Часть третия.

О святей евхаристии.

Аще не снесте плоти Сына Человеческаго, и пиете кровь Его, живота не имате в себе; Словеса Спасителя нашегоIсуса Христа, положенная у святаго евангелиста Иоанна, в зач. 23.

 

Предел первый.

Во времена нужды, может, человек сый христианин, имеяй веру правую, и дела добрая, аще и не причастится святых таин, спасен быти.

 

Глава, 1.

Аще и нужно есть причастие животворящих таин Христовых ко спасению, обаче не имущу где причаститися, может спасен быти.

Пресвятый и пречистый Владыка и Спаситель рода человеческаго,Iсус Христос Сын Божий, и Бог, благоволением Отца, и советом Пресвятаго Духа, пришедый на землю спасти род человеческий, егда на тайней своей вечери, на ней же предаде божественным своим учеником, пресвятую свою плоть ясти, и пречистую свою кровь пити, чрез них же и всем верующим вонь, да, иже достойне снедят плоть Его, и испиют кровь Его, наследницы будут царьствия небеснаго, снаследницы же Ему, возлеже, рече [Мф. глава 28, зач. 108]: Приимите и ядите, сие есть тело Мое, еже за вы ломимое, во оставление грехов. Таже приим чашу, благослови, и рече: Пийти от нея вси, сия есть кровь Моя новаго завета, за вы, и многия изливаемая, во оставление грехов. Кая словеса своя пребожественная благоизволи, да вечно непреступнейшима пребудут, от верующих вонь, утвердити, рече: Ядыи Мою плоть, и пияй Мою кровь, во Мне пребывает, и Аз в нем. И паки: Аще не снесте плоти Сына Человеческаго, и пиете кровь Его, живота не имате в себе. Ядыи Мою плоть, и пияй Мою кровь, имать живот вечныи [Ин. глава 6, зач. 24, и 27]. Сия словеса Господня нецыи от зелных ревностнолюбителей, слышаще и ведяще, всеми силами, всяким усердием, тщатся исполнити. глаголют бо, яко отнюд невозможно не причастившуся святых божественных таин, наследником царствия небеснаго быти, аще и вся добродетели совершил. Понеже сам Господь пречистыми своими усты рече: Аще не снесте плоти Сына Человеческаго, и пиете кровь Его, живота не имате в себе. Ядыи Мою плоть, и пияй Мою кровь, имать живот вечныи. Вемы воистинну вемы и мы, яко сия словеса Христа Бога нашего, елико всякаго достоверства, и благоговейнаго почитания достойна суть: толикаго и прилежнаго во тщании исполнения требовательна, во еже всякому всегда причастнику быти животворящия плоти и крове Господни, во освящении души и тела, в наследия живота вечнаго. О чесом вси верующии во Христа, а наипаче всем сердцем спастися ревнующии, огнепалное желание присно являти усердствуют. Сия словеса пречистаго Владыки Христа Бога нашего и мы, аще и грешнейши всех есмы, и несмы достойни таковаго божественнаго дара, во еже причастниками быти животворящаго тела Господня, и пречистыя крове Его, огнепалне всеми силами, всяким тщанием, всем усердием, да наследницы будем небеснаго Его царствия, снаследницы же Ему, исполнити желая желаем: но не можем. Яко видим великороссийскую церковь различными пестротами ересей преиспещрену. Яко видим в ней обливаемое крещение с трипогружателства крещением за равносилное содержимое. Яко видим в ней премногая привложения, отложения, и изменения древлеправославных догматов. Яко видим литоргию не на седмию, по преданию божественных отец, и содержанию древлеправославныя церкве, но над пятию просвирами, совершаему. О часом напреди имамы пространнее глаголати. Яко не имамы благочестиво сиятелнаго архиерея, от него же бы производилося православное священство. Яко не имамы православнаго иерея, от него же бы предложенныя дары, нашествием Пресвятаго Духа, пресуществилися в плоть и кровь Христову. Понеже не имать православно христианския веры. Не имея же истинныя православно христианския веры, не может и совершити, во еже бы предложенный хлеб и вино пресуществилось в плоть и кровь Господню. И слыши о сем древлеправославную церковь сице вопросоотвещателне вопиющю [Катихисис велик., глава 4, лист 210]: [Вопрос: Истинныя ли и правыя пресвятыя тайны Христовы суть у еретиков? Ответ: Понеже они истинныя и правыя веры Христовы не имут, то како пречистыя и святыя тайны Христовы у них быти могут?]. Катихисис великий, глава 4. Яко обретается от божественных отец, пременений, и привложений, и отложений ради под клятвою, о чесом доволно показахом в первой части, и напреди имамы рещи еще. Чесо ради таинство Христово, сиречь животворящее тело Его, и пречистая кровь не может от него совершитися. Якоже сему явственно научает блаженный Иоанн митрополит Никейский, сице взывая: [От анафемы благословение не бывает, и от проклятия молитва не исходит. от диавола Христово не совершается таинство]. в слове обличителном на армены. Что убо, рцы ми; Аще кого случай не допустит причаститися животворящаго тела Христова, и пречистыя крови Его, за неимением православнаго священника, может ли имый веру праву, и дела добрая, спасен быти? или ни? Речеши ли ни. Како убо сам пресвятый Владыка нашIсус Христос пречистыми своими усты рече [Ин. зач. 10]: Тако бо возлюби Бог мир, яко и Сына своего единороднаго дал есть, да всяк веруяй вонь не погибнет, но имать живот вечныи. И паки [зач. 11]: Веруяй в Сына, имать живот вечныи, а иже не верует в Сына, не узрит живота. Зде рече Владыка наш ГосподьIсус Христос о иже верующих вонь. Где убо глаголет о творящих Его пресвятыя заповеди, и како? Глаголет бо у тогожде святаго евангелиста Иоанна сице [Ин. зач. 48]: Имеяй заповеди Моя, и соблюдай их, той есть любяй Мя, а любяй Мя, возлюблен будет Отцем Моим, и Аз возлюблю его. Таже навед рече [ниже]: и к нему приидева, и обитель у него сотворива. Зри, первее рече: всяк веруяй вонь, сиречь, в Сына, не погибнет, но имать живот вечныи, таже: имеяй заповеди Моя, и соблюдаяй их, той есть любяй Мя, а любяй Мя, возлюблен будет Отцем Моим, и Аз возлюблю его, и к нему приидева, и обитель у него сотворива. И аще всяк веруяй праве в Сыне, и заповеди Его божественныя соблюдаяй, не погибнет, но имать живот вечный, к нему же Отец и Сын приидета, и обитель у него сотворита. То како не имать таковый спасения получити? всяко получит. Понеже бо аще к имущему веру правую, и соблюдающему заповеди божественныя, Отец и Сын приходита, и обитель у него сотворяета, всякому проявлено, яко и вселяется. Аще же вселяется, безпрекословно, яко той есть сосуд Святаго Духа, избран честен и свят. Понеже и священник повелевает к святым, святым приступати. Сице бо возглашая глаголет: Святая святым. Якоже и святый Иоанн Златоустый глаголет [в толкован. на Мф.]: Святая святым, сиречь. Аще кто несть свят, да не приступает. не просто бо рече, от грех чист, но свят. И аще свят освящаем сыи верою правою, и делы благими, прежде даже приступит ко святым, есть яве, яко таковыи и прежде приятия есть наследник царствия небеснаго, аще же есть наследник царствия небеснаго, убо и спасен. Откуду богоявленно, яко, аще кто, иже имать веру праву и дела богоприятная, и не сподобится причаститися животворящия плоти Христовы, и пречистыя крове Его, не за ино что, но благословных ради вин, каковых ради и ныне невозможно есть, может спасение получити, и наследником царствия небеснаго быти.

Глава, 2.

Аще и седмь таин во святей церкви исповедаются, но две точию тайне нужнопотребне ко спасению, ихже кроме невозможно есть спасения получити.

Аще бо святая древлеправославная церковь и седмь таинств церковных определяет быти, ихже исчисляет сице [Катихисис великий, лист 245]: Первое, крещение: Второе, хрисма, сиречь, миропомазание: Третие, священьство, сиречь, рукоположение. Четвертое: Божественное причащение, сиречь благодарение. Пятое: исповедание, или покаяние. Шестое: законный брак. Седмое: Масло священие, или последнее елеосвящение помазание. Катихисис великий, лист 245. Тождеименное число таинств церковных и кир Гавриил архиепископ Филаделфийский изъявляет быти, сице глаголя [лист 15]: Седмь суть церковных таинств: 1: Святое крещение, 2: Святое миро. 3: Божественное причащение. 4: Чин священства. 5: Покаяние. 6: Законный брак. 7: Молитвомаслие. Обаче не вся всякому христианину нужнопотребна суть во спасение: но некая. От них же некоторых, аще и не получит, может спасен быти. Зде во первых ведательно есть, что есть таиньство или тайна церковная? Понеже не вси, аще и слышат о них, ведят, что есть таинство или тайна церковная. Сего ради возмнех изъявити, что есть тайна церковная, да от сего удобь разумети возмогут. Аще вся тайны церковныя нужнопотребныя суть, всякому православному христианину, ихже кроме невозможно есть спасение получити, или ни? Темже и вопрошая: Что есть тайна? На сие ответствует святая древлеправославная церковь сице глаголю [Катихисис вел., лист 244 обор.]: Тайна есть невидимая благодати Божия видимое знамение, во освящение наше от Бога нам преданная. Ино бо в тайне видим, и ино приемлем. Знамение убо верху явленное видим, сокровенную же духовную благодать, яже нарицается вещию, или концем тайны, сию приемлем. Катихисис великий, лист 244. Или иначе [Дамаскин, книга 4, глава 14; Кахисис малый, лист 27 на обор.]: Тайна есть видимая вещь, уставлена же есть от Христа: яже егда освящена бывает от священника, и ко употреблению человеком подаваема, приносит нам от Христа Бога невидимую благодать, освящающую человека, и до вечнаго живота воспомогающую. Катихисис малый, лист 27. Сим согласно и кир Гавриил Филаделфийский о таинстве вопросоответне глаголет сице [глава 14]: Что есть таинство? Таинство есть вещь некая, чювству подпадающая, имущая в себе силу божественную сокровенную, еюже спасение, и яже к спасению человеком подает. Рех таинство, яко таинство наученным, и верным единем подобает сие стяжати и открывати. не мещите святая псом, глаголет Господь, ниже бисеры пред свиниями, якоже речеся. Рех вещь некую, и чювству подпадающую, да не непщует кто, яко есть нечто небытное, и от нашего ума притворенное. Рех священную, к разделению несущих священных собственно и истинно. Рех имать силу божественную сокровенную, да покажю яко от Бога священнодейственником низходит сила, в нем сущая и действующая, а не от человека коего. Рех во спасение, или яже ко спасению, да нуждная убо таинства будут просто ко спасению нашему. Сия тайны церковныя разделяются, по церковных учителей, елико древних, толико и новых гласовом на двое, на нужнопотребные во спасение, и нужнопотребныя ко спасению. И нужнопотребныя убо во спасение суть три, крещение, причащение, и покаяние. Нужнопотребныя же ко спасению суть четыре, но не всякому. Сице бо о сем в велицем Катихисисе явствует [лист 245 обор.]: [Нужнопотребных во спасение есть три: крещение, причащение, и покаяние. Потребныя же ко спасению две, святое миро, и последнее елеосвященнопомазание. Брак и потребен есть употребляющим его, помощи ради и сохранения от блуда, и нужнопотребен есть чадородия ради и исполнения церкве Божия. Подобно же и священничество, потребно убо есть хиротонисавшимся, дабы сим служением угодити Богу, нужнопотребно есть правления ради церковнаго и строения святых божественных таин]. да лучше и удобнейшее уразумееши, послушай другаго сего разделения: [Вся убо седмь тайны потребны суть, но не всякому человеку. ниже единообразны. Брак бо и священство, аще убо и нужнопотребны суть церкви, но от другия страны, в воли и избрании всякаго есть, тако яко и не брачився и не хиротонисався может спастися. Прочая же пять тайны потребны суть во спасение и ко спасению, но не единообразне. Крещение бо, и причащение, и покаяние, сице нужнопотребни суть всякому во спасение, да спасется, якоже корабль в преплытие глубины морския, без нихже ни един спастися может, разве аще не возможет их употребляти, вожделев их. Святое миро и последнее елеосвященнопомазание, сице ко спасению суть потребни, дабы имели есмы спасение наше дерзновенне известно же и твердо]. Зри, рече: Вся убо седмь тайны потребни суть, и наведе: но не всякому человеку, но ниже единообразны. Таже располагая тайны глаголет: Брак убо и священство, аще и нужнопотребни суть, но церкви, прочим же в воли и избрании всякаго есть, тако яко, аще кто и не совокупится браком, и не хиротонисается, может спасение получити. Прочия же пять тайны, глаголет, потребны суть во спасение и ко спасению, но не единообразне. Что есть, еже глаголет, во спасение? и что убо ко спасению? во спасение убо глаголет, яко не стяжавшему их, невозможно есть спастися. Ко спасению, яко имеяй я, имать спасение свое дерзновенне известно и твердо. обаче аще кто и не сподобится их получити, неких ради нужных случаев, может спастися. нужднопотребныя же тайны во спасение всякому человеку определяет быти три, крещение, причащение, и покаяние. их же кроме рече, ни един может спастися. и наведе, разве аще не возможет их употребляти, вожделев их. что есть, разве аще не возможет их употребляти вожделев их? то есть, толико сия нужднопотребны суть тайны вся, всякому хотящему спасение получити, крещение, причащение и покаяние, яко аще кто не стяжет их не имать спасен быти, разве аще точию зело огнепалным желанием возжелев бы их, но не мог неких ради нуждных случаев получити, сиречь, егда кто не крещен сый водою и Духом, страждет и умирает за Христа, тогда излияние крови его вменяется в самое крещение. Сице егда кто зелне желает причаститися божественных и животворящих таин Христовых, но не может благословных ради вин, или яко в гонении ему сущу, или яко не имать православнаго священника от него же бы возмогл причаститися, обладающим нечестивым еретиком святыми церквами. Тогда аще и не сподобится причаститися божественныя плоти и крови Христовы, спасен быти может, яко самое его огнепалное желание вменяется ему в причастие.

Блаженный же кир Гавриил Филаделфийский, во изложении о седми тайнах, располагая я, две точию тайне нужднопотребне весма ко спасению изъявляет быти, ихже кроме человеку невозможно спасение получити, прочия же по нужде посредния, ихже аще кто и не сподобится некия ради нужды, спасен быти может. Сице бо глаголет: [Ведати нужда есть всем, яко тайны церковныя иныя суть, миропомазание, евхаристия, и елеопомазание, ихже аще и не сподобится нужды ради некия, спасен быти может. иныя же по нужде заповеди, те же есте две, крещение и покаяние, еюже кроме несть леть спасение получити]. книга О седми тайнах.

Сим согласно и от новых учителей, творец книги глаголемыя Мир с Богом, в книзе своей Мире, расчисляя тайны церковныя, две токмо тайне нужднопотребне всячески ко спасению определяет быти, крещение и покаяние, прочия же не тако глаголет [глава 5]: [Ведати потреба (ниже) две сия тайны, крещение и покаяние весма нуждны и потребны суть ко спасению, сице яко без них не может человек спастися. Крещение отнюд потребно коемуждо особь человеку, покаяние коемуждо согрешившему смертне по согрешении [о тайнах церковных, лист 105]. Ибо аше кто не родится крещением [Ин. 3], или по крещении согрешивше смертне. аще не покается (рече) вси погибнете [Лк. 13]. Но сим двоим тайнам, поелику весма нуждны суть ко спасению, причисляется и третия тайна священства, еже не комуждо особь, но всей церкви обще, или всему собранию верных нуждно есть ко спасению. ниже: Прочия же четыре тайны, миропомазание, евхаристия, елеопомазание, и супружество, не тако весма нуждным образом суть потребны но полезны к лучшему и совершеннейшему приобретению спасения]. глава 5, о тайнах церковных. Видиши ли яко кир Гавриил Филаделфийский, и творец книги Мира с Богом, две точию тайне весма нужднопотребне, всякому человеку особь, ихже кроме отнюд невозможно спасения получити, во спасение определяют. прочия же пять, между ими же и причастие исчисляют, не весма нужнопотребны ко спасению, но полезны к лучшему приобретению спасения, ихже аще кто нужды ради некия и не сподобится, спасен быти может, уставляют. И како убо противу толикой явственной истинне, бодрствуя, дерзаеши глаголати, яко не причастившуся невозможно всячески спастися? Аще бы невозможно имущему веру праву и дела добрая, непричастившуся животворящия плоти и крови Христовы, вин ради благословных, сиречь нашедшу гонению, или святыми церквами обладающим еретиком, не сущу православну священнику, от него же бы лепотствовало причаститися, спасения получити: не бы святая древлеправославная церковь, тайну причащения между тайнами нужднопотребными во спасение, без них же отнюд человеку спастися не возможно, крещением и покаянием, вместивши, наведши рекла, разве аще не возможет их употребляти, вожделев их. Не бы кир Гавриил положив е в по нужде посредния тайнах, рекл, ихже аще кто и не сподобится нужды ради некия, спасен быти может: не бы и от новых автор книги Мира с Богом, с тайнами причастия, не тако весма нужднопотребными, якоже крещение и покаяние, ихже кроме невозможно спастися, но полезными ко спасению, ихже аще кто и не допустит стяжати нужда некая, спастися может, соединив определил. елма же убо и новии, и древнии церковнии учители паче же вся дрвелеправославная церковь, велегласнее трубы гласящи изъявляет, яко нужды ради некия, аще кто и не сподобится причаститися животворящих таин Христовых плоти и крове, может спасения получити. Како ныне в толикое нужды время, толиких ради благословных вин, ихже ради несть мощно всячески всякому хотящему пречистыя и животворящия плоти и крове Христовы вкусити причаститися, егда толикому зелному гонению всюду належащу, егда святыми церквами православия христианскаго отчюждившимся обладающим, егда благочестивосиятельнаго архиерея отнюд не видети есть, егда православнаго иерея зело невозможно обрести, имущему веру праву, и дела добрая, и огнепалне желающу причаститися, но не могущу, невозможно есть спасение получити, и наследником царствия небеснаго быти? ей возможно.

Глава, 3.

Премнози древлежительствующии по пустыням, не причащахуся святых таин, овии чрез многая лета, овии же чрез всю свою жизнь, обаче спасошася.

Воззри токмо в древняя времена, посмотри в прешедшая лета, и абие не неимаши уразумети, колиции преподобнии мужие, колицы пустынножителие, в самое цветение благочестия, в самое сияние православия, ни единому гонению належащу, ниже кому от еретик церквами святыми обладающу, во удалении от всея вселенныя жительствующе в пустынях, не причащахуся чювственне животворящия плоти и крове Христовы, обаче святи и богоугодни суть, и ныне на небесех насыщаются лицезрения Божия, какови быша:

Преподобный Марк Фряческий, иже 95 лет в пустыни живый, отнюд человека не виде, и святыя евхаристии устнами не вкуси, обаче чрез добродетелное житие свое выну насыщаяся благодати Божия, свят и любезен Богу паче всех живущих в мире явися.

Сицев бе и преподобный Петр Афонский, иже 53 лета в пустыни жития своего препроводив, человека не виде, и божественныя плоти и крове Христовы причаститися не име, обаче чрез высокое жития своего святаго, сосуд вожделен Богу, святейший паче всего мира бысть [июня 12 дня].

Сицев бе святый Феофан, иже во Антиохии, иже сам себе крести, и блудницу от идолопоклонения обратив крести, яже оба благочестно пожиша, не имуще святых таин устнама причаститися: обаче чрез богоугодная дела присно благодати Божия причащастася, и к Богу благоугодне преставися [Пролог, июня в 10 день].

Сицев бе преподобный Павел Фивейский, его же обрете преподобный Антоний Великий, иже чрез все свое пребывание в пустыни, не вкуси устнами божественнаго причащения: обаче чрез богоугодное жития своего выну насыщаяся благодати Божия, паче тем живущих в мире и причащающихся устнами, святейший Богу и любезнейший явися [Пролог, октября в 30 день].

Сицев бе некий епископ, иже не стерпев мук иже пожре идолом, последи же бежа в пустыню, и поживе в хиже, 39 лет, в покаянии, сей чрез толь долговременное жития не име где причаститися: обаче неусыпных ради трудов своих и слез, прия от Бога прощение, и чрез высокое жития своего причащаяся благодати Божия, явися свят и Богу любезен паче многих причащающихся его же обрете епископ града Сухейска, во мнишестве суща, по смерти же его финик, от него же питашеся, усше, и хижа падеся [Пролог, октября в 3 день].

Сицев бе некий отшелник, о нем же повествуется в житии святаго Савы Освященнаго, сице: ходя святыи Сава со учеником Агапитом по пустыни, обрете отшельника прозорлива, иже блаженнаго именем нарече, и известив о себе, яко пребывая ту лет 38, ни единаго виде человека, потом паки в пустыню отъиде. и егда возвратився хотя еще его видети, обрете его скончавшася, и погребе его в той же пещере. Кий прозорливый отец, чрез толикое время пребывая в пустыни, и ни единою причастися божественных таин, обаче благодати Божия непрестанно, чрез богоугодное жития своего насыщаяся, яко и прозорливства сподобися, свят и богоугоден явися [декабря в 5 день].

Такова бяше преподобная Мария Египетская, яже 47 лет в пустыни живущи, и святых таин усты не причащающися: обаче чрез добрая дела присно благодати Божия причащашеся, и Христа внутрь себе имеяше, небеснаго царствия сподобися [Пролог, апреля в 1 день]. Такова бяше Феоктиста, иже 30 лет во острове живущи, устнама плоти и крове Христовы не вкуси: обаче высокаго ради жития своего, благодать Божию присно в себе имущи, в небесныя кровы свято преселися. Такова бяше святая мученица Дросида, яже сама себе крестила, и никогда же животворящих таин Христовых устнама вкусила: обаче чрез веру и усердие, имущи в себе благодать Божию, ко Господу отъиде [Пролог, октября в 30 день].

Такова бяше некая старица, юже обретоша два старца, в час скончания ея в пещере, яже не имущи где вкусити устнама божественныя плоти и крове Христовы, удаления ради церковнаго, без причащения преставися: обаче выну имущи в себе благодать Божию, в райская селения святопреселися [Пролог, октября в 30 день].

Такова бяше некая преподобная жена яже в пустыни 60 лет живущи, ни единаго от человек виде, юже обрете некий мних на камени седящу, яже такожде не имущи где причастися животворящих таин Христовых, без причащения преставися: обаче высокаго ради жития своего непрестанно насыщаяся благодати Божия, от пустыннаго жития преселилася в царствие небесное, юже егда погребе старец он в пещере ея, в ней же жительствоваше, абие от святаго тела ея прозре слепым оком [Пролог, ноября в 1 день].

Сии святии, и инии множайшии пустынножителнии мужие и жены, удалившеся от вселенныя, в самое то время, егда благочестие аки солнце в поднебесней сияше, егда православие во всех концех вселенныя процветаше егда благочестивии архиереи во всем мире апостольския престолы украшаху, егда православнии иереи всюду в Божиих церквах безкровныя жертвы приношаху, не сподобишася усты вкусити пречистых и животворящих таин Христовых, за неимением близ себе священника. обаче не воспротивишася тем своим непричащением, словесем Господним, ниже умалиша своего спасения: но чрез веру и желание и житие добродетелное, присно благодати Божия причащахуся на земли отчасти, на небесех же лицем к лицу божественнаго светолития совершенно наслаждаются. О них же преподобный Ефрем вопиет глаголя: [Славу юже поют в горах же и в вертепах жертва благоприятна приносится Богови. Сами суть священницы себе, и исцеляют наши недуги молитвами своими]. слово 111. Что убо еще ли возглаголеши, яко невозможно есть не причастившуся животворящих таин Христовых, спасение получити, яко сам Господь рече [Ин. зач. 23]: Аще не снесте плоти Сына Человеческаго и пиете кровь Его, живота не имате в себе? И како толици и таковии святии пустынници иже в пустынях жительствующе, никогдаже устнами вкусиша божественныя плоти и крови Христовы, спасошася: Их же святая церковь памяти торжественне воспрославляет. Аще бы невозможно непричастившуся плоти и крови Христовы спастися: не бы и сии вышеименованнии преподобнии пустынници спаслися. Но понеже толици и таковии, и инии множайшии преподобни пустынножителницы тогда егда престолонаместници апостольстии всюду по вселенней благочестивии быша, егда священници во всех странах поднебесныя православни быша, [им же бы возможно от пустынных своих жителств изшедшим причаститися, от православных священников, и паки возвратитися, но сего не сотвориша, от пустынных своих жителств не изыдоша, и от православных священников не причастишася, о них же явственно от повествований житийных показуется] не вкусиша устнами животворящия плоти и крове Христовы, обаче чрез веру и усердие и житие добродетелное присно оных благодати насыщахуся, ныне же святопресельшася в ликовствующей церкви на небеси лицезрения Божия непрестанно насыщаются. Чесо ради ныне в толикое нужды время, егда благочестием сияющых архиереов ни во единой от стран вселенныя не слышится, егда православнаго священника, от него же бы подобало было причаститися, нигде в подсолнечней не видится и несть, невозможно имущему веру правую и дела добрая, не вкусившу усты божественныя плоти и крове Христовы, присно огнепальне желающему, но не имущему где получити, наследником царствия небеснаго быти? поистинне возможно и будет.

Глава, 4.

Трегуби суть причащающиися божественных таин во святей церкви, ови усты и сердцем в чистой совести, друзии верою и усердием, третие едиными токмо устнами.

Хотя убо аще кто некия ради благословныя вины и не возможет устнами, животворящия плоти и крове Христовы причаститися, обаче может таковый чрез веру и усердие духовне причащатися. Понеже во святей православнокафоличестей церкви, якоже причащающихся устроение трегубо разделено обретается: тако и словеса святых отец о сем разсуждающая являются, еже и новопечатныя книги явственно определяют.

И первии убо суть: иже усты и сердцем в чистей совести приемлют животворящее тело, и святую кровь Христову, по преданию святых апостол, и святых отец. И сие сугубо: ови во святей церкви, на святей литургии причащаются: ови же от священника православнаго вземше часть животворящих таин, у себе держат, и егда восхотят причащаются. Ибо дотоле сие таинство цело есть, доколе вид хлеба и вина цел пребывает. Чесому научает нас святая православная церковь сице глаголющи: [Сия тайна не точию в причащении по освящении тайною бывает, якоже прочия тайны, но и в самом освящении бывши тайною и жертвою за живыя, и без причащения доколе виды хлеба и вина целы пребывают, совершенным всегда есть тела и крове Христовы тайною, и самым Христом Богом нашим [Златоуст бес. во Антиохии, 23]: ихже ради вин ни едина иная тайна того имать, якоже та имат. Понеже яко самому Богу, поклонение и честь воздаватися имать от нас]. Катихисис малый [лист 30]. Таковии быша в скитех и пустынях отцы, во Александрии же и в Египте простии людие, намнозе имуще причастие в дому своем кождо, и егда хотяху, причащахуся собою [преп. Никон Черногорец, в слове 23; Симеон ответ 41]. яко Великий Василий свидетельствует, и Симеон Фессалонитский в книзе своей утверждает.

Втории: Иже благословных ради вин, не имеют где причаститися, еже устнами вкусити животворящих и пречистых таин: обаче веру теплую, и усердное желание о сем показуют, во еже бы вкусити плоти и крове Христовы, добродетельми свое житие украшающе. Таковии чрез веру и усердие духовне причащаются плоти и крове Христовы. Каковии бывают обладающим нечестивым еретиком церквами, и во времена гонительная. Кации быша в древняя времена, при священномученице Киприане епископе Карфагенском, иже от Понтия Патернауса во изгнании сущии, не имуще где тела и крове Христовы устнами вкусити, духовне причащахуся. о них же повествует Бароний Кесарь в книзе своего сочинения, сице: [На изнании сущу Киприану, Понтии Патернаус и иных многих епископов, иереов, и диаконов, и клириков во Африце ищущ, многое их число пойма, и крепких во исповедании Христове видя, дрекольми их бити повеле, и на работу в горы Халкорихиов. К сим Киприан святыи, утешая их, писа послание сладости христианския исполнено. [ниже] не имате (рече) возлюбленная братия, ни единыя тщеты, во благоговении и вере, яко тамо в сие время священницы Божии приношения и жертвы (или литургию) совершити не можете: пожрите в жертву дух сокрушен, сердце сокрушено и смирено Бог не уничижит. Сию жертву Богу непрестанно воздаете в день и в нощь, и сами есте жертва жива и свята, (якоже глаголет апостол [к рим. 12]) в телесех ваших. Ниже: И дарова им сию благодать Господь Бог, яко вси во оной долгой и тяжкой работе изомроша]. Лето Господне 260.

Третии суть: Иже едиными токмо устнами причащаются. иже недостойне ко святому комканию приступают, иже скверными грехи окаляни, иже в смертных гресех погрязоша и не очистишася. Каковии не токмо не получают благодати Божия, но паче большее осуждение приемлют, по божественному апостолу Павлу глаголющу [к коринф. зач. 149]: Ядыи бо и пия недостойне, суд себе яст и пиет, не разсуждая тела Господня. О них же и святый Исидор Пилусийстий глаголет [в последовании святаго причащения]: [Согрешающии мук суть достойни, и повинны себе сотворяют, по неложному гласу Павлову, телу и крови Господни]. В Старчестве же страшнее приводя глаголя [и Никон Черногорец в слове 53]: Аще недостойне приимеши святых таин, повинен бываеши телу и крови Христове, и обретаешися Христа убивая, и Онаго закланию повинен еси. (ниже) иже тогда тело Его прободшии и оскверняющии Того, ныне сии нечистою душею недостойне причащающеся Ему, един суд с распеньшими Его прияти имут, по глаголу апостола Павла.

Сие трегубое причащающихся устроение, и новопечатныя книги явственно засвидетельствуют: Сице о сем пишет в книжице О седми сакраментах, типографии Черниговския [рока 1716, лист 6]: Вопрос: Многократное ли есть потребление евхаристии? Ответ: Трикратное: едино есть устнами токмо, якоже обыче бывает, егда кто с нечистым сердцем приемлет тело и кровь Спасителя нашего, яко Июда беззаконныи на тайной вечери: таковии на пагубление души своей приемлют. Другое потребление есть духовное, то есть, егда кто истинною верою и волею хощет тела и крови Христовой причаститися но не может Его прияти, яко то обыче бывати, не сущу тогда тамо священнику. Ниже: Третие есть, егда кто истинным сердцем, и чистыми устнами бывает причастником евхаристии святой. лист 7.

Зде убо святая древлеправославная церковь, и новии учители, на три чины причащающихся плоти и крови Христове расположивше, на чистым сердцем и чистыми устнами вкушающих тела и крове Христовы: на духовне, си есть, егда кто истинною верою и огнепалным желанием желает причаститися животворящим тайнам: но не может благословных ради вин, причащающихся: и на недостойне приступающих ко святому причащению, еда уничижают желающих огнепальне причаститися, но не могущих? Еда отревают от христианскаго их сочетания? еда глаголют яко невозможно есть отнюд не вкусившему устнами плоти и крове Христовы, спасение получити, и наследником царствия небеснаго быти? никакоже никако; но паче ублажают. Якоже святый священномученик Киприан к сослужебником своим сущим во изгнании пиша глаголет [Бароний лето Господне, 260]: [Не имате (рече) возлюбленная братия, ни единыя тщеты во благоговении и вере, яко тамо в сие время священницы Божии приношения и жертвы, или литургии совершити не можете, пожрите в жертву дух сокрушен, сердце сокрушено и смирено Бог не уничижит. сию жертву Богу непрестанно воздаете в день и в нощь, и сами есте жертва жива и свята в телесах ваших]. И аще убо святая церковь не отрицает желающим, но не могущим некия ради вины благословныя, устнами причаститися, спасение получити, ты же како противоборствуя всей кафоличестей церкви, дерзаеши отрицателне глаголати, яко невозможно есть непричастившуся спастися. Ни ли слышиши яко имущии огнепалное сердца желание, и ревностное усердие, во еже бы причаститися устнами животворящих таин Христовых но не могущии некия ради вины благословныя, приумножения благодати Божия без причащения себе получают; По премногу нас сему научает и от новых учителей творец книги глаголемыя Диалогизма, в ней же устроение причащающихся, на три чины расположив глаголет сице [изданная в киевопечерстей лавре року 1714, часть 2, беседа 10]: [Велико есть разньствие между ядущими трапезу Царскую. едини ядят действительно; едини недействительне. и инии тайну святую приемлют, купно же и действия ея; прочии же ни тайну святую приемлют, ниже действие, или корысти от тайны святыя происходящия. (ниже). Приемлющии тайну святую без действия, еже есть без благодати Божия, сии есть, иже в гресе смертном причащаются. И сице причащающиися далече отстоят от благодати Божия. новыи грех паче соделовают, и суд себе ядят и пиют. Не любве же Христовы, но гнева и негодования приумножение себе творят. Приемлющии же действие тайны сея, сиесть приумножение благодати Божия без причащения, сии суть, иже имеют огнепальное сердца желание причаститися, но не могут, или некоея ради тяжкия болезни, или иных коих благословных вин, или не имеют на сие помощника себе. Приемлют же точию действие тайны святыя за свое благоусердное желание, и духовне сицевии причащатися глаголются]. часть 2, беседа 10.

Видиши ли, яко иже имут огнепальное сердца желание, рекше всем сердцем желают причаститися божественным тайнам, но не могут неких ради вин благословных, таковии без причащения приемлют действие святыя тайны, сиречь приумножения благодаати Божия, еже от приятия пречистых таин происходит.

Темже убо аще по словеси святаго священномученика Киприана, ни единыя тщеты во благоговении и вере не сотвориша себе онии священницы, не могуще чрез всю свою жизнь, изгнания ради причаститися: Аще по сказанию творца книги Диалогизма, иже имут огнепальное желание во еже бы причаститися, но не могут неких ради вин благословных, без причастия приемлют действие святыя тайны, сиесть приумножение благодати Божия. То чесо ради не возможно ныне таковым, иже православнокафолическую веру без нарушения соблюдают иже святоотеческия догматы без ущербления содержат, иже вся святоцерковная предания неизменно сохраняют, иже имут всеусердное тщание, огнепальное сердца желание, еже бы причаститися святым и животворящим тайнам Христовым, но не могут благословных ради вин, яко не обретают святокафолическия церкве, яко не имут благочестиваго архиерея, яко несть православнаго священника, в ней же бы и от него же подобало причаститися, без причащения прияти действие святыя тайны, сиесть приумножение благодати Божия? ей возможно, и приемлют. И аще убо без причащения таковии приумножение благодати Божия приемлют. Чесо ради не возможно таковым спастися? ей возможно и спасаются.

Глава, 5.

Кииждо от христиан имеяй веру праву и дела добрая, может по мере веры и добродетелей духовне насладатися Агньца Божия.

Доволно убо нас научают и святии божественнии отци, пастырие и учители церковнии, яко кииждо от сущих христиан может, по мере веры и добродетелей, причащатися плоти и крове Христовы духовне. Но кто суть таковии? слыши, блаженный Феофилакт архиепископ Болгарский, и святый Никита митрополит Ираклийский. От них же блаженный Феофилакт толкуя божественныя словеса, яже сам Христос пречистыми своими усты рече: Ядыи Мою плоть, и пияй Мою кровь, во Мне пребывает и Аз в нем, трубы велегласнее вопиет глаголя [Благовестник на Ин. зач. 24, лист 105]: [Зде воньми разумне о причащении тела и крови Господни, како подобает веровати, ядыи Мою плоть, и пияй Мою кровь, во Мне пребывает, и Аз в нем. И ты можеши не токмо по тайному причащению ясти и пити плоть и кровь Господню, но по иному образу. Ибо плоть яст кто, егда по детели проходит действенное, нуждна бо делателна плоть. якоже и детель есть трудна. Кровь же пиет яко вино веселящее сердце, виденне глаголю, яко безтрудно виденное, паче же труду покой, зане питие без труда паче, нежели брашно]. Благовестник на Иоанна. Виждь разум словес блаженнаго Феофилакта. Первее рече: И ты можеши не токмо по тайному причащению ясти и пити плоть и кровь Господню. Что есть по тайному причащению? По тайному причащению есть, егда кто приемлет усты и сердцем в чистей совести, животворящее тело Христово, под видом хлеба, и пречистую кровь Его, под видом вина, по преданию Господню. Но и по иному, рече, образу. По коему иному образу? По добродетелному. Егда кто содержит без нарушения веру святыми апостолами преданную, седмию вселенскими соборы запечатленную, егда кто всяцем образом тщится проходити житие свое добродетельми украшенное: Чесому нас по премногу научает блаженный Никита иже от Ираклии сице глаголя [в толкован. на стих, втораго слова на святую Пасху, святаго Григория Богослова, Соборник, лист 635]: [Причастятбося божественному Агньцу и Слову по коегождо уда мысли, кождо по своем чине и силе, и данней тому благодати Духа. рекше: Главы убо, иже от неуказателных начал свободна отнюд имущу яже о богословии словеса веру имея. ушию же, иже божественная словеса с художеством приемля, и послушлив Богови тех ради, даже до смерти бывая. очию же, иже тварь духовне разумевая, и вся яже по чюству же и уму словеса непреткновенне во едино славы Божия собирая исполнение. Перси же, иже сердце богословных исполненно имея видении. Руку же, иже ничтоже отъиде по заповеди дел леностию совершая, но все имея готово и доблественно ко исполнению божественных законов. Души, еже по детели действо. Утробу же, иже раждательное души присно, поточно имея умножимо духовными видении, и несгараемо воспалителное к божественно смешению, безстрашнаго желания рачительство имея. Внутренним же, иже сокровеннейшим взысканием же и разумом, ума глубины Божия испытуя, и неизреченных насыщаяся таинств. Стегнома же, иже слово надлежимо имея душевно, и страстной части, и весма отрицая той вещное движение. Колену же, иже к лежащим и недугующим, верою милосердне по промыслу прекланяяся, и еже к нам Слова воспевая схождение. Голени же и ноги, иже при вере и добродетели и разуме, непоколебима имея душевная шествия, и незыблема. Сице снедаем и приобщаемся комуждо по мере Агнец Божии бывает, претворяя к себе Духом причащающихся]. Ельма же убо всеми уды человек проходя добродетелное житие, желаяй огнепально причаститися плоти и крове Господни, но не могий, причащается по силе и мере добродетелей божественныя благодати. Тем и рече святый Феофилакт, но и по иному образу. ему же согласно и святый Никита Ираклийский изъявляет, яко кииждо от праве верующих во Христа Бога, и проходящих добродетели, по мере веры и добродетелей причащается плоти и крове Христовы, сице глаголя [в толковании, стих 26, втораго слова св. Григория Богослова, Соборник, лист 687]: [Якоже кождо веровавших Богу, по своей силе духовне Христу сраспинается, по действу греха, овым убо единому и самым тем страстем, ов же ниже о страстех воспоминанием. Сице кождо нас в дому некоем особочинием, еже по добродетели прикладствующе ему устроения, закалает Агнец, и прищащается Тоговы плоти, и насыщаетсяIсусом. Комуждо бо свой бывает АгнецIсус Христос, якоже кождо вмещати, и ясти Того может по мере, яже в коемждо веры, и благодати подаемыя от Духа. Овому убо сице, овому же сице, обретается весь всему, и всем вся бывая]. стих 26, на святую пасху. Зде убо вонми прилежно. Аще по сказанию блаженнаго Феофилакта глаголющему: И ты можеши, не токмо по тайному причащению ясти и пити плоть и кровь Господню, но и по иному образу, рекше, по мере веры и добродетелей. Аще по научению Никиты Ираклийскаго, кождо нас верных в дому некоем особочинием, еже по добродетели прикладствующе ему устроения, закалает Агнец, и причащается Тоговы плоти и насыщаетсяIсусом. Комуждо бо свой бывает АгнецIсус Христос, якоже кождо вмещати и ясти Того может по мере, яже в коемждо, веры, и благодати подаемыя от Духа. Чесо ради в толикое нужды время, егда благочестивосиятелнаго архиерейства во всех концех России не ощущаем, егда православнаго священства отнюд не обретаем, от него же бы годствовало причаститися, телу и крове Господни, невозможно, иже туюжде православно кафолическую веру, юже святии апостоли насадиша, святии отцы соборне утвердиша кроме всякаго примесу ересей имать, иже тыяжде содержит догматы, ихже Господни ученицы предаша, иже таяжде соблюдает предания, яже святая древлеправославная церковь содержала и содержит, иже тщится житие свое, поелику сила есть, добродетельми украшати, желая вкусити устнами плоти и крови Христовы, по тайному образу, но не могий, по иному образу, рекше, по добродетели прикладствующе ему устроения, закалати Агнца, и причащатися Того плоти, и насыщатисяIсуса? Поистинне беспрекословно может. Зане комуждо свой бывает АгнецIсус Христос, якоже кождо вмещати и ясти Того может по мере, яже в нем веры, и благодати подаваемыя от Духа. Аще бы невозможно было имущему веру непорочную веру христианскую, веру святоотеческую, и добрая дела, и огнепалне желающему прчаститися плоти и крове Христовы, но не имущему где, толиких и таковых ради благословных вин, ихже многократне воспомянухом, без причащения приумножение благодати Божия прияти: не бы блаженный Феофилакт рекл: И ты можеши не токмо по тайному причащению ясти и пити плоть и кровь Господню, но и по иному образу, сиесть с верою правою проходиши житие добродетельное. Не бы святый Никита Ираклийский глаголал: Яко кождо нас верных в дому некоем особочинием, еже по добродетели прикладствующе ему устроение закалает Агнец, и причащается Тоговы плоти, и насыщатисяIсусом. Но понеже и божественный Феофилакт и святый Никита, согласно научают, яко кождо верных может по мере добродетелей, закалати Агньца, и причащатися Тоговы плоти, и насыщатисяIсусом. Убо и ныне кождо нас верных, не имея где причаститися чювственне животворящия плоти и крове Христовы, может особочинием, еже по добродетели прикладствующе ему устроения закалати Агньца, и причащатися Того плоти, и насыщатисяIсуса. Понеже комуждо свой бывает, по словеси Никиты, АгнецIсус Христос, якоже кождо вмещати и ясти Того может по мере, яже в нем веры, и благодати подаемыя от Духа. И аще тако есть, якоже и есть, убо и ныне кийждо от имущих веру праву, и дела добрая, закалает Агнца и причащается Тоговы плоти, по мере веры и добродетелей, и насыщаетсяIсуса, может всякаго кроме прекословия, наследник царствия небеснаго, снаследник же Христу быти.

Глава, 6.

Во святей церкви вся службы, праздницы, причащения, и жертвы уставлены, не иного чего ради, точию дабы человек очистился от грехов своих.

Рцы убо ми, о возлюбленне! чесо ради во святей православнокафоличестей церкви уставлены службы, праздницы, причащения и жертвы? Не того ли ради, яко да очистится человек от грех своих, и вселится вонь Бог? и в лепоту. Попремногу убо научает ны сему святая древлеправославная церковь, сице глаголющи: [Первая польза во освящении, якоже есть за живых жертвою безкровною, отпущения ради грехов, тако и за умерших. Вторая в причащении, яко Христос в нас живет, и мы в Нем, по реченному: Ядыи Мою плоть, и пияй Мою кровь, во Мне пребывает, и Аз в нем [Ин, глава 6]. Третия полза, живот вечныи наследуем, якоже таможе святое писание свидетельствует: И ядыи Мя, и той жив будет Мене ради. Таможе ниже: Ядыи хлеб, се жив будет вовеки. Четвертая польза, яко свободни бываем от бесовских искушений, понеже егда ощутит в нас живущаго Христа, и не имать наветовати на нас]. Катихисис малый [лист 31]. Обаче и всякая добродетель, есть жертва и поклонение духовно. Ибо всякия ради добродетели, оправдается человек, еже есть из грешника осиянием благодати Божия изменяется в праведника [Стефан Рязанский, лист 1033]. И спасению сподобляется, и небесному царствию наследник бывает. Якоже ясно о сем видим во евангелии учителном, в неделю о самаряныни, идеже тако вещает: [Купно же всяка духовна добродетель, жертва и поклонение духовно есть. Тогда убо изволиши, рече жертву правде. Всякия бо добродетели ради, оправдится человек, и спасению сподобляется, и небесному царствию наследник будет]. Понеже убо творяй заповеди божественныя, есть любяй Бога, любяй же Бога возлюблен будет и самем Отцом небесным, и Сын Его возлюбит его. якоже сам Господь пречистыми своими усты рече [Ин. зач. 48]: Имеяй заповеди Моя, и соблюдай их той есть любяй мя, а любяй Мя возлюблен будет Отцем Моим, и Аз возлюблю его. И к нему придева, и обитель у него сотворива. Егда бо убо будет человек храм одушевлен, и богоздан Божии, и Отец и Сын и Святый Дух живет в нем, отстоит та душа богоносива ,от всякия любве, церквей зданных, и жертв видимых, собор множества, и праздник человеческих, ниже в горе оной, ни во Иеросалиме желает поклонитися. Внутрь бо имать в себе Отца, внутрь же Сына Архиерея, внутрь Дух истинный огнь, внутрь Жертвенник, чистую совесть, внутрь очистилище грехов, духовную слезу, внутрь вышнии Иеросалим, радостную душю. И сие не свое си глаголю, но слыши блаженнаго Анастасия, игумена Синайския горы, сице о сем вещающа [в книзе своей, глава 2. И патерик Иеросалимский, слово 17]: [Вопрос: Кто суть истиннии поклонницы, иже ниже в горе, ниже во Иеросалимех поклонятся Богу и Отцу, идеже во Иеросалимех не поклонятся благоразумно яко ни во ином месте на земли ничтоже бо Иеросалима зде честнейши? Ответ: Страшно убо воистинну, и дивна слышания вопрошения, и сего ради ответа и разрешения явленнейша не ведыи, зане не всем вмещати божественных таин слышания, обаче от показания некоего священна муж священных, ихже ныне в плоти сущих, яко явственно реченное сотворим. Шед некто от здешних, мужу отшелнику молчальствующу, и рече ему: Дивлюся отче, како сице терпиши отлучен быти от святыя церкве, и от тоя причащения, и святых собрании? К нему же отвеща человек Божии, и рече: Вся собрания и службы, и праздницы, и причащения, и жертвы, о человече, сего ради быша, яко да очистится человек от грех своих, и вселится Бог вонь, по иже от Христа реченному: Яко приидем Аз и Отец Мой, и обитель в нем сотворим, и вселюся в них и похожду. Егда убо человек храм одушевлен и богоздан будет Божии, и Отец и Сын и Святыи Дух и живет и ходит в нем, отстоит та душа богоносивая от всякия любве церквей зданных, и жертв видимых, собор множества, и праздник человеческих, и ниже в горе сей, и ни во Иеросалимех желает поклонитися Богу. Внутрь бо имать в себе Отца, внутрь же Сына Архиерея, внутрь Дух истинныи огнь, внутрь жертвенник чистую совесть, внутрь очистилище грехом духовную слезу, внутрь вышнии Иеросалим радостную душю. Прочее яко духовен духовныма очима, духовныя жертвы приносит. Дух бо есть Бог, и покланяющиися Ему в Дусе истинною достоит покланятися. Вся бо видимая временна суть, якоже рече Павел, аще жертвы, аще приношения. Невидима же вечна, иже суть в Дусе истинно в сердцы бывающи, ихже око не виде, и ухо не слыша, и на сердце человеку прежде пришествия Христова не взыде, яже уготова и откры нам. Сия же вся сподобишася стяжати, яко обожився вселением Божиим, и той прочее в нем. Паче же и себе чтет, зря свою плоть обитель Божию, и дом, и жертвеник, и святилище Богу сущь. Сицевый же ни небеса, ни аггели, ни жертвенник видимыи, ни ино что в мире, или паче мира чтет, множае своего тела церкве, в нем же зрит исполнение Святую Троицу живущу]. глава 2. Виждь убо, аще сего ради во святей церкви уставлены службы, праздницы, причащения, и жертвы, яко да человек очистится от грех своих, и вселится вонь Бог. Но и всяка же добродетель духовна, есть жертва и поклонение духовно, еяже ради оправдается человек, сиесть изменяется из грешника осиянием благодати Божия в праведника. И спасению сподобляется и небесному царствию наследник бывает. Тем благоявленно, яко творения ради добродетелей, сиречь исполнения заповедей божественных, вселяется вонь Бог. И такова душа имущая в себе Бога, нарицается церкви свята и честна, и божественныя тайны совершаются в ней. Явственно о сем засвидетельствует преподобный Ефрем Сирин сице глаголя: [Душа бо имеющи Бога в себе, церкви наричется свята и честна, и божественныя тайны служатся в ней. И тщатся присно силы небесныя посетити ю, понеже Господь вселился есть в душю. И аггели и небеса веселятся о ней, и тщатся почтити душю, понеже церкви наричется Владыки их]. слово 83. И понеже убо добродетелнаго ради жития вселяется в человека Бог, и бывает таковаго душа церкви свята и честна, и божественныя тайны в ней служатся. Яко внутрь имать в себе Отца, по сказанию блаженнаго Анастасия [глава 2], внутрь же Архиерея Сына, внутрь же Дух истинныи огнь, внутрь же жертвенник, чистую совесть, внутрь очистилище грехом, духовную слезу. Сего ради таковый человек, иже имать житие свое украшено. яко бисерием многоценным, духовными добродетельми, аще и не сподобится некия ради вины благословныя, яко не имать православнаго священника, от него же бы возмогл прияти божественныя тайны, причаститися пречистаго и животворящаго тела и крови Христовы, не имый священства, не разоряет закона, по реченному преподобным Ефремом: Не закон разоряют. не приемлюще священства держати, не лишится наследия горняго Иеросалима [слово 111]. Зане имея в себе Бога, добродетелнаго ради своего жития, по мере добродетелей своих, непрестанно причащается без причащения благодати Божия, и спасению сподобляется, и наследник царствия небеснаго бывает.

Тем благоявленно, яко и ныне сущии христиане, иже имут веру православную, и дела богоугодная, аще и не могут причаститися устнами тела и крове Христовы, яко не имут православнаго священника, но могут по мере веры, и добродетелей своих, и кроме причащения причащатися благодати божественныя, и сподобится спасению, и наследниками царствия небеснаго быти.

Глава, 7.

Аще кто некия ради нужды, не имать где и от кого причаститися, обаче зелне желает, таковый яст тело и кровь Христову, и кроме причащения, единым теплым желанием и верою.

Вемы бо воистинну вемы, яко велие сие таиньство, и неизреченное Божие милосердие к нам грешным, еже под видом хлеба предаде животворящую плоть свою верующим вонь ясти, и под видом вина пречистую кровь свою пити, да очистит ны от всякаго греха, и вселится в ны, и сотворит ны наследники царствия небеснаго. И кто бы от ум имущих дерзнул таковаго дара пренебеснаго отрицатися вкусити, таковыя трапезы царския причастником быти, таковыя пищи пребожественныя насытитися, аще бы древнее благочестие в церквах Божиих соблюдаемо было, аще бы святая древлеправославнохристианская вера ненарушима содержима была, аще бы законы и уставы церковныя без повреждения сохраняемы были, аще бы пастырие апостольския престолы украшающии благочестием сияющии были, аще бы священницы православнии в церквах совершающии были; Но всех сих вышепредреченных не имамы. Не имамы древняго благочестия в церквах соблюдаемаго. Не имамы в них святыя православныя веры непорушителне содержимыя. Не имамы законов, и уставов древлецерковных в них неповрежденне сохраняемых. Не имамы престолонаместников апостольских благочестивосиятелных. Не имамы православием украшенных священников. То како дерзнем, в таковой церкви, в ней же вся изменишася, вся превратишася, вся древняя анафеме и клятве, о чесом в первой части, и зде на своем месте имать рещися, предаются, и от таковых священников, иже анафеме и клятве от святых отец, якоже напреди речется, отсылаются, причаститися? Блаженный Иоанн Милостивый вопиет глаголя [в житии святаго Иоанна Милостиваго, глава 46]: [Аще и весь живот ваш от какия нужды или напасти безпричастни пребудите, не обретающе соборныя церкве, можете спастися]. Ты же како противоборствуя толикому светилнику дерзаеши глаголати, яко отнюд невозможно без причащения спасения получити? Что убо, еда, иже непорочно живый, и Богу благочестно служа, во всяком благочестии и чистоте добродетелей сияя, сам себе храм Богу творя благими делы, на всяком месте, и везде благоугождая Богу, непрестанно и чисте Ему служа вся дни живота своего, не может кроме сея видимыя церкве, и причащения получити? Не веси ли яко истиннии поклонницы не требуют места определеннаго, ведят яко везде есть, присудствуяй Бог, по реченному псалмопевцем: На всяком месте владычествия Твоего. Ниже церкве, сами бо себе церковь одешевлену благими делы сотворяют. Якоже о сем божественный Афанасий Великий в вопросоответех своих вещает сице глаголя [к Антиоху, вопрос 24]: [Вопрос: Котории суть истиннии поклонницы, ниже в горе оной, ниже в Иеросалиме, но духом и истинною покланяются Богу? Ответ: Сии суть иже в пустынях и горах и в вертепех, и в разселинах земли живуще, иже кроме собрания церковнаго, делы благими, божественным Духом просвещаеми, духом и истинною покланяются Богу Отцу нашему, иже есть на небесех, непорочно живуще, и Богу благочестно мудренно служаще, во всяком благочестии и чистоте добродетелей сияюще, и не требуют церквей, или места, но самы себе храмы творяще благими деланьми, на всяком месте, и везде благоугождают Богу, непрестанно и чисте Ему служаще вся дни живота своего]. вопрос. 24. И аще убо, по божественному Афанасию, Богу благочестно служащии, во всяком благочестии и чистоте добродетелей сияющии, не требуют церкви, или места, яко сами себе храмы сотворяют благими делы, на всяком месте и везде благоугождающе Богу, непрестаннои чисте Ему служаще вся дни живота своего. То чесо ради без причащения невозможно спасения получити, и наипаче ныне в толикое нужды время, егда не имамы православнаго иерея, от него же бы лепотствовало причаститися? ей возможно. Не веси ли яко службы, праздницы и причащения в церкви уставлены, не иного чесо ради, точию, да человек очистится от грех своих, и спасен будет; Аще невозможно, како святый Иоанн Милостивый глаголет [в житии, глава 46]: Аще и весь живот ваш, от какия нужды или напасти безпричастни пребудете, не обретающе соборныя церкве, можете спастися? Что убо лжет ли? да не будет. Аще истинну глаголет, якоже и есть. убо благоявленно яко возможно. Аще возможно, кая убо нужда в таковую церковь ити, идеже благочестие изменено, идеже вера христианская отвержена, идеже предания святых апостол отриновена, идеже догматы и уставы святыя древлеправославныя церкве попраны, идеже священная правила божественных апостол, и богоносных отец, седми вселенских и девяти поместных собор уничтожаются, идеже трисоставный крест хулится, идеже знамение двоперстнаго сложения, в нем же вся тайна благоверия христианскаго заключается, анафеме предается, и причащатися. Причащаяйбося еретическаго причащения, едино тело с ними бывает. Быв же с ними едино тело приятия ради причащения их, не имать ли быти и сонаследник им, идеже они будут? вашему оставляю разсуждению вы судите. Аз бо вем златокованную трубу, вселенныя проповедника, Иоанна глаголю Златоустаго сице о таковых вопиюща [Маргарит, в слове о лжеучителех]: [Иже бо друг врагом царевым есть, сей не может друг царев быти, но купно со враги погибнет. и горшая подъимет]. Аще невозможно, како и новии учители научают, яко аще кто нужды ради некия не имать где и от кого причаститися, обаче зелне желает, таковаго Христос тайноположник, и намерение благое венчает. Понеже таковый яст тело Христово и кроме причащения, единым теплым желанием и верою. Сице о сем Стефан митрополит Рязанский, в книзе своей Камень веры пиша глаголет: [Якоже вожделение крещения в некиих случаях и нуждах вменяется вместо самаго крещения, сиречь, егда кто не крещен водою и Духом, страждет и умирает за Христа. или кроме страдания, егда умирая, и презельным вожделением крестися желая, не имать крещающаго, ниже времени удобна ко крещению. Тако случай бывает, в нем же вожделением евхаристии вменяема вместо самыя снеди евхаристическия, сиречь, егда умирающь, и сея божественныя пищи тепле желающь, кроме всякия своея вины, не имать причащающаго таин Божиих служителя: тогда Христос тайноположник и намерения благая венчающь, идеже нужда без вины остудения творит щедротами своими оскудевающая наполняет, и ползы от евхаристии бываемыя, таковому дарует. И о сицевом мощно рещи, яко тело Христово яст без евхаристии, единым теплым желанием, верою же и любовию. О таковом случеи некто от учителей рече: Что готовиши зубы и чрево? веруй, и ял еси. Сими словесы умирающаго, не имущаго же, без вины своея, причащения, укрепляет, да не тем оскудением во отчаяние впадет, но паче да имать упование на неизреченныя щедроты Божия, яко и самое презелное желание и вожделение причащения, вменяется ему в причащение. Что (рече) готовиши зубы и чрево? веруй и ял еси]. догмат о евхаристии, часть 2, глава 1.

Видиши ли яко не токмо древнии святии учители, яко Феофилакт и Никита Ираклийский, от них же ов убо глаголет [св. Никита, в толк. на ст. 26]: Кождо по мере веры и добродетелей, закалает Агнец, и причащается Тоговы плоти, и насыщаетсяIсусом. Ов же [в толку на зач. 24, от Ин.]: и ты можеши не токмо по тайному причащению ясти и пити плоть и кровь Господню, но и по иному образу: Но и от новых Стефан Рязанский глаголет: Яко не имеяй причаститися некия ради нужды, яст тело Христово без евхаристии, единым теплым желанием и верою, и таковому вожделение вменяется вместо самыя снеди евхаристическия. И аще тако есть, якоже и есть, то кая нужда с таковыми сообщатися, иже суть отлучени от святыя соборныя апостольския церкве? Аще бо беда велия, еже молитися со отлученными, яко таковый и сам отлучен, по божественных апостол правилу. Много паче не сравненно причащатися с ними. Что убо негли того ради тщишися, аще и от отлученных святыя церкве причащатися, яко аще и может кто по мере веры и добродетелей причащатися плоти и крове Господни, но не может толикия благодати Божия, елика в самом причащении приемлема бывает, получити: таковаго мздовоздаяния, каково в самом приятии причастия приемлемо бывает прияти? Суетно есть сие непщевание, и неполезно. Ты точию соблюди веру православную ненарушимо, содержи догматы, законы, предания и уставы древлеправославныя церкве непозыблемо, сохрани заповеди Божия без ущербления, удаляйся греха, содержи чистоту, люби Господа Бога Твоего от всего сердца, и желай всеусердно причаститися тела и крове Его, егоже аще некия ради благословныя вины, и не возможно получити: но толико будеши имети много мздовоздаяние, елико бы в самом приятии святаго причащения приял бых. Ибо, по сказанию блаженнаго Никиты Ираклийскаго, аще кождо нас по мере веры и добродетелей, закалает Агньца, и причащается Тоговы плоти, и насыщаетсяIсусом. Благоявленно яко самую туюжде благодать, юже бы и в самом причащении имел прияти, приемлет: самое тоежде мздовоздаяние, еже бы в самом приятии святаго причащения получил, получает. Слыши убо о сем некоего и от новых учителей, толико ясно глаголюща, яко и самый невежда всякаго кроме труда может познати, иже глаголет тако [книга Диалогизм, часть 2, беседа 8, лист 136]: [Не усумневайтеся ни изнемогайте умом вашим благоговейнии, и Бога любящии души, воистинну веруйте, яко равную мзду и благодать и милость у Бога обретаете, за сицевое ваше благоговение, за сицевую ревность, и намерение духовное, аки бы воистинну уже причастилися. И намерение бо сицевое неизреченне благоугодно есть Господеви, свидетельствующу о сем учителю церкви Ипонийския, сими словесы: Веруй и вкусил еси, и причастился еси. пребуди в чистоте, бегайте греха. Что же вам предложи церковь Христова веруйте, повинуйтеся, и заповеди Божия соблюдайте, ГосподаIсуса от всего сердца любите, и вседушно причаститися тела Его желайте. Аще же когда доити сего не возможете, толико будете имети мздовоздаяние, елико в самом причащении святом прияли бысте]. Диалогизм, беседа 8.

И аще убо равную мзду, и благодать и милость обретают у Бога, желающии вседушно причаститися, но не могии, сущу священнику, за сицевое свое благоговение, за сицевую ревность и намерение духовное, аки бы уже причастилися, и толико будут имети мздовоздание, елико бы в самом причащении прияли быша. То чесо ради ныне толицей нужде належащей, яко не сущу православному священнику, имеяй веру православную, и дела богоугодная, и желаяй огнепалне причаститися, но не могий, равныя мзды и благодати и милости у Бога не имать обрести, за сицевое свое благоговейнство, за сицевуую свою ревность и намерение духовное, и толикаго имети мздовоздаяния, елико бы в самом причащении приял был? Поистинне обрящет и возъимеет.

Темже убо аще по сказанию церковных учителей и древних и новых, имеяй веру праву и дела добрая, желаяй огнепалне причаститися божественных таин, но не могий некия вины ради благословныя, спасение получает, и наследником царьствия небеснаго бывает: Аще преподобнии отци и пустынницы, в самое сияние благочестия, за неимением близ себе священника, ови многовременно, ови же чрез всю свою жизнь, не вкусивши устнами животворящаго тела и крове Христовы пребыша, обаче не лишишася духовнаго и благодатнаго просвещения: Аще всеусердне желающии причаститися, но не могущии, без причащения приемлют приумножение благодати Божия: Аще по мере веры и добродетельнаго жития, кождо верных закалает Агньца, и причащается Тоговы плоти, и насыщаетсяIсуса: Аще по гласовом святых веры ради и добродетелей вселяется в человека Бог, егоже душа бывает свята и честна, и божественнныя тайны в ней совершаются: Аще имущии веру православную, и добродетелное житие, и желающии вседушно причаститися, но не могуще. таково же мздовоздаяние имети будет, каково бы в самом причащении имели быша: Ныне убо содержащии древлеправославную веру без нарушения, соблюдающии вся догматы и предания святыми апостолы преданныя без малейшаго ущербления, сохраняющии чины и уставы святыя древлеправославныя церкве без повреждения, и тщащиися, Богу споспешствующе, житие свое благими делы украшати, желающии же всеусердно причаститися таин Христовых тела и крове, но не могущии, яко выну в гонении пребывают, яко не имут видимыя церкве, но невидимыя, яко не имут благочестивосиятелнаго архиерея, от него же бы производилося православное священство, яко не имут православнаго священника, имже бы и от него могли причаститися желанием, и прияти приумножения благодати Божия? ей могут. Еда не могут по мере веры и добродетелей своих закалати Агнца, и причащатися Тоговы плоти, и насыщатисяIсуса? всячески и могут и имут. Еда не могут вечнаго спасения получити, и наследниками царствия небеснаго, якоже они преподобнии пустынницы не вкусившии устнами животворящия плоти и крове Христовы, аще доконца веру святоотеческую соблюдут и добродетельми житие свое украшено возъимут, быти? воистинну и могут, и получат, и будут.

 

Предел вторый.

О винах новодействуемаго причащения, яже с древлецерковным православием не согласуют.

 

Аще убо и во всех вещех зданных и действуемых, вины обретаются и суть, обаче наипаче во святых церковных тайнах, яко во святем причащении, тако и в прочих от всех авторов, и древних и нынешних, согласно и свойственно полагаются четыре: Действительная: Имже что бывает, яко в действии евхаристии повелением Божиим действует совершитель. Материалная: Из нея же что бывает. яко евхаристия от хлеба и вина. Формалная: Чрез еже что видотворится, яко ехаристия чрез благословение священника, и пришествие Святаго духа. Кончателная: Яко творити и прелагати существо хлеба и вина в плоть и кровь Христову. О коих винах древнии в Катихисисе Велицем и малем поведают, блаженный кир Гавриил Филаделфийский, о седми тайнах. новии, в книзе Ормолоксогион, во Акосе, и в книзе О седми сакраментах, и прочих. Кия вины к совершению каждаго таинства, толико нужднопотребны суть, яко без них ни едино таинство совершатися может. Которыя вины и в новодействуемем причащении, пребирающе опасно разсмотрим.

 

Глава, 1.

О вине действительней.

Первая вина: В тайне убо святаго причащения, действующая вина, аще первоначалная и сущая, сам есть Христос Бог первый и превышший Архиерей уставивый тайну святаго причащения [Катихисис вел., гл. 64], безкровне в великий четверток, под знамением хлеба и вина, егда возлегий на тайней вечери прием хлеб, благословив, преломи, и даяше учеником своим, и рече [Мф. гл. 26, зач. 108]: Приимите, и ядите, сие есть тело Мое. И прием чашу, благодарив, даде им глаголя: Пийте от нея вси, сия бо есть кровь Моя новаго завета, за многия изливаемая во оставление грехов. Обаче всяк тайнодействитель святаго причащения, есть действующая или органная вина по святым отцем. Еже утверждает и блаженный кир Гавриил Филаделфийский сице глаголя [книга О седми тайнах церковных]: [Творительное убо виновное, еже далече есть, Бог, а еже внимателное священник]. Ему же должно быти всячески православну, первоначалней вине Христу согласну, согласну православнокафоличестей церкви, законно рукоположену. еже учители церковнии утверждают, сице в Катихисисе малом засвидетельствует: [Аще кто восхощет причаститися тела и крови Господни, первее да имать, по описанному церковному чину с постом и благоговением особным приготовити себе, потом исповедатися пред священником православным]. лист 30. Новодействуемаго же убо причащения, действителя или органныя вины, еже есть священника, вера не видится нам быти православна, святоотеческаго православия чюждь, согласия к древлеправославней росийстей церкви не имать. Принеси убо того согласие на среду, и истяжем благоразсудительне, аще имать согласие неразньственно к первоначальней вине Христу? всяко не обрящем. Ибо пречистый наш ВладыкаIсус Христос, егда восхождаше на небеса от горы Елеонския воздвиг руце свои, благослови ученики своя двема перстома [Лк. зач. 114], еже древлегреческая церковь во изображении праздников, и самовидитель святый Лука евангелист, на образе Богоматере иже на Тихфине, самовидне иероглифическии написав, утверждая засвидетельствует [история о Тихфинском образе]. Священнодействуяй же священник не двема перстома, но пятию персты, таинства и везде выну осеняя благословляет, еже новопечатныя книги, и самое видение, показующе свидетельствуют. Чесо ради священник оный не обретается первоначалней сущей вине Христу согласен. Истяжем ли того согласие, к древлероссийстей православней церкви; Обретаем оного во всякой службе, во всяком действии, несогласна оной, несогласно знаменающася, несогласно литургисающа, и всякое чинодействие, всякое служение, несогласно древлероссийстей церкви благочестивей, и совершающа, и действующа. Истяжем ли того православие; Обретаем того древлецерковное святосодержание, еже в сложении крестнаго знамения, православно уставленное, (еже вседоброе веры таинство в себе содержит и замыкает) анафеме и проклятию (смелодерзостне) предающа, и ересию арианскою, несторианскою, и арменскою, и хуляща и порицающа. Кое святое предание двоперстнаго сложения, тако святии богоноснии отцы всепрекрасно похвалами ублажиша, всепредивным таинством предивно увязиша: яко святии апостоли святонаучиша предаша, и сам Христос Бог своя апостоли своим благословением научи богодействително. О чесом доволственно выше в первой, во втором пределе, в первой главе речеся.

Обретаем онаго, святое древлеправославныя церкви содержание, и всетаинственное аггелския песни славословие, еже в сугубом аллилуия возглашаемое, ересию многодерзостне порицающа, и клятвам пресмелостне подвергающа. Котораго святаго сугубаго аллилуия пения, яко древлевосточная церковь содержащи имеяше, еже старогреческия рукописныя книги свидетельствуют: тако древлероссийская святая церковь неизменително содержаше, еже святых архиереов и чюдоносных мужей саморучныя книги свидетельствующе утверждают. Еже святии премудрии учители своими писаньми похваляюще позлащают. О чесом доволно выше во втором пределе, первыя части изъявися.

Обретаем того, пресвятый и животворящий трисоставный крест Христов, [Имже и на немже животворивая содеяся Спасова смерть] дерзостно от просфир отлагающа, и от таинства святыя евхаристии отмещуща, и брыньским хульственне порицающа. Которым всепресвятый трисоставный крест, яко в таинстве животворныя Спасовы смерти послужив, преестественно облагодарствовася: таинство евхаристии, своим неизменным образом, и знаменованием, и всякое таинство освящая облагодатьствует. О чесом пространственнее непреди имать рещися.

Обретаем оного, и прочих премногих святых отец преданий, и содержаний и действ безчисленных нарушителя, и смелостна отменителя, яко свободным языком, и дерзновенными устнами, святая древлецерковная предания, не токмо отмещуща, но и хулами и поношеньми облагающа, яко новопечатныя книги, само показующе изъявляют. от них же в книге Розыске творения Димитрия Ростовскаго, пресвятое имя Владыки нашего ХристаIсус, со единою иотою по старопечатным книгам славословимое, поречено, яко бы не знаменует сим Спасителя, но равноухаго, сице [Розыск, часть 1, статия 1]: Не исповедуют (бо рече) Спасителя и Исцелителя душ наших, и вправду в них инIсъ, не истиннаго боIисуса Спасителя и Исцелителя исповедуют, но некоего равноухаго.

В книзе Скрижали Никона патриарха, двоперстнаго крестнаго знамения сложение, всезлобне и неправедне хулит порицая [Скрижаль, лист 796], ариевою пропастию, и злобожным разделением.

В Пращице же Питирима Нижеградскаго во ответех, 30, 35, и 36, тоежде древлеправославное трех перстов сложение, еже великим и двема последнима таинство Святыя Троицы исповедается, злохулне укоряя нарицает мудрованием, еретическим, ариевым, македониевым.

В книзе Увете, тоежде древлеправославное крестнаго знамения сложение, неправедне порицает, арменскою ересию [Увет, лист 199, на обор.].

В книзе Розыске, тоежде Христово преданное православное двоперстнаго сложения знаменование, поносительне хульствует глаголя [Розыск, часть 2, статия 3]: Приличнее им раскольником, на своем арменском сложении написати имя демонское, на едином персте, «де», на другом «мон», и тако будет на двух перстех седети демон.

В книзе Увете, тоежде святоправославное крестнаго знаменивания двоеперстное сложение злохульственне порицает, глаголя [Увет, лист 67]: Поднесше скверныя своя руки горе, (ибо суть скверны яко неправо о Святей Троице разсуждают) сия творят.

И аще убо священник священнодействуя несогласен есть первоначалней вине Христу, во благословении. Аще несогласен древлеправославней церкви в действиях показуется. Аще несогласен древлероссийскому благочестию обретается. Аще сопротивная древлеправославней церкви совершает. Аще хульствует и поносит древлецерковныя догматы и уставы. Како убо будет согласно новодействуемое от него причащение древлеправославноцерковному причащению? Аще бо догматы, предания, уставы, чины, и службодействия, новопременена содержимая им не суть истинна, како будет от него новодействуемое причащение истинно? Глаголет бо в книзе Катихисисе сице [Катихисис великий, глава 4, лист 16]: [Понеже бо они истинныя и правыя веры Христовы не имеют, то како пречистыя и святыя тайны Христовы у них быти могут]. глава 4. Аще бо сему попустим быти истинному, остается яко древлеправославныя церкве, еже да не будет ниже кому когда от сущих христиан тако помыслити о сем не бе истинное. Аще же убо оное древлецерковное бе и есть и будет неотрочне по выну истинное, и просветителное приемлющих е, душ, убо сие новодействуемое несть истинное. Аще же несть истинное, како может быти очистительно грехов приемлющаго е? Аще сему речем, очистителну быти грехов, обрящется яко древлецерковное не бе, еже далече да будет мысли сынов древлеправославныя церкве, очистително. Понеже велие несогласие между собою, в догматех, преданиях, чинех, и действиях имут. Аще же оно бе и есть, и навеки будет очистително, убо сие безпрекословно несть очистително. Аще несть очистително, то како возможно таковаго причащения причаститися? Причащайбося его причащается и нехотя, и оных новопреданных догмат, чинов, предания, действие и хуление, ихже он содержит. Аще же ли она не суть приятна, паче же нелепо, убо и новодействуемаго причащения, яко не освящающаго, есть бегательно и удалително.

Глава, 2.

О вине материальней.

Вторая материалная сущая, и вещество причащения, аще по всем автором яко по древним, тако по нынешним, свойственно и согласно показуется, (хлеб пшеничен квасен, солию же осолен, и вино с водою имущее свою естественную целу сладость). [Катихисис великий, глава 64, лист 264]. Якоже и Гавриил Филаделфийский глаголет [книга О седми тайнах церковных, лист 111]: [Вещество убо божественныя литоргии есть, хлеб и вино с водою, не бо от иного коего либо вещества, или от плода прилучившагося, или сикера, не от истинныя пшеницы, и вина истиннаго, божественное тайнодействие совершати нам Господь, и божественнии Его апостоли предаша]. Обаче и вещи и действа при действии причащения бываемыя, к материи приписуется. Какова суть: Седмопросфирное служение: выимание частей ис просфир: исповедание веры: и прочая последования, описуется в Служебницех. О чесом в книзе Катихисисе малом, вещь хлеб пшеничный, и вино с водою глаголет, в ней же при последовании иных потреб, положенных в Служебниках, от священника совершения причащения бывает, идеже пишет тако [Василий В., Златоуст, Иаков в литоргии, Дионисий о церковном священноначалии, глава 3]: [Первее егда священник имать совершити святую литургию, с намерением ума да совершают ю, еже святая церковь, соборне убо описала своим, и не соборне. Ктомуже да имать приналежащую вещь совершенную сущу и целу, еже есть, хлеб чистыи пшеничныи квасныи, и вино естественное с водою мало смешеное. Потом и иныя потребы, без них же никакоже может святая литоргия совершитися, якоже о том достаточно имамы науку, в Служебниках церковных, или в Потребниках]. лист 29. В новодействуемей же убо литоргии, или причащении, материя, хлеба пшеничнаго, и вина с водою мало смешеннаго, аще убо и подобно полагается: но прочия вещи, и глаголы при причащении бывающыя, не согласны, елико древлеправославней российстей церкви, толико и древлевосточней разньственны обретаются. Ихже егда во испытание действ, вещей, глаголов, доброразсудительне внидем, яже при литоргии, яже в литоргии, церковне преданне положишася, многа несогласия, многа разньства, многия противности, в новодействуемей литоргии, и с древлепечатными книгами несослагателная обрящем. Кая несогласия, разньства, и противности, вся трудно и многовременно изследовати, обаче отчасти некая удобнейшая ко исчислению предлагаем.

1: Святая древлеправославная великороссийская церковь, приемши от святыя восточныя церкве, содержаше непременителне даже до лет Никона патриарха, в священнодействии святую литоргию, над седмию просфирами совершати. Первую, за Господьский хлеб. Вторую, в честь и память Пресвятыя Богородицы. Третию, в честь и славу небесных сил бесплотных. Четвертую, о здравии и о спасении патриарха, и всего священническаго чина. Пятую, о здравии и спасении благочестиваго царя, и царицы, и чад их. Шестую, за всех православных христиан живых. Седмую, за усопших. В новодействуемей же литоргии, две просфире, еже за царя и патриарха особные отложене, и вместо еже по старопечатным Служебникам, тайно действовати литоргию над седмию просфирами, новоуставленно служити на пяти просфирах. Но сие тайнодействие святыя литоргии, еже служити над седмию просфирами по премногу многшии древлепечатнии Служебницы засвидетелствуют, от них же немногия некия и зде во утвержение наше предлагаем.

В Слежебницех перваго патриарха Иова, егоже рукоположи вселенский патриарх Иеремия Констянтинополский, изданных в лето 7120. В Служебницех святейшаго Филарета патриарха, егоже рукоположи Феофан патриарх святаго града Иеросалима, изданных в лето 7131. Святую литоргию над седмию просфирами велено служити. В Служебницех Ермогена патриарха, Иоасафа, изданных в лето 7148. и Иосифа изданных в лето 7159, и в первониконовских, изданных в лето 7160, во всех сих над седмию просфирами повелевает служити. В Потребницех изданных при Иоасафе и Иосифе патриархе, повелевает службе святыя литоргии над седмию просфирами служити. В Потребнице рукописнем святаго Дионисия архимандрита Радонежскаго, литоргия Златоустова повелено на седми просфирах служити. Сие седмопросфирное служение святыя литоргии, и белороссийския печати Служебники явственно утверждают. В Служебницех киевопечерския печати, изданных в лето 7137, такожде на седми просфирах повелевает служити.

В Служебницех Виленския печати в четверть, изданных лета 1624, литоргию Златоустаго велено на седми просфирах служити. В Служебницех Виленския же печати в четверть, изданных в лето 1641, повелено литоргию Златоустаго такожде на седми просфирах служити. В Служебницех в полдесть, печатных благословением епископа Львовскаго в Стрятине, лета 7112, литоргию Златоустаго велено служити на седми просфирах. Сие седмопросфирное служение литоргии и святии восточнии учители утверждают. Сице святый Симеон Фессалонитский в книзе своей [новопреведенной], от главы 92: Сице иерей в квасныи той хлеб, из середины хлеба чинно изимает, являя и всем яко от нашего естества, а не из инаго существа воплотися Спас. От главы 93: Сам же иерей иную восприят просфиру, от иже посреди печати единую изъем частицу копием, в честь и в память приносит Богородицы, и сию одесную иже на дискосе священнаго хлеба полагает. От главы 94: Ошуюю же аггелов и святых всех, зане вторыи сии имеют чин, паче же ниже сравнимую весма коея преимуществу, чрез нея же просвещаются, и из нея первыя и мы чрез святых спасаемся, яко и чрез нея Богу соединяемся. [Скрижаль, глава 75, лист 193] Сие убо совершив иерей, потом и прочия приносит частицы, предварително убо о архиереи, понеже священства есть источник, потом о всем священническом чине, служащем тайне, подобает прежде восприяти трудившемуся, якокже, и Павлу мнится. Потом о верных царех поборающих о благочестии, и спасении их, и христолюбиваго народа. По немже о игумене, аще в монастыре действуется, и о прочей братии, аще же в храме некоем, о воздвигшем, или память совершающем, и о прилежащих тамо, и еще о принесших, и о тех иже дары принесе. И последовано же и о еже о Христе усопших, и всего освященнаго чина, и монашескаго, и паки всех православно скончавшихся верных. Сие святаго Симеона исчисление по всему согласует великороссийския церкве, еже на седми просфирах служити божественную литоргию. Ибо якоже у святаго Симеона, по трех просфирах приносити повелено о архиереи и о всем священническом чине: тако и в древлепечатных Служебниках, четвертая просфира приносится о всем священничестем чине. И яко же у Симеона, по священничестем чине указует, приносити о верных царех, и всех христианех: подобне, и в древлепечатных Служебниках, пятая просфира приносится, о благочестивых царех, и князех, болярех и воех их, и о всех православных христианех. И якоже Симеон по царех повелевает приносити, в монастыре о игумене и о всей братии, в храме же о здатели храма, и присудствующих ко храму, и дары приносящих: сице и в древлепечатных. Шестая просфира приносится, в монастыре о игумене и священницех и причастницех и всех братиях, и служебницех, и за их же хощет здравии приносити и за себе. И якоже Симеон последовано повелевает, за усопшия приносити: равнообразне, и в древлепечатных Служебницех, последняя седмая просфира приносится за усопшия. Согласно древлеблагочестивыя великороссийския церкве содержанию, и научению святаго Симеона Фессалонитскаго, и святии отцы Афона в Номоканоне, иже издан бысть в Москве, при патриарсех Иоасафе и Иосифе, еже на седми просфирах служити святую литоргию научают сице глаголюще [Номоканон афонских отец, печатан в Москве, правило 13]: На святой проскомидии, божественныя литоргия, седмь просфир да имаши: Первая, за Господьскии хлеб. Вторая, Пресвятыя Богородицы. Третия, за святых. Четвертая за патриарха. Пятая, за царя и царицу, и за чад их, а идеже будет к цареву величеству послати, то выимати по именом, всем по просфире. Шестую же, за всех православных, за живых человек, ихже хощеши поминати. А седмую, за усопших едину прямо со другою особно, кождо чином своим, якоже в Служебниках указано и изображено имаши. правило 1. По премногу, яко сей чин в содержание древлеблагочестивыя великороссийския церкве, еже на седми просфирах служити литоргию, древлеправославныя восточныя предание бе, и о новых учителей Питирим Нижеградский в Пращице утверждает глаголя [Пращица, лист 345]: В прошедших летех, до правления старопечатных книг, аще и служили на седми просфирах. (ниже) ибо тако тогда повеление было великороссийския церкви, и не по противлению восточной церкви. ответ 12.

Но аще убо святая древлеправославная великороссийская церковь, имеющи содержание чин, и обычай, до лет Никона патриарха, еже на седми просфирах служити божественную литоргию, не по противлению восточней церкви, то почто таковый чин и содержание пременяти? Или не явно есть преступление таковых, еже святыми богоносными отцы писаное Духом Святым предание во времена подобная положенныя развращати своя же некая мняще быти, паче Духа Святаго лутчая учения вносити [книга Кирилова, лист 305]? Святая же бо древлеправославная восточная церковь определила, на седми просфирах божественную литоргию совершати не туне ниже всуе, но во образ оныя Христовы трапезы, на ней же седмию хлебами четыре тысящи народа насыти, яко высочайшия и духовнейшия. Еже и сами новопременители оныя трапезы засвидетельствуют, и в новосочиненной своей книзе Жезле сице глаголюще [Жезл, часть 2, возобличение 19]: [Не невемы и некиих церквей обычая, яко над седмию служити просфирами, во образ оныя трапезы, егда Христос Господь, изволи седмию хлебы четыре тысящи народа насытити]. часть 2. Сии же седмопросфирную службу отринувше, уставиша над пятию просфирами служити, во образ сея трапезы на ней же Христос Господь пятию хлебы, пять тысящь народа насыти, мняще сию чюдодейственнейшую оныя быти. якоже сами утвержают глаголюще [Жезл, ниже]: [Но лутчи есть над пятию хлебы, пять тысящь народа насыти. Ибо большее есть чюдо пятию хлебами пять тысящь насытити, неже седмию хлебами четыре тысящы]. Обаче аще и мнят быти болшее чюдо в пяти хлебах: но несть бо болшее. В седми бо хлебах духовнейшее, и высочайшее таинство является, нежели в пяти, чистоты ради таинства седморичнаго числа. Явственно о сею трапезу Господню, святый Никита Ираклийский, в толковании словес святаго Григория Богослова, на пятьдесятницу свидетельствует глаголя: [пять (рече) хлеб бывающее от пяти чювств естественно о Бозе учение, в нем же питаются иже по пяти чювствах токмо живуще, и не могущеся воздвигнути крылы ума воззрение высочайшее. Ниже: И не и еще срастны безсловесныя части душа очистивших. А совершенных же пища много лучши и вышши есть, четыретысящнии бо тии. и мнии пятитысящных по числу, злии бо множайшии, и родные добродетели имут. Седмь же хлеб бяше чистоты ради и таинства числа. Чисто бо и действенно седморичное число, и избыток же знамения ради седморицы чист и нетленен. Божествена убо сия и недоведома зрения и духовна, седмь бо духовна дарования]. стих 7. Подобне сему и святый Феофилакт в толковании словес Господних глаголет: [В седми хлебах духовнейши и высочайши таинство являет, неже в пяти хлебах, ядят же просвещеннии и насыщаются]. Благовестник, лист 43 [на зач. от Марка, 32].

2: В старопечатных и древлеписанных святых книгах, во святей литоргии, егда режет Агнца, повелено глаголати сице [Служебник в чине проскомидии]: Жрется Агнец Божии вземляй грехи. В новопечатных же Служебниках напечатано, и повелено глаглати, вместо множественнаго числа грехи, единственным числом грех, сице: Жрется Агнец Божии вземляй грех мира. Что убо еда ли Христос прииде на землю, един некий грех взяти, сиречь очистити, мира, рекше хотящих веровати вонь? а не и вся? никакоже никако, но вся. Понеже убо святый Иоанн Предтеча, егда узреIсуса к себе грядуща, не рече [Ин., зач. 3]: Се Агнец Божии вземляй грех миру, но грехи миру. Яко не един некий прииде очистити грех, но вся. Темже и пресвятый наш Владыка Христос Господь. пречистыми своими усты, егда исцелив разслаблена жилами, глаголя [Мф. зач. 29; Мк. зач. 7]: Дерзай чадо, отпущаются греси твои. неким от книжник помышляющим, что сей хулит. ведыи помышления их, рече к ним: Но да увесте яко власть имать Сын Человеческии на земли отпущати грехи. Не грех, рече, но грехи.

3: В древлепечатных Служебниках повелено якоже от третия просфиры за всех святых, едину часть выимати: тако и от прочих просфир, за здравие, и за упокой, по единой части выимати определено. В новопечатных же Служебниках, елико от третия просфиры не едину, но девять частей выимати уставляют, толико и от прочих просфир, многая части ис коейждо просфиры, нынешнии архиереи выимать повелевают. Но древнии рукописнии Служебницы, при великих князех писаннии харатейнии и бумажнии, еще же и святых чюдотворцев, яко преподобнаго Димитрия Вологодскаго, тако и прочих, от третия просфиры, не якоже нынешния девять, но едину часть, согласно древлепечатным выимати повелевают: и от прочих просфир за здравие, и за упокой, такожде по единой части, подобно старопечатным указуют выимати.

4: Святая древлеправославная церковь имеюще содержание, по часех пред литоргиею в царских дверех безотлагательства глаголати отпуст. Нынешнии же архиереи в новопечатных своих Служебниках, еже по часех пред обеднею в царских дверех глаголати отпуст, отложиша. Сей же убо отпуст и священнии отцы священным своим собором, иже бе в Москве, при царе Иоанне Васильевиче, в лето 7059, в книзе Стоглаве, неотложно повелевают творити.

5: Во святую и великую неделю пасхи, и в прочия Господьския праздники, и в воскресныя дни, и в седмичныя, на литоргии, на третием антифоне в древлеправославней церкви приглашашеся аллилуиа трижды [во уставах, и Апостолах, и минеях, и триодях]. Нынешнии же архиереи, в новопечатных своих книгах напечатавши, единожды аллилуиа повелеваша припевати. Еже убо трижды, на третием антифоне аллилуиа приглашати, многия древнейшия книги засвидетельствующе утверждают, не точию старопечатныя московския, но и иныя многочисленныя, яко харатейныя, тако древлеписменныя, и белороссийския, ихже отчасти в достоверствие зде предлагаем.

Во Уставе древлехаратейнем, принесеннем из грек, преподобныма Савою и Варсонофием Тверскима. Во Уставе харатейнем, в десть в последовании пятьдесятницы. Во Обиходнице харатейнем. Во Уставе старописаннем болшем.

В книгах московския печати: Во Апостоле печатнем в Москве, в лето 7072, при царе Иоанне Васильевиче, и при митрополите Афонасии. Во Уставех печатных при Ермогене патриарсе. Во Уставе печатном, при Филарете патриарсе. Во Апостолех и минеях месячных, и триодех цветных, и трефолоях тогожде патриарха. Во Уставех, Апостолех, минеях общих и месячных, трефолоях, в триодех цветных печатных при Иоасафе патриарсе. Во Апостолех минеях общих и месячных, триодех цветных печатных при Иоасафе[Иосифе?] патриарсе.

В книгах белороссийския печати: Во Псалтырех с воследованием Краковския печати, печатных в лето 1491. Во Псалтырех с воследованием Острожския печати, выданых в лета 7107. В Часословах Острожских же печатных, лета 1612. Во Уставех печатных в Вилне, в лета 1622. В Служебницех печатных в Киеве, в лета 1620. В книзе новом завете, печати князя Окринскаго в еве, року 1611.

Еще в триодех постных, изданных в Москве, в лето 1664, по описанию их з греческих харатейных, и сербских древних книг печатных.

Во всех сих вышепредреченных книгах на литоргии на антифонах повелевает аллилуия, согласно старопечатным московским, по трижды приглашати.

6: Нынешнии архиереи в новопечатных своих книгах, пред последи поемым трисвятым приложиша, сила, сице: сила Святыи Боже и прочее, яко Скрижаль на листе 673, Ирмологии на листе 157, явствуют. Коего прилога сила, в древлеправославней церкви пред трисвятым певаемаго отнюд не беяше, явственно показуется, яко в древлепечатных книгах его не обреташеся, в древлехаратейных и писменных всячески не имяшеся. В толковых литоргиях древлеписанных на хартии и бумазе несть. Подобне, и в древлехаратейной книзе, евангелии воскресном, преведеном святым Кирилом Философом, в лета 6406, напоследи в толковании литоргии, в трисвятом прилога сего, сила не написано, согласно старопечатным книгам. Но и в преведенной литоргии, святаго Иакова брата Божия, сего прилога несть, в ней же пишет тако: Таже певцы трисвятую поют песнь: Святыи Боже, Святыи Крепкии, Святыи Безсмертныи помилуй нас. Но виждь дерзость их новых учителей, како не устрашишася к толикой и таковой трисвятой песни прилог приложити; юже первее серафими воспеша без прилога, сила. Святый собор четвертый вселенский без прилога же укрепи. Сам Бог чюдом аки печатию некоею запечатле. Якоже святый Иоанн Дамаскин о сем засвидетелствует сице глаголя [книга 3, глава 10; Пролог, лист 93]: Глаголют убо церковную историю сочинившии яко молебствующу в Констянтинополи люду, ради некоего богогневнаго прещения, при Прокле архиепископе бывшаго, случися восхититися детищу от люда, и тако научитися от аггельскаго некоего учения трисвятой песни, Святыи Ьоже, Святыи Крепкии, Святыи Безсмертныи помилуй нас. И абие возврщшуся детищу, и ученое возвестившу, воспети песнь все множество, и сице утолитися прещению. И на святом же и великом вселенском четвертом синоде, в Халкидоне глаголют, сице воспетися трисвятая песнь предадеся. Тако содеянным того святаго синода вносится. Смех убо сущно и играние, аггелы наученную, и наведения престанием веровавшуюся, и толиких же святых отец синодом укрепившуся, и утвердившуся, и первее от серафимов воспевшуюся трисвятую песнь, яко триипостаснаго Божества изъявителную, к’нафея, аки попратися безсловесным, мнением, и убо исправитися, яко серафимы прелогствующаго. Но о самоугодия, да не глаголю безумства! Мы же сице глаголем, [аще и демони растерзаются] Святыи Боже, Святыи Крепкии, Святыи Безсмертныи помилуй нас.

7: Святая древлеправославная церковь определила, в литоргии святаго Иоанна Златоустаго, (еже явствует в Служебниках) целовати диакону святое евангелие. И в самом входе глаголати ко иерею: благослови владыко предложение се. иерей благословит рукою на святая крестообразно глаголя: Благословено предложение священных, и прочая. Сие все ныне в новопечатных Служебниках отложено и несть во употреблении.

8: Древле во благочестивей церкви повелено еже по апостоле пред евангелием, священник взем честный крест, и знаменався им, целует и глаголя: Силою и заступлением, и прочая. И потом благословив диакона. И диакон целует такожде. И еже диакон пред святым престолом творит три поклоны. Сие все в нынешней церкви отставлено и не действуется. К сим же святая церковь повеле диакону пред чтением святаго евангелия возглашати сице: Благослови владыко благовестити благовестие святаго славнаго и всехвалнаго вселенскаго благовестника апостола и евангелиста, имярек. Ныне же сие испревращено тако: Благослови владыко благовестителя, святаго апостола и евангелиста имярек.

9: Святая древлеправославная церковь имеющи содержаще чин, еже пред евангелием и по евангелии, слава Тебе Господи. В нынешней же великороссийстей церкви усугубивше с припеванием поют сице: Слава Тебе Господи, слава Тебе. Но сего прилога, слава Тебе, в древлепечатных и писменных Служебницех отнюд несть. И в протчих старороссийских книгах всячески не обретается. И во Обиходницех монастырьских, Кириловстем и Соловетстем, слава Тебе Господи, без прилога же написано видится. Но и в книзе Старчестве, во главе 35, во Указе чтения евангелия в келии, и в поучении старческом ко ученику, повелевает пети, слава Тебе Господи, без приложения, слава Тебе. И в певчих древних Ирмолоях всюду воображено зрится, слава Тебе Господи, без прилога, слава Тебе. К сим же сие древлецерковное содержание, еже пети, слава Тебе Господи, без прилога, слава Тебе, сам Господь Бог запечатле аки некоею печатию чюдотворением. О чесом блаженный Симеон Метафраст, в житии преподобнаго Даниила Столпника, повествуя о некоем детищи, приведеном к преподобному, еже чюдотворне прия глаголати молитвами его свидетельствует сице [Минея четия древлеписменная в житии Даниила; и новопечатная декабря, в 11]: Егда святому евангелию хотящу честися, и диакону рекшу, от Матфея святаго евангелие чтение, предвари всех отрок, и возопи, слава Тебе Господи.

10: В древлепечатных Служебниках по положении святаго евангелия на престоле повелено литон распростирати на святом престоле, идеже поставити святая. В новопечатных же сие отложено.

11: На великом выходе древлеправославная церьковь повеле священнику и диакону, егда входят в церковь, глаголати: Всех вас да помянет Господь Бог во царствии своем, и прочая. И паки противо западных дверей глаголати: Да помянет Господь Бог всех вас, и прочая. И паки входящим в царския двери глаголати: Благословен грядыи во имя Господне, Бог Господь и явися нам. Сего всего ныне не глаголют священник и диакон.

12: Во святей древлеправославней церкви обычай бе, на велицем выходе, во время херувимския песни, всенародне полагати три поклоны Богу. Ныне вместо того повелено припадати к священнику носящему святыя дары. А иже до земли тогда покланяются, тех глаголют, прельщатися. Якоже в Никоновой Скрижали, идеже пишет тако [Скрижаль, лист 312]: Аже же суть неции, иже поклоняются до земли, якоже прежде освященным даром, егда входит священник, яко мнитмися, прельщаются. Но в древлецерковных святых книгах, сия три поклоны, неотложно повелевает полагати. О чесом ниже предложенныя свидетельства имут явити:

Во Псалтырех в полдесть печатных в Москве, в лето 7154. Во Обиходнице Соловетстем, преподобных Зосимы и Саватия, во главе 13, повелевает, на воскресных литоргиях полагати на херувимской песни, егда понесут перенос, два поклона в пояс, а третий в землю. Во главе же 15, на повседневных литоргиях повелевает полагати, на переносе три поклоны в землю. В книзе Старчестве, во главе 13. Во всех сих вышепредложенных книгах на великом выходе повелевает три поклоны полагати. Но и в Летописце о избрании богоизбраннаго царя на царство Михаила Феодоровича, в чине поставления его повествуется, яко и он полагаше сия три поклоны, в нем же пишет тако: [И егда на херувимской песни сотвориша выход, тогда царь и великии князь снем с себе царскии венец, и постави на златом блюде, и поклонися трижды до земли, и паки на себя возложи царскии венец]. И не токмо в древних но и в той же новопечатной Скрижали, в послании Паисия архиепископа Констянтинополскаго, в сказании литоргии, на велицем выходе поведает со всяцем благоговением людем покланятися ниско, идеже пиша глаголет о священнице сице [Скрижаль, лист 678]: [Молит о всех людех глаголя: Всех вас да помянет Господь Бог во царствии своем. Подобне и людие молятся тожде благоговением и умилением покланяющеся ниско]. В новопечатном же Жезле противохульственно, древлеблагочестивую святую церковь, нынешнии архиереи поносят, сказующе яко бы тогда твари покланяются, яко Творцу. и Божию честь воздают хлебу и вину, подобящеся безумным еллином, не боги за Бога похвалившим. В нем же пишет тако [Жезл новопечатный, лист 42]: [Твари покланяшеся, яко Творцу, Божию честь даваше хлебу и вину. Не сам токмо но и прочих наставляше тако творити. Имже делом уподобися безумным еллином не боги за Бога похвалившим]. И паки глаголют укоряюще: [Понеже хлеб тогда наг совершенныя благодати. убо ему не подобает поклона Божия давати]. лист 42. Коих стретая блаженный Симеон Солунский посрамляя их укорително порицателство, нарицающих предложенныя дары к Богу. идола, сказуя их горших злачестивых никоноборцев быти. Оправдая же поклоняющихся глаголет сице [в книзе 2, во главе 78]: [Да постыдятся хуляще, и еже от Бога отчюждения да убоятся. Ибо не идолослужим мы, божественным даром припадающе, никакоже: но возложенным Богу чрез молитвы даром, и еще несовершившим, честь воздаваем, якоже освященным принесением, якоже принесенным чрез божественныя молитвы: якоже местообразным сущим, тела Христова и крови. Глаголющии сия убо приносящаяся о них, якоже идоли прежде Господня гласа: но прочия молитвы имеют. Кий ответ имети будут весма, иже предложенныя в предложении дары Богу, идола. (оле) именующия. И злочестивых иконоборцев горшыи сии, яко святыя иконы святыя убо, якоже образы истиннии. дары же возложены Богу, и во еже быти тело и кровь Христову, приносимыя. Аще убо священным иконам, честь и поклонение воздавати долженствует, множае, паче самим даром местообразным сущим, якоже Великии глаголет Василии]. книга 2.

13: Премениша в херувимской песни: в старописанных и старопечатных: трисвятую песнь припевающе. Паки в старопечатных, по конце херувимския песни, аллилуия единожды пети повелено. А в новопечатных, аллилуия трижды. Но сего еже трижды пети аллилуия, в древних книгах, яко печатных, тако в писменных, и певчих отнюд не видится. И в самой древнейшей харатейной книзе, в толковании литоргии, святаго Кирила Философа, по херувимстей песни, единожды пети аллилуия засвидетельствуется, в ней же пишет тако: херувимская песнь являет предшествием, и ветреники серафимским образом. И иже видяще мысленныя силы, и лики аггельских сил, невидимо вопиюще песнь аллилуия. есть же и подобно погребению Христову, в нем же Иосиф снем тело с креста, повит плащаницею.

14: Древле во святой литоргии, по херувимстей песни, повелено священнику и диакону полагати три поклоны, пред престолом с молитвою, и прощение творити пред престолом, и целовати святый престол. В новей же ныне литоргии вся сия отставлена. Но приложено вново глаголати пятьдесятый псалом, и тропари умилителныя, а неведомо какия. И вместо еже диакон глаголет: Возми владыко святая: возми владыко, а святая оставлено. И вместо еже диакон возлагает воздух на десное рамо: на левое рамо возлагати новопредано.

15: В древней литоргии, егда священник покрыет воздухом святая, повелено глаголати тропарь, благообразный Иосиф, весь. В новопечатных же точию конец тропаря: Но в третии день воскресе Господь, даруя мирови велию милость, а начало отложено. И приложены два тропаря: Во гробе плотски. яко Живоносец. и паки, благообразныи Иосиф, без конца.

16: Древле в божественней литоргии, егда иерей прием кадило. кадит святая трижды. повелено глаголати сице: Ублажи Господи. [И прочая поряду:] и конец. Тогда возложат на олтарь Твой тельца. Ныне священницы кадяще. вместо единьственнаго числа телца, множественном числом глаголют: Тогда возложат на олтарь Твой телцы. В древлеписменных же убо и печатных святых книгах, везде обретается сие речение, единственным числом, телца, а не телцы. Ибо и сам царственный пророком пророк богоотец Давыд, Духом Святым прорече о телце, имущем заклатися за грехи всего мира на кресте, и датися в снедь верующим вонь, а не о телцах ветхозаконных. Явственно о сем божественный Иоанн Златоустый, толкуя, псалом 50, глаголет: [Тогда возложат на олтарь Твой телца. Сим прообразова страсти Господа нашегоIсуса Христа, причащение святых таин тела и крове Господне. Сии же бо пророк паки бедит ко яди сего телца, глаголя [псалом 33]: Вкусити и видите яко благ Господь]. Псалтырь толковая киевскаго перевода, псалом 50. И паки той же Златоустый, в слове в неделю о блудном сыне, на евангельскую притчю, еже отец обращения ради блуднаго сына, повеле заклати телца упитаннаго, сказует единаго телца, Девыя Сына, на жертвеннице закалаемаго, и не умерщвяемаго, сице глаголя [Соборник, лист 14]: [Приведше телец упитанныи, его же юница девая родила есть, приведше телца питомаго необученаго. (ниже) заколите, иже волею закалаемаго, заколите о животворящаго закалающих Его. заколите закалаемаго и неумерщвяемаго. заколите раздробляемаго, и раздроблющих Его освящающаго. заколите делимаго и неразделяемаго. заколите ядомаго от ведущих Его, и никогдаже иждиваемаго. заколите, иже закалающих Его блаженны соделовающаго, (ниже, лист 15) Таже и аггелом с небесе похваляющим и глаголющим. Свят Отец восхотевыи пожретися Тельцу упитанному. Свят Сын купно и Телец, иже присно закалаемыи, и присно живыи. Свят Утешитель Святыи Дух, иже жертву совершенно действуяй. Сим же внутрь сотворяем, старейшии сын с села пришед, слыша согласия и лики, и призвав единаго от отрок вопрошаше. Что убо суть сия? глас, рече, некии необычен оглашает ми уши. Пророк Давыд внутрь поет [пс. 50]: Тогда возложет на олтарь Твой телца. Той же паки понуждая, ту сущыя ко жрению глаголет [пс. 33]: Вкусите и видите, яко благ Господь]. Соборник, лист 14. И паки той же Златоустый: [Приидите видите на жертвенице, упитаннаго Телца, Агнца Божия закалаема, и не умерщвяема]. в неделю 4-ю поста. И понеже убо сам Бог Отец повеле заклати единаго Телца упитаннаго, Егоже Девая родила. Понеже сам Бог Сын Божий, в священном своем евангелии единаго телца воспомяну, егоже повеле отец блуднаго ради сына заклати. Понеже сам Бог Дух Святый усты пророка Давыда о едином Телце упитаннем, Агнце Божием, прорече. Понеже божественный Иоанн Златоустый, уста Христова, единаго же Телца Агнца Божия, на жертвеннице закалаемаго изъяви. Благоявлено яко древлеправославная церковь исповедающи единаго Тельца нас ради волею пожершагося Сына Божия, глаголаше: Тогда возложат на олтарь Твой телца. Убо нынешнии священницы глаголющии: Тогда возлажат на олтарь Твой телцы, многих телцов изъявляют быти, но киих. не вемы.

17: По кажении древле на святей литоргии [в службе Златоустове], повелено иерею и диакону, пред святым престолом три поклоны положити до полу, глаголюще в себе молитву: Боже очисти мя грешнаго, и прочая. И прощение сотворити, и молитву глаголати пред целованием святых. И по символе, трисвятое глаголати. Ныне же в новопечатных все сие отложено, и не глаголется.

18: Повелено священнику, егда держит над святыми дарами воздух, глаголати символ святыя веры. Но колика и какова несогласия, нынешний священник имать в своем символе с дервлесодержимым святою древлеправославною церковию, виждь.

В древлепечатных:

И во единаго ГосподаIса.

Рождена а не сотворена.

И Марии девы вочеловечьшася.

Страдавша и погребена.

Егоже царствию несть конца.

И в Духа Святаго Господа истиннаго.

И во едину святую соборную.

В новопечатных:

И во единаго ГосподаIиса.

Рожденна несотворенна.

И Марии девы и вочеловечьшася.

И страдавша и погребена.

Егоже царствию не будет конца.

И в Духа Святаго Господа животворящаго.

Во едину святую соборную.

Божественнии же отцы перваго, и втораго вселенских соборов, сочинивши святый символ, страшными клятвами запечатлеша, во еже бы не ктому кто дерзнул что новое приложити или отложити, или склад и иоту едину пременити. Но якоже предаша Духом Святым наставляеми, тако и да чтется от всех верных, в роды родов вовеки. Якоже о сем преподобный Максим Грек явственно сказует, сице глаголя: [Священныи символ еже есть исповедание православныя веры христианския, изложен бысть первым собором, 318, святых отец, в Никейском граде, при Великом царе Констянтине, изложен бысть ими до сего точию, верую и в Духа Святаго. И вторыи вселенскии собор 150 святых отец собравшихся на духоборца Македония, хуляща на Святаго Духа, и глаголюща Его создана, а не Создателя, приложили святии отцы богословие, еже о Святем Дусе. Третии же во вселенскии собор святых отец, 200, собравшихся во Ефесе на христоборца Нестория. (ниже). Заключи и крепце заповеда страшными клятвами, святыи символ изложенныи прежнима двема соборами, дабы никтоже прочее дерзнул, по малоумней своей дерзости. Ни приложити что отнюд к нему, ни уложити из него, ни едину черту, ни иоту, еже есть ї, ни пременити ни едино речение, ни писмени, от яже в нем, иже изрекоша тако: Аще кто последи дерзнет таково что во святем символе православныя веры, да будет проклят, и чюждь всякаго благословения, и собства христианскаго. (ниже). Не глаголи убо яко мала разнь есть дерзаемое ныне новое аки мудрование. Страшная заповедь их, равне подлагает анафеме, и прилагающаго и отъемлющаго, и пременяющаго наименшее писмя. Недобра убо такова их похвала, да не глаголю дерзость. Под туюже бо анафему, и их подлагает претворящих богодухновенная словеса].

19: В древних святых Служебницех повелено егда речет иерей благодарим Господа, людем возгласне отвещати: Достойно и праведно. Ныне же в службе в новопечатных Служебниках, егда речет иерей: Благодарим Господа, приложено, к достойно и праведно, есть покланятися Отцу и Сыну и Святому Духу Троице единосущней и неразделней. Но сего приложения, еже есть, есть покланятися, в древних книгах печатных писменных, и харатейных нигдеже обретается, и в толковой литоргии, в древних книгах писменных в харатейных, и в древлехаратейной книзе святаго Кирила Философа, всячески несть. Ктомуже в новопечатной литоргии, Иакова брата Божия, к возгласу, егда речет священник: Благодарим Господа; людие вопиют: Достойно и праведно. А приложения сего, еже покланятися Отцу, и протчая, несть. Еще же и Арсений Суханов самобыв во грецех, во 157 годе, написав в книги своей третией части Проскинитария, о литоргии поемей во грецех, повествует: таже патриарх: Благодарим Господа. людие: Достойно и праведно. И виждь разум нынешния церкве и древния. Тогда убо священник подражая перваго священника Христа, иже прежде даже предаде таинство, благодари Богу и Отцу, такожде прежде таинственныя молитвы, понеже священнодействоваше святая призывает людей к благодарению Богу и Отцу, возглашая: Благодарим Господа: Людие исповедающе, глаголют: Достойно и праведно, сиречь благодарити. еже по премногу утверждает и новопечатная Скрижаль, сице глаголющи [Иоанн Нафанаил иерей, в толковании литоргии, глава 100, лист 461]: [Перваго Священника подражая, сиречь Христа, благодаряща Богу и Отцу, прежде даже предати таинство общения, и той прежде таинственныя молитвы, по ней же священнодействоваше святая, благодарение сие творит к Богу и Отцу, Господа нашегоIсуса Христа, глаголя: Благодарим Господа. И всем исповедающим и глаголющим: Достойно и праведно]. глава 100. Ныне же егда священник призывая к благодарению Богу и Отцу, возгласит: Благодарим Господа. Людие иное исповедающе глаголют: Достойно и праведно есть покланятися Отцу и Сыну и Святому Духу, Троице единосущней, и неразделней. Имже своим приложением противоборствует всем преже бывшим святым отцем, паче же всей древлеправославней церкви; но ниже со своими учители соглашается.

20: Святая древлеправославная церковь, во время, егда возглашает священник словеса Господня, приимете и ядите, даже до лет Никона патриарха, не име обычая покланятися. Ныне же нововведеся в нынешнюю церковь обычай странный. Древлеблагочестивей церкви противный. Повнегда бо возгласит священник: Приимите и ядите, абие вси покланяются. Каковый обычай есть латинскаго костела западнаго, отпадшаго благочестия. Доволно сие засвидетельствует, яко западнаго костела обычай, и от новых Иоаким патриарх Московский, иже зело возбраняет на оная словеса Господня полагати поклоны, в слове поучителном. еже чтено бе на соборе, в лето 7198, о поклонех. Яже на возглашение словес Христовых, приимите и ядите. ныне полагают в церкви, сице глаголют [книга Щит веры, в слове поучительном, чтенном на соборе в лето 7198]: [Сие поклонение ново прииде в Россию, от латинских обычаев. (И паки глаголет:) Яко обычай той есть западнаго костела, отпадшаго благочестия. Восточней же церкви, еяже предания, и чины, и обычаи, непретворно вси долженствуем хранити. не есть ниже бысть когда, еже в то время покланятися. (ниже) Имже в то время по древнему отцев наших обычаю. отнюд не подобает быти, ниже сообщницы латином будем, да не с ними и осуждени будем от Бога, отчюждающеся церкве православныя, матере нашея икрения. Глаголют бо закони священнии: Иже аще и малейшее что кафолическия церкве подвизая, есть еретик. И Златоуст святый глаголет: Веру превратиша, и мало нечто ново творят. И паки тойже: В вере, и мало изменяющым анафема. Зде же не малаго но величайшаго предания и обычая православная позывание и предвижение]. книга Щит веры. Понеже бо папежницы римляни, противно святей древлеправославновосточней церкви, яже исповедует предложенным даром, хлебу прелагатися в тело, и вину в кровь Господню, знамением креста и пришествием Святаго Духа, мудрствующе мнят, яко предложенный хлеб претворятеся в тело, и вино в кровь Господню, единеми точию словесы Господними, и сего ради тогда покланяются. Имже, и нынешняя великороссийская церковь последствующи смудрствуя покланяется на возглашение оных словес. Яже бо аще словесы и не являет себе исповедати, яко онеми едиными словесы Господними предложенный хлеб и вино в тело и кровь Господню прелагаются. Обаче самою вещию, самем сим делом показует себе исповедати, яко сими едиными токмо словесы пресуществляется хлеб и вино в плоть и кровь Христову. еже утвержает и Питирим в книзе своей Пращице глаголя [во ответе 192, лист 331 на обор.]: [Святейшии патриарх Иоаким написа, последуя древнему преданию святыя восточныя церькве: Понеже святая восточная церковь имеет мудрование православное, еже на божественней литоргии, предложенныи хлеб и вино, прелагается хлеб в тело Христово, а вино в кровь Христову, молитвою иерейскою, и креста знамением, Пресвятый и животворящий Дух приходит, и прелагается. А костел римскии иное имеет мудрование противное восточней церкве. мудрствует бо прелагатися хлебу и вину, точию едиными словесы Христовыми, того ради и молитву оную, еюже Дух Святыи над предложенныя дары приходит отставили: и узакониша, таковыя ради вины на оных словах покланятися, с тем намерением, яко точию теми едиными словесы предложенная прелагаются, хлеб в тело и вино в кровь, и с таковым мудрованием во оное время, патриарх Иоаким кланятися всеконечне отрече с запрещением, разрушая таковое римскаго костела противное мудрование]. ответ 192.

21: Паки нынешняя великороссийская церковь прияла обычай еретический, западнаго костела римскаго, отпадшаго православныя веры, звонити, егда возглашаются словеса Господня, Приимите и ядите, во един колокол. Коего нововводнаго древле во благочестивей церкви, еже звонити к возглашению словес Господних, обычай отнюд не бяше. Чтоже не бяше сего звону древле в России и в грецех, явственно вся древлецерковныя книги засвидетельствуют. И не точию древлецерковныя, но и от нынешних Иоаким патриарх Московский в новопечатной своей книзе, глаголемей Щит веры в вышепомяненном поучителном слове, в беседе, 3, якоже поклонение оно тако и звон сей отрицает, и обличает, сказуя, яко еже к словесем Христовым звонити, обычай есть западнаго костела. И поносит творящих сие: [Не ведяще суетнии, яко латинское сие нововводство, а не восточныя церкви предание, ниже древнии обычай]. И в лепоту. Понеже бо римляне сопротивно святей древлеблагочестивей восточней церкви мудрствующе, яко оными единеми Христовыми словесы, предложенный хлеб в тело и вино в кровь Христову прелагаются, уставиша почести ради при попе их близ стояще ударяти в колоколчик. По неколицех же летех прияша поляки, с темже костелным мудрованием звонити ко оным словам. По премногу сие утверждает и Питирим епископ Нижеградский, в книзе своего сочинения Пращице, сице глаголя [во ответе 193, лист 332]: [Патриарх Иоаким поминает латинскаго костела мудрование, о преложении святых даров: Понеже у них егда поют оная словеса, тогда при попе их близ стоя и ударяет в колоколчик. По некоторых же летех прияша поляки, с тем же костелным мудрованием, благовестити ко оным словам]. ответ 193. Откуду явственно видимо есть, яко и нынешняя великороссийская церковь, повнегда уподобителне латином, уставила к оным словам Господним в колоколчик звонити, сим своим обычаем от римлян привнесенным в Россию, аще и всеми образы тщится прикрывати себе от смудрствования им, яве показует себе смудрствовати в предложенных даров хлеба и вина в плоть и кровь Христову сими словесы.

22: К сим великороссийская нынешняя церковь, приемши нововводный обычай, противный святей древлевостоней и российской церкви, согласный же униятом и папежником, содержит, ему на литоргии на словеса Христова, иереом и монахом открывати главы. якоже новопечатный Устав, во главе 29, явственно показует. Коего обычая древле во благочестивей церкви всячески не бе. Явственно сие показуется от всех древних святых книг, елико ни во единой от них отнюд обретается таковое повеление, еже бы на словеса Господня открывати иереом и иноком главы. Доволно сие утверждают. Яко не бе сего обычая ни в Грецыи ни в России, и нынешнии гречестии премудрии учители самобратия, Иоаникий и Софроний Лихудиевы, в новосочиненной своей книзе Врачевании сице глаголюще: [Ни во едином святых отец, или синодов, или уставов обрящет кто яко во время Господних словес подобает открыватися иереом и монахом, кроме токмо, в некоем Уставе в новопечатном ныне на российском диалекте, в лето от создания мира, 7190, в главе 29. О еже когда подобает открывати главы. И сие бысть неразсмотрением от исправителя неведуща еллинский диалект, и поверившаго неким книгам, в Киеве или в Полше печатавшимся, от униатов на восточную церковь, в погибель известно душам простших человек. И горе им окаянным растлевшим тако книги святых отец, и смущающим божественная предания. В древних же уставех и новых, (славенских) и греческих не обретается, сие неразсмотривое, и противное православию приложение, еже в словеса Господня открыватися, кроме, якоже прежде рекох, в предреченном новопечатном Уставе, на российском языце токмо]. ответ 10.

23: Древле святая православная церковь, имеющи повеле пред причащением, егда приемлет иерей обема рукама потир со святым покровом, глаголати ему сице [Служебник]: Боготворящую кровь ужаснися человече зря, и прочая. В нынешней церкви в новопечатных сие отложено, и новоприложено: Сие прикоснуся устнам моим, и отъимет беззакония моя, и прочая. И повелено пети, воскресение Христово видевше. и светися светися. и о пасха велия, вся сия до конца. Сего всего в дервлеправославней церкви не бе на литоргии во употреблении.

24: Ныне в великороссийстей церкви привложа повелено глаголати священнику: Спаси Господи своя, и прочая. лик: На многа лета. Коего приложения отнюд в древлеправославней церкви не бе. К сим же новопредано пети: Видехом свет истинныи, прияхом Духа небеснаго, обретохом веру истинную, неразделней Троице покланяемся, Та бо нас спасла есть. Яко бы ныне свет истинный узрели, и Дух небесный прияли, и веру истинную обрели, а дотоле бытто и во тме неведения пребывали, и Духа Святаго не имели, и веры истинныя не обрели. Но что убо; егда ли в древлеправославней церкви, до правления истиннее рещи травления книг Никона патриарха, не видеша света истиннаго, иже просвещает всякаго человека грядущаго в мир [Ин. зач. 1]? И како толь премнози святии в России в чюдесех процветоша, егда не имеша Духа Святаго? И како премногия знамения сотвориша? еда не имеша веры истинныя? И како сице пребезчисленнии святии в нетлении мощей просияша? еда не покланяхуся Троице неразделимей? И како толицы и толь неисчетнии святии спасошася, и наслаждаются в немерцающем свете лицезрения Божия выну? Проявлено яко и видеша, и прияша, и обретоша, и покланяхуся, и покланяемся, и покланятися имамы  и имут. Та бо верующих ей истинно и спасла, и спасает, и спасти имать.

25: Святая древлеправославная церковь, по стисе, да исполнятся уста моя похвалы, последующе древлевосточней церкве, име обычай пети аллилуия единожды. Ныне же в церквах сопротивно оному поют, аллилуия по трижды.

26: Древле во святей благочестивей церкви благочестивый обычай содержашеся, еже на отпусте литоргии, егда священник возглашает: Благословение Господне на всех вас. (сие же глаголя) благословляет осенением, креста рукою люди, глаголя: Молитвами пречистыя Ти Матере, и прочая, глаголя: Людие глашают: Достойно есть. Сие в нынешней великороссийской церкви, от лет Никона патриарха отставлено и ни поется.

Прочая приложения, отложения, и изменения (в новодействуемей литоргии) продолжения ради оставляем, оставляем прилоги, отложения, и измены, елики в словесех, елики в речениях, елики в молитвах, елики в возгласех, в тропарех, песнех, и прочих действах речениих, ими же толь премного новопечатании Служебники обогатишася, яко несть молитвы, возгласа, несть периода, несть самыя коммы кия отменами, и приложениями не преправлены, вся сия множества ради претекающе оставляем самим благоразсудителным читателем, желателно потрудитися во оных. Но понеже убо толикия суть, и обретаются в новодействуемей литоргии отмены, толь премногая приложения и отложения в словесех и действах, толь множайшая несогласия к древлецерковному святороссийскому тайнодействию, толь многочисленая и таковая несходства, яже от святых отец клятве предаются, к древлегреческим святым учителем, якоже выше предпоказахом, то како может быти новодействуемое причащение самое суще тело Христово и самая сущая кровь Его? Не вем. Аще бо сие новодействуемое причащение есть сущее тело Христово. Благоявлено яко обрящется и нехотяще, (еже не даждь Боже ниже помыслити кому от сущих христиан) древлеправославныя церкви причащение не сущее быти тело Христово. Аще ли же оно самое сущее животворящее тело Христово было, якоже и было. убо сие новодействуемое безпрекословно несть сущее тело Христово. Зане толикими, и толь премногими отменами приложениями, и привнесениями в тайнодействии своем якоже предрехом, богатообилствующе от онаго разньствуем. И аще новодействуемое несть сущее, како может быти изнурително грехов приемлющаго е? и како приемляй е, приимет самого Христа, егда егда не суща Христова тела причащается? Како же и со Христом будет едино тело, не Его тело ядый? разве со еретики едино тело. И в лепоту, то како возможно прияти е? Аще бо толикия и таковыя отмены, приложения, отложения, и ересей привнесения в новодействуемей литоргии, при тайнодействии причащения содержащияся неприятна суть, како может быти приято новодействуемое причащение? Аще ли новодействуемое причащение лепотствует приимати; Всяко да будут и все вышепредреченныя отмены отложения, приложения, и латинских ересей привнесения при причащении действии, бываемая прията. Аще ли она не суть прията. Убо ниже новодействуемое причащение должно есть приято быти. Убо уне есть, аще весь живот свой, по словеси Иоанна Милостиваго, без причащения пребыти, нежели с еретики причащаяся, со онеми едино тело быти, и с ними купно совселитися во оном веце.

Глава, 3.

О вине формальной.

Третия: форма или вид святаго причащения по написанию и древних и настоящаго века авторов, словеса Господня, яже рече на тайней вечери, приимите ядите, и прочая, вкупе от священника со благословением бываемым, и с прочими последствующими глаголемыми глаголы, по чину от священника, нашедшу Святому Духу. Якоже свидетельствует кир Гавриил Филадельфийский глаголя [в книзе о седми тайнах, глава 8, 112]: [Виде же предводителне убо Господня словеса, еже приимите, ядите, сиречь, сие есть тело Мое, и еже, пиите от нея вси, сия есть кровь Моя новаго завета, яже за вы и за многия изливаемая, во оставление грехов, имея споследующыя и глаголемыя глаголы по чину от священника, якоже в божественной литоргии носится]. Сице в Катихисисе велицем [глава 64, лист 264]: [Вопрос: Кии есть вид, или видотворение сия тайны и жертвы? Ответ: Сия глаголы Господня, Приимите ядите, се есть тело Мое, за вы ломимое во оставление грехов. И пийти от нея вси се есть кровь Мою новаго завета, за вы и за многих изливаемая во оставление грехов. И сие творите в Мое воспоминание, сиречь, жрите и приносите со благодарением, и освящайте со благословением. О сем и Павел к коринфом пишет [к коринф. зач. 145]: Чаша благословения, юже благословляем, не общение ли крове Христовы есть; хлеб егоже ломим, не общение ли телу Христову есть; (Ниже) О сем святый Иоанн Златоустыи в третием томе, сиречь книзе о предательстве Июдином, сице глаголет: Якоже оно слово, еже рече Господь Бог, растите и множитеся, и исполните землю, единою речено бысть. и во вся времена совершителне есть, всегда к рождению естество прилагается: Сице и сие слово Господне. единою речено бысть, еже на всех престолех олтаревых даже до сего дни, и до пришествия Его, подает силу жертве. (ниже) Но ниже простыми молитвами содеяна бывает сия тайна, но благословением и освящением, якоже глаголет святыи апостол Павел: Чашю благословения, юже благословляем, не общение ли крове Христовы есть. Чашю благословляем сиречь вино в чаши освящаем, и глаголем глаголы Христовы, се есть кровь Моя, не проповедию се, ниже чтением действуют, но благословением. Якоже Христос благослови хлеб, тако и мы благословляем на божественней трапезе]. глава 64. Тако от новоизданных исповедание православныя веры, Скрижаль, в ней же пишет тако [лист 469]: [Священник преклонив главу молится тайно, (Ниже:) Низпосли (глаголя) на ны Духа Святаго, и на дары сия предложенныя, и обретаемыя пред Тобою. (Ниже) Таже священнодействует честныя дары, и жертва совершается вся]. глава 100. В сем убо тайнодействии, вид причащения, в нынешней великороссийстей церкви, аще и подобне Христову преданию, еже есть, приимите ядите, и прочая, от священника произносится. Но совершителное видотворения причащения, без негоже не может хлеб в тело Христово приложитися. и вино в кровь Его пресвятую претворитися, не согласно Христову преданию,  не согласно святых Его ученик и апостол научению, несогласно всея древлеправославнокафолическия, яко восточныя, тако великороссийския церкве содержанию содержит. Ибо пребожественный наш ВладыкаIсус Христос, предавый сию тайну учеником своим, благослови я, егда возношашеся на небо, двема перстома. Якоже богогласный Лука евангелист, в священном евангелии, на вознесение Христа Спаса глаголет: [Извед же их, (сиречь апостолов) вон до Вифании, и воздвиг руце свои, благослови я, и бысть егда благословяше их, отступи от них, и возношашеся на небо]. Како же персты своя божественныя сложив благослови, аще зде и не явствует во евангелии, обаче той же священный Лука повествовавый во евангелии Христа благословляюща, священным образописанием, благословящую Его десницу, светлее полуденнаго солнца, показующую благословение Христово, двема перстома изобразив написа. Еже на Тихфинском чюдотворном пречистыя Богоматере образе, егоже он написа при Клавдиеве кесарстве, явственно всем видимо есть. О нем же древле писанная история повествует сице: [Написа бо со образом Пресвятыя Богородицы, у Спасителя Христа руку десную благословляющу, три убо персты совокуплены, по образу неразделимыя Троицы, яко сыи от Троицы, воплощься от Девы. не разлучися от Отца и Духа: два же перста образуют божество Его и человечество, яко совершен Бог во двою существу. сиречь божестве и человечестве, во единой же ипостаси. якоже и персты во единой длани]. И якоже Христос Спас благословив божественныя ученики своя двема перстома, предаде и научи и прочия такожде благословляти: Сице и они яко ученицы и приемницы священных его тайнодействий, действующе рукою в знамении честнаго креста, три убо персты совокуплены имуще во образ неразделимыя Троицы, Отца и Сына и Святаго Духа. Два же перста сложена во исповедание двою естеству во Христе, божества и человечества, и простерта на благословение осеняху. Явственно сие святая древлеправославная восточная церковь, иконоизображением на Корсунском кресте иже ныне в Москве, в соборной Успенской церкви, во олтаре стоит, чеканным художеством, на сребре изобразивше, у верховнаго апостола Петра, у апостола Матфея, у апостола Марка, и Варфоломея, благословящыя руки совокуплением триех перст. даже простерта ко благословению имущия показует. Откуду и сама святая древлеправославная восточная церковь, последующи священным и божественным апостолом, яко самовидителем благословения Христова, и приемшим и научившимся от Него, прия и научися от них, яко во изображение на себе креста, слагати персты, тако и на благословение, три убо перста, великий и малый, и что подле малаго, во образ триех божественных ипостасей, Отца и Сына и Святаго Духа. два же указателный и великосредний, во образ двою естеству во Христе сшедшуся, божества и человечества. еже явственно засвидетельствуют святии древлегречестии образи, их же отчасти предлагаем. Крест его же святый князь Владимир из Корсуня принесе [в лето 6496], великий запрестолный, иже ныне стоит в Москве в соборной Успенской церкви, на нем праздник вознесения Христова изображен, имеющь Христа Спаса благословляюща апостолов, три персты сложены, по образу троическому, два же простерта на благословение. образ Пресвятыя Богородицы, Неопалимыя купины, его же прислаша к великим князем российским во благословение от Синайския горы [в лето 6898], писан на самом камени, идеже Моисей в купине Бога виде, на затворе того образа изображен праздник Вознесения Христова, изображением греческим, показуют Христа благословивша апостолов двема перстома. Той же святый великий князь Владимир, взя из Корсуня врата медная великая, яже ныне в Великом Нове граде, именуемыя Корсунская, на онех грекокорсунских вратех, на многих местех, у Спаса благословящая рука, палец со двема последнима совокуплени, и указателный и великосредний сложена на благословение. Паки той же святый князь Владимер взя из Корсуня, грекописанный образ святых апостол Петра и Павла [Летописец Новгородский], иже ныне стоит в Великом Нове граде, в соборной церкви Софии. на оном образе вверху на средине изображен Спас имея благословящую руку, три персты во едино сложены, и два указателный, и средний простерта на благословение.

В том же Великом Нове граде, на Корсунских вратех изображен святитель Александр, имущь благословящую руку двема перстома. суть и инии множайшии образи древлегреческаго изображения, ихже долготы слова убегая, оставляю, иже древлевосточныя церкве. свято благочестивое от святых апостол от самаго Христа Спаса научившихся приятое содержание, еже на благословение совокупляти три персты, палец со двема последнима во образ неразделимыя Троицы, Отца и Сына и Святаго Духа, два же указателный и великосредний слагати, во исповедание двою естеству во Христе Божества и человечества, крепце утверждают. Сии убо святей древлевосточней церкви, и святая древлеправославная великороссийская церковь, от нея же научившеся вере Христове, вся догматы предания, и уставы прияла, яко матери своей последующи, прия еже на благословение совокупляти три персты, палец со двема последнима, во образ триех божественных ипостасей, Отца и Сына и Святаго Духа, два же указателный и великосредний, во образ двою естеству во Христе сшедшуся, божества и человечества. еже священнии чюдотворнии образи явственно, утверждают.

Образ многосияющий чюдесы, Пресвятыя Богородицы, именуемый Владимирский [бывый в лета 6666], его же обложи златосияющим окладом, благоверный князь Андрей Боголюбский. На оном златосияющем обложении, начертан разным художеством, праздник вознесения Христова, показующь Христа благословляюща двема перстома, якоже и на Корсунском кресте.

Образ вознесения Христова, иже стоит в Вознесенском монастыре в Москве, в церкви Вознесения Христова, юже строила благовернаго князя Димитрия Донскаго чюдотворная княгиня Евдокия [степень 12, глава 15], и подписывала славными живописцы, Феофаном гречином, да Симеоном Черным. на нем изображен Спас, благословляющь апостолов двема перстома. образ Пресвятыя Богородицы именуемый Казанский, явивыйся многочюдесне в лета 7087.

Образ Пресвятыя Богородицы Фехотьевский явивыйся чюдесне в лета 6802, иже ныне стоит в Преславле Рязанском в соборе.

Образ Пресвятыя Богородицы Колочевский, явивыйся многочюдесне, в лета 6921.

Образ Пресвятыя Богородицы Мирожский, иже во Пскове, от него же слезы яко миро истекоша, в лета 6700.

Образ Пресвятыя Богородицы Елецкий явивыйся многочюдесне, в лето 6568, иже в Чернигове на горах Балдинских.

Образ Пресвятыя Богородицы Печерския явивыйся чюдотворне в лето 6796, иже в Свийском монастыре.

Образ Пресвятыя Богородицы Зимнозерский близ Казани явивыйся, в лето 7000.

Образ Пресвятыя Богородицы подобен Тихвинской, иже явися в Нове граде в монастыре Воскресенском, на Красном поле, в лето 7151.

Сии вси и инии многочисленнии суть святии чюдотворнии образи Пресвятыя Богородицы, имущи Христа Спаса благословляюща двема перстома, иже трубы велегласнее святое содержание древлеправославныя российския церкве, приятое от святыя древлевосточныя церкве, еже двема перстома благословляти, проповедающе утверждают.

И не токмо святии чюдотворнии образи Пресвятыя Богородицы, но и святителя Христова Николы чюдотворнии же образи, тожде свято благочестивое древлероссийския церкве содержание, приятое от восточныя, еже двема перстома благословляти, показующе засвидетелствуют.

Сице древле грекописанный чюдотворный святителя Николы образ Зарайский, от Корсуня принесенный повелением его святителя Николы, в лето 6733, на Рязань [Пролог, печ. июля в 29 день]. благословящую руку совокупльшю три персты, палец со двема последнима. Два же указателный и великосредний, на благословение простерта имать.

Подобне его же святителя Николы образ круглая дска, явивыйся чюдотворне, в лето 6721, иже в Нове граде на Ярославле дворищи благословящую руку двема перстома имеет.

Такожде его же чюдотворца Николы, чюдотворный образ, в Киеве у Софии в соборной церкви, пред киим образом младенца утопшаго из Днепра Никола изнес положи, о нем же повествует в житии святаго Николы печатном, чюдо 26.

Его же святителя Николы образ чюдотворный древнейший, во Пскове на Печерском подворье, иже принесен из Юрьева ливонскаго такожде благословляюща показует.

Его же святителя Николы образ Угрешский, явивыйся чюдотворне великому князю Димитрию Донскому, в лето 6889.

Его же святителя Николы образ Великорецкой и Вяцкой, явивыйся чюдотворне в лета.

Его же святителя Николы образ чюдотворный в Киеве, иже в монастыре Николы Пустыннаго стоит над враты церковными.

Такожде образ его же святителя Николы чюдотворный Гортунский в Карачеве Ондринский.

И прочии древлецерковныи многочисленнии святии образи святителя Николы, ясне имеюще благословящую руку, три персты во едино сложены, два же, указателный, и великосредний простерта на благословение, древнее благочестивое содержание святороссийския церкве утверждающе запечатлевают.

К сим же и святии велицыи великороссийстии чюдотворцы, иже своима святыма рукама написаша образы Пречистыя Богородицы, на них же у превечнаго Младенца Христа Спаса, благословящую десницу двема перстома изобразивше, древлецерковное святороссийское благочестивое содержание утверждают, сице:

Святый Петр митрополит Московский чюдотворец, написа образ Пресвятыя Богородицы, еще до архиерейства своего [Степенная, степень 10, и в житии его написанном святым Киприаном митрополитом]. Кий чюдотворный образ, в морском плавании, Геронтию хотящему восхитити престол Руския митрополиии, чюдотворне запрети. и прорече о сем Петру святому быти митрополитом, его же святейший патриарх Афонасий егда рукоположи митрополитом, той священный чюдотворный Богоматере образ, даде ему истинному святителю сице рекл: Приими Богородичный образ святый, иже ты своими рукама написал еси. сего бо ради и возмездие тебе дарова, сама икона о тебе прорече. На нем у превечнаго Младенца Христа Спаса благословящую руку изобрази, три персты, палец со двема последнема во едино совокуплени, два же указателный и великосредний на благословение простерта.

Подобне, и преподобный Дионисий Глушицкий, написа образ Пресвятыя Богородицы Одигитрии, иже стоит в монастыре Глушитстем, на нем у превечнаго Младенца благословящую руку такожде двема перстома изобрази. Но и преподобнии, Алимпий, иже научен бысть от посланных Богородицею из Царя града иконописцев, написа образ Христа Спаса иже стоит в Киевопечерстем монастыре, на нем у Спаса изобрази благословящую руку двема перстома.

Сим согласно и преподобный Антоний Сийский, написа образ живоначалныя Троицы [в житии святаго Антония], иже в пожаре не згоре, кий стоит в монастыре Сийском, на нем благословящую руку написа двема перстома.

Сии вси святии святым своим иконописанием, паче устнаго проповедания, трубы громогласнее гласящыя, древлецерковное, святороссийское, от восточныя церкве благочестивое христопреданное содержание, яко благословляти подобает, три убо персты палец со двема последнема совокупив, во образ неразделимыя Троицы, два же указателный и великосредний, во исповедание двою естеству во Христе сшедшуся, явственно утверждают.

Но и святии восточнии учители, яко приемницы престолов апостольских, купно, с восприемницы и всех их благочестивых преданий, последствующе священным апостолом, святый Мелетий патриарх Антиохийский, и блаженный Феодорит Кира града, писательными своими гласы по премногу научают [Псалтырь со возследованием, Псалтыри малые, в Кирилове, в Катихисисе велицем, в Соборнике Даниила митрополита Московскаго], еже на благословение совокупити три персты равно, палец да два последних ими же исповедуется тайна неразделимыя Троицы Отца и Сына и Святаго Духа, два же перста вышний да средний вместо сложити и простерти, во исповедание двою естеству во Христе божества, и человечества, и тако благословити, еже святый Мелетий патриарх самым делом самым благословением всекрепце утверждает. Ибо егда глаголаше противу ариан, о единосуществии живоначалныя Троицы, правовернии прошаху скораго знамения. Тогда он показа три персты разностоящыя, и не бысть знамения. таже два перста совокупив, якоже повествует Стоглавый собор [глава 31], а три пригнув, благослови люди, абие оное благословение Господь Бог аки некоею печатию, предивным чюдом изшествием от него огня, аки молнии запечатле, яко есть истинное православное, и все таинство благоверия в себе заключающе.

Священник же нынешния великороссийския церкве священнодействуяй, не согласно самому Христу Спасителю предавшему благословляти: не согласно священным Его учеником и апостолом научившым: не согласно всея елико древлевосточныя, толико, и великороссийския благочестивыя церкве непременному содержанию: не согласно святых российских чюдотворцев, своима рукама написавших, на святых образех, благословящих рук изображению: не согласно святых восточных учителей научению, предложенныя дары благословляет. Не бо якоже Христос совокупив пречистыя своя ученики и вся верующыя вонь. Не якоже божественнии апостоли приемше от Христа научиша: Не якоже вся древлеправославная яко восточная, тако и российская церковь научившися от священных апостол содержаше обычай: Не якоже святии российстии чюдотворцы, самонаписавшия священныя образы, изобразиша по преданию священных апостол благословящыя руки: Не якоже святии восточнии учители приемше научиша писательными своими гласы благословляти, совокупив три персты, палец со двема последнима, во образ триех божественных ипостасий, Отца и Сына и Святаго Духа, два же указательный и великосредний во образ двою естеству во Христе сшедшуся, божества, глаголю и человечества, благословляет. Но благословляет странно пятию перстами, изображая в них имяIс Христос. указателным перстомI, великосредним перстом С. палцем и четвертым Х. пятым перстом С. Коего ради благословения сопротивнаго самого Христа Спасителя преданию: сопротивнаго самого Христа Спасителя преданию: сопротивнаго святых апостол научению: сопротивнаго всея древлеправославныя церкве содержанию: сопротивно святых чюдотворцев благословящих рук изображению: сопротивно святых восточных учителей учению, видотворение сея тайны не может совершитися, сиречь предложенный хлеб в тело Христово претворится, и вино в кровь Его пресвятую преложится. Понеже убо предложенныя дары, в суще тело Христово, и в кровь Его пресвятую, молитв ради иерейских, и знамения крестнаго, еже рукою иерейскою бывает, Пресвятый Дух пришед претворяет. Якоже свидетельствует, и от новых Питирим Нижеградский, сице глаголя [Пращица, лист 344]: [Совершенное самое тело Христово, и кровь Христова, (ниже) ради молитв иерейских, и знамения крестнаго, иже рукою иерейскою бываемое, Пресвятый и животворящий Дух прихождаше и предложенныя дары претворяше]. ответ 211.

Но и святая древлеправославная церковь глас свой возвысивши трубы велегласнее вопиет глаголющи [Катихисис великий]: [Не простыми молитвами содеяна бывает сия тайна но благословением. (ниже) якоже Христос благослови хлеб, тако и мы благословляем на божественней трапезе]. глава 64. И аще убо кроме благословения христоподобнаго, предложенный хлеб в тело Христово не прелагается, и вино в кровь Его не претворятеся. то како от нынешняго священника сопротивно Христову благословению благословляющаго, и предложенныя дары, хлеб, и вино претворяются в плоть и кровь Христову? благоявлено яко не претворяются. Аще не претворяются, убо предложении дари не суть сущее тело Христово, и кровь Его пречистая, под видом хлеба и вина аще и мнится тайно действовати: но хлеб хлеб, и вино вино. И аще тако есть, якоже и есть. И како причащаяйся сицеваго причащения, еже есть истинное тело Христово и пречистая кровь Его, под видом хлеба и вина пребывающее, имети будет в себе Христа? Какоже и отпущение грехов получит? и како наследником царствия небеснаго будет? не вем вам оставляю, вы судите. Аз бо вем, яко причащаяйся с ними сицеваго причащения, едино тело с ними бывает. понеже бо якоже причащающиися плоти и крове Христовы, едино тело Христово и едина кровь, и друг другу уди бываем стелесни Христови суще [Гавриил Филаделфийский О седми тайнах, глава 8]: сице и сего причащаяйся тело с ними, не глаголю Христово бывает. Убо купно и снаследник им будет.

Глава, 4.

О вине кончателной.

Совершителная причащения с древлецерковными не единствуют догматы же и уставы.

Четвертая совершителная святаго причащения вина, по всем автором, и древним и нынешним, еже творити и прлагати существо хлеба и вина, в плоть Христову. Тако кир Гавриил Филаделфийский научает глаголя [О седми тайнах, глава 8, лист 114]: [Совершителное же, еже творити и прелагати существо хлеба и вина, в плоть и кровь Христову, ими же освящаются, оживотворяются, сих верно причащающиися. Во оставление бо грехов во общение Святаго Духа, в царствия небеснаго исполнение, в дерзновение Спаса нашего Христа бывает причащение божественных тайн]. книга О седми тайнах. Подобне Катихисис великий: [Вопрос: Кое есть совершителное третия сея тайны? Ответ: Сие есть дивное совершителное яко в ней верху являемыя образы хлеба и вина, пребывают же сами о себе выше естества хлеба и вина, сиречь, вид, и вкус вина есть, вина же несть. Якоже иногда и в манне, не бывших в ней пищь, вкусы и сладости бяху в ней, и пребывают сия видимая знамения, сами о себе и в себе, без водружения и естества своего]. глава 64. Согласно в книжице О седми сакраментах свидетелствует. Кое в таинстве святаго причащения преложение существа хлеба и вина, вплоть и кровь Христову святии богословцы, святым и животворящим крестом совершатися исповедуют. Сице святый Иоанн Златоустый, златословесными своими усты громогласне вопиет глаголя [в Беседах на Мф., нравоучение 54]: [Яко венец, сице да обносим крест Христов. Ибо вся тем совершаются яже по нас; аще и породитися треба будет крест проходит; аще и напитатися таинственною оною трапезою; аще и рукоположитися; аще и яково ни буди ино что сотворити, везде одоления нашего предстоит образование]. Ныне же чрез повеление Божие крестом кленетеся, [его же даде нам Бог на честь велику, и оружие на сопротивнаго врага. Без того бо ни крещение ни литоргия не бывает ни иная кая духовная вещь, имже мы знаменающеся бесовския силы побеждаем]. Пролог, марта 13. Подобне и святый Симеон Фесалонитский вопиет глаголя: [Темже и совершеннотворитель сам крест, и без креста ничтоже совершается божественных таин]. глава 64. Сим согласно и святый Иларион епископ Мегленский [книга Кирилова, московския печати]: [Рукою воображаемый крест, освящает вся, на ня же полагается, и воду, глаголю крещения, и масло, и миро, и лица, человек верующих, и тайный хлеб и священную чашю и ина вся]. прение святаго Илариона со армены.

И не токмо древнии святии богословцы, крестом вся таинства совершаема утверждают быти: но и от нынешних учителей, Дамаскин иподиакон студит, тожде изъявляет глаголя: [крест есть сила, и утвержение всех благих. Тем совершаются вся таинства нашея веры. Тем же венчаемся, тем освящаемся. И аще хотят священницы служити, и аще хотят архиерей рукоположити, тем честным крестом исполняют вся]. Скрижаль, лист 771. Елма же убо аще по святых отец гласовом, порождение крещения крестом, аще совершение таинственныя трапезы крестом, аще вся таинства духовная крестом, и о кресте совершаются. убо крест святый есть всепребогатое Божия благодати орудие, и всеосвятелный и предивный освящения инструмент совершителныя вины. Сие слово верно, и всякаго приятия, апостольски рещи, достойно есть. Еже в древлеправославней церкви законно и уставоположителне совершашеся, яко священник святый хлеб двема перстома благословляя возглашаше [Служебник]: [хлеб убо сей самое честное тело, Господа Бога и Спаса нашегоIсуса Христа, и прочая]. Сице убо во изображение благословения, якоже и в знаменовании себе самый животворящий крест Христов, таинственне, изобразовати, по святым отцем, умствоваше, паче же самого распятаго Христа Бога высокотворне изображати вероваше, якоже святый Кирил Иеросалимский глаголет [Псалтырь толковая, на псалом 59]: [И не стыдимся исповедающе Распятаго на челе со дерзновением, персты назнаменовати креста печать. И паки: Не стыдимся распятием Христовым, но аще ин таит, ты же на челе си знаменайся им]. оглашение 4. Не точию же сие святии в крестном знамении изображати, но и новопечатных книг творцы тожде толкуют: На главу перстосложением главу Христа Бога нашего, на кресте терновным венцем обложенную, на пуп перстосложением ног Божиих ко древу пригвождение. на правое и на левое плче положением. рук Христовых ко древу крестному пригвождение. Пращица, и Скрижаль. Какоже распятый Христос, в крестном воображении таинственне изобразуется, святый и дивный Петр, иже от Дамаска явственно, (и предивно) научает ны глаголя: [Яко два убо перста, и едина рука, являют распятаго Господа нашегоIсуса Христа, во двою естеству и едином составе познаваема]. книга о постничестве к концу. Откуду в древлеблагочестивей великороссийстей церкви, и благословлявшии и знаменовавшиися, поелику страсть Христову двема перстома паче же самого распеншагося Христа Бога на кресте во двою естеству, и единой ипостаси, православно верующе, православно изображаху; потолику и крест самый животворящий Христов, на нем же Христос пригвоздися, на себе, и во благословение изображати, по святым богословцем, и вероваху и умствоваху. О чесом явственно засвидетелствуется в книзе Кирилове сице: [а мы православнии христиане то честное знамение крест Христов восприимаем. на нем же пригвождены быша ноги Его и покланяемся Ему. не древо но знаменование Христово почитаем. Полагаем на себе. исповедающе еже Христос творяше. и что еще имать творити, и прочая крестовоображение перстами показание]. глава 6. И якоже священник священнодействуяй благословляя прелагаемый хлеб в тело Христово крест самый животворящий Христов, на нем же распяся изображаше: тако оный таковым же животворящим крестом Христовым, и печаташе. Который крест Христов бяше тричастным, четверочастный: со дщицею и трисоставный, якоже древнии учители, и святии богословцы явственно свидетелствуют. О чесом в первыя части во втором пределе, во главе 22, доволно доводственне засвидетелствовахом. Понеже убо якоже самую живоносную страсть Владычню, на трисоставнем кресте содеявшуюся православно исповедаше. Сице и на проскомидии на просфире грядущей образовати живоносную страсть Владычню, согласно трисоставный же крет полагаше, да будет образ подобен первообразному. И какоже не подобает хлеб оный предложения, трисоставным крестом печатати? всяко подобает.

Первое. Понеже хлеб оный предложения в проскомидии, образует самое животворящее тело Христово, еже на кресте пригвоздися. якоже древлехаратейная литоргия толковая свидетельствует, и новопечатная Скрижаль сице глаголющи [Скрижаль, лист 142]: [хлеб предложения посвящен, является очищение мира и безмерное богатьство благостыни Божия. яко Сын Божии и человек бысть, себе даде жертву и приношение Богу и Отцу и тело свое даде искупление, и очищение за живот мира и спасение. Взем убо все смешение человеческаго естества разве греха, и принесе яко жертва изрядная, сиречь избранна Богу и Отцу за род человеческий, якоже глаголет [Ин. 23]: Аз есмь хлеб сшедыи с небесе. И ядыи хлеб сей жив будет вовеки, сиречь. Аз есмь хлеб, иже снидох с небесе, и кто яст сей хлеб, иже снидох с небесе имать жити вечно. О нем же, и пророк Иеремия глаголет: Приидите и вложим древо в хлеб его, пророчествуя древо креста, на нем хотяше пригвоздитися святое тело]. глава 54. К сим же и самое действо проскомидии, воспоминание есть страстей Христовых. Понеже иерей начиная глаголет тако [Служебник]: [Воспоминание творим Господа Бога и Спаса нашегоIсуса Христа]. и прочая приглашения яже в Служебницех, в чине проскомидии положена суть. И аще убо самое животворящее тело Христово, на трисоставнем кресте пригвоздися, и пречистыя страсти Его на трисоставнем кресте совершишася. убо и образующая плоть Его просфира, и воспоминание страстей Христовых грядущая, долженствует трисоставным же крестом, яко сообразным самому кресту Христову, печататися.

Второе: Святая древлеправославная церковь в таинствах просфиры, панагиарнаго хлеба, и артуса на святую пасху повелеваше трисоставным крестом знаменати, еже Уставы церковныя изданныя при Ермогене, и Иоасафе, лист 53, патриарсех, в чине о панагии утверждают, но и хлебы предложенныя на проскомидии просфиры же нарицаются, яко Служебники древнии и новии засвидетелствуют. Убо благоявленно яко неотрочне и сия трисоставным же крестом подобает печатати. Ибо аще меншее таинство являющыя просфиры, трисоставным крестом повелено печатати, како не подобает болшее таинство изъявляющыя просфиры трисоставным крестом печатати? еже и содевашеся неизменно в древлеправославней церкви до лет Никона патриарха.

Третие: Святый пророк Иеремия пророчествуя о древе креста, на нем же хотяше Христос Бог пригвоздити святое свое тело, вопиет глаголя: [Приидите вложим древо в хлеб его]. глава 11. Еже святый Иоанн Златоустый толкуя глаголет [Соборник, лист 494 на обор.; Мф. зач. 108]: [древо крест хлеб, плоть Христова. иже Господь хлеб, рече: Се есть плоть Моя за вы ломимая во оставление грехов]. Согласно сему и в Скрижали новопечатной изъявляет сице: [хлеб Христов тело есть глаголется, зане в нощь в нюже Христос хотяше предатися прият хлеб и рече апостолом: Сие есть тело Мое. древо убо вложиша евреи в хлеб Христов сам крест есть на нем же распяша Христа]. лист 780. Но той крест на нем же Христос распяся трисоставен, якоже выше рехом, со дщицею и подножием бяше. Его же святая церковь ублажающи воспевает: [Трисоставныи крест, яко троичныи образ воспеваем]. Триодь, во вторник, 4 недели поста, в трипесньце. И святый Григорий Синаит вопиет глаголя: [Крест трисоставныи, честное древо, Троицы бо носит трисоставныя образ]. в каноне кресту, песнь 8. Тем трисоставным животворящим крестом Христовым, архиерей народы благословляху. Той трисоставный крест на Богоявление Господне, и августа в 1 день, и прочая водоосвящения, в воду погружающе, воду освящаху. Той тричастный, яко на Воздвижение, тако и в 3-ю неделю поста, и августа в 1 день, всецерковне и всенародне целоваху. Тому и поклонение творяху вопиюще: [Ты ми покров державен еси, тричастныи кресте Христов, освяти мя силою твоею, да верою и любовию покланяюся и славлю тя]. сентября в 14 день, на литии. Тем трисоставным животворящим крестом Христовым, и просфира на проскомидии грядущая образовати тело Христово должна назнаменоватися. Ибо просфира она знаменует Христа по возрасту. якоже свидетельствует Скрижаль глаголющи [глава 68, лист 122]: [Хлеб убо иже разлучися от священника, да священнодействуется, дондеже лежит в предложении, есть хлеб наг совершенныя благодати, сие токмо дарование имать, да будет и жертва. Знаменует же Христа по возрасту оному, от него же бысть дар. Бысть убо дар от самого рожества]. глава 68. И понеже просфира она знаменует самое тело Христово тем по освящении ей честь и поклонение яко самому Богу воздается. якоже свидетельствует древлеправославная церковь глаголющи: [Понеже тайна сия по освящении, донележе виды хлеба и вина целы пребывают, совершенною всегда есть тела и крове Христовы тайною, и самим Христом Богом нашим; ихже ради вин ни едина иная тайна Того имать, якоже та имать. Понеже яко самому Богу поклонение и честь воздаватися имать от нас]. Катисхисис малый, лист 30. Како бо сей просфире, толикое в себе таинство замыкающей, яко по освящении бывает самым телом Христа Бога, яко самому Богу честь и поклонение воздавается, не лепотствует самем темже трисоставным крестом, на нем же Христос распяся, печататися? Не веси ли яко сие есть таинство таинств, и святых освящение, и воистину святое святых, и совершенно таинств всех совершеное таинство, и таинство начальное и таинственное, понеже един Таинствоначалник Слово, сотвори е, и предаде к воспоминанию страстей своих. Тем же аще сам Таинствоначалник, и Таинствосовершитель Христос Бог, на трисоставнем кресте распяся, убо и просфира в проскомидии имущая пресуществитися, в плоть Его пресвятую, долженствует, якоже и печаташеся, темже трисоставным крестом Христовым печататися. Ибо без сего трисоставнаго креста Христова ни едино таинство совершитися может. Якоже святый Августин свидетельствует глаголя: [Что есть еже ведают, знамение Христово, разве крест Христов. Которое знамение аще не употреблено будет, или на челех верующих, или в той воде, от нея же раждаемся, или в елеи, имже миропомазуемся, или в жертве еюже питаемся, ничтоже от сих благосовершается]. книга 22. и в трактате 118. Тем бо трисоставным животворящим крестом Христовым, древле во благочестивей церкви, просфира имущая пресуществитеся в плоть Христову, печатаема бывши, прелагашеся в существо тела Христова. К сему же аки ко одушевленному тайносовершителю трисоставному кресту Христову, святый Иосиф Фессалонитский вопиет глаголя [Соборник, лист 399]: [Тобою тело и кровь Христову приемлем]. в неделю 3-ю поста. В новодействуемей же ныне проскомидии совершителное пресуществления предложеннаго хлеба и вина, в тело и кровь Христову еже бывает крестными способы, не согалсно древлеправославней церкви, и действуется и умствуется. Ибо священницы хлеб и вино, благословляюще, не двема перстома, но пятию, сопротивно древлеправославней церкви. О чесом в прошедшей главе, доволно рехом, осеняют. Каковое благословение под клятвою древлеправославныя церкве обретается, сице страшне гремящия: [Иже не крестит двема перстома, якоже и Христос, да будет проклят]. Кормчая древлеписмянная, в чине приятия еретик. Подобне в Потребницех Филарета, Иоасафа и Иосифа патриархов, вопиет глаголющи: [Иже не крестит двема перстома, якоже Христос, да будет проклят]. И якоже в сем новоблагословлятелном перстосложении, (воплотившаго, распятаго, и воставшаго Христа Бога нашего, двоестественое и единоипостасное не изображается таинство, еже двоперстным сложением изображается) по святому Кирилу, и Петру Дамаскину. Сице и во образовании креста, двочастный крест изображати, и веруют и умствуют, еже засвидетельствуют новопечатныя книги, Розыск во второй части, в статии третией, и Пращица во ответе 115: И поелику распятие Христово, на двочастном кресте, великороссийская ныне церковь, исповедает быти, не согласно святым богословцем, не согласно святым песнописцем, не согласно и всей древлекафоличестей церкви: потолику, и в благословении не самый крест трисоставный, но двочастный изображати извещают. Тем двочастным крестом воду в крещении освящати, тем просфиру благословляюще претворятися в плоть Христову, тем вся таинства и веруют и умствуют. еже новопечатная книга Жезл явственно свидетельствует глаголющи [Жезл новопечатный, лист 112]: [Ибо сицевым воображением креста Господня, вся тайны церковныя действуем и воду ко крещению святому сицевым креста образом благословляюще освящаем, елей такожде: но и отроча мажуще елеом, и миром святым, не иныи крест, точию четвероконечныи изображаем. сицевым крестом просфира на заклание Агнца уготованная благословляется, и в самых таин тела и крове Христовы совершении, сей же образ креста употребляется. Сим супружество составляется, и священство благословляется. Не иным образом сами ся знаменаем, и иныя благословляем. Так елеом болныя мажем, церкви посвящаем, ястие, и питие благословляем. словом рекше, вся священная действуем, четвероконечнаго креста образ творяще]. часть 1, возобличение 23.

Древлецерковнии же святии учители глаголют, аще и едина часть креста убудет, уже своего образа не являет. Сице святый Кирил Философ: [Четыре бо части имать крест, аще и едина его убудет, то уже своего образа не являет]. в прении со Аникием еретиком. Подобне Иоанн екзарх глаголет: [Иже обретается образ не сыи по первому того подобию, в пустоше есть зовом образ. от еже бо не подобитися первообразному, того ради образ не есть]. глава. Какоже двочастный крест может нарещися образ трисоставнаго креста Господня, повнегда не единыя части не имать, но и двух, титлы, и подножия? Не имый же титлы и подножия, како может быти крест Господень, не подобяся трисоставному кресту на нем же распяся Христос? Святый Афанасий Великий вопиет в прение с арием Фотином: [Образ от того, чии есть разньствовати не может]. И аще образ от того чии есть разньствовати не может. Убо двочастный крест, толикое имый разньствие от трисоставнаго креста, неимением титлы и подножия несть образ трисоставнаго креста Господня, ниже может нарещися крест Господень. Ибо (како бы образ был первообразного, не спасай пообразное). Скрижали гласящей [лист 803].

Ельма же убо двочастный крест не может быти крест Господень, паче несть. Како вся таинства и вещи, двочастным крестом совершаемыя, могут совершитися? Какоже и в проскомидии предложенный хлеб и вино, двочастным крестом и осеняемыя и печатлеемыя, могут пресуществитися в плоть и кровь Христову? не вем. Слышу бо святаго Симеона Фессалонитскаго вопиюща [глава 61], яко [без креста Господня ничтоже совершится божественных таин. Темже и совершенотворитель сам крест]. И аще совершенотворитель сам крест, благоявлено яко точию трисоставным крестом совершаемыя тайны суть, совершены, двочастным же, не совершены. Како же убо нынешнии новии богослови, да не реку буеслови, не устрашаются хульствовати, животворящих таин Христовых, под трисоставным крестом совершаемых, и совершенных? Паче како не ужасаются, самого Пресвятаго Владыку Христа Бога нашего, под видом хлеба и вина сокрываемаго безчестити? Ибо сия тайна по освящении совершенною есть тела и крове Христовы тайною, и самым Христом Богом нашим. Поистинне сей то есть зверь оный, ему же даны быша уста глаголюща велика и хулна [Апок. глава 13], иже отверзе уста в хулении к Богу, хулити имя Его. Како же и кто хулит? Слыши. Феофилакт архиепископ Тверский, пиша возобличение, на ответы выгорецкия, нарицает, (ох увы трепет мя обдержит, егда хощу тростию и чернилом изрбразити непреподобное его хульство, и не могу, трепещущей деснице моей) пречистыя и животворящия тайны Христовы трисоставным крестом совершаемыя, о мерскаго языка! о непреподобных устен, устен велеречивых! смертоносным ядом и нечестием, сице глаголя [книга Обличение на заонежские ответы, напечатана в лето 7253]: [Зрите православнии, коликии смертоносныи яд, коликое нечестие, сии злокозненныи мужики под осмоконечным крестом своим, под своима двома перстома содержат. Может ли быти горшии хулитель и еретик, паче сих котории тайны святейшия евхаристии не исповедуют]. сиречь под двочастным крестом совершаемыя. книга Феофилакта, лист 60.

Но воззрят в древняя времена, посмотрят в прешедшая лета, колицы во древлеблагочестивей церкви, под осенением двоперстнаго благословения, и под трисоставным крестом Господним, совершаемых животворящих таин Христовых, причащающиися спасошася. Колицы и какови пастырие великоросийстии, и печатлевшии предложенный хлеб, грядущий преложитися в тело Христово, и благословящии двема перстома хлеб и вино, пресуществляемыя в плоть и кровь Христовы, в нетлении мощей просияша; Колицы и коль премнози преподобнии отцы, печатлеемыя и совершаемыя трисоставным крестом Христовым, и благословляемыя двема перстома, пребожественныя тайны плоть и кровь Христову вкушающии, в знамениих и чюдесех процветоша; Сей же непреподобный таковыя пресвятыя и животворящия тайны Христовы дерзает хульствовати. Слышим бо воистинну слышим Господа глаголюща [в законе 17, Мф. 18, 16], яко при устех двою, или триех свидетелей станет всяк глагол. Мы же не двоих ниже триех, но множайших приведохом зде свидетелей, всякаго вероятия достойнейших, и на утвержение истиннаго нашего кафолическаго догмата, на посрамление же сего лжесловесия. Приведохом святаго Иоанна Златоустаго, трубу Духом Святым вдохновенную, и во вся концы вселенныя гремящую [беседы на Мф. нравоуч. 54]: [Яко венец, сице да обносим крест Христов, ибо вся тем совершаются яже по нас; Аще и породитися таинственною трапезою]. Приведохом Симеона Фесалонитскаго. Приведохом Илариона Меглинскаго вопиющаго: [Рукою воображаемыи крест освящает вся на няже полагается]. Приведохом и Августина святаго глаголющаго [книга 22]: яко [крест Христов аще не употреблен будет, или в той воде от нея же раждаемся, или в елеи, имже миропомазуемся, или в жертве, еюже питаемся, ничтоже от сих право совершается]. И аще убо по святых отец гласовом, вся таинства церковная, трисоставным крестом Господним совершаются: Тем и сия тайна святейшия евхаристии, темже трисоставным крестом Христовым совершаема бывает. Глаголет бо святый Симеон Фессалонитский: [Сечет паки хлеб посреде иерей, крест действуяи во всем, показуя Христово распятие, жертву, сие глаголет Христу распятие, сиречь и закалается, глаголет пророческое, Агнец Божии, от мира жития и спасении]. глава 85.

Кое убо таинство святаго причащения освящается? токмо единым двоестественным Христом освящаемое. Явственно о сем взывающу святому Иоанну Златоусту: [Сия она трапеза, и ничтоже менши имеет. Не бо ону Христос, сию же человек соделовает, но и сию сам]. беседа на Мф., нравоучение 82. Кое действо всесвято облагодатьствуется? Токмо единым трисоставным животворящим крестом, совершаемое. Кая тайна всебогатыя благодати Божия сподобляется? токмо благословением Христовым осеняемое. В новодействуемей же литоргии, предложенный хлеб и вино, како может преложитися в плоть и кровь Христову, идеже сопротивно самому Христу благословившему благословляюще осеняют, не бо двема перстома, но пятию, и осеняюще не самый животворящий крест Христов трисоставный, но токмо двочастный, иже несть крест Христов, якоже выше рехом, изображати умствуют? ей не может. Како может претворитися существо хлеба и вина, в существо тела и крове Христовы, идеже в крестоосенении двоестественное и единоипостасное изображати таинство воплощьшагося Христа Бога отъято есть? ей не может. Како же в новодействуемом тайнодействии может пресуществитися хлеб и вино, в тело и кровь Христову, идеже крест кровию Христовою освященный, тайносовершитель всех таинств изображатися не исповедуется? поистинне не может. И аще не пресуществляется хлеб и вино, в новодействуемей литоргии, вышепоказанных ради вин, якоже и есть, в плоть и кровь Христову, то какое есть зде тело Христово? и кая есть кровь Его? разве хлеб, хлеб, и вино, вино. Аще тако есть, то како таковаго причащения причаститися возможно. Еже таковым благословением ограждается, которое под клятвою от древлеправославныя церкве обретается, и таковым крестом знаменается, иже несть крест Христов, яко не подобится первообразному. И каково от сицеваго причащения спасение души имать быти? не вем, вы судите. Аще ли убо сие причащение подобает прияти, яко истинное; подобает безпрекослвоно и имже причащение совершается, сиречь пятиперстное благословение и двочастный крест прияти, яко истинный. Аще ли сих не лепотствует приимати, яко ово несть крест Христов, ово иже под клятвою. убо ниже сего причащения лепотствует приимати. К сим же аще попустим, яко ныне в новодействуемей литоргии, предложенный хлеб и вино, печатлеемыи двочастным крестом, и осеняемый от священника пятиперстнаго сложения благословением, еже клятве предается, имже осенением и верует и исповедует двочастный крест изображати, сущее есть тело и кровь Христова. Обрящется яко древле во благочестивей церкви, предложенный хлеб и вино, и печатлеемым самым трисоставным животворящим крестом Христовым, и осеняемый от священнодействующаго благословением двоестественное и единоипостаное изображающим таинство, воплотившаго Христа Бога, имже осенением и вероваше и исповедаше, той же самый трисоставный животворящий крест Христов изображати, не бе, еже далече да будет сицевое неблагочестивое мнение, мысли православных, самое животворящее тело и кровь Христова. Аще ли оное бе самое сущее тело и кровь Христова, якоже и бысть. Убо ныне новодействуемое всячески не может быти тело и кровь Христова. паче же и несть. Яко велие разньствие между собою имут, и в действиях, и в чинех, и в речениях, и в молитвах, в самом тайносовершительстве. Аще же несть сущее тело и кровь Христова: убо хотящему спастися, сущу сыну кафолическия церкве, всеми силами подобает блюстися, во еже бы не быти причастну его. зане причащаяися его, причащается купно, и всех новин, и едино тело с ними бывает.

Глава, 5.

О печатании просфир трисоставным крестом, в кругловидной печати и танстве кругловидства.

К сим святая древлеправославная великороссийская церковь, последующи святей древлеблагочестивей яко матери своей восточьней церкви, имеющи содержаше обычай печатати просфиры трисоставным крестом, в кругловидней печати, с копием и тростию, и надписанием евангельским. Се Агнец Божии вземляй грехи мира сицевым видом [на поле: прилагается рисунок печати]. Каковым обычай святыя восточныя церкве, еже печатати просфиры кругловидною печатию, имущею посреде трисоставный крест по премногу утверждает святый восточный учитель, Симеон Фессалонитский, во главе 88, книги своея. Кий един той же а не ин обычай восточныя церкве, и в великороссийстей церкви, от самого крещения России, даже до времене патриаршества Никонова, неизменно содержашеся. Свидетельствуют сие самовидетелне, обретающиися в России, древлецерковнии дорники. Не менше и сам Питирим, в книзе своего сочинения Пращице, во ответе 25, утверждает. Ныне убо от лет Никона патриарха, в великороссийстей церкви, святоотеческий обычай кругловидства печати изменивше отринуша. Глаголют яко [кругловидство, (якоже Феофилакт Тверскии [книга на ответы выгорецкия, лист 62]) от римскаго обычая бяше]. Вместо же кругловидныя печати, имущия трисоставный крест, печатают просфиры, четвероуголною печатию, имущую посреде двочастный крест; без надписания евангелскаго, сицевым видом [на поле: изображение четвероугольной печати, с надписаниемIИС ХС:НИ КА]. Обаче, аще и тщатся сими своими словесы, яд прелести своея укрыти; но не возмогут. Абие бо обратится болезнь их, псаломски рещи, на главы их и на верси их неправда их снидет. Вемы бо святаго Иоанна Златоустаго глаголюща [в беседах апостол. на деяния, нравоуч. 17] вемы, яко [противницы церкве видяще что противно своему зловерию, в книзе каковей, и хотяще ю отвержену и помрачену имети, не могуще же инако ни единым образом противу стати, оглаголуют ю быти коего любо еретика]. Равнообразне и зде восхотевше отринути кругловидную печать от просфир, оглаголуют ю западнаго костела преданием. Но аще западнаго костела еже печатати просфиры кругловидною печатию, имущею посреде себе трисоставный крест, с надписанием евангелским, есть обычай, и предание, а не святыя древлевосточныя церкви. Како святый учитель восточный Симеон Фессалонитский, изъявляя кругловидство печати в печатании просфир, утверждает восточныя церкве обычай. сице глаголя: [Яже, (рече) смотрения Спасителя во хлебе, яже убо суть божества, в хлебе печати, яже кругловидная есть, и посреде ея крест]. книга 1, глава 88. Видиши ли коль явственно глаголет, в хлебе печати, яже кругловидная есть, и посреде ея крест, и не рече четвероуголная, но кругловидная. Како же и святии гречестии восточныя церкве архиереи, вселенския патриархи Иеремия, и Феофан, в России самобывша, святую литоргию служиша, самовидне своими очесы видевша, на просфирах трисоставный крест, в кругловидней печати, не зазреста и не порекоста латинским обычаем; но и паче похвалиста в России содержащееся тогда благочестие, якоже явствует в Кормчей. Аще бы был латинский обычай, всяко имела быста зазрети, и повелена быста исправити, яко вселенская патриарха. Како же и по сию оставшия святии архиереи, греци суще, Арсений и Иосиф Суждалстии, Нектарий Вологодцкий, иже присно на своих престолех служаще, трисоставным крестом в кругловидней печати просфиры печатаны имуще, якоже древнии дорники показуют, не зазреша, и не отринуша, порекше латинским обычаем? Ельма же убо и святый Симеон Фессалонитский, кругловидство печати утверждает: елма вселенская патриарха самобывша в России, и самовидевшая кругловидную печать, не зазреста и не порекоста латинским обычаем: елма святии архиереи; греци суще, служившии, в России на престолех, повыну видевше кругловидную печать, и не отринуша. Всякому проявлено, яко еже печатати просфиры, кругловидною печатию, имущею посреде трисоставный крест, есть обычай и предание святыя восточныя церкве, а не латинский. Аще убо глаголеши латинский; рцы, когда и в кая лета? при коем благочестивем князе, или царе великороссийстем? и при коем митрополите, или патриарсе российстем? и ким внесеся сей обычай в Россию, всяко не имаши показати. Ибо сей обычай, еже кругловидною печатию печатати просфиры, от самого начала христианския веры, непременно в России содержашеся. Что убо хощеши ли да ти аз покажу? Возмем от Никона, и пойдем разсмотряюще времена даже до лет князя Владимера и всяко обрящем той же обычай непрерывно содержащийся. И виждь ми: При пяти благочестивых великороссийских патриарсех, Иове, Филарете, Ермогене, Иоасафе, и Иосифе, во святей великороссийстей церкви, даже до лет Никона патриарха, обычай бе просфиры печатати кругловидною печатию. Еже по премногу древлецерковнии дорники обретающеся в России самовиденне показующе утверждают. Сицев же обычай печатания просфир, и прежде пяти патриархов в России, при святейших митрополитех Московских до царя Иоанна Васильевича, и при царе Иоанне Васильевиче непременно содержашеся. Явственно сие засвидетельствует Питирим в Пращице, во ответе 19. Той же а не ин обычай, печатьствования просфир и прежде царя Иоанна Васильевича, при благочестивых князех, даже до лет святаго Владимира, и при Владимире, отнележе начашася службы в России, непреложно имяшеся, зело сие утверждают отцы стоглавнаго собора, иже содержаху обычай древний друг другопреемательне, печатати просфиры кругловидною печатию. понеже убо сей святый собор, собравыйся с Макарием митрополитом, не новыя введе, но древния святыя великороссийския церкве обычаи и содержания укрепи, яко в предисловии Стоглава изъявляет. И аще от лет святаго князя Владимира, до лет благочестиваго царя Иоанна Васильевича, в Российстей церкви, непременителне содержашеся обычай, печатати просфиры кругловидною печатию: аще от лет царя Иоанна Васильевича, до бытия пяти благочестивых патриархов, той же обычай неизменителне соблюдашеся: аще в бытность пяти благочестивых патриархов, до лет Никона патриарха, един той же а не ин, святыя восточныя церкве обычай бяше, печатати просфиры кругловидною печатию, имущею посреде трисоставный крест. Остается прочее яко четвероуголною печатию печатати просфиры, имущею посреде двочастный крест, не есть предание святыя древлеправославныя восточныя церкве, не есть содержание, святыя древлероссийския: но римскаго отпадшаго благочестия костела обычай. И в лепоту. Ибо аще хотя лжею лицемерия своего яко овчиною закрывающе в себе, внутренняго волка и не объявляют [книга Кирилова, лист 495]. Потаемне согласившеся с римляны, яко христопродавец Июда с жидами умыслиша всех благочестивых в здешней области христиан, безвести отторгнувше, с собою в погибель вринути. Обаче самая их писания объявляют яко есть римскаго костела обычай. Глаголют бо яко вся наши книги преводим с греческих, яже печатаются в латинских странах. Которая книги печатаются, в трех латинских градех, в Риме, в Паризе, и в Венеции. Но сия греческия книги новыя многая несогласия и погрешения, с древними греческими и словенскими имут. Сие не ин кто, но сам Никон патриарх их засвидетельствует. Егда бо его извергаху из сана патриарша, принесена бысть книга Номоканон, по ней суд произвождаху, именуемый восточный, еже и закон царский, назва ю еретическою, яко напечатася в западных странах. О чесом в соборном деянии писано, о извержении того Никона патриараха, в лето 7175. Но и в житии того же Никона патриарха, повествует; Яко печатныя греческия новыя книги, с греческими же и славенскими, древними, многая несогласия и погрешения имут. В книзе же Жезле, тыяждо книги, и в тех же градех печатныя книги глаголюще оправдает [Жезл новопечатный, лист 54]: [Яко праведне и нерастленне печатают их латыни. от них же вся наша книги преводим. ничесоже прилагающе или отъемлюще, да совершенне им уподобимся]. Зде снеси купно словеса Никона и Жезла, и виждь каковы суть нынешния великороссийския церкве книги. Никон рече, яко печатныя греческия книги новыя, с греческими же и славенскими древними, многа несогласия и погрешения имут. Жезл же глаголет: от них же вся наша книги преводим, ничесоже прилагающе или отлагающе, да совершенне им уподобимся. От коих преведше напечаташа [Скрижаль, лист 57, во Псалтырех новых]: [креста убо образу от двою древу совокупляюще покланяемся, на нем же и распятыи за нас,Iисус Христос руце прострыи, вся языки расточенныя в концах, во едино собра]. И якоже крест двочастный, от новых, греческих, в латинских странах печатных, растленных книг, преведше, древле в России неслыханных в своих книгах, подобящеся им совершенне, напечаташа и церкви предаша: Тако и четвероуголную печать, от тех же книг преведше, подобящеся латином, в новых своих Служебницех напечатавше, определиша в церкви просфиры ею печатати. Отсуду явственно видимо есть, яко четвероугольною печатию печатати просфиры содержимый ныне в великороссийстей церкви обычай есть римскаго костела, а не восточныя церкве. Кругловидною убо печатию, святая древлеправославная церковь определила печатати просфиры, не просто ниже всуе: но таинственне и по прообразованию. Понеже бо манна в ветсем завете, еюже евреи в пустыни питахуся, с небесе сходящая бе кругла. яже круглотою своею прообразоваше божество, в пресущественнем хлебе и вине. якоже споведует кир Гавриил Филадельфийский, сице глаголя [книга О седми тайнах, лист 118]: [и манна убо бе кругла, и круг убо прообразоваше в божество, в пресущественнем хлебе и вине, ниже начала, ниже конца имеюще]. глава 8. Подобообразне и зде кругловидство печати прообразует божество Христа Спасителя. Сие святый Симеон Фессалонитский толкуя таинство просфиры утверждает, глаголя: [Яже, рече смотрения Спасителя, яже убо суть божества, в хлебе печати, яже кругловидная есть, и посреде ея крест]. книга 1, глава 88. Виждь, рече, яже убо суть божества, в хлебе печати, яже кругловидная, прообразует, яже убо божества Спасителя, сиречь, безначальное и безконечное. Ибо якоже печати оныя кругловидство не имать ни начала ни конца: сице и Сын Слово Божие не имать ни начла ни конца, но всегда и везде сыи. Яко же той же святый Симеон Фессалонитский толкуя таинство кругловидства печати, сказует сице: [Безначалнаго и безконечьнаго Слова воплощения всем вкупе показующи, и Бога суща, и по нас явльшагося, и воплотившагося поистинне и страдавша]. глава 88. Се колико и каково кругловидная печать таинство в себе замыкает. Коего таиньства в четвероугольной печати,  аще, и многащи потщишися поискати, отнюд не обрящеши. Понеже четвероуголная не имать в себе кругловидства, имже изобразуется безначалное и безконечное Слова воплощеннаго. Не имея же, кругловидства, ниже имать и знаменования безначалнаго и бузконечнаго. В четвероуголии бо есть начало, есть и конец. Ибо от угла до угла черты протязаемыя показуют начало и конец. В едином бо угле начинается черта в другом же окончание свое имать. И тако сими своими началом и концем, четвероуголная печать не показует, якоже кругловидная, безначалное и безконечное Бога Слова: Но всяко под началом суща, якоже Арий злочестивый блядословляше глаголя: Бе некогда яко Сын Божии имеяше начало. Откуду сим своим новым мудрствованием, показуют себе смудрствовати Арию, но таковою четвероуголною печати, показующею начало и конец Бога Слова, и нехотяще самою вещию подтверждают себе зело зело.

Ктомуже святая древлеправославная великороссийская церковь, повсемественне содержащи имеяше обычай, в кругловидней печати полагати надписание, словес пророка Иоанна Предотечи рекшаго [Ин. зач. 3]: Се Агнец Божии вземляй грехи мира. обаче не всуе ниже туне определила сицевое надписание полагати на просфирах: но вин ради благословных. Ибо предложенный хлеб в проскомидии знаменует самого Христа Спасителя. Еже яве видимо есть от толкования литоргии, идеже пишет тако [Иоанн Нафанаил, в толковании литургии, глава 68, Скрижаль, лист 152]: [хлеб убо, иже разлучися от священника, да священнодействуется. (ниже) знаменует Христа по возрасту оному, от Него же бысть, дар, бысть убо дар от самаго рожества]. Скрижали, глава 68. Священник же начинаяй божественную литоргию, знаменает Иоанна Предотечю. Явственно сему научает Иоанн Нафанаил в толковании литоргии сице глаголя [Скрижаль, глава 53, лист 148]: [Священник, иже начинает божественную литоргию, носит образ Предотечи Иоанна Крестителя]. глава 53. Якоже убо тогда узре святый Иоанн Предотеча Христа грядуща к себе, возва глаголя [Ин. зач. 3]: Се Агнец Божии вземляй грехи миру. Подобне и начинаяй служити литоргию священник, видя в проскомидии предложенный хлеб, иже знаменует самого Христа,  отлученный в священнодействие, на нем же имать воспоминание страстей Христовых изображати, аки перстом указуя глаголет: Се Агнец Божии вземляй грехи мира. Тем и начиная проскомисати глаголет: [Жрется Агнец Божии вземляй грехи миру]. Сие толикое и таковое таинственное евангелское подписание, нынешнии великороссийския церкве архиерей, порекше излишним, яко Питирим Нижеградский в Пращице, во ответе 211, отринуша, и в новоизданней своей четвероугольной печати не подписуют. Да како убо есть излишнее, егда хлеб отлученный на проскомидии, да священнодействуется, знаменует самого Христа, священник же священнодействуяй, знаменует Иоанна Предотечю? ей несть излишнее. Аще бы было излишнее: не бы и святая древлеправославная церковь определила подписовати. Но понеже несть излишнее. но велие в себе таинство заключающее есть, сего ради и узаконоположила. Убо лепотствует надписовати, да весть, яко хлеб сей Христа знаменует.

К сим нынешния великороссийския церкве архиереи сопротивомудрствующе, преданию и содержанию святыя древлевосточныя, и великороссийския церкве, копие и трость, от креста отъявше, отринуша, и в четвероугольней своей печати на просфирах при кресте не изображают. Святая бо древлеправославная великороссийская церковь, последующе древлевосточней, имеяше обычай, в кругловидней печати при кресте Господни изображати копие, имже животворивая ребра Господня прободена быша, и трость на нюже оцет придевше напояху Его. якоже свидетельствуют, священнии евангелисти, Матфей в зач. 113, Мр. в зач. 68, Ин. в зач. 61. Кая оружия святая древлеблагочестивая церьковь изображала на просфирах, купно с крестом, вин ради благословных.

Первое: Святии богословцы, копие и трость, купно с крестом Господним почитают, и прославляют, и покланяются, яко сими вкупе страсть Его содеяся. Сице святый Иоанн Златоустый труба церковная вопиет, глаголя [Маргарит, лист 517]: [С ними же и мы искуплены от клятвы законныя, честною ти кровию, покланяемся безстрастия ходатайственым ти страстем, и смерти волней нас оживльшей. Целуем же крест и губу, и трость и копие, и гвоздие с багряницею, еюже поруган бысть сладосте церковная. Прилагаем же к сим устне, и очи и сердца]. в слове, О распятии Господнем. Подобне святый Георгий архиепископ Никомидийский воспевая глаголет [во святый и великий пяток]: [Лобзаю Твой крест, имже мой осудил есть грех, имже смертнаго мя осуждения свободил еси. Целую трость, еюже свобождение ми подписал еси, еюже строптиваго змия уязвил еси главу. Целую губу иже ко пресвятым Твоим принесенную устом, еяже ради преслушания горькое в сладкое претвори. Яко сладкую вместо желчи вкусих снедь, яко веселия вместо оцта причастихся питию. (ниже) Целую копие иже мое рукописание раздравшее, безсмертия источник отверзшее]. в слове на погребение.

Второе: Святый сладкопеснивый церковный славий, яко святый сладкопеснивый сирин Иоанн Дамаскин, Феофан митрополит Никейский, Иосиф песнописец, в своего творения имнах, ублажающе копие и трость, купно с крестом воспевают сице: [Покланяющеся чтем копие, и губу, и трость, имиже дарова миру своему, мир и велию милость]. глас 5, вторн. вечер, в стихере. И паки: [Копие, и трость, губу и венец, лобзающе, (ниже) Честне почитаем, имиже спасохомся]. в четверток вечер в стихере. Паки: [Страдати претерпев Владыка, яко да безстрастие всем подаси, покланяющимся Твоим страстем, и волному заколению, и копию, и гвоздем, и тростем яже долготерпеливе хотя претерпел еси, яко да и мне исходатаиши Господи, ради страстей Твоих безстрастие]. глас 8, во вторник веч. стихера. Сим подобне, и триоднии творцы, святии Феофан Никейский, и Иосиф песнописец, Феодор Студит, купно с братом, Иосифом Солунским, воспевающе поют: [в пениих поюще и глаголюще, слава живоносному Ти кресту, слава божественному копию Твоему, имже ожихом едине Человеколюбче]. в пяток, 3 недели поста, на утрени седален. Паки: [Кресту Твоему вси покланяемся Христе, предпразньство творяще воскресения Твоего. поем гвоздия Твоя, чтем и копие, устне и очи, душю же и тело сим очищаем]. в понеделник, 4 недели поста, песнь 1. И паки: [Поем ТиIсусе многую благость, покланяющеся кресту Твоему копию и трости. тем бо разори Щедре вражды средоградие]. среда, 4 недели поста, песнь 6. И паки: [Пою копие Твое, покланяюся, и гвоздем Твоим, губе и трости с крестом, имиже спасе мяIсусе Боже]. в среду, 6 недели поста, в 9 песни стих. Темже елику убо святии богословци, и церковнии песнотворцы, всегда и всюду, крест копие, и трость вкупе научаху прославляти, и покланятися, потолику и святая древлеблагочестивая церковь крест воображаше неразлучно с копием и тростию, на нем же и ими же содеяся страсть Господня, яко на иконах, сице и на просфирах.

Третия: И наивящшая вина, еже на просфирах, при кресте Господни копие и трость изображати, от самыя приличности показуется годствовати. Зане просфира оная, юже разлучи священник, да священнодействует, в проскомидии, яже знаменует Христа прообразует страсти Христовы, страсть, смерть, и погребение [Скрижаль, глава 68, лист 157]. И показует самыми делы, яко сим образом прииде на страсть Господь, сим образом умре, сим образом прободеся в ребра, сим образом от прободенных ребр излияся кровь и вода. понеже бо священник повнегда возмет хлеб, глаголет [Скрижаль, глава 69, лист 160]: Воспоминание творим Господа Бога и Спаса нашегоIсуса Христа. Кое воспоминание? страсть, крест и смерть: О сих нам повеле творити воспоминание Его. И откуду явлено есть сие. от Павла. он бо добре разуме таинства Христова. Ибо пиша к коринфом о таинстве сем глаголет: Яко Господь рече: сие творите в Мое воспоминание. Сего ради, егда речет священник, в воспоминание Господне, приводит и оная. яже являют крест и смерть. Ибо режа хлеб, глаголет пророчество пророка Исаии: Яко овча на заколение ведеся, сиречь, Христос ведеся в смерть яко овча, и словом и делом показует, елико есть возможно. И якоже бо тогда на кресте един от воин прободе в ребра: Сице и в проскомидии водружает копие священник в просфиру, изобразуя прободение ребр Господних. Еже и святый Симеон Фессалонитский утверждая глаголет: [и от приносящих хлебов един прияв, знаменует, его копием крестообразно, спасительную страсть прообразуя Христову]. глава 84. И понеже убо аще тогда во время страдания Господня при кресте копие и трость быша, како и зде ныне, воспоминанию совершающуся тогожде самого страдания Господня в хлебе, при кресте на просфире не лепотствует изображатися копию и трости? ей ей лепотствует, паче должно есть.

Темже убо аще нынешняя великороссийская церковь, сопротивомудрствуя отринувши обычай и содержание, святыя древлеправославныя церкве, еже печатати просфиры кругловидною печатию, [Коея кругловидство знаменует безначалное и безконечное Бога Слова] уставила четвероуголною, подобящеся латином, в ней же не показуется знаменователнаго безначалнаго и безконечнаго Бога Слова, печатати просфиры: аще отвергла подписание евангельское, Се Агнец Божии вземляй грехи миру, от печати просфир: аще от изображения на просфирах копие и трость бывших при кресте Господни отринула: аще самый трисоставный животворящий крест Христов, совершеннотворитель всякаго таинства, отринувши печатает двочастным, иже несть крест, о чесом выше доволно засвидетельствовахом, Христов. Яко же и святый Иоанн Златоустый глаголет [в беседе 10 ко евреом, лист 2966, Кирилова лист 59]: [Несть втораго распятия, сиречь, крест вторыи несть ктому]. в беседе 10 ко евреом. Но един крест Господень честный, егоже на рамех своих Христос, на смерть грядый с места снес на гору Голгофу, на нем же и титла от Пилата была написана. книга Кирилова, лист 59. И не токмо отринула, но и печатающия трисоставным крестом просфиры, по древлецерковному преданию, а не двочастным, в соборном свитце отлучению, и анафеме предает, и с еретиками дерзновенно осуждает. В новопечатной же Пращице, во ответе 212, полагающыя на просфирах, креста трисоставнаго воображение в кругловидней печати, с подписанием евангелским, с копием и тростию, под проклятие соборное всех архиереов подлагает и низвергает, но и тайнодействуемыя просфиры под таковым креста воображением, и печатию с подписанием отрицает глаголя [Пращица, ответ 212]: [Не может быти сущее святое тело, и кровь Христова. весма]. То како под таковою четвероуголною печатию, и двочастным крестом, иже несть Христов, в действуемей просфире может быти сущее тело Христово, и кровь Его святая, лишившися самосовершителя креста, без него же, якоже множицею рехом, хлеб и вино не может преложитися в существо тела и крове Христовы? Но и самое сие новосотворшееся печатьствование не по древнему святыя церкве преданию бываемое, несть, несть ли под клятвою святыя древлевосточныя церкве? ей есть. Ибо святая древлеправославная церковь, все новосотворшееся, или последи содеятися хотящее, анафеме предает, сице светлым гласом вопиюще: [Вся яже чрез церковнаго предания учительства, новосотворенная и соделанная, или по сем содеятися хотящая анафема]. правило собора соединения.

И аще убо сия четвероуголная печать, не по преданию древлеправославныя церкве новосоделанная есть под клятвою: аще без трисоставнаго креста, совершеннотворителя таинств, не может хлеб и вино пресуществитися в тело и кровь Христову: благоявленно яко в новодействуемей литоргии, под четвероуголною печатию, и двочастным крестом, и действуемый хлеб и вино несть сущее тело и кровь Христова: Но хлеб хлеб, и вино вино. Ибо аще по их неправому мнению, яко печатию, с надписанием евангельским, и трисоставным крестом Господним, с копием и тростию, в действуемей просфире, еже да не будет, не может быти, (всегда бо и и бысть, и есть, и будет) сущее тело и кровь Христова весма: Но неотрочно, паче в новодействуемей просфире, под четвероуголною печатию, яже есть под клятвою, и двочастным крестом, иже несть совершенотворитель таинств, якоже трисоставный, без него же не пресуществляется хлеб и вино, в плоть и кровь Христову, несть сущее тело и кровь Христова. И аще тако есть, якоже и есть. То како таковаго причащения возможно причаститися? и коего тела Христова имать вкусити причащаяися? разве тела соединения со еретики. и в лепоту. Ибо якоже причащаяйся тела и крове Христовы, едино тело со Христом бывает: Сице и причащаяися со еретики, едино тело с ними бывает. Убо сицеваго причащения весма блюстително есть, яко не со Христом соединяет, но от Христа далече отлучает, и царствия небеснаго лишает.

Глава, 6.

Яко в великороссийстей ныне церкви обретаются два креста, тако и два Христа.

Обретохом убо мы ныне в россианех содержащиися два креста, един трисоставный, тричастный, от святых песнописцев зовомыи, на нем же Христос Бог плотию распяся: другий же от новых учителей нарицаемый двочастный, яко от двою древу соделан, его же до лет Никона патриарха в России не слышашеся, но с правления новопечатных книг, паче же стравления, от западнаго костела, Никоном в российскую церковь внесеся. обрящем всяку в них, аще токмо внутреннима очима ума нашего добре разсмотрим и два Христа проповедуемыя, и в лепоту. внемли точию. Христос бо есть имя нарицателное, яко многим пристоит. Понеже бо древле нарицахуся христи царие и архиереи, от помазания, яко елеом помазовахуся, егда на прстолы царския посаждахуся. якоже Самуил пророк помаза Давыда елеом от рога на царство. и сам пророк вопиет глаголя [псалом 19]: Ныне познах, яко спасл есть Господь христа своего. Христос же есть имя греческое, производится от еврейскаго, мессия, еже словенский помазанник, происходит от месса мажу. Нарицается же помазанник, за восприятие плоти, помазан совершением Святаго Духа, яко Царь превыше всех царей, и Священник, превыше всех священников, и Пророк, превыше всех пророк [Катихисис великий, глава 1, лист 2 на обор.]. О Нем же псалмопевец Давыд глаголет [псалом 44]: Сего ради помаза Тя Боже Бог Твой елеом радости, паче причастник Твоих. Собственно же имя есть,Iсус, еже единому точию пристоит, Спасителю нашему Христу Богу. Сие имяIсус есть еврейское, еже гречески глаголется сотир, словенски же спас, или спаситель, сиречь избавитель. Понеже спасл есть нас от грех наших, и от всякаго дела греховнаго и от скверны, и мучения диавольскаго, и смерти, и муки вечныя, и ада преисподняго избавил нас есть [Катихисис великий, глава 1, лист 3]. Которое имя Христа СпасителяIсус, святая древлеправославная великороссийская церковь, последующи восточней, яко матери своей, везде и всюду яко во святых книгах, тако, и на святых образех, и на честных крестех писаше с единою иотою, без иты, сице,Iсъ, еже явственно показуют святыя книги, от них же немногшыя зде на среду в достоверное свидетельство предлагаем.

Вначале в книгах прежде печатнаго тиснения писанных, при великих князех, и при освященных митрополитех российских всякаго звания, их же множество число превосходит, до лет царя Иоанна Васильевича, везде писашеся имя Спасителево, сице,Iсъ.

Сице во Псалтыри толковой, преведенной Максимом Греком философом в лето 7031.

В книгах беседах на благовестия евангелисту Матфея, Иоанна, преведения того же преподобнаго Максима и ученика его Селивана.

В книзе того же преподобанго Максима Грека сочинения, на славенском языце, имя Спасителево везде написано,Iсъ.

В книзе преподобнаго Иосифа Волоцкаго, нарицаемем Прсветитель. и второй тогожде книзе, о монастырском общежителном благочинии,Iсъ.

Подобне в древних книгах харатейных на славенском языке писаных.

Сице в евангелии харатейном, святаго Моисея Новгородскаго, имя СпасителевоIсъ,Iсе.

В книге Служебнице харатейном писма и перевода, святаго Киприана митрополита всероссийскаго.

В книзе харатейном новом завете рукописания святаго Алексия митрополита и чюдотворца всея России.

В харатейной тетроевангелии харатейном, писанном в Констянтинополии, в 6658.

И во инех безчисленных рукописных книгах, на бумазе и хартии писанных, (из них же иныя руками святыми писаны) имя Спасителево кроме иты,Iсъ, писано.

Но и в древлегреческих харатейных, на греческом языце писаных, имя Христа Спасителя под титлою пишемо всюду с единою иотою видится сице,Iσ.

Сице в книзе Кормчей в десть,Iσ,Iσ.

В книзе святаго Кирила Иеросалимскаго,Iσ,Iσ.

В книге святаго Никифора патриарха Царя града, правилной,Iσ,Iσ,Iσ.

В книге правил седми соборов,Iσ,Iσ.

В книзе святаго Епифания Кипрскаго,Iσ,Iσ.

В книзе Бесед апостольских,Iσ,Iσ.

В книзе тетроевангелии харатейном писаном на греческом же языце, первая и большая его часть буквы славенскими, на греческом языце, идеже имя Христа Спаса, писано: ОIС, ОДУ,IС, ДIАIVIV. Последняя же и меншая часть греческаго писмени, имя Спасителево писано сице,Iσ,Iσ,Iσ.

Такожде в книгах древлепечатных московского друку, от лет царя Иоанна Васильевича, до Никона патриарха, печатных при митрополитех и пяти патриарсех. яко служебных, тако и четии, всякаго звания, ихже множества ради неисчислительно есть.

В книзех благовестницех, евангелиях учителных, Кормчих, Псалтырех со воследованием, в минеях общих, в Маргаритех, в Пролозех, и в прочих безчисленых везде имя Пресвятаго Владыки, пишемо зрится, аще под титлою, без иты,Iс, аще без титлы,Iсоусе.

Подобне в книгах острожския печати, яко в Библии в Маргарите, в книзе Великаго Василия, в Заветех, во Псалтырех, и Часословах, и в книзе О вере изданной в лето 7091, и в прочих острожских книгах, яже при велицем благочестия поборнице Василии князе издашася, во всех оных, и в прочих сим подобных, имяIсусово, яко под титлою печатано,Ic,Iса,Iсе, имеется, тако без титлы,Iсоус Наввин,Iсоус Сирахов, без иты напечатано показуется.

Сие благочестивое древлеправославныя церкве содержание, еже и писати имя Спасителево, без иты,Iс, и произносити такожде без приложения иты,Iсе, и от святых чюдотворных, елико греческаго, толикаго и российскаго живописателства, образов, на них же имя Христа Спасителя, с единою иотою под титлою пишемо, светлее солнца сияющи видимо есть, утверждается зело зело.

Сице на образех Пресвятыя Богородицы, Владимирския, и Тихфвинском, святым евангелистом Лукою писанныхIС, ХС.

На образе Пресвятыя Богородицы Казанском.

На образе Пресвятыя Богородицы, писанем, Петром митрополитом Московским.

На образе Спаса Христа Корсунском.

На образе Пресвятыя Богородицы Влахернском иже принесен из Царя града, в лето 7000.

На образе Грузинском принесеннем из Персиды, иже стоит на Пинеге.

И на прочих Пресвятыя Богородицы чюдотворных образех, их же выше в главе третией явихом, и кроме сих, на иных премногших. иже не поновлени суть от нынешних иконописцев, везде пресвятое имя Владыки Христа, писано является без иты,Iс.

Но и святии чюдотворнии кресты, тоеже святое отцепреданное благочестивое российския церкве содержание, еже и писати и глаголати пребожественное имя Христа Спаса, без итыIс, по премногу утверждают.

Сице на кресте Корсунском, иже в Москве во Успенском соборе, имя Владыки Христа написано,IС, ХС.

На вратах медполитых Корсунских, яже в Великом Нове граде.

На кресте, его же святый Иоанн Богослов даде святому Авраамию Ростовскому.

На кресте состроеном, (по Божию откровению) царем Констянтином.

На кресте каменом сотворенном, в лето 7866, иже в Великом Нове граде.

На благословящем кресте соделанном, в лето 6660, в Переславле Залеском.

На всех сих чюдотворных крестех, имя Спасителя Христа, с единою иотою написано в подписании зрится, сице,IС ХС.

Нынешния же новии великороссийския церкве, архиереи, восхотевше новаго себе Христа, оное имя Пресвятаго Владыки, с единою иотою пишемое и произносимое,Iс, хулительне порекше равноухим отринуша. Вместо же оного новое и неслыханное имя, чрез иоту и иту пишемое и глаголемое, сицеIисус, проповедавше приведоша. Якоже Димитрий Ростовский в книзе своей Розыске, являет глаголя: [В руском языке расколщики в две токмо силлябы глаголющеIсоус, не исповедуют Спасителя и Исцелителя душ наших. И вправду в них инIсоус: Не истиннаго бо Спасителя и Исцелителя исповедуют, но некоего равноухагоIсоуса]. часть 1, статия 1. Сему подобне и Питирим в Пращице новосочиненней глаголет: [Яко с единою иотою пишемое имяIсоус не знаменует Спасителя, но равноухаго]. ответ 146. Но оле дерзостнаго языка! Оле непреподобных устен! Что убо аще имяIсус, с единою иотою пишемое, есть равноухий, и како божественный Лука евангелист, написавый образ Богоматере с предвечным младенцем, иже ныне на Тихфине подпись имяIСЪ ХС, без иты? Еда ли он неведый знаменования Его, равноухаго подписа? Далече блядословие сие да будет. Аще бо по сих мнению без иты пишемое, имяIсъ, есть равноухий. Убо Лука святый написаIСЪ ХС, не Спасителя написа, но равноухаго. И аще равноухаго, то како толикая, и толь пребезчисленная, якоже явствует история, чюдеса от него содеяшася? благоявленно яко Спасителя. К сим святии и чюдотвории образы и кресты, ихже выше предпоказахом, имущии на себе написано имя Владыки Христа, без иты,Iс, Хс, еда равноухаго имя на себе имяху? И аще равноухаго: И како от них премногая и различная чюдеса совершахуся?

Но святии древлероссийстии архиереи, еда в равноухагоIсуса, Его же пресвятое имя, яко в древлеписменных книгах писаху, и в печатных печатаху, тако и во устех имеюще призываху вероваху? И како в нетлении мощей присиявше чюдодействоваху. И святии преподобнии чюдотворцы еда равноухаго именем бесы изгоняху? никакоже никако; но Христа Спасителя. Понеже бо якоже сердцем вероваху, сице и усты исповедоваху,Iсуса, Спасителя и Избавителя, Его же имя призывающе чюдодействоваху, и силы многи творяху, еже святыя древлецерковныя книги харатейныя писменныя и печатныя, и святии образи, ихже выше предложихом, показуют, тако и толковаху. Сице божественный Иоанн Златоустый, в беседах евангелских, (их же преведоша с греческаго на славенский язык, преподобный и премудрый Максим Грек, и Селиван ученик его) [на Мф., беседа 1]: [Iсус убо сие имя несть еллинско, но еврейским гласом глаголется, еже есть в елладскии язык протолкуемо сотир, сиречь спас, спас же от еже спасти люди своя]. Сему согласно и святый Феофилакт Болгарский, в толковании священнаго евангелия, от Матфея, в зач. 1, протолкует глаголя: [Iсус имя несть эллинско, но июдейско, сказуется Спас]. Благовестник, лист 14. Подобне святый Кирил Философ, учитель славенский, в книзе харатейней сказания святаго евангелия, юже сам преведе, в лето 6406, от Матфея, в неделю пред Рожеством Христовым, толкуя имяIсусово глаголет: [книга рожестваIcХва. Сего ради сице рече. зане всего смотрения глава си суть и начаток и корень всех благ. имя жеIсъ Хво несть не гречески ни славенски, но жидовски, сказуемо есть Спас. Спас же наричется, зане спасе люди своя]. Такожде и святый Кирил Иеросалимский, толкуя имя пресвятое ВладыкиIсус, глаголет [книга древлеписменная, оглашение 9]: [Един естьIсъ Хс, имя чюдно пророки провозглашаемо. Глаголет бо Исаия пророк: Се Спас тебе приидет, имыи с собою свою мзду. Спас же еврейскииIсъ сказуется. (ниже)Iсъ же наречеся не человеки, но аггелом]. оглашение 9. Видиши ли коль явственно показуется древними книгами писменными, харатейными, и печатными, и святыми чюдотворными образы, и честными кресты, и толкованием святых и богодохновенных учителей церковных, яко якоже святии архиереи, и премудрии преводницы, и вси христиане древлероссийстии, вероваша воIсуса Спасителя, тако и писаша с единою иотою, пресвятое Его имяIсъ, сице и толковахуIсъ Спас. И что сих свидетельств крепчайшии? Что ли достовернейшии быти может? Что убо глаголют; яко аще и писаху кратко,Iс но произношахуIисус. никакоже никако. Явственно сие видети есть от старописменных, и старопечатных книг, яко идеже без титлы складом писашеся имяIсусово, всюду без приложения иты писашеся, тако и читашеся. Сице во Псалтырех со воследованием, и уставех, в святцах сентября в 1 день, напечатася: и памятьIсоуса Наввина.

В Кормчей печатной, на листе 83, поместнаго собора, иже в Лаодикии, в правиле 58, имяIсоуса Наввина напечатано: Iсоус Наввин.

В прологах печатных, сентября, в 1 день: В той же день УспениеIсоуса Наввина. стих: Течение уставль солнечное древле прочееIсоус Солнце славное видит.

В книзе завета втораго выхода, от Матфея, зач. 28: Изыде в сретениеIсоусови, зач. 112. ПоемшеIсоуса. Иоанн, зач. 17. ИдеIсоус.

Во Апостоле в конце Июдина послания;Iсоус Христом Господем нашим.

В книзе О вере в полдесть, на листе 166: И во единаго ГосподаIсоуса Христа.

И в прочих безчисленных яко писменных тако и печатных книгах, имя Христа СпасителяIс, яко под титлою писашеся и печаташеся всюду с единою иотою: сице и без титлы складом с единою иотою, и кроме иты произношашеся имя Христа истиннаго ИзбавителяIсоус. Сей бысть роду человечю истинныйIсус Избавитель [Катихисис великий, глава 1]. Сие есть имяIсъ, ему же поклоняется и припадает всяко колено небесных и земных и преисподних. Сие есть имяIсъ, егоже аще кто призывает без сомнения Духом и истинною, спасен будет. Сие есть имяIсъ, о немже аще кто что просит от Отца небеснаго, вся приимет. Сие есть имяIсъ, егоже подобает всем верным присно имети в сердцех, и во устнех, во всех делех своих, по апостолу Павлу глаголющему: Аще что творите, словом, или делом, вся во имя ГосподаIса Христа творите, благодаряще Бога и Отца о Нем. Тем божественным именем имамы избавление прияти, и вся враги наша противныя победити.

Темже убо аще пресвятое имя Владыки Христа, святым пророком прореченноеIсъ, без иты пишемое есть Спас: аще аггелом, нареченноеIсъ, есть Спас: аще священным евангелистом Лукою написанное на святых образех, и прочими святыми живописатели на святых образех, и крестех изображенноеIсъ, есть Спас: аще во всех древних и греческих и славенских харатейных писменных и печатных книгах пишемоеIсъ кроме иты, есть Спас: аще святии святителие верующе воIсуса свене и ты, егоже выну призывающе, в нетлении мощей просияша: аще преподобнии чюдотворци именемIсуса с единою итою произносимым бесы изгоняху и чюдодействоваху: аще кто что просит о имениIсуса, без иты же пишемом, от Отца небеснаго, приемлет: аще святии богословци имя кроме иты пишемое Спаса протолковаху. Убо нынешними новыми архиереи проповедаемыйIисус, чрез иоту и иту пишемый, несть Спас, сиречь, Спаситель и Избавитель рода человеча: но ин некий неслыханный, егоже пророцы не прорекоша, апостоли не проповедаша, святии отцы седми вселенских, и девяти поместных соборов не провозвестиша. И в лепоту. Аз бо ти не отвне свидетелей приведу: от самех их. Сами бо они яве свидетельствуют, яко у них инIисус. Сице глаголет Димитрий Ростовский: И вправду в них инIсус. И аще в нас инIсус, благоявленно яко в них ин.

Темже якоже два креста обретохом, един тричастный трисоставный животворящий, на нем же Христос распяся, другий двочастный новоизобретенный, от римскаго костела привнесенный: тако и два Христа, единагоIсуса Спасителя и Избавителя рода человеческаго, другаго новагоIисуса, апостолы не проповеданнаго, но новыми учители изобретеннаго, и проповедуемаго обретаем.

Божественный же убо апостол Павел утверждая нас во истинней вере, всячески не повелевает приимати новопроповедуемагоIсуса, но отбегати. Сице пиша к коринфом глаголет: [Аще бо грядыи инагоIсуса проповедает, егоже не проповедахом, добре бысте прияли]. зач. 191. Еже святый Иоанн Златоустый толкуя, добре бысте прияли, глаголет тако [Беседы апостол. 23 к коринф., лист 1374]: [И убо сего ради не достояше приимати, но отскакати]. Почто? ниже наведе [лист 1376, к коринф. зач. 166]: [Зане лицемерие творяще, ины вводят догматы]. беседа 23, к коринфом. Темже и страшнее вопиет блаженный Павел глаголя: [Аще кто не любит Господа нашегоIсуса Христа, да будет анафема]. коринф. зач. 166. И якоже новаго себеIисуса, апостолы не проповеданнаго изобретоша, тако и все святое евангелие, и вся служебная, молитвенныя и читателныя святыя книги, на глаголемаго ихIисуса превратиша, и слыши: Идеже бо святый Матфей евангелист рече:Iсу рождьшуся в Вифлееме июдейстем [Мф., зач. 3]. Ту они глаголют:Iису же рождьшуся в Втфлееме июдейстем. Святый Марк евангелист рече [Мр. зач. 39]: ПризвавIсъ ученики своя, глагола им. Сии же глаголют: ПризвавIисъ ученики своя, глагола им. Святый Лука евангелист рече [Лк. зач. 54]: ВнидеIсъ в весь некую. Сии глаголют: ВнидеIисъ в весь некую. Святый Иоанн евангелист рече [Ин. зач. 65]: ЯкоIсъ есть Христос Сын Божии. Сии: ЯкоIисъ есть Христос Сын Божии. И не токмо книги: но и вся таинства на новаго своегоIисуса, превратиша. Блаженный Павел апостол вопиет глаголя [к рим. зач. 91]: Елицы во ХристаIса крестихомся, в смерть Его крестихомся. Сии глаголют: Елицы во ХристаIиса крестихомся, в смерть Его крестихомся. Превративше же убо вся святыя книги и таинства на новопроповедуемаго имиIисуса, утверждают глаголюще: [Аще кто не исповедуетIисуса Христа быти Сына Божия, да будет анафема]. книга Жезл новопечатная, лист 86. Но божественный апостол святый Иоанн Богослов сын громов посрамляя отмещущыхсяIсуса Христа Спасителя, и ложне новопроповедующих инагоIисуса, громогласне вопиет глаголя: Кто есть лживыи? Точию отметаяися якоIсъ, несть Христос. сей есть антихрист. 1 послан Ин., зач. 71.

Страшно бо есть страшно, и всякаго ужаса зело преполно, еже новагоIисуса прияти. Да не како приемше и приимем вместо Пастыря волка, вместо Спасителя, душегубителя, вместо Христа, антихриста. Понеже бо не един от святых отец, ниже от учителей церковных, ниже от богословцев, ниже от апостол кто, ни сам Христос воспомяну, яко имать приити в последнее время ин Христос, разве точию вси единогласно взывают, яко имать приити антихрист. И в лепоту. Сице бо сам Господь ко отметающимся Его, пречистыми своими усты рече: [Аз приидох во имя Отца Моего, и не приемлете Мене. Аще ин приидет во имя свое, того приимете]. И Павел апостол вопиет глаголя: [Да никтоже вас прельстит ни по единому образу, яко аще не приидет отступление прежде, и открыется человек беззакония сын погибели, противник]. солун. зач. 275. Хотя убо аще и приидет антихрист, обаче не наречет себе антихристом но Христом. Явственно о сем свидетелствует святый Андрей Кесарийский, в слове 10, сице глаголя [в толковом Апокалипсисе, слово 10, глава 11, лист 49]: [Известит себе быти Христа]. глава 11. Но и святый Ипполит глаголет [Соборник, лист 127]: [По всему убо хощет уподобитися льстец Сыну Божию]. в слове о антихристе. Виждь, аще по всему, яве яко и наименованием, себе Христа наречет. Еже и сам Христос во евангелии рекий утверждает [Мф., глава 54, зач. 91]: [Мнози приидут во имя Мое, глаголюще: аз есмь Христос]. Зде многих глаголет Христос антихристовых предотечь. Да аще тии имут нарицатися Христом, колми паче сам антихрист наречется Христом.

Егда же приидет антихрист, тогда людие будут двою веру. едини верующии во Христа, друзии во антихриста. Верующии же во Христа имети будут печать Христову. Верующии же во антихриста, антихристову. Что же в пришествие антихристово будут людие дву веру, едини имут веровати во Христа, друзии же во антихриста, слышим, и от новых учителей явственно о сем глаголюща. Но кто убо он сей есть сице глаголяй? Стефан митрополит Рязанский, иже в книзе Камень веры глаголет тако [догмат о кресте часть 2, глава 3, лист 254]: [Во время антихристово двоих вер будут люди, едини во Христа верующи, друзии же во антихриста. Обоих же тех вер народи будут имети печать на челех своих. Верующии во Христа будут имети печать Христову: Верующии же во антихриста печать антихристову]. Камень веры, догмат о кресте.

Зде ведательно, что есть печать Христова? Печать Христова ничтоже ино есть, точию знамение креста Христова, паче же и самый крест Христов. Сице о сем святый Иоанн Дамаскин свидетелствует глаголя: [Сие нам знамение дадеся на челе, имже образом израилю обрезание. Сим бо вернии от неверных разстоим и знательствуемся. Сей щит, и оружие и одоление на диавола. Сей печать да не коснется нас всегубительствуяи]. книга 4. О вере, глава 12. И сам Господь глаголет: [Тогда явится знамение Сына Человеческаго на небеси]. Мф., зач. 100. Святый Феофилакт толкуя сия словеса Господня глаголет: [Знамение Сына Человеческаго крест есть]. Благовестник, лист 191. И аще убо по сказанию святых печать Христова не ино что есть, точию крест Христов. Благоявленно яко и печать антихристова ничтоже ино есть, токмо крест антихристов. И в лепоту слыши. Явственно о сем блаженный Ипполит папа Римский о последних временех, и о пришествии антихристове, и прелести его, на опасение правоверным пророчествуя глаголет [Соборник, в неделю мясопустную, лист 127]: [Явися Христос Агнец, явится и антихрист агнец, внутрь сыи волк. даде Господь знамение, иже в Него верующим, честныи крест. И той подобне даст свое знамение]. слово о антихристе. Зриши ли коль явственно глаголет святый Ипполит. Рече: Господь даде знамение, иже в Него верующим. Каковое знамение? Наведе: Честный крест. Таже глаголет: И той, сиречь, антихрист, подобне даст свое знамение, кое знамение не ино какое, разве крест. Понеже рече: И той подобне даст. Что убо ныне несть ли два Христа? Несть ли и два креста? ей еста. Ибо един истинныйIсус Христос Сын Божий Бог наш. Другий же новопроповедуемыйIисус Христос. Еже и сами утверждают новии учители глаголюще [Розыск, часть 1, статия 1]: И вправду в них инIсус. Тако и два креста. един трисоставный, тричастный и четвероконечный со дщицею, на нем же Христос распяся, якоже святии богословцы научают, и церковнии песнотворцы утверждают. О чесом выше в главах доволно предпоказахом. Другий же двочастный, до лет Никона в России неслыханный, именуемый крыж, на нем же Христос не распяся, святыми апостолы не проповедася, и святою церковию не бе прият, но Никоном в Российскую церковь внесеся от западнаго костела. Якоже сами они новии учители свидетельствуют глаголюще [Жезл, лист 54, 71, 65]: [Яко праведне и нерастленне печатают их латини. от них же вся книги наша преводим, ничесоже прилагающе или отъемлюще да совершенне им уподобимся. Несть в самом деле укоризна кресту Господню именоватися крыжем, егоже от двою древу совокупляюще покланяемся [Скрижаль, лист 57]]. Святый убо Иоанн Златоустый глаголет [ко евреом, беседа 2, лист 2966]: [Несть втораго распятия, сиречь, крест вторыи, несть ктому]. книга Кирилова, лист 29. Но един крест честный, егоже на рамех своих Христос на смерть грядый с места снес на гору Голгофу, на нем же и титла от Пилата была написана.

И якоже убо обретохом два Христа, и два креста, сице обретаем и две печати на просфирех полагаемыя. едина печать кругловидна, имуще посреде себе крест трисоставный с подписаниемIсъ Хс, яже содержаше древлеправославная церковь, до лет Никона патриарха, якоже выше предрехом. Другая четвероугольная, имущи посреди крест двочастный, и надписаниеIисъ Христос. Сию убо четвероугольную печать, нынешнии архиереи новопривнесше: оную кругловидную печать, от печатания просфир, с трисоставным крестом, и с подписаниемIсъ Хс отвергоша, каковыя же ради вины отвергоша трисоставный крест от печатания просфир? Мню яко не иныя ради вины, точию, яко сатана тщится отвержения креста, или Христа сотворити чрез антихриста. Якоже о сем явствено свидетелствует сице глаголя [Апокалип. лист 82, на поле]: [Креста или Христа отвержение чрез антихриста соделати тщится сатана]. Ибо по сказанию Германа патриарха Констянтина града:Iсус в кресте, и крест вIсусе. Темже отвергийся отвержеся креста, и Христа. Почто убо тщится сатана соделати отвержение креста? Понеже идеже крест есть, тамо он не может приближитися. Не сущу же кресту, велию тамо силу имать. О чесом свидетельствует преподобный Зиновий инок Отни пустыни, сице глаголя [Соборник малый, лист 146]: [Зде же отъемля силу Божию от людей, юже Христос на диявола дарова людем крест свой, имже испроверже всю силу вражию, связав диавола. его же силы трепеща диавол, научи еретиков отвращати люди от креста. Не может бо диавол приближитися тамо, идеже крест Христов славим есть. Сего ради еретиками своими ему рабы, отвращает люди от креста, да возможет на человеки диявол на неимущих креста Господня]. Соборник малый. Отвергше же кругловидную печать уставиша четвероуголную имущею двочастный крест, с подписаниемIисъ Христос печатати просфиры. Зде убо внемли опасно. рехом выше яко ныне обретаются два Христа, и два креста, и две печати. Святый Ипполит папа Римский глаголет [Соборник, лист 127]: Явися Христос Агнец, явится и антихрист агнец, внутрь сыи волк. И древле убо во святей древлеправославней церкви, священник в проскомидии печатлеемую просфиру трисоставным крестом имущую подписаниеIсъ Хс, выимая первуя часть,Iсъ, приглашаше [Служебник]: Жрется Агнец Божии вземляй грехи миру. Паки: Древле во святей церкви, по освящении животворящаго тела и крове Господни, причащаяся священник глаголаше [Служебник, лист 156]: Честное и пречестное тело Господа Бога и Спаса нашегоIсуса Христа, подается, рабу Божию иерею, имярек, от престола Господа Бога и Спаса нашегоIсуса Христа. И ныне иерей причащаяся приглашает: Честное и пречестное тело Господа Бога и Спаса нашегоIисуса Христа, подается рабу Божию иерею, имярек, от престола Господа Бога и Спаса нашегоIисуса Христа. Паки: Явися Христос Агнец в Него же убеждая учреждению песнопевец Давыд вопияше [псалом 33]: Вкусите и видите, яко благ Господь. К сему и священник по причащении глаголаше [в молитве 7, в Канонниках и Псалтырех]: Давыи пищу мне плоть свою, иже огнь сыи опаляя недостойныя, да не опалиши мене Содетелю мой, но паче вниди в уды моя действенне, и во вся составы во утробу, и сердце, и кости, и мозги. Явися и новопроповедуемыйIисус агнец: К нему же всяк ныне, иерействуяй по причащении якоже и Богови Святому глаголет [в новых Служебниках лист 302]: Давыи пищу мне плоть твою волею, да не опалиши мене Содетелю мой, паче же пройди во уды моя, во вся составы, во утробу в сердце и вся кости, и мозги. Видиши ли яко и к новопроповедуемомуIисусу Христу, якоже и самому Спасителю нашемуIсусу Христу, приглашения и молитвословия в тайнодействиях их от новых тайнодействителей возглашаются. Темже убо, аще по сказанию блаженнаго Ипполита, явися Христос Агнец, явится и антихрист агнец. Который антихрист не имать себе нарещи антихристом, но Христом, зане по всему хощет уподобитися льстец Сыну Божию. Ныне же в церквах проповедуется новый Христос, новое знамение еже есть крест, новая печать, еюже печатлеют якоже чела верующии вонь, тако и просфиры, на нихже совершают таиньства своя. То како удобоприятно возможно под новаго Христа новою печатию, совершаемаго тела и крове новопроповедуемагоIисуса причаститися? Страшно бо зело и ужаса преполно есть, таковаго новопроповедуемагоIисуса причащения причаститися, да не како причащаяся его приобщения, причаститися вместо тела и крове Христовы, хотящаго приити на конец веком, и будет стелесен ему, и един уд с причащающимися ему. Понеже бо причащайся плоти и крове Христовы, приобщается Христу, и вси причащающиися единаго хлеба, едино тело Христово, и едина кровь, и друг другу уди бывают, стелесни Христу суще. Сице о сем свидетельствуя кир Гавриил Филаделфийский глаголет: [Глаголется общение, и есть воистинну по божественному Дамаскину, за еже приобщитися нам тем Христу, и причаститися плоти Его и божества, приобщитися же и соединитися друг другу тем. Понеже убо от единаго хлеба причащаемся вси едино тело Христово, и едина кровь, и друг другу уди бываем, стелесни Христови суще]. глава 8. И аще убо причащающиися плоти и крове истиннаго Христа Бога нашего, причащаются, и божества, приобщаются же и соединяются друг другу тем. Понеже от единаго хлеба причащающеся вси, едино тело Христово, и едина кровь, и друг другу уди бывают, стелесни Христови суще. Что убо еда зде причащающиися от единаго хлеба, новопроповедуемаго Христа, под новою печатию действуемаго, ни едино тело неслыханнагоIисуса, и едина кровь, и друг другу уди вси бывают, стелесни новопроповедуемому Христови суще? поистинне едино. И аще тако есть, якоже и есть. То кто бы от благоразсудителнейших, новопроповедуемагоIисуса, под новою печатию действуемаго причащения дерзнул причаститися? не вем. Слышим бо о таковом брашне речено [преп. Ефрем, лист 302]: Тогда издхнут младенцы на лонех матерних. умрут отец и мати с чады вкупе. Зде умрети глаголет преподобный Ефрем отцем и матерем, с чады вкупе. не временною смертию но вечною, их же оплакуя творец книги О вере, глаголет [лист 2]: Кто даст главе моей воду, и очима моима источник слез, да плачю день и нощь побиенных дщерей людех Божиих, сиречь душ крещеных, и храмов христоносных низложение и погубление. умерших верных неверием, миролюбием, и покорением князю тмы века сего. И аще убо по Ефрему, от таковаго брашна умрут отцы и матери с чады вкупе, убо уне есть без причащения пребывающу, по мере веры и добродетелей, причастником быти Христу во царствии небеснем, нежели сицеваго причащения причастившуся, предану быти смерти вечней.

 

Предел третий.

Несть лепо священнику проклятию предану сущу или отлучению подпадшу или еретичествующу, от таковаго причаститися.

 

Глава, 1.

О еже от священника проклятаго преданнаго не подобает причащатися.

Доселе убо мы глаголахом о винах новодействуемаго причащения, коликое и каковое несходство имут, с винами святыя древлеправославныя церкве, святаго причащения. ихже ради вин новодействуемаго ныне причащения, хотящему наследником небеснаго царствия быти, всеми силами блюстително есть, во еже бы не быти причастну. ныне взыскателно, аще леть есть от проклятию преданнаго священника причащатися.

Глаголахом бо и прежде в первом догмате, в части третией, яко священник нынешния великороссйиския церкве есть под клятвою. обаче и ныне вкратце привоспомянем, чесо ради и како предается клятве темже слыши.

[1] Святая древлеправославная церковь, не крестящихся двема персты клятве предает, сице вопиющи [книга древлеписменная Никона Черныя горы]: [аще кто не знаменается двема персты, якоже и Христос, да будет проклят]. священник же нынешния великороссийския церкве, не изображает на себе крестнаго знамения двема перстома, но треми. убо есть проклят.

[2] Паки: священник нынешния великороссийския церкве, не благословляет двема перстома, по преданию Господню, но пятию странно. чесо ради от отец собора поместнаго, иже бе при царе Иоанне Васильевиче в Москве, клятве предается, сице взывающих [Стоглав, глава 31]: [Аще кто двема перстома не благословляет, якоже и Христос, да будет проклят]. Убо сей священник есть проклят.

[3] Паки святии отцы поместнаго собора, иже бе в честней патриархии святаго града Иеросалима, изменяющаго образ честнаго и животворящаго креста, клятве предают, сице восклицающе [Свиток многосложный]: [иже убо дерзнет кто инако веровати, или развращати что от законоположенных, или крестнаго образа. (ниже) аще святители суть, да извержени будут и прокляти]. Священник же нынешния великороссийския, сопротивно древлеправославней церкви умствует Христа распята на двочастнем кресте, имже крещение совершает, просфиры печатает, тем венча тем вся таинства совершает. убо есть проклят.

[4] Паки: святая древлеправославная церковь определила таинственное аггельския песни славославие в сугубем аллилуия воспевати, прилагающих же и отъемлющих, клятве предает, сице возглашающи [книга Кирилова, лист 371]: [Мы законы церковныя соблюдаем мы пределы отеческия храним. мы прилагающих нечто или отъемлющих от церкве проклинаем]. Священник убо нынешния великороссийския церкве сопротивно мудрствуя древлеправославныя церкве содержанию трегубо аллилия воспевает. убо есть проклят.

[5] К сим: святая соборная и апостольская церковь, всеми седмию вселенскими, и девятию поместными соборы, символ святыя веры, еже есть верую во единаго Бога, и прочая вся доконца, утвердила всем блюсти неподвижно ни отъемля, ни прилагая что. но цело сохраняти. сего ради и клятвами запечатле страшными аще что кто дерзнет пременити, или речение, или слог, или самую малую черту. якоже о том в самех правилех соборных видимо есть, сице правило втораго вселенскаго собора гремяще вопиет [1 правило]: [яже в Никеи святых отец вера твердо да держится и пребывает, реченная же и писанная на ню от еретик, и еретики да будут прокляти]. Но священник нынешния российския церкве, сопротивно древлеправославней церкви мудрствуя, и отъемлет и прилагает, и пременяет, якоже видети есть в символе о чесом явлено есть во втором пределе, во главе 2. убо есть проклят.

И что много исчисляю; не достанет ми лето повествующу, коликих и каковых ради новин клятве предается, словом рещи: всех ради, яже чрез церковнаго предания и учительства и воображения святых и приснопамятных отец новосотворенных и содеянных, анафеме предается.

И аще тмократне от всея восточныя церкве проклятию предается, како возможно от проклятаго, сиречь от отлученнаго от всех, от отторженнаго от церкве, от отчюжденнаго от Бога, причаститися действуемым от него тайнам. святый, Иоанн Никейский вопиет глаголя [в слове обличителном на армены]: [аще бо тмократицею прокляти бывше. и диаволу предани, како от анафем и от клятв благословение изыдет? или како от диавола духовное и святое дело совершается? от анафемы благословение не бывает, и от проклятия молитва не исходит, и от диавола Христово не совершается таинство]. И аще убо от анафемы благословение не бывает и от проклятия молитва не исходит. рцы ми кий дух на от него действуемыя тайны приходит? Благословением бо, еже рукою иерейскою бывает, и нашествием Святаго Духа прелагается хлеб, в тело, и вино в кровь Христову. Зде же, по сказанию Иоанна Никейскаго от анафемы благословение не бывает. но ниже Дух Святый на призвание его приходит. явственно о сем свидетельствует преподобный Максим Исповедник, сице глаголя [в житии его генваря, в 21 день]: [убо иже сами от себе прокляти суть и от поместнаго собора бывшаго в Риме извержены, и священства отчюждени. тии кая совершают таинства? и которыи дух приходит на тех]. Виждь ми, аще бо тогда единыя токмо ереси единоволницы, единою прокляти быша не ктому уже можаху совершити. аще и действоваху таинства, зане Дух Святый не прихождаше на ня. зде же толикократно проклят от всея восточныя и великороссийския церкве, то кий дух на от него действуемыя тайны приходит? благоявленно яко не приходит. аще же Дух Святый на проклятию преданнаго призывание не приходит. убо и не совершает действуемых от него таин. аще не совершает действуемых от него таин, убо ниже предложенный хлеб прелагается в тело Христово, и вино в кровь Его животворящую. но хлеб есть хлеб, и вино вино. понеже бо без благословения, еже рукою иерейскою бывает, ни нашествия Святаго Духа, сия тайна совершитися не может. сие и от новых Питирим по премногу утверждает глаголя [Пращица, ответ 211, лист 344]: [совершенное самое тело Христово, и кровь Христова, молитв ради иерейских, и знамения крестнаго, иже рукою иерейскою бываемое Пресвятыи и животворящии Дух прихождаше, и предложенныя дары претворяше]. И понеже без благословения иерейскаго бываемаго рукою, и нашествия Святаго Духа, сия тайна не совершается. сиречь предложенный хлеб и вино не пресуществляется в плоть и кровь Христову, убо ниже от проклятию преданнаго, аще и благословляет, благословение действително есть, аще и призывает и Дух Святый не приходит, и предложенный хлеб и вино претворяется, аще и действует, в существо плоти и крови Христовы. и аще убо от проклятаго не пресуществляется в плоть и кровь Христову хлеб и вино то како возможно действуемаго от него причащения причаститися? всячески невозможно, паче же не подобает. понеже убо клятва проклятию преданнаго священника, не токмо строения таин церковных лишает но и подаяния, якоже о сем творец книги Мира с Богом свидетельствует глаголя [догмат 4, о клятвах]: [клятва лишает проклятаго общения таин церковных, сице в приимании их, яко в подаянии. ибо проклятыи не может таин приимати, и сущии священныи подаяти]. Аще убо проклятый не может таин церковных приимати, и сущии священныи подаяти то како священник проклятию преданный может тайну святыя евхаристии совершити? всячески не может. почто понеже по того жь творца книги Мира с Богом свидетельству: [клятва лишает всего строения чина и сана священническаго, такожде приимания и строения добре]. И аще клятва лишает священника всего строения чина и сана священническаго и строения таин церковных, проявлено яко от проклятию преданнаго священника тайна святыя евхаристии не совершается, сиречь предложенный хлеб и вино не претворяется, аще и мнится действовати не пришествующу Духу Святому, во еже преложити я в плоть и кровь Христову. и аще от таковаго священника предложенный хлеб и вино в тело и кровь Христову не пресуществляется, остается прочее яко предложенный хлеб, хлеб, и вино, вино. и таковаго причащения причащаяйся, како тела и крови Христовы имать причаститися, идеже несть разве точию причастится тогожде проклятия и в лепоту. понеже бо аще моляйся со отлученными, по гласу священных апостол, и сам отлучен есть [правило 10]. Благоявлено яко и причащаяися с проклятыми есть проклят. Сего ради всякому хотящему наследником небеснаго царствия быти всеми силами блюстительно есть. еже бы от проклятию преданнаго священника, действуемаго от него причащения не причастится, да не како причастився его, причастится и клятв его и будет ему снаследник во оном веце. понеже бо ядущий от единаго хлеба, едино тело бывают якоже выше рех убо уне есть содержащу веру праву и дела добрая не сущу православну священнику весь живот свой безпричастну пребывати и со Христом вселитися, нежели от проклятию преданнаго священника причаститися, и царствия небеснаго лишитися.

Глава, 2.

О еже от отлучению подлежащаго священника не лепотствует причащатися.

Елико убо нынешния великороссийския церкве священник обретается под клятвою; толико и отлучению нехранения ради священных правил, от святых отец предается. о чесом и выше в первой части, во главе 10 третияго предела, довольственно предпоказахом.

[1] Яко за сребреники сан себе получает, чесо ради по правилом священных апостол, и божественных отец отлучается. [2] Яко предания церковная презирает, новая же содержит, коих ради от святых от церкве отлучен бывает. [3] Яко во святую 40-цу, и в прочия среды и пятки не постится. чесо ради священия апостоли священным своим правилом отлучают. [4] Яко с еретики и со отлученными вкупе молитися. чесо ради священными правилы божественных апостол, и богоносных отец отлучается и сана лишается. суть и иныя многия вины. их же ради священник священства лишается. и от церкве отлучается. коих ради всех вин от таковаго священника, аще и мнится тайнодействовати, не подобает всячески причащатися. понеже бо аще кто от церкве отлучен есть, той сатане предан. [5] Яко святыя древлецерковныя обычаи отринув, новыя содержит, их же ради святыми отцы из сана извергается и клятве предается, и поистине; слыши о сем творца книги Мира с Богом сице вещающа [догмат 4, о клятвах]: [всяк бо (рече) христианин иже от церкве отлучен бывает, сатане бывает предан, ибо вне церкви диавол. якоже в церкви Христос]. Зде убо внемли: аще отлученный от церкве сатане бывает предан. и како от священника от церкве отлученнаго и священства обнаженнаго, таинство церковное совершатися может? всяко не может. понеже бо от церкве отлученный и священства обнаженный, аще и священная действует вне сана и чина священническаго, чрез правила действует. аще не может: то како от таковаго священника, иже от церкве отлучен, и священства обнажен, предложенный хлеб и вино претворится в существо тела и крови Господни. кий убо дух на от таковаго священника действуемое таинство приходит? сия бо тайна кроме Святаго Духа совершатися не может. Какоже Святый приидет на таковаго священника призывание, иже сатане предан? благоявлено яко не приходит. аще не приходит убо таковым ниже Бог что действует. аще же Бог ничтоже тем действует, проявлено яко ниже предложенный хлеб и вино пресуществляется в плоть и кровь Христову и в лепоту. слыши о сем божественнаго Златоустаго сице вещающа [к Тим. посл. 2 глава 1 нравоуч. 2]: [аще бо тем, (си есть священником) ничтоже Бог действует ни баню имаши, ниже тайнам причащаешися]. И аще, им же Бог ничтоже действует священником ни крещение имаши ниже тайнам, аще и причащаешися, причащаешися. убо действуемое от него причащение несть причащение, сиречь тело и кровь Христова, но хлеб просто хлеб, и вино вино, принеси убо и виждь, како и сами суть нынешнии учители утверждают, яко иже суть прокляти, и отлучени и отвержени и священнодействия обнажени. от таковых не может быти сущее тело Христово, и кровь Его божественная. сице бо глаголет Питирим Нижеградский [Пращица, ответ 212, лист 346]: [в прешедших летех до правления старопечатных книг, аще и служили на седми просфирах. [ниже] ибо тако тогда повеление было великороссийския церкве, и не по противлению восточней церкви, (ниже) и тии иереи от патриархов восточных и московских, не прокляти быша, и не отлучены. а ныне на седми просфирах и воображение полагати креста, сицевым образом, с тростию и копием и главою Адамовою никто служити не будет кроме вас противников. понеже убо противящихся в таковых, соборне восточнии патриарси; Паисий Александрийскии патриарх, Иоасаф, и вси российские архиереи проклятию предаша, и священства извергоша, и всякаго священнодействия весма обнажиша. и аще котории попы, (ниже) ныне дерзнут тако служити, противящеся восточней и великороссийстей церкви, и вышепомяновеной соборней клятве, таковии суть прокляти и отлучени весма священнодействия обнажени, и от таковых собором проклятых, и изверженных, и священства обнаженных не может быти сущее святое тело Христово и кровь Христова весма]. Зде убо нынешнии архиереи, аще собором своим служащаго священника на седми просфирах под трисоставным крестом печатлеемых, и клятве предают, и священства обнажают но клятва их неправедная, несть важная клятва, си есть отлучающая от церкве. всяк бо всуе проклинаяй себе проклинает, глаголет Соломон. якоже и святая древлеправославная церковь светлым гласом вопиет глаголющи [Номоканон, лист 63]: [аще убо архиерей чрез волю Божию кому запретит, Бог ему не послудует, и се обретается запрещение его неправедно, и сего ради не крепкое]. Понеже бо сей собор, паче же соборище, не по Христе бе, но на Христа, яко не древлеправославныя церкве уставы утвержающе, но оныя разоряше. отметаше бо святыя древлеправославныя, елико восточныя, толико и великороссийския церкве содержание, содержащееся от начала проповеди апостольския, до лет Никона патриарха, и святый животворящий крест Христов трисоставный. сего ради собор сей несть собор праведный и правилный, но сонмище на Христа собравшееся. и в лепоту, слыши; глаголет Стефан Рязанский [Камень веры, догмат о святых иконах, заключение третие, лист 24]: [не всяко блещащееся есть златом не всяко совкупление есть собором и правилным и праведным святым вселенским, вемы бо яко и распинателие Христовы на Христа собор имеяху, предсташа цари земстии и князи собравшася вкупе на Господа и на Христа Его [псалом 2], и злочестивейшии ариане, на едино существо Христово различная имеяху стечения, ово во Антиохии ово же в Аримене, и диоскориане и евтихиане во Ефесе. темже стечением еретическим причисляется, и соборище Копронимово, иже Влахеристем храме на святыя иконы. вся же оная злочестивая собрания не могут нарещися святым, иже есть не по Христе, но на Христа, по подобию онаго соборища июдейскаго: (ниже) но той собор, идеже есть сам Христос. тамо Христос, идеже собираются во имя Его, идеже [рече] два или трие собраны во имя Мое ту есмь посреде их [Мф. 18, 20]. а идеже собравшиися Христа хулят, изображение Его святое попирают, таковое собрание, не во имя Христа бывает, но во имя антихриста]. Откуду благоявлено яко собор оный, собравыйся на отвержение догмата всецерковнаго, во еже бы не ктому прочее имели служити священницы по древнему преданию святыя восточныя церкве на седми просфирах, имущих на себе трисоставный крест, но на пяти бы службу совершали, двочастным крестом, печатлеемых, на нем же собравшиися и трисоставный крест Христов отмещут, несть праведный и правилный яко не по Христе, но на Христа собрася. слышим бо яко [Апок. лист 52 на обор.]: [креста или Христа отвержение чрез антихриста соделати тщится сатана]. Отмещуще же трисоставный животворящий крест Христов, соотмещут купно и самого Христа. понеже убо по сказанию святаго Германа патриарха:Iсус в кресте и крест воIсусе.

Темже убо аще и глаголют: яко по соборе их, и по предании клятве. и по извержении, и обнажении от них священства, аще кто имать служити на седми просфирах трисоставным крестом печатлеемых, не может самое сущее святое тело Христово быти и кровь Христова весма еже да не будет. всяко бо якоже бысть самое, истинное сущее тело Христово, и животворящая кровь Его, тако и есть, аще, где от православнаго священника совершается, по преданию святыя древлеправославныя церкве. литоргия, сице и имать выну неотрочне быти, егда же убо по новых архиереов мудрствованию, аще кто имать. по соборе их служити по преданию древлеправославныя церкве, на седми просфирах трисоставным крестом печатаных, на нем же они тако служащих клятве предают, их же несть важная клятва, яко неправилная, и сана извергают их же извержение не может вменитися во извержение, яко чрез каноны извергают, и священства обнажают их же обнажение священника, не лишает священства, яко всуе лишают. [ибо якоже от них священнии не священи, тако и священства лишеннии, не суть лишени но и преосвящени] не может быти сущее тело Христово еже да не будет. есть бо, и кровь Христова. како, рцы ми, от нынешняго священника иже сопротивно преданию святыя древлеправославныя церкве, на пяти просфирах, под двучастным крестом таинства своя действует, и литоргию всяк чин и всякое действо, и всякую службу служит, и тайны благословляя осеняет, иже тмократне содержимых ради им новин, от всея святыя яко восточныя тако и великороссийския древлеблагочестивыя церкве проклятию предан есть, извержен, и священства лишен, может быти сущее тело Христово, и кровь Его пресвятая? всяко не может, понеже бо аще попустим, яко в пяти просфирней службе, предложенный хлеб двочастным крестом печатлеемый, и пятиперстным благословением осеняемыи, и вино, от нынешняго священника действуемыи, есть самое сущее еже да не будет, тело Христово, и кровь Его святая останется всяко и нехотяще яко древле во благочестивей церкви, во святей литоргии по всеобдержнаго святыя церкве содержания преданию на седми просфирах совершаемей, трисоставным крестом печатлеемых, и великотаинственным двоперстнаго сложения знамением благословляемых, предложенный хлеб и вино, от православнаго священника священнодействием, не бе еже да не будет, самое сущее тело Христово, и кровь Его животворящая. но никто от ум имущих сущих православных христиан, дерзнет тако рещи, колицы бо онаго причащающеся священнии святителие в нетлении мощей просияша; колицы преподобнии отци онаго вкушающе, в чюдесех и знамениих знаменати явишася; колицы иноцы и белцы онаго насыщающеся со Христом водворишася; но понеже тогда во святей древлеправославней церкви, в седмипросфирней службе под трисоставным крестом и двоперстнаго сложения благословением, совершаемое причащение бе самое сущее тело Христово и самая сущая животворящая кровь Его. убо ныне в нынешней церкви, в пятипросфирне действуемей службе под двочастным крестом, и пятиперстным благословением действуемое причащение не может быти и несть самое сущее тело Христово и кровь Его, но хлеб хлеб, и вино вино. понеже священник вне сана и чина своего действует. тем и причащаяйся новодействуемому причащению, не телу и крови Христови причащается но хлебу и вину. причащаяижеся хлебу и вину причащается и нехотя томужде проклятию, и отлучению от церкве, зане едино тело с ним бывает. понеже от единаго хлеба яст и от единыя чаши пиет. и аще от отлучению преданнаго священника, предложенный хлеб и вино, не пресуществляется в плоть и кровь Христову, то како от него действуемаго причащения, еже несть сущее тело и кровь Христова, возможно причаститися, кое бо приобретение от него спасения души будет? не вем. разве приумножение мучения и в лепоту. убо лучше есть, содержащу веру православно отеческую, и по силе проходящу добродетелное житие, всю жизнь свою, за неимением православнаго священика, непричастну пребыти, и Христу снаследником быти, и еже от отлученнаго от церкве священника причаститися, и едино тело с ним, бывшу, вне чертога царскаго Ему сводворитися, по реченному Златоглаголивым [слово о лжеучителех]: аще кто друг врагом царевым есть. не может друг царев быти. но купно со враги погибнет, и горшая подъимет.

Глава, 3.

Яко от священника еретичествующаго не подобает причащатися.

Но уже как мнится, не недоволно предпоказах, Богу поспешествующу яко от проклятию преданнаго, и отлучению подпадшаго священника, отнюд не лепотствует причащатися нужно вознепщевах показати яко и от еретичествующаго не подобает. понеже во много нынешния церкве священника обретаем еретичествующа. о чесом уже доволно глаголахом, и в первой части, чесо ради и не подобало бы зде прочее глаголати о том же. обаче лучшаго ради ведения вкратце речем, како еретичествует. темже слыши, глаголют бо священнии законы; иже аще и малейшее что кафолическая церкве подвизася есть еретик; или еретик есть той, иже не тожде со святыми отцы мудрствует. сей убо священник, не малейшее что едино или двое кафолическия церкве предвигну: но вся ея преданная изменив не тожде со святыми отцы мудрствует. яково что глаголю слыши:

[1] Святии отцы, яко блаженный Феодорит, Максим Грек, Петр Дамаскин, Никифор Панагиот и прочии, паче же и вся древлеправославная церковь последующе Христову преданию в сложении перстов, оба таинства изъявляху. треми бо сложенными персты, палцем и двема последнима таинство триех божественных ипостастей, Отца и Сына и Святаго Духа исповедоваху, двема же совокупленома перстома указателным и великосредним таинство смотрения Христова, во двою естеству во единой же ипостаси изображаху. нынешния же великороссийския церкве священник не согласно мудрствует сослагателно же еретиком Евтиху, и Диоскору, едино естество во Христе исповедающим, совокуплением бо триех первых перстов, едино естество божественных триех ипостасей, Отца и Сына и Святаго Духа исповедует, двою же естеству во Христе божества, глаголю и человечества не изъявляет [Псалтырь новопечатная в полдесть, лист 13; Скрижаль, лист 806]. сего ради есть еретик.

[2] Паки святии отцы яко Мелетий патриарх Антиохийский Феодорит Кира града, Максим Грек и прочии, и вся древлеправославная церковь последствующе благословению благословившаго Христа в сложении перстов на благословение, оба таинства православныя веры вседобре и богатовидно изображаху. совокуплением бо триех перстов, великаго и двоих последних, таинство Святыя и неразделимыя Троицы изобразоваху. сложением же двою указателнаго и великосредняго, два естества во Христе божество и человечество изъявляху. нынешний же священник, не согласно вышепредъявленных святых отец мудрствованию мудрствует, не якоже Христос предаде двема перстома благословляти, но подобно римляном пятию персты странно благословляют в коем перстосложении литерами тщится изобразовати имяIсъ Христос. убо есть еретик.

[3] Паки: святии отцы, и богословцы, и церковнии песнотворцы, яко святый Златоуст, Хрус Уединенный, Ириней, Иоанн иже от Дамаска, Феодор Студит, Иосиф песнописец, и прочии безчисленнии, купно и вся древлеблагочестивая церковь, мудрствующе, исповедаху Христа Бога нашего плотию распята на трисоставнем кресте. священник же нынешния великороссийския церкве сопротивомудрствуя мудрованию всех предреченных святых богословцев и песнотворцев, согласно же римляном, Христа Бога распята умствует на двочастнем кресте. сего ради есть еретик.

[4] Паки: священнии богословцы яко Григорий Синаит, и прочии, паче же вся древлекафолическая церковь православно мудрствующе исповедаху, треми составы трисоставная креста Христова три составы единосущественныя Троицы. якоже Григорий Синаит вопиет глаголя [в каноне кресту, песнь 8]: крест трисоставныи честное древо Троицы бо носит трисоставныи образ. Настоящаго же века великороссийския церкве священник, сопротивно всей древлеправославней церкви мудрствует, не бо треми составы трисоставнаго креста, три составы Святыя единосущныя Троицы, но единым составом двочастнаго креста подобне проклятому Савелию един состав в Троице блядословящу, един состав самою вещию, трубы велегласнее проповедуя исповедует. убо есть еретик.

[5] Паки: святии и божественнии отци, яко преподобный Максим святогорец [в слове 58[28?]], и стоглавнаго собора, и всея древлевосточныя церкви [глава 42], последующи преданию ангелы преданному, еже на псалмоглаголании дважды глаголати аллилуия, а в третии приглашати слава Тебе Боже, во изображении триех божественных ипостасей, мудрствующе научаху, нынешния же великоросийския церкве священник, сопротивно святым отцем, и всей древлеправославней церкви мудрствуя, сослагателне же римляном, на псалмоглаголании глаголет аллилуия трижды, а в четвертыи слава Тебе Боже приглашает, имже своим мудрствованием четыре лица в Троицы показуется исповедати. сего ради есть еретик.

[6] Паки: святии и божественнии отцы, и вся древлеблагочестивая церковь, во святую четыредесятницу, по славах на аллилуия, на трисвятое, на приидите поклонимся, и по честнейшую херувим, 17 поклонов, вся сия земныя неотложне имуще содержаху полагати, грядущаго же времене священник великороссийския церкве, не согласно божественным отцем, и всей древлеправославней церкви мудрствуя, согласно же еретиком непоклонником, о них же святый Иоанн Дамаскин воспоминает, вместо оных на предъявленных местех, земных поклонов не полагает, но поясныя. тем и есть еретик.

[7] Паки: святая древлекафолическая церковь имеющи содержаше обычай, во святую и великую четыредесятницу, на преждесвященных литоргиях, и на троицтей вечерни, падши лицем на земли молитися, присудствующаго же времени священник российския церкве, изменив оное предание, сопротивно мудрствуя ей смудрствуя же еретиком латином, на колену стоя молится. убо есть еретик.

[8] Паки: святии и божественнии отци, Андрей Кесарийский, Анастасий Синайский, и вся древлеправославная церковь, научающе повелеваху писати, святых евангелистов, Матфея лицем человечим, Марка лицем орлим, Луку телчим, Иоанна львовым. нынешния же великороссийския церкве священник сопротивомудрствуя святым отцем, согласно же еретиком римляном, пишет Марка лицем львовым, Иоанна лицем орлим. сего ради есть еретик.

[9] Паки: святии священнии, и церковнии учители, паче же вся древлеблагочестивая церковь, предаша наедине глаголати молитву: ГосподиIсусе Христе Сыне Божии помилуй мя грешнаго. аще во обще: помилуй нас. Сию молитву нынешния церкве священник, сопротивомудрствуя священным богословцем, отложив, и вместо оныя глаголет новопреданную: ГосподиIисусе Христе Боже наш помилуй нас. Тем и есть еретик.

[10] Паки: священнии апостоли и божественнии отци, научивше предаша, имя пресвятое Владыки Христа Спасителя нашего, с единою иотою токмо и писати и произноситиIсус. настоящаго же времене священник великороссийския церкве, сопротивоборствуя священным апостолом, и божественным отцем, в мудровании своем пресвятое имя Владыки Христа пишемое с единою иотоюIсъ отставив, новагоIиса проповедуя, пишет с иотою и итою, и произноситIисус. убо есть проклят.

[11] Паки: божественнии отци, святый Иоанн Златоустый, Феофилакт Болгарский, Максим Грек. и вся древлекафолическая церковь, повелевают во священнем евангелии еже от Иоанна, в зачале 16, стихи разделяя сице прочитати: и область даст Ему, и суд творити, зде стати, и паки начати, яко Сын Человечь есть не дивитеся сему. Нынешния же великороссийския церкви священник, противомудрствуя священным отцем смудрствуя же Павлу Самосатскому: сей стих прочитает сице: и власть даст Ему, и суд творити, яко Сын Человечь есть. таже аки от инаго начала начиная чтет: не дивитися сему, яко грядет час. сего ради есть еретик [в новопечат. Требнице издан. в 7167 г., в чине погребения мирян].

[12] Паки: священнии отци, священными своими правилы, повелевают кающихся по мере качества и количества согрешений, связовати епитимиями, и отлучати святаго причащения, донележе исполнит каяся уреченное время епитимий, таже причастити. якоже их правила явственно показуют. священник же нынешния великороссийския церкве, сопротивно божественных отец правилом умствуя, согласно же еретиком, месселианом, васелианом, и латином, не единою кающихся епитимиею не связуют: но предложив Божие благоутробие, аще и смертныя грехи имать кто, абие причащает. тем яве есть еретик.

[13] Паки: святии отци втораго и шестаго, вселенскую собору, и прочии церковнии учителие [Кирил Иеросалимский, во оглашении, евангелие учителное Калиста, Катихизис вел. глава 62], во святом крещении повелевают, святым миром помазовати новокрещеннаго, на челе, на очию, на ноздрию, на устех, на обе уши, на грудех, и на руках, и на сердце и на плечию, и между рамома. великороссийския же церкве священник противоборствуя святых отец преданию, споследуя же римляном, вместо еже на плещу и на сердце, и между рамома святым миром помазовати отложив, помазует на ногах. сего ради есть еретик.

[14]. Паки: святии и богодухновенннии отцы, Дионисий Ареопагит, Иоанн Златоустый, Афанасий Великий, Кирил Иеросалимский, Григорий Ниский, Феофилакт Болгарский, Максим святогорец, и прочии, во святом крещении повелевают, неотрочне крещаемаго погружательне крещати обливательне же крещеных отци втораго вселенскаго синода в некрещенных вменяют, и повелевают их паки трипогружательства крещением крестити. нынешнии же великороссийския церкве священник сопротивомудрствуя, вышеименованным божественным отцем, смудрствуя же еретиком папистом, калвистом, и лютераном, за равносилно якоже в три погружения творимое крещение, тако и обливанием действуемое вменяет, и не покрещевает обливаемым крещением крещенных. убо есть еретик.

Суть и иная премногшая пременения, о них же, и в первой части в различных главизнах глаголахом, нынешним священником содержимая яже да не вся по единому исчисляя, скуку нанесу читателеви, изволяй да чтет тамо, продолжения ради слова оставляю, ими же сопротивоборствуя святым отцем, и всей древлеблагочестивей церкви, смудрствуя же различных ересей еретиком, показуется и есть еретик.

Како же убо от толико и толь премногообильно различных еретик, различными ересей пестротами испещреннаго действуемаго причащения священника, причаститися возможно, кии бо дух на от него действуемая таинства приходит? слышим бо яко всяк еретик имать в себе дух диаволь. сице о сем преподобный Зиновий инок Отни пустыни сказует [Свиток многосложный, глава 11]: [имать бо всяк еретик в себе дух диаволь, темже и противится Святому Духу]. И аще убо всяк еретик имать в себе дух диаволь, проявлено яко и сей. и аще сей священник еретичествуя, яко от церкве отвержен, и проклятию предан тогожде духа в себе имать, уже не ктому Дух Святый на действуемыя от него таинства, во еже бы я совершити приходит. понеже бо имея в себе духа противнаго, противится им Духу Святому. аще же Дух Святый совершеннотворитель таинств, не приходит к совершителству на действуемая от Него таинства, то како действуемое от него таинство будет совершено, сиречь предложенный хлеб и вино како приложится в существо плоти и крове Христовы? благоявленно яко не прелагается, свидетель ти сему достоверен есть блаженный Иоанн Никейский, сице глаголющь: [Како от диавола духовное и святое дело совершается? от анафемы благословение не бывает, и от проклятия молитва не исходит, и от диавола Христово не совершается таинство]. Аще же предложенный хлеб и вино действуемыи от него не прелагается в плоть и кровь Христову, и кто бы от благомыслящих дерзнул сицеваго причащения, еже несть сущее тело и кровь Христова но простый хлеб и вино, яко непресуществляющу я Духу Святому причаститися? причащаяибося действуемаго от него причащения, не тогожде ли проклятия еже имать он причащается? ей поистинне тогожде. не тогожде ли отлучения, еже на нем пребывает, причащается? ей тогожде. не тех же ли ересей, их же он содержит? воистинну тех же. не едино ли тело с ним, не глаголю Христово, бывает? ей едино. и слыши. понеже убо, якоже, елицы причащаемся тела и крове Христовы, едино тело Христово бываем, зане от единаго хлеба вси причащаемся. тем едино тело Христово, и едина кровь, и друг другу уди бываем [кир Гавриил Филаделф., О седми тайнах]. стелесни Христови суще, сице и елицы от еретичествующа священника действуемаго от него причащения причащаются едино тело еретическо бывают. понеже от единаго хлеба вси причащаются, тем, и едино тело, и едина кровь, и друг другу уди бывают, стелесни суще, не глаголю Христови, да не будет. несть бо врагом Божиим соединения с Ним, донележе обратятся, разве. отсюду явственно видимо есть всякому, яко причащающийся от единаго хлеба, едино тело, и едина кровь, и друг другу уди бывше, стелесни суще, причастницы бывают тогожде проклятия, еже имать священник. причастницы бывают тогожде отлучения, еже пребывает на священнице. причастницы бывают тех же ересей, их же содержит священник, причастницы будут, и во оном веце тогожде награждения, еже уготовано священнику проклятому, отлученному, и еретичествующу, темже убо, аще от проклятаго, отлученнаго, и еретичествующаго священника, действуемаго причащения причащаяися, не плоти и крове Христовы причащается. Понеже не присутствующу Духу Святому коеже предложенный хлеб и вино пресуществити в плоть и кровь Христову, но проклятия, отлучения, и ересей содержимых им причащается, убо всякому хотящему вечным наследником царствия небеснаго быти, всячески удалятелно и убегателно есть сицеваго причащения. яко не со Христом соединствует, но разлучает: яко не от грехов очищает, но приумножает. яко не царствия небеснаго наследником сотворяет, но вечныя муки. убо унее есть всю жизнь, пребывающу во благочестивей вере, и добродетелех, не сущу православну священнику, без причащения пребывати, и Христу воцаритися, нежели от еретика причаститися, и ему соучастником быти.

Глава, 4.

Яко не подобает с еретики причащатися, зане причащаяйся с ними едино тело бывает.

Что убо глаголеши ли; како невозможно у еретиков быти, истинным пречистым и животворящим тайнам Христовым, понеже у них такожде, якоже и у православных христиан, служба Божия совершается, такожде святое писание и книги прочитаеми бывают, такожде церковное строение, и духовныя чины, и уставы, и образы имеют, такожде поучаются заповедем Господним, пост держат, и милостыню творят, такожде и девство соблюдают и крещение у них бывает, и причастие тела и крове Христовы приемлют? и того ли ради прибегаеши в церковь к ним? и тщишися с ними причащатися? но что се, рцы ми? место ли освящает человека, или человек место? всяко речеши; человек. и аще человек, то чесо ради тамо прибегаеши, идеже еретицы собираются? не слышиши ли яко божественная апостола Петр и Павел в своем правиле вопиюта глаголюща [Кормчая, прав. 9, лист 28]: [аще несть мощно собиратися в церкви неверных ради еретик. в дому собиратися на пение. о епископе, да не внидет благочестивыи в церковь нечестивых, не место бо освящает человека, но человек место]. и паки [правло 10]: [аще же нечестивии держат место, да бегаеши от него. понеже осквернено бысть от них якоже преподобнии святители освящают, тако нечестивии оскверняют]. И како убо ты к таковым во оскверненное ересьми прибегаеши место? и молиши спастися? что убо сего ли ради, яко книги имут и прочитовают? но что се? еда бо идеже суть книги, и место то свято есть? никакоже никако сего бо ради наипаче подобает бегати, и отвращатися, яко пророки имут: но не веруют пророком, яко прочитают книги но книги растленне имуще прочитовают на вред и соблазн не ведущим писания, яко образы имут, но преступлением заповедей написанных на образех, безчестят самех тех, их же суть образы, по реченному [к рим. зач. 82]: в законе хвалишися, преступлением закона Бога безчествует. Словом рещи: ничтоже у них есть истинно. аще и тщатся творити; от смышления бо своего творят на прельщение прочим. явственно о сем в Катихисисе велицем повествует сице [глава 4, лист 16]: [поистинне ничтоже у них несть истинно: но все убо, еже еретики творят от смышления своего. како могут совершити действо Божия, на игрищах своих? но вся сия льстиво и лживо творят. аще и церкви своя, и клирики церковныя, и писания божественная почитают, и мнится еже темже крещением крещатися, такожде и тайны божественныя, еже есть пречистое тело и честную кровь Христову имети. вся же сия не тако имеют. но инако и нечестиво. о них же святый Иоанн Златоустыи глаголет: праздники убо и святыя дни празднуют, и святых апостол и мученик, но вся во отвержение веры истинныя, от своего умышления творят, и лживыя пророки имеют, и вся творят сия ко прельщению верных. якоже рече божественный евангелист Матфей: востанут бо, рече лжехристи, и лжепророци, и елико бо аще не трезвятся, и праведнии прельщатися имут. сего ради разумети имамы, яко еретическая писания, и праздньства и службы и тайны, и проповеди, не суть правы]. глава 4.

И аще убо ничтоже у еретиков есть истинно, но все нечестиво, и ниже, аще и тщатся имети животворящыя тайны Христовы, еже есть пречистое тело и кровь Христову, имут. понеже убо како могут я имети, егда не имут самыя истинныя правыя веры Христовы? аще же несть действуемое у них причащение, истинное животворящее тело и кровь Христова, то кто бы дерзнул от правосмыслящих сих причащения причаститися? что убо причащаяися его, не тогожде ли еретичества причащается: и не таков же ли еретик будет? ей всяко. и слыши. блаженный Никита Ираклийский, в толковании втораго стиха, слова святаго Григория Богослова в неделю новую, нарицает, иже токмо бояся еретик, обладающим им речет, и аз таков же есмь, каков и ты, еретиком. сице глаголя [Соборник, в толк. слова Григория Назианзина, в неделю фомину, лист 760]: [вчера временем таяся, и противу времени вероваше, зане имяше держащыя тя еретики, и бояся их мняшеся еретиком сравняяся и ты еретик, днесь Божию веру научи, даже до чесого на обою храмлеши бедру, сиречь ни по единой вере право ступая, но и по Божией вере, и по временной изнемогая. аще бы был не изнемогал, не бы удобь прелагался, се же речено пророком Илиею в третием царстве, к священником безчестным: доколе храмлете на обою бедру [3 царств, 18]: когда убо Ваалу, когда же Богу покланяющеся? даже до чесого устроиши, рекше убо. не глаголи ниже твори неподобная строителне; есть же се, яко кому глаголати боязни ради еретик, еретик есмь и аз, а христианин сыи по всему. того ради глаголет святыи к таковому. доколе строителне неподобная твориши, явися яко истинныи христианин еси]. Видиши ли яко аще токмо страха ради еретиков, обладающим им, сый христианин сравняяся им, речет таков же есмь, каков и ты есть еретик; кольми паче причащаяся с ними от единаго хлеба и чаши, есть еретик.

Темже убо, аще мнишися быти христианин чесо ради еретическая ревнуеши, но ли еретик? чесо ради знаменаешися двоеперстным креста знамением? исповедуеши на трисоставнем кресте Христа распята? и иная древлеправославныя церкве содержания содержеши? персин, не перская ли мудрствует? варварин, не варварская ли ревнует? како убо ты ко отверженных древлеправославныя церкве вся чины, предания, уставы, и содержания преставляяся жительству, молиши спастися? еда бо мало есть, еже посреде нас, и онех? еда ли о прилучшихся есть сомнение? яко да едино и тожде вменяеши быти? смешаеши несмесная. похулиша они крест трисоставный на нем же Христос распяся, порекше брынским, порекоша они знамение двоперстнаго сложения имже вседоброе христианския веры таинство исповедуется, еретичеством, нарекше арианством, македонианством, и несторианством. обругаша они вся святыя древлеблагочестивыя церкве книги, по ним же святии российстии чюдотворцы молитвы своя Богови возсылающе, и вся святыя службы совершающе, в знамениих и чюдесех просияша. нарекше я смертною пажитию. еже видимо есть от послания Паисия патриарха Константина града, иже пиша к Никону патриарху глаголет тако [в Скрижали лист 639, лист 642, лист 711]: [Паисии Констянтинополскии, всея северныя страны господину Никону, прияхом грамоту преблаженства твоего таковаго убо познавающе тя мы, с радостию отвещаем тебе, о епископе же Коломенском Павле, и о протопопе Иоанне Неронове, яже глаголю та, яко не согласуюта с нами, ниже книги их, ниже литоргия их, ниже знамение их. [Жезл, лист 13, Скрижаль лист 712] иже не от жива источника, жаждущыя души напаяют, но от горких вод Мерры, сия вся суть знамения ереси раздора, аки рождения ехиднова ядом аспидом неисцелными угрызают. [Стефан Рязанский, лист 11; Жезл лист 17; Скрижаль лист 713] не точию усты проклятыми но и писаньми своими богомерзскими, да отвержете и разлучите их извержением, да не питают кого смертною пажитию]. Зриши ли с коликим безчестием похуливше отвергоша святыя книги.

И аще оныя святыя древлеправославныя церкве книги, смертную пажит в себе имяху, убо нынешния церкве новоисправныя книги, животворную в себе пажить имут. рекше: аще оныя святыя древлецерковныя книги возсылающих, и поучающих по ним, в геенну низвождаху. убо новоисправныя в царство вводят. тем всех преждебывших, елико пастырей, елико преподобных, елико и всех великороссийских христиан, даже до лет Никона, суетна бе вера, тщи подвизи, напрасни трудове. аще ли же древнии онии пастырие великороссийстии преподобнии, и вси христиане, елици богоугодно жиша, по оным святым книгам службы совершающе, молитвы Богови приносяще, люди Божия аки от живаго источника, живыя воды божественных словес напаяюще, и поучающии и поучающиися спасошася. убо оныя святыя, святыя древлеблагочестивыя церкве книги, не смертную в себе пажить имут, но животную. отсюду проявлено, яко нынешния новоисправныя книги, яко во всем сопротивно оным мудрствующе, смертную в себе имут пажить. видиши ли, колико есть посреде нас и онех; и како убо ко ным течеши; еда бо сей обвожду потязания закон; и иже оглаголания вид; не и писание ли приемлет к тем образом. слыши, что рече Иеремия к жидом: поидите, рече. в кидарь, и видите, послите во островы хитейския, и видите, и разумейте, аще быша такова, аще изменят языцы боги их, и тии не суть бози; вы же изменисте славу вашу от нея же не ползуетеся. А еже глаголет, сице есть: они, рече, идолом поклоняющеся, и бесом служаще, толику о прелести имут совесть, яко не хотети оставити оны, и ко истине приити. вы же истинному Богу покляняющеся, оставльше отеческое благочестие, к чюжим сами приидосте. и елику имут они о прелести совесть, ниже толику вы о истине показасте. сего ради рече: аще быша такова, аще изменят языцы боги своя, и тии не суть бози; вы же изменисте славу, вашу от нея не ползуется. не рече, изменисте Бога вашего, Бог бо не изменяется. но изменисте славу вашу. еда бо мене, рече, неправдовасте? еда бо мне бысть пакость? вы сами себе обезчестисте. мою не умалисте славу, но вашу.

Дадите убо и мне подобно нечто таково к сим рещи, иже со онеми причащающимися. пойдите в соборища их, и видите, аще они измениша новоисправление свое? еже несть новоисправление, но законопреступление. обаче не измениша. вы же остависте древних святых отец предания, чины, и уставы, и яже оных приемлете. они ко истине не текут. а вы к законопреступлению течете. дадите ми Илиино к тем провещати. ибо он зря жидове нечестивующа, овогда убо Богови внимающих, овогда же идолом служащих, сице к ним рече: доколе храмлете на обе бедре ваши? аще есть Господь Бог с вами, приидите и ходите вслед Его; аще ли Ваал, то идите по нем. Сие и аз глаголю к тем ныне: аще никонианство мните истино быти, чесо ради придержитеся христианства? аще ли христинаство истинно есть, якоже и есть, почто от священника никонопоследствующаго, сопротивомудрствующаго древним святым причащаешися. аще бо токмо глаголяй еретиком, бояся их, сый по всему христианин, и аз таков же есмь, еретик, много паче причащаяися от еретичествующаго священника, есть еретик. и в лепоту. якоже бо причащающиися тела Христова, едино тело Христово бывают, а не телеса. и слыши о сем блаженнаго Павла апостола сице вещающа [кор. зач. 145]: [яко един хлеб, едино тело есмы мнози]. Еже святый Иоанн Златоустый толкуя глаголет тако [на 1 посл. к коринф. беседа 24, лист 822]: [что бо глаголю общение, рече? само есмы оно тело. что бо есть хлеб? тело Христово. чтоже бывают приемлющии? тело Христово, не телеса многая, но тело едино. якоже бо хлеб от многих зерен слагаем слагается, да никакоже являются зерна, но суть убо та, не явленно же их есть различие в счетании: тако друг другу и Христу счетаваемся. не бо от инаго тела убо ты, от другаго же он питается, но от тогожде вси]. Зриши ли коль явственно Златоустый глаголет; первее бо рече: что хлеб? отвеща: тело Христово. таже: что бывают приемлющии? и наведе: тело Христово не телеса многая, но тело едино. и виждь: аще убо хлеб оный есть тело Христово. приемлющии е суть тело Христово, не телеса многая, но едино тело. проявлено, яко и от еретик и с еретики причащаяйся, едино тело есть, не телеса многая, но едино тело. почто? понеже (якоже той же Златоустый сказует) яко хлеб от многих зерн слагаем соединяется, да никакоже являются зерна, но суть убо, не явлено же есть различие в сочетании: тако и друг другу и Христу счетаваемся. не бо от инаго убо тела ты. от другаго же он питается: но от тогожде вси. подобообразне, и у еретиков причащающиися, друг другу счетаваются, единаго хлеба причащающеся. не бо от инаго убо хлеба сей, от другаго же он питается: но от тогожде вси. ибо якоже в хлебе, многая зерна слагаема, един есть хлеб, подобне и в теле многия суть уди, обаче единое тело. чесому научает нас божественный апостол Павел сице глаголя [кор. зач. 152]: [якоже бо тело едино есть. и уди имать многия, вся же уды тела многия сущия, едино есть тело]. Еже святый Иоанн Златоустый толкуя глаголет сице [беседа 30, на 1 посл. коринф., лист 903]: [якоже бо тело едино есть, и уды имать многия, вся же уды тела единаго многия сущия, едино есть тело; не рече, многия сущыя единаго суть телесе, но самое то тело, многия суть; и оныя многия уды, сия есть едино. аще убо едино суть многия, и многия едино, где различие? где преимущее? где меншее. вся бо, рече, едино суть. и не просто едино, но и по истовейшему истязуемся, по еже тело быти, обретаются вся единосущныя]. Видиши ли разум блаженнаго? рече вся уды единаго тела многия сущыя, едино есть тело. и не рече, многия сущыя единаго суть телесе но самое то тело. и не просто, едино, тело, но единосущно. зде убо воньми ми: аще бо причащающиися плоти и крове Христовы, вси уды единаго тела многия сущыя, едино суть тело. и не токмо просто едино тело: но и единосущно. проявленно, яко и причащающиися от еретичествующаго священника вси, елицы причащаются, уди единаго тела многия сущыя, едино суть тело, и единосущно. и како убо не суть вси едино тело? егда крестивыи един един, и в него же крести един есть. и слыши о сем блаженнаго Иоанна Златоустаго сице вещающа [беседа 30, на 1 посл. к кор., лист 904]: [устроивыи ны единотело быти, и отродивыи ны един есть Дух. не бо иным убо сии, иным же другии крестися Духом. но точию же крестивыи ны един есть, но и в него же крести, сиречь, о нем же крести един есть. не бо да различная будут телеса, но да вси единаго тела друг к другу опаство навершаем, крестихомся; сиречь, да вси едино тело будем. на сие крестихомся. темже и устроивыи един есть, и в него же устрой един есть. и не рече, тогожде тела да будем. но едино тело вси]. Зриши ли яко горе и долу показует, яко причащающиися от единаго хлеба, вси, елицы суть, уди, не суть телеса, но едино тело, и единосущно. и понеже вси причащающиися от единаго хлеба, многия сущыя уды, не суть телеса но едино тело. сего ради нарицается общение, яко сообщает друг другу и Христу. якоже той же божественный Златоуст изъявляет глаголя [беседа 24, на 1 посл. к кор., лист 851]: [Не токмо бо внегда причащатися и приимати, но и внегда соединятися приобщаемся. якоже бо тело оно соединися Христу, тако и мы Тому хлебом сим соединяемся]. И аще убо причащающиися причащения совершаемаго, от православнаго священника, соединяются друг другу, и Христу, и срастворяются и смешаются Богу, тем, и обожаются, и освящаются, и благодати божественныя исполняются. о чесом свидетельствует священный Дионисий Ареопагит, сице глаголя [в Скрижали, лист 103]: [общение убо есть соединение Божие с нами, обожение наше, освящение, исполнение благодати, сияние, отгнание всякаго супротивнаго, и что ино, разве Божие срастворение, сиречь, смешение и общение]. Неотрочно есть, яко и ядущии от единаго хлеба, действуемаго от еретичествующаго, сообщаются, и соединяются друг другу и. соединившежеся сим друг и другу и. Бога далече бывают, оскверняются, благодати Божия лишаются, отверзают дверь сопротивному по реченному: идеже света лишение бывает, ту тме пришествие, и что ино; разве смешаются и срастворяются с тем. и понеже убо вси, елици причащаются плоти и крове Христовы, аще и многия суть, самое тело Христово бывают. яве яко и причащающиися от хлеба от священника в ересех состоящаго действуемаго, едино тело вси, елици причащаются, бывают, не Христово, но. яко на от таковаго действуемая таинства, якоже выше рехом, Дух Святый не приходит, ко еже совершити я. и како убо к таковым тщишися приходити, от них же бы паче подобало, всячески отвращатися и бегати, и причащатися с ними. кую ползу мниши от сего себе приобрести? разве бо соединився зде с ними, причащением их, и едино тожде быв с ними, и во оном веце таяжде, яже и они имут наследствити, получити хощеши. и поистинне неотрочно бо тако есть. глаголет бо божественный Златоуст [Маргарит, слово 13, о лжеучителех]: Иже бо друг врагом царевым есть, сей не может друг царев быти, но купно со враги погибнет. Коеже еретици имут наследствовати место? слышим, яко, егда кто ересьми поврежден будет, аще и муки претерпит, спасения не имать получити. сице о сем в книзе Реторице пишет [глава 3, местоимение]: Яко ниже самыя мученици, яко и много страдали, а ересию повреждены, спастися не могут. Убо много паче лучше, непричастну весь, живот свой, не сущу священнику православну быти, нежели с еретики причастившуся, вне чертога затворитися.

Глава, 5.

От еретиков не подобает причащатися, аще и чрез всю жизнь кому случится; но нужды ради некия пребыти непричастну.

И поелику убо тело Христово, вкушающих е, обожает, и освящает, благодати духовныя исполняет, осиявает, всякаго супротивнаго отгоняет: потолику и причащение от еретик действуемое, жрущих е от Бога отлучает, оскверняет, благодати духовныя пуста творит, омрачает, всякаго супротивнаго присоединяет. сего ради божественнии отцы зело возбраняют еретиком приобщатися. сице непобедимый воин небеснаго Царя, святый Афанасий Великий, вопросоотвещателне вопиет глаголя [из ответов ко Антиоху, вопрос 111]: [вопрос: аще во время праздника останется человек во стране в ней же общение соборныя церкве не обретается, что должно есть праздника ради сотворити? приобщатилися еретиком, или неприобщену пребыти? Ответ: Аще много и люта беда, еже своей жене прелюбодействовати, и со иным смешатися, аще и во отшествии будет муж. кольми паче правую веру предати. за еже с еретики сообщатися. якоже убо свою куплю продати хотящии, елико аще время закоснят в странстве, не восхощут вместо начертания царскаго прияти внешнее начертание. тако и о Христове общении непщевати подобает. еже бо рещи апостолу: яко един Господь, и едина вера, и едино крещение. назнамена известно, яко едина в мире неложная есть вера, юже держит соборная и апостольская церковь, и едино крещение очистительное, и грехов избавительное. не тако же мудрствуя прельстися]. до зде Афанасий. Видиши ли коль потрясительне глаголет? рече: аще многа и люта беда, еже своей жене прелюбодействовати, сиречь, коликую пагубу, коль велию тщету души своей сотворяет жена, далече воину страну отшедшу мужу ея. еже со иным смешатися, и оскверняти себе, яко смерть невременную, но вечную наносит. кольми паче правую веру предати, за еже с еретики сообщатися. рекше, не соравнително вящше, пагубу души своей содевает, иже оставит православну веру, сообщаяся с еретики оскверняет себе. но понеже еретическое причащение не на очищение души, но на осквернение бывает приемлющим е. сего ради блаженный Иоанн Милостивый, зело возбраняя таковаго причащения причаститися, аще и чрез всю свою жизнь кому, нужнаго ради случая не случится причаститися тела и крове Христовы, за неимение православнаго священника, повелевает безпричастну пребывати. о чесом повествуется в житии его сице [глава 46]: [И се муже блаженныи (Иоанн) учаше, и засвидетельствоваше, яко никакоже никогдаже отнюд еретичестве общении, и паче же сквернении причаститеся, аще и весь живот, рече блаженный, от какия нужды или напасти, безпричастни пребудете, не обретающе соборныя церкве. аще бо естество жены плотяно законне, притяжавше, аще во стране некоей далече умедливше кроме ея, оставити ея, и иноя пояти, Богом и законом возбраняеми есмы, аще сие сотворим казнена будем. како убо Бозе правою верою соборне церкви припрягшеся, якоже рече апостол; обручивыи единому мужеви девицу чисту, представити Богови. аще православную и святую веру оскверним приобщением еретическим, не будем ли причастницы мучению в будущии век ждущему еретик? общение бо глаголаше, сего ради наречеся, за приобщение и причастие общающаго, имже сообщится. не мозите убо о чада тацех молитвищих прикасатися комкания ради]. Зриши ли коль зело крепце святый Иоанн Милостивый, поучая запрещает православным еретическаго причащения, паче же сквернения причащатися; рече бо никакоже никогдаже отнюд, еретичестве общении паче же сквернении причаститися, аще и весь живот ваш от какия нужды безпричастни пребудете, не имуще соборныя церкве. таже таковаго причащения причащающагося, в чину прелюбодеев положив, глаголет от уподобления: аще бо естество жены плотяно законне притяжавши, аще во стране некоей далече умедлив кроме ея. оставити ю, и иную Богом и законы возбраняеми есмы пояти. аще ли сие сотворим, рекше свою жену оставивше, и иную поимем, кажнени будем, яко прелюбодействуем. како убо Бозе правою верою соборней церкви припрягшеся, аще православную и святую веру оскверним, не будем ли причастницы мучению, в будущий век ждущему еретик? ныне убо несть ли нужды, несть ли крайняго недостаточества? егда мерзость запустения на месте святе стоит, рекше нечестивая ересь святыми церквами обладает; егда благочестиваго архиерея не видимо, егда православнаго священника не ошщущаемо, от него же бы подобало причаститися? то како возможно, входити в таковое место, от него же пребожественный наш Владыка повелевает бегати глаголя [Мф. зач. 99; Даниил глава 9]: егда узрите мерзость запустения реченную Даниилом пророком, стоящу на месте святе, тогда сущии во июдеи да бежат на горы. И к таковому священнику, иже тмищне различием ересей преиспещрен, и купно с ним причащатися? что убо еда причащаяися с еретики не будет томужде подлежати, ему же еретицы подлежат мучению? и како глаголет Иоанн Милостивый, яко правою верою припрягшеся соборней церкви, аще православную и святую веру оскверним приобщением еретическим, причастницы будем мучению в будущий век ждущему еретик? убо ли лжет? да не будет. Аще ли же истину глаголет, якоже и есть, убо всякому хотящему быти сыном кафолическия церкве, и наследником царствия небеснаго, всеми силами подобает блюстися и отбегати от еретики действуемаго причащения, аще и весь живот свой непричастну пребыти, да некако совещаяся с ними, осквернив приятием его святую православную веру христианскую. будет сообщник и в будущем веце томужде награждению, еже ожидает еретиков.

Глава, 6.

Яко причащаяися с еретики, причастник будет и мучения ждущаго еретик.

Но и сладкопеснивый сирин, церковный щур, святый Иоанн дамасково воспитание, всеми силами повелевает православным христианом блюстися, во еже бы не быти приемником причастия еретическаго, сице вопия [книга преп. Иоанна Дамаскина, глава 38]: [имже бо от единаго хлеба взимаем вси, то едина плоть Христова, и едина кровь, и друг другу уди будем. Всею силою блюдемся не приимати причастия еретическа, ни даяти им. не дадите бо святая псом, рече Господь, ни пометайте бисер ваших пред свиниями, да не причастницы злыя славы, понуждени будем]. глава 38. Зриши ли коль явственно и сей церковное утверждение повелевает от еретическаго причастия блюстися. Всею, рече, силою блюдемся не приимати причастия еретическа. И не токмо не приимати: но ниже им даяти. Почто? да не причастницы злыя славы их, рекше, злыя веры, будем. Злославнии бо нарицаются еретицы, вместо зловернии. и не токмо божественнии отцы не повелевают от еретик причастия приимати: Но ниже просфиры от них проскомисанныя. Сице отци собора, иже в Лаодикии во своем правиле глаголют: [еретическое благословение, не благословение. Толкование: Благословение убо зде просфира нарицается. Темже не подобает прияти яко благословение от еретик проскомисанных просфир. Не благословение бо есть паче тех благословение]. правило 32. Зри: Аще бо от еретик проскомисанныя просфиры божественнии отцы не повелевают православным приимати. Како убо попустят причастие от них приимати? Не попустят всячески не попустят. И виждь ми. Сущии бо апостоли всякаго епископа, и презвитера, и диакона, приемлющаго от еретик приносимая на службу, из сана измещут. Сице в своем правиле гремяще вопиют: [крещение и жертву еретическую приемль святитель, не священ. Толкование: Епископ, или презвитер, или диакон, аще не похуляет ни ругается еретическому крещению, но приемлет крещеннаго от сих, или приносимыя от них на жертву, сиречь на службу приемлет, таковыи да извержется от сана. Кое бо сочетание Христови к диаволу; или кая часть верному с неверными]. правило 46. Зде вонми: Аще святии апостоли, епископа и презвитера, и диакона, иже приемлет от еретик приносимая на жертву, сана лишают. Что убо не имут ли епископа или презвитера или диакона, причастившагося от еретик лишити сана? простолюдина же отврещи от сообщения церковнаго? лишат, поистинне лишат, и отвергут. Слыши. Тако бо божественнии отцы Афона о сем во своем правиле вопиют глаголюще: [Аще кто поидет на праздник варварскии, или еретическии, и снесть в той день жремая от них за душу их, или спразднует им, лета два да не причастится, по седмому правилу, иже во Анкире, святаго собора. аще ли священник есть, да извержется, по семдесятому правилу святых апостол. Но и от них жремая не подобает ясти, аще и приносят нам, возбранибося от тридесять осмаго правила. иже в Лаодикии собора]. правило 133 [Номоканон]. И аще убо по святых отец гласовом, аще кто пойдет на праздник еретический, и снесть в той день жремая от них, простолюдин лета два да не причастится, священник да извержется. То како возможно от еретик и с еретики причащатися? всяко невозможно, паче же не подобает.

Вемы известно вемы, яко святии отцы, аще кии от священник, и недостойне своего сана жительствует, не повелевают лишатися, во еже бы от него не причащатися, яко недостоинства его ради не умаляется Святаго Духа дар; Что же от еретическаго имущаго учение священника, сиречь, от еретика, всячески повелевают блюстися, еже бы не причаститися. Явственно о сем преподобному Иосифу Волоколамскому глаголющу сице: [Не умаляетбося дар Святаго Духа недостоинством священническим. Аще бо и не во всех Бог благоволит: но во всех действует. Ты же не суди судиям осужден сыи, не паси пастыря овца сыи, ниже глаголи яко той достойнейшии сыи, ин же не таково имать достоинство. Но да будет ти всяк достоин, точию да не будет кто еретическое имея учительство, аще ли же имать, таковаго блюдемся приимати учения ниже причащения. И не токмо не приобщена имети: но осуждати всею силою, и обличати, яко да не погибели его причастницы будем]. слово 7. Видиши ли согласие единаго к другому святых? Вси бо единогласно повелевают блюстися еретическаго причащения, да некако причащаяися причащения их, будем причастницы и погибели их. Коея погибели? вечнаго мучения, по реченному Иоанном Милостивым, ждущаго еретик. Темже убо аще святии отцы Лаодикийскаго собора, от еретик проскомисанных просфир, яко благословение не повелевают православным приимати: аще святии апостоли приемшаго епископа, или презвитера, или диакона, от еретик на жертву, из сана извергают: аще божественнии отцы афонстии на праздник еретический, снедшаго от еретик жремая, простолюдина от причащения отлучают, священнаго же сана обнажают: аще святии Иоанн Дамаскин, и Иосиф Волоколамский повелевают не приимати от еретик причащения, да не погибели их причастницы будем. То како возможно от еретик и с еретики причащатися? И кто бы от ум имущих дерзнул от них и с ними купно комкати? Какову бы себе от оных причащения имел получити ползу? Разве приумножение вечнаго мучения. Аще бо вера их истинна, убо и причастие их истинно. Аще ли же вера их несть истинна, благоявленно, яко ниже причастие их есть истинно. Явственно о сем свидетельствующу великому Катихисису сице [глава 4]: [Понеже они. (сиречь еретицы) истинныя и правыя веры Христовы не имеют, то како пречистыя и животворящыя тайны Христовы у них быти могут]. И аще не суть у них истинныя и животворящыя тайны Христовы, убо и причащатися от них, и с ними не подобает, да некако причащающеся с ними оскверним православную веру, и будем томужде мздовоздаянию, еже им уготовано, в будущем веце, причастницы. Убо уне есть чрез всю свою жизнь безпричастну пребыти, нежели сицеваго причащения причаститися, и с преступниками православной веры вечней погибели подпасти.

Глава, 7.

В первенствующей церкви премнози святии пастырие образ себе своим стадом представляюще, не причащахуся с еретики.

Се колик ти облак, всякаго вероятия достойнейших свидетельств божественных отец, священными словесы, всячески возбраняющих православным христианом с еретики причащатися, предложих. хощеши ли да представлю ти и самех тех пастырей и учителей церковных, иже поелику словесы врученными себе от Христа Спаса словесныя овцы поучаху, да не питаются смертною пажитию, рекше, да не причащаются от еретик: потолику и самих себе живый образ представляху им, самем делом, самою вещию наказоваху, не причащающеся с еретики. Показуют сие церковнии истории. Сице бо повествуется, о святем Афанасии Велицем [Бароний, лето Господне 349; Феодорит книга 2, глава 8; Созомен книга 3, глава 19]: [Святыи Афанасии Великии, егда возвращен бысть повелением Константина от изгнания на престол свой во Александрию. первее прииде во Антиохию, идеже кесарь Константии обиташе, и тамо зело радостно и честно прият бысть. Обитающ же Афанасии во Антиохии, не сообщашеся Леонтию епископу, а с теми иже евстафиане нарицахуся, си есть с православными, по оном изгнанном епископе своем, сирыми в собрании домовном пребываше. Ибо церкви вся арианами отъяты бяху]. Подобне преподобный Максим Исповедник гнушаяся причащения еретиков единоволников, не причащашеся с ними, о нем же повествует, в житии его сице [минея четия генваря, в 21 день]: [Вопросиша преподобнаго, Троил патрикии, и Сергии евфрат царския трапезы началник, не приобщаешилися констянтинополскому фрону? глаголя святыи: не приобщаюся. (ниже) глаголаша ему: что сотвориши, егда римляне соединятся византяном? Ибо вчера приидоша из Рима два апокрисарии, и утро в день недельныи будут причащатися с патриархом пречистых таин. Отвеща: Аще и вся вселенная начнет с патриархом причащатися, аз не имам причаститися с ним. вем бо Духа Святаго чрез апостола Павла, и аггелов анафеме предающаго, аще бы инако благовестили новое что вносяще. (выше) глагола Феодосии: хощет царь и патриарх чрез нас уведати от тебе. чесо ради не приобщаешися с престолом констянтинополским? глагола Максим: весте сотворшаяся новшества, от шестаго индикта, мимошедшаго круга, яже начашася от Александрии, чрез надписание, Киром бывшим тамо патриархом, девяти главизн приятых, и утвержденных от престола констянтинопольскаго. и иная пременения, и приложения, синодове святых ущербления, сотворенная от первоседателей византийския церкве Сергия и Пирра, и Павла, которая новшества, всем церквам суть сведома. Тоея ради вины не сообщаются, раб ваш констянтинополстей церкве. да возмутся от церкве соблазны положенныя предреченными мужи. да возмутся с положившими я. и претыкание от стези да отметнется, и вы гладким путем евангелия, от всякия ереси очищенныя шествуйте, и егда обрящу церковь констянтинопольскую тако, якоже прежде бе, тогда и аз обрящуся в ней, якоже бех прежде, и пойду ко освящению тоя без всякаго увещания человеческаго. А доколеже в ней еретическия соблазны, и соблазнители архиереи будут, дотоль никаковое мя увещает слово, или дело, да бых когда им како приобщился].

Но и блаженная двоица Феодор и Феофан Начертанная, колика гнушающеся еретическаго причащения, самем делом, самою вещию научаета, не причащатися от еретиков, слыши [минея четия декабря в 27 день]: [Представлены бо быша некогда епарху. он же глаголаше лаская их: единою точию причаститеся с нами. и отпущу вы, да пойдета аможе хощете. блаженныи же Феодор возсмеявся, рече: Подобне глаголше господине епарше, егда бы кто кого молил, глаголя: Ничтоже от тебе прошу, точию да единою отсеку главу твою, и потом идеши аможе хощеши. Веждь убо яко хотящему нас увещати к вашему общению, удобнее есть превратити небо и землю, да та будет горе, оно же низу, неже нас от благочестия нашего отвратити].

Сим всем согласно, и блаженный Агапит папа Римский, зело гнушаяся сквернаго еретическаго причащения, не токмо не причащашеся с еретики но и сосуды, яже они прикосновением своим оскверниша, освяти паки. Сице бо о нем споведует Бароний, лета Господня 536 [лист 619, на обор.; Либерат, глава 22] [Анфима папа отметает. Никифор книга 17, глава 12; Анастасий баблиотикарь о Агапите]: [Пришед в Констянтинополь Агапит папа, послан сущь от Феодота короля Готфскаго, обладавшаго тогда Римом, мира просити у царя Иустиниана, сия лица, яже к нему кесарь чести ради посылаше. Благодарно приемляше, Анфиму же патриарху не сообщашеся, иже бе еретик евтихианин. егда же Агапита первейшии кесарстии сановницы понуждаху спрошением, дабы Анфима в сообщение принял, отвеща им, невозможно сему быти, дондеже исповедание веры своя напишет, и на свое епископство в Трапезонт возвратится. Анфима же низложив без собора, хотя ему милосердие показати даде ему власть возвратитися на епископство трапезонтское, аще бы отреклся ереси. А на место его Мину православна суща посвятити изволи. Обретается в книгохранилнице римской ватиканской и сие, яко Агапит отверг Анфима, вся сосуды церковныя и утвари, яже досякновением еретическим осквернишася, паки освяти и обнови. Тако еретиками церковь гнушашеся]. до зде Бароний.

Зриши ли каковии церковнии пастырие и учителие, якоже, словесы научаху врученныя себе словесныя овцы сыны церковныя, тако и самою вещию самем делом, образ себе представляху им, не приемлюще еретическаго причащения, да некако причастившеся причащения их, будут и во оном веце сопричастницы безконечныя муце, ждущей еретик.

Глава, 8.

Яко древле не точию иноцы, но и мирстии людие бегаху еретическаго причащения.

Откуду последствующе божественных пастырей и учителей, священным гласовом, колицы иноцы, колицы простии народи, отступаху от еретик, да не сообщницы в приятии причащения их бывше сопричастницы и мучению уготованному им будут. еже явственно видимо есть от историк церковных. Сице в житии иже во святых отца нашего Григория Богослова, архиепископа Констянтиня града, повествуется [генваря в 25 день]: Бысть же и нечто таково: арианстеи ереси духом лукавствия потопляющи церковь. (ниже) дано бысть дерзновение пагубным пастырем, и овчею кожею волка покрывающым изгоняти верныя архиереи, и первому Пастырю Христу достойныя, сими бо нецыи страхом убо ужасшеся, ови же ласканьми умягчившеся, или именьми побеждени бывше, друзии же простотою нрава прелстившеся, лщение ересию приемлют, писанием же ручным и приобщением совокупльшеся противным, их же един бе и блаженнаго Григория отец препростием разума удицы впад. Сего страны оныя не терпяще, от общения его отсецают, соотступи же с ними, и от людей часть немалая.

Но и в римстей стране коль безчисленнии иноци, гнушающеся еретическаго причащения, крыющеся бегающе по пустыням и непроходимым местом. О чесом повествуется в житии преподобнаго Антония римлянина [Пролог, август, в 3 день] [латыни отпали в лето 6300, Сергий патриарх ис помяновения извергну папу в лето 6508]: Сей убо преподобный отец наш Антоний, родися в граде Риме от христианину родителю, его же родителя держаста в тайне, крыюще в домех своих понеже Рим отпаде веры христианския. И навыче книжному учению, и облечеся в иноческии образ, и сам отъиде в пустыню, и обрете мнихов крыющихся от еретик в пустыни, в них же бе един презвитер, и едва их преподобныи умоли, еже пострищи его. (ниже) Бывшу же гонению конечному от латин, тоя же пустыни иноци от гонения разыдошася, и не познаша друг друга. Преподобныи же Антонии жительствова при мори в непроходимых местех, на едином камени.

Что же преподобная Мария Голендуха, колико возгнушася сквернаго еретическаго причащения, якоже пишет в житии ея сице [Пролог, июля во 12 день, и минея четия новопечатн.]: По различных убо муках бывши святая во Иеросалиме и поклонившеся животворящему честнаго креста древу, и гробу Господню, и прочим святым местом, прииде в некии монастырь, в нем же злочестиваго Севира бяше ересь, исповедающая божество быти страдателное, аки Отец и Святыи Дух купно с Сыном страдал на кресте. Помолися убо святая к Богу да открыет ей о северианех, аще подобает приступити к причащению их, или ни. И виде ангела держаща два потира, един полн тмы, а другии света исполнен. являя ей, яко потир со тмою, еретическое есть причащение, а иже со светом, то соборныя святыя кафолическия церкве. Возгнушася убо святая еретическим общением, и скоро оттуду отъиде.

Видиши ли како древнии святии гнушахуся еретическим причащением, яко от церквей отступаху, домов своих и обиталищь лишахуся, по пустым и непроходимым местом крыяхуся, всякия тесноты, всякия скорби подъимаху, точию бы не причастным быти им, и ты глаголеши невозможно спастися.

Глава, 9.

О еже в прежния времена безчисленно множество народа, во всех четырех странах вселенныя, от еретик раны, и узы, разграбления имений, темницы изгнания, и самую смерть подъимаху, во еже бы не быти причастником им.

Но обтецы вселенную обозри восток, осмотри запад, коль премногое множество простаго народа гнушающеся сквернаго еретическаго причащения, различная озлобления, различная изгнания, различная мучения претерпеваху, во еже бы не причаститися от еретик и с еретики. Якоже видети есть, в житиях святых. Сице в страдании святаго мученика Ерминигиада царевича Готфскаго [месяца ноемврия, в 1 день, минея четия новопечатная; списание от святаго Григория Двоеслова папы Римскаго, книги 3 двоесловия, глава 31; и Бароний. лето Господне 584; Григорий Туровский, история франков, книга 5, глава 38]: Ерминигиад сын царя Готфскаго Ливигиада, от арианския ереси к православней вере, обращен бысть Леандром епископом Испалитанианским. Печален же бысть Левигиад, арианин сыи, яко сын его остави зловерие арианское, и тщашеся отвратити его от правоверия, к своей же ереси паки возвратити. Ласкаше убо его любезными словесы яко отец, да оставит кафолическую веру. (ниже) И егда виде непреклонна, прещеньми устрашаше и, муками и ранами грозя. (ниже) Таже виде его непреклонна умом, выю, и руце и нозе ему железными узами сковав, в тесную и мрачную вверже темницу. (ниже) Наставшу же великому празднику святыя пасхи, Ливигиад царь призвав некоего епископа от своего зловерия, посла его нощию к сыну своему в темницу, яко да от руку епископа того Ерминигиад приимет арианское их сквернодейственное причастие. И аще сего причастится, паки в древнюю отеческую любовь, и в первую честь возвращен будет. Святыи же страстотерпец арианскаго епископа всячески возгнушася, и зловерие добре обличив, отгна и от себе, не прием сквернаго их причащения.

Сему подобне в житии, святаго Афанасия, о христианех великия Александрии, повествуется [минея четия иянуария в 18 день, в житии св. Афанасия В.; св. Назианзина слово о похвалах Афанасия]: По изгнании же второе святаго Афанасия Великаго, некоего Григория Каппадока зловернаго арианина, на престол той поставиша. Злочестивыи же Григории прият престол Александрийскии, аки хищник, его же македоняне и ариане послаша, возрасти зло, его же навыче от пославших его. По седмицы бо святыя пасхи, вметаемы бяху девицы во узилища, епископи от волков связани ведяху. сирых и вдовиц расхищахуся домове, и совершенныи разбой в граде бываше. И исхождаху из града нощию христиане, храмины запечатлеваху. Ибо вси Григория гнушахуся, и общения его бегаху.

Не менше сего озлоблени, не менше мучение, и в самем царственнем градовом в Констянтине от злочестиваго Македония, правовернии, яко не хотяху сквернаго их причащения причащатися, претерпеваху. О чесом повествуется в житии святаго Павла исповедника сице [минея четия, в 6 день ноября; Бароний, в лето Господне 351, лист 266; Созомен книга 2, глава 30]: Егда блаженныи Павел исповедник, на заточение в Кукусы арменския послан бысть, на его же место взыде еа престол патриаршескии в граде Македонии, иже неизреченно озлобляше Божию церковь гоня и убивая правоверныя, епископ благочестивых изверже, и в них место еретиков постави, имущи поборника себе епарха Филиппа. На котором седящь зело многих православных, с сим Филиппом, лютым ядом арианским исполненым, изби и умучи, иже сообщения с ними, имети не хотяху. жен православных тако мучаше яко им сосцы ковчегами заключенными отсецаху; другим уста клинами отверзаху, дабы евхаристию арианскую приимали. иных бичами бияху, и носы им и ушеса отрезоваху. И иных огнем пятнали, и много крове верных разливаху. И близких Констянтинополя таковым же гонением озлобляше, к своему сообщению, и отрицанию божества Христова, и отвержению словесе оного, омоусион единосущен, принуждая.

Посмотри же како и во граде Едесстем, правовернии христиане гнушающеся еретическаго причащения, вон из града исхождаху в поле, и тамо службы Богови совершаху о них же сице поведает [минея четия августа в 25 день; Феодорит еп. Кирский, книга 4, глава 15 и 16]: В царство Уалента ариева зловерия бывша. егда гонима бе по премногу церковь Христова, и правовернии архиереи от престол своих изгоними бяху, а на их места еретицы посаждахуся. бе во граде Едесе епископ именем Варсис, правоверен и свят. (ниже) ереси же арианской крепко сопротивляющеся. Того злочестивыи царь не терпяше, изгна от престола, и на заточение посла. (ниже) в него же место возведе именем и нравом волка, Люпус бо имя бе тому лживому архиерею, еже сказуется волк. И бе видети вместо истиннаго пастыря в стадо Христово вшедшаго волка хищнаго, во овечей архиерейства одежде. Правоверныи убо народ едесскии, тому лжепастырю еретику сущу, и аки мерзости запустения, на месте святе в церкви настоятелствующу, общатися не хотя, изхождаху вне града в поле, и на месте пустем собирающеся, службы Богови совершаху, якоже и в церкви. Ибо ни едина дадеся во граде церковь правоверным, но вси затворени быша им, а начальнейшими церквами возобладаша ариане царевым повелением.

Что же, колико озлобление, колико удручение, колико мучение, по изгнании блаженнаго Иоанна Златоустаго подъемляху правовернии от противных ему, не хотяще им сообщатися [Маргарит, лист 162 на обор., в житии]: По изгнании блаженнаго Иоанна Златоустаго, поставиша патриарха Констянтину граду, вместо его, Арсакия некоего паче и рыб безгласнейша. (ниже) К сему Арсакию никтоже рачи приступити от страны Иоанновы: но вси отбегоша от него, не хотяше служити с ним, ниже от него причаститися. а о гражданех что есть и глаголати: множайшии бо народ отступи от церкви и собирахуся вне Богу молящеся. якоже ни в церквах толика народа беяше. видевше же то Арсакии и Антиох со своими поборники, отступление людское, убояшеся, да некако разгневався царь, паки возвратит Иоанна от Кесарии, шедше умолиша предния мужи царевы, и понудиша я да глаголют к царю, яко да пустит заповедь по всему граду, да никтоже отступает от Арсакия, ниже от Феофила, и иже с ними суть епископи. Царь же послушав тех лукавыи совет, и велми запрети всем приступити ко Арсакию. Темже иже гневахуся на Иоанна, тии с радостию прихождаху к церкви, а иже поистинне беяху злобе обличители и зело добри, то тии предаяхуся судиям, и яко истиннии вернии мученицы тверде исповедающе истину, и равны с теми прияша венцы. Друзии же убоявшеся лукавых прещения, и казни тоя лютыя, изыдоша из града вон, по заповеди Господни глаголющей: аще изгонят вы из града сего то бежите в другии.

Зриши ли, колико постоянство в вере колику ревность о благочестии, колико усердие о православии имяху, яко раны, темницы, озлобления, изгнания, заточения, и самую смерть добльственне подъемляху; все же того ради претерпеваху, во еже бы не быти, причастниками сквернодействуемаго еретическаго причащения. Ведяху бо яко сообщаяися еретикам, будет сообщник, аще и вся добродетели совершит, и во оном веце мучению уготованному им. И слыши не свое ти предлагаю, но от писания. аще бо свое рекл бы, не быти было вероятно. Сего ради вся реченная мною утверждаю достоверными свидетельствы от писании, да будет ти неотрицателна. Темже и о сем сице в Лимонаре свидетельствует глаголя [Лимонарь, Софрония патриарха Иеросалимскаго, глава 26]: Бе некии старец в лавре Каломони у святаго Иордана, именем Кириак, бе же велия добродетели. К сему прииде брат некии, от страны Доры, именем Феофан вопросити старца о помыслех блудных. Его же старец мало поучив, о помыслех плотских и о чистоте. Брат же зело ползовася, глаголя старцу: Господине авво, аз в земли моей с несторианы, причащаюся, и аще не сея ради вины, с тобою пребыл бых. Якоже услыша старец о имени Нестория, оскорбися о погибели брата учаше же его и моляше отступити от таковыя скверныя веры, и приити к соборней и апостольстей церкви, и яко несть (рече) инаго спасения, точию православно веровати и мудрствовати истинно быти святую Богородицу Марию. Рече же брат: господине авво, вси еретицы глаголют, яко аще с нами не причастишися, не имаши спастися, что же сотворити имам окаянныи аз, не вем? но молися убо Господеви да известит ми делом, кая есть истинная вера. Старец же с радостию прием братнее слово, рече ему: пребуди в вертепе моем, и надежду имам к Богу, яко открыет тебе благодать Его истину. сам же старец иде к Мертвому морю моляся Богу о брате. и се во вторыи день, в час девятыи, виде брат некоего пришедша к нему, иже страшным образом воззрев нань, рече: прииди и виждь истину. и веде его на место темное и смрадное, и огнем дышущее, и в том огни, Нестории, Евтихии, и Аполинарии, Диоскор и Севир, Арии и Ориген, и иныя от еретик, и глагола ему явивыися: Се место уготовано есть еретиком и хулником, и послушающим словес их, аще убо угодно ти есть место сие, то пребуди в приобщении несториан: аще ли искус сея муки прияти не хощеши, то прииди ко общению соборней и апостольстей церкви, якоже старец учит. Глаголю же ти, яко аще вся добродетели исправит человек и неправо верит, на сие место, и в таковыя муки приходит. До зде от Лимонаря.

Темже убо аще святии пастырие и учителие церковнии, не токмо священными своими словесы, врученныя себе овцы научаху удалятися сквернаго еретическаго причащения, но и самем делом самех себе преставляху стадом своим, гнушающеся причащения их: Аще древлеблагочестивии иноци, боящеся да не осквернят святоотеческаго православия, бегаху еретическаго комкания: аше простии безчисленнии народи мужие и жены, гнушающеся оскверняющаго еретическаго сообщения, изгнания, имений разграбления, узы, темницы, различная мучения претерпеваху, да не како сообщающеся им в приятии причастия осквернивше святоправославную веру, будут сообщницы и мучения в будущий век уготованнаго им. То кто бы от благоразсудителных дерзнул от священника, отлучению подлежащаго, и проклятию преданнаго, и еретичествующаго, действуемаго от него причащения причаститися? не вем. Аще бо, по блаженнаго Иоанна Александрскаго [Милостиваго], аще святую и православную веру оскверним приобщением еретическим, причастницы будем мучению в будущий век ждущему еретик. Сего ради таковаго причащения, аще бы случилося кому и изгнания, аще и имении лишения, аще и узы, аще и темницы, аще и самую смерть претерпети всячески не подобает восприимати. Понеже бо унее есть, аще и весь свой живот, не сущу православну священнику, безпричастну пребыти, нежели от священника еретичествующаго причаститися. Зане кииждо имея веру правую, и дела благоугодная, по мере веры и добродетелей, насыщается Агнца Божия, и туюже благодать, юже и усты причащаяися, получает.

Глава, 10.

Во время пришествия антихристова не имать явитися тело и кровь Христова, обаче святии будут.

Аще невозможно имущему веру православную, веру святоотеческую, и дела благоприятая, кроме причащения получити спасения, како убо в последняя дни вовремя пришествия антихристова, мнози неимуще где причаститися тела и крове Христовы, яко во днех онех не имать оно быти, спасаеми будут? И слыши о сем блаженнаго Ипполита папы Римскаго, сице вопиюща [Соборник, слово в неделю мясопустную, лист 133]: [Восплачется тогда, рече, вся земля, восплачется море и воздух. Восплачется солнце и луна. Восплачются горы и холми, и древа польская, человеческаго ради рода, яко вси уклонишася от Бога, и лестцу вероваша, приемше начертание сквернаго богоборца, в место животворящаго креста Спасова. Восплачютжеся и церкви Божия плачем велиим, зане ни приношения, ниже кадило совершается, ниже служба богоугодная. Священныя бо церкви яко овощное хранилище будут, и честное тело и кровь Христова во днех онех не имать явитися, служба угаснет, чтение и пения не услышится, но тма будет на человецех]. в слове о антихристе. Разумееши ли коль явственно глаголет блаженный Ипполит, яко во днех онех не имать явитися честное тело и кровь Христова, обаче святии будут. Что же святии будут тогда, слыши о сем преподобнаго Ефрема Сирина сице вещающа [в слове о антихристе, лист 304]: [Мнози святии тогда обрящутся, вкупе со слезами молящеся день и нощь, со многим смирением, и даст им Господь помощь, и наставит их в места нарочита, и спасутся крыющеся]. Когда глаголет тогда мнози святии обрящутся? Вовремя пришествия антихристова. О чесом и блаженный Ипполит глаголет [там же, лист 133]: [Иже молятся человеколюбному Богу, и Той исторгнет их мреж антихристовых, и спасет их от соблазн его лютых, и невидимо покрыет рукою своею, иже достойне и праведне Тому припадающих]. Еже и сам той же Ефрем утверждает [лист 296]: [Будут бо, рече, мнози обретаеми тогда угодни Богу, и могущее спастися, в горах бо, и холмех, и в пустых местех, и многих молитвах, и плачех безчисленных]. Видиши ли согласие преподобнаго к священномученику? святый Ипполит рече: во днех онех честное тело и кровь Христова не имать явитися. Преподобный же Ефрем глаголет: Мнози святии тогда обрящутся, и мнози обретаеми будут угоднии Богу. и аще по Ипполиту, во днех онех честное тело и кровь Христвоа не имать явитися, по Ефрему же, мнози святии тогда обрящутся, и мнози угодни Богу тогда будут. Благоявлено яко имущии тогда святии, и Богу угоднии быти, кроме причащения, сиречь не причащающиися телу и крове Христовы будут: но от веры правыя, и благих дел. И в лепоту. Слыши великаго во отцех покаяния проповедника, святаго Иоанна Хризостома сице о сем вещающа [беседы апостольск., лист 2871]: [Всяк бо верныи свят есть, поелику верен есть. Аще и мирянин будет кто, свят есть]. беседы апостольския. Зри вера святыню содевает. И аще от веры вернии освящаются. убо и кроме причащения, имущему веру правую веру отцепреданную, и добрая дела содевающему возможно есть спастися. И виждь ми, аще вовремя пришествия антихристова не имать быти в церквах тело и кровь Христова, обаче святии угоднии Богу будут, непричащающиися тела и крови Христовы: но имущии святоотеческую веру, и дела богоугодная. Проявлено яко и ныне, в толикое нужды время, (еже непщую самое то быти) егда видим мерзость запустения на месте святе стоящую, еже есть ересию нечестивою обладаемыя церкви, не сущу православному священнику, от него же бы лепотствовало причаститися, всяк имеяй веру православноотеческую, и дела добрая неотрочно может спасение получити. Сего ради не подобает от священника еретичествующаго отлученнаго и проклятаго действуемаго причащения, еже несть истинное тело и кровь Христова, яко не приходит на ня к совершительству Дух Святый, понеже кииждо от еретичествующих имать в себе дух противнаго, имже противится Духу Святому, причаститися, да некако сообщением его и с ним сообщаяся, осквернив православную веру, той же казни, яже есть уготована еретиком, предан будет. Убо унше есть всякому древлеправославныя церкве сыну, хотящему вечное спасение получити, чрез всю свою жизнь безпричастну пребыти, и наследником царьствия небеснаго быти, нежели онаго причастився, сопричастником причастником его быти, и купно с ними во уготованном им селении вселитися.