли и от плача. томяше бо его тая мысль многое время. старец же плакашеся о сем, и каяся Богу. и молитвою на помысл вооружися. ибо в непрестанных молитвах, яко адамант во утвари красяшеся, днем и нощию Господеви моляшеся присно, и просяше помощи на нападающаго нань врага.

 

О хождении Кирилове ис пустыни, в свой созданный монастырь на Суну реку, для увещания братии, оставших от него во оном монастыре.

Но помыслив в себе что идти тайно в оставленую свою обитель на Суну реку, и поучиши свою оставшую братию о благочестии. что бы хранити им древнее благочестие и бежати от новин в горы и в вертепы и в пропасти земныя, по писанию Ефрема Сирина, кому куды можно укрытися. хотя оную диявольскую брань облегчити, и помысл свой утолити, и души своей спасение получити, и помолився Богу востав пойде в путь свой, и пришед втай в нощи, не доходя близ монастыря своего, взят с собою некоего христолюбца для приходу та инаго в монастырь, и прият бысть сперва малыми людми в тайне, они же видевше его возрадовашася, и начаша плакати. раствориша радость с плачем и глаголаша ему. почто нас честный отче и наставниче наш любезный оставил сирых; он же видяше прилежную к нему любовь, и не можаше терпети от плача, нача им с плачем и со умилением свое от них отшествие глаголати; они же слышавше от него сия, собрашася вси к нему, и начаша вси плакати, и бысть плачь велий, и начаша ему по его отхождении свое озлобление и вязание и расхищение сказовати, что им от гонителей в та время случишася. он же слышав сию горкую и плачевную повесть, велми зжалися; и нача к ним слово учения с плачем и с любовию простирати и учити о благочестии, и чтобы им от новин Никоном внесенных в Российскую церковь удалятися, и от лютости их и гонения бегати аки от огня, и никакоже новин его приимати, но укрыватися всяким ухищрением, кому куды мощно по писанному Ефрема Сирина, никакоже к новинам их приобщатися. они же слышавше от него такое учение малии внимаху. а инии все начаша его с плачем и с великим усердием молити чтобы с ними жити во своем созданном монастыре. он же сего их моления не внимаше: но видя их к себе велику веру и усердие, тайно в сердцы своем бояся воздыхая, да не како неволею удержан будет от них, и поучив их всех с любовию, и нача сам себе в тайне глаголати, бедный старче Кириле спасая спаси свою душу. а оных возложи и остави Богу могущему их спасти как Он свет хощет о них тако и сотворит. а тебе время от них молком бежати в старую свою пустыню да не приимеши от диявола какого препятствия да не како любовию оных удержан будеши. да не приимеши себе паче прежней скорби и печали и сетования: и побыв у них несколко время, и став в нощи тайно не сказав никому своего отхождения, отшед от монастыря тою нощию к прежнему христолюбцу чрез кого в монастырь приход свой сотворил: и моли его чтобы отвести его тайно; оной же христолюбец со усердием его отвезе тайно куды он повелеваше, и приим от старца благословение возвратися в дом свой. старец же моляше его да никому сего поведает. и пришед на морскую дорогу в преждереченную Слободу к преждереченному христолюбцу Феодоту, и поведа ему все свое хождение; и отшед в свою в Выговскую пустыню, и пришед в келию свою славя и благодаря Бога, и отдохнув мало от печали; но диявол не даяше ему в покои пребывати, но хотя его от оной пустыни отгнати, да не како оным старец оная пустыня населица богорадными жители изгнанными християны.

 

О брани бесовской наношении блудных помысл.

Немалу же пакость деяше ему враг наношением блудных помысл, о неусыпныя твоея лютости лютый человеческаго рода враже, како непрестая наступаеши на прервавшаго единою услаждающаго тя любодеяния скверную узу: но дивися сего блаженный диявольской дерзости, како приносит смрада зловоние, влиянная небесным миром ноздри; како стречет уды уже старостию умерщвеныя, но извыче диявол преже в пустыни на Суны реки тем же бороти. Оле подвига твоего дивный наш страдальче противу сицевыя рати исходяше отец в броня терпения одеян, шлем упования нося. за щит веры укрываяся, на лютость жгущаго пламени, богатую реку слез изливаше: на нападающаго нань помысла, копием молитвы прободаше: стрелящее его похотное жало, постом удавляше: овогда бо два дни овогда же три дни без пищи пребываше, убегая лютых помысл необратнаго стремления: но ни тако до конца можаше истребити проколающаго его мысленаго терна: и того ради исхождаше в пустыя дебри идеже комаров толпы и мух и овадов сонмы летаху, и тамо обнажаше костьми умерщвенное свое старческое тело. жала же летающих не кровь но мозги того вытягаху: той же неудовлевашеся мукою ядущих его мшиц, но отломив елевыя ветви, и бияше себе по старческому умерщвенному телу, до пролития слез и плакаше до сытости, и востав отхождаше в келию свою моляшеся Богу. пребысть же в таковом подвизе до толика, яко победити ему вся вражия прилоги, и обрести внутрь себе образ покоя мысленныя радости яко же и прежде во оной пустыни напреди являет.

 

О лютости и дерзости бесовской на блаженнаго Кирила.

Но диявол оную кознь на него плеташе хотя устрашити своим привидением всегдашния же звуки и клопоты творяще ему. да поколеблет мужественное его сердце и устрашит приведением своим и отбежит оной пустыни. но блаженный Кирил яко мужествовавый в таковых храбро с велиаром боряшеся преодолевая его лукавыя козни: овогда прихождаше к нему с полки бесовскими грозя ему всячески и властелски повелеваше бесом своим немилостивно ис келии его извлещи, и немилостивно убити и келию его разорити. беси же внидоша в келию его и хватиша его с яростию немилостивно, и извлекоша вон ис келии и биша его немилостивно и влачаше за ноги по тернию. а келию его разметаша, и кричаще вси зверски хвалящеся глаголюще. калугере калугере отъиди от сея пустыни откуль  пришел еси, сие место наше никто от создания мира от человек смел в сию пустыню дерзнути поселитися до сего времени: а вы ли малые бегуны изгнанныя и возненавиденныя от всего мира от человек хощете сию пустыню своими бегунами населити. а нас хощете от сей пустыни изогнати, яко же прежде сего нас изгнал еси с прочими своими калугерами с Сунорецкой пустыни и где и монастырь свой поставил: но и сам ныне оттоле бегун явился: зде же не попустим тебе сего, но старец же видя такое бесовское дерзновение, возри ко Господу от всего сердца с великою жалостию и со умилением и с плачем. Боже Боже мой вскую мя оставил еси, вонми Боже и призри на немощь мою и востани в помощь мне недостойному да не возрадуется о мне враг мой, да не речет где есть Бог его востани вскую спиши Господи не отрини до конца; вскую лице Твое отвращаеши, и забываеши нищету нашу; востани в помощь мою даждь ми силу и крепость свою да поперу вся враги моя видимыя и невидимыя, и да посрамятся и постыдятся и исчезнут оклеветающии душу мою. и по молитве онии беси вси яко от огня отскочиша и исчезоша и невидими быша. но] просветися в сердцы его свет: и востав виде себе от келии отвлечена, востав пришед к келии своей, виде келию свою целу нерушиму и шед в ню благодаря и славя милосердие и заступление Божие.

 

О бывших во времена Кирилова в выговской пустыни жителех.

В то же время во оной Выговской пустыни немного бяше жителей, яко не всем знаема бяше. но точию некий инок Питирим сперва живяше у Челозера и у иных озер переходя; овогда при брезе Выга обиташе, овогда же при потоце некоем водворяшеся иже ныне Горелыша именуется, да близ же Шелтоозера живяста некая от русских стран прибывшая два мужа Терентей именуемый Воробей, Иоанн зовомый Скамья. да в верховских лесах утамбичь озера живяше старец Соловецкой выходец именем Герман который после скончася за благочестие в собрании в другом в Палеостровском монастыре. да от него к востоку глаголю ныне где Ладожской скит, живяше отец Корнилий, вдале же обитоваше некто Епифаний инок крыяся от гонителей за благочестие при Столпоозере в нем же при нашествии мучителей и утопе. и аще кто ин от таковых тогда в пустыни той бяше или ни, о том оставляем повесть могущим известнее нас сказати.

 

О приходе паки к блаженному внука его Иоанна.

Паки во время зимное по неколицех летех. прииде к блаженному внук его Иоанн, и пребысть у него мало дней наслаждаяся словес его, и егда начат возвращатися в монастырь. и глагола ему блаженный Кирил. иди чадо Иоанне во своя си, не можеши бо нашея пустыни труда носити: но тщися же древлеотеческую веру непоколеблемо сохранити, в ней же елико мощно сохраняй, и родителей твоих стариц. имаши бо бабку твою погребсти тамо. с материю же твоею послежде водворишися в пустыню яже присудствует званию Выговскому: последствуют же с тобою с монастыря токмо малии; мене же к тому жива не имаши видети. молю же тя любезное чадо всеми мерами от мира и от сует его блюстися маловременен бо есть: и тако наказав его прощению сподоби, и отеское свое благословение дав ему, отпусти его с миром. тот иже отъиде к матери своей и к бабке, возвещая им о блаженном отце и прочим и о проречении его. яже вся последи збышася. ибо бывшая его сожительница инокиня Елисавет преставися благочестно. в добре исповедании при обители его иже на Суне: аще бо и в гонительная времена но благочестие свое соблюде невредно, и погребена бысть тамо. внук же его преждереченный Иоанн, с материю своею инокинею Таисиею, пришедеше в Выговскую пустыню, и сперва живяста у старца Сергия в собрании несколко времени у Выга, а послежде поселистася в месте нарицаемом Терво озеро, и пожиста во всяких добродетелех и преставистася с миром.

 

О преставлении блаженнаго Кирила.

Живяше же старец ожидая себе блаженныя кончины. уже бо сединами и леты приближашеся ко исходу жития своего, и волею всемогущаго Бога отец Кирил от суетнаго сего века в некончаемую жизнь преставися. в год той во время великаго поста. егда начинашеся весна зимныя снега груды поядати. два некая мужа един с Маселги морской другий же с Слободы совещавшеся поидоша на реку Выг, ради рыбныя и звериныя ловитвы. бывшима же има в преждепомянутой губе. яже ныне Кирилова именуется: узреша от реки в гору след лыжами по снегу испранный по нему же шедше мало обретоша келию, толкнувше же не получиша ответа, в ню же вшедше обретоша старца седяща на лавице обратившагося ко святым иконам единою страною о стену опершася, псалтырь же лежащу пред ним отверсту, и кадильницу со углием и фимияном, и кратир с былием пустынным стоящи близ его; в руце же держа лествицу. приступльше же близ его, и видеша уже умерша, не смеюще же прикоснутися ему изыдоша вон ис келии.

 

О погребении тела блаженнаго Кирила.

Пришедше же в дом свой сказаша вся елика видеша: преждереченный Феодот слышав сия, скоро тече в пустыню ону, и обрете отца преставльшася, якоже преждереченнии мужие реша. пад же при ногах его плакаше велми яко не сподобися блаженныи кончины его видети, не смеяше же прикоснутися отеческому телу: и тако отъиде в путь свой печален оставив отца непогребена: и абие ят бысть болезнию, яко бы всем удом его разслабитися: и елико убо он от отеческаго вертепа Феодот в дом идяше, толма болезнь его паче согнеташе. и до толика умоли его недуг, яко к тому не можаше ни с места поступити: прост же зело бяше сей муж, и не можаше надолзе разумети яко преставльшагося ради отца бысть ему сицевое посещение. недугу же единаче составы его потрясающу, той же от тесноты болезненныя возопи ко отцу моляся: сицевая ли мне воздаяния твоя за труды мои, отче мой, аз убо приидох к тебе надеяся насладитися медоточныя ти беседы, и благословения твоего отеческаго, и молитв сподобитися по грехом моим опрепятствовавшим мя и надежде моей в срам обратившейся: обретох бо тя не тако яко же желах. говея же не смех прикоснутися честному твоему телу. ты же прогневася на мя посетил еси мене сицевою болезнию: но молю тя рабе Божий отдаждь ми в чесом убо аще согреших ти: се бо иду искати единаго от пустынных отец с ним же пришедше скутаем твое трудолюбивое тело: и тако помолився абие от недуга свободися. и шед обрете инока Питирима с неким жителем и поведа им бывшая. Питирим яко услыша точию, теком пойде послужити честному отеческому телу: и пришед лобызаше блаженнаго мощи, и тако взем трудолюбное оно тело покрыв е власяницею яже бяше на нем, вместо же гроба скалою березовою обви ископа ров, и песни надгробныя совершив погребе. славя Бога сподобившаго и послужити погребению блаженнаго: и тако разыдошася, Питирим и Феодот во своя си. Поживе же блаженный Кирил всего в жизни сей 83 лета: считаютжеся лета живота его сице: В 16 лето возраста своего жене сопряжеся и поживе с нею 3 лета, в монастыре в Юрьегорском до пострижения 1 лето, а по пострижении 2 лета. а во отоце окияна моря на соловецком острове в киновии преподобных отец Зосимы и Саватия поживе 3 лета; по разным монастырем странничествова 3 лета. в Задней пустыни пребысть 2 лета. во обители, великаго Александра поживе 5 лет, в пустыни яже на Суне реце на Виданском острове, до пришествия соловецких старцев, безмолствова 15 лет. по пришествии же старцев до изгнания, припроводи 25 лет. по изгнании из монастыря в пустыни Выговской поживе до преставления 8 лет. преставижеся в лето мироздания. осмыя тысящи во 104 году. в марте месяце. но и в та время, как отец живяше в пустыни сей и после преставления его, гонения мечь единаче играше по России. паче же в пределех Олонецкаго града, всем хранящим древлеотеческое благочестие всегда изливашеся, злодыхательное мучительство. его же ради бегаху православнии в непроходимыя пустыни крыющеся от рвения мучительнаго пламене видяще же новин любителей. яко укрываются нецыи от звероядных зуб их. послаша искати в горы и вертепы и пропасти земныя, и елицех аще обретаху, мучаху велми, всякими различными муками повелевающе им, тремя персты креститися. и по новоизданным требником служебныя просфиры ясти, и таин тех причащатися. не приемлющих же уста пястьми и палицами сокрушаху и вложивше кляп между десны. силою причастие во уста вкладающе вливаху. таковое же к новинам мучительное обращение людие видяще, болма удалятися тех начаша, не могуще же в пустынях укрыватися в руце же мучителей впадати трепетаху да не помажутся уста их лиянием новослужимаго причастия, и того ради овыя гладом помираху, овыя в водах утопаху от лютаго того гонения, а иных по великих муках, в срубах сожигаху, и главы отсекаху. мнози же и число превосходящии народи вооружившеся верою збирахуся кому где возможно бяше, и при нашествии мучителей зжигахуся благочестно по законех древлеотеческих, подражающе древних, азарииных чад. онех убо рука Навходоносорова в пещь вверже сих же теснота мучительская, пореваше. протяжеся же сицевое злодыхательное мучительство по всей России, на много время, без отдохновения. но паче же в наших Олонецких пределех. егда же премудрый восхоте Зиждитель Бог даровати малу отраду чадом, древлевосточныя церкве, тогда самодержствуя над всею Россиею, великий Петр. возведе яко орел разсмотрительное свое царское око на всероссийское лице. от его же самодержавнаго правосудия побежа клевета далече и ложь позна путь в безвестие отъити. ибо во время царствия его лице сильных страхом покрывашеся. обидницы же яко класове мечем пожинахуся таковых ради его грозных законов несмеюще обижати безвременно един другаго. елма убо правосудию Петрову во всей России храбрость свою показующу. случися и гонителем за древлецерковныя законы некий здох прияти. ибо самодержец. аще новин и не истребляше. обаче и древняго благочестия любителей в конечную обиду не отдаваше. и того ради угаси огнь, и нестроение российския люди поядающии, и затворися гробо безчисленныя тысящи словенскаго народа, единым часом, в себе вмещая. таковому же отдохновению югу от царского престола на Россию повеявшу отверзошася, абие пустынная недра приемлюще в себе древлецерковнаго благочестия любителей отворишася, тогда и Выговския пустыни врата, в ня же скоро налияся христорадных людей множество и тако оттуду царскаго величества милосердием яко отсюду святых отец живших во оной пустыни молитвами огустеша, выговские дебри жительми и блата наполнишася доилицами устроишася, и две обители велицыи едина мужеская, при Выге реце во имя Богоявления Спасова. другая же при реце Лексе, во имя всемирнаго Воздвижения Честнаго Креста девическая, обеима же сима даде Бог премудрых предводителей. тако в слове мудрости, яко в житии исправления богатно довольствующих глаголю же Даниила кротости пучину, и Андрея источника премудрости, и Петра слез величайшую реку, их же труды и подвиги тако телесныя, яко душевныя без гласа отзываются и без шума гремят. ибо не точию онии две обители тех трудами населишася но и скиты стоящии окрест их, всеразсудным попечением размножишася. тем же аще и всех пустынножителей вопросиши. кто в Выгорецыи пустыню основа. единогласно отвещают глаголюще, Даниил кроткий и милосердия пучина и нищелюбия бездна. кто древлеотеческия законы и внешнее наказание всем пустынножителем объяви и укрепи своим учением, чины и уставы положи. возопиют единогласно. Андрей премудрости источник. кто церковную службу торжествовати по уставу научи. возгласят без сомнения. Петр, слезоточивый еклисиарх. ибо древо добро не может плода зла творити, по Спасову гласу. тако, и святопочившия. в пустыни сей. не могут видети быти, по себе предводителей тщеславию работающих, и того ради, якоже сами насытишася населе пустыни сея трудами и молитвами, напоишажеся слезами и милостынею, возрастоша же постом и чистотою, такой ветви от себе израстиша. подобящияся тех естеству и нраву. но о сих убо упокоивше слово на краткое воспомянутие, о месте идеже лежит тело блаженнаго Кирила. прежде помяновенный убо, еклисиарх Петр велию веру имяше созидати молитвенныя храмы, и украшати, тыя святыми иконами. неусыпное же желание стяжаста и преставльшияся отцы, панихидами и прочими молитвоприношениями поминати, и молитвы их к себе в помощь призывати созидаше же над многими верху идеже  тогда положении быша единаго от отец телеса, и гробницы хитроустроеныя. к сему же отцу, яко к первому пустынножителю, велию веру имея созда в память его на месте идеже погребен бысть блаженный Кирил часовню малую, и дондеже жив бяше прихождаше ту с клириками и творяше память его честно поя над ним панихиду, и фимиянным каждением удовлевая молитвенный храм и место, на нем же положено бяше тело блаженнаго. егда же Петру слезный путь скончавшу и в надежду вечнаго веселия отшедшу, остася на его месте Симеон стрый его, брат же премудраго Андрея муж естественныя остроты и глубины писания зело пребогатый, и сшествуяй по стопам отец своих возгради над телом Кириловым новый молитвенный храм пространнее перваго вонь же приходяще. тако от обителей, яко и от скитов отцелюбивии дети творят отцу всеусердное помяновение. призывающе его кождо по вере своей на помощь, и чрез помяновение имени его приемлют молитвы своея плод богатый, якоже ныне слово явитися хощет. Бысть убо некто христолюбец муж именем Симеон живый в преждепомянутом месте, нарицаемом Огорелыша. еже отстоит от обители Богоявления яко 6 поприщь. муж же той бяше кроткаго нрава, и душею сокрушенну имяше, слезная же роса, мало от лица изсыхаше. ибо зело бяше слезоточив. приспевшу же некогда празднику святых Богоявление. той же Симеон якоже обычай имяше пойде в Богоявленскую обитель да тамо торжества праздничнаго усветляемаго пением и молитвами и уясняемаго чтением насладитися. бывшу же ему во отстоянии от своего вертепа вдалее яко пол поприща, внезапу пременися воздух и буря велия воста и снега множество просыпася и вихры зело суровыя сокрушаху старческое лице, той же яростию бури сламляем совратися с обычнаго пути, и не ведяше камо идет, и едина ему точию надежда бяше лыжи, иже под ногами его бяху. в немощи же мнозе и страсе быв старец за одержание трясущия место то и его седины бури. приим абие во ум блаженнаго Кирила лежащаго в той пустыни начат со слезами и с верою молитися глаголя отче преподобне Кириле виждь беду мою, яко от лютости зимныя погибаю люте и не вем убо пути, ни во обитель шествовати ни к вертепу возвратитися, ты же елико имаши дерзновение предстати ми молитвами твоими в час сей помогая. и сие токмо Симеону изрекшу явися абие пред очима его свет. яко бы улица между бурею идущая. Симеон же разуме быти отца Кирила скорую помощь, и веруя пойде светом оным водящим его. и мало пошед изыде на реку Выг яже течет от обители Богоявленския ею же прииде во обитель безвредно поведая отца Кирила молитвенное посещение и помощь к нему и осияние светом, и тако благодаряще Бога и Его угодника Кирила в сем быти возвещаше.

Но и тезоименитый почтению отче приими наша от нас приносимая ти своя же от себе нам просящим у тебе подаждь. приими веру, и подаждь целбы. приими труды и подаждь дарование, приими усердие и подаждь любовь, ибо во всех тя искусна вемы и того ради вси припадаем к тебе отче наш любезный, младенческое ли малолетствие помянем но тое и полновозрастных смысл превзыде, отроческое ли целость к памяти совнесем, но тая в первозданей целости невредна тобою соблюдеся, юношеское ли целомудрие посреде нас поставим. но тое постоянства твоего крепостию дышет яко крин араматами. ко учению же божественных писаний распалися твое сердце, яко огнь любви Христове возжеся душа твоя. яко елень к источнику к родительской воле вверися твое сердце, яко скуделоздетелю. и того ради был еси супружником образ изрядный. отшельствующим правило добродетелей известное. странствие бо любимое Христу твое нозе ходящии по монастырем изследиша труды творящии, телу честь а души помощь, твои рамена. замостивший великий мост соделаше. послушание любезное ангелом во обители великаго Александра тобою исправися. возвращением твоим в дом родителие твои сподобишася во иноческий образ облещися пришествием твоим на Виданский остров. ненаселенное от века место преславное население прият гоняй тя, терпением, и молитвами твоими диявол и с бесы своими люте посрамися. твоея заповеди преслушание лютую смерть нанесе мужу сестры твоея Иоанну. твоего прошения моление игумена обители Александровы, и братию сотвори прилежати о пустынном твоем населении твоея пустыни, отишие приведе к тебе дивныя отцы, Епифания, и Варлаама. о блаженных ушес твоих Кириле ими же сподобишася слышати от святаго Епифания пророческое проречение. крепких твоих рамен терпеливе ими же поъял еси биение врагов твоих нашедших на тя. о мужества твоего мудре имже у градодержателей испросил еси владети населяемое тобою место. прилежанием же твоим и труды возградиша обитель, человеколюбие твое и молитвы собраша братию. крепкодушие твое и вера, и по отшествии знаменосцев отцев не умалися.

Родителие твои под кровом обители твоея телеса своя погребоша. врази твои щедротами твоими от гладныя смерти избыша, новины просыпанныя по России молитв твоих ради долго в твою обитель не внидоша, егда наполнишася твои ушеса посадниковых проповедей. тогда большую души твоея веру стяжа егда истощишася сокровища твоего богатство в руце новолюбцев, тогда болшее усердие о хранении благочестия в сердцы твоем умножися егда огустеша здания обители, от крыемых в ней христолюбцев. тогда множае уплодишася гобзования братолюбцев. противу же посланнаго от новолюбителей воинства теплейшими молитвами вооружился еси, от палящия же ярости их, яко Исус от Ирода в незнаемыя тебе страны бежал еси оставив вся имения и обитель, весь нестяжателен, отвсюду, в Выговскую пустыню пришел еси. в ней же живый дубом древяным себе угощевал еси. и былиями в блатных местех растущими, утробу свою от глада отводил еси. кто же может исповедати труды и борения твоя бывшая противу миродержца. овогда убо страша тя диявол, сострояше звуки, овогда же разслабевая тя приношаше помыслы. ты же противу тех, ратуяся молитвами и постом тело свое удручи, трудами и ранами и мшиц и комаров ядением победил еси супостата и его коварства. тело же твое на укрепление в сея пустыни под сению древес осеняющих Выговския бреги в земли населеной вашими постническими трудами погребсти изволил еси, мы же на место то приходяще всеговейно поклоняемся обычными же церковными помяновении поминающе тя любезно отца нашего просим и молим совокупитися в молитвах со отцы нашими, в сей пустыни жившими и преставльшимися в молитвах вас призываем и просим. оградите пустыню сию от всяких бед и напастей. тако и внутреняя мятежи и раздоры утишающе. елико предержащих мудрость и мужество и благопостоянное содержание дарующе. толико и мирное безмятежное пребывание изливающе всем людем в пустыни сей призрите на ны смиренные и сокрушенныя паче всех языков уничиженныя и изгнаныя люди, содержащия пресветлое и святое древлецерковное российское отеческое благочестие. того ради благочестия и вы в пустыни сей поживше, всякия напасти и беды и гонения и искушения подъемше от лукавых бесов, и от злых гонительных человек. ныне и нас бедствующих защищайте своими отеческими молитвами от всяких бед избавляйте. видите скорби и беды наши. видите и нестерпимии напасти и гонение еже присно преболезненне страждем от многолукавых бесов и от злых человеков и от своея лжебратии. и от страстей воюющих во удесех наших и избавление милостивно покажите. приклонитеся к смиренному нашему молению. вся благая и мирная и спасительная нам обильне дарующе. многоволнуемый корабль нашего многонапастнаго жития окормите. ветрила душ наших греховную бурею раздранная. молитвенными си иглами сшейте. весла деланий наших искривленная своими богоданными исправлении обновите. бури грехов разсыплите, мраки страстей расточите, гонения уставите, ереси низложите, церковныя раздоры погасите, междоусобныя свары утешите. упремудрите начальствуемыя, упасите паствуемыя, вразумите старые, уцеломудрите юнныя, накажите безчинныя, утешите малодушныя молитвою своею у Бога испросите нам вся ны милостивно научите и наставите благих дел богатство пространно в душах наших всаждающе. смысл владычествия над страстми показающе. волю нашу всесильней воли Господни покаряюще. в преславней правде Божией. яко верою тако и делы совершены являюще. всякими благими добротами, и всякими спасительными изобилии исполняеми направите в тихое и пресладчайшее будущея радости в пристанище царствия небеснаго в пресветлый град святыми вашими предстательствы преставите чисты и благодерзновенны и обрадованны. О честный любезный наш отче Кириле непрестанно Богу и Владыки нашему Исусу Христу и пречистыя Его Богоматере пресвятей Богородицы и всем святым за вся ны в сей пустыни живущих своими ходатайствы заступи и просящим у тебе богатно требуемая подавай. даждь убо нам недостойным жития твоего собравшим и описавшим вдерзнутых туне незазорное прощение. и в погрешенных за неведение и грубость ума нашего, или инако в чем погрешенных туне милостивное решение и не вмени в повествованных блаженному твоему упокоению в тяжкое стужение, и во мзды же место нашего грубаго тщания воздаждь свое отеческое благословение. по силе нашей доблестей твоих собрании. приими от нас за честное приношение по усердию немощи нашей. бодраго еже по Бозе твоего пустыннаго течения. худою нашею тростию грубое плетение. присовокупи достойно блаженней памяти твоей на всекраснейшее позлащение. всем же нам понудившимся и трудившимся и описавшим и чтущим и послушающим с верою и усердием сподобитися хотящим священными твоими отеческими молитвами по силе нашей в древлецерковном отеческом благочестии ревновании. со усердием и с верою до кончины живота нашего пребывати, и конец благий получити. испроси мир и благословение и всемилостивейшее Божие посещение. всяк описуя сие или почитая или послушая жития твоего да поревнует полезным по стопам твоим шествовати. а злых дел да блюдет. а о нас да воспомянет ко всесильному Богу и Спасу нашему Исусу Христу. яко да и нам таковая в полезная вменит и навершит недостаточная нашего неразумия. буди нам и всем получити о Христе Исусе Господе нашем, Ему же слава со Отцем и со Святым Духом, ныне и присно и вовеки веком, аминь.

Добавить комментарий