Скачать файл в формате DOCX

ЩИТ ВЕРЫ
или
Ответы древняго благочестия любителей на вопросы,
придержащихся новодогматствующаго иерейства.
[составлены в конце 18 века]

ОГЛАВЛЕНИЕ
Настоящия книги триста осмидесяти и дву ответов

Предисловие
Увещение

Часть первая, раздел 1.
Ответы:
1. О православней святоцерковной вере, яже есть крепкое и твердое разумение, со дерзновением в сердцы о Бозе и о вещех спасеных.
2. О исповедании веры христианския на дву вселенских соборех, и о дванадесяти артикулах, то есть [или] сложении веры православныя.
3. О вере христианской, иже есть правый и истинный закон, и в слове Божии утвержденный.
4. О святей соборней и апостольской церкви, в нюже веруем, кая под единым женихом Христом пребывает, а еретических же учений и действ чужда.
5. О святей церкви, кая за себе и за нас ответствует: и известно, яко и грехи кающихся при церкви, а не кроме церкве разрешени имут быти.
6. Яко воистину без святыя церкве спастися невозможно.
7. О яже во святем евангелии писанное и не писанное вся сия приемлем, и содержати усердствуем.
8. Яко имеем святую соборную и апостольскую церковь, яже есть не стены и покров, но правая учения и предания божественных правил, и святых собор, и святых апостол.
9. О святей и соборней церкви, яко за крепкими свидетельствы исповедуем быти до скончания века.
10. Яко церковь святая во времена случайная может кроме священников и видимых церквей пребывати и спасати, и творимое крещение от простолюдин, яко простии по нужде крещающии правилами приятни.
11. О установлении седми таин, яко о сем святокафолическая церковь явно ответствует Катихисисом Великим.
12. О еже от святых учителей церковных речена быша до скончания века жертвоприношению быти, от тех же предрекошася и запустению оной от слуг антихристовых быти.
13. Яко Христово священство по образу Мельхиседекову сказуется вечно быти во имении епископов: ныне же видственно того не зрится: еретическое же несть Христово и вечно.
14. О еже якоже в ветхом законе, тако и в новом многажды о многом до скончания века предрекошася, но за нехранение закона вся упразднишася: убо и истинному священству оскудевшу, нужно есть и жертве сей истинной оскудети.
15. Новины и изменения от когда начашася: с новинами же последствует и пресечение священства.
16. Яко развращаяй во святем евангелии Христа Бога нашего предание получит со отлучением от церкве проклятие.
17. О нужных случаев таин, яко не иныя кия определяются быти, точию две: крещение и покаяние.
18 и 19. О святей тайне святыя евхаристии, до пришествия Христова како будет совершатися.
20. О еже яко еретическия тайны не могут тайнами истинными нарицатися.
Части первыя, раздел 2.
О новинах российския церкве.
Собственно в трех частех, и в десяти разделах показуется.
21. Во второй части, о всяких ересех, яко не нагло имеют нечестие к Божеству.
В третией же части, о неприятии нашем новодействуемаго крещения, и о количестве нововнесенных в него вин.
Часть, 1.
О новинах нынешния великороссийския церкве.
Раздел, 1.
Статии:
1: О согласии российския церкве перваго чина с еретиками.
2: О нынешних российских архиереях, иже крест Христов трисоставный, образ Святыя трисоставныя Троицы, отметают и не приемлют.
Раздел, 2.
Статии:
3: О согласии нынешния российския церкве с еретики, не верующими во Святую Троицу и в воплощение Сына Божия.
4: О нынешних архиереях, херосложне персты благословляющих.
5: Яко чрез сие херосложное благословение киим еретиком уподобляются.
Раздел, 3.
О неистовем богословствовании великороссийския церкве.
Статии:
6: О нынешней великороссийской церкви, яко не точию таинства веры во образовании отметает и не приемлет, но и в самом учении богословском существо божественное поруговает.
Раздел, 4.
О хуле на Господа Бога Отца Вседержителя Саваофа.
Статии:
7: О нынешних богословах, неправе мудрствующих о Господе Бозе.
Раздел, 5.
О хуле на Сына Божия, и на тайну воплощшагося Слова Божия, такожде и на спасительное имя Исусово.
Статии:
8: О Скрижали, в нейже Дамаскин иподиакон развращенно толкует Христова словеса.
9: О тайне воплощьшагося Сына Божия, якоже древле православная церковь двема перстома, имаже знаменаемся, двоестественное Христово таинство образовати и исповедати законополагает: российская же церковь сие образовательное исповедание демонским и чертовским порицает.
10: О нареченнем от Бога Отца чрез безплотнаго слугу пречистей Деве еврейским языком возвещенное пресладкое имя Исус: и яко сие всеспасительное имя новороссийская церковь равноухим порицает.
Раздел, 6.
Статии:
11: О неравом богословствовании нынешния церкве о безначальном Бозе, чрез своего учителя Платона предаемое.
Раздел, 7.
О догматех и преданиях нынешния великоросийския церкве, согласующия перваго чина с еретиками.
Статии:
12: С еретиками, иже о святей богословии неправославно мудрствующими.
13: С еретиками, слияние о Святей Троице согласно мудрствующими.
14: С еретиками евномианы, вместо крещения возливающими на главы своя до пояса.
15: С еретиками, иже поливание крестящимися, церквей и храмин не имущими.
16: С еретиками манихеями, иже солнце и луну Бога творящими.
17: С еретиками маркионитами, иже учат три начала Божеству проповедати.
18: О трегубой аллилуии, како Пресвятая Богородица откры списателю жития преподобнаго Евфросина.
19: О согласии нынешния церкве с еретиками маркионитами, иже приходящих от различных грех прощают без всякаго страха.
20: С еретиками нарицаемыми павликианами, мудрствующими о Христе смиренная.
Раздел, 8.
Статии:
21: О согласии нынешния российския церкве с латиноримскими, лютерокалвинскими, еллиньскими и агарянотурскими ересями. В первых о латинех и люторах, мудрствующих Христа Бога от Иоанна Предтечи в реце Иордане обливанием крещена, с ними же российская церковь в разумении соглашается.
22: О зачатии человечестем латыни мудрствуют, что не вкупе душа с телом созидается, такожде и россияне с ними согласуются.
23: О богомерзских агарянотурцех, иже о воскресении мертвых проповедают, что мужие яко мужие, жены же яко жены востанут, и россияне сим пособствуют.
24: Яко латыни в своих костелах многажды на коленех стоя молятся: подобне и в российских ныне церквах.
25: О книзе Щите веры Иоакима патриарха, в ней же о возглашении в литоргии.
26: О уставленном звону от великороссийския церкве возглашению словес Христовых, подобном латином.
27: О пении партесном, подобне латином.
28: О написании евангелистов подобне латином.
29: О латинех, странно пишущих распятие Христово, подобне и россиянех.
30: О литургии, в ней же две просфиры за патриарха и царя отлагаются.
31: О панагиарном хлебе, на нем же вместо креста Христова двочастный полагается.
32: О артусе и на нем такожде.
Раздел, 9.
Статии:
33: О злославных еретицех Евтихе и Диодоре, новороссийская же церковь в мудровании и сим подобится.
34: О пременении сложения перстов в крестном знамении, подобствующим сим арменом и северианом еретиком.
35: Знаменование креста триперстным сложением уподобляется латинскому, от восточнаго учителя Константина Панагиота означенному.
36: О святых иконах, живописуемых подобне латином.
37: О нынешних живописцах, иже пишут на иконах треугольник.
38: О тех же живописцах, иже пишут великий глаз.
39: О пречистей Богородице, юже пишут распростертыми власы подобне латином.
40: О преписывании икон чудотворных.
41: О отложении поклонов земных во святую 40-цу и в прочия посты, егда поется аллилуия, подобне латином и лютерокалвином.
42: О брадобритии, согласном латином и всем иноязычником.
43: Яко нынешнии архиереи попам повелевают усы подстригати подобне татаром и срацыном.
44: Яко всяк молитву дея покрытою главою срамляет главу свою, такожде и жена раскровенною.
45: Яко россияне дворяне во всем все обычаи и поступки немецкия и лютерокалвинския содержат.
46: Яко латыни, люторы и калвины комеди строят, равне и россияне.
47: О первом дни сентября месяца, како на первом соборе Никейском от святых отец уставися празновати индикту, еже есть новому лету, ныне же уставися праздновати генваря в 1-й день, в равнообразие латыном и лютором.
48: О латынех, иже на костелах своих крыжи своя поставляют, подобне и россияне.
49: Яко латыни, люторы со псы из единых сосудов ядят: подобне оным и россияне мнози творят.
50: Латыни, люторы, и прочии языцы давленину и прочее ядят: равне и россияне, паче же и высокия лицы ядят.
51: О табаке, иже чрез естественными образы употребляюще пиют.
52: И о разрешающих и не постящихся.
53: Святую великую 40-цу и прочия посты по правилам святых апостол 29-му и 69-му.
54: О нынешних монахах.
55: О монахах, иже как простых, так и освященных, птиц ядят, подобне латинским.
56: О не носящих на себе крестов.
57: О резных и алебастровых образах.
58: О ангелах из алебастра.
59: О аптеках и гофшпиталах, и яковы в них мерзости употребляеми бывают.
60: О натомении мертвых.
61: О конском рыстании.
62: О властях как мирских, так и духовных.
63: О господских детях.
64: О путрении власов.
65: О безчинном в церкви стоянии.
66: О камеде, опере и маскараде.
67: О клириках.
68: О нынешних монахах.
69: О нынешних малороссийских попах.
70: О семинаристах.
71: О прении и при ней музыки, и прочаго безчиния.
72: О нынешних господах.
73: О святых иконах.
74: О распятии Господни, иже треми гвоздьми прибивают.
75: О подобии манихейскому учению.
76: О бываемом погребении у господ.
77: О архиерейских посохах со змиями.
78: О чине в крещении и миропомазании ног.
79: Яко в крещении не во осмый день.
80: О странных имянах.
Раздел, 10.
Статии:
81: О нынешних российских архиереях, вооружающихся и хулящих древнее благочестие.
82: Древнее предание.
83: Древнее благочестие.
84: О вседерзом оглаголании древняго благочестия.
85: О ныне российских учителех, соединяющих древлеправославных христиан с еретиками.
86: Древлеправославную церковь именующих блудницею.
87: О порицании арианством.
88: О порицании македонством.
89: О порицании несторианством.
90: О порицании арменством.
91: О порицании латинством.
92: О порицании древлецерковное содержание.
93: О двоеперстном сложении, от черта быти сказующих.
94: О том же двоеперстном сложении, иже волшебным знамением порицают.
95: О древлеправославных пречистых тайнах поругание.
96: О изображенней на иконе Божии Матери.
97: О кресте животворящем, иже именуют раскольническим, брынским.
98: О том же животворящем кресте.
99: О не приемлющих поливательнаго крещения нарицают афеистами.
100: О отвержении древних антимисов.
101: О Стоглавом соборе, иже недостойным быти сказуют.
102: Того же собора священных отец возъименовали безмозгими.
103: О православном учителе Стефане Зизании, иже проименоваша эфиопом.
104: О наругании Константина Панагиота.
105: О порицании изложения святейшаго Филарета душепагубным.
106: О мучениках Христовых, иже за ложныя почитают.
107: О книзе именуемой Кирилове, юже злословяще ложною нарицают.
108: Афанасиевы ответы такожде ложными порицают.
109: О повести Трояна царя, юже отмещут.
110: Куколь, иже есть образ незлобия, называют кукишем.
111: О порицании пения староцерковнаго.
112: О книгах старопечатных и старописменных, яже именуют старогадкими и проч.
113: О порицании имени Исусова.
114: О ложном сказании на пророков, и о Авраамове взятии дров.
115: О покропительном крещении.
116: Яко писаниям святым не имут веры.
117: О книгах греческих, яже ныне печатают латыни и немцы.
118: О книзе Щит веры Иоакима патриарха, и о Требнице Петром Могилою сочиненном.
119: О латынех, иже древния святыя книги растлевают, подобне и россияне.
120: О Флоренском соборе, иже принесоша латыне восточным отцем книгу ветхую: равне и россияне Деяние соборное и Феогностов потребник.
121: О обливательном крещении, яко латинов, лютеров и калвинов, и прочих единопогруженцов и обливанцов нынешняя церковь приемлет неповторне.
122: О приходящих от ересей латинам, лютором и калвинам не повелевают ереси и ересиархов проклинати.
123: О приятии церковию обливания и единопогружения.
124: О восприемниках на крещении еретиков.
125: О браках с еретики.
126: О сообщении россиян разных вер с еретики с латины, люторы, калвины и со армены, и прочими в молении.
127: О сообщении в ядении россиян с еретики.
128: О сообщении, не точию с еретики, но и со псы из единых сосудов ядение.
129: О множестве издания богохульных и святохульных книг, во опровержение всего древлеправославнаго предания.
130: О послушании российския церкве амазонским ложам всюду умножатися.
131: О поставлении чинов, причащающихся ересям: жидовской, симонианской и македонианской.
Часть вторая.
О ересях, яже не наглое имеют нечестие к Божеству, но некоторую прикровенность.
Глава первая.
О ересях, иже друг ко другу взаимное имеют любопрение.
Глава вторая.
О православней вере во Святую Троицу, яко не точию словесы, но и от дел и вещи познавается.
Глава третия.
Яко не мощно есть всем ересям во единой церкви явно утвердитися.
Часть третия.
О новодействуемом крещении.
Ответы:
22. Яко чесо ради его приимати опасаемся, и о количестве нововнесенных в него вин во двадесяти седми показаниях явствуем.
23: О неприятии таин великороссийския церкве, яко лишаются благодати Святаго Духа, и за премножество вин не должны приятися.
24: О еже яко поелику великороссийская церковь приобщается верховнейшим еретиком: латином, люторам и калвинам: убо и прииматися должни суть по готовому образу изложенному.
25: О еже яко по Христе и от крещения истиннии христиане нарицаются.
26: Яко нынешняя великороссийская церковь прилагается своими ересьми к вящьшым еретиком: убо прибегшия от нея к древлеправославней церкви по правилам святых апостол и святых отец должно покрещевати.
27: О сем, яко мы готовому святых отец прилагаемся уставу, и от священных страдальцов начало прияхом покрещевати нынешних россиян.
28: О еже яко по нужде крещающии несвященнии жидов и срацын и кроме проклятия, не суть противнии святей церкви.
29: О новотворимом крещении многажды рехом, яко не мы не приимати начахом, но священный полк страдалец якоже священнии, тако и несвященнии.
30: О надежде на всезрящее око, яко без всякаго примеса противных действий православие хранящих соблюдаем, а новопросыпанных Никоном новин приимати опасаемся.
31: О еже яко крестити простолюдину по нужде от еретик никоегоже препятствия в писании не обретается, и о преступающих закон Божий по нужде и без нужды.
32: О еже яко святии древле крещаху, аще и простолюдини, но не без действа Святаго Духа.
33: От доводов святаго писания ясно показуется, яко святый Филипп крести самаритян не без содействия Святаго Духа, и яко не прияша не Дух оставления, но дух знамения и чудес творити.
34: О еже яко не простолюдина опасает крестити после руки еретической: но после руки еретической крещенных не вчини за крещенных. Номоканон, правило 203.
35 и 36: О еже како крестити род человечь, яко никоего различия возрастным со младенцами в чине крещения не показуется, о чесом в выше указанном 10 ответе, в приведенных свидетельствах может достоверно видеть.
37: О еже, яко по нужному сему времени, оберегаяся священических действ, с символом православныя веры, читая оный 3-жды, во имя триипостасной Троицы, крещаем бывает требующии от нас крещения: и о отрицании сатаны, и обещании Христу, в древлепервенствующей церкви от простолюдин бывшем.
38: О еже яко потребно имети восприемников при крещении, аще и от простолюдин действуемом, якоже и в десятом ответе засвидетельствовася, или от Захария Копестинскаго показася.
39: О крестном воображении, яко о обоих крестителя и крещаемаго, по согласию святых учителей церковных, на себе образом смиренным верою существуем, и тако тем крещение всеблагодатне у нас совершается.
40 и 41: О еже яко крещение случающееся по нужде с трикратным погружением, и с приглашением триипостаснаго имени, бывает совершенно, и потом нетребовательно исполнения молитв.
42: О мvре и руковозложении, яко крещения тайна по нужде и без мvра и руковозложения совершена есть.
Части первыя, раздел, 3.
Ответы:
43, 44 и 45. О показании доводов трепогружательнаго крещения, его же на десять разделов располагаем.
Раздел, 1.
Яко святиии апостоли без всякаго изъятия от еретик действуемаго крещения не приемлют.
Раздел, 2.
О еже яко во времена первенствующия церкве, последующе святым апостолом, святии учители поместными соборами такожде всех еретик и раскольников крещение отмещуще не приемляху.
Раздел, 3.
Яко мнози святии учители во время вселенских и поместных соборов, и проч., соглашающеся со апостольскими правилы и первенствующия церкви обычаю, яко в три погружения, тако и от всех еретик крещение не приемлюще, паки совершенно второе крестити поучают.
Первое: О еретицех наватианех, рекше чистых.
Второе: О еретице Павле Самосадском и павликианех.
Третие: О еретице Монтане и мантанианех.
Четвертое: О еретице Фотине и фотинианах.
Пятое: О еретицех воздержниках.
Шестое: О еретицех вретищниках.
Седьмое: О еретиках апотактитах.
Осмое: О еретиках водопредстателях.
Девятое: О еретиках четыредесятниках.
Десятое: О еретицех средницех.
11: О еретиках саватианех.
12: О арианах еретиках, иже от Александрии.
13: О еретицех аполинарианех.
14: О еретиках маркионитах.
15: О еретицех уалентианех и прочих.
16: О еретицех пелагианех и келестианех.
17: О еретицех евтихианех и диоскорианех.
18: О еретицех несторианех.
19: О еретицех севирианех.
20: О еретицех арменех.
21: О еретицех древлелатынех.
22: О белорусцех униатах, приглашающих имя папы римскаго в своих службах.
23: О неприятии от святыя церкве от всех еретик крещения.
24: О агарянских детех, крещающихся от невольствующих священников.
25: От ложно сотворшихся священник крещенных.
Раздел, 4.
Яко святая правила вселенских и поместных соборов, ит святых отец, не еже точию ради не трех погружательнаго крещения, от еретик приходящих повелевают второе крестити, но обновления ради и важных и многих вин.
Раздел, 5.
Яко святая кафолическая церковь не непреложный же имеет предел, еже втораго или третияго чина еретик не крестити, но иногда единех и тех же приемлет под проклятие ересей, иногда же и под миропомазание, а иногда тех же и совершенно крестить повелевает.
Раздел, 6.
Яко аще и не приемлется от еретик втораго и третияго чинов крещение, но вин ради благословных и нужных.
Раздел, 7.
Понеже приимаше святая церковь от малых еретик крещение, но смотрительно: смотрительныя же вины в законныя и обдержныя в божественном писании не полагаются.
Раздел, 8.
Яко аще и приемлют правила по смотрению от средних еретик крещение, но под миропомазанием: настоящаго времени нужность не допущает иметь миропомазание: убо и отнюд тще есть защищающих новодействуемое крещение на тыя (правила) указание.
Раздел, 9.
Яко аще древле по смотрению и приимаху крещение от еретик под миропомазание, или проклятие ересей, но точное нашему крещению.
Раздел, 10.
В нем же глав дванадесять.
О нынешней великороссийской церкви,
яко новодействуемое крещение православному крещению не точно и вере есть преступно.
Ответы:
46. О правилах святых апостол, и святых вселенских и поместных соборов, и особь писанныя от святых отец правила, непременно православным христианом даже до кончины века хранити, а не оставляти подобает.
47. О правиле священномученика Киприяна, еже со освященным собором составленное о еже всякаго еретика же и раскольника паки крещати.
48. О еже кая нужда собору Киприянову повелевати миряном от ереси приходящих крестити, когда велий достаток бяше освященных верных; воистинну никакоже.
49. Яко несть наше дерзновение, касающееся к несличности времени: но и по киприянову правилу наше неприятие от нынешния великороссийския церкве новодействуемаго крещения зело благоприлично есть.
50. О показании, яко не един Киприянов собор еретиков и раскольников крестить законополагаше, но и прочии учители церковнии.
51. Яко апостольское 52-е правило антихристом нарицает за неприятие грешники на покаяние: сие и к верным епископом глаголется. Ибо антихристом может человек сотворитися не по единому неприятию грешников на покаяние, но и осуждения ради братняго греха и гонения на тех, иже за истину.
52. Яко, по апостольским гласом, вси еретицы антихристом нарещися могут: убо поелику кий еретик в злобе своей превосходствует, потолику к Богу противляется.
53. О еретическом крещении, аще и во имя Отца и Сына и Святаго Духа, аще и в три погружения, но некиих важных ради вин не приемлется.
54. О еже яко и 2-е правило апостольское гласит о епископех верных, не приемлющих грешных на покаяние, таковых бо наказует извержение санов: великороссийская же церковь вящше сего нечестие имеет.
55. О великороссийской церкви, в которых и коликих еретиков в согласных ересях обретается.
56. О наватианской ереси, яко в гонение подклонившимся и пожершим отрицаше покаяние, и двоеженцем не приобщашеся.
57. Наватиане ниже о крещении, ниже о таинстве православныя веры, ниже о ином коем законе церковном беззаконноваху: но зане грешником покаяние отрицаху, за то отриновени и прокляти быша.
58. О приятии наватиан к просвещению свидетельства.
59. О еже во времена святых апостол нигде видится о трех чинах еретических писанаго, но последи уставлени быша на первом вселенском соборе, и о силе и разуме 46 правила апостольскаго.
60. Яко от всех еретик крещаемых трех чинов приятия и неприятия в 44-м ответе пространно описано со свидетельствы священных правил.
61. О правилех святых апостол, и о их действии над ертиками предел зри в 59-м, а святых отец в 44-м ответах: тамо пространно узриши.
62. О еже кия еретики быша во дни святых апостол, и которыя в них бяху ереси, в 21-м и 44-м ответех засвидетельствовахом.
63. Погрешение еретиком, бывших во апостольская времена: в чесом погрешили, о том явственне засвидетельствоваша правила апостольския и церковныя истории.
64. Яко еретическое крещение не за еже незаконнаго ради точию действа еретическим именуется, но и действителя ради еретика суща.
65. О разньствии еретических крещений: аще трипогружательное, аще же единопогружательное, аще и иное кое, или обливательное, не истинным и не крещением именуется, яко от еретик суть взаконяемо.
66. Яко от еретик, аще и от малых, и тожде даемое крещение кафолическим нарицатися не может, но еретическим суть.
67. О еретиках перваго чина, погрешающих о святом крещении, и о латынех.
68. О как нынешняя великороссийская церковь о крещении мудрствует, и како самеми действии исполняет.
69. О запрещении страшном на прелагающих символ веры: приложение к символу от злославных различно.
70. О зачинающих кую любо ересь, или дерзающих превращати символ православныя веры.
71. О крещении наватском и македонианском.
72. О наватианах и прочих, ни в чесом о вере преступающих, святая церковь сих крещение по смотрению приимала.
73. О еретиках четыренадесятниках и празднующих святую пасху со июдеи, обращающихся паки святым крещением очищати.
74. О еже по соборному изложению святейшаго Филарета патриарха, четыренадесятников за превращение святыя пасхи повелевает крестити.
75. О Ариевой ереси и о крещении, яко нам правоверным точное, и яко нецыи святии отцы вторично оных крестиша.
76. О Евномии злейшем еретице, яко воедино погружение крещаше скверный.
77. О Македонии еретице и о ереси его.
78 и 79. О Манихеи и Манесте еретицех и о ереси его.
80. О сем, яко ариане и македониане точное имеяху крещение нашему крещению.
81. О сем, что еретицы ариане и евномиане в чем разньствоваша, и о Арии иже от Понта.
82. О сем, что кия ереси евномиане и манихеяне имеяху.
83. О арианех, иже от Александрии, яко нашими кафолическими словесы по евангелию крестишася.
84. О наватианех и донатистах, средниках и воздержниках, и иных втораго чина еретицех, святая церковь, за противное мудрование их, веру их и крещение относит во ино лице, еже есть во иного христа.
85 и 86. О еретицех, иже неправаго ради мудрования во инаго христа веруют и крестят.
87. О иже преподобный Матфей правилописец, о еретиках втораго чина, по смотрению нарече крещение божественным, и еже мvром помазати.
88 и 89. О еже вящше показуется, идеже от многих, а не от единаго вещь утверждаемая суть.
90 и 91. О втораго чина еретиках святая церковь различно с ними поступаше.
92. О преподобнем Никоне Черногорском, яко по смотрению от чистых и воздержных еретиках, еже миропомазовати оных, и яко они наше крещение си есть точное имеют.
93. О еже откуду область имеют простии крещати, явствует Номоканон, яко Господне повеление есть: и яко еретицы, аще и священнии, обаче области крестити не имеют.
94. О сем, яко поучают вселенстии учители не на кратких и темнореченных фундаметствования, но в явнейшая писания входити.
95. О еже яко правила и святых седми соборов не менши евангелия почитаются.
96. О еже чесо ради от великороссийския церкве покрещеваем.
97 и 98. О разньствии двоих ариан, иже от Александрии и иже от Понта.
99. О качестве и количестве нынешней великороссийской церкве новшеств.
100 и 101. О еже яко святии отцы от еретик крещения приимати не повелеша не единаго ради несогласнаго в крещении действия, но и многих и вящших ради ересей.
102. О количестве ересей несторианских.
103. О сем, яко святая церковь не токмо еретика Нестория проклинает, но и всех еретиков настоящаго и грядущаго времене извергает и анафематствует.
104. О полноте церковных чинов и о древних еретицех.
105 и 106. О учителех церковных, яко на противящияся ереси крепкое и строгое писаху обличение.
107 и 108. О усердных защитниках новопросыпанных новин, и яко кроме ярости повелевается разглагольствовати с еретики.
Часть первыя, раздел, 4.
Ответы:
109 и 110. О сем, яко обычно есть всем еретиком свое зломудрие от пророков и от евангелия и от апостол священным писанием покрывати.
111 и 112. О сем, что во евангелии писанная, и яже не суть явственно писанное, великороссийская церковь отринув отверже, и свое новое положив утверди.
113 и 114. О арианех еретицех, иже между собою о Божестве не единственное имеяху мудрование.
115. О символе святыя веры святии богословцы сице рекоша: аще дерзнет кто во святем символе приложити или пременити, да будет проклят, и чужд благословения и сообщения христианскаго.
116. О превращении символа, яко в коликих и каковых превращениях нынешняя великороссийская церковь обретается.
117. О древних еретицех видится, что они символ никейския веры не изменяли, но прияти той не желающе.
118. О согласии самом древлегреческом в символе глаголати: и в Духа Святаго Господа истиннаго и животворящаго.
119 и 120. О отложении с запрещением и клятвою от Никона патриарха в символе: и в Духа Святаго Господа, истинным глаголати.
121. О сем, яко символ веры латыняне и великороссияне нынешнии аще и не отвергающе, но приложением в него оживляют ереси.
122. О сем, яко вера православна не точию словесы, но и вещию и делы познавается, в противном же и самою малейшею буквою не точию в символе веры, но и инде где в книгах прилагаемо, ересь вводится.
123. О приложении иты ко имени Исусову, и с коих времен в книги нововнесеся.
124. О пятипросфирной службе, како и когда в белорусцех при благочестивых наших патриарсех деющейся.
125. О сем, что от истинных любителй благочестия великороссийская нынешняя церковь в первый чин определися не единаго ради имене Иисусова и страннаго толкования, но и иных множайших и безчисленных ересей.
Части первыя, раздел, 5.
Ответы:
126. О святейшем патриарсе Филарете, и о всесвященном соборе его, и о повелении его всех еретик и многих ради вин крестити.
127, 128 и 129. О сем, яко святейший Филарет патриарх законообдержне за свидетельствами от апостольских и отеческих правил, еже всех еретик без изъятия крестити повеле.
130. О сем, яко несть убо никоего разньствия во изложении святейшаго Филарета патриарха в приятии от еретик приходящим.
131 и 132. О сем, яко святейший Филарет патриарх не новое, но древнее святых апостол и богоносных отец укрепляющь предание.
133. О обливательном крещении без изъятия, аще от православных по неведению, аще от еретик, нигде не приемлется за крещение.
134. О том, что и до Филаретова времени нигде не видится, чтоб правоверным обливательное крещение прияти.
135. О сем, яко премудрии учителие по неведению заблуждающих и во обливательном крещении утопающих в еретическом пределе не полагают, но заблудчиками разумеют.
136 и 137. О Ионе митрополите Сарском и Подонском, не повелевшем крестити двоих ляхов и прочих белоруских епископех, и о извержении Игнатия патриарха, кий не крестил Маринку жену Гришки Отрепьева, но мvром помаза.
138 и 139. О соизволяющих поливательному крещению и утверждающих оному быть, сии суть извержению повиннии: от изверженных же ниже крещению ниже хиротонию приимати.
140 и 141. О миропомазании, чесо ради от белорусцев приемлется, и яко от еретик и от средняго чина не приемлется.
142. О дерзающих несвященных на священная наскакати.
143 и 144. О соборном изложении святейшаго патриарха Филарета, яко всеусердно приемлем.
145. О сем, в кое лето именно, или соборне или обычаем в грецех поливательное крещение начася.
146. О сем, яко в лето 7147 у греков с россиянами едино согласие утверждается.
147. О сем, како и от кого греки поливательное крещение и триперстное сложение прияша.
148. О продолжении количества лет восточным в содержании новообычествования.
149 и 150. О сем, яко в лета святейшаго Филарета патриарха быша в Белороссии митрополиты и епископи точию не греки, но белорусцы.
151. О белорусцех, яко не вси пребывающе бяху под паствою папы римскаго.
152. О белорусцех, от них же святейший патриарх миропомазание и крещение и маслопомазание приемлет, беша православни.
153 и 154. О пастырех, кии убо белорустии митрополити и епископи не склоняющеся в папежское учение, на сих действа Дух Святый прихождаше: не прихождаше же над тех действие, кия к папе римскому уклонишася.
155. О еже како не ведяше святейший патриарх сих белорусцев, аще сам тамо бяше.
156 и 157. О белоруских епископех, кия быша греческаго исповедания, и яко мvро ко крещению свое содержаша.
158. О еже яко обычай есть церковный, еже на всякое лето архиереом приготовляти мvро к действию на крещение.
159. О святейшем Филарете патриархе, яко обрете главнейших во святей церкви законоположителей и самовидцев слову Божию, повелевающих всякаго еретика крещати.
160. О еже яко и Киприянова собора святых отец правила не премину испытати Филарет патриарх, аще всех еретик повеле крестити.
Часть вторая, раздел, 6.
Ответы:
161 и 162. Яко не точию еретическая хиротония не созидательна есть вере кафолической, но и самая раскольническая.
163 и 164. О донатистах, обратившихся к православней церкви, епископов и презвитеров чесо ради не второхиротонисая повелевает приимати во своя чины, како и киим.
165. Яко имеем нужду и усердное желание к получению священства богопреданнаго.
166. Яко надежду свою полагаем на правую нашу кафолическую веру, чего доити не возмогаем, упованием то навершити тщимся.
167. О сем, яко нецыи отступят от некоего епископа не греховнаго ради извета, но за ересь.
168, 169 и 170. О вязании и решении кающихся: ничтоже бо кто дает не имеяй, и ничтоже приемлет от неимеющаго.
171 и 172. О сем, яко без дозволения епископи ни по нужде запрещенному во исповедь приимати иерею не дозволяют.
173 и 174. О сем, яко иерейско благословение со архиерейским не единако, но различно, и о различии епископа и иерея.
175. О сем, яко тайны от еретик неправыми и неприятными засвидетельствоватися.
176 и 177. О недостоверном правиле Иоанна Китрошскаго, и в коликих винах правилом не соглашается.
178. О сем, яко во апостольских правилах не видится на три чины еретиков разделяти.
179. О последи произшедшем обычаи церковном разделяти еретиков на три чины.
180 и 181. О сем, яко от наватиан ставленных не просто в их чинах оставляти от святых повелено, но освящати их.
182 и 183. О еже, яко от наватиан хиротония по всем правилам есть не приятна.
184. О Навате еретике.
185. Чесо ради от великороссийския нынешния церкве священства отбегаем.
186. Чесо ради от наватианския ереси обративыйся епископ сводится в презвитерскую степень.
187. и 188. О еже чесо ради в нижнюю степень наватианстии епископи сводити повелевается.
189. О наватианских епископах и причетницех, како приимати им прежния своя степени.
190 и 191. От донатиан поставлении и от великоросийския церкве не имеют в приятии подобенства.
192. О еже, чтоб приимаху во общество хиротонисавшихся от еретиков севериан, нигде не видится.
193 и 194. О преподобных отцех Саве и Феодосии, и о исповедании ревности их, к неприятию северианской хиротонии.
195 и 196. О еже чесо ради еретиком донатистам святии отцы снизхождение показоваху.
197. О еже яко несть се кроткаго и мирнаго Христа вид учеников, еже вин еретических качество и количество не разсмотряти.
198. О еже яко святии отцы после миропомазания вторично хиротонисаху.
199. О еже яко рукоположения силы никтоже имать, точию епископове.
200. Яко истинных хиротонисателей епископов ныне не видится нигде: убо без оных и священство не может состоятися.
201 и 202. Иже не точию от втораго чина, но и от третияго в нынешее время принять хиротонисанных невозможно есть.
203. О Иоанне патриархе Иеросалимском, яко от православных хиротонисан.
204 и 205. О еже аще Иоанн Маркионов обещася, а не прия Севировы догматы.
206. О увещании паки Иоанна на правоверие.
207. О еже от Иоанна Маркионова принуждение кратко написуется.
208. Яко не нарече Сава Освященный Иоанна Маркионова еретиком, но аще не послушает, тогда аки еретик прокленется.
209, 210 и 211. О преподобных отцех Саве и Феодосии, яко они не прияли от ереси Севировы, яко неправоверна Иоанна Маркионова, но обще с ним ересь Севирову прокляша.
212. О Севире еретице, яко кия ереси еретик бяше.
213. О преподобнем Максиме Исповеднице, ибо якоже он, сице и прочия правилописцы от единовольныя ереси хиротонии не приемлют.
214 и 215. О Пирре еретице.
216 О Нестории еретице.
217. О неприятии от несториан хиротонии.
218. О порицании еже за повторение крещения от некиих христораспинателями.
219 и 220.О еже, что от ариан и наватиан и прочих подобных не приемлема хиротония.
221 и 222. О еже яко Афанасий великий и Мелетий патриарх хиротонию и крещение арианское похуляют и не приемлют.
223. О презвитере, иже сослужебника ангела Божия удостоивыйся зрети с собою всегда.
224 и 225. О иконоборной ереси.
226 и 227. О нынешней великороссийской церкви.
228 и 229. О Павле патриархе Иеросалимском.
230. О святем Тарасии патриархе и о седмом вселенском соборе.
231. О покаявшихся от иконоборныя ереси.
232. О еже что устамениша святии апостоли и вселенстии поместнии собори и святии отцы, и кия правила изложиша, та вся седмый вселенский собор утвердив укрепи.
233. О Данииле епископе Владимирском, и како святейший Иона митрополит Московский благослови его на епископию.
234. О Исидоре митрополите отступнице Московском.
235. О разньстве благословения архиерейска и иерейска.
236, 237 и 238. О еже от ереси приходящаго священика благословити на священнодейство множае паче епископа не видится.
239. О обращающихся от латин и от прочих ересей к православию.
240. О приобщении от еретик к верным разньства архиерею со иереем не полагает, а еже в возвождении на степень священства от испадших иерею никоего сродства не обретается.
241 и 242. О неправду глаголющих на учителей церковных.
243. О некоем судии, жестоко судившем.
244 и 245. О священноигумене Досифеи, и священноиноке Иове.
246. О Феодосии священноиноце.
247. О еже яко древнии вси страдальцы, иже благочестия ради пострадавше, второкрещаху от новодействуемое крещение имущих.
248 и 249. О преподобнем Антонии Римлянине и о римском отпадении.
250, 251, 252 и 253. О папе римском, иже бысть на принесении мощей святаго Николы и освящении церкве, есть вещь странна и весма удивительна показуется.
254 и 255. О еже кая бывает помощь верным от еретик и идолопоклонник.
256. О еже яко обще вси еретическия тайны от святыя церкве отвергаются.
257, 258 и 259. О еже яко не у единых малых чинов еретичествующих в три погружения крещение бяше: но много таковых еретиков и перваго чина, иже в три погружения крещаху, и яко приявшии от неких еретик тии крещаху, не подпадают апостольским правилом, понеже смотрительне прияша.
Часть третия, раздел, 7.
Ответы:
260. О пребывании святыя церкве по нужде без священства.
261, 262 и 263. О еже яко не точию во время неимения священства по нужде, но и во время мирное простолюдини и простии иноцы на исповедь приимаху.
264, 265 и 266. О иноческом пострижении, кроме священника прилучающеся.
267. О запустении и погублении чинов от Никона патриарха и от его последователей.
268 и 269. О еже второе крещающии от еретик нимало не подвержени будут под суд христораспинательства.
270 и 271. Яко простолюдини послани от Христа Спасителя понужде крестити, и от святых учителей церковных повелеваеми суть.
272 и 273. О развращающих положенныя от Бога во святей церкви чины.
274 и 275. О нужнотворимых чинах по нужному сему времени явствует 42 и 43 ответы.
276. О еже ложно правоверных оклеветающия, и кто суть татие и разбойницы.
277. О обычаи в древлероссийской церкви, яко к православию от латын приходящим имена прелагахуся.
Часть третия, раздел, 8.
Ответы:
278. Яко без священства, архиереов, иереи в действии браков полномочия не имеют, понеже не могут жертвеника совершити.
279 и 280. О нужных временах, яко и древле во оныя святии безбрачне жити поучаху, и яко в таковыя времена поучающии чистоте неповинни суть, и о пророчестве Даниила пророка, еже прорече (яко тогда) скончается разсыпание руки людей освященных.
281 и 282. О послании 2 Кориньфу святаго апостола Павла, 7-я главы и 6-го вселенскаго собора правила 52.
283 и 284. О различии многих языческих и еретических законов.
285. О брачившихся, яко девическим образом ходити не повелевает.
286. О очистительных молитвах по рождении младенцов.
287, 288 и 289. О еже яко новодействуемыя тайны крещение и брак и прочия не приимати начало произведеся от полка святодревлеблагочестивых страдальцов.
290. О еже в нечесом разглагольству обретаются нецыи, обаче веру праву и предание святых во всем непорочно сохраняют.
291. О еже яко участишася многия не согласующия толки, то есть согласия.
292, 293 и 294. О распрении единородительным чадом, единыя матере святыя церкве детем, аще в каких любо сродствах, обаче чадами благочестия нарицаются, а не еретиками.
295. О еже малаго ради разньства с единоверными судити друг друга опасаемся.
296. О молитвоосвящении дому, кладезей или брашен оскверненных.
297. О ястии с торжищ языческих снедей.
298 и 299. О поклонении святым иконам.
Часть четвертая, раздел, 9.
Ответы:
300. О еже в начале Христовы церкве не бяше везде и всюду священства.
301. О еже что творец книги О вере написал, яко начаток Христовы церкве како с концем согласует.
302. О христианстей церкви, яко по самой крайней нужде не точию без епископа, но и без презвитера может быти.
303, 304 и 305. О еже яко по прилучаю, и кроме священных лиц, церковь в собрании вернаго народа суть и именуется, и о писании святаго апостола Павла о различных чинах святыя церкве, кия и в неосвященных обретахуся.
306 и 307. Яко видимая церковь без епископа не может быти.
308 и 309. И о запрещении еже без благословения и молитв епископских не воздвизати церкве.
310. О еже аще и не может епископ прийти к созиданию храма, но пошлет вместо себе свои иереи.
312. О иереох древняго рукоположения Стефане и Козме на Ветке.
313. О африканских церковных служителех, под арианскою державою обретающихся.
314. Во время идолопоклонническаго гонения, в цареградской патриархии быша ли церкви православныя.
315. О византийской церкви.
316. О председании епископов на престолех.
317 и 318. О Павле цареградском патриархе.
319 и 320. О святейшем Мелетии патриархе Александрийском и о десяти посланиях его.
321. О еже к кому послания писана святаго Мелетия.
322. О неправославномудрствующих пастырях, яко без них мощно быти и спасение получити.
323. О последующих новорукоположенным и неправильным иереом.
324. О приятии обратившихся белорусских священных бывших.
325 и 326. О иереох новорукоположенных, отлучающихся новодогматствующия церкве и странствующих.
327. О еже татие суть и волцы, не по писанию творящии и не от писания глаголющии.
328 и 329. О крыющихся учителех в гонительное время, како вхождаху сокровенне в домы и учаху.
330 и 331. О сомнении получать евхаристию от новшествующих архипастырей и иереов.
332. О еже яко мнози святии, получающе от православных презвитеров святую евхаристию и в домех держаще, причащахуся.
Часть пятая, раздел 10.
Ответы:
333. О антихристе по четырем разумам священнаго писания: исторический, аллегорический, анагогический, евтропологический. И како словеса Христова, еже антихристу приити, не к единым июдеом прилагается, но и к прочим богоотступником и еретиком.
334. О колене Данове, и о прочих дванадесяти коленах Израилевых.
335. О рождении антихриста.
336 и 337. О еже яко антихристово рождение не от единаго Данова колена показуется быти.
338. О еже яко не от единаго языка жидовска антихристу родитися.
339. О еже яко антихрист по всему хощет уподобитися Сыну Божию, и како уподобится.
340. О пришествии антихристове ко июдеом.
341. О еже каковым образом антихрист приидет к жидом.
342. О еже яко антихрист не имать чувственно приити и Богом именно нарещися: убо и церковь Соломоню чувственно воздвигнути неудобно.
343, и 344. О печати антихристовой.
345 и 346. О знамении обносящем антихристовом, и яко от того ведоми ему явятся.
347. О не имущих печати Христовой.
348. О еже яко антихрист не может показатися чувственно.
349. О еже яко антихриста приход не есть ко единому языку.
350. О поборницех антихристовых.
351. О еже яко не имать антихрист явно себе Богом явити, или кумир свой во имя свое поставити, но под именем Божиим.
352. О предотечах антихристовых.
353. О еже како ныне отрицаются, по святому Ипполиту, печати Творца неба и земли, и крещения, и самого имени Спасова.
354. О наватианех и донатианех.
355. О яковитех и единовольниках, коими перстами крещахуся.
356. О неприемлющих на себе Христова крестнаго знамения.
357. О еже яко никтоже возможет купити ни продати, разве кто имать начертание (или имя) зверя.
358 и 359. О сотворении образа зверина.
360. О знамениих антихристовых и чудесех ложных.
361. О Илии и Енохе, и Иоанне Богослове.
362 и 363. О трех законах пророческих.
364. О приношении безкровныя жертвы Христа истиннаго Бога нашего.
365 О таинственном проповедании пророков на полчетверта лета.
366 и 367. О тысящи лет на связание сатаны.
368. О числе зверине 666: число бо человеческо есть антихристово.
369. О пришествии пророков.
370 и 371. О убиении пророков.
372. О спасении дванадесяте колен Израилевых.
373. О оскудении священства во временах антихристовых.
374. О убиении святых пророк Илии и Еноха, и како труп ею оставле будет на стогну града.
375 и 376. О воскресении пророков.
377 и 378. О времени пришествия антихристова.
379. О еже како антихристу поклонятся вси живущии на земли, их же имена не написаны на небесех.
380. О сем, яко антихрист не во едином лице приидет, но во многих.
381. О изшествии Гога и Магога.
382. О сокровенном разуме сем, еже о получетверте лете антихристова царствования.
Надсловие ответов.

ПРЕДИСЛОВИЕ НАСТОЯЩИХ ОТВЕТОВ

Понеже творец сих трехсот и осмидесяти двух вопросов, на них же люботрудне составишася сии ответы, аще и угасе прекращением своея жизни, но последующия оным, и зельнейшия защитницы не престают тем же огнем сикилийским пылати на любящия древнее предание и правоверне от правоверных действа приемлющия, от тайнодейств же новолюбцев оберегающияся с великою опасностию, злохульственне ругающия, нарицающе сих второхристораспинателями, и иными безчисленными неправедными уничиженьми поношающе, яко же в вопросех видети есть. И сими (вопросами) яко некоеми пращами на оных метающия, и везде яко некое новоизобретенное Евангелие предлагают на любопрение, и теми поношающе нас яко сущих безответных и противных святей Церкви. Сии убо ругательныя и зело досадительныя святыя Церкве, по нужному и горькоплачевному времени, на пребывающих чад подобожабныя и вопиющыя вопросы не точию внутрь России разсеяшася, но притекоша и в наши обския пределы. Мы же пребирающе оныя разумными перстами, и разсматривающе тех злохульственную неправость, не могли оныя молчанию предати, еже кроме ответствовании на сия оставити. Но и апостоловещательный глас зельнейше нас убеждает, еже быти готовому ко всякому ответу: «будете (рече) готови ко всякому ответу, вопрошаему вы о вашем уповании». Сего ради яко некии щит, сии ответы противу прилетевших нам сих пращев представляем, ихже не погрешим нарещи щитом веры, по гласу сосуда избраннаго: «щит веры восприемше, и мечь духовный, еже есть глагол Божии». А понеже сии вопросы разделяются на пять частей, на десять же разделов, убо и мы той же чин сохраняюще, свои ответы на сие же количество частей и разделов распределяем, и на кийждое вопрошение священными писании ответословствуем. В первом разделе написуем: яко святая Церковь, во время неимения православного священства, может кроме свободное время действуемых таин быти, и в ней пребывающия могут спасение получити. Во втором разделе извествуем: яко от великороссийския нынешния церкви праведную и благословную имеем вину, еже не приимати новодействуемаго крещения. В третием разделе изъявляем: яко святая Церковь и от древлебывших еретик, аще и от малых, не приимаше законне крещения: аще же и приемляше от неких, смотрения ради приемляше, и вин ради благословных и нужных. В четвертом разделе показуем о приложении о отложении, и изменении в символе святыя веры. В пятом разделе изъясняем: яко святейший Филарет патриарх не от многих, но от всех различных еретических вер приходящих повелевает крестити, и чесо ради. В шестом разделе засвидетельствуем: яко еретическая хиротония не есть к созиданию святыя Церкви ключима, и яко оная святыми правилы не приятна есть. В седьмом разделе подтверждаем: яко не точию во время нуждное неосвященные иноцы и простии искусословнии, но и во время имения законоправильнаго священства обычай имеяху искусну сущу, паче священника неискусна приимати на исповедь повелевается: в нем же и о пострижении от простых иноков засвидетельствовати имамы. Во осмом разделе доказуем: яко во время нужное, в не имении священьства и жертвенника, браковенчание творити зело правилы запрещается. В девятом разделе глаголати имамы и о начале святыя Церкве, такожде и о конце, в чем оныя действия согласоватися имут, и о неспособности кроме епископов созидания жертвенников и видимых церквей. Наконец же, в десятом разделе изъявляем и о приществии в мир сына погибелнаго антихриста, яко во всем чувственно разумевати его действиям зело несогласно покажется Священному Писанию. И сице убо в кратце вину в настоящем предисловии изъяснивше, и яко на некоем мало постоявше празе, усердно поспешихом внити во ограду многочисленных ваших вопросов, моляще надсвыше вся назирающаго и поспешающаго во благих делех всемогущаго Бога: да Той подаст свою велемощную помощь, яже толикую пучину ваших вопросов безбедно преплыти, и во пристанище благоутишия окончания достигнути.
О всесвятый Владыко, триипостасный Боже, помози твоим рабом, усердствующим о защищении твоея Церкви, при самех горкослезных и волнующихся временах пребываемыя, сию всерадостную утеху получити, еже якоже начати, так и благоуспешно совершити да возможем вси мы, поносимии имени Твоего ради, Твои вернии рабы, в веселии воспети Тебе нашего Творца и Содетеля ныне и во вся веки, аминь.

УВЕЩЕНИЕ.
Благочестивый читатель, да не будет вашему велеумию удивително, яко мы многая и готовейшая из готовейших сочинений восприяхом. Понеже мы не признаваем себе за неких ведущих многоученых авторов. А на сие подвигнухомся не ради показания любокичливых неких учительств, но единаго ради защищения от неправеднаго поношения сих неправдословных злохулителей на последователей святыя древлеправославныя Церкве (иже своими лжесловесии преизобилно своя вопросы обогатиша). Еяже ради правости всесветлых законов ревность сию восприяхом, по реченному от псалмопевца: «ревность дому Твоего снесть мя. И покрых постом душу мою». Тем же аще случится ти что обрести погрешителне начертанная, то и молим твое братолюбие оная по согласию со Священным Писанием исправити, и нас вашим сподобити прощением и благословением, да Бог мира и любви будет в нас всегда ныне и присно и во веки, аминь.

Ответы древняго благочестия любителей на вопросы,
придержащихся новодогматствующаго иерейства.

ЧАСТЬ ПЕРВАЯ,
РАЗДЕЛ 1.

Вопрос, 1.
Что есть вера?

Ответ, 1.
Вера есть, якоже глаголет божественный апостол Павел [евреом, гл. 11], уповаемым извещение, вещем невидимым обличение. Или сице [Златоуст, евреом глава 11, беседа 32]: «вера есть крепкое и твердое разумение со дерзновением в сердцы о Бозе, и о вещех спасеных, ихже невидимо сердцем видим, и усты исповедуем, по реченному [Рим, гл. 10]: сердцем убо веруется в правду, усты же исповедуется во спасение».

Вопрос, 2.
Колико есть сложений веры?

Ответ, 2.
По исповеданию веры христианския на дву вселенских соборех [Собор никейск. и констант., Афан. толк.], первом никейском и втором константинопольском, сложенному дванадесять есть артикулов, или сложений веры православныя.

Вопрос, 3.
Чесо ради нарицается истинная, православная христианская вера?

Ответ, 3.
Православная вера христианская есть правый и истинный закон, от святых преданный, в словеси Божии утверженный, кровию мученическою и исповеданием святых и богоносных отец свидетельствованный [Катих. Велик., глава 4].

Вопрос, 4.
Сие речение, еже во едину святую соборную и апостольскую церковь, како приемлете, и в которую церковь веруете?

Ответ, 4.
Веруем в тую святую соборную и апостольскую церковь, кая под единым женихом Христом суть пребывающая, и православным крещением Ему суть соединена, и учением и догматами святых апостол, и святых вселенских седми соборов утвержаема просвещается, еретических же учений и действ чужда.

Вопрос, 5.
Кроме церкви православной возможно ли есть спастися, и разрешение грехов получити?

Ответ, 5.
Святая Церковь за себе и за нас (понеже мы в ней) ответствует в Катихисисе велицем сице [Катих. вел., глава 31, 1 Петра зач. 60]: «якоже при потопе вси елицы с Ноем в ковчезе не бяху истопоша. Тако и в день судный, вси иже в церкви святей не будут, и тии во езеро огненное ввержени будут [Апокал., глава 20]. Церковь же свою Сам Христос спасает. Яве яко и грехи кающихся при церкви, а не кроме церкви разрешаются».

Вопрос, 6.
И аще возможно, то явите от Святаго Писания.

Ответ, 6.
Явствовахом в прошедшем ответе, что без святыя церкви спастися не возможно.

Вопрос, 7.
Все ли сие приемлите и содержите, еже нам Господь своею церковью предаде разумети, яже во святем евангелии писанное и неписанное?

Ответ, 7.
Что нам Спаситель наш во святем своем евангелии, и через своих апостолов и учеников, и наместников апостольских предаде писанное и неписанное, вся сия всеговейно приемлем, и содержати усердствуем. Аще за нужду и неимение действителей священноправильных и лишаемся неких действии таин, обаче, по апостольскому словеси, упованием сия приемлем. К римляном, зачало 98.

Вопрос, 8.
Имеете ли себе истинное пристанище, рекше святую соборную и апостольскую церковь?

Ответ, 8.
Имеем мы церковь, по реченному от златословеснаго учителя [Маргарит, Слово 10, О еже предста Царица]: «Церковь есть не стены и покров, но вера и житие». Не стены церковныя, но законы церковныя. И по преподобному Никону Черногорскому [Тактик. Пос. 22]: «Соборная церковь не стены суть, но правая учения, и предания божественных правил, и святых соборов, и святых апостол. И по апостолу глаголющему [к коринф., зач. 182]: Вы есте церкви Бога жива. И паки, по вышереченному вселенскому учителю, возглашающему: «Удобротвори сию храмину, иже много паче оноя честнейши».

Вопрос, 9.
Святая соборная и апостольская церковь имать ли до скончания века пребывати, и святыя тайны ко спасению человеческому будет ли употребляти, обьявите нам от святаго писания?

Ответ, 9.
Вселенский учитель святый Златоуст [от жития святаго Иоанна Златоустаго лист 116] церковь сказует быти верных весь народ. Такожде и в предисловии на беседы Деяний святых апостол [Предисл. Бесед на Деян. святых апостол], церковь Христову быти извествует людей правоверных и православных. Премудрый же Максим Исповедник о святей церкви к единоволником еретиком тако возъответствова [Мин. Чет., ген. 21]: «Христос Господь (рече) кафолическою церковью нарече быти правое и спасенное исповедание веры. Идеже бо нарицается Христос, ту и соборная церковь сходится». Сей убо святей и соборней церкви исповедуем быти до скончания века. О ней же блаженный Феофилакт, архиепископ болгарский [Благовест. от Луки, зач. 107], на словеса евангельская тако глаголет: «не прейдет бо род сей христианский. Небо и земля изменится, словеса же Моя и евангелие Мое не разорится, но пребывают. Аще и вся двигнутся, но о Мне вера не оскудеет». Являет же зде, яко церковь честнейшу имать всех тварей. Ибо аще и тварь изменится, верных же церкви и словеса ея и евангелие, никогда же. Согласная же глаголет и преподобный Никон Черногорец [Тактик. Пос. 22]: «соборная бо (рече) церкви, не стены суть, но правая учения, и предания божественных правил, и святых соборов и святых апостол. Якоже рече Господь к верховному апостолом: ты еси Петр, и на сем камени созижду церковь мою, и врата адова не одолеют ей. Виде ли, кая есть соборная церкви? Сам бо великий Петр. Первее антиохийския многажды разрушены быша от язык, законы же и предания божественных отец, и божественная правила пребывают не разрушена во веки от держащих тая». До зде Никон Черногорец. Сия убо святая церковь (еже вернии людие) до скончания века имут пребыти. Обаче при содержании законов божественных, с ними же и Христос Спаситель обещася пребыти до скончания века. «Аз с вами (рече) во вся дни до скончания века». Тайны же святыя, овые глаголются быти во спасении нуждныя, а овыя ко спасению в свободность, действуемыя от архиереев и священников, яко же мvро при крещении, и рукоположение от архиереов. Но убо всем, рещи, тайнам быти, свободно действуемым до скончания века, недоумеем, понеже всем оным совершенныя строители суть епископы. Якоже святый Симеон Фессалоницкий в 1-й книзе своей, засвидетельствуя, глаголет сице [глава 77]: «яко седмь действий имеет в себе епископ, темже и действий седмь носят епископи, по числу божественных действий Духа, сия же суть: крещение, миропомазание, четца печать, рукоположение иподдиакона, хиротония диакона, презвитера и епископа. В сих убо совершен сущь, воздавательную един имеет благодать, темже и единый и рукоположения и мvр действует». И паки тойже: «иереи не действуют тайны без жертвенника. Сие же мvр освящает, мир же чрез архиерея токмо совершается. И убо, кроме архиерея, ниже священник, ниже жертвенник. Весма вся сия чрез архиерея суть». До зде Симеон Фессалонитский.
Тем же по сим свидетельствам яве познавается, яко тайнам всем совершители суть епископи, убо и летьствует епископам быти до скончания века. Якоже о сем Сам Христос Спаситель во евангелии притчею, назнаменуя глаголет [Благовест., от Луки, зач. 95]: «Человек некий добра роду иде на страну далече, прияти себе царство, и возвратитися. Призвав же десять раб своих, даст им десять мнас, и рече к ним: куплю дейте, дондеже прииду». В толковании: «рабом же своим десять мнас вда. Раби же имже церкви поручи. Десять глаголет быти, совершеннаго ради церковнаго состояния. Ибо в церкви чин совершение имать, предстоящими украшение. И ни большем лепо быти, ни мнее. Еже слова благодатию трие сии образи в церкви: очищение, просвещение и совершение. Три сия действа наследуема чинов. Диакони очищают оглашением учения: презвитери просвещающе крещением: архиереи же священныя чины поставляют и совершают». Видиши ли чины к действом, ни вящьше, ни мнее реку предстоящих. Подобне о сем в Книзе Кириловой, на листе 77 показуется. Такожде и О вере списатель, во главе 8, на листе 59 на обороте, засвидетельствует.
Темже, истязателю, лепо бы вам прежде не о тайнах вопрошати нас, до скончания века быти действуемым, но будут ли оных совершители, си есть епископи, до скончания века. Но епископов законоправильных ниже у вас, ниже у нас не обретается. Но утешаете вы похоть желания вашего новыми попами, от новых архиереов рукоположенными: но и теми бегствующими, наиболее по причинам подвергаемым под суд наказания от своих архиереов. Сими ли вечное может указатися священство? О чуднии! Но воньмем убо проречению, как ветхом законе, так и в новой благодати, в силе состоящемуся, соблюдения закона Божия быти до скончания века. Речено бо бысть Моисеом сыновом израилевом сие: «Снабдите же слово се закон себе сыновом вашым до века» [2 Исход, глава 12].
Но кто убо от христиан помыслит ныне в жидовском законе правость их до скончания века пребывати. Речено же паки бысть и самем Господем о церкви Соломонове сице: «Ныне избрах, и освятих Духом сей, да будет имя Мое ту во веки» [2-я Паралип., глава 7]. Но где убо ныне церковь Соломоня святая святых? Вся уже в небытие прейде. Такожде и царственный пророк Давыд о левитех рече: «Ихже глаголаше, избра Господь к ношению киота Его, и к служению себе до века» [1-я Парлип., глава 15]. Но возмнит ли кто жидовских служителей, Богу угодных? Несть убо несть, всяко убо не богоугодни суть. Речеши ли, яко сие бяше в ветхом законе, в хотящем в новой преложитися, ныне же вся убо суть непреложна. Ответствуем: речено бысть, до скончания века в Риме благочестивым папам пребывати. О чем в повелении блаженнаго царя Константина сице явствуется [Кормчая от задней дски, лист 1]: «Святейшему, и блаженнейшему отцу отцев поднебесныя, православному Силивестру епископу и папе превысочайшему, великого града Рима, и всем сущим по нем приемником, святителем православным, иже на седалищи блаженнаго Петра, даже до скончания века седящим». И паки [лист 6]: «и тамо до скончания века и всегда поищут учителя, идеже святое почивает учителево тело». До зде от повеления.
Но где ныне в пресловутом граде Риме благочестие? Где православные учители? Где правоверныя папы? Не вся ли сия лепота римскаго костела в мрак нечестия преложиша. Но речено бысть, и в греческих странах до скончания века благочестивым созидатися, или стояти жертвенникам. Якоже божественный Иоанн Златоуст в беседах на Деяния апостольская, в нравоучении 15, поучая в селех церкви созидати, сице глаголет [Беседы на Деяния, нрав. 15, лист 177]: «помысли, яко даже до пришествия Христова ты мзду имети будеши, поставивый жертвенник Божий». Обаче Божиими судьбами мнози и безчисленнии жертвенницы в греческих странах от язык разоришася. И самая соборная небесоподобная в Царе Граде церковь, увы грех ради наших, в языческой мизгичь претворена [История печат. 1716, лист 290].
Тем же вся сия рассмотрев, со апостолом возопием: кто разуме ум Господень? Или кто советник Ему бысть? И яко святая Его воля хощет, и весь в киих и где соблюсти реченныя до кончины века.
Что же касателно до нужных таин, в нужная времена от простолюдин действуемых, о том в грядущих ответах засвидетельствовати имамы.

Вопрос, 10.
Церковь сущая православная может ли быти, и совершенная в ней тайны действоватися кроме священьства, явите и о сем от святаго писания?

Ответ, 10.
В прешедшем в 8-м ответе явихом, что есть святая кафолическая церковь. Такожде и в начале 9-го кратко засвидетельствовахом. Зде же, по связанию вашего вопроса, долженствуем свидетельствовати, может ли она быти кроме священьства? Аще бы и леть было отсловствовати ответом 101-м выгорецких ответов против иеромонахову вопросу, точно о том же вопросившему: обаче, да не явимся мы презорствующе ваше вопрошение, хоша неизобилно потщимся изъявити, яко святая церковь за обстояние и нужду не точию кроме иереов (киими вы от внешней церкви довольствуетеся), но и архиереов может быти, и в ней обретающияся могут спастися. Якоже о сем вселенскии учитель святый Афанасий Великий глаголет тако [Книга Никона Черногор., слово 7]: «Шествующе же непрелестныи и живоносныи путь, око убо да извержем не чувственное, но умное, сиречь, аще епископ, или презвитер, сущеи очи церковныя, неподобне живут и соблажняют люди, подобает изврещи их. Уне есть им без них собиратися в храм молитвенныи, неже с ними воврещися, якоже с Анною и Каиафою, в геену огненую. Подобне же и рука, еже есть диякон, аще недостойно что творит, да отлучится жертвенника. Нога же, еже есть слуга, аще зле течет во лжу к приятию имении по Гиезии, подобает и сего от служения чужда творити, яко люта и несмыслена человека, да церковь собираема без соблазна хранится». До зде Афанасий. Согласно сему и божественный Златоуст, в толковании священных апостольских посланий, в 34-й беседе ко евреом пиша, сице глаголет: «Лучше бо есть (рече) ни от единого водиму быти, нежели от злаго водиму быти. Той бо многажды убо спасеся, многажды же и беду подъят. Сей же всячески беду приемлет, в яму ведом сыи. Како убо Павел глаголет: повинуйтеся наставником вашим и покаряйтеся. Что убо, рече, егда зол будет, повинуемся ли? Како глаголаши? Аще убо веры ради, бегай его и отрицайся. Не точию аще человек бы был, но аще и ангел, с небесе сшедыи. Аще же жития ради, не испытуй». До зде Златоуст.
Предложенных сих святых писании истину утверждают и церковная истории, от них же едина есть и сия, яже о преподобнем Максиме Исповеднице. Егда бо сей святый муж освеняшеся от еретиков, единоволныя ереси и нечестивому тех догмату согласитися не хотяше, что соборищу злочестивому весма было обличително. Коею виною вызвали они преподобнаго мужа на ответ, следующим вопрошением [Мин. Чет., ген. 21]: «Коея, глаголюще, еси церкви? Византийския ли, или Римския, Антиохийския ли, или Александрийския, или Иеросалимския? Се вси тыя церкви с подлежащими им странами с нами согласуют. Аще убо и ты кафолическия еси церкве, убо едино буди с нами. Да не странническое житие во изгнаниях начен, чего не чаеше постраждеши. К ним же блаженныи муж премудре отвеща, глаголя: Христос Господь кафолическою церковию нарече быти правое спасеное веры исповедание, того ради и Петра, добре исповедавшего, нарече блаженна, на его же исповедании таковую создати церковь всех обеща. [Ниже:] Они же паки вопросиша его: что сотвориши, егда римляне соединятся византяном; ибо вчера приидоша из Рима два апокрисарии, и утро в день недельный будут причащатися с патриархом пречистых таин. Отвеща преподобный: аще и вся вселенная начнет с патриархом причащатися, аз не имам причаститися с ним. Вем Духа Святаго, чрез апостола Павла, и ангелов анафеме предающаго, аще инако благовестили, новое что вносяще». До зде святый Максим.
Зри прилежно внутренним души оком, о вопросителю, и внимай мыслию, како святии иерарси наши, и учителие вселенныя, во обстоятельстве злых пастырей советуют пребывати в церкви Бога жива. И како в преимущественнейшем степени полагают тех, иже ни от единаго же обыкоша водитися, неже руководствующихся злыми пастырьми с бедою душевною. Ов из них глаголет: «уне есть без них (сиречь без епископа и попов) собиратися в храм молитвенный, неже с ними (яко с блазнителями) воврещися в геену огненную». Всяк бо, якоже ин во ином писании рече, прием разум разсуждения, мучен будет, аще последует пастырю неискусну, и ложну славу яко истину имущу. Другии же глаголет: «лучше бо есть ни от единаго же водиму быти и спастися, неже от злаго водиму быти и вринутися в яму погибели». Ин же и вящше нечто представляет нам: «аще бо, рече, и всея вселенныя патриарси на зло соглашаются, или согласишася, и вси с ними причащатися будут еретическому нечестию, аз един не причащуся». И о сем убо внимательно да разумееши, о истязателю. Мы же предлежащая паки обращаемся.
Мелетий, патриарх Александрийский, опасая правоверных христиан, в Малороссии пребывающих, и от пастырей злых утесняемых, их же советами своими премудрыми отводя послушания ко отступником, и направляя разумы тех к послушанию единаго пастыреначальника Христа Исуса, сице глаголаше: «сего ради, толико вам обнажим отступников благочестия, дася ими не прельщаете, яко пастыри отступиша, или заблудиша, яко и нам немощно ся без них сохранити. Но несть тако несть, мощно быти без них. Занеже Бог их из церкве изгнал и обезчестил, понеже недостойне тыя престолы содержат, и то имя на себе носят. И не мни яко слава им се, но безчестие, и вечное отпадение Христа, и святых Его». И паки тойже, похваляя их ревность о благочестии, в другом послании и сие приложил есть: «Мужие росийстии, благочестия воспитание, православия заступницы, иже произволением уже и мученицы, и к державе царства сопротивистеся, о благочестии подвизаеми. Не убо на иже от Бога данныя власти высящеся, но Божию любовь всех иных предпочитающе. И еже истинныя веры усердие являюще, вторая подати терпяще всех весьма никомуже, вас странне иже в вас дние. И посему точию не лукави зрятся, не вседомовнии мученицы, но всенароднии. В вас преславне свет бываем тма, свет тма обличи. Ибо учинени бывше владычествовати вами пастырие, волцы суще, и отступивше добраго стада Христова, не токмо расточити вас, или убити, или погубити возмогоша, но и в болшую ревность совоздвигоша. Вы бо восприясте пастырьскую ревность, и злых пастырей отлучистеся, иже истины отступивших, и благочестия ради человеческия славы позыбляти убо начавших, не возмогших же Божиею благодатию. О овчата христоименитая, и воистину Христовы и от Христа научившиися, чужих не послушати гласа, ниже последовати чуждим. О ангели земнии, подражающе небесных, и се пострадавше небесным, еже не испасти с денницею. Чудо велие, како отврати вас Божия благодать от епископов ваших. Ох прелести, нынешний возлюбивших век, и обратившихся вспять, и благочестия и православия отступльших. Вы пребысте столпи незыблеми, неподвижими во иже отцы преданном учении Спасове апостольском, святительском, с ними же и венцы венчаетеся. Вем добре, венцы онеми правды, якоже глаголет Павел». И прочее. Ко оным же белорусцем и другий некто приснопомнимыи муж, и духовныи инок, именем Иоанн, сия восписоваше, глаголя: «Ибо вам о очищении церкви нашей православной речь зачалася. И далее то чинити будем, на священническии степень по правилом святых отец да восходят, а не по своих волях похоти плотьской, ради имения и богатьства сан восхищают. И всякаго таковаго, иже сам наскакует, не приимуйте, и от короля данного без вашего избрания изжените и проклените: не в папежа бо вы крестилися и в королеву власть, да вам дает волки, злодеи, разбойники и антихристовы таинники. Лучше бо вам без владык и без попов, от диявола поставленных, до церкви ходити, и православие хранити, нежели со владыками и попами, не от Бога званными, у церкви быти, и тою ругатися, и православие попирати. Не попы нас спасают, или владыки, или митрополиты: но веры таиньство нашей православной, и сохранение заповедей Божиих, то нас спасти хощет». Согласно сим всем предреченным пишет в Книзе о Вере, острожской печати, сице: «Яко пребывающа убо папу во отеческих велениих, достоит воздавати ему почесть, елику отцы повелеша, праведно бо: не пребывающа же, бежати того подобает, якоже волка и тлителя, сиречь сказицы церковнаго». Лист 146.
По сим вышеписанным показанием о злых пастырей весма удобно достигнуть всякому из нас, когда подобает повиноватися пастырем церковным, и когда долженствуем бегати, яко казиц веры православныя. И лучше без них повелевает быти, нежели с ними благочестие попирати, и вечной погибели причастником быти. Не глаголет зде, в сих ревнителех истины, чтоб благочестию кое было ущербление. Не показует веры православныя повреждения. Не засвидетельствует сих вне святокафолическия церкви обретающихся. Но и паче сих православнии пастыри высокими похвалами превозносят и похваляют, яко же выше назнаменовася.
Кия же тайны и колико святая церковь во время нужды, без присутствия архиереов и иереов, может содержати, о том и в помяновенных выгорецких ответах, во 101-м, 102-м и 103-м, засвидетельствовася. Во 101-м показася, яко святая церковь во время нужды и без священства может быти, и в не имении архиереов и иереов и простолюдин может по нужди крестити. Во 102-м засвидетельствовася и о крещении простых, такожде и о исповеди нерукоположенных. И более по нужди без священьства сих двух таин в действие не определяется. Якоже церковному тайнотолковнику вопиющу [Катих. мал., лист 35]: «Всяк (рече) нерукоположенный ни таин строителем быти может, разве некоторых нужных случаев таин». Нужныя же тайны по нужде во спасение определяются две быти [Книга о седми тайнах]: крещение и покаяние, якоже восточный учитель Гавриил, архиепископ Филадельфийский, засвидетельствует. Но о исповеди в 7-м разделе третия части предлагати будем: зде же о крещении от простолюдин историями и правилами представити в краткости потщимся.
1-е: Равноапостольная святая первомученица Фекла сама ся крести и прочих [Мин. староп., сен. 24].
2-е: Мученица Дросида, дщерь Трояна царя, сама ся крести [Пролог, март 22].
3-е: Мученик Порфирий сам ся крести [сен. 15].
4-е: Преподобный Феофан сам ся крести и блудницу [июня 10].
Засвидетельствуем сие самих ся крещение и Захария богомудрый [Книга 2-я, глава 35], киевопечерский архимандрит, глаголя сице: «А за часов оных преследования за царей поганских сами крестилися. Как пишет в синоксари месяца марта дня 22-го: Дросие, или Дросида, дщерь царя Трояна, которая ввергшись в ров водный, крестилася, глаголющи: крещается раба Божия Дросие, во имя Отца и Сына и Святаго Духа».
Зри, не точию от простолюдин, но по нужде тех не обретши, и сами на себе крещение учиниша, не быша за сие от святости от всезрящаго ока отказание, но и зело ему во угодницех явишася. Но о самокрестившихся до зде: рцем же зде о несвященных, крестивших многия народы в неприсудствие священных лиц, от церковной истории. От них же сице предлагаем:
1-е: Еще странствующу Господу в мире, апостоли, не имущие рукоположения, крещаху, по реченному евангелистом Иоанном Богословом: «Исус сам не крещаше, но ученицы Его» [Иоанн, зач. 11].
2-е: Анания Павла апостола крести [Деян., зач. 21]. Зри убо, коликаго апостола богоизбранного крести, не имея священства, иже словесною мрежею весь мир уловив, веровати живому Богу научи. Убо ли без благодати Божия апостол Анания содея? Ни убо. О чем и златословесному в толковании святых деяний засвидетельствующу: «Егда, рече, крестися (Павел), абие многу прияти благодать Духа Святаго». Толкование на Деяние святых апостол, зач. 21.
3-е: Святая Мариамия, сестра святаго апостола Филиппа, многих крести [Пролог, ?].
4-е: Святый мученик Галактион свою обручницу и раба Евтолмия крести [ноябрь 5-е].
5-е: Святый мученик Созонт многих крести [сент. 7].
6-е: Преподобный Феофан многих крести [сент. 22].
7-е: Святии мученицы Диодор и Дидим многих крестиста [сент. 11].
8-е: Святый мученик Марко многих неверных крести [сент. 27].
9-е: Святый мученик Власий, иже и Викул именовася, многих крести [фев. 3].
10-е: Преподобный Александр многих крести [фев. 23].
11-е: Святый мученик Мина крести Ермогена епарха [фев. 16].
12-е: Святый мученик Александр многих крести [мар. 13].
13-е: Преподобный Аннин чудотворец варвара, огласив, крести [мар.13].
14-е: Святый мученик Сава многих крести [апреля 15].
15-е: Святый Афанасий Великий, в детском возрасте, детей крести [май 2].
16-е: Святый мученик Максим многих крести [май 14].
17-е: Святый мученик Василиск такожде многих крести [май 29].
18-е: Преподобный Феофан, иже во Антиохии, блудницу крести [июнь 10].
19: Святый мученик Потит дщерь цареву со многим народом града крести [Мин. киевопечат., июль 1].
20-е: Феодор жидовин за неимением священник и воды от простолюдин песком крещен бысть [Пролог, август 28].
21-е: Отроцы рода христианска крестиша отрока жидовска, иже последи бысть диакон [Лапсаик, глава 37].
22-е: Святый Филипп апостол каженика на пути крести и Самарию крести [Деяния, зач. 18 и 20].
Довлеет ли ко уверению вашему, о вопросителю, толик собор святых, крестивших в неприсудствии священник? Аще ли не суть удовлително, то и вящше представити имамы. Но уповая на благоразумие ваше, мним и сему во удовольствие вам быти, по писанному: «Даждь премудрому вину, и премудрее будет». И паки: «Наказуй праведнаго, и приложит приимати». И по свидетельству самаго Христа Спасителя: «При двою или трех свидетелей да станет всяк глагол». Аще же кто противствуя обрящется здравому учению, таковому да ответствует златоглаголивый учитель: «Иже бо, рече, глаголемым не внемляи, ни множайшим веровати имать» [Маргарит, слово 13 О лжеучителях].
Приложил же во удовольствие ваше и от повеления правильнаго, в неприсутствие священников нерукоположенным крестити повелевающаго.
1-е: По засвидетельствованию Номоканона афонских отец, Господь наш Исус Христос многим апостолам, священства не имущим, повеле крестити [Потребник, лист 624].
2-е: Сие повеление Господне засвидетельствуется в толковании 49 апостольскаго правила сице: «По сему повелению всякому правоверному подобает крестити в три составы единаго безначальнаго Бога, а не в три сыны, не в три утешители» [святых апостол правило 49, Кормчия, лист 13].
3-е: «Не рцы, епископ да мя крестит, или благороден, или неженен, да не благородство мое укорено буде. [Ниже:] Не зри о житии крестителеве, токмо да не яве еретик и церкве чуждь, но тою же верою воображен» [Богослов, глава На крещение, тол. стих 20].
4-е: «Велие убо есть крещение, но велие то не крестяй творит, но призываемый в крещении. Понеже крестити ничтоже есть, может бо сие и не зело доблий муж сотворити» [Беседы, 2 коринф., зач. 153, лист 538].
5-е: «Подобает некрещенныя младенцы, аще обрящется на месте некто, не сущу ту иерею, крестит и свой отец, или каков либо человек христианин, несть грех» [Номоканон киевопеч. , лето 7132, стран. в катал. 169, прав. 225].
6-е: «Ведати достоит, яко не сущу священнику, а приключившийся нужде, может и диакон крестити, и людин христианин либо муж, либо жена» [Гавриил Филаделф. О седми тайнах, глава 7].
7-е: «Подобает ведати и сие, яко лучше есть да простым людином совершится божественное крещение, нежели священником проклятым, или отлученным, или еретичествующим» [Потребник киевопеч. лето 1646].
8-е: «По обстоянию мних прост крестит, или диакон, или людин же, аще обрящется на месте, не сущу ту священнику» [Арменоп., прав. 58. киф. патриар., сеч. 4, надпис. о людин.].
9-е: «Подобает некрещенным детищам, аще обрящутся на месте, не сущу иерею, креститися. Аще крестит же и свой отец, или кий либо человек, точию да будет христианин, несть грех» [Правило Никифора патр., в той же книге Севаста Арменоп.].
10-е: «А сии нужды ради, обаче не второкрещаются, иже от причетник, или от простца инока или диакона, или отца своего, или христианина некоего православнаго, и по нужде не сущу священнику, то крещени суть» [Потребник, лист 607, прав. 203].
11-е: «Елико аще крещают несвященнии мужие и жены, или иноцы, что достоит творити. Ответ. Аще умрет крестивыйся прежде, нежели постигнути священнику, божественная благодать совершает» [Потребник, лист 626].
12-е: Святый Иероним в Двоесловии на светоносцы глаголет: «Вемы же леть быти и мирянином крестити, ибо якоже кто приемлет, тако и дати может».
13-е: Святый Августин к Фортунату пишет: «Обыкоша, потребе случившейся, простии люди крещающимся подавати крещение».
14-е: Святый Иоанн архиепископ и Постник свидетельствует: «Инок крещает и образ иноческий подает, и диакон по нужде крещает».
Такожде по всем вышеприведенным свидетельствам ясно показуется: яко святая православная церковь есть верных людей Божиих собрание, или истинное и спасенное исповедание, во оном совершающееся: яко она может быти и кроме священства, если правилнаго и законнаго нигде не обретается: яко святыя тайны. По нужде во спасение, крещение и покаяние могут и без священства совершатися.

Вопрос, 11.
Кто устави и преда святыя тайны святей церкви?

Ответ, 11.
Святая церковь явственне вам ответствует Катихисисом Великим: Что сам ея Жених, Господь наш Исус Христос устави и предаде. О чем во главе 83, о седми тайнах засвидетельствуется. Такожде и кир Гавриил Филадельфийский в книзе О седми тайнах, во главе 8, подобне показует.

Вопрос, 12.
Пречистое убо тело и честная кровь Христа Спасителя нашего, ко причащению верных, видимо и чувственно будет ли до скончания века пребывати, или ни?

Ответ, 12.
Понеже убо всякий глагол Божий и всякое Божие обетование, аще и чрез Его служителей слову Божию апостол и пророк, или учителей церковных, свою непреложность дотоле имеют, доколе оное в нерушимости закона Божия соблюдается в последователех: егда же в противность оному что привнесется, тогда и обетование оное в тех не пребудет действительным. Яко же богодухновенный Давыд пророк от лица Божия глаголет [Пс. 88]: «Ни оскверню же завета Моего, и исходящая от уст Моих не отвергуся. Единою кляхся во святое Мое, аще Давыду солжу. Семя его вовеки пребудет, и престол его, яко солнце предо мною, и яко луна свершена в век, и свидетель на небеси верен». Сие убо толь крепкое обетование чинится от Бога соблюдающим в непреложности закон Его. Не соблюдшему же и законопреступному Израилю в том же псалме ниже тако глаголет: «Ты же отрину и уничижи, и негодова помазаннаго своего. Разорил еси завет раба своего, осквернил еси на земли святыню его. Разорил еси вся оплоты его, положил еси твердая его в страх. Расхищают и вси мимоходящии путем, бысть поношение соседом своим» и прочая. Но и иная многая реченная быша в ветхозаконии и в новой благодати, до скончания века, за преступление же закона не пребыша, о чем в конце девятаго ответа засвидетельствовахом. Но аще мы ныне и лишаемся таковой пресвятейшей тайны пречистаго тела и крове Христовы, точию не в бытие богопреданнаго священьства, и в неиметелное время правилных епископов и священников, чрез которых и от которых действие сея происходит. Обаче аще и лишаемся сея в сие нужное и горкослезное время, но веруем Христову словеси, глаголющему тако: «Ядый Мою плоть, и пияй Мою кровь, во Мне пребывает, и Аз в нем». Иоанн, зач. 24. Доказывают же доволно о сем и церковнии учители, что не точию по видимому образу летьствует причащатися верному, но по иному образу. Якоже Иппонийский премудрый учитель Августин засвидетельствует: «Веруй, рече, вкусил еси и причастился еси». О чем сия вкратце предъявивше, и прочее предложенными показаниями пространнее засвидетельствуем.
1: Причащающихся устроение на трегубое действие разделяется.
2: Яко без правилнаго священьства святая евхаристия не может быти или действоватися.
3: За обстояние еретик, или за гонителную тесноту, или за иную кую любо благословную вину, аще кто и не сподоблен будет причастия святых таин, обаче за свое усердие не может сей лишитися Божия благостыни.
4: Святии учители церковнии, за неимение православных священников, зело опасают правоверных еретическаго причастия, аще и во всю жизнь лучше не причастным быти повелевают.
5: Мнози таковии обретошася, за неприятие еретическаго причастия страждуще, блаженно жизнь свою скончаша.
6: Но и во время мира церковнаго, во время православнаго священства, пребывающии в глубочайших пустынях, кроме причастия, чрез достойное житие, за великое усердие, спасение себе получиша.
7: Не точию в новой благодати, но и сообразно и в ветхом законе, за нужду лишаеми жертвоприношения, не противни быша закону.
8: А понеже от которых учителей церковных речена быша до скончания века жертвоприношению быти, от тех же предрекошася и запустению конечно тому от антихристовых служителей учинитися.
И сия убо оглавивше, в самая показания церковных свидетельств вступаем.
Первое: О трегубо причащающихся.
Понеже первии суть, иже усты и сердцем в чистей совести приемлют животворящее тело и святую кровь Христову, по преданию святых апостол и святых отец, и се сугубно. Ово во святей церкви, на святей литоргии причащаются: овии от священника православнаго вземше часть животворящих таин, у себе держат, и егда восхотят причащаются. Ибо дотоле сие таиньство цело есть, доколе вид хлеба и вина цел пребывает. Таковии быша в скитех и пустынях отцы, во Александрии же и Египте простии людие, намнозе имуще причащение в дому своем кождо, и егда хотяху, причащахуся собою [Препод. Никон Черног., в слове 53-м, Симеон, ответ 41]: яко Василий Великий свидетельствует, и Симеон Фессалонитский в книзе своей утверждает, тоже доказует и богомудрый Захария Копестинский в книзе своей на латины, во главе 37.
Втории: Иже благословных ради вин не имеющии где причаститися, еже устами вкусити животворящих и пречистых таин, обаче веру теплую и усердное желание о сем показуют, добродетельми свое житие украшающе, таковии чрез веру и усердие духовне причащаются плоти и крове Христовы. О чем в нижеследующих статиях изъявится.
Третии: Суть едиными токмо устами причащающиися, иже недостойне ко святому комканию приходят, иже скверными грехи окаляни, иже в смертных грехах погрязшии и не очистившися, котории не токмо не получат благодати Божия, но паче болше осуждение приимут, по блаженному Павлу глаголющему: «Ядыи бо и пия недостойне, суд себе яст и пиет, не разсуждая тела Господня». К коринфом, зач. 149.
Сие трегубое причащающихся устроение вышепомяненный Захария Копестинский во главе 37 засвидетельствует. Подобнее же древним и новопечатныя книги явственно изъявляют.
Книжица о 7-ми сакраментах, типографии Черниговския, року 1606, на листе 7-м: «Вопрос. Многократное есть потребление евхаристии. Ответ. Трикратное. Едино есть устнами токмо, якоже обычай бывати, егда кто с нечистым сердцем приемлет тело и кровь Спасителя нашего, яко Июда беззаконный на тайней вечери, но таковый на пагубление души своей приемлет. Другое потребление есть духовное, то есть, егда кто истинною верою и волею хощет телу и крови Христовой причаститися, но не может его прияти, яко то обыче бывати, не сущу тогда тамо священнику. Ниже: Третие есть, егда кто и чистым сердцем, и чистыми устнами бывает причастником евхаристии святой».
Сие же трегубое устроение причащающихся и Диалогисм книжица, изданная в киевопечерстей лавре, року 1614, на листе 154-м, располагает, глаголюще [часть 2, беседа 3?]: «Яко великое есть разньствие между ядущими трапезу царскую. Едини ядят действительно, едини не действительно. Инии тайну святую приемлют, купно же и действия ея. Прочии же ни тайну святую приемлют, ниже действия или корысти, от тайны святыя происходящия. Ниже: Приемлющии тайну святую без действия, еже есть без благодати Божия, сии суть, иже в гресе смертном причащаются. И сице причащающиися, далече отстоят от благодати Божия, новый же паче грех соделовают, и суд себе ядят и пиют. Не любве Христовы, но гнева и негодования приумножение себе творят. Приемлющии же действия тайны святыя, си есть приумножение благодати Божия без причащения, сии суть иже имеют огнепальное сердца желание причаститися, но не могут, или некоея ради тяжкия болезни, или иных киих благословных вин, или не имеют на сие помощника себе: приемлют же точию действие тайны святыя за свое благоусердное желание». До зде Диалогисм.
Второе: Без правилнаго священства святая евхаристия не может быти или действоваться.
Явственне о сем доказует восточный учитель святый Симеон Фессалонитский книги своея во главе 75, глаголя сице: «Единый действует епископ, свидетель свещателен сый, яко подражает Бога Отца светов, и Егоже обилует благодатию, си есть дарование даром, и всяк чин, и вся тайны, и все совершенство чрез него». И паки во главе 77 пишет: «Иерей не действует тайны без жертвенника. Сей же чрез мvро освящается, мvро же чрез архиерея. Ниже. Жертва, ниже священник, ниже жертвенник, весма убо вся сия чрез архиерея суть». До зде Симеон Фессалонитский. Подобне же сему и святый Феофилакт Болгарский в толковании Христовых словес изъявляет, глаголя: «Архиереи же священныя чины поставляют и совершают». Благовестник от Луки, зач. 95, лист 205. Дионисий же Ареопагит в книзе своей, О церковном священноначалии, во главе 5, тако глаголет: «Знаменай, яко освятити и свершити мvро несть презвитера, но ниже жертвенник совершати да принесет на нем, ниже хиротонисати. Сия бо един священноначальник сотворити имать. Ихже кроме, священник ниже крестит, ниже принесет, но в предсвященных от епископа священнодействуется». До зде Дионисий Ареопагит. По сим убо вышеприведенным свидетельствам, без православнаго епископа священник ничто может действовати: ниже крестити, ниже мvро совершити, ниже жертвенник ради действо причастия устроити, ниже от прочих действий священных что от себе может, кроме онаго, учинити. Тем же яве и познавается, яко все чинодействия церьковная (кроме нужных времен, по нужде неких действий от святых определенных, и нами выше и ниже засвидетельствованных) без епископа не могут основатися на иереях, и яко епископи суть всем чином и действиям совершители, и суть во образ солнца, просвещающаго прочия планеты. Аще угаснет сей чин, убо и прочия чины и действия будут всяко лишаеми своего освящения, якоже и в самом деле случися в малороссийских христианех. Егда у них епископи отступиша к римскому костелу, тогда вмале не згорети у них учинися всей святыни. Аще не бы приспел на то время вселенский патриарх Феофан, и вознес сию святыню рукоположением митрополита, всяко бы конечне могли пострадать сей недостаток, в котором мы ныне жалостне находимся. Обаче тогда малороссийстии христиане изволиша без причастия и прочих святынь быти, нежели ради онаго с беззаконнующими в путь беззакония тещи. О чем творец книги О вере во главе 23, о юнитах доволнее о сем засвидетельствует.
Темже вы, о вопросителю, втуне хвалитеся, якобы противу нас своим преимуществом. Аще вы богопреданнаго вечнаго священства, в епископах основаннаго, у себе не имеете, убо того ради и вы у себе святыя евхаристии с вечным священством, вечно определенныя, не имеете. Но паче порок зело укорный себе притяжали есте приобщением неправилным иереов, от котораго вы никак не можете очиститися, если от того правилно не отбежите. Но о сем в грядущих ответах доволно вам глаголати имамы.
Третие: За обстояние еретик, или за иную гонителную тесноту и неимение, о лишающихся святаго причастия.
О сих убо великий летописец Бароний, в лето Господне 260, на листу 165 на обор., повествует сице: «На изгнании сущу Киприану, Понтий Патернус, и иных многих епископов, иереов и диаконов и клириков, по Африце ищущь, многое их число поима: и крепких во исповедании Христове видев, дрекольми их бити повеле, и на работу их руды медныя изгна в сигу и в гору Халкорихов. К сим же Киприан святый, утешая их, писа послание, сладости христианския исполнено. Ниже: Не имате (рече) возлюбленная братия, ни единыя тщеты во благоговении и вере, яко тамо в сие время священницы Божии приношения и жертвы (или литоргии) совершати не можете: пожрите в жертву дух сокрушен, сердце сокрушено и смирено Бог не уничижит. Сию жертву Богу непрестанно воздаете в день и в нощь, и сами есте жертва жива и свята (якоже глаголет апостол [к рим. 12]) в телесех ваших [епист. 77]. Ниже: И дарова им сию благодать Господь Бог, яко вси во оной и тяжкой работе изомроша». Утверждает же о сем и богомудрый Захария Копестинский в книзе своей, которая выдана з друкарни Острожской, лета от Христа 1598, июня 11. В ней же, во главе 37, сице доводствует: «Если убо и тем способом пресвятых таин причащения правоверный не могл имети, или подчас преследования, или в недостатку правовернаго иерея, а помяненный иноверныи налегали бы, и до своих сакраментов намовляли или приводили: тако кождом способом не дающися оным прельстити изводити, в покаянии юже за грехи и выскусе, в слезах и в молитвах на он час самому себе будет помощи сподобити, безпечне умирати, и в руки Божия душу свою поручати, имеюще при том за уполичу волю, и теплое от сердца пожедание и прагнение исповедатися, и тело и кровь Христову прияти, глаголющи в сердцы своем: где бы ми на тот час правоверный иерей Божий, святой церкви восточной, приспел, исповедающися им, тело Спаса Исуса Христа и кровь Его пресвятую бы пил. а волю такую, избавленное жедание Бог не презрит, але яко самую речь приимет. Авраам хотяж сына своего Исаака на оферу не забил, але волю его Бог принял. [Ниже:] Святый Иоанн Хрисостом, на эпистолию к римляном, в главе 5, глаголет: Сущим в произволении, венцы суть и мучение. еще слушай, что в Вавилоне в пещи огненной три отроки глаголали: ни есть в той час князя, ни пророка, ни вожда, ни целопаления, ни оферы, ни приношения, ни кадила, ни места оферовати пред Тобою, и найти милосердие: але душею сокрушенною, и духом смиренном да прияти будем. як видели в себе на той час и пророка и место имети, и ради бы Богу оферовати. але где ся не могло стати, душу сокрушенную, и на милость Божию надеющеся, и дух упокорены и жалобны оферовали, верующи же тем способом, за не преднейшую оферу от Бога имели быти приняты. тако же и правоверныи, в час помяненный, разумеют о своем приятии у Бога: пророка, то есть иерея: место, то есть церкви: оферы, то есть таин пресвятых: где не есть, яко и те трие отроцы, душу сокрушенную, дух упокоренный Богу оферовати. не тревожся, лучше и безпечне так в руки Божии податися. яко Давыд царствующий пророк глаголет [Цар., 24]: тогда впаду в руки Господни, ибо вем многи суть милосердии Его, а в руки человеческии тогда не впаду. А Исус Сирах: да впадется в руки Господни, а не в человеческии, яко вем велможность Его, тако и милосердие Его, аминь глаголю. иже безпечно и избавлено есть от предименованных иноверных, с церковию восточною не верующих, и не держащих догмат, так самых латынников, яко и униатов, которы до них пристали, сокраментов не брегуще. а ни у них исповедаючи, правою верою умирати, так убо вем в руки Божии, и милосердия и добротливости впадаемо: а нежели в руки человеческии, то есть неблагочестивыи и неправоверныи впасти, чрез что згибель избавлеися не бывша верным до конца. буди безпечен на остатном стопени живота твоего, схорони себе. поминай онаго разбойника на кресте, поминай и первомученика Стефана, и иных многих без личбы мучеников, вызнавцов, и на выгнанью и в пустынях будущих, которыи без причастия живот свой скончали, веру в главах над все схоронивши, памятуючи бо вем оно: буди верен до смерти, и дам ти венец живота. [Ниже]: Або вем не презорства и не з презрении так то чинити будете, але для последования и чрез шкоды от видимых мучителев, а стараючися в сохранении и ненарушенную быти правую веру». До зде Захария Копестинский.
Но и творец книги О вере подобне сему о гонении унеятов на правоверных, такожде и о блюдении неприятия от них действуемых таин, сице повествует [глава 23]: «Но имже они (униатове) суровии на люди, и на священники наступовали, тем они наипаче гнушахуся ими, и удаляхуся от них. от сих же причин, великое множество младых детей без крещения, болных без причащения, и умерших без погребения было».
Согласно сим и в вышепомяновенной книжице Диалогисме, в беседе 8-й, на листе 136, утверждает: «Не усумневайтеся (рече), не изнемогайте умом вашим, благоговейнии и Бога любящии души. воистинну веруйте, яко равную мзду и благодать, и милость у Бога обретаете за сицевое ваше благоговение, за сицевую ревность и намерение духовное, аки бы воистинну уже причастилися. и намерение бо сицевое неизреченне богоугодно есть Господеви. свидетельствующу о сем учителю церкве Иппонийския сими словесы: веруй, и вкусил еси, и причастился еси. пребудете в чистоте, бегайте греха. что же вам предложи церковь Христова верите, веруйте, повинуйтеся, и заповеди Божия соблюдайте, Господа Исуса от всего сердца любите, и вседушно причаститися тела Его желайте. аще же когда доити сего не возможете, толико будете имети мздовоздаяние, елико в самом причащении святом прияли бысте». До зде из Диалогисма.
Но и в книзе О седми тайнах причащение по нужде в посредие полагает, и за неимение спасения не отлучает. Якоже о сем в самой книзе сице пишет [Гавриил Филадельфийский, и книга Жезл, на лист. 49]: «Ведати нужда есть всем, яко тайны церковныя, иныя суть по нужди посредия, яковыя суть: миропомазание, евхаристие и елеопомазание. ихже аще кто и не сподобится нужды ради некоея, спасен быти может. иныя по нужди заповеди, темже есте (две): крещение и покаяние. еюже кроме, несть леть спасение получити». До зде из книги О седми тайнах.
Церковь же православная, о нужнопотребности святаго причастия, такожде и о неполучении за невозможность, Катихисисом великим противу вопросу возответствует сице: «Крещение бо и причащение и покаяние сице нужнопотребныя суть всякому во спасение, да спасется, якоже корабль в преплытие глубины морския, разве аще не возможет их употребляти, вожделев их». Катихисис великий, глава 83[72?].
Пишет убо и архиерей Рязанский, аще и от новых, но древним в том согласуя, в книзе Камени веры, о повсеместном разуме святыя церкве нужных случаев лишения устных святыя евхаристии, сице: «Тако случай бывает, в немже вожделение евхаристии вместо самыя снеди евхаристическия, сиречь, егда умирающь и сея божественныя пищи тепле желающь, кроме всякия своея вины, не имать причащающаго, таин Божиих служителя: тогда Христос тайноположник, и намерения благая венчающь, идеже нужда без вины оскудение творит, щедротами своими оскудевающая наполняет, и ползы от евхаристии бываемыя таковому дарует. и о сицевом мощно рещи: яко тело Христово яст без евхаристии единым теплым желанием, верою же и любовию. о таковом случаи некто от учителей рече: что готовиши зубы и чрево; веруй, и ял еси. сими словесы умирающаго, не имущаго же, без вины своея, причащения, укрепляет: да не тем оскудением во отчаяние впадет, но паче да имать упование на неизреченныя щедроты Божия, яко и самое презелное вожделение причастия вменяется ему в причастие. что (рече) готовиши зубы и чрево; (в сицевом случаи и нужде) веруй, и ял еси» [л. 419]. До зде Рязанский.
Но сие убо Рязанский не нас пользуя писа, но противу еретиков кальвинов писа, иже в жертве евхаристии святыя не сущее тело и кровь Христову, но точию образ быти тела и крови Христовы глаголаху. Тем и ядуще тии сию образную, ум возводити в небо повелевают, идеже сам Христос в плоти своей. И сим возвождением ума, по желанию мысли оныя возводимыя, причащатися (сказуют) самого тела Христова верою. Их же суеумие отражая Рязанский, не чрез образную (глаголет) причащатися мысленною верою тела и крови Христовы, но идеже всеконечное жертвы сея оскудение будет. От коея веры желающь кто и крещения, но не сподобится, за всеусердное желание в крещенных вменяется. От тоя же веры всеусердно желающь причаститися тела и крове Господни, а не получив, пользы причащения не лишается.
Темже доволно есть видети из свидетельств сего показания, что во время нужды, кроме священства, всяко можно спасение верному христианину без евхаристии получить, если житие достойное покажет, о чем в последующем 6-м показании изъявится. Прочее в предъидущия о опасении верных от еретическаго причастия вступаем.
Четвертое: Святии учители церковнии, за неимение православных священников, зело опасают правоверных еретическаго причастия, аще и во всю свою жизнь лучше непричастным быти повелевают.
Вначале убо всех учитель языком Павел, апостол, пиша к коринфом, глаголет: «Яко не можете (рече) чашу Господню пити, и чашу бесовскую». Послание 1, зач. 145.
Близкий же апостольский престолонаместник святый Игнатий Богоносец, к филадельфом пиша, глаголет: «Молю вас, единыя веры, единаго учения, единыя евхаристии употребляйте: ибо едино есть тело Господа нашего Исуса Христа, едина кровь Его, за ны излиянная, един олтарь всей церкви». Бароний, лета 109-го.
От учителей же церковных блаженный Иоанн Милостивый, патриарх Александрийский, поучая пастырьски своя словесныя овцы освенятися еретическаго причастия, тако глаголаше [Минея четия, житие Иоанна Милост. глава 46]: «Яко никакоже никогдаже отнюд еретическому общению, наипаче сквернении причаститися, аще и весь ваш живот, рече блаженный, от какия нужды или напасти без причастия пребудите, не обретающе соборныя церкви. аще бо естество жены плотяны, законне притяжавше, аще же во стране некоей далече, кроме ея умедливше, оставити ю и ину пояти Богом и законы возбраняемы есмы: аще ли сие сотворим, казнени будем. тако убо в Бозе правою верою соборною церковию припрягшеся, якоже рече апостол: обручивый единому мужеви девицу чисту представити Богови. аще православную святую веру оскверним приобщением еретическим, не будем ли причастницы мучению в будущий век, ждущему еретик. общение бо глаголаше сего ради наречеся, за приобщение и причастие общающаго, имже общимся. не мозите убо, о чада, тацех молитвищих прикасатися комкания ради».
Согласно сему в книге святаго Афанасия Великаго, вопрос 111 Антиоха князя сицев [книга св. Афанасия, печ. лет. 7164, стран. 108]: «Вопрос. Аще во время праздника останется человек во стране, в нейже причащение соборныя церкве не обретается, что должно праздника ради сотворити, приобщитилися еретиком, или пребывати без причащения. Ответ. Аще ли многа и люта беда есть мужеви, еже свою жену оставити, и со иною прелюбы деяти, аще и во отхождении далече есть, то кольми паче правую веру предательствовати, за еже еретиком сприобщатися. якоже бо свою куплю продати хотящии, елико же время в таинстве укоснят, и не хотят прияти вместо царскаго воображения внешнее начертание, тако и во Христове общении подобает непщевати. еже бо рещи апостолу: яко един Господь, едина вера, и едино крещение, назнаменова известно, яко едина и сама в мире неложная есть вера, юже святая держит соборная и апостольская церковь: едино крещение очистителное и грехов измывателное. не такоже мудрствуяй, прелстися».
Подтверждает же сие, еже от еретическаго причастия отбегати, и богомудрый Захария Копестинский в книзе своей на латины, во главе 37, тако глаголя: «Под которыи то часы, то есть в недостатку православнаго иерея, и часу преследования, и в странах иноверных будущим, если бы ариане, несториане, ормяне, хапежи, гофты, яковиты, евангеликове, лютори, франгове, латынники, унеяты, апостаты, намовляли до внимания своих сокраментов, либо такожде со страхом приводили, тогда кождым способом не имеется православныи до оных наклонити, а ни оных сокрамента приимати. когда отцы святии собора Лаодикийскаго заборовняют от них приимати всякаго благословения, глаголюще: иже не надобно у еретиков благословения приимати, которыи, рече клятвами суть, а не благословением».
Свидетельствует и Катихисис великий, яко у еретиков несть истинныя тайны, идеже вопросоответствует сице [Катихисис старописмен., глава 4]: «Вопрос. Истинныя ли и правыя пресвятыя тайны Христовы суть у еретиков. Ответ. Понеже они истинныя и правыя веры Христовы не имеют, то како пречистыя и святыя тайны Христовы у них быти могут. [Ниже, во ответе:] Поистинне (у еретиков) ничто несть истинно. но все убо, еже еретики творят, от смышления своего. како могут совершати действа Божия на игралищах своих; аще и Христа проповедают, и веру свою похваляют, но вся сия льстиво и лживо творят. аще и церкви, и клирики церковныя, и писания божественная почитают, и мнятся еже тем же крещением крещатися, такоже и тайны божественныя, еже есть пречистое тело и честную кровь Христову имети, вся же сия не тако имеют, но инако и нечестиво. [Ниже:] Сего ради разумевати имамы, яко еретическая писания и празднества, и службы, и тайны, и проповеди не суть правы».
Гряди убо, от самех историй действительное освенение святых правоверных явственно покажем. Святый Василий Великий к папе в Рим писа о арианских правоверным истеснении тако [Бароний, лето Господне 371]: «Отъидоша от нас веселия праздников наших. домы молитвенныя заключены, олтари духовныя службы не имеют, христиане не собираются, учителей не стало. [И ниже:] Кто даст главе моей воду, и источник слез веждома моима; простых (ариане, рече) прельщают, крещение имеют, немощных посещают, печалных утешают, оскудевшым воспомогают, тайны раздают, и народ простый привлекают».
Но и во время единоволных еретиков таковое же озлобление правоверным творяшеся, и принуждахуся мнози ко общению еретическаго причастия, от них же единаго Максима Исповедника ревность воспомянем. Егда бо сей ко общению принуждаем бе, Епифаний патрикий глагола к нему: «Да сокрушит убо сердце твое Господь, яко да приобщишися нам, и причастимся вкупе с тобою пречистых и животворящих таин тела и крове Христовы. Отвеща преподобный: Аще и вся вселенная начнет с патриархом причащатися, аз не имам причаститися с ним. вем бо Духа Святаго, чрез апостола Павла, и ангелов анафеме предающа, аще бы инако благовестили, новое что вносяще». Зри в житии Максима Исповедника, генваря 21.
Преподобномученица Мария Голендуха прииде во Иеросалим, и поклоньшися святым местам, прииде в монастырь некий, идеже злочестиваго Севира ересь живяше. Испросивши от Бога открыти ей, аще подобно есть приити к причащению их. И виде ангела, держаща два потира: един полн тмы, другий же света, являя ей, яко света полный соборныя святыя церкве есть. Зри в Прологе, июля 12.
Пятое: Мнози таковии обретошася, за неприятие еретических таин страждуще, блаженно жизнь свою скончаша.
Пишет в Минеи четии августа 25, и июня 22, о гонении арианстем на правоверныя. Многи от слабых христиан ко арианству тогда приступаху. елицы же тверди, тех (мужей и жен) мукам предаяху: женам сосца ковчегами оттерзаху, иным ножами отрезоваху, силою арианское причастие во уста вливаху, не хотящим же причастником быти носы и уши отрезоваху: в коей злобе наипаче Македоний успе. Которая ересь не токмо на востоце, но и на западе возмогаше. Мнози от христиан от общения их бегаху, мнози во изгнании отсланы быша. Пространнее же во историях о сем повествуется.
Пишет убо Бароний [лето Господне 355]: «Африка великая часть света, имяше двести пять престолов епископских, но от обладания арианскаго сниде на четыре престола. и двадесять пять лет великий Карфаген град без епископа бяше, и правовернии ни мало не приступиша ко арианскому общению». И паки той же в лете 483 пишет: «Во Африце Гунерик зело озлобив православных: во первых, всех из санов низложити и из чина воинска повеле, аще бы арианами быти не восхотели. мнози от православных и саны и воинство повергоша, ихже он имения взяв, посла самих в Сардинию и Сицилию, епископов иереев и диаконов 4966 в пуста места изгна. мнози ити принуждени». До зде Бароний.
Что виновное бысть сих толикаго озлобления? Не ино что токмо, яко общения их прияти не хотеша.
Ерминигилд, царевич Готфский, такоже от своего отца Ливигилда, царя Готфьскаго, за неприятие арианскаго причастия пострада до смерти, о чем в Минеи четии ноября 1-го повествуется сице: «Ливигилд царь, призвав некоего епископа от своего зловерия, посла его нощию к сыну своего в темницу, да от руку епископа того Ерминигилд приимет арианское их сквернодейственное причастие. [Ниже:] Святый же страстотерпец, арианскаго епископа всячески возгнушався, и зловерие его добре обличив, отгна и от себе, не прием сквернаго их причащения. [Ниже:] Арианский же епископ, посрамлен к царю возвратився, сказа ему вся, яже от сына его слыша. тогда царь исполнися неизреченныя ярости, и зубы поскрежетав, абие нарочитыя от боляр своих мужи посла, повелевая им Ерминигилда, сына своего, убити в темнице. тии же шедше, секирою отсекоша ему честную главу». Зри ноября 1-го в Минеи киевопечатной.
От сих всех предложенных во двою показаниях ясно ти предложихом, яко еретическая многия от лет апостольских сонмы воставаху: и святая церковь, сиречь истинно вернии во Христа, весма охраняхуся тех, не точию пастыри, но и мужи и жены, и дети малии, не токмо таинств причастия их, но простаго обхождения: и изволяху раны, темницы, гонения, смерти претерпети, нежели с ними во обществе явитися. И святии архипастыри о удалении сем словесныя овцы поучаху, наказываху никако приобщитися еретическим действам, кое еретическаго действа качество ангелом Господним преподобномученице Марии показано бысть. Отнюду же христолюбивии людие, иногда видевше пастырей малороссийских, к римскому костелу приступивших, мнози боящеся их действ, младенцы без крещения, болнии без причащения, а умершии без погребения были. Кую их благоверия любовь писатель книги О вере между похвалными речьми положи [книга О вере московск. печ., глава 23].
Сице убо и зде, в велицей России, по исполнении 1666-го году случися, первое от Никона патриарха, и по нем от других архиереов и от гражданских судей. Егда отеческих велений отступивше, и своя новопредания учиниша, тогда начаша многия нужды и приневоления творити соблюдающим древняя предания по всем градом даже и до ныне, того ради, дабы с ними общение имели. И себе паче, нежели похвалной правде веровати повелевают. А кто их новопредания не приемлет, и с ними не причащается, таковых они начаша проклятию предавати, и потом гонити и мучити различно: овых начаша падогами и кнутом бити, иных же в струбах сожгоша, иным главы отсекоша, а иным ноздри вырвавши, в катаржная мучения посылати, и всякими приказными истязании утесняти: оковы, юзы, темницы, оклеветания и озлобления предлагати. У иных же начаша домы разоряти, и имение их отнимати, и прочая безчисленная томления и муки вымышленныя творити, кая подробну описать невозможно. Темже мнози от христиан духовнаго и мирскаго чина, убоявшеся того лукаваго пронырства и мучителнообразнаго нрава, и желающе причастниками их быти, оставя отечество и домы, бегству себе предаша по различным местом для сохранения православныя веры, да купно со древним благочестием и живот свой соблюдут, помняще Господа глаголюща: Блажени изнани правды ради, яко тех есть царство небесное. А инии на муки вдашася, не общающеся с ними, бояхуся бо ся за приобщение да не с ними осуждени будут, и слышаще Господа глаголюща: Не убоитеся от убивающих тело, души же не могущих убити. Друзии же, убоявшеся мук, приступиша ко обществу их. А инии за соблюдение благочестия положенный платеж двойнаго оброка соизволиша прияти, по свидетельству О вере списателя: «Веруемо, яко они в той незгоде веселятся, чтобы надолго имения имати, и нам вред и печаль и убожество. и отнюд уже последнюю ризу совлачат с нас. даем в правде еже даем, но с песнию, оставяляемся ныне единым телом и душею правоверною». Книга О вере, глава 25, о унеи.
Шестое: Но и во время мира церковнаго, во время православнаго священства, пребывающии в глубочайших пустынях, кроме причастия, чрез достойное житие, за желание усердное, спасение себе получиша.
Но прежде нежели внидем в показание, постоим на празе разсуждения о сей священнейшей тайне, ибо оныя есть сугубое причащение: по тайному образу и детелному. Якоже сам Христос Господь евангелием своим глаголет: «Ядый Мою плоть, и пия Мою кровь, во Мне пребывает, и Аз в нем». На кая Христовы словеса святый Феофилакт, толкуя, глаголет: «И ты можеши не токмо по тайному причащению ясти и пити плоть и кровь Владычню, но по иному образу. ибо плоть яст кто, егда по детели проходит действенное. нужна бо делателна плоть, якоже и детель есть трудна. кровь же пиет, яко вино, веселящее сердце. виденне глаголю, яко безтрудно виденное, паче же труду покой. зане питие без труда паче, нежели брашно». До зде Феофилакт.
Но противу сему у вас есть слово: то де Феофилакт о детели труднаго жития, и мыслей боговиденных, а не о наполнении устнаго ядения святыя евхаристии глаголет. На кое отвещаем: Яко человек сугуб есть, из духа и плоти сложен, тем и сугубаго причастия требует, проходя детели добрыя по житию, сподобляется причастник быти самого Христа, по оному: побеждающему дам ясти от древа животнаго.
Что же есть древо животное. Андрей Кесарийский глаголет [Апокалипис, глава 2, зач. 3]: «Древо жизни есть сам Христос не по телеси, но по души вмещению Христа, откуду и умное и виденное случается, еже всем хранящым заповеди Божия бывает».
Ядый же и пия, инако живущь и беззаконно, несогласно внутреннему яст, тем и в суд себе яст и пиет [к коринф., зач. 149]. Плоть бо и кровь Христова ползует, но точию по Христе живущих: инако же живущих не вемы како ползовати имать.
Но сие убо разсуждение святых толковников о сугубейшем причащении, аще во время бытия онаго при правоверном священстве ключимствоваше, кольми паче не есть потребнейшо во время нужд, и во время самое, неимение онаго.
Прочее же сему согласное и во иных святых толковниках и учителей церковных усмотрим.
Святый Никита Ираклийский в толковании на словеса святаго Григория Богослова тако глаголет: «Сице кождо нас в дому некоем особочинием, еже по добродетели прикладствующе ему устроения, закалает Агнец, и причащается Тоговы плоти, и насыщается Исусом». Соборник, лист 687.
Святый Златоуст в толковании на послание ко евреом, зач. 324, глаголет: «К кому (рече) приходим; аще кто свят верою, духовною службою, со истинным сердцем, во извещении веры: сиречь, понеже ничтоже есть видимое, ниже священник, ниже жертва, ниже олтарь зрится». Беседы апостольския, лист 2959.
Но о сем убо еже умном и устном причащении довлеет свидетельств на изъявление: зде же в самое показание святых, в пустыни живущих, внидем. Понеже овии из них при конце сподобишася святаго причащения, овии же при самем скончании причастни того быша, но обаче чрез доброе их житие тоя благодати не лишени быша.
Такова бяше преподобная Мария Египетская, 47 лет в пустыни живущи, и святых таин усты не причащающеся, и Христа внутрь себе имяше [апреля, 1]. Такова преподобная Феоктиста, 30 лет во острове живущи, и устами не причащающися, обаче благодать Божию присно в себе имяше [ноября, 9]. Сице преподобный Марко Фряческий [апреля, 15] и Петр Афонский [июня, 12]: ов 95 лет, ов же 53 лета, в пустыни живша, человека не видевша, и евхаристии не имуща, обаче чрез высокое жития святаго сосуди вожделении Богу паче всего мира явишася. Тако некая святая жена, 60 лет в пустыни человека не видев, скончася [Пролог, ноября, 1]. Сице же другая старица в пустыни в яслех скончася [октября, 30]. Таков бе епископ оный, иже 39 лет человека не видев, скончася [ноября, 3]. Такова бяше старица она, 38 лет никогоже видевши, яже при кончине ея два старца обретоста уже кончащуся [Патерик скитский]. Таков бе и оный пустынник, его же видев Августин святый, 30 лет живша на острове единаго: его же святость удиви епископа и сущих с ним [Житие блаж. Августина].
Таковии быша мнози святии пустынницы, далече от вселенныя живуще, церкви и священников не имуще, устнами святых таин причаститися не имяху, обаче верою и желанием, и житием добродетельным присно оных благодать в себе имяху. О них же святый Ефрем в слове 111-м глаголет: «Совершени суть и исполнены правды, зане суть уди церковнии. не разлучают себе от стада, зане чада суть святаго просвещения. не закон разоряют, не приемлюще священничество держати. заповеди хранят, не противятся закону, тепли суще верою. егда же предстанут честнии священницы святей трапезе службу принести, тии первее простирают руки своя, приемлюще с верою тело Тогоже Владыки, воистинну иже присно с ними сущаго. [Ниже:] Церкви имут языки своя, имиже совершают молитвы своя прилежныя. [Ниже:] Славу юже поют в горах же и вертепох, жертва благоприятна приносится Богови. сами суть священницы себе, исцеляют наши недуги молитвами своими». Ефрем Сирин, слово 111.
О таковех пустынножителех и святый Афанасий Великий, во ответех ко Антиоху князю, в толковании притчей глаголет [Скрижаль, в толк. притчей, лист 14]: «Вопрос 24. Котории суть истиннии поклонницы, ниже в горе оной, ниже во Иеросалиме, но духом и истинною поклоняются Богу. Ответ. Сии суть, иже в пустынях и горах, и в вертьпех, и в разселинах земли живуще: иже, кроме собрания церковнаго, делы благими божественным Духом просвещаеми, духом и истинною поклоняются Богу и Отцу нашему, иже есть на небесех, непорочно живуще и Богу благочестно мудрено служаще, во всяком благочестии и чистоте добродетелей сияюще. и не требуют церкви, или места, но сами себе храмы творяще благими деланьми, на всяком месте и везде благоугождают Богу, непрестанно и чисте Ему служаще вся дни живота своего».
И в книзе святаго Анастасия Синайскаго, и в книзе Патерице Иеросалимстем, обретается о сем отвещание сицевое [Анастасий, глава 2, Патерик, слово 17]: «Вопрос. Кто суть истиннии поклонницы, иже ниже в горе, ниже во Иеросалимех поклонятся Богу и Отцу; идеже во Иеросалимех не поклонятся, благоразумно, яко ни во ином месте на земли: ничтоже бо Иеросалима зде честнейши. Ответ. Страшно убо воистинну, и дивна слышания вопрошание. и сего ради ответа и разрешения явленнейше не ведый, зане не всем вмещати божественнейших таин слышания. обаче от показания некоего священна муж священных, ихже ныне в плоти сущих, яко явленно реченное сотворим. Шед некий от здешних мужу отшелнику молчальствующу, и рече ему: дивлюся, отче, како сице терпиши отлучен быти от святыя церкве, и от тоя причащении, и святых собраний. К сему отвеща человек Божий, и рече: вся собрания и службы, и праздницы, и причащения, и жертвы, о человече, сего ради быша, яко да очистится человек от грех своих, и вселится Бог вонь, по иже от Христа реченному: яко приидем Аз и Отец Мой, и обитель в нем сотворим, и вселюся в них и похожду. егда убо человек храм одушевлен и богоздан будет Божий, и Отец и Сын и Святый Дух живет и ходит, отстоит душа богоносивая от всякия любве церквей зданных, и жертв видимых, и собор множества, и праздник человеческих. и ниже в горе сей ни в Иеросалимех желает поклонитися Богу: внутрь бо имать в себе Отца, внутрь же Сына Архиерея, внутрь Дух истинный огнь, внутрь жертвенник чисту совесть, внутрь очистилище грехом духовную слезу, внутрь вышний Иеросалим радостную душу. прочее яко духовен, духовными очима духовныя жертвы приносит. Дух бо есть Бог, и покланяющымся Ему в дусе и истинною достоит покланятися». До зде Патерик.
Седьмое: Не точию в новой благодати, но сообразно и в ветхом законе, за нужду лишаеми жертвоприношения, не противни быша закону.
Приснопамятнии трие отроцы в пленении халдеями в Вавилоне, кроме церкви, кроме пророков и вождов и жертв, при самей напасти, среди пещнаго разжения, тако вопиюще, к Богу глаголаху [книга пророка Даниила, глава 3, молитва триех отроков, Псалтырь, песнь 7]: «Яко Владыко умалихомся паче всех язык, и есмы смирени по всей земли днесь, грех ради наших. и несть во время се, князя ни пророка и вожда, ни всесожжения, ни жертвы, ни приношения, ни кадила, ни места, еже пожрети пред Тобою, и обрести милость. но душею сокрушенною, и духом смиренном да прияти будем. яко во всесожжениих овних и юньчих, и яко во тмах агнец тучен. тако да будет жертва наша пред Тобою днесь, и скончаем по Тебе, яко несть студа уповающым на Тя». Псалтырь, песнь 7-я.
Сии речи триех отроков богомудрый Захария Копестинский в книзе своей, во главе 37-й, протолкующий ветхозаконныя и нынешних времен нужды, случающиися в тайне евхаристии и прочих, тако глаголет: «Слушай, что в Вавилоне в пещу огненном три отроки глаголали: ни есть в той час князя, ни пророка, ни вожда, ни целопаления, ни аферы, ни приношения, ни кадила, ни места оферовати пред Тобою, и найти милосердие: але душею сокрушенною, и духом смиренном да прияти будем. як видили б себе на той час и пророка и место имети, и ради бы Богу оферовати. але где ся не могло стати, душу сокрушенную, и на милость Божию надеющеся, и дух упокоренны и жалобны оферовали, верующи же тем способом, за не преднейшую оферу от Бога имели быти приняты. такоже и правоверныи, в час (недостатака таин или во время притеснения от противоверных) разумеют о своем принятии у Бога: пророка, то есть иерея: место, то есть церкви: оферы, то есть таин пресвятых: где не есть, яко и те трие отроцы душу сокрушенную, дух упокоренный Богу оферовати». До зде Захария.
На оная же словеса толкует святый Златоуст сице [Псал. толк., песнь 7]: «Сущее. Но душею сокрушенною. Толкование. Еже и Варух глаголет: дух в теснотах, и душею дряхлою возопи к Тебе самое величество бед, вместо моления предлагаем, сице да прияти будем, сице да услышимся. [И паки:] Но вместо глаголют благочиния, еже в храме, приими наше во смирении моление, равно могущее приношению, еже безсловесными, положи в наших телесех всесожжение».
Согласно сему на оная же словеса триех отроков святый Афанасий толкует: «Богу (рече) паче агнец и юнец вера действует. смирение и благочестие паче тех может и вменяется».
Преподобный же Нил Черногорец тако глаголет: «Которыми болезньми и труды мытарь спасеся; не простыми ли глаголы смирения. но якоже в ветхом законе, душею сокрушенною, смирение и благочестие паче агнец и юнец вменяшеся».
И во Псалтыри толковой на псалом 4 сицевое толкование, согласное вышепредложенным, обретается: «Сущее. Пожрите жертву правде и уповайте на Господа. Вопрос. Что есть пожрите жертву правде и уповайте на Господа. Ответ. Правду, рече, творите, правду приношайте, си есть велий дар Богу. таковая жертва есть приятна, таковое приношение многоугодно есть Богу. ни овча заклати ни телца, но праведныя дела творити. видиши ли церковный чин, како изначала древле провозвещен есть. и вместо чувственныя жертвы, оное умное искати. правду же зде глаголет, якоже рех, не отчасти добродетели, рече, но всяку правду. якоже и праведнаго человека глаголем, имеющаго всяку правду, а не иногда неправду. таковая бо жертва ни цену требует, ни заклания, ни жертовник, ни огнь, ни дым расходится ни сквара, но лежит изволение приносящаго и. сей бо жертве ни нищета не возбраняет, ни убожество отгоняет, ни место, ни человек, не ино ничтоже. но идеже аще обращаешися, можеши жертву сию приношати присно, сам быти священник, (виждь зде о жертве умной, которую везде приносити можеши) и жертовник, и олтарь, и нож, и овча, и огнь. тако умная и духовная жертва удобно приношение имать, ни единаго от внешних не требует орудия». До зде от Псалтыри толковой.
Осмое: О которых учителей церковных речена быша жертвоприношению до скончания века, от тех предрекошася и запустению конечне быти тому от антихристовых служителей.
Понеже убо засвидетельствовахом (якоже выше глаголавше) в девятом ответе, что многая, якоже в ветхом законе, тако и в новой благодати, изрекошася до скончания века быти: обаче, по недоведомым судьбам Божиим, за преступление закона до конца не пребыша, но разоришася, и в небытие превращена быша, о чем и впреди сего ответа надпомянуся.
Воньмем же зде реченному от Стефана Зизания в толковании словес Кирила Иеросалимскаго, идеже он сице засвидетельствует: «Се есть жертва, которую церковь христианская, от язык избранная, приносит во всем мире Господу Богу, и до скончания века приносити имать тело и кровь Господа Бога и Спаса нашего Исуса Христа, в память смерти Его».
Но обратим свои очи, о вопросителю, по сему пророчеству на весь мир, где можем мы с православными действители обрести сего истиннаго жертвоприношения. В западных ли странах? Но уже Рим со всеми западными странами, по свидетельству О вере списателя и того же Стефана Зизания, отпаде совершенно святыя и православныя веры. В восточных ли странах взыщем православнаго жертвоприношения? Но и тамо, за обладанием турков, и за привнесение многих новшеств, противных древнему благочестию, не обрящется. Но едва ли где и тех сих есть окалянных нечестием жертвенников взыскать возможно, ибо и самая небесоподобная Софийская в Царе граде в турецкой мечеть претворена. В России ли и по прочим странам благочестивая жертва взыщется? Но можно вам и самем подлинно ведать, что едино во всех странах согласие ко опровержению древности утверждается. В вас ли оное указатися? Но яко же вам, не имеющим православнаго епископа, убо без онаго и православнаго жертвенника (якоже в вышнем 2-м показании засвидетельствовахом) вам имети невозможно, без онаго же и жертвоприношению быти неудобно, убо и в вас сего обрести всякая надежда отпадает. И имеете вы иереов, но от тояже, новинами изобильствующей, великороссийской церкви: но и тех бежавших (в правду рещи) не ради благочестия, но причин неких ради, и приобретения наивящьшаго от вас видимых вещей, и неправилне от вас приемлемых, о чем много рещи имамы в последующих ответех. Убо аще и всячески православнаго священства, и от того действуемы жертвы поискати возжелаем, но обрести не имамы. Темже и остается того же Стефана Зизания проречение, ныне действително исполняемо о антихристовом в мире пришествии, и от него и его слуг истреблении православных жертвенников. О чем он, богомудрый учитель, в толковании Кирилова 15-го слова, в знамении 6-и, сице пишет: «Яко антихрист прежде пришествия своего учинит, яже везде жертвенники и истинную жертву истребит, и кумир свой на святом месте поставит. уже бо сицевое мерзостное запустение посланнии от него лжепророцы начинают». От сего убо Стефанова протолкования ясно познавается, яко не до конца века жертвенники, и истинная жертва на них приноситися будет, но еще до пришествия антихристова от посланных его лжепророков истребится. Темже летьствует не нареченное во время цветущаго священьства взирати, но на исполнение и сбытие вещей. Ибо когда сей учитель до конца века быти евхаристии писал, тогда не везде православное священство с жертвенниками истреблены быша. Но аще и не везде, обаче православие со оными сияше. Что бы он рек ныне, егда видел нынешнее наше бедное состояние? Не совершенное ли бы запустение тех вещей проповедал, якоже ниже о сем предзнаменовал, глаголя [знамение 6]: «Тако будет в запустении нынешняя святая жертва, иже не во храме Соломони, но яже по всему миру уставлена есть». До зде Зизаний.
Суть же и инии мнози пред пришествием Христовым, во время антихристовых времен, прорицающии скончанию как священству, так и жертвоприношению. От них же един есть неложный и знаменитый пророк Даниил, во главе 12 предсказует о сем, глаголя: «Яко во время и во времене, и в пол времене, и егда скончается разсыпание руки людей освященных, и уведят се вси». Даниил, глава 12.
Даниилов же протолкователь, священный Ипполит папа Римский, сказуя о взятии (или запустении жертвы), тако глаголет [Соборник, слово в неделю мясопустную]: «Якоже бо о сем (рече) Даниил провещав, глаголет бо: завет завещаю седмицы единыя, и в пол седмицы возмется Моя жертва и жрения. едину убо седмицу седмих лет назнаменует, тако бо напоследок будет». Он же (си есть Ипполит святый) о скорби тогдашних времен святыя церкви жалостне, предвещая, глаголет: «Восплачутся (тогда) церкви Божия плачем велиим, зане ни приношения, ниже кадило совершается, ниже служба богоугодная. священныя бо церкви яко овощное хранилище будут, и честное тело и кровь Христова во днех онех не имать явитися. служба угаснет».
Подобне Сирский глас плачевне возглашает, глаголя [Ефрем, слово 105]: «Восплачутся тогда церкви Христовы вся плачем великим, зане не будет службы святыя во олтарех, ни приношения».
Сице согласно и творец душезрителнаго Зерцала о том пишет [Зерцало душезрит., слово 4]: «Восплачетжеся (тогда) плачем великим и церкви всяка, занеже ни приношение, ни службы отнюд, ни кадило освящения в тех бо не будет, псалмы пения престанут, и всяка служба».
До зде словеса святых, прорицающия о запустении от антихристовых слуг святыя жертвы.
Темже в предложенных во всех сих показаниях явихом, яко причащающиися устроение есть трегубо: овии усты и сердцем, овии же единем сердцем, а овии точию единеми усты причащаются. Тако засвидетельствовахом, яко без правилнаго священьства святая евхаристия не может действоватися. Тако показахом, яко за обстояние еретик, или за гонителную тесноту, или за кую любо благословную вину, не сподобльшиися святыя евхаристии причастни быти, не лишаются за свое усердие Божия благостыни.
Сице святии учители поучают, яко в неимении православных священников не леть есть к еретичествующим для евхаристии приступати, хоша и весь век случится в том скончати. Сице представихом, яко самем делом святии страждуще за неприятие еретическаго причастия, блаженно жизнь свою сканчаша.
Сице божественное писание поучает, и чрез добродетельное житие духовно причащатися. Сице ревнующе богоноснии отцы, в пустынях живущии, тако причащахуся. Сице и ветхозаконное писание тому согласно утверждает. Тако убо якоже от святых учителей предсказашася до скончания века быти жертвоприношению, сице от тех же и запустению оной от слуг антихристовых предрекошася. Тако и многим обетованиям, бывшим до скончания века, якоже в ветхом законе, сице и в новой благодати, за не пребытие же в законной истинне последующих, реченное упразднително показася. Верно есть слово сие, и всякому приятию достойно. Апостол, зач. 280.

Вопрос, 13.
Имеете ли Богом узаконенное по чину Мелхиседекову священство?

Ответ, 13.
Богомудрый учитель и толковщик словес святаго Кирила Иеросалимскаго Стефан Зизаний временное Аароново, вечно же по чину Мельхиседекову священьство сие быти протолкует [Кирилова, лист 77]: «Престало тогда архиерейство Аароново, яко временное, востало же Христово вечное. иже из мертвых востав, апостолов своих на се освяти хиротониею, еже есть руковозложением. и воздвиг руце свои, и благослови их, и вознесеся на небо. а апостоли паки епископов освятиша, якоже пишет. тогда постившеся и помолившеся, и возложше руки ня, и отпустиша их проповедати слово Божие. а епископи паки попов, якоже пишет, освящьше же им попы на вся церкви помолившеся, с постом предаша их Господеви». До зде Зизаний.
Согласно же сему о вечнующем по образу Мелхиседекову Христове священьстве творец книги О вере засвидетельствует, глаголя: «Не восхоте (Господь) достояние свое оставити на земли не устроено отходя на небеса, но изем два сребреника, даде гостинником, се есть, старый и новый завет. комуже дал; кто гостинницы; апостоли, и по них восприемницы их, пастырие и учителие, архиепископи и епископи, иже служителие суть величеству смотрения Его, имже и спребывати даже до скончания века обетование сотвори. и по своему неложному обетованию благодатне избирает себе людей достойных, и поставляет и освящает рукоположением чина духовнаго чрез патриархи, архиепископы и епископы». Книга О вере, глава 7.
Таковаго христопреданнаго по чину Мелхиседекову священства, си есть в преосвященнем святительском чине, где ныне за обстоятельством всюду еретик возможно обрести? никакоже никако. Но указуется ли от вас на видимых великороссийских архипастырей, отнюду же и ваши безглавствующии иереи влекутся. Но якоже тии, тако и ваше иерейство, таковому священству, священно чрез благодатное освящение освящяемому, отнюд непричастно за неприсещение всеблагодатных луч от Святаго Духа, ради еретических вин и действ (о них же в последующих ответех изъявится), во освящении своем лишаемых. Ибо священство, по церковному гласу, сими треми состоит: «Веществом, то есть возложением рук епископских. Видотворением, сиречь глаголы оными, их же святитель над рукополагаемыми в молитве глаголет. Совершителною силою Святаго Духа, ея же ради действо хиротонии исполняется, и рукоположенный во своем чине и сане устрояется, да будет своим служением благоугоден Богу и церкви». Катихисис Болшей, глава 63, О священстве.
Темже архиереи еретичествующии, безблагодатно действующии в своем рукоположении, явственне лишаются в своем священстве освящающаго оное Святаго Духа, убо и священством оное нарещи не леть есть. Якоже и апостольское 68 поучает правило: «От тех бо, рече, крещени не крещени, и поставлени не причетницы». Сице и Матфей правилописец на оное же апостольское правило глаголет: «Отметаем бо таковых, якоже крещение, сице и хиротонию. небо освящение се, но скверну веруем исходатайствовати». Состав x, глава 14.
Убо ваши иереи и паче сего в раздаянии прочим благодатнаго дара не причастнии суть, яко не получившии воздаятельныя благодати в своем рукоположении, ниже силу рукоположения носящии суть, убо и священства имяни всяко лишаются. Лишаются же того силы и имяни, втуне и приемлют оное, восхищающе недарованная, по апостольскому правилу, с самем Христом борутся [правило 2, всех апостол].
Мы же аще и вступаем по нужде в нужныя тайны, но в позволенныя самем Христом Спасителем Богом, и святыми апостолы, и святыми отцы, по нужде действованныя, и чествуем образ богопреданнаго священства, в запрещенная же входити трепещем. Аще же чего в получении обрящемся не причастни, тое желанием нашея наполняем веры, о чем в прешедших ответех в 10-м и 12 засвидетельствовахом. Такожде и о реченном обетовании до скончания века как священству, так и святой евхаристии, в 9-м и 12 показахом, зде же таяжде да не повторим.

Вопрос, 14.
И до скончания ли оное века имать пребывати?

Ответ, 14.
Благоключимствует убо всяко вопрошати по чину, а не без чина и о едином многажды. Ибо в первых вопрошаеши о тайнах, до скончания ли века будут совершатися. Но в святей церкви таин седмь есть, в которых числится и священьства Христова тайна. Действители же совершеннии всех таин суть епископи, о них же в 9-м и 12 ответех засвидетельствовахом. Убо лепо бы вам в начале вопрошати, будут ли до скончания века епископи, понеже от них священство зависит, якоже в прешедшем ответе указахом. Но того и у вас отнюд не обретается. И полагаете свое основание на внешнем священстве, отвлачаете бо от того гнилыя члены. Понеже, по толкованию 55-го апостольскаго правила, епископи по образу суще Господа нашего Исуса Христа, и глава церковнаго телеси именуются, презвитери же и диакони по образу суще рук.
Темже не точию правоверныя, оживляющия главы прочия члена не имеете вы во своем иерействе, но и внешния и неосвященныя, но и от тоя похищением, кроме правилнаго указания, оныя члены для вашего исполнения своевольства привлачаете. Оле сего чуднаго священства, от лет Христова вознесения даже и доселе (кроме противников Христовых) небывалаго. Тое ли вы, проповедуемое вами, священство можете вечным Христовым нарещи и определить? Темже устыдитеся, сущии противницы Христова узаконения в священстве. Понеже Христос Спаситель наш совершенному тричисленному священству определи быти до конца века, о чем в 9-м ответе предложихом. Но до конца веку тому быть, или указать в коем месте, не точию мы, но и ваши соклеврети не возмогоша. Понеже вопроси их Нижегородский Питирим о бытии вечном православных епископов, они же по вопросу отвеща: «Аще (реша) и усердно желаем тем до скончания века быти, мы пророческаго дара не имамы рещи, а и от божественнаго писания вечность их определить недоумеем для того, что многия вещи сказаны быти до века, но Божиими судбами в небытие приидоша. В Паралипомене, во главе 15, Духом Святым царьственный Давыд рече о левитах: Ихже глаголаше, избра Господь к ношению киота Его, и к служению себе даже во веки. Обаче леввитская служба упразднися. И паки в Кормчей, в завещании царя Константина Великаго писано, яко в Риме пребывати православным папам до скончания века. Обаче же, по объявлению восточных патриархов, папы Римстии новодогматствования ради отпадоша от православия, и за сие извержени и прокляти». И еще во ином ответе глаголют: «В Исходе, во главе 12, сам Господь заповеда пасху законную жрети сыном израилевым до века. Но сия пасха преста. В Паралипомене, во главе 7, Господь о церкви Соломонове рече: Яко избрах и освятих дом сей, да будет имя Мое ту во веки. Но церковь Соломоня разорися весма, и преста славитися имя Божие в ней. Златоуст святый, на деяние в нравоучении 18, понуждал в селах церкви созидать и сказоваше, яко в тех церквах до пришествия Христова мзду имети будут. Но оныя церкви не пребыша в службе Божией, но от язык разоришася».
Суть и ины доводы имеем, кои предречены быша на толико им быти, но недоведомыми судьбами Божиими инако быти им случися. О чем и Кирил Святый в книзе своей о продолжении и сокращении вещей Божиим судбам оставляет: их же ради якоже хощет, сокращает за грехи, а за добрая дела продолжает. Но яко к сокращению ведем ответы своя, много о том любопытствовать оставляем. Прочее же удовольствоватися желаяй вящшими, да прочтет прешедшия ответы.
Темже аще и самыя вашея поповщины соклевретство, ищуше с великим восторгом священства, бытие онаго доколе определить не могоша: последовательне же и безкровной жертве Христове, от священства приносимой, до скончания века суще приноситися и нам определить невозможно. Ибо истинному священству оскудевшу, нужно есть весма и жертве сей истинной оскудети.

Вопрос, 15.
Но аще оное в вас не обретается, то когда пресечеся, и колико лет вы тако пребываете?

Ответ, 15.
Истиннаго Христова православнаго, по образу Святыя Троицы, священства ни в вас, ни в нас, ни во иных киих нами ныне не видится. Аще вы и имеете иерейство, но оное точию презорством служить имать Христову священству. Ибо блаженный Феофилакт, в 95-м зачале от Луки, на Христову притчу о священстве тричинном толкуя, еже мы оное по чину разделяем, сице: «Ибо (рече) в церкви чин совершение имать, предстоящих украшение. и ни болше лепо быти, ни мнее. еже слова благодатию трие сии образи в церкви:
Очищение;
Просвещение;
и Совершение.
Трие сия действа наследуема чинов. диакони очищают оглашением учения: презвитери просвещают крещением: архиереи же священныя чины поставляют, еже есть рукоположение. Видиши ли чины к действом, ни вящше, ни мнее реку предстоящих». До зде Феофилакт.
Зри зде внятно, вопросителю, яко священства Христова служение во триех чинех самем Богом предано: и несть мощно к сему уставлению ни прибавити ни уменьшити, еже Бога Слова положено благодатию. Трие бо сия чинове Троицы образ носят, якоже священноцерковных чинов изъяснители Дионисий Ареопагит [книга 3, слово 5] и Симеон Фессалонитский [глава 156] засвидетельствуют. И коемуждо положено свое делание ведать, якоже правило 1-е всех святых апостол повелевает: «Кождо в данном ему чину да пребывает. и не преступай заповедей, не суть наша, но Божия». Кормчая печатная, лист 37.
Сие же богопреданное чиноположение не мы, при крайних пребывающии нуждах и во время нуждное, повеленных действах преступаем, яко, ужасающеся клятв и запрещений церковных, к новолюбному не приступати священству: но ваше согласие, дерзнувши яко царское печатление сокрушити, вступающе в действо чина архиерейска, хиротонии внешних попов благодатными сказующе творити, и священнослужительми попы попов устрояюще. Прочее же удовлеваем ваше вопрошание о пребытии священства до скончания века прешедшими ответами. Когдаже, вопрошаеши, оное пресечеся? Того мы проуведительнаго смотрения, чтоб во всех местах всея вселенныя оному пресещися, рещи недоумеем. Якоже и напоенный от Духа Святаго прорицателною благодатию, славный Илия пророк не мог уведети седми тысящ, не поклонившихся скверному богу Ваалу. Сице и мы единых себя ведцов о сем отнюд в числе не полагаем, держащеся онаго премудраго гласа [Сирах, глва 3]: «Вышши себе не ищи, и крепльша себе не испытуй».
О падении же Римския церкве, такожде последственно, и древлегреческия церкве держащихся, и в тыя же новины уклонившихся, творец книги О вере во главе 30-й засвидетельствует. И если волишь, до досмотри ответов Выгорецких: ответ 49 и 50-й, и тамо время и новины, внесшияся в церковь великороссийскую, доволно увидиши. С новинами же убо последствует тамо и пресечению священства. Но о сем во своем месте засвидетельствуется.

Вопрос, 16.
Аще кто предание писанное во святем евангелии или неписанное начнет превращати или истощевати, то за сие что быти сказуете?

Ответ, 16.
Вемы сия вемы, яко развращаяй во святем евангелии Христа Бога нашего предание ни что иное получит, точию с отлучением от церкве проклятие, якоже во евангелии православия, в неделю 1-ю святаго и великаго поста, извествуется. Но внидем в разсмотрение, кто из нас обрящется превращаяй евангельския Христа Бога нашего пределы. Понеже, якоже в вышшем ответе показахом, Христос Спаситель священство определи в триех чинех, якоже Его спасительных словес священный толковщик Феофилакт указует, в вас же сего священства отнюд не обретается. Но разрушаете оное богопреданное священство, по образу Святыя Троицы устроенное, вашим безглавным и внешним иерейством, кое Христос вам не предаде, убо точно может развращение Христова евангелия на вас указатися. Мы же аще и не получаем за обстоянием еретик онаго, но верою нашею то навершаем. Якоже сосуд избранный о умном уповании в послании к римляном, в зачале 98-м сице извествует. «Вемы бо яко вся тварь с нами совоздыхает и сболезнует, даже доныне. не точию же, но и сами начаток Духа имуще, и мы сами себе воздыхаем, всыновления чающе избавления телу нашему. упованием спасохомся. упование же видимо, несть упование. еже варит кто, что и уповает; аще ли егоже не видим надеемся, терпением ждем. сице и Дух споспешествует нам в немощех наших. что бо помолимся, якоже подобает; не вемы. но сам Дух ходатайствует о нас воздыхании неизглаголанными. испытаяй сердца весть, что есть мудрование Духа, яко по Бозе молитися по святых». К римляном, зач. 98.

Вопрос, 17.
Аще вы священства не имеете, то како седмь таин по чину святыя соборныя и апостольския церкви употребляете? известите нам и о сем, ничтоже скрывающе.

Ответ, 17.
Святая православная церковь своими учителями употребляет седмь таин [Катихис. бол. и мал. о седми тайнах, Симеон Сел. гл. 77]: овыя благочестивыми архиереями, другая же рукоположенными от них священниками, в силе и повелении архиерея православнаго, содействующей благодати от того рукоположения, по писанному [Потреб. вел. лист 714 на обор., Гавриил Филаделф.]: «Действует рукоположения благодать за приходящих спасение». Суть же иныя из оных таин зело нужныя, без них же невозможно человеку получити спасение, в неприсутствие священных лиц повелевается действовати и простому, еже есть нерукоположенному, по свидетельству святыя церкви: «Яко ни един неруковозложенный и ни таин строителем быти не может, разве некоторых нужных случаев таин». Катихисис малый, лист 35. Нужных же случаев тайны не иныя кия определяются быти, разве точию две есте: крещение и покаяние. О чем Гавриил, архиепископ Филадельфийский, в книзе О седми тайнах извествует, такоже и в Жезле, на листу 49, показуется. Темже мы в нужное сие время, за обстояние еретическое, аще и не можем все употреблять тайны, но веруем православныя святыя церкви положению, яко из оных суть овыя во спасение, овыя же ко спасению употребляемыя. А их же, за разсыпание руки людей освященных [Даниил гл. 2], аще и не сподобляемся, сия верою приемлем, по священному сосуда избраннаго гласу [рим., зач. 98]: «Упованием спасохомся. упование же видимо, несть упование. еже бо варит кто, что и уповает. аще ли егоже не видим надеемся, терпением ждем. сице и Дух споспешествует нам в немощех наших». К римляном, зач. 98.
Також и по триех отрок гласу: «Во время сие несть вожда ни пророка, ни жертвенника, еже пожрети пред Тобою. но душею сокрушенною, и духом смиренным да прияти будем. [Ниже:] Тако да будет жертва наша пред Тобою днесь, и сконьчаем по Тебе, яко несть студа уповающим на Тя. и ныне возследуем всем сердцем, и боимся Тебе, и ищем лица Твоего». Псалтырь, песнь 7.
Церковь же православная Катихисисом великим ответствует: «Без нихже (си есть таин) ни един спастися может, разве аще не возможет их употребляти, вожделев их». Катихисис великий, глава 83.
В дополнение же сообщаем прешедшыя ответы: 9, 10, и 12 и прочия, зде же таяжде писати долготы ради убегаем.

Вопрос, 18.
И аще возглаголете, яко за лютостию времени невозможно обрести ныне священства: но не противны ли сим будите апостольскому учению, иже утверждает, что тайна святыя евхаристии до пришествия Христова будет совершатися.

Ответ, 18.
Сосуда избраннаго от Христа от Бога, и вознесеннаго даже до третияго небесе, и тамо неизреченныя глаголы слышавшаго, божественнаго Павла апостола сия словеса: «Елижды аще ясте хлеб сей, и чашу сию пиете, смерть Господню возвещаете, дондеже приидет». К коринфом 1 послание, зач. 149.
Сия убо словеса сего небеснаго кречета всякаго вероятия суть достойна. Но о колико бы мы на сие волили, и колико в сие желали приити, не токмо видом, но поне и слухом, дабы сия жертва сущею должностию возносилася в нас, и тоею жертвою смерть Того о нас животворная историописалася. Но паче промысла Божия не можем что о себе таково сотворити. Аще бы Божий суд оставил в нас архиерейство, аки семя благодатное священства, не бы того дражайшаго воспоминания лишилися. Но зане Богу о нас тако предзревшу, кто воли Его святей противитися может; но аще и оный плачь вавилонский уже постиже нас, внегда помянути нам древния церкве возношения, обаче не отчаяваемся, ниже безчинствуем в том. Воньмем же Павловым словесем сим: «Елижды бо ясте [рече] и пиете, смерть Господню возвещаете, дондеже приидет». Зде апостол не по тебе глаголет, что тайна евхаристия до пришествия Христова будет совершатися, или ясти хлеб и пити чашу Христову, но неоскудную благодать в евхаристии той сказует быти. Елижды бо ясти и пити будем, дондеже приидет, всегда смерть Владычня тем возвещатися будет, всегда тело и кровь Владычня оно ядение и питие имать быти, но воистинну в верующих, дондеже дастся ясти и пити, аще не препнет кое любо обстояние противных. Но никтоже да в скудстве сем: есть бо и отъинуду смерть Господню историчествовати. Якоже сам апостол о себе глаголет: «Аз бо язвы Господа на теле моем ношу». И паки инде: «Лишение скорбей Христовых исполняю». И паки сам Христос сообразным быти повелевает себе в крестоносии. Сие сообразие неотреченный есть долг всякаго христианина и ничим отрещися имущее, яко внутрь есть нас, и всегда в нашей воли есть, и кроме излияния крови всегда мощно умирати, аще не стужаем в бедствиих, скорбь наша вместо смерти бывает, о чем и Павел апостол глаголет: «На всяк день умираю». Еда ли едина нам от естества дадеся смерть; возможно, аще хощем, тмами умрети за Владыку нашего, ибо в нашем произволении лежит. А еже ядением и питием плоти и крови Господни смерть Того возвещати, несть всегда в нашей воли: но многажды и хотимое се не получится истинное, о чем и в вышних ответах 12 и прочих засвидетельствовахом.

Вопрос, 19.
Аще же паки возглаголете: яко и мы веруем, что тайны святыя евхаристии, такоже и прочия святыя тайны будут совершатися, то Господа ради известите, убо ли в вас, кроме священства, имут совершатися?

Ответ, 19.
Доволно уже в прошедших ваших вопросех мы от вас многажды таяжде и о том же истязани быхом. Мы же, по нашей силе, на тая вам свидетельствами подкрепихом, которых таин по крайней нынешней нужды лишаемся, и кия по нужде тайны для наинужнейшаго времени во свое спасение употребляем: о том убо паки свидетельствовати ради долготы слова не разсудихом, убо благоволите темижде и о том же тамо себе удовольствовати.

Вопрос, 20.
Аще ли паки и паки возглаголете: яко за неимением православных архиереов не можем употребляти святых таин, то чесо ради ныне вы приходящих к вам от великороссийской церкви и крещенных в три погружения паки покрещеваете? ибо весте, яко крещение есть тайна, почтоже вы неправо ея употребляете?

Ответ, 20.
Несть нашего лишесловствия по напряжению вашего вопроса: но ваше многажды о том же и таяжде вопрошения много усугублена суть, желающе излишно притеснить наше скудоумие. Но якоже наше соизволение на ответствие стремится не похвалнаго ради кичения, но самыя ради гонимыя святыя церкви от седмоглавнаго зверя, желающаго в своих мерзских водах злаго учения потопити (от коих вод учения и ваш источник истече), ея же ради, яко нашея матере, в сей подвиг защищения изыдохом. Но аще по грубости нашей подробность самую писать и не достизаем: обаче по немощи нашей елико потщахомся, и Божиею помощию и Его невесты святыя и православныя церкви елико вразумихомся, толико о сем изъявити потщимся, да не дастся место диаволу, да не дастся дверь волком, да не дастся вина, ищущим вины, да не дастся же ся от нас притча врагом. Но да возможем, правовернии суще, дерзновенно о ея истинне глаголати, да не порочна она восточная, наша мати, святая соборная и апостольская церковь явится, противных же оной дерзость да посрамится.
Темже, оставльше о сем слово, к вопросу вашему приходим. А понеже в нем вопрошение ваше, от великороссийской церкви приходящих и крещенных в три погружения, не по чину положися (ключимствует бо ему быть в разделе 2-м сея первыя части): убо и мы, наблюдающе порядок чина, двадесять в первом ответе, в начале 2-го раздела, свой ответ с свидетельствами полагаем, в настояшем же ответе о вашем нынешния великороссийския церкви тайны за сущия тайны признании да ответствуем. Ибо вы глаголете: яко есть у нынешних великороссийских архиереов действуемое крещение тайна, яве яко и прочия суть от вас быти мнятся тайнами. Нас же в своем вопросе укаряюще за наше непочтение тайнами, глаголете: почтоже вы неправо ея употребляете.
Темже летьствует с сосудом избранным возопити к вам сие: «О несмысленнии галате (якоже и к вам леть есть прирещи: о несмысленнии поповщина!), кто вы прельстил есть не покарятися истинне; имже пред очима Исус Христос прежде написан бысть в вас распят. [И проходя, указует несмысльство:] Тако несмысленни есте, наченше духом, ныне плотию скончеваете». Глаголет апостол Павел галатом, глава 3.
Принуди нас и к вам, о вопросителю, возвати: кто вы увещал есть не покарятися истинне, еюже пред очима вашима Исус Христос прежде написан бысть в вас распят; егда о благочестии возбудитеся, тогда вся пренебрегосте, вся яко уметы оплевасте, и сраспятися Христу готови бысте. и тако наченше духом, ныне плотию скончеваете, похотем плоти работающе. Прежде бо вопросил еси о православных тайнах, ныне же от еретических виноград собирати листвие, еже закрыти студ страстей своих, приходиши. Их же виноград от виноград содомских есть, и лоза их от Гоморры. Глаголя, защищаеши тайну еретическую: вскую, рече, неправо ея употребляете; самым делом указуете, сице вам рещи благоключимейше: почто вы неправо сие творите, приемлюще тайны еретическия; понеже, везде исходя исходища путей, не нашел еси православнаго священства, от котораго должно всем заимствоватися тайнам: ныне же, не обинуяся, прямо путь к еретическим тайнам приступать указал еси. За что святии (якоже в 12 ответе, в 5-м показании явихом) страждуще, ради не приятия еретических таин, блаженне жизнь свою скончаша. Ты же, о дивне, кроме всякия таковыя нужды, волею и хотением к новодейстию их приступати научаеши. Но мы вемы апостольския и отеческия гласы, зелне запрещающия к таковым тайнам приступати, и оныя приятными исповедовати. Но сия ниже в сем ответе указати имамы. Зде же вначале сосуда избраннаго послушаем гласа, о силе тайны возвещающаго сице: «Тайна сия (рече) велика, аз же глаголю во Христа и церковь». В послании к ефесеом, зач. 231. Виждь, не просто от апостола полагается тайна быти во святей православней церкви, и с верою Христовою не разделена, якоже учит тойже апостол, глаголя: «Един Господь, едина вера, едино крещение». К ефесеом, зач. 224.
Святая же церковь дает нам знать, что есть тайна, яже в Катихисисе велицем, во главе 83, сице по вопросу ответствует: «Тайна есть (рече) невидимыя благодати Божия видимое знамение, во освящение наше от Бога нам преданная». До зде Катихисис.
Еретическия же тайны сея невидимыя благодати, сиречь Духа Святаго освящения, суть лишаеми, убо и тайною святою нарещися она не может, ниже во освящение душам нашим есть ключима. О чем преподобный Никон Черногорский в книзе своей, заповедей Господних, в слове 63-м, пиша о раздорниках церковных, глаголет: «Иже от церкве отступльшеи, не ктому имеша благодать Святаго Духа в себе. оскуде бо подаяние, внегда пресещися последованию. [Ниже:] Ктому не могуще благодать Святаго Духа инем подати, от неяже тии отпадоша». Никон Черногорский, слово 63.
Подобне сему преподобный во иеромонасех Матфей правилописец, в книзе своей состава а, во главе 2-й, глаголет: «Аще и не о вере расколницы погрешают. [Ниже:] Сии же от состава удов телесных отторгошася, не ктому пребывающую в них имут благодать Святаго Духа. еже убо не имут сами, како иным преподадут». Матфей канонист, состав а, глава 2. В толковании же Алексей Аристин на 1-е правило Василия Великаго, именно о тех раздорниках извествующи, глаголет тако [Кормчая, правило 1 Василия Вел.]: «Наватиан же, рекше чистых и воде предстоящих и воздержащихся, крещение аще и не приятно есть, понеже оставляет их Дух Святый».
Виждь убо, аще на раздорническия действа, или крещение, Дух Святый не может присутьствовать присещением, кольми паче на самыя еретическия, от них же последовательне да свидетельствуем.
Святейший патриарх Филарет в соборном своем изложении сице глаголет: «Яко вси еретики, различных вер, не имут права святаго крещения, еже водою и Духом Святым». Потребник, лист 561.
Вселенский патриарх Мелетий к белорусцам, пиша, глаголет [книга Кирилова, лист 505]: «Яко все веры прочии, иже верами зовутся, не суть веры, но прелести, наченши от латыньския и до прочих всех. и почто не суть достойни называтися верами; того ради, яко ни едина от них не вмещает Духа Святаго даровании, ни пришествия Его сподобляется». Мелетия патриарха послание 10-е.
Зиновий мних Отни пустыни, ученик премудраго Максима Грека, глаголет: «Имать бо всяк еретик в себе дух диаволь, темже и противится Святому Духу». Соборник малый, слово 40.
Преподобный же Иосиф Волоколамский пишет тако: «Кроме (рече) благодати Святаго Духа, ничтоже может кому сотворити от священных. еретицы же в себе нечистый дух имеяху сатанин». Книга Иосифа Волоколамскаго, слово 12.
И иная прочая свидетельства о сем за краткость словесе оставляем. Темже аще не приходит Святаго Духа благодать на еретическая действа, остаются их тайны без благодати Божия, убо и тайнами истинными нарещися не суть достойны, такоже и во освящение не есть потребны. Якоже скуделник, не причащься огненнаго ожжения, неприятен в надлежащую потребу: сице и тайна кая, огня Святаго Духа не получившая, не суть на спасение и освящение душам потребна, того ради святая церковь непотребными и неприятными быти их показует, о чем в Катихисисе великом вопросоответствует сице: «Вопрос. Истинныя ли и правыя пресвятыя тайны Христовы суть у еретиков? Ответ. Понеже они истинныя и правыя веры Христовы не имеют, то како пречистыя и святыя тайны Христовы у них быти могут. Вопрос. У еретиков убо такожде, яко же и у православных христиан, служба Божия совершается, такожде святое писание и книги прочитаеми бывают, такожде церковное строение, и духовныя чины и уставы, и образы имеют. [Ниже:] Како убо у них невозможно быти истинным пречистым и животворящым тайнам Христовым? Ответ. Поистинне ничто у них несть истинно. но все убо еже еретики творят, от смышления своего. како могут совершати действа Божия на игралищах своих; аще и Христа проповедают, и веру свою похваляют, но вся сия льстиво и лживо творят. аще и церкви своя, и клирики церковныя, и писания божественныя почитают, и мнятся еже тем же крещением крещатися, такоже и тайны божественныя, еже есть пречистое тело и честную кровь Христову имети, вся же сия не тако имеют, но инако и нечестиво. [Ниже:] Сего ради разумети имамы, яко еретическая писания и празднества, и службы, и тайны, и проповеди не суть правы». Катихисис великий, глава 4.
Сему подобно и святый Иоанн Никейский на армены еретики пишет сице [Кормчая старописмен., слово на армены]: «Какоже лживии христиане и лживии правовернии и скверное их крещение, и жертвы их, яко истинныя и крепкия творят; аще бо тмократицею прокляти бывше и диаволу предани, како от анафемы и от клятвы благословение изыдет, или како от диавола духовное и святое дело совершается; от анафемы бо благословение не бывает, и от проклятия молитва не исходит, и от диавола Христова таинства не совершаются, и от гноища благоухание не исходит, ни от гнилаго трупия ин исцелится, ниже от червивых удов здравие иному телеси подается, ни паки от ереси или от неверия духовное действо исполняется. [Ниже:] Якоже Христос глаголет: Не собирают бо от терния грозды, ни от репия смокви, темже проявленно, яко крещение их, и вся, яже от них содеваема, неприятна и непотребна суть, аще и тщатся несмысленнии и неразумнии, и неутвержении, и лживии христиане, яко истинна и благоприятна творят делания их». Кормчая писменная.
Согласует же сему и в книзе 6-й завещания святых апостол, идеже тако пишется: «А иже от нечестивых приемлюще осквернение, обещницы разума их будут, ниже бо суть тии священницы. глаголет к ним Бог: понеже ты отринул еси разум, отрину тя и Аз священствовати Мне. ниже крестившыися у них очистишася, но осквернени суть. не оставление грехов приемлюще, но связания нечестия». Книга 6-я, Завещания святых апостол, глава 15.
Златоуст же святый о всех еретических тайнах, пиша, глаголет [Апостол толковый, друг. преводу]: «Тайны (рече) без единости церкви христианския ничесоже суть. ибо всем отлучившымся от единения церковнаго Бог пророком рече: Послю на вы клятву, и проклену благословение ваше, и оклену е. и разорю благословение ваше, и не будет в вас: сиречь, положу клятву на благословение ваше, имже тайна совершаема бывает. ибо церковь Божия есть, якоже глаголет писание, вертоград заключен, и источник запечатлен. и того ради не возможно нигдеже тайне совершатися, точию во единости церкви Божия, еяже между сонмищи и еретиками несть, тогда и тайны в них несть ни единыя». До зде Златоуст.
Подобне и святый Максим Исповедник о еретиках единоволниках извествует: «Иже (рече) единоволники сами от себе прокляти, и от поместнаго собора, бывшаго в Риме, извержени, и священства отчуждены. тии кая совершают таинства, и который дух приходит на тех, иже от таковых хиротонисаются». Минея четия, генваря 21.
И Бароний пишет в лете Господнем 258-м: «В первенствующей церкви, о том во Иконии во Фригии собор сотворше, уставиша ни едину тайну у еретиков в тайну вменяти». До зде Бароний.
От сих убо вышепредложенных свидетельств, ясне доказуется: яко еретическия тайны не могут тайнами истинными нарещися, яко на оныя Дух Святый не приходит: яко тех действа, и тайны святою церковию не приемлются. Темже убо право во святей нашей церкви употребляется, еже еретическия все действа и тайны не приемлются. Обаче же в сем ответе предъидущая от нас вам предложишася, точию о неприятии генерально от еретик всех таин. В последующем разделе, в 21-м и прочих ответех, якоже выше рехом партикулярно, о едином неприятии нынешняго новодействуемаго от великороссийския церкве крещении, и с подлежащими тому новинами, и от нея и от них же чесо ради отлучаемся, явити имамы.

ЧАСТЬ ПЕРВАЯ.
РАЗДЕЛ, 2.

Вопрос, 21.
Чесо ради вы оставили великороссийскую церковь, в ней же прежде и вы крещением породистеся?

Ответ, 21.
Удивляемся мы вашему попечению о великороссийской нынешней церкви. Что вы толикое имеете о ней рачительство, что едва не к четырем стам вопросов произведосте, потящеся поправити тоя кривыя предании; и како суще о своей матери щадением не малым о той подвиг усердный показуете, не взирающе ни на что, что она и вас ужасней клятве и анафеме предавает; но единственно ваше, как видится, таковое происходит усильствие, точию из приобщения вашего тоя новодействуемым тайнам, желающе и неправое учинить правым, клоняще к воле ваших суетных исполнений. Но обличают вас пророцы и апостоли, и сам Христос Спаситель наш, глаголя: «Еда (рече) объемлют от терния грозды, или репия смоквы». Матф. зач. 22. А Исаия пророк вопиет: «Горе полагающым свет во тму, а тму в свет». Исаия, глава 10. Апостол же Павел, взывая, глаголет [2 коринф., зач. 182]: «Кое причастие правде к беззаконию? ли кое общение свету ко тме? кое же согласие Христови с велиаром? или кая часть верну с неверным?» и прочая.
Аще же великороссийская нынешняя церковь предание древлеправославныя святыя церкве под анафему и клятву отсылает, убо из под анафемы како имать изсходить благословение или таиньства? Явственне бо святый Иоанн, митрополит Никейский, опасая от еретических таин, пиша, глаголет [Кормчая старописм.]: «От анафемы бо (рече) благословление не бывает, и от проклятия молитва не исходит, и от диавола Христова таинства не совершаются».
Зри убо от всех едино согласие сияющее, якоже самого Христа Спасителя, тако и Его пророков, и апостолов, и учителей. Вам же единем устремление бысть ко оправданию еретических действ, к хулению же неправдословному истинных и правоверных христиан, бегающих праведне оных сквернения.
Но не мы прежде отлучихомся великороссийския нынешния церкви, но преосвященный Павел, епископ Коломенский, с прочими духовными протопопы и попы, и простыми людьми, такоже и соловецкия обители иноки, якоже священными, тако и простыми. Отлучилися же не просто без вины, но привнесения ради новшеств чрез Никона патриарха, и прочих последующих ему архиереов, в Российскую церковь: от которых доволно они как своими словесы, так и писаньми тогда новодогматствующих учителей обличаху, чего ради мнози от них оземствования, темницы, юзы, и различныя смерти за древлеправославие претерпеша. И если волишь для уведения наивящьшаго о новинах, прочти аппологию ответную выгорецких общежителей, и в ней 50 и 79 ответы и прочия, и тамо доволно узрети имаши, чего ради отлучение бысть, последователне же и наше. Мы же вам на сей 21 вопрос, по понуждению вашему, такожде и по обещанию нашему в 20-м ответе, должное воздающе, сей ответ на три части разделяюще разполагаем, части на разделы.
В первой части полагаем: О новинах российския церкве, с которыми прежними ересями они согласие имеют.
Во второй части показуем: Яко всяка ересь не нагло свое имеет нечестие к Божеству, но имеет некое прикровение: обаче святыми учители точной суд износится на оныя.
В третией же части: Чесо ради бысть неприятие наше новодействуемаго крещения, и о количестве нововнесенных в него вин.
Сию убо взаимность разполагающе, как новин нашего опасения, так и с новинами и в новинах сущаго, новодействуемаго крещения, убо касаемся самых показаний новин, или, истее рещи, ересей нынешния великороссийския церкве.

Часть 1,
о новинах нынешния великороссийския церкве, с которыми ересями они согласие имеют.

Раздел, 1.
Статия, 1.
О согласии российския церкве перваго чина с еретиками, не верующими во Святую Троицу.
Вселенский учитель Василий Великий в 1-м своем правиле о еретиках перваго чина сице глаголет: «Еретик, иже верою чуждь. и яко от еретика крещение не приятно». Кормчая, глава 21, лист 224.
И преподобный Иосиф Волоколамский, в слове 15 пиша, сице о них глаголет: «Яко не веруют во Святую Троицу, и Господа нашего Исуса Христа истинным Богом не нарицают, и плотьское Его смотрение не приемлют: но ов пророка Его нарицает, ов же проста человека. о таковых, рече, вся божественная писания глаголют, яко еда приходят к православной церкви, то подобает их крестити». До зде святый.
И от сих предложений показуется, яко вси еретицы перваго чина истинно во Святую Троицу не веруют, и Господа нашего Исуса Христа истинным Богом не нарицают, и плотьское Его смотрение не приемлют. И сицевии вси, по Василию Великому, верою чужди суть. И яко от них (рече) и крещение не приятно.
Во образ же общаго их сего нечестия российския церкве подобие являем.
Понеже первый ересиарх российския церкве патриарх Никон, в Скрижали своей, неописанных триех ипостасей божественных, непостижимое существо, истекателными персты, сиречь пальцем и указателным и великосредним, равенство Святыя Троицы измеряет дерзостне, ибо тако рече [Скрижаль, лист 795]: «Имиже (сиречь тремя персты) возвещаем Святыя Троицы равенство же и соединение, вкупе же и несмешение». До зде Скрижаль.
Но святии богословцы, ко истязати дерзающим о Бозе таковыми, сице запрещают [Кирил Иеросал., лист 393. о Святом Дусе, глава 17]. Григорий Богослов: «Аще един есть Бог, и едино естество превышнее, откуду представлю тебе подобие? или взыскуеши от нижних и сущих окрест тебе. зело убо срамно, и не точию срамно, но и буее вельми от нижних уподоблении вышних приимати, и непостижимых от искателнаго естества». И святый Дамаскин [книга Небеса 3, глава 9]: «Не можно бо обрестися в здании образу, непременно в себе образ Святыя Троицы показующу. зданное бо и сложно, и течно, и вращно, и описанно, и образ имеющо тленное, како явит всех сих избавленное и пресущное Божество».
Премудрый же богословец, Максим Грек, обличая Николая, в таковых дерзающа, глаголет [Кирила Иеросалим., о Святем Дусе, глава 17, лист 394]: «Аще сия ведяше Николай, и благочестиве слышати хотел бы, не бы убо гиометрийскими образописании непостижимое существо испытал дерзостне». И паки: «Кто от создания мира божественныи муж образописании Божество испытав уразуме, и последним по себе предаде?» И паки той же: «И елика сицевая Николай вводит, странна и чужда благочестивыя и православныя веры, изобретение сущих душевнаго, и долу влекомаго разума, и земным паки взысканием и разумением пристоящаго». До зде святый.
Никон же, в Скрижали, истекателными персты равенство неописанных Божиих ипостасей измеряет дерзостне, несогласно святым богословцем мудрствует, согласно же оному Николаю немчину, еретику сущу, и подобно древним еретиком, иже верою чужди суть. Таковая, по премудрому рещи Максиму, странна и чужда благочестивыя веры, от долу влекомаго разума, и земным взысканием и разумением сицевая вводит, убо того ради, по 1-му правилу Василия Великаго, сицевии обличаются, якоже верою чуждь. И яко от еретика крещение не приятно. Кормчая, лист 224.
Статия, 2.
Нынешнии российстии архиереи крест Христов трисоставный, образ Святыя Троицы имущий [Григорий Синаит, Феодор Студит], отметают и не приемлют: но ругателне его порицают брынским, осмиконечным и выговским [Обличение, лист 53, 38. Розыск, лист 179], и сего ради со онеми, иже во Святую Троицу неверующими, еретики соглашаются. Святая же православная Христова Церковь проклинает всех таковых, сице глаголя: «Проклинаю вся враги креста Христова, иже не имеют его и не покланяются ему, и не знаменуют лиц своих крестным изображением». Потребник Болшей, лист 604 на обор.

Раздел, 2.
Статия, 3.
А понеже яко древния перваго чина еретицы, по преподобному Иосифу, показуют, яко не веруют во Святую Троицу, и Господа нашего Исуса Христа истинным Богом не нарицают, и плотьское смотрение Его не приемлют. Во образ же общаго их сего нечестия российския церкви подобие являем. Ибо, по древлеправославныя церкви святым учителем, десныя руки сложение перст, имже знаменаемся, имже все доброе веры таинство изображати научаемся, яко образ богоначалных триех ипостасей Отца и Сына и Святаго Духа, такоже и образ воплощьшагося Сына Божия двою естеству Божества и человечества. Сия убо оба превеликия таинства християнския веры нынешнии архиереи отметают и не приемлют, но хулными словесы порицают, и богомерскими ересьми облыгают [Димитр. в Розыске, лист 188. Обличен., лист 26]: яко арианством, македонианством, несторианством, армянством, паче же яко воплощьшагося Сына Божия тайну демонским и чертовским именем порицают. И сего ради со онеми, иже во Святую Троицу не верующими, еретики соглашаются.
Статия, 4.
Яко нынешнии архиереи херосложным перст богословением явственно обоих таинств веры отвержение показуют: понеже в том образ Святыя Троицы не изображается, такоже и Господа нашего Исуса Христа истиннаго Бога, нас ради воплотившагося, тайна не исповедуется. И убо сим херосложным перст благословением явственно всего добраго веры таинства отвержение показуется, и сего ради со онеми, иже во Святую Троицу не верующими и воплощение Сына Божия не приемлющими, еретики соглашаются.
Статия, 5.
А понеже яко древния оныя еретики пророка Христа нарицают, или проста человека, то и в херосложном перст благословении российских архиереов сицевое разумение заключатися может. Понеже перстами литеры IС XС изображаются, и в сих литерах толкуется быти IС XС, но не по подобию: ибо верхними точию концы литеры оныя показуются, нижними же концы перст вкоренением ничесого не изобразуется. И аще литеры самыя достолепнаго начертания своего аки не имущия показуются, ими же бы спасительное имя Исуса Христа написатися восподобствовало, то како убо, еже Господьственную честь образующее, титлоначертание во оном может изобразитися? [Грамматика часть 1, орфографии] Но яко отнюд сему изобразитися неудобно есть, убо кроме тител имя Исуса Христа изображаемое не может чести Божией приписатися, не может достолепнаго имени Божия начертати, не может же сим простым начертанием показать истиннаго Бога Исуса Христа, но разве проста человека, по вышеобъявленному онех еретик зловерию.
Темже аще сицевое в перстосложении великороссийских архиереов может заключитися разумение, убо по оному с древними онеми еретиками согласие является. А понеже сие перстосложение от российских архиереов во всяком тайнодействии церковнем, в благословении же и освящении употребляется, темже и нечестию онех еретик во всех своих действах церковных от сего вводиму быти долженьствует. О чесом Мелетий, патриарх Александрийский, на новообретение латинов пиша, глаголет сице: «Всяк неотеризм припряжен есть к беде. бегай беды. или не мала есть беда, еже церковь колебати». И паки: «Обыкшая с новым обретение бывати злая. сия вся молва и разстояние, ересей наношение, и церковная смущения, новины любославных». 3-е послание Мелетиево до белорусцев.
Церковь же православная, проклинающи пятиперстное благословение, тако глаголет: «Проклинаю в латинех творимое странно некое благословение пятию персты». Потребник Болший, глава 72, лист 597.

Раздел, 3.
О неистовом богословствовании великороссийския церкви.
Статия, 6.
Нынешняя великороссийская церковь не точию таиньства веры во образовании отметает и не приемлет, но и в самем учении богословском существо божественное поруговает, и якоже варивше изъявися, яко тленным и истекательным естеством перст равеньство Святыя Троицы дерзостне измеряет, таже и тмою дерзновеннейше тое порицает, о чесом и свидетельство предлагаем. Яко Никон, патриарх Московский, в Скрижали своей о непостижимом существе божественном сице глаголет: «Ибо лучше имать именовати Бога тму и невидение, неже свет, зане ум не может домыслитися каков есть Бог. И сим образом мощно есть домыслитися кому Бога». Но возлюбленный ученик Христов Иоанн Богослов в соборном послании своем, в зач. 68, весма сопротивно тому, пиша, глаголет: «Яко Бог свет есть (рече), и тмы в нем несть ни единыя». Явственно же и по символу православныя веры научихомся веровати, глаголя: «Света от света, Бога истинна, от Бога истинна». Но речет ли кто, яко Богослов Григорий глаголаше сие, «глаголется (рече) и Бог тма». Но Богослов не именоваше Бога тмою, но за неведомое Божества (рече) глаголется Бог тма, о чем и свидетельство из пророка сие приведе: «Положи тму за кров свой». Тем засвидетельствуя, что Божияго существа величество отнюд есть недоведомо.
Святый же Иоанн Дамаскин сицевое именование Божеству полагает [книга 1, глава 17]: «Паче же (рече) от честнейших и ближайших Ему свойственне возъименуется, честньшая же невещественная вещественных, и чистая скверных, и святая мерских, и паче Ему ближащаяся. понеже и множае причащаются Его, свойственнейше убо паче возъименуется солнце и свет, неже тма и день, неже нощь и жизнь, неже смерть и огнь, и дух и вода, яко животна, неже земля, и прежде всех, и множае благость, неже злоба». До зде Дамаскин.
Никон же, тмою Его именуя, несогласен есть апостольскому и святых богословцев учению и церкви Христовой священному символу, но является сопротивен. И сицевое его о святей богословии неблагоговейное учение и не имать именоватися богословия, но разве сущая злословия, и на Божие величество явная хула. И есть сие презельное еретичество, имже бо паче всех ересей нечествуется, и паче всех еретических хулений Богови досаждается. И сицеваго ради неблагоговейнаго о святей богословии погрешения великороссийская церковь зельне Богови приражается, того ради паче всех ересей тяжчайшему суду повинна есть.

Раздел, 4.
О хуле на Господа Бога Отца Вседержителя Саваофа.
Статия, 7.
В новопечатной книге Иоанна Дамаскина, во главе 10, написано: «Отец убо безвинный и не рожден. не бо ис кого, из себе бо еже быти имать». До зде из новопечатной.
В старопечатном же Катихисисе Великом по древлецерковному богословствуется преданию сице: «Отец ни от кого же ни сам от себе».
Подобне же и великоученный Максим Грек в слове 1-м своея книге сице предлагает: «Безначален Отец, и не рожден, и безконечен. ниже сам себе приведе в божественное свое существо и ипостась, якоже нецыи безумники нечестиве мудрствуют. аще бо дадим сие, последует от нужи глаголати, яко не бе прежде, еже привести сам себе в бытие. сице возмнится создан, и сам себе вина, и начало, под время и под начало, и конец, иже единыи не создан, безначален, присносущен, превечен, и безконечен, вкупе с происходящим от него Сыном и Святым Духом». До зде Максим Грек.
В новопечатней же Иоанна Дамаскина от нынешних преводчиков новых преведеся, яко Отец из себе быти имать: убо, по Катихисису и премудрому Максиму, сицевое богословствование безумне и нечестиве мудрствующих есть, и последует глаголати: яко Отец не бе прежде, еже привнесе сам себе в бытие, и создан и сам себе вина, и под временем и под началом, и конец имать, купно с Сыном и со Святым Духом.

Раздел, 5.
Статия, 8.
В Скрижали Дамаскин иподиакон толкует Христова словеса, яже прежде распятия своего Христос рече: «Аще кто хощет по Мне ити, да отвержется себе, и возмет крест свой, и по Мне грядет». И сия Христова словеса, прежде волнаго распятия Его речена бывшая, Дамаскин толкует сице, глаголя: «Кии убо есть разум, еже глаголет, да возмет крест свой? не повелевает, яко да сотворит кииждо крест от древа, носити и на раме своем. зане сие кую пользу имать, или кая добродетель есть носити крест на раме своем. но что хощет рещи: тако да имате пред собою смерть вашу, якоже и Он, иже имать распинатися за некое прегрешение, носит крест на раме своем, и ходит трепеща, и ожидая смерти». Скрижаль, лист 766.
И сим толкованием показует, яко бы Христос, прежде распятия своего реченными словесы, назнаменова свою смерть, яко Он имать распинатися за некое прегрешение, а не за мирское спасение, иже един безгрешный и един праведный, о Нем же пророк глаголет: «Яко греха не сотвори, ни обретеся лесть во устех Его».
Статия, 9.
Такоже и воплощьшагося Сына Божия тайну, якоже древлеправославная церковь двема перстома, имаже знаменаемся, двоестественное Христово таиньство образовати и исповедати законополагает, которое перстосложное образование демоньским и чертовским порицает. О чесом Димитрий Ростовский в Розыске, в части 2-й, в статии 3, пишет: «Прилично им, расколником, на их армянском сложении написать имя демоньское: на одном персте «де», а на другом «мон», и тако на двух перстах будет седети демон».
В Обличении же на выгорецкия ответы во главе 1-й, на листу 26-м, на двоеперстное сложение таковая хула напечатана: «Двоеперстное ваше сложение отстоит ли от латинскаго перстосложения, или ни? о том зде истязания или разсуждения не творим. и от латин ли вы взяли, или от иного какого горшаго черта». Тамо же [Обличение, между 9 и 10-м листом] напечатали чертеж с древних святых и чудотворных икон, на коих благословящия и молебныя десницы воображены по древнему преданию, их же числом сто и четыре руки. Таже на концы, при сложении десницы двома перстома, изображеною прописию, вси оныя вышесложенныя святых руки названы арменьским кукишем. И сицевое на воплощьшагося Сына Божия, образуемую тайну, презельное порицание вящьше всех еретических хулений обретается, еже восходит на первообразное, сиречь к самому Господу нашему Исусу Христу. Якоже глаголет Великий Василий [Соборник, в многосложном свитке]: «Честь образа восходит на первообразное, такоже и бесчестие».
Статия, 10.
Яко Господа нашего Исуса нареченное от Бога и Отца, и чрез безплотнаго слугу пречистей Деве еврейским языком возвещенное, пресладкое имя Исус, еже по святым богословцем толкуется Спас, толкуется Исцелитель. Нынешняя же великороссийская церковь новомудрствующими учители всяцем коварством кует, да отнюд сие имя Господа Спасителя пресвятое и славное не именуется во времена сия последняя [Ефрем, слово 105], о чесом новоизданныя их книги о том свидетельствуют. Яко Димитрий, митрополит Ростовский, в книзе своей Розыск, в части 1-й, в статии 1, сице глаголет: «В руском же языце расколщики в две токмо силлябы глаголюще, Исус, не исповедуют Спасителя и Исцелителя душ наших. и в правду в них ин Исус: не истиннаго бо Иисуса Спасителя и Исцелителя исповедуют, но некоего равноухаго Исуса. [Ниже:] Ин бо обретеся в них Исус, глаголемыи равноухии. в нас же един, иже бе прежде и ныне есть, и во веки будет Иисус, глаголемыи Спаситель и исцелитель душ наших Христос Господь». До зде Димитрий.
Сему подобно и в Пращице, во ответе 146-м, «с единою иотою пишемое, имя Исус не знаменует Спасителя, но равноухаго Исуса». До зде Пращица.
Сице же согласно онем и во Обличении на ответы выговския ругательствуется имя нашего Спасителя Исуса.
И по сицевому новомудрствующих учителей толкованию является два Исуса: един Исус, а другий Иисус. Истиннаго бо Спасителя нашего Исуса отметаются и не приемлют, и Спасителем Его не именуют, но равноухим порицают. Другаго же Иисуса, внове, от лет 1666-ти проповеданнаго, Спасителем именуют. И вправду, по онех разумению, яко у нас в древлепечатных святых книгах с их новопечатными книгами не есть един Исус, но ин и не той же. Ибо святая древлеправославная церковь проповедует с единою иотою пишемое Исус, и того Спасителем именует: нынешняя же другаго Иисуса с двема литерами воспроповеда Спасителем, истиннаго же Исуса равноухим хулнейши порече, тем и воистинну между нами два Исуса показастася. Но мы веруем святых богословцев и учителей церковных толкованию, яко Исус есть Спас и Избавитель, и Исцелитель истинный, Его же церковь древлеправославная по всей вселенней истинным Спасителем проповедует, в Него же и мы вседушно веруем, и истинным Спасителем исповедуем. Новомудрствующих же учителей дерзновенное порицание на спасительное имя явнейши согласуется преподобнаго Ефрема прорицанию о антихристовом богоборном царьствии, глаголющему тако [Ефрем, слово 105]: «Всяцем бо (рече) коварством кует, да отнюд имя Господа Спасиеля пресвятое и славное не именуется во времена змиева. бояжеся и трепеща святыя силы имене Спасова се творит немощныи».
Понеже они воспроповедаша всюду Иисуса, Спасителем Его именующе, Господа же нашего Исуса Христа равноухим порекоша, отселе явнейше сбытие оных словес показася.
Блаженный же апостол Павел, опасая правоверных коринфян, еже бы им не прияти иного Исуса, тако глаголет [коринф, зач. 191]: «Боюжеся, да не како змии прельсти Евву лукавством, сице истлеют и разумы ваша от простоты, яже о Христе. аще грядыи иного Исуса проповедает, егоже аз не проповедах: или дух ин приемлете, егоже аз не приях: или благовествование ино, еже благовестих вам». И паки [галатом, зач. 199]: «Аще мы, или ангел с небесе благовестит вам, паче еже благовестихом, анафема да есть». До зде апостол.
Великороссийская же церковь, сие имя иное Иисус не точию усты воспроповеда, но и всем тайнам своим во оное совершатися законоположи.
Темже мы, по апостолу, ужасаемся, да не истлеют разумы наша от простоты, яже о Христе. И да не приимем иного Иисуса или в слове или в деле, новомудрствующими учители новопроповеданнаго. И да не будем почитающе его, яко истиннаго Исуса Спасителя. Да не о нас исполнится, еже преподобным Ефремом реченное [слово 105]: «Яко вси поклоняющеся пред зверем, и вопиюще и глаголюще, ты еси Спаситель наш». Но и самое свойство, по учителем церковным, времене его познавается 1666 [книга О вере, глава 30].

Раздел, 6.
О неправом богословствовании нынешния церкви о безначальном Бозе.
Статия, 11.
Пишет нынешний российский учитель Платон в краткой своей богословии, в части 1-й, в параграфе 5-м, о свойствах Божиих тако: «Ибо когда Бог не зависит ни от кого и не может не быть, следует, что Он есть един. [Ниже:] Следовательно Дух наичистейший. (д). (д) Дух есть существо, сложения непричастное, разумом и волею одаренное. такое существо по превосходству есть Бог». До зде Платон.
Сие новороссийскаго учителя богословствование елико всем святым богословцем есть противное, толико и самей феологии есть несогласное. Сие может ли согласоваться как святым богословцем, так и самей святей богословии? ибо Бог наш, такое превысочайшее существо, что он есть самый верховнейший, пресовершенный дародатель всех видимых и невидимых дарованиев. Како может Бог наш быти одарен разумом и волею, когда, по святому пророку [псалом 146], разуму Его несть числа, такожде и воли Его святей несть ни начала ни конца? и кто может одарити такого превысочайшаго Дародателя разумом и волею, иже всем всегда преестественно разум и премудрость низпосылающаго, и несозданною своею волею вси созданные воли по преестественной своей благой воли властно управляющаго? Ежели Бог одаренный есть разумом и волею, то, следовательно, есть некое превышшее Бога существо, которое одаряет Его оными дарованиями, и посему будет Бог под властию, убо и Бог несть, но некое будет от тварей сотворение, или ангел, или человек.
Темже сие богословствование российских новомудрствующих учителей не точию первейшим согласоватся еретиком, сводящим двоестественное во Христе во едино, и творящим Безначалнаго начало имущим, но и еще вящше. Ибо не о едином Христе сие неправомудрствование может приписатися, но и о всей Святей безначальней Троице. Темже российския церкве предткновение не о единой коей ипостаси показася, но о всех триех божественных и безначалных ипостасиях. Не Ариева или Македониева зде показуется ересь, Сына и Духа Святаго уменьшивающая от отеческаго Божества, или разделяющая тое единое существо: но обще вооружися на божественное Существо, глаголя е быти Существом одаренным, убо и вышше некое одаряющее существо нечестиве проповедаша. А еже сие дерзостное поругание, что Сына Божия грешным нарекоша, тайну же двоестественную Христова естества демоньским и чертовским именем быти назваша, спасительное же имя Исусово равноухим порекоша, в киих еретиках быти взыщется? недоумеем. Аще бо и перваго чина еретицы, пророка Христа быти нарицают, или проста человека, а не грешна, ниже демоньским или чертовским именем смеяху нарицати Его: разве богоубийцы жидове глаголюще о Нем: «мы вемы, яко сей человек грешен есть». И паки глаголюще: «яко беса имать». Такоже и великороссийскою церковию нанесенное оное хуление, согласно есть онем жидом, еретических же нечестий нечестивейши есть.

Раздел, 7.
Гряди, явим ти и прочия догматы же и предания нынешния великороссийския церкви, согласующия перваго чина с еретиками. Ибо якоже в поучении богословском и в таиньственном образовании православныя веры, в новоизданных догматах, оно погрешение не малое имеет, и со онеми еретиками соглашается, якоже выше предложихом: так и о прочих догматах и преданиях церковных не безповинна есть, и согласие со онеми еретики имеет, о чесом свидетельства на среду представляем.
Статия, 12.
Понеже еретицы монтаниты, и савелианы, и евномианы, о святей богословии неправославно мудрствуют, еже Святую Троицу в един сливают состав, иже и крестятся в едино погружение, по свидетельству 8-го правила 2-го вселенскаго собора. Во образ же сего российския церкви подобие являем. Яко латыньский двочастный единосоставный крыж имеет в нем же трисоставную Троицу исповедует, и се савелианскому и монтанианьскому о Святей Троице слиянию соглашается. А понеже яко Никон патриарх в двочастном кресте догматствует, яко образ Троицы в нем быти сказует, еже в Скрижали, на листу 34-м [глава 7], сице глаголет: «И таиньство Троицы даде нам со образом креста. ибо прямое его древо знаменует Отца вышняго, иже печется о нас, живущих на земли. косвеное же древо, еже совершает крест, знаменует Сына и Святаго Духа». До зде Скрижаль.
Но сие мудрование неправославно есть, еже Отца образовати древом, Сына же со Святым Духом образовати единым же древом: убо Сына и Святаго Духа ко Отцу неравеньство являет, и от сего арианьскому и македонианьскому о Святей Троице неравеньству соглашается. Такоже и Сыну со Святым Духом в едином древе образоватися, слиятельно есть, и от сего савелианьскому и евномианьскому, и монтанианьскому о Святей Троице слиянию соглашается. А еже, по Пращице и по Розыску, еже в дво частном кресте догматствуется, яко образ Троицы в четырех концех быти исповедающе [Пращица, ответ 116. Розыск, часть 2, стат. 3]: «ибо верхнии конец высоту назвавше, иже знаменует Отца: нижнии же конец глубину именовавше, иже знаменует Сына: два же конца пречнаго древа знаменуета Святаго Духа». И по сему Пращицы и Розыску толкованию, еже в четырех концех Святей Троице образоватися, неправославно есть, но самою вещию свидетельствуется, яко четыре лица во Святей Троице быти являются. Ибо аще Отца образовати концем вышним, Сына же концем нижним, Духа же Святаго образовати двема посреднима концема: и по сему является Духови Святому ко Отцу и Сына неравеньство, но на два места растояние, на два начала показует Ему разделение, еже от Отца и Сына исхождение, якоже латини о том зле мудрствуют. И есть се пребольшее еретичество, и первое от седми вселенских соборов святых отец отступление, о чесом Филарет патриарх в соборном изложении явствует [Кирил Иеросалим., лист 39. Потребник иноч., лист 232]. Еще же о сложении треперстном пишуще в новообретенном их соборном деянии, последи предлагается новообретенная книга, Феогностов Требник: в нем же на листу 35-м, в слове под именем премудраго Софрония, написано сице: «Егда тыяжде три персты, имиже воображаеши Отца и Сына и Святаго Духа несмесно и нераздельно единицу в троице, не соединены, и троицу в единице, егда совокуплены во едино». От слова Софрониева.
И аще, по разсуждению сего слова, несмесно единицу в троице не соединеными, но разделеными тремя персты образовати, убо единосущному Божеству и естеству Святыя Троицы разделение показуется, и сим маркионитское о Божестве на три начала разделение заключаемо вводится.
Такоже и противу сему, аще и нераздельно троицу во единицы, егда совокуплены три персты во едино, тако образовати, убо не раздельность, но слияние лиц показуется, и сим савелианское о Святей Троице слияние заключается. И в сицевом их мудровании, еже изрекоша, яко несмесно и нераздельно единицу в троице, не соединены, и троицу во единице, егда совокуплены во едино, различных ересей согласие обретается: яко маркионитское о единосущном Божестве разделение, таже и савелианское, и евномианское, и монтанианьское о Святей Троице слияние заключаемо вводится.
И якоже в новомудрствовании их яковое о Святей Троице догматствование взаконяется, таковое же и в действах церковных согласное сему разумение заключается. Яко в Служебнике, на вечерни, в молитве главопреклонной, начало молитвы к единому лицу Сына Божия написано сице: «Господи Боже наш, преклонивыи небеса», и прочая. Окончанием же сице: «буди держава царствия Твоего, благословена и препрославлена Отца, и Сына, и Святаго Духа». Такоже и в Требнице, в чине исповедания, в молитве: «Господи Исусе Христе Сыне Бога живаго, Пастырю и Агньче, вземляи грех», и прочая. Окончание же: «и Тебе славу возсылаем, Отцу и Сыну и Святому Духу». И сих молитв начала к единому лицу Сына Божия полагается, окончания же к трем лицам прилагается, являет в едином Сыновне лице Святую Троицу, Отца и Сына и Святаго Духа: соглашается же савелианьскому и евномианьскому, и монтанианьскому о Святей Троице слиянию.
Обаче таковое молитвословие древлеправославною церковию зазрено есть. Якоже Троицкаго монастыря архимандрит Дионисий, обрет в старописменных Потребниках и в Служебниках печатных первых выходов в молитвословии начал молитв к единому лицу Сына Божия, окончания же к трем лицам, зазре сему, и нарече тыя концы молитв ереси Савелиеве и Ариеве помогательны, обаче убо последи в выходах старопечатных же исправишася. Ныне же паки в российстей церкви тая зазренная обретошася, темже убо разумеем, яко сицевым молитвословием савелианское и евномианское, и монтанианское о Святей Троице слияние заключаемо вводится.
Еще же и в прочих местех подобно сему обретается. Яко на утрени, на 8-й песне, глаголется: «Благословим Отца Сына». И на вечерни, в молитве Свете тихии, глаголется: «Поем Отца Сына». И сим слияние же о Святей Троице вводится, и со онеми еретики соглашается.
Статия, 13.
Понеже яко сии еретицы аще и вси слияние о Святей Троице согласно мудрствуют, обаче в таиньствах и в преданиях церковных различие имут. Яко еретицы монтаниты началника их Монтана утешителем именуют [Кормчая, глава 21, в толк. 1-го прав. Вас. Вел.], и совокупльшияся ему две блудницы, Прискиллу и Максимилу, пророчицами нарицают, и прочая: темже, в того крестящиися не крещени суть.
Во образ же сего российския церкви подобие являем.
Понеже православная Христова церковь проклинает иже развращенно святое крещение творящих, иже глаголют священницы сице: «Се от мира Христа моего аз тя крещаю». Творят попы их Богом, а Божия имени не вменяют. И сицевое развращенное приглашение уподобительно есть монтанианьскому крещению, иже в того крещают, по соборному Филарета патриарха изложению, еже о римлянех явствуется [в Потреб., в чине от латин приход. В книге Кирил., в разглагольств. Конст. Панагиота со Азимитом].
Никон же, патриарх Московский, в Скрижали своей, защищая развращенное оное приглашение, и глаголет сице [Скрижаль, в слове о 7 тайнах]: «В божественнем и священнем евангелии оба глагола: еже крещаю глаголют, и еже крещается, обретается. Обоя за едино полагающи, утверждает, яко оба еангельска еста. Сим убо тако сущым, аще действительне, аще страдательне возгласится, не мнее исповедает благодати приити над крещающагося». До зде Скрижаль.
Но Симеон Фессалонитский, между крещаю и крещается, разньство сказует [Симеон Фес., книга 1, глава 64]. Еже бо крещается, вольное крещающагося являет: а еже крещаю, по насильству и кроме хотения, якоже латины творят, сказует.
По насильству же крещаяй, антихрист, по священным писанием, вменяется. Якоже Кирил святый и прочии святии о том довольно, пишуще, изъявляют, яко нуждою и насильством всех к себе приводити имать.
В великороссийстей же ныне церкви тайна крещения самою видотворится вещию, яко по насильству крестителя действуема есть. Понеже убо крещаяй священник, не по древнему чиноположению погружение действует, якоже подобает крестителю, с востока лицем обратився, и против хотящаго креститися став, и тако святым крещением просвещати, якоже в Потребнице, в чине крещения изобразися. И сим видотворением вольное прихождение и желание крещающагося являет, крестителя же аки любезне пред лицем стояща и приемлюща, иже с верою приходящаго и хотящаго креститися. И сим образом видотворится святаго крещения тайна, яко волею и желанием, и верою крещаемаго совершаема есть.
Но в российской ныне церкви креститель не от востока, но от запада к купели приходит, приемлет же созади крещающагося: и аки бы напрасно нань нападая, якоже волк на ягня, тако созади похитив его за главу, и таковым образом, аки бы давляше, погрузив в воду крещаемаго. И сим видотворением яко насильство его показуется. А еже аще действительне, сиречь крещаю тя, возглашати, якоже выше рехом, за едино со страдательным великороссийскою церковию приемлется. По соборному же изложению Филарета патриарха и Симеона Фессалонитскаго, таковое крещение есть насильническое, и крещающий тако творится Богом, якоже изъявися.
Но в российстей церкви аще и страдательне, сиречь крещается, приглашение глаголется, обаче к тремя божественным лицам четвертый аминь приглашается, якоже видети есть в новых Требниках. И на коеждо приглашение возводит и низводит в купели крещаемаго повелевается действовати, якоже и бывает сицевое законоположение совершаемо. Убо сицевым четверократким аминя приглашением, и на всякое приглашение крещаемаго возвождением и низвождением погружаема, не мнится быти лучше латиноримскаго крещения, еже в приглашении развращеннаго, и церковию зазреннаго, монтанианскому уподобительнаго. Ибо не чувственно у римлян в свое имя креститель их приглашает, но развращенно действительным залогом, сице [Конст. Панагиот ко Азимиту]: «Се от мира Христа моего аз тя крещаю», и приглашает: «во имя Отца и Сына и Святаго Духа аминь». О чесом Иосиф патриарх в послании к Валдемару королевичу пиша, и зазирая еретиков сице: «Яко римляне и прочии обливают не разньственне по испостасех со единем аминем. но мы, рече, у всякой ипостаси, аминь приглашаем». До зде Иосиф.
Такоже и в Разговорах древлероссийстии учители Дмитрей Франзбеков да ключарь Иван Наседкин попу Валдемарову Матфею сице о трех аминях засвидетельствуют: «Еже крещати во имя Отца аминь, и Сына аминь, и Святаго Духа аминь. и то станет, во имя Отца истиннаго, и не слита составом по Савелию, и не пременяема по Евномию еже в Сына и Духа. и потом, и Сына, аминь. и то Сына Божия истиннаго же, а не тварь по арианьски, ни по савелиански сливаема во едино лице, ни по Евномию пременяема. и потом и Святаго Духа аминь. еже и в Духа Святаго Господа истиннаго и животворящаго, а не тварь по Македонию. и Матфей немчин молвил: и то де добро у вас так, а у нас де того не бывало. и мы ему говорили: да как же вы крестити? и он сказал: мы де обливаем, а говорим во имя Отца и Сына и Святаго Духа, аминь единожды, а не три аминя. и мы ему сказали: так вы по савелиански крестите». До зде от Разговоров.
И по сим свидетельствам показуя, показуется, аще с единем аминем крещение содеваемое, будет савелианьской ереси согласно, и во един состав три составы Святыя Троицы сливаемей: убо, последовательне, с четырьми аминями форма, а крещения ясне не в три лица, но в четыре разделяема изъявится, и тем во единой ипостаси Святаго Духа две испостаси изобразитася. И сим приглашением Святаго Духа на два начала явне разделяют [Кирил. Иерос.]. И есть се презелное еретичество, и первое от святых отец седми вселеньских соборов отступление. И убо да весть всяк, яко сие злое размышление всем ересем глава, от него же вся иныя ереси прозябают. И за толикия презельныя ереси всех еретик довлеет совершенно крестити, о чесом Филарет патриарх во Изложении пишет [в соборном излож. Филарета патр., лист 576].
И сицевым приглашением аще действуется крещение, убо не точию латиноримскому, не точию монтанианскому и савелианскому уподобительно есть крещению, но и всех ересей паче нечестивейше обретается: яко злое размышление, и глава всем ересем от сего вводима имать быти зловернейше, и того ради вящши всех ересей нечествуется.
Статия, 14.
А еже еретицы евномианы вместо крещения воду возливают на главы своя до пояса, и молитвы своя творят в тайных местех земли, церкви же и храмин не имеют.
Во образ же сих российския церкви подобие являем. Яко в российстей церкви тайна крещения, яко в три погружения и в поливании за едино приемлется, и за равносильно вменяется, якоже показуется в новоизданных книгах. В книге О поливательном крещении, изданной от Синода, на листу 47-м, сице пишет: «Ибо мы приемлем крещение погружательное, не отмещем же и поливательное, но сие и оно за равносильно, и ни едино отметно исповедуем». И на листу 17: «Яко погружение не есть главнейшии крещения обряд, и потому не так важныи и сильныи, дабы за него мощно, аки за некии догмат веры, брань христианом творити, и церковное единство раздирати». На листу 54-м, паки: «Отнюд порицати не подобает, аще тремя погружениями младенец крещается или единем, понеже в трех погружениях Троица лиц, в единем же единьство Божества изобразитися может». И в книге Потребнице Петра Могилы погружение и поливание за едино же полагается и приемлется. Еще же в книге, нарицаемой Мир с Богом, сице написано [лист 108]: «Яко аще отроча недужно будет, темже баба, аще не весть отроча трижды погрузити, или воды на него возлияти, смертне согрешает». И на листу 109-м: «Ведати подобает, яко аще неудобно будет рождение. отроча же во утробе матерней близ смерти сущее, показало бы главу точию, или ину кую телеси часть: тогда, убегающе беды смертныя на отроча, и та е крестит баба, или кто абие, поливая часть ону, яже бы ся показала». До зде из Мира.
И сицевыми неправославными тайнодействы церковными явственно с евномианы показуется согласие.
А еже глаголют: треми погружении Троица лиц, а единьством единство Божества изобразитися может. Но и сие их мудрование елико святому Златоусту и прочим учителем церковным (научающим чрез три погружения, не Троицу лиц, но тридневное погребение и воскресение изображати) противно [к коринф. беседа 4, лист 1062. Евангелие поучит. на Крещение Григория Нискаго. Григорий Богослов на Просвещение. Василий Вел. Иоанн Дамаскин], толико Савелию Ливийскому и Монтану согласно, исповедающем слияние о Святей Троице: того ради и при крещении на коемждо погружении всех трех ипостасей имяна купно изгласивше, крещаху. Великороссийская же церковь не точию водою, аще и обливанием, по святых апостол, омыватися на души первородному греху исповедует, но кровию Иисусовою, подобне скверным лютером (якоже писано есть в Разговорной книжице с люторским попом Матфеем, бывшим Датския земли с королевичем Валдемаром). Темже она, яко же таинства погребения и воскресения Христова в крещении своем не изобразует, сице и развращенною мыслию, по лютеранскому мнению, не водою крестительною, но кровию своего Иисуса омыватися верует.
А еже, якоже предложихом, повелеся в неудобствии рождения младенца, в лоне матернем суща, показующуюся некую часть из ложесн, поливанием крестити. Сицеваго сквернаго действа ни в каковых еретиках не обретается, еже тайны церковныя в подпупии женском действовати.
Но оле скверныя сея латинския бани, над подпупии женском действуемыя! Како не возгнушахуся великороссийстии духовныя власти, сицевую мерзость в тайнодейства церковная прияти? Воистину благовременно есть к таковым рещи, яко не восхотеша Бога имети в сердцых своих, предаде их Бог в неискусен ум. И сицевое убо онех тайнодейство, вящьше всяких еретических действ сквернением превозшедшо быти разумеется, и за сие вящьшему суду подлагати сих долженствует.
Статия, 15.
А еже тыя же еретицы евномианы, иже поливанием крестящиися, церквей и храмин не имут, молитвы же своя творят в тайных местех земли, от них же впреди показася.
Во образ же сего российския церкве подобие являем. Яко в книзе, нарицаемой Мир с Богом, написано есть сице: Что, взяв антимис, в простых храминах литоргисати, аще и в скаредном месте, повелевается, и сего ради с евномианы и с римляны российския церкви согласие является. О чесом Филарет патриарх, в соборном изложении пиша, зазирает латин, что службы своя совершают кроме церквей. А скверныя их костелы несть подобны церквам Божиим быти сказует [Потребник Бол., лист 573]. И тако во всем, яко в поливательном крещении, так и в службах их, якоже и евномиан, равно еретичествующих нарицает.
Такоже и в России церкви не подобны суть церквам Божиим, понеже священи бывают не по древнему чиноположению церковному, но по новопреданному от Никона патриарха уставу. В нем же антимисов древних со крестом Христовым и с мощьми святых иметь на престоле не указует, но вместо антимиса повелевает иметь положение Христово во гроб. Креста же и мощей святых не имеющи, и к престольной сорочке пришивать не повелевает, но точию на престоле имети, и вместо антимиса сие вменяют. Сицевый же их антимис с престола многажды подвижим бывает, и вносят его в простыя храмы.
Но по древнему чиноположению [Потребник, в чине освящения церкви], антимис повелевает пришивать к престольной сорочке. Престолы же святым мvром мажут, кресты творяще. Аще случится подвижим быти престол, и не возможно будет, не сняв антимиса, починить оный, и тогда сорочка престольная со антимисом снимается, ради поновления столпцев престольных: обаче антимис той от сорочки отнимается, и другий антимис на то место пришивается, а тот антимис под престол полагается, церковь же снова не свящати повелевается. А у них еще и многажды антимис их от престола просто снемлется, и паки тойже на престол просто полагается, церковь же снова не свящается. И по сему простыя их храмы, в них же служат и не освященныя, но паче оскверненыя, понеже во освящении их, вместо святаго мvра, мылом престолы мажут, кресты творяще.
Древния же святыя антимисы нынешнею церковию не точию отметаются, но и еще зельне с крайним уничижением ругательствуются. О чем во Обличении на ответы выговския, на статию 31-ю сице глаголют: «Понеже (реша антимисы древния) бяху зело неблагообразны, были ласкутки толстаго полотна, каковаго и деревенския мужики на рубашки себе не употребляют, разве в самой крайней нужде. и тыя ласкутки, вместо подобающаго на них изображения, так нелепо вымараны, что и смотрить гадко».
Темже российския церкве учители не точию просто отвергают священныя антимисы, но и еще с презельным таковым руганием. Убо не точию простыя их церкви имут нарещися храмы, но и еще Богу и святей церкви сопротивныя и скверныя, в них же служат и поливательное и единопогружательное крещение приемлют: тем, по Филаретову изложению, якоже о римлянех пишет, подобно евномианом еретичествуют.
Статия, 16.
Еретики манихеи солнце и луну боги творят. Во образ же сих российския церкве подобие являем.
Понеже бо римляне обличаются собором Филарета патриарха, яко солнца и луны, и прочих планит, сиречь звезд, двизания волшеством разсуждают: и под ними сказуют строитися человеческому рождению и смерти, и збытие времен и лет под неволею и под нуждою звездною быти написуют.
И сея ради вины уподобляет их манихеом, чтущим солнце и луну. Так и в россиянех, подобно сим исполняется. Яко настоящаго сего века любомудрецов, новоизданныя их календары повсюду в Велицей России обретаются, в них же по планитом мудрствуется о предбудущих летех и временех, что и каковое збытие хощет быти, благополучие. Вся же сия по планитом мудрствующе, мнятся познавати, и сему веровати не стыдятся. И сицевое их по планитом новомудрствованное вероятие согласно римляном и манихеяном. О чесом убо от древлеправославной церкви святыми отцы обличаются римляне, «яко по манихейскому учению блядословному, явно есть в сих мудрование астроложское, яко два начала противна и равномощна пребывают, еже несть сего и не будет во веки. Темже бо диавол невидимо вселился в них, но видимо же убо всеми действует волю свою в них, якоже хощет. [Ниже:] Но они всемогущаго Творца силу, тварь сводят, и в ничтоже в немогущих звездах строитися его силе, яже на казнь, или на честь и возношение человеком. и о сем довольно святыи и премудрыи старец Максим изобличает таковех в слове 10-м и 11-м в книзе своей». Потребник Большей, лист 571.
Но в Велицей России не точию что вне церкви по планитом мудрствуется и веруется: но и внутрь церкве, в самех действах церковных, согласно этому, сиречь господственное, звезд является предпочитание, якоже самое глаголемых молитв иерейских заключаемое разумение достоверство показует. В Потребнике, в чине крещения человек, в молитве: «Велии еси Господи», вместо: «Тебе молятся звезды», написано есть и глаголется: «Тебе присудствуют звезды». А в первых их выходах написано: «Тебе собеседуют звезды». И обоя сия речения богопротивна еста, има же звездное почтение и обожение быти является. Понеже бо аще собеседовати и присудствовати звездам Богови, то убо господственное звезд является.
Еще же в новоизданных великих Требниках, в молитве, под именем мученика Трифона, глаголемой на заклинание мушиц, червьвий, гусельниц, мышей и прочих вредящих, написано есть сице: «Заклинаю вас Святою Троицею, таже вочеловечением Господним». Таже глаголет: «Еще заклинаю вас великим именем, на камени написаным и не носившым, но разседшимся аки воск от лица огня». И сицевое молитвословие богопротивно есть. Показуется некоей твари, кроме Божества триипостаснаго, обожение. Понеже аще неким великим именем, на камени написанным и не носившим, но разседшимся, заклинати, и паче Святыя Троицы сие имя возносити богохульно есть: согосподьственно же быти является Афродите звезде, юже чтут срацыны, на камени написаную [Потребник, в чине отрицания срацын. Минея чет., киевопечат., генваря 2]: согласно же имени жидовскаго волхва Замврия, о котором в житии святаго Силивестра, папы Римскаго, показуется.
И сицевое, якоже предъявихом, молитвословие, такоже и планитное по календаром мудрование, согласно есть манихеем и римляном. Суть же и ина многа в Велицей России, согласная сим, обретаются еретическая мудрования и верования, яже суть тайная волшвения и чародеяния, встречам верования, и соннаго мечтания волшебная разсуждения и верования: которая не суть явленна, но прикровенна, яко мирскими, так и духовными и всякаго чина людьми мноземи содержима суть: чесо ради, вышеписанными еретики, яко с манихеи, так и с римляны, злыми своими и богомерскими мудровании удобь соглашаются.
Статия, 17.
Еретики маркионити учат три начала Божеству проповедати, и крещение дают не едино, но и две и три.
Во образ же сего российския церкве подобие являем. Яко трегубая аллилуия, с приглашением слава Тебе Боже, на псалмопении и во всякой службе великороссийскою церковию Богови приносится.
В Стоглаве же древлеправославною церковию, соборным судом явственно обличаются, яко сия латынская ересь. Не славят бо Святую Троицу, но четверят. И Духа Святаго от Отца и от Сына глаголют исходяща. И тем раболепна Святаго Духа творят [Стоглав, глава 42]. И премудрый Максим Грек, обличая латин, о аллилуии трегубой изрече, яко латинскаго костела чиносодержание [книга Максим Грек, глава 28]. Собором же Филарета патриарха осуждаются латины, яко Духа Святаго от Отца и от Сына глаголют исходяща, и тем Его на два начала разделяют [Потребник Вел., лист 575 и 576]. Свидетельствует же и в Катихисисе Велицем, «яко латины начало Божествц второе вводят, еже и от Сына исходити Святому Духу». До зде Катихисис.
И аще сие догматствование, еже от Отца и Сына исходити Святому Духу, по Катихисису и по соборному изложению Филарета Патриарха, начало Божеству второе вводит, еже и великороссийская церковь во аллилуии трегубой имеет, еже от Отца и от Сына исхождение Святому Духу прилагает, яко же в Стоглаве изъявися: убо и великороссийская церковь начало Божеству второе вводит, по вышеписанным свидетельствам святыя церкви.
Но великороссийская церковь не точию троящи аллилуию с четвроприглашением слава Тебе Боже, но и много усугубляющи, сиречь до 7-ми и до десяти крат, и множае воспевающи Богови приносит [после причастия на литоргии]. Аще ли же трегубая аллилуия, с четвероприглашением слава Тебе Боже, Духа Святаго на два начала разделяет, и тем начало Божеству второе вводит: кольми паче, аще многоусугублением сим может многоначалие вводитися имать зловернейше, еже убо и маркионитскаго о Божестве триначальнаго разделения нечестивейши суть.
А еже тыя еретики, сиречь маркионите, не едино дают крещение, но две и три: так и великороссийская церковь не едино же содержит и взаконяет крещение, но две и три, сиречь трипогружательное, единопогружательное и поливательное, якоже изъявихом: такоже и чрез развращенное приглашение, сиречь «крещаю тя аз», в закон приемлет, и за равно со страдательным вменяет. А еже аще и страдательным залогом, сиречь крещается раб Божий, возглашая, но к тремя троичным лицам четвертое лице к Святей Троице прилагается, и сим начало Божеству второе же вводится, еже маркионитскому о Божестве разделению свойственно есть.
Статия, 18.
Пресвятая же Богородица списателю жития преподобнаго Евфросина, о трегубой аллилуии открый сицевое таиньство, якоже сице рече ему [месяца маия в 15, житие старописм. преп. Евфросина]: «Нужду ми творят христианя неведением своим, трояще божественную тайну сию. юже аз Богородица тебе повелеваю, дважды да глаголется тая правоверными божественная аллилуия, понеже то есть тайна воскресения Христова. [Ниже:] А идеже бо троится божественная аллилуия, ту есть прилагается чуждии бог языческии, понеже мнози суть бози еллинстии. [Ниже:] И аще не сия тайна божественнаго аллилуия, яко не воскресе Христос по страдании своем, и не воскресе Бог, то пророцы ложно пророчествоваша, и Дух Святыи солга, и Бог не воплотися в мя, и Христос прост человек распятся, и умре и не воскресе, ни аз Дева Богородица, и апостоли вотще трудишася, и мученики и мученицы горькая и лютая пострадаша в безумии, дела и вера хрисианьскаго сияния света потемнело и мертва суть. и новая благодать истиннаго закона, иже бысть неложна есть». До зде от жития святаго.
Зри убо, о вопросителю, отверстыма очима сицевое пребольшее еретичество. Разумей сие быти первое от седми соборов святых отец отступление. Познай е главу быти всем ересям, от нея же всем им прозябение быти сказуется. Веруй явлению Божия матере, и таиньственному ея откровению о трегубой аллилуии. Како сия едина презельная ересь довольна есть на отчуждение всего христианьскаго благочестия. Яко не славится, но четверится Святая Троица, и тем чуждий бог языческий прилагается, понеже мнози суть бози еллиньстии. И аще чуждыя боги языческия прилагаются, убо и множество бесовское от сего вводимо быти имать зловернейше. Яко же пророк рече: «Бози язык бесове, Господь же небеса сотвори». Но паки на предлежащее возвратимся.
Статия, 19.
Еретики маркионисте суть месалиане, иже последуют Оригенову мудрованию, и приходящих от различных грех прощают без всякаго страха, чрез божественная правила, и не разсматривают плодов покаяния, скоро всяк грех мнятся очищати [Потребник Велик., лист 574 (552?)].
Во образ же сего российския церкве подобие являем. Яко по Духовному Регламенту правительствущаго Синода повелевается, аще кто и в смертных гресех обрящется, таковаго без ептимей разрешати и причастия сподобляти, якоже данныя от архиереов священником книжицы чин исповедания о том свидетельствуют [Регламент, разсуждение 14. И указ перваго императора, книга Устав духовной, издан в лето 1723, лист 16].
Но преподобный Никон Черногорский в 52-м слове книги своея, еже грехи без епитимей разрешати, показует согласие многих еретиков: месалиан, рекше евтих, енфусиан, хоревт, лампетиас, аделфиан, евстафиан, маркионит и евтихиан, иже безсловесно человеколюбие вводят, от сатаниньския гордости не покаряются божественным правилом и законом, просто рещи, грехи прощают без епитимей.
Блаженный же Филарет патриарх, в соборном своем изложении сей месалианстей и василианьстей ереси уподобляя римлян, тако глаголет: «И римляне убо и вси еретики иныя, от всех различных еретических вер, такоже по месалианьскому мудрованию и василианскому, человеком грехи отпущают без епитимей, и не разсмотряя плодов покаяния, и такоже скоро от грех мнятся очищати, и равну ересь в себе с месалианы и василианы содержат. и того ради убо подобает и римлян, и всех приходящих к нашей православней вере греческаго закона, совершенно крестити». Потребник Велик., лист 574 (553 об.?).
В великороссийской же церкви тая же месалианьская и василианьская ересь, еже грехи без епитимей отпущати, взаконяется, убо по блаженному Филарету, и крестить от нея приступающих к православию летьствует.
Статия, 20.
Еретики, нарицаемыя павликиане, мудрствующе о Христе смиренная, и проста Того человека быти проповедают, о них же в 19 правиле перваго вселеньскаго собора в толковании повествуется.
Во образ же сих великороссийския церкви подобие являем. Преподобный Максим Грек в книзе своей, во главе 72, ко Иоанну Лодовику зазирает римскому стихоразделению, еже от Иоанна во евангелии, во главе 5-й имеют стихами разделено сице: «И власть даст Ему и суд творити, яко сын человечь есть». И сие стихоразделение нарицает не согласно греческому правописанию, имущему сице: «И власть даст Ему и суд творити». Зде точка полагается. Таже аки от инаго начала прочитают: «Яко сын человечь есть не дивитеся сему». В новопечатнем же Требнице, изданнем во 167-м годе, в чине погребения мирян, монахов и священников, во евангелии от Иоанна, сие стихоразделение, подобно латинскому, от преподобаго Максима Грека зазренному, обретается сице [27, 28 стих]: «И власть даде Ему и суд творити, яко сын человечь есть. не дивитеся сему», и прочая. Святии же Златоуст и Феофилакт в толкованиих своих сие стихоразделение ересь объявляют быти Павла Самосатскаго, о чесом в Беседах на евангелие, от Иоанна в беседе 39: и в Благовестнице, в толковании зачало 16 от Иоанна явствуется.
В новопечатных же книгах: в Жезле, на листу 79-м: и во Увете, на листу 139-м: о новоначертаемом имене Иисусове толкуется: «Литера «I» образует Божество, а литера «и» образует человечество. а где Iсъ, тут будет простыи человек». Темже и сие толкование новопечатных книг не неравно обрящется Павлу Самосатскому, Христа простым человеком нарицавшему.
Убо великороссийская церковь, якоже сим стихоразделением, такоже и самомнителным толкованием о имене Исусове, всячески уподобитися имать ереси Павла Самосатскаго.
К сему же еще великороссийская церковь не точию Сына Божия простым человеком возъименова, но и еще на образуемую тайну во двою естеству Бога же и человека, еже древлеправославная церковь в двух перстах, в знаменовании крестнаго знамения, благочестивне исповедоваше. То убо православное святыя церкве исповедание нынешнии новомудрствующии учители злословне демонским и чертовским и волшебным знамением, оле дерзновеныя смелости, возхульствоваше, порекоша. О чем Димитрий Ростовский в Розыске, в части 2-й и в статии 3, пишет: такоже и во Обличении на выговския ответы, на листу 1-м и 26 засвидетельствуется.
Темже российская церковь не точию Павлу Самосатскому и Савелию Ливийскому, перваго чина еретиком подобится, но и еще хулою своею вящше к Богу приражается.
Их же, Павла Самосатскаго и Савелия Ливийскаго, в толкованиих 1-го вселенскаго собора 19 правила, и Лаодикийскаго собора правила 7-го, повелевает совершенно крестити святым крещением: убо и от российския церкве приходящих, по тем же правилам, летьствует крестити.

Довольно ли ти, вопросителю, ко увещанию твоего мнения, яко бы российская нынешняя церковь не причащается в мудровании своем вящшим ересям перваго чина еретиков? Зде убо явне в вышших разделах изъявихом, яко не единой ереси оной согласует, но и зело многим. Иди, если тебе неукоснительно покажется, изъявим ти и еще российския церкве согласие в премножайших догматах и содержаниих и обычаях, елико латиноримским ересям, толико лютерокалвинским новопреданиям: и яко подобообразие еллинским многим обычаем, тако агарянотурским законосодержаниям, их же зде на среду по последованию исчисления статей представляем.

Раздел, 8.
Статия, 21.
Латини и люторы мудрствуют Христа Бога от Иоанна Предтечи в реце Иордане обливанием крещена, о чесом в книге О вере, на листу 283 и 285-м: в Разговорах с Вальдемаром, королевичем Датским, являет: такоже подобне и гречестии нынешнии архиереи мудрствуют. Еже Досифей, патриарх Иеросалимский, в грамоте государем российским Иоанну и Петру Алексеевичам писа. яко бы Иоанн Предтеча Христа в крещении обливал, а не погружал. Сообразне же во всем и российстии архиереи в новопечатных книгах предают: в книге Трубе, в слове на зачатие Иоанна Крестителя, и в первом слове на Богоявление. такоже и в новоизданной Синодом О обливании книжице о сем некако, к тому же склонно, предают.
Святая же древлеправославная церковь в проклятии латинских и люторских ересей тако возглашает [Потребник, в чине от латин и люторов приходящих, лист 603]: «Проклинаю скверное крещение их обливаемое, а не погружаемое по Господню образу, иже во Иордане, и святыми апостолы нам преданное в три погружения, во имя Отца и Сына и Святаго Духа». Темже сим противным мудрованием (еже Христу обливанием крещену быти) как латиняне, так грекороссийстии учители, самого Христа Спасителя причастником творят ереси евномианской [Матфей Иерос., сост. а, глава 2].
Статия, 22.
Латыни мудрствуют о зачатии человечестем, что не вкупе душа с телом созидается, но обои сии части человечества порознь бывают, о чесом в Катихисисе Велицем, во главе 59 засвидетельствует.
Подобне сему в новопечатней же книге Жезле, изданной от собора, на листу 27-м мудрствуется, что мужеск пол по 40 дней, женский же по 80-ти, одушевляется.
Святый же Афанасий Великий сие мудрование манихейской ереси быти сказует, о чем в ответе 16 ко Антиоху князю пишет.
Преподобный же Иоанн Дамаскин в книзе своей, в слове 23-м [в новопеч. глава 14], сие разумение о зачатии человечестем сказует быти оригеновой бляди. Противно же сему великороссийския церкве мудрованию и преподобный Иоанн Лествичник [Леств., лист 216 на обор.] и Симеон Фесолонтский [Симеон Фес, во ответе архиерею] пишут.
Темже российская нынешняя церковь в сем мудровании, еже о зачатии человечестем, не точию сообразует латинам, но подобится манихеем и оригенитом, убо и тому же на них изнесенному суду, еже не приимати крещения, повинна суть.
Статия, 23.
Богомерзския агарянотурки о воскресении мертвых проповедают, что мужие яко мужие, жены же яко жены востанут, и всякое наслаждение плотьское тогда будет. О чесом в Потребнице, в чине орицания срацын: такоже и многопремудрый Максим Грек в своей книзе, во главе 8, на маомефян засвидетельствует.
Великороссийская же нынешняя церковь подобне оным агарянотурком мудрствует. О чесом в новопечатней книзе Скрижали, в ответах Афанасиевых, сицевое догматствование о воскресении мертвых внесено (его же в древлеписменных не обретается), ибо в воскресении мужие яко мужие востанут, жены же жены. И в книжице Стефана, митрополита Рязанскаго, о антихристе, на листе 128-м, подобне напечатано: «Мужи в мужеском, жены в женьском полу востати имут», и прочия доводы его.
Сицевое российский церкве учителей мудрстование о воскресении мертвых, елико самому Христу Спасителю нашему Богу, глаголавшему саддукеем: яко в воскресении мертвых ни женятся ни посягают, но яко ангели будут, зело есть сопротивно, толико и учителем церковным: Афанасию Великому [из старописм. Ответы князю Антиоху Вел. Афанасия, ответ 24], блаженному Феофилакту архиепископу Болгарскому [Благовестник от Луки назач. 102], великоразумному творцу Душезрительнаго Зерцала [Зерцало Душ., слово 3, глава 10] и святому многопремудрому Максиму Греку [Максим Грек, глава 72, к Лудовик. в 21], такоже и Великому Катихисису [Катих. В., глава 21], весма не согласно: сообразно же всячески будет срацынотурком, якоже выше засвидетельствовахом.
Убо чрез сию отрасль ереси агарянския, и на онех изнесенному суду православныя святыя церкви, новомудрствующии учители повинни суть.
Статия, 24.
Латыни в своих костелах многажды на коленях стоя молятся, о чесом обличают их Дионисий, митрополит Московский, в соборном ответе: и в слове о Флоренском соборе в Минеи четии Макариевской августа месяца. И турки и татаре в своих мечетех и в домех на коленех стоя молятся, о чесом новопечатный Елкарон, такожде Исистима извествуют.
Сице же сообразно онем и в российских ныне церквах, на прежеосвященной литоргии, на дася исправит молитва моя, и на троицкой вечерни, на молитвах, всем людем и служивым на караулах во множестве, на коленех стоя молитися уставлено, согласно латином, и турком, и татарином.
Статия, 25.
Иоаким патриарх в книзе своей Щите веры, еже в литургии просфире в плоть Христову и вино с водою в кровь прелагатися словесы Христовыми: приимите и ядите и пийте от нея, латинскою ересию нарицает.
Сию же латинскую ересь (от Иакима патриарха нареченную) нынешнии российстии архиереи в книгах своих утверждают: в Жезле, собором изданной: в книзе Мир с Богом, на листу 118, 119, 120: в книзе Требнике Петра Могилы: в книгах Обеде и вечери, и в книзе Месия правдиваго, на листу 138.
Статия, 26.
От нынешния великороссийския церкве к тому же возглашению словес Христовых звон уставлен [Щит веры, беседа 3], инии же и поклоны полагают, латинским обычаем.
Статия, 27.
Пение партесное новокиевское ныне в России в церквах воспевают, многоусугубляемое, со воздвижением всея плоти, с покиванием главы, и с помаванием рук, от латин приятое, о чесом в конце Номоканона афонстии отцы являют и запрещают таковая пения [Потребник Вел., лист 744]. Но и бывшии в России гречестии новии патриарси, Паисий Александрийский, партеснаго пения пети не повелеша.
Статия, 28.
В древлепечатных святых евангелиях и благовестницех, и на святых древних иконах, воображахуся святии евангелисти: Матфей лицем человеческим, Марко орлим, Лука телчим, Иоанн львовым. Еже и святии согласно сему протолковаша: Андрей Кесарийский во Апокалипсии: Анастасий Синайский в вопросе 57-м, и в древлехаратейной Кормчей в толковании литургии. А латины пишут Марка лицем львовым, а Иоанна лицем орлим, о чесом изъявляют святейший Филарет патриарх собором и Иов, митрополит Киевский, собором во обличении на книгу Кирила Транквилиона, лист 40.
Подобне и ныне в России во евангелиях печатают, на иконах воображают, и в книгах мудрствуют. В Скрижали лист 163, и в предисловии евангелия, согласно латином, Марка лицем львовым, а Иоанна лицем орлим пишут и мудрствуют.
Статия, 29.
Латины пишут распятие Христово странно и необычно: на двух древах испревращенно висит не по подобию, и длани пригвождены, а персты не распростерты, но зжаты: а подножие пишут у креста впрям, и обе ноги Христы един гвоздь вонзен. О чесом в послании великаго князя Московскаго Василия Васильевича во Святую Гору, о Исидоре митрополите писаном, засвидетельствуется: и в другом такоже послании того же князя к царю Констянтинопольскому о Исидоре митрополите повествуется. в книзе же Сокровищи, изданныя тщанием Григория Малакса в лето 1568-м, на листе 655, распятие Христово видственне напечатано на двоедревнем кресте, руце обешене, и нозе единем гвоздем прибите.
Подобне и нынешнии новомудрствующии архиереи научают Христа Бога распята на кресте дводревнем, якоже в Пращице новопечатней, во ответе 115-м и прочих. И в книзе Розыске Димитрий, митрополит Ростовский, во 2-й части в статии 3-й, и прочии утверждают. От них же един Ростовский, хульствуя святый трисоставный крест Христов, и исповедуя Христа распята на четвероконечном римском, тако глаголет: «Яко на четвероконечном римском, а не на осмоконечном брынском Христос распят бысть». Но великороссийстии нынешнии учители не точию словесы, но и самеми делы словеса своя утверждают: воображают бо видственне распятия на двух древах без подножия и дщицы: индеже пишут сжатыми дланьми, и во обе ноги един гвоздь вонзен. И сие подобообразное изображение латином, и лютором, и калвином поставляют в церквах и в домех, и в книгах печатают: в Служебниках в лето 7207: в Тетроевангелии в лето 7209: в Завете в полдесять в лето 7210: пред Деянием в Октоике в лето 7214, в 3-м, 5-м и 6-м гласех: в Служебниках в лето 7206, пред вечернею: в Беседах апостольских в лето 7217, во второй части, на листе 1230-м.
Статия, 30.
В литургии нынешнии российстии архиереи две просфира: 4-ю за патриарха, пятую за царя, отложиша. Круг около креста с надписанием евангельским: Се Агнец Божии, вземляи грехи всего мира, образующий Бога безначальна и бесконечна, нас ради воплотившася и пострадавша. И посреди его крест трисоставный, на котором Господь распяся, и крови своея лиянием его освяти, с копием и тростию, и с надписью: царь славы. Вся сия охуливше, от печатания просфир отвергоша. Противне же тому сотвориша печать четвероуголную, и посреде ея чтевероконечный крест, или крыж латинский. И тем свои просфиры печатают, и над таковым служат.
Статия, 31.
На панагиарном хлебе крест трисоставный с копием и тростию, и с надписание: царь славы, в древлеправославной церкви полагашеся [во Уставах, лист 2, в других, лист 53]. Нынешнии же российстии архиереи той отложиша, печатают тем же латинским крыжем, си есть четвероконечным крестом.
Статия, 32.
Артус трисоставным же крестом с копием и тростию в древлеправославней церкви печаташеся. В российстей же нынешней цекрви тем же латинским крыжем печатают. Аще убо Исидор митрополит похуляется от древлеправославных учителей, за еже ему поклонитися крыжу латинскому и поцеловати его, за то нарицается отступником: но и Московстии народи, князи и архиереи Антония леготоса с крыжем ни близ царьствующаго града не попустиша прийти, непщующе того ради почитаемой быти латинской вере. Аще убо Исидор митрополит приклякнувши к крыжу латинскому и того поцеловавши, отступником порицается [во всех древних историах]: аще впущение едино крыжа латинскаго в благочестивейший град, в почтителность веры латинской вменяшеся от правоверных, своей же православней поругание: коль паче нынешнии великороссийстии якоже священнии, тако и простиии людие, не точию крыжу латинскому кланяющиися, не точию целующии, но и причащающиися оным, исповедающе на таковом четвероконечном римском Христа распята быти [Розыск, часть 2, глава 24, лист 169 обор.], подобнии латином, и лютором, и калвином явятся, и на них изнесенному суду от древлевосточныя церкви повинни будут.

Насытился ли, о вопросителю, настоящим и прешедшими разделами, изъявляющими великороссийских архиереов согласие во множайших ересях с латинами и прочими величайшими еретиками? Гряди, еже ти кратко засвидетельствуем, да безответен будеши в своем защищении великороссийских нынешних новопреданиев, древних еретиков увеличивая, настоящих же уменьшивая и скращая. Аще мы по худосилию своему коликая вам предложихом: аще малокоснутием коль премножайшая засвидетельствовахом: что же рещи имаши вопреки, аще вся тебе подробность представлена будет, которыя на изъявление ниже время, ниже возможность послужити имать? Зде убо умолкнув, слыши еще в прибавление предлагаемых согласие нынешния церкви с латины, люторы, калвины, с срацыны, и с еллины и с прочими еретики.

Раздел, 9.
Статия, 33.
Злославнии еретицы Евтих и Диоскор бежаста Несториева разделения, два Сына глаголющаго, и во ино зло впадоста: ибо двема естествома, Божеству же и человечеству, по совокуплению убо смеситися и во едино сотворитися естество нечестиво проповедаста, а два естества во Христе исповедающих проклинаста [в Кормчей, в предис. 4-го собора, лист 93].
Подобне оным и российстии архиереи ныне на знаменование слагают три персты первыя, образующе Святую Троицу во едином существе. Теми же перстами, в том же соединении и совокуплении, и смотрение воплощения Слова Сына Божия мудрствуют, сливающе во едино естество [Скрижаль и Псалтырь в полдесять новая, лист 13]: а двема персты, два естества во Христе образующих и исповедающих, несторианским разделением в два Сына порицают и словесно глаголюще [Скрижаль, лист 99 и 409]: «Умно услышим и да не прельщаемся сугуба быти Христа, по неизреченному Его соединению, из Божества глаголю и из человечества. якоже Евтих и Диоскор злоумствуют. идеже бо исповедается два естества во Христе, ту две воли. а идеже едино естество, тамо и воля едина есть», убо сие исповедание и имать причастно быти единоволной ереси. Таковых всех святая церковь проклинает сице [Потребник, лист 658 на обор.]: «Не исповедающыя дву естеству и дву волю, един же состав при Господе нашем Исусе Христе не исповедающе ни приемлюще, да будут прокляти».
Статия, 34.
Нынешнии великороссийстии архиереи на знаменование себе слагают три персты первыя, и мудрствующе оными Святую Троицу образовати во едином существе и естестве. И теми треми персты, по их образуемою Троицею крестящеся, на себе крест воображают. И тако, не хотяще, богострастник в ересь впадают, Троицу страдавшую на кресте заключающе. Двема же персты, два естества во Христе исповедающих, проклинающе, богомерзским арменом еретиком уподобляют.
Но яве яко сами уподобляются арменом и севирианом еретиком, мудрствующим страдавше быти на кресте Божество: двою же естеству во Христе не исповедающим, но во едино естество вочеловечение Сына Божия сливающим, а исповедающих два естества во Христе проклинающим. О чесом оных обличают святии Иоанн Никейский, Иларион Мегленьский, и в Минеи четии, и в Баронии. А святая древлеправославная церковь, проклинающи не крестящихся двема перстома, вопиет сице [Стоглав, глава 31]: «Иже кто не знаменается двема персты, якоже и Христос, да будет проклят».
Статия, 35.
Древлевосточный учитель Константин Панагиот обличает латинскаго учителя Азимита [Кирилова, лист 237]: «Но твориши (рече) крест обоими персты, и последи палцем внешнею страною. и воображение креста твоего зрит вон. вместо еже бы им одеятися, якоже мы христиане, а ты совлачишися животворящаго креста». Сице и в Потребнице, в проклятии латинских ересей [Потребник, лист 597]. Такоже и у папы Формоса, тыяжде три персты благочестивым папою Стефаном быша отсечены [книга О вере, лист 240].
Подобне оным и великороссияне ныне, два перста: указателный и великосредний, и палец ко онем совокупляя, сицевым сложением знаменаются, не точию единем, но и всеми треми внешнею страною, и паче не одеваются, но совлачаются животворящаго креста.
Статия, 36.
Нынешнии живописцы пишут иконы не з древних святых чудотворных образов, греческих и российских, но от своего смышления, вид плоти Спаса Христа, и прочих святых одебелевают. И в прочих начертаниих во всем уподобляюще латинским и фряжским живописанием, якоже в Библеах их напечатано, и на полотнах малиованы, о чесом святый Симеон Фессалонитский обличает латин во главе 23 книги своея. И нынешний Иоаким, патриарх Московский, таковыя иконы запрещает держати и отмещет в духовной своей грамоте. Российстии же архиереи, и своему патриарху не последующе, на него сице пишут: «Иоаким Московский, будучи он таковыи завет написал, явно себе показал ревнителем руских деревенских мужичьих забобонов», и прочая. Обличение на статию 20 выговских ответов.
Статия, 37.
Нынешнии же живописцы пишут на иконах треуголник, и подписывают, Бог, латинским обычаем, о чесом обличает Максим Грек в слове противу Николая немчина [книга Кирилова].
Статия, 38.
Онии же живописцы пишут великий глаз, и на нем такожде подписывают, Бог, противно древнему живописанию. Понеже сего на древних иконоизображениях нигде не обретается, подобно латином.
Статия, 39.
Пишут пречистую Богородицу распростерты власы и в немецком платьи, побоно латином.
Статия, 40.
Иконы чудотворныя переписывают, и сложение древнее потирающе, новое же живописуют, подобно латином: о чесом засвидетельствует книга Пращица во ответе 109, на листу 192.
Статия, 41.
Во святую четыредесятницу и в прочия посты, егда поется аллилуия, во всех книгах и уставах повелено поклоны во всей службе творити земныя, кроме суботы и недели, и праздник великих святых. Латини же, люторы и калвини земныя поклоны в службах своих вси отвергоша: о чесом в книге О вере на листу 256 на обор., и в Кириловой на листу 264-м являет.
Подобне им и великороссийстии нынешнии архиереи поклоны земныя в вышеявленная времена вси отложиша [Пращица, ответ 147], и не творят отнюд си, кроме разве четырех поклонов, и то в великий пост.
Преподобный же Никон Черногорец в слове 57-м, и во Псалтырех малых напечатано сице: «Зане во многих окоренися таковое нечестие и ересь, и еже коленное не преклоняние во святый великий пост. проклято бо есть сие, и с еретики отвержено таковое злочестие, еже не творити поклонов до земли в молитвах наших к Богу в церкви во уреченныя дни».
Статия, 42.
Латини, люторы, и калвини и прочии мнози иноязычницы брады бреют. Которое брадобритие, якоже в ветхом законе, тако и в новой благодати, есть богомерзско и отметно [Левит, глава 19, и 21. книга 2 Царств, глава 10. Паралипоменон, глава 19]. Первии убо плевелоносители сея ереси суть их царей греческих Константин Ковалин иконоборец, из римских же еретичсеких пап Петр Гугнивый. Святый же Епифаний брадобритие ересию Евтиховою нарицает. Мнози же святии за не приятие брадобрития пострадаху: якоже преподобный Даниил от срацын, и святии Антоний, Иоанн и Евстафий в Вильне, и священномученик Исидор в Юрьеве Ливонском, и прочая. Преподобный же Никита Стифит студит латин о том же обличает.
А святейший Михаил, патриарх Цареградский, третию ересь латинскую брад бритие исчисляет. И прочии мнози безчисленнии, якоже гречестии, тако и российстии учители, брадобритие ревностне обличающе, зело богопротивною ересию нарицают.
Со всеми же учители древлеправославная церковь соглашающися, нечестивых латин за брадобритие проклиная, тако возглашает [Потребник Вел., лист 600 обор.]: «Проклинаю богоненавидимую блудолюбиваго образа прелесть, душегубителныя ереси, еже остригати браду, ейже бысть началник Петр Гугнивыи, Римский папа, во царех же гноеименитый Константин Ковалин», и проч.
И святейший патриарх Иосиф со освященным собором брады бриющих церковней клятве предает, и всякия святыни и общения верных отлучает.
Подобне же и нынешнии великороссияне, презревше самого Бога и святых апостол, и учителей церковных запрещения, и соборныя клятвы, образующеся латином, лютором и калвином, такоже брады бриют, но и оправдают сию ересь. О чесом у Димитрия Ростовскаго в книзе Розыске, в части 2-й, во главе 19, на листу 113, 124, 130 и прочих, и у Платона во Увещании, на листу 71, явствуется.
Статия, 43.
Нынешнии архиереи попам повелевают усы подстригати, о чесом Димитрий Ростовский в книзе своей Розыске, в части 2-й, на листу 133-м утверждает, подобне татаром и срацыном.
Статия, 44.
Святый апостол Павел к коринфом в зачале 147-м, и Златоуст в беседе 26 толкует: «Всяк муж молитву дея, или пророчествуя покрытою главою, срамляет главу свою. всяка жена молитву деющи, или пророчествующии непокровенною главою, срамляет главу свою. едино бо есть и тожде оструганней». Покрывати убо мужу главу не должно есть, растити же власы присно возбраняет. Сего ради, якоже о жене рече апостол, аще ли же не покрыется, да стрижется. Златоуст: «Тако и о мужи, яко аще растит власы, безчестие ему. и темже и начиная глаголаше: всяк муж молитву дея, или пророчествуя покровенною главою. не рече покровенною, но на главе имея, показуя яко аще и нагою молится главою, косу же имать, равен есть покровенному. власы бо, рече, вместо одеяния даны быша. одеяние бо и власы едино быша». Глаголет апостол: «или ни самое естество учит вы, яко муж убо власы растит, безчестие ему есть. жена же аще власы растит, слава ей есть, зане растение власом одеяния дано бысть ей». Святый Златоуст протолкует: «муж аще власы растит, безчестен и начал свой отлагает, и покровенною главою молится Богу. жена же аще стрижает главу, начальство мужеское восхищает. обоя противна суть Богу».
Святый Епифаний Кипрский евхитскою ересию нарицает долгия власы плетущих и виющих и красящих, и таковыя отлучает [Никон Черногорский, слово 37]. И Никита Стифат, обличая латин, пишет [Кормчая, лист 388 и 389]: «Бог заповеда пророком, власы главы твоея не питай рече, рекше не обрости». Моисей отрицает, глаголя во Второзаконии: «Не сотворите (рече) себе челки, не извивайте влас». И Матфей Иеросалимский, во главе 9, 3 стих, красящих власы и плетущих отлучати повелевает. Латыни, люторы и калвины, власы долгия и накладныя носят, во всем подобная оным еретиком и евхитом. И россияне творят, власы долгия и накладныя напутривше носят, тако и в церквах Богу молятся покровеною главою. А святая соборная церковь на таковых вопиет [Потребник, лист 605]: «Проклинаю еретическое приятие, еже агарянским обычаем последствовавше, и не открытою главою молятся». А жены господьския власы стригут, такоже и девицы, и непокровенною главою мнози молятся, архиереи же не запрещают о сем.
Статия, 45.
Россияне дворяне и прочии, в домовном житии и во устроении всяком, во всем обычаи и поступки немецкия и лютерокалвинския содержат: платие и обущи немецкия носят, чела бриют, галстуки около шии носят, и парики и прочая. Такоже и женский пол все немецкое носят, и верхних зазорных частей тела не закрывают. А не хотящих тако носити принуждают, древним всем обычаем ругающеся отвращаются и ненавидят. В предисловии же о Разговорах с Валдемаром, королевичем Датским, носящих тако платье уподобляет бесом.
Статия, 46.
Латыни, люторы и калвины комеди строят, мужей в женския одежды облачающе, и поганския и бесовския лица накладающе, о чесом в книге О вере являет: равне и в России тожде творится.
Статия, 47.
В Минеи четии, сентября месяца в 1-й день [лист 3], сказует: «На первом соборе Никейском, от святых отец уставися праздновати в той день индикту, еже есть новому лету. тако в восточней церкви в греках, яко в России, во оный день согласно древленовому лету, сиречь году, начало творяше, праздноваху. в той день и служба уставлена вся с преподобным Симеоном новому лету». Латыни же и люторы изменивше сия, начаша году начало творити генваря в 1 день. И лета числят не от создания мира, но от Рожества Христова, осмь лет убавляюще. Такожде и россияне ныне, подобящеся им, сотвориша начало года генваря в 1 день. И лета оттуду счисляюще, осмь лет от Рожества Христова убавиша.
Статия, 48.
Латыни на костелах своих крыжи своя поставляют. Подобне им ныне и россияне на церквах и на колоколнях таковыя крыжы, си есть четвероконечныя кресты, поставляют. На иных же церквах великое и высокое острое на подобие шила поставляют, якоже на люторских кирках.
Статия, 49.
Латыни, люторы, калвины, турки и прочии языцы невернии со псы из единых сосудов ядят, о чесом святый Панагиот обличает Азимита. И в Потребниках, в проклятии латинских ересей возглашается [Потребник Велик., лист 594 об.]: «Проклинаю беззаконнаго Петра Гугниваго, иже со иными и со псы из единых сосудов ядят». Подобне оным и росияне мнози из единых сосудов со псы ядят, а наипаче дворяне се творят.
Статия, 50.
Латыни и люторы, и прочии языцы, давленину, и псами и ястрепами пораженное, и в тенетах и в силах удавленое ядят (о чесом в книге О вере лист 257), и всяко скверно ядят (в Кормчей лист 401: в Кириловой лист 259: в Потребнике малом лист 240 и 246, ересь латынская 12). А святая церковь православная, проклиная, сице глаголет [Потребник Бол., лист 598 об.]: «Проклинаю всякое латынское скверноядение, иже ядят давленину и мертвечину, и прочая, и жабы ядят».
Равне и россияйне ныне, паче же высокия лица, птиц давленых и ястребами пораженных, и заяцы давленых псами и в петлях, и скверныя жабы и устрицы ядят.
Статия, 51.
Жидове, татарове, поганцы, латыни, люторы, и калвины, и калмаки, табак, всякими чрез естественными образы употребляюще, пиют (его же в книзе О вере, на листу 128, бесовским нарицает). Подобно онем и россияне питками и носом табак пиют, и во уста за щеку влагают, не токмо мужие, но и жены.
Статия, 52.
Святых апостол правило 69: «Аще которыи епископ, или презвитер, или чтец, или певец, в 40 дней, сиречь в великии пост, не постится, и во все лето, во всякия среды и пятки, да извержен будет. аще же мирскии человек не постится, да отлучится». И прочая святых апостол и святых отец завещания, в различных книгах лежащая, всегда повелевают в среду и пяток единожды без рыбы и масла ясти, кроме разрешенных седмиц, и праздников Господских и Богородицы, и святых великих. Святый Афанасий Великий глаголет [Номоканон, правило 13]: «Разрешаяи среду и пяток, сей распинает Господа, якоже июдеи. ибо в среду совет бысть на Него, а в пяток распяша и. разве точию в разрешенныя дни от церкви и праздник, не повинен есть разрешаяи». Святый же Цареградский патриарх Никифор в 5-м своем правиле глаголет: «Яко от священника, не постящагося среду и пяток, не достоит причаститися. ибо отчасти благочествовати, а отчасти нечествовати безместно». И Апполос, великий во отцех, всех согрешений страшнейшии глаголет: «В среду бо Христос предан бысть, в пяток же распят. иже убо сия разрешаяи, сей предает Спаса и распинает». Латыни среду и пяток же не постятся, о чесом в книге О вере лист 247 показует, и в соборном изложении лист 229, и в Кириловой лист 208. Яко люторы и калвины отнюд не постятся, такоже и россияне ныне среды и пятка не сохраняют. Ядят не единожды и с рыбою, а инии же млеко и мясо ядят. А духовнии не запрещают о сем, понеже и сами с рыбою и не единожды во оныя дни ядят, презирающе уставление святых отец.
Статия, 53.
Тоже святых апостол правило 69 глаголет: «Аще которыи епископ, или презвитер, или диакон, или певец, или чтец, или поддиакон, в 40 дней, сиречь в великий пост, не постится, да извержен будет. аще же мирскии человек не постится, да отлучится». Поместнаго собора иже в Гангре правило 18: «Аще кто от воздержащихся, кроме телесныя нужды, гордится, и преданныя посты во общину, и хранимыя церковию разрешает, целу сущу в нем и совершену помыслу, да будет проклят». (А како кий пост поститися, зри в Лаодикии собора правило 49, и 81: и во уставах во глав.: и Никон Черногорец, в слове 57. и в Тактиконе, в главах 1, 6, 7, 8 и 14: в Номоканоне правило 213, 220, 221, 223 и 225). Преподобный Никон глаголет: «И якоже паки на еретики проклинания имут, сице и на Владычняя посты преступающих. и елицы не держат посты тако, якоже лепо есть, с еретики от божественных собор святых отец спричитаемыи суть».
Латыни не хранят святых апостол и святых отец постов, о чесом показуется в Кормчей, и в Кирилове, и в Потребнице ересь 7-я их изъявляется, в соборном же изложении арианскою ересию именуется (и в Кирилове лист 249, и 259 и 237, и в книге О вере лист 127 и 247).
Церковь же, проклинающи, тако глаголет [Потребник мал., лист 257 на обор.]: «Проклинаю отвращающих христианскии пост святыя великия 40-цы, егоже латыни сами не хранят ни иноцы их, отвергше апостольское и отеческое предание». Такоже и люторы вся посты отвергли и не постятся. В Кирилове книге лист 264. Их же святая церковь такоже проклинает, глаголюще сице [Потребник Вел., лист 604]: «Проклинаю и отрицаюся вселетнаго обхождения их, весь закон не имущии поститися никогдаже». Такоже и калвины и прочии еретицы, и армени не постятся. Всем онем подобно и россияне ныне святых постов тако, якоже от святых уставлено, отнюд непостятся: понеже во вся дни многажды с рыбою ядят, инии же млеко и мясо, не разсуждающе постнаго хранения. А духовнии о сем не запрещают, зане и сами не единожды во вся дни и с рыбою всегда ядят. И сие воистинну несть пост, но преступление и насилование поста.
Статия, 54.
Нынешнии монахи на литоргии, на словеса Христова, открывают главы подобно латином. Ответы диаконовы, ответ 1, статия 68.
Статия, 55.
Мнози из нынешних монахов, как простых, так и освященных, птиц ядят, и всякое хмелное питие пиют, подобне латинским, о чесом их обличает в книге О вере, во главе 15, на листу 131 на обор. И в Потребнике, в проклятии латинских ересей, тако глаголет [Потребник Вел., лист 597]: «Проклинаю иже от латин творимая яве еретичества, поставляемым у них епископом, аще будет и от мнишескаго жития, мяса ясти без боязни повелевают. мнихом же их аще когда и мала болезнь прилучится им, мяса ядят».
Статия, 56.
Без крестов по татарски мнози ходят не точию мирския, но и духовныя [Скрижаль, слово Дамаскина. и в чине крещения крестов возлагать не указует]. Нецыи же из женска пола дворян носят малейшия анагнуски, из металла или драгих камени сотворенныя, подобне латином.
Статия, 57.
Ныне в России резныя и алебастровыя образы делают неблагочинным видом без венцов, подобно болваном еллинским.
Статия, 58.
Ангелов делают такожде из алебастра весма дебело и развращенно, по подобию еллинских купидонов, живописуемых на латинских картинах.
Статия, 59.
Нынешнии россияне аптеки и гофшпитали имеют, и в них всякия мерзости употребляют: и людей на уды, аки зверие дивии, терзают: и женская мертвая ложесна не точию руками осязают, но и очима на то мерзостно взирающе, ножем вырезывают, и в банки полагают, спиртами наливающе, чтоб долгое время не згнивши были, на зрение всем, на таковую мерзость хотящим смотрети скверными очима. Подобно древним еллином и латином, и лютором, и калвином.
Статия, 60.
Мертвых анатомят, и разными спиртами помазывают, с корениями утробы начинивающе, подобно жидом и древним в прелести нечестия отменным египтяном и еллином, лютором, и калвином.
Статия, 61.
Нынешнии россияне коньское рыстание имеют, подобно древним еллином, творящим таковая игры на олимпических подвигах, святаго же апостола Павла 6-му правилу сопротивно [Кормчая, лист 25].
Статия, 62.
Нынешнии власти как мирския, так и духовныя, с музыками и органами, и плясанием, и плесканием ядят и пиют, подобно еллином, лютором, и калвином, и древним жидом, погибшия в пустыни [Маргарит, слово 13, о лжеучителех. Ефрем, слово о недели].
Статия, 63.
Господа детей своих вместо божественных псалмов учат бесовским песнем [Зри о воспитании детей книги гражданской печати]: и вместо стояния на молитве учат тонцовать и прочим языческим обычаем, подобно латином, лютором и калвином.
Статия, 64.
Мнози нынешнии россияне с путреными волосами, намазанными салом, не точию в церковь, но и в олтарь входят, подобно арменом, латином, лютором и калвином.
Статия, 65.
Во время службы в церкви безчинно и без страха стоят гордостно, ови рукою подпершись, инии же ногу откинувши, друзии же без нужды седят и во время евангелия, подобно латином [Потребник, лист 592. книга О вере].
Статия, 66.
Комеди, оперы, маскарады творят противу воскресных дней и прочих Господьских праздников. И провождают всю нощь в таковой бесовской брани не точию мирския, но и духовныя, подобно латином, лютором, калвином и древним еллином.
Статия, 67.
Клирики немецкое платие носят и бороды бреют, подобно латином [Потребник. книга О вере, глава 28, лист 257].
Статия, 68.
Нынешнии монахи исподняи ризы, камзолы, штаны и рубахи носят, такоже и без мантии и клобука, и камилавки в кельях и по монастырю ходят, подобне латинским монахом.
Статия, 69.
Нынешния малороссийския попы и грузиньския, и господа, по совокуплении с женами не омываются, омывающих же ся называют махометанами, подобно латином и лютором.
Статия, 70.
Семинаристам, которыя учатся в школе, и их в духовныя чины производят, играти повелевают со движением всея плоти: и при обедах их уставляют музыкам быти, подобно лютором.
Статия, 71.
Во время прения, когда бывает в Москве университетских со иконоспаскими, при котором разглагольствии бывают духовныя лицы, тогда бывает музыка и многое безчиние.
Статия, 72.
Нынешнии господа из домов своих иконы древния выносят, вместо же их картины скверныя еллинских богов написуют, и древа, и птицы, и прочия животныя, подобно латином.
Статия, 73.
Аще же где иконы и обретаются, но точию по единой, и сии не поставлены благочинно, якоже у православных, но повешены, якоже у иконоборцов.
Статия, 74.
Треми гвоздьми прибивают Распятие, латинская ересь. Минея четия декабрьская печатей киевских, в предисловии.
Статия, 75.
По манихейскому учению, под нуждою стихийною строитися житию человеческому разсуждающе, и потому в духовныя чины производят. С 20-го июля до 1-го сентября в школах учитися не повелевают, и Катихисиса не толкуют, подобно лютором, глаголюще, что в сих месецех непонятие наук бывает. Сице и латыни во своих школах взаконение имут.
Статия, 76.
Егда бывает погребение у господ, тогда провождают умершаго в шляпах и с смолеными факалами, распустя волосы, подобно латином.
Статия, 77.
Нынешнии архиереи имеют посохи со змиями [Соборник, лист 303]. Есть сие жидовския ереси возобновление, на подобие древния медныя змии, вознесенныя Моисеом, и внесенныя во святая святых, и потом за неподобное поклонение от царя Езекия разбитыя [4, царств 18. Кирилова, лист 172 обор., глава 13].
Статия, 78.
В крещении, в чине миропомазания, ноги мажут жидовским обычаем.
Статия, 79.
В крещении не во осмый день многажды младенцем имяна дают [Симеон Селун., глава 62].
Статия, 80.
Неким имяна странна нарицают: якоже Юрья, Богдана и прочая, подобно латином [Потребник, в проклятии ересей латин].

Пришел ли еси к пределу доволствия, о вопросителю, в вышшем сем разделе, изъявляющем премножайшия ереси, внесшияся в великороссийскую церковь, разных еретических латинских, люторских, калвинских, еллинских и срацынских вер? И аще и сих мало ти покажется, виждь оныя зелнейшее хуление как на святое древнее благочестие, так и на благочестивыя вещи, и на святых древлегрекороссийских учителей. Виждь нынешних российских учителей неправедное мнение на священное писание. Виждь лживое их клеветание, сущее в союзе неправедном, во оправдание своих новостей, согласное с латины, с люторы и прочими еретики, о чесом зде в 10-м разделе предлагается.

Раздел, 10.
Статия, 81.
Нынешнии российстии архиереи, вооружаяся на древлесодержателей благочестия, хуляще соборне, тако глаголют [Жезл, изданный от Синода, на листу 17]: «Мы (реша), освященный собор, исходим, яко же Давыд, со Жезлом сим мысленным. и предати тя имать Бог в руце наши, и убием тя, и отъимем главу твою от тебе, сиречь твердь ересем твоим, си есть прочия уды, или части хуления твоего иноплеменнича, еже есть иныя сверстники твоя, и вся хуления их, в день сей птицам небесным и зверем, сиречь духовом злобы поднебесным на измождение». Сице убо хульствующе древлесодержателей благочестия, с ними же и древнее святое благочестие схульствуют.
Статия, 82.
Древнее предание не от живаго источника напаяющее, но от горких вод Мерры сказуют [Жезл, лист 13].
Статия, 83.
Древнее благочестие вратами адовыми нарицают, низводящими в геену огненую [Жезл, лист 17].
Статия, 84.
Оное же древнее благочестие рождением ехидновым и ядом аспидовым вседерзостне оглаголуют [Стефан Рязанский, лист 711].
Статия, 85.
Нынешнии российстии учители в своих богомерзских писаниих [Жезл, лист 17, Скрижаль, лист 642] древлеправославных христиан соединяют с еретики, подобно лютором. Потребник, лист 602.
Статия, 86.
Древлеправославную церковь, святыми российскими содержанную, от нея же старообрядцы научившеся, и ту святую церковь именуют блудницею [Предисловие соборнаго деяния на Мартина].
Статия, 87.
Порицание арианством.
Статия, 88.
Порицание македонством.
Статия, 89.
Порицание несторианством.
Статия, 90.
Порицание арменством. [Предисловие соборнаго деяния на Мартина. Скрижаль, лист 796, 804. Увет, лист 139 обор.].
Статия, 91.
Порицание латинством. [Обличение, лист 26].
Статия, 92.
Порицают древлецерковное содержание преданием еретика Мартина не бывшаго [Деяние соборное на Мартина].
Статия, 93.
Двоперстному сложению от черта быти глаголют [Обличение, лист 26].
Статия, 94.
Тое же двоперстное сложение, и в нем, по святым богословцем, обою таинств исповедание, волшебным знамением порицают [Обличение, глава 1, лист 4].
Статия, 95.
Древле православным пречистым тайнам сорокою или вороною на небо взятым быти сказуют [Обличение, лист 26].
Статия, 96.
Изображенную на иконе Божию Матерь греческим живописным художеством уподобляют руской бабице [Обличение, лист 53 и 38. Розыск, лист 179].
Статия, 97.
Крест животворящий, от трех древ сложенный, с титлою именуют ругателно расколническим, брынским, осмиконечным, выгоцким.
Статия, 98.
Оному же животворящему кресту, от трех древ сотвореному в четвертых со дщицею, вопреки глаголют пророку Исаии, и прочим святым учителем: якобы он не от кипариса и певга, и кедра устроен, но от древа дубоваго [Обличение, лист 37 и 34].
Статия, 99.
Не приемлющих поливателнаго крещения называют афеистами и безбожниками [книга О поливательном крещении, лист 5].
Статия, 100.
Древние антимисы отвержены с крайним уничижением и ругательством: яко бы они столь неблагообразно вымараны, что и смотрить на них гадко есть [Обличение, лист 41 втораго счета].
Статия, 101.
Стоглавый собор при царе Иоанне Васильевиче и при митрополите Макарии, не точию стоглавным нарицатися недостойным быти сказуют, но ниже единоглавным. И той собор не в собор полагающе, и яко не бывш вменяют. И того собора клятву на ереси не в клятву полагают, и проч. [В соборном свитке, лист 8. Обличение, лист 146.].
Статия, 102.
Того же освященнаго собора священных отец возъименовали безмозгими и плевело сеятелями [Обличение, лист 139 и 138].
Статия, 103.
Восточныя церкве учителя Стефана Зизания проименовали ефиопом и учеником лукаваго диавола [Обличение, лист 138 и 139].
Статия, 104.
Константина Панагиота, греческаго учителя, ревностное обличение латинских ересей сравнивают с шумством бражников и людей кабацких [Обличение, лист 145 обор.].
Статия, 105.
Святейшаго Филарета патриарха изложение о крещении всех еретиков душепагубным соблазном нарицают [Пращица, ответ 165].
Статия, 106.
Мучеников Христовых, ревностно обличающих поганых царей и нечестивых мучителей на судищи, не вменяют за законных мучеников, и повести таковыя во святых книгах почитают за ложныя [книга печатн. Толкование блаженств, лист 130].
Статия, 107.
Книгу, именуемую Кирилову, неблагочестне злословяще, всюду порицают ея книгою ложною и вероятия недостойною. Содержащия же ся в ней избранныя словеса от пророческих и апостольских писаний о православной нашей вере и о превысочайшей богословии оглаголуют прелестию и обманом простым людям. И якобы сии плевелы (то есть Божия глаголы; или божественныя догматы) посеял Зизаний, что де зело противно есть Богу, самой естественной истинне и доброй совести, а приятно единому диаволу, иже есть отец лжи, его же учеником соделался Зизаний [Обличение, глава 7, лист 138].
Статия, 108.
Афанасиевы ответы на вопросы князя Антиоха глаголют быти подложныя, а не истинныя [Обличение, лист 18, в конец счета].
Статия, 109.
Отмещут достоверную и чудотворную повесть о Траяне цари и о Фанкониле девице, молитвами святаго Григория и первомученицы Феклы по смерти спасшихся [Сборник староп. лист 42 и 34. Четия мин. новопечат. 103].
Статия, 110.
На новопросвещаемых полагаемый куколь, иже есть образ незлобия и чистоты, называют кукишем. А мантию иноческую, юже святии отцы именуют покровом Божиим, уподобляют простой япанче, покрывающей человеки от дождя и снега [Обличение, лист 30 на обор. втораго счета. Тамо же лист 40. Пролог октября 22, лист 134].
Статия, 111.
Пение староцерковное порицают дурным и мужичьим [Обличение, лист 26].
Статия, 112.
Книги старопечатныя и старописменныя названы, или, справедливе сказать, опорочены, старогадкими, старопачконными, неправыми, не церковными, вероятия недостойными: яко бы переведены они были под именем святых отец подложныя на прельщение, а не на спасение рускому народу [Обличение, лист ? втораго счета, и 135 и 110 втораго счета].
Статия, 113.
О имени Исусове глаголют: якобы в древних книгах без иты писано было от дьячков ленивых по невежеству. И сие ругательство касается до всех древних российских святых мужей, которыя писали своеручно имя Исусово без иты: якоже Алексей митрополит в новом завете, и другия тоже, и на святых иконах и чудотворных крестах видится [Обличение, лист 83].
Статия, 114.
Пророки почитающе, и тех пророчество на свою ересь толкующе, некая баснословия слагают [ересь уалентиан, Кормчая, правило 1 Вас. Вел.].
Авраамово взятие дров на двочастной крест, Иосифово поклонение на верх жезла, Иаковле преложение, раставление полков, Моисеовых рук распростертие, Исаино о трех древах, Иезекиилево о крещении, Моисеово помазание кровию агньчею, Иезекиилево острижение главы и брады, ложь на Иеремию в пострижении брад и на святых мучеников Георгия и Димитрия. Ветхозаветную церемонию о поставляемых в левиты, помовение чваном и скляницам, крещение котлом и одром, сивиллино о имени Исусове, Давыдово: жезл твой и палица, у подножия креста. И прочая множайшая писания, противно святым богословцем толкующе, своя баснословия слагая, нововводная предания утверждают, подобно латином, лютором и калвином [Розыск, лист 156, 162 часть 2. Обличение, Розыск лист 160. Розыск, лист 115] [Иезекииль 5, ст. 115. Леввит 14, ст. 9. Иеремия 41, ст. 5. Числа 8, ст. 7] [Поливат., глава 1, лист 10. Обличение, Жезл, Розыск, лист 152].
Статия, 115.
Покропительное крещение за важное и законное поставляют [книж. О поливат. крещении], и проречения пророка Иезекииля [глава 36] на свою ересь толкующе обращают.
Статия, 116.
Писанием святых не имут веры, подобно лютором [Потребник, лист 605].
Статия, 117.
Книги греческия ныне печатают латыни и немцы в Риме, в Париже, в Венеции и в прочих градех, о чесом в Жезле: и в Пращице, во ответех 185-м и 208-м. И самыя оныя книги о себе сказуют, где кая печатана. У греков же своих печатей издавна несть. Со онех книг ныне в России, преводя на словенский язык, своя нарицаемыя новоисправныя книги печатают и глаголют сице: «Яко добре их печатают латыни, от нихже и вся нашя книги преводим, ничтоже отлагающе или отъемлюще, да совершенне им уподобимся».
Статия, 118.
Иоаким, патриарх Московский, в книге Щит веры, в поучителном слове, о новотворных киевских книгах повествует сице: «Требник великий, сочиненныи Петром Могилою, митрополитом Киевским. В нем же 1-я ересь: в крещении вместо погружения обливанием у срамных женских удес в рождении младенцев. 2-я ересь: словесы Христовы преложение святых таин, и в то время поклоны. 3-я ересь: выимаемыя части ис просфир в честь Богородицы, и святых, и живых и усопших, мнети Тело Христово. Книга Кирила Транквилиона, толкование на евангелие, и в книге Зерцало богословия, и книга Перлы, книга Мир с Богом, книга Труба, Мечь, и Симеона Полоцкаго творения: книга Псалтырь, или с польских или от Аполинария еретика преведен: книга Обед, книга Вечеря. Во всех оных книгах противности нашей православней церкви, и обретаются латинския ереси, и о исхождении Святаго Духа от Отца и Сына, и иныя латынския догматы: обаче покровено и неудобопознанно, имущыя единоумие с папою и западным костелом, отступльшим восточнаго благочестия». И учителя латынстии еретики во оных, и учение их написаны, яко благочестивая тех книг, яко позор и ереси имуще, запрещает народно и в церквах прочитати священным под извержением, простым под отлучением. Сия убо Иоаким написа.
Обаче тии с латинскими ересми книги везде в церквах, по всей России, беззазорне держат, утвержающеся ими, и словеса в них на праздники в службе прочитают, не боящеся запрещения.
Статия, 119.
Латыни древних святых книги растлевают, на свое мудрование словеса святых учителей превращающе, тако и книги своя пишут и печатают. О чесом святый Нил Солунский во главе 13, 14 и 21 книги своея сказует [лист 488]: и святейший Мелетий, патриарх Александрийский, в послании 4-м изъявляет: и в книге О вере глава 4. Такоже и российстии архиереи ныне печатают книги святых, по своему разуму, якоже хотят, прилагают и отлагают и изменяют.
Статия, 120.
На Флоренском соборе принесоша латыни восточным отцем книгу ветхую, писанную за многая лета [кроникер греческий, о Флоренском соборе, превод Арсения Грека]: в ней же написано, яко бы седмый вселенский собор в символе веры повеле глаголати Духа Святаго, от Отца и Сына исходящаго. И хваляхуся от ветхости ея, утвержающе мудрование свое. И понеже книга оная не согласна древлегреческаго православия книгам, отцы восточнии не прияша ю, неистову и лживу разсудиша быти. И святый Нил Солунский о таковых лживых книгах латынских в 14 главе извествует: «Издревле таковая быша, апостола Павла именем послания нецыи посылаху [к солун, глава 20]. Доките еретицы ложное святаго Петра евангелие употребляху, лжи и басни о святых апостолех путяху [Бароний, лист 191, и 44, 16 и 5]». Святаго апостола Петра. Деяния Андреева, Фомина, Филиппова. И староцерковныя в предисловии Кириловы книги, многолживых книг изъявлено.
Подобно латином, докитом и прочим таковым, и российстии архиереи, ныне утвержающе новины своя, сочиниша и написаша на старых хартиах книгу, Соборное деяние на Мартина еретика, ложно, чесого в России никогда не бысть, и ни един летописец российский о сем являет. И другую книгу таковую, Требник Феогностов. Написавше обе лживыя, хулныя, с клятвами на древлецерковное святоотеческое всеблагочестивое содержание. И оныя книги у себе имеют, и ими защищают своя еретическия нововнесенныя уставы.
Но да не вся российския церкве по единой исчисляя ереси, в безмерное долготы множества ради их слово прострем, и тако вас, вопросителю, слухом отягчена сотворим. Прочее прочия самем благоревностно вежественнейших нас в писании разсмотрети оставляем.
Статия, 121.
Оставляем глаголати нынешния российския церкве, что, приходящих от иноверцов латинов, люторов, и калвинов и прочих еретиков, единопогруженцов и обливанцов не покрещевают [книжица О поливат. крещении, глава 11, лист 44], противно святых апостол правилу 50-му, не крестящаго епископа или презвитера в три погружения из сана извергающему, такоже и вселенскаго 2-го собора правилу 8-му, и всей грекороссийской древлеправославной церкви, не приемлющей не точию от латин и люторов обливателное или единопогружателное крещение, но и от белороссийцев: о чесом во ответех выговских в 50-м, в статии 35-й, доволно показуется.
Статия, 122.
Оставляем, что, приходящих латинам, лютором и калвинам, не повелевающих проклинати ереси, противно святых вселенских соборов перваго 8-му, и 6-го 95-му правилом, тако же и Тимофею презвитеру, повелевающим проклинати (аще и втораго чина и 3-го) ереси и ересеначалников.
Статия, 123.
Молчим нынешния российския церкве не точию приятие обливания и единопогружения, но и содержащую целыя митрополии и архиепископии обливанцов: Киевскую, Белоградскую, и Смоленскую и прочия. И от тех обливанцов, имеющих на престолех всероссийских архиереов, таковии быша: Стефан, митрополит Рязанский: Феофан, архиепископ Новгородский: такожде Феодосий, архиепископ Новгородский, бывый лютор родом: Димитрий, митрополит Ростовский, и прочии безчисленнии, имеющиися елико во епископех, елико во архимандритех, елико во игуменех, елико во иереох, елико в клирицех, елико во иноцех, их же исчислити не возможно. И во всяких службах во икономских и в монастырских, и в поставлениих в чины они присудствуют, о чесом и Синод со оправдание обливания приводит.
Понеже Киевская митрополия вся, и Смоленьская епископия, под Полшею много лет бывшии, издавна обливанием крестят, тако же и греки: о них же всех во ектениях и приношениях в российских церквах моление совершается всегда подобно, яко у латинов.
Статия, 124.
Не воспоминаем нынешния российския церкве обычая, что восприемников на крещении мнози имеют еретиков. Восточный же учитель святый Симеон Фессалонитский глаголет: «Тако творящии родители, не просвещают чада своя в крещении, но затемняют. и попы, сице творящии, являются причастники чужде Божия». О чесом во главе 66 засвидетельствует.
Статия, 125.
Молчим нынешних россиов в браке с еретики латыни, люторы и калвины сообщение, в противность святым собором и святоотеческим запрещениям. О чесом Лаодикийскаго собора в правиле 10-м тако глаголет: «С еретики в сватовство не сходитися». На поле: «У еретиков не женится, ни дщерей своих за них христианом не давати». И 31-е правило о том же, и шестаго вселенскаго собора 72-е правило подобне запрещает. Но Афонстии отцы в правиле 52-м глаголют: «С латины аще православная жена сочтется, с роспустом брака и запрещению подлежит, по 12 главе, 3-го стиха, еже в Матфеи. аще кто преступит уставления, той да отлучится». И Никон преподобный в слове 13, и в Тактиконе слово 27. Такоже повелевает и преподобный Феодосий Киевопечерский о латынех, князю Изяславу поведа ереси их злыя, глаголет: «Христианом же своих дщерей не достоит даяти за них и ни поимати от них за себя. ни брататися с ними, ни кумитися, ни целования с ними имети».
Ныне же великороссияне за еретиков латинов, люторов и калвинов дщерей своих дают, и от них за себя и за сынов своих принимают, и Синод сему не запрещает.
Статия, 126.
Не глаголем о сообщении россиян разных вер с еретиками: с латины, люторы, калвины, и с армены и прочими, в молении, в несогласие святых апостол и святых отец правилом, и священным писаниям. О чесом заповедуют: святых апостол правила 10-е и 40: и Лаодикийскаго собора правило 6 и 33: и Карфагенскаго собора правило 9: Тимофея, архиепископа Александрийскаго, правило 9: в Номоканоне афонских отец правило 153 [лист 270 и 253]: и преподобный Никон в слове 63-м: повелевающих отнюд в молении с еретики не сообщатися. В книзе же О вере засвидетельствует: «латины в своя костелы иноверцов к службе пущают». Равне и россияне ныне всяких еретиков: латин, люторов, калвинов и арменов, в церковь, и во время литургийнаго пения приемлют, или егда бывает коронация государем, и в церемонии брачныя и погребальныя.
Статия, 127.
Прешествуем нынешних россиян о сообщении в ядении с еретики: с латины, с люторы, с калвины, с турками, и с армены, и с прочими погаными язычники, не точию простых, но и духовных, в разгласие святых учителей церковных и святых богословцев, отнюд не повелевающих тако творити. О чесом святый Василий Великий, в книзе Постничества второй, во главе 279, пишет. Святый Златоуст в слове О лжеучителех тако глаголет: «Услышите вси вы, иже с еретики вкупе ядущии, болезненнаго сего ответа, яко вы Христовы врази бысте. иже врагом царевым друг есть, сей не может друг царев быти, и жити недостоин есть, но со враги погибнет, и горшая подъимет». И ниже, на листу 523-м. О том же преподобный Иоанн Лествичник в 1-м слове в толковании, и в книзе Матфея Иеросалимскаго, в Зонаре глава 76 и глава 112: «Всяко ядущаго с еретики, или пиющаго, или дружбы деющаго, и в любви и соединении пребывающаго, таковаго анафема». И преподобный Феодосий Печерский князю Изяславу о латынех изъявляет [Патерик старописмен., слово 13. И Минея Макар. митр., глава 36]: «Христианом же не достоит с ними ни пити ни ясти из единаго сосуда». И преподобный Иосиф Волоцкий глаголет [глава 14, от словес Златоустаго]: «Возлюбленнии, многажды глаголах вам о безбожных еретицех, и ныне молю не совокуплятися с ними ни в ядении, ни в питии, ни в дружбе, ни в любви. творяи бо сия, чужа творит Христовы церкви. аще кто и безплотных житие поживет, еретиком же приобщаяся в дружбе или в любви, таковыи чужд есть Владыки Христа».
Статия, 128.
Преходим молчанием россиян дворян и прочих многих, не точию с еретики сообщение, но и со псы из единых сосудов ядение, на подобие латин, люторов, калвинов, турок, и прочих неверных языков [Кирилова, глава 26]. О чесом обличает святый Константин Панагиот латинника Азимита. и в Потребниках [лист 594 обор.]: «Проклинаю беззаконнаго Петра Гугниваго, иже со иными и со псы из единых сосудов ядят», и прочая.
Статия, 129.
Сверх же всех сих вышепредложенных ересей великороссийския церкве напоминаем множество издания богохульных и святохульных книг, во опровержении всего древлеправославнаго предания, издаваемых от нынешних учителей. Их же и в них же исчислити вся новопредания и противности древнему благочестию невозможно, исписати же тонкочастне еще не возможнейше есть. И аще бы кто от прозорливых и художных мужей поистязати восхотел бы елико в книгах их, елико внутрь сердец тех крыющаяся безбожная мнения, елика в самех словесех произносимая теми везде и всюду, то упователно не сыскал бы он вящше того зла и в самых тех духах, сверженных с небес от Бога за высокомерие и гордость безумную.
Нецыи бо из сих последних благочестия отступников (римлян и россиян) в таковое приидоша дерзнутие, якоже некто сказует об них в своей апологии [книжица выпепечатана в сенатской типограф., 1765 года, на атеистов и неутралистов]: «Что не признают никакого промысла в свете от верховнаго Правителя. а иныя хотя Его и признают, однако говорят, что будто Он ни мало не обращается около благочестия или веры, евангелием утвержденныя. Другия же мечтают, яко бы нет настоящей ни лжи, ни истинны, но все от мнения и узаконения человеческаго зависит. и нет де ничего добраго ни худаго, и потому ни в чем нет никакой подлинной истинны, но все по своему узаконению и обычаю люди делают. Всякая де речь другой подобной речи како нибудь имеет противословие: и об одном деле между двумя спорщиками равносилныя выискиваются доказательства. и тако по сему во всем свете истинны не взыскивают. и все законы, вещи и писания божественныя, от выдумщиков изложенныя быти, признавают. и сие глаголют они о Аврааме, о Моисеи и о Христе, началницех благозакония». Прочее тех злосмышления молчанием со слезами запечатлеем, да не како простых мысли восколеблются о Христе, и ослабеют силы душевныя от таких повестей, губящих в сердцах человеческих крепость благочестия. Суть бо нецыи мудрствующе, и грех естеством входящ, а не произволением, по манихейски глаголют. Сия бо производства мнениев во внешних россиян многих из дворян и прочих обретаются. Мнози же и из духовных и ученых студентов глаголати таковая дерзают, что много де таких пустошей и безделиц напечатано есть в церковных книгах, и в самех апостольских и соборных правилах. Мы де все то, кроме священной Библии, почитаем за выдумки и человеческая предания. Да еще же и сие инии приглашают, что и в самой Библии есть такия апокрифы, которые отнюд не принадлежат до богодухновеннаго писания. В иных же и таковое мнение находится, что и в лютерокалвинских списаниях имеется. Не признавают они никаких мытарств воздушных, ни рек огненных, ни езер, ни тартара студенаго, яже Бог сотвори в наказание грешником. А о воскресении мертвых и о будущем суде, и о безконечном царствии, чуть ли они не то же мудрствуют, что и Ориген проклятый в книгах своих баснословит.
И сия вся мнения разная россиян церковь великороссийская всесоборне не запрещает, клятве и отлучению не предавает: но попущает таковому зело развращенному разуму всюду по России носитися в досаждение всему благочестию.
Статия, 130.
Оставляем попущение нынешния российския церкве амазонским ложам всюду в россиянех умножатися, и прочим нововыниклым еретическим сонмищам: в них же не точию мирстии увязнуша, но и мнози духовнии: их же не разрушают ниже соборне клятве предают.
Статия, 131.
Но о сем единем глаголем: яко российская церковь в поставлении чинов причащается ереси жидовския, симонианския и македонианския. Понеже по правилу святых апостол 29-му: «Аще кии епископ за сребреники достоинства сего приятель бысть, или презвитер, или диакон, да извержется и той и рукоположивыи, и да отсечется общения всячески, яко же Симон волхв от мене Петра». По правилу 30 тех же апостол: «Аще кии епископ мирских князь помощию приимет церковь, да извержется и отлучится». Четвертаго же собора правило 2-е глаголет: «Купяи и продаваяи поставление, даже и до церковнаго ключаря, своих степеней да отпадут, мирстии же человецы и черноризцы да будут прокляти». Толкование: «По Великому убо Василию, горее есть Македония духоборца, иже непродаемую Божию благодать продает». (и проч. зри 6-го собора прав. 22: 7-го прав. 5 и 19: и Василия Вел. прав. 89: Кормчая, главу 36: в Матфеи состав X: и Номоканон, лист 60). Кормчая, глава 36, Генадия патриарха со епископы, 81-м в послании, вси сии продающаго и купующаго, и ходатайствующаго сия, извергают и анафеме предают. Преподобный Исидор Пилусиот купующих священство уподобляет Каиафе жидовину христоубийце, и Симону волхву: а поставляющих за мзду, ко Июде, предавшему Христа. И в книзе О вере о латынех [лист 239 и 237]: «Симонианству же в Риме бывати не новина, и папеж папежа подкуповал».
Ныне же в великороссийской церкви несть ли оной симонии? не купят ли златом и сребром и всякими подарки священства попы и диакони? Яко всяко есть. Ибо всякому от них рукоположение становится в тридесять, в четыредесять и в пятьдесять рублев и вящше. И в диаки причестися, в десять, в пятьнадесять, в двадесять рублев и болше становится. Суть же нецыи и имение свое, такожде и у жен все истощают на поставление. Аще же архиерею рукоположитися потреба, то и многия тысящи источает. И ни един кто получит церковнаго чина, аще на се великаго даяния и помощников не возъимет.
Тако убо, вопросителю, во всех вышеписанных разделах и главах предложихом: яко нынешняя видимая великороссийская церковь в новоизданных своих догматех и преданиях со древними оными, иже во Святую Троицу не верующими, и воплощение Сына Божия не приемлющими, еретики удобь соглашается. Тако предъявихом, яко и в самой богословии, в своем учении, существо Божие тленным естеством измеряти дерзает. Тако засвидетельствовахом, яко и Бога Отца Вседержителя самого от себе создана, и под временем и под началом, и конец имуща, купно с Сыном и со Святым Духом, в своем учении быти заключает. Тако показахом, яко безгрешнаго Сына Божия, Господа нашего Исуса Христа, именует грешным человеком: тайну же двоестественную Божества и человечества, в перстах образуемую, демонским именем порицающи, ругательствует, спасительное же имя Исусово равноухим именует. Тако засвидетельствовахом, яко Божие триипостасное существо одаренным, а не одаряющим вся, противно всей святей богословии мудрствуют. Сице представихом, яко российская церковь, и с прочими перваго чина еретики не с единым, но со многими еретиками, во своих догматах соглашается. Сице предложихом, яко с латины, с люторы, калвины, и прочими многими языки неверными, как своим учением и содержанием, так обычаем, всячески соединствует. Сице указахом, яко российская церковь хулами и клеветами, и разными богопротивными мнениями, всех еретиков качеством и количеством превосходит. Темже таковыя и столь множайшия ереси имеющей великороссийстей церкви, что имамы к ней пригласити? Разве точию с пророком возопием: «От главы до ногу бысть яко едина язва, и яко един струп, и несть кому приложити пластыря ниже врачевания». И с тайновидцем речем: «Вавилон великии, мати любодеицам и мерзостем земским, и душевному блуду учителница. с неюже любодеиша царие земстии, и упишася от вина любодеяния ея, и купцы от силы пищи ея разбогатеша». Святейший же и многострадальный господин Филарет, патриарх Московский, в соборном своем изложении о римлянех, причащающихся многоразличным ересям, засвидетелствующи, возвещает: «Всех же лютейшии и сквернейшии есть латиняне папежницы, понеже всех древних еллинских и жидовских, и агарянских, и еретических вер, ереси проклятыя в закон свой прияша, и со всеми еретиками обще все действуют и мудрствуют». И преподобный Иосиф Волоколамский, храбрый и многопремудрый обличитель безбожных, блаженнаго евангельскаго теснаго пути разрушителей и святоотеческих преданий презрителей, окаянных люторов, в преизящном своем словеси на сих громогласно тако вопиет: «И еже (рече) Христос кая собою и не собою, но божественными апостолы и святыми отцы предал есть, и тая отметая и хуля, и той всех неверных невернейший есть, и ниже христианин может быти». Слово 15 О чине иноческом.

Часть, 2.
О ересях, яже не наглое имеют нечестие к Божеству, но некоторую прикровенность.
Глава, 1.
Яко вси ереси друг к другу взаимное имеют любопрение, того ради и не можно всем явно вкупе во единой церкви утвердитися.
Понеже убо свидетельствующи божественному писанию [правило Вас. Вел., 1. Кирила Иеросалим., глава 28, лист 261], яко вси еретицы в верах и преданиях своих друг другу не согласуют, того ради всем ересям в единой церкви явно утвердитися не возможно есть. И якоже в первой части о еретицех перваго чина изъявися, яко различна суть онех учения и предания, так и о прочих 2-го и 3-го чина еретицех. Аще подробну разсмотрим учения и предания онех, обрящем и сих такожде друг другу весма не согласующих.
Якоже убо ариане еретицы, сице мудрствуют Господа нашего Исуса Христа, истиннаго Сына Божия, не единосущна Отцу проповедаша, не сотворена быти глаголаша. Македонияне же Духа Святаго тварь быти нарицаше. И сии между собою не согласуют. Несториане же единаго Господа нашего Исуса Христа на два естества разделяху: единаго убо быти от Отца рождьшагося Слова, другаго же от Марии рождьшагося человека. И сии со онеми еретики несогласны же. А евтихиане же и диоскориане и прочия, бежаста Несториева разделения, два сына глаголюща, и во ино зло от разделения впадоста: ибо двема естествома Божеству и человечеству смеситися, и по соединению в едино сотворитися естество, нечестиво проповедаша. И сии такожде с прочими не согласуют. Единоволницы же едину волю божественную во Христе исповедают. Ориген же со единомысленники [Евагрий и Дидим] временныя муки проповедаша, и воскресению не быти глаголюще. Иконоборцы же иконам святым учиша не покланятися. Воздержницы же и вретищницы, и апотактиты ненавидеша брака, и отвращающеся вина, и тварь Божию скверну быти глаголаша. Наватиане же отвергшихся Христа волею или неволею на покаяние не приемлюще, и второбрачным же не приобщахуся. И сии вси и прочии еретицы в верах и в преданиях своих друг другу весма не согласуют. Им же всем в единой церкви аще явно утвердитися и быти без препятьствия, отнюд неудобно есть, занеже ересь ко ереси весма обрящутся сопротивоборствуя. Сокровенно же где любо аще заключаеми, или в словесах, или действиях, или в вещех, всяко могут укоренитися и пребывати друг другу без препятьствия, якоже в третией главе изъяснится.
Глава, 2.
Понеже вера православная во Святую Троицу не точию словесы, но и делы и вещьми исповедается.
Божественный апостол Павел к римляном во главе 10-й глаголет: «Сердцем бо веруется в правду, усты же исповедуется во спасение». Зачало 103.
Темже аще, по апостолу, якоже сердцем, тако и усты веровати и исповедовати повелевается в правду, си есть несомненно, без всякаго размышления и несогласнаго толкования. Убо от нынешния великороссийския церкве учителей, аще и усты исповедуется Святая Троица неслиянно во триех ипостасех: но како будет в правду сердцем веровати, когда она в двочастном кресте образует три состава, в котором отнюд образовати не возможно? Всяко не троица лиц, но двоица изобразится может: убо и усты не можно исповедать во спасение, когда в невозможность исповедуется возможное. И паки: Аще друзии учители российския церкве по концам усилуются такожде четвероконечнаго креста образовати Троицу, убо и зде зело от праведнаго исповедания далече отступают: ибо в четырех концах, не троица, но четверица изображается. Темже и еще вящьшии сии во исповедании своем погрешают, приглашающе некое чуждое лице ко Святей Троице, или Духа Святаго на два разделяюще начала. И сие есть преболшее еретичество, и всем ересям глава, от нея же и вси иныя ереси прозябают, якоже Кирил и Филарет патриарх написаста. Темже от сего исповедания российския церкве отнюд согласия не обретается к праведной вере истиннаго исповедания, но далече отстоит: убо и устное исповедание российския церкве совсем мрачно или темно обретается. Такожде и о воплощении Сына Божия рещи, когда церковь православная исповедати восприя в двух перстах два естества Христова Божеское и человеческое. Нынешняя же российская церковь тое исповедание нарече неправым и еретическим, и демона сидети ту указа. Убо тожде разсуждать должно и о том таинстве российския церкве, якоже и о Святей Троице неправедном богословствовании.
Речеши ли, о защитниче еретичества, яко российская церковь погрешает в веществе, а не во устну исповедания, тем и не может причестися к еретиком, устным исповеданием погрешающим. Но рцы ми, что есть вещество? не самое ли дело вещей. Понеже аще где либо на какую тварь вещей не посмотриши, вси засвидетельствуют Содетеля Бога, по реченному от псалмопевца: «творения же руку Его возвещает твердь». И так, аще речеши вещество, речеши дело и содеявшаго, и тем возвещает самое неразньство в веществе и деле Сотворшаго Словом, по реченному: «Словом Господним небеса утвердишася, и Духом уст Его вся сила их». Отречеши ли дело или вещь, убо с нима соотречеши ли и Слово Божие, сотворшее тварь? Отселе убо познавай сим примером и прочая.
Темже аще вещество и дело не разнится с собою, якоже и от здания действие отнюд не разликует в согласии, убо и слово от дела никогда не отделяется или разньствует. Якоже святая церковь в неделю православия в кондаке воспевает: «но исповедающе спасение, делом и словом сие воображаем».
Гряди убо, явим ти и прочих учителей церковных гласы веру православную, не точию словесы, но и делы и вещьми действуему и исповедаему глаголющих. В книзе Кирилове, в слове о опресноцех тако пишет: «Вера бо самеми вещьми действуема состоится». Лист 297. Зде убо воньми глаголемому. Не рече, точию вера состоится от глаголов, но и от вещи действуемых. Убо российская церковь, в веществах образуемая древлеправославною церковию, таинства Святыя Троицы и воплощения Сына Божия отметающая с злохульством, яве соглашается с погрешающими еретиками устно.
Понеже егда вещь извещается, и в том извещении от учителей церковных полагается за самый глагол. О чесом блаженный Феофилакт, архиепископ Болгарский, тако пишет: «Вещь бо (рече) егда извещается, глаголется глагол». Благовестник, от Луки, зачало 6, лист 23.
Преподобный же Иоанн Лествичьник, зело явствене исповедание словесы и делы и мыслию во Святую Троицу засвидетельствуя, тако глаголет: «Словесы (рече) и делы и мыслию во Святую Троицу праве и без порока веровати». Лествица, слово 1, стих 19.
Зде убо, о вопросителю, с ким свое согласие положиши? С древними ли со святыми учители, паче же со всею святою церковию, засвидетельствущею православную веру не точию быти от глаголов, но и от самех дел и вещей? Или с нынешними новомудрствующими учители, все предание церковное и вещи святыя охуливше, едину веру свою точию воспроповедаша во устнах или в сердце паче, а делы же и вещьми, исповедуемую от святых учителей, отвергоша с клятвами и зельными хулами, о чесом в первой части во главах довольно ти показахом? Аще же сим не доволен будеши, иди, явим ти и прочих еретик, не нагло погрешающих о Божестве и о прочем предании церковнем. Но святая и православная церковь явственный суд на них без обиновения или щадения износит, о чесом в предъидущей главе ти предлагаем.
Глава, 3.
Яко не мощно есть всем ересям (якоже выше рехом) во единой церкви явно утвердитися, сокровенне же могут вси вкупе быти: православная же церковь и в тайне содержащих ереси проклинает. Во образ же сего представляем Римскую отпадшую церковь, иже вся ереси в себе вмещающую.
Понеже римляне, не нагло догматствующе, четверят Святую Троицу: но единаго Духа (по их мнению), а не два, от Отца и от Сына исходяща, глаголют, обаче тем Святаго Духа на два начала разделяют, раболепна Его творяще. Не нагло сим еллинское многобожие вводят, но яко несовершенно реченный евангельский и отеческий глагол совершающе, и от Сына исхождение Святому Духу прилагают.
Но зри, како православная Христова церкви еретичество сие всем ересям главою нарицает, от него же всем иным ересям прозябению быти сказует, а обращающихся за сие всех еретик крестить повелевает.
Не нагло солнце и луну обоготворяют, но точию по планитом мудрствующе разсуждают, и от сего счастие или несчастие познавати веруют. Прочее же, глаголю, яко символ о догматех веры имеют, в нем же исповедуют Святую Троицу, и Господа нашего Исуса Христа истинным Богом именуют, и плотьскому Его смотрению веруют: о чесом присяга малороссийских владык, еже к римскому костелу примирения их, явствует.
Но зри, како православная Христова церковь точный суд аки на манихейское нечестие полагает, и обращающихся всех еретик за сие крестить повелевает. Не нагло по монтаниански браки разрешающе, и сатаниным изложением нарицают: но токмо единем попом своим, аки для чистоты, женатым быти не повелевают. Но женятся и посягают и папежники, и люторове, якоже преподобный Иосиф Волоколамский в слове 15 засвидетельствует [Потребник иноческий, лист 365].
Не нагло крещаяй поп их в свое имя крещение приглашает, но токмо действительным залогом возглашает, сице глаголя [Кирилова, лист 239]: «Се от мира Христа моего аз тя крещаю, и приглашает: во имя Отца и Сына и Святаго Духа, аминь». О чесом Иосиф патриарх Московский в послании своем, к Валдемару королевичу пиша, глаголет: «Яко римляне и прочии обливают неразньственне по ипостасех со единем аминем».
Но зри, яко православная Христова церковь, как о разрушении брака, так и о развращенном приглашении, еже в крещении, точный суд аки монтаниян полагает, и обращающихся всех еретик за сие крестить повелевает.
Не нагло по евномиански обливателное крещение взаконяют, но Христа от Предотечи во Иордани обливаема бывша проповедают. Но православная церковь точный суд аки на евномиан полагает, и обращающихся за сие крестить повелевает.
Не нагло по жидовски над опресноком служат, но оклеветающе апостола Петра и святыя отцы, яко от них имуще таковое предание. Но святая Христова церковь, точный суд аки на жидов полагающи, и проклятию предает, а жертву опресночную мерзостию запустения, стоящею на месте святе, порицает, юже и кумир антихристов быти вменяет.
Не нагло Леон папа, венчавший Карула, примесил законы жидовския: но благодать воздавая Карулу, от главы и до ногу мvром помаза. Но православная церковь за сие осуждает Леона, яко миропомазанием примесил законы жидовския.
Не нагло еретицы Каруловы, иже с ним пришедшии в Рим, и послежде их бывшии сообщники и стаибники Каруловы еретики, иже на многая лета тайно развращаху люди Божия от истинны, и ко своим ересем привлачаху. Но святая Христова церковь всех сих еретиками осуждает, и проклятию предает: о чесом в Потребнице, в чине от латин приходящих, во отрицании и проклятии написано обретается [лист 594].
Не точно евномианом молитвы своя творят римляне, аки в тайных местех земли, церкви же и храмин не имуще, но разве нужде подлежащей: якоже и великороссияне, взяв антимис, и в простых храмех литоргисати повелевает [Мир с Богом]. Обаче римляне и великороссияне церкви и храмины имеют, в них же службы своя совершающе. Но святая церковь точный суд аки на евномиан полагает, скверныя же костелы римския уничижающи, не подобными церквам Божиим вменяет, а обращающихся римлян крестить повелевает.
Не нагло в нощи богоявленской воду свящают, папежскаго ради беззаконнаго рождения прикровение творяще, но Христа от Предотечи нощию крещаема бывша проповедуют.
Не нагло брады бриют за папежское блудное прельщение, но аки от ангела о том завещание приемше проповедуют. Святая же Христова церковь за сие их осуждает и проклинает, и аки блудолюбный образ и помраченную прелесть быти сие нарицает. Но сия убо о римлянех, заключающих в своих преданиих вся ереси, рекошася.
Но посмотрим и прочия вся ереси, аще нагло вводятся. Но всяко увидиши, яко от писаний святых, евангельских, пророческих и от прочих святых отец, приемлют себе оправдания, и тем ложному своему учению творяще защищение. Обаче святая церковь Христова, не по видимому их лицемерному лукавству внимая разсуждает, но по внутреннему, заключаемому в них нечестию, духовным разумом поступающи, за вся сия осуждает и проклинает, и от достоинств отметает, а обращающихся, якоже римлян, сице и прочих еретик, крестить повелевает.
Тако уалентиане и аполинариане, обретше Христова словеса, глаголюща [Иоан., зач. 9]: «Никтоже взыде на небо, токмо сшедыи с небес Сын человеческии, сыи на небеси». И от сего зле разумеша, нарекоша Христа сшедша с небесе, во плоти суща, и аки сквозе трубу пройде утробу святыя Девы.
Но святая Христова церковь за сие их осуждает и проклинает, и обращающихся уалентиан крестить повелевает.
Так и прочии еретицы, яко павликиане, и фотиниане, и ариане, и сим подобнии, не нагло Христа Сына Божия хуляще, но сокровенно. Понеже не рекоша тако, яко аще Христос и Сын Божий есть, и единосущен Отцу и Святому Духу, но мы в Него веровати не хощем, и Сыном Божиим Его не нарицаем, но за проста человека Его вменяем. Ни убо. Но яко не тако хуление их бяше: но притвором же благоговеинства, и от писаний похищенными от них словесы, и развращенне ими толкуемыми. Понеже убо во святом евангелии обретше, яко сам Христос от себе глагола: яко Сын человечь есть. И от сего зле разумевше, нарекоша Христа не Божия Сына, но сына человеча. И паки обретше Христова словеса: яко Отец болии Мене есть. И от сего зле разумевше, нарекоша Христа Сына Божия Отцу не равна, но менша, и не единосущна ему суща. И паки обретше апостола, о Сыне Божием глаголюща: яко Бог Христа сотвори. И от сего зле разумевше, нарекоша Христа сотворена, и тварь суща, а не рождена от Бога Отца, и по Божеству не создана.
Но святая Христова церковь всех сих, аки явных врагов Божиих, и хулящих Сына Божия, осуждает и проклинает, и от достоинств отметает, а обращающихся крестить повелевает.
Такоже воздержницы, вретищницы и апотактиты не нагло Бога творца злу нарицаху, но тварь Божию скверну быти глаголаша, тем и Бога аки творца злу нарекоша.
Прочее же глаголем, яко символ о догматех веры имеют, в нем же исповедуют Святую Троицу, и Господа нашего Исуса Христа истинным Богом нарицают, и плотьскому Его смотрению веруют, о чесом преподобный Иосиф Волоколамский в слове 15 свидетельствует.
Но зри, яко православная Христова церковь точный суд, аки на маркионитян, полагает, а обращающихся за сие крестить повелевает.
Понеже и вси еретицы не нагло ложныя своя учения распростирают, но кождо от писаний оправдание себе приемлет, и тем ложная своя учения защищающе. Аще, по Катихисису, «и церкви имут своя, и клирики церковныя, и писания божественная почитают, и мнятся еже тем же крещением креститися, но вся, рече не тако имеют, но инако и нечестиво. [Ниже:] Якоже глаголет божественныи Златоуст: праздники убо и святыя дни празднуют, и святых апостол, и мученик, но вся во отвержении веры истинныя, от своего умышления творят. и лживыи пророки имеют, и вся творят ко прельщению верным». До зде Катихисис.
Сему подобно и богоубийцы июдеи не нагло Христа Сына Божия на смерть осудиша, и божественному Его смотрению противящеся, но не познаша Его плотьскаго смотрения, якоже и выше объявленнии еретицы они. О чесом евангелист Иоанн в зач. 1 сице глаголет: «В мире бе, и мир тем бысть, и мир Его не позна. во своя прииде, и свои Его не прияша». И от сего показуется, яко пришествие Христово не позна мир. Якоже и в соборном послании своем глаголет той же евангелист, яко не разуме мир Бога. И прочая писания доволно о сем являют, яко еретицы и жидове не познаша Христова плотьскаго смотрения.
Но и агаряне турцы аще и вышняго Бога призывают себе в помощь, храняще же сквернаго Маомефа учение мерзское, разумеваемое о Бозе, яко Он есть всекован, и прочая злохуления Его. Церковь же православная явне их сице разумеваемаго Бога проклинает: и обращающихся всех сих, аще жидовинов, аще срацынов, аще еретиков и крещение еретическое имущих, осуждает и проклинает: а обращающихся всех сих единообразно и неизменне крестить повелевает: и правоверным христианом запрещение сицево полагает: «Яко аще кто внидет в соборище июдейское, или в церковь еретическую, или в поганскую, и помолився с ними, аще епископ, или причетник, да извержется, мирский же человек да отлучится». О чесом в Кормчей, во главе первой, правило апостольское 68 о сем показует. И божественный Златоуст в Маргарите, в слове о лжеучителех, тако глаголет: «Врази бо неприязни церковныя еретицы, ничимже разни прочих поган не знающих Бога, во вся роды погибели предадятся, по словеси Христову: всяк сад, егоже не насади Отец Мой небесныи, ископается». До зде Златоуст.
И от сих вышепредложенных свидетельств показуется, яко вси еретицы не нагло своя богохулная учения распространяют: но притвором благоговеинства лицемерствующе, и от писаний свидетельства себе приемлют, и тем своя ложная учения защищающе. Церковь же Христова аки врагов сущих неприязни нарицает, и ни в чем же не разнит их от прочих поган, не знающих Бога: и входящих в сонмище июдейское, или в церковь еретическую, или в поганскую, единем судом таковых облагает, а обращающихся от всех нечестий в христианскую веру, аще жидовинов, аще срацынов, аще и еретическое крещение имущих прежде, всех сих единообразно и неизменно крестить повелевает, якоже впреди показася.
Тако и мы ныне, великороссийския видимыя церкви новозданныя догматы и предания опасно разсмотряюще, сокровенное в них нечестие обретаем: обретше же тое, на среду представляюще изъявляем. И не по видимому их благоговеинству притворное их благочестие, или мнимое их благоверие щадяще, или приводимых ради ими от писаний свидетельств оправдание кое быти в них разумеем, но паче от сих осуждение быти им вменяем, яко развращающим священная писания, и на своя ереси толкующим, и тем паче всех прельщающим. Понеже и святии отцы, хотяще кия любо ереси обличити, не с пощадением тыя обличаху, но яве предлагающе правоверным оныя, мерзскими творяху. О чесом преподобный Иосиф Волоколамский, засвидетельствуя о них, сице глаголет: «Тако бо (рече) и древнии святии отцы наши творяху: егда бо кто хотяше о которой ереси писанию предати, и всякия вещы изъявляху скверныя их ереси: якоже святыи Кирил, патриарх Иеросалимскии, о манихейстей. написа святый Мефодий Патрский о аригенстей ереси: и святыи Иоанн, Никейскии епископ, о армянской ереси. и инии мнози святители и преподобнии отцы наши написаша и ничтоже скрыша, но вся их ереси скверныя изъявиша: яко да уведевше их ереси и скверныя и гнусныя дела их, христианскии православныи и боголюбезныи род еретики совершенною ненавистию возненавидят, и сих скверныя дела и ереси искоренити и упразднити вседушно да потщатся». Слово 15 на ереси.
И тако мы, по святых отец ревнующе, и духовным их святоотеческим разумом поступающе, сокровенное в них нечестие обличаем, и яко явное их Божиему величеству хуление быти вменяем. Аще что любо и сокровенно обретаем, обаче которым ересям свойственно, и киим еретиком согласно быти уразумехом, тое на среду представляюще изъявихом.
Темже убо, не нов сей имамы обычай, еже сокровенное нечестие еретик изобличати: но древний святоцерковный, и богодухновенных святых отец наших пастырский и учительский духовный сей есть разум. Сего ради, по святых отец православно мудрствующе и духовне разсуждающе, несмы повинни, яко согласная святым отцем творим и глаголем. Аще же зазирая от вас, яко простолюдини суще вступаем судити священныя лицы: но и се творим не самовольне, но по преданию святыя церкве учителей. Якоже божественный Златоуст заповедуя тако глаголет: «Яко подобает (рече) повиноватися учителем и священником, и не судити их, аще и житие имут укорно. аще же о вере погрешат, то не подобает повиноватися им, но и отбегати и судити их». Беседы апостольския, послание к Тимофею 2, лист 2550.
И вышепоименованный преподобный Иосиф Волоцкий в книзе своей в 7 и 13 довольно о сем засвидетельствует, и прочии мнози.

Часть, 3.
О новодействуемом крещении.
Чесо ради его приимати опасаемся, и о количестве нововнесенных в него вин. Понеже, по святому Иоанну Дамаскину, крещение глаголется быти корень святыя христианския непорочныя веры и твердое основание, о чесом в книзе Жития Иоасафа царевича во главе 8 засвидетельствуется. «Убо есть вера древо с ветвьми, возрастающее и стоящее на корени крестительнем. Еще крещение есть основание веры, убо есть вера здание кафолическаго благочестия, стоящее на всеспасителном основании крещения».
И от сего явствуется, якоже вера не разделяется от крещения, тако и крещение отнюд от веры не разлучается. Если же вера разлучится от крещения, то может обоя недейственна быти: как и древо, от корени отторжено бывши, умерщвяется. Сие убо согласие веры со крещением святии велицыи богословцы явственно научают быти. Святый Василий Великий в послании о иночестве тако глаголет: «Креститися подобает, яко прияхом, веровати яко же крестихомся». Книга О постничестве. И святый Афанасий Великий, нераздельность крещения и веры показуя, тако взывает: «Темже и Спас не просто заповедал есть крещати. но прежде научите, и потом крестите, во имя Отца и Сына и Святаго Духа, да от учения вера права изъявится, и с верою совершение крещения прложится». В слове 3-м на арианы. Согласная же определяет и святый Богослов Григорий, сице возглашая: «Крещение есть утвержение веры и извещение». Подтверждает же единственное согласие быти веры с крещением святая церковь и в Катихисисе Великом, тако глаголя: «Не разделяем веры, в нюже крещени есмы и в той пребываем». Глава 4. Зело явственне нераздельность веры от крещения и святый Никита Ираклийский показуя глаголет: «Вера и крещение два образа равна себе и неразделна. вера убо совершается крещением, и предходит исповеданием ко спасению». В толковании словес святаго Богослова на святое Просвещение.
По сим убо святых богословцев свидетельствам, аще новодействуемое разсмотрим крещение, не зрится нам быти корень древлероссийскаго благочестия: понеже не токмо не споевается со оным, но и разделяется от онаго: понеже не токмо не соединяется с древлецерковными догматы, но и разлучается от оных.
Яко действители новотворимаго крещения (еже есть нынешнии архиереи и священницы) многая ко святым учителем несогласия имеют, безчисленныя ереси содержат, ужасныя на древлецерковныя догматы и предания злохульства и клятвы полагают, трепетная умствования о святей богословии стяжавают, о чесом первыя части во главах доволне предъявихом. Убо новодействуемое крещение не есть корень и основание святыя православныя веры: яко не с древлеправославныя церкви учители соглашается, но от тех оттерзается: яко не соединяется с древлеблагочестивыми догматы, но тыя презелне хулит и проклинает: яко не малейшими и согласующими с величайшими святей церкви досадители и отступники. Убо праведно о нем сомняющеся, и единых ради вин его действителей прияти оное опасаемся.
Но гряди, вопросителю, и собственныя вины, заключаемыя в новодействуемом крещении, кратко изъявим ти, да конечне угаснет тщание твое о защищении онаго. Аще же ниже важность вин действителей, ниже действа великороссийския нынешния церкви увещати тя не имут, то убо ниже всего света свидетельства довлеют ко увещанию не раскаленныя выи вашея в горниле разсуждения. Понеже, по Златоусту, глаголемым не внемляй, ни множайшим веровати не имать. Маргарит, слово 13.
Но вся сия, еже веровати свидетельствуемым, в волю вашего разсуждения полагаем. Мы же касаемся должнаго показания о новодействуемом крещении, оставляюще пространное о нем описание по пределам вин, заключаемых в крещении, но обще вся вины онаго совокупляем в нижеследуемыя главы. И яже несогласная и противная в новопечатных книгах, против древлепечатных книг новоположенная, на среду зде представляюще, изъявляем.
Первое: Егда на крещении младенец приносится, и пред дверми церковными от пелен разрешается, тогда священник сотворит на нем крестное знамение. Кое благословение, по древлецерковному преданию, двема перстома совершается. По новопечатным же книгам, пятию перстами священницы оныя благословляют. Но в древлецерковных книгах на крестящия не двема перстома клятва положися. Потребник, лист 597 и 659.
Второе: В новопечатных приложен чин воцерковления, в котором принесеннаго младенца прием священник пред враты храма, крест младенцем начертавает пред дверми, глаголя: «Воцерковляется раб Божии». и проч. Коего чина и крестоначертания яко в древлепечатных, тако в харатейных, не обретается. Но и некрещенным младенцем крест начертавати, зело неудобно есть.
Третие: Во оном же чине, в новопечатных книгах, младенца некрещеннаго повелено вносити в олтарь и к самому жертвеннику, глаголя: «воцерковляется раб Божии». Сего ввождения и приглашения во всех древлецерковных не обретается книгах.
Но и некрещеннаго вносити в церковь и во олтарь, апостольским и отеческим уставом не есть согласно и сомнительно зело.
Четвертое: В новопечатных книгах, нынешнии учители умствуют креститися треми первыми персты, в противность древлеправославней церкви. И в тыя три персты сказуют порождатися водою крещения. О чесом в книзе во Увете тако глаголется: «Еже треми первыми персты десныя руки воображати на лицы и на персех знамение честнаго креста сице [изображено треперстное знамение]: понеже порождает нас водою крещения», и проч. Увет, лист 128.
По сицевому исповеданию нынешния великороссийския церкви учителей, нам, древлеправославныя церкве чадом, происходящее новодействуемое крещение от треперстнаго сложения прияти весма неудобно и трепетно есть, о котором и в первой части засвидетельствовахом.
Пятое: В старопечатных Потребницех, в запрещении первом: «запрещает ти дияволе, Господь наш Исус Христос, пришедыи в мир». В новопечатных же: «Запрещает тебе Господь дияволе пришедыи в мир», а Исус Христос, оставлено. В том же запрещении диаволу. В старопечатных: «запрещен буди и отъиди», и проч. В новопечатных: «запрещен буди». А отъиде оставлено.
Шестое: В молитве 4: В древлепечатных: «и дунув иерей на крещаемаго, 3-жды, и знаменает чело его, и уста его, и груди его, и глаголет, изжени от него». и прочая. В новопечатных же: «и дунет священник на уста его, на чело, и на перси, глаголя: изжени» и прочая. А еже знаменати его, сие оставлено.
Седмое: Во отрицании сатаны. В древлепечатных: «Вопрошает иерей крещаемаго. имярек. отрицаешилися сатаны», и прочая. В новопечатных же: «обращает его священник и глаголет. отрицаешилися сатаны», а имярек, оставлено.
Осмое: В том же отрицании. В древлепечатных: «отрицаюся сатаны и всех дел его, и всея службы его, и всех аггел его, и всего студа его». В новопечатных же, вместо «студа его», напечатано: «и всея славы его».
Девятое: В том же отрицании, в древлепечатных: «вопрошает младенца, имярек. отрицаешилися сатаны. отвещают вместо младенца восприемницы, отрицаюся сатаны». В новопечатных, к вопросу: «отрицаеши ли ся сатаны?» отвещает: «отрицаюся». А сатаны отставлено.
Десятое: В том же отрицании в старопечатных: «и паки вопрошает крещаемаго, и сие трижды. отрече ли ся сатаны? и отвещает отрекохся сатаны». В новопечатных, к вопросу: «отреклся еси сатаны?» Отвещает, «отрекохся», а сатаны отставлено.
11: В обещании Христу. В древлепечатных: «вопрошает священник, подобне трижды, и сие, обещаваешилися Христу, имярек. и отвещает, обещаваюся Христу». В новопечатных: «глаголет священник, сочетаваеши ли ся Христу, отвещавает оглашенныи сочетаваюся». А имярек, и Христу отставлено.
12: В символе святыя веры, иже глаголется на святом крещении от крещаемаго 3-жды. В новопечатных с древлецерковными несогласие. В древлепечатных: «и во единаго Господа Исуса Христа… рожденна а не сотворенна… Егоже царствию несть конца… И в Духа Святаго Господа истиннаго и животворящаго». В новопечатных: «и во единаго Господа Иисуса Христа… рожденна не сотворена… Егоже царствию не будет конца… И в Духа Святаго Господа животворящаго». и проч.
И за превращение символа святыя отцы таковое запрещение положили, дабы иоту едину, или едину черту не превращати, сиречь ни приложити, ни уложити, ни превратити ни едино речение, ни писмене отъяти в нем. Аще кто дерзнет таково что любо в священнем символе, да будет проклят. О чесом третияго вселенскаго собора правило 7, такоже и премудрый Макисм Грек, и О вере книга на листу 8 являют [и Кирил. на листу 370].
13: В старопечатных. По символе вопрошает крещаемаго трижды: «обещался ли еси Христу, и отвещает, обещахся Христу». В новопечатных: «глаголет, паки к нему, сочетался ли еси Христу. и отвещает, сочетахся». А Христу отставлено.
14: В древлепечатных: «вопрошает, веруеши ли во Христа, и отвещает, верую во Христа». В новопечатных: «вопрошает, веруюши ли Ему? и отвещает, верую Ему яко царю и Богу». А во Христа отставлено.
15: В молитве: благоутробныи. В древлепечатных: «и вообрази Христа твоего, в хотящем породитися святым крещением, от моего недостоинства». В новопечатных: «и вообрази Христа твоего, в хотящем паки родитися, моим окаянством». А святым крещением отставлено.
16: В молитве. велии еси Господи. В древлепечатных: «Тебе поет солнце, Тебе славит луна, Тебе молятся звезды. Еже рабское служение, от твари ко Творцу приносимое говение (метафорически) являет». В новопечатных же вместо «Тебе молятся звезды», напечатано: «Тебе собеседуют звезды». А последи во иных напечатано: «Тебе присудствуют звезды». Советническое и приближное звезд к Богу сим глаголанием показуется, несогласно яко древним рукописным и харатейным книгам, тако к самому словес разумению. Кая убо тварь к непостижимому Творцу в собеседство, или в присудство может устроитися? Весма сомнително православному разумению. Разве согласное изъявится манихейскому умствованию, еже тварь обоготворяющему, якоже и в первой части, во главе 16 явствуется.
17: «И дунет на воду 3-жды, погружая персты крестообразно, и глаголет: да скрушатся под знамением воображения Твоего вся противныя силы». Которое знаменование, по древлецерковным книгам, двема перстома священницы благословляюще совершаху. По новопечатным же: пятию перстами иереи знаменающе воду благословляют. Но не двема перстома благословляющих древлеправославная российская церковь клятве отдавает. Потребник, лист 597 т 659: и Стоглава, глава 31, и проч.
18: В той же молитве, в древлепечатных: «Да отступят от нас вся воздушная, и невидимая привидения. и да не утаится в воде сей бес темен, ниже снидет со крещающимся дух лукав помрачение помыслом, и мятеж мысли наводяи; но молимтися Владыко, Ты Господи всех покажи воду сию воду покоя, воду избавления, воду освящения», и проч. В новопечатных же: «Да отступят от нас вся воздушная привидения. и да не утаится в воде сей демон темныи, ниже да снидет со крещающимся, молимся Тебе дух лукавыи, помрачение наводяи; но Ты Владыко всех, покажи воду сию, воду избавления», и проч.
Но коль сомнительно и коль неистовно показуется сие молитвословие, имже является духу лукавому явственное повиновение, и покорное молитвенное прошение, и господьственное его владычество.
19: В действе маслопомазания: «и дунет священник в сосуд елея, 3-жды, и знаменает рукою, 3-жды, крестообразно». Которое знаменание в древлецерковнем двема перстома священницы знаменающе совершаху, и освящаху масло. По новопечатному же: пятию перстами священницы оное знамение совершают, сопротивно древлеправославней церкви.
20: В маслопомазании. В древлепечатных: «священник приим святое масло, помазует крестящагося, на челе, на очию, и на прочих частех тела, на коемждо помазании глаголя: помазуется раб Божии, имярек, маслом возрадования. во имя Отца и Сына и Святаго Духа, аминь». В новопечатных же: «помазуется раб Божии елеом радования, во имя Отца и Сына и Святаго Духа. ныне и присно и во веки веков, аминь». А имярек, отставлено. Ныне и присно, прибавлено. Еще приложено в новопечатных, в маслопомазании приглашения: «на персех, во исцеление души и тела. на ушесех, в слышание веры. на руках, руце Твои сотвористе мя и создасте. на ногах, во еже ходити по стапам заповедей Твоих». Яже в древлецерковных во всех книгах весма не обретается.
21: В древлеправославней святей церкви вси святии учители веруют совершатися святому крещению крестом Христовым, яве яко трисоставным, о чем и в 40-м ответе засвидетельствуем. Ибо Христов есть трисоставный, им же и купельным водам, и прочим тайнам освящатися исповедоваху. Якоже святый Златоуст глаголет: «Ныне же чрез повеление Божие крестом кленетеся, егоже даде нам на честь велику, оружие на противнаго врага. без того бо ни крещение, ни литоргия не бывает, ни ина кая духовная вещь. имже мы знаменающеся бесовския силы побеждаем». Пролог, марта 13, лист 64.
Святый Иларион Мегленский: «Рукою воображаемыи крест освящает вся, на нихже полагается, и воду глаголю крещения, и масло и мvро, и лица человеча верующих, и тайныи хлеб и священную чашу, и ина вся». Книга Кирилова московския печати, прение святаго Илариона со армены. И святый Симеон Фессалоницкий пишет: «Темже совершено творитель сам крест, и без креста ничесо совершается божественных таин». Слово 62. Преподобный же Феодор Студит явственнейшии сице глаголет: «Днесь тричастныи крест покланяем есть, и четвероконечная празднует радостно». И паки: «Крестом во Христа облекохомся, крестом назнаменахомся Христовы овцы», и проч. Собоник, слово 2 в неделю 3-ю поста.
В нынешней же великороссийстей церкви учители не трисоставным крестом Христовым крещению и прочим тайнам залогом веры совершатися умствуют, но четвероконечным крестом (си есть латинским крыжем) крещение и прочия тайны совершати и веруют и утверждают. Яко новопечатная книга Жезл явственно свидетельствует, глаголющи: «Ибо сицевым [изображен двучастный крест: IИС ХС: НИ КА] воображением креста Господня вся тайны церковныя действуем: воду ко крещению святому сицевым креста видом благословляюще освящаем, елей такожде. но и отрочата мажуще елеем и мvром святым, не ины крест точию четвероконечныи изображаем. сицевым крестом просвора, на заколение Агньца уготованная, благословляется, и в самых таин тела и крове Христовы совершении сей же образ креста употребляется. сим супружество составляется, и священство благословляется. не иным образом сами ся знаменаем, и иныя благословляем. тако елеем болныя мажем, церкви посвящаем, ястие и питие благословляем. словом рекше, вся священная действуем, четвероконечнаго креста образ творяще». Часть 1, лист 65. Зри подобне и прочия новопечатныя книги, тоже утвержающиия: книгу Камень веры, о кресте, часть 2, глава 3, лист 253: и книгу о кресте, Розыск пятой.
Чесо ради о догмате сем проповедания сомнения ны весма объемлет, яко вся тайнодейства и вещи двоечастным крестом великороссийская нынешняя церковь совершати исповедает и умствует. И яко весма сомняемся двочастному кресту покланятися, и вместо истиннаго креста трисоставнаго прияти его. Тако зело опасаемся из под того двочастнаго креста (еже есть латынскаго крыжа) прияти и крещение, яко оным совершаемое и действуемое, и весма трепещуще страшимся.
22: В великороссийстей нынешней церкви (якоже и в первой части в статии 14 явихом) и обливательное крещение взаконяется. И в Киевстей же, Смоленстей и в Белоградстей митрополиях обливательное крещение всюду и всюду имеется. И приходящих от латин поляков и малороссийцов, такоже и от люторов и калвин, нынешнии российстии пастыри второе не крещают: и не токмо не крещают, но и в духовная чины поставляют. И в посвящении в епископы и в прочия причетники начальствовати им определяют. И в книги их, обливание утвержающия, приемлют: якоже Требник Петра Могилы, книгу Мир с Богом, и книжицу Трубы Лазаря Барановича, и еще книжицу Катихисис малый, и прочия многшия всюду и везде в российстей церкви имеют и содержат: тако и обливание по оным откровенною главою совершается.
А наипаче новоизданная О поливательном крещении книжица, которая от духовнаго Синода в лето 1724 издадеся, яже не токмо поливательное определяет крещение, но и за важное и законное оно вменяет. И не сие токмо, но и единопогружетельное крещение за крещение вменяет, аще с приглашением Святыя Троицы совершатися будут. Еще же и трищное погружение во крещении не нужно, ниже важно, но вещь среднюю иметь, свободе подлежащую. Тако и таинство изображения смерти Христовы не нужно и преступно быти глаголет. Еще же не водою исповедает, по святых учителей, омыватися на души первородному греху, но кровию Христовою, якоже скверныя лютеране. О чесом главы 12, 13, такоже и 7, самовидно свидетельствующе изъявляют. От сего показуется, яко не точию приемлет российская нынешняя церковь обливаемое крещение, но и за важное и законное его поставляет. Крещение же трипогружательное не нужное, ниже важное, но вещь среднюю, свободе подлежащую, быти объявляет. Отсюду зрится, яко аще и трипогружателное где в российстей нынешней церкви бывает крещение, обаче самою вещию обливательное и единопогружательное за законная полагаются. По сему их новопроповеданию новшествующих архипастырей, како будет от них крещение не сумнительно? како рачителем древлеправославнаго предания удобоносно крещение их покажется, яко толь злаго мудрования и предания наполненное, яко с обливательным и единопогружательным крещением соединение имеет? Того ради сомняющеся о нем, прияти его зело опасаемся.
23: В древлепечатных Потребниках в самом действе святаго крещения полагается: «посем иерей приим крестящагося, и крещает глаголя: крещается раб Божии, имярек, во имя Отца, и погружает его к востоку лицем, и возводит глаголя. и Сына аминь. и паки погружает его глаголя, и Святаго Духа аминь». В новопечатных: «крещает его священник, проста его держа, и зряще на восток, глаголя, крещается раб Божии. имярек. во имя Отца аминь, и Сына, аминь, и Святаго Духа аминь. ныне и присно и во веки, веков аминь. на комждо приглашении возводя его и низводя». А еже погружати его, и еже первое и второе и третие погружати, сего в новопечатных Требниках не обретается: откуду и сомнятися подобает, яко самая форма крещения в новопечатных видно не указуется, а наипаче понеже во иных книгах и обливати повелевает, якоже в вышшей статии показася. А еже к единой ипостаси Святаго Духа два аминя прилагати великороссийская церковь повелевает: явственне чрез сие Святаго Духа в два начала разделяти усилуется, и сим Римския церкве мудрованию о исхождении Духа Святаго от Отца и Сына согласующися. Обаче святая церковь, якоже сие мудрование клятве предавает, так и пребольше еретичество и всем ересем главу быти являет, от него же вся иныя ереси прозябати сказующи засвидетельствует: о чесом в первой части, во главе 13 изъявихом.
24: В старопечатных же: «помазует священник крестившагося святым мvром, и творит крестообразно, на челе, на очию, на ноздрию, на устах, и на обе уши, и на грудех, и на руках, и на сердцы, и на плечию, и между рамома, глаголя, на коемждо: печать дара Святаго Духа, аминь». В новопечатных: «помазует крестившагося святым мvром, творя креста образ, на челе и на ноздрех, и устех, и обоих ушесех, и персех, и руках, и ногах, глаголя, печать дара Святаго Духа аминь». А еже на очию и на сердце, на плещах, и между рамома помазовати, отложено. Вместо же сих на ногах помазовати положено, еже весма православней церкви противно и несогласно. Ибо егда Карула кесаря Леон папа мvром в миропомазании от главы и до ногу помаза, наречено жидовским обычаем. Якоже книга Кирилова лист 226, и книга Кормчая на листу 11 являют.
А наипаче, понеже до осмаго дне мvро не отмывается, како сохранитися от мокрот, нужно от естества исходящих, вящше егда случится от младенца? Откуду нам зело сомнително показуется действо миропомазания, яко святым учителем несогласно и весма противно.
25: В древлепечатных: «И возлагает на крестившагося крест с гойтаном, якоже истиннии христиане имут обычай, еже носити на себе знамение спасительных Христовых страстей, иже есть честнаго креста образ, на прогнание всякия неприязненыя детели, себе же на сохранение души и телу». В новопечатных же сего крестовозлагания не указано.
26: В древлепечатных, во апостоле по крещении глаголется: «братие елицы во Христа Исуса крестихомся, в смерть Его крестихомся». Якоже и во евангелии: «едини надесяте ученицы, идоша в Галилею, в гору, аможе повеле им Исус». Паки: «и приступль Исус рече им», и проч. В новопечатных же, во апостоле читается: «братие елицы во Христа Иисуса крестихомся, в смерть Его крестихомся». Во евангелии же: «едини надесяте ученицы, идоша в Галилею в гору аможе повеле Иисус». И паки: «и приступль Иисус рече им». и проч.
Посему познавается, яко ныне великороссийская церковь не во Исуса крещает, но во Иисуса: сице и не во Исуса верует, но во Иисуса, яко же в символе веры пред крещением глаголется. Сего ради мы во Иисуса действуемое крещение прияти зело опасны и весма сомнителны. Понеже опасает нас крепце и сосуд избранный Христов Павел апостол от приятия инаго Исуса, еже пиша к коринфом, тако глаголет: «Боюжеся, да не како якоже змия Еву прельсти лукавством своим, тако истлеют и разумы ваша от простоты яже о Христе. Аще бо грядыи иного Исуса проповедает, егоже не проповедахом: или дух ин приемлет, егоже не приясте: или благовествование ино», и проч. Зач. 191. Возлюбленный же ученик Христов Иоанн Богослов, явственне отметающагося Исуса Христа антихристом нарицает, тако глаголя: «Кто есть лживыи? точию отметаяися, яко Исус несть Христос. сей есть антихрист». Соборное послание 1-е, зач. 71.
Но великороссийская церковь явственне Спасителя нашего Исуса Христа отметается, глаголя: «Вправду (рече, в расколниках) ин Исус». И паки глаголет: «Ин обретеся в них Исус, глаголемыи равноухии». Книга Розыск, глава 15.
Темже мы, по апостольским словесем, якоже зело ужасаемся иного Исуса, еже есть Иисуса (в крещении новодействуемом заключаемаго), весма трепещем в того действуемыя тайны крещение и прочия приимати: да не истлеют разумы наши от простоты, яже о Христе: и да не приимем с действами и самого онаго Иисуса, еже новомудрствующими учители внове проповеданнаго: и да не явимся почитающе его, яко истиннаго Исуса Спасителя: да не и о нас исполнится еже преподобным Ефремом реченное [слово 105]: «Яко вси покланяющеся пред зверем и вопиюще, глаголюще: ты еси спаситель наш». Его же свойственно быти на число лет 1666 разумеем.
27: В древлепечатных: «И обходит священник святую купель, среди церкве стоящую, трижды, последующу и восприемнику с новокрещенным, поющым всем, елицы во Христа крестистеся». Которое обхождение в древлероссийской церкви совершается по солнцу. В новопечатных: «Таже творит священник с воприемником и младенцем круга образ. и поем елицы во Христа крестистеся». Еже содевают в новодействуемом обхождении единожды, и противу солнцу на шуее творят круглообразное хождение: и сим являют от пути деснаго отступление, и на шуии, сиречь развращенный, уклонение, и ко антихристу присвоение. Яко пишет святый Кирил Иеросалимский во главе 6-й, сице глаголя: «Но Христов противник яко во всем, тако и в том противится Христу. и востающе с шуия противник десныя, сиречь дающе силу свою на десную, тоже Христово, а шуее бо антихристово». Книга Кирилова, лист 60.
Прочия же отмены и изменения в новодействуемом крещении продолжения ради оставляем. Прилоги, отложения, елики в словесех, елики в речениих, елики в молитвах, в возгласех, и в тропарех, в песнех и прочих действотворениях, ими же толико новопечатныя Требники изобилно обогатишася, яко не обрящется стиха и молитвы, отменами и приложеньми не преправлены. Оставляем власострижения пременение, куколиовозлагания отъятие, и прочия многшая. Вся сия множества ради претекаем, оставляюще самому тебе, вопросителю, благоразумно и желательно труждатися во оных.
Темже, како таковое крещение будет православное? кто от любящих древлецерковное предание сие крещение возъименует благочестивое? кто от хранящих святоотеческое содержание сицевое многоковарственное и много растленное крещение православным и христопреданным (яко же вы нарицаете) нарещи не устрашится? кто, имея совесть благу, возглаголет, по Матфею Иеросалимскому [состав а, глава 2, о еретицех 2 чина], яко точное нам совершается божественное крещение? Отъиди.
А понеже и сам той же Матфей Иеросалимский, свидетельствуя о неприятии святыми от еретик растленнаго крещения, сице глаголет [состав а, глава 2]: «Аще, рече, отнюд не крестишася, или крещьшеся, не по уставех православныя церкве назнаменашася, темже яко не просвещени божественными отцы вменяются». К сим же всем и святое изображение веры, во едину святую соборную и апостольскую церковь, едино крещение исповедати научает, а не в еретическую и отступническую. Согласно же символу веры и апостол научающи глаголет: «Един Господь, рече, едина вера, едино крещение». Но и впреди сея третия части доволно от святых богословцев показахом, яко вера с крещением не разделяется, тако и веровати подобает. Темже аще тако веровати летьствует, якоже крестихомся: убо ты, вопросителю, приемляи от великороссийския церкви крещение, должен прияти и все новшества, заключаемыя в новодействуемом крещении. Аще же веруеши иначе, а крещение с твоею верою отнюд не согласуемое приемлеши, то всуе твое отлучение будет от новинами изобильствующей церкви: и яко развратник или предатель обоюдный древнему иному явишися, и праведное посмеяние от всех приимеши с великим поношения укором.
Мы же, соглашающеся со святыми, праведне о новотворном крещении сомнение имеем, и законно и нуждно его прияти опасаемся: яко самех действителей (крещения новодействуемаго) за согласие со всеми древними вящьшими еретиками, и со оными, во всем согласующими, латины, люторы и калвины, якоже в первой части изобразихом: тако и самеми того крещения толико многими несогласии и таковыми отменами, вседолжественно в сие принуждени.
Верно есть сие слово и всякаго приятия достойно.

Вопрос, 22.
Приемлете ли кия от великороссийской церкви тайны, или не приемлите?

Ответ, 22.
Понеже перваго раздела в 20-м ответе от свидетельств святаго писания явствовахом, яко вси тайны еретическия лишаются благодати Святаго Духа, и яко святою церковию они не приемлются. Но и в прешедшем ответе коликими премножайшими свидетельствами подкрепихом, чесо ради мы не приемлем крещение от великороссийския церкве, и яко праведное имеем от него опасение. Темже убо аще крещение к приятию древлеправославныя церкви чадом отнюд неудобно показуется, коль паче неудобнейшии к приятию прочия тайны явятся. Ибо восточный учитель Гавриил, архиепископ Филадельфийский, крещение сказует быти перваго чина или степене, и кроме онаго прочия тайны своего совершения в действе не могут получити, идеже тако глаголет: «Первыи чин имать, божественное крещение. яко сие есть, яко некии степень иных таин. и яко сему не сущу, иныя совершити христианина не могут». Книга О 7-ми тайнах, глава 9.
Во второй же части, в разделе 6-м, о неприятии от еретик тайны хиротонии, и в прочих засвидетельствуем. Но и в вышшем в 10-м и в 20-м обще о всех тайнах еретических доводствовахом, зде же таяжде повторяти продолжения ради оставляем.

Вопрос, 23.
Аще приемлите, то кия, и за право ли их приемлите?

Ответ, 23.
Довольно засвидетельствовахом в 20-м и 21-м, такоже и в вышшем ответе кратко помянухом, чего ради крещение и прочия вси тайны еретическия к приятию нам неудобны показуются. Темже аще не приемлются, тако и правыми не поставляются: убо о том же паки якоже вам вопрошати многажды не приличествует, тако и нам ответствовати, кроме есть чиннаго и уставнаго поведения: да не о едином продолжающе, укосним время в неполезных, полезное же отставивше не ответствованное. И сие не есть ученных дело, но грубых и невежества и неразумия всякаго исполненных.

Вопрос, 24.
Аще не за право, то чем их исправляете, и которым молитвословием навершаете?

Ответ, 24.
Кое убо будет от нас нынешния великороссийския церкве тайнам, паче же крещению, о нем же у нас наиболее пря належит исправление (яко же ваше намерение клонится к поправлению мvром, каков церковь Божия неким средним еретиком смотрения ради обычай имеяше)? Или коим молитвословием ко исправлению, более клонящимся третияго чина еретиком, а не перваго? Но коликая тебе, вопросителю, предложихом по своему скудоумию в 21-м ответе: яко великороссийская церковь не малых ересей или средних точию ереси возобнови, и яко не единаго коего любо еретика ересь: но многих древних великих еретик ереси возстави, и прочих богомерзских латинов, люторов, калвинов, такоже жидов, татаров, и еллинов и прочих множайших предания и обычаи нововведе, другия же и от себе привнесе, и святоотеческое предание отверже с клятвою и зелнейшим поруганием. О таковей убо церкви свидетельствует превечное Слово Христос Спаситель, тако глаголя [Матф., зач 22, Лук., зач. 27]: «Никтоже, рече, собирает от терния грозды, и от репия смокви». Святии же учители последующе своему Учителю, сице реша: «От еретиков (иже аще и не толико тяжчайшия ереси имущих, ниже толь безчисленныя безчисленных, но точию частне предания православныя церкве преступивших) яко еллины приимати сия повелевает» [6 собора прав. 95, от толк.]. Преподобный же во иноцех Иосиф Волоколамский о них засвидетельствует, тако глаголя: «Но еретицы убо не единомудрствуют: ови убо тако, ови же инако, павликиане и фотиане, фруги и евномиане. [Ниже:] И прочия таковии. сии убо не веруют во Святую Троицу, и Господа нашего Исуса Христа Богом не нарицают. [Ниже:] Ови же проста человека. о сих убо глаголет божественная писания, яко егда приходят к православней вере, подобает им прежде поститися время довольно, и вне церкви стояти. потом же сих крестити, яко ельлины». Книга Просветитель, слово 15. Святейший же Филарет последственне глаголет: «Обаче павликиане и прочия, яко еллины приемлем. Ельлины же (рече) яко жидовы и агаряны повелено есть крестити святым крещением». и прочая. Потребник, лист 64 на обор.
Сих же все вышеписанных еретиков части великороссийская церковь ереси возобновив, другия же от себе привнесе, якоже в 21-м ответе явихом. Свидетельствует же о сем и Тимофей Великия церкви, яко от приложившихся к павликианстей ереси, таже прибегших к православней церкви, устав изложен по всему покрещевати [Кормчая, лист 635]. 7-е правило собора Лаодикийскаго, за поновление ересей перваго чина, фитиниан повелевает крестити. В Потребнице же, латинов, за суботный пост жидом уподобляя, повелевает крестити. И чин и устав един тамо написуется, яко же латинов, тако и жидовом и срацыном, или кто прежде еретическое крещение бе имея: о чесом во главе 72, на листу 590-м показуется. Темже и ныне, от имеющей великороссийской церкви тыяжде ереси, таяжде предания онех еретиков и ко оным приложившейся, летьствует подобообразное оным исправление приходящим имети: яко не мvром, или молитвословием навершати, но совершенно святым крещением, яко не просвещенныя просвещати.
А яко от вас, и от самого твоего примечается вопроса, мнение происходит, что крещаемии не в погружении православному получают совершеньство или пришествие Святаго Духа, но в миропомазании. И в том крайне ваше разумение противствует исповеданию святыя церкве. Понеже она не в едином миропомазании освящение Святаго Духа исповедует, но и в прочих тайнах, и во всех священиях церковных. О чесом в Катихисисе Великом засвидетельствующи тако вопросоответствует: «Вопрос. Како нам дадеся Дух Святыи и дарование, и в чем действие Его совершается? Ответ. Первое гласом евангельским, и поучением святых писании. якоже святыи апостол Петр к Корнилию глагола, нападе Дух Святыи на вся слышащая слово. [Ниже:] и зде Дух веры слышанием и поучением слова Божия нам дадеся. [Ниже:] потом паки во всех тайнах церковных действует Дух Святыи. и нам дадеся, якоже на крещение, Дух освящения, и истинныи Дух обручения, и дарования приятие. Дух сыноположения. такоже и возложением рук, и миропомазания, и в хиротонисании. сие же и во время освящения церкви. Такоже бо святыи апостол глаголет, яко Дух Святыи действует вся во всех. вся едина суть потребна к спасению нашему. [Ниже:] сия вся Дух Святыи во всяком изволяющем действует. [Ниже:] Вопрос. В коих убо таковая действует Дух Святыи? Ответ. Яве яко во изволяющих благое, и крестящихся, и в послушающих слово Божие и хранящих е. и в каяющихся, и верующих обетованиом, и в тех о иже противу совести ничтоже дерзают творити, или предложением имут блюстися грехопадения, и до издыхания своего Богу повиноватися. в сицевых токмо человецех Дародатель Дух Святыи действует». Глава 24.
От сего убо доводства явне утверждается, яко не точию в крещении чрез миропомазание Дух Святый снисходит на освящение и просвещение человека, и очищение древняго прародительнаго падения, и прочих грехов, но и самую сию тайну крещения печатлеет еще до миропомазания. Ибо крещение и миропомазание, такоже и елеопомазание, разныя суть тайны и собными своими чины действуемы суть, и Духа Святаго присещением всеблагодатне совершаются. Аще и вси во едино время действуются над крещаемым: но и прочия такоже тайны той же пресовершенный всех действий церковных Дух Святый своим совершеньством освящает и просвещает, якоже от Катихисиса засвидетельствовахом. Зри еще и в самом чине крещения в молитве, от иерея глаголемой пред миропомазанием: в ней же крестивыйся, еще не получив миропомазания, уже причастником Святаго Духа быти засвидетельствуется, идеже тако речется: «Благословен еси Господи Боже Вседержителю, источниче благих, солнце правды, просиявыи сущым во тме свет спасения, ради явления единороднаго Ти Сына Бога нашего, и даровав нам недостойным, блаженное очищение во святей воде, и божественное освящение в животворном Ти помазании. еже и ныне благоволил еси породити раба своего новопросвещеннаго, имярек, водою и Духом и волных и неволных согрешении оставление даровав». и проч.
О действии же святаго крещения во время нужды, в неимении священства, кроме мvра, маслопомазания и молитвословия, может ли оно совершенным быти? в 42-м ответе засвидетельствуем, зде же продолжения ради писати оставляем.

Вопрос, 25.
Почему нарицается истинный православный христианин?

Ответ, 25.
Преподобный Ефрем Сирин в 50-м слове ответствовати вам имать, почему может нарицатися християнин. Идеже тако глаголет: «Поразумеем, яко имя наше согласно есть имени Его (сиречь Христову). понеже убо Той Христос наричется сам, мы же христиане». Там же, на поле, против сих строк напечатано: «По Христе христиане». Ефрем, слово 50-е.
Истее же нарицается или познавается христианин от веры и благодати евангельския, божественным крещением знаменанныя. Якоже о том в Катихисисе Велицем, воглаве 1 сице ответствует: «Христианин есть, иже от Бога святым крещением порожденыи. и по благодати Его банею паки бытия сын Божии нарицается. благочестивно и боголюбезно пребываяи, и право в православии веруя, и твердо стояи. не ища себе инаго закона, и превратнаго сомнения. храня себе непоколебимо во христианском законе, и своими благими делы показуя свое благоверие». Катихисис, глава 1.
Ответствуют же вам и прочии учители церковнии Анастасий патриарх Антиохийский, и Кирил Александрийский, глаголюще сице: «(христианин есть) иже в Бозе живет, и благочестивно и боголюбезне пребывает». Катихисис малый печат., лист 3.

Вопрос, 26.
Положенныя в Потребнике о приятии еретик во святую церковь, разныя чины обретаются. Вы убо по которому чину от великороссийския церкви приемлите: убо ли якоже от латин, или якоже и от прочих еретиков? известите нам и сия, ничтоже утаевающе.

Ответ, 26.
Понеже много мы искахом в Потребницех: но на от иже приходящих ко святей церкви различных еретиков, такоже жидов и срацынов, хотящих просветитися святым крещением, разных чинов к приятию не обретохом, якоже от тебя, вопросителю, назнаменовася. Аще же ты где обрел еси, повеждь нам. Мы вемы, на приемлющих святое крещение от разных иноверцов един чин и устав обретается в Потребницех. Разве точию каждому суеверию имеется особое отрицание с проклятием: но сие точию может нарещися припряжение, отменное к чину и последованию крещения, а не чин особый. Якоже в самем Потребнице, в чине от ереси приходящих, явственне против вашего мнения засвидетельствовати имать сице: «Чин и устав, како достоит приимати, иже от латынь приходящих, ко святей Божии соборней и апостольстей церкви к нашей непорочней христианской вере православней. хотящих истинным святым крещением креститися. Дающих на себе свиток писания православныя веры, и проклинающих вся своя ереси, и иную всякую ересь. Сего же чина и устава последование, единообразно действуется над приходящими, и от иных вер. Аще жидовин, аще срацынин, или кто преже еретическое имея крещение, о нихже вся свершается неизменно, якоже зде написано: кроме токмо свое писание имать во отрицании, коегождо богомерзскаго закона, и проклятия всяких различных ересей». Глава 72, лист 590.
Зде убо явственне в Потребнице показуется, яко не по тебе, разныя чины еретиком, и прочим требующим святаго крещения, но единственен и единообразен: точию особое отрицание и проклятие ересей различное обретается. Но сие (проклятие) прилежит паче к священным чинам, а не простолюдином, по нужде нуждныя тайны действующим, о чесом в 29-м ответе засвидетельствуется. А еже вопрошаемся: тако ли от нас приемлются от российския церкве приходящии, якоже латины, или прочия еретики? но поелику великороссийская церковь, якоже в 21-м ответе показахом, приобщается своим мудрованием и действием верховнейших еретиков, такоже латинам, лютором, и калвином и иным многим: бо и прииматися должни суть по готовому образу, изложенному от святыя церкви, приходящии от нынешних великороссиян, яко приложившимся ко оным ересем. Якоже о сем Тимофей, презвитер Великия церкве, свидетельствует: «Яко от приложившихся к павликианстей ереси, тако прибегших к православней церкви, устав изложен по всему покрещевати». Кормчая, лист 635.
Зри о сем же во ответе 24-м, зде же повторяти за долготу ответов не разсудихом.

Вопрос, 27.
Аще ли от сих не по единому, то убо ли у вас собою положенный чин о приятии от великороссийской церкви обретается?

Ответ, 27.
В прешедшем ответе явствовахом, яко святая кафолическая церковь на еретиков, требующих святаго крещения, и прочих иноверцов жидов и срацын, един чин и устав содержит, разве точию в проклятии ересей различие употребляющи имеет: убо и не должно вам нас истязати о изложении особого чина. Но мы готовому святых отец святоцерковному прилагаемся уставу, егда обретше в великороссийской церкви в новопреданиях согласное с наивящьшими еретиками, темже и со оными тую осуждаем. И сие не от себе, якоже ты рекл еси, приемлем, но по образу правильному поступающе, входити в сию необходимость понуждаемся, якоже и в 24-м ответе засвидетельствовахом. Иже егда святии отцы, коих еретиков уведевше, обновляющих величайшия ереси, тогда уже снисхождение им творити отложше, поступаху законно, си есть крещением, яко непросвещенныя, просвещаху, о чесом в 3-м и 4-м разделе ответа 44-го засвидетельствуем.
Но не мы первии суть началовводители или положители великороссийскую церковь в первой чин или в вящьшее погрешение: но велицыи страдальцы, кровию своею запечатлевшии древнее благочестие, якоже священннии, тако и простии. Их же мы священное писание зде поряду предлагаем, да явленнейше увеси, не от нас начало (еже без крещения нынешних великороссиян не приимати), но от богоблаженных и благоревностных страдалцев произыде.
Лазарь, священник бывый града Романова, пишет к патриарху Иоасафу сице: «А крещение в новых книгах не истинно есть, и то есть тайное отрицание. яко в молитве глаголют: молимся тебе дух лукавыи, помрачение помыслом и мыслей наводяи. но ты владыко всех. и прочая доводит премены в новодействуемом крещении». И паки ниже, приводя свидетельство от Василия Великаго глаголанных словес, пишет: «Креститися подобает нам, якоже прияхом: а веровати так, яко крестихомся, яко от крещения запечатлеется в нас истинна. аще кто крещен будет не истинно, и како таковыи по крещении может веровати во истинну?»
Из послания священноинока и страдальца Феоктиста из Анзерской пустыни древлелюбителем благочестия: «Аще бо от еретик рукополагаемыи, и от слуг антихристовых: кое от таковых освящение, или очищение, или крещение, или всякия потребы благоприятны бывают? (сие он о новодогматствующих иереях глаголет) рцы ми, содействует ли Дух Святыи еретическому рукоположению, еже на них? никакоже. но паче осквернение, а не очищение. и о том в Кирилове книге пишет, во многих местех сице: еретическое крещение, несть крещение, но паче осквернение. аще бо и в покаяние приидет познания ради истинны, то не освященна его мню, понеже Дух Святыи на нем не действовал, но за простца его и мирянина в братьство причитаем».
От епистолии священнаго страдальца Феодора диякона: «А которыя попы от Никона отступника поставлены, и от никониан после мору, паче же от 174-го году, егда совершенно православие все отринуша, древнее предание святых апостол и богоносных отец оболгаша, и льстивно охулиша, нечестие же всякое прияша и оправдаша и укрепиша, и новоразвращенныя богомерзския книги со многими ересьми в них и всех еретиков похвалиша, крещение римское и священьство их гнусное прияша, ихже вси святии отцы наши прокляша и от святыя церкви отметнуша. понеже Рим всех ересей приятелище, и источник всякаго нечестия латынское мудрование богомерзское. тем отступлением своим и с латыни сообщением, чужди себе сотвориша архиерейства. [Ниже:] И православным христианом ныне не подобает их благословение приимати, ни службы, ни крещения, ни молитвы», и проч.
Из большия епистолии отца Авраамия инока и страдальца: «Нынешнии отступницы, ученицы окаяннаго Никона, повелевают нам отврещися печати Творца небу и земли, еже есть истиннаго крестнаго знамения, и святыя прежния службы, и святаго крещения. понеже бо не во Истиннаго крещают, не во Истиннаго и веруют, но в ложнаго антихриста».
Из малаго послания его же Авраамия страдальца: «А о крещении (сиречь новом) реку вам: первое, символ православныя веры от лица крещаемаго 3-жды глаголется превращенно, во имени Исусове литера прибавлена: и в Духа Святаго крещаемыи истиннаго не проповедует, емуже и по крещении во истиннаго Бога веровати невозможно».
И богомудрый старец Спиридон Потемкин, иже богоугодно в заточении пожив в Покровском монастыре. Сей в премудрейшем своем изложении на нынешнее великороссийское новодогматствование пиша, тако о приемлющих сие новодействуемое крещение, глаголет: «Горе, рече, приемлющым от злоковарных (нынешних никониан) крещение, или священство. и лучше бы им не родитися, сиречь умрети во утробе матерни», и прочая. Зри в книге его во главах 2-й и 7-й, пространно тамо писанное.
Подтверждает сего Спиридона Потемкина и Феодор вышепомяновенный, диакон и страдалец, тако глаголя: «А богомудраго старца Спиридония преподобнаго словеса, писанныя на еретики, приемлите, как и прочих богословцев святых Григория и Василия, и Дамаскина и иных. тот же истинныи Параклит глагола в нем отце Спиридоне, и пророк бысть. что он говорил про собор отступничей, так и збысться все. и на мне пророчество збысться не едино, что преставляяся глаголал мне. чуден муж бысть делом и словом, и в премудрости инаго таковаго ныне несть». У сего же епистолии священнаго стардальца диакона Феодора и рука приписана отца преосвященнаго, Аввакума протопопа, сице: «Протопоп Аввакум чел сие и разумев сие истинно, к тому и руку приписал».
До зде согласие единственное священных и богомудрых страдальцев, еже не приимати великороссийскаго новодействуемаго крещения. Когда еще в начале появляхуся новости, и не у в совершенство свое приидоша, и тогда толь с зелным запрещением уставиша предел отметати оное: коль паче неприятнейше явится при нынешнем глубочайшем новодогматствовании (о нем же в 21-м ответе толико изъявихом) творимое крещение. Но вам, о вопросителю, неверна мнятся сия страдалческая определения, не хотяще последовати оному священному гласу: «Не прелагай, рече, предел вечных, яже положиша отцы твои». Или инде негде от премудраго глаголется: «Не отступай заповеди старец, ибо тии навыкоша от отец своих».
Но аще неверна ти сия зрятся, гряди, покажем ти от изъявления предков ваших. Вопроси бо некогда Питирим епископ вашу поповщину тако: «Попы (рече) ваши в прежняя лета, по соборному приговору старцов и мужиков ваших, от нашея церкви приходящих к вам крестили совершенно в три погружения. и те попы, старцы и мужики, кои приговаривали им тако крестити, не покаявшеся о таковом законопреступлении, и умроша. правславни ли суть они или нечестивии, по правилом святых отец? Ответ 58. Аще кии оставшии древлеправославныя церкви попы, в прежняя лета, крещенных по новопечатным книгам сумнишася приимати за оным крещением, ради пременения чина, и ради протчих новодогматствовании и премен, объявленных в 1-м и 4-м ответех, а наипаче негли от оных попов, кии вельми дерзаша гнати, мучити, хулити, за древлецерковное старопечатных книг содержание. мы тыя древлеправославныя священники нечестивыми осудити за она не смеем. понеже, по сказанию священноинока Матфея Иеросалимскаго, сказателя священных правил [Матфей, по изложении особь объятие всех вин], священномученик Киприан со освященным собором крещенных от всякаго, в раздорстве сущих, повелеша крестити. а Василии Великии, воспоминает сие речение, в похваление убо положив, строения же ради праздность на ня изрек, а нечестивством за сие не оглагола. сих ради и мы, за новодейства усомнившыяся о тайнодействиях, православныя священники недоумеем нечестивством осуждати». Ответы Диаконовы, 58 ответ.
Но и сам вопросивый нижегородский епископ о прежнем чиноизложении древлеправославных священников к приятию, от великороссийския церкве приходящих, засвидетельствуя тако пишет: «А еже воспомянути прешедшая лета, отселе назадь лет 25, то по оному (си есть Филаретову) изложению, вы вси противни, мало не вси: всех к вам приходящих крещенных паки совершенно крестили. Исидор поп Козмодемьянскии, посем совершенно крестил. и дворянин Феодор Кокмачев такожде крестил. посем Феодосии поп крещенных паки крестил совершенно. посему же и прочия прельстившыяся такожде много крещенных паки крестиша». Пращица, лист 272.
Темже, аще от страдальческих епистолей показуется, что они крещение и прочия тайны новодействуемыя приимати не повелеша: аще и от ваших предков засвидетельствовася с подкреплением, яко крестившия древлеправославныя священники вторично приходящих от великоросийския церкви не суть нечестивии: аще и от самех никонопоследствующих архиереов показася, яко древлеправославнии попы паки от их церкве приходящих совершенно крещаху: убо не мы внове сей чин изложихом, еже приходящих от новодогматствующей великороссийской церкви паки совершенно крестити, но священныя страдальцы и древлеблагочестивии священницы. темже и не можем мы почестися за самоположителей чина церковнаго: но готовому последующе, согласныя со священными правилы творим и мудрствуем. Паче же вы показуетеся самотворцы чинов, приемлюще крещение новодействуемое и иерейство, в несогласие правильнаго положения, и в противность православных предков наших, запечатлевших святое благочестие своих исповедических кровей пролитием. Мы же хоша и простолюдини суще, но последуем готовому преданию, помняще апостоловещательный глас: «Стойте и держите предания, имже научистеся». 2 солуняном глава 2, зач. 276.

Вопрос, 28.
И аще собою положенный у вас чин имеется: то явите, от кого и когда, и соборне ли он положен? и был ли при оном изложении кто, поне един из архиереов, или множайшии иереи?

Ответ, 28.
В вышепредложенном ответе предложихом, яко не от нас началнейше, еже на приятие, от великороссийския церкве приходящим, чин, требующь крещения, положися: но от священных страдалец и древлерукоположенных и скрывшихся от гонения священников. Мы же готовому последующе, паче же апостольским и соборным, и прочих богоносных отец правилом, тако по нужде действуем.

Вопрос, 29.
И аще при оном изложении бяше архиерей или иерей, то явите имяны, кто они бяху? и како положен? и кия ереси проклинаются?

Ответ, 29.
В варившем 27-м ответе засвидетельствовахом, кто быша началоположители чина, приходящим от великороссийской церкви, еже крестити их совершенно. Но и они сицев чин положиша не без правильныя и праведныя вины, якоже мы тебе в 21-м ответе показахом. Обаче не вам бы должно о сем любопытствовати, еже о древнем древлеправославнаго предания, всеусердными блюстители положенном, чине: но нам бы вас, яко внове новая изложивших чиносодержания, в противность всему древлеблагочестивому преданию, котораго вселенстии пастыри зело опасатися повелевают. Якоже Мелетий, патриарх Александрийский, пиша к белорусцем, тако глаголет: «Всяк неотеризм [новичник] припряжен есть к беде. бегай беды. или не мала есть беда, еже церковь колебати». И паки: «Обыкшая с новым обретением бывати злая. сия вся молвы и разстояния, ересей наношение, и церковная смущения, новины любославных». 3-е послание Мелетиево до белорусцев.
Церковь же православная заповедует нам, глаголя сице: «Сего ради всеми силами всяк православныи тщатися повинен есть, яко да в приятии новин под анафему не подпадет, при которой искушения казни злыя сретают небрегущих о сем». Книга О вере, глава 23.
Темже не мы сего опасения и толиких диспутов (яко древнее а не новое, или от себе восприятое держащии предание) достойни суть: но вы, яко не древнее, яко новое, и яко от себе восприятое, противу правильной силы, паче же вопреки всему священному писанию и чиноположению последующии. Но яко мы, напротив, от вас потязаемся, в крайнее ваше защищение вашея матере, нынешния великороссийския церкви, яково убо видим от вас о ней зелнейшее попечение в грядущих ваших вопросех.
А еже от вас потязаемся, како и кия ереси от нас проклинаются? на сие ответствуем тако: еже судити новомудрствующих учителей (си есть определяти правилне в кий любо чин) и всяк верный христианин, аще и простолюдин, может: о чесом в прешедших в 10-м ответе и 21-м, в концы 1-я части, изъявихом, и в последующем в 30-м ответе засвидетельствуем. Проклинати же ереси не посвященныя от епископа не могут. О чесом Лаодикийскаго собора в правиле 26-м сице пишет: «Не заклинает кто, аще не будет от епископа поставлен». Толкование: «Заклинатели от епископа приемлют поставление, якоже и прочии священническаго чина. аще убо не поставлен будет от епископа в степень, заклинати не может ни в домех ни в церкви». Кормчая, лист 77 на обор. Ибо елицы древнии иереи донележе бяху, тогда и проклятие на великороссийския ереси от них исполняшеся. Егда же сей благочестивый корень священьства пресечеся, оттоле остальцы древняго благочестия по нужде, в нужная времена, определенною церемониею, непространным чиноотправлением над приходящими от противославия действуют, чрез три погружательное крещение, во имя Святыя триипостасныя Троицы оное совершающе: обаче же совершенство святаго крещения в том почитается, о чесом в предъидущем 42-м ответе засвидетельствуем.
Но мы паки касаемся о предлежащем ко крещению на приходящия от ересей творимом отрицании и проклятии оных показания. Понеже, якоже и в вышших ответех засвидетельствовахом, святая кафолическая церковь не единым точию творит отрицание и проклятие еретиком, но и другим богомерзским противоверцем жидовом, срацыном и прочим. Но святии мнози и несвященнии оных крестиша и кроме отрицания и проклятия, обаче от святыя церкве того ради несовершенным крещением оных крещение не почтеся. О чесом зде кратко засвидетельствуем.
Месяца ноября в 24 день. Мних некий крести девицу, жидовину сущу, о нем же Иоанн Милостивый откровение получив. В Лапсаике, во главе 37-й повествует: «Нецыи христианстии отроцы, на поли пасуще овцы своя, и прилучившагося с ними, пасуща вкупе овцы своя, евреина детища, именем Феодула, крестиша во имя Отца и Сына и Святаго Духа». Убо сии крестившии простолюдини жидов кое отрицание имеяху богомерзскаго их противоверства? и кое проклятие творяху различным их ересем, противу закона Моисеова введенным? Такожде и крещающии по нужде неосвященнии срацын или татар, которое имеют чинить проклятие их срацынскаго закона?
О чесом поместнаго собора в Константине граде отцы засвидетельствуют, якоже о них в древлеписменном Номоканоне повествуется сице: «Седящым святым патриархом в месте своем, в святой Софии, Антиохийскому, Констянтина града патриарху Иоанну. [Ниже:] А всея Русии митрополит Максим. и предстоящым ту многим избранным попом и диаконом. и положиша посреде собора вопросы некия, и ответы всякому. [Ниже:] Вопрос. Аще кто от татар приидет, хотяи креститися. Толк. Аще не будет велика сосуда, в чем погрузити его, то крестив воду в реце, и погружай его трижды, глаголя: Во имя Отца и Сына и Святаго Духа. Вопрос. Аще ли будет при смерти, а не будет святителя, ни попа, ни дьякона, а будет дьяк, льзе ли ему крестити? Толк. Аще не будет ни попа, ни дьякона, а будет причетник церковныи, то и тому подобно крестити, во имя Отца и Сына и Святаго Духа». Книга Кормчая старохаратейная в полдесть Глушицкаго монастыря.
И от сих свидетельств показуется, яко по нужде крещающии несвященнии жидов и срацын, и кроме проклятия ересей, не суть противнии святей церкви, и не несовершенно священие сицевое имеется быти. Аще не бы совершенно было, то неприятнии бы были крещающиися таковии от несвященных. Но яко и крестившии и крестившиися святии и церковию приемлются: и таковое крещение, по нужде творимое, вселенскими пастыри засвидетельствуется и повелевается, убо по нужде и без проклятия может совершенным быти. Повествует же в Потребнице Велицым, на листу 748: «Яко суть в России нецыи язычницы, безбожне живуще, яже суть: черемиса и мордва, чювашане, чюхны, ижора, лопь, и самоедь, остяки и колмаки и инии мнози. Сих убо подобает приимати, якоже еллины, и имеющым волхование проклинати оное. такоже грамотным и ереси проклинати повелевает». Зри убо, вопросителю, и сим, отнюд безбожным сущым, естьли обрящутся какия за ними волшества или ереси, повелевает церковь Божия им, приступающим к православию, проклинати оныя: повелевает и не вскоре просвещати святым крещением, якоже и прочих великих еретиков. Но что бы ты мог творити тогда и в таком месте, егда бы тамо не обретался православный священник, а нужда бы повелевала неотменно его просветить святым крещением? Мог ли бы ты требующих того оставить без просвещения так, и погибать вечно душею? к тому же, опасаяся без проклятия, не священ сый, принять и удостоить с православными соединения? Оле вашего неразсуждения и смешения нераздельнаго, сиречь свободность с нуждою, паче же единственное уклонение, кроме всякаго разсмотрения, к новолюбительному иерейству. Ибо точию ко оному ваше стремление безстрашне уклоняется, не разсуждающе ни времени ни случая трепетнаго, ни нужды предлежащия. А сосуд избранный заповедает тако [к филип., зач. 244]: «В неже (рече) время достигохом, тоже и мудрствуем, и темже правилом жительствуем».
Согласная же и его златословесный уяснитель священных словес, святый Златоуст пишет [Беседы апост., лист 298]: «Яко указания не вся повсюду достоит приимати, но потребное их избравшым, и на неже приемлется, прочее же все оставляти». Но ваше едино точию слово возглашается, что без священников все ничто. А того в разсуждение вам не приходит, что есть нужда, или что свобода? Или вы ум ваш облаком страстнаго похотения застоновлен имеете, еже не тщитеся разделяти свет со тмою, или злато с блатом. Ибо какой бы вам ни бы ни наткан злочестием, но точию бы имя иерейства на себе носил.
О слепоты! Не дивно есть тем прелестию обогащатися, и утопати в тине своего противоверства, кия уже нимало лучи древлеправославныя веры сияния отнюд зрети не удостоены. Но дивнейше есть вам к томужде всетемнейшему заблуждения приплетатися туману, и приимати ересесогнившия и отпадшия от главы их священства уды. Но насмехается, или паче удивляется Ростовский архиерей вашему суеверию, глаголя: «Дивлюся, рече, неким брыняном, яко новоисправленных книг не приемлют, а по новоисправленным книгам ставленных попов приемлют». И прочая тамо идиллимическая его вам от него соплетается фигура. Но уступите нам и зде, что мы укоснели к вам выговором нашим. Но якоже вы крайних, кроме самой истинны, истязании наполнисте ваш сей аргумент, и все по нужде творимыя вещи жестокому подлежисте суду и укорению: сице и мы не престанем праведне вас потязовати о вашем неправильном иерействе, которое не на создание евангельския истинны от вас новопроизведенное, но на развращение. Но сия ныне оставив, прочее простираемся паки ко ответствию на ваши вопрошении.

Вопрос, 30.
Аще ли положеннаго у вас чина не обретается, который бы с повелением православных архиереов изложен бяше: то по чему вы приходящих к вам от великороссийской церкви перекрещиваете? или по единому мужиков ваших приговору точию?

Ответ, 30.
Понеже предложихом ти уже в 27-м ответе, и многажды в прошедших ответех рехом, яко не мы не приимати начахом от великороссийския церкве новодействуемое крещение: но священный полк страдалцев и осталцы древняго благочестия, якоже священнии, тако и не священнии, к ним же присовокупишася и соловецтии иноцы. Понеже и они в своей епистолии, к самодержавнейшему монарху пишуще, такожде обличаху новодействуемое крещение. И выходцы из них священныя паствы делом тое исполняху. Кия при краях окияна моря скитающеся, не приемляху от никониан приходящих без повтораго крещения. Которым и мы последующе, яко сынове отцем, и яко ученицы учителем, по премудрому Сираху: «Не отступай, рече, от заповедей старец, ибо тии навыкоша от отец своих». Но что противное, аще бы и от нас что согласное священным правилом было бы изложено? Ибо преподобный Никон Черногорский во изглашении божественных правил советует, да церьковная правила употребляем в полезное, взирая на обстоятельство времене и на чины ключаемыя. Его же сказание таково есть [Кормчая, глава 71 и лист 637. от 63 слова Никона Черног.]: «Божественная правила от святых соборов, и инии глаголи святых отец, и от тех самех градских закон, яко да кождо от хотящих потребное в ключимем чине, и своим временем приплодит пользу». И паки той же [Никон Черног., слово 20, о покаянии]: «Яко не подобает, яже по нужди бывающая, или по смотрению некоему временну, внегда та в свидетельство приводити: но егда таковое найдет время».
Темже и мы, по сим богоносных отец гласовом, аще что правильно разсмотряюще судим, несмы противни закону, несмы не согласны заповеданию отеческому, не суть мы противни правильному положению. О чесом второперваго собора правило 15 тако глаголет: «Аще же нецыи отступят от некоего епископа, не греховнаго ради извета, но за ересь его, от собора или от святых отец не ведому сущу, таковии чести и приятия достойни суть, яко правовернии».
Речеши ли, яко сие завещается презвитером, или другим священным лицам. Не суть сия, не суть. И яко не глаголет именно освященным: но нецыи, сиречь вси правовернии, если отступят от в ересь впадающаго епископа, хоша и неведому преже сущу.
Темже сие правило может последовать во отлучении сих как освященным, так и неосвященным. Но зри Златоуста, явственно повелевающа судити всем погрешающих о вере, коего бы они достоинства не были: «Яко (рече) подобает повиноватися учителем и священником, и не судити их, аще и житие имут укорное: аще же о вере погрешат, тогда не подобает покарятися им, но и отбегати и судити их». Беседы апостольския, 2 послание к Тимофею, лист 2508. Согласно сему и преподобный Никон Черногорский пишет сице: «Яко лепо есть послушати учителя и священники, всегда учити им от божественных писании, яве яко по Божии воли, а не по своих похотех, якоже пишется. И не судити их, аще и житие имут зло. аще ли же о вере погрешают, тогда не подобает покарятися, но и отбегати и судити их». Книга заповедей, слово 40. Явственнейше же пишет богомудрый Иосиф Волоколамский, тако глаголя: «Прочее же речем и о сих, еже еретицы глаголют, яко аще и подобает судити, или осужати еретики, или отступники, но царем, князем, и святителем, и судиям земским, а не иноком иже отрекошася мира, и всех яже в мире. подобает же им, точию себе внимати, и никогоже осужати, ниже еретика ниже отступника. К таковым убо сице речется: Яко аще не подобает иноком осужати ниже еретика ниже отступника, то како Великии Антонии осужаше их? глаголаше о еретицех, яко словеса их лютейша яда змиина. Ученики же своя всегда наказуя, яко да никоегоже приобщения имут с мелетианы и с арианы, и с прочими еретики. Святыи Пахомии всегда осужаше еретики, глаголаше: яко приобщаяся еретиком, и прочитая писание Оригеново, и Мелетиево, и Ариево, и прочих еретиков, во дно адово сходит». Слово 3.
По сим вышепредложенным свидетельствам, можеши ли вопреки рещи, яко единым точию освященным суд церковный вручен есть: не священным же отнюд не возможно есть онаго касатися, якоже от вас в вопросе ругательно предложено суть? или по единому, рекуще, приговору суд сей мужиков ваших, еже перекрещивати от великороссийской церкви, учинен есть? Оле вашего злословия! На кого оное восходит злохуление: на нас ли единых, или на святых, определивших и не священным еретическое судити заблуждение? Не на нас точию, но и на святых и священных страдальцев, и прочих остальцев благочестия, повелевших не приимати новодействуемое крещение. От нас же и особь предложено вам в 21-м ответе, с которыми еретики соглашается великороссийская церковь, и чего ради не приемлется от нас новотворное крещение: зде же паки повторяти продолжения ради оставляем.

Вопрос, 31.
И аще по единому точию мужиков ваших приговору: то откуду они таковую дерзость восприяли? и имеют ли о своем они дерзновении свидетельство от святаго писания?

Ответ, 31.
Вемы и разумеем твою дерзостную подсмеятельность, везде и всюду повлачающаго тя наше благочестие, и о едином многажды вопрошающа. Мы же, по апостолу, аще и укоряеми терпим, и хулими утешаемся. Обаче надежду имеем на всезрящее око, яко без всякаго примеса противных действий православие храняще соблюдаем: аще и не в пространных, но весма в нужных церемониях, по нужде святыми действовати позволенных, пребывающе. Но утешаемся оными триех отрок словесы, в сицевых же подобообразных случаех и временах обретшихся, и вопиющих к Богу [Даниил, глава 3, ст. 38]: «Тако Владыко мы умалихомся. несть во время се, князя ни пророка и вожда, ни всесожжения, ни жертвы, ни приношения, ни кадила, ни места, еже пожрети пред Тобою, и обрести милость. но душею сокрушенною, и духом смиренном да прияти будем. [Ниже:] яко несть студа уповающым на Тя». и прочая.
В удовольствие же вашего вопроса просим вас прочести вышеписанный ответ, на тожде вопрошенное вами решительный.

Вопрос, 32.
И аще имеют свидетельства, то всеусердно просим: Господа ради изъявите, кто от святых тако предаде, еже бы крещеннаго истинным крещением, сиречь в три погружения, и обратившася от ереси, паки воскрещевати, простцем сущим? ибо мы нигде сего не видехом и не видим.

Ответ, 32.
Всюду ваша слепота доселе в своих вопросех безпутьствова. Ово вопрошаше о разных положениях чинов на обращающияся к православию различных противоверств, оболгающи Потребник: ово же являше, без проклятия ересей неудобно быти к совершению едино крещение предлагашеся, которое от православных учителей, в три погружения по нужде действуемое, за совершенное почитается: а ово и от прочих принадлежностях к благочинию крещения во время свободы, а не в нужде ключимых, от вас диспутствовахом. Ныне же ваш (по вам мним), непреборимый диспут, еже простолюдином, яко бы после еретических действ отчаятельно ползовати приступающия к благочестию, паче же кто имеет на себе трипогружателное еретическое крещение, его же ты за истинное почитаеши. Но мы о еретическом, в три погружения действуемом, крещении показовати вам случая зде еще не имеем. Ибо вами о том в 44-м вопросе истязание предлагается: тамо и мы, яко храняще чин, о нем глаголати со свидетельствами священных писаний будем. Но прежде в 21-м ответе коль премногими доводами укрепихом, яко великороссийское новодействуемое крещение по всем причинам к приятию отнюд неудобно.
Ныне же ваше устремителное мнение, еже после руки еретической, яко бы запрещение негде простолюдину крестити препятьствие в писании обретается, разрешаем.
Первое: Святый Кирил, епископ Туровский, в слове о разслабленнем, о силе святаго крещения глаголет сице: «Ныне же к крещению купели сам Господь Бог наш Святым Духом приходя, освящает ю, и подает здравие болящым и грехом очищение. аще ли кто слеп есть разумом, или хром неверием, или сух во мнозех беззакониих отчаянием, или разслаблен еретическим учением, сих всех вода святаго крещения здравы творит». До зде Кирил Туровский.
Темже аще по свидетельству святаго Кирила, святаго крещения вода от всех недугов душевных исцелевает, якоже греховных, тако и еретических, убо доволно есть на очищение святое крещение от еретик обращающимся. И приходяй на не Дух Святый недостаточное может совершити, якоже в последующих ответех изобразится. Темже и неосвященнии, крещающии приходящих еретиков, якоже трех погруженцов, тако и обливанцев (понеже святая церковь еретиков осуждает под суд крещения не единаго ради неисправления в материи, но за и важность вины крестителевы, якоже в прешедших изъявися и последующих ответех покажется), чрез святое трикратнаго погружения крещение, не препятьственно могут совершенными учинить чадами святокафолическия церкве.
Второе: Священный златоточный учитель вселенныя повелевает вся творить не в повреждение благочестия, иже тако глаголет: «Вся (рече) твори кроме еже повредитися благочестию». Но крестити простолюдину по нужде от еретик, никоегоже повреждения обрести в писании не возможно есть, наипаче же вид опасения от нечестия чрез сие поистинне оказуется. Ибо невместимое вмещати (то есть еретическое крещение с православным, аки плевел со пшеницею) всюду божественными правилы возбраняется, якоже 44-го ответа в третием разделе изъявится: паче же тмочисленными винами великороссийское нынешнее окруженное, о чесом в 21-м ответе изъявихом: убо и не есть благочестию повреждение, но паче показуется в нас онаго всеусердное хранение, нечестия же отнюдное блюдение.
Третие: Ищется от вас, вопросителю, точнаго указания от священных писаний, еже крестити простолюдину от еретик, паче же в таковое горькослезное время, якова от начала сотворения мира, по Спасову словеси, не бывало. Но в божественном писании, и от богоносных мужей, и кроме ясных доводов полезную вещь, внове являемую, якоже в действии, тако и во именовании, без всякаго сомнительнаго препятьствия приемлему. Но яко вещь есть по разсуждению невредительная благочестию, но пользующая, сего ради последними роды кроме всякаго зазрения сия обретается. Видим мы в ветхом законе Моисеову жену Сепфору, обрезавшую своего сына Гергесема кроме законнаго повеления. Но яко по нужде сотворенное, и в пользу благочестия: убо того ради, якоже от ангела, хотящаго погубити, сохранено бысть детище, тако в род и род сие действо кроме всякаго приемлется зазора. В новой же благодати, на первом вселеньском соборе отцы, кроме ясных указаний священнаго писания, приложиша Сыну Божию сие речение: «гомувзион патеро», то есть единосущен Отцу. Но яко прилог бе не противен чести присносушнаго Отцу Сына Божия: того ради аще и многажды противницы чести Сыну Божию, зловернии ариане, подвизашася порочным сие приложение сотворити, но ничтоже успеша: ибо разсуждением богомудраго Афанасия (и других церковных учителей) от подобия приводов, якоже в прении его со Арием показуется приражение оных, аки к каменю истинны, в пены разсыпася.
4: В вышепредложенном параграфе засвидетельствовахом, яко внове приемлемыя действа и имена в созидание благоверия, якоже в ветхом законе, тако и в новей благодати, не суть зазрению подлежащи, но и хвалам и честем есть достойни. И зде убо в подобообразное сказует и Златоуст (о диаконе, учащем люди, небрегущим старейшим). «Понеже тогда епископу случися не быти ту во оно время: от презвитеров же ниже един печашеся, но просте сотвориша посвещенным быти. внезапу во едину нощь тмам многим, и просте крещахуся вси, ничтоже ведуще. сих оный поем на особь, купно по сту и по двести, беседоваше к ним, ино убо ничтоже, разве яже о тайнах, яко ниже прощати смешатися с не причастными тайнам. (На стране: не да отъидут на крещении) сие ему творящу, мняху мнози начальства желающу сие творити: но он ничтоже печашеся о мнящих. [Ниже:] что убо он ли соблазна сего виновен? никакоже, якоже аз мню. аще бо не сущей вине сие творил бы, в лепоту оному вину написовали бы, и аще паки простерл бы. егда бо угодных Богови возбраняло бы ся, за соблазн другаго пренебрегати подобает». На Деяния нравоуч. 46, лист 419.
Темже, по Златоусту рещи, аще бы не сущей вине, си есть во время священства, дерзали бы несвященнии от еретик обращающихся крестити, были бы некоему соблазну подлежащии. Обаче вышеписанный диакон, и во время презвитеров, но нерадящих, пецашеся о спасении людстем, и не подлежащь явися достойному оглаголанию, но паче и оправдася. Кольми паче ныне, кроме православнаго священьства, по правилом не не могут вернии, аще и не священии, желающим еретиком крещения преподати.
5: В божественном писании, по нужде в неимении священников православных простолюдину крестити от еретик приходящих, нигде препятьствия не обретается, нигде закону преступление не зрится. Но и закона в нечесом преступление по нужде не полагается сотворшим за преступление закона или наказание, якоже последующими доводы от ветхаго и новаго закона засвидетельствуем.
Преступил закон Божий без нужды Озан оный [Паралип., глава 13], который дерзнул наклоненный киот Божий поддержати в присудьствии священников, за то и поражен бысть от Бога за свою дерзость.
Преступила закон Божий по нужде жена Моисеова Сепфора (якоже и в вышшей статии рехом), обрезавшая сына своего Гергесема каменем [Исход, глава 4]: обаче, по нужде дерзнувшая, не осуждена от Бога явися.
Преступил закон Божий Озия царь [Паралип., глава 2], иже восхоте покадити в присудствии священников без нужды, за что и поражен бысть проказою на челе за свою дерзость.
Преступил и Давыд царь закон Божий по нужде [Царьств книга 1, глава 21], и дерзнул внити во святилище, и хлебы предложения снести, которых кроме священников не повелено ясти, обаче за нужду не осужден бысть от Бога.
Дерзнул некий от полка Израилева без нужды разорити закон Божий [книга 4 Моисеова, Числ., глава 15]: изыде бо в суботу собирати дрова, за что Бог повеле убити камением пред полком Израилевым.
Дерзнуша и ученицы Христовы разорити закон Божий по нужде: идоша бо в суботу сквозе сеяния, и от глада восторгаху класы, стирающе руками, и ядяху, за что и оправдани быша от Учителя своего свидетельством, преступившаго закон Божий по нужде, Давыда, и не осуждена, и священниками преступающими закон Божий: «или (рече) несте чли в законе, яко в суботу священницы в церкви суботы сквернят, и не повинни суть».
Преступают закон Божий тии, которыя в неделю без нужды делают, за что от святых отец клятве предаются таковии.
Понужде же делающии в неделю, или от нищеты крайния, таковии не токмо клятве не предаются, но и прощения сподобляются. Матфей правил., состав а, глава 4.
Без нужды дерзнувшии скотину внутрь церкве ввести, таковии причетницы извергаются, людския же отлучаются.
По нужде дерзнувшии скотину ввести в церковь, и обнощевати с нею за нужду, таковии прощению сподобляются и не осуждаются. Матфей прав., состав е, глава 15. На стране: понужденое прощено.
По нужде и песия мяса ядущии не токмо клятве не предаются, но и прощения сподобляются. Кормчая, лист 248: и Матф. прав., состав 0[70].
Девица не по нужде, но от своего произволения растлит девство свое, таковая именуется блудница, и блудническую казнь приимет.
По нужде же растленна бысть не от своего произволения, или раба от Господина своего, таковая не яко блудница именуется и казнится, но и без запрещения бывает. Кормчая, лист 240.
Без нужды же дерзнувый причетник в корчемнице ясти, отлучается: по нужде же ядый в корчемнице, таковии помиловани бывают. Кормчая, лист 15.
Но и гражданьския законы, по нужде преступающих и царьския повеления, таковых прощают и милости сподобляют.
И безчисленныя таковыя в божественном писании доводы и приклади обрящутся, яко без нужды дерзающии не в повеленном, яко преступницы закона, осуждаются.
По нужде же дерзающии не точию осуждаются, но хвалам и честем достойни бывают, и от всех учителей оправдаются.
Обаче же леть есть и в сем разсуждати, яко в таковых есть подобно дерзати, в которых самая крайняя нужда повелевает. Да не когда сия к нужде прилежащая предлагающе, и не нужных времен, и к нужде не подлежащия тайны, по нужде к действию производити начнем.
Якоже сия священство и мvро, и прочия, яже не суть по нужде бываемыя, но в свободное время содержимыя, яко архиерейству суть прикладныя, аще и требовательныя зело христианству.
Но зде о крещении и покаянии глаголем, без которых не возможно быти. А яко от еретик действуемое крещение есть бездуховно, и святыми не приемлется, и яко не бывшо вменяется, без крещения же спасение всячески ненадежно суть: убо понужде простолюдини таковых крещающии, по вышепредложенным доводам, не суть преступницы закона.
6: В изъявлении Тимофея, презвитера Великия церкве, о различии ересей [Кормчая, глава 70, лист 635]: в Потребнице, во Филарета патриарха [Потребник, лист 564 на обор.], павликиане, мантанисты, и манихеяны, и прочии еретицы, приходящии ко святей церкви, яко еллины приимати повелеваются. (павликиане же и монтанисты в три погружения крестили, о чесом в третием разделе, в вопросе 44-м изъявится). Такоже и в вышеименованном Тимофееве изъявлении, еретицы армены за язычников некрещенных полагаются и крещению подлежат. Арменове же не точию тогда, но и ныне в три погружения крещают. Убо по сему и трехпогруженцов еретиков простолюдину крестити, яко и еллинов, никоего препятьствия не обретается.
7: Златословесный же учитель вселенныя, в слове о лжеучителех, еретиков ничим же разнит от поганых, идеже глаголет тако [Маргарит, слово 13]: «Еретицы (рече) ничимже разни суть от прочих поган не знающих Бога». И другий, такожде вселеньский учитель Великий Василий, еретиков с жиды за едино полагает [Шестоднев]: «Еретик (рече) и жидовин едино еста».
Темже аще разности никия у еретиков с жиды и еллины учители вселеньстии быти не признавают, убо и нам никоего разньства в приятии в крещении от еретик со онеми приходящим обрести не возможно.
8: Но и святая церковь явственно никоего разньства от еретик обращающимся с жиды и срацыны в чиноприятии не имеет, но единообразно над всеми сими приходящими действует. Якоже в Потребнице, в чине от ересей обращающихся повелевая законополагает сице [Потребник, лист 590]: «Сего чина и устава последование, единообразно действуется над приходящими, и от иных вер. аще жидовин, аще срацын, или кто преже еретическое имея крещение, о нихже все свершается неизменно, якоже зде написано». Потребник Бол., глава 72.
Темже аще святая церковь в чиноприятии еретиков с жиды и срацыны отнюд не разньствит: убо и простолюдином по нужде от еретик приходящих, яко не разньствуемых ни в чем от поганых, как во уподоблении, так и в чиноприятии, крестить никоего препятьствия не обрящется. Но явственно жидов и срацын по нужде древле простолюдини во святей церкви крестиша, якоже и в вышших ответех засвидетельствовася. И паки тыя же срацыни Иосифом Волоколамским в первом чине еретическом полагаются, якоже в 15 его слове явствуется. Се убо показася, яко и еретики понужде от простолюдин крестишася. Такоже сам апостол Павел многажды себя именует бывшим фарисеом [Деян., зач. 21, к филип. зач. 244], и от ереси фарисейския обратившася сказует, и диаконом Ананиею за неимением священников крещен бысть: обаче не не сподоблен бысть благодати и Святаго Духа, якоже деяния апостольская и святаго Златоуста на тое толкование засвидетельствует [Апостол толк., зач. 21].
9: Обычай бе непременный в древния времена простолюдином крестити. Якоже блаженный Августин Иппонийский в послании к Фортунату пишет [книга О 7 тайнах Гавриила, архиеп. Филадельф.]: «Потребе случившейся, обыкоша мирстии крещающимся подавати крещение».
Подобне и святый Иероним в Двоесловии на светоносцы глаголет: «Вемы же (рече) леть быти и миряном крестити: ибо якоже кто приемлет, тако и дати может».
Темже по свидетельству святых учителей, бывшему древнему обычаю, в потребе случившейся может и ныне мирянин благочестивый по необходимости, требующим еретиком святаго крещения, кроме всякаго препятьствия, яко имеющий, не имеющим преподати.
По оному реченному от святыя церкве гласу [Пролог, август, 28 день]: «Где убо суть глаголющии, яко простецем нам при напасти не мощно крестити, не сущу ту иерею?» Где убо суть (приречем мы) и ныне нас потязающии, в таковое напастей преполное время и в неимении священьства крещающих, яко не крещенных, сущих еретик? Прийди и ты, вопросителю, семо, и мрак своего неведения отложше, разсуждай десно, не смешая времена, случай и нужды. Вправду бы были достойни твоего гаждения и потязания, аще бы в бытие правильных священников дерзали в недерзаемыя вступати степени. Но яко по нужде, и нуждно творимая святыми в нуждныя времена. И мы подобне действуем и творим, не суть под вашим осуждением, ниже достойни вашего потязания.
Прочее же, долготы слова убегающе, оставляем многая доводствовати. Оставляем самого Спасителя повеленное предлагати, и несвященным вся языки крестити. Оставляем неких апостолов, не священных сущих, по повелению Господню крещающих, доводствовати, и потом соборне сшедшихся и написавших правила. В них же в 46, якоже епископом и презвитером, тако и диаконом, повелевают равне не приимати еретическаго крещения. И если бы не лежало сие дело, еже суждению предавати, или не приимати с повторением еретическое крещение, по нужде кроме священников, то вскую бы тожде апостолом заповедати, единственно и диаконом, еже не приимати онаго. И сия вся за множество оставляем: но токмо киевопечерскаго друку Потребник представляем. В нем же повелевается, лучше от простолюдина крещению совершитися, нежели от священника еретичествующаго, или проклятаго, или отлученнаго. Идеже творец онаго, аще и не от древних, но древним в том согласуя, сице глаголет: «Яко лучше есть да простым людином совершится божественное крещение, нежели священником проклятым, или отлученным, или еретичествующим». Потребник киевопечерский, року 1646 друкованный.
Зри, яко не опасает по нужде от простолюдин совершаемаго крещения: не[но?] опасает от еретика священника, или проклятаго, или отлученнаго. Аще и вне прикрывается чином, но внутрь себе волка носит, сего паче опасатися повелевает. Лучше же от простолюдина совершитися крещению, оный Потребник заповедает, нежели от священника еретика, или проклятаго.
Согласуют же древним и страдалцы за благочестие, Аввакум с прочими глаголя: «Виждь убо, велено простолюдину крестить по нужде. А колми паче же из нужд ныне нужда. Судихом бо и повелеваем о Святем Дусе, самим православным крестить, а ко отступником осквернятися не ити».
Темже яко от древних, тако и от новых учителей, сице и от страдалцев за благочестие, в сем пределе едино согласие зрится, еже лучше хоша от простолюдин крещение получить, нежели под еретическим быти: «да не лишения ради божественныя благодати, по Спасову гласу, лишатся таковии внития в царство небесное» Иоанн, глава 3, зач. 8: и Златоуст, в беседе 25 на Иоанна.

Вопрос, 33.
Аще же паки и паки по своему упорству возглаголете: аще и в три погружения крещен в ереси сый, убо всячески достоит воскрещевати. Но докажите, аще инок, или мирянин крестит кого, от ереси пришедша, и на тое крещение благодать Святаго Духа сходит ли, или ни?

Ответ, 33.
Различныя сети плести покусился еси, о вопросителю, то тем, то инем уловляя наше по нужному времени текущее благочестие, по царе пророчествующих уст гласу: «Сеть уготоваша грешницы ногам моим, и при стези соблазн положиша». Но поистинне к вам обращаяся пророк глаголет: «В сети своей увязе грешник». и прочая.
Мы же сообратимся с пророком на разторжение ваших паучинных тенят, еже от вас мнимо не преборимых, в вопросе завязанных узлов касаемся, развязовати священным писанием. Понеже в нем ово связуемся мы невозможностию отнюдною крестить трехпогруженцов еретиков (о которых в 44 ответе засвидетельствуем. и 21 ответом о великороссийском новодействуемом крещении доводствующе, к неприятию оное удобь показахом), яко бы никаких ради ересей крестить их не возможно: ово же диспутствуемся, яко над простолюдин действа Дух Святый не сходит: а ово потязаемся, яко бы наипаче над приходящими от еретик и от простолюдин крещаемыя, благодать Духа Святаго не действует.
Сицевый убо разум, заключаемый в вашем вопросе. еже мы, входяще во ответ, постоим на празе онаго, потязающе ваше неправдоразсмотрение. Понеже ведяще, яко святии древле крещаху, аще и простолюдини, но не без действа Святаго Духа. Убо на от еретик приходящих и крещающихся по нужде от простолюдин вопрошати устремление ваше восприясте. А наипаче как ваше мнение влечется, наиболее к сему, якобы во время крещения на миропомазание Дух Святый снисходит. Но о том уже в 24-м ответе изъявихом, яко не на едино миропомазание сходит, но и на крещение, и прочия тайны. Зде же вам в первых представляем от свидетельств святыя церкве, яко Дух Святый над всякаго крещающагося сходит: а не так, по тебе мнительно, яко на от еретиков приходящих, и крещающихся по нужде от простолюдин, оныя благодати лишаются. Зри в толковом евангелии, на Крещение Господне тако пишет: «Даже увемы, яко на всякаго человека крещающагося отверзаются небеса, и призывает его в вышнее жилище, сходит же нань и Дух Святый». Евангелие толков., слово 68, на Крещение Господне. Согласуя же сему, пишет в толковании своем блаженный Феофилакт тако: «Небеса же Адам заключи, Христа же ради отверзаются. яко да увеси, яко егда и ты крещаешися, отворяеши небеса». Благовестник, от Матф., зач. 6, лист 30. Священный же и златоглаголивый учитель вещая глаголет [Маргарит, лист 432 на обор.]: «Внемли со опасением, другая язва диаволу. не токмо бо другаго проповедует, но и Дух рече согрешением прощение подает. Духа глаголет, Егоже трепещу. благодать, еяже боюся. идеже бо благодать, тамо и прощение. [Ниже:] и что есть благодать. идеже благодать, не ктому от дел благодать. понеже благодать, не ктому есть благодать. [Ниже:] есть благодать, яже всех разрешающи прощение и оставление. [Ниже:] Дух огнь нарече. и почто Его огнь нарече? [Ниже:] зане якоже огнь изнуряет терние, тако и Дух нашед, потребляет согрешения. и якоже огнь рудную землю, злато соделовает. сице и Дух Святый впадая в крещение и в купель водную, прелюбодея, праведника сотворяет. разбойника, сына Божия устрояет. и не рцы ми како, понеже и аз вопрошю тя. како огнь землю приемля, злато творит. и не веси рещи хитрости, вкупоработному попущаеши, и человеколюбию ли Владычню не попущаеши. огнь и от земли злато творит, и паки истукана оборжавша разливает и отирает, и чиста соделовает. тако и Дух Святый и от оглашеннаго верна соделовает. и от грешник, верно праведника сотворяет. сего ради глаголет Давыд, сердце чисто созижди во мне Боже, и дух прав обнови во утробе моей». Маргарит, слово 3, О крещении. Церковь Христова воспевающи глаголет: «Тако и ныне действует водою Дух погружения ради, ихже наш восход к Богу бывает. землено явление, и выше небес разумеваемое». Минея месячная, генваря 6-го дня, стихера на хвалитех.
Святейший всероссийский первопрестолник и благоревностный люторския скверных преданий обличитель, патриарх Иосиф, во увещательном своем словеси к Валдемару королевичу засвидетельствует, яко в самом погружении Дух Святый на крещаемаго сходит, и грех первородный и прочия на души коегождо очищает, сице глаголя: «И о том зрите разумно, егда в купели погружен бе, и прия дар Святаго Духа. [Ниже:] егда еще в воде бех, послышах свыше верху главы своея Святаго Духа наитие. [Ниже:] и тако ныне вси верующии, иже крещаются, сим крещением приемлют на ся наитие Святаго Духа. аще и не видим бе от нас Дух Святыи телесныма очима. Дух Святыи воистину действует вся, и подает верующым». И паки к вышеписанном учительном евангелии яснейше глаголет: «Независтна бо (рече) есть благодать, всякому хотящему благое, малу же и велику, премудру и и препросту, старцу и юну, богату же и нищу, мужем же и женам, и всякому возрасту. благии бо Бог всем простирает луча своя благодати». Евангелие в неделю праотец. Сим убо всем вышереченным согласующеся, и афонстии отцы, еже в Номоканоне, видом вопрошения и ответа, сице явствуют: «Вопрос. Елико аще крещают не священнии мужие же и жены, или иноцы, что достоит творити? Ответ. Аще умрет крестивыися, прежде нежели постигнути священнику, божественная благодать совершает и. Аще ли же жив будет, да поставит и священник в купель, и молитвы и мvро по обычаю творит». Тоже и Никифор патриарх Цареградский глаголет. Потребник Болшей, лист 726.
Но от вас вопреки речется, яко бы не о возрастных, но о младенцех сие глаголется. Но противу коих ваших мнений, мы в подобие на отвращение из евангелия о звании на браки полагаем: «Идите убо (глаголет притчею Господь) на исходища путии, и елицех аще обрящете, призовите на браки». Таже изъявляет: «[Ниже:] собраша всех, елицех обретоша, злыя же и добрыя». Матф., глава 22, зач. 89. Темже и в Номоканоне, еже елико крещают, обьятельно указует всяк пол и возраст, разньство крещаемых от язык и от ельлин, и от всякаго еретическаго заблуждения, и не крещенных детей христианских, и в возрасте сущих.
Согласует сим и повеление Господне многим апостолом, не имущим священства, крестити. Номоканон, лист 724. Иже от всякаго возраста и безверия обращающияся святии апостоли крещаху. И о еретицех прав. 46 и 47, и 68 повелевают еретики крестити. О сем же и в вышшем 32-м ответе засвидетельствовахом, и в прочих последующих изъявится.
Но убо о сем доселе. Мы же обращаемся в показание самех збытия вещей действия и совершения Святаго Духа, еже нерукоположенными действова, на среду приносяще изъявляем.
В деянии апостольском, в главе 50-й сказует, како апостол Филипп на пути крести каженника: «Егда (рече) изыдоста воды, Дух Святыи нападе на каженника». И в зач. 18 от Апостола толков.: «Егда (в Самарии) вероваша, Филиппу благовествующу о царствии Божии, и о имени Исус Христове, крещахуся мужие и жены». В толков. Епифания Кипрскаго: «Понеже апостол Филипп, слуга сыи, не имеяше рукоположения власти, еже даяти Дух Святыи. знамениом великим бываемом, како Духа Святаго не прияша? Духа убо Святаго прияша грехом оставлением, знамениом же не прияша». От Аммониева толкования: «Понеже не прияша крестившеися от Филиппа Дух Свят. но потом, егда помолишася о них Петр и Иоанн, дастся возложением рук своих крестившымся Дух Свят. общим бо именем и нераздельным глаголет писание, яко возложением рук святых апостол на веровавшая, возсия Духа Святаго благодать. Не рече яко единема точию Петром и Иоанном, но общим именованием рек, совокупи и Филиппа. [Ниже:] егда же и той знамения сотвори и исцеления недуг и изгнания бесом, но яко не помолися еже быти им се. сице многащи помыслив быти им, обаче на пользу, яко еще не приличным сущым ко прятию Святаго Духа. [Ниже:] и како, рече, диякон сыи крестил есть? понеже оскуждение бе презвитер в Самарии, и един Филипп точию бе, гонения ради бывшаго. подобает в нужи и диякону крещати, не сущу презвитеру, якоже его Дух Святыи научи». До зде апостол толковый. Того же деяния во главе 9-й сказует, како Анания крести Павла. И яко возложением руки его спаде от очию его яко чешуя, и абие прозре. О чесом и Златоуст в толковании на деяние, в зачале 21 тако глаголет: «Почто ни единаго достоверных и великих ниже приведе, ниже представи на крещение Павлово? яко не хотяше человеки возвестися, но самем Христом. понеже ни Анания ничесоже научи его, точию крестил есть. егда убо крестися, абие многу прият благодать Духа Святаго, от ревности и усердия многа. не рече бо: беседуй к нему, и поучи его, но яко молится. и виде в видении мужа, возложша нань руце. и Анания диякон бе, якоже сам Павел свидетельствует в правилех. се же бысть, понеже оскудение бе презвитер в Самарии, гонения ради бывшаго». До зде Златоуст.
Темже от сего толкования Златоустаго показуется, яко Анания, крестив Павла, не повреди ниже веры, ниже апостольства. И Павел крестися, не умали благодати крещения, но паче умножи от усердия многаго. И благодати своея Святый Дух не лиши, якоже Филиппа, тако и Ананию, крещающих: но обоих действия своего присещением не не сподоби. Убо явственно есть, яко крещением сих не повреждается вера и церковь Божия, таже и благодать Божия не умоляется, но паче умножается от усердия многаго, якоже предъявися.
Такоже и прочии безчисленнии мнози не рукоположеннии крещаху, содействова ими благодать Духа Святаго, о чесом жития святых и Пролога свидетельствуют. Якоже в Пролозе септеврия в 7 день, в житии святаго мученика Созонта. Иже бе пастырь овчий, обаче пишет, «яко благодатию Божиею учаше и крещаше ельлины, во имя Отца и Сына и Святаго Духа». Пишет же месяца июня в 10 день о преподобнем Феофане, яко по нужде сам ся крести, и потом умоли блудницу отступити от блуда, и крести ю и устрой Духа Святаго обителище. [Ниже:] И тако Божиею благодатию оба в един день преставистася, и восприяста нестареющееся присносущее блаженство.
И от сих показуется свидетельств, яко Созонт и Феофан простолюдина суща, и никоего священства имуща, обаче Божиею благодатиею участа и крещающа: убо явственно есть, яко благодать Божия крещающихся от них совершаше и освящаше.
Такоже и августа в 28 день повествуется, яко простолюдини сущии некоего евреина, именем Феодора, на пути разболевшася, и за не имением воды песком крестиша, обаче содействова благодать Духа Святаго. О чесом послежде и священный собор удивися скорому присещению Духа Святаго [Дионисий, Александр. епископ, с прич. церковным разсуж.]: «аще и не прияша е, за еже не в такой материи, сиречь песком, а не водою, обаче удивишася скорому присещению Святаго Духа». О чесом объявленный Пролог, паче же Лимонарь, явствуют.
В заключении же всем вышепредложенным свидетельством конечное свидетельство предлагаем, имже явственнейше действо Духа Святаго в нерукоположенных показуется, еже в Лапсайце во главе 37 повествуется [Лапсаик, глава 37]. Яко во Аравии некоем граде, христианстии отроцы, на поле пасущии овцы своя, и прилучившагося с ними детища, евреина суща, именем Феодула, крестиша во имя Отца и Сына и Святаго Духа. Идеже сице пишет: «Яко осени его благодать Святаго Духа от святаго крещения». И паки глаголет: «Дело отрочищь пришествие Святаго Духа показа». И егда оное отроча, яко не наказанно сущо, по крещении седе на вечери с родителема своима вкупе ясти, тогда весь дом исполнися благоухания. родителие же его начаша обьюхатися, но не причастни бо суть, рече, благодати святаго крещения. егда же ко отрочати приидоша, обретоша его от главы и до ногу благоухания исполнена, и начаша с гневом взирати нань, купно же и бити и начаша. конечне же уведеша от него, яко крещен есть, абие совещаша о нем да в пещь огненную ввергут его, яко да згорев в прах будет. оному же ввержену бывшу в люте разженую в бани, и до утрияго дни пребывшу, заграждену сущу. во утрии же день, по смотрению Божию, обретеся епископом града того не вредим сущии, при нем же из оной пещи изшедыи. и лице его яко ангела светляшеся. и глагола пред всеми отрощь: яко егда ввергоша мя в пещь огненую, зрях жену, багряны ризы носящу, и огнь погашающу, и пламень в росу претворяющу. и то слышаще разумеша, яко то бяше святая Богородица. отрока же того епископ постави диаконом». И сия зде вкратце из оныя повести предложивше, пространнее же во оной обрящеши.
Подобне же сему повествуется и в Патерице скитстем, яко и тамо нецыи христианстии отроцы играюще отрока еврейна крестиша. И потом, по обычаю христианьскому, назначенный от них во образе епископа жертву принесе, на которую огнь сниде и попали. Отрока же онаго родителие трижды вметаху в пещь банную, и Божиею благодатиею невредим пребысть. И прочая тамо, чудесно показанная, пространно изъявляют.
Мы же сия повествующе удивляемся, яко и отрочестей игре, творимей по образу благочестия, поспешествова в действии благодать Святаго Духа: коль паче поспешествовати не не имать, с благословением и с пользою благочестия, и еще во время нуждное, благоверным христианом в действии святаго крещения.
Но убо, якоже предложихом, аще и от детищь действуемое крещение, обаче чудесне содействовася. Сего ради судихом зде, ради наивящьшаго уверения, протещи вкратце повествованиями, еже от нерукоположенных совершаемое крещение, якоже вечнаго блаженства ходатайственно суть, тако и многими чудесы засвидетельствовано бяше: их же на среду предлагаем.
1: Павлу апостолу нерукоположеннаго Анания крещение очи просвети.
2: Филиппа нерукоположеннаго крещение на каженика Духу Святому снити сотвори.
3: Святую Екатерину крещение простолюдина Христу в невесту обручи.
4: Галактионово крещение Епистимию видения небеснаго достойну быти сподоби.
5: Феклы крещение девицу разслабленую от одра воздвиже.
6: Калистратово крещение 40 воинов узы разреши.
7: Назариево крещение Келессия по водам ходити сотвори.
8: Мних, крестивши девицу жидовину, чудотворения сподобися, о нем же Иоанн Милостивый откровение получи.
9: Преподобнаго Александра крещение хлебом небесным крещения от него насытити.
10: Христианских детей крещение отрока жидовскаго благоухание испущати сотвори, и пещь банную угаси.
11. Мученика Василиска крещение бесныя исцели, и недуги уврачева.
12: Сисиния диякона свет небесный освяти, и глас с небеси слышашеся: «Приидите благословении Отца Моего, наследуйте уготованное вам царствие». Сей глас судию увери, его же и крести Сисиний.
13: Потитово крещение от проказы очисти, и дщерь Антонина царя от беса избави.
14: Святая мученица Дросида сама ся крестивши, 7 дний ангельскую пищу приимаше.
Темже вышепредложенными подкрепихом: Яко над всякаго крещающагося небеса отворяются, и Дух Святый сходит: Яко аще простолюдини по нужде крещают, то благодать Божия содействует и совершает: и яко многих простолюдин крещение чудесне засвидетельствова Бог вышеестественными знамении.
И аще сице священными писаниями утверждается, яко благодать Святаго Духа и не рукоположенными действует и совершает, якоже древлеправославными христианы и содействова: убо и ныне, и даже до скончания века, правовернии христианы, и церковная предания правомудрствующии, аще крещают, то благодать Божия совершает. Верно слово, и всякому приятию достойно. Апостол, зач. 280.

Вопрос, 34.
Во апостольских деяниях пишется: егда святый Филипп, иже от седми диякон сый, изшед в Самарию, крести многи. Чесо ради ни на единаго их сшед Дух Святый, изъявите от святаго писания?

Ответ, 34.
Понеже должно есть о сем Филиппе апостоле с великим разсуждением разумети: чесо ради в Самарии на крещающихся от него Дух Святый не сниде? И коего дара Святаго Духа тогда самаритяне не сподобишася прияти? А той же Филипп егда каженика на пути крести, и Дух Святый на него сниде. И паки: апостол Анания такожде диякон бе: обаче, егда крести Павла апостола, Дух Святый облагодатьствова, якоже и в вышеписанном ответе изъявихом.
На сия убо доводствуем.
1-е: Яко сие разньствие не чего ради инаго учинися, но точию ради присутствия ближняго святых верховных апостолов: ибо Самария от Иеросалима не весма в далнем разстоянии находится. А яко каженника на пути крести в далном разстоянии, такоже и в Дамаске Анания бе не близко от начальнейших апостолов: убо за далностию и не присутьствием сих апостолов совершенно во всех дарех Дух Святый содействова. Подтверждает же сие наше мнение и святый Епифаний Кипрьский, тако глаголя: «Почто не бяху прияли сии Дух Святыи? или (глаголет того ради) яко Филипп предпочиташе апостолы». Согласует же сему и Аммоний, яже он не единех верховнейших апостолов полагает в действе, но и Филиппа присовокупляет, идеже рече: «Яко возложением рук святых апостол на веровавшая, возсия Духа Святаго благодать. не рече яко единема точию Петром и Иоанном, но общим именованием рек, совокупи и Филиппа». Ниже: «Егда же и той знамения сотвори на исцеления недуг и изгнания бесом, но яко не помолися еже быти им се. сице многащи помысли быти им, обаче на пользу, яко еще не приличным сущым ко приятию Святаго Духа». Апостол толков., зач. 18.
Доводствуем.
2-е: Яко аще и не прияша дара Духа Святаго самаритяне, но не грехом оставления, но дара знамения и чудеса творити, Его же верховнейшии силнейше во оном подаянии бяху. О чесом засвидетельствует святый Златоуст, глаголя тако: «Како убо рече, Духа не прияша тии? Дух прияша оставления, Духа же знамения не у бяху приемше». Беседы апостольския, на деяние зач. 18, лист 330. Согласно же зело сему и Епифаний Кипрьский глаголет: «Знамением же великим бываемом, како Духа Святаго не прияша? Дух убо прияша грехов оставления, Духа же знамении не у бяху приемше». Апостол толков., зач. 18.
И от сих свидетельств познавается, яко крестившиися от Филиппа прияша Дух оставление по согласию символа веры, исповедати повелевающаго едино крещение во оставление грехов. И аще от Филиппа крестившиися прияша оставление грехов, убо оное крещение в силе своей с символом есть согласное. Аще же не прияша дар знамения творити, иже послежде той от верховнейших апостолов прияша: но сие не толико важно, якоже оставление грехов. Ибо Златоуст, и кроме знамений и чудес, в правой вере пребывающих за святых почитает. О чесом в Беседах апостольских на Павловы словеса сице толкует: «Святии же суть вси, елицы веру праву с житием имут. аще и знамении не творят, аще и бесов не изгоняют, святии суть». Беседы апостольския, лист 2491.
Доводствуем.
3: Но и святая церковь явственне засвидетельствует своими гимнами, яко святый апостол Филипп не без совершения Святаго Духа самарян крести, яже воспевающи, тако глаголет: «Яко седмих диакон причтен, яко исполнь премудрости, и божественныя благодати, служити блаженне Филиппе святым, купно с Стефаном потребам избрася еси. тем и убиваема сего видев, в Самарии востече, повелением божественным, Божие слово проповедая славне, и просвещая сущих во тме прежде. ихже соверши Духом Святым, дневи сыны премудре». Минея месяч., октября 11, служба апостолу Филиппу, единому от седми диакон, стих на Господи воззвах. Паки же сия возглашает о крещении Филипповом каженника, глаголющи: «Священныи кандакий видев тя, вразумляюща того, твоею рукою Филиппе крещается. и исполнь Духа Святаго явлься, проповедник божественныи бысть». Канон, песнь 4, стих 4.
Темже от тех вышепредложенных доводов святаго писания ясно показуется: яко святый Филипп крести самаритян не без содействия Святаго Духа: и яко не прияша не Дух оставления, но Дух знамений и чудес творити: и яко святии верховнии апостоли сие отменное дарование с сообщением Филиппа на верныя излияша. Убо мнение ваше зде, яко бы Филипп крести без совершения Святаго Духа, остается совсем не действительно и несогласно. Согласно же со святыми во всем наше православное исповедание и действие обрящется. Аще они по нужде крестиша не без содействия Святаго Духа, якоже и в вышшем ответе явствовахом: убо и мы, по нужде действующе с православною верою святым крещением приходящия от всякаго иноверия, соединственни онем в приятии Святаго Духа всяка явимся.

Вопрос, 35.
В Номоканоне святых отец, на листу 49-м напечатано: «По нужде, но обаче крещени суть, аще от простца инока или православнаго христианина, [ниже напечатано:] но точию аще не рука еретическая бяше первее». И сие о ком речено, чтобы не бяше рука еретик первее: на крестители, или на крестящем?

Ответ, 35.
Лишившимся здраваго зрения очес не дивно есть не истинно зрети лучи солнечнаго сияния: сице убо и погубльшим правое разсуждение леть есть и всякую правду кривити. Якоже древоделю, не обретшу криваго древа на свою потребу, обычай есть и прямое кривити: сице случается и таковым неправдословцем и заблуждающим от истины и самую ясность в темныя низводити мраки. Яковое есть и ваше саморазсудительное в Номоканоне правила 203-го толкование. Ибо ваш разум влечется единственно ко оному намерению, яко аще изъявится на крещаемом, а не крестителе, еже рука еретическая бяше первее, то оных простолюдину крестити в препятьствие есть. Оле вашего неразумия! По сему вашему мнению, уже совсем отчаятельно явится спасение, в неприсутьствии священников, приимшым руку еретическую. Яко бы отнюд есть не свободно простолюдину попещися о тех спасении, еже есть просветити таковых святым крещением. Но прельщаетеся убо, прельщаетеся в суетном вашем мнении. Ибо разум в Номоканоне не таков есть, якоже вы мыслите, якобы опасает после руки еретической простолюдину крестити. Аще и попустим вам, еже о крещенных, а не о крестителех глаголанное в Номоканоне быти: но яко креститель от крещаемых не разньствит в действе. Понеже якоже крещение без крестителя не бывает, тако и креститель без крещаемаго. Ибо по утвержению философии, три сия в силе и действе своем суть нераздельни, яко например рещи: действующий, действуемое и действуемый. Действующий глаголется креститель, действуемое крещение, действуемый крещаемый. Или паки: учитель, учение и учимый. А понеже начальная и органная вина есть в действе креститель, убо от православного крестителя и православная рука на крещающемся бывает. или явственне рещи: от православнаго крестителя и православное крещение на крещающемся бывает: от еретичествующаго же, аще рукоположеннаго, аще и нерукоположеннаго, еретическая рука глаголется на крещающемся быти. Или от еретичествующаго крестителя и еретическое крещение имети глаголется. Темже и Номоканона прав. 203 не простолюдина опасает крестити после руки еретической, но после руки еретической крещенных не вчинити за крещенных. Якоже самое правила заповедание являет, глаголюще: «А сии нужды ради обаче не второкрещаются, или от причетник, или от простца инока, или диякона, или отца самого, или христианина некоего православнаго, и по нужди не сущу священнику, то крещени суть, точию аще не рука еретическая бяше первее».
Зде убо показует, яко нужды ради, а не от ложно творящихся священников, не второкрещаются от простолюдин, не сущу священнику, точию (си есть противительне глаголет) не рука еретическая (сиречь крещение от еретика) бяше первее. И убо зде якоже от ложно творящихся священников (не приемлется), тако и от еретик крещающихся: от христианина же, аще и от простолюдина, за крещенных быти вменяются по нужде.
Аще же невероятно, или сомнительно явится ти сие изъяснение правила, гряди ко оным свидетельствам, на их же Номоканон указует.
Зри [или чти] (рече) правило Никифора патриарха Константинопольскаго, и Арменополь в канонех кратких, сечение 4-е, титла 2: сечение 5-е, глава 1: и в книзе 3, собор 1. Мы же сия у Арменополя показанныя Номоканоном созерцаемыя места, и простолюдину крестити после руки еретической никоего препятьствия обретохом: паче же в неимении священников крестити повеление видится. Но самую же тую речь, еже в Номоканоне глаголется: но точию аще не рука еретическая бяше первее. Тамо же написано: но точию будет (креститель) христианин, несть грех.
Зде убо да видят слепотствующая очеса яснейшее тамо повеление христианину крестити, а не запрещение любо которое (якоже вами возмнеся, не крестити простолюдину от еретиков приходящих). И сия видяще, престанут прочее бредить во сне своего неведения. Аще же и сим не будут довольни, приведем и иная сему подобообразная свидетельства из правил апостольских и отеческих, согласно сему утверждающия. О чесом правило 68-е святых апостол о еретической хиротонии глаголет сице: «Дващи поставленныи и с поставльшим его да извержется, аще не будет токмо еретическая рука первая». В толковании: «Аще токмо не прилучится, яко от еретик поставлен бе первее. ибо от тех крещении, не крещени: и поставлении, не причетницы». Зри толкование на сие правило и прочих толковщиков, согласно толкующих: Никона Черногорскаго в 63 слове. Матфея Иеросалимскаго в составе X, во главе 14. Подобне же и в Потребнице, в чиноприятии от отвержения глаголет: «Второе крестити кого крещеннаго преже от правоверных, вся правила отрицают. разве аще некто от нечестивых крещен бысть преже. тех бо крещение, сквернение есть паче, а не крещение». Глава 75, лист 649.
Зри сих правил разум согласный Номоканону. Якоже тамо от правоверных простолюдин крещении не второкрещаются, тако и в сих крестити второе от правоверных отнюд отрицается. Или якоже в Номоканоне за крещенных оныя младенцы вменяются быти, но точию не рука еретическая (действовала) бяше первее. Аще же оная на тех в действии была, то яве есть, по вышепредложенным правилом, тех крещение не крещение, но сквернение паче. И от сих доводов познавается, яко не после руки еретической опасает простолюдину крестити, но яко от руки еретической опасает простолюдину крестити, но яко от руки еретической крещенных не почитати повелевается. ятоверно есть сие слово, и всякого приятия достойно.

Вопрос, 36.
Аще же и повелевает простьцу, или православному христианину крестити, то от ереси ли приходящих, или за нужный случай токмо младенцов, явите и сия?

Ответ, 36.
Понеже в 31-м и по нем последующих ответех явствовахом, яко от ереси приходящих крестити простолюдину никоего препятьствия обретается. О крещении же от простолюдин, якоже возрастных, тако и младенцев, в 10-м ответе много засвидетельствовахом. Но аще Господне бысть повеление апостолом и не священным крестити: то убо не единых младенцев крестити повеле, но и от всякаго безверия во всяком возрасте, всякой пол великих и малых мужей и жен, и всяк младенчь возраст: еже делом мнози святии апостоли и не священнии и исполняху. Крести безчисленно народа в Самарии Филипп и во Азоте, и прочих местех. Крести же и Анания Павла в Дамасце. Крещаху же и прочии апостоли еще до рукоположения, якоже Иоанн евангелист в 11 зачале засвидетельствует. И не точию же мужи возрастных крещаху в то время, но и жены, якоже святая Фекла равноапостольная. Святая Мариамия крести Ликаонскую страну [Пролог, март 20]. И святая Фотиния самаряныня во граде Риме множество народа крести. И прочии безчисленнии, якоже при святых апостолех, тако и по апостолех по временам крещаху, о чесом в вышеуказанном 10-м ответе, в приведенных свидетельствах можешь достоверно видеть. Зде же аще паки таяжде предлагати, то будет вещь великаго затруднения. Чего ради убегающе долготы, тамо любопытьствовати читателя убеждаем.
Но и в самем уставе святых апостол, и во изложении святых и богоносных отец на седми вселенских соборех, якоже в Потребнице назнаменуется [глава 15], еже како крестити род человечь, никоего различия возрастным со младенцами в чине крещения не показуется.
Якоже во отрицании зрится: «аще (рече) в возрасте будет крестяися, сам глаголет отрицание: аще же младенец, то восприемницы зань глаголют». Сице же и в самом крещении является: «по крещении (рече) полагаем бывает крестивыися куму на руки на сидон: аще ли в возрасте, то полагаемь бывает на выю его сидон, сиречь чехол». и прочая.
Темже от сих свидетельств явствуется, яко устав апостольский и отеческий никоего различия в крещении у возрастных со младенцами не показует. Аще же где вы кое любо различие в сем пределе обретосте, то просим вас уверить нас свидетельствами со всяким извещением: мы же вящьше лежащаго во уставе вам достоверствовати недоумеем.

Вопрос, 37.
Аще младенцов повелевает простьцем крестити нужды ради, а нет от ереси приходящих: то чесо ради вы несличная своему действию свидетельства приводити?

Ответ, 37.
Обычно есть вашему неправдомудрствованию служити многословию. Якоже во всех твоих вопросех толь многая излишесловия наткал еси, что ниже малейшия наши обычаи или шаги у вас от испытания утещи возмогоша, якоже в прешедших и в предъидущих вопросех твоих видится. Убо и в сем 37 вопросе с потязанием то же вопрошаеши, якоже и в вышшем вопросил еси. Тем и мы на вышеписанный ответ вас отсылаем, бегающе лишесловия.

Вопрос, 38.
На крещении вы, простцы суще, како отрицание сатаны, и обещание Христу, и прочии церемонии творите, явите ничтоже скрывающе?

Ответ, 38.
При крещении у нас, творимом по нужде, несть не подлежащих простолюдину церемоний: но совершается у нас оное нужным и кратким образом, оберегаяся священнических действ, с символом православныя веры, читая оный трижды: вкупе с тремя погружении, во имя триипостасныя Троицы, крещаем бывает требующий от нас крещения.
Чтоже касательно до отрицания: аще сей предел и не есть весма нужде подлежащий, такожде и у нас не везде есть за нужду у всех исполняем. Но аще где и исполняется, то сие исполнение не суть противно церковному чину, повелевающему крещаемому самому отрицание чинити, аще он в возрасте есть. Церковь же святая не точию при крещении, но и по крещении отрицатися и запрещати сатане всякому православному христианину не запрещает, но и повелевает. Яко же во Псалтырех со возследованием, острожских печатей, в молитвах запрещенных в Златоустовех и прочих показуется. В первенствующей же древлеправославней церкви, не точию мужие, но и жены при крещении отрицание творили. Показуется сие от жития равноапостольныя Феклы сице: «(некая) жена изнесши дщерь свою, и верже ю на нозе (святыя Феклы) и сама ся с нею и возопи глаголющи: помилуй сию, якоже и многи помиловала еси. и вопроси ю: крещена ли еста? они же реста: поганьска жития есве. [Ниже:] мати же девицы, ово на страсть, ово на желание, внемлющи дщери своей, и изволи прияти знамение Христово, припадше ко святей и рекоста: аще достойне есве, воля Божия буди. и отрекшися диявола, и обещастася Господу нашему Исусу Христу. и молитву же сотвори има, и научи я евангелию Божию, и помазавши елеом веселия, и крести я во имя Отца и Сына и Святаго Духа». Минея Макариев., сент. 24.

Вопрос, 39.
Кума и куму при действии крещения вашего поставляета, простцы суще. По коим правилом или обычаем сия действия совершаете?

Ответ, 39.
Вправду мы глаголем: изшел еси на распутия, смотряя льстивно, ужалити хотя в пяту нашу, еже есть, изследуя и последния наши действа, и подлагая тыя под крепкое истязание. И по вам, нигде сущим нам правоверным простолюдином к благочестию склонному поступити не летьствует. Понеже восприемницы крещаемым помощницы, или свидетели вере при крещении бывают, паче же младенцом. Якоже в Катихисисе Велицем, во главе 61 о крещении, глаголет тако: «Без веры бо никтоже Богу угодити и оправдан быти не может. имут же паки младенцы помощь от веры, якоже оныи разслабленныи, от исповедания отцев своих крестных». Аще же крестнии отцы при крещении ради исповедания веры бывают, убо и простолюдини крещающии долженствуют не инаго чего, но точию ради свидетельства и исповедания при крещении восприемников имети. Якоже и богомудрый Захария Копестинский, Киевопечерский архимандрит, в книзе своей, которая выпечатана во острожской друкарни в лето от Христа 1598, сице засвидетельствует: «Есть ли подчас не бытности с какой сколко причины иерея при церкве, допущают (правила вышепок.) простым крестити. далеко больше и скорей допущается и позволяется нынешних часов в местах и селах преследования, где не будет православнаго священника, и где не будет волности и безпеченства до православной церкви нести, а дитя бы хворое было, дабы диакон и монах, также отец, или какии христианин крестили. а до ляхов и до тех, которыи с ними веруют, жадным способом не нести. если бо вем в кумовство их забороняет наша церковь приимати, яко во Арменополе, в книге пятой, в вопросех Марка Александрийскаго и Петра Антиохийскаго патриархов, пишет. [Ниже:] Виде ли у греков до рослых крестячи, тех которы в турках от правоверных сродичов породилися, из неволи выходили. а як паки крестити имеют таковы повинны, си делающе: воды чистой излияти, и дитя три крат погрузити, глаголюще за первым погружением: крещается раб Божии, назови ему имя как любиш, во имя Отца, аминь. и вознести его на верх воды, и Сына, аминь. и вознести его на верх воды. третии раз погрузити, молви: и Духа Святаго и ныне и завсегда и на веки веком, аминь. кумы на свидетельство таковаго крещения потребны суть. и прочая». Захария Копестинскаго, глава 35.
Показуется же и от сего потребно имети восприемников при крещении, аще и от простолюдин действуемом. Ибо оное действовати позволяется и самому Отцу свое дитя, еже по нужде крестити, якоже и в 10-м ответе засвидетельствовася, или якоже и выше от Захария Копестинскаго показася. Убо своему отцу без восприемников како возможно крестити свое детище, от чего учинився своей жене кумом? Если же тако учинит, то должно разлучится союза брачнаго. О чесом в Номоканоне, в правиле 208 тако глаголет: «Аще несть ин поп, священник сам да крещает своего детища, крещает же и той со инем приимцем. аще ли будет приимец детища своего, разлучается своея жены, сиречь матере детищу, занеже быша себе кумове».
Но и инаго ради без восприемников крестити не летьствует, еже есть ради брачнаго совокупления. Аще случится юноше и девице един креститель без восприемников: убо креститель сей обоим сотворися отец крестной, они же братия крестнии, сиречь брат девице, девица же сестра крестная ему учинится: сего ради до осмаго степени родство хранится. Якоже в том же Номоканоне, в правиле 209-м засвидетельствует: «Два (рече) некая, иже не имеют кого сродника, аще дети их един кум крестит, сиречь, от купели святаго крещения приемлет. дети оны да не приходят в бракопричастие до осмаго степене, понеже братия суть. един бо отец роди тех духовныи святым крещением». Потребник, лист 708 на обор.
Темже по вышеприведенным свидетельствам, необходимо есть и при простых крещение имети восприемников. Убо ваше истязание зело видится неблагомысленно, паче же егда будет зло, от коварственнаго смышления производимое. Вы же тем недовольни, но своими подкопами под прагом церковным далее простираетеся, желающе вами искомое получить. Но того вам, вся надзряй на наши дела и мысли, которыя ради вины в то принуждаемся входити, не допустит своим словесным овцам волкохищными вашими уловлятися словесами.

Вопрос, 40.
Святый Иларион и златословесный Иоанн, и инии учители церковнии сказуют сице: «Рукою изображаемыи крест освящает вся, на нихже полагает: и воду глаголю крещения, на нихже полагаем, и ина вся». Без сего бо ни едина тайна совершается. Вы же изображение честнаго креста над водою како изображаете? и кто у вас сие действие навершает?

Ответ, 40.
Тайна святаго крещения у нас без креста не совершается. Понеже крестяй и крещаемый, входяй в купель, оба они знаменуются святым животворящим крестом, по разумению святых учителей церковных, самем Христовым крестом. Крест же Христов бяше, на нем же содеяся Его спасительная смерть, трисоставен. Той убо мы залогом веры на себе существуем. Якоже златословесный орган, звяцая, возглашает сице: «Крест есть двоякии видом. ов убо из вещества, или злата, или маргаритов, или каменей честных. ов же (креста вид) невещественныи. ибо не из вещества ипостась Его, но от веры существо». Маргарит, превода Андрея Кипрскаго, в неделю 3-ю поста: и Камень новопечатный, часть 1, глава 4.
Темже аще и не предала церковь Христова обдержне неосвященным над купелию изображати десницею крест Христов: обаче же и той от обоих крестителя и крещаемаго, по согласию святых учителей церковных, на себе образом смиренным (а не священническим, имже предано есть на рукоположении десницею благословлять) верою существом, и тако тем крещение всеблагодатне у нас совершается.
Великороссийския же церкве креститель, залогом своея веры, не Христов трисоставный крест на себе и на крещаемом, такожде над купельными водами, и на прочих тайнах изображает, но четвероконечный, якоже в 21-м ответе, в части 3, и в статии 21 показахом. Убо на вас имеющееся новодействуемое крещение, суть не имуще в совершении креста Христова, но четвероконечный крыж латинский, остается несовершенным и яко не у бывшим. О чесом священный Златоуст в слове во лжу кленущихся засвидетельствует, якоже в Прологе в 13 марта месеца показуется.
Темже по премудрому рещи: «Крепка мужу сеть, свое ему устне». И по иному: «В сети своей увязе грешник». Тако и ваш хитросплетенный вопрос, не на нас, но поистинне на вас вопреки обращается. Понеже и чуднейшее сие творится поражение, егда отъявши своего врага оружие, и тем его поразит, якоже и Давыд над Голиадом учини.

Вопрос, 41.
Аще же кроме изображения честнаго креста у вас действуется крещение: то како сия святая и наипервейшая тайна церковная может без воображения честнаго креста совершатися?

Ответ, 41.
Засвидетельствовахом вышшим ответом: не у нас по древлецерковному разумению в действуемом крещении, аще и по нужде, лишение в совершении креста Христова зрится, но у вас по новопечатным книгам в новодействуемом крещении, его же вы со всеусердием своим приемлете. Темже не мы, но вы сему истязанию виновни.

Вопрос, 42.
Аще кто во обстоянии смертныя нужды дерзнет крестити, простец сый, и при оном крещении ниже чина действия молитв, ниже елей святый, или мvро честное совершается: убо может ли оное крещением совершенным именоватися, явите о сем от святаго писания?

Ответ, 42.
Не едина есть случающаяся нужда, еже точию бываемая при смертном часе: но нуждныя случаи мнози суть: или при смертном часе, или в неимении священства. Якоже и святый мученик Галактион, крестивший свою невесту Епистимию, глаголаше: «О жено, погибе священничество от рода христианска, нужда да аз сам тя крещу». Минея чет., Макар., ноября 5. Такоже и святый мученик Потит отрок крести дщерь цареву и с нею множество народа. И тамо пишет: «понеже невозможно бяше в то время обрести иерея». Минея чет. новопеч., июля 1. Или нужда бывает и та, аще и суть священницы, но не благочестивии, якоже и от Захария Копестинскаго в 39-м ответе засвидетельствовахом. Сих убо ради вин аще случится по нужде, кроме молитв, и кроме елея и мvра, от простолюдин крещение, во имя Святыя триипостасныя Троицы с тремя погружениями, может совершитися и облагодатьствоватися, якоже нижеследующая свидетельства ясно докажут.
В книзе Катихисисе Велицем, во главе 60 сице вопросоответствует: «Вопрос. Кии вид, или видотворение сея тайны? Ответ. Оная словеса, имиже Господь повеле крестити, сиречь, во имя Отца, и Сына, и Святаго Духа, вкупе со тремя погружениями. сими бо глаголы божественными, и силою их крещение кончается и совершенно бывает. аще и прочии глаголи при крещении глаголеми суть от священника, в благолепотное украшение и наказание бывают, сия же три в видотворение и содеяние крещения суть, да сими всездравственно и благосовершенно крещение бывает». И паки: «Внегда ко умовению водою словеса сия Божия приложатся, сиречь, крещается раб Божии, имярек, во имя Отца, и Сына, и Святаго Духа. Тогда с сими словесы, тайна святаго крещения совершается, и душею паки раждается крещаемыи силою Святаго Духа. сей же Дух Святыи несказанно пременяет воду во умовении сем, якоже внегда огнь зимную воду в кипящии укроп претворяет. и даст ей сицевое совершителное, яко касающися тела и душу омывает, и паки раждается. и убо не вода сие творит, но Духа благодать». Катихисис Великий, глава 60.
Речеши ли, яко аще крещенный жив будет, то потреба ко исполнению чина молитвы прочитати. Ответствуем: Засвидетельствует севаст Арменопул, яко крещение, случающееся по нужде, с трикратным погружением, и с приглашением триипостаснаго имени, бывает уже совершенно, и потом не требовательно исполнения оставльшихся молитв. О чем от ответа Илии, митрополита Критскаго, к некоему монаху Дионисию, тако глаголет: о детище, 6 вопрос: «Детищь, рекл есть, недугом удержан и приближився убо к смерти, принесеся некоему иерею, священным богорождением возраждущся. тонкое же сего видев вдышуща и убоявся, да не како обычным молитвам и заклинанием припеваемым, предвосхититися, не получив крещением возрождения. отъем молитвы, прежде совершения припеваемыи, и заклинания, совершает его троим погружением, и равночисленным призыванием, Отца и Сына, и Святаго Духа. что по сих крепится детищь, недугу отбегшу. присудствует паки иерей, заклинания яже остави, и молитвы яже возъисполняющь. прочее искал еси научитися, аще годствует сие творити, или ни? и мнится ми, яко не подобает по совершении, яже преже совершения припеватися. уже совершенному троим погружением, и призыванием трех лиц, в нихже и совершение. негде бо от некоего от священных правил сицево что обретаем преопределенное. В Лаодикии, правило 47, обстоятелно в недузех крещаемых происходящее, ничтоже сих помяне: ни благословити ни заклинати по крещении, точию подобает в недузе крестившымся, или воставшыя, изучатися вере, и знати яко Божияго дара удостоишася». Книга 5 севаста Арменополя. И паки той же от Никифора патриарха, от самех простолюдин творимом крещении, засвидетельствует сице: «Подобает некрещенныя младенцы, аще обрящется некто на месте, не сущу иерею, крестити. крестит и свой отец, или каков любо человек христианин, несть грех. Толкование. Недугующь детищь вдадеся абие крещатися, здравствующь же по 40 днех его рождения. блаженныи же Иоанн тако глаголет: недугом одержим, приближився уже к смерти детищь, аще троическим точию погружением иерей страхом еже не предвосхититися совершит, не треба сему по сих и молитв, яже оставишася, и определения возъисполнити». Книга 1, сечен. 5, глава 1.
Священный же Златоуст в беседах евангельских сице глаголет: «Якоже бо удобно нам креститися и возницати, сице удобно Богу погрести ветхаго человека и показати новаго. трижды же сие бывает, да навыкнеши, яко сила Отца и Сына и Святаго Духа вся сия совершает». Нравоуч. 24, лист 191 на обор. И паки той же в Беседах апостольских глаголет: «Банею (рече) омывается нечистоту глаголом рече каковым? во имя Отца и Сына и Святаго Духа». Лист 1778. Согласует же и блаженный Феофилакт, в толковании на благовестие евангелиста Марка тако глаголя: «Понеже просвещение, глаголется крещение, еже в трех суть просвещени крещением». Зач. 32, лист 43.
Темже от сих вышепредложенных свидетельств показуется, яко совершенство святаго крещения не от молитв зависит, но от трех погружений с триипостаным именем Святыя Троицы. И яко по нужде если тако совершится, потом уже не требуется исполнения оных, но тако крещаемый оставляется. Убо и ныне по нужде крещающии простолюдини, с трищным погружением, и со именем Святыя Троицы, не без совершенства крещают, якоже выше предъявися.
Но гряди, явим ти и о крещающих по нужде без масла и мvра, не точию не освященных, но и освященных епископов и презвитеров: обаче крещение без сих тайн не не совершенно бывает. О чесом в Завещании святых апостол, к епископу или презвитеру, о крещении тако глаголет: «Да помажеши (рече) первее елеом, таже крестиши водою, конечне же печатаеши мvром: да помазание убо будет причастие Святаго Духа, вода же совет смерти, мvро же печать сложения. аще же ниже елей будет, ниже мvро, довольствует вода к помазанию и к печати, и ко исповеди умирающаго». Книга древлегреческая Завещания святых апостол, книга 7-я, глава 23. Сице и в Катихисие Велицем о нужде не имения святаго мvра заповедает: «Вопрос. Скажи ми еще о сем явственне? Ответ. Вся убо седмь тайны потребни суть, но не всякому ниже единообразни. [Ниже:] крещение бо и причащение, и покаяние, сице нужно потребни суть всякому во спасение да спасется. [Ниже:] без них же ни един же спастися может, разве аще не возможет их употребляти вожделев их. святое же мvро и последнее елеопомазание, сице ко спасению суть потребни, дабы имели есмы спасение наше дерзновенне известно же и твердо. [Ниже:] разве аще бы я вожделел и не возмогл бы их употребляти». Глава 60, о седми тайнах. Засвидетельствуют же и вселенстии учители, яко во спасение суть две тайны потребны: крещение и покаяние. Еже святый Григорий Богослов, и его толкователь Никита Ираклийский, тако засвидетельствуют: «Вера совершается крещением, и предходит исповеданием ко спасению». На Крещение Господне слово 2, стих 13, от толков. Подобне и Златоуст глаголет: «Ниже уже покаяние довлеет на очищение, но потреба крещение восприяти». На поле напечатано: «покаяние и крещение». Беседы апостольския, лист 2855. В подтверждение же вышеписанным засвидетельствуем из книги О 7-ми тайнах Гавриила, архиепископа Филадельфийскаго: тако же и в Жезле, на листу 49 подтверждает сице: «Ведати нужда есть всем, яко тайны церковныя, иныя суть по нужди посредия, каковы суть: миропомазание и елеопомазание. ихже аще кто и не сподобится, спасен быти может. иныя по нужди заповеди, темже есте две: крещение и покаяние. еюже кроме, несть леть спасение получити».
Темже, якоже при священницех при скудости, тако и без священников по нужде, крещения тайна может без молитв, без масла и мvра совершатися. Понеже кое мvро бяше, егда крещаху простии мужие и жены? Кое мvро при мученицех бяше, егда в темницах, егда на самых мучениях крещахуся, егда сами себе крещаху и нерукоположеннии? Кое мvро при оных апостолех бяше, котории священства не имуще крещаху, о них же во ответе 10-м, такоже и в сем 2-м разделе, в 36, и в прочих засвидетельствовахом? Аще кроме мvра крещаху, кольми паче без молитв и елеопомазания. Убо и ныне простых крещение, аще и кроме молитв, масла и мvра по нужде совершается, надеждно и известно, и спасительно может быти.

Вопрос, 43.
И аще оное совершенным крещением нарицается: то убо ли кроме возложения рук презвитерских таковых, иже в болезни крещени, оставляху, и без всякаго молитвословия и миропомазания тако пребывати попущаху? известите и сия от святаго писания.

Ответ, 43.
В вышепредложенном убо вопросе предложил еси о мvре, масле и молитвах, зде же присовокупил и руковозложение. Обаче в самом начале церкви, якоже засвидетельствует Симеон Фессалонитский, и в Катихисисе Велицем во главе 63, руковозложение вместо мvра бяше. И ты сие присовокупил, вопрошаеши, после действия простолюдин: сия действа бываху ли последи над крещаемыми совершаема? Мы же в прешедшем уже ответе засвидетельствовахом, яко по нужде во имя Святыя триипостасныя Троицы с тремя погружениями совершаемое крещение, за совершенное почитается: и потом молитвословие, бываемое при крещении, оставляется кроме всякаго исполнения. Миродействие же бывает во время свободы, и при присутьствии священства, якоже и над крещенными от святаго Афанасия, во время его детьскаго играния, от Александрийскаго архиепископа учинено.
Во время же неимения священства, якоже в крещение Филиппово каженника, и Ананиево апостола Павла, или по апостолех в случающаяся не иметельная времена священства, во время крещения Галактионова Епистимии, и в прочая безчисленная от простолюдин действия, от объявленных в 10-м и в прочих ответех: всячески аще поищеши, не имаши узрети того, чтоб по крещении оных совершали миропомазанием и прочими молитвословиями, или руковозложением. А понеже явственно показахом в прешедших ответех: яко близкаго ради разстояния, руковозложения от начальнейших апостолов, в Самарии крещенным от Филиппа востребовася руковозложение. Егда той же Филипп бе на пути, и крести каженника, тогда и без руковозложения Дух Святый соверши. Такоже и Анания, крестив Павла, последи не видится, чтоб было над ним действуемо руковозложение, разве в приятии от главных апостол хиротонии.
Темже ваше сие вопрошание не от правдоразсмотрительнаго обыскания производится: но точию, как и в прочих вопросех, намерение ваше клонится ко излишнему истязанию, желая в недоумение ны грубыя вложити, и безответных показать. Но мы по силе нашей в прешедшем ответе доволно о сем засвидетельствовахом.
Но аще и попустимся (по вам) к получению на совершение крещения святаго мvра: но где убо и ныне оный обрести возможно? Воистинну нигдеже. Аще в первом разделе во ответех изъявихом, яко священства невозможно обрести, кольми паче от священства совершаемаго мvра. Ибо кроме епископа мvр от священников никакоже попускаем есть от святыя церкве совершатися. В первых есть засвидетельствуяй апостольский престоловосприемник Дионисий Ареопагит, тако глаголет: «Знаменай яко освяти и совершити мvро несть презвитера, но ниже жертвенник совершити да принесет на нем, ниже хиротонисати. сия бо един священноначальник сотворити имать». Книга Дионисия Ареопагита, во главе 5, в толковании.
Согласно сему апостольскому престолонаместнику и прочии учители церковнии утверждают: Симеон Фессалонитский, во главе 43, 77: и во ответах 13 и 36: такоже в Катихисисах, в Великом во главе 63, и в Малом на листу 31-м, довольно засвидетельствуется.
Но в вас ли, о чуднии, где обрести есть мvро, которое форму свою и материю, и совершенство свое от великаго архиерея имеет? коего уж давно не обретается. Ибо диаконовыми в прежняя лета не малое о том мvре взыскание бяше, и отвсюду многия собирающе, и от ведомыя формы сего обрести не возмогоша. Такоже и в вас давно уже сего мvра несть, якобы рещи, от лет Феодосия попа. Ибо при нем старова мvра было с малую поллошки. И тое в новосоставное свое мvро вложивше, варили вместе. О коем новосоставном мvре есть свидетельство писменное Александра диакона, писанное к Ветке сице: «А наипаче всего, как вы мvро составляли, о всем том извольте к нам прислать подлинное ответствование. [Ниже:] А како вы мvро составляли, у него Питирима подлинная скаска, за рукою бывшаго уставщика Афанасия есть. [И ниже:] А буде вы, отцы святии, не пришлите на письме за руками о церкви и о мvре к нам ответа, како у вас составлялося: то мы за вас не вемы как ему отвещать, понеже мы и сами в первое слышим». До зде от Александровы грамотки, кая бяше писана ко Александру попу лета 7224, февраля 20.
Но так составлять мvро и попу освящать, весма противно есть святей церкви. Ибо освящати мvро, якоже выше предложихом, единаго есть архиерея дело: иначе же освящаемо, не вемы кое лучшество в нем будет простаго елея. И таковым помазуяй, како глаголати дерзнет: печать дара Духа Святаго? И помазанный сим, кое совершенство в крещении прежнем приимет? Но уже и онаго Феодосиева мvра, за толикия лета, и за множество народа, не вемы где бы у вас было.
Темже убо и у вас что подражателнаго (аще и хвалитеся священством) к пользе обрящется?
Аще поищем священства, но того в вас не обретаем (ибо священство в архиерействе, а не иерействе заключается). Аще посмотрим на ваше приятие приходящих, то разньственное имеете иереов с простыми: первых приемлете без миропомазания, простых же миропомазуете. Аще полюбопытствуем вами предлагаемаго мvра, но и того у вас отнюд не обретается.
Темже от сего показуется, яко о вас должно сомнятися, яко новое, яко от себе восприемших, яко противное святей церкви содержащих, а не о нас. Аще и не получаем по крайней нужде сих таинств, обаче, по триех отрок гласу: душею сокрушенною и сердцем смиренным, недостигновенное навершаем. Ибо, якоже они реша: «несть студа, уповающим на Бога».
Конец второму разделу.

ЧАСТЬ ПЕРВАЯ.
РАЗДЕЛ, 3.

Вопрос, 44.
Крещенных от еретик в три погружения с приглашением триипостаснаго божества, и приходящих ко святей соборней и апостольстей церкви, достоит ли таковых во второе совершенно крестити?
Ответ, 44.
Понеже безтрудное бы было ответствие наше, если бы мы на указание нашего 21-го ответа вас, вопросителю, отсылали. Ибо тамо довольно великороссийския церкви о новинах засвидетельствованно, яко оныя со всеми древними вящшими еретиками подобие и согласие имеют, темже и за излишнее истязание о прежних малых еретиках зде быти полагаем.
Аще российския церкве согласие с древними вящшими еретиками, и с римляны, люторы и калвины быти имеется: убо всякому удобно есть познати, яко от оныя за толь величайшия и множайшия ереси летьствует приходящих совершенно паки крестити. К сим же и показанныя в том же ответе множайшия противныя вины в новодействуемом крещении, всячески должно онаго не приимати, яко противно уставам кафолическия церкве действуемаго: весма пресомнително сие приимати.
Но ваше упорство всюду належит, вопльствующе: Яко в правилах отнюд не повелевается крестити три погружательное крещение имеющих еретик, или других киих противников святыя церкве, имеющих оное.
Того убо ради мы, выше надлежащаго поступающе о древнем от еретик действуемем крещении, зде в настоящем ответе доводы от святых правил предлагаем.
Но прежде, нежели внити во оныя, судихом на празе тех постояти разсуждения, каковыя суть должности взыскуются на сущее и приятное церкве крещение.
1: Да будет вода.
2: Да будет в воде трикратное погружение.
3: Да будет на коемждо погружении (пременно) единыя божественныя ипостаси имя приглашение.
4: Да будет креститель по всему православен, такожде и креститися хотяи.
5: И Духа Святаго приитие взыскуется.
И в таковых обьстоянии крещение бываемое, нарицается крещение святыя церкви и православное, и спасению человеческому виновное.
В еретицех же бываемое крещение в сих обстояниих:
1: Воду имут подлежащую.
2: Аще в воде трищное погружение.
3: И аще на коемждо погружении божественнаго лица имя со аминем разнествующее приглашение.
Четвертыя же должности крестителя и крестившагося лиц православных несть. За приложение же крестителя к вящьшим еретиком, и крещение не приемлется, якоже в 24-м ответе показахом, и в настоящем в 4-м разделе изъявится.
К сему же и пятыя должности Духа Святаго не бывает, якоже в 20-м ответе засвидетельствовахом, убо и несовершенно.
И сицевое крещение по трикратному погружению аки православно, по главнейшим же лишительным обьстоянием еретическо, яко иное качество обстоянии в нем и иное по таиньству. И како может глаголатися православно и приятию достойно, далече православнаго в силе отстоящо.
Аще бо рещи, яко трикратным погружением крещаются кии еретики.
Но зде не до того точие слово. Ибо нам не та есть токмо нужда, еже бы в воде трищи погрузитися, но ищется в том погружении некоего таиньства: кое таиньство от очей наших скрыто, и токмо оком веры постигаемо. Того ради и глаголется православное крещение тайна, яко тайна неизреченна в нем содевается. Ибо егда с верою правою входит человек в воду креститися, и крещаяи правоверен: и ради того правоверия, егда пригласятся имена ипостаси Отца и Сына и Святаго Духа, невидимо на крестившагося сходит Дух Святый, и преестественно на нем чудодействует: отъемлет от него древнюю клятву, и грех истребляет, и порождает его, и всего нова сотворяет, и сына и наследника божественнаго царствия творит и. Без коего порождения ни един внидет в славу Божию, по Оному: «Аще кто не родится водою и Духом, не внидет в царство небесное». Еретическое крещение, аще и трикратнаго погружения, но Духа Святаго не имать. Убо и не бывает в еретиках крещенному духовнаго порождения, ниже древняго осуждения свобода: но каков бяше до крещения, таков и по крещении пребывает, излишнее же носяи по оном осквернение. И како то может рещися крещение православно, аще славных дел в нем несть; аще не порождает во Отца и Сына и Святаго Духа; аще сына Божия и наследника Его царствия не сотворяет; убо в еретическом крещении простое некое погружение, и пользы никоея приносящо. Сего ради и не может быти во имени православным, но еретическаго действа крещение.
И тако убо, помедливше при входе нашего ответа, вступаем и в самое показание доводом о трехпогружательном еретическом крещении, его же на десять разделов располагающе разделяем.
1: Яко святии апостоли в своих правилах без всякаго изъятия от еретик действуемаго крещения не приемлют.
2: Яко во времена первеньствующия церкве последствующе святым апостолом, святии учители поместными соборами, такожде всех еретик и расколник крещение отметающе, второе крестити повелевают.
3: Соглашающеся тому и во время вселенских соборов, и на соборах такожде и по соборах, мнози святии учители церковнии, яко в три погружения, тако и от всех еретик крещение не приемлюще, паки совершенное второе крестити поучают.
4: Святая правила вселеньских и поместных соборов и святых отец, не еже точию ради не трехпогружательнаго крещения от еретик приходящих повелевают второе крестити, но обновления ради и важных и многих вин.
5: Святая кафолическая церковь, не непреложный имеет предел, еже втораго или третияго чина еретик не крестити: но иногда единех и тех же приемлет под проклятие ересей, иногда же и под миропомазание, а иногда тех же и совершенно крестить повелевает.
6: Яко аще и приимаше от онех (си есть втораго и третияго чинов) еретик крещение, но вин ради благословных и нужных.
7: Паки рещи: приимаше святая церковь от малых еретик, но смотрения ради: а смотрительные вины в законные и обдержныя в божественном писании не полагаются.
8: И паки глаголем: аще и приемлют некая правила от средних еретик крещение, но под миропомазание. Настоящаго же времени нужность не допущает иметь миропомазание, убо и отнюд тще есть защищающих новодействуемое крещение на оныя правила указание.
9: Аще древле по смотрению и приимаху от еретик крещение, но точное нашему крещению.
10: Нынешния же великороссийския церкве новодействуемое крещение православному крещению не точное и вере есть преступно.
И сия убо разделы оглавивше о еретическом трехпогружательном крещении, в самая оных показания входим.

Раздел, 1.
Яко святии апостоли без всякаго изъятия от еретик действуемаго крещения не приемлют. Правило святых апостол 46: «Крещение и жертву еретическую приим святитель, не священ». Толкование. «Епископ или презвитер, или диакон, аще не похуляет ни ругается еретическому крещению, но приемлет крещеннаго от них, или приносимая от них на жертву (сиречь на службу приемлет), таковыи да извержется от сана».
Речеши ли, сие апостольское правило быти гласящее на не трепогружательное еретическое крещение. Но противу сего вашего прекословия в апостольском сем правиле, в 59-м ответе, возразительно возъответствуется. Зде же порядок наших доводов соблюдающе, тамо вопросителя отсылаем.
Но согласно вышеписанному 46-му апостольскому правилу и в книзе Завещания их шестой, во главе 15, о еретиках пишется сице: «Ниже бо суть тии священницы (глаголет к ним Бог), понеже ты отринул еси разум, отрину тя и Аз священнодействовати Мне. ниже бо крестившийся у них очистишася, но осквернишася. не оставление грехов, но связание нечестия приемлюще».
Паки 47-му апостольскому гласящу: «Второе крещаяи крещеннаго истинным крещением, и не покрещеваяи оскверненнаго от зловерных, таковыи святитель не священ». Толкование. «Несть достойно дващи крестити человека, аще же который епископ, или презвитер крестит кого второе совершенным крещением, да извержется от сана, суть же нецыи, иже благоверно крещени бывше, отвергше же ся Христа волею и неволею, и осквернени бывше, и таковыя муром токмо помазуеми освящаются, и иже не крестит совершенно второе, первое крещение приемшаго от еретик, но приемлет его яко верна, да извержется от сана».
Но и в вышеписанном апостольском Завещании, в книзе 6, во главе 15, согласно сему правилу заповедается: «Яко ниже прекрещати подобает, ниже паки приимати, еже от нечестивых крещение данно, еже несть крещение, но осквернение, такожде и крещением единым довлевайтеся, самим иже в Господню смерть лаемым, не оное еже от злоименитых еретик даемое, но еже от непорочных священник даемое, во имя Отца и Сына и Святаго Духа, ниже оное, еже от нечестивых, приято буди вам, ниже от преподобных сущее укоризненно за второе».
Такоже и в 68-м правиле апостольском толкуется: «Ибо от тех (си есть еретик) крещени не крещени, и поставлени не причетницы». До зде от апостольских правил и Завещания.
Зде убо речеши ли, апостолом о первом чине еретическом глаголати, еже от них не приятно быти крещению. Но яко тогда не бяше триех чинов от еретик приходящим установления: аще и много поищеши, того обрести не возможеши. Ибо уставление триех чинов последи произыде, или паче, рещи конечнее, во времена вселеньских соборов. Убо от сего остается, яко святии апостоли без изъятия всех еретик, яко Святаго Духа не имущих, повелеша крестити. Которое наше показание, еже крестити всех еретик святии апостоли повелеша, подтверждает и святейший Филарет патриарх, глаголя тако: «(Правило перваго вселеньскаго собора 19) И тако вси возгласиша купно, еже еретическое крещение, несть крещение, но паче осквернение, и повелевают таковых крестити святым крещением паки совершенно. Сия бо прияша святии отцы, от самех самовидцов слову и премудрости божественных апостол, еже еретическое крещение, не в крещение полагают: понеже божественнии апостоли, в четыредесять шестом и седмом правиле своем тако утвердиша. Епископ, или поп, или диякон, аще еретическо приимет крещение, или жертву, таковыи да извержется». Потребник болшей, лист 575.

Раздел, 2.
Яко во времена первеньствующия церкве, последующе святым апостолом святии учители поместными соборами, такожде всех еретик и расколник крещение отмещуще не приемляху.
Засвидетельствует великий дееписец Бароний в лето 216 древле западной подлежащия Африкийския церкве обычай о крещении всех еретик, тако глаголя: «Агрипин, епископ Карфагеньский, ненавидя еретиков, ведая же яко вся во гресе моления своя и тайны совершают, суди яко крещение их несть крещение, и сих, кая от них к церкви прилагахуся, паки крестити подобает. На утвержение же сего созва епископы Африкийския, и с ними устави, дабы от еретиков крещении паки восприимали в церкви истинное крещение, бе сие изначала приятно учение, и имяше по себе многия крепкия доводы. По сем Агрипине, в лето Господне 255-е, святый Киприан восприя престол Карфагена епископство, и в лето Господне 258-е сотвори собор, созва из Африки и Нумидии еписокпов 84. и на нем уставиша. яко еретическое крещение несть истинное крещение, и не может в крещение вменятися. и ниже сие глаголаху, яко они тех, иже от еретиков приходят, вторицею крестят, но яко аки некрещенных (ни во чтоже себе крещение еретическо вменяюще) крещаху. ибо вси православнии второкрещением гнушахуся».
О сем во Африце Киприанове соборе и Матфей Иеросалимский на преди книги своея положи, и пишет: «Яко оный собор весма от всякаго еретика и раскольника крестившихся, к соборней приходящих церкви, паки крещати повеле. Раскольники же в та времена наватиане быша».
Сие изречение и Великий воспоминает Василий, в похваление убо се положив, строения же ради праздность на ня изрек.
Сие же Киприанова собора определение засвидетельствует и Тимофей, презвитер Великия церкве, глаголя тако: «А иже с Киприаном собор повелевает всякаго еретика крестити». Кормчая, лист 636.
Сицевыя же соборы быша тогда и в восточной церкви на еретиков, якоже вышепомяновенный историк Бароний в лете Господнем 258 тако глаголет: «Восточныя церкви во Иконии, во Фригии, собор сотворше, уставиша ни едину тайну у еретик, ниже крещение, в тайну вменяти. На что восточных соизволение писаша Фирмилиан епископ Кесарийский, Дионисий Александрийский к Киприану».
Темже от сего раздела показуется, яко сии соборы, бывший в первеньствующей церкви, якоже на западе, тако и на востоце, согласная творяще апостольским правилом: еже всех еретик, яко Святаго Духа в крещении лишающихся, второе крещаху. Писаше же сим собором согласная и Тертулиан славный, быв еще православен, тако глаголя: «Еретики (рече) не имут общения со учением нашим, само их проклятие о том свидетельствует, не должен есмь у них познати сие, еже мы, ниже того Христа, Егоже мы имамы, убо и крещение не едино». Бароний в лете Господнем 216.

Раздел, 3.
Мнози святии учители, во время вселеньских и поместных соборов, и на соборах, такоже и по соборах, соглашающеся со апостольскими правилы, и первеньствующия церкве обычаю, яко в три погружения, тако и всех еретик крещение не приемлюще, паки совершенно второе крестити поучают. Аще и неоспоримо есть, яко втораго чина еретики смотрения ради от церкве приемлеми быша под миропомазание, вси тыя крещаху в три погружения. Но яко суть нецыи и в том прекословствующе, егда увидят в священных правилах инде смотрения ради приемлемых, инде же второе крестить повелеваемых: того ради упорно вопреки самой истинне вооружающеся, и сих быти не трехпогруженцов усилуются утверждати. (якоже и в последующих твоих вопросех много истязания обрящется). Того ради и мы в начале сего раздела сих еретиков засвидетельствуем от святых учителей, яко точно нам, правоверных крещение имеяху. И яко нецыи из них и мудрование о Святей Троице, и о воплощении Сына Божия, согласно во всем церкви православней содержаху. И сии от неких учителей церковных расколниками, а не еретиками нарекошася: но ради неких противных догматствований, от святыя церкви отвержени и проклята быша, и со еретики положишася. О чесом преподобный Иосиф Волоколамский в слове 15 сказует: «Суть же и друзии еретицы, аще и зле мудрствуют, но не тако якоже первии: суть наватиане, и донатиане, и четыренадесятницы, и средницы, и воздержницы, и инии таковии. сии убо исповедуют Святую Троицу, и Господа нашего Исуса Христа истинным Богом нарицают, и плотьскому смотрению веруют». Преподобный Матфей Иеросалимский в составе а, о сих и о прочих еретиках объявляет: «Арианы (рече) и македонианы, и саватианы, глаголющих себе чистых, и левыя и четверонадесятники, иже средники, и аполинарианы, понеже точно нам божественным совершаются крещением». И паки того же состава а, во главе 2, о наватианех сице пишет: «Нават, презвитер сый стараго Рима, глаголемых чистых ересь начат, раскольник сый истее, а не еретик, небо в чесом от правил предании с верными разньствоваше, но иже в гонение подклонившимся и пожершим отрицаше покаяние, двоеженцем же не приобщашеся. ихже ради, аще и не о вере погрешаше, но за немилосердие его и братоненавидение, собору бывшу в Риме при Корнилии папе, Декию царствующу, извержен бысть и проклят, яко же Памфилийский Евсевий исповедует».
Согласно сему о наватианех Созомен историк, в книзе 7, во главе 12 засвидетельствует, сице глаголя: «Яко Сисинии наватианския ереси, яже тожде, еже и православнии исповедание Троицы содержаше».
Преподобный же Максим Грек, в книзе своей во главе 68, о сих наватианех явственно сказует, тако глаголя: «Слыши внятно, и разумей прямо, еретики, ижи от Навата, презвитера бывша Римскаго, наватиане нарицаемии, ниже о крещении, ниже о таиньстве православныя веры, ниже о ином коем законе церковнем беззаконноваху: но зане точию дарованное от человеколюбца Спаса Христа грешником покаяние отрицаху, и не приимаху на покаяние обращающихся, иже в гонении Христа отвергошася. за то едино отриновени быша от всякаго собора православных, и проклята быша».
И прочая многая свидетельства о сем писати продолжения ради оставляем. Ныне же входим в самое показание сего раздела о еретиках, аще и трипогружательное крещение имеющих, обаче множайшими святыми учители церковными их крещение отметается, и паки крестить повелевается: их же мы зде поряду имена статиями указуем.
Первое.
О еретицех наватианех, рекше чистых.
О сих убо еретицех Алексей архидиакон в толковании 1-го правила Василия Великаго сице глаголет [Алексей ахидиак. бе после седмаго собора]: «Наватиан же, рекше чистых, и воде предстоящих, и воздержащихся, крещение аще и не приятно есть, понеже оставляет их Дух Святый, но смотрения ради да будет приятно». Кормчая, лист 224.
Но смотрительныя вины в законныя и обдержныя не приемлются, якоже о том в 7-м разделе объявится: убо остается, яко законно и обдержно не приемлется чистых крещение.
В старописменной же Кормчей о сих наватианех толкование на 47 правило Василия Великаго сицевое имеется: «Воздержницы (глаголет) и вретищницы тому же подлягут слову, ему же и наватиане. яко о тех убо аще возглашено бысть, мы же убо единем словом второе крещаем таковыя».
Согласно же сему преподобный Никон Черногорский, на тожде Василиево правило толкующь, тех же наватиан с прочими повелевает крестити, о чесом сице пишет [Никон Черногор. бе в лето 6..?]: «Воздержницы и вретищницы, и апотактиты тому же слову подлежат, емуже и наватиане. яко о онех убо правило изложенное бысть, аще и различие, а иже о сих умолчана быша. мы же единем словом покрещеваем таковыя». Слово 63.
Утверждает же и севаст Арменопул, толкующи на правило 47-е Василия Великаго, оных наватиан крестити, тако глаголя [Севаст Арменопул бе в лето 6961]: «Наватиане, аще многих епископов изволится суду, да воскрещеваются». Книга 1, сечение 5 о людинех. Темже сей учитель церковный, последуя обдержному обычаю, утверждает наватиан второе крестити. Убо крестити и втораго чина еретиков есть не непреложный предел, но законный и обдержный.
Второе.
О еретице Павле Самосатском и павликианех.
Первый убо вселеньский собор, правилом 19 павликиан повеле второкрестити, глаголя [1 вселен, соб. бысть в лето 5818]: «Павликиане покрещеваются». и прочая. Толкование. «От павликианския ереси приходящий к соборней и апостольстей церкви, да покрещеваются второе: первое крещение не крещение, понеже еретично бе». До зде правило.
Речеши ли, яко ереси сей началник Павел не в три погружения крести? Вопреки же сему доводствуем отсюду.
Пишет великий летописец Бароний в лете Господнем 266: «Яко сей Павел ересиарх бяше града Антиохии епископ в правоверных, слух же дойде отцем о нем, яко сопротивно о Христе умствует, собрашася во Антиохии епископи, вопросиша его о богохулном учении, он же исповеда себе точна с ними мудрствующа, и того ради оставиша его на епископстве, но по десяти летех известно отцем сотворися о Павлове учении, и в лето Господне 277-м паки собравшеся на Павла святии отцы, и вопрошением познавше его, яко зле о Христе учит, извергоша». До зде от Барония.
Отсюду мощно есть познати, яко Павел в три погружения крещаше, того ради и в толикия лета не возмогоша познати его о ереси, аще бы иначе крестил Павел, вскоре бы явился.
Третие.
О еретице Монтане и мантанианех.
Монтана еретика от многих познати мошно, яко в три погружения крести, во Отца и Сына и Святаго Духа, но Параклита себе мняще сей.
Святый священномученик Дионисий, не вняв себе в сем его словеси, прия крещение его за крещение, о чем зазрен бысть святым Василием, яко не разсмотренно о вещи тако содея [Нил Селунский, глава 30].
Подтверждается же трикратно быти его погружение и от Тертулианова к нему пристатия [Бароний, лето 201]. Како бо можаше сей Тертулиан согласитися с ним, аще бы иначе Монтан крестил; ибо Тертулиан о вере ничтоже зле имяше.
Показуется же и от святаго Афанасия Великаго, яко фруги (си есть монтанианы) имена, сиречь трех ипостасей, приглашаху в крещении. О чесом пиша на арианы, глаголет: «Тако (рече) манихеи и фруги и самосатовы ученицы, имена глаголюще, ничтоже мнее еретицы». Слово 3 на арианы.
Обаче святая церковь монтаниан еретиков во всех правилах повелевала крестити, полагая ни в чесо их трепогружательное крещение [Лаодик соб. прав. 18, 2-го всел. соб. прав. 8 и проч.].
Четвертое.
О еретике Фотине и фотинианах.
Показуется от собора Лаодикийскаго, яко сии еретицы фотиниане в три погружения крещение имеяху, якоже услышим поместнаго собора, иже в Лаодикии, правило 7: «Еретики наватианы фотинианы и четыренадесятники, аще прокленут ереси, по помазании муром, да приобщаются». До зде правило, от него же яве есть фотинианово трикратнаго погружения крещение бывшо. Како бо хотяше собор под муро сего прияти; обаче толкователь сего правила, фотиниан в крещаемый чин положи, глаголя: «Яко началник их Фотин многи ереси обнови, и Павла Самосатскаго, и Савелии, и Монтана ереси». Зри убо зде вину сведения в крещаемый чин фотиниан, не качество крещения, но качество крестителя, сиречь каковы крещаяи ереси имать, а не то, како крещает.
Сих убо фотиниан Тимофей презвитер и Иоанн, митрополит Руский, в чин требующий святаго крещения полагают. Кормчая, глава 70, лист 634; и Потребник великий, глава 7, лист 582.
Пятое.
О еретицех воздержниках.
Преподобный Иосиф Волоколамский в 15 слове книги своея засвидетельствует о воздержниках, яко они во Святую Троицу веруют, и воплощение Сына Божия приемлют, о чесом впреди о сих изъявихом. Но яко они, по толкованию Алексия архидиакона, отрасль имеют маркионитския ереси: ненавидят бо сии брака, и отвращаются вина, и тварь Божию скверну быти глаголют. Того ради аще Василий Великий в первом правиле своем и прият сих крещение, но в 47-м, исправляя, повелевает воздержники и прочия крестити. Якоже и в самом правиле сице заповедает: «Воздержники, и вретищники, и апотактиты, да крестиши, аще бо и глаголют, яко во Отца и Сына и Святаго Духа крестихомся, но понеже злу Творца Бога нарицающе, хулят по Маркионову учению, не крещени же, не приятии». Кормчая, лист 234.
Такожде и преподобный Никон Черногорский на сие 47 правило о тех же воздержниках и прочих пишет сице: «Не приемлем их в церковь, аще не крестятся в наше крещение, да не глаголют убо, яко во имя Отца и Сына и Святаго Духа крестихомся, зане злу Творца творят Бога, подобие Маркиону и прочим ересем».
Подтверждают же крестити вторично воздержник и древлероссийстии пастырие Иоанн митрополит и святейший Филарет патриарх, вземше указание от Тимофея, презвитера Великия церкве. О чесом в Потребнице великом, во главе 7, на листу 581 на обор.: и в книзе Кирилове, во главе 27, на листу 257 явствуется.
Шестое.
О еретицех вретищниках.
А понеже онех выше засвидетельствовахом, яко от Василия Великаго сии вретищницы во едином правиле положишася: и яко во Отца и Сына и Святаго Духа крещение имеяху: и яко согласно воздержником и апотактитом мудрствоваху: о них же и в древлеписменной Кормчей, в пространном указании Тимофея презвитера засвидетельствует, яко не разгласно сих всех учение бяше. Корень же своего учения получивше от ученика Иустина Философа и мученика. Сего же быти Епифаний Кипрский сказует Татиана, не последовавша своему учителю. О чесом в той же старописменной Кормчей Епифания Кипрскаго, во главах 46 и 47 показуется. Но и преподобный Никон Черногорский, в толковании 47-го правила, сих вретищников за едино полагая с воздержниками, и едино мудрование быти извествует.
Сих же вретищников Тимофей, презвитер Великия церкве, в требующий чин святаго крещения положи, о чесом в Кормчей, во главе 70, на листу 634-м указует.
Седмое.
О еретиках апотактитах.
Вышеименованный Великий светильник вселенныя Василий в 47-м своем правиле, такожде сих еретиков апотактитов, во едином крещении и во едином разуме быти сказует: такожде единьственно, как и воздержников и вретищников, без крещения не приемлет. Подобие о сих и преподобный Никон Черногорский, толкуя 47-е правило, не приемлет сих в церковь, аще не крестятся крещением православным. Сих же апотактитов и Тимофей, презвитер Великия церкве, в требующих святаго крещения полагает. Кормчая, глава 70, лист 634.
Осмое.
О еретиках водопредстателех.
О сих убо еретиках аще Василий Великий в 47 правиле и не поминает: обаче 1-го правила его в толковании сии с воздержниками за едино полагаются, идеже о них сице глаголется: «Наватиан же, рекше чистых, и воде предстоящих и воздержащихся, крещение аще и не приятно есть, понеже оставляет сих Дух Святый, но смотрения ради будет приятно». Сообщая же толкование 47-го правила, оному сице глаголющее: «еже по смотрению, онамо прият (си есть Великий Василий) . зде же исправляя, повелевает воздержники и прочия крестити». Явственне же сих водопредстателей древлероссийстии пастыри Иоанн митрополит и Филарет патриарх, вземше указание Тимофея презвитера, засвидетельствуют второе крестити. Потребник, глава 7, лист 582.
Матфей же Иеросалимский сих ересь соединьственну воздержникам быти описует: «Воднии (рече) предстателие суть, иже точию воду во священнодейство святыя приносяще чаши, с вином же сию сопримесити не приемлюще, и законному браку ничтоже разньствовати блуда нешцуеще». Глава 1, перваго состава.
А понеже сия ересь и есть отрасль маркионитския ереси: убо святый сей светильник повелевает тоя ради воздержники и прочия крестити, темже не не повелевает и водопредстатели крестити.
Девятое.
О еретиках четыренадесятниках.
В толковании 7-го правила поместнаго Лаодикийскаго собора о сих четыренадесятниках тако пишет: «Четыренадесятник же ересь сия есть, еяже ради и четыренадесятницы нарицаются. в четвертый бо надесять день луны, егда полна будет, и аще прилучится день той в понеделник, или во вторник, или в среду, тогда тии и Спаса нашего празднуют воскресение, не приемлют же якоже и наватиане обращающихся грех свои, держат же и почитают отверженныя книги, и ина многа таковая зле мудрствуют». Кормчая, лист 73.
Обаче сии четыренадесятники, по Иосифу Волоцкому и Матфею Иеросалимскому, якоже о вере, тако и о крещении не погрешают, о чесом впреди ответа изъявися.
Но Василий Великий в 47-м правиле воздержников и прочих, подобных наватианом, повелевает крестити. Сии же четыренадесятницы, еже не приимати обращающихся от грех, точно ересь имеют с наватианы, убо, по правилу 47, и сих крестити долженствует. О крещении же наватиан второе в первой статии изъявихом.
Темже, якоже по 47 правилу Василия Великаго, и по изъявленному в 1-й статии о наватианех, яко подобообразное имущих мудрование, сих четыренадесятников крестити обдержным обычаем не непротивно есть правилом.
Но сии четыренадесятницы не точию по наватианьски обращающихся от грех не приемлют, но и Пасхи празднование превращают, якоже выше от Лаодикийскаго собора 7-го правила показася. Святейший же Филарет патриарх, изложения своего на римляны, во главе 2, сея ради вины (сиречь превращения ради Пасхи), всех еретик крестити повелевает. Потребник Большой, лист 569 на обор.
Темже, по соборному изложению, и за превращение Пасхи четыренадесятников леть есть крестити.
Десятое.
О еретицех средницех.
Понеже сии еретики средники во втором вселеньском соборе в 7 правиле, и шестаго вселеньскаго собора в 95-м правиле, за едино полагаются с четыренадесятницы же, по 7-му правилу Лаодикийскаго собора, равно недугуют с наватианы, еже обращающихся от грех не приемлют. Темже по 47-му повелевающему воздержники и прочая подобныя крестити: убо и сих средников, яко в том же подобии лежащих, еже обращающихся от грех не приемлющих, летьствует обдержно второе крестити. Но сии средницы, по Иосифу Волоцкому и Матфею канонисту, о вере и о крещении тако же, яко и наватиане и четыренадесятницы, не погрешаху: в мудровании же точны беяху, якоже и четыренадесятницы: такоже, по толкованию втораго вселеньскаго собора 7-го правила, в 14 день луны праздноваху Пасху. Темже не точию, по 47 правилу Василия Великаго, не летьствует приимати тех крещение, но и по изложению соборному святейшаго Филарета патриарха, повелевающему за превращение Пасхи всех еретик крестити. Средницы же нарицаются, понеже, по сказанию святых отец втораго вселеньскаго собора, в среду мяса ядят, а в суботу постятся. Правило 7 в толковании.
А святейший же Филарет патриарх, в соборном своем изложении на римляны, и сея ради вины повелевает крестити, идеже в первой главе тако извествует: «Римская ересь, иже прияша от мелхиседекиан, и жидов, и армен. Мелхиседекиане убо и жиды и армены, равну ересь в себе содержат, еже в суботу постятся. [Ниже:] и сея ради вины подобает убо и от римлян, и от всех различных еретических вер совершенно крестити: понеже еретическое крещение, несть крещение, но паче осквернение». Потребник, лист 566 на обор.
Убо сих средников и сея ради вины, еже в суботу постятся, а в среду разрешают, по изложению соборному Филарета патриарха, годьствует крестити.
11.
О еретиках саватианах.
Преподобный Матфей Иеросалимский о сих саватианах, повествуя, сице пишет: «Саватиане же. их вождаше некто Саватий презвитер, ереси убо той сый Наватовы, любочестием же еже на горшая, июдейски суботьствовати велит, пост в сию проходя, и иная приискренно о нем, якоже и латини ныне». Глава 2, перваго состава.
Темже и сих саватиан, яко туюжде ересь Наватову содержащих, по 47-му правилу Василия Великаго, повелевающему, такожде и в первой статии по показанным толковником его правил, соглашающихся еже воздержники, наватианы и прочия крестити, не летьствует обдержно крещение приимати. Сице же и по соборному изложению Филарета патриарха, за отменное от наватиан сих еретиков саватианов суботьствование, всяко долженьствует крестити, о чесом в вышшей десятой статии изъявихом.
Речеши ли, яко сии саватиане не в три погружения крещение свое совершаху. Но вопреки вам возглаголет Матфей канонист: «яко точно нам (сиречь правоверным) божественным совершаются крещением», якоже о сем впреди сего ответа изъявихом.
12.
О арианах еретиках, иже от Александрии.
Преподобный во иеромонасех Матфей Иеросалимский о сих еретиках и о начальнице их сице повествует [другий же Арий, иже от Понта. крещ. во едино погруж., яко в Потребнике сказуется]: «Ариане убо суть, иже Ариева мудрствующих, сей презвитер сый, иже во Александрии, Сына Божия и Святаго Духа не сущна издание всескверный предаваше». Состав а.
О сих убо еретицех арианех и прочих той же Матфей Иеросалимский объявляет, яко точно нам правоверным крещаются, якоже впреди сего ответа изъявихом. Обаче Афанасий Великий, патриарх Александрийский, в слове 3-м, на арианы пиша, и крещение их весма уничижает [Афанасий бе в лето 5872. во время же 1-го архидиякон бяше]. И не точию арианьское, но и прочих неправославномудрствующих еретик крещение похуляет, и не крещение, но паче осквернение быти вменяет. О чесом самая словеса сего вселеньскаго учителя на среду зде представляем, глаголемая сице: «Сии же бедствуют и от самой полности тайны, глаголюще крещении, аще бо во имя Отца и Сына дается совершение, не глаголют же Отца истиннаго, за еже отметатися из Него подобнаго существа, отметаютжеся истиннаго Сына, и иного себе, от несущих зданнаго, возтворяюще именуют, како не всеконечно тщее и неполезное от них даемое есть; притворение бо имущее, истинну же ни едину имущее к благочестию помощь. [Ниже:] многия убо и иныя ереси, глаголющыя точию имена, не мудрствующыя же право, якоже речеся, ниже веру здравствующуя имущыя. неполезну имут и от них даемую воду, скудствующую благочестием, якоже и кропящемуся от них паче сквернитися в нечестии, ниже избавлятися». Слово 3 на арианы.
Но и святый Григорий, богословию тезоименитый, сих еретиков ариан, обращающихся к соборней церкви, повелевает покрещевати, сице светлым гласом вопиет, глаголя: «Ныне же кая лесть благодати, паче же хотящих благодать, яко в Бога уверити и возъити безбожну, иному исповестися, и иному учитися, каковы словес, татьбы и льсти, иным вопрошением и исповеданием во ино не сущыя. увы светлости, аще по бани очерневаются, аще светльшия зрю, не у очищенныя, аще крестителя злославием коварствуюся, аще ищу лучшаго Духа и не обретаю, даждь ми баню вторую и о первой зле помысли». Слово 24 на еретики.
И паки той же Григорий Богослов явственно сказует, яко ариане погружающеся крещаются, сице глаголя: «Что глаголете погружающий или возгружающии, есть ли быти духовным без Духа, причащается ли Духу, нечествуя Духа; чествует ли воздаяние, и единоравное крещаяся несть». Слово 25, ко арианом.
Сей святый вселеньский учитель бе во время втораго вселеньскаго собора. Но и прежде сего собора дванадесяти лет, сущий христиане с Павлином епископом во Антиохии не приимаху крещеныя от ариан. Такожде и после сего втораго собора, спустя 37 лет, божественным откровением Порфирий епископ Газский, крестил некоего Навклира арианина, в корабли плывя. Чти о сем Барония лета 360, в Минеи житие святаго Мелетия февраля 12, Феодорита, Барония лета 401, в Минеи житие Порфирия Газскаго февраля 26.
13.
О еретицех аполинарианех.
Вышеименованный Григорий Богослов в толковании своем на символ веры едино имети указует православное крещение отметати повелевая, сице глаголя: «Сущее. Исповедаю едино крещение во оставление грехов. Толкование. Едино убо крещение зовется, веровати несовратне в Троицу единосущну, яже дастся нам от юности нашея. ина суть крещения, но различна, яже суть нам на вред души, тех же нам яко нечто нечисто гнушатися, яже суть арианьская и аполинарианьская. и та нам отметна имети, да не внидет гнилость в тело наше, яже губит душу с телом». Псалтырь древлеписменная, Афанасиева толкован. в конце псалмов.
Преподобный же Матфей Иеросалимский о сих аполинарианех в составе а, извествует, яко точно нам божественным совершаются крещением. Той же о мудровании начальника сих еретиков сице пишет: «Сей (Аполинарий) о смотрении явственно хуляще, глаголя Сына Божия тело убо одушевленно, ума же весма непричастно, от святыя восприяти Девы, яко божеству довлеющу вместо ума безсловесна, якоже души Господни мудрствуя, но и едино естество на Господе нашем уча». Состав а, глава 2.
14.
О еретиках маркионитах.
Тимофей, презвитер Великия церкве [Тимофей презвитер бе в лето 5945], на три части разделяя обращающихся от еретик ко святей церкви: на требующих святаго крещения, на не крещаемых, но муром святым помазуемых, на ни крещаемых, ни помазуемых, но проклинающих точию свою и всякую ересь, определяет от маркионския ереси обращающихся ереси точию проклинати, глаголя тако: «Ни помазуемии ни крещаемии, но точию проклинающий своя ереси суть сии: мелетиане: [Ниже:] маркионите, иже от Маркиана Трапезонтянина. и месалиане: и прочии». Кормчая, лист 634 на обор.
Но толкователь всех правил Алексей архидиакон [быв по 7-м всел. соборе], в толковании 1-го правила Василия Великаго, сих маркионитов сведе в чин крещаемый, идеже пишет тако: «Маркионити же суть, мессалиане, иже и молебницы сказуются, иже многоглаватую и многоименитую ересь имеют, сии убо от ереси своея обращающеся, и к непорочней вере приступльше крещаются: понеже отвержено есть нами крещение их». Кормчая, лист 225. Сих убо маркионитов повелеша отцы покрещевати, не того ради, якобы не трипогружательне крещаются, никако. Ибо они не исчисляются между еретиками, в крещении погрешающими, их же вышеименованный Тимофей презвитер изчисляет. Но како бы оный же Тимофей презвитер положил сих маркионитов в третий чин, аще бы было их крещение не трепогружательно; ниже. Темже отвсюду познавается, яко сии еретицы не за качество крещения, но за качество ересей крестити повелешася.
О начальнице же сея ереси Бароний в лете 146 сие повествует: «В сие лето воста зело вредителей еретик Маркион от Понта [Трапезон бо град при Понте суть, якоже о нем Тимофей презвитер рече]: иже (глаголет Епифаний) имеяше отца епископа, и в чистоте пребывая, некую девицу прельсти и с нею падеся. о сем, егда был от отца проклят, отчаявся, восприя учение проклятаго Кердона, и хотяше утвердити ересь о двух богах, о злом и добром, и яко злый бог ветхий закон даде, благий же новый завет устави. брак хуляше, и брачным не обещаше спасения, и прочая». Лист 99.
15.
О еретицех уалентианех и прочих.
Вышеименованный Тимофей, презвитер Великия церкве, повелевает еретиков уалентиан, приходящих к христианстей вере, покрещевати, сице глаголя: «И манихеяны же, и уалентианы, и маркионисты, и от подобных им ересей приходящих, яко еллины приемлюще покрещеваем». Кормчая, лист 635. Киих уалентиан еретиков повелевает Тимофей покрещевати, не крещения ради, во еже бы не треми погруженьми крестишася. Ни: но ересей их ради. Еже явственно показуется от толкования на первое правило Василия Великаго, в нем же тако глаголет: «Уалентиане же, телесем отрицают воскресение, и ветхий завет отмещут: пророки же почитающе, и на свою ересь тех пророчества толкующе, баснословия некая слагают, и Христа снебес снесша плоть глаголют, яко сквозе трубу прошедша святую девицу: и ина некая такова хулная блядут».
Их же и святый Василий Великий повелевает в первом своем правиле ересей их ради покрещевати, якоже явствует Алексей Аристина в толковании его правила, сице глаголя: «Сии убо от ереси своей обращающеся, и к непорочней вере приступльше крещаются: понеже отвержено есть нами крещение их». Кормчая, лист 225.
16.
О еретицех пелагианех и келестианех.
Той же Тимофей, презвитер и сосудохранитель Великия церкве, ертиков келестиан, иже от Пелагия и Келестина приходящих к соборней церкве, повелевает покрещевати. О них же пиша в различии о приходящих от ересей к благочестивей вере, сице глаголет: «И крещаемии убо суть сии, таскудрудити: маркионисте, рекше артотирите: вретищницы, и апотактите: [Ниже:] и иже от Пелагия и Келестина». Кормчая лист 634. Сим последующих повелевает покрещевати, не того ради, якобы не треми погружении крещаются, но ересей их ради. Якоже свидетельствует Матфей Властарь, глаголющь сице: «Келестий же ученик Пелагия некоего мниха, беста же оба Карфагена, якоже Константина града Фотий споведует, новейшая привождаху предания: смертна бо создана быти в начале Адама прилежаста, а не от отступления сего осудитися. новорожденным младенцем не требовати крещения, не бо обносят прадедняго, еже от Адама греха, место же быти посреде рая и муки, в нем же просветитися недоспевшым младенцем, представляемым блаженне жити. сия и иныя шесть приискренния сим главизнам сущий о Пелагии и Келестини вероваху, ихже и сей вселенский (третий) собор анафеме предаде, но убо и в Карфагене собор». Глава 2-я, перваго состава.
17.
О еретицех евтихианех и диоскорианех.
Той же Тимофей, сосудохранитель Великия церкве, еретиков евтихиан и диоскорян, приходящих к благочестивей вере, повелевает покрещевати, сице глаголющь: «Несторианы, и евтихианы, и северианы, и иже от подобных им ересей: подобает им творити записания, и проклинати свою ересь, и Нестория, и Евтиха, и Диоскора, и Севира, и прочая началники таковым ересем, иже тех мудрствующыя, и вся яже прежде воспомянутыя ереси: и тако восприимати им святое крещение». Кормчая, лист 635.
Можно ли рещи зде, яко сии вси вышепомянутыя еретицы не трипогружательне крещаются; аще бы тако крещалися, почто шестому вселенскому собору приимати под муро; почто и сему Тимофею презвитеру, выше во изъявлении, сих под проклятие приемлющихся еретиков степень вместе сообщите; яве убо, яко в три погружения крещаху.
18.
О еретицех несторианех.
О сих убо еретицех выше засвидетельствовахом от Тимофея презвитера, вместе с евтихианами повелевает восприимати святое крещение, якоже в Кормчей на листу 635 показуется.
Матфей же канонист о их ереси поведает, сице глаголя: «Несторий убо, патриарх Константина града, проста человека глаголаше Христа, соединитися ему по любовному одержанию Сыну Божию, егоже ради ниже Богородицу святую Деву именоваше». Глава 2, перваго состава.
19. О еретицех северианех.
Такожде и о сих еретицех выше у Тимофея презвитера упомянуся, яко им сообщительне с евтихианы, диоскорианы и несторианы по проклятии ересей святое крещение повелевает восприимати. Кормчая, лист 635 на обор.
И сих еретиков севериан, никто не может вопреки рещи, яко бы не трепогружательне крещаются. Не буди: но ересей ради. Понеже ересь их есть отрасль ереси Евтиховы и Диоскоровы. О чесом свидетельствует Матфей Властарь, сице глаголя: «Севир же Антиохийский епископ бе, не по чесомуже менший в нечестии Диоскора и Евтиха, сего ради и от православных от престола вкупе и из града изгнан бысть. Александрии же достиже, идеже и книгу списа, всякаго исполнену нечестия, в ней же отметаше убо иже в Халкидоне четвертый собор, укрепити же покушашеся предающую ересь, едино естество на Господне совокуплении». Глава 2, перваго состава.
20.
О еретицех арменех.
Святый Иоанн митрополит еретиков армен, приходящих к соборней церкви, повелевает паки крестити, иже глаголет тако [Кормчая старописменная]: «Темже проявлено, яко крещение их, и вся яже от них содеваемая, не приятна и непотребна суть, аще и тщатся несмылении и неразумнии, и неутвержении, и лживии христиане, яко истинна и благоприятна творят деяния их. аще бо вера права и благоприятна есть, да будет и крещение их приятно, аще же вера их неприятна есть, како крещение их приятно». В слове обличительном на армены.
Но и святейший Филарет патриарх в соборном изложении сих армен такожде засвидетельствует второе крестити, идеже тако глаголет: «Сии извержении и проклятии мелхиседекияне убо и жидове и армени равну ересь в себе содержат, еже в суботу постятся, от нихже кто восхощет быти в православии нашего християнскаго закона, и сих святая правила повелевают совершенно крестити святым крещением». Потребник Иосиф, велик., глава 1, лист 565 на обор.
Такожде засвидетельствует в чине отрицания от армен приходящих, которой напечатан есть в Потребнице Филарета патриарха в лето его патриаршества 6-е. Идеже сице отрицаяся глаголет: «Аз имярек иже от армен днесь прихожу к вере христианстей. [Ниже:] отрицаюся всея арменския веры и мудрования. [Ниже:] и еже шихове их убрус носят на шиях своих, и святое Христово крещение с чистою и нелукавною душею и сердцем, и верою прилежною прошу прияти». Глава 74.
Засвидетельствует же и в книзе Кирилове, на листу 269 на обор.: «(яко арменове) аще где будут в правоверных христианех, то свою веру проклинают, а от наших попов крестятся».
Темже от сих множайших доводов засвидетельствовася, яко не точию в древлевосточней церкви еретицы арменове второкрещахуся, но и в древлероссийстей церкви без второкрещения в церковное приобщение не приятии быша. Но речеши ли, сих еретиков, не трепогружательное имеющих крещение. Но мы якоже от древлевосточныя церкве времене, тако и от нынешняго самаго настоящаго засвидетельствуем, яко еретицы арменове крещаху и ныне крещают в три погружения. О чесом желаяи известитися, да вопрошает ныне имеющихся армен по России, яко всяко рекут о себе, что в три погружения они крестят. От древлевосточныя же церкве засвидетельствуется отселе, яко арменове в три погружения свое крещение совершаху: понеже ови древле крещаху сих, овии же под миропомазание приемляху, якоже Тимофей презвитер в Кормчий на листу 636 указует.
Но и порождение их ереси изыде от трипогружательное крещение имеющих, си есть евтихиан и диоскориан еретик, якоже пишет в книзе Кирилове: «Исперва убо армени бяху с нами в соединении и в православней вере, до святаго четвертаго собора вселенскаго, иже в Халкидоне святых собравшихся 630. потом же отвергошася от святыя соборныя церкве и от православныя веры, впадше в ересь Евтихиеву и Диоскорову». О арменстей ереси, глава 30. И во иныя тмищныя. О чесом засвидетельствует Тимофей, презвитер Великия церкве, сице глаголя: «Тии же и тмами в ереси впадше, и от соборныя церкве отчуждившеся, и от кесарийския церкве поставления не приемлюще, како не суть всячески не священнии и без рукопоставления; и иже от них крещаемии, отнюд язычницы некрещени». Кормчая, лист 636 на обор.
21.
О еретицех древле латынех.
Кроникарь Бароний, римския церкве заступник, пишет в лето Господне 1054, яко тогда грецы латин и прочих вторицею крестиша. О чесом в самей своей летописней книзе поведает, Гумберта кардинала издавша клятвы на греческаго патриарха Михаила, в них же сице глаголет: «Яко ариане вторицею крестят, уже крещенных во имя Святыя Троицы, наипаче латин». Еже и во изданней на Москве Бароний в лето 1719, согласно обретается. Еже и на поле напечатася: «грецы древле латин вторицею крестиша». Лист 1219 на обор. [1119?]
Возглаголеши ли, яко латины и тогда, си есть в 54 году по тысящи лет, уже не трепогружательне крестиша. Отсловствуем сице: Аще бы латины тогда не трепогружательное крещение имели, то бы усерднейший ревнитель по благочестии, и зельнейший обличитель латин Михаил, патриарх Константинопольский, подробну описывающ латинския ереси и до малейших заблуждений, не бы премолчал важнейших, си есть о погрешении начальнейшей тайне крещения. Понеже не потаи и сие, еже римских епископов перстней ношения: кольми бы паче не потаил римлян погрешение в крещении, которая есть из таин есть первая тайна. Аще той же Михаил патриарх хуление на тайну брака священническаго не премолче, паче бы не премолчал о не трепогружательном крещении, яко апостольским правилам противном. О чесом изволяяи ведать опасно, да прочтет Барония, лето Господне 1054, лист 1220.
Темже явственно показуется, яко тогда еще латины, согласно грековосточней церкви, в три погружения свое крещение совершаху: но последи онаго времени в них крещение единопогружательное и поливательное помалу нача являтися. якоже преподобный Никон Черногорец, бывый после оных лет в 180-м годе (то есть в 26 лето после Михаила патриарха описания ересей), взем от послания Петра Антиохийскаго не соборне, но от неких частне уведомившася, яко не в три погружения латины крещают, о чесом тако пишет: «Слышах же (рече) от неких, яко арианствуют, в едино погружение крещающе». Книга Тактикон, послание 40.
Зри, яко и тогда, сиречь во время Никона Черногорскаго, едино точию слышание народное о латинах происхождаше, яко не в три погружения крещают, повсемественнаго же и известнаго уведомления не бяше. Обливательное же крещение, в латинах действуемое, еще того после от учителей восточных известися. Якоже святый Симеон Фесалонитский в книзе своей извествует сице: «Крещение (латины) ниже бо в трех погружениях, но обливанием действуют и без мура». Глава 20.
Но подлежащий Константиноградскому престолу в митрополиях еще до тысящнаго году от воплощения Божия Слова латин вторично крестили.
Понеже, по свидетельству всероссийскаго летописца преподобнаго Нестора Киевопечерскаго, князь Владимир приял веру древлевосточную, и крестился со всеми присудствующими в Корсуне в лето воплощения Божия Слова 988-м.
И отселе до Никона Черногорскаго, без мала сто лет предварше, крещение Владимирово обрящется: обаче древлероссийстии пастыри от лет князя Владимира вторично латын крестиша. О чесом святейший Филарет патриарх, извествуя Ионе, Сарскому и Подонскому митрополиту, не повелевшему крестити вторично ляхов, тако глаголет: «От лет убо (рече) приснопамятнаго, и святаго великаго князя Владимира, иже просвети всю великую Русию святым крещением, от грек прием, и даже до днесь по лето, седмь тысящ сто двадесять осмое, никтоже в нас не дерзнул сотворити таков соблазн еретичества, кроме Игнатия извержаннаго патриарха и тебя». И паки [ниже]: «такоже как и Московское государьство учинилося (то есть от лет Владимировых), и от того времене, и по се время того не бывало в Московском государьстве, чтобы еретиков латин, и иных различных вер еретиков не крестили, кроме изверженаго из святительства Игнатия патриарха». Потребник, лист 565.
И от сих предложений познавается, яко аще и привниде в латины не трепогружательное крещение, но последи описания ересей латинских Михаила патриарха. Темже явственно отселе зрится, яко тогда древлевосточнии латин ересей ради крестиша, а не погрешительства в материи и форме крещения.
22.
О белорусцех униатах, приглашающих имя папы римского в своих службах.
Святейший Филарет патриарх, самобывш в тамошних пределех, идеже сии белорусцы обретаются. Той убо богомудрейший всероссийский архипастырь, описуя тех все подробности, не премину и о сих белорусцех изъявити, кия крещающии суть в христианскую веру, а римскаго папы имя в своих службах приглашающий: киих он повелевает паки совершенно крестити в три погружения. О них же сице глаголет: «И которыя иноземцы, егда биют челом о крещении, в православную веру, крещены в християнскую веру греческаго закона, а в крещении у них обливают, а муром и маслом помазуют. а иныя скажут, что они в греческую веру крещены в три погружения, и муром и маслом помазаны. [Ниже:] А который белорусец скажет о себе, яко ерещен он в християнскую веру, а которой поп его крестил, и тот поп в божественной литургии в приношении и во ектениях, в первых поминает римскаго папу, да и во всяком пении во ектениях и в литиях молит Бога за папу, и таковаго подобает совершено крестити в три погружения, и муром и маслом помазывати, да и латыньскую ему ересь и папежев римских еретиков проклинати». И паки о сих же белорусцех ниже: «А который белорусец скажет, что был он выной вере, и пришол изыной веры в совершеных летех, и крестился в християнскую веру в Литве от русскаго попа, а тот поп, которой его крестил, молит Бога за папу, и таковаго совершенно крестити. и латыньское и еретическое отрицание ему говорити. и молитвы все говорити, и младеньческое отрицание такоже, что и еретику, для того, что крещен от отступника, которой молит Бога за папежа». Потребник велик., глава 71, лист 588 и 589.
Зде убо внимание не малое иметь должно о сих белорусцех. Понеже между чтущих правила о них многое имеется несогласие, овии сих глаголют быти совершенно отступивших к латиньству, и все латинския обычаи и ереси восприявших: друзии же тем вопреки глаголют, яко сии белорусцы точию имя папино в своих службах имети по понуждению обязашася, в прочем же оставлени быша, якоже при восточныя церкве мудровании, тако и при своих прежде бывших действиях и церемониях: а крестити сих Филарет патриарх повеле за едино помяновение в службах римскаго папы.
Тако убо любопрящеся обе сии страны о сих белорусцех, непщуют. Но аще последний и склоннее ко истине обретаются: но еже за едино богомолие за папу повелеша точию крестити Филарета патриарха умствующе, в том видятся погрешают, якоже предлежашия объявят доводы.
1: Показуются сии белорусцы по сему быти несовершенно во всех ересях и обычаях к римскому приставше костелу, яко крестиша в греческую христианьскую веру. Аще бы совершенно и нелицемерно во всем бывше приступили, не быша в греческую веру крестили: но яве бы в латинскую, а не в греческую.
2: Аще бы были сии белорусцы совершенно во всех обычаех приставший к римскому костелу, не бы было в них миропомазание: понеже нецыи белорусцы и при обливании миропомазание имели: понеже латиняне вместо мура слиною крещающихся помазуют.
3: Аще бы совершенно были приставше сии белорусцы к римскому костелу во всех действиях и церемониях, не быша были поминающе в первых имя папы римскаго: яве, яко во вторых и восточнаго патриарха поминали, понеже папа во своих сущих церквах, взаимно восточных поминати не терпит.
И от сих вышепредложенных доводов является, яко сии белорусцы самыя быша униаты, еже есть отступницы от восточный церкве, о них же книги О вере творец во главе 23 извествует. Им же от папы римскаго попущено ради прелести и обману во всех пребывати действиях и церемониях, якоже нижеследуемыя изъявят свидетельства.
1: В самом изложении Филарета патриарха выше во описании изъявляет, яко сии быша униаты, идеже сице пишет: «А в которой у них церкви, аще она и християнская есть, а молят Бога за папу, и таковая церковь у них нарицается унея, и по их же разсуждению толкуется, яко таковыя церкви, еже нарицаемии от них унеи, сиречь соединение, еже мирующиися и соединяющийся с папежники, и в тех их церквах, в нарицаемых унеях, еже есть в соединяющихся с папежники, и под паствою папы римскаго пребывающий митрополиты, и архиепископы, и епископы, и архимариты, и игумены, и протопопы, и попы, и диаконы, и инии причетницы мнози есть суть». Потребник великий, лист 586 на обор.
От сего убо свидетельства яве познавается, яко сии белорусцы быша униаты, си есть соединители с папежники, или к римскому костелу отступницы, якоже книги О вере творец в 23 главе доволно о них пишет: убо и крестити сих не за едино богомолие Филарет патриарх повелевает, но паче за их приложение к костелу римскому, или отступление. Якоже и в самом изложении Филарет патриарх глаголет: «Для того, (крестити) что крещен от отступника, которой молит Бога за папежа».
2: Явственне засвидетельствует Захария Копестинский, яко сии белорусцы униаты от папы римскаго оставлены быша во всех действиях, обычаях и церемониях непременными восточныя церкви, ради прелести и обману простых людей кафолическаго благочестия. О чесом в книзе своей, которая выдана из друкарни Острожской лета от Христа 1598-го, во главе 37 тако извествует: «Иже нынешних часов отступницы, до отступления удавшии, и случившийся с сопротивными, во всем веру костела противнаго приняли: толко себе поставу з верхнею и церемонии церкви нашея оставивши, дабы чрез то добре могли простых сыскивати и прельщати и обманути». Паки во главе 13 пишет: «То же подобеньство с нами в церемониях и в способе набоженьства имеют, что оным из Риму позволено, дабы могли простыи посполитыи народ прельстити. простыя вем до видимых церемонии привязуются, взираючи на отступных владыков и попов, иже церемонии или обряды в церкви давным извычаем отправляют, но потреба стрещися их, бо есть фалшивыя пророцы, о которых Исус Христос Избавитель наш рекл: стрежитеся от фалшивых пророков, который приходят до вас во одеяниях овчих, а внутрь суть драпежны». проч. И паки той же засвидетельствует от послания некоего к епископу унеяту: «Окроме иных доводов же в той вашей унеи, яко сам признаваеш, ничего вам а ни отъято ни придано: по старому все сохранено: только дабы есте упадши поклонилися, и за послушеньством хиротонии до Риму посылали, а особливе дабы есте себе очи и губы позатыкавши, науками их новым не пречили: или и свое державше, а их слишки познавали, албо недостатки накрывали». Той же Захария Копестинский засвидетельствует от Кирила, епископа Любортовскаго, о унеи: «Тая (рече) унея не может зватися ни латынская ни христианская вера: бо от церкви отступает, а до костела не прилучается во всем во единость. тая унея матку восточную лобжет, а мачеху западный костел лижет. тая унея пред очима папежника хвалит его веру, а заочне ганит, удаючися всюду лицемерно, тая унея все то приимет, яже святии отцы отметают вредное, и от церкви изгоняют». До зде Захария.
Подобие же сему пишет и О вере списатель во главе 23 о унитах сице: «Понеже вси вещи, иже суть свойствене, и истинно Христовы, и еретицы имут в раздрании, подобныя имут церкви, такожде святаго писания, подобныя епископы, и иныя в духовном чину клирики, подобное крещение, подобныя бескровныя жертвы, и ины вещи вси наипаче же самого Христа». До зде списатель О вере.
Темже от всех сих вышепредложении ясно познавается, яко сии белорусцы, аще быша и униаты, аще и отступницы к костелу римскому, но оставлени быша пребывати во всех действиях и церемониях восточныя церкве ради прельщения верных, и яко подобное имеяху правоверным крещение: убо зело удобопознанно изъявися, яко сии белорусцы в три погружения крещаху. Темже отселе спорующии обе страны объявишася, яко их непщевание о сих белорусцех сомнительно есть, паче же первых. Прочее же о всех белорусцех в 5-м разделе, во ответе 143 и в последующих пространнее изъявится.
23.
О неприятии от святыя церкве от всех еретик крещения.
Понеже святая кафолическая церковь, последуя святых апостол правилом, и первеньствующия церкве соборам и обычаю (аще и прия по смотрению от неких еретик, паче же рещи, расколник и подцерковник, по Василию Великому), не точию ради важных ересей трехпогружательнаго от еретик не приемлет крещения: но и от всех еретик крещение многими соборами и святыми учители церковными есть отвержено, о чесом зде на среду предлагаем.
Апостольскаго 68-го правила толкователь, архидиакон Алексей Аристина, сице глаголет: «Ибо от тех (еретик) крещении, не крещени: и поставлении, не причетницы». Оное же правило 68-е толкуя, преподобный Никон Черногорский тако о еретицех извествует: «От таковех бо (еретик) поставленом, или крещеном, ниже верном, ни причетником мощно есть быти». Книга заповедей Господних, слово 63.
Сие же правило изъясняя, преподобный во иеромонасех Матфей канонист о еретицех тако вопиет: «Разве аще от еретик хиротонию приял бе первее. отметаем бо таковых, якоже крещение, сице и хиротонию. не бо освящение се, но скверну веруем исходатайствовати». Книга Матфея Властаря, состав х [600], глава 14.
Святейший Филарет патриарх, приводя во свидетельство правило 19 1-го вселенскаго собора, еже всех еретик крестити, тако восклицает: «Правило перваго вселенскаго собора 19. И тако вси возгласиша купно, еже еретическое крещение, несть крещение, но паче осквернение, и повелевают таковых крестити святым крещением паки совершено». Потребник великий, лист 575.
И паки той же в чине от отвержения приходящих глаголет: «А иже второе крестити кого крещеннаго прежде от правоверных, вся правила отрицают, разве аще некто от нечестивых еретик крещен бысть преже. тех бо крещение, сквернение есть паче, а не крещение». Ниже, подтверждая же сие, глаголет: «Якоже о всех сих свидетельствуют божественная правила, святых апостол правило, 46 и 47. и вселенскаго собора 6-го правило 85. и собора иже в Карфагене правило 73». В толковании же 73-го правила сего собора тако глаголет: «Аще будет от нечестивых еретик крещен: тех бо крещение, сквернение есть паче, а не крещение». Кормчая, лист 149. И на листу 662 сие Карфагенскаго собора определение тако подтверждает: «Крещенаго от еретик паки крестити». Согласуя же всем вышеименованным определением, еже крестити всех еретик, афонстии отцы тако глаголют: «Аще агарянския дети крещени бывше от еретик от кого, паки крещаются и тии послежде, аще от произволения обратятся ко истинне». Правило 202.
Достоверно же всесоборне испытав правила святых апостол и святых отец о всех различных еретиках и о тех крещении, святейший всероссийский архипастырь Филарет убо едино определение положи, еже всех приходящих от различных еретических вер совершенно крестити в три погружения. Идеже тако утверждая глаголет: «Аз же по малей силе моей, елико благодать Святаго Духа настави мя, вседушно попекохся о сем, и правила святых апостол, и святых отец прилежно смотрях со вниманием, и истязовах со испытанием того ради, да уведят вси людие, всея российския земли, яко вси еретики, различных еретических вер не имут права святаго крещения, еже водою и Духом Святым, и того ради от всех еретических вер различных приходящих к православию, христианьскаго закона, подобает совершено крестити». Ниже, изъявляя же обычай непременный древлероссийския церкве, глаголет: «Такоже как и Московское государьство учинилося (си есть от лет князя Владимира), и от того времене, и по се время того не бывало в Московском государьстве, чтобы еретиков латин, и иных различных вер еретиков не крестили». Потребник великий, лист 561 и 565.
В Катихисисе же велицем явственне такое же, якоже от правоверных предаемое, от еретик крещение, нечестивым и неправым нарицает сице: «Поистинне ничтоже (у еретиков) несть истинно, но все же убо, еже еретицы творят, от смышления своего, како могут совершати действа Божия на игралищах своих; аще и Христа проповедают, и веру свою похваляют, но вся сия льстиво и лживо творят, аще и церкви своя, и клирики церковныя, и писания божественная почитают, и мнятся еже тем же крещением крещатися. [Ниже:] вся же сия не тако имеют, но инако и нечестиво. [Ниже:] Сего ради разумети имамы, яко еретическая писания и празднества, и службы, и тайны, и проповеди не суть правы». Глава 4.
Зри убо, о вопросителю, коликих и каковых еретиков, от ересей своих обращающихся ко истинней христианстеи вере, якоже треми погружении, тако и от всех еретик крещеных, священнии отцы священными своими правилы, и богопросвещенными соборы, и поучительными словесы, всячески повелевают второе святым крещением от скверн еретических очищати. и не токмо сих: но и агарянских детей, иже от православных священников святогреческаго закона трипогружательне крещенных бывших, но яко не благ залог имущих, и прибегающих от агарянскаго своего их нечестия ко святей соборней апостольстей церкви, повелевают паки совершенно святым крещением крестити, о чесом в предлежащей статии изъявится.
24.
О агарянских детех, крещающихся от невольствующих священников.
Севаст Константин Арменополь, номофилакт и судия Фессалонитский, о сих агарянских детех сице свидетельствует: «Знамение синодальное в царство Комнина господина Мануила, патриарху сущу Луце. [Ниже:] Во дни же святейшаго патриарха господина Луки, предсташа агаряне синодально, и испрошаеми креститися, испроси ми како; отвеща: яко обычай есть всем младенцем агаряньским крещатися от православных иерей, но не прияшася, услыша бо, яко от неверных искомое от християн крещение, не залог благ и произволение православное ищется, но лечбу телесную, возмнеся убо у агарян чадом их бесноватися и потом смердствовати, аще не крещение получат христианское: и оттуду не яко чистителя всякия скверны душевныя, и света божественнаго и святьбы подателя воспрошают, но яко бальство, или напевание. нецыи же из них матери реша имети православныя, и от тщания сих креститися им от православных, но ниже сии услышашася, яко не предсташа свидетели, сие самое свидетельствующий, паче убо и осудишася, яко не благое предприятие дающе на себя, во еже приходити к вере православней, темже и попустися всячески сим креститися». Книга 3, знамение синодално 12.
Согласно сему и Матфей Иеросалимский о агарянских детех поведает, глаголя: «Видети есть и во глубоцей тме агарянскаго злочестия свет насилуем благодатный, и от тоя не объемлем или убежаем. понеже знамение ниже верным возбранено бысть, возводяще сих к божественному помазанию, обычай бо есть от агарян многим на первее обрезовати своя младенцы, прежде даже убо под властию их христианстии священницы, и неволею понуждени будут сия крестити. взыскание убо бысть о сем на соборе, иже в царствующем граде, Луце божественному патриаршеский правяще престол, аще подобает таковая истинней христианьстей вере приступающих покрещевати, или токмо муром помазовати; и суждено бысть, сих непрекословно паки крещати. имже бо измышася крещением, не мыслию благочестивою, но аки чарование или обаяние некое сия прияша». Глава 3, втораго состава.
25.
От ложно сотворшихся священник крещенных.
Не токмо же божественнии отцы агарянских детей, прежде крещеных от благочестивых священников, но и от неосвященных, ложне сотворившихся священниками, крещенных повелевают отнюд покрещевати. Сице глаголет Матфей Иеросалимский в книзе своей: «Взыскано бысть и се, Ираклийскому вопрошающу Мануилу, аще подобает приимати яко верна, егоже несвящен крестил есть священник, ложне сотворився; се бо в пределе его тогда приключися. и суди собор и сим покрещеватися». Глава 3, втораго состава.
Согласно сему и кир Симеон Солунский от неосвященных, лицемерящих же ся священниками быти, крещеных повелевает покрещевати, сице вопия: «Аще ли нецыи попущением Божиим в толикое приидоша дерзнутие, яко еже неверие и злочестивне (неверие бо вещь таковая, еже кроме священьства прияти хиротонию) священная действовати. несть слово рещи о осуждении сицевых: сие бо дело горше есть и самех тех нечестивых бесов, но не сущих, и Божие убо лицемерствующих, безбожных сущих, и противных Богу, таковии не токмо велие и неисчетное томление подъимут, на божественная сице зле похуливше, ниже бо гласи божественнии от них, ниже божественная дела, понеже благодати рукоположения не имут, но и месть приимут иную за прельстившихся от них, или негде крещеных, или рукоположеных. сии бо не хиротонисаны ни крещени суть, ничто бо дает не имеяи, никтоже приемлет что от неимущаго, аще и мнится имети. темже и прельщен бысть, веруяи быти священник, или крещен несть, и погибели сих крестивый повинен, не может бо человек имети не прием от Бога, кроме Мене, рече, не можете творити ничтоже». Номоканон Иоасафов печ., лист 57. Ответ 1 кир Симеона Солун. кор. 11, зач. 191.
Сего ради и святии отцы афонстии, от неосвященных, сотворивших же ся ложне священными, крещенных повелевают покрещевати, сице вопиюще: «Второкрещаются паки, иже ложне творящеся, поистинне же не суще священницы, крестиша». Правило 203.
Но что много глаголати; что много изчисляти; не токмо бо священнии своими правилы отцы: не токмо святии церковнии архипастыри вселенскими и поместными соборы, якоже от еретик первее крещенных трипогружательне, тако и от всех еретик, приходящих к соборней церкви, повелевают паки крестити: не токмо агарянских детей, вначале от православных священников крещеных, таже живших в своем махометаньском законе, и паки обращающихся ко истинней вере от ложне лицеприемших на ся священства крещеных законополагают воскрещевати: но и тех самех, иже в младеньчестве от православных священников крещени быша, младеньческаго же ради возраста недоведят, аще крещени быша или ни, ниже имут извествующаго им, яко крещени быша, повелевают всячески второе крестити, да не како недоведения ради нази будут божественнаго просвещения. Сице божественнии отцы собора, иже в Карфагене, священным своим правилом вопиюще повелевают: «Не разумевающих, аще крещени быша или ни, годе есть крестити, да не како двоеразумием лишатся божественнаго очищения». В толковании: «Аще кто от правоверных сумнится, и недовесть аще крещен есть или ни, ни сам того свесть младенческаго ради возраста, и иного не имать извествующа ему, и свидетельствующа воистину, яко крещен есть, таковаго без сомнения крестити подобает, да не размышления ради лишится божественнаго очищения». Правило 73.
Подобие и 6-го вселенскаго собора отцы повелевают, глаголюще: «Иже не ведят, ни послух же не имут, яко крещени быша, да крестятся». Толкование: «Елицы не ведят, аще во младенчестем возрасте крещени быша, не обретают же ся ни послуси нецыи достовернии, без извета тех извествующе, аще крещени суть, без всякаго претыкания да крестятся». Правило 85.
Подобие же протолкует сии оба правила преподобный Матфей Иеросалимский, сице глаголя: «Осмь десять и пятое правило шестаго собора еще же и 73 Карфагенскаго. сомнящиися младенцы, аще божественнаго получиша крещения, ниже сим ведущым возраста нечувствием, ниже иных известие свидетельствующих, без сомнения повелевают крестити. аще бо едино исповедати крещение, от божественнаго изображения научими быхом. но понеже Господь рече: аще кто не родится водою и Духом, не может внити в царство небесное, убоимся, да не лишимся божественнаго крещения, прикладным к духовному браку, не облечен одеянием чертога, вкупе и брака извержен будет, лепо есть во имущих сомнения побеждати человеколюбие несомненное». Глава 1, втораго состава.
Сим всем согласно и святии отцы афоньстии повелевают сомнение имущих, аще крещени быша или ни, покрещевати, вопиюще сице: «Елицы не знают аще крестишася, от пленения негли, или от инаго недоумения, и никтоже да известит их опасно, да крещаются паки, по 73-му правилу, иже в Карфагене святаго собора». Номоканон, правило 203.
Воньми убо, истязателю, колицы и какови светила церковная, столпи благочестия и забрала благоверия, яко же глаголем, святии апостоли, тако и богоноснии отцы, елицы во время первенствующия церкве, толицы и послежде, сколь светло живописательными своими гласы вопиюще в священных своих правилех, не точию без изъятия от всех еретик, получивших крещение, приходящих ко истинней християнстей вере, повелеша крестити: но и от православных же священник агарянских детей, не с благочестивою мыслию крестившихся, к сим и не освященных, ложне священниками сотворшихся, крещеных: еще же и от благочестивых иерей крещеных, не сведящих же совершенно, аще крещени быша или ни, ниже имущих свидетелей, яко крещени суть: и таковых повелевают безпрекословне второе, яко некрещенных сущих, крестити.
Убо кольми паче, по вышепредложенным премножайшим свидетельствам, без всякаго прекословия летьствует от еретик обращающихся к православию ересей ради, аще и трипогружательне имущих крещение, совершенно крестити. Верно есть сие слово, и всякаго приятия достойно.

Раздел, 4.
Святая правила вселенских и поместных соборов и святых отец, не еже точию ради не трехпогружательнаго крещения от еретик приходящих повелевают второе крестити, но обновления ради и важных и многих вин.
Понеже аще и доволне в прешедшем разделе изъявихом, яко и трехпогруженцов еретиков, но ересей ради, святая церковь второкрестити повелеваше: но в сем убо настоящем разделе явленнейше предлагаем, яко не единаго ради не трехпогружательнаго крещения, но и важных ради вин, и возобновления первых еретиков ересей, второе крестити повелевается, якоже нижеследующия явят свидетельства.
В книзе Кормчей, во главе 5-й, и на листу 40-м пишет о еретицех павликианех сице: «Павликиане нарицаются, иже от Павла Самосатскаго приемше ересь, иже смиренная о Христе мудрствовавша, и проста Того человека быти проповедавша, и начало не от Отца прежде век, но от Марии приимша». Сих убо павликиан выше в 19 правиле перваго вселенскаго собора повелевает второкрестити, идеже сице глаголет: «Павликиане покрещеваются». В толковании: «От павликианския ереси приходящий к соборней апостольстей церкви, да покрещеваются второе: первое бо крещение, не крещение, понеже еретическо бе». До зде от правила.
Зри убо, не рече в сем правиле, яко сих еретик подобает не трех ради погружательнаго крещения крестити. Сего бо нигде не обрящеши, чтоб еретицы павликиане не в три погружения крестили. Но яве, якоже выше изъявихом, ереси ради вящьшия крестити сих святии отцы повелевают: о чем и в вышшем разделе, во второй статии изъявится.
Убо святая церковь непреложный имеет предел, не точию ради не трехпогружательнаго крещения, но и для ересей, приходящих второе крестити.
Поместнаго собора, иже в Лаодикии, святии отцы в 7-м правиле еретиков фотиниан тако приобщати к святей церкви повелевают: «Наватиане и фотиниане и четыренадесятницы, сии еретицы, аще инех ереси не прокленут, и с теми и свою, неприятии, аще же прокленут, помазани муром, да приобщаются». В толковании же Алексея Аристина, сих фотиниан, за обновление великих ересей, полагают в чин, требующий святаго крещения, идеже сице пишет: «Фотиане же, святаго и спасенаго крещения требуют, рекше, да крестятся, началник бо их Фотин, многи ереси обнови, и Павла Самосатскаго ересь: и Савелия Ливийскаго, и монтанову. не безначална глаголаше Божия Слова, ни Творца веком всем, ни первейша всея твари суща, но млада и нова, и начало бытию приемша, от плотскаго рожества еже от девы». Кормчая, лист 73.
Зде убо зело явственне показуется, яко не повреждения ради формы крещения сии еретицы от толкователя священных правил сведошася из миропомазания в требование святаго крещения, но обновления ради вящших ересей. Понеже не ученицы сего ересиарха Фотина обновиша сии ереси, но сам Фотин, их учитель. Обаче Лаодикийский собор, которой после сего бяше ересиарха, под миропомазание положишася. Аще бы не в три погружения было у сих крещение, не бы святый собор под миропомазание суди сих еретиков приимати. Когда же усмотрися толкователем, яко оных ереси, обновленныя начальником их, приобщаются первейших еретиков ересем, тогда и в требующий чин святаго крещения определяет оных: которой толковщик бяше уже по прошествии седмаго вселенскаго собора. Но и прочий описателие еретиков: Тимофей презвитер, Иоанн, митрополит всероссийский, такожде в требующий чин святаго крещения сих фотиниан полагают: о чесом в Кормчей, во главе 70, на листу 634: в Потребнике велицем, во главе 7, на листу 581 на обор, явствуется.
Гряди убо, и святых отец правила представим ти: яко и тии, за приложение к величайшим и многим ересем, повелевают совершенно в три погружения крестити.
Вселенский учитель Василий Великий, воздержников и прочих еретиков, в первом своем правиле, по смотрению прият крещение, и повеле точию муром помазати: в правиле же 47-м, исправив смотрительное, и повеле воздержники и прочия крестити, зане тех ересь усмотри быти отрасль маркионитския ереси. О чесом самое тое правило с толкованием представляем, сице глаголющее: «Воздержники, и вретищники, и апотактиты, да крестиши, аще бо и глаголют, яко во Отца и Сына и Святаго Духа крестихомся, но понеже злу творца Бога нарицающе, хулят по Маркионову учению, не крещени же, не приятии». Толкование: «В первем убо правиле своем, по смотрению словесе воздержник и наватиан, глаголемых чистых, великий сей светильник церковный, прият крещение, и повеле токмо святым муром помазовати их, егда приходят к соборныя церкви вере, и ереси своя проклинают, зде же исправляя еже по смотрению, онамо прият, повелевает воздержники, и прочия крестити: понеже ересь их, отрасль есть маркионитския ереси, ненавидят бо сии, якоже они брака, и отвращаются вина, и тварь Божию скверну быти глаголют». Кормчая, лист 239.
Подобне же и Тимофей, презвитер и сосудохранитель Великия церкве, приложившихся к величайшим ересем, изъявляет святыя церкве устав непреложный, еже таковыя покрещевати. О чесом во изъявлении своем о различии ересей тако пишет: «О приложившихся к павликианстей ереси, таже прибегших к соборней церкви, устав изложен бысть, еже покрещевати их по всему». Кормчая, глава 70, лист 635.
Священномученик Дионисий, яко не вня важности ереси, прият Монтана еретика крещение. Но святый Василий Великий, добре разсмотрив, и зазре оное приятие, яко не разсмотренно содеянное: о чесом Нил Селунский во главе 32 засвидетельствует.
Зри убо, аще бы Монтан не в три погружения крестил, не бы Священномученик Дионисий приял того крещение. Убо и Василий Великий зазре Дионисиево приятие, не яко не в три погружательное крещение (поелику Дионисий не не ведяще апостольских правил, отнюд заповедающих отметати не в три погружения действуемое крещение), но яко обрете в самем Монтане величайшую ересь. Дионисия же, оныя не разсмотривша, но яко трипогружательное крещение прявша, Великий Василий зазре. И от сего яснейше зрится, яко святыя церкве учители не на едино взирающе неисправное крещение, но и на тягчайшее прегрешение еретиков, крещение их отметати повелевают.
Согласно убо вышепредложенным собором и святым учителем церковным творяше и всероссийский архипастырь, святейший Филарет патриарх со всем своим освященным собором, еже приложившихся оных белорусцев к римскому костелу, и имя папы римскаго вместивших в поминовение во все службы церковныя, ради же прелести и обману простых и неученых, оставленных от папы во всех действах и церемониях восточных и в подобном крещении. Обаче святейший патриарх, почитая тех ложное притворение ни во что, повелевает таковых непременно паки крестити в три погружения, точно яко латынян. О чесом в вышепредложенном разделе, в 22 статии о сих белорусцех доволно засвидетельствовахом.
Сей же благоревностный страдалец и истинный пастырь всероссийския церкве, ревностию Илииною подвижася на Иону, митрополита Сарскаго и Подонскаго, повелевшаго не крестити двух ляхов латиньския веры, собра всеосвященный собор, и засвидетельствова киих и каковых ради вин не подобает от латинския и от прочих вер приходящих вторично крестити.
1: Аще в суботу постятся, и сея ради вины всех еретиков повелевает крестить [Потребник вел. лист 567].
2: Аще праздник Пасху превращают, и сея ради вины всех еретик повелевает крестить [Там же лист 569 на обор.].
3: Аще по манихейски по планетам веруют, и тоя ради вины всех еретик повелевает крестить [Там же лист 572].
4: Аще не в три погружения крещают, и сея ради вины всех еретик повелевает крестить [Там же лист 572].
5: Аще грехи прощают без епитимей, и сея ради вины всех еретик повелевает крестить [Там же лист 574].
6: Аще Духа Святаго на два начала разделяют, и сея ради вины, как латин, так и всех еретик повелевает крестить [Там же лист 572 и 576].
Таже и сице прирек: «Да и многих ради вин довлеет от латинских и от инех различных еретических вер приходящих ко благоверию, крестити совершено. понеже прияша в закон свой многочастных различных ересей предания», и прочая [Там же лист 575].
Темже от всех вышепредложенных свидетельств показуется, яко не за еже точию не трепогружательнаго крещения святыя соборы и святии учители церковнии повелевают еретиков крестити, но и важных ради и многих вин. И не точию самых тех еретиков, но и обновляющих оных ереси, или отрасль имущих. Убо святокафолическая церковь непреложный предел имеет, якоже за не трепогружательное крещение, тако и за вящшия ереси, вторично всех еретиков крестити.

Раздел, 5.
Святая кафолическая церковь не непреложный же имеет предел, еже втораго или третияго чина еретик не крестити: но иногда единех и тех же приемлет под проклятие ересей, иногда же и под миропомазание, а иногда тех же и совершенно крестить повелевает.
Святыя древлепервенствущия, яко западныя, тако и восточныя соборы всех еретиков и расколников повелеша крестити. Якоже дееписец Бароний, пиша вначале о Агрипине епископе Карфагенском, тако засвидетельствует [в лето 217]: «Агрипин, епископ Карфагенский, ненавидя еретиков, ведая же, яко вся во гресе и проклятии моления своя и тайны совершают, суди, яко крещение их несть крещение, и сих, кия от них к церкве прилагахуся, паки крестити подобает, на утвержение же сего созва епископы африканския, и с ними устави, дабы от еретиков крещении паки восприимали в церкви истинное крещение. бе сие изначала приятно учение, и имяше по себе многия крепкия доводы».
По сем Агрипине, в лето Госпдне 255, святый Киприан восприя престол Карфагена епископство. И в лето Господне 258-е сотвори собор, созва из Африки и Нумидии епископов 84. И на нем уставиша, яко еретическое крещение несть истинное крещение, и не может в крещение вменятися. И ниже сие глаголаху, яко они тех, иже от еретиков приходят, вторицею крестят: но яко аки некрещенных (нивочтоже себе крещение еретическо вменяюще) крещаху. Ибо вси православнии второкрещением гнушахуся.
Сицевыя же соборы и восточныя церкве на еретиков во Иконии, во Фригии сотворше, уставиша ни едину тайну у еретиков, ниже крещение, в тайну вменяти. На что восточных соизволение писаша Фирмилиан епископ Кесарийский, Дионисий Александрийский к Киприану.
О сем во Африце Киприанове соборе и Матфей Иеросалимский на преди книги своея положи, и пишет: «Яко оный собор весма от всякаго еретика и расколника крестившихся, к соборней приходящих церкви, паки крещати повеле. расколники же в та времена наватиане быша. Сие изречение и Великий воспоминает Василий: в похваление убо се положив, строения же ради праздность на ня изрек. Иначе же и вторый вселенский собор в правиле 7-м написа. Подобие же и шестый, рече же: се бо якоже является тогдашнему поспевающе временю и вещем».
Темже, первый вселенский собор в правиле 8-м сих наватиан еретиков, приходящих к соборней церкви, повеле точию муром помазовати [Кормчая, лист 35]. О сих же наватианех и воздержниках в первом правиле Василия Великаго пишется сице [Кормчая, лист 224]: «Наватиан, рекше чистых, и воде предстоящих, и воздержащихся крещение, аще и не приятно есть, понеже оставляет сих Дух Святый, но смотрения ради да будет приятно». И повеле сих точию помазовати муром. Но в 47-м правиле Василий Великий, воздержники и вретищники и апотактиты оныя, повеле крестити. О наватианех же Константин Арменополь в книге первой на сие 47-е правило пишет сице: «Наватиане, аще многих епископ изволится суду, да воскрещеваются».
Поместный Лаодикийский собор фотиниан еретиков под муро прият: в толковании же Алексей Аристина сих фотиниан в требующий чин святаго крещения положи: о чесом и в вышшем разделе изъявися [Кормчая, лист 81].
Втораго вселенскаго собора в правиле 7-м арианы и прочия еретики под муро приемлются. Якоже в самом правиле тако глаголет: «Четыредесятники, арианы, наватианы, и аполинаристы, писание вдавше, приятии, помазующе токмо вся чувства».
Но прежде сего собора дванадесяти лет, сущий христиане с Павлином епископом во Антиохии не приимаху крещеныя от ариан. Такожде и после сего втораго собора, спустя 37 лет, божественным откровением, Порфирий, епископ Газский, крестил некоего Навклира арианина, в корабли плывя. Чти о сем Барония, лета 360: Минея, житие святаго Мелетия, февраля 12: Феодорита, Барония, лета 401: в Минеи, февраля 26, житие Порфирия Газскаго. Тимофей, презвитер и сосудохранитель Великия церкве, бывый в лето от создания 5945, еретиков маркионитов, иже от Марка Трапезонтянина (имеющих многоглаватую ересь), описует в третием чину проклинаемым [Кормчая, глава 70, лист 634]. А диакон Алексей Аристина толковал всех соборов каноны, и Великаго Василия на первое правило в толковании тех же маркионит преложил в крещаемый чин.
Шестый вселенский собор правилом 95-м повелевает: арианы; македонианы, наватианы, несторианы, четыренадесятники, аполлинарианы, евтихианы, северианы, и подобныя, по проклятии ересей муром помазовати [Кормчая, лист 205].
По многих же временах сего собора, Алексей архидиакон, правил толкователь, на сие глаголет: «Несторианы, евтихианы, и северианы, чрез едино проклятие ересей приимати».
А Тимофей, презвитер Великия церкве, во своем послании ко Иоанну о приятии еретиков, приемлемых по учиненному последованию и обычаю [Кормчая, лист 634]: «Арианы убо и македонианы, и наватианы, и аполлинаристы, и левыя, и четыренадесятники, по проклятии ересей, муром вся чувства помазуем их, глаголюще: знамение дара Святаго Духа». Таже на болшия еретики сходя, глаголет: «павликианы, евномианы, мантанисты, и савелианы, аки еллины приемлем». И потом глаголет: «несторианы же, и евтихиасты, и севирианы, и иже от подобных ересей приходящих, (яко еллины) подобает им творити записания, и проклинати своя ереси, и Нестория и Евтиха, и Диоскора, и Севира, и прочил, и тако восприимати святое крещение». И паки глаголет: «Зрим же ныне в Великих и соборных церква, рекше патриархиях и митрополиях, и прочих, яко армены, ияковитяны, и несторианы, и прочия безглавныя и подобныя им, обращающыяся в православную веру, божественным муром помазуют, а не крещают армены. нецыи же совершенно крещают армены». До зде Тимофей.
От сих убо предложенных познавается, яко святая церковь повсемественно не взираше на едино точию качество крещения еретическаго (аще чрез трикратное погружение их и миропомазанием некий приимаше), но и болше качество ересей их смотряше, темже и разнообразное единым и тем же еретикам приятие творяше. Ныне убо сих еретиков проклинанием точию ересей помазующи муром приимаше: а иногда тех же, коих проклятием или миропомазанием приемля, второкрещением приятие творяше. И сице приятие еретиком творяше в единых и тех же разньственное, не иныя коея вины ради, яко нам мнится, яко крещение еретиков бездуховно, яко порождения духовнаго не подающо.

Раздел, 6.
Яко аще и приемлется от еретик втораго и третияго чинов крещение, но вин ради благословных и нужных.
Тимофей презвитер, Константина града Великия церкве сосудохранитель, о еретицех третияго чина сице изъявляет: «Зрим же ныне в великих церквах, рекше в митрополиях и патриархиях и прочих, яко армены, ияковиты, и несторианы, и прочия, муром помазуют, а не крещают. творят же их проклинати начальники их. и се ныне вообразися вин ради благословных и нужных». Кормчая, глава 70, лист 636.
Кия же вины благословныя и нужныя, их же ради не покрещеваху еретиков; явственно бо о сем от патриархии Александрийския самого учителя восточнаго, святейшаго Тимофея архиепископа, достоверно вопросоответственное свидетельство в церкви Божий обретается, которое зде на среду представляем. «Вопрос. Почто обращающыяся еретики к соборней церкви не покрещеваем. Ответ. Аще бы се было, не бы ся человек скоро обратил от ереси, покрещения стыдяся. обаче и возложением руку презвитерску и молитвою весть приходити Дух Святый, якоже деяния святых апостол свидетельствуют». Ответы правильныя святейшаго Тимофея, архиепископа Александрийскаго.
Подобие сему и Матфей канонист на правило Василия Великаго о воздержницех сице являет: «Василий знаменает о воздержницех, еже не достояше, по маркионову бо мудрствуют, и создание Божие скверно быти глаголют, да не глаголю, яко во имя Отца и Сына и Святаго Духа крещаются, зане злым Творца Бога нарицают. и прирек: но да не опасения держащеся, ленивейших сотворим их, ко еже соборней приступити церкви, да приимемся обычая, и устроившым о них отцем последуем, якоже онем мнится, помазуемом быти святым муром, сице священи да причащаются». Состава а, глава 2.
Зрите убо вины благословныя и нужныя, ихже ради не покрещеваху еретиков, обращающихся в христианскую веру. Яко вещь, снизхождения к ним показующая, является. И сие творящеся, еже (чрез миропомазание церковь Божия приобщаше) еретики, аки над недужными, по врачевской хитрости, не поелику должность, но поелику возможность милостию награждати непреклонная тех сердца. Не яко прежнее крещение удостояюще, но яко благодатию Христовою, превосходящею в ней, все недостаточное тех покрывающи.
Суть убо и иныя вины обретаются, ихже ради святии отцы не соизволиша еретиков крестити, яко страха ради их мучительнаго. Понеже еретицы, ненавидяще кафолическое крещение, многих правоверных, крещенных сущих истинным кафолическим крещением, в свое еретическое крещение мучительством привлекоша. Инии же, не приемлюще сквернаго их крещения, и души своя положиша. О чесом ниже представляемая свидетельства являют.
В страдании святых мученик, иже во Африкии скончавшихся, сице пишет [Пролог, дек. 8]: «Яко Африкийскую страну правящу в содержании Онориху, по скончании отца своего Зехира. арианин бо сый верою, Ариевы ереси, а с ним тояже ереси иерей Кирил и Валиндис совещевающеся. [Ниже:] сии же Онориху подражаше, повелеша, иже не крещающихся во арианское крещение внезапу убивати. [Ниже:] В старом же Риме, в таковое время, Сулинда жена Риги, содержащего Рим, яже и та недугующи подобие во единой вере, едину от градских житель, некоего от вельможь жену, нудяше, еже креститися оной во арианское крещение, ейже бяше имя Анфиса, и яко увещати ю не возможе, слышаще, яко от епископа Мидиоламскаго водою и Духом крещена бысть. [Ниже:] разгневавши же ся Сулинда, и святую Анфису огнем сожже». Пролог, дек. 8.
И кроникарь Бароний, засвидетельствуя из епистолии 6-й папы Феликса, сице пишет: «Феликс папа, падших во Африце епископов, и иереов, и диаконов, иже тяжких ради мук соизволиша на новое крещение от вандалов ариан, паки с покаянием обращающихся приемляше. обаче епископом, и иным духовным, сицевую епитимию, или довлетворение, чрез послание определи, дабы никогда сана своего касалися. но отлучени от молитв верных на ином месте молилися, и при смерти аки простолюдини причащалися, и проч.». Бароний, в лете Господнем 487.
Подобие же арианом и прочий еретицы над правоверными творяху, перекрещивающе в свою веру. Якоже в житии Кирила Александрийскаго повествуется сице: «Крещенных бо (еретицы наватиане) кафолически паки крещаху. (тожде и прочий еретицы твряху в то время, прельщенных в свою перекрещивающе веру)». Минея четия, Киевопеч., июня в 9 день.
Такожде и вышепомяновенный кроникарь Бароний, повествуя, глаголет: «(В лето Господне 258-е, воста) искушение и буря на церковь, имже аки неким трясением земли, зело поколебашеся во многих и великих церковных лицах, вина сего бяху еретики катафриги, или мантанисты, иже отторгшихся от церкве паки крещаху, ни во что вменяюще оное крещение, еже у православных прияша. (се же и наватиане творяху). мнози такожде епископи еретическое крещение уничтожаху, и тех иже у них крестишася, новым крещением очищати начаша». Бароний, лета Господня 258.
Еще же и святейший Филарет, патриарх Московский, и во изложении соборном довольно засвидетельствует, како великая Россия от короля Жигимонта пострада, и колико зла учинися за еретическое крещение. Понеже просиша сына его на царство Московское, и дабы повелел его крестити христианским крещением. Король же на се разгневався, Филарета и прочих с ним посланных просителей в далныя страны своего государьства в заточение разосла, великую Россию повеле к своему нечестию мучением привлещи. И по онаго велению по всей велицей России огнь и мечь протекаше. И всюду христиане нудими быша свет евангельский оставити, тме же еретичества их последовати. и за сие мнози от благочестивых христиан души своя положиша. Церкви же Божия от благолепоты обругаемы бяху тогда. И прочая, яже самое изложение соборное пространно о сем явствует.
Зри убо, каковая учинися злость правоверным, хотящим отметати и не приимати еретическаго крещения. И сих ради причин не дивно есть древним снизхождение показати о еретическом крещении, ово страха ради, ово же смотрения ради, яко да не опасения держащеся правильнаго, ленивейших сотворят их, ко еже соборней церкви приступити. А ово стыдения ради покрещении, да не укосневают к приобщению приступати соборныя церкве: или да не паче убо развратившеся, гонение некое воздвигнут, яко же и прочий еретицы сотвориша: или паки желающе уставити тех стремление на правоверное крещение, еже творяху перекрещивающе православныя. Сия убо суть вины благословныя и нужныя, якоже Тимофей презвитер глаголет, обаче не суть законныя, или правильныя, или обдержныя, не суть смотрительныя, или истее рещи, частно временныя, якоже в предъидущем разделе изъявится.

Раздел, 7.
Понеже приимаше святая церковь от малых еретик крещение, но смотрительно: смотрительныя же вины в законныя и обдержныя в божественном писании не полагаются.
Алексей архидиакон, всех правил толкователь и изъяснитель, в толковании 1-го правила Василия Великаго, о наватианех и о воздержниках сице явствует: «Наватиан же, рекше чистых, и воде предстоящих, и воздержащихся крещение, аще и не приятно есть, понеже оставляет сих Дух Святый, но смотрения ради да будет приятно. [Ниже:] тии бо аще обратятся к соборней церкви, токмо святым муром помазуются». Кормчая, лист 224.
И паки той же в толковании на 47-е правило Великаго Василия глаголет сице: «В первом убо правиле своем, по смотрению словесе воздержник и наватиан, глаголемых чистых, великий сей светильник церковный, прият крещение, и повеле токмо святым муром помазовати их, егда приходят к соборныя церкви вере, и ереси своя проклинают, зде же исправляя еже по смотрению, онамо прият, повелевает воздержники, и прочия крестити». Кормчая, лист 239 на обор.
И преподобный Никон Черногорский на первое правило Василия Великаго такоже, пиша, глаголет: «Чистии (рече) и тии от раздорных суть, обаче изволися древним, иже о Киприане глаголю и Фирмилиане нашем, единым судом облагати, чистыя и воздержники и водопредстатели убо, занеже началом разделению раздором бысть. а иже от церкве отступльшеи, не ктому имеша благодать Святаго Духа в себе, оскуде бо подаяние, внегда пресещися последованию. [Ниже:] Темже, яко от простых людей, от них крещаемых, повелеша приходящих к церкви истинным крещением церковным очищатися. ельма же изволися неким всяко, иже во Асии, смотрения ради многих прияти их крещение, да будет приятно». Слово 63.
Но вняти подобает: всюду ли и везде, и во всяко время, и всякому лицу, смотрительный случай подобает хранити. Якоже той же Никон в слове 22-м пишет: «Смотрительная владыкам нашим оставим, мы же вне града суще, и таковыя вины извета пременени, яко иноцы, да творим подобающая по божественных правилах, и прочих божественных писаниих просто, а не смотрительно. ибо безумная смотрительства многих в плотьская угодия сведоша, и каноны святых попрати устроиша».
Такоже и святая церковь во уставе своем о смотрительных винах сице дает ведати [Устав, глава 40, лист 67; глава 31, лист 67]: «Главизны же (рече) законны и обдержны, а не смотрительны, или отчасти, яже бо отчасти и смотрительне, некоего ради слова содеянная или глаголанная, не достоит восприимати во обдержная и законная свидетельства, сего ради яже отчасти и смотрительная, в сих не сочетахом». Устав церковный, глава 40.
Вышепомяновенный же Никон Черногорец зело спасает по смотрению писанная приимати в законная и обдержная. О чесом в слове 2-м тако, пиша, глаголет: «Аще (рече) не разсуждаем время и вину, и различие вещи, но яко по смотрению глаголанная или бывшая, объятно на всяко время приемлем, главою снити имамы, и горняя долу будем». Книга заповедей, слово 2.
Паки той же в слове 28: «От других же отчасти смотрительне бывшых, яково ко иконе исповедавшагося, и Давыдове, и ина ветхаго закона, и великаго канона, и другая яже честное твое имяше послание, да испытует, владыко мой, честь твоя смотрителная силы, отнюд не преводити сих, ниже в беседу, от таковых смотрительных развращенная сердца человеческая, не прочитающе тех толкования, не вмещающе в духовный ум. но от плотьскаго мудрования совращаюся в различныя ереси и прелести, и доконца погибают». Слово 28.
И паки той же в предисловии книги своея пишет [Никон Черногор., слово, 63, Кормчая, глава 71, лист 634]: «Силным бо в разуме смотрительныя вины прилично изобретати, а наипаче сподобльшымся духовныя благодати».
Темже, сии едини смотрят полезнейшее святей церкви: и из крещаемаго в миропомазуемый, а из помазуемаго в крещаемый, или паки, из помазуемаго в крещаемый и в проклинаемый чин прелагают, якоже видим.
Василий Великий в первом правиле, по смотрению словесе, воздержных и вретищных еретиков прият крещение, и повеле муром помазывать: в 47-м правиле повеле сии еретики крестити. Вину наводит сему сию, понеже ересь их отрасль есть маркионитския ереси. Ненавидят бо сии якоже и они, брака, и тварь Божию скверну быти глаголют. И о наватианех зде умолчася: обаче Константин Арменопуль, аще многих епископ изводится суду, наватиан повеле крестити.
Подобие же некто и в правиле 7 Лаодикийскаго собора предается. В самом правиле наватиан, фотиниан повелевает миропомазанием приимати, а в толковании повелевает второкрестити. Вину же сему наводит, яко Фотин многи ереси обнови, и Павла Самосатскаго ересь, и Савелия Ливийскаго, и Монтанову: не безначальнаго глаголаше Божия Слова, ни Творца веком всем, ни первейша всея твари суща, но млада и нова, и начало бытию приемша от плотьскаго рожества, еже от девы. До зде правило.
Но мы по историям обретаем, яко сицевии ереси еще до сего собора Фотин име, и за то извержен. Собор же Лаодикийский тако уже извержена в миропомазуемый чин положи, негли за надежду исправления: толковник же сего по многих летех негли за ожесточение в сие сведена описа. И сему приклади мнози. Папиа, епископ Иерапольский, недобре от Апокалипсии Иоанна Богослова разуме: во царствии Божий на тысящу лет быти сладостей. И в сие заблуждение повлече Иринея и Иустина мученика, но не бяше им в ересь се. Егда же, по многих летех, Аполлинарий при сем умствовании твердо ста, проклят. От несториан иногда просто под проклятием единым к соборней приимаху церкви, а иногда помазанием мура, иногда совершенно крестиша святии: тако и над прочими еретики творяшеся: о чесом выше в пятом разделе изъявихом. И сему что дивное; ничто ино мним от прежних, точию разве снизходительныя и уступныя случаи. И сие творяху неравенство, или за ожидание обращения, или ересей умаление, или, напротив того, за ожесточение и приложение к вящшим ересям, по законному и обдержному суду поступление.
Темже непогрешительно, за лишение таковых еретиков в крещении их Духа Святаго, законным и обдержным обычаем паки второе крестити. Паче же в таковое время не имущее, якоже священства, сице и от того проистекаемаго мура, праведно убо и зело законно всех еретик совершенно крестити.

Раздел, 8.
Яко аще и приемлют правила по смотрению от средних еретик крещение, но под миропомазание. Настоящаго же времени нужность не допущает иметь миропомазание, убо и отнюд тще есть защищающих новодействуемое крещение на тыя (правила) указание.
Понеже святая церковь приобщает к части спасаемых от еретик средних, но не просто: но чрез миропомазание. О том правилами соборными засвидетельствует: перваго вселеньскаго собора правилом 8-м, втораго вселеньскаго собора 7-м, и шестаго вселеньскаго собора 95-м: такожде и поместнаго собора иже в Лаодикии 7-м правилом, и прочими отеческими правилы.
Но миропомазание же, по толкователем священных канонов, часть святаго крещения быти разумеется: якоже Матфей канонист состава 2-го во главе первой, такоже и севаст Арменополь книги 1-й, сечения 2-го, в надписи 3-й, засвидетельствуют.
Обаче же святая церковь различно в приятии с сими еретиками поступаше, якоже в 5-м разделе показахом: овогда единех и тех же приимаше под миропомазание, иногда же и на едино проклятие с возложением рук священнических снисхождаше, а иногда тех же и совершенно крестить повелевая. Что же есть сему виновное? Ничтоже ино разсуждается быти, точию милость святыя церкве к погибающим, желающи бо тем во удесех Христовых быти: и яко полномощна властию и совершенством в силе Духа Святаго даров, за упартое еретиков, оставляющи трудное еретиком крещение, в наполнение того ин способ примышляющи к приятию даров, его же еретицы в крещении своем не прияша. Церковь святая сообразное имать крещение в Дусе по Христу, якоже евангелист Матфей сказует: «И крестився Исус, взыде абие от воды, и се отверзошася Ему небеса. и виде Дух Божий сходящь яко голубь, и грядущь нань». Зри зач. 6.
Кое схождение Духа Святаго над крещающимися действовася после чрез возложение священных рук. Ныне же вместо сих рук, чрез миропомазание мура. Зри Катихисис Бол., глава 63.
Темже святая церковь, наполняющи крещение приходящих еретиков и творящи быти духовно, помазываше муром, кое по крещении она своих чад употребляше, и тем тожде образно творяше.
Но сицева тайна (якоже речеся) миропомазанием над приходящими еретики творяшеся, аки над недужными, по врачевской хитрости, не поелику должность, но поелику возможность милостию награждати непреклонная тех сердца: не яко прежнее крещение удостояюще, но благодатию Христовою, превосходящею в ней, все недостаточное тех покрывающи. Сице убо и в разумнейших мужех обыче склонность к нисхождению ради времени (если не противна благочестию) бывати. Якоже пишет белоруских печатей в Грамматице: «Разумна мужа, еже снисходити времени, искусна учителя, еже кратку быти в поучениих».
Воньми же и сему опасно: не помазуют ли муром и еретицы в крещении. Почто зде еретики паки помазуются? Инако, миропомазание их церковь ни во что полагает, а крещение приемлет. Разумей се быти милости ради церковныя, а не по должности.
Прочее вопрошаем тя самого, вопросителя: аще кто от написанных в вышепоказанных правилах еретиков приидет, их же по уставу святыя церкве муром помазовати подобает, и мура не будет, како прияти таковых подобает: просто ли не второкрестя или второкрестя? и кое ближайшее к награждению духовному: простое ли приятие тех, или покрещение? и крестяй сих погрешит ли? Отвещай нам правильно.
Но мы вемы, яко сугубое от вас ответствие явится. Первое речеши, что у вас миропомазание обретается. Но миропомазание обретается при священьстве Христове. Священьство же Христово (якоже в первых ответех засвидетельствовахом), в полномощном преосвященном чине заключается: яве, яко во архиепископех и епископех, и в полномощном преосвященном чине заключается: яве, яко во архиепископех и епископех, и в прочих верховных чинах. В вас же сего священства всячески не обретается, убо и миропомазания у вас отнюд несть. А чтоже бывшее ваше составление мура при ветковской церкви от попов, отнюд неправильно, да и зело противно святыя православныя церкве уставу.
Первое: Святая церковь святое мvро составляти повелевает от различных вещей. У вас же малую бывшую поллошки стараго мура, и то неизвестнаго, смешивали с некими вещьми иными и непристойными.
В Катихисисе же велицем повелевает устроение чинити от ливнаго елея и балсаму и нарди, и прочих благовонных араматов, якоже в 62 главе засвидетельствуется.
2: У вас на Ветке над сим муром молитву читал иерей. Святая же церковь, якоже в том же Катихисисе засвидетельствует, повелевает муро освящати архиерею на божественном престоле в великий четверток: в свидетельство же приводит Дионисия Ареопагита и прочих первеньствующия церкве и последующия учителей, о чесом во главе 62 явствуется. Но и прочий учители церковнии: Симеон Фессалонитский, во главе 43, во ответех 13 и 37-м, и во главе 77: в Катихисисе малом, на листу 31, и Карфагеньскаго поместнаго собора в правиле 6-м. Во всех сих местах священнаго писания повелевает епископу, а не попу муро освящати. Убо ваше ветковское освящение мура зело противно есть священному писанию.
3: А еже муро смешивати с маслом или с иными вещьми, такожде древлеправославным учителем несогласно и весма противно обрящется. О чесом всероссийский митрополит Дионисий со освященным собором тако глаголет: «Понеже уведахом о божественном крещении, смутне некако и неразумие смешающе муро божественное с маслом, и тако мажут по всему телу крещаемаго, еже всего злее неразумие». Кормчая старописмен., глава 51. Зри и поместнаго собора Лаодикийскаго правило 47.
Темже от сих предложений удобно есть разумети о вашем муре: каково оно есть, и сколь противно святей церкви повелению, и будет ли сие лучше простаго елея или еще хуждьше. И таковым помазуяй, како глаголати дерзнет: печать дара Духа Святаго; и помазанныя сим кое совершенство во крещении прежнем приимут; но о сем убо в 43-м ответе засвидетельствовахом.
Темже, не точию инде где, ниже у вас сего мура законодействуемаго обрести всячески невозможно суть. Убо и снисходительне под миропомазание приимати еретиков средняго чина в сие нужное время, всячески неиметельность того не допускает.
Но и таковым своим вы муром не всех, по уставу святыя церкве, приходящих к вам от ересей помазуете: ибо иереи, приходящия к вам, оставляются кроме миропомазания, простии же миропомазуются.
О коль чудитися летьствует вашей слепоте! Сами иереи, не помазуеми, не причащьшеся, по вам, Духа Святаго, простый народ помазуют: и безблагодатнии, яко благодатных устрояют. И кое се презорство; подобает бо учителю прежде самому творити, таже в то учити ины. Но наставник сей несть творец, егда сам не помазан, а иныя мажет: иных крещение исправляет, а у самого крещение не исправно.
Святии бо отцы, для приятия Духа Святаго, обще всех помазовати муром повелеваша. Сей же не помазан, убо не имать Духа Свята. И како иным преподает то, чего сам не имать; и о сем доселе.
Второе: Многажды в своих вопросех рекл еси и зде возглаголеши: яко исполнити и наградити у еретиков безблагодатное един освященнейший может, а не простый. Отвещаем. За нужное все может. Не видиши ли, како в Самарии Филиппу Дух Святый в даре чудес не поспешествова, в каженике же поспешествова: и Ананиево действо крещения како благодать Духа явися. Вся сия во знание, яко не в присутьствие должных чинов меньшими благодать Духа Святаго исполняет за православный разум. А наипаче и се ведати подобает, яко лучше есть, да простым людином совершится крещение, нежели священником проклятым, или отлученным, или еретичествующим.
Зри о сем Потребник, изданный во святой великой лавре Киевопечерской, року от Рожества Христова 1646-го, месяца декабря в 16 день.

Раздел, 9.
Яко аще древле по смотрению и приимаху крещение от еретик под миропомазание или проклятие ересей, но точное нашему крещению.
Преподобный Матфей канонист на правило 7-е 2-го вселенскаго собора о еретиках средняго чина сице глаголет: «Яко арианы и македонианы, и саватианы, и наватианы, глаголющих себе чистых, и левыя, и четверонадесятники, иже и средники, и аполинарианы, понеже точно нам божественным совершаются крещением. [Ниже:] и таковых по проклятии святым муром помазовати повелевает». Состав а, глава 2.
И преподобный Никон Черногорец в слове 63-м на правило первое Василия Великаго глаголет: «Оно бо (рече) судиша древний приимати крещение, еже никакоже от веры исходящее».
Такоже и святейший Филарет патриарх на правило 1-е Василия Великаго пиша тако глаголет: «Взыскание убо о чистых, и речено есть первее, о добре воспомянул еси, яко подобает обычаю возследовати всякия страны, зане вознести различно от крещеных приимших от тех тогда. [Ниже:] изволиша древле приемлюще крещение еже ничим же веры преступающее, тем убо ереси нарекоша отверженыя отнюд, и по той вере отчуждены еже манихеяны и уалентияны и маркияны». Потребник Бол., лист 567.
Севаст Арменополь на тое же правило Василиево тако глаголет: «Не приятно еретик крещение, приятно же раскольник и присонмищник». Книга 1, сечение 5, о людинех, надпись 1.
Но у вас противу сего готово суть слово: аще святии отцы древле приемлют крещение от еретик точное правоверным, и аще ничимже веры преступающее, или от веры исходящее: убо остается крещение во имя Святыя Троицы, и в три погружения, от еретик приятно быти, аще в каковых бы ересех они не обреталися. На которое свое мнение от вас приводится свидетельство от Барония в лето Господне 314, от собора Арелятскаго тако писанное: «Яко в Галии, во Ареляте граде, на епископском соборе уставлено бысть противу донатистов, иже паки крещахуся, дабы от еретиков крещеннии во имя Отца и Сына и Святаго Духа, не были тии крещаеми, но токмо рукополагаеми, ради приятия Святаго Духа: не ведущий же исповедания Святыя Троицы, да бы крестилися». До зде Бароний.
Но мы видим восточныя церкве святых архиереов, каноны своими сопротивно сему (по сем арелятском соборе) повелевающих. Святый Великий Василий от еретик, крещенных во имя Отца и Сына и Святаго Духа, в первом правиле прият крещение, и единым точию муром помазывати их повеле, обаче сих же еретиков в 47-м правиле повеле крестити [Василий Великий бе в лете Господнем 353]. Еда сей Василий Великий не ведяше во Ареляте граде собор, иначе о таковых еретиках повеле; и не точию се, но и соборнейше в первом о таковых изрече сице: «Наватиан и воздержник крещение не приятно». А вину неприятности изрече сицеву: «яко оставляет их Дух Святый». И посему святая церковь на еретическом крещении не утвержашеся. Отнюду же и севаст Арменополь на правило Василия Великаго 47 и глаголет: «Наватиане, аще и многих епископ изволися суду, да воскрещеваются». То севаст. Понеже сам Василий Великий в 47-м правиле токмо воздержных еретиков повеле покрещевати, а о наватианех умолча. А севаст и наватиан к тем же припряже воздержным, аще изволятся епископом. Но воздержницы и наватиане точно во Святую Троицу и во Христа веруют, подобие православным крестят, якоже и впреди сего ответа засвидетельствовася.
Но что много глаголем. Все тии объявленнии еретицы в 3-м разделе сего ответа, аще (некотории) и странно по божеству Отца и Сына и Святаго Духа исповедание имеяху: обаче якоже от многих свидетельств доказахом, в три погружения крещаху, их же множае двадесяти изъявихом. В четвертом же разделе яснейше засвидетельствовахом, яко святая церковь не точию пременения ради материи или формы в крещении повелевает второе крестити еретиков, но и обновления и важных ради вин. А в пятом от правил доказахом, яко не непреложный есть предел, еже еретиков средняго и малаго чина не крестити, но иначе иначе святая церковь с таковыми поступаше.
Темже яве показуется, яко святая церковь не весма на еретическое крещение полагашеся, како пишет Бароний о Арелятинском соборном уставе, но различное приобщение тем к себе устрояше. И киих иногда муром помазоваше, тех же последи и второкрестити повелеваше. И не взираше на едину тех неисправность в крещении, но созерцаше тех важность мудрования, а не тако, якоже вы подражающе Баронию. Понеже той, по причине сей, гневаяся на восточную церковь, и таковая свидетельства собираше. Ибо греческая церковь западную и папежа римскаго с действы его ни во что поставляше, темже и крещеныя ими паки покрещеваше: о чем той же Бароний в лете Господнем 1054-м пишет. Но Бароний великий защитник римския церкви и ревнитель бе.
Темже убо, еретическое крещение не точию по материи и форме его глаголется святыми отцы не точно нашему крещению и вере преступающее: но аще и во Святую Троицу и в три погружения крестят, но мудрование о Святей Троице противное кафолическому мудрованию имеют, или о воплощении Сына Божия неправе веруют, и того ради может таковых крещение вере преступающее нарещися. Ибо вера с крещением, по святым богословцем, неразделна имеется, якоже Афанасий Великий, Григорий Богослов и прочий согласно о сем мудрствуют: о чесом 21-го ответа в 3-й части засвидетельствовахом.

Раздел, 10.
Нынешния же великороссийския церкве новодействуемое крещение православному крещению не точно и вере есть преступно.
Понеже аще в 21-м ответе, в части 3-й и предложихом, коликое нынешняя великороссийская церковь в новодействуемем крещении имеет в вере и догматех преступление: его же аще и кратко коснухомся, но к двадесяти седмь вин обретохом. Обаче зде, яко порядочное и должное наблюдающе, паки тех же ко изъявлению касаемся.
Первое: Яко символ, еже есть образ веры, не точен есть древнему священному символу, но развращен сущий, иже при крещении глаголется. И посему является крещение се нашему не точно и вере есть преступно.
Второе: В 21-м ответе показахом, яко нынешняя великороссийская церковь, в своем мудровании в вере православней, якоже о Святей Троице, тако и о воплощении Сына Божия, соглашается с древними еретики, не верующими в сия оба великия таиньства. И посему крещение великороссийския церкве нашему православному не точно и вере есть преступно.
Третие: Яко крещаяй священник и крещаемый, оба знаменаются тремя персты, имиже и равеньство Святыя Троицы измеряют дерзостне, по новомудрствованию и преданию нынешней церкви. И сим странно и чуждо благочестивыя веры догматствование вводят: о чесом Максим Грек на николаитскую прелесть во обличение явствует. И не точию сицевое мудрование великороссийская церковь о треперстном слжении имеет, но и в сих трех перстах заключающи имя Святыя Троицы, от них порождатися крещением умствует [Увет, лист 128].
И посему, крещение се нашему не точно и вере есть преступно.
Четвертое: Яко крещаяй священник и хотяй креститися, еже по древлецерковному преданию сложение перст знаменовательное, ими же вседоброе веры таинство, по святым церковным учителем, исповедуется. Сие великотаиньственное образование веры в крещении отложиша, и посему крещение се нашему не точно и вере преступно.
Пятое: Яко крещаяй священник благословляет воду в купели пятию перстами, в них же отложишася обоя таиньства веры во образовании, яко образ Святыя Троицы и образ вочеловечения Божия Слова не обретаютася: которое их пятиперстное благословение от святых отец клятве соборной есть предано [Потребник, в чине проклятия от латин приходящих]. И посему, крещение се нашему не точно и вере преступно.
Шестое: Яко самая видотворящая крещение форма, еже есть чрез приглашение троичнаго имени с трищным погружением, во оном крещении нарушается. Яко крещаяй священник глаголет: Крещается раб Божий, имярек, во имя Отца, аминь, и Сына аминь, и Святаго Духа аминь, ныне и присно и во веки веков, аминь. И на коеждо приглашение возводя его и низводя, якоже в новых требниках изображено есть. И сим четверократным аминя приглашением, и на всякое приглашение крещаемаго возвождением и низвождением, является четвероличное, а не троичное Святыя Троицы приглашение. И сим четвероприглашением аминя показуется, яко четвертое лице при крещении сем вводится. Якоже о сем святейший Иосиф патриарх в послании к Валдемару королевичу Датскому, такожде и в разговорах с его попом Матфеем древлероссийских учителей, явственно показуется: о чесом в 21-м ответе, в части 1-й засвидетельствовахом. И сицевое крещение нашему есть не точно и вере преступно.
Седмое: Яко крещаяй священник по преданию и содержанию своей их церкви, трипогружательное и единопогружательное, вкупе же и поливательное крещения, за равносильно приемлет, и верует и исповедает: и сицевыя веры залог имущий, в три погружения крещает. Обаче како крещение се может быти христианскому крещению точно, яко единопогружению и поливанию залогом веры крестителя не различается, но соединяется, и точно тем крещением вменяется, христианскому крещению не точно и вере преступно.
Осмое: Яко приглашение глаголяй священник по своему их церкви мудрованию, аще страдательным залогом, сиречь, крещается раб Божий: или аще и действительным (залогом), сиречь: крещаю тя аз: за равносильно быти верует, и исповедует. А еже в трепогружателном крещении тайну тридневнаго погребения Христова и воскресения не нужну, но и преступну быти верует и исповедует, аще и погружает, аки бы в смерть Господню: обаче погружение не главнейший крещения обряд, и не так важный и сильный быти верует и исповедует.
И сицевыя веры залог имущий, аще и в три погружения крещает: обаче крещение се веры таинство о смерти Христовой и о погребении, и о спасительном Его воскресении, залогом веры крестителевы преступает. И сицевое убо крещение веры христианской есть преступно: Проклятому же к римскому поливательному и развращенному в приглашении крещению, такоже и единопогружательному прочих еретик крещению, залогом веры крестителевой есть равносильно и вменяется быти точно, святокафолическому же крещению не точно и вере есть преступно.
Девятое: Яко крещаяй священник, соединяя и за равносилно полагая единопогружательное крещение с трипогружательным, тако мудрствует: в трикратном погружении Троица лиц изобразуется, в единем же единьство Божества. Сицевый залог веры крестителя, елико есть не согласен, во образовании трех погружений, образующим святым богословцем не троицу лиц, но тридневное погребение Господне и воскресение; толико и в едино погружении (нынешняго крестителя) мудрование единственное Божества, согласно обрящется Савелию Ливийскому, исповедающему слияние о Святей Троице: того ради, и при крещении всех трех ипостасей имяна купно изгласив, крещение нашему правоверному крещению будет не точно и вере преступно.
Десятое: Яко крещаяй, не водою (по святых богословцев учению) мудрствует омыватися на души первородному греху, но кровию Христовою, якоже всесквернии лютеране [Поливат., глава 7, лист 22, 23, 24 и 25]. Убо крещаяй не точию в форме трех ипостасиях погрешает, но и в материи воды, противно кафолическому учению, согласно же люторскому [Разговор с Вальдемаром, основание 13]. Убо сицевыя веры крещение нашему православному крещению не точно и вере есть преступно.
11: Оставляем глаголати в молитвах глаголемых от крестителя (на освящение воде, в ней же крещаемому погружатися) многая имеющая развращения, и к древнему крещению неточная и преступная: еже звезд в собеседничество к Богу по манихейскому мудрованию полагати: еже духу лукавому молитися: еже самого Бога неистинным нарицати: еже не святым крещением порождение исповедати: еже отречение от сатаны прикровенне вещати: еже не явственне Христу обещатися: еже символ веры несогласно древнему глаголати: еже Иисуса некоего инаго во исповедании веры проповедати: еже ноги по жидовски муром мазати: еже круг купели против солнца ходити. И прочая безчисленная в новодействуемем крещении, елики прилоги, елика отъятия, елика пременения, елика несогласия, волею преходим: якоже самыя новопечатныя требники, богатокипящия новшествами, засвидетельствуют. Мы же всяко, хотящему опасно ведати, на разсмотрение оставляем: обаче по возможности нашей в 21-м ответе, в части третией изъявихом.

Окончание.
Тако убо, протекающе десять разделов, нами впреди обещанных, ныне к концу приступивше, мало нечто труду нашему покой отдадим.
Понеже в первом разделе изъявихом яко святии апостоли своими правилы всех еретиков крестити повелеша.
Понеже во втором разделе показахом, яко во времена первеньствующия церкве, последующе апостолом, святии учители поместными соборами такожде всех еретик и раскольник крещение отметающе второкрещаху.
Понеже в третием разделе засвидетельствовахом, яко и во времена вселенских соборов, и на соборах, и по соборах, мнози святии учители церковнии, яко в три погружения, тако и от всех еретик крещение не приемлюще, паки совершенно второкрестити поучают.
Тако в четвертом разделе доводствовахом, яко святая правила вселенских и поместных соборов, и святых отец, не единаго ради не трепогружательнаго крещения от еретик приходящих повелеша крестити, но и обновления ради и важных вин.
Тако в пятом разделе представихом, яко святая кафолическая церковь не непреложный имеет предел, еже втораго или третияго чина еретик не крестити, но иначе и иначе с ними поступаше: овогда под проклятие ересей, иногда же под миропомазание, а иногда тех же и совершенно крестить повелевает.
Тако в шестом разделе засвидетельствовахом, яко аще и приимаху от тех еретик крещение, но вин ради благословных и нужных.
Тако в седмом разделе указахом от правил, яко приимаху крещение таковое, но смотрения ради: а смотрительныя вины в законныя и обдержныя в божественном писании не полагаются.
Сице во осмом разделе утвердихом, яко не просто тако помянутых еретиков правила приемлют, но под миропомазание. Настоящаго же времени нужность не допущает иметь миропомазание, убо и тще есть защищающих тем еретическое крещение.
Сице в девятом разделе явствовахом, яко аще древле и примаху от еретик крещение, но точное нашему крещению.
В десятом же тако предложихом, что великороссийския церкве новодействуемое крещение православному крещению не точно и вере есть преступно.
Темже, по сим множайшим и неоспоримым доводам ясно можно видеть, яко аще бы великороссийская церковь и средния имела ереси, и таковых бы ради приимать без повторнаго крещения не бы удобно было за ради неимения миропомазания. Но аще бы было и священство с миропомазанием, и тогда бы не противно было правилом (по смотрению принятое) законообдержне обычаем, яко не имеющее духовнаго дара, паки повторяти православным крещением. Коль паче лепо есть тогда, когда сих, от церкве на таковое совершенство уставленных, таин в неимение, и от имеющей церкви многочисленныя различных еретиков вящшия ереси, и не точное правоверным крещение отметати. Убо зело законно и праведно таковое, и от таковых важных ересей, и в таковое не имеющее свободных тайн время, не приимати крещение (аще бы оно и в три погружения было), и обращающихся святокафолическим православным и духовноблагодатным очищати крещением. Верно есть сие слово, и всякаго приятия достойно.

Вопрос, 45.
И аще достоит, то по коим правилом достоит? явите и сия с показанием от святых писаний.

Ответ, 45.
Довольно уже весма по нам довольно в прешедшем ответе, по нашему худосилию, от еретиков действуемом трехпогружательном крещении глаголахом, зде же повторяти таяжде долгости ради оставляем.

Вопрос, 46.
Кия правила подобает содержати, и кия оставляти? изъявите и сие без закрытия.

Ответ, 46.
Преподобный Никон Черногорец, написавый свою книгу заповедей Господних по повелению Пресвятыя Богородицы, и по благословению патриархии Антиохийския, якоже сам в своей повествует книге. Сей убо богоносный муж во изглашении божественных правил заповедует, святых апостол, и святых вселенских и поместных соборов, и особь писанныя от святых отец правила, непременно православным христианом даже до кончины века хранити, а не оставляти, якоже в вопросе вашем вопрошаемся, и глаголет: «яко во всех тех соборех един Дух Святый действова». И паки приглаголет: «Яко аще кто некая от божественных правил истощевати, или возбраняти начнет, повинен есть по таковому правилу и запрещение приимати». Зри пространнее в книзе его в слове 63-м, и в Кормчей главу 71, на листу 637 и прочих.
А яко убо оставляти вся сия правила не долженствует, но хранити со всяцем опасением: действовати же по них должно суть не всякому во всякое время, но точию во свое время и в ключимом чине. Ибо кия правила благо приличествуют к освященным, паче же к пресвященым, убо тыя тако и приимати леть есть. А еже не освященым по нужде реченная, тая по нужде и приимати. Якоже тойже преподобный Никон Черногорец тако глаголет [Кормчая, глава 71, лист 637; Никон Черног., от слова 63]: «Божественная (рече) правила от святых соборов, и инии глаголи святых отец, и от тех самех градских закон, яко да кождо от хотящих потребное в ключимем чине, и своим временем приплодит пользу». Слово 63.
Темже внятельно к правилам приступати подобает. Не якоже в них яже глаголется, тая во всякое время, и всякому чину творити: но разсуждати время и вину, и различие вещей, и глаголанная аще смотрительне, аще обдержне, или ключимая к высочайшим чинам. Якоже той же Никон Черногорский, взем от Исака Сирина свидетельство, сице глаголет: «Аще убо, рече, не разсуждаем время и вину, и различие вещем, но яже по смотрению глаголанная, или бывшая, объятно на всяко время приемлем, главою имамы снити, и горьняя долу будут». Книги 1-й, слово 2. И паки той же: «Яко не подобает, яже по нужди бывающая, или по смотрению некоему временну, всегда тая в свидетельство приводити, но егда паки таковое найдет время». Слово 52.
Сице убо лепо есть разумети о положенном в правилах: аще где гласящая суть к высочайшим и преосвященным чинам, тая в присутьствии тех и разумети: аще же по нужде, и в нужная времена, за необходимость христианскую простым долженствуемая, тая убо тако и приимати. Или паки: аще смотрительне, ради милости кафолическия церкви, где в которых правилах прияся от еретик крещение, тамо за временное и смотрительное, и приимати суть должно, якоже в 44 ответе явихом. Аще же всегда обдержно и законно тая устремительно приимати начнем, убо вся горняя долу, дольняя же горе превратятся.
И сия вся бывают от крайняго неразу суждения нашего, яко божественнии отцы рекоша. От них же первый есть Иосиф Волоколамский, глаголяй тако: «Яко доброе не во свое время приемлемо, на злое происходит, не от естества своего, но от неразсуждения приемлющих его». Слово 5.
Согласная же сему отцу преподобный Никон Черногорский, взем свидетельство от небошественнаго Лествичника, тако подтверждая глаголет: «Есть убо егда иному лечьба, иному же смертоносие бывает, и есть и тожде томужде, во свое время приносимо, лечьба спасительная бывает, не во время же паки смертоносие бывает». Книги 1-й, слово 2.
Сице убо, разсматривающе о лежимом в правилах, и не тако приемлем к действию, якоже в них написана суть: но соглашающе писанная с виною и со временем, по апостольскому заповеданию, глаголющему тако: «В неже время достигохом, рече, то же мудрствуем, и тем же правилом жительствуем». К филиписеом, глава 3, стих 16.

Вопрос, 47.
Священномученика Киприана составленное правило где удержася?

Ответ, 47.
Сие убо священномученика Киприана со освященным собором составленное правило, еже всякаго еретика и раскольника паки крещати, не яко оставленное, или не яко презренное последующий святии отцы быти вмениша: но точию в том месте, си есть во Африкии, попреданному обычаю удержавшееся, быти объявиша. О чесом нижеследующая свидетельства указати имут.
Преподобный Никон Черногорский в предисловии шестаго вселенскаго собора сице изъявляет [Кормчая, глава 71]: «И паки Той же Святый и покланяемый Дух вдохну и научи святым шестым собором, изо уст святых в предисловии божественных правил сочетав всех собор, в коемждо колико правил изложил есть. [Ниже:] еще же и от Киприяна бывшаго архиепископа Африкийския страны и мученика, и иже с ним собора изложенное правило, еже в предреченных наместник местех точию по преданием обычаю удержа». До зде Никон.
Такожде и священноинок Матфей, в составе к, во главе 5, сице глаголет: «А иже убо от архиепископа Африкийския страны священномученика Киприана, и иже с ним собора, издавшееся правило, в тых месте токмо удержася». Той же во объятии всех вин сице глаголет: «Тем же и шестый вселенский собор, издавшееся рече отцы сими правило в местех их токмо удержася, по преданному обычаю». До зде Матфей.
А понеже святии отцы святаго шестаго вселенскаго собора, за благо разсудивше и определивше, киприановым собором составленному правилу во оных местех, си есть идеже собором его составлено правило бысть, чрез оных наместников по преданному их обычаю действовати, еже всякаго еретика и раскольника паки крещати. Обаче аще и в той точию стране сему действию быти указано, но и в той же апостольстей церкви повеленное святыми отцы творяшеся: убо не суть ересь или противность, не суть второхристораспинательство, по мнению вашему.
Аще бы была кая противность в сем от собора Киприанова уставленном правиле, не бы святии отцы оный собор засвидетельствовали: не бы сие неприятие от еретик и раскольник крещения вселеньскими богомудрыми учители в похваление положено было. О чесом той же вышеименованный Матфей Иеросалимский, во объятии всех вин, засвидетельствует о сем Киприанове соборе, тако глаголя: «Всех убо вселенских и поместных иже в Халкидоне собор первейший написуется, начальника же имущи великаго Киприана, епископ же множашеся осмьдесять к четырем, иже убо едино токмо изнесоша, яко во образе правила отречение: иже весма от всякаго еретика же и раскольника крестившихся, к соборней приходящих церкви, паки крещати. Раскольники же сущих о наваганайствуют, тогда бо яже сего ересь привниде в церковь, сие изречение воспоминает Василий, в похваление убо положи, строения же ради праздность на ня изрек». И паки той же Матфей Иеросалимский, на правило 1 Василия Великаго глаголя, сице засвидетельствует: «Годе бысть сущим о Киприане и Фирмилиане нашем волися покрещеватися. В Кархидоне бо емуже епископ великий Киприан собор отец древнейших всех собрася, иже угодно бысть общим судом всем еретиком и раскольником покрещеватися. щетаху бо сице рекше слагаху, аще и не о вере расколницы погрешают, но понеже убо глава телесе церковнаго Христос, по Божественному апостолу, от Него же вси уди, живятся и духовный возраст приемлют, сии же от состава удов телесных отторгшеся, не ктому пребывающую в них имут благодать Святаго Духа, еже убо не имут сами, како иным преподадут, но обаче рече Великий сей отец, понеже неким сущим во Асии годе бысть строя ради чистых крещение приимати, да будет приятно». Состав а, глава 2.
Такожде и преподобный Никон Черногорец, на тое же правило 1-е Василия Великаго глаголя, засвидетельствует о Киприанове соборе тако: «Чистии и тии от раздорных суть. обаче но изволися древним же, иже о Киприане глаголю и Фирмилиане нашем, единем судом облагати чистыя и воздержники, и воде предстателя, за неже убо начало разделению раздором бысть. а иже от церкве отступлыпеи, не ктому имеша благодать Святаго Духа в себе, оскуде бо подание, внегда пресещися последованию. [Ниже:] Ктому не могуще благодать Святаго Духа инем подати, от нея же тии отпадоша. тем яко от простых людии, иже от них крещаемых, повелеша приходящим к церкви истинным крещением церковным очищатися. ельма же изволися неким всяко, иже во Асии, смотрения ради многих прияти их крещение, да будет приятно». Слово 63.
И Тимофей, презвитер Великия церкве, Киприаном уставленное соборне правило поминает, глаголя: «А иже с Киприаном повелевает всякаго еретика крещати. и хотящим от ереси обратитися, десять дней, или пять надесять поститися». Кормчая, лист 636.
Поминает же сей собор Киприанов и творец книги О вере, и с прочими святыми соборы сочетовает, о чем во главе 17, на листу 158 на обор, явствуется.
В описании же книги Соборника [лист 877], сего великаго и изящнаго воина Христова Киприана ревность, сщетает равне со всеми вселеньскими учители, подвизавшимися в защищение святыя церкве от еретик.
Темже сицевыми и толикими учители сей собор Киприанов и того издавшееся правило засвидетельствуемо. Како убо от вашея страны последователи нецыи не стыдятся Барония привлачити к гаждению сего от священнаго собора, аки бы церковь сие в заблуждение и ересь постави; но свидетельства явственнаго привести не може, о чем в лете 258-м пишет. И аще бы Киприанов собор был бы церкви противен, якоже Бароний противоречит, не бы правилом апостольским: 46, 47 и 68-му, всех еретик крестити повелевающим, соглашался. Аще бы сей собор о себе точию состоял, не бы прежде его бывшему собору Агрипинову последовал: не бы в тоже время и на востоке собираемым собором во Иконии и во Фригии соглашался. Аще бы сей собор Киприанов заблуждал, не бы великий светильник церковный Василий его похвалил: не бы и сего вселенскаго учителя правил толкователи Никон Черногорский и Матфей канонист засвидетельствовали: не бы и Тимофей презвитер сего собора определение поминал. Аще бы сей собор был в заблуждении и в противности церкве, не бы шестый вселенский собор с прочими соборы сочетал, и единым и тем же Святым Духом озарен�