Показательное списание на новоявленныя философы и учители, и иже от них списательныя книги Скрижали, Жезла и Увета, показующее их древним богодухновенным писанием, еще же и к друг другу несогласное мудрование, писано по понуждению благовернейших и боголюбивых отец и братии, от божественных писаниих, грешнейшим человеком но християнином, и благоверное святых отец предание, зело лобызающим, и понеже понужден смотрети вышереченныя новопреданныя книги, и показати их сколь оны прямо имут в себе учительство. тем же и к понуждающим его боголюбцем, предисловным предсказанием написано прежде вкратце сице.

В сад чювственный или в травник шипконосный, необычный и в новообретенный, вшед бы кто и аще не будет не воздержный не прежде от плода его яст, дондеже с добрым искуством объявленне познает, и здравие и сладость вкушения онаго, да некогда от напраснаго ядения не раздвоенно что, или смертоносно вкусит или пиет, и постражет неначаемое, яково же от неискуства древнии прадеды пострадаша, Адам и Ное, ов убо от змии и жены похвалямаго от них сада вкусив смертию осудися. другий же напрасно истопта виноград, и не искушая пив, упиянися и пострада неначаемое, сих убо ради праведно и преподобно. Мню ваше благочестивых боголюбезное намерение, о благовернии христолюбцы. иже последи древних благочестивых патриарсех, царех и князех и митрополитох афетороссийских, возрастшии новины Никоном бывшим патриархом Московским, искушаете с добрым богожеланным объявленне, обысканием еже вы показуется яве, не невежеством и упрямством каким что каково новопредание отметаете, но прилежным своим боголюбезным тщанием вся сия расмотряете, и от хуждьшаго к лучшим прибегаете, аще и от новоявльшихся софистов новосложенными книгами Скрижалию, Жезлом, Уветом, и прочими списании, яко цветы похвалами теновиньшества украшаемы. и кроме всякаго искуса всяк возраст последовати увещаваемы и повелеваемы, яко архиереом и пастырем, неглиже и зело с казньми многажды понуждаемы. Но вы священным богогласником повинующеся вся искушаете да добрая содержите, и паки искушаете духи, аще от Бога суть, и за еже повелеваеми от учитель пишемая и глаголемая искушати, и согласная убо со священным писание приимати, несогласная же по коему любо образу отметати. аще кто любо есть по еже от апостола реченному: аще мы или ангел с небес благовестит вам, паче еже благовестихом, анафема да есть.

На сие же богорачительное ваше споболение, на тризнище истязание, тех новосписаний совлачитися понуждаете моего грубаго ума, еже есть зело выше силы моея. и весма бы отрещися таковаго труда, аще не бы ярем преподобнаго послушание, и выше силы уставляющь начинати, не своей силе, но молитвам заповедавших надеющися. Яже аз преподобных ваших молитв надеяся выше силы понуждаюся, сетованием за свою немощь. надежен же на Божию помощь, и за молитв всех российских чюдотворцов, ихже благоверием укрепляем. вхожу в новонасажденный Никоном, и яже о нем ревнующих новоизложенных книг цветник, и похвалами своими и витийскими краснословии по пророку рещи, предняя его яко рай процветения. Усмотрим помале аще не обрящется имея сокровенная под чернилом во глубине лежащая развратная кая учения, яже по оному же священноглагольнику рещи задняя его после погубления. Богоподражателное обыскание творим, не за честь и славу и по любопрению и по не хвалному упрямству настоящия жизни, но по ревности Божией и по желанию вечнаго уповаемаго благоверных обетования, и по оному верховному богословцу повелевающему готову быти ко ответу всякому вопрошающему слово о вашем уповании. Вы убо о церкви Сионстей благопослушная чада; иже древним святых отец преданием любезнии последователи, сего подлинно обыскателнаго тризнища зрители и видители не лишайтеся быти. яже не в силе констей, ни в лыстех мужеских, филосовскаго и витийскаго кичения, но в силе священных словес божественнаго писания. и узриши помале винограда, егоже не насади Отец небесный от основания ископана, зане не от источник Израилев славит Господа. но от новоумышленныя по земли повлачимыя мудрости века сего. от нея же нам Павел сосуд избранный блюстися повелевает. егда кто будет крадоводя философиею и тщетною лестию. ныне убо да узриши внимателне православный читателю, терзаемо под овчиною лежащее не православных предание, но новинников велеречие. яже мы не от премудрости века сего хвалящеся, но о Бозе сотворим силу, и Той уничижит стужающаяя нам. Ему же слава вовеки аминь.

О хвалении новых учителей своих и их новопреданий.

Увет книга от Иоакима патриарха изданной на укрепление нововводным догматом в лета, в немже в первом увещании похваляя церьковь свою, с нововводными догматами приводя на украшение ея Соломона. от книги Песни песней: Се еси добрая ближняя моя и порока несть в тебе, и прочая, и паки ниже от Премудрости 7: Убеление бо есть светлости вечныя, и зерцало непорочно Божия делания и образ благостыни Его.

Обыскание их велехвалению.

Ныне начнем смотрети о Иоакиме. аще о твоей церкви Соломон пророчествова такая. аще несть никоего порока в вашем новоучительстве. последуетбося объявление. Зане и Аскалона бо выше и Газы. на самом концы Иордана реки, есть страна многая некая, сия убо тако благоцветущая и ко всем странам красотовидением любопрящися, достизающися гобзованием рая Божия, и стоят убо шипки и древо глаголю и плод светлое явление имущий, и неведущему подающе многия надежды.

Тако цветет и вашими похвалами ваше нововведение. Но оно убо яже на концы Иордана рай, аще и светлеется, зрение точию прельщает, плод же его Божияго гнева есть воспоминание. аще бо взяты будут в руце разломшися, плода убо никоего же, прах же и пепел мног показуют щадимый внутрь.

Приимем же ныне вашего нововведнаго плода, егоже красите чюжим речением, вся рече добра ближняя моя, в ней же несть порока, и разломим его благоверным разумом, и узрим что обрящется под чернилом его во глубине лежащее сокровище.

Зри читателю в последующих трех обысканиих и объявлениих, каков порок и несогласия их со святыми и меж собою, и сколь далече разгласное мудрование их.

Обыскание 1.

Прииди днесь всяк благоверный с Богом помощником имемся трудов яже за неблазненое благоверие. вземше по искуству священных писаний Параклитова вдохновения пророковещанными гласы, на всяку истинну нас наставляюща: начало глаголет словес Твоих истина, и в век вся судбы правды Твоея. B паки: словеса Господня словеса чиста сребро раждеженно и искушенно земли. Cими убо явственне научаеми не обноситися всяким ветром учения, но со многим опаством и трезвенным умом искушати духи, сиречь яже от неких писуемыя книги: аще согласны по всему со священным божественным писанием, или сами в себе аще согласны суть, по премудрому Максиму Греку, аще же не по всему согласуют, ниже шествуют с богодухновенными писании я от неких списуемыя книги отринути и гнушатися их подобает, аки хулных и скверных и от Бога нас отлучающих.

Пишемая же ныне новосложная от архиереов, нынешняго века сего списания о крестном знамении, первие в Скрижали, потом же в начале Псалтырей дестевых и полудестевых, в них же досаждают православным по древнему святых отец преданию двема персты знаменующимся. яко бы по Несторию злоумному, в том преданном сложении перстном, разделяют во две ипостаси единаго Христа.

Первое в трех перстех изобразующих Святую Троицу, указуете быти Сыновню ипостась. таже особь отделивше, ину ипостась Сыновню поведаете быти, во указателном глаголю и великосреднем перстех.

Таже пониже. Да не отлагаем обоих таиньств совокуплением первых триех перст исповедати, то есть: Святыя Троицы, и смотрения воплощения.

В тех же их списаниих впреди Псалтырех и Часословцех.

Повелевает, болшее хотящим известитися врачевство духовное о соборныя церкве подадеся в книге Скрижале, и в книге именуемой Жезле правления, и в книге Увете духовном.

В них же в Жезле на листе 61, и в Увете на листу сице пишут: Яко много лучше те обе тайне нами воображаетеся ибо трех первых перстов соединением. первое трех лиц безначалное во единьстве естества является пребывание, таже двема последнима преклоненнома перстома. последняя тайна, еже есть преклонение небес, и смиренное Бога Слова вочеловечение, лучше являтися может.

Разгласному их мудрованию, 1 объявление.

Сеть крепка мужу свои устне, и увязает устнами своих уст, глаголет премудрый Соломон, и паки того отец, в сети своей рече увязе грешник. И како не увязоша вышепомяновеннии высокоглаголивии философи, от своих устен. исперва востая на православных Скрижалию, и яже по преди Псалтырей и во инех обретающихся их списаниих, аки зелне яряся укаряют: яко в трех перстах Троицу исповедавших, таже в других дву стекшаяся во Христе два естества исповедающих. Они же глаголют якобы по Несторию злоумному, другую ипостась поведаете быти. Таже аки забывшее свое первое предание в Жезле и в Увете в первых триех перстех изъявивши Святую Троицу, таже двема последнима, смиренное Бога слова вочеловечение являют. И убо по Скрижали и яже впреди Псалтырех преданию. Жезле и Увете, по самех их умствованию, во два состава несториански Христа разделяет: зане по первом Святыя Троицы явлении, относит в последних дву перcтах смиренное Бога Слова вочеловечение. по Жезлу же и Увету неправое будет исповедание. Скрижали и прочих яже противно им, в трех точию перстех укрепляется. исповедовати оба таиньства Святыя Троицы. и смотрения воплощение. B како убо сии могут когда увещати кого здраво разсуждающа последовати себе, в толиком сами меж собою дерущеся и разлучающеся в своем исповедании. Зане яве познавается яко не от единаго живаго источника Параклита вдохновени, ниже от священных божественных писаний наставляеми, но по нехвалному упрямству и непокорению древним святым отцем, и по влачимыя по земли века сего от самомнимыя мудрости глаголют. Их же благовременно есть вопросити яко пастырей и учителей именующихся: рцыте убо нам о предобрии по которой убо по вас похвалной книге, умствовати ваше треперстное сложение. по Скрижали ли и протчих яже об ней. иже точию в трех перстах исповедающих оба таиньства Троицы и смотрения. в других же два перста относити смиреннаго Бога Слова вочеловечения никакоже терпящее. но таковых еще ересию несторианскою вельми оглаголующа, и аще Скрижали держитеся аки первовиновныя вашего нововведения. то убо Жезл и Увет отринути будет яко противящихся уставленной там богословии, и по оному мудрованию аки несторианскую ересь прославляющих. Аще ли любите с Жезлом и Уветом в трех перстах объявляти Святую Троицу. двема же таиньство Бога Слова вочеловечшагося, то убо Скрижаль с протчими точно мудрствующими отжените от себе, аки неправо исповедающих и хулу на богословию глаголющих. с ними же вкупе и Жезл и Увет отрините, зане не узнавших своего с ними толь глубоко растоящагося мудрования, или узнавши по безбоязньству же вышняго суда, и по лицемерству яко неправедных защищающих и похваляющих тое во многих местех Скрижаль. понеже их не истинно учащих. но раздирающих истканную ризу от вышния богословии священных наших отец и богословцев. Прочее о знаменовании честнаго креста и объяснение хулению их в подобающем месте да известится. Ныне же точию в первом объявлении разломанный плод несогласнаго, не точию церкви святей, но и самех их себе мудрствующих объявися, иже не точит плод церковнаго согласия, но испущает мутное неправаго исповедания веление. Вкратце сия тако изъявися яко тии сами новии учители и философи, меж собою имеюще в своем учительстве, толико далече растоящееся и друг другу противящеся раздирание.

Обыскание 2, о хвалении их еже нарицают древния печатныя книги разгласными, своя же нововводныя глаголют с греческими святыми и российскими чюдотворцы, един чин и устав показуют. О Увете в сказании исперва о исправлении книжном.

Сего ради должно есть нововводныя чины церковныя, з древними греческими и славеньскими книгами, новыя разгласныя печатныя при прежде бывших патриархов Московских исправити яко же лепо. и о сем вси тако утвердивше з древних истинных греческих и славеньских печатати и исправляти повелеваем. иже обои, един купно чин и устав показуют. в них же святии человецы и велицыи сих чюдотворцы восточнии богословцы и учители, Афонасий Великий, Григорий Богослов, Иоанн Златоустый, Иоанн Дамаскинский и инии мнози, такожде российскии чюдотворцы Петр, Алексей, Иона и Филипп и прочии святии.

Объявление 2, показующее их со святыми чюдотворцы несогласие и обличающее ложное их высокохваление.

Священницы Твои облекутся в правду, глаголет царьственный пророк. сими показует иже истинно Богу священьствующих, никогда лгущих, зане крепце в правду облеченных, и из нея никогда выступающих, а иже не таковии, о их же ин пророк являет изыде беззаконие от Иеросалима, от старец Израилев. иже таковых по псалмопевцы гроб отверст гортань их, языки своими лщаху. Сими пророческими от Параклита вдохновенными словесы наставляемся добре познавати православных пастырей, иже всегда истинну глаголющих. зане от Святаго Духа наставляемых. Тако и лжепастырей объявляет, иже глаголющих лжу, аки от сопротивнаго духа. Руководствуемых воистинну добре и богоугодне священнодействующих и вправду облеченных, по псалмопевцу пастырей наших великих чюдотворных архиереов объявляет слово истинное, Петра, Алексия, Ионы и Филиппа, Макария же чюднейшаго и Акакия Тверскаго, Гурия и Варсонофия Казаньских, и прочих прежних российских архиереов, и чюдотворцов, и пяти патриарх Московских, в них же и многострадалнейшии исповедницы Гермоген и Филарет. иже един и тойжде чин и устав имеющих, и разгласия меж ними каково нынешних новых учителей отнюд не видится. Аще и зело тщаливи нынешнии философи, и праведное слово помрачати. зде же вопрошаеми сказати не могут, в кое время, или кия архиереи, или князи и цари по равноапостольном князе Владимире, разгласили святыя соборныя апостольския церкви предания, и новины от себя какие бы ввели, яково же при инех развратников церковных и еретиков в кое время кои явятся что развращая, тогда Дух Святый на них подвижет и обличителей, таже потом и по многом времени святыя книги о их явственне повествуют, яко же и у нас в России бывших новгородских еретиков, еще же и Иова мотылнаго столпа четверяща аллилуия, яве ведомо, но убо и начало нововводца разорванию согласия церковнаго, Никона не утаилася дерзость. видится убо старопечатныя книги пяти патриархов неразорвано согласие имут с Петром, Алексеем, Ионою и Филиппом и со инеми чюдотворцы. от многих инех познавается, яко же и от знамения крестнаго. на неже сложение перстов десныя руки равно употребляли, яко единаго пастыря Христа ученицы. и страшное и чюдное имя Владыки нашего и Бога равно Iсъ без прибавочныя иты единогласно славословили, и прочая предания яже ныне да умолчатся реченная же доводятся и по держащемуся в них согласию. Еще же объявляется. и по святаго архиерея Петра его рукою, на иконе написанное у Спасителя з десныя руки сложение перст согласно с старопечатными. подобне же Исусово имя без прибавочныя иты, согласно же тому и на прочих чюдотворных образех Пречистыя Богматери с превечным младенцем Тихфинския, Казанския, и Толгския, и на инех древних чюдотворных образех безчисленных. яже тому противно нынешнии архиереи и на иконах воображают. и на древних образех дерзают по своему переписовати, аки вопреки им творя на благословение и себе на знаменование. инако и противно святому Петру, и прочим чюдотворным образом персты слагают. и имя Пречистаго Владыки Iсъ, противно им пишут Iисъ. Еще же бывший священный собор при благовернейшем цари Иоанне Васильевиче, о крестном знамении явственне укрепляет. не яко вновь повелевая но древнее утверждая глаголя: аще кто не благословляет, или себе не знаменует двема персты, яко и Христос, да будет проклят святии отцы рекоша. Такоже и восчетверение аллилуии нарицая латинскою ересию. На том соборе первоседательствоваше священнейший Макарий митрополит Московский, дивный добродетелный муж, от всех после бывших историков и списателей святых житий зело по премногу похваляемый. еще же и Феодосий архиепископ новгородский ученик и постриженник преподобнаго Иосифа Волоколамскаго, и Акакий епископ Тверский, муж свят и добродетелен, и дара пророческаго сподоблен. иже прежде многих лет пророчествова святому Варсонофию, еще ему в диаконском чину сущу, яко быти ему после его епископом на его месте еже и бысть. и во время вышереченнаго собора, он святый Варсонофий, и Гурий Казанския чюдотворцы были же. и той убо священный собор таковыми духоносными мужи самобывшими тогда свидетельствуется, не менше же и последующими утверждается. Чюдный он великий Филипп митрополит и чюдотворец то и той не точию не противяся священнейшему Макарию. но еще в житии его написано, егда прия престол великия руссийския митрополия, благий нрав подражая преждепомянутаго боголюбиваго Макария митрополита, усердно потщася последовати честным стопам его. Видится ныне объяснене яко зело согласни вышепомянутыя чюдотворцы: Петр, Алексей, Иона и Филипп, и Гурий и Варсонофий Казанскии, с боголюбивым Макарием и прочими святыми, прежде их и меж ими бывшими и в последи бывшими пятию патриархи. яко согласно знамение честнаго креста воображали. и аллилуия ангельскую песнь ко Святей Троице возсылали. такожде и Спасителево имя Iсъ и прочия чины и уставы согласно славословили. И како убо не устыдешася тии хвалитися ложно. иже толь крепкия церковныя догматы клятвою соборною предвигающих осуждающия смели предвигнути. и сопротив вышереченным святым в сложении перст, инако на иконах воображающе и благословляюще, и на древних святых иконах смеюще святое воображение перст выскребати. и свое новое на то место воображати, инако себе знаменающе, во обоих подобне со святыми не согласующеся, и аллилуию противно им четверяше и к пречистому имени Исусову иту прилагающе. а глаголющих яко с ними святыми един чин и устав имут. како не явная ложь познавается. еже тако обольщевати не по истинне пастырской. но по безбоязньству вышнего суда. а наипаче коль велико растояние с ними имеющих. яже бо святая церковь издревле содержала, еже и у святаго Петра на иконе воображено сложение перстов, и на протчих чюдотворных образех имеющееся. И яже преосвященный Макарие со святыми чюдотворцы на соборе утверди. ему же и святый Филипп митрополит последова. но убо и таиньство богословии сколь велико в них исповедается. еще же и не просто но инако хотящих благословляти, или знаменоватися клятвою вечною осудиша. и пригласиша святии отцы сиречь кои прежде бывшии. Тако глаголют то истинное сложение перстов в нынешних новых книгах напечатано, проклятым арменским и несторианскою ересию оглашено. И не яве ли зде солга неправда себе. еже всуе и туне согласны написалися с вышереченными святыми. яже в кратцем сем разсмотрении ясне объявилися. сколь далече отстоят. Посему убо и в прочем их нововводстве, тоже надеемо быти. Иже бо рече Господь в мале неверен и во мнозе неверен. и иже не собирает со Владыкою, и со святыми Его единомудрствуя с ними, той и расточати не убоится. Еже и зде смели испустити такову тяжку хулу, на столь явственнейшую истину святых отец в сложении перстов богословию. и с таковыми проклятыми еретики армяны и несторианы заедино почести не устыдилися. Кому бо таковая прилична точию зверю оному, виденному во Апокалипсии творящему брань со Агньцем и со святыми Его, а не  и таковым бы пастырем, иже внешнею премудростию и честностию гражданства красящимся. Прочее ныне оставим слово, зане пространнее впреди Богу помогающу понудимся явити. Зде точию во втором объявлении кратко изъявихом, яко со священными архиереи и чюдотворцы российскими имеют колико растояние и сопротивление, а чернилом пишут, яко бы согласно и единако тайнодействуют с ними. Сего ради вмале испрахом утробу овчеобразнаго покрова, и показахом под чернилом лежащее святым чюдотворцем не согласие, но хуление. да не хвалятся Никон и Иоаким лжущеи на истинну, насилием лжи вмещающеся в полк православных архиереов, сами толь дерзостно преданию их противящеся.

Обыскание 3, яко тии иже о Никоне хвалятся единеми уставоположеньми в грецех и в России издревле и ныне краситися.

Увет напреди во увещании Иоакимовом.

Яко же святая православная восточная церковь истинная, верою и правым учением святых соборов отцев святых, и чиньми уставоположеньми от вселеньскаго святейшаго патриарха Константинопольскаго, и прочих патриархов Александрийскаго, Антиохийскаго же, Иеросалимскаго, и от всех християн содержится. такожде и зде в Российском государстве издревле и ныне красится.

Объявление 3, показующее нынешних греков с древними православными греческими учители несогласие. и являющее яко до Никона российстии архиереи з древними греческими священными проповедники, во святей вере опасно согласие имеяху.

Сие третие объявление на три статии разделяется.

Прииди и днесь в начало сего третияго объявления, духоносный царьственный пророче совниде, нашему немотующему языку, аки ненаученному риторскаго красновещания. но точию в подражании твоего богодвижимаго языка, еже есть неправду возненавидех и омерзе ми. аще и кто любо творя или глаголяй есть. за еже твоим подражателем рещи, Бог лица человеча не стыдится, или аще кто Божий подражатель есть. что бо вещает псаломская твоя цевница. утвердиша рече себе слово лукаво поведаше, скрыти сеть реша кто узрит их. Воистинну и вышереченнии во Увете философи глаголюще и древним благочестивым греком и россияном, и нынешним грекам,  и им содержатися святых соборов святых отец уставопоженьми единеми и краситися, тако хвалящиися. Поведаше зде скрыти сеть, и возмнеша яко никтоже узрит их такову не постыдешася толь яве неправду глаголати. еже бо древним благочестивым греком наученным от святаго апостола Андрея первозваннаго, и от святых соборов святых отец утверженным, тако же и нашим великороссияном благочестивому князю Владимиру, и великим архиереом Петру, Алексию, Ионе, и Филиппу, и Макарию, и Гурию и Варсонофию, и Иову первому патриарху, и многострадальным Гермогену и Филарету, со Иоасафом же и Иосифом, и со всеми святорускими благочестивыми людми, единомудрственно вещати со апостолом: един Господь, едина вера, едино крещение, тако веровати нам праведно и преподобно зело. и инако дерзающих развращенно что про их рещи. Да заградятся уста таковая, иже на тацех великих мужей смеющих глаголати неправду гордынею и уничижением. А нынешних греков како мощно примесити к толь пресветлому священному лику. иже не точию во инех о священней вере преткнушася. но и самое святое крещение противно богоглаголивых апостол, и святых отец преданию развращают, аки явныи им противники не крестят в смерть Господню, в три погружения и сие, не в неведении, аще бы малии нецыи о том обмекнулися. но самы главнейшия их патриархи, с подданными ими иереи и с единомудрствующими с ними сербовы и прочии, яже в Киеве, и в Литве, белорусцы, со инеми преступлении, и то введоша еже вместо трех погружениих обливают. точию забыв богословнаго онаго языка, его же Великий Павел бе учай. Дионисия глаголю Ареопагита, ясне повелевающа в три погружения крещати. но и апостольскаго онаго в 50-м правиле, запрещения не убояшася, не крещающих в три погружения из сана извергающаго, а их же святии апостоли извергают и отлучают. кому смети таковых прочее приобщати, аки над священным их законоположением возноситися и новозаконополагати, истове же рещи противитися.

О их же еже в грецех и в сербех, и в белорусцех, деющеся обливание, и в Требнике Киевской печати, у Петра Могилы тое обливание с треми погружениии равно почтено.

Сих и толь таковых преступников како не устрашаются нынешнии новии учители, к православных лику древних святых отец примещати, еще же их аки крепку подпору к новинам своим во свидетельство приводити, и везде в своих списаниях и в беседах, аки к некоим столпом к греком и сербом, киевляном и белорусцем нынешним отсылати, к ним же аще приидем и посмотрим. и уже толико те столпы от основания падоша. яко к прочим своим преступлением, и истиннаго крещения на себе не имеют. Что убо вас о премудрии отвлече от согласия пяти патриарх прежде бывших, Московских благочестивых иже святых древних греков и россиов безъизменно держаху благочестие. И что привлече к нынешным греком отступником, с прочими вышереченными, кое чюдотворение, или воздержное житие у них усмотрели. Того ли ради что они смесилися с различных вер языки, и навыкли дел их, или что ли вас понуди, от святаго корени безъизменных преданий древних отсекатися, и прицепитися к гнилоносному от червей ересоядовитых истлелому обливанцов корению, и везде вам источником и коренем их нарицати. Не весте ли дивнии, яко всяко древо не творящее плода добра, а наипаче не имеющее святаго крещения посекается, и во огнь вметается священное евангелие нас научает. посечену бывшу кореню, яве и прочему ветвию. таможе с коренем валятися. И понеже вы с ними заедино сцепилися и смесилися и вкупе глаголете, едина вера едино крещение. праведно кто почтет равно ваше и их крещение. и не инако како зане по вашему о том исповеданию, и по священному евангельскому словеси от уст своих оправдишися, и от уст своих осудишися.

Статия вторая.

И не точию сим обличаются нынешнии грецы с ними же и последующии им, и не точни вероятельства учинилися, но и в крестном знамении о сложении перстов, явственне обличаются, яко православным древним греком противницы, а не обычая их хранители. Святый бо Мелетий и Феодорит и Петр Дамаскин, и Максим премудрый святогорец, не трема персты повелевают знаменоватися, ниже разметными персты благословляти. аще и от нынешних философов. Мелетий и Феодорит инако и инако отводятся, обаче обличаются от священнаго с чюдотворцы собора, яже при Иоанне Васильевиче. Еще же обличают их древние чюдотворные образы греческих изуграфов писанныя. якоже и чюдотворный образ Богоматере иже на Тихфине, иже чюдотворне ис Царя-града изволением Богородицы принесеся, на благословение православным россияном, и на обличение нынешних греков, и последующих их заблуждения, вкупе рещи вся чины православных россиов древних, яже у пяти патриарх наших первых имелися. еже двема персты креститися и благословляти в трисоставном кресте распятаго Господа нашего Исуса Христа прославляти. и той на просвирах печать имети, и на седми просвирах священнодействовати литоргия. с прочими священными чины и уставы вся истинно и неизменно по преданию святых апостол и святых отец содержахуся. Аще и заблудившии от чрева матерня. сиречь не очистившиися в трех погружениих с православною верою, во святом крещении нынешнии грецы, и глаголют лжу на православных наших патриархов, но обличается их лжа от прежде их бывших греческих православных патриархов, которыя еще не по лисам и соболям судили, и на пенязи разрешителных грамот не давали. [яково же поведают нынешние вселенские патриархи, приезжая к Москве деяли] В царство благочестию всесветлаго подражателя царя Феодора Иоанновича, бывый пресвятейший Иеремия архиепископ Константина града, и вселеньский патриарх, иже украси превысоким престолом патриаршеским церковь Божия Матере на Москве честнаго и славнаго Ея Успения, и рукоположи в ней перваго патриарха Иова, и не бо видеша он вселеньский патриарх в чесом святых отец предания нарушаемы. Аще бо было не по апостольскому преданию, видел бы тогда своима очима и ушима слышал в соборной церкви Божия Матере. яко же обычай бяше, тогда у православных: над седмию просвирами священнодействовати святая литоргия, печать просвиры имеюще трисоставнаго креста. тако же и аллилуия дважды глаголати, и приглашати в третие Слава Тебе Боже. и знаменоватися двема персты. и спасителное имя Исус прославляху, и прочее старопечатных книг священнодейство, и не точию не похули, но яко же видится от их тогда с великим государем беседы и зело похвали, о чем в их за многими руками в соборном сложении написано, яже в Кормчей книге напреди напечатано, от них же малая речем.

От беседы царя Феодора ко вселеньскому патриарху. лист, 14.

Понеже наши прародители великия государи цари всея Великия Росии, приняли святую и непорочную християньскую веру. и поставление прияша первопрестолники новыя чюдотворцы Петр, Алексий Киевския, и прочия всего великаго российскаго царствия, от святейшаго патриарха Константинопольския церкви новаго Рима, еже Вседержителя Бога милосердием и пречистыя Богородицы и до ныне непоколебимо держим.

И сия убо изрекшу благочестивому царю, противо беседует вселеньский патриарх, по иных убо речех, и сия рече.

Воистинну в тебе благочестивом царе Дух Святый пребывает. И паки ниже. Понеже убо ветхий Рим падеся Аполинариевою ересию. Вторый же Рим иже есть Константинополь агарянскими внуцы от безбожных турок обладаем. Твоего же о благочестивый царю великое российское царствие третий Рим, благочестием всех превзыде и вся благочестивая в твое царствие в едино собрашася.

К сим да постыдятся нынешнии законоучители клевещущии, старопечатных книг служение, новыми и разгласными именующии, что бо сих яснее благочестивому царю рекшу, яже издревле непорочную веру прияша благочестивыя государи и первопрестолники и доныне непоколебимо держим. Вселенский патриарх пригласи: воистинну в тебе Дух Святый пребывает, и великое российское царствие благочестием всех превзыде, и вся благочестивая в твое царствие в едино собрашася. Убо явно есть отсюду, яко древнее благочестие старопечатными книгами исповедуемое апостольское и святых отец непоколебимо было. Колеблют е ныне новые учители, и превосходящее инех всех благочестие, и такими апостольскими настолники издревле преданое, и на последи же свидетельствованное, дерзают преоправляти, истовее же рещи противитися и преступати. Еще же и в царствование благочестиваго царя Михаила Феодоровича, бывый Феофан патриарх святаго града Иеросалима, иже рукоположи святейшаго многострадалнаго Филарета патриарха, его же и зело похваляет в своем списании, яже напечатано в Кормчей книге напреди, в ней же и поучает святейшаго Филарета патриарха, и не глаголет к нему, чтобы исправити что в вере, яко же нынешнии новые власти, сии рече еже бы ис проскомидии две просвиры убавити, или печатать двучастным древом и проче священнодейство, яково же у нынешних не согласно з древними, или аллилуия четверити, или знаменоватися крестным знамением, инако не по прежнему. сия бы ему мощно видети служащу с ними и тайнодействующу, аще бы было не по апостольскому преданию. Но что тогда самого Владыки Христа престола его наместник: да соблюдаеши истинную святую православную нашу веру, яко же обещался еси пред мноземи свидетели. Что бо и сих правой вере держащейся душе словес яснейше, не рече исправляя но глаголет, соблюдай истинную святую и православную нашу веру, яко же и обещался еси, воистинну и не солга многострадалный он чюдной мужь, но и соблюде. К сим прочее нынешнии грецы да постыдятся слышавшии своих древних апостольских наместников вселеньских патриархов, древнее святых отец благочестие, у наших патриархов держащееся похваляющих, и непреложно соблюдати повелевающих, самех их ныне яве познавается несогласие к ним.

Статия третия.

К сему же и аллилуия ангельскую песнь, древнии грецы пели дважды, а в третии приглашали Слава Тебе Боже.

И сему свидетель преподобный он Максим инок премудрый святогорец, еще же и Евфросин Псковский чюдотворец, яве бывший в греческом царствии, и слыша своима ушима в соборней церкви, и упрочих всех единогласно, аллилуия дважды а в третии доксасиофеос, еже есть Слава Тебе Боже. Аще и в Жезле облгано, якобы святый Евфросин в Царе граде не был, и верити ему не повелевают, и списателя жития его святаго хулят. Но обаче яснее о сем свидетельствует собор освященный, иже при царе Иоанне Васильевиче, иже в Стоглавнике положено. тако и в служебных Минеях печатных, маия в 15 день, в службе святаго Евфросина похваляет трудившася в Царь град о божественной аллилуии, и слышавша тамо своима ушима поющих дважды аллилуия. Лепо же и от своих их свидетельств показати древних греков с нынешними о аллилуии несогласие. В Увете на листу посылают нас в Минеи четьи блаженнаго Макария в месецех, и тамо велит о аллилуии пространнее слышати в тех книгах, не в церковное прочитание, в месечных числех, по на краех приплетены послания некая, иже яве познаваются Иева роспопы Псковскаго развратника, и его учеников. против видятся Евфросина чюдотворца, и прочих православных. в них же многая блядения о божественной аллилуии писана, яже смеху а не удивлению суть достойная. И тамо во многих местех укоряет греков, еже поют аллилуия 2-жды, а в третии приглашают Слава Тебе Боже. И называет их за то отступниками, и не подобает глаголют вселенским патриархом и афонским отцем покарятися, виною их оболгующе, иже они пели ангельское пение аллилуия оглаголующе, еже отвсюду ясне показуется, и от православных и от их свидетельств, яко древнии вселенскии патриархи в грецех пели дважды аллилуия а в третьи приглашали Слава Тебе Боже.

И тако от сих малых свидетельств яве показуются нынешнии новопредатели древним православным грекам противнии, и уставом их благочестивым раздорники, яко греки тако и россияне, наших же прежних патриарх и митрополитов, и всего освященнаго состояния российскаго. священное сословие, и согласие с древними православными греки, апостольскими и отеческими догматы красящеся ясне облистовается, и истинна светлеется, а ложь лживых объявляется.

По сему же и в прочем новопредании, нынешних законников познаваемо, и глаголы их новыя и свидетельства никоего вероятельства не суть достойни, по священному евангельскому словеси: иже бо в мале неверен, и во мнозе неверен же есть.

[О Кресте Христовом]

Прииди ныне днесь божественный пророче Исаие, рцы нам по дару благому данному тебе. возвести елика ти Дух Святый прежде многих лет пришествия Христова откры. с треми древами или двема, слава ливанова приидет в новый Иеросалим, зане о сих нам с новыми философы прииде слово, воструби богоглаголивою ти трубою, и не замолчи Божия ти откровения. Исаия 60. Отверста рече будут врата твоя Иеросалиме выну день и нощь и не затворятся, ввести к себе силу язык и цари их ведомы. иже тебе не послужат запустением запустеют. и слава ливанова к тебе приидет с певгом и кедром и кипарисом прославити место святое Мое. Сия пророческая словеса протолкуя святый Григорий Амиритский, в беседе 3 с Герваном жидовином. глаголя сице: и слава ливанова к тебе приидет, сиречь высота крестная, поистинне тамо соблюдается, кипарисом певгом кедром рече вкупе прославити место святое Мое, и место ног Моих прославлю. Зде Ерване внемли известно истинное разрешение глаголемых глаголют, крест Христов, от кипариса и певга и кедра сложение имать. ибо простое его от кипариса бяше, прекое же его от певга. подножие же от кедра. и сице убо отдалече разумевше Духом Святым пророцы прорекоша. и прежде всех Исаия прорече о сем, ибо место ног Христовых подножие есть честнаго креста еже от кедра быти прославися. Что глаголеши о пророче, яко слава ливанова, сиречь высота крестная к тебе придет с кипарисом и певгом и кедром. в трех древах высоту крестную объявляеши нам быти, противно премудрым нынешним архиереом, иже философскими словесы в дву древах уставиша славу крестную юже и прославляют и на просвирах знаменуют и на поклонение поставляют. ты же толь с крепостию предаеши таиньство, яко исперва глаголеши к лицу новаго Иеросалима, в немже службу крестную в трех древах пророчествовал еси, иже тебе не послужат запустением запустеют. где ныне высокоглаголивыи ритори новых сих времен, да рекут противо пророческих уст великаго Исаия, почто не в дву древах высоту крестную приходящии в новый Иеросалим, рекше во святую церковь пророчествовал. но в трех древах Параклитовым вдохновением объявил есть. О ней же высоте крестней, и другий царственный пророк пророчески вещает: Возшел еси на высоту, пленил еси плен, и дал еси даяние в человецех. А понеже проческая уста Божия есть уста никакоже лгут, объявляет убо и пророчествованная от них, искупленная кровию Христовою присная невеста Его, сице вещает, иже во Охтае гласа 7-го в среду на утрени в седалне являет: Церкви вопиет Ти Христе Боже на певге и кедре и кипарисе покланяющися Тебе. И аще в трех древах покланяется Христу, возлюбленная его невеста по проречению богогласных пророк. почто убо в дву древах сии точию предают, да аще мощни пророческий глас преодолети, школними своими науками, или некуды некако обвести яко же им есть обычно. Но обаче укрепляет ны Павел сосуд избранный, глаголя: блюдитеся, егда кто вы будет крадоводя философиею и тщетною лестию, по преданию человеческому по стихиям мира сего а не по Христе. Но истиннолюбне а не сокрадая разум да возвестят нам, почто пророческим гласовом и збытию их, рекше Христову распятию противно творят, ясно бо вем многая богословцев писания являют, яко же церковный глас вопиет, во Охтаи в пятом гласе 3, на утрени седален: на кипарисе певге и кедре вознеслся еси Агньче Божий, да спасеши иже верою поклоняющияся волному Твоему распятию. Но убо глаголют нам, кая нужда им повеле пророчески провозвещенное, и Христовыми ногами освященное Христа подножие не творити, в крестных образех, и в самом тайнодействии великом тела и крови Христовы, которая богословская тайна тем третиим древом отъемлется, и того бы ради аки непотребно да отставится, или паки да объявят нам отъятием того третияго древа. которая тайна церковная у них исповедается, яко им толь нужно отъяти понудило то третие древо, яко не пощадети все царство Никону патриарху смутити, и безчисленное кровопролитие ввести, зане до него трисоставный крест Господень на поклонение и на просвирах воображаем бяше. Кое ему ясно да покажет божественное писание запретило на просвирах и на поклонении трисоставный крест Господень отъяти, и понудило двудревесный положити. И аще ли утверждаются таковыми школными науками, на приношении на просвирах двудревная печать имети, третияго же древа никако им прияти, иже пророком прореченнаго, и Христовеми ногами освященнаго, и церковию объявленнаго, еже есть подножие креста. То будет от них тако нечто показуемое: или яко пророк солга, и прибавил в своем пророчестве третие древо, еже им не угодно, или другое некое умышление покажется, яко Христос не добре на трех древах распятся, зане им нынешним архиереом не любезно, в трех древах святаго приношения просфиромисати. Или третие козньствование их будет, яко пригвожденными ногами к подножию спасения не сотвори Христос, но всуе и туне пречистыя Его ноги за ны пригвождени быша. И якобы сего ради не имеют нужды во образе крестнем, третияго древа подножия имети, якоже и многажды глаголют яко то древо не нужное. И что сея дерзости будет нечестивейшее когда, иже возносящиися не на дравы точию, но и над самым Владыкою смеюще и устав Его крестной разоряти. и не по прилучаю как положенной, но честною и животворящею Его плотию, и предрагою кровию освященной и утвержденной. Но аще и многажды свое нововведение утверждают каковыми ни гласы не могут предолети великаго Исаия ясне их обличающаго, и в трех древах высоту крестную пророчествующаго. еже им будет жестоко противу рожну прати, вкратце сия тако речеся, да поне пророка слышав их обличающа, усрамятся и не здымают брови над древними святых отец догматы. Мы же единаго от пророк воспомянувше на другаго прейдем.

Что же и царьственный пророк царьски вещает. егоже не сами собою глас восприимем ведущи свою худость, таковых да не дерзаем, но с богословными языки, вкупе пророческий глас да воскликнем, противная убо устрашающии, стадо же Христово собирающии и много возвеселяющии.

Глаголет же преподобный Феодор Студит в неделю 3-ю поста, Соборник печатной, лист 404: Да бряцает убо Давыд духовная цевница воспевая она благовременная, возносите Господа Бога нашего, и кланяйтеся подножию ногу Его яко свято есть. И паки ниже. Днесь поклоняем крест пресвятый, и Христово воскресение благовествуя днесь поклоняемо есть. древо живопитателное. Которое повеждь ми о благословный языче, древо живопитателное глаголеши, и какому же и подножию Господню с пророком кланятися призываеши. еда к двучастному древу, егоже римляне возносят, егоже российстии новии архиерее на просфирах вместо трисоставнаго креста Господня имеют. егда и ты на тойже двучастное пророческое слово сводишь, ни рече, но что днесь тричастный крест поклоняем есть, и четвероконечно празднуют [днесь] радостно. Оле согласие пророкам с богоносными отцы тричастный крест поклоняем, а не двучастный, и четвероконечная празднует радостно. сиречь в четвероконечней вселенней пребывающии людие. тогда праздновали [людие] и поклонялися тричастному кресту Господню. о нем же и в Триоди в среду 4 недели поста, в песни осмой глаголет: Сей крест тричастный великий мал видением сый. и небес ширши есть силою своею, человеки к Богу возводя присно, имже благословим Христа вовеки. И паки. На Воздвижениев день честнаго креста на литии: Стих. Ты покров державен еси тричастный кресте Христов, освяти мя силою своею. яко да верою и любовию поклоняюся и славлю тя. Что убо яснейше гласов сих богопроповедников, или что согласнейше. пророк кланятися завещевает подножию ногу Господню: священнейший отцев лик, яве тричастному кресту Господню. на каковом распятся Создатель всяческих и Господь славы. со пророком вкупе кланятися и почитати завещевают, и силу и славу Его небес ширши богословствуют. и человеком тем освящатися и к Богу восходити объявляют. ныне же больше паки да посрамятся и умолкнут. иже в двудревной крест поклонение и славу установившии. подножие же Господня креста, яко от другаго пророка обличаеми, и от прочаго богословцов согласия. аще ли некая неверная искра омрачает умное око, и дерзает еще кто сопротив пророков и отцев глаголати. хотя новое свое предание утвердити. что убо таковый льстится исповедывая веровати в символех, и в Духа Святаго глаголавшаго пророки. Сам пророческим гласовом явный противник являяся. и иже от них Духом Святым прореченное животворящее от трех древ сложенное древо разоряяй и иное вместо того уставляяй.

К сим да воспомянем и третияго свидетеля от пророческаго лика, да пред двума или трию свидетели всяк глагол да верен станет. И первый убо высоту крестную в трех древах, в новый Иеросалим приходящу Духом Святым прочее. другий же поклонятися тому подножию ног Господних Параклитовым вдохновением завеща. како же и хлеб в каком древе тайно действовася будет тело Господне. Да призовется много плачевный и сладкий великий пророк Иеремия. егоже пророчество объявляя нам, да приидет божественный Златоуст. в Соборнике печатном в понеделник великий во втором слове, о иссохшей смоковнице. Сице глаголяй: Сие древо пророческим оком провидев Иеремия, жидов хотящих Христу соделати, и прямо лицу их рече глаголя им, приидите и вложите древо в хлеб Его, и сотрем Его от земли живых. Кое убо древо, и что хлеб рцы нам. о златоглаголивая богогласная уста. древо рече крест, хлеб плоть Христова. иже взем Господь хлеб, рече, се есть плоть Моя за вы ломимая во оставление грехов. коеже древо сие крестное еще повеждь ми освященно глаголиве, на сем древе рече крестнем руце простер, по воздуху парящия силы разгнав, без соблазна нам на небеси путешествие уготова. А яко распятся не на дву древах яве, но на трех на певге и кедре и кипарисе, по Исаии пророку, и по прочих вышереченных богословцех, являет же и Триодь в пяток 4 недели поста, на утрени песнь пятая: На кипарисе певге и кедре распныйся Сыне Божий, освяти всех нас. Подобне же и во Октаи в пяток глас 3, на утрени по 2 кафизме седален: На кипарисе певге и кедре вознеслся еси Агнче Божий, да спасеши иже верою поклоняющаяся волному Твоему распятию. и всему убо животворящем тричастном кресте. на нем же животворивая плоть, Владыки нашего распятся, по пророчеству Иеремиеву, и по Златоусту, хлеб тайнодействуемый бывает существенная плоть. такова же за нас, на том же кресте Его Владычня распятая. И не инем каким древом нам подавается, но тем на нем же распята бысть плоть Христова. Яко же и Иосиф епископ Фессалонисский в неделю 3 поста. в Соборнике глаголет. лист 399: Но о божественный кресте ангелом неизреченное зрение, человеком похвало. хоругвь царьская, яко душевну ти возглаголю, радостная же и победная нашему приносящу спасению. тобою врата райская затворенная паки отверзаются, тобою разрушися держава смерти, тобою ад сокрушися, тобою умерщвеннии животу сподобишася, тобою разбойник в раи ликует и радуется, тобою совкупишася небесная со земными, тобою разуе истинне, тобою крещения обновление дано бысть, тобою оставление грехов даровася человеком, тобою запечатлеся дар Святаго Духа, тобою церкви знаеми домове бывают, тобою тело и кровь Христову приемлем. Киим убо крестом повеждь нам о священнейший исповедниче и песнопевче, таковая и толь чюдная и преславная содеяшася таинства. и кий вышерекомый крест видим предлежащь, имже и тело и кровь Христову приемлем, понеже си рече множество священно и праведно, и любезно слово познахом, светлыми и чистыми сердцы, да целуем честное и животворящее древо, на нем же пригвоздися Христос Бог наш. и длани божественныя гвоздьми пронзошася, на нем же копием ребра прободоша Господа убийцы. Согласно убо пророку и божественному Златоусту, и сей священный муж и церковный краситель глаголет. и не к иному какову двудревному отсылает. но животворящий истинный крест освященный богомужною плотию Господнею, еже есть тричастный, сколь великих преславных таиньств подавателя богословит, вкупе и тело и кровь Христову тем приимати священно гластвует, и понеже времени приличну похвалными словесы знамение спасения нашего похваляет, рекше в неделю 3-ю святаго и великаго поста, в нюже церковь святая обычай имать, всем християном целовати тричастный крест Господень. того предлежащаго креста, в той священный день, святый исповедник похваляет, того а не иного кого, всех тайн святых подавателя священнословит, и многих и великих и неизреченных благих подаяний нам виновна. Оле величества тричастнаго креста предлежащаго, в крестную неделю на целовании в церкви, и во вся времена освящающаго человеки, кто бо видя крест животворящий тричастный, и не познавает в нем распятия Христова. кая ли душа видяй пречистое древо, и не внимает умныма очима на нем повешена бывша Царя славы, и не припадает к тому со многим сердца сокрушением, зря древо на нем же рапростерто бысть животворивое тело Господа Спаса. видяй другое прекосложенное, на нем же распростерты пречистыя длани Его. зряй третие сложенное на нем же пригвождени быша пречистыя нозе Господни. Хощет ли познати кто есть на нем распятый, да зрит на том тричастном кресте в высоте дску, иже во время распятия Христова бе прибиена. Иоанн зачало 60. Матфея зачало 113. Марка зачало 68. Во образ тоя дски святии отцы вверху тричастнаго креста равнообразнаго, от кипариса и певга и кедра сложенному дску полагают. на нейже или над нею написуют Царь славы. на преком же древе. на обеих концах или над ними IС XС, на подножии же или над подножием НИКА. еже во Алфавите толкуется победитель. Еже вкупе рещи оно подписание крестное. Царь славы. IС XС победитель. А яко истинно есть, яко святии отцы не двучастные кресты, но тричастные с верхною дскою или частию с вышереченным подписание, и на святых хлебех воображаху, и на поклонение поставляху. доводствуем свидетельствы, ихже от многих малая воспомянем. Устав святых отец именован от святых отец, Око церковное, избран святыми отцы от многих Типик: Иеросалимскаго, и Святыя горы, и от Студитова, и от многих святых отец, и от вселенских святых собор, и предан святей Божией церкви, еже исправляти чин той. В нем же на листу, в чине о панагии воображен животворящий крест в лицех, и с подписми его, имже хлебец пречистыя знаменуется. Образ его сицев, подобен тому образу и подписание в старопечатных евангелиях тетрах на краех. Иоанна в начале 46. Тому же подобны кресты Господни. и подписание им: Царь славы. IС XС. НИКА. на антимисах же и на водружалных крестех иже в Потребниках больших печатных в лицех напечатаны. Подобне и на распятиях древних царьственне и соборне свидетельствованных, якоже и в великом Нове граде на волховском мосту, всеми прославляемый чюдный крест, иже подписание своим сказуя, поставлен при царе Иоанне Васильевиче. таможе и другий крест при сыне его Феодоре Иоанновиче. и при них бывших архиереов поставлен имеюще на себе воображену распятаго Владыки плоть подпись на верхней дщице. Царь славы. на среднем древе IС XС. на подножии креста НИКА. Такоже подобно и преподобных отец наших Зосимы и Саватия Соловецких чюдотворцев, и Филиппа митрополита Московскаго, и прочих древних отец тоя Соловецкия обители, древле ставленныи древянныя кресты, окрест монастыря, и по островом, и идеже шествие творяху. якоже и в Шуйском селе глаголют, преподобнаго Зосимы поставленный крест. иже ветхостию многою паче златовидныя одежды являющийся. Вся те древле ставленныя трисоставныя кресты, подписание имеют на верхней дщице. ЦАРЬ СЛАВЫ. на среднем древе IС XС. на подножии креста НИКА. При всех тех древлепечатанных и ставленных крестах, копие и трость с губою, и под крестом гора голгофа, и глава Адамля воображены. Той животворящий крест Господень, и в просфиромисании печатию употребляху святии отцы. по вышереченным свидетельством святаго пророка Иеремия, и Златоустову и Иосифову, святых отец. яже во истиннем древнем благочетии в России до Никонова развращения. на мисалех всюду воображено имелися, еще же и при Никоне в начатцех его в Служебниках напечатан к просвиромисанию крест подобие имать сицево. [Крест четырехчастный в круглой печати. По кругу надпись: Се Агнец Божий вземляй грехи всего мира. На кресте надписи: Царь славы, IС XС, НИКА. С крестом: копие и трость с надписями].

К сим на окончание свидетельства, аки златозарною печатию апостольским гласом, Павла сосуда избраннаго печатлеем утвержение. не сами же собою и того глас рещи дерзнем. яко же и в пророческих учинихом еже есть незазорно свидетельство, святых протолкований утвержающеся.

Святый Григорий Синаит в крестном каноне икосом святовещает: Иже до третияго небеси восхищен бысть в раи. и глаголы услышав божественныя и неизреченныя, ихже не леть есть языки человеческими глаголати. Что к галатом пишет яко рачителем писанию прочтосте и разуместе, мне рече не буди хвалитися, токмо о кресте Господни, на нем же страдав уби страсти, того убо и мы известно держимся. креста Господня похвалы всех, есть бо нам спасение сие древо, оружие миру непобедимая победа. И егоже креста Господня держатися святый Григорий повелевает, паки того по сих в 8 песни похваляет: Древо жизни и спасения. древо безсмертия, древо разума древо трилюбезно, нетленно и не изнуряемо. крест трисоставный, честное древо. Троица бо носит трисоставный образ.

И аще толики и таковы пророческая и апостольская, и святых отец свидетельства, о трисоставном кресте Христове, яко же выше слово объяви. како убо ныне смеша явитися таковии, вместо того двучастное древо утвержающии. и противно толь богоглаголивых языков дерзы что законополагати. откуду же и каковы свидетельствы укрепляются. и что глаголют и что пишут, и что во свидетельство приводят. Ныне приспе время совлачитися к подвигом, на самая тех глаголания, ихже и аки паучинная ткания составленная, иже некрепких от мшиц уловляющия. и аще что и от божественных писаний привзятая, но и та накриво инако сказанная. Да внидем в полчище не от Ассирии ратовати ны пришедших, но аки от римолатиньскаго заблуждения востающих, не сами мы о себе философским каким кичением надеющеся, но крестною силою вмужившеся о Бозе Спасе нашем сотворим силу.

И в первых первопохвалная их книга Скрижаль да истяжется. да покажет же себе аще она со Христом и со святыми его собирает, а не расточает ли и ратует. Что же ли в той книге новии философи учители предлагают на листу 34-м, сице мудрствуют о кресте. и таиньство Троицы даде нам со образом креста, зане правое убо древо креста знаменует Отца вышняго. иже печется о нас живущих на земли. кривое же древо еже совершает, знаменует Того Сына и Святаго Духа.

Обличение1.

О сколь неприличен образ Святыя единосущныя Троицы изобразиша новыя мудрецы. к нимже благовременно есть рещи. Подобаше вам о человецы, отцем убо древним во всем последовати. и с священными их гласы и образовании славити Святыя единосущныя Троицы трисоставное Божество. аще ли изволилося почтити крестное таинство за ради иже на нем распеншагося Спаса Христа. и в нем показати изображение Троицы нпостижимыя, и тако бы достояло со священными онеми мужи. в трисоставнем кресте и глаголати и славити, якоже они богогласнии воспеша. В каноне крестном творение святаго Григория Синаита: Крест трисоставный честное древо, Троицы бо носит трисоставныя образ. И паки Триодь. во вторник 4 недели великаго поста. на утрени: Трисоставный крест яко троичный образ воспеваем. А не дерзати бы своими какими новозаконоположеньми раздирати ризу от вышния богословия истканную. ныне же с новым своим законоположением новое и неприличныя Святыя Троицы образование изглашаете.

Вопрошаеми же от нас поведайте нам, кто да вас от священнаго лика святых отец поне един в двудревнем кресте изображал Святыя Троицы таиньство непостижимое. якоже и мы вам показахом о трисоставном кресте како святии богословиша. И аще сего показати не можете. якоже и не можете. како не явное зде покажется ваше возношение возносящеися на разум Божий. и явное отлучение ваше от священнаго отеческаго лика. не почивающим вам на готовых их уставех отеческих, но аки над ними возносящимся, и самем новозаконополагающим, и ново излагающим. да еще и о каком непостижимем Святыя Троицы таиньстве. чтоже ли безместно и не страждете от тоя, своея отцем непокоряющейся дерзости. како бо и можете в двух древах Троицы таиньство изобразите. Два бо древа, два нечто изображают: а не три. аще ли же и концами тех древ понудитеся извещевати. и тех изчетается четыре. и четырьми концы четыре нечто изобразуется: а не три. И по тех вам изображениих, или двоица или четверица показуется, состав же в сложении дву древ един. еже есть совокупляяй два древа в едино. и тем такожде троичное число не считается. И в таковых неприличных Святей Троицы изображениих, сколь нечестиво и мерзско дерзати веществовати. истее же рещи раздирати Святыя единосущныя Троицы таиньство. Аще ли речете еже уже рекли есте, правым древом Отца знаменуете, пречным же егоже кривым назвасте, Сына и Духа назнаменуете, и сие ваше веществование, таково нечто показует, едино от двух безместное. или Отцу в дву состава разделяние, или Сыну и Святому Духу в един состав слияние. Аще бо оправдуеши, яже о Отце свое исповедание, глаголя, яко едино древо, един и состав Отечь образует, тогда в подобном того и другом древе, в нем же Сына и Духа знаменовал еси яве покажется от вас в Сыне и Дусе един же состав. Аще ли от сего брега избежати восхощеши и речеши: аще и едино прекое древо на два конца являет. имиже два состава Сына и Духа показуете. тогда паки в другий низбрег впадаете. зане и правое древо подобно прекому, два же конца имеет. и тако Отцова ипостась по вашему неправому изобразованию в два состава разделится, и в едином от сих низбрезе и нехотя погрязаеши, егоже сам себе за непокорение и не последование святым отцем ископал еси, и обретаешися во реченнем от пророка: ров изры и ископа и впадется в яму юже содела. Кая же вам нужда вопросим вас понудила еже не устрашитися, таково дерзостно веществование изглашати о Пресвятей единосущней Троице, а не отеческими паче гласы и образовании удовлятися славити и почитати тоя таиньство, отверзите нам свое сокровище. от коего вы понуждены в таковое дерзостное новопредание. Повежде нам кое у вас состоится таковым вашим новоначинанием, или вы от трисоставнаго креста хощете всяку похвалу помрачите, да двудревный он великою светлостию прославится, или во всем двудревное свое знамение хощете уподобити трисоставному кресту Господню. и того ради нудитеся на нем. чево не мощно богословити, паче же рещи досаждати Святей единосущней Троицы, не приличным тоя таиньству двудревным изображением. Или не весте за то свое дерзостное образование, и насилователное трисоставному кресту уподобление, кому вы приличны явитеся. ни ли оному. о нем же священный Ипполит папа Римский пишет: По всему убо хощет уподобится лстец Сыну Божию, и паки даде Господь знамение, иже в Него верующим честный крест, и той подобне даст свое знамение. Но по святому Ефрему рещи, прелестнику бо ему сущу невозможно есть подобитися истинному Пастырю. тяжек бо есть образом исполнь татьскаго гласа, и абие знаем будет яко чюждь есть. И како в Скрижали не познася неправедное мудрствование, но пред очима ума имущим и зело обличися. яко со святыми отцы вкупе не тщится уставлятися точию в их богословии, еже бы с ними вкупе рещи трисоставный крест Троицы носит, трисоставный образ. но любопрится не приличной тому образ уподобляти от земнаго и земли влачимаго своего мудрования. еже двема древами троичный образ знаменовати. Аще ли и обличена еще не хощет молчати, но чрез заступников своих лукавыя языки наймовати, не глаголю философския еже оправдати зле плетеное то мудрование. то да покажут нам ясне, кий от богоносный отец в дву древнем кресте богословил Святыя Троицы таиньство. яко же и мы показахом о трисоставном кресте. Аще ли показати сего не можем, но козньствовательными лжеплетении от чрева своего будут что сплетати, еже по пророку рещи, заблудиша от чрева глаголаша лжу ярость их по подобию змиину, и аще от святых не узаконоположено что будет кто глаголати, яко же Скрижаль в вышереченных дерзнула, то мы не сами собою отвещаем, но представим им достоверных обличителей, от священных правил сице глаголющих.

От блаженнаго Феодора Валсамона патриарха Антиохийскаго, от толкования его на правило 32 Карфагенскаго собора полагаю сия.

Пишет рече святый Игнатий, иже глаголет: паче яже узаконена суть. аще бы был и верный, аще бы и постился, аще бы и девственник был, аще бы и знамения творил, аще бы и пророчествовал, волк тебе да мнится быти в кожи овчей убийство овцам содеваяй. И аще священнии сии мужие не стыдятся, и таковых дарований духовных сподобльшихся, а дерзающихся глаголати паче законоположения богоносных отец, волками убийцами душам именовати. коль паче тех иже дале от такова жития постнаго отстоящих, и различными духи земнаго и тлеемаго похотения пленяемых. а дерзающих над небесными умы возноситися, и самем новозаконополагати и яже от святых узаконена. паче того глаголати и мудрствовати а не глаголю бесноватися. якоже и выше реченных показашася. Како не явныя волки таковии и убийцы душам человеческим, от священных онех отец, и показатися и обличатися будут.

Глава 2.

Обличену убо бывшу, яже в Скрижале о двучастном древе, неправедному мнению внидем к другому борению. яже воймя и осмой их книге Жезл мудрования. и узриши тамо. аще добре посмотриши новых ныне именующихся пастырей. не з жезлом священных онех мужей, Петра Алексея Ионы и Филиппа имеющи воображен крест Христов. но з Жезлом возлюбленных их внове ими устроенном, имеющим на себе змиино воображение исходящих, и с теми змииными главами пожрети непокоряющихся их новому преданию, зело яро дышущих, яже на листу 7, на листу 9, тоя книги, и на протчих тамо написанных узриши, емуже воображение слова в своем месте да вчинится. темже и нам християнскому согласию, иже богоносным древним отцем покаряющимся, и новинам никаким не внимающим. во утвержение себе же и прочим о Христе благоверным братии, во ответ же вопрошающим нас, по богоглаголивому апостолу повелевающему готовым быти ко ответу вопрошающих. тако же и противляющихся скутоватися и срамлятися. но аще останутся не разорены лукавством состроеныя главизны их, яже первее в Жезле, потом и в Увете еже о двучастном глаголемыя. возмнится от неких не внимающих яко стоят цела и крепка их свидетельства. И первие да сокрушатся лаятелныя зубы его, устрашающия многих своим бреханием, да познает всяк правоверный с ким оне брань творят. потом и на прочее счинение их имеемся. Что же ли глаголет Полоцкий: в Жезле лист 64, положено исперва обличение Никитино, 23. да по его же Никонову велению, в Служебниках на агньце Божии, вместо креста Господня, напечатан ляцкий крыж сице. [изобраден равносторонний двучастный крест с надписанием IС XС, НИКА].

Во обличение Полоцкаго.

Ибранный сосуд в первом послании к кориньфом во главе 1, написа сице: Слово крестное погибающим убо юродство есть. Еже праведне о вас о безумнии расколницы написася, се бо яве есть, яко объюродесте, занеже слово крестное, всего православнаго християньскаго рода красоту и похвалу хулите и ругаете; последователно же есть яко душами вашими погибаете. рцыте нам кто вы увеща, или прелсти, сицевым знамением божественным гнушатися. и крестом его не нарицати, непщую не ин разве побеждаемаго выну сим оружиям побеждающим диявола. И мало пониже. Чесо ради не нарицаете крестом, но странное имя ему налагаете крыж. И сия убо тако надхнен духом гневным, Симеон пишет, со многим иных словес наруганием.

Обличение 2.

И великий убо Павел, иже до третияго неба вознесенный, той к галатом пишет: мне рече не буди хвалитися, токмо о кресте Господни. [к нему же пррек в каноне крестном во икосе, святый Григорий Синаит] на нем же страдав уби страсти; о нем же кресте, в том же каноне пишет: Крест трисоставный Троицы носит трисоставныя образ. Видится убо яко Симеон несть Павлов ученик. ниже с Павлом Христово учителство собирает, зане Павел рече не буди хвалитися точию о кресте Господни, еже есть, о трисоставном. Симеон же, аки вопреки ему, хвалится другом двудревном, от них вместо трисоставнаго Господня креста на просвирах вознесенному. И аще с Павлом и со святыми согласно не мудрствуют, почто и Павловы речи таться крадет, и погибающими древняго благочестия истиннаго християн именует, и юродством слово крестное им винословит, за негоже тии кровь свою проливают. А помале обратится болезнь его на главу его. Ныне же в лице ему слово обратим: ты убо о Симеоне тех всех кии аще узрят двудревняго креста вместо животворящаго Господня трисоставнаго креста возносима и почитаема, и именуют его крыжем, укаряеши и расколниками и погибающими, и дияволом прелщеннными именуеши: Кто убо суть сии давшии ему странное именование крыж? Точию ли иже ныне от вас мучими и гоними, за древнее истинное благочестие християн? И аще бы токмо тии менши быти студ продерзателю был. аще ли до тебя и до нас при святых отцех наших и чюдотворцех руских в православных церквах, тако во святых книгах прочитаемо было. где тогда явишися своею дерзостию. И да слыши яже покажем ти.

От жития иже во святых отца нашего Ионы митрополита Московскаго. О Исидоре митрополите отступнице. Имать сице.

Пойде он Исидор к собору в Рим к папе рекше о укреплении нашего православия. шествие же творя чрез немецкую землю, и егда прииде в Ригу. сретоша его православнии, носяще кресты честныя, воздающе ему честь, яко же подобает святителю, капланове же от божниц, сретоша его с крыжы по своему латынству.

К сим. Что речеши о Симеоне, или и зде яко аспид глухий заткнеши уши свои, и не слышиши гласа церковнаго яве тя на истину научающаго, виждь разделение честным крестам с крыжы. И не смешай несмесная, но разделяй ложь от истины, познавай яко православнии не с крыжы ходят, но с честными кресты, с крыжы же сретают, не православнии, но капланове по своему латыньству. Что же ли оный овчеобразный волк Исидор творит тогда.

Он же [рече] остави святую православную церковь, и святыя иконы, и честныя кресты презрев, пойде в божницу латыньскую, и с протодиаконом своим Григорием черньцем и приникше римски. Бысть же тогда с ним много православных мнихов и мирских. и начаша ему со слезами глаголати о сем. он же мирских человек предаде многим мукам, мнихове же заточи по местом.

Оле безместия. Пастырь мутным питием латыньства упивается. Овцы же трезвостию християньства вере укрепляются, архиерей сый, честные кресты презирает, и к латынским крыжем и к прочему нечестию их преклоняется. А овцы Павловым гласом укреплены, еже ни о чем хвалитися точию о кресте Господни. и пастыря со слезами от латынства отводят. Но пастырь пастырьскую кротость, евангельски данную от Господа отмещет, и волчее зверообразие и кровопроливаемое мучительство приемлет. Что же по и сих творит, не Христов, но дияволь ученик во Флоренции с кривоучительным папою сложися. и оттуду во светящуюся благочестием Россию с помраченным латинским учением прииде еже вкратце и в вышереченнем житии объявляется, пространнее же поведает Симеон священноинок суждалец, иже с ним тамо самобывый, и от него многая зла пострада. егоже чюдотворец Сергий от многих напастей чюдотворне избавляя. и явлением своим повелел в России православным ему Симеоном поведати со дерзновением буйство и нечестие латинское. о чем в чюдесех святаго Сергия в книге его яве сказует. но не умолча он священноинок, но яве во истории своей о всем неправом и мучителном соборищи Флоренском, и о ревности православных тогда греков, и ясне поведает. яже краткости ради ныне оставляем, точию о предлежащей вине скажем, яже тамо написано сице.

В лето 6949. Прииде Исидор митрополит из собора из флянской земли, и от папы римскаго Евгения на Москву, к благоверному и великому князю Василию Васильевичю белому царю всея России, с великою гордостию и неправдою и буйством латынским, нося пред собою крыж латынский, и палицу сребрянну, крыж нося в креста Христова место, являя латынскую веру. а палицу нося гордость и буйство проповедуя латынское. аще ли кто не приклякнет ко крыжу, того палицею велит ударити, якоже у папы творят. и папа даст ту область Исидору, латынской и немецкой и литовской закон.

Аще не приклякнутся к крыжу православнии християне, и христолюбивии князи, сим что речет Симеон, или ину кознь воздвигнет противо тацех достоверных мужей, священноинок Симеон по благословению преподобнаго Сергия со дерзновением проповедает, и являет про отступника Исидора, яко от еретическаго соборища фряжскаго и от наместника злодеяния того папы приносит крыж латинский вместо креста Христова.

В житии святаго Ионы являет, яко христиане исходят со кресты честными, капланове же от божниц со крыжи. Списано же тое житие святаго Ионы, по повелению благочестиваго царя Ивана Васильевича, и по благословению преосвященнаго митрополита Макария.

В лето 7058. И прочитаемо оттоле в соборней апостольской церкви.

И бяху в то время и после велицыи святии мужие и чюдотворцы Гурий и Варсонофий Казанскии чюдотворцы, и Филипп митрополит Московский, настолник вышереченнаго Макария митрополита. иже и во всем Макариеву нраву подобяся. якоже в житии Филиппове пишет. яве якоже и житие Ионы митрополита, иже и во всем Макариеву нраву подобяся. якоже в житии пишет Филиппове, яко и житие Ионы митрополита на память его святую прочитали. в нем же крыжи от честных крестов отделяет. и ясне крыжами именование дает. Симеон же Полоцкой за то именование на тех зелною яростию, аки от ада преисподняго дышет. и аки пес бесноватый дерзает раскольниками и погибшими, и дияволом прельщенными лаяти, сам раскольник святым онем и ратник и дияволом прельшен. И воистинну погибшей, яко отпадый от части святых выше помянутых чюдотворцов, ученик и сын дияволь, яко от него научаем хулити святых. и послушник и друг Евгения папы. и Исидора митрополита вышереченных отступников, аки с ними едино знамя крыжа имея, и на истинное православие дыша. К нему же и речем ты еси иже исперва в богомерском своем сложении Жезле в начале рекл еси: Исходим с Жезлом сим. [сиречь с змиеобразным] аки Давыд на Голиафа, и призывал смотрети тоя твоея храбрости. Пришедше же ныне и познахом тя. и не яко Давыд, иже заповедал поклонятися подножию ногу Господню, еже есть тричастному кресту, но яко Исидор отступник от сатанина и еретическаго папежскаго учения, с крыжем латинским исходиши. и на Голиафа ратуеши окаянне. Но полк святых онех вышереченных со благочестивыми цари и патриархи, и с протчими благочестивыми християны, в них же церковных собраниих ясне друга твоего Исидора отступника, и протчих слюбовников ваших каплановитов, иже с крыжи латиньским своим заблуждением, а не якоже православнии со честными кресты службу свою деют. Ты же за то что крыжем именуют погибшими нарицаеши, и слово крестное им юродство блядеши. сам юрод сый и погибший и ратник кресту Господню трисоставному. не воздавая ему достойныя чести, но нарицая его осмоконечным, каковым именованиям никто от святых не нарицал, хотя его лишити четвероконечныя силы, иже ему распныйся на нем подаде. и двучастным крыжем латинским словом соединяя, делом же и той ему чести не дая. но трисоставный от просвиромисания отметая. двучастной же на онаго место полагая. Воистинну тебе юродство слово крестное, а нам со святыми древними сила Божия есть. и не Давыд еси якоже лжеши, но лаянием своим, яже доходит до святых, уподобился еси зверю оному виденному во Апокалипсии. во главе 13: Ему же дана быша уста глаголющая велия и хулная, и ему же дано бысть брань сотворити со святыми и победити их. Якоже и ты твориши брань со святыми Божиими змия еси лукавая, ей же и видение на Жезле вообразил еси, и подобно оной змий глаголеши, еже ясти от древа разумети добро и зло, и будете яко бози. Ты же различно виешися школными лукавствы повелеваеши от двучастнаго крыжа ясти, и за то обожение временный покой, и будущее царство лжеши.

Но мы трисоставным крестом Господним бием ти главу и сокрушаем жало твое, проклята еси от Господа Бога нашего, что к тому дерзаеши. осуждена еси землю ясти, да в сластолюбных и сребролюбных и славолюбных сердцах покоишися, что в кожю овчюю облеклся еси. и школьными пестротами украсилася еси, яко да избранных прельстиши. Совлекаем ти ныне одежду, показуем ти яве яко не с Моисеовым и Аароновым жезлом приходиши, иже на время точию змиею обратися. да египетских волхвов змиев пожрет. в твоем же жезле всегда видима змия якова образная прельстившая в раи прадеда нашего, и пожираеши иже незнающих лукавуства твоего ядом еретическаго твоего учительства. ратуеши же не египетских волхвов, но вкупе с волхвы духовнаго Содома и Египта яковы папежники, капланове, и с Исидором отступником на святыя Божия угодники, на древняя наши православныя архиереи. или скрываеши яд свой яко в лице на святых не хулиши. се ти личину лукавства твоего здираем, и объявляем тя яве, яко ратник еси и хулник святых, ибо они святыя наши православныя архиереи, и благочестивыя цари во уставе церковном повелели житие святаго Ионы, на память его марта в 30 день, прочитати в церковных собраниих, в нем же яве обличен крыж от капланов почитаемой. и иже от тебя ныне возносимой, и сила Божия именуемой. Ты же не могий терпети крыжем ему именования именующих погибающими, и от диавола прельщенными блядословиши. убо ли древнии благочестивии цари и князи и архиереи и чюдотворцы, за то что его латинским крыжом именовали, и погибшии и диаволом прельщенныи и помраченныи якоже глаголеши. ни помраченнии не знаеши их пресветлаго достоиньства ни своей помраченной видиши погибели. но свиния еси яко в лузе некоем или чаши, в школах меж латинскими языки науками лежавшая душею и обкалившаяся папежским дыханием. И изшед оттуду от плотьскаго мудрования зоблеши коварствы своими богонасажденный древняго благовери виноград, и яко инок дивий поядаеши, и яко буря некая гордяся над прежним правоверия Жезл змиеобразный послал еси. всем глаголал еси победи и победи, и никому и никому. уже против лукавства твоего противитися. ты бо рече крепостию силы моея наученныя в школах латинских сотворю, и премудростию разума моего отъиму пределы отеческия, и силу их благочестивыя уставы пленю, и вселенную всю объиму Жезлом моим яко гнездо, и яко оставленныя яйца возму. и не будет никтоже иже убежит мене, или отвещает сопротивне мне. Но се Владыка Господь Саваоф, смятет славныя вас школники. и высокоустыя укоризною, еюже святых укориша сокрушатся и смирятся. и падут высоции мечем оружием непобедимым креста Господня. прочая же чаша многоречия твоего падется. зане вознеслся еси паче меры плотьскою мудростию твоею. и похвалился еси уже Жезлом твоим всех противляющихся неправому твоему учению сокрушити. Темже и с пророком глаголем ти: что ся хвалиши в злобе силне беззаконием весь день, [жития твоего не ветхаго человека христоподобным терпением совлекался с похотьми, но филосовским учением] не правду умыслив. язык твой [от плотьскаго мудрования и от лукавства] яко бритва изощрена [сотворил еси в сказаниях твоих] лесть возлюбил еси злобу, еже лаяти на святых паче благостыни [еже бы по древнем святых благочестии поборати] неправду [противно святых] неже глаголати [согласно бы с ними] правду. возлюбил еси [от оныя реки исходящия от уст змиевых] вся глаголы потопныя язык льстив [крадуще истинный разум]. сего ради Бог разрушит тя. [составление козньствования твоего] доконца восторгнет тя [обличением от святых его писаний]. и преселит тя [идеже лукавне сокрадая разум писаний] от селения твоего и корень твой. [идеже лукавне укреплялся] от земля живых. [сиречь от святых отлучен объявиши, яко не единомудрствуя им. но противяся] узрят праведнии [еже о Христе благовернии, яже правду любящии от истиннаго сказания обличено коварство твое] и убоятся и о тебе возсмеются [слышавши тебе прежде хвалящеся зело, ту же побеждаема] и рекут сей человек. [Симеон Полоцкий] иже не положи Бога помощника себе. [еже бы со всяким беззлобием последовати древнему святых отец преданию] но упова на множество богатства своего [езуитския науки] и возможе суетою своею [гордыми тщеславными духи пленяем, правоверным же нам християном остает речение]. аз же яко маслина плодовита пребывах в дому Божии. [в древнем во истинном благочестии. ничтоже подвижна от святых отец положенных].

Обличение 3.

Зане еще ты же рекл еси не точию осмоконечный целуем, но и сей четвероконечный почитаем, коим гласовом отеческим и зде последовал еси повеждь ми. еже трисоставному кресту Господню именование осмоконечным даеши. Кий поне един от множества полка богословцев отец дале такое именование кресту Господню, еже зватися осмоконечным? Аще ли от святых такова глашения не обрящеши? яко же и не обрящеши, бием ти и зде крестом Господним зубы, и сокрушаем челюсти твоя, да покажется внутрь под чернилом лежащее злохитрство твое. зане не от источник израилевых святых мужей древних славише Господа, но весь день луквству поучил еси язык твой. И аще бы кто от нынешняго рода простотою какою тако назвал, милуя его учити бы подобало. Ты же яко же сложение твое являет тя, горда мудреца, и всяким коварством кующа. еже годствует матери древняго благочестия церкви, с Павлом о тебе рещи дастмися пакостник плоти моея [сиречь гонимых христианом] аггел сатанин да ми пакости деет. И толь таков умудряяся, како и чего деля не глаголал вкупе со отеческими гласы, трисоставным или протчими их глашении крест Христов. но осмиконечным нарекл еси, ни ли того ради сключал еси, да яже он в трех составех носит Троицы трисоставныя образ. таже и четвероконечную силу, да ты тоя его славы улишиши, на двучастней же коварне некаково преведеши, яко же уже и сотворил еси. и четвероконечней силе его впредь обличен будеши, о образе же троичном егоже во двучастном насилием образовати дерзнули уже обличени суть. Или мнитися ти мало нечто прегрешение, еже чрез предел святых отец крест Христов осмоконечным именовати. не веси ли крестныя славы, сколь она препрославлена, яко же поведает Иоанн Дамаскин в книзе. Глава 12: Похвала наша и главизна, всех благих крест. Сие древо пречестнейше на нем же сам Христос на жертву вознесеся, освященно прикосновением святыя плоти и крови тамо же. Всяко убо делание и чюдотворение велико и божественно и дивно. Но всех есть честнейши ему крест. И ты убо к такому великому таиньству приразитися, своеволным ти именованием чрез предел отеческий смел еси. Не убоялся еси и в сих якоже и в прочих за приложение соборных клятв, яже светлым гласом вопиют: Мы законы церковныя соблюдаем, мы пределы отеческия храним, мы прилагающих нечто, или отъемлющих от церкве проклинаем. Ты предел их разоряя, еже о трисоставном кресте, и аки в впреки им осмиконечным именуя. како же и клятвы отеческия убежиши за твою дерзость, а сам сколь яро о двучастном древе стоятель не терпя ему именования крыжем, еже християне не сами собою именование ему то дают; но древними отеческими гласы зане от латынь и капланов и ляхов вместо креста Христова почитаемаго. тем же их языком польским тако его именуют. И за то колико хуление отрыгнул еси, еже обратилась болезнь твоя на главу твою и на верх ея неправда твоя возшла. и исполнися писанное, праведник от сети избавится в него же место предается нечестивый. но обаче и зде якоже и в протчих в сети своей увязает Полоцкой. Глаголет бо: не точию осмоконечной целуем, но и четвероконечному поклоняемся. два креста яве известил во своем новозаконении. Вопрошаем же которым крестом диявола хощет побеждати и хвалитися паки о коем, аще ли о Христове кресте еже осмоконечным назвал. то почто другому кланяется и силу Божию его именует. аще ли двудревным возмудрствует диявола побеждати и об нем хвалитися. то почто лицемерить, и Христов крест трисоставный целует и кланяется ему. а самому уже стал не надобен ни на какое пособие. Аще ли речет яко обоими крестами диявола побеждает и хвалится. и яве и зде покажет себе яко несть Павлов ученик, и не хвалится с Павлом о кресте Господни, рекше о едином, но о дву крестах. о Христове егоже назвал осмиконечным, и о другом дву древном. и воистину слово крестное погибающиму Симеону юродство. нам же со избранным сосудом о нем о животворящем кресте Господни хвалящимся сила Божия есть. имже побеждаем диявола. да и послушника его Симеона Полоцкаго, аки зело поучившагося древние святых пределы отвергнути.

4. Но паки Симеон защишая двудревняго креста. доводит яко сицевым воображением креста Господня, вся тайны церковныя действуем. и исчитает крещение, священьство, супружество и прочия тайны, и сами ся глаголет знаменуем и иныя благословляем словом, рекше вся священная действуем, четвероконечнаго креста образ творяще.

Обличение 4.

Есть сребро и есть олово, видение их обоих белеет, естество же их разньствует. и паки краснеет злато, краснеет и медь, но естество их разньствует. Сице убо и в наших благочестивых тайнодействиях, и в ваших знаменованиих, видится у нас во истинном древнем благочестии архиереи и иереи благословляли. вся тайны на священии, и мы на себя знаменуем крест Христов четверократно. и вы ныне благословляете и знаменаетеся четверократно же видение обольщевает. веры же исповедание различествует. и мы убо везде знаменуем крест Христов, на нем же волное распятие претерпе. еже есть трисоставным. четверократне же покладаем высоту его и глубину и долготу и широту, непостижимую его четвероконечную силу, знаменуем еже имеет трисоставный крест Господень. Вы же такоже четверократне уподобляется знаменовати, но инако не отцепреданне персты слагаете, и исповедуете не в трисоставный крест Господень знаменовати. но в два простыя сложенныя на крест древа и в концы его ограждаете. аще и приписуеши ему ты Симеон четвероконечную непостижимую силу. но яко о сем лжеши, помале о том обличен будеши. а яко мы той крест Христов, на нем же Он распялся, на себе воображаем доводим от писания.

Святый Ефрем в слове 102, пишет о кресте: Без него убо ничто же начинаяй ниже кончевай, но и спи и востая и делая, и в путь шествуя, аще и по морю плавишися, аще и реку возишися, и вся уды своя животворящим крестом утверди, и не приступит тебе зло, сего бо видяще противныя силы, потаяющыя отъидут. сей бо вселенную всю освяти и свет наведе. И паки помале. Сей есть водружен на месте лобнем, и абие прозябе гроздь жизни нашея.

А яко не двучастной водружен бысть но трисоставной крест, на нем же Господь распялся, ясне о том прежде показано в 1-м слове, и яко тем крестом Господним, вся тайны содеваются, яже по нас пишут святый Златоуст. Феодор Студит, Иосиф Песнописец, Иоанн Дамаскин.

В древнем истиннем благочестии, и у нас убо по святых отцех богословцех, вся тайны церковныя животворящим крестом Господним, на нем же Он распятся освящаются и на себя того же непобедимую силу знаменуем. А ты же убо Симеоне, егда рекл еси не токмо осмиконечный целуем, но и четвероконечному поклоняемся, и пишеши впреть яко тем твоим четвероконечным вся тайны вы содеваете, а его же назвал осмиконечным, того и оставил яко тем ничего не действуете, и ясне себя показал еси отлучена от лика святых отец и от силы животворящаго трисоставнаго креста, на нем же Господь распятся. Яко же вкупе со святыми того креста Господня, над тайнами своими и на себя не воображаеши, но всяко свое действо и тайны крещение и покаяние, миру и маслу помазание, священьство и брак, и еже рукою знаменование двучастному древу, его же четвероконечным назвал еси, ему заключил еси. Какого Исидор отступник принес от фряжскаго соборища крыжа латинскаго, вместо животворящаго креста Господня, ты к тому не яко Исидор на колену приклякнул, но всеми церковными тайнами к нему припал, и в нем заключил все своея веры таиньство, и таковым твоим исповеданием, и зело ты нам объявил каково ваше крещение и рукоположение и миропомазание, и прочия тайны. Во иных убо много потился овчину наволокая на своя действа, зде же сам овчину совлек волка убийственное внутрь объявил, еже ваше крещение и рукоположение и прочия тайны, от лет Никона патриарха, егоже число 666 лет не бывают священы крестом животворящим; но от двучастнаго крыжа истекают. И како бо вам и возможно двема персты не знаменающимся, в них же исповедаются два естества Христова, страдавшаго на кресте своею плотию. тем же якоже ты сам себе показал, что от святых отец отделился, зане не действуя с ними вкупе тайн своих животворящим крестом Господним: но двучастным уже вера твоя вся назидается. Отделяемся и мы от вас, и от ваших всех тайн, да в едином лице с богоносными отцы будем, ведуще известно великаго учителя Златоустаго глаголюща, яко без креста егоже нам Бог даде на крещение ни литургия не бывает, ни ина кая духовная вещь. Но аще ты и приуподобляешися своими действами, яко олово к серебру, или яко медь, по апостолу звяцая  к блещущемуся злату, но мы в златозарной проповеди со святыми отцы пребываем, и со апостолом глаголем, не буди нам хвалитися точию о кресте Господни, на нем же страдав уби страсти, и соблюдаем словеса Господня, словеса чиста, сребро раждежено искушено земли, очищено седмерицею, на вселенских соборах. Тебе же остаются медь и олово не драгое дело, да и сам погрязнеши яко и олово с мысленным фараоном во глубине преисподняго ада. зане на православных лаеши. о требуии расколницы, а сам расколник святым онем и отступник явный от них, и от силы трисоставнаго креста Господня.

Но убо помраченный прелестию Симеон, отверьсти правоверным, и истинно зрящим очеса велит их же и окаянными хухнает и показует на ризах архиерейских и иерейских и на иконах крестоначертание. виждьте глаголя образов сего креста святаго.

Обличение 5.

Есть животно пифик именуемое. нрав имать таков, егда видит кого орудием резательным что крояща, отшедшу же делателю та приемлет орудие оно резателное, и хотя уподобитися делателем тем дерзает пререзывати и травити, аще и многоценныя порты многажды и себе обрезыает. больши тоя дерзости творит Симеон, не имея нрава покорителнаго богоносным отцем. и яко облезьяна бросается в церковную их породу, пререзует предрагия их чиноположения, мняся мудр быти и философ. а не может разделити яже на ризах кротость начертая, и яже непостижимыя силы трисоставнаго креста Господня. Видеша убо видеша и издревле, о Симеоне, православныя наши архиереи, и ныне мы их ученицы правовернии людие на ризах архиерейских и иерейских крестоначертателные образы. но ниже им подписания творили, ниже поклонения якоже трисоставному кресту Господню. твори и ты такоже и никтоже будет обличая тя. и познавай коемуждо подобную славу. и не будет ти о сем преткновения. Кресту трисоставному писали подписание: ЦАРЬ СЛАВЫ. IС XС. НИКА. F яже на ризах крестоначертанию никакия надписи не писали. Священницы и диакони егда кажение творят людем, священником и диаконом, людие поклоняются. а крестоначертанием на ризах не поклоняются. А егда на святую пасху кадит с животворящим крестом Христовым, тогда людие прекрестяся кресту Христову поклоняются, таже и священнику не знаменовався поклоняются. Паки на Воздвижениев день в третию неделю великаго поста, и во иная времена егда церковь святая обычай имать покланятися и целовати крест Господень трисоставный, и пришедше поклоняются дважды, яко священницы тако и простии людие, и прекрестивше лице свое целуют животворящее древо, и паки поклоняются. А на наручиях же яже священницы имеют воображен крест, и егда в чиноодевании целовати наручия имут не тако обычай имут, якоже трисоставным крестом, еже тамо прекрестившися целуют и поклоняются, зде же на наручии прекрестив целует. Паки святыя образы святительския видим воображены, яже на ризах начертаны имут кресты и образу святительскому поклоняемся, крестоначертанием же не кланяемся. Виждь церкве святыя обычай, и не смешай несмесная. имей и ты на ризах и на поручиях священническая крестная начертания, но не приписывай им четвероконечныя непостижимыя силы, которую не он, но трисоставный крест Господень имеет. И убо во уставе святых отец на панагиарном тайнодействии крест трисоставный воображен, и с подписанием таможе во уставе для примет начертаны кресты, простым подобием, овы окружены овы же ни. да по них праздники разбираем, познаваеши ли сколько им силы и славы вместо точек, для приметы начертаны, да по них зрятся праздники. Не убо ли ты Симеон равнаго ради именования яже нарицается крест равную и силу приписываши. Но познавай убо коль велико и страшно Божие именование, по реченному: Бог есть огнь поядаяй. Паки цари земнии и началницы бози именуются, по глаголанному во псалме: Бог ста в сонме богов посреде же богов разсудит. И бози язык бесове именуются, и им же бог чрево именуется. И ради бог именования, не уже кто сбеснуется и равною мерою почтити дерзнет. Разумей и зде просто воображенной именуется крест, и трисоставный Христов крест познавай силу, един крест трисоставный Троицы носит трисоставныя образы, другой воображается во уставе вместо приметы чем праздники дознаватися. И сия убо в церковных чиноукрашениях благолепное коемуждо украшение подобие. Но паки да не возбесишися еже подкопатися к глашением святых отец и рещи, яко бы речех на ризах священнических был крыж латинский.

Являем ти. Пшеницу земля Божиим повелением растит на пищу человеком, никто ю гаждает. А есть егда просфира хлеб пшеничен же с крестом животворящим, тогда за святыню почитаем. А егда со влиянием вина священнодейством православно кафолическия литоргия приемлем тело и кровь Господню. А егда латыни от тоя пшеницы творят опресноки вместо священныя службы. тогда от тоя же пшеницы опреснок гаждению бывает достоин. и от святых отец нарицается мерзость запустения. И убо опреснок не естеством скверна кто его имеет, зане в домех людие пресно что испекше ядят не бывает во осквернение, но егда папежеве преслушавши Бога и святых Его вместо кислаго хлеба в священную службу внесли, тогда им тако бывает. Но убо и в древнем благочестии на священнических ризах кресты вышитые. никто их тогда и ныне от православных крыжем латинским именовали, зане то не латино-римскаго чина, но древлеправославно-кафолическия благолепство. А еже капланове встречали Исидора митрополита с крыжи по своему латиньству, и паки егда к Москве Исидор отступник приехал с папежским нечестием, нося крыж латинский вместо креста Христова, являя латинскую веру, якоже явихом во обличении втором, яве бо от сих словес что латинское капланов мудрование, еже просто крест сотворя от дву частей или древ кроме подножия и царьскаго подписания, якоже у них и в Полше бывает, и почитают его вместо непобедимыя силы животворящаго креста Господня. И зане от них вознесенной тако, сице их именем крыжем латинским именование даша святыя наши древние пастыри. И несть они за то гаждения достойны, но и похвал многих, яко умели чистого от нечистого разделяти. В древнем законе Моисеом впреки повешенную от меди сотворенную змию, во исцеление израильтяном от змиина угрызения, последи от израильтян кажением почитаемую благочестивый царь Иезекия разби. Глава 18. Несть он за то укорения достоин но и похваления. яко в тойже главе о нем пишет: И сей сотвори угодное пред очима Господнима, по всему якоже сотвори отец его Давыд. Творяху и наши отцы и чюдотворцы угодное пред очима Господнима. И еже имеяху на ризах священнических кресты, ниже подписоваху Христово к ним именование, ниже кланяхуся им. Егда же от латин от дву древ сотворенной крест, и кланянием почитаем, яко и животворящий крест Господень, тогда и они яко змию виющеся папежское мудрование разбиваху, не приимаху его вместо креста Господня, но латинским крыжем именоваху. Православныя иноцы и миряне кои со Исидором митрополитом отступником были в Риге, на ризах священныя их кресты никогда гаждали. Но егда капланове с крыжи по своему латиньству сретоша митрополита, токмо митрополит с единым протодиьяконом в Божницу их шел и приникнул, но они того не сотвориша, аще и муки и темничное озлобление прияша. о чем в житии Ионы митрополита писано. Тако издревле православно-кафолическия церкви сынове опасно сохраняли ризу церкви матери от вышняго богословия истканную. Полоцкой же древним благочестивым отцем не покоряяся, и сам яко и вепрь дерзнул внити в церковную породу, и прегрызует тоя благолепотне лежащие вещи, не зная в них коемуждо достоиньства. ино до инаго дерзает приносити. еже ему на осуждение и на вечное проклятие.

Статия 6-я.

Еще он Симеон мятется и глаголет, виждьте о погибающии людие в свидетельство приводит, крест святый древний именуемый корсунский [разумеетжеся якобы бывают запрестолныя кресты] и еще глаголет: зрите глаголю, каковыя кресты от начала крещения на персех своих обыкоша людие вернии носити не четвероконечныя ли. ей тако. како убо дерзаете крестом не именовати. и чести достойныя обнажати образ креста Господня. осудят вы в сем и малыя отрочата, оплюют простыя люди, и женеск пол безумию вашему посмеется.

Обличение 6-е.

Всяку кознь движет Симеон, всяко коварство кует Полоцкой, да смятет древле положенныя святых чины. еже достояше матери древняго благочестия церкви, и чрез уды ея православныя, с пророком рещи: на мя шептаху вси врази мои, на мя помышляху злая мне. слово законопреступно возложиша на мя. И паки мы речем, назирает грешный праведнаго и поскрежещет нань зубы своими. Господь же посмеется ему. Чтобы была нужда тако не полезно трудитися Симеону, аще бы слушал апостола глаголюща: в научения странная не прилагайтеся; и аще бы покарялся, и пророку глаголющу: не прилагай предел вечных, яже положиша отцы ваши; но аще и потщался и в сих скрадати разум, но како сими свидетельствы может утвердити свое новозаконение. Кто бо от правоверных не весть повсюду в церквах святых запрестолныя кресты с кругами, на них же воображено бывает распятие Господа нашего Исуса Христа на трисоставном кресте, и Пречистыя Богоматере и Иванна Крестителя, и святых апостол образы, или инде Спасителев, и пресвятыя Богородицы и святых образы, имже поклоняются православнии. И понеже не чим инем оправдати своего новозаконения, дерзнул внити и в таковая свидетельства. И время ти уже по твоему сему доводству и дскам четыреуголным поклонятся, или просвиры ими печатати, зане и на них воображенным лицам Господню и святых Его поклоняются християне. Еще же и на персех у християн честныя кресты не убоялся в помощь себе коварне привзяти. Кто бо от правоверных носил когда от дву древ равных крест состроенной, яков у вас на просвирах ныне? И ныне з доводством твоим оплюют тя самого простыя люди. егда не видят у себе на персех на сребре или не меди воображен трисоставный крест Господень, с великим богословным подписанием еже есть ЦАРЬ СЛАВЫ IС XС Победитель, и копие имеющь и трость страсти Владычни, и гора Голгофа, на ней же был водружен крест Господень, в ней же и глава Адамля изображена. и отвратятся от тебе яко лжива и блядива человека, яве и не тай на всех солгавша. Жены же твоему мудрованию зело посмеются; но и паче делателныя иже имеют у себе сосуды на прядение, делателныя два древа на крест положа да делают свое рукоделие, иже именуют воробы, и никогда их за святость имеют. Крест же трисоставный с копием и тростию его же на персех носят, вельми его умеют почитати. Ионы митрополита житие прочитали по святым церквам, в нем же являет как капланове стречали с крыжи по своему латыньству, и слушали того жития цари и князи, и никто тому нарицанию не смеялся и не ругался, до твоего ныне безбожнаго языка, ты ныне за то крыжа именование, и отрочатом отдал православных на поругание. Но надеюся яко и отрочата разсудят твое шатание. Обычай имут дети мирския несовершеньства ради возраста во играх упражнятися. Есть у них игра карты, едва ли ею и болшие когда играют, а на них есть на инех карточках крыжики, едва ли тому не подобообразны кроме подписи, точию которой у тебя в Жезле в лицех поставлен, ему же не любя крыжем именования со святыми ратовался, яко же вышереченных показахом. И егда оне услышат яко ты такое подобие силою Божиею именуешь, едино от двух за тобою безумие обрящут: Аще бы оно истинно сила Божия есть и величество непостижимое простое крестоначертание, почто попустили попиратися во игре детскими и голей кабацких руками, и еще пастырие на то и учинены да за злое кое дело запрещением и отлучением от церкви отсекают как христианом древняго благочестия никоего зла сотворших, ни играм каким внимающих тех тщаливи и сами духовныя кровь их проливати. и тщалив Симеон целую книгу на них коварне счинити, да их пред всеми омерзит, да ни от кого помиловани будут; а на сие единаго листа не пишет, егоже по егову мудрованию непобедимая сила Божия попирается. Аще ли простое крестоначертание несть сила Божия, то для чего трисоставному кресту Господню уподобляти не убоялся, и силою Божиею именовати не устрашился. А наипаче егда и отроцы услышат, яко в житии чюдотворца Ионы есть ему крыжем именование, и в протчих летописцех зело тогда оплюют, хулная твоя уста и не променяют на тя, аще ты и философским кичением надымаешися на святых Божиих угодников. Понеже не наказан был еси от школнаго учения, еже во всем отцем святым древним покарятися, на казнь бываеши от малых детей играния, еже ты сам над святыми древними чиноположении играти дерзнул, играем от детей бываеши, еже исполнится писанное: оружие их внидет в сердца их, и луцы их сокрушатся.

Состав 7.

К сим еще Полоцкой кует, яко стрелы коварство входит татьски и в церковныя книги, и яко мышь угрызует речения, дерзает же и святых глаголом и свой прибавляти да всеми образы украдет истинный разум, да состреляет во мраце правыя сердцем, и глаголет паки: Несте ли чли еже глаголет великий светильник и поборник православия святый Афонасий, крестному убо образу от двою древу слагаему покланяемся, иже на четыре страны разделяются.

Обличение 7.

И зде Симеон не устрашился вселенскаго учителя словеса развращая, и инако сказанная инако рещи, яко же и в Скрижали начальнейшии предатели новозаконения дерзнули, и тамо убо к вопросу 41. Еже к Великому Афонасию от Антиоха реченнем. Чесо ради вернии вси кресты равнообразны кресту Христову творим. В Скрижале же: Чесо ради вернии вси кресты убо вместообразны  кресты Христова творим. Понеже мы все вернии кресту Господню трисоставному на немже распялся равнообразны кресты трисоставные творим. Скрижаль же потщалася той разум скрасти, да вместо равнообразны креста Христова местообразны сиречь по их разуму двучастныи кресты предпостави. Еще же и в ответе прибавити смели к слаганию дву древ рекли и покланяемся. Симеон же и свыше Скрыжали дерзнул приложити сие глашение: иже на четыре страны разделяется. И видится убо сих новых учителей таково нечто потщание, и самая речения святых писаний пременяти и разум их. Аще где им краткоречения ради подкопатися приближайше скрадывати, не боится. точию да свой разум поставит, и отцем древнейшим да не последуют, и яко мудрейшии учители и исправители над отцы да любо почитаются. Зане и Афанасия Великаго к себе привлещи не устрашилися, аки бы и он им помогая, с прочими отцы разгласне завещал крестный образ не равен кресту Христову, но от двою древу слагати. подножие же креста и дщицу, аки излишнее отставити повелел. Но обаче помале узрим и самыя вопросы и ответы Великаго Афанасия. ныне же воспомянем к болшему укреплению, и ко изящному разумению о образе крестнем протчих святых отец повеления, отверзающая умныя наши зеницы, и наставляющая истинно разсуждати, и реченная от Великаго Афанасия.

Собора 7-го вселенскаго от сказания, книга Кормчая, лист 15: Тако бо честному кресту поклоняющеся, на нем же животворивое распростерто, бысть тело Господне, иже на очищение мирови кровь источи. И еще же и образу креста, имже беси отгоними бывают, и страсти исцеляются. того ради яже единою на первообразном сотворившияся благодати и силы, даже и до тех образов с подобным действом спроисходити. Зрится зде во отеческом завещании, в подобном образе крестном первообразному кресту Господню, с подобным действом благодати и силы спроисходити ясне проповедуемо. и о первообразнем убо кресте Господни, на нем же распят бысть, явихом уже вы в 1 слове, явим же ныне вкратце.

От Минеи маия в 21 день: Икос царю Константину. Константина вернии с материю почтем, иже пророка и тии словеса послушающе, на кедре и певге, и кипарисе тресложный крест уведеша.

Вопросиши. Како же ли начертаем будет крестный образ, дабы он равнообразен оному тресложному кресту Господню; то бы и именовати оного перваго креста Господня себе первообразным, к нему же бы они истинно виделися своим подобообразием.

Отвещаю. Преподобный отец Феодор Студийский в Триоди во вторник 4 недели поста во втором творцы. в песни 8 глаголет: Трисоставный крест яко троичный образ воспеваем, и поклоняющеся со страхом возопием. благословяще поюще и превозносяще Христа вовеки.

Зде объявленне. Высоким проповеданием церковь святая на всяком месте, идеже бывают православных собрания имеюще трисоставнаго креста иже покланянием и воспеванием в славу Христову чествуют его, а те все кресты трисоставныи. По объявлению святаго 7-го вселенскаго собора именуются образы оному кресту Господню, на нем же животворивое распростерто бысть тело Господне. зане во всем тому истинен образ и подобное равнообразие показуют, за кипариса, правым древом бывша правое древо, и за певга, пречное, за кедра же подножие, и за дску в верьху креста прибиенную дску в высоте. бывает истинен образ первообразного креста Господня. Сего ради и собор святый объясняет таиньство рече яже единою на первообразном сотворившияся благодати и силы, даже и до тех образов с подобным действом спроисходити. Что же ли от дву древ точию сложенный крест, может ли именоватися образом креста Господня? никакоже. зане не носит образа подобна кресту Господню. Како бо два древа трем частем кипарису и певгу и кедру, и четвертой части верхней дски образ могут бытии? или коим коварственным нравом кто двудревный трисоставному кресту Господню может уподобити? како ли первообразным креста Господня именовати двудревному будет? а ему двудревному неподобообразну сущу, но инообразну невоеобразну, да понудится ли кто насиловательным ндравом рещи, яко и в двучастном кресте правое древо кипарису образно, прекое же пречному певгу. Речем же и мы где убо в вашем образовании кедровой части подножию, и верхней части дски образование? не яве ли зде обличается, яко двудревный не имать подобна образа кресту Господню, и таиньства того силы сподобитися не может. и той убо яко же и образ его по Григорию Синаиту: крест трисоставный Троицы носит трисоставныя образы. От дву же частей или рещи древ сложенный, един состав имеет. како же ли может единем составом уподобитися трисоставному кресту, и трисоставной Троице образ носити? не могущу же убо ему сего таинства образовати. Яве яко сего и образ кресту Господню подобен нарещися не может. Смеет ли Симеон надеяся философскому кичению, и еще по сих брови вздымати и безстудне рещи, яко они двудревный начертавают во образ креста Господня. Приложим и мы глаголети нань паки обличения, яко стрелы да познает яко стрелы сильнаго. Владыки от церкви Его исходящия изощрены. нежели по земли повлачимыя и престающия мудрости века сего велеречие. Да услышит святаго Кирила Философа учителя словяном, яже он к Анию патриарху ересию иконоборною ослепленному беседовал. Вопросившу его Анию: Како кресту разорену сущу не кланяемся ему, ни лобызаем его. а вы аще лице до перси токмо будет, и иконною ему честь творяще не стыдитеся. Философ же отвеща. Четыре бо части крест имать, и аще едина его часть убудет, то уже своего лица не являет. К сим что отвещаеши, о Симеоне? видиши ли премудраго учителя рекша, аще от четырех едина часть от креста убудет, то уже своего лица не являет, а ты дву частей креста Господня подножия и дщицы не воображая. Еще же и прекое древо не подобно кресту Господню. но на среде права древа покладуя от среди человека руки не бывают, и распростертие на пречном изобразити неудобно. И тако противно Христову распятию творя, и святым отцем не покаряяся, явне о сих засвидетельствовавших, како нас увериши подобообразна его кресту Господню непщевати, и поклонением чествовати. Аще ли еще безместно что помышляеши, и вышереченная вся нивочтоже вменяя, якоже и еретиком есть, обычно обличающая их мимо тещи. надежду имея аки приближнейше ти коварствовати в Великаго Афанасия ответе. Прилагаем ти и еще свидетелство от божественных писаний. Да поне толикими аки облаки свидетелствы отвсюду обличаем позде некогда приидеши в чювство, и расмотрителне прочтеши Афанасия святаго словеса. И будут ти согласна со всеми инеми святыми, яко от единаго Параклитова вдохновения дышущих. Преподобный Иосиф Волоколамский в слове 7-м сице глаголет: И не точию тому единому животворящему кресту подобает покланятися и почитати, на нем же Христос распятся, но и всякому кресту иже во образе и подобии сотворен, оного Христова животворящаго креста, покланятися подобает яко самому оному, на нем же Христос пригвоздися. О сколь согласно богопроповедников глаголемое таиньство. яко и зде священнейший в преподобных отцех Иосиф егда завещавая кланятися, и всякому кресту и не постаси, но и наведе, иже во образ и подобие сотворен онаго Христова животворящаго креста. рекше по Григорию Синаиту: Крест трисоставный честное древо Троицы носит трисоставныя образы. И ты убо о Симеоне толиким множеству святых сопротив дерзати не убоялся еси. еже от дву древ крест сотворя уподобляеши трисоставному кресту Господню, и святаго Афанасия от лика множества толь богоносных отец отлучати не устрашился, и его речения ова развратил, у овых же разум скрал, тако новоучительство ево укрепляеши.

Гряди прочее на расмотрение самых словес великаго Афанасия. От послания ко Антиоху князю вопрос 41. Чесо ради вернии вси кресты убо равнообразны кресту Христову творим, святаго же копия Его и трости и губы равнообразия не сотворяем, свята убо суть и та якоже крест? Зде же смотри вопроса сего разум, опасно потом и ответ да расмотрится. Зри вопрошающаго разум: не вопрошает, да каким подобием крест творити, но уже извещает, чесо ради вернии вси кресты равнообразны, кресту Христову творим. согласно с прочими богословцы, и сей глаголет еже тогда бяше у них во святей церкви у всех верных, еже кресты равнообразны кресту Христову творили. понеже Христос распяся на кипарисе певге и кедре. и в четвертых верху главы Его бяше дска прибита, и вернии убо тогда вси яко же сказует вопрошаяй, тому кресту Христову кресты равнообразны творили, сиречь подобны тому трисоставные кресты, и о кресте убо тако поведает.

Состав, 8.

К сим же паки дерзает Полоцкой раздирати евангельское учителство украдает, и тамо истинный разум пременяет истинная речения, точию да отцем древним не покаряяся укрепит свое новоучительство, сице глаголяй: Подобне и в поучении евангелия воскреснаго, в главе о кресте на Воздвижение глаголет: Крест убо образ на четыре страны разделяется, и вышняго его праваго древа вышним рогом содержима суть. нижняя же нижним. посредняя же его двоими концами пречнаго древа содержима суть.

Обличение 8.

К нему и мы речем. Подобаше ти убо о человече яко же и прежде рехом, отцем последующе ничто же разумевати паче уставленных ими ниже собирати речения, о ином и ином глаголанная насиловати тех ко иному разуму да волю свою поставиши. и аще уловиши негде речение, еже крестный образ на четыре страны разделяется, или от праваго и прекаго начертания назнаменуется, абие умышление сотворив. на двудревной точию крест заключаеши, аки бы в трисоставном кресте Господни и не было праваго и прекаго начертания, и на четыре бы страны не разделялся он. яко же и вышереченных потщался еси. Да еще та речения ловиши, кая о самом том кресте речена, на немже Господь распялся и тех не убоялся еси, на свой двудревной коварне и лестне отнести. истее же рещи безстудствовати, почто же и яко мышь писмена огрызуеши и не чтеши. От начала учительство оно яже на Воздвижение. Яже свыше тамо глаголет, сице: Понеже бо пришел есть Господь понести еже о нас бывшую клятву, крестною поносною смертию умерл есть, како бы инако клятва была, аще не бы клятвенную смерть крестную приял. како ли бы нас призвал, аще не распялся бы, кроме бо распятия простертома рукама кто умирает. И паки ниже: Сего бо ради подобно Господь приемлет крестом смерть. крестный бо образ на четыре страны разделяем от посредняго знамения, вся показует, яко божественным естеством содержима, вышняя убо вышним рогом содержими суть, нижняя же нижним. посредняя же двоими странами, даже убо покажет Господь, яко той есть собираяй и содержаяй всяческая, сего ради крестную смерть приемлет. Видиши ли яко вся та речения о самом распятии Господни, о самой смерти Его, о самом том кресте на нем же распялся: того креста и глаголет на четыре страны разделяем, того креста вышняя вышним рогом содержима суть, нижняя же нижним, посредняя же двоими странами. и како не устрашился еси, сию непостижимую силу креста Господня, на двудревной приписывати. уже бы ты поне своих словес стыдился. сам первие образом его кресту Господню нарицая, аще и в том солга. ныне же и славу всея непостижимыя силы первообразнаго креста Господня совлекая, на неподобной же ему двудревной заключая. Оле твоего коварства человече и явнаго безстудия. рцы ми ныне на коем кресте Хрисос распялся? где дерзнеши солгати, и на двудревном рещи. не яве ли по пророку Исаии в главе 60. их же протолкуя святый Григорий Амиритский глаголет крест Христов от кипариса певга и кедра сложение имать, ибо простое его от кипариса бяше. прекое его от певга, подножие же от кедра. И сице убо разумевше отдалеча Духом Святым пророцы прорекоша, и прежде всех Исаия прорече о сем, ибо место ног Христовых подножие есть честнаго креста, еже от кедра быти прославися. К сему же от святаго евангелия познаваяся, еже верху главы Господней на кресте бяше дска прибиена. Ныне обличен еси яко крест Христов с подножием и дскою, на нем же Господь распялся. Паки вопрошаю тя како исповедаеши на четыре страны разделятися ему? и где ему исповедуеши вышний и нижний рог, ими же высоту и глубину содержит? Или речеши, яко же и рекл еси, вышняя убо праваго древа вышним рогом, и нижняя нижним. како зде не явный продерзатель обретаешися и прибавляеши сие речение праваго древа, чесого во священном евангельском поучении несть положено. праве о тебе рещися может: нечестивый пришед во глубину злых не радит. Зане и во иных смели преграду отеческих клятв прескочить, еже чрез их уставоположения убавити и прибавити. тако и зде не устрашился ко отеческому гласу свое речение, еже праваго древа прибавити. да тем прибавлением неведущих умы окрадеши, ведущии же рекут о тебе: с пророком несть страха Божия пред очима Его. И паки: гроб отверст гортань их языки своими лщаху. Но что убо бе умышленное клюкание твое: еже роги крестныя ими же содержатся вышняя и нижняя, глаголеши и мудрствуеши концы праваго древа. да на двучастной от вас вознесенной крест наведеши четвероконечную силу, яко же и дерзнул еси в Жезле, а трисоставный крест, аки бы не имея сего таиньства именованием осмиконечным прозва. чтобы его лишити четвероконечныя силы. Аще ли кто вас от писания догонит, яко сия вся рекошася о кресте Господни, на нем же Он распялся, того и четвероконечную силу именуют. Тогда ты со оного двучастнаго и не хотя вон сходиши, да в кресте Господни коварствовать начнеши концы верхной и нижной длиннаго древа рогами именуя, ими же глаголя содержит высоту и глубину, да покажеши коварством своим вышнюю дску и подножие, безтаиньственно, и не нуждно к нашему спасению, да убежите обличения аки ненужныя части отметаете. Вопрошаем же тя ныне: повеждь нам кое божественное писание, научило тя тако мудрствовати, еже праваго древа верхней и нижней концы те рогами именовати, ими же содержатся вышняя и нижняя? Аще ли от писания показать не можеши, яко же и многажды вопрошаемы, не имате что показати обьявляемы. Не имате что показати обьявляется, и зде от чрева своего лжу составляюще. Тем же и мы исперва обличивше ти ложь твою первую, и совлекше овчину прикровения твоего, и показавше тя яве татьски прескачющаго во двор евангельский, и речения реченная о самом кресте, на нем же Господь распялся, тя крадуща, и на свой двучастной преносяща обличившеся. Вторую ложь  юже от своего чрева отрыгнул еси речение прибавляя, и разум скрадая, и вопрошаем от писания свидетельства не приводиши. Гряди прочеее да евангелскою истинною разорим тму неведения, в нем ты яко во мраце состреляеши сердца незлобивых людей. Понеже речено в поучении на Воздвижение: Вышняя убо вышним рогом содержима суть. нижняя же нижним посредняя же двоими странами. Что суть вышний рог имиже вышняя содержатся, и что нижний имиже нижняя содержатся? Показуем, из Благовестника от толкования на Матфея зачало 113: И смерти же многообразны бяху. но крестом умирает Господь яко да и древо освятит имже прокляти быхом. и всю вселенную благословит, и небесная яже является высотою креста. таже и преисподняя яже подножием креста является, обоими странами креста, руки же простирает, да соберет и приимет чада Божия разсеянная. Ныне что речет Полоцкой со всеми своими послушатели мудрствующая нижняя нижним концем праваго древа содержатися. зде же явственне речено, таже и преисподняя яже подножием креста является. О нем же подножии святый Григорий Амиритский глаголет, ибо место ног Христовых подножие есть честнаго креста яже от кедра быти по реченному, яко место ног Моих прославлю сие есть.

Еще же и в подножии креста в Алфавите азбучном. Начало писмо червь. Вопрос. Что ради пишут у креста Христова подножие, десную страну подъемшую горе, а шуюю понизшуся доле. Ответ  за еже на кресте стоя главу преклони на десно, да преклонит вся языки веровати и поклонятися ему, того ради облегчи десную ногу, да облегчатся грехи верующим в Него в сретение Его. а шую ногу того ради отягчи, и подношку долу понизшуся. да неверующии вонь отягчают и снидут во ад. Тем же убо о содержании преисподния ясне объявилося от божественных писаний, яко та тайна в кресте подножием показуется нижним составом креста, идеже нозе Господни беша пригвождены.

Но убо от нижних пойдем на вышняя, яко же по лествицы ступающе, что убо вышний рог креста, им же вышняя содержатся. еже святый Феофилакт в Благовестнике высотою креста нарече, яве бо от нижняго рога и верхний объясняется. аще бо по толкованию вышереченных богословец нижний рог содержай нижняя, на конец праваго древа, но подножие креста, еже есть в кресте трисоставном нижний состав, объявленне и вышний рог на конец праваго древа, но состав его верхней показуется. еже святый Феофилакт именова высотою креста, имже содержит или благослови небесная, что же или и объясненнее сих свидетельств толь яве доведенных. Первое убо яко на нем же кресте на трисоставном Христос распялся, той содержит вышняя и нижняя и посредняя. сиречь на земли широту, и долготу. второе же яко не концами праваго древа тая тайна состоится, еже вышних и нижних содержание, но нижним составом и по нем показуется и вышним, и довлеют правоверным во укрепление, а противляющимся в показание и сия свидетельства. но ради безстудно дерзающих и по обличении шеперяти, или утверждшагося в них обычая, покрывало имеющим на очесах умных и не могущим здраве видети. да приидет к достойно верным свидетелем истинный свидетель растерзая всяко недоумение, и развевая ратующих всякое плевелосеятелство, великий Иоанн Златоуст, той в неделю крестопоклонную в пространном своем слове, о кресте глаголет: Кто зрит к сущей истинне виде яко образ с четырми слоги, от посредняго слога разделяем всю провидимую явльшагося на том силу же и промысл назнаменуем.

Зде внимай глаголемое. Златоуст четыре части или древа крестныя, четырми слоги именует. И считай же. 1. Слог. кипарис правое древо. 2. Слог. певга прекое древо, от негоже рече посредняго слога вся разделяем внизу. 3. Слог. от кедра подножие. Паки. Верху средняго древа. 4. Слог. прибиенная дска  А не дерзает кто и зде подкрастися, и рещи, яко Златоуст слоги концы нарече. но да зрит яве яко слоги древа нарече, егда бо образ [сиречь крестный] с четырми слоги рече. наведе от посредняго слога разделяем, посредний слог прекое древо нарече тако и другий объявляется, и на том от четырех слогов кресте явльшагося всю силу же и промысл назнаменует. Таже паки. Златоуст и того ради коемуждо слогу свояйшим именуется гласом, глубину глаголя, еже от среды долу и высота надлежащая. ширина же и долгота со страны протяженное совокупление обою, яко же семо от среды ширина, а еже отъинуд долготу нарече. Понеже ныне нам и от прочих богословцев, на конце же от Златоустовых словес явственно объяснилося, яко крест Христов трисоставной той в составех своих непостижимую силу имеет высоту и глубину широту и долготу, к нему же и Григорий Синаит рек четвероконечная сила: Отвещаем. В том же каноне в 8 песни, он же святый Григорий глаголет: Крест трисоставный честное древо, Троицы бо носит трисоставныя образ. К нему же и в 4-й посни воспевает: Твоя высота живоносне кресте воздушнаго князя биет, и глубина всея бездны закалает змия, широту паки воображает низлагая мирскаго князя крепостию твоея. Да постыдится же ныне иже смели дерзати, на двудревной крест приписовать непостижимаго креста Господня силу. не имеющу ему верхняго и нижняго состава, ими же глубина и высота содержится. ниже распятие Христово на себе воображати может, да не надеютжеся ныне на заступника своего Полоцкаго, зане ныне силою трисоставнаго креста Господня сокрушены ему зубы. аще и паки еще зинет усты своими. но прежде реченная свидетельства и объяснения святых отец, уже ему бывает под языком его труд и болезнь. нам же помощь наша во имя Господне, сотворшаго небу и землю.

Состав, 9.

Что паки от сокрушенных челюстей еще зинет Симеон подобне сему: И преподобный Никон бывый монах Черныя горы пишет в слове 50-м: Крестный образ написуется от прекаго начертания и праваго.

Обличение 9.

И зде подобно Афанасиеву речению. о нем же писахом во обличении 7-м. Тамо посылаем читателя. зде точию вкратце речем, яко крест трисоставный имеет правое и прекое начертание. о нем же и Никон преподобный рече. о дщицы же и подножии краткости ради умолча но не убо и отрече, ибо никогда от креста Господня не отъемлются.

Состав, 10.

Но паки еще древняя ложь помраченная прелесть шепчет Симеоновыми устами: Сице согласно и святый Иоанн Дамаскин в книзе 4 о православной вере в главе, 12, повествует, яко 4 край креста средним центром держится и состягаются тако Божиею силою высота, и глубина долгота и широта содержится.

Обличение 10.

Паки Симеон кует ложь, паки крадет речения, паки от распятия Христова на двудревный некаким коварством во мраце относит, дабы ему и оболстить людей ихже может. аще ли кто его обличит, чтоб прикрыть ему студ свой мощно. яко бы и отвратить ему слово свое, аще кто может познать лукавство Симеоново, тако он двоеобразне зде лукует. но обаче во обличении 8-м оба его сокрушены коварства, не много зде потребуем труда.

Состав, 11.

К сим еще Симеон послежде приводит конечное на срам себе, в помощь же благоверных свидетельство сице пиша: Тожде утверждает и святый Григорий Ниский в слове 3-м. на Евномия идеже приводит святаго апостола Павла. сицевая о кресте беседующа в послании к ефесеом во главе 3: да возможете разумети со всеми святыми, что широта и долгота и глубина и высота. еже святый Григорий на образ креста преносит. часть верхнюю высоту именуя, глубину же часть долную пречнее паки чрез оба конца, широты и долготы именуем знаменуя. Что сих свидетельств светелее, или что вернее быти может.

Обличение 11.

И мы ти речем зело свидетельства сия светлы но не тебе: Тебе бо погибающему слово крестное юродьство, спасающимжеся нам сила Божия есть. Како и зде мудрец сый, яве юрод бываеши, по подобию волчию всуе зинул уста своя, что бо ты рек Григориево свидетельство о кресте часть верхную высоту именуя. показал еси верхную дску, глубину же часть долную подножие явил, пречнее паки чрез оба конца, третьюю часть прекаго древа явил еси, четвертая часть длинное древо в нем же те три части утверждаются. на что яснее сих словес.

В книге их именуемой Мече на листу 400-м и на 401-м пишут: Двор сей Господень есть крестный на кресте созданный от древес четырех по описанию учителей, иже глаголют широту быти крестную, на нем же руце Господни пригвождены от древа финика, долготу на ней же висяше нозе пригвожденны от кедра. высоту же на нейже титле бе написан от маслины, яко исполнитися зде реченному от премудрости Божией чрез Сираха яко кедр вознесохся в Ливане.

Статия, 12.

Но или сими словесы хощет ны увещати, еже глаголет: Яко на просвирах не ино что токмо образ креста Господня написуется.
Обличение 12.

Вопросил бы Полоцкаго коего креста Господня образ на просвирах у них написуется. онаго ли креста Господня на нем же Он страда волное распятие, но той трисоставен бе, от четырех частей древа сложение имать, и односоставной трисоставному какой будет образ, не могущу же ему быти. почто и образ того креста Господня именуется. Тем же и зде яко лживый Полоцкой обличается составляя от чрева своего лжу: пространнее же о образе креста Господня писано в седмом обличении.

Статия, 13.

Что же по сих Симеоновых паучин соткание. Ведая свое неправое в прежних свидетельствах мудрование, нынешняго рода живых свидетелей приходит, яков же и сам упоен мутным пития мудрованием. Глаголет: вопросите честных иеромонахов от святыя горы Афонския приходящих, како у них просворы печатаются изначала; и приимете ответ взыщите от архиереов всего православия греческаго, и тожде услышите.

Обличение 13.

Писание глаголет: Вопроси отцы твоя и возвестят ти, старцы твоя и рекут ти. От сих словес мы научаемся древних святых вопрошати, и их учением святым ответ себе приимати. Вы же с новым своим преданием себе самех вопрошати повелеваете. еже есть нынешних архиереов, и монахов Афонских, кии несогласны древним святым отцем греческим и российским. Несогласие же их объявлено в начале сея крестныя книги. во объявлении 3-м. о просвирах же яко на них по святых отец преданию, печатию воображается трисоставный крест Господень, в 1 слове в 3-й явихом. вам же и ныне от устава святых отец, о нем же в предисловии его пишет: уже есть Око церковное избран святыми отцы, от многих Типик: Иеросалимскаго, и святыя горы, и от Студитова, и от многих святых отец, и от вселенских святых собор и предан Божией церкви. В сем Уставе во главе Чин о панагии. бывающи в монастырех по вся дни како выимается хлебец пречистыя, на нем же коим подобием крест животворящий воображается, в лицех напечатан образ его сицев. [Изображена печать с четырех частным крестом с копием и тростию, в основании голова Адама, надписан сверху дски ЦАРЬ СЛАВЫ IС XС]. И тако убо по преданию святых вселеньских соборов, и прочих святых отец и святыя горы, еже есть Афонския. крест Христов трисоставный печатию имеется. Нынешних же архиереов греческих и руских и афоньских монахов предание, повелевает воображати на понагии и на прочих просворах сицевым подобием [Изображена квадратная печать с двучастным равносторонним крестом. вверху надписано IС XС, внизу НИКА]. и яве познавается яко нынешнии архиереи и афоньские монахи, не согласны с древними святыми вселеньскими соборы и с Типики святых отец, и святыя горы Афоньския. яко с ними едину печать на просвирах трисоставнаго креста Господня не имеют. но имеют новую свою печать двучастнаго креста. юже от плотскаго своего мудрования положиша. какого во Ионе святаго житии, и в прочих древних историях крыжем латинским именует. о чем во обличении 2, сего слова писано и есть и познавается. и сие здание Полоцкаго, толико крепости не имущее яко и паучинным тканием уподобляющееся. аще кто точию не возрит в древняя святых отец священная предания, таковых разве уловляющая. а иже от божественных писаний просвещаемаго, тако не терпяща яко тлением новости своея на растерзание всем подлежаща. Кто бо от иже святым писанием утвержденный, не весть древних богословцов и отец достоиньства, и от них не восхощет научатися право, и незаблуждающею стезею шествовати, имже не время токмо много, и премудрость крайняя свидетельствует достоверное, но и жительство равноангелное, и над всеми сими всельшаяся в них благодать Утешителя, яже и безчисленными даровании тех просветила, и мимо их велелепнаго достоиньства, дерзнух бы утверждати свое вечное спасение на новых законниках, иже вчера и днесь прозябших, и саны своя точию богатьством и гордостию века сего, и многоценными трапезами красящих, и не покаряющимся им не христоподобною кротостию и терпением, но мучителным кровопролитием яродышущих. И толико отстоящих от духовныя благодати и премудрости, иже от небес в древних отцех обитаемыя, и равноангельнаго жития их и святости. яко множае прах сладострастие века сего престающаго привлачащи, да не глаголю по подобию скотов безсловесных, сладкопитанием и сребролюбием и славолюбием, пияньствы и инеми прилепляющегося. Но иже спасения вечнаго а не времяннаго желаяй, никакоже или прещением кто принуждает древних святых отец не внимати, нынешних же новопредателей с нерасмотряя послушати, аще что и новое противо древнему предают, зане яко архиереов и пастырскими саны одеяных. но утверждают ны Павел сосуд избранный глаголя, аще мы или ангел с небес благовестит вам, паче еже благовестихом анафема да будет. Протолкуяй же сия словеса Златоуст, и в болшее благобоязньство приводит глаголя: И не рече, аще противное возвестят или превратят все, но аще и мало нечто благовествуют, паче еже благовестихом, аще и худое что подвигнут анафема да будут. Но и священный собор Соединения сколь твердо основание церковнаго древняго предания блюсти завещавает, сице глаголя: Вся яже чрез церковнаго предания и учителства, и воображения святых и приснопамятных отец новосотворенная и соделанная, или посем содеятися хотящая. анафема. И убо апостольское и святых отец мудрование дерзновенно предает анафеме, иже и мало что в церковных преданиях смеющих новотворити. И аще по святому Иоанну Дамаскину: Главизна всех благих есть крест, и Христу всех инех чюдотворений любезнейший. И той крест трисоставный Троицы имеет трисоставный образ, и тем содержатся небесная и земная и преисподняя, и тем вся церковная тайны содеваются, и тем тело и кровь Господню приемлем, и той воображали печатию святии отцы, яко же и в прежних обличениих ясне объявлено. Каковой великой анафеме показуются достойни, иже в толь великую крестную тайну смевши согрешити, и вместо плотию Христовою освященнаго трисоставнаго креста, и равнообразнаго тому, и тоюжде благодать имеющаго, смевшии двудревный вознести на просвирах, и троичное образование ему приписовати, и глубину и высоту и ширину и долготу, с трисоставнаго креста Господня скрасти, и татским гласом двудревнаго облещи, яко же в 1-м слове и в 2-м в 13 обличениях яве показано, таковой же апостолской и святых отец анафеме подпадшии, како будут достоверни в небесе подобном церковном учении свидетели. Каковым ли безстудием и зде Симеон заключая, гнило строителное свое здание не устыделся к небоязнивым отеческих клятв дерзателем, новым века сего мудрователем, привлекати нас аки и детей. Или и зде не по притчи ли вещанныя стрелыя одежды. до приятия рук видением точию знаменующеся. в принятии же ни едино от краев крепящеся но гнилости ради своея, вся на растерзание готово подлежащи. и толико паче елико к другому краю ближайше терзаема будет. толико крепости объявися в мудровании Полоцкаго. Зане здание счинения его неправдою многою соткано, аще и зело показал еси себе хвастая возносящася и высящася, но и мы с царственным пророком ныне времени прилично псаломски воспоем: видех нечестиваго. возносящася и высящася над древним благочестием. [школьным кичением] аки и кедры ливанския и мимо идох. [от божественных писаний познавая коварство его] и се не бе [крепости в чинении его] и не обретеся меж православными древними учители место его, и бысть нам Бог прибежище и сила помощник в скорбех обретших ны зело. К Нему же Владыце своему славословя вопием, яко сотворил еси суд мой с Полоцким и прю мою. [с ним] сел еси на престоле [матери нашей церкви] судяй правду, божественными Твоими писании, запретил еси языком и погибе нечестивый диявол и с послушником своим Симеоном. имя его потребил еси животврящим Твоим трисоставным крестом, в век и в век века врагу [древняя благочестия Полоцкому] оскудеша оружия в конец, и грады [состав ложнаго счинения его] разрушил еси погибе память его с шумом. Зане не от источник Израилев, пророк и апостол и отец славит Господа, но от чрева своего износит лукавая: И понеже утверди себе Полоцкой слово лукаво, и поведаше езуитским лукавством скрыти сеть и рече [в помышлении своем] кто узрит сих. надеяся овых разгнаша, овых же соблазниша. и несть кому обличити неправды его. Тако еще к злобы злобу прилагает, сице глаголя: Тем же утвердитеся сим Жезлом нашим при правде православныя церкви, и отгоняйте от себе злыя и душегубныя лестьцы, их же часть з Дафаном и Авироном, и общение с князем тмы вечныя. отложитеся от них да не и вы с ними за хулу, на вечное всехуление, и нескончаемыя муки осуждени будете. и паки истинно вам желаем, и Господа о сем безпрестанно молим.

Обличение.

Аще молится тебе враг твой велиим гласом, [глаголет премудрый Соломон] не веруй ему, седмь бо суть лукавстии в души его. Истинно сие слово о Симеоне Полоцком, рещися может, в молении его седмь лукавствии в души его познавается, не точию та что прежде уже обличена, но и зде коликаго яда смертоносна исполнена. Повелевает утвержатися Жезлом своим а отгонять от себе злыя душегубныя лестьцы, а яве тех нарицает, познавается кои з Жезлом его не согласны.

Видится убо по всех 13 обличениях, и вам еже о кресте слове, яко пророков и апостольское учение с богосными отцы вкупе проповедуют и прославляют животворящий крест трисоставный на нем же Христос распятся. Полоцкого же Жезла составление, татьским обычаем ту славу украдая от трисоставнаго креста. противно святым на двучастной преписа. И тем Жезлом ратовати кому, уже противляющихся ему святых полк будет. яко их противно Жезлу всюду трисоставный крест, на нем же Христос распялся, а не двучастный, прославляющих. И тако показуется Полоцкой ратник и наветник святых Божиих. Но понеже обычай разбойником злобы своей отрицатися, и сюду и сюду коварствовати безбоязненной есть, тать и Полоцкой смел вкрастися, и в святых богословное учение яко же прежде обличен. много паче дерзнет хулу свою зде оправдати. Зане он же рек: отложитеся от них да не и вы с ними за хулу на вечное всехуление и нескончаемыя муки осуждени будете. Хулу же в начале того своего 23 возобличения яве показал яко крыжем двучастнаго кто именует на тех он много исперва хулы отрыгнул. Но показахом, во 2-м нашем обличении яко крыжем его, не мы нынешняго рода именование даша, но древле во святей соборней апостольстей церкви при благочестивых царех и архиереох и чюдотворцех российских святых отец наших, за латинов его двучастнаго вознесения, тако его именоваху крыжем, зане полскаго и латыньскаго чиноположения тако его препрославляти. Полоцкой же не хотя латиньския яве показати личины гневался на тех иже крыжем именуют, от сердца своего яко из бездны хулу испусти, яко же в начале тако и на конце, возобличения того сице глаголя, отгоняйте от себе злыя и душегубныя лесцы. их же часть с Дафаном и Авироном, и общение с князем тмы вечныя.

Отвещаем.

Научила нас соборная апостольская церковь истинно благоверная, кая до Никонова смущения не поколеблема бяше и до ныне в послушающих ю, преданием своим пребываает. В ней же не диявол глаголяи яко же вы хулите; но по божественному Златоусту веруему в церкви вся от Бога вещаются. В ней же устав Око церковное марта в 30 день, повелевает чести житие святителя и чюдотворца Ионы, которое прочитаемо бяше во святей церкви, от лет царя Ивана Васильевича, и митрополита Макария. А в нем ясне пишет: Исидора митрополита сретоша в Риге православнии носяще кресты честныя, капланове же от божниц сретоша его с крыжи по своему латыньству. Понеже по них капланов латиньству, от дву каких частей сложа вместо Христова креста почитают, полским языком от православных крыжем именовался. И тии вси прочитающии и глаголющии по вышереченных псов лаянию названы от диявола, и обгаждены порождения ехиднина толь пресветло в православии сияющияся об коих священное евангелие сказует, елицы его восприяша даде им область чадом Божиим быти верующим во имя Его. иже ни от крови ни от похоти мужеския, но от Бога родишася. О земле како стерпе толикое досаждение церкви православно-кафолическия. о солнце и луна како не иступисте своего чина, яко же и во время распятия Христова, о каковыя ядовитыя гады попустилися за наши грехи на светлую Росию. А пастырие упиташася славолюбием и сластолюбием и сребролюбием, и любят како бы школней краснословец откуду от Полше или яко из бездны бы вышел да умел живых чюдотворцов хвалити. зане по смерти негли и недостойни да умел бы на пирах над винными и пивными чашами витейски краснословити яко же был Симеон Полоцкой, а древнее истинное благочестие истинных благочестивых пастырей. аще и зело нестерпимыми досадами и в них живущаго Бога яко пси лают того в печаль себе не приемлют, и жития их софистом плотскаго а не духовнаго не разсуждают. якови же и сами учинилися преслушавши евангельскаго гласа повелевающаго: от плод их познавати. и паки сосуда избраннаго глаголюща: блюдитеся кто вы будет крадоводя философиею и тщетною лестию. Пияному Иоасафу патриарху любезно было слушать, что его ублажил в Жезле Полоцкой, тако же Иоакиму малограмотному красно в Увете похваление, а того не ощущают каково отрыгнуто хуление на Бога и на святых Его, не восхотели святою простотою древним святым отцем последовати и невеждами и буими со апостолом нарицатися. но вознестися аки сами исправители и мудрые пастыри покладаеми от лукавых языков школьных, не уразумеша тако толь глубокия погибели своея. А кто апостольскою простотою и истинно желающим разумом правду древняго благочестия, принесет пред них, того слушать не хотят. наруганием и муками и томленьми неисчетными истяжут его.

Но убо и в Увете подобно Жезлу татьским обычаем разум истинный от писаний украдаем, но поражену Жезлу от силы трисоставнаго креста не разорилося, и Уветное неправдословие и несть требе повторяти обличения. Да не в том время испразднивше, многия главизны их, неправедныя остаются стеснения ради, яково имамы всегда писмены не обличены, но в божественных писаниях лежимое пред очима ум имущих не молчит на них обличение, нужда же ныне прибавочные во Увете прилагания разорити церковною истинною да не хвалится и последняя их лжа противо истинны.

Написан во Увете в лицех назван Корсунский крест сицев образ имеющь [изображен двучастный равносторонний крест вверху надписано IС XС, внизу НИ КА], и тем доводит двучастнаго почитати.

Обличение.

Диявол во истинне не стоит яко несть истинны в нем, егда глаголет лжу от своих глаголет яко ложь есть и отец лжи, священное нас слово научает. той научи и зде лгати в Увете два древа точию написали да и подпись к нему написали. да и рекли: той древний святый Корсунский крест. Оле безсрамныя лжи крест Корсунский. яко же и достовернии глаголют: аще и на дву древах, но написали на средине, трисоставный крест Христов с воображенною распятаго Владыки  плотию, к нему же и подпись подписана глаголют. на прочих же кругах иконное написание и зело истинно како бо на воздусе, а не на древе, подпись может быти, яково у них воображено, яко бы к двум древам подпись положена и восхотели нас и зде обманути, яко и детей. Мы не точию на дву древах просто накрест положенных воображенным трисоставному кресту и распятию Христову, и прочим святым образом: но аще и на дске будут воображены равно покланяемся. но не убо сего ради и дски не имеющеи таковых святых воображений, но праздней подпись подпишет кто и начнет кланятися. Тем же и сия их ложь крепости им никоея не подает, но паче срамляет обличающу пророку: заблудиша от чрева глаголаша лжу.

Но или Увет на сем утверждается еже глаголет Минея месяца септеврия 14 число, стихера крестопоклонная вещает творец, сице: Четвероконечный днесь мир освящается четверочастному воздвизаемому Твоему кресту Христе Боже наш.

Обличение.

И зде мудрец не узнал малаго здания дому своего. на Воздвижениев день честнаго креста поется сия стихера на поклонение кресту, и не дву древный, и у самех их бывает не точию в древнее благочестие, но трисоставный крест Господень. к нему же и сам во Увете повыше того именовал тречастной крест Господень. Тем же и вопрошая их в лице к ним, слово обратим: поведите нам, о мудролюбцы, какой у вас крест тречастной и какой четверочастной, еда вы концы в двучастном от сложения их от среды горе и долу и поперек сюду и сюду те частьми именуете, да коварне предпоставите пред неведущими в двучастном четыре части и стихеру вышереченную насильством привлечете, аки бы к нему глаголалася яко же уже и дерзнули есте тако [Изображен равносторонний двучастный крест]. и сия у вас четверочастной тако мудрствуется. Како же у вас тречастной протолкуется? коим видом его покажете? не яве ли по вашему. четырех частей протолкуется протолкованию подобие сие ему тричастному будет имети [изображена двучастная фигура в виде буквы Т]. И уже колик вам срам о мудролюбцы аще и сему виду покланятися будете, еже вас доводит ваше новомудрование. Аще ли постыдевшися еще и триконечному виду не извещати будете кланятися. но речете о тричастном яко трисоставный крест Господень, иногда тако тричастным именуется ради образования трех древ кипариса и певга и кедра. то яве покажете яко и четверочастным той же трисоставный крест Господень. иногда именуется ради четвертыя чести верхние дски. А в вашем двудревном две части яве покажется яко же и есть, древо бо богословцы частию именуют, а не пол древа. ясне бо на той же Воздвижение день к единому трисоставному кресту Господню поет церковь на литии в стихире: Ты покров державен явися тричастный кресте Господень. А на целовании вышереченной стихире: Четвероконечный днесь мир освящается, четверочастному воздвизаему Твоему кресту Христе Боже наш. И паки стихера глас 2: Приидете вернии животворящему древу поклонимся, на нем же Христос Царь славы волею руце распростер. И яве о сих истинна трисоставнаго креста светлеется. лживое же Увета мудрование обличается, и яко тать и хищник показуется, дерзнувый церкве православно кафолическия чад порождением ехидных тако татски во двор церковный подкоповатися, и ложью а не истинною дыхати. Но убо аще в Увете приводит неправедне отвсюду куя коварством украдая истинну да новозаконение свое поставит. Но понеже разоренной отеческою истинною лжесловесия их храмине. невозможно утвердитися им на малом их составлении, тем же несть нужда впреди по тонку сказати, зане той же разум их впреди обличен. разве краткими словесы истинным, раздрати паучинотканное лжесловесие их. приводят свидетельство.

Обличение.

Григорий Богослов в книзе своей о двучастном кресте не учил в Часословах повеления такого несть же. А коего ради действа тамо написаны вы нам того не объявили. Аще ли таким же подобием как и во Уставе, для приметы праздников написано просто кресты, и на том вам утвердитися несть прилично. яко же в 5-м обличении показахом. Аще ли каким подобием там написаны кои до вас священный собор писцу оному заповедал написати, и для какова тайнодействия, то нам объявите, да ответ у нас услышите. почто же и в прочих Часословах, и Григория Богослова в книгах несть такого подобия, как у вас на просвирах. Аще бы было святых отец предание, быти ему подобало неизменно, и в последующих во всех книгах. Сего ради несть сие ваше свидетельство достоверно. А наипаче яко видим мы во всех харатейных книгах и старописмянных, пречистое Спасово имя IС писано, вы же на своих двучастных крестах ИIС подписываете, а книгам древним печатным и писмянным не последуете. Тем же отвсюду новозаконение ваше познавается, еже что и глаголете недостоверни являетеся, и на кои книги ссылаетеся, те и обличают ваше дерзопреступление.

Сим Увет крест царя Константина от злата устроенный, имже побеждаше противныя, во свидетельство к своему двучастному заемлет. Обаче и зде обличается. понеже несообразно двучастному царя Константина кресту воображение имать, но правое древо длиннее пречнаго, и паки пречное к верхному составу ближайше имать. до нижняго же состава подалейше, зане креста трисоставнаго образования имать. Образ же его есть сицев [Изображена фигура креста: средняя перекладина по центру и равна высоте; имеются также по две симметричных перекладины на средней и на высотной] имеющь три составы целы воображены и како односоставнаго трисоставному дерзают уподобляти. тем же и зде не остает, ни пера им свидетельства: но точию лживое коварство обличается. Но паки ныряет Увет, паки обходит ища где подкоповатися. или аще где хитреца деланием недостаточне во образе имать, аще и к двучастному не образуется. Но коварне Увет яко не имея на божественных писаниих утвердитися, заключает в сих образех свое таинство, глаголет: на сосудех Антония Римлянина, знамение креста сице четвероконечным образом. и в лицех представляют. [Изображен пятиконечный крест: на верхней доске, надписание НI ЦI; на низу креста насыпь из которой исходят копие и трость с губой; подписано рядом с верхней доской IС XС, внизу над насыпью Н К]. Но и зде несть им помогающее нимало: зане правое древо длиннее пречнаго и сверх имеет дску, доле же копие и трость, аки от третияго состава, горе прочерташася. аще и не у в ясность вообразися, яко же случается, или от нужнаго случая или от невеждества поспешится, но обаче к двучастному нимало подобия не имать. двучастный бо точию два древа и те оба равны. зде же дска вверх ясне изображена, к сему же копие и трость и аки нижний состав нижнее проначертание. еще же и горы Голгофы назнаменование и тем подобием бывает и глава Адамля воображена, но у них в Увете не положено. Обаче и по них воображению обличаются, а еще и в их ображении донележе первообразное не зрится. по первых прилыганиих их невероятелни являются.

К сим же паки свидетельствует Увет теми кресты, иже на церкви Благовещения Пресвятыя Богородицы на царском дворе златый крест, и образ его изобразиша [Изображен двусоставный крест: средняя часть сдвинута немного к низу, на нижнем конце утвержден полумесяц: на трех вышних декоративных головках креста по три декоративных креста; и в перекрестии два декоративных креста в виде андреевского: рядом с верхней частью креста надпись IС XС; над полумесяцем НI КА]. еще и глаголют в Нове граде и во Пскове и в Киево печерской лавры, и убо в Нове граде у Софеи премудрости Божии на главе крест глаголют достоверьнейшии самовидцы, яко имеет у себе посреди себе воображен трисоставный крест Господень, к нему же и подпись надписана есть. на деемо же посему, иже от святых свидетельствованных крестех, и везде быти аще где и двудревным подобием воображен, но на себе изображение имать трисоставнаго креста Господня, с божественнаго имени подписанием. яко же во многих местех свидетельствуют самовидители. Но они убо новозаконие свое утверждают не видят трисоставнаго креста; но точию заднее подобное зрят, чтоб им самособне укрепить двучастной крест. Яко же видится в церкви Благовещения Пресвятыя златаго креста, воображали и подпись к нему по странам написали. а там на подлинном кресте по их изображению на воздусе IС XС НИ КА, яко же и на Корсуньском кресте смели явную свою представити ложь, а что на среднем крузе крест трисоставный с подписанием, и с протчим воображением то и умолчали, аки бы его ту и не было. Или вам возмнелося милости ради воображения тричастнаго креста прозрена его показати, не услышасте ли и о сих, о премудрыи, церковнаго гласа, в Триоде в среду четвертыя недели поста, в осмой песни глаголющаго: Сей крест тричастный великий, мал видением сый и небес ширши есть. силою своею человеки к Богу возводя присно, им же благословим Христа вовеки.

И о сих убо вкратце доволно мню к противляющимся, а что паки написали свидетельство кресты на царских венцах и на митрах патриарших: а о сих подобностию яко же и на ризах архиерейских, но о сем показано во обличении, 5-м, о сих посылаем читателю. Еще же прирек такия же кресты и на антимисех, иже привезены из Владимира из монастыря царя Константина. Несть сие свидетельство достоверно их глаголов. Мы видим предано от святых апостол и святых отец, яже в Потребники болшем древлепечатном, ясно изображен на антимисе крест трисоставный, и подписание имея ЦАРЬ СЛАВЫ IС XС НИКА. Подобно сему и в Минени Макария митрополита во Евгустовом в великом Нове граде на антимисе крест изображен и с подписанием, яко же и в Потребнике.

И сие верно слово и всякаго приятия достойно.