Честному вопросителю Ивану Романовичю разумными качествы здравствовати желаем.

Сии ответы составил и давал Василеи Матфеевичь, в 7278 год. московскои духовнои правитель.

Ныне нечаянно прииде к нам от вашего усердия некое писание, стяжавающее шесть некия написанныя вопросы; и при том написанное вашего усердия прошение, понуждающее нашу худость, к разрешению онаго вашего вопроснаго задания. На сия твоя вопросы, мы нижайшии зде, с Божиею помощию, краткая ответствования предлагаем, помняще завещание святаго апостола Петра, глаголющее, готови будите ко всякому ответу, вопрошающему вы слово о вашем уповании: апостол Петр 60 зач.

Вопрос ваш, 1.

Монастырских, федосеевых, и тверских християн; вы за сущих еретиков их вменяете быть и на сих крещение снитие Святаго Духа не исповедуете, какия же в них ереси, и которым еретиком подобны суть, и колико их числом, пожалуйте вы нам от правил святых апостол и святых отец покажите?

Ответ, 1.

Объявленныя в сем твоем первом вопросе, три согласия, монастырское, федосеево, и странническое, или тверское, и сих всех трех согласий, началоводителей и сообщников, мы нижаишии, вне православныя Христовы церкви состоящих их разумеем, и общения с ними не имеем; и того ради потому и еретиками звати их не отметаемся; якоже преподобныи Никон Черныя горы, пишет [Кормчая, лист 641] еретики вся несущия приобщены. Темже и на всех сих согласии крещение яко вне церкви сущих снития Святаго Духа не исповедаем; якоже той же преподобныи Никон Черногорскии свидетельствует глаголя [Никон, слово 63], а иже от церкви отступльшии, нектому имеша благодать Святаго Духа в себе, оскуде бо подаяние внегда пресещися последованию, (ниже) ктому не могуще благодать Святаго Духа инем подати от нея же тии отпадоша. и паки [Матф. правильник, состав А, глава 2]: понеже убо глава телесе церковнаго Христос, по божественному апостолу, от него же уди вси живятся, и духовныи возраст приемлют. сии же от состава удов телесных отторгошася, нектому пребывающую в них имут благодать Святаго Духа. еже убо не имут сами како иным преподадут. Дозде Никон Черногорскии, и Матфеи. Вопрошаеши же, какия за сими треми согласии ереси разумеем, и которым еретиком подобны, и колико их числом.

На сие отвещаем. первая и общая за всеми сими согласии, ересь явственныи раскол, (всех сих согласии) от святыя православныя Христовы церкви показуется, еже преподобныи Иоанн Дамаскин и Никон Черногорскии, раскол ересию нарицает (зри в книзе Никонове, слово 2). како же сии три согласия раскол с православною церковию возымеша и имеют, о сем зде являем:

Первое согласие федосеево. Православная убо Христова церковь, зде в России по пременении Никоновом остася, во осталцех благочестия соловецких и поморьских отцех и прочих. от сея же святыя Христовы церкви Федосеи со своими согласники отторжеся, сиречь раскол учини, в лето 7214. (очесом история жития его свидетелствует) в котором расколе федосеевы и доднесь пребывают неисправленнии.

Второе согласие мануйлово, или монастырское новое. Иже начася в поморскои стране, в лето 7247, егда Мануил с прочими введы во обитель известную новость, и сею новостию со своими согласники раскол учини, от святыя Христовы церкви, по свидетельству святаго Златоуста два образа раскола церковнаго извещающа [к ефес. нравоуч. 11], едино убо егда изсякнем любовию; другое же егда недостоиная творити ко оному телу дерзнем. (еже сей Мануил с согласники учини) обоими бо отлучаем себе от исполнения.

Третие согласие тверское. И сие такожде отлучися от содержащих соловецких и поморских отец благочестие неизменне здешних християн. темже и сие согласие раскол учини от святыя церкви, в лето 7274. очесом вси здешнии християне известны.

И тако за всеми сими треми согласии, первая и всеобщая ересь явъственныи раскол всех сих согласии от святыя православныя Христовы церкви показуется; еже сия ересь подобна есть древним расколником и еретиком наватистом, донатистом, мелетианом,  авдианом и прочим; подобне от святыя церкви отлучающимся, о коих еретиках, и о расколе их зри во историях церковных явьственне, и в книге Кормчей, и в прочих правилных книгах. Тако убо таковым еретиком уподобляются и сии три согласия по единои сей ереси сиречь по расколу их от святыя церкви. Суть же в сих трех согласиях множайшия и особныя еще коегождо их согласия ереси. якоже в федосеевых еретическия титлы, еретическия браки, и на соловецких и поморских отец ругателныя хулении, и о торжищном брашне самоизмышленном мудрование, и прочая многочисленныя. И в монастырских кроме первыя новости, и другия ереси, сиречь, с федосеевыми сообщение, и новоженцем неправое разумение, и с еретики никонияны сообщение, и прочая множайшия. Тако и в тверском согласии, кроме раскола их суть иныя ереси, сиречь, о записке, о пачпортах, о антихристе, и о царской власти неправедное разумение, и прочия множайшия. Кия ереси всех сих трех согласии аще именно известите, обрящутся множаишим древним еретиком же подобны? но оставляем вся сия до времени. Довольствуем ваше усердие на сей твои первыи вопрос, и единою сею трех сих согласии явьственно раскол от святыя церкви сотворшии находятся, якоже показахом. и тако что еще на сию первую ересь речеши увидим, таже аще потребно будет нам, и о прочих их ересех изъявити тебе не обленимся.

Вопрос, 2.

Егда от тех разногласных к вам приходят, которым вы чином приемлете под крещение, или под миропомазание. а понеже у вас мир не обретается, то чем вмсето онаго навершаете, или кия ереси проклинати им повелеваете. понеже святая правила повелевают проклинати ереси, и ересеначалники, то каковых ересеначалников и кто имяны?

Ответ, 2.

От предложенных онех в первом твоем вопросе разногласных трех согласии приходящих приемлем мы яко от втораго чина еретическаго и разумеем достоиных их быти прииматися под таину миропомазания, по предложенному в прешедшем ответе уподоблению онех, (за раскол от святыя церкви) еретиком наватистом, мелетияном, авдианом и прочим; кия под миропомазание прииматися в Кормчеи печатнои определяются. А понеже у нас миропомазания таины за оскудение ныне священных чинов не имеется, и того ради навершаются у нас таковии приходящии, покаянием молитвою, слезами и постом; очесом в грядущем третием ответе известим пространнее.

Кия же ереси вопрошаеши проклинати таковым приходящим повелеваем и кия ересеначалники, понеже де в правилех повелено проклинати ереси и ересеначалники. Но понеже мы нижаишии ныне вне присудствии священных чинов, и от перваго чина еретическаго никониян приемлем без проклятия ереси и ересеначалников. и того ради и от сих трех согласии приходящих приемлем без проклятия ереси и ересеначалников с крепким точию православныя веры обетом, за неимением ныне священных чинов.

Вопрос, 3.

Аще ли же у вас в неприсудствии священника, и святаго мира на приходящих от вышепомянутых разногласных вместо миропомазания четыредесятныи пост полагаете; чрез которыи и Святаго Духа исповедуете приити, и вы пожалуйте покажите от божественнаго писания и от правил святых отец, кая правила повелевают на приходящих к православному соединению от еретик крещенных истинным крещением четыредесятныи пост вместо миропомазания (кроме тех аще християнин в ересь впадет, или Христа отвержется) полагати. и кто от святых тако дея, и святеи церкви предал сице творити? а обаче писано есть, аще и пост несогласен есть правилом апостольским, отнюд неприятен есть; и по Златоусту еже бо не по воли Божии, аще и добро мнимое нам в грех обращается.

Ответ, 3.

От вышепредложенных трех согласии несогласных, приходящии у нас навершаются, (за неимением ныне миропомазания таины) покаянием, молитвою слезами и постом. якоже и в прешедшем ответе рехом, чрез кая действа с православною верою и Святому Духу на приходящих сих приити исповедуем по святому писанию; якоже в Катихисисе велицем церковь святая явственне исповедует [Катихисис, глава 24], гласом евангельским и поучением святых писании, приходити Духу Святому; и в книге О вере [О вере, лист 147, 124], молитва ходатаи Богу, и пост ходатаи благодати даннеи нам от Святаго Духа извествуется; и в Соборнике в слове Анастасия Синайскаго [Соборник, лист 210 на обор.], чрез слезы получити причастие Святаго Духа сказуется. Чесо ради и мы нижаишии за сия действия наитию Пресвятаго Духа на приходящих онех быти праведне исповедуем. А еже вопрошаеши кая правила повелевают на приходящих от еретик, вместо миропомазания пост налагати, кроме де токмо в ересь впадшихся; и на сие отвещаем. Понеже правила святых апостол, и святых отец, имеются на священныя чины, и того ради нигде во святых правилах несть того чтобы в ересь впадших, и Христа отрекшиися исправлялися бы постом вместо миропомазания; не тако якоже ты глаголеши, кроме де тех, аще християнин в ересь впадет или Христа отвержется, таковых вместо миропомазания постом исправляти во святых правилех повелевается, а которыя от ереси втораго чина приидут, и таковых постом иправляти кроме миропомазания аки бы не повелевается. Но несть сицеваго разньствия и разделения (о приятии таковых) в правилех святых апостол, и святых отец, якоже ты зде неведомо откуду научился, тако разделительно предлагаеши. Но убо во святых правилех, равныи или паче рещи, един суд имеется положен в приятии, якоже Христа отрекшиися, и в ересь впадших и иже от втораго чина еретическа приходящих. зри в Кормчеи в толковании, 47-го правила апостольскаго; отвергшиися Христа миром помазоватися определяются. зри же в тои же Кормчеи книге, в толковании 8-го правила, лист 35. 1-го собора. и в толковании 7-го правила, лист 88. втораго собора и приходящии от втораго чина еретическа миром же помазоватися определяются, и никакова разньствия между сим не полагается; и тако откуду ты сих разделяти навыкл еси. Но аще же суть другия определения святыя церкви, иже с постом и миропомазанием отвергъшиися Христа приимати уставляет, якоже в Потребнике в соборном изложении зрится; и бывшия случаи научают, иже с единем постом по случаю отвергшиися Христа кроме миропомазания исправлялися. Но убо суть такожде другая определения святыя церкве, и о приходящих онех от втораго чина и с миропомазанием в Кормчеи старописменнои прииматися таковии определяются. Суть же инде и без миропомазания, с достославным точию покаянием таковии приемлются, якоже в толковании, 95-го правила, 6-го собора несторияне, евтихияне, и севирияне третиим чином без миропомазания приемлются. (си есть по Василия Великаго 1-му правилу) с достославным покаянием, кия еретики втораго чина суть, якоже в сущем 95-м правиле того собора сказуется, и под миро приимати их тако повелевается, в толковании же и без миропомазания приемлются. И тако един и равныи чин приятия видится во святом писании, якоже отвергшимся Христа; и иже от втораго чина еретик приходящих, еже обои сии с миропомазанием и постом прииматися определяются; иногда же и без миропомазания с постом единем обои сии приемлются. И того ради и мы равне, якоже отвергъшиися Христа без миропомазания с постом приемлем; тако и втораго чина от ереси монастырских, и федосеевых, и тверских подобне без миропомазания с постом приемлем, на четыредесять днии. того ради понеже в вышепомянутои Кормчеи старописменнои таковым пост на 15 днеи, определяется и миропомазание; и потом еще 7 днии постити и прочая. У нас же понеже таины миропомазания не имеется, и того ради против всего того положеннаго чину четыредесятныи пост точию сицевым со общаго християнскаго совета и разсуждения у нас полагается. якоже преподобныи Матфеи правилник глаголя. Аще (рече) писание не лежит закон, сохраняти подобает навычение и обычаи. аще ли же и сего оскудение, последовати подобает, иже множае приближающимся, уподобление имущим ко искомому, аще ли же ни се будет, разумнииших вкупе, и множаиших совет да держится. Дозде Матфеи правилник. И тако сицевое у нас имеющеся чинодеиствие, яве зрится согласно святоотеческим правилом; и потому и зело союзно а не противно воли Божии. якоже царьственныи пророк Давыд о воли Божии извествующи глаголет: святым (рече) иже суть на земли его, удиви Господь вся хотения своя в них. яве волю Божию во святых изъявляет. Темже и у нас сицевое чинодеиствие (сиречь пост) от предания святых имеется, понеже и святии на сицевых пост полагали (якоже из Корчеи старописменнои известихом) и от общаго християньскаго совета по Матфею правилнику сицев пост у нас употребляется, а не от некоего своемнения и самосмышления якоже ты в вопросе сем произносиши и того ради воли Божии всячески сие не противно но зело согласно есть.

Вопрос, 4.

В бытность Андрея Дионисовича, когда учинил с монастырскими первое разделение Федосеи Василиевичь, какое тогда было о федосеевых, и о их крещении разумение? познавали ли о их крещении что без Духа Святаго, и от киих лет федосеевы, и монастырския с четыредесятным постом приемлются к вам в церковь, покажите Господа ради истинно как в сем стать пред нелицемерным Судиею?

Ответ, 4.

В бытность преждебывшаго нашего отца Андрея Дионисовича, во время егда Федосеи Василиевичь учинил от оных преждебывших соловецких и поморских отец разделение. какое тогда было у оных отец федосеевых, и о их крещении разумение; о сем нам за претечением от онаго времени до нас толиких лет за неимением достоверных памятухов бесет оных отец, такожде и писменых их сочинении мало имущих известити подробну неудобно, обаче от многих малая извествуем. Показуется убо от писем вовреме прежде бывшаго онаго отца Андрея Дионисовича к федосеевым от поморских отец посылаемых, (кия писмы у нас обретаются) таково непщевание они отцы о федосеевых имели; еже яве за отлучившихся их (расколом их) от части святых отпадших исповедывали. Пишут бо они отцы о федосеевых, во оном писме сице; вопиюще (рече) не имети ни части ни жребия, за сия грубостию своею от части святых тако вообразивших и предавших отлучитися дерзают. Дозде с писма оных отец. Аще же по сему писанию прежде бывшия онии отцы за отпадших и отлучившихся от части святых федосеевых разумели, то яве и крещение их в таковом от части святых отлучении содеваемое, (до обращения их в церковь) без Духа Святаго признавали. Понеже златозарныи вселеньскии учитель святыи Иоанн Златоустыи пишет, всем рече отлучившимся еденения церковнаго Бог пророком рече, послю на вы клятву и проклену благословение ваше, и облеку е, сиречь положу клятву на благословение ваше, имже тайна содеваемая бывает, и прочая. Темже на таковом клятвенном отлучившихся от церкви, благословении Духа Святаго пришествии исповедати не мощно. Почему и мы от преждебывших наших поморских отец, не слышахом таковаго гласа, чтобы они на федосеевых раздорников крещении пришестие Святаго Духа исповедывали. А еже вопрошаеши, от киих лет федосеевы, и монастырския с четыредесятным постом у нас в церковь приемлются, и прочая. то аще мы нижаишии о тех летех твоему усердию за оскудением ныне достоверных памятухов, и не имеем что рещи, како приимахуся федосеевы во оная лета во всех странах нашего согласия, сиречь с начала раздора своего, до появления новаго монастырскаго согласия. Но мним же убо не единственну чину приятия онех во всех странах тогда быти. ово ради начала появления онех ово же яко и во многих а не во единой стране нашего согласия народи тогда обретахуся. и того ради о чине приятия федосеевых тогдашнем ведети неудобно, и утвержатися на том ненадежно есть. Но убо же егда монастырское новое согласие появися, и федосеевы ко оному согласию приложишася, то есть о лете миробытия 7247 года, с тех лет нам известны есть еже единственно с четыредесятным постом монастырския с федосеевыми в наше согласие приимахуся и доныне у нас тако в церковь приемлются. кроме некия малыя отмены зде в Москве, краткое некое время по неведению и по старательству некоего лживаго пастыря бывшия; а именно Михаила Григориева.

Вопрос, 5.

После перваго разделения было ли примирение, аще было, то кем имянно, и на каком основании, аще не было, то почему ваш отец с федосеевыми много время общался, и ваш настоятель, и брат крещены до разделу с федосеевыми, то приято ли их крещение?

Ответ, 5.

Аще сим вопросом вопрошаеши о федосеевых еже после перваго их от святыя церкви, си есть от преждебывших соловецких и поморских отец разделении; было ли их паки к тем же отцем примирение. и аще было то кем имянно, и на каком основании. Но мы нижаишии примирения всеобщаго федосеевых после расколу их, достоверно показуемаго нам не видехом на каком основании бы было таковое, когда, и с кем примирение их подлинно не слышахом. различным же иноразгласным баснем о примирении (аки бы бывшем) федосеевых сказующим неким вероятствия недостоиным людем не уверяемся. И сего ради примирения федосеевых всеобщаго к преждебывшим нашим отцем всячески не показуется, до появления новаго монастырскаго согласия, с коим согласием федосеевы вси с Данилом Матвеевым и прочими, удобно слепишася; но сеи их мир нам невочтоже есть. А еже глаголеши аще же не было примирения, то почему отец ваш с федосеевыми общается; и прочии елицы вовремя того общения крестишася, приято ли их крещение, и прочая. На сие отвещаем; яко примирения всех федосеевых правилнаго к преждебывшим нашим отцем не является, отец же наш блаженныя памяти Варлаам, общашеся с федосеевыми по простоте своей; коварством и обманом оных федосеевых; ибо оныя федосеевы якоже бывшаго тогда отца Корнилия, тако и сего отца Варлаама коварным образом уверяху и многими обманными писмами прельщаху сказующе себе во всех ересех исправившихся, и всем себе показоваху согласным преждебывшим поморским нашим отцем и в том многими клятвами, якоже и древле еретицы, Арии, и ариане кленущеся уверяху себе. коего их лукавствия, и злохитраго намерения, сии отцы, Корнилии и Варлаам, по простоте своеи и незлобию ведети в тонкость не могуще; и сего ради удобно их льстивым сказанием емляху веру, по писанному незлобивыи рече емлет веру всему. и тако во общении их оставляхуся; обаче же аще и бяху с ним во общении, но ко ересем их нимало ни прилагахуся, и не приложишася но свое благочестие аще и во общении их твердо и мужески сохраняху и онех федосеевых приложившихся и сохраняющих тоже их благочестие быти мняху. Тако бяше сообщение с федосеевыми отца Варлаама, и преждебывшаго отца Корнилия. И таковыя случаи, сообщения с еретики и древле и над святыми приключахуся, еже коварством еретик нецыи по незлобию своему, еретическая лести неразумеюще во общение их слагахуся. Тако убо блаженныи и равноапостольныи царь Константин по незлобию своему, еретика Ария лести не разумея во общение оного прияти повеле, и с прочими арианы мир имети завещаваше; очесом во многих различных церковных историях повествуется [Минея четия, генваря 18; Синоксарь в неделю 7-ю по пасце]. такожде и святыи Василии Великии, и Евстафия епископа ариянина, хитрости не усмотрев во общение оного прия, в чем от Федота православнаго епископа зазрен бысть, очесом в Баронии в лете Господнем, 371-м извествуется. Подобно же сему нечто пишется в житии преподобнаго Никиты Исповедника, вовремя еретиков иконоборных бывшаго, сице [Минея четия, апреля 3]: Еретики рече злочестивии видевше, отцев яко изволяют умрети паче неже своего отступити правоверия. изобретоша на них прелесть сицеву. глаголюще ничесоже ино от вас требуем. точию да с Феодотом патриархом в церкве приобщитеся святыни, (ниже) и тако поидите свободно кождо в свой монастырь, (ниже) таковым еретическим лукавством прельщаеми бывше отцы, соизволяху некако во оное время, но послежде прелесть познавше, вельми покаяшася, и исправишася добре. (ниже) испущени тогда бывше, изыде же и Никита преподобныи, не ослушася в то время честныя дружины, ихже и веру правую и добродетелное житие знаяше. и идоша убо вси купно, ко лжепатриарху оному, то иже да удобне уловит их к своему общению, веде я в некую молитвеницу нарочне иконами украшенную, того ради, да отцы тии видяше иконы святыя мнят быти патриарха правоверна. Тако Феодоту литургисавшу, прияша причащение от руку его, слышаху бо от уст его словеса таковая; аще кто не чтет иконы святыя, анафема да будет. сие же той глагола, не яко сам икону Спасителеву почитающи, но лицемерствующи пред ними, да не усумнятся обещницы ему быти. Посем комуждо в свой монастырь отшедшу. преподобныи Никита сердечною уязвися жалостию о том, яко Феодоту лжепатриарху лицемерному льстецу приобщися; ибо и малое от пути праваго уклонение, святыи себе яко всецелое заблуждение вменяше. умысли убо бежати во ину страну, и тамо о прегрешении своем каяшеся. Дозде от жития преподобнаго Никиты. Еже во всем сему подобное и таковую еретическою прелестию бывшее показуется, и оное их наших отец Корнилия, и Варлаама к федосеевым приобщение; еже тогда оныя еретики федосеевы; якоже и древния еретики иконоборцы, и их настоятель Илия Иванов; якоже и древнии он лжепатриарх Феодот, правое исповедание лицемерно оным нашим отцем даяти видяхуся, егда извещеваху пред ними прелестное глаголюще, егда; что у нас же ныне крестов с титлами уже несть, и от зрения их где случашеся кресты с титлами в другия углы убираху. сие же творяху федосеевы, не яко крестов с титлами не приемляху, но лицемерствующе пред оными нашими отцы, да не усумнятся обещницы им быти. К сим же и писмы ложныя о сем во уверение оным же отцем даяху; якоже отцу Корнилию сочинивше писмо, в начале и на конце написавше первое исповедание, в средине же своего зломудрия глаголы, и тако онаго писма, начало и конец пред ним прочетъше; средину же потаивше. и тако обманно рукоподписание от него к сему писму к примирению своему взяша. кую их прелесть на конец жизни своея отец Корнилии уведав, всеустно того их еретическа умышления, и подписания своего, к примирению их даннаго отричашеся, несть глаголя мне с вами в том ни части ни жребия, и тако в таковом исповедании и преставися. тако и блаженныя памяти отец Варлаам, (якоже и древле исповедник преподобныи Никита) егда последи уразумев федосеевых прелесть и обман, абие всеусердне, общения их отлучися, и о бывшем с ними общении, пред своими отцы всячески раскаявашеся. и потом уже до смерти своея общения с ними отнюд не имеяше. Тако убо по таковому случаю, и таковым образом бяше сообщение с федосеевыми, сих наших отец Корнилия, и Варлаама, еже яве по простоте, и незлобию их бяше, неразумеющим бо им коварства, и прелести еретическия, и стати противу козни их доблественне не могущим. Кая вещь и над святыми древле приключашеся, якоже известихом. Но обаче же и сии наши отцы, егда познавше сицевое свое погрешение, абие о том, якоже и древнии раскаявшеся. и в том раскаянии, и от сея жизни отъидоша. И того ради и крещение от сих отец, и прочих православных, елицы вовремя таковаго их по простоте бывшаго с федосеевыми сообщения восприяша, право и православно и прятно разумеется, яко от православных и благочестивых отец, паче же рещи и исповедников восприятое.

Вопрос, 6.

Аще приятно и благочестиво, то мнимыя вами за федосеевыми пороки, или по вашему ереси, прежде ли их крещения, или после явились, и до перваго ли разделу оныя крещены, или после?

Ответ, 6.

Почто о усердныи вопросителю, в сем твоем конечном вопросе, о приятом оном от православных крещении вопрошая известия о времени, ереси и раскола федосеевых истязуеши; преже ли расколу федосеевых, или после оныя крещены вопрошаеши, коея ради вины тако вопрошаеши; и кия подкопы под законным врагом рыеши. Кая же убо вина принесеся таковому твоему неприличному стязанию; за сие кое убо причастие приятаго от православных крещения, к ересем и расколу федосеевых; аще бы оных ереси и раскол прежде ли или после крещения были. Аще бы ты о восприятом от федосеевых крещении зде вопрошал еси. то негли бы ти прилично было тако о сем вопрошати, еже прежде ли, или после ереси и раскола федосеевых крестишася. но понеже сии (о них же вопрошаеши) не от федосеевых раздорников крестишася, но от православных отец, аще и во время происходящаго случайнаго с федосеевыми сообщения заимствовавше крещение. но понеже оныя отцы и прочии, по простоте своей тако тогда некое время с федосеевыми сообщахуся, коварством онех, кая вещь сицеваго сообщения, и над святыми древле приключашеся, якоже в прешедшем ответе явихом; тако аще и общахуся по таковому случаю с федосеевыми тогда но не бяху чрез сие причастницы ересем их, якоже и онии предложеннии иже в прешедшем ответе явихом. И того ради о сице приятом в то время от православных крещении, вопрошающу тебе; несть ти приличия вопрошати о времени ересей и раскола федосеевых, зане таковое крещение их, не от федосеевых но от православных. И того ради никоего участия к ересем федосеевых не имать, якоже рехом, а аще оно и после ересеи и раскола федосеевых восприято есть. И тако на вся сия шесть предложенныя твоя вопросы честныи вопросителю, яже о трех согласиях, федосеевых монастырских, и тверских и о приятии от них приходящих; таже о времени разумения и чиноприятия онех и бывшем отца Варлаама с федосеевыми сообщении и наконец о полученном в то время крещении; нашу худость вопросити порачительствовал еси, на вся сия твоя вопросная задания, мы нижаишии и грубии, краткая сия ответы сочинивше ти предлагаем, и сим ответное сие наше писание окончеваем ныне, аминь.