Выговское сочинение

Конец XVIII столетия

Ответы выговцев на зазрения Ильи Ковылина

Страха же ради не убойтеся ниже смущайтеся Господа же Бога святите в сердцах ваших готовы присно ко ответу всякому вопрошающему вы слово о вашем уповании и кротостию и страхом совесть имуще благу.(1 Пет. Зач. 60)

Время всякой вещи время терпения, время ответа. (Книга о вере, лист 2, печать московская)

Проповеди ради благочестия точию да будет ти брань. (Златоуст, ко ефесеом, беседа 19, лист 1761)

Иже есть от Бога, глагол Божиих послушает. (Иоан. глава 8)

Изъявление вещи

Потреба на нужнейшая влечет ны грубыя изъявити, а молчанием не лет есть покрыти, о несогласующеи с нами и со отцы нашими братии федосеева мнения.

Понеже прежде приезжавший к нам во общежительство знатный в них учитель Игнатий Трофимов с товарищи и по мнозей беседе мир утвердивше чтоб не разглашатися с поморцы, си есть с нашею страною; о чесом и письмо примирительное отцы нашими, по их прошению писанное и им данное свидетельствует не ложно. А ныне возновляет древнюю ту распрю по самомнимой своей ревности, новый в них ревнитель зовомый Илья Алексеев, древнее несогласие с нами и со отцы нашими аки удачю некую изъявляя сущим раздор, и не согласие, ии к чесому годное.

А, первое: О пилатове написании четырьмя литерами писанное еже есть I Н Ц I. Си есть Исус Назарянин, Царь Иудейский, согласное латином, люторам и калвином, и Никона патриарха написанному о чесом книжица его в Крестном монастыре или Ставрове изданная и напечатанная явствует.

В, второе: Против мнению их о титулах за начальствующия в молении, в местех потребных творимое нами, и именуемое благочестивыми, благоверными и подобными, яко же святии отцы именословивше не погрешиша, честь надлежную честным воздавающе, о чесом в нижеследующих по нам доказаниях явлено будет.

Г, третие: Всероссийстии христиане, во время новотворства Никона патриарха, и прочих по нем ревнующих не приемлюще новин, то есть триперстнаго благословения, четверогубой аллилуйя, и прочих новостей, и от насильнаго принуждения к таковым убегающе душевные гибели многия беды подъяша, ови муками, и томленьми, и казньми смертными от немогающеся избывше умроша, овы же изгнанием и темницами и заточением в страны горкую смерть приимше, убегше лютости нечестия умроша. Друзии же собирающеся во едино место от несносныя и горкия тесноты с женами и детьми, и в домех своих, и в древних церквах старого строения от насильства лютости всенародно огнем скончевахуся во очию многих народов зрящих геенскаго огня с никоновым нечестием убегающе на иный мир странно и ужасно преселишася; которая их благая о древнем благочестии и Богу угодная ревность, и написанием правым древним согласная, вашим согласием и новоревнивым Илиею зазирается и порицается, весьма неразсмотрительно и многому зазору достойно.

Заключение

Сих ради грубии мы, и старостию и хворостию одолеваеми, понудихомся надсилу, защищающе и оправдающе непогрешимое отец наших устройство, и со святою древлеправославною церковью согласное.

Аще [еже ли] о Пилатове написании на кресте, еже есть Исус Назарянин, Царь Иудейскии, но, напротив, святоотечески Исус Христос, Сын Божии, по писанию, и Царь Славы, и прочая боголепная и высокая согласная Церкви подписуем и веруем дóлжна быти.

Аще начальствующия персоны или лица согласно со святыми Божиими угодники честными титулами и пишуще и глашающе то есть: яко от Бога данные власти, и святыми отцы почитаемыя и молимся по апостолу Павлу о них всегда, яко долг неотрочныи воздавающи Церкви силам, яко да тихое и безмолвное житие поживем, по апостолу Павлу.

Аще ли ревностно и благочестно скончавшияся в прешедшия времена за древнее благочестие теснимы гонительными образы [виды], згоревшия ли водным ли истоплением и прочими неначаянную себе смерть сотворшая, яко мученики веруем не укорны и о нас и о всем мире молитвенники непостыдны быть чаем и исповедуем.

А о прочих вашем мнении, его же чрез совестно мнится нам умножил еси написав, оставляем умным читателем и слышателем в разсуждение, однако кратким ответом извинившеся, да не вменимся безответни быти пред вами.

Тем же убегающе излишних трудов, и чину ответному, по нам согласующе пишем извинившеся: обычною краткостию приличныи приступе ко ответу творим Божией помощи смиренныи сей труд наш, вручаем и молим поспешествовати, и в прочих и не оставленным быти и прочая.

1772. Месяца генваря в последних числех: подадеся нам грубым писмо [или задание] в 16 пунктах соуруженное от феодосиева согласия, бывшаго у нас, во общежительстве именем Ильи Алексиева с товарищи оставшагося в них от мороваго поветрия.

Первый пункт, о написании Пилатове, положенном на Кресте Христове, в четырех литерах изображенное, I Н Ц I, си есть Исус Назарянин, Царь Иудейскии. Таково написание разумеют и утверждают за важное и непременное начертание. И мнят [любопрятся] яко бы на славу и честь оное распятому Сыну Божию написанное.

Вторый пункт, яко напротив мнению их, начальствующия лица отитлуются благоверными крестоносными, православными, христолюбивыми и благочестивыми нарицаются.

Третий пункт, яко бы мы, во время иеромонаха Неофита разглагольства и камисии, отреклися, яко сами не покрещены, и других не покрещеваем.

Четвертый пункт, умерших поминаем, псалтыри говорим по них не право сие.

Пятыи пункт, за живых не крещеных молебны поем, яко да неприлично есть.

Шестыи пункт, масло древяное в лампадах жжете и свещи от некрещеных приемлете.

Седмыи пункт, совокупльшияся по крещении блудническими мните [нарицаете].

Осмыи пункт, по крещении на третии день о прежних грехах исповедь чините, а не прежде.

Девятыи пункт, пред крещением не повелевается вами четыредесяти дней постится, и не постятся.

Десятыи пункт, с мирскими пиют, и ядят, а настоятели не истязуют, ни исправляют и за пиянство не пользуют как надлежно.

Первонадесятыи пункт, с новоженами общение имеют.

Второнадесятыи пункт, в баню с мирскими ходят и не возбраняются от главных старшин.

Тринадесятыи пункт, тропари и кондаки за умерших некрещеных, сочинивше, говорят.

Четверонадесятыи пункт, самосожегшихся и самоубившихся за мучеников причитаете и страдальцев законных вменяете, яко бы за веру умроша.

Пятонадесятыи пункт, книгу во оправдание прилагателнаго имене счинивше, да отложат и отложити дóлжна есть.

Шестонадесятыи пункт, сами между собою имеющее посредство си есть несоглашение, и разсмотревше, десному и лучшему да уступят.

Дозде пункты конец имеют.

Отсловие [уговоры] на вышеписанная.

Сицевое Ильи Алексиева и товарищев его мнимое витийство и смелость непохвалная: прежде сражения сама от себе снизитися [уклонитися] хощет, яко же от нашей страны справедливым ответом и доводы непогрешимыми и молитвами отец и братии, наипаче помощию Божиею, грубая по нам контроверьсия [се есть] любопрение благосчастливо и богоспособно совершитися возъимать: юже честному читателеви или слышателю усердному случится видети, или слышати. Да чтет и разсуждает разумно [десно] чувствующи полезная.

Дозде отсловие или уговор, по силе мысли нашея потребныи есть.

Первыи пункт Илиина зазрения

Несогласно святым богословцем о надписании Пилатове, положенном на первообразном Кресте, по писму старца Игнатия, яко бы оное писание не на славление Сыну Божию, но на безчестие.

Ответ, А.

Копию или выписку от слова надгробнаго трудов отца Андрея Денисьевича еклисиарху Петру, си есть уставщику и сроднику, ему же начало: кто есть человек иже поживет не узрит смерти (Псалом 88), о вышепомянутом вами иноце Игнатии во свидетельство предлагаем вам, да познаете откуду и когда, и каков, и колик бе блаженныи он старец и велеумныи подвижник, и сущии раб Христов: а вашим согласием уничтожаемыи давными времены, отец Игнатии.

[копия] Егда бо древле соловецтии отцы не приимаху новых уставов Никона патриарха: древлесодержания церковнаго, ни мало уступити дерзаху, бяху же в них тогда мужи честнии и святии, от многолетных подвигох постных просвещени, и разумом Божественнаго писания озарени: в них же два прочих превосходяща в премудрости и разуме, и во всем ведении священных писании.

Един [инок] Герасим Фирсов, именовашеся, его же премудрость и разум каков бяше, является от списания его, еже писа о знаменовании [честнаго] креста на лицах своих.

Вторыи же [инок] черныи диакон Игнатии [ныне нами повествуемыи] муж святолепен и подвижник велии, и Божественнаго писания читатель, и внешняго наказания искусный [искусен].

Бяху же тогда в соловецтей обители мнози отцы, святоподвижнаго их ради жития, прозорливым даром знамении и чудесы облагодатьствовани.

У них же бе некии отец Гурии, имянуемыи аки благоуродствуя пребываше, многая прорицания тогда предвещаше: егда еще Никон митрополитом бывыи, по мощи святаго Филиппа посылаем бяше, тогда той святыи старец, приезд его и яже об нем прежде прорече: и ина многа памяти достойна глаголаху отцы, той прорицаше: молитвеник бо велии и постник бяше многолетен, и чистоты ради умныя предвидяше дальная, яко близ сущая.

Той великии отец часто, помяновенному Игнатию отцу, повелеваше изыти из обители соловецкия: Бог тебе [глаголя] повелевает отсюду изъити, чесо ради стужившу отцу Игнатию, и некогда молящу святаго сего старца: почто убо, о святче Божии, аки мя непотребнаго уда от обещания своего, от обители преподобных изгоняеши. Святыи же той старец: иди иди Игнатие [рече], не имея сумнения, хощет бо Бог состроити тобою велию обитель в славу его: обители же соловецкой разорение предрече, яже пóслежде зельным страданием древлесоловетсии отцы за древнее благочестие скончани быша.

Помяновенныи же отец Игнатии изъиди из соловецкия обители по глаголу святаго старца и по благословению отец и Богом подвизаем. Прииде в сия поморския пустыни пребываше близ Повенца, отечества помяновеннаго Петра, и часто в дом родителей его прихождаше, яко же и прочии отцы соловецкия и благословения сподоблевахуся. Пребываше же сей отец Игнатии во многих вышеестественных подвизех: и в вышепомяновенной Курженской обители священноигуменом Досифеем и прочими отцы схождашеся, и единоумно о благочестии усердствоваху. Бе бо добродетелнаго ради жития и премудрости всеми знаем, именит; еще же живыи в пустыни сей чистоты ради его сердечныя и безстрастнаго жития прозорливыи дар от Бога имеяше. Иже видяхуся добродетелна быти, их же провиде он последи отпасти благодатнаго жития, предрече о них: иным наказанным быти за прегрешения объяви: другия, зело ревнители являющеся, от очию своею отгна, преступники быти предсказа. Вся же сия по предречению отца сего збывахуся.

Многи же сей отец священныи просвети, учением научи, благоверию наказа, добродетелем на подвиг возстави. Чесого ради мнози прицепившеся к нему и моляху его с ним пребывати, и предводителством его спасенными быти: еже и сотвори боголюбная óна душа, памятуя проречения и повеление святаго старца соловецкаго Гурия, и нача в сей пустыни общее житие.

Не токмо по благословению отец соловецких, но и благословением помяновеннаго игумена Досифея, бяше бо ему отец духовныи, иже повеле ему женеск пол особь в пустыни от братии отстраивати и велиим опаством целомудренное наблюдати житие: иже и велиим опаством по священным писанием общежителнии же и целомудрении уставы предводительствоваша.

Сему отцу ученик и сообщник бывает кроткии, аще ин кто таков Даниил, благословением священнаго отца игумена Досифея, бяше бо ему сын духовныи, и стаинник благочестия: моляшу же Даниил сего священнаго игумена, да благословит и научит у какова искусна отца в наказании быти. Священная же óна глава, аки Богом воздвизаем: иди, рече, и в ваших поморских странах пребывающа соловецкаго старца Игнатия послушай, сей бо мощен тя наставити на путь спасения: еже и сотвори Даниил, бысть ему сын и сообщник общежительства его. И несколько время терпяше с ним и братиею многи скорби пустынныя, и гонительныя волнения.

По сих же отцу Игнатию многи души во благочестии и добродетелех научившу, и направившу и скончавшуся о Христе. Оставлец же онаго общежительства Даниил смиренныи, скитаяся по пустыни с некоими братиею, место от места пременяя, многаго ради тогда гонителнаго волнения, и многое попечение имеяше, аки некии велии долг, да общежительное обещание, по благословению отец, во общежителных святых уставех исполнит.

Бяше тогда в пустыни сей, живя священныи отец, предревнии великии подвижник, авва Корнилии староскитскии, Ниловы пустыни древлеобщник, знаемыи еще древле бяше и любим, добродетельнаго ради жития, святейшему патриарху Филарету и несколько время у него жил бяше. Той, аки ангел некии, в вышеестественных подвизех просвещаше пустынная сия недра, и всем нам отец духовныи и сладостныи наказатель бяше, Даниилу же и поминаемому нами Петру.

Бяху же инии отцы древлесоловетьстии: отец Генадии Качалов по роду именуемыи: Иосиф Сухой, соловецкии же: и ины отцы и пустынножители, с малою дружиною живуще, молитвами своими дебри сия освящающа.

Даниил же в малом общежительстве живя: древлесоловецких отец благословение, аки благовонное миро во алавастре нося и соблюдая: усердствуя же он о общежительстве, возусердствоваша же и прочая братия: возревноваху же и отцы благословляюще и повелевающе о нем пещися: яко же и нас с приснопамятным Петром: моленьми отеческими благословении, советовав принужденми принудиша общежителнаго не жития точию, но и попечения и тяготы его вкусити.

Разсуждающе бо тое тогда: да обдержанием общежительства в пустыни сей благочинное житие утвердится, всякое безчиние изничтожится: и да не попустится своеволным злым людем место пустынное жительство быти, яко же и бысть.

Ибо тогда воровских людей терьние в лесах сих вкоренятися наченьшеся, благодатию Христовою, обдержанием общежительства сего изничтожися: и мирно и благопокорно, и ведомо житие се, тако церковному величеству, яко властем градодержателем, общежительством сим исходатайствовася. Яве бо по Христовым и апостольским преданиям, повелевающим Бога боятися и царя почитати: и Божия Богови и Кесарю Кесарево отдати.

Сия вся Богу помогающу благое от Божиих писании и благопокорное разсуждение общежительство сие источает.

И тако сие общежительство, якоже рехом, от соловецкия обители произшедшее, есть чином же и благословением соловецких отец вкорененное, и священноигумена Досифея благословением насажденное: к сим же и староскитскаго отца Корнилия, и прочих отец пустынных молитвами и благословением утверженное. Исперва место из места пременяя гонителных ради случаев бяше, со священным отцом Игнатием близ пурнозерских езер, прежде водворяшеся. Пренесжеся на Саро езеро, идеже после отца Игнатия соблюдашеся: по сих близ Боровскаго скита, при малом езерке крыяшеся: идеже мы, благодатию Божиею, совокупихомся и живяхом, по благословению священнаго отца Корнилия и прочих пустынных, и соловецких отец, Генадия и Иосифа.

Таже, Богу изволившу, преселихомся к Выгу реце, идеже не токмо древнейшии отцы, Корнилии и Виталии благословением и присещением многажды нам присудьствоваху: но и соловецкия обитатели священник Пафнутии и пустынножителныи старец поживе во общежительстве лет седмь, всерадостно благословяше устав общежительства и церковныя службы: и возвещая вся благочестивыя уставы же и обычаи соловецкаго монастыря и сладостно прилагашеся сего общежительства уставу же. К сим же и древнии старыи священник Феодосии, страдавыи многолетно за благоверие, той прилучися во общежительстве быти, усердно похваляя и благословляя чины вся и Бога благодарствуя о уставе общежительства, сего и сам желаше сообщежитель и служитель быти.

Сице убо сие общежительство от пустынных и освященных отец первозачатием проистекшее толиких и таковых священных мужей, благословением строительствовано бяше, его же еклисиарх и строитель и многоусердныи пользователь бяше поминаемыи раб Божии Петр.

Дозде копия из писма отец наших.

Сицевым вышеписанным свидетельством и труды велеумными отца нашего Андрея Денисьевича предложихом вашему усердию, да познаете известно, яко не таков бе блаженныи он, старец Игнатии, яко же Вам и всему вашему согласию возмнеся о нем и многими неприличными поношеньми и укоризнами всем вашим согласием давными времены поносите, хотех рещи грешите [погрешаете] о нем: не бояшеся праведнаго суда Божия и до празднаго словесе опасно ны истязати хотящаго.

И оныи Игнатии, о нем же ныне нам есть слово, и житием свят и словом от священных писании обогащен вельми: и со святою кафолическою церковию во всем согласная мудрствующе, яко же и в посредствующей убо с вами вещи. Вы уже вси от давних времен уставляете новомудрствующе, не токмо Пилату, яко язычнику, согласная пишуще на кресте четыре литеры сия [I Н Ц I], знаменующия Исус Назарянин, Царь Иудейский: но и латином, и лютером [лютераном], и кальвином, и никоновых времен новонаставшему согласному вышеозначенным подписанию.

Но Церковь древлеправославная грекороссийская и апостольская гласит боголепными написании, еже есть Царь Славы, Исус Христос, Ника: всеми старопечатными книгами, разных выходов: а имянно, святым Евангелием разных печатей [разныя выходы]: потребниками великими, уставами на панагиарном хлебе: к сим согласно и белорусския печати во многих разных книгах гласит, аки гласом вопиюще еже есть Царь Славы, Исус Христос, Ника; к тому же чюдотворными кресты старогреческим корсуньским, его же князь Владимир из грек принесе: и жезлом святаго апостола и евангелиста Иоанна Богослова данным самем евангелистом чюдотворному отцу Авраамию Ростовскому нигде вместо Царя Славы Исусом Назарянином гласит: видно [заведомо] опасаяся, да не проста человека покажет Божия Слова, таков титул, а по вам, мнимую богословию, еже Назарянином нарицати Спаса Христа и мнети не грешити: и бесовскии отчаяныи род вопиет тоже: не могут бо инако рещи Господа нашего Исуса Христа, точию Исуса Назарянина: чти аще хощеши о сем в житии преподобнаго Нифонта, декабря 23 дне, известно ти будет грамотниче честныи: и прочим вашего согласия и мнения, ревнителем:

Еще: из благовестника, Лука, зач. 110, предлагаем ти: Пилат же вопроси [Исуса] Его глаголя: Ты ли еси царь иудейскии. Он же отвещав рече ему ты глаголеши.

От толкования. Тем же и Пилат оставль клевету исповедает, яко никоея же вины обретаю в человеце сем: мню же и се вопрошение еже творит ко Христу, на посмех, клевете быти, укоряяй бо рече глаголя, ты ли еси царь жидовск. Токмо не се глаголя, ты убо нищь, худ, безпомощи оклеветаем, и яко царства хотя, се бо посмехающагося есть, яко таковая вадати {вадьба-клевета, Ц.-С. слов.}на Исуса: яко таков худ, наг, такову вещь начинати. НИЖЕ

Евангелие. Пилат же [ниже] посла [Исуса] Его ко Ироду, сущу и тому во Иеросалиме в тыя дни.

От толкования. Ирод же рад бысть о том, не яко хотя обрести что душе полезная от видения Исусова, но зане слышаше о Нем, яко мудр есть и чюдотворец. Имяше же неразумно желание, токмо видети что и слышати, а не веровати. Не такожде ли и ныне мнози болим и неразумеем тем, яко на позорищах хотяще видети чюдо действующих змии, пожирающе в мечте и мечи и ина таковая, зело мняше Исуса от тех: и вопрошаше Его словесы мирными, паче же укоряя и тем и Господь ничтоже отвеща, весть бо когда лепо отвещати, иже вся Словом сотворивыи и свидетельствован от Давыда, яко разсмотрив словеса своя на суд, что же требе метати бисеры пред свиниями. НИЖЕ: И се человеколюбие есть, еже молчати в таковых, реченное бо слово на ползу осуждению ходатай есть невнимающих. НИЖЕ. Ты же ми разумей всюду еже творит научаем диаволом. НИЖЕ. Беста себе друга Пилат же и Ирод. Подлежащее бо Ироду посла Пилат к нему, начало дружбы являя, яко не приступающу Пилату во Иродов предел. Виждь же зде, иже враждою растоящияся совокупляти диаволу, да токмо Христу устроить смерть, и единотрапезники собирающия враги в любовь.

Дозде из благовестника о Пилате и Ироде.

Внемли честныи Илие, о вышеглашаемых о Пилате словесех, яко диаволом со Иродом водими единотрапезники бывше и яко же слово вышеписанное гласит: их же лепо ум имущим гнушатися и ненавидети, по гласу псаломскому: не навидящыя ли Тя, Господи, возненавидех их и во враги быша ми. Псалом 138 (21стрф).

Еще о Пилате воспомнити лепо есть от святаго Феофилакта: Матф. Гл. 27. [Благовестник] печатной:

Евангелие Матф., зач. 111 Видев же Пилат яко ничто же успевает, но паче молва бывает, прием воду, умы руце пред народом глаголя: неповинен есмь от крове праведника сего, вы узрите: и отвещавше вси людие, реша, кровь его на нас и на чадех, наших. Тогда отпусти им Варавву, Исуса же бив, предаде им, да распнут его.

Толкование. Умывает же си Пилат руки, являя себе яко чиста, злоразумно мудрствуя: праведна бо нарицая Исуса, предаде его убийцам или жидовом погодие {сообразно} творя или являя, яко и той осуди его и не хотят неповинна человека распяти, но поругана и осужденна.

От Марка, гл. 15, зач. 66 Пилат же хотя народу хотение сотворити: пусти им Варавву и предаде Исуса бив его.

Толкование. Виждь же иудейско убийство, и Пилатову кротость, аще и той осуждения есть достойне. Но зане не усердно о добрем противися. НИЖЕ. Конец вдася воли онех, биша же Господа плетенным ремением, да мнят яко от судии его осуждена пояша и предаде им, да его пропнут, хоте бо доволно народу угодити, а не Богу, яко Пилат, предатель и биица Христов познавается и есть, по евангелисту; Исуса убо бив [рече] предаде им [си есть жидовом], да пропнут его.

Не глаголи ты Илие, и еще не внял еси угождения Пилатова к жидовом на Спаса же нашего, посяжки и навета, сего ради поне вкратце от песней церковных покажем ти егово злодейство на Христа бывшее и уведев негли престанеши хвалитися о нем, познав того злодейство.

О Пилате треодь цветная во святую и великую среду на утрени:

Се лукавыи совет воистину собрася враждебне, яко осужена осудити, иже в вышних седящаго, и яко судию всех и Господа. Ныне собирается с Пилатом, Ирод и Анна вкупе и Каиафа, истязати единаго долготерпеливаго. (Сед., глас а, лист 70, на обор.)

Во святыи великии пяток. Антифон. 13: глас 6:

Соборище иудейское, у Пилата испросиша распяти Тя Господи: и вины убо в тебе не обретоша, повиннаго же Варавву свободиша и тя праведнаго осудиша, и пагубнаго убийства грех наследоваша: но даждь им, Господи, по делом их, яко суетным на Тя поучишася.

В суботу великую канон на боготелесное погребение Господа Бога и Спаса нашего Исуса Христа. (Творение Симеона Логофета. Песнь а, слава):

Хотящи Мати приступи в тайне к таящемутися ученику Иосифу, и тайно плачущи моляшеся пречистое испросити тело Твое у Пилата, беззаконнаго судии.

В святыи великии пяток. Синоксарь, лист 114:

Пилат же июдеом благодатьствуя, бив Исуса, преже изводит с воины, во одеяние оболчена червлено, терновным же венцем обложена, и в десницу ему трость вложив: ругаем же от войн глаголющих, радуйся царю июдейскии. НИЖЕ. О часе же третием дни на лобнем месте бивше и тамо распинают его. НИЖЕ. Всякой убо досаде на нем исполньшися: Пилат дщицу написа о нем глаголя: Исус Назарянин, Царь Июдеом, аще и они возбраняху, не пиши, сице глаголюще, но тако Он сице рече: Пилат же отвеща: Еже писах писах, паки отрече {приговор}.

От гранографа царства Тиверия Римскаго: глава 83. О Пилате и прочих явствует:

Кесарь слышав сия, и почюдися: уведев же, яко Антипа советен бысть на смерть Христову: и Иоанна Предтечю беззаконнаго, ради прелюбодеяния усекну, посла приведе его в Рим связана со Иродиадою, отъем имение их, а самех посла в заточение во Испанию: и тамо живот зле скончаша: плясавшую же отроковицу, земля пожре живу. К сему Тиверию тече в Рим Мария Магдалыня, вопиющи на восставшая, на Христа, на Пилата и на архиерея Анну: и Каиафу, их же Тиверии зле умучи. Пилат же от великия нужды сам себе закла. Дозде из гранографа.

Псалтырь толковая киевскаго переводу. Псалом 2:

Вскую шаташася языцы, и людие поучишася тщетным предсташа царие земстии. и князи собрашася вкупе, на Господа и на Христа Его.

Афонасия Великаго:

Еже есть вскую, язык иудейск яро гневахуся и скрежетаху на Христа, поучающеся о смерти его и бысть им вотще предсташа царие земстии, и князи собрашася вкупе на Господа и на Христа Его: Ирод и Пилат, тии бо на Христа воссташа, и на Господа, и на Господьскаго человека: Бог бо и человек есть Христос.

Григория Амиритскаго:

Собрашажеся на Господа, аки на Сына человеческаго: Он же по истинне Бог и человек бе.

Сущее. Живыи на небесах посмеется [им] и Господь поругается им.

Толкование. Пригвожденныи бо ими и смерти преданныи на небесех сыи и все одержаще: сия являет их. И Отец же Его и всех Владыка достойную им месть подаде. Инаго, Бог Господь живыи на небеси: преда род жидовск, не верующим в Бога нашего Исуса Христа, в посмеяние и поругание разверзши совет их, и месть наня послав. Что же и бысть: понеже Ирод и Пилат, быша изгнани, Пилат в Тукгдуне граде сам ся уби: Ирод же, нечестивою смертию умре, июдеи же по всей вселенней разсеяшася. Дозде о Пилате.

Увещание

Ужели ты, друже, поне вмале узрел еси недостаток в Пилате, на мнозем творим на Спасе Христе, или: еще в уме твоем вращается [корпит] нечто, не буди, друже, невероятен к предложенным нами: сама: убо тебе святая церковь, неложными доводами увещевает твою совесть послушати от нашея страны представляемых на мнозе о Пилате и о суетном Ироде поучишабося суетным: и да уверит тя конец жизни их: и смерть погибельная, вышепоказанным свидетельствы, ащели по нам не умягчится совесть твоя, приложити имамы еще доводы силнейшия, от них же останешися в зазоре, познавая свое старание [устойство] безсилное.

Евангелие в неделю мироносиц; лист 122 и 123, печать московская, при Филарете патриарсе 7140 г. О блаженнем Иосифе и злонравнем и жестоцем душею Пилате:

Блаженныи же Иосиф, един от совещания июдейскаго зело нарочит и богат. НИЖЕ. Прииде к Пилату. НИЖЕ. Испроси погребсти тело Исусово. НИЖЕ. Божественная бо сила споспешествоваше Иосифу, и Пилату злонравную и жестокую душу умягчаваше. И приим тело Иосиф, купи плащаницу, и сняв Его со древа и обвив и плащаницею, и с Никодимом купно. НИЖЕ. Честное и пречистое тело Владычнее, честно и благоговейно и со страхом погребают. Дозде из евангелия.

Еще о той же двойце слыши аще несть внятно слышати случилося тебе о блаженнем и приснопамятном Иосифе: и о беззаконном судии иже есть Пилате: како: и российстии пастыри согласно древним разсуждают о нем, ценят егову злобу и не грешат:

Приближися Иосиф к горко рыдающеи матери: его же видевши, и молебными тому оплеташеся глаголы, потщися рече благообразне, к Пилату, беззаконному судии, приити, испроси со креста сняти тело Учителя своего, моего же Сына и Бога. (Кирила, епископа туровскаго слово в неделю жен мироносиц, книга соборник, лист 768, печать московская)

Надсловие, 1-е,
краткое первому по нам к вам ответу со увещанием.

Сицевыми словесы отвещевающим нам грубым вкупе же и увещевающим вы: яко благоразумны: которое не без труда и потов производимое есть, ищущее желаемыя в нас ползы и мира; и ненавидимаго Богом долговременнаго раздора, между нами случившагося во утоление, и угашение. Ты же уразумев сицевая, яко благоразумен, престани пререкуя: и другим буди советник благ: яко крайному греху виновную, а наипаче всего гнева Божия на ны приити хотящаго: по глаголу Павлову к ефесеом пишемому: грядет гнев Божии и прочая.

Дозде труд наш на первыи пункт окончавше на вторыи и прочия с Богом помощником, приходим, ревность Илиину имуще, по глаголом еговым ревнуя: поревновах и прочая. (3 Царств, глава 19).

Надсловие, 2-е

Чрез неже воспоминание всему по вам согласию гласит о вышепомянутом по нам отце Игнатии, а вашем согласием не по разуму гаждаему, и злоречиму. Известно вам да будет о, друзи: о нем же притыкается из давных времен, как вы вси, и прежде вас бывшии старшины ваши: о вышепомянутом отце, иноце Игнатии, аки о камень претыкающеся хулами и браньми неприличными надходяще, да не поставит вам Господь Бог во грех грубости, хотех рещи дерзости тоя, не ведуще известно каков и колик бе блаженныи оныи отец, о нем же вкратце, от списания отца нашего Андрея Денисьевича, выше сего, вашему согласию явихом. Да познаете известно и разум и премудрость его и ревность неугасимую о древлецерковном благочестии и всей целости христианьския веры и Закона Божия и конец страдальческии.

Восплануся бо тогда, грех ради наших, аки буря зелна и прежестокии вихорь гонительныи напахну на вся верующия по старопечатным книгам, и неимуще где и куда скрытися места: ни во градех, ни в селех; всяко убо места объят тма оная гонителная. И аки воров и разбойников сущих християн православных везде искаху и вязаху без милости мучаху. И толь жестокии неугасимыи пламень диаволом разженный на правоверных вниде и во весь Олонецкии уезд, во всяком не точию селе, но и во всяком доме конечная стала бысть опасность и боязнь.

Приснопоминаемому же отцу Игнатию из таковыя нестерпимыя и ужасныя тесноты, разсуждающу с прочими ревнители како бы и коим образом гоизнути таковыя беды, вымышляет Божиим пособием и многих боголюбивых мужеска пола нарочитых и женска советом забегнути в могущее место, поне на время укрытися и спасти себе.

Заседают, самем Богом научаеми, в Палеостровскии монастырь, идеже им место ключимо, к хотящему быти за благочестие кончанию Божия судьбы готовят.

И елицех обретают союзных от старец таковых примиряют себе. Елицех же не хотящих тожде мудрствовати, тех от себе свободне их уволиша и таковым образом уселишася внутрь палеостровскаго селения, и места: и вести всюду скоро прошедшей собрася единомысленнаго народа христианска числом две тысящи и седмь сот душ. И слава об них всюду аки вода веснена пролияся.

Посылается от Олонца команда салдат, в немалом числе, с ними же и мирскаго люду, яко же сказуют до двох сот, и вящше, и вопрошаются, откуду люди и какия, и за какову вину собрашася толикии народ зде.

Они же прямыи ответ творят сице: мы люди государевы Олонецкаго уезда собрахомся от тесноты крайныя. Принуждаемы есмы, к настоящейся вере, Никонова вымышления, а, имянно, к триперстному сложению, ими же повелевают креститися, пятиперстное малакса, некоего благословение прияти, новое причастие, под знаменованием двочастнаго креста, прияти символ православныя веры, аки выправленыи греческими и российскими настоящими архиереи, без прилагателнаго имени Истиннаго читати: и прочия новости, не бывшия прежде в российстей церкви, содержати и верити по вам не будем.

Таков ответ, и тому подобныи им сотворшим. Главныя от команды реша: не будите вы упрямы, но послушайте добрая вам советующих. Они же паки не можем мы глаголюще, новости прияти: лучше нам за древность святыя великороссийския и греческия церкве умрети, нежели с новостию никоновою живым быти. Команда же начат сурово приступ чинити, и огнь показаша пушечныя пальбы, потом и из мелково оружья.

Обдержимыи же внутрь монастыря народ, видя напрасное и суровое буйство, и неудержанное продерзание, аки у разбойников нань, приготова вещество к нужному случаю и конечному смертному часу сготовленое: солому, смолье, порох и прочая заправленое сготовльше: зажигают огнем гасимым: лучше разсудивше скончатися жестокою болезнию чювственнаго огня жжением, за древнее святоотеческое благочестие, и правую несумнительную веру: нежели с Никоновыми новинами преданным быти родству огненому, червию неумирающему, тме кромешней, и прочим, конца не имущим мукам: и с таковым добрым и велеумным разсуждением скончашася о Господе: предаша душа своя в руце Бога жива. Лета от создания осмыя тысящи: 195-го, месяца марта, 4 дня, на память преподобнаго отца нашего Герасима иже на Иордане.

Таковым образом и несумнительною верою усердно преселишася доблии страстотерпцы и исповедницы всероссийстии богомудрии и доброревностныи преподобныи отец Игнатии, с доброю и союзною дружиною своею, от седмаго настоящаго века, к хотящему приити некончаемому осмому, отъидоша. Вечная им память 3-жды. Дозде надсловие. 2-е.

Сия и сицевая любве ради Христовы во обще к вашему согласию, о благонравнейшии стязателю и любоперниче охотныи, Илие, о вышепомянутом по нам отце Игнатии, по добрей совести защищающи, пишем о нем и глаголем вам. Иже бысть дом преполныи разума и прмудрости духовныя и священных писании и истории церковных и внешних, читатель и ведетель многопремудрыи, и христианских законов и священных апостольских и святоотеческих правил преполное и честное сокровище. От вашего согласия именуемаго феодосиева, напрасно многолетно многими языки, не токмо от главных, но и последних невежд злословится, и гаждаем есть: и сицевая творятся по безбоязньству видится страшнаго суда Божия.

Престаните прочее братие и друзи языкопольства такова, и другим по вам ревнующим, запрещением запретите, да недходят хулою, по их непщуемою ревностию, ради вышепомянутаго Пилатова написания, четырех литер, иже есть, I Н Ц I, яснейши рещи, Исус Назарянин, Царь Иудейский: престаните и паки глаголем престаните, праздныя хвалители быти, убойтеся, да некогда прогневается Господь, по псаломскому словеси, хвалимыи святою церковию, Царь Славы, и по апостолу Царь царствующих и Господь господствующих.

Уже бо и так страшно и ужасно слышати, случая несчасливаго в вас: мнози бо изомроша, и первии начася, яко же сказуют от лиц ваших духовных, по них же произыде послежде и на весь московскии народ: и ныне достоит рещи: Боже и Господи сил пощади люди своя, ибо и тебе, ревнителю, случися быти под тем же наказанием судеб Божиих: но посрочил суд сотворшаго всяческая ради должнаго в нас исправления и прочая.

Дозде на первыи пункт, или вопрос ответ должныи.

Вторыи пункт зазрения
Неблагочестивыя лица шестью прилагателными имяны, в тропарех, кондакох и икосах: Благоверными, Благочестивыми, Православными, Правоверными, Крестоносными, Христолюбивыми нарицаете.

Ответ 2-и

Древлеправославная кафолическая церковь на священных писании, аки на камени крепце непременныи фундамент свои содержит исконно: на апостольских и церковных учителей, отец святых не погрешаем. Многим убо законом сущим, един убо есть сей, наипервыи: молитвы и моления творити за вся человеки собственно же и похвално есть: за царя и за вся иже во власти суть. И вину изъявляет полезну: яко да тихое и безмолвное житие поживем во всяком благочестии и прочая. И не токмо молитвы творити за власти сущия, но и честными и подоболепными прилагателными имяны почитати величество их: то есть благоверными, благочестивыми, христолюбивыми и прочая, но да не возмнится излишество в словесех.

Приидем на самыя апостольския и святых отец доказания и свидетельства яснейше солнца светлеющия яже суть:

Доказание первое и свидетельство

Молю убо прежде всех, творити моления, молитвы ходатайство, благодарения за вся человеки: за царей, и за всех на власти сущих, да тихое и безмолвное житие поживем во всяком благочестии и чистоте: сие бо добро и приятно пред Спасителем нашим, Богом, иже всем человеком хощет спастися и в разум истинныи приити. (1 Тим. Беседа 6. Златоуст) Что же есть, еже прежде всех: сиречь, в служении повседневном и сие таинницы ведят како на всяк день бывает и на вечер, и утро: како за весь мир, и за царей, и за всех, иже во власти сущих, моление творим; НИЖЕ.

Зри что глаголет и како полагает прибыток, да поне сице приимем наказание да тихое рече, и безмолвное житие поживем, сиречь, онех спасение — наше есть безпечалие, яко же и в послании к римляном подвизая их повиноватися князем глаголет: не точию за нужду, но и за совесть Бог бо во общую ползу начальства учинил есть. Како убо не безместно онем убо за сие воинствовати, и оружия предлагати, да мы в свободе пребываем: нам же ниже за приемлющих беды и воинствующих творити моления: тем же несть ласкательство вещь, но по праведнаго бывает слову. Дозде Златоуст.

Доказание 2-е

Сущее. Молю убо прежде всего.

Толкование во вседневней службе. Се прежде инех да будет память. Ниже. Хощете убо и за царя молити, да победят и пребывают: ниже. Епископу бо общу отцу сущу подобает за вся человеки молитися: за верны, и неверны за други и враги, и за искушающия и за оскорбляющия: ниже: тако наведе и за царя и за вся во власти сущих.

Сущее: да тихое и безмолвное житие поживем, во всяком благоверии и чистоте;

Толкование. Да не мятется христианин: что во время тайн поминается царь многащи и неверен сущь: являет нам приобретение онех спасение, [како] аще бо они спасаются и благоволят в сущих, еже ко врагом брани, мы в молчании и тихости пребываем, ни единому нас смущающу. Аще бо бы безместно, тем убо за общение тщатися, нам же по силе молитвы за ня приносити. Ниже.

Толкование. Аще той рече хощет всем спастися, иже и спасаяи Господь кая потреба наших молитв: ей тех же и онех в любовь влечеши и любовное являеши: подобишися [рече] смотрению Божию: той бо всем хощет спастися и ты от всех моли. (Апостол толковый превода инока Максима Грека)

Доказание 3-е

Из благовестника. Воздадите бо рече: кесарева кесареви, а Божие Богови. И виждь не рече дадите, но воздадите, долг бо есть рече: воздаждь убо долг. Хранит тя князь от ратных, житие твое мирно строит, должен еси ему данию. На странице напечатано киноварными словесы сице: Зде разумей мудраго ответа Спасова, еже кесарева кесареви а Божия Богови. Не токмо царю дань давайте, но и Бога молите за него. Дозде из благовестника.

Доказание 4-е

Что есть царь. Царь бо ничто же ино есть, разве образ живыи видим, сиречь одушевлен, самого Царя Небеснаго. Яко же рече некии от еллинских философов, к некоему царю глаголя сице: Царство уверен быв буди тому достоин царь бо Божии есть образ, одушевлен сиречь жив. (Максим Грек, глава 24)

Доказание 5-е

О том же гласит. Царь есть: законное настоятельство, общее, благое всем послушливым. Ниже. По пристрастию благо творя, ниже по противострастию зло творя: новозсловно некии сыи подвигоположнии и натрижнения {труд, подвиг, награда за подвиг} изравна подавая. Дозде Севаст. (Севаст Арменопул. Книга 2. О царех римских)

Надсловие или увещание

Слышиши ли любоперниче, яже не точию слышати тебе лет есть, аще хощеши кафолическия церкви не сумнителныи последователь быти, но и веровав последовати тоя законом.

Доказание 6-е.
О почитании властей

Повинитеся убо всякому человечу созданию Господа ради, аще царю, яко преобладающу, аще ли князем, яко от него посланным во отмщение злодеем в похвалу же благотворцем. Яко тако есть воля Божия благотворящим обуздовати безумных человек невеждество. Ниже: но яко раби Божии всех почитайте, братьство возлюбите: Бога бойтеся, царя чтите: раби повинуйтеся, во всяком страсе владыкам: не токмо благим и кротким но и строптивым: се бо есть угодно пред Богом. (1 Петр. 2. Зач.58)

Увещание

Внемли велеумие, аще чювства имаши, к писанным выше, коль дивно и честно нарицателно имя властем, описует ни что ино токмо образ Божии, одушевлен самого царствующих царя Христа и законное настоятельство и правило живущим во вселенней, наипаче во Христа верующим народом. Сего ради и апостольская выше показанная уста, всех нас к повиновению и покорению тех увещевают и повинуют глаголюще: повинитеся убо всякому человечу созданию, Господа ради: аще царю, яко преобладающу, аще ли князем, яко от него посланным во отмщение злодеем в похвалу же благотворцем и прочая, и прочая.

Видиши ли коль нуждны и потребны начальствующии власти народом во вселенней живущим: яко же тело без души мертво есть: тако и вселенная без правления царска, или княженскаго в нестроение и запустение абие приходит, и скончевается и прочая, и прочая.

Виждь како святая церкви вседневно и вечер и утро повелевает молитися о царех, и за вся начальствующия: и пользу показует, яко тихое и безмолвное житие поживем: они войньствуют за нас, кровь свою проливающе яко воду: ты же и помолитися не хощеши, не скланяя слуха к священному писанию, учащему и повелевающему молитися за властей и честными титулами величати их и почитати.

Но еще тебе предлагаем довод непогрешимыи о молитве за начальствующия и аще и жесток еси, устыдишися упрям быти и непослушен.

Церковь святая, усты всех святых исконно непогрешно молит за начальство земское и не может таковыя догмы [уставы] отменити когда. Но и сама всепетая Мати Бога Слова такова церковнаго догмата не токмо не пременяет его, но и согласуется тому, последующи, яко Владычица мира. Свидетель тому достоверен: всецерковная песнь, повседневно, во услышание всем, глашающи умиленно, яко сладкопеснивая ластовица сицевая.

Блажим тя вси роди Богородице Дево, в Тя бо невместимыи Христос Бог наш вместитися изволи, блажени есмы и мы Помощницу Тя имуще, день бо и нощь молишися о нас: и державы царствия Твоими молитвами утвержаются: (На полунощнице повседневной, псалтырь след. 167)

Державы множественым числом состоимы и глашаются о них же молит всепетая дненощно, яко же выше изъявися. Ты же до толика себе самого являеши, упряма, яко не точию, неисчисленыи собор святых апостол и святых отцев представленыи нами, в вышепоказанных словесех к преполезной за вся человеки молитвы, и самыи молитвенныи уставов устав и чин богоприятныи, пренепорочныя Матере Господни не увеща, ни умягчи ваше не похвалное устоиньство, на всяк день или утро исконно гласимыи: о нрава жестокости грубости; о, и прочая, и прочая.

Прочее; что ино к твоему такову устойству приречем.

Разве апокалипсическая словеса, и во увещание и в страх спасительныи. [Иже есть] обидяи да обидит еще, и скверныи, да сквернится еще, и праведныи правду да творит еще: и святыи, да святится еще: и се гряду скоро, и мзда моя со мною, воздати комуждо по делом его:  Аз есмь Альфа и Омега и прочаяя. (Апокалипсис. Гл. 22)

Доказание 7-е.
О царе Константии, арианскаго мнения бывшем

Судия. Благочестиваго царя грамота да чтется тако:

Константин Константии благочестивыи вечныи победитель и венценосец, праведныи Август, прову судия здравия. Божиею благодатию отеческии получившу престол, о сем первее мне усильствовати требе, познаваю дабы еретическое сожитие изтребивше, святой вере нашей, совокуплен сущь, радовался весь свет и прочая. (В прении Афонасия [Великаго] со арием. Припрове судии)

Увещание из любовнаго по нам залога.

Смотри, друже, како святыи Афанасии, пастырь богомудрыи в разговоре о богословии: еже есть исповедати Сына Божия единосущна и сопрестолна Богу и Отцу и соприсносущна Святому и Животворящему Духу: а не тварь по Арию: о сем крепко и не премолчно мужествуя и исповедуя бяше.

А о церковнем титуле слышав возглас судии, еже возъименова его благочестивым и в грамоте вторично почтена слышав, тем же титулом, еже есть благочестивыи, не сумнителна себе яви и проста. Аще бы сумнение каковое было в егове мысле, молчанием не покрыл бы: богоревнивыи он: а яко слыша разуме молчанием заключи: убо видно показа себе не сумнителна и весма цела о наименовании цареве благочестивым.

Ты же хитрыи человече: еже ли хощеши согласна себе показати богомудрому церкве святыя пастыреви Афанасию, должен еси согласная тому и мудрствовати и глаголати, яко же и он: а не претыкатися разгласием. Да некогда на долзе дремля скончаеши в нем живот свои. От чего же да избавит ны Владыка Христос Бог наш, за многое неизчетное милосердие свое.

Доказание 8-е.
О царе Феофиле

Иже от высочайшия десницы Божия всемогущия вышняго Царя царем, Господа господем: им же цари царствуют, и силнии держат землю, им же велицыи величаются и могущии пишут правду, славою и честию венчанному, Богом поставленному, имя имущему, боголюбия самодержцу, царю и владыце, иже повелением и званием Божия строения браздодержателю греческаго начальства. Ниже.

Сие твердое и крепкое, и честное царство дал есть Бог в руце твои богоутверженныи владыко, и славою и честию венчав, боговенчанную главу твою. Ниже.

Сего ради помаза тя господьствовати Бог твой елеом радости, паче причастник твоих. Ниже.

Царь велик еси и самодержец и зело христиан, иже скипетры римскаго царства великаго по закону приим Христом, Царя царем, и Господа господем. Ниже.

Яко да сим богоутверженныи владыко и благочестивыи пребывая по достоянию и по правде велелепнаго твоего царства пребываеши исправляя слово твоея истины. Ниже.

И молим, дабы было долголетное житие твое, Богом поставленныи, и Богом венчанныи, владыко, поминаем же благочестивую твою державу, понеже убо и малыя сия книжицы списахом к вашему богопоставленному владычеству и господьству собрашеся во святом граде Божием. Ниже.

Всемогущая и всесодержащая десница Вышняго, да сохранит Богом поставленное твое царство, самодержавнаго царя и вечнаго владыки, и мирно да будет и многолетно твое царствие со всеми повинующимися тебе христолюбивыми воины и прочими людьми. Дозде из многосложнаго свитка. (Многосложное послание святых отец, 1955 лист, на обор.)

Блаженная же Феодора [царица того жена] отай верна бяше, да яко виде бывшее, абие отгна от церкви еретика патриарха, великаго же Мефодия вместо его введе с советом же его ради царя Феофила, та убо внутрь полат, милостынями же и прочими благими делы.

Патриарх тако же с прочими христианы упражняшеся на молитву и пение во бдениих всю первую неделю великия четыредесятницы. И по совершении недели, ответ прият патриарх от Бога, тако же и Феодора царица, яко спасеся царь Феофил и оттоле восприят церковь совершенное православие, и уставлено бысть праздноватися первой недели.

Но да видим, како спасеся Феофил, показа конец, яко в покаянии обретеся, внегда лобзати и прочая сотвори божественному образу. Дозде Никон. (Никон Черногорскии. Слово 38)

О вышеписаных нами честныи Илие: чаю доволно возмогл еси почювствовати о Феофиле царе и егове шатании на святыя иконы: но молитв ради святых Божиих угодников, вышепомянутых отцев: и теплыя ради веры и боголюбия жены его царицы Феодоры милость и прощение получи царь Феофил, и спасен бысть. Прочти о нем в синоксаре описание, ежели хощеши каковым образом ужасным спасен бысть, и ползу получиши велию.

Но святии отцы писателною тростию писаша к царю Феофилу и честно и зело учтиво послание еще в животе ему бывшу.

А святая кафолическая церковь послание оно в закон прия и повеле по всягодно прочитати, посреде соборныя церкве во услышание всем и общую пользу: да познают вси, каковым учтивым образом почитати достоит Богом поставленное царское достоинство и высоту самем Богом определенную.

Тойждь вышеозначенныи свиток повелено читати и в соловецком типице, си есть уставе преподобных отец Зосимы и Саватия, в седмицу сыропустную, по всягодно неотменно.

От сицевых вышеписанных богословных вин воньми себе Илие, честныи [хитрый] грамотниче, и не буди упорен, но согласная с кафолическою церковию и говори и умствуй, да себе самого спасеши, воспевающь и торжествующь, по апостолу, благовременная церковь Бога жива столп [есть] и утвержение истины. (Стих 1, глава 3, зач. 284) Дозде увещание.

Доказание 9-е.
О Анастасии кесаре евтихианине мнением

Царь Анастасии с радостию отцы приим. Ниже. Бяше бо любя черноризцы, аще и наважен бе от еретик и разврати православную веру. Ниже. Глаголя ко святому Саве, ты отче ничто же просиши, да что ради толик труд подъял еси. Отвещав старец рече: аз благочестивыи царю приидох семо, первие убо поклонитися стопам вашего благоверия, ниже молитися о святем Божии граде Иеросалиме и о преподобнем архиепископе нашем. Ниже. [И паки] Великии Сава рече: хощу зде озимети и достоин быти вашему поклонитися благоверию. Тогда царь ины игумены в Палестину отпусти, ему же озимети повеле тоу. И абие чернечестии старейшины блаженныи Феодосии и Сава, собраша мнози чернечество и советоваша и единым умом здумавше писание с молением послаша к царю имущо сице.

Писание молителное.

Боголюбивому и благочестивому Августу, самодержцу царю Анастасию, христолюбцу.

Моление от Феодосия и Савы архимандрит и прочих всех черноризец живущих в Божии граде Иеросалиме самом и около града Божия: и оба полы святаго Иордана, и во всех пустынях. Ниже.

Молим твое благочестие помиловати монастырь святыи Сион: да повелит твоя держава преставити обдержащей сей бури на святыи град. Ниже.

Да повелит твое благочестие утолити злобная сия безчиния, на святыи сей Божии град: и на архиепископа нашего Иоанна от врагов истины. Ниже.

Мир же Божии, превосходяи всяк ум да сохранит свою церковь и оставит пакость ей творящих повелением твоего державнаго царства. Дозде от жития святаго Савы.

О вышеписанныя благодатныя учтивости, си есть честных словес преподобных отец Феодосия и Савы: можно тебе престати молвити на ны, в наречении титула властем, в честь от нас возносимаго. Но видно от занравия, яко же и прочии согласники ваши не хощеши, согласитися в честной и богоугодной учтивости ко властем Богом уставленым, но поне покорити свой нрав: чюдотворным преподобной двоице отцем Феодосию и Саве: и всему вышеозначенному сонму преподобных инок: о нем же можно непогрешно рещи псаломское песнопение: Бог ста в сонме богов и паки в совете правых и сонме велия дела Господня и прочая. (Пс. 81,1,110,1)

Да негли, и о вас збудется Давыдово глашение: се что добро или что красно, но еже жити братии вкупе. (Пс. 132,1)

Ащели не можете умягчити давными времяны совесть, всего вашего согласия; но поне ты [Илие] и товарищи твои бывшии у нас, во общежительстве, покоритеся не нам, но богомудраго апостола Павла уставу непогрешимому, толь громко и благодатно учащему, не к римляном точию, но и к нам христианьская мудрствующим.

Воздадите убо всем должная: ему же убо урок урок: а ему же дань дань, а ему же страх страх, и ему же честь честь. Ни единому же ничим же должни бывайте: точию еже любити друг друга. (Рим.,13;7) Дозде Павлова словеса благодати Духа Святаго преисполнена.

Сицева наставления апостольскаго кто от правоверных послушати не хощет: кто, от иже страхом Божиим огражденых, покоритися тому не будет. Прочее убоимся честнии слышатели, да не к нам речется псаломническое глашение. Днесь аще глас его услышите не ожестите сердец ваших. (Пс. 94:8)

Таковыми благоуветливыми словесы, Божии пророк призывает, ны грубыя, к миру и согласию богоугодному и любви взаимнои друг другови и прочая.

Доказание 10-е.
О почитании властей

Прежде даже ответствовати нам от книги ответныя, трудов велеумных отцев наших, от вопросоответа о императорском величестве: ответ непогрешимыи во свидетельство предлагаем вам.

Сия форма: си есть образец учтивыи есть и вышеписанным по нам доказанием к вашему увещанию союзныи: да вообразится в сердцах ваших к честной и богоугодной учтивости почитанию богоданных и богохранимых властей.

По реченному от апостола Павла: несть бо власть, аще не от Бога, сущия же власти от Бога учинени суть таковая предложивше ответствуем. (Ответ 52)

Христос Бог во священном евангелии, научает глаголя: воздадите убо яже кесарева, кесареви, и яже Божия Богови. (Лук., гл. 20. зач.101) Сим спасительным его наказанием и мы грубии научаемся, яже в богослужение и в богоугождение надлежат благочестия тайньства, церковная уставохранения, спасителная дела, воздавати всеверно Богови. Тако и от Его вседержащия Божия десницы поставленному и славою и честию венчанному, всепресветлейшему державнейшему императору, всемилостивейшему нашему государю, должныя чести и покорения благодарения и всеверная служения, всеусердно воздавати. Сице мы и апостольскаго священнаго наказания научаемся, глаголющаго: Бога бойтесь, царя чтите: 1 Петр., гл 2. зач. 58. Сице мы и от святоотеческих, гласов и от прародителей и родителей наших навыкохом древлецерковное святоотеческое благочестие, в богоугождение, и во спасение душ своих, всеверно содержати. И его богоизбранное всепресветлейшее императорское, честнейшими гласы всеговейно почитати. Мы аще о внесенных от Никона новоопреданиих сомневаемся: но не сомневаемся о богопоставленнем самодержавстии, богохранимаго и богопомазанного самодержца. Но его боговенчанное и богопочтенное премудрое и всемилостивейшее величество всепресветлейшаго императора Петра Великаго, отца отечествия, богохранимаго самодержца, всемилоствейшаго нашего государя, всеговейно почитаем, и всеусердно прославляем и всежеланно благодарствуем и благодарствовати и почитати когда не перестанем. Мы его государьскаго благочестия не истязуем, но Господа Бога за его милосердое величество молим, по реченному у псалмопевца: Господи спаси царя, и услыши ны в онь же день аще призовет тя. Мы его императорскаго православия не испытуем, но всякаго блага его боголюбивому величеству доброхотно желаем и от Господа Бога просим. Тем еже в вопросе сем вопрошаеши о нелепом прочитании к некаким, и прочая. Но его богопомазаннем всепресветлейшим величестве, таковаго нелепаго причитания, или инаго нечестнословия не точию глаголати глаголати, но и слышати не хощем. И вопрошаемых таковых словес произносити ужасаемся. Мы и святейшего правительствующаго Синода не уничижаем, но честно почитаем и архиерейскаго достоиньства безчестными словесы не оглаголуем. Аще же от новостех каких, от Никоновых времен в церковь внесенных, сомневаемся и опасаемся и древлеправославныя церкве, святоотеческое содержание, безсомнително во спасение душ своих содержим. Но на их архиерейския высокия чины, мы премалейшии и последнейшии суда наносити не дерзаем. Мы и прочия от Бога почтенныя всероссийския градоправителей и военачалников персоны, должни не судити, но честно почитати, и Бога за них молити: яко за почтенныя от Бога, яко за радитили и правители государства, яко за верныя и доброхотливыя служители великому государю. Мы и прочия вся российския христианы осуждати опасаемся, по священному апостольскому заповеданию, сице глаголющему. Ты кто еси судяй чюждему рабу: своему господеви стоит или падает. (Рим., гл 14;4. зач. 112) Тем же долженствуем мы не прочия судити, но свое спасение разсуждати и соблюдати: и от Господа Бога просити мир вселенней даровати, и душам нашим велию милость. Дозде ответ отеческии.

Сицевым боговразумляемым, по нам, честным и велеумным боголюбивых отец наших ответом о его блаженныя и вечнодостойныя памяти его императорскаго величества, Петра Великаго, отца отечества, императора и самодержца всероссийскаго, советуем и просим тя благоразумныи Илие: и прочих старших, и до последняго вашего мнения согласных быти с наставлением апостольским и со всею кафолическою древлеправославною церковию. И союзно той и несумнително именовати и величати богоданными им титулами: и Господа Бога и Царя царствующих и Господа господьствующих молити и просити о телесном их и душевном спасении: и о всей полате и войньстве их. И не точию келейно и вседомовно молити, но и молением соборным общим молитися о победе на супостаты, яко же повелевает древлеправославная церковь. Яко да Господь Бог покорит под нозе их величества и безбожную бусурманскую измаильтескую гордость: и всю до конца махметанскую пагубную спесь смирит.

Наилучше же и величайше и благосчастливейше [дай Боже] даждь да вознесется рог: благочестивейшия государыни нашея ИМПЕРАТРИЦЫ ЕКАТЕРИНЫ АЛЕКСЕЕВНЫ, самодержицы всероссийския: и всемилостиваго цесаревича и великаго князя ПАВЛА ПЕТРОВИЧА: и одарит их всяким благословением и здравием на множайшая всесчастливая и мирная лета, лета и лета: по гласу кафолическия церкве: [иже есть сицевым] яко всяко даяние благо и всяк дар совершен свыше исходяи от Тебе, Отца Светом [Светов].

Сицевым братолюбным и многотрудным советом увещевающе вы любве ради Божия и общаго вам и нам спасения [его же ничто в свете сем честнейше любезнейше и наивышше и преполезнейши], запечатлевающе и окончевающе не претворно, и глашающе, сицевая даждь Боже даждь, да будет будет, аминь.

Копия с челобитной соловецких отец

Благоверному и благочестивому, и в православии пресветлосияющему, от небеснаго Царя помазанному, во царех всея вселенныя великому князю Алексею Михайловичу, всея великия и малыя и белыя России самодержцу.

Биют челом нищии твои государевы богомольцы соловецкаго монастыря: келарь Азарей и казначей Геронтии и священницы и диаконы и соборные чернцы, и вся рядовая и болничная братия, и служки и трудники вси;

По предании Государь Никона, бывшаго патриарха, и по новоизложенным его книгам проповедуют нам ныне его, Никоновы ученицы, новую незнаемую веру, по своему плотскому мудрованию, а не по апостольскому и святых отец преданию. Ея же веры не точию мы, но и прадеды и отцы наши до нас, такия Никонова патриаршества и до сего времене слыхом не слыхали. А в коем православии прародители государевы скончалися и многия святии отцы и чюдотворцы наши Зосима и Саватии и Герман и Филип митрополит, и прочии святии отцы угодили Господу Богу, и ту истинную нашу православную веру они похулили и весь церковныи чин и устав нарушили и книги вси перепечатали на свой разум богопротивно и развращенно. А что Государь их непотребство и развращение в тех новых книгах объявилось книги сами, мимо нас, обличают: лист 766, Дамаскин иподиякон в слове своем в неделю 3-ю: Святаго Поста повелевает нам, православным христианом, ходити по татарски, без крестов, и пишет сице: Кая рече полза, или кая добродетель есть носити кому крест на раме своем, и прочая. Дозде из челобитной.

Третий пункт
Яко бы мы, во время иеромонаха Неофита с ним разглагольства и камисии отреклися, яко сами не покрещены и других не покрещеваем.

Ответ на третий пункт, А

Всяка лжа от истины несть, яко же священное гласит слово: сице и по тебе, велеумныи Илие, может решися; глаголеши, яко отреклися: не крещены и яко бы и других не покрещеваем. Явственно ложь твоя может обличена быти книгою ответною {Поморские ответы}, что уже обличается в ней 102-м ответом, данным иеромонаху Неофиту, всему духовному их синоду. Уже весь духовныи синод и вси господствующия персоны вся Россия известна о всех наших состоянии, а ты лжеши, хотех сказать бредиши, яко бы мы отреклися крещения и других не покрещеваем. Аще бы о крещении не гласило слово по нам ответное, имелося бы по тебе рещи яко умолчахом о второкрещении, ащели толь звонко гласит, яко вся российския концы извествуются: к тому же и мы грубии со сверстники своими и имянно с надежным братом Мануилом Петровичем и прочими товарищи удостоихомся от отец наших со ответною книгою послани быти и самоустно своими языки, елико Бог вразумил, правость святоотеческаго согласия свидетельствовали: и вспять к домови благополучно возвратившеся не посрамлени: о сем вся Россия исполнися известия, а ты, Илие, говоришь, яко отреклися крещения и других не крестили.

Прочти книгу ответную, и в ней ответ сто вторыи, и уверишися не ложно: яко же камень верженыи на воздух скоро возвращается к пославшему и тако и лживое, и вероятия недостойное, слово возвращается и падает на егову душу, и зело вредит. А истинное слово не токмо не вредит истину вещающаго, но и честию венчает его и веры достойна словесе его показует, и утешает тем же.

[вонми] Слышателю: Ибо Господь наш Исус Христос многим апостолом священства неимущим повеле крестити. Ибо от Христа и апостол свидетельствуемо есть, яко простым крестити, вне присудствии священства, повелевается: крестил Филип диакон: крестил Анания Павла: крестил Галактион святую супружницу свою Епистимию: крестил святыи мученик Мина Ермогена: сице простии сущи крещаху в неприсудствии священника. И номоканон свидетельствует сицево: аще кто есть священник неискусен, а другии несвященник искусен же, сему паче священника праведно есть помышления приимати и правилно исправляти: наполе напечатано старча исповедь прията.

И сему действители бывше святии отцы не священницы суще: преподобныи Антонии Великии: Пахомии Великии: Сава Освященныи, еще до священства братию собрав, помышления приимаше: преподобныи Иоаникии Великии, не священник сыи, помышления приимаше: святыи мученик Христофор две жене блуднице кающеися прият и прощение им подаде.

И аще вышеписанная наша доказания свидетельствуют о крещении и покаянии, и иноков, мужей и жен простых: известно буди вам: яко вся таковая, внутрь нашего общежительства, делом исполняхуся и совершахуся: не пресечно и непременно.

Престани прочее празднословити, хотех сказать клеветати, да не вменится тебе в великии вред душевныи, но паче яко велеумен не полагай в забвение апостольскаго наставления, глашающаго: со страхом жития вашего время жительствуйте и прочая. (1Петр. 1, зач 58)

Дозде третии пункт.

Ответ на третии пункт, В

В вышшем ответе ясно показахом, яко второкрещение в нас действително совершаемо и исполняемо над приходящими к нам. По новопечатным же книгам творимое, яко сумнителное отлагаемо. Но от страны Ильины неутолимыи ропот: поморцы отреклися крещения, всем и везде наслышает, по безбоязни вышняго, и всем право судити хотящаго Бога нашего: тем же долженствуем мы уверити его и вся честныя слышатели не ложным, но праведным решением.

Во время камисии над нами бывшей: случися двум от братии нашей в допросе быти и по своей простоте сказали о себе, яко прекрещены снова, по старому: а о других де мы не знаем. Камиссия же услышавши прекрещение, скоро уведомляет в синод и оттуду указ посылается, повелевающии всех пустынных допросити: могут они вси новокрещены быти: и оттого часа стала быть волокида всем в допросе, волоччися старым и юным безотговорно. Таковая необходимая теснота коснулася и до нашей худости: а мы в то время случилися в канцелярии под караулом: и допрос взяхомся. Нужда нам тогда наста, сказывать сугуба: первая о своем имени: вторая о действители: от кого и когда крещен. Но Бог благии не оставляет раб своих. Канцелярист молод, но умен, подружил, вместо Ивана мирскаго по нам имене прописал и молвил вслух Даниил Матфеев: и тем словом свободихся от печали: а крещена о себе самом сказах: во младенческом возрасте старцем Варлаамом: время точию отменив, а правость святаго крещения не потаил есмь. Еже ли бы не отменил времени крещения, то во истязание излишное впал бых: где таковыи действитель ныне находится и коей он обители или епархии, и прочая коварства произошли бы. А оныи отец Варлаам в живых находился тогда, и нужда бы была нам общая с ним и теснота крайная. Того ради, с мысленным словом Богу помогающу, избыхом от синодальныя тесноты: а в таковых догадливых словесех боговразумляеми, неповредихом благочестия и свидетель на таковыи, редко бываемыи случай в христианех, честен и достоверен. Преподобныи авва Дорофей, в сочиненной от него книзе, в слове о лжи, поучение 9, на листе 85 свято учит сице.

Святыи Авва Дорофей

Есть же, яко бывает нужда вещи, и аще не скрыет кто мало, приходит вещь во множайшее смущение и скорбь. Егда убо таково обстояние будет и видит кто себе принуждаема, сего ради изменити глагол, да не будет, яко же рех множайшее смущение и скорбь или беда, яко же рече авва Алонии, авве Агафону: Се два человека при тебе убийство сотвориста и един бежа в келию твою, и се князь и при его и вопрошает тя, глаголя: при тебе ли убийство бысть. Аще не солжеши предаси человека на смерть.

Егда убо великая нужда приключится, должен есть кто ниже сице без печали быти: но каятися, и плакати, пред Богом, и имети таковое яко же время напасти. И ин же сие часте, но единою многих деля. Яко же бо и офириакии {териак — лекарство} и чищении внутреннем, аще на часте пиема, вредят, ащели же испиет кто единою летом, ради великия нужды, ползуют его. Сице должен есть кто, приимати вещь сию, да аще нужды ради восхощет изменити глагол, не часто, но что убо да есть единою, многих ради, аще видит, яко же рех, многу нужду: и самое же то еже временем, со страхом и трепетом, показуя Богу и произволение свое и нужду, и покрыен будет: зане и в том пакость приемлет. Дозде Авва Дорофей.

Слышиши ли Илие: чаю слышиши, како богомудрыи авва Дорофей не согласует твоему мнимому зазрению, ни порекует ны грубыя отречением гаждая, но отечески непогрешно во время напасти глагол отменити советует, которыи мнимаго по тебе отрицания не творит: тем же благодать всесилному Богу, не попустившему ны грубыя над’силу искуситися, но со искушением, сотвори и милость, яко благ, с нами грубыми. Тем же друже и брате время ти уже отложити глагол небратолюбныи и тебе самого не пользующии: еже пишеши, на мнозе молву творити, яко отреклися: но любныи и дружескии: паче же той самыи, его же Христа Бога нашего уста изрекоста не како к своим его учеником, иже есть сицевыи: вы друзи мои есте и прочая. (Иоанн 15;14)

Дозде ответ на третии пункт.

Четвертыи пункт
Некрещеных умерших поминаете и псалтырь говорите по таковых.

Ответ на четвертыи пункт

Нужда наша влечет ны грубыя, и на четвертыи пункт ваш: ответ творити, не яко некрещеных, по вам мнимым, отцеве наши уставиша помяновение творити: но обещевающихся и готовящихся всегда и намерение не сумнителное в сердцах своих имущих: во одежду нетленну, си есть святаго крещения удостоитися, но суеты многоскорбнаго века сего и тягости безмерныя, и не хотящих в вавилоне суетнаго века сего мешкати, удерживают безмерно и надсилу томят. Из таковых убо, добрых рачителей: волею создавшаго и Бога, преставится: и сродницы таковаго отец или мать, или кто от своих ему принесут во ограду братскую, и сиротскую, по силе своей на помяновение: многажды же и тело умершаго или умершия привозят во ограду и близ сродников своих погребают е. И таковых верных и усердных мужей и жен и благотворительствующих: соборным советом отцы наши Д. В. [Даниил Викулович] и А. Д. [Андрей Дионисьевич] повелеша, за усердие их и крепкую веру, к целости благочестия, и псалтырь говорити по таковых, кроме панихид и канона за единоумершаго: а прочая навершати и поклонами и молитвами келейными и милостынями к нищим, ко вдовицам и сиротскому множеству, по возможности дающаго.

И тропари, по вам оглаголуемыя, а по нам форма или образец, не нами уставленныи, но от отец наших и по потребе вещи: на коейждо славе говорит приличен есть. [сицевыи] Покой Господи душу усопшаго раба твоего, или рабы имярек, елика согреши, яко человек, во вся дни живота его, в слове и в деле, и в помышлении: прости ему всяко согрешение волное и не вольное, и избави его вечныя муки, огня негасимаго, яже есть геены несветимыя, червия неумираюшаго, скрежета зубнаго и прочих, конца не имущих, мучении: [наконец глаголет.] Удостой его небеснаго и конца не имущаго царствия небеснаго, со всеми святыми твоими, яко благословен еси и препрославлен со Отцем и со Святым Духом ныне и присно и в нескончаемыя веки веком, аминь.

Дозде форма, то есть образец святоотеческии.

К вышеписанным еще, любве ради Христовы, прилагаю тебе повесть, вероятия достойную: Патерик египетскии, неложно, гласит сицево.

Некто христианин имея по закону жену и едину дщерь и изшедшим им в пустыню жити богорадно, и разделившим имение свое в три части: едину часть самому си: вторую жене своей, третию же дщери своей: которая еще сущи случися быти не крещена, тогдашних времен бе обычай в христианех, не крестиша до полнаго возраста. По времени некоем случися дщери ею в болезнь впасти и мало болезновавши умре. Отец же ея имати в печали быста о дщери своей и наипаче за ради сего, яко некрещена обретшися умрети, и в печали возблагодушествоваша: и койждо свою часть и дщере своея за душу умершия дщери своея, раздаста нищим и сиротам, и плачущим очима моляста Бога о дщери ею. Пребывающим же им в печали о своей дщери, и молящим прилежно щедроты Божия: слышит глаголющь к нему: не печалуй отныне о дщери своей, уже бо крещена есть. Он же слышав умилися душею: но обаче преодолеваем печалию о дщери своей тужа и печалуя, пребываше яко некрещена отъиде ко иному миру: еще ему прилежне моляшуся. Слышит вторицею глас глаголющ к нему: не тужи о дщери своей, уже бо крещена, ащели сумнишися иди откопай гроб ея и уверишися, яко преложена с крещеными: он же шед откопа гроб ея и ничтоже обрете, уверився пребых прочее, хваля и славя Бога, творящаго дивная и преславная с рабы своими. И о сих дозде.

И сия предложивши вам, Илие, из любве трудими: яко Бог благ и человеколюбив есть и солнце свое сияя на злыя и благия и дождем дождит на праведныя и на неправедныя и всем, по коегождо вере и добродетели, воздает благая. Сице и в нас творимая по уставом святоотеческим, яко благ не имать презрети: но благостию своею неизмеримою во свое время воздаст. Ты же, аще мниши себе разумна, остави судити и зазирати другия, а наипаче в нас святоотеческия обычаи и предания исконныя, отнюдь какову зазрению неподлежащия:  и никогда ни от кого разумных под зазрением бывшая, разве удивления: никогда и прочая, и прочая.

Пятыи пункт
За живых некрещеных молебны поете, яко неприлично есть.

Ответ на пятыи пункт

Святаго апостола Павла уста, Христова суть уста, уста Златоустаго Христова суть и Павлова уста. Той к Тимофею в первом послании, в зачале 282-м, свято учит глаголя сице.

Иоанн Златоуст: беседа шестая на листе 2413: свято учит таковая: Молю убо прежде всех, творити моления и молитвы, ходатайства благодарения за вся человеки: за царя, и за всех на власти сущих: да тихое, и безмолвное житие поживем, во всяком благочестии и чистоте. Сие бо добро и приятно пред Спасителем нашим Богом, иже всем человеком хощет спастися и в разум истиныи приити. Дозде святаго апостола Павла и святаго Иоанна Златоуста словеса: и прочая.

В вышеписанном по нам втором пункте или ответе, и в десятом доказании: писахом к вам, велеумныи Илие: засвидетельствующе, яко святая соборная и апостольская церковь, усты всех церковных учителей, отцев святых, начальствующия лица, царей и великих князей: непогрешимо и богоугодно честными титулами, а имянно христолюбивыми, боголюбивыми, православными, благоверными, державными: и прочими подобными нарицающе и почитающе бяху: яко же самая вышеписанная по нам свидетельства показуют, и явствуют. Ты же до толика разумен и безпамятлив еси: чрез всякую христианскую совесть: аки ничесоже когда видев в писании святых или от разумных мужей или от разумных мужей и учителей церковных о властех учтивая и честная нарицания: толь странно и неуветливо пишеши таковая и не стыдишися пишущь. За живых некрещеных молебны поете и прочая. О, грубости и понеже можно нетрудно разуметь, яко вышеявленная нами свидетельства и увещания не возмогоша умягчити вашего права: другая неложная и самеми делы творимая во свидетельство: яже суть.

Первое показание

Святому епископу Ростовскому Кирилу ходяшу в татары с честию за дом Святыя Богородицы. Ниже.

В тоже лето разболелся сын царя Берки, един бе у него: царь от врачев не обрете никоея пользы посла в Ростов по святаго владыку и обеща ему дары многи, да исцелит сына его. Владыка же прежде повеле пети молебны в Ростове, по всему граду: освятив и воду и пришед в татары исцели сына царева.

Слышиши ли Илие како святыи епископ Кирил, не согласуя тебе или напротив дея: за толь поганаго татарина или назвать варвара, сына царя Берки, некрещена суща, и молебны несумнително пев и воду, за ради его здравия, святив: Бог же благии хотяи всем человеком спастися подаде ему здравие и крепость: нам подая вину [образ] за таковыя несумненно молитися и всякаго блага им хотети, и желати и прочая.

Второе показание

Прииде Ахмыл на русскую землю и пожже град Ярославль и пойде к Ростову со всею силою. Ниже. И бежаша князи Ростовстии и владыка Прохор побеже. Игнатии же извлек мечь и согони владыку и рече ему: аще нейдеши со мною противу Ахмыла, то сам посеку тя: наше есть племя и сродичи. И послуша его владыка возвратися: изыде со всем клиросом в ризах, взем крест и хоругви, пойде противу Ахмыла. А Игнатии пред кресты со гражданы: и взем пеш царскую кречеты, тубы и питие, край поля и езера ста пред Ахмылом на колену и сказася ему: древняго брата царева племя, а се есть село царево и Твое, Господи, купля прадеда нашего, идеже чюдеса творяхуся Господни. Ниже. Рече Ахмыл, ты теш подаеши, а сии кто суть в белых ризах и с хоругвями, егда сещися с нами хотят: Игнатии же отвеща, то богомольцы царевы и твои суть, и да благословят тя и се носят божницу, по закону нашему.

В то время у Ярославля в тяжце недузе бысть сын Ахмылов, вожаху его на вознех: и повеле привести сына, да благословит его. Владыка же Прохор святив воду и вда ему пити и благослови его крестом и бысть здрав. Ахмыл же виде сына здрава и сниде с коня противу крестов, и воздев руце на небо и рече благословен Вышнии, иже вложи ми в сердце идти дозде: праведен еси, господи, епископе Прохоре, яко молитва твоя воскреси сына моего: благословен же и ты, Игнатие, иже упасе люди своя, и соблюл еси град свой: царева кость наше племя. Ниже. Ахмыл же взя теш у Игнатия и целова Игнатия и поклонися владыце, взыде на конь, отъиде во свояси. Игнатии же проводив Ахмыла и возвратися со владыкою и с гражданы возрадовася, и певше молебны прослави Бога.

Что к сим, вышепоказанным нами, представити хощеши: Илие, сложишилися и таяжде мудрствовати будеши, свыше представленым по нам, древним Прохором епископом и честными чиновными гражданы и согласная мудрствовати: аще ли инаку мысль на сердцы своем утвердиши, погрешиши имаши: и не грехом просто малым, но и зело великим и тяжким, и Бога благаго прогневающим, не согласным с верными древними россияны и благочестивыми.

Видиши ли спорниче: целым градом честь воздаша царю Ахмылу, неверну сущу, и  с дары и почести весь духовныи чин, епископ со всем клиросом, к сим и молитвы прилежны и чиновны воздаша Господеви за ня: и священною водою, не точию покропивше царева сына, но и напоивше поганна, и благословивша осенением креста. Что такову действу последовало: не ино что: точию от благаго Бога, иже всем хощет спастися, точию здравие болезнующему сыну цареву и от тяжкия болезни свобождение: ты же не токмо помолитися за таковыя не хощеши, но ни честным словом приличным власти почтити его изволяеши: забыв апостолом реченное, емуже честь честь и прочая. (Рим. 13:7) Не являя в сицевых грубость вашея страны и крайное неосмотрение закону церковному и апостольскому: несогласие с древними чиновными христианы, с великими князи и архиереи и священники: и со всею полностию народа российскаго, со всею и прочая. Ты же самому себе последовати и верити навыкл еси, не ведыи, ни осмотрев писаннаго, горе о себе мудрым и пред собою хитрым, падают яко листвие. Притча 1: и 21. Авва Дорофей, поучение 5, лист 53.

Третие показание.

За премногую святаго [чюдотворца] Алексия добродетель и богоугодное житие всюду слава происхождаше о нем. Такова слава достиже и до нечестиваго царя Чанибека, сына Азбекова, иже имяше царицу именем Тайдулу: и та бяше три лета слепа очима и прочим недугом немощна бысть, и ни от какова врачевания ползы не може обрести.

Слышаху же о святем Алексие, елико Бог творит его ради тогда той безбожныи царь Чанибек и царица  Тайдула прияша веру о нем, яко послушает его Бог молчшася. И посылает с молением к великому князю Иоанну Иоанновичу и к сыну его великому князю Димитрию, яко да послют к ним, во орду, человека Божия, святителя Алексия: такожде и самаго того чюдотворца Алексия моляху, да посетит болящую царицу и Бога молит о ней и от немощи свободит и беса от нея ижденет, и очима прозрение даст ей: ниже. Сего Божия служителя пустите к нам, его же молитвами, аще исцелеет царица моя, мир имети имаши со мною. Ниже. Великии князь Иоанн Иоаннович возвещает человеку Божию, Алексию, и молит его не обленитися, но идти ко царю. Святыи же Алексии слыша сие слово и тяжко си внят и рече: сие прошение и дело выше меры моея есть, но обаче верую, иже слепу от рождения прозрение даровавшим Богу: яко аще кто с верою просит не презрит его Бог, идущу же ему во Орду. Ниже. Слышан бысть у царя приход святаго и абие царь сретает его: и с сыном своим Бердебеком и с прочими сыны своими и со всеми князьми и вельможами своими с великою честию и дароношением: и бяше видети реченное древле лев и агнец вкупе почиета. И тако архиерей святыи молебное пение совершив и свещу воска онаго, яже сама от себе возжеся: и тамо той свещи возжжене бывши, и покропив царицу священною водою и в том часе царица [Тайдула] прозре. Видев же царь [Чанибек] и прочии с ним велможи татарстии таковое великое чюдо велми удивишася вси, хвалу же и честь велию дароваша святому [Алексию] и дары многими одариша его: купно же и всех священников, и прочих служащих святому: и отпущен бысть с миром. Дозде от жития святаго.

Чаю слышиши и верити можеши, Илие, святому и им  чюдесно, и богопритно деемым: коликим преславным чюдесем делатель бысть чюдотворныи он, архиереи Алексий:  и ни от себе ни собою, но помощию сотворшаго небо и землю: Спаса Христа. Первое яко прибыв, чрез надежно обрадова немощную царицу, купно же и царя: радостнотворным посещением, яко Божии сущь архиерей. Второе: яко и молитву о ней прилежну сотворь, к вышнему Царю царей, тоя ради, и от тяжкия и неудобьстерпимыя болезни свободну содела. Третие: и лютаго велиара, лукаваго врага диавола, зело томящаго ю, избави: и над всеми сими щедротам Божиими и заступлением пречистыя Его Матере, и Госпожи Царицы, царице: сладкии свет очима ея дарова, и светло и ясно зрети ю сотвори: и весь их царюющии дом от первых и до последняго раба в нечаемое удивление приведе.

Ты же христианин сыи, таковым неописанным милосердием сотворшаго всяческая облиставаем и малыя и кратчайшая о них молитвы принести не хочеши: неблагодарна себе являя, о благодатели и прочая.

Четвертое показание

Поведаю вам братия: первое един аз приидох на место сие святое. Живущаго никого же не имам на сем острове, и поставих крест и малу хижу, покоя ради телеснаго: таже молитвенныи храм, сиречь часовню. А живущии тогда именовахуся, около езера Онега, лопяне и чюдь и сташивая сыроядцы близ места сего живяху. По мале времени прииде ко мне муж, лопин старейшина, нося на руку отроча, слепо от рождения, и глагола ми: да сотвориши сего здрава и отъидем от острова сего, идеже повелевают нам отроцы твои. Аз же о словеси сем удивихся и моление сотворих о нем ко Господу Богу и Пречистей Его Матери, и взем отроча и молитвою иерейскою освятих его и покропих святою водою и приложих ко образу Владычню [и абие] отроча оно прозре: муж же той отъиде с радостию. Аз же о таковом чюдеси прославих Бога. По мале времени той же муж прииде ко мне и принесе ми нечто от имения своего и от брашен: аз же едину кожицу еленю и мало нечто от брашен взях у него, и молебная соверших о нем ко Господу. Муж же той предреченныи кланяяся и глагола ми: с тобою суть живущии отроцы, на месте сем, жен и детей наших зело биют жезлием и отсылают от места сего: и о том поведа ми, яко они слышат звон от места сего. Аз же отпустих его с миром: и о всех [сих] благодарих Бога. Дозде от жития преподобнаго Лазаря Муромскаго и Обонежскаго, бе в лето 6699{?} {1191{?}; 1391 см. жит. Дм. Рост.} марта 24.

Видиши ли [Илие] яко боголюбивая душа: преподобныи отец Лазарь от имене своего и мертв и связан толкуется: той толикии и таковыи отец не презрев лопина, суща варвара, молящася о сыне младенчище его. И молитвою прилежною помолися о сыну его и Богови Святому и Матери Его, Ея же молитвами, по гласу церкве святыя державы утвержаются: и покропив его святою водою: и не точию се, но и ко образу пречистаго Владыки Христа приложив его. И Бог благии и человеколюбивыи своего создания не презре и яко же древле от чрева матерня произшедшу слепу зрение дарова: яко и сему младенцу лопску сладкии свет зрения, яко милосерд, подаде, и отца и детища обрадованна и благодарна к домови отпусти. О, конечныя благости Твоея Христе, о, неисповедимых щедрот Твоих, и крайняя милости, на своем создании, Исусе блаже.

Ты же велеумныи Илие: и помолитися ленишися [не хощеши] и другим к той же лености виновник бываеши: к другим и прочая.

Шестый пункт зазрения.
Масло древянное в лампадах жжете и свещи от некрещеных приемлете и прочая.

Ответ на 6-й пункт
Мед, масло древяное и воск из неверных язык приходит в Россию: и покупаемо христианы в славу Божию употребляется и освящается веры ради невидимою Христа Бога нашего благодатию. Свещи же сами про себе строим и обычныя и болшия и местныя: а с торгу не купим, разве у христиан. А кои свещи от боголюбцев от Москвы или Питербурха, присланныя, по вере пославшаго, без сомнения и неиспытно, приемлем, ови местныя от белаго воска строимыя, и златом и серебром украшенныя, и различными шары, си есть красками усвечены, без омысления приемлем и в славу Божию посвящаем: и в праздники Господьския и пресвятыя Божия Матере и святых апостол и святителей и прочих святых употребляем, ничтоже сумнящеся, но за благое даяние добрых и честных милостивых подателей непрестанно Господа Бога молим, по писанному: непрестанно молитися, о всем благодарите. (1 Сол.: 5,17, зач. 273).

Ты же зазирателю [Илие] и в сицевых не умолчал еси: да не поставит ти Господь во грех такова зазрения.

Однако должен еси взаимно и ты от нас вопрошен быти. Откуду получаете и вы воск и свещи и ладан: не без свечь служиши должныи канон молитвенныи, или без кажения обычнаго всем, и масла, и свещь должное правило содеваете. Аще ли не от ангел и ты получаеши вещи таковы и в действо производиши я, но от подобных себе человек: равно и мы человеки от человек получаем потребныя вещи, но во славу живаго Бога и во свое по нам, или наше спасение творим. Аще ли паче чаяния: свечь и масла в славу Христову не употребляеши, чесо ради и ропщеши на творящия, видно показуюши себе не опасна суща, зазирающа свещи и масло и ладан употребляти в славу сотворшаго небо и землю, Давыд гласит: псалом 145,6.

Замолкни прочее с таковыми ти нравом и обычаем всему христианству не согласующим помолчи и прочее.

Седмыи пункт зазрения.
Совокупльшияся браком до познания веры по крещении блудническими нарицаете.

Ответ на 7-й пункт

Яко вся лжа от истины несть, глаголет Богослов: 1 Иоанн. 2. стих 21; зач. 71. Тем же не надлежит ти порицати [Илие] якове мы по вам совокупльшихся браком до познания веры блудническим нарицаем. Вемы убо многих не блуднически сходящихся, но чином настоящаго гражданства, в Никонове же предании и вере суще. За что или сих ради и сумнителен нам есть брак той и не достоверен ради в нем прибывших новшеств и премен, которыя и описаны во ответной книзе нашей {Поморские ответы} в ответе пятьдесятом, в статии 28. А еже ли кому случится приими во христианскую веру древняго благочестия: и несумнителным святым крещением обновитися, мужеви и жене, и тогда законно же им долженствует и обновитися православным древлецерковным чином брака. Да будут оба по апостолу в плоть едину (1 Кор.: 6) [и паки] тайна сия велия есть. (Ефес.:5;32) Но горе нам не стяжавшим грехов ради наших и стяжати от невозможных есть в настоящее, плача и слезам виновное [достойное] время, православнаго епископа, и священника: сего ради лишаемся и неволею или не хотяще таковыя преполезныя вещи и общаго всех человек блага, священства: яко збыватися писаннаму во пророце: скончатися имать рука людей освященных. (Даниил. 12) Что в збытие не ложно и прииде вещь сия. Сего ради разумнии людие и боящиеся Бога: чистотою и целомудрием украшаются, яко брат и сестра в сокровищи сердца своего благую мысль носят чистоты и тверди бывают благодати Божией, урепляющей таковыя, беззазорное житие препровождающе.

А в вашем феодосиевом согласии, яко же слышим послабляется таковым жити, яко муж с женою законом спряженною, и в грех не причитают: а законом церковным таковии не спряжени [счетани] суть. Благии таковым делателем судия правдивыи и есть и будет.

Мы же зде готовыми словесы заключаем.

Потщимся в страсе Божии, и сетовании и плачи благочестно житие препроводити, памятствуя и не забывая никогда же: во дни и в нощи, седя и лежа, в дому и в стогнах, в церквах и везде поучающеся, страшнаго и трепетнаго предстояния судищу Христову, идеже царь и князь, воин, гражданин, духовныи инок, богат и убог. Вси равне и не обиновенне истязани будут, вси до праздна слова, даже до помысла тонка и воздадят слово. Ни что же там оставят без истязания и казни ни что же бо скверно и нечисто внидет в царство небесное. А еже страшнейше, еже отчюждену сущу от Бога и обличену пред всеми: не стерпим студ и всегорчайшая мука. Ея же да сподобит нас Господь избегнути, и получити царство небесное. Дозде из книги Альфы и Омеги: о страшном суде Христове, глава 66.

Осмыи пункт зазрения
По крещении на третии день о прежних гресех исповедь чините, а не прежде.

Ответ на 8-й пункт

Благодатию Христа истиннаго Бога нашего знают в нас им же вверися знати и чины и порядок и время и како и когда и чрез кого чин исповеди творити: и совершати богоугодно во спасение человеческих душ. Ты же [подвижниче] до толика дерзаеши не опасно, яко же и обычно ти есть зазирати нашу страну, и прочим по тебе: яко и о времени исповеди душ человеческих, невинных винити ны твориши, аки незнающия, по мнению твоему, на сию и чина и времене потребна. О, дерзости и незнания конечнаго своей винности. Оглянися на свое прямое и крайное неведение: яже вышеписанныя нашея страны ответы и решения вопиют и ваше новоумствование, и со святыми древлецерковными книгами несогласное разсуждение порицают и прочее и прочее.

Девятыи пункт зазрения
Пред крещением не повелевается вами четыренадесяти дней поститися и не постятся.

Ответ на 9-й пункт

Глаголеши: аки бы не повелевается в нас, хотящим креститися, пост четыренадесятныи исполняти, яко же глашают на ны ваша уста: а нам грубым и во сне того не видится, что ваша уста на яве на нашу страну плетут. Не можеши ли поне чрез единаго по евангелию [2 Кор.: 13;10(?-1)] правдива же свидетеля представити или чрез двоих доказати или триех: без них же не может стати глагол: аще ли свидетеля не можеши обрести, яко же и не можеши, то лучше ти Павловых уст, аки Христовых, послушати, глашающих: отложите лжу, глаголите истину кождо искреннему своего. (Ефес.:4;25; зач. 227) А поне же обычно ти есть на нашу страну посягати можете, по своей грубости [дерзости], и не просто святых, но и апостолом: верховныи бо апостолов Петр не сохранив будет по вам правила четыредесятнаго, но три дни точию пред крещением повеле Клименту [последи же бывшу папе великому Риму] со Акимом и Никитою поститися, а не 40 дней, по тебе: зазри и сему, аще силен еси толику и такову сущу велику чином и достоинством, напротив тебе творящу: и таковая творяи он неповинен есть и не подлежит зазрению [вины ради благословныя, еже есть проповеди евангельския: и прения с Симоном Волхвом за истину] ибо и в нас, подобно таковым, случается и зазору не подлежит [не подаст] вещь.

Тем же престани друже подзирати и зазирати деемая во отеческом по нам состоянии и случаях творимых в разуме и правилно совершаемых во славу Божию. Однако же, яко человек, за малодушие осмотри в житии священномученика Климента папы Римскаго, в минеи четией рукописнии, месяца ноемврия, в 25 день известишися правдивыми доводы, и сам себе в таковых опаснейшии будеши, и прочии по вам.

Десятыи пункт
С мирскими пиют и ядят: а настоятели не истязуют ни исправляют и за пиянство не ползуют, как надлежит

Ответ не 10-й пункт

Напрасно чрезмерствуеши Илие, глаголя на страну нашу сицевая: с мирскими пиют и ядят и пиянствуют, дерзновенно осуждая нашу страну, от толь дальнаго разстояния не помышляя о себе, яко в толь многом народе своего согласия не аз не быти под порицанием сим пиянице какову: человецы бо суще подпадати могут, порицанию такову за мнение фарисеом сравнителное. Блюстися потреба, да не уподобимся фарисею, его же Христос Господь, во святом своем евангелии, объявляет глаголюща несмь, яко же и прочия безумныя глаголы: пощуся три краты всю десятину даю и прочая еговая. В нас же аще кому и случится, и то болшее во отлучке, погрешити [в винном напойстве] и когда ведом учинится и стязуют таковаго и штрафуют, не точию поклонами трапезными, и конечно не оставляют без исправления погрешившаго. А сверх того у нас, по всягодно неотменно, во весь великии пост, за трапезою братскою стоят на поклонах, за вся годовыя случающияся недостатки и наконец, ходяще по всем столам, прощаются, обходяще, и таковым образом очищающе совесть свою и веруют прощение прияти от Бога. Ты же, пребывая, осуждаеши всенародно, обличая невинна, себе мнящь: блюдися, да не к тебе речется евангельскии он глагол: в чюжем очеси мал сучец видиши, а в своем оце, и целаго бервна не чюеши [Матф.:7;3. Лук: 6;42]: и не точию по нам братию осуждаеши, но и настоящую старшую братию порицаеши, а самого себе не чювствуеши, в грязи вчера бывши и смертию супруги своея едва омывшася: едва и прочая.

Престани прочее судити другия недостатки: остави судити единому хотящему разсудити люди своя в правду.

Хотел бых к тебе рещи и не вем аще тебе угодно явится. Поревнуй друже возгрети давными времяны, обещанную Игнатием Трофимовым, мирную с нашею страною любовь и согласие, на чесом зависть и писмо данное ему от отец наших, по егову прошению, и обещався не сохрани ю. А писма копию миротворнаго осмотри, вложенную ниже ответных сих наших глагол, известишися верно. А друзии не ложно от вас утвержаются глаголюще: яко при самом исходе души своея ужаснувся от нечесого: повеле раздоры не имети с нами, сему и ты поревнуй о ползе согласия, да будеши подлинныи Илия новыи, благих сих ревнитель и именем и вещию.

11 пункт

С новоженами общение имеете.

Ответ на 11-й пункт

Мы уже от давных времен сия заповедь отцем нашим подражающе храним. Никакова общения с новоженами не имеем: всуе и туне зазираеши нам, всяк камень небратолюбно подвижа на ны, не веси ли, яко опасность велию имеем и уже долговременну: разве тех, которыя самопроизволно в покаяние приходят, исправився совершаются со общением, а не тако, яко же уста ваша на нас движут, не изследив, не испытав опасно в пустом мнении, аки в тумане бродяще пристанища прямаго погрешаете, си есть опасности братолюбныя. Усрамитеся братие, поне в мале глаголющаго усрамитеся: не осуждайте да не осуждени будете: и паки в ню же меру мерите возмерится и вам. (Матф.:7; зач. 20. Марк: 4; 24)

12 пункт

С мирскими ходят и не возбраняются от старших ваших.

Ответ на 12-й пункт

Нам зде живущим: несть о том известно ходят ли кои нашего согласия с мирским, в вашей стране живущии, паритися в баню или ни, нам зде неизвестно, а кои еже ли не хранят своей совести и с мирскими моются, тии чрез совестно согрешают, и мы таковыя их дерзости не хвалим. И отсюду потаки на такую их продерзость не творим. У нас, в нашей стране, того не чинится, но под великим зазрением находится, и есть. А когда, нередко случается, от мирских афицер или салдат приезжают: и потребуют бани для прохлаждения, сие нередко случается, и повелевается от больших баню на них протопить и воды, и холодной и теплой с потребу: и виник с мылом приготовить: и парятся они сами собою елико хотят, а наши за едино с ними не моются, ни парятся, тем же и вы в том совести не имейте: и на нашу страну чрезсовестно не ропщите, но паче убойтеся апостольскаго гласа, возбраняющаго: неропщите гласит, яко же нецыи ропташа и погибоша от всегубителя. (1 Кор.:10; зач. 144)

13 пункт

Тропари и кондаки за умерших некрещеных, сочинивше, говорите

Ответ 13-й

Помолчи мало смелы Илие в друзе, зримых тобою недостатков мнимых, можно видети тя, яко от неведения шатаешися мыслию и не отпущаеши, яко болезнуеши ползу себе самому мниши. Потерпи мало да известно покажем не от себе самех, но от церковных учителей, святых отец о споболении умерших своих сродник к тому же и общих всея вселенныя благодетелей: молящихся к душелюбцу Богу и не погрешивших желания своего, но благодати и щедрот Его самеми вещьми удостоишася в получении быти и насладитися. Слыши, преподобныи Иоанн Дамаскин свято учит таковая [слово о усопших]: аще и тяжестна неким вещь сия непщевася: еда{неужели} убо Фалконилу не спасе, первомученица по смерти, но равне речеши, яко та по достойньству, зане первомученица и тоя лепо бе услышатися молению. Аз же и сему глаголю добре, яко первомученица: смотри же паки о коем есть прошение, не о еллиныни ли идолослужителнице же и всячески не священне, и чюждей Господа, и беззакония делателнице, ниже. Прейди же ми паки от сих на другая, тойжде силная доказания. Ниже.

По великому чюдотворцу Макарию, всеистинне написана суть чюдеса, како сухую лбину вопрошая, яже о усопших уведев вся, таже к ней: никогда же ли убо некое утешение, рече не обретаете. Бе бо святыи обычне творя о усопших молитвы, и уведети желаше, аще убо на успех бывают. Сеже восхоте показати, душелюбивыи Господь и своего известити угодника, изсохшей лбине слово вдохну истинне: егда, рече, о умерших моления приносити, тогда утеху малую ощущаем. (Книга соборник в десть в субботу мясопустную лист 34, печать московская)

Григории, убо беседовник, старейшаго Рима епископ, муж яко же и ведят вси в святости и разуме именит: ему же глагол, служащу небесным с ним служаще и божественныи ангел. [слово 2 о Траяне царе и о Фалкониле]

Сей некогда по каменному пути шествие творя, и став со усердием, молитву крепку к душелюбцу Богу о прощении грехов Траяна царя сотвори: иже абие гласу от Бога принесшуся ему услыша сице рекшу: молитву твою, рече, услышах и прощение Траяну даю, ты же не к тому приложи молитвы о нечестивых приносити ми: и яко се истинно есть и не зазорно свидетель восток, и весь запад о сем.

Сие и Фалкониле вышереченной: она же никому же иному злом виновна бысть сей же мнозем мучеником горкую устрой смерть. Дивен еси Владыко и чюдна дела Твоя, и Твое неизглаголаное благоутробие славим, яко всегда к человеколюбию преклоняешися и рабом твоим вины подаеши, братолюбия и еже Тебе известныя веры, и прочая.

О царе Феофиле

Сего амморей приемлет Михаил, того же паки сын Феофил, иже на иконы неистовства, прочая во вторых полагающе. [Синоксарь, неделя 2, Великаго Поста; Пролог, лист 893, на обороте]

Сей убо Феофил многи от святых отец томлением и мукам различным издав, икон ради. Ниже. Дванадесяти лет самовластвова и чревным недугом объят быв расторгнутися хотяше от живота: уста его паче зело отверзошася, яко внутрь утробы его являтися. Царица же Феодора болезнена о приключившемся бывши, едва ко сну обращься и во сне виде пречистую Богородицу, Млада держащу Превечнаго, святыми обстоима ангелы, Феофила же тоя подруга от тех, немилостиво биема и поругаема. Яко убо отъиде от нея сон и Феофил мало возведеся  возопи: горе мне страстному, святых ради икон биен есмь, и абие полагает на него царица богородичныи образ, молящися со слезами. Феофил убо сице имея, виде некоего от стоящих ему, икону носяща, похитив ю у него, облобызаше: и абие яже на иконы шатавшаяся уста и безстудно зинувшии гортань в первое существо претворяшеся, и держащия беды пременися. И усну исповедав добро быти святыя иконы почитати. Ниже.

По мале убо исчезает от жития сего Феофил: Феодора же иже во изгнаниих и в темницах всех возваши, и в свободе пребывати повеле. Ниже. Молитися им, да мольбу о муже ея Феофиле сотворят. Сии же веру [ея] видевши повинуются молитву творити. И иже во святых Мефодии патриарх, вся собрав от мала и до велика, причет весь и архиерей в великую церковь: ниже мольбу всенощную к Богу сотворяют о Феофиле, всем молящимся со слезами и усердием чрез всю первую неделю поста сотворяют: и самой царице Феодоре, такожде с женами и прочими содевающи людьми. Сице же сим часто молящимся; Феодора же царица утрени озаряющу пятку на сон обращшися непщева обрестися у столпа крестнаго, и нецыим спящем проходящим путь проходити различным мукам сосуды носящим. Посреде же сих водима связана царя Феофила опаки связане руце: сего же познавши последоваше и та ведущим, даже и до медяных врат доспеша. И виде преестественным образом мужа некоего пред образом Христовым седяща, ему же прямо Феофила поставиша. Сему же ногам прикоснувшися царица, о царе моляшеся: сей же помолчав много и отверз уста рече: велика ти вера жено: разумей убо, яко за слезы твоя и веру еще же и за молитву и моления раб моих и священник моих милость даю мужу твоему Феофилу: таже глагола к водящим, разрешите его и предайте жене его: таже того вземши отъиде радующися, и абие от сна востав си, убо Феодора царица, узре ниже. О пятце же патриарх узре некоего ангела страшна в великии входяща храм и к нему рече: услышася моления твоя епископе и милость получи царь Феофил, к тому уже прочее о сем не стужай Божеству: сии же окушашеся {покушение} аще есть истина зримое от места своего сшед и книгу обрете и прочет и обрете от Божиих судеб заглажено от Бога всячески Феофилово имя.

О жене мучениколюбице Клеопатре.

И како явися ей святый мученик [Иуар] и с сыном ея: поведание.

Мале ту сон нашед, упокой всяко бяше, отрок той явлься с мучеником: предстояща бо мняшеся зрети страдалца, и яко сына своего, тоя сына, в недрех имуща одеяние же обоим от преестественныя и пресветлыя вещи венцы же тех, главы сладостне украшаху венца же божественную самую рекл бы доброту, и никако же языком изрицаемую. Почто не радуешися о жено, глаголати мняшеся мученик: еда {неужели} бо сице неблагодарствен аз, и ни о чесом от иже тобою бывших приходя в чювство, или яже о них воздаяния любочестне не воздах. Первое умолих Бога, о роде твоем поганом сущем, у них же положи мя ты в гробе, и отпущен бысть им грех: а ныне не зриши ли в какове сын твой явился есть славе: какова благодать блистает на нем: что убо, но скорбное ли сие оставльши и сама прейдеши к благодушному. Ниже. Приятне быти и той к сыну и утешитися в зримых, крепце моляшеся мученику: он же иже ко спасению ведущаго пути наипаче той держатися наказоваше и конечне мир дав ко своим со отроком идяху пребыванием, и от очию оноя отступяху. Она же абие убуждьшися {смирилась}, и в себе возвратившися: какова от мученика же, и отрока пришествия благодушия насладися ту сущим сладостне изглагола, и чюдо всех имяше [услаждаше] душу ради преславнаго поведания. И о сих дозде.

Святыи Григории Богослов

О Платоне еллине написаху слово второе. [Соборник печерскии, печать московская, лист 754]

Спасе же Христос, во ад сходя, не всех, но единых веровавших. Златоуст же крепится яко никого же Христос во аде спасе и суща достойна спасению, егда умре: и аще негли веровавшии достойни явишася спасения. Каково же что и о Платоне еллине, во отеческих носится повестех, досажденьми бо он умерыи древле от некоего христианина, яко безбожен и лукав ударяем бе: во сне же представ досаждающему виновствоваше мужа яко суетне тому досаждающу: аз бо рече грешен убо быти не уво отмещуся Христу же, во ад сходящу, ни един прежде верова, таково о Платоне исповедание, аще ли же подобает веровати или ни послушателем судити оставляю. Дозде о Платоне.

О агарянине милостивом, по реклу {прозвищу} щербетенин.

[Житие преподобнаго Пафнутия Боровскаго, май, 1 день]

Глаголаше блаженныи отец Пафнутии: яко в той великии мор некая инокиня умре, и помале в тело возвратившися сказоваше, яко многих видех тамо. Ови в раи, инии же в муце от иноческаго чина и от сущих в мире: и елицех поведа и разсудиша по житию их и обретеся истина. Ниже. Изшед же оттуду и места мученаго не дошед и виде одр и на нем пса лежаща одеяна шубою соболиною. Она же вопроси водяшаго ю: господи что есть сие. Он же рече: сей есть щербетенин, агарянин милостивыи и добродетелныи, и неизреченныя его ради милостыни избави его Господь от муки: яко не потщася стяжати истинную христианскую веру и не породися водою и духом не вниде в царство небесное. Толико же бе милостив, и всех искупую от всякия беды, и от долга и пускаше, по ордам посылаше и плененныя христианы, искупуя, пущаше. Не точию человеки, но и птицы от уловльших, искупуя, пускаше. Показа же Господь [о нем] по человеческому обычаю: зловерия ради его, в песием образе: милостыни же честное, многоценною шубою обьяви, ею же покрываем избавление себе вечныя муки назнамена. Дозде о агарянине.

Из книги Катихисис иеросалимский

рекше божественныя и священныя литургии

издавшейся в Венецыи лета от Рожества Христова 1681.

[Повелением господина Христодула булгарийскаго]

В час егда поется или Достойно Есть или О Тебе Радуется, поминает в олтари иерей, яко же хощет живыя и мертвыя. Зане не точию мы живии приемлем оставление грехов, со страхом Божиим причащением святых и пречистых сих таинств: но и сами усопшии ко святому Герману созываются с пророки и апостолы и мученики соприити и поклонитися со Авраамом, и Исааком и Иаковом на тайнственней трапезе царствия Христова. Зело ползова прошения Григория Диалога ко спасению Траяна самодержца и гонителя церкве: многу ползу Фекла первомученица Фалкониле оной: многу ползу великии Макарии случившейся ему язычестей лбине: многу ползу царица Феодора иконоборцу Феофилу: кольми паче души в вере усопших православных и благочестивых ползуются и воспокояются, чрез безмерно мощную жертву Тела и Крове Христовы. Дозде из книги Катихисис иеросалимскии.

Се колики {многи} труды дал еси нам, братолюбныи Илие, яко да уверим вашея страны давное устойство, болшее же неизвестие, священных писании и действителных к ползе святыми молитвенными к Богу возношенми, творимых прошении, хотящему вся человеки спасти: непогрешивших своего желания, ищемыя душам ползы: якови суть нами в доказание представленнии святии: пастырие и учители: и преподобнии отцы и святии мученицы, кровь свою за Христа излиявшии: и царствующия боголюбивыя персоны: о них же выше, неложно, изъявихом. Вси согласно и непогрешно молящиися Цареви и Богу вся создавшему и всем спастися хотящему: и не погрешившии своего желания и ищемыя своим искренним спасителныя ползы.

Ты же: чрез крайную в себе самосостоимую незнаемость [грубость] дерзновенно страну нашу зазираеши, яко некрещеных поминают чрез тропари, по тебе, и кондаки названыя: а по нам никогда творимыя ни пишемыя. Есть ли бы ты ведал, что тропарь и что кондак: и кую силу в творьчестве содержит, не писал бы во укор и зазрение таковых имен: которыя возлагаются от творцев в честь и в хвалу точию единому Богови и святым его: аще ли написал еси во мнимую ти удачю, се обращается тебе самому в неведение, тобою пишемых имена, точию гласите, а что суть она сказать описателне не знаете. Не тропари, велеумне, не тропари, ниже кондаки, по тебе, пишем: но смиренная и кротка прошения, от души возсылаемыя, к Зиждителю всех Богу: от жалостныя и умиленныя совести, от коегождо за своего родителя или родительницу, си есть матерь: или какова любо случившагося знаменита и честна благотворителя: всему братьству и сиротьству: не дошедша же во устрой совершенства [християнства] приити, или за грубость какову, или века сего многообразныя задержки и недопуски случающияся: к тому же и различныя недоумения и мнения недопущающия к готовой и отверстой ползе приити: за таковыя келейными молитвами и поклонами и нищим добротворенми кождо по силе своей и мощи: творит. Яко да избавлен умерыи или умершая вечныя, и конца неимущия, казни, си есть мучения. В толиком и таковом разуме молитвенное наше прошение к Творцу всех и Владыце, возносится о ближних своих и святым согласное: тем же престани и не глашай чрез меру: да не прогневаем Бога всем человеком спастися хотящаго и прочая.

Дозде ответ на 13 пункт и прочия по нам доводы и утвержения, суть крепчайшия и всякаго подзрения вышшая, а вам в братолюбную ползу служащая.

14 пункт

Аки самосожегшихся и самоубившихся, за мучеников, и страдальцев законных вменяти.

Ответ на 14-й пункт

Слыши Илие, аще имаши чювства слышати, откуду возмнел еси, яко не законно пострадаша богоревнивии они, первыи боголюбивыи отец Игнатии и прочая дружина его ведомо да будет, егда вселютейшии оныи пожар гонительныи возгореся от лета [или времени] по Рожестве Христове 1666. Вина тому Никоновы новины; триперстное сложение, пятиперстное благословение, двочастныи крест, трегубая аллилуия с приглашением Слава Тебе Боже: и прочая ина. Начаша принуждаемы быти россиане к новинам оным приятием неволным и странным, дондеже лютыи той разогревшийся огнь и неугасимыи и до Олонецкаго уезда, и во вся пределы Корельския. Отцу же вышепомянутому иноку Игнатию от тесноты гонительныя избежавшу от обители соловецкия, и скитающуся исперва в Каргапольских пределех, в посаде Каргопольстем уяже древнее благочестие любящих, прихождаше и в пустыню зовомую Строкину, яже близ посада за рекою Онегою стоит, ко игумену Евфимию, любящему благочестивую всероссийскую древность [веру]: а иногда близ посада, в жила окрестныя или деревни Ольсиево имянуемо и в другия забегаша, место местом изменяя, начлег себе потребныи ищут. Егда же лютому тому огню гонителному разгоревшуся, и яко ужасныи другии водныи потоп покрыи всю землю российскую, уже и начлега сыскать стало трудно, тогда боголюбивыи отец прейде в Олонецкии уезд, чая ту обрести себе мал покой и Божиим направлением улучи внити в дом отца нашего [Андрея] родителей на место, имянуемо Повенец, и ту прият бысть и упокоився, слава Богу. И прейде оттуду в Шунгу и в Толвуйскии погост. Люди же видевши такова странна старца и от образа и нрава познаша его, яко Божии раб есть, и Богом послан бысть к ним, прияша его всеусердно и прилепившеся к нему любовию духовною мнози. Он же мало пребыв с ними отъиде с некоим братом в пустыню на Выг реку, Бога моля и пречистую Богородицу угасити той суровыи огня пожар гонителныи, и вселися близ некоего езерка, имянуемаго Батькозеро, живущу же ему; познася со отцем Генадием соловецким, иже близ нынешняго Боровскаго скита жилище себе имея, при речке зовомой Немена. И тако отцу Игнатию пребывающу с вышеназначеным братом, духовныи путь женущим {стремящимся}.

Божиим попущением, грех ради наших, возбурися паки вселютейшии вихорь, диаволом воздвизаемый [надутый], найдоша с волостей множество гонительствующих, нападоша на живущих ту рабов Божиих: отец же Игнатии бегуся ят утече, укры его Бог от руки зловерны. Братия же вси разбегошася, бе бо время жатвы и другим жнущим: поемлются злыми теми два раба Христова и ревностна суща, имаже имена Артемии и Потапии, кореляне родом: их же связавше злонравнии тии и, бивше безмилостиво, отвозят в Олонец, руки опако {вспять} связаны имуще.

Отец же инок Епифании стар сущь от внезапнаго лютых нападения, кинувся к воде и знаменався знамением крестным сниде в воду, и самого дна дошед за клочье с травою рукама крепце взявся, таковым образом и утопе, дух свой Господеви предаде. Василие же, родом каргополец, по прозванию Быков, последи зовым бысть во иноцех Варлаам, с другими пришед, поискавше добрых ревнителя, отца Епифания, извлекше от воды обретают его цела суща и ничим вреждена седяща и ключь травы в руку имуща. Удивльшеся боговразумляемой в нем ревности: и, отпевше надгробная со умилением многим, погребают страдалче тело, покрывше землею, и на том же острове, близ келии его, идеже пребывая жительствуя бяше: братия же согласная верою и до настоящаго времени, известившеся усердием его, притичеше ко гробу его поминающе панихидами и канонами удивляющеся теплому его о благочестии усердию и ползу душам своим приемлюще, отходят радостно и сим сице бывающим.

Вышереченныи же Василии, новоназванныи уж инок Варлаам, живыи в пустыни и когда нужная потреба нудящи его, хлебныя ради скудости, исхождаше в волость, к согласным ему, и оттуду возвратися весь обременен: в крошиях хлебы печены, масло и сыры и яйца, с пригохою носящь, а в руках в десной и в шуйце по порочке млека варенца носяще, и пришед в келию свою весь утружден сыи: живущая же с ним нищета искусивше ношу свесят {взвесить}, и обретается ноша его три пуда весом и иногда и вящьше, таковыми труды и тягостию томяше себе боголюбивыи он, старец, да плотьская взыграния умертвит, подражая древним отцем святым завсегда же постом и молитвами, и стоянием дненощным просвещаше себе и псалмы Давыдовыми: даде бо ся ему дар памятныи весь бо псалтырь изуст глаголаше, книги не имея в руках, и кто может исповести по ряду духовныя труды его и подвиги. И бяше отцем нашим Даниилу Викуличю и Андрею Дионисиевичю отец и советник духовныи и о сем убо толико.

Блаженныи же отец Игнатии видит на лучшее не пременяющуюся гонителную беду: и христианом умножившимся советует с нарочитыми ревнители, коим бы образом удержати в народе добрую о благочестии ревность. Дондеже не распужени от волков и не разгнани, яко овцы, по горам и холмам мужескии сонм и женскии, совет благ полагает, по реченному в совете правых и сонме велия дела Господня и прочая. (Пс.110,1) Повелевает собратися всем во едино место в Палеостровский монастырь, и по совете, и делом исполни: вшедше внутрь ограды и согласных с ними старцев и бельцев еликих обретоша удержавше с собою, несогласующих же безобидно отпустиша на свою волю. Сами же укрепивше ограду и предустроивше седоша в запоре. Окрестнии же народи, услышавше деющееся, потекоша, яко вода многа и яко речныя быстрины к намеренному месту, друг друга предваряюще, и наполнися ограда народа усерднаго и теплаго о благочестии, яко же сказуют известившиися: 2700 человек мужеска и женска пола с малыми детьми и с превозрастными, вси ревнующе умрети за древнее благочестие, мало послежде и делы исполниша Божиим пособием [Божиими судьбами].

Таковыи случай страшныи и ревность народную о древнем благочестии: Никонова мнения защитницы уведеша, собравшеся с народом мирским со оружием и дрекольми, наподобие древних июдеи, или варвар и караул учинивше, выговор творят вопрошающе: какие люди и для чего собрашеся. Они же ответ творят, яко мы, люди здешних погостов жители, собрахомся от вашего разбойническаго находу отъемлете у нас и нами от издревлехранимое святоотеческое благочестие: а напротив того предаете новое и небывалое учение, повелеваете треми персты креститися, а не двема, крест Христов тричастныи и трисоставныи отъемлете; а в того место, двочастныи предаете, и антидор свой вмещаете, а древнее причащение, тайну тела и крове Христовы поносити и отметаете: яко не может по вам [мнению] по трисоставным крестом знаменанная просфира Тело и Кровь Христова быти, яко же новотворныя и новопечатныя книги ваши утвержают. Сия и сим подобная ответствующим усердным ревнителям: они же, напротив, сумнителныи извет творят: приимите новоисправныя книги, кои исправлены добре и согласитеся с греческими и российскими архиереи и новыя тайны, под видом двочастнаго креста, без сумнения приимше, согласитеся, и милость достойную приимете. Доблии же исповедницы реша: не буди нам о Христе Царю не точию прияти Никоновых новостей, но и помыслити, лучше нам зде умрети за несумнителную благочестия целость, да живи будем животом вечным и к тому умрети не могущим. Слышавше же сия противнии постыдишася: начаша приступ чинити и из фузей стреляти безпремолчно, як же воинствующим обычно есть. Доблии же добрых ревнители уразумевши, яко конец житию их приближается благословение у отца приимше зажгоша приготованное вещество; смолье и бересто и прочая, упредивше, дабы в руки мучительствующим не впасти, огню же внезапу воспланушуся раби же Христовы с великим усердием, аки на вечерю зовомы, приличная пения тому отхождению воспевше, и времени ключимая скончашася о Господе. Мы же оставшиися поминание творим: упокой Господи душа раб своих, пострадавших от никониян на всяком месте, и учини их идеже присещает свет лица Твоего, в селех со всеми избранными твоими: и прочая.

О отце Пимине и прочих доблих

Но еще диавол, яко лев рыкая ходит искии кого поглотити: паки вооружает своя служители, на разорение людей Божиих. Отъезжают в корельския погосты, идеже отец инок Пимин, с прочими рабы Божиими жительство имеют: нападше зверообразно аки разбойники хотяще всех пленив разорити. Отцу же Пимину уже прежде о наезде оном известну бывшу: келию на то укрепивше, собрашася со всем собранием внутрь, готовящеся ко ответу: и всю братию и сирот исповедию поновив, а елицы от юных и средовечных и случившихся младенцев обрелися под новым от никониян крещением, вся тыя, возновив, крести мужескии пол и женскии. Близ бо ту случившуся, Божиим промыслом, езеру, воду имущу многу: и собравшимся людем, вечеру же тиху, сущу Иордан предустроивше, всем зрящим мал вихорец явися в месте Иордана, во устроенном остенении, а не во всем езере. Отец же Пимин видев бывшее, удивися: и прослави Бога творящаго дивная и преславная: и возгласив во услышание всем, глаголя: Братие благодарите Бога, ибо и в нужныя наши плачевныя дни, сия благодать Святаго Духа действително и видственно приходит, являяся вихром сим: и крести вся пришедшия, собравшияся во устроенныи им дом, си есть остенение, исполнише свое усердие прославиша Бога.

Выше показанныи же зверонравныи народ, приступ суров сотворше, стены начаша просекати, дабы кого можно от внутрь сущих извлещи: внутрь же сущая братия: поспешнейше начало молитвы сотворше зажигают храмину не во едином месте, поюще и воспевающе со слезами и радостно, яко сподобляет их Господь Бог за имя Его душа своя положити. Скончашася таковым образом всеусерднии, всероссийскаго древняго благочестия ревнители и православия заступницы: преподобныи отец Пимин с прочими о Христе ревнители, 1200 душ в лето от создания мира 7195-го, месяца августа, 9-го дня: в Олонецком уезде, в Корельских погостах, в месте именуемом Березовыи Наволок: вечная им память, 3 жды.

О скончавшихся в горах, под Олонцем

От тех же вышеозначенных мучителей и в том ужасном [плачевном] времени, и от тех же, дерзостнаго разбойническаго наезда убоявшеся, скончашася ревностно огнем в месте, прозываемом в горах, под Олонцем: 1000 человек мужеска и женска, здробивше [убоявше], яко человеки, да не распленени {погромлены} будут и мучимы, и не стерпевше зелности мук погрешат благочестия: сицевыя ради вины, не дождавше противных наезда, по писанному: терпящии изменивше крепость, окрилатевше, по Исайи, яко орли [п] текше и, не утрудивше себе, (Исаия, гл. 40), ревностно от’идоша с целостию благочестия к судящему всем правыми мерами, Господу Богу и Спасу нашему Исусу Христу вси всеусердно слезно вопиюще жалобная: доколе Владыко Святыи не судиши и не мстиши крове нашея, от живущих на земли и прочая. (Апокалипсис, гл. 6, зач. 17)

По вышеозначенных подвижницех, подвижница [ревнителница] некая, явльшися во время камиссии, именем Марина, в Шунском погосте. Егда вниде в погост рой солдатской и нача всех теснити ко входу церковному, да вшедше в церковь, приимут триперстное сложение: и послежде причастятся и святых таин, си есть евхаристии, еже есть причащение, вшедше дерзостно и в дом Маринин камиссиане понуждающе ю идти в церковь, да приобщитися к новости и приимет с верою новое причащение. Марине же случися в той час пещь нагревати и готовити снедная: и онем стужающим {досаждающим} ей: она же отвещевающи со спехом тещи {поспешала}. Понуждателем же в дому Мариине клети [чюланы] ея обходяще, к животам зияюще: она же свое боговлиянное, в сердце своем, намерение исполнити тщащися и тайными помышленьми Бога благаго и Матерь Его призывающи мысль ея в дело произвести, и новаго нечестия гоизнути: пещи убо у нея горящи в самой силе огня. Она же прекрестивши лице свое знамением крестным и рекши в горести сердца: Господи Исусе Христе, имати слова, помозите рабе ваю, и, закрывши лице свое убрусом, влезши в пещныи пламень ревностно и усердно: древняго святоотеческаго православия любителница умре за умершаго ны Христа, иже живыми и мертвыми обладающаго. Мучителныи же слуги, видевше ненадежно случившеся, окаменеша душею, постыдешася: между тем погощане и сродницы ея удивльшеся ненадежному случаю о Марине, в вземше тело ея умершее предаша земли: землю плод производящую и возрастающую, не в тридесять и шестьдесят, но во сто: текущую и превозрастающую в живот вечныи. (Иоанн 4,14; зач. 12)

О яже на Печере реце, за древнее благочестие скончавшихся

Не дает нам добрая ревность молчанием покрыти добляго о древнем благочестии подвижника Иоанна Анкиндинова [родом Ростовец]: мужа добродетелна и подвиги духовными украшена [и свята], содружна и добросовестна бывша отцем нашим, А. Д. [Андрею Д-чю] и С. Д. [Симеону Д-чю], по премногу житие имуща в верх реки Выга, отстоящо от общежительства 15 поприщь. Потом изволившу ему преселитися всекелейно на Печеру реку, в Архангелогородскую губернию, разстоянием отсюду вящши 1000 верст: и тамо по своему доброму усердию богоугодное житие совершающу со дружиною своею.

Исконныи же враг, диявол, позавиде богоугодному житию их, обретает сосуды сообразны своей злобе. Подходят клеветою к Холмогорскому архиерею Варсонофию, бывшему прежде архимандриту соловецкаго монастыря. Он же едва ли не слаб сыи умом, и лаком {сластолюбив} сущь к сребролюбию и тленному богатству века сего возмнев у них обрести сумму не малу. Выводится по его, Варсонофиеву, доношению камиссия от губернской канцелярии, от города Архангельскаго: и при ней немалой наряд салдат, бо афицеры, и яко на разбойников вооружени отпущаются, хотяще разорити и пленити Божие стадо избранное. Онем же яко рабом Божиим живущим [сущим] неизвестны такова на себе бедственнаго намерения, однако от начала заседания своего вместо оно и во опасение диявольскаго навета [поветрия]: предустроися ими келия и укрепися двостенна: да егда наветом врага стена едина просечена будет, другая цела соблюдется, ко управлению нужнаго часа: предустроивше же потребная смолье и бересто и серу и другая, способная к неначаянному нападению неприятелей, да егда неначаянно нападут, погрешат своего мнимаго и злобнаго лова. Такову опасность рабом Христовым деющим напрасно наехавшу воинству вражию: и острог [караул] сотворше, вопрошаются: какия люди и коею виною остенишася и во опасность себе предустроиша. Онем же ответ сотворшим: яко не за иную каковую вину седохом зде и жительство имеем, но да сохраним древнее благочестие и Бога милостива моленьми нашими о гресех наших обрящем. Архиерейска же чета [сонм] напротив отвещевающи: отмените раскольническии нрав и приимите Никоново и прочих духовных властей новоуставленное благочестие. Онем же дерзновенно отрекшим: не буди нам прочее предложения вашего слышати, лучше нам благонадежнейше с целостию благочестия, еже имеем в сердцах наших неизглажено, соотъидти к Цареви веком [Силам], и желанно и благонадежно умрети зань, да живи цели и нетленни обрящемся в день втораго пришествия Его с душами и телесы нашими. И по ответе таковом с благословением зажигают приготовленная вещества: молящеся всимилостивому Богу и пречистей Его Матери, поюще исходная песнопения во умилении мнозе и во слезах, скончашася о Господе: вышепомянутыи богоревнивейшии Иоанн с дружиною и иноком Игнатием и со инокинею Александрою и с прочими мужеска пола и женьска числом девятьдесят душ, месяца декабря, в 7 день; вечная им память.

Собравшиися же народ постыдешася: наполнивше руки своя оставльшимся имением рабов и рабынь Христовых и различными припасами съестными преисполниша ненасыщаемыя утробы своя, восвояси возвратишася посрамлени. Вышепомянутыи же епископ Варсонофии, недобросовестное свое намерение исполнив, и яко удачю вменив: вышеписанныи христианьскии и сиротьскии сонм, ни единаго зла ему сотворши, мучительски и разбойнически уби [умертвив]: на небесныя круги, и не хотя, послал: сам же, напротив, яко убийца праведным, суда Божия гневом наказуется. Рука его десная, обычай имущи благословляти народы малаксовым сложением, пятию персты, чрез всяко чаяние от перстов и с дланию до лактя внезапу очерне, яко сопуха [главня], и опохши томима бысть и жгома внутрь ея нестерпимым огнем. И лекарем иностранным, призваным к нему, ответом услыша: инако не исцелеет, еже ли рука не отъята будет по месту болезнену. Он же услыша ответ странен умолкну: по мале же времени тяжко болезновав, суровыи он и продерзыи, умре телом вкупе и душею странно.

О иже за правость веры и благочестие: скончавшихся в Олонецком уезде в месте нарицаемом Озерцах

Желательно есть нам [слышателие] и о отце Иосифе, нарицаемом Ловзуньском, и его боголюбезной ревности о древнем благочестии с прочими тожде ревнителною братиею поне, вкратце, писанием изъявити: в славу Божию и в пользу христиантскаго согласия. Сей приснопамятныи отец Иосиф, родом Каргопольскаго уезда, от града отстоящия поприщь седмь, служитель [бе или яснее рещи дияк] церковныи, человек ведением священных писании преизобилныи муж, бе великаго воздержания и писатель книжных литер многохитрыи: и свидетельствуют еговых трудов книги и до вашего времене и рук дошедшия, показующе хитрость и художество делателя; книга Евангелие Тетро в полдесть, еговою рукою написанное и по ныне между нами цело соблюдаемое, в цене десятирублевой находится, и есть не ложно. Сей и толикии бывы делатель, наипаче же всего всякою добродетелию блистаяся, живыи по Бозе, и церкви служа выну, и со служители поя и возвышая горе к Богу, и глаголя: в Церкви Славы Твоея стояще на небеси стояти мнимся, отверзи нам двери и прочая. Тем временем грех ради наших начася быти в Москве пременение книжное чрез Никона патриарха и прочих властей, согласующих ему: чрез чаяние же премена бысть и всему православию: отставляется крест Царя Славы от церковнаго тайнодействия, пременяется двоперстное благословение на питиперстное, новоустанавливается триперстное сложение за двоперстное знаменование с великим насилием во весь народ: трисоставныи крест Христов на двочастную печать новотворится: сугубая аллилуия, приглашением Слава Тебе Боже, странно и необычно отмену приемлет, и прочее все последование всецерковное, инако и инако неначаянную отмену, но вострадати ново начинает: яко видно збыватися писанному: сотворит [некто] отвержение и за прение креста, и прочая.

Сложишася тому новоначатому действию, и царския и княжеския лица с прочим народом великия России: и таковое нечаемое бедство и смущение, аки некая болезнь вниде в тело российскаго множества и неволею вся страдати и болезновати понуди.

Увы бедства и бедства гнева Божия преполнаго: кои были ревнители благочестия, тии стали быти защитницы и проповедницы новопременения, от чесого стала быти теснота оставшимся в древнем благочестии. Чесо ради добрых ревнители ови в подвиг страдания за благочестие намерение восприяша, друзии же домы и отечества оставльше разбегошася по чюжим странам. Приснопоминаемыи же нами Иоанн, оставив отечество и дом свой и покой, и странствовати, любве ради за нас странствовавшаго Бога Слова, попущается и изменяет свой вид на ся иноческии образ и бывает вместо Иоанна Иосиф, иже помножение толкуется: помножи убо еже есть умножи и распространи своим нравом и наипаче по Бозе добродетелным житием славу святоотеческаго благочестия. И по некоем времени, обретает себе согласную братию, в Курженской пустыни. Место убо оно пребысть Богом хранимо на времена не мала: в нем же церковь и олтарь древняго благочестиваго здания и ту обретает согласную себе братию: и отцев и приснопамятнаго отца Иоасафа, еклисиарха, си есть уставщика бывша Кирилова монастыря, иже на Беле езере: мужа препроста суща нравом, а житием свята. И когда случашеся отцу Досифею на некое время отлучитися места, отъежжавше бо часто в Москву и в другия городы нужных ради потреб, отец же Иоасаф время улучив первенствуя беяше во обители: и во время службы церковныя предначиная, си есть за молитвуя бяше. И в простоте живя любляше древность чина священническа и, любовию водим, патрахиль священнику на выю свою возлагая: и поручи на руки: тако замолитвуя беяше, и окончеваша церковное служение. Братия же сущии с ним, ведяще простоту [святость] его и незлобивое нрава, молчанием покрывают творимое им. Вышепомянутыи же отец Иосиф к прочим благим и полезным обретает древняго отца игумена Досифея: Тифинскаго монастыря, Николы именуемаго Беседнаго, доброревностнаго отца, вышепомянутого инока Игнатия соловецкаго отока жителя. Схождахуся бо ту ревнители благочестия мнози от различных мест и стран, духовныя ради ползы, яко древнии израильте от всего языка, яже под небесем, по описанию апостола Павла: полности ради церковныя службы и наипаче совершения ради священныя литургии: и проистекающаго от нея новаго Иордана таинственнаго пития и пищи, Тела и Крове Христа Истиннаго Бога нашего. Ея же усерднии с теплою верою причащахуся: друзии же в залог духовныи вземлюще, с верою отношаху в домы своя и страны, и хранитися таковое нетленное сокровище и ангелы говеемое в христианех и до настоящаго времене: и сим богатящеся и другим надежным преподавают любве ради Христовы.

Но доколе будем наращати историю или повесть о бедственных случаех наших, грех ради бываемых, время уже привести ко окончанию. Принеси убо, да изъявим, в славу Божию христианом случающаяся: егда прииде гонителная верным теснота: уже не имущим где скрыются раби Христовы места, от злости гонящих, принуждающих к триперстному сложению, и новодействуеемому ими причащению. Устрояют себе убежище, новохрамину, вместилище християном спасителное, общим всех верных советом, да не от сносныя беды в ню вступивше, с любезною ими целостию благочестия, не сумнително огнем жегоми скончавшеся умрут, геенскаго несветимаго огня свободни будут, милосердия ради милости Бога нашего. И сему делы бываему, и ревностию исполняему собирается рой [сонм] христианскии мужеска и женска пола, особливо же девственных лиц девиц, душ 70, умрети ревностно вожделевше, с чистою, нежели жити с нечестием временно, а во веки конца не имущаго, преданным быти в родство огненное со дияволом и со Иродиадою, нечистою и блудною плясавицею. Гонительствующии же нашедше свое деюще, вопрос творят и сурово и гордо: кто и какия, глаголюще, и для чего собравшеся в толикии сонм и многость велику [толику]. Раби же Божии отвещевают глаголюще: вы и ваши новины до толика нас истесниша: что уже вселенная, Богом нам данная во общину, малы части к сожитию нашему не дает, вашим гонителным нравом обладаема: но лучше нам временная теснота, с Божиею помощию, вытерпевшим понести, за несумнителную святоотеческую веру, да свободу и пространство со святыми в царствии небеснем обрящем, милосердия ради и милости Бога нашего.

Между тем вещество сготовленое солому и бересто и серу и смолу, с благословением отеческим запаливше во многих местех, многих рук действом, и вскоре, пламени воскурившуся, скончеваются о Христе и за Христа, добрых ревнителей, с пением церковным и торжеством сердец и уст своих, к небесным востекоша. С ними же единоревностно скончашася знатнии во усердии граждане от посада Каргопольскаго: Михаил, сын Георгиев, прозванием Кушников, нам грубым сродник, непритворныи муж бысть великия по благочестии ревности, ремеслом кузнец хитрыи: и по натуре плоти бысть мужественнейшии и храбрыи: Феодор, прозванием Двойников, и друзии знатнии от чина и художества мужие разумнии и честнии, скончавшася и Господе, лета 7197 {1689}, декабря, 4 дня, на память святыя мученицы Варвары: и преподобнаго Иоанна Дамаскина.

О скончавшихся огнем в Пудожском погосте от гонительствующих за древнее благочестие и веру

Коим словом описати имам плачю и слезам достойную повесть, ея же нелзе молчанием покрыти, ползы ради духовныя от нея проистекающия, боголюбцем.

Понеже тоя же вышеозначенныя бури остаток: с зелным вихром и шумом, еже есть варварскою и разбойническою дерзостию и нравом единаго и тогожде полка Никонова, новии варвари и безбожныя гонители от воиньствующих, и духовнаго чина: видно ненасытившеся убийственныя крове христианския, приехавше в Пудожскии погост, наченше людей Божиих и теснити и принуждати к новости Никонове: к триперстному сложению и к прочим новинам, наконец, новому причастию, под видом двочастнаго креста новодействуемому. Народи же Божии, все людское множество, яко море восколебася печалными волнами обоего пола, и мужей и жен, уже известившеся самеми вещьми таковая содеяшася, от их безстудия и неудобь сказуемая продерзости, в других местех: неминуемо и себе возмневше: разсудивше всем единомысленным собратися во едино место удобно: неже невозможно отговором каковым увещати и укротити от таковаго их необузданнаго безстудия, то лучше с целостию благочестия умрети всенародно: за всю правость древлероссийския святоотеческия веры: и по совете самем делом заключиша. Собравшуся народу и послежде исчитавше числом явися до тысящи и двухсот душ, вси в единой мысли готови умрети и души своя положити за правость святоотеческия веры: и сбысться апостольское слово, от них непогрешно рещи: позор быхом миру, и ангелом, и человеком, и таким образом предуготовльшеся богоревнивейшии к смертному концу. Внезапу найде на них, яко облак темени бурен, наеха воинство вражие: и вопросом возшуме дерзостным, вопрошая: кто и какия, и за каковую вину собравшеся в толик народ, яко збыватися псаломскому словеси, яко се врази твои возшумеша, и прочая. (Пс. 82,3) Они же отвещавше: не иная вина нашего зде собрания, но ваше мучительское и разбойническое к нам грубым прибытие, что в других местех сотворили, есте убивше и разоривше, яко разбойником прилично тое, и над нами последними сотворити хощете, но лучше нам умрети неминуемой, хотящей нам по естеству, смерти: новую ныне смертию, от ваших рук мучителных: да избудем конца не имущия геены хранимыя, еретиком и развратником и христианския веры. Безстудствующии же возшумеша гласящеся: покоритеся церкви и священному чину, архиереом и учителем новопечатных книг. Внутрь же сущая братия, к последнему уже за себе ответу, умоливше наставника своего, отца инока Иосифа: он же изшед возгласи кротким к ним, готовым, ответом: удобнейше нам господие и весь собравшиися на ны грубыя народе: испити смертную чашу, за непогрешимое благочестие: нежели прияти ваше новое и в церкви древлероссийстей небывалое новоучение. И таковая отцу ответствующу, и некто дерзыи от народа, наущаем диаволом: испусти из фузей, уби отца, кротко отвещевающаго. Его же вскоре внутрь сущии вземше: и абие во многих местех зажегше и огню воспалившуся велию, скончаваются раби Божии, песнь духовную во устех имуще, грядуще же с радостию по псалмопевцу [в горнии мир] вземлюще кииждо рукояти [мзда] своя: (Пс. 125, стих 6). Мучительствующии же отъидоша с народом посрамлени: камень и не хотяще влагают во уста своя молчания и стыда: и прочая.

О благоверном князе Феодоре и жене его благоверной княгине Евпраксии

[История Российская древняя].

Еще приложити лепо есть из истории древния или повести: о явлении святаго чюдотворца Николы великому князю Феодору Георгиевичу Рязанскому: и пророчество о нем, и о жене его, великой княгине Евпраксии, и о сыне его Иоанне, нареченном постнице. Великии чюдотворец Никола является великому князю Феодору Рязанскому, поведая ему приход чюдотворнаго образа из Корсуня града глаголя: иди княже в сретение моего образа, хощу бо сим моим зде быти и чюдеса творити и прославити место сие: о тебе же княже, умолю милостиваго Бога, да подаст тебе и жене твоей и сыну твоему неувядаемыя венцы в царствии небеснем. Ниже. Не по мнозе же времени благоверныи князь Феодор сочетавается законным браком, поемлет себе жену царска роду, именем Евпраксию, и благообразну сущу и боящуюся Бога: и тако законно сочетавшимся им и добре и богоугодне живущим, и в заповедех Господних пребывающим: даде им Бог плод чрева, породиста сына: и наречено бысть имя ему Иоанн: посем нарекоша его Постником. И тако святителя Николы о велицем князе проречение исполнися. Посем великии князь Георгии Игоревичь, посылает сына своего, великаго князя Феодора и иных князей к царю Батыю со многою и дары: моля его дабы не воевал земли Рязаньския: Ниже. Безбожныи же Батыи начен просити у князей Рязанских дщери и сестры их к скаредному своему блудному смешению. Они же сего вельми отрицающеся беша. И некто, от Рязанских вельмож, диявольским наветом поосттряем, сказа безбожному Батыю: яко благоверныи князь Феодор имеет у себе княгиню, велми доброзрачну и лепу лицем. Слышав же безбожныи Батыи и похотию скверныя плоти своея растлеваем рече великому князю Феодору: даждь ми княже видети красоту жены твоея. Благоверныи же князь, слышав словеса его, посмеяся безумию Батыеву и рече к нему: не подобает нам християном к тебе, царю безбожному, приводити жен своих на блудное смешение: аще убо ты нами преодолееши, тогда и женами нашими владети будеши. Безбожныи Батыи зело возъярився, и повеле вскоре благовернаго князя Феодора Георгиевича убити: тело же его поврещи зверем и птицам на снедение. Таже повеле и иных многих нарочитых князей убити. Един же от пестун [слуг] великаго князя Феодора, именем Апаница: зря на блаженное тело своего государя, горко плакася, видев его никим брегома: взем его тайно и погребе на нарочитом месте: и ускорив возвратитися к жене его благоверной княгине Евпраксии, и поведая ей, яко нечестивыи царь Батыи уби мужа ея, благовернаго князя Феодора. Ниже. Тогда брат благовернаго князя Феодора, великии князь Игорь Георгиевич: взем тело блаженнаго князя Феодора, цело и невредимо, принесе во град Зарасскии, и велми плакавше погребоша е честно, со псалмы и песньми, близ церкве великаго святителя и чюдотворца Николы, многочюдеснаго его образа Зарасскаго: во едином месте, с благоверною его княгиною Евпраксиею и с сыном Иоанно, именуемом Постником и поставиша над гробы их кресты каменны, яже и доныне всеми видимы суть и знаеми.

Град же той прежде именовася Красныи, последи же прозвася Зарасскии, вины ради сицевы: егда убо достохвалныи и новыи [целомудрия] исповедник, благоверныи великии князь Феодор Георгиевич, пострада от нечестиваго царя Батыя, ради християньския веры: и целомудрия ради жены своея убиен бысть. Благоверной же его княгине Евпраксии, бывши во граде именуемом Красныи: сказано же [поведано] бысть ей о убиении мужа ея, благовернаго князя Феодора Георгиевича. Слышавше же она вельми восплакася горко, о разлучении его: и в велицей печали вмени [разсуди] себе [благоверная], яко ради красоты ея посечено бысть благоцветущее древо, доброплодовитыи виноград, от поганых супостат. Помышляше же и то, яко хощет злочестивыи Батыи видети красоту [лица] ея и хотя от поганых рук его избежати: целомудрие же свое соблюсти и тело свое чисто пред Богом поставити. Стоящи же ей в превысоцем своем тереме и на руках [своих] держащи сына своего, князя Иоанна, именуемаго Постника: и в горести души своея из превысокаго терема [горницы] и с сыном своим Иоанном низринуся на землю и заразися {ударилась} ту: и прият кончину жития своего. И того ради прозвася град Заразскии даже и до днесь.

Окончание истории или повести кто убо не удивится, толь великой ревности великаго князя, благовернаго Феодора Георгиевича, яко не убояся лютаго прещения свирепаго и поганаго плотоядца, безбожнаго и нечестиваго царя Батыя: но обличи душепагубную его прелесть. Тако пострада за Христа, и от вседержителныя Его руки приим венец во царствии небеснем, вкупе и с супругою своею, благоверною княгиною Евпраксиею и с сыном своим, князем Иоанном, именуемым Постником: яко же прорече о сем [сих] великии святитель [и архиерей] Божии, Никола чюдотворец мирскии. Дозде из истории.

Заключение ответа со увещанием

Отселе надлежит ти, Илие: из вышепоказаннаго чюдеснаго действа святым Николою соделаннаго в чювство приити: и не к тому грубому своему мнению последовати. Виждь, зазору не подлежит благая ревность о чистоте и целомудрии, аще и смертным действом, си есть смертию, защищаема бывает. И не точию неподозрителна есть, но и нетленным венцем небесному царствию ходатайствена. И свидетели неложная, двоица, великии князь [приснопамятныи] Феодор Георгиевич с княгиною своею Евпраксиею и с сыном ею Иоанном, нареченным Постником. Яко оба за целость боголюбезныя чистоты и целомудрия умроста усердно и венцем нетленным удостоишася и церковию кафолическою всероссийскою вечно ублажаются, яко суще светила вторая всему миру быша, и будут в нескончаемыя веки.

Поревнуй и ты, Илие, благодати толицей: от Бога давшейся им, и долговременныи нрав свой устойства отмени: не буди самосомневаяся таковому случаю спасительному [или яснейши рещи] судбе Божией спасительной, да жив будеши во веки животом вечным, конца неимущим, его же да сподобит ны всемогии Господь Бог, создавыи наедине сердца наша, яко же свидетельствует Давыд. (Псалом 32, стих 15)

Нужда нам понуждает ны засвидетельствовать о случаех плачевных, бывших в Москве и прочих градех российских, за грехи наша Богом попущаемых: и о дерзости безбожныя литвы и поляков, и о поругательстве над християны, мужеским полом и женским, и над святыми вещьми, иконами и ризами священническими, и пеленами с нашитым на них образом честнаго креста, и до прочих всех вещей. И о ревности по Бозе мужеска пола и женска, за чистоту телесную: многообразно самех себе убиваху, да не осквернени будут от поганой литвы, и безбожных поляков и изменников русских.

И из повести (месяца июля, 28)

О чюдесном явлении и гласа от образа пресвятыя Богородицы во граде Смоленске святому мученику Меркурию: во время нашествия поганаго и безбожнаго царя Батыя: [и из минеи рукописной копия или выписка]

В лето 6753 {1245} злочестивыи бусурман, злонравныи и ненасытныи кровопиица: христианскии гонитель и разоритель: и всякия диявольския преисполненыи злобы, царь Батыи? видя православных християн изнеможение, помысли раззорити благочестие и искоренити православие. Умысли злыи кровопиица идти на град Смоленск: идучи из русския земли, плененных ведоша во своя страны. А сие умножися на нас за беззакония великия и лютыя грехи: и мерзскую нечистоту блудную: за что от вседержителныя десницы Божия послаша на ны великия беды и разорения градов. Ниже. Бысть же тогда Божиим церквам оскудение и запустение люто, яко и дивиим зверем плодитися, за оскудение людей, и смиришася грады, и монастыри святых разорени быша, без пощадения: иереом тяжки вериги на выях бяху и нужныя горкия смерти, инокам и инокиням лютое и немилостивое поругание и посечение. Ниже. Исполниша они нечестивии варвары русскую землю сквара {нечистота, мерзость} и дыма злобожнаго и нечестиваго их закона, и кровопролитие творяху: младенцы ссущия отторгоша от пазух, недр матерних, о землю ударяюще, а иныя оружием прободяху. Оскверниша же, чистоты девиц растлеваху, и брачных жен разлучающе от мужей, и честныя невесты и инокини оскверняху блудом. Мнози же тогда, от православных: сами резахуся и смерти приимаху, дабы не осквернитися от поганых, а потом смерти сами себе предаваху. А кои иноки во едином месте живут и тех работами облагаху, и стражы быша им: и вино и пиво строяху, и кормы готовляху, и стада пасяху. Иереов же умелива и у возов, и у дровосечества моряху, и блудниц стрежаху: и работаху им, воду носяще и порты скверныя мыяху им, и ругающеся повелеваху им песни срамныя пети, и скакати, и плясати. Иноков непокоряющихся смерти предаяху. Ниже. От зверей убо сих и от злых делателей бегаху мнози без исповедания, и кроме святых таин умроша, и священный чин потреблен бысть. Ниже. По всей земли всяк возраст, всякаго чина: овых с башен высоких градных долу метаху и иных с берегов крутых в воду мещуще и иных связавше и из луков и пищалей стреляюще; иным голени наполы преломляху, у иных же чада изхитивше, на огни жаряху, пред очима родителей; а иныя от сосцу матерню и от пазух отторгающе и о землю, и о праги {пороги}, и о камень, и о углы разбивающе убиваху; а иных на копия, и на сабли взоткнувше, пред родителями ношаху; жен и девиц на блуд взимаху. Мнози же сами зарезывахуся, дабы не осквернитися от поганых: и инии же в воду мещущеся с брегов высоких утопаху. Ниже. Сия видевше, мужественныи сердцем рыкнувше умираху: друзии же, не могуще зрети рождьших у беззаконник в блуде, сестр и братии на смерть предаваху. Мнози холопи ругающеся госпожам своим, связавше мужа или сына, или брата, пред очима их студ содевающе, не пощадеша враги и маловозрастных юноток, но и тех растлевше, и милостыни нагих пущаху просити, крови текуще срамной и власом ободраном сущим: инокини же растригаху, и по станом влечаху и скверняху блудом, и нудяху мясо ясти, и в постныя дни сыр и млеко веляху ясти. Нечестивии поляки и изменники, вземлюще святыя иконы местныя и царския двери и сих мостяще под скверныя постели и блуд на них совершающе бяху, и прочая.

Надсловие вышеписанных

Еже ли случилося ти, Илие, вышеписанных в России бедств и во всем государстве российстем истории читати действително; аще ли ни, поне от слышания старших, негли {не-ли, может быть} известился еси когда: аще ли может бысть ни от кого, мы тебе за любовь и пространьше известим не на словах, но писменно представляюще.

Виждь коликими и каковыми напастьми бедственными искусися благополучныи российскии род, и колики беды и напасти прият за безмерность греховную, си есть нечистоты и скверны блудныя, яко же выше известися. За что равномерно и наказася праведным гневом Божиим: разорения градов, сел и слобод, и домов, и пленении, и смерти: и над всеми, себе и женам, и детем безчестная ругательства и безчисленныя казни. Но целомудрении и боящиеся Бога, познавше своя грехи: и Божии праведныи гнев, и в чювство приимше: против нечистоты и слабости возпротивльшеся мужеством: и Богом вразумляеми, ови зарезывахуся себе самых, да гоньзнут {избавятся} скверны телесныя: ови воде предаяху себе самех и утоплению, и таковым странным концем и ужасным себе самых пользовавше, скверны плотьския гоньзнуша, истейше же рещи {сказав}, душевныя пагубы: и последующих той, вечных мук: по писанному: блудником и прелюбодеем судит Бог (Евр.,13,4).

Ты же, брате, на своя руки посягшия судиши, яко бы сами себе убивше, самоубиицы мнятся, неприятни и церкви, и помяновению, по вам: суду. Но вышесоделанная их по Бозе ревность сопротивляется тебе и вашему саморазсуждению: понеже не просто, ниже кроме разсуждения, ревность соделавши, велеумнии они и Христовы раби и рабыни: и смертную чашу испивше: но ради препохвалнаго целомудрия, да не осквернятся скверною греховною, ужасно судимою и праведным судом Божиим по Апостолу: блудницы бо и прелюбодеи царствия Божия не наследят. Сии же добрых ревнителе, нечистоты греха смертию ревностною по Бозе избывше самех себе резанием и в водах истоплением, и с берегов ужасным падением, подобно древним, и прежде их бывшим, соделавше, скончашася о Господе.

Таковым десным по нам разсуждением сеть порицателная раздрася, и истаявше погибе, и мы по писанному избавлени быхом: помощь наша во имя сотворшаго небо и землю (Пс., 123).

15 пункт

Книгу во оправдание прилагательнаго имене счинивше, да отложат:и отложити должно есть.

Ответ 15-й

О прилагателном

Вышеписанныи наш ответ о прилагателном имени, в доказаниях 6,7,8,9 и 10 изъяснися выше сего доволно, негли уже и видел еси, и разумев: и не ползе тебе мимо тещи, не осмотрев его. И аще видел еси его и разумев: должен еси по нему десная дати нам: и к тому не любопретися на крайныи от страны зазор, и самому и прочим по вам, но лучше есть и похвалнейше мирное и любовное возъимети житие, и вышеписанным по нам свидетельствам согласующее да и о нас негли исполнится реченное от Спаса Христа: мир Мой оставляю вам, мир Мой даю вам (Иоан.,14;27). Дозде о прилагательном.

16 пункт

Самомнимое имеющееся в неких посредство взаимное друг ко другу в средних вещех несоглашение.

Ответ 16-й

На посредства сумнителная

В малых некиих грубии неции от братии вещех не согласуются един другому и иногда и в церковных обрядах: eвещаваемы, мало умягчившеся и минув неколико время, паки тожде толкуют и бредят, и хотя недерзновенно некако: но сами себе и своему нраву обыкше, последующе находятся. И сами подвижни некако и кротцы правилу церковному и келейному усердни суще: но негли со временем Божией благодати поспешествующу им, пременят свое мнение и общему и согласному во всем нраву и обычаю святоотеческому да согласятся, убоявшеся апостольскаго гласа, громко глашающаго: Блюдитеся от творящих распри и раздоры (Рим.,16) и паки, и да не суть в вас распря (1 Кор.,1;10). Дозде о раздорах и несогласиях.

Из псалтыри толковыя, преводу преподобнаго Максима Грека, песнь Триех Отрок:

Сущее: Благословен еси Господи Боже отец наших и препет и превозносим во веки: и благословено имя Cлавы Твоея Cвятое, и препето и препето и превозносимо во веки: Благословен еси в Церкви Святыя Славы Твоея, и препето и препето и превозносимо вовеки.

Иоанн Златоустыи: Славы имя есть, Божие имя: аще бо Царь Славы имя есть, и победителныи, и елицы таковая. Множае паче, имя Божие: абие бо возставляется душа слышавши, абие Творца разумеет. Аще же имя Славы, множае паче существа: Господь бо и Вседержитель и Человеколюбив, и Благ: и вся таковая имена, Славы имена суть.

Из евангелия учительнаго, в неделю по Рожестве Христове, лист 458. (печать при патр. Иосифе, лета 7160 {1652}):

Евангелие: Яко да збудется реченное от пророк, яко Назорей наречется.

Толкование: Сказуетжеся Назорей Водящии и Святыи Божии, и Свет: обаче же и Святыи Израилев нарицается. И Даниил же Свята Святым нарицает Его.

Из рукописнаго апостола толковаго, превода преподобнаго Максима Грека, от зачала 21, о небесном и божественном звании Павлове:

Сущее: Идущу же ему и приближающуся к Дамаску, внезапу облистаему светом с небесе, и пад на земли, слыша глас глаголющь ему: Савле, Савле что Мя гониши. Рече же: кто еси Господи. Господь рече: Аз есмь Исус, Его же ты гониши: но востани и вниди во град, и речеттися что ти подобает сотворити, и прочая.

Толкование Аммониево: Почто не явися ему во Иеросалиме, почто не в Дамасце, яко не подобаше инех и не ко онем поведати. Видев бо Исуса и не терпя множества света, окаменися зрителное души и живителное. Тем же и мня очи имети не видяше, и уста имея не ядяше дондеже верова Анания глаголавшу ему слово и исцелися. По вере убо начат видети, прочее крестися и тако пищу паче духовную прият, тем же, подобно есть, паче крещати прежде, и потом пищу подаяти. О человеколюбию Владычню, Бог человеку беседует: что Мя гониши рече: Отцу своему подобится. Он бо народу еврейскому глаголет: людие мои, что сотворих вам или что оскорбих, или озлобих, отвещайте Ми. Сице и Сын Его Савлу глаголет: Савле, Савле что Мя гониши. Что же он отвеща: кто еси Господи, абие Владыку исповедует. Видиши ли душу благоразумну, кто еси Господи. Аз есмь Исус рече, Его же ты гониши. О премудрости Владычней: почто не рече ему: Аз есмь Сын Божии, Аз есмь иже изначала Слово, Аз есмь седяи одесную Отца: иже зраком Божиим Сыи: иже небо пропиная, иже землю основавыи, иже море прострыи, иже ангелы сотворивыи, иже везде сыи, и вся исполняя: иже прежде век родився. Почто ради не рече честная она и великая, и высокая: но Аз есмь Исус Назарянин, Его же ты гониши: от долняго града, от долней веси, места занеже не ведяще гоняй Его. Аще бо бы ведал Его, не бы убо гонил, яко от Назарета бе ведяше не ведяше, яко от Отца рожден бе, и Сын Божии есть. Аще бы убо рекл ему Аз есмь Сын Божии, иже изначала Слово: рекл бы убо, ин есть он, и иного аз гоню, несть сей распныися. Но да уведет тако Оного гонит, воплощшагося, зрак рабии приимшаго: с ними пожившаго, умершаго: погребеннаго. От долняго града суща глаголе: Аз есмь Исус Назарянин, Его же ты гониши, Его же видел еси, Его же познаваеши, с тобою пожившаго. Сего ради абие владычество исповеда: сниде толико, елико раб взывати можаше. Ниже

Толкование Златоустаго: Почто же не изначала се бысть, но потом да явится, яко воистину воскресе Господь. Гоняй Его и не веруя погребению Его и воскресению, откуду бы убо веровал, аще не бы была многа воскресения сила: иже бо сице весуяи {вися}, яко и крови изливати, и в темницах влагати, внезапу верует; иже ко архиереом пришед, и писания прием, связаны ученики Христу приводити: се ныне Владыку исповедует. Славы имя есть, Божие имя, аще бо Царь Славы имя есть, и Победителныи. И елика таковая: множае паче имя Божие. Абие бо возставляется душа, слышавши, абие творца разумевает: аще же имя Славы множае паче существо: Господь бо Вседержитель и Человеколюбец, и Благ: и вся таковая имяна, Славы имяна суть. (Златоустаго из псалтыри толковой, прподобнаго Максима Грека)

Из книги Златоструя от слов святаго Иоанна Златоустаго:

От 11 псалме: И о словеси реченном в деяниих. Бысть же на утрие собратися старейшинам их, о хромце седящим у красных врат. Оле, лукавство и злая зависть: кто виде коли о недужнем исцелевшем, врача досаждаема, кто виде о добродетели человека, добросотворшаго котораема. Ниже. Егда воля Божия немощному повеле исцелити, тогда вы на врача вины сплетаете: обаче разумно буди всем вам и всем людем израилевым, яко о имени Исус Христове, Назарянина Того, Его же вы распясте, Его же Бог воскреси из мертвых, о Том Сей стоит пред вами здрав. Ниже. Что твориши блаженныи Петре видети есть, яко неполну имаши любовь к Богу: пред ним Сына Божия исповедал еси, а без Него Назарянина наречише: ей рече ругаемаго ими имене воспоминаю, да болшую им печаль сотворю: о имени Исуса Христа Назарянина, Его же вы распясте, Его же Бог воздвиже из мертвых, не мните Его уже на земли живуща, о Том Сей стоит пред вами здрав.

Из минеи четьи, декабря, в 23 день, от жития преподобнаго Нифонта:

И се им глаголющим и минующим стогмы {улица, площадь}: и сретеся с ними человек скача с сопельми {гусли, флейта, свирель} и послушаху его. Ниже. И се муж зряще из полаты стоя, и той стречем {уязвлен} от сатаны и повеле пред собою ставши свиряти {играть на свирели} и всех плескати руками, бесом угодие творяще. И нача скакати, и вземь даст {муж} сопельнику сребренницу. Он же {музыкант} ю прием вверже во чпаг {карман} свой, беси же изъемше изо чпага сопелнику, пустиша ко отцу {сатане} в бездну, и реша лукавому бесу сице: иди рцы отцу нашему великому, тамо связанному Назарянином: се ти жертву един от князь пусти {прислал}, нарицаемыи Алазион. Ниже. Иже приим лукавыи взыгрався рече: от кумир аз жертву приемлю, но не могут мене обвеселити, яко же приносимая от християн: си рек, мерскии он, сатана, паки возврати вспять сребро и медь сопущему {музыканту} осквернив я своим омрачением, рек духу пронырливому: да растет по силе мое, всех идете же и побеждайте грешныя назаряны. Инако не могут нарицати Господа нашего Исуса Христа, но Назарянина Исуса.

Из благовестника, Лука, гл., 24; зач 114, лист 252, на обор.: Она же реста ему, яже о Исусе Назарянине, яже бысть муж Пророк силен делом и словом пред Богом, и всеми людьми.

От толкования: Виждь какову малу о Господе мысль имяста, мужа бо Пророка и непщеваста, яко же Илию, и Исуса Наввина, или Моисея рещи, силна делом и словом.

На Корсунских вратах

R  H  O  E

Рекс Ностер Ест

Царь наш есть

и

Рекс Назореус Ест

Царь Назореанин [Назорейский] Есть

На распятии Антония Римлянина из Рима принесенном

I  H  S

X  P  S

Толкование слов верхней строки:

Иудекс Гониум салуатор

Судия Человеком Спаситель

На те же слова:

Исус Гонинум Структилис

Исус Человеком Зиждитель

На те же слова:

Исус Гостиум Супетанс

Исус Врагов Победитель

Толкование нижней строки:

Христус Пекката Сусципиенс

Христос Грехи Вземляи

На те же слова:

Христус Потенс Салвере

Христос Могии Спасати или Спасти

На те же слова:

Христус Пропициатор Симулакрум

Христос Очиститель Кумиров

На другом Антониевом с Риму принесенном распятии

X  H  S

I  P    —

Толкование верхней строки:

Христус Гомо Субстанциалист

Христос Человек Существенный

На те же слова:

Христус Гуманитатис Сусцептор

Христос Человечества Восприятель

Токование нижней строки:

Исус Провидиус Салутис

Исус Промыслитель Спасения

На те же слова:

Исус Пеккаторум Салватор

Исус Грешных Спаситель

А ныне у латин на распятиях пишут

I  N R I

Исус Назоренус Рексус Иудеуск

Исус Назарянин Царь Иудейскии

На Москве в Соборе Благовещеньском имеется киот, исполнен панагии архиерейских сребропозлащенных: в них же на коейждо изображен чеканным художеством Крест Христов, трисоставныи с подножием и дщицею, с копием и тростию, надписание имущь: Царь Славы, Исус Христос, Ника. На иных надпись Исус Христос, Сын Божии, и прочая. На других точию Исус Христос, надпись. А таковых крестов преисполнен весь киот. При тех же панагиях совложены и настоящих архиереов панагии имеющия надпись пред древними приложену, четыре литеры сицевы: I Н Ц I; си есть Исус Назарянин Царь Иудейскии, подобно латинским и немецким, и лютераньским распятиям.

Из Барония, лето Господне, 304, Констатия и Галерия, 1:

Описует святыи Василии Великии страдание Варлаама, его же мучители руку десную на огнь возлагаху и вместо олтаря употребляюще ея, кадило на ню метаху, дабы оное кадило, огнем палимая рука, на олтарь повергла, и богом возмнелася {почтила}. Но он руки не подвиже, донележе вся от огня истаяла: и не можаху ниже сердца его, ниже руки к жертве диавольской победити.

Той же Василии похваляет и Улиту мученицу в Кесарии. И егда некии сребролюбивыи поганин от Улиты имение отъимаше: она пред судом законом защищашеся. Но поганин рече, яко защищения от суда не имат, аще прежде Христа не отречется. Она же имения и здравия лишитися избра, и во огнь уготованныи с великою радостию вскочи.

Лето Господне, 39, Константии, 4:

Максимиан великия своим творя, и жен честных сенаторов своих насильствуя, повеле игемону своему римскому: дабы ему свою послал, ея же красоте ведяще. Сия бе христианыня, Софрония именем: муж ея, страха ради, соизволи на оное повеление: и испросила себе Софрония поити в камару {свод, кров}, аки хотящи украситися, и рабынею девицею, возвести глаголя, да будет таковыя христианы приятны мучителю: и тамо заключившися и Богу вручившися, от надхнения Духа Святаго, острым железом прободе сердце свое, и мертвыи труп мучителю остави.

Такова же бе во Антихии Пелагея, девица млада, яже произволи низврещися с горы и разбитися, нежели осквернитися от неверных, иже ю на нечистоту похитити хотяху. О сей пишет святыи Амвросии, похваляя велие мужество ея, еже и Златоустыи святыи, яко единостранец ея творит. Тоя же Пелагии мати, пишет Амвросии, ведома к судии, изволи паче утопитися в некоей реце, неже впасти со дщерьми в поганския нечистыя руки, на погубление чистоты. Еже и Евсевии воспоминает: несть сомнения; яко на сие имяху особое надхнение Духа Святаго, яко же и Августин показует.

Баронии: лето Господне, 331: Константина, 26:

Моляшеся Донат, а Бог будто ему с небесе отвещеваше: толикая гордость его, яко на игемонов кесарских, и на самого кесаря лаяше, при таковом и толь гордом вожде в сицевое неистовство приидоша донатисты, яко себе новое мученичество, им же бы у народа прославилися, обретоша си есть, убиение самых себе: повергахуся с гор, падаху в огнь, и потопляхуся в воде, аки бы за веру, и за Христа, а единомыслении их вместо мучеников освящаху. О сем на многих местех глаголет Августин, и толикое юродство, ересь, приводит, еже и между погаными не бе: сами наказоваху себе, и грехи своя, егда от Церкве святыя отпадоша, в ней же молитвы иных помоществовати им можаху.

[Андрей Д-ч, копия]:

Известие странным братии, пришедшим ради мирнаго состояния, с ними же беседовахом от святых писании, и по желанию их, и других братии, введение общесогласное, и примирение извествуя.

Понеже пустынножители прияша обычай от древлеправославныя церкве имети на животворящем Кресте подписание, по древлецерковным святым обычаем, и кресты медныя лити с древних обрасцев, с староцерковными подписании. О сем премножайшая, древлецерковная святых свидетельства имеем. А како о Пилатове написании во святем евангелии, и в прочих церковных книгах писано, тако и приемлем, а своего предания от тех святых словес, чево тамо не написано не изводим, и не предлагаем, и от других своеразсуднаго предания не приемлем. О сем премногая древлецерковная святых свидетельства: и противо неистинных наношении ответствования достоверная на беседе вашей любви явихом: чесо ради нам готовому святых преданию последовати надежно есть. А о оной, Пилатом написаной, титле, воображали ли ю в древлеправославней церкви, четырьми буквами, святии на образех крестных: о сем достоверных свидетельств ищем: того ради и писати, тех четырих букв, до поданнаго свидетелства, советовати опасение имеем, понеже от древних святых воображенны не обретаем.

А когда прилучится нам быти в странных христианех, и обретающимся у них животворящим Крестом, с подписанием Царь Славы, Исус Христос, Ника, аще и титла на тех же крестах, четырми буквами воображена, и тем животворящим Крестом поклонение творим, и инем советуем поклонение творити: о чем у нас и прежде на общей беседе писмом извещено.

И о сем вашу братскую любовь молим, еже вы потщание имеете; на староцерковных крестах подписание обыскиваете: благоволите о сем доброе и боголюбное радение имети: яко же соборне в Стоглаве Православная Церковь повелевает; святыя иконы, и подписания с древних преводов воображати и древлецерковная святых известная начертания во образец и во свидетельство возъимети. А от новинов соединения, от них же мы всяких тайнодействии опасаемся, со строенных от них иконных и крестных начертании, и на них подписания, чтоб каким неведением нам во свидетельство и во образец не прияти, и по преданиям их не быти: но яко же в прочих тако и о сем древлецерковными святых достоверными свидетельствы утвержатися, а о чинех молитвенныя службы, яже мы прияхом от древлеправославныя Церкве, и наипаче древлесоловецкия святыя обители, о сем вашей любви на беседе явихом, и от святых писании и иноческих обычаев засвидетельствовахом.

Наше некия и разныя чины обрящутся в том друг з другом разгласия не имети: но кому с ким прилучится приходити имети соглашение, и распри не чинити. Да мир Божии будет между христианы. Аминь.1727 году, августа, 5 дне написася.

На пункты ответы против Ильи Ковылина, феодосиева согласия

1) О титле на кресте, I Н Ц I,

2) О начальствующих лицах, отитлуюя благоверных,

3) Яко сами некрещени и других не покрещеваем

4) Некрещенных умерших поминаем и псалмы говорим

5) За живых некрещенных молебны поем

6) Масло древяное и свещи от некрещенных приемлем

7) Браком совокупльшияся до познания веры по крещении разводите

8) Исповедь по крещении на 3-й день чините

9) Пред крещением не повелевается вами 40 дней постится

10) Ядят с мирскими, настоятели не истязуют

11) С новоженами общение имеют

12) В баню с мирскими ходят

13) Тропари за умерших некрещеных говорят

14) Самосожегшихся за мучеников причитаете

15) Книгу прилагательнаго имени счинивше

16) Сами между собою несоглашение и разсмотревше

*  Приложения

Слово надгробное блаженныя памяти боголюбивому Выго-пустыннаго общежительства Екклисиарху Петру Прокопиевичу; сочинено того же общества господином Киновиархом Андреем Дионисиевичем.

Кто есть человек (возглашающу пророку)  иже  поживет и не узрит смерти. Кто от Адама рожденных, земля еси и в землю паки пойдеши Адаму реченных избежати возможет. Кто смертных страшнаго сего смертнаго таинства восприяти не воздолженствует. Ельма убо, о боголюбивая чада пустынная, потаися от нас церьковнаго благолепия торжественник; скрыся от нашею очию любезный боголюбия ревнитель; покрыся смертными облаки братская красота; умолча язык сладость слова Божия точащий; затворишася уста молитвы соборныя к Богу и святым его мироухающая; зайде сладкий нашего зрения свет; скрыся от очию нашею любезная свеща; взяся в горкия сия дни  пустынное утешение;  скончася  в скорбное сие время раб Божий  Петр, бодрый  служитель церковный. Чесо ради никто зде от боголюбивых возможе сие разлучение понести без жалостнаго сердца, никто без скорбныя души, никто без плачевнаго лица. Вси же жалостными уязвишася сердцы: старейшии возскорбеша, церковнии восплакаша, общежители возслезиша, скитяне возрыдаша, сироты восхлипаша; вси же возтужиша таковаго усерднаго красителя церковнаго, таковаго разженнаго слову Божию служителя, таковаго ревнительна к делу Божию тщателя и в скорбных случаях вселюбовна утешителя, и в напастех скора   молитвами вооружителя,   и тепла всех к молитвам возбудителя. Тем же убо неправедно нам мнится быти таковаго слову красителя без слова гробу отдати, и якоже в земли тело, сице в молчании жизнь его скутати, и ниже любви духовныя, ниже родственныя воспомнити, и лишити себе же и прочия любовныя сладкаго того изображения, и якоже незрим есть телом, не зрети его душевныма очима оставити. Аще бо грубейшие от поселян   умершия своя частыми воспоминании повествуют,  и поселянская его дела, елика или в ратайстве дивна, или в ловительстве чудна, или в домостройстве им мнится добра, та вся высоко вещают и друг другу проповедуют, и на гроб приходяще, и друг другу любовнаго своего показующе, дела его и словеса возвышают, много себе теми повестми утешение устрояюще. Не много ли паче нам, мужа сего в духовных подвизех от юности усердно подвизавшагося и многия сладости и любви духовныя нам виновнаго словом изобразити должно есть; не яко да он воспочтится, не требует бо сего смиренная она душа; но да мы словом изображена его, яко жива зряще утешаемся и поелику возможно пользы наслаждаемся, и воспоминающе любовно любовнаго нашего любви точителя, любовно на поминание души его воздвигнемся; чесого у нас ныне, якоже саморучным его писанием, сице душею его просит и желает и любезно приемлет. Убо всежалостная чада церковная,  понеже любовными вашими пламы скорбите и желаете достойнаго желания сего мужа зрети же и беседовати с ним; приидите ныне отрем слезы от очию нашею и жалость сердца нашего, и с повестию сею походим с ним умныма очима, и воспомним краткостию слова пребывание его с нами, и поне сице сотворим утешение себе от многия жалости.

Бе бо сей раб Божий от юны версты научен красоты благочестия, и от преятия родитель взгромажден ведением древняго благоверия, якоже и отчество его и вся поморская страна, яко велие прародительное наследие святых отец древнее благочестие преятием друг от друга лобызаша, и отцы сыном и тии же своим чадом преподаша ведение и слышание святоотеческаго православия, с киим поучением и просвещением сей раб Божий воспитовашеся. Не от невежд же некиих и слова непричастных древлецерковное благочестие всероссийское всей поморской страны в нынешняя времена смущенная проповедася и уяснися. Сице и рождение сего от прародителей и родителей, от них же последованием благоверие восприят, не неведущих писания производится, якоже слово ниже хощет показати.

Егда бо грех ради наших Никоном патриархом перемена 6лагочестивых святоотеческих уставов учинися, и светлое светлейших святых отец чиносодержание отлагашеся, своя же его уставоположения утвержахуся, и знаменающиися крестным знамением по святых отец Божиим уставом, тии проклинахуся, и по старопечатным и старописанным святым святоцерковным и царственным и архиереосвидетельствованным книгам содержателю благочестия, знаменосцы же и чести достойные отцы яко злодеи тогда прогоняхуся и вязахуся и мучении тяжкими искушахуся, и тьма тяжка покры тогда Россию, мечь и огнь поядающь села и домы и пустынная места за содержание древняго святоотеческаго благочестия; от лет сие смущение седмыя тысящи сто шестьдесят втораго году, с Никонова патриаршества. От тогда противящийся Никонову новопреданию и опасный хранитель святоотеческих древних содержаний, священный архиерей и Божий человек, Павел епископ коломенский, за имя Божие и за свидетельство Исус Христово за древлецерковное православие, муж свят и достойный чести, с безчестием послан. бяше в заточение в поморскую нашу страну, в Олонецкий уезд, в Палеостровский монастырь; паче же рещи яко некий Моисей и Аарон Божиим изволением на утверждение новаго израиля, беззлобивых и богобоязливых поморских людей прислан бяше. Идеже несколько время пребыв, поучая свободно народы, утверждая жити в святоотеческом благочестии, нововыниклых уставов Никоновых соблюдатися наказуя. Коего учения и благословения архиерейскаго страны сея жители вкупе же и родители сего раба Божия Петра слышатели же и свидетели зело бяху.

По сих же явися ин муж свят и благочестив, игумен Досифей с Тихвины  Николы Беседнаго монастыря, благочестия ради крыяся,  старостию и добродетельми украшенный, иже часто прибегая в пустынной  некоей Куржетской обители,  ея строении преподобнаго некоего старца Ефросина, в ней же и святыя церкви бяху. В них же собираяся со многими отцы, великыми постники и знаменосцы, иже от многих стран и от Соловецкия обители изшедшии, яко ангели некия, земнии и небеснии человецы, службу Богови за весь мир приношаху  и житием добродетельным просвещаху. И бяху  мнози в них разумом божественнаго писания обогащени и безстрастия  светом просвещени, священнаго и иноческаго чина знаменосцы. Откуду тогда  в зиму гонения лютаго на благочестие весна сияше  пресветла от оных знаменосцев благоверия. Тогда мнози от знаемых и сродных сего раба Божия во ону  обитель прихождаху и просвещахуся, исповедахуся и святых безсмертных таин причащахуся. Аще и послежде защитницы Никоновы и ненавистницы древлесодержательнаго благочестия, архиерейстии посланнии с Новаграда, оле плача и жалости! не токмо разпудиша стадо Христово (по реченному апостолом:  все хотящии благочестно пожити о Христе Исусе гоними будут);  но и святыя церкви тыя в Куржетской обители огнем пожгоша. Обаче одушевленныя церкви благодатныя, по апостолу, — вы есте церкви Бога жива, старожитнии они отцы остальцы Соловетския и прочих обителей, крыяхуся по пустыням поморским около Онега езера, пачеже около отчества сего поминаемаго нами Петра, Повенца именуемаго. И тако древлеправославное благочестие храняшеся и проповедашеся, и в домех благочестивых богобоязнивых мужей светяшеся, и пустынная места благочестивыми  от гонения наполневахуся. И сей раб Божий Петр от младенчества благочестивыми повестьми питаем со сродники своими возрастааше. И тако не токмо от издревле сие наше православие евангельскими, апостольскими и соборными догматами украшено есть, и священными книгами засвидетельствовано; но и в смущенныя сия дни архиерейским и священных мужей благословением и проповедию насаждено и страдальческою кровию утверждено есть, в нем же сей раб Божий в юны версты слышанием просвещаем возрасте; такоже от прародителей и родителей, наученных святым книгам сущих и вероятельства достойных восприя последованием уставы древлецерковныя.

Прадеда бо его отец бяше рода князей Мышецких с Новгородския области, именуем Борис Александрович, муж благ и благочестив и добродетелен, якоже последованием родителей ведению даже до нас дойде. Той во время смущения Русския земли, егда от шведов и поляков волновашеся Россия, и мнози принуждаемы бываху целовати крест чужестранных кралей; сей же благородный князь не восхоте в том учинити поползновения, но якоже крепок во благочестии, сице своим природным государем вернейший явися, не поддадеся чужестранным иноверным кралем, не восхоте креста за них целовати. А понеже велие налегание тогда от противных бяше и бедствоваше Россия конечным бедством, остави сей отечество свое и поместья и вотчины, и пресельник бывает в Заонежской пятине, аки в пустыне некоей в лесожительном селце, Пудожская гора именуема, в нем же, во иноческом чину Боголеп преименованный, благочестно преставися. Сын же его Иван Борисович священства и иночества чином назнаменован, Иона во иночестве именуем упокоися. Того же дети Порфирий священник и Евстафий пресельники на место Повенец именуемое быста, незнатно и убого суще; якобы последи от них и рода их тое место населися,и из рубища нищеты и неволи очистися и знатно в сих странах учинися. Сего бо Евстафия дети Иаков, иже и дед бяше сего поминаемаго Петра, муж в сих странах знаменит и разумен, в гражданстве же славный от великих государей самолично многажды милосердие гражданству же и сему Повенцу получивый; а наипаче во время воеводства на Олонце князя Терентия Васильевича Мышетскаго, от него же по любви к милосердию благородия сродственнаго велие милосердие тогда получи. Такоже и братия сего вси священному писанию научени и церковными древними уставы просвещени, и в гражданстве и в странах сих знаменити бяху. От них же Дионисий не токмо в мире правдою и добродетелию поживе, но и оставив мир, пустынное житие лобызав, добре Богу девятолетно потрудися; свидетели же житию и словесем его братства сего старожители суть. Помяновеннаго же Иакова сын Прокопий произнесый сию добрую отрасль в мирстем житии умре. Мати же сего добляго Евфросиния, во иночестве Екатерина, зело боголюбива и благочестива бяше; яко многия ея ради веры и любви к Богу единочадых своих сего Петра и дщерь едину и вся мирския покои не пожале во время гонения веры оставити, да благочестно во благочестии скончается. От таковых прародителей и родителей сей наш Петр произшедый и от младенства священным книгам и древнему благочестию научен бяше, в девятоенадесять лето возраста сего мира и мирскую прелесть оставляет. Возжада бо (рече с пророком) душа моя к Богу крепкому и живому, услышав глас евангельский и поревнова, ощутив преславный Владыки глагол; и возъусерствова почув реченное: аще кто оставит отца и матерь, жену и чада, села и имения сторицею приимет, и живот вечный наследит. И теплым тщанием исполнитель сему учинися; отбеже бо покоев телесных, отскочи красоты славы сластей, яже тогда преизобильствоваху, и насельник с сверстники и сродники некиими своими пустынных мест бывает, с псалмопевцем ревнуя и вопия: се удалихся бегая и водворихся в пустыни, чаях Бога спасающаго мя. Тепл бо бяше верою и разжен усердием; глаголаше бо: аще ми и гладом умрети в пустынных местех, но лучши произволяю терпети Христовы ради любви в прародительском церковном благоверии, нежели жити в селех грешничих в смущении о благочести, в мятежах и молвах и гресех мира сего.Егда же приложися пустынным недром не лености и дряхлости вдадеся, не сну и унынию послужи, не своевольству и безвременному скитанию ссебе вручи; но весь всего себе всеусердно Богови на службу отдаде; церковную службу исполняти в келиях по уставу возъусердствова, ей же от младенства научен бяше. Правило же келейное по благословенію отц усердно исправляше; чтению же священных писаний, яко райския сладости, по дни и по нощи выну наслаждатися не преста, читая, преписуя, каталоги устояя (устрояя?) даже до смерти в сих упражняяся; в посте же и трудех пустынных юность свою смиряаше, усердно многи пустынные труды подъемля, в них же не оставляше молитвеннаго правила и священных писаний прочитания; тепл бо бяше и усерден, в во всех делех остатися не хотяше, яко рещи усердному делателю многая дела уступают. О чистоте же тако телесней яко и душевней велие прилежанние имеяше, поминая рекшаго — блажени чистии сердцем, яко тии Бога узрят; размышляя же о не хранении чистоты беду не малу апостолу глаголющу, кроме тоя никто же узрит Господа. Прочее рещи о всех добродетелех подвизаашеся, ко всем ревноваше, ову творяше, другой поучашеся, о иной ревноваше,. иная слезами и моленьми наполневаше, и во всех добрых делех не последний хотяше быти. Часто же о сих поучашеся и отеческая словеса о чистоте и смирении умнем поучающая выну прочиташе, и о смертней памяти и суде страшнем всегда наказовашеся. О службе же церковней и о уставе тоя зело прилежание от младенческих ногот имеяше, не токмо что от родителей и от отец древнейших научен бяше, но уставы древлецерковныя в обиходники монастырския прочиташе, и с них воедино некое краткое собрание преписоваше; попечение бо велие имеяше да вся по отеческим уставом богоугодно исправлена будут. Чесо ради многаго его тщания и искусства достоин явися екклесиарх церковныя службы, и украситель торжественный, и всебратственный пользодатель, и многий помощник строении общежительству, тако Богоявленскаго, яко Крестнаго девическаго.

Откуду же общежительство сие начало прият и како устроися, нужда нам вкратце объявити зде, да скажуще о нем екклесиарха тоя покажем, екклесиарха же повествующе общежительетво явим; да неведущии ведением, ведущие же памятованием обновят своя слуха; ибо малая сия речка, или кто како об нем помыслит, общежительство сие, глаголю, истече от источника великаго, Соловецкия глаголю преподобных отец и мирских молитвенников Зосимы и Савватия обители, яко благословением, тако чином и уставом образом сицевым. Егда бо древле соловецкие отцы не приимаху новых уставов Никона патриарха, древлесодержания церковнаго нимало уступати дерзаху; бяху бо в них тогда мужи честни и святи от многолетних подвигов постных просвещени и разумом божественннаго писания озарени. В них же два прочих превосходяща в премудрости и разуме и во всем ведении священных писаний; един Герасим Фирсов именовашеся, его же премудрость и разум каков бяше является от писания его, еже написа о знаменовании креста на лицах своих; вторый же черный дьякон Игнатий, муж, святолепен и подвижник велий, и божественнаго писания вельми читатель и внешняго наказания искусен.

Бяху жо тогда в Соловецкой обители мнози отцы святоподвижнаго их ради жития прозорливым даром и знамении и чудесы облагодатствовани. В них же бе некий отец Гурий именуемый, аки благоуродствуя пребываше, многая прорицания тогда предвещааше. Егда еще Никон митрополитом бывый, по мощи святаго Филиппа посылаем бяше; тогда той святый старец приезд его и яже о нем прежде прорече, и ина многа памяти достойна, глаголаху отцы, той прорицаше; молитвенник бо велий и постник бяше многолетен, и чистоты ради умныя предвидяше дальная, яко близ сущая. Той великий отец часто помяновенному Игнатию отцу повелеваше изыти из обители Соловецкия: Бог тебе, глаголя, повелевает отсюду изыти. Чесо ради стужившу отцу Игнатию и некогда молящу святаго сего старца: «Почто убо, о святче Божий, аки мя непотребна уда от обещания своего от обители преподобных изгоняешь?» Святый же той старец — «Иди иди, Игнатие, — рече, — не имея сумнения, хощет бо Бог состроити тобою велию обитель в славу Его». Обители же Соловецкой разорение предрече, яже послежде зельным страданием древле Соловецтии отцы за древнее благочестие скончани быша.

Поминовенный же Игнатий изыде из Соловецкия обители по глаголу святаго старца и по благословению отец, и Богом подвизаем прииде в сия поморскии пустыни, пребываше близ Повенца, отечества помяновеннаго Петра, и часто в дом родителей его прихождаше, якоже и прочии отцы Соловецкие, и благословения сподоблеваху. Пребываше же еей отец Игнатий во многих вышеестественных подвизех, и в вышепомяновенной Куржетской обители с священноигуменом Досифеем и прочими отцы схождашеся и единоумно о благочестии усердствоваху. Бе бо добродетельнаго ради жития и премудрости всеми знаем и именит; еще же живый в пустыне сей чистоты ради его сердечныя и безстрастнаго жития прозорливый дар от Бога имеяше; иже видяхуся добродетельны быти, их же провидя он последи отпасти благодатнаго жития, и предрече о них, иным наказанным быти за прегрешения их объяви, другия зело ревнители являющися от очию своею отгна преступники быти предсказа, вся же сия по предречению отца сего сбывахуся. Многи же сей отец священный просвети учением, научи благоверию, наказа добродетелем. Чесого ради мнози прицепившеся к нему и моляху его с ним пребывати и предводительством его спасенным быти, еже и сотвори боголюбивая она душа, памятуя проречение и повеление святаго старца Соловецкаго Гурия. И нача сей в пустыни общее житие не токмо по благословению отец Соловецких, но и благословением помяновеннаго игумена Досифея, бяше бо ему отец духовный, иже повеле ему женеск пол особь в пустыни от братии отстраивати, и велиим опаством целомудренное наблюдати житие, иже и велиим опаством по священным писанием общежительнии же и целомудреннии уставы предводительствоваше.

Сему же отцу ученик и сообещник бывает кроткий, аще ныне кто таков, Даниил, благословением священнаго отца игумена Досифея, бяше бо ему сын духовный и стаинник благочестия. Молящу же Даниилу священнаго сего игумена да благословит и научит у какова искусна отца в накаэании быти; священная же она глава, аки Богом подвизаем: «иди, — рече, — и в ваших поморских странах пребывающа Соловецкаго старца Игнатия послушай; сей бо мощен тя наставити на путь спасения»; еже и сотвори Даниил, бысть ему сын и сообщник общежительства его и несколько время терпяше с ним и братиею многи скорби пустынныя и гонительная волнения. По сих же отцу Игнатию многи души во благочестии и добродетелех научившу и направившу и скончавшуся о Христе; осталец же онаго общежительства Даниил смиренный, скитаяся по пустыням с некоею братиею, место от места пременяя многаго ради тогда гонительнаго волнения; и многое попечение имеяше, аки некий великий долг, да общежительное обещание по благословению отец в общежительных святых уставах исполнит. Бяше же тогда в пустыни сей живя священный отец, предревний великаго жития подвижник, авва Корнилий староскитский, Ниловы пустыни древлеобещник, знаемый еще древле бяше и любим добродетельнаго ради жития святейшему патриарху Филарету, и несколько времени у него жил бяше. Той аки ангел некий в вышеестественных подвизех просвещаше пустынная сия недра, и всем нам отец духовный и сладостный наказатель бяше, Даниилу же и помяновенному нами Петру. Бяху же инии отцы: древле Соловецкий отец Геннадий, Качалов по роду имянуемый, Иосиф Соловецкий же и ины отцы и пустынножители, с малою дружиною живуще и молитвами своими дебри сия освящающе.

Даниил же в малом общежительстве живя, древле Соловецких отец благословением аки искру во угле, или аки благовонное миро в алавастре носяй, соблюдая. Усердствуя же он о общежительстве, возъусердствоваше же и прочая братия, возревноваша же и отцы, благословляюще и повелевающе о нем пещися; яко же и нас с приснопамятным Петром моленьми, отеческими благословеньми, советов принужденьми принудиша общежительнаго не жития точию, но и попечения тяготы вкусити. Разсуждающе тое тогда, да обдержанием общежительства в пустыне сей благочинное житие утверждается, всякое же безчиние изничтожается, и да не попустится своевольным злым людем место пустынное жительство быти, яко же и бысть; ибо тогда воровских людей терние в лесах сих вкоренятися наченшееся, благодатию Христовою обдержанием общежительства сего изничтожися. И мирно, и благопокорно, и ведомо житие сие тако царскому величеству, яко властем градодержательным общежительством сим исходатайствовася; яве бо по Христовым и апостольским преданием повелевающим Бога боятися и царя почитати, и Божия Богови и кесарю кесарева отдаяти. Сия вся Богу помогающу, благое от Божиих писаний и благопокорное разсуждение общежительство сие источает. И тако сие общежительство, яко же рехом, от Соловецкия обители произтекшее есть, чином же и благословением Соловецких отец вкорененное, и священноигумена Досифея благословением насажденное, к сим же и староскитскаго отца Корнилия  и  прочих отец пустынных молитвами и благословением утвержденное, изперва место из места пременяя гонительных ради случаев бяше;  со  священным  отцем Игнатием близ Пурнозерских езер прежде водворяшеся,   пренесе же ся на Саро-озеро, идеже после отца  Игнатия  соблюдашеся; по сих близ Боровскаго скита при малом  езерки крыяшеся, идеже мы благодатию Божиею совокупихомся и живяхом, по благословению священнаго отца Корнилия и прочих отец пустынных и Соловецких отец Геннадия и Иосифа.  Таже Богу  извольшу преселихомся к Выгу реце, идеже не токмо древнейшии отцы  Корнилий и Виталий благословением и присещением многажды нам присутствоваху; но и Соловецкия  обители  священник Пафнутий  и пустынножительный   старец  поживе   во   общежительстве лет седмь, всерадостно благословляше устав общежителъства и церковныя службы и возвещая вся благочестивыя уставы же и обычаи Соловецкаго монастыря, и сладостно прилагашеся сего общежительства уставу. К сим же и древний старый священник Феодосий,  страдавый многолетно за благоверие, той прилувся быти в общежительстве сем, усердно похваляя и благословляя чины вся, и Бога благодарствуя о уставе общежительства сего, и сам желаше сообщежитель и служитель быти.

Сице убо сие общежительство от пустынных и освященных отец первозачатием проистече, толиких же и таковых священных мужей благословением строительствовано бяше; его же екклесиарх и состроитель и многоусердный пользователь бяше поминаемый раб Божий Петр. Но не таково бяше сие общежитие и особноскитское пребывание тогда, егда снидохомся, яко же ныне зрится. Бе бо тогда стадо Христово в сих поморских пустынях, аки в нощи бурной и темней, в гонительных волнениях и от безчинных людей во обуреваниях, по пустыням и по местом страдальчески без чина и паствы скитающеся; и рещи по Григорию Богослову, яко смокву в пустыни обретохом Израиля, и яко зерно едино или второе зрело в безгодне грозде благословением Господним убо соблюдено и начаток освящен, обаче мало и скудно и не наполняя уста ядущему, и яко стяг на холме, и яко древо ядреное на горе, или аще ино что от единаких же и не множайшим видом. Егда же благодатию Божиею и благословением отец совокупихомся в сие общежительство в таковых пустых хлебонеродных местех, в толиких бурях и волнах неисчисленных, в толиких ратех и напастех безпрестанных; о, коликих трудов и потов в строительство сего общежительства воздолженствовало! о, коликих подвигов бедовметных и попечений многопечальных возтребовало, — телесное житие состроити и душевное спасение устроити, в неплодных местех прекормление примыслити и душевную трапезу (да не гладом помрут) всегда уготовити, нивы лесораслыя с трудами пахати да и терновидные нравы со многими поты изтерзати, одеждами в нищих местех одеяти и общежительными святых отец обычаи ненавыкших людей украсити, горы своевольныя поравняти, чащи миролюбных обычаев искореняти, сено со огнем разделити, воды страстныя застановити, возгорения похотная и яростная загасити, волны многочисленныя утишити, противу ратей премножайших ополчатися. Колицы же и какови противности и злодыхательни рати на церковь же и братство сие быша и суть от диавольска злорыкания, от бесовския зависти от гонителей жития, от раздорников лукавствия, от иудоподражательных злодыхательства, от безчинных свирепства, от своевольных шатания, от злообычных роптания, от гладных случаев, от нужды потребных, от вне и от внутрь, от невежества и от предприятия, мнится сие от самыя преисподния геэнны волны сия на корабль благоверия гремеша и гремят, от самых челюстей чермленаго змия бурливыя воды сия на церковное благочестие восклокоташа. О, с коликою ужастию прешедшия рати тыя помыслити! О, с коликим жалостным плачем о оных пророчески возопити: яко аще не бы Господь в нас (помогая нам) ввнегдавозстати человеком и бесом на ны, убо живы пожерли быша нас; внегда прогневатися яярости их на ны, убо вода потопила бы нас.

Во всех же сих нужных братских строениях я ратех от диавола наносимых безчисленных, велий бяше ревнитель, и усердный подвижник, и теплый молитвенник, и духовный ратоборец, и теплейший советник, и помощник правительствовати братство, и боголюбивый учитель, и украситель церковный сей наш церковныя службы екклесиарх. Многолетныя же его всебратственныя и всецерковныя подвиги и труды не сего краткаго времене и не моего грубаго ума подробну представити пред ваша боголюбны очеса; аще и потребно нам сицевая слышати, да воздвизаемся на таковое усердие; аще и должно нам трудами его память поновляти, да незабвенно имеюще толикия его всебратственныя и всецерковныя подвиги, долг любви помяновением души его любовно отдати возъусердствуем; но краткости ради сия вся молчанием минуем. Обаче не премолкнут нивы и горы древния труды его возвещати, идеже он, брат, слезами припадаше, у всех прощения прошаше, взаимно же всем, вселюбное прощение изливаше; вся церковныя люди, вся любовныя и сродственныя лица плачаше на молитву Богу за себе воздвизаше, и ныне и тогда и нами и чрез нас вас убо, о священное совокупление, умильно молит, и  слезоточительно просит,   и вечное   любовное   целование деет: «здрави будите, — глаголя, — здрави любезнии отцы, здрави сладчайшая дружино, здрави  единоревнительнии  друзи,   любовнии сродственники, церковная чада, богособранные сироты, здрави вси боголюбезнии и сладчайшии мои   будите,   и за мя возставше   Владыце молитеся, пролейте боголюбныя ваша слезы, к царствующим Царю возшлите за мя любовная воздыхания всемилостивому Спасу. Простите мя, священии отцы,   елико согреших Богу  и вам,   простите мя, любезная дружино, вся богособранная церковная чада, и елико вас кого согрубих простите ми и за мя молитеся; помяните мою к вам любовно худую любовь; помяните яко о Христе пребывахом, ядохом и пихом, советовахом, усердствовахом о Бозе с вами, в скорбех утешахомся,   в напастех   увещевахомся,   словом Божиим наказахомся, церковными торжествы наслаждахомся, и ныне праведным праведнаго и милосердаго Владыки   моего судом   от вашея сладкия любви один отлучен есмь, и не вем что срящет мя, в путь отхожу вечный и не знаю кое получи получу пребывание. Аще бо, возлюбеннии мои, и подвизахся худым моим   подвизанием   о убогой души моей, и усердствовах с вами о церковном   благочестии; но кто свесть и известит мне, прежде Владычня правосудия, приятна ли моя убогая дела или отказана, вписана ли в книги животныя или отриновена от лица Божия. Понеже во многих века сего мятежех, во многих вышесильных попечениих, во многих паче нашея силы братских тяготоношениях или помрачением занят бых, или жестотою окалянихся, или неведением  падохся, или моленьми человеческими склонихся, или   многими сношеней бурями   погрузихся и нелепными мысльми прогневах моего Владыку, или словесы неугодными милосрдно его досадих, или безумными   делы противу  заповедей Его возборствовах и покаянием сих очистити не дойдох. Увы мне аще сими занят буду от лукавых мытоимцев; горе мне аще возхвалятся надо мною темнии бесове; ох мне аще осужден буду в мучительныя руце их. Аще ли милосердия ради моего пресладкаго Владыки и заступлением общия всех христиан Заступницы всесладчайшия Владичицы и молитвами   всех  святых небесных сил и всех святых Божиих угодников  и наших теплых молитвенников, и ваших ради святых молитв, ваших ради церковных и келейных поминовениих,   ваших   ради теплослезных   прошений; аще помилован пройду темная темных князей воздушная без пакости мытарства, аще милосердием Божиим покрыт дойду, вместо крова дивна, пресладкаго Владыки моего светосияния. О, колико возрадуюся и возвеселюся, о, колико возпою и возблагодарю моего Владыку, о, коликими гласы пророческими возкликну: благословен Бог, иже не предаст нас в ловитву зубом их; помощь наша во имя Госнодне сотворшаго небо и землю. Колико же должен буду памятствовати вашю сладчайшую любовь, ваши за мя умилительныя молитвы, ваша любовная убогой моей души помяновения. О, аще бы, дал Господь за вашими молитвами моей грешней души отраду, должен бы был возопити за вы ко Владыце; должен бы сладчайшия моя други, возмолити: призри, призри, пресладкий Владыко, на Твоя люди бедствуемыя выну, призри на твой виноград, его же насади десница Твоя, призри в тяжких мира сего волнах на обуреваемыя Твоя рабы, отжени лукаваго диавола от них злобу, защити от бесовских злоковарств, волны утиши, напасти отжени, ратующия утоли и в мире мирно сия церковная чада сохрани и небесному Твоему царствию причастники учини. О, аще бы умилосердился всесладкий наш Владыка и дал бы нам места светла в прекрасных кровех своих и совокупил с вами в вышнем прекраснем Иеросалиме; о, да дал бы с вами вечно нам возрадоватися, вечно в вечности небесной возвеселитися. О, колико бы тогда возрадовалися, колико бы возликовствовали, колико неизреченно восторжествовали бы, иже на земли в воюющей церкви, единодушно Его света в Троицы славимаго Бога славословихом, да даст нам и в небесней ликующей церкви благодарно и утешительно славити ег во вся веки аминь. Тем же, духовная моя братия, и друзи любезнии, и спастницы, и знаемии, не забудите мене егда молитеся; но видяще мой гроб, поминайте мою любовь и молитеся Христу, да учинит дух мой со праведными».

Сия убо и такова и вящше сих, раб Божий Петр, в жизни сей жив, изобразил словесы же и делы образ полезен нам попечения души. Сицевыя же умиленныя гласы и вещи, словесы же и писаньми во изходе души своея и ныне нам возглашаше и возглашает, сицевыми любовными пламы вся боголюбивыя души объемлет, сицевым, нестерпимым вечным рачительством сердца наши убодает.

Тем, боголюбное пустынное сочленение, христолюбнии отцы и благоверная дружино и вся усердная чада церковная, воспомним любовь любовнаго благочестия рачителя; воспомним, люди церковнии, церковнаго усерднаго красителя; воспомним, любители благоверия, о благоверном житии всетщательно попекшагося; воспомним, вси благочестивии, всем нам многаго утешения духовнаго и пользы виновнаго; возопием молебно Владыце всяческих, возмолим всеусердно Творца небу и земли, воскликнем к нему: небесный Отче вседержителю и Сыне единородне  и Душе святый изходяй, презри умершаго согрешения, и иже зде в  церкви  Тебе послужившаго,   в церкви первенец сотвори его радоватися  и славити Тя со   всеми огождьшими Тебе. Помолим  христианом теплую Заступницу, преславную Заступницу, преславную Богородицу: Царице мати милосердия, милосердо помилуй твоего раба, часто Тебе, о всепетая Мати, воспевающаго, и радуйся, Невесто неневестная, зде возглашающаго, тамо со всеми святыми умоли пресладкаго Владыку  душу его упокоити в небесных селениих. Помолим архангельский. собор и всех святых лики: о, архангели и ангели   всесветлейший соборе, Михаиле и Гаврииле со всем воинством безплотным, помозите Божиему и вашему рабу, иже в здешнем житии памяти и службы вам усердно торжествовавшаго и на помощь себе призывавшаго,  в тамошнем пребывании любовни и милостиви продстатели ему будите.  Велиции апостоли Петре и Павле и Иоанне Богослове со всеми апостоли, будито тепли  пособники теплому нашему молителю. Вси святии Божии угодницы, угодити вам службами потщавшагося милостиво заступите. Теплый наш молитвенниче святителю Николе, усерднаго вашего служителя, яко отец милосердый, приими в защищение. Преподобнии отцы наши и всего мира молитвенники   Зосимо и Савватие, Сергие и Варлааме, не презрите вашего торжественника. Вси российские чудотворцы, не оставите ваши праздники любовно творившаго. Пострадавшие за благочестие страдальцы российстии, помяните любовно срачительствующаго во благоверии и поминавшаго вас рачительно. Соловецкие отцы и исповедницы, благовкрия любящему вы любовь воздадите. Сладчайший Мемноне церковный и наш подвижниче, объими любовно твоего и нашего срачителя. Дионисие старче и боатства сподвижниче, приими любезно любезнаго своего сердоболя.. Екатерина боголюбивая, восприими свое чадо, его же Божия ради любви оставила младша. Вси преставльшиися и милость Божию получившии отцы пустыннии и братския   обещники, приимите любовно усердно вы зде помииавшаго. Вси души праведных,  утешите вашим утешением от скорби сея грядущаго вашего рачителя. Отсюду, отцы пустыннии, любезное братство, с поминанием провождайте, тамо отшедшее спасшееся братство любовно приимайте; отсюду, любезнии сродницы и други, с моленьми и слезами отпустивше, помяновением сердобольствуйте, тамо, любовнии ему спасшиися дуси, праведных радостно в радость прияти Владыку умоляйте.  Вси же вкупе тако в небесней яко и в земней церкви славяще прославим  и благодаряще возблагодарим Христа Сына Божия, искупльшаго ны честною своею кровию от пленения диаволя, и смертию смерть поправшаго, и тридневно воскресшаго, и всем правоверно в него верующим вечное пресветлое воскресение даровавшаго, с безначальным его Отцом и с пресвятым истинным животворящим Духом во вся веки.

Аминь.

Опубликовано в журнале “Русская старина” т. 26, ноябрь, 1879 г., СПб, Ив. Д. Беляевым.

Обычай Великороссийския страны древлеправославныя святыя соборныя и апостольския Церкви о приятии еретик таков обдержашеся

Два святейших патриарха, Ермоген и Филарет соборне о сем свидетельствуют, сице во изложении их и собрании божественных правил объявляется.

От божественных писаний и от святых правил собрание великаго господина, смиреннаго Филарета, патриарха царствующаго града Москвы и всея России и сошедшихся к нему митрополитов и архиепископов и епископов, Макария, митрополита Новгородскаго, Варлаама, митрополита Ростовскаго, Корнилия, архиепископа Вологодскаго, Арсения, архиепископа Суздальскаго, Пафнутия, архиепископа Тверскаго, Рафаила, епископа Коломенскаго о крещении латынь и о их ересях [Потребник печатный, лист 559] . (ниже)

Тем же убо аз, Божией милостию, патриарх Филарет, царьствующаго града Москвы и всея России, уведев убо неустроение и соблазн в пастве моей сице бывающь. Во второе лето паствы моея, от создания же мира в лето 7128 [1620], возвестися убо мне, некотории два священника Иоанн и Евфимий, от церкве Пресвятыя Владычицы нашея Богородицы и присно Девы Марии, честнаго и славнаго ея Рожества, иже в Столечниках, на Иону, митрополита Сарскаго и Подонскаго, сицеву вещь, яко той Иона митрополит, тем двема священником Иоанну и Евфимию, от латынския веры пришедших двою человек ляхов, Яна Слобоцкаго, да Матфея Светицкаго, не повеле крестити, но токмо святым миром помазати их, и потом повеле причастити их пречистому телу и крови Господни (ниже). Аз же, смиренный патриарх Филарет, не презрех такова раскола, да не погибнут овцы стада Христова и испытанием писаний, и правою верою исправитися в подобу явленную вещь изволих, да не како останок еллинския и июдейския злобы воистину в зрелую пшеницу вмесился будет, и ис корене яко плевел да восторгнется, и чиста явится церковная нива. И того ради повелех Ионе, митрополиту, пред собою стати, и воспомяну ему о Игнатии патриархе, иже бысть во дни наша. От него же смута о том же крещении – еретическом первое явися, егда в лето 7114 [1606], грех ради наших Господу Богу попустившу, и царствующий град Москву лестию и мечем прият, рострига чернец Гришка Отрепьев. Патриарх же Игнатий угожая еретиком латынския веры, и в церковь соборную Пресвятыя нашея Богородицы и присно Девы Марии, честнаго и славнаго ея Успения, введе еретическия папежския веры Маринку, святым же крещением совершенным християнскаго закона, не крестил, но токмо единем святым миром помаза: и потом венчал ю с тем растригою: и якоже Июда предатель и сей поругася Христу. И обоим убо сим врагом Божиим ростриге и Маринке, подаде пречистое тело Христово ясти, и святую и честную кровь Христову пити. Его же Игнатия за таковую вину священноначальницы великия святыя церкве российския, яко презревшаго правила святых апостол, и святых отец от престола и от святительства по правилом святым изринуша, в лето 7114 [1606]. (ниже) Аз же по малей силе моей, елико благодать Святаго Духа настави мя, вседушно попекохся о сем, и правила святых апостол, и святых отец прилежно смотрях со вниманием, и истязовах со испытанием, того ради. Да уведят вси людие всея российския земли: яко вси еретики различных вер еретических, не имут права святаго крещения, еже водою и Духом Святым. И того ради от всех еретических вер различных приходящих к православию християнскаго закона, подобает совершенно крестити святым крещением, по преданию и содержанию святых вселенских патриарх, еже утвердиша по правилом святых апостол и святых отец, всех же убо еретических вер сквернейши и лютейши есть латыняне папежницы. Понеже всех древних еллинских и жидовских и агарянских, и еретических вер ереси проклятыя в закон свой прияша, и со всеми с погаными языки и с проклятыми же еретиками обще вседействуют и мудрствуют. [Мы же чисти  есмы от сих] И от лет убо приснопамятнаго и святаго великаго князя Владимира, иже просвети всю великую Руссию святым крещением, от грек прием, и даже до днесь, по лето седмь тысящ сто двадесять осмое, никто же в нас не дерзнул сотворити таков соблазн еретичества, кроме Игнатия изверженнаго патриарха и тебя [Ионы митрополита] ниже, такоже как и московское государство учинилося. И от того времяне и по сие время того не бывало в Московсом государьстве, чтобо еретиков латынь, и иных различных вер еретиков не крестили, кроме изверженнаго из святительства Игнатия патриарха.

От втораго изложения [Потребник, лист 587]

Тем же убо аз смиренный Филарет патриарх Московский и всея Русии, с сыновы моими положих и утвердих завет и устав, грядущим по нас сыновом и братиям нашим, иже аще будут Божиим благоволением, и всем церковником сущим под нами. Се не новое предание введше, но древнее укрепляюще поновихом: и последующе заповедем святых отец.

Предивный и всесладчайший ВИНОГРАД РОССИЙСКИЯ ЗЕМЛИ, его же всепредивный Бог от египта темнаго нечестия человеколюбне пренесе, изгнав мысленныя языки, прелукавнейших бесов полки [1]

ОГЛАВЛЕНИЕ

• Вступление
• Глава 1. О Павле епископе Коломенском
• 2. О Данииле протопопе Костромском
• 3. О Логине протопрезвитере Муромском
• 4. О Аввакуме протопопе
• 5. О Феодоре диаконе Московском
• 6. О Лазари иереи Романовском
• 7. О отце Епифании Соловецком
• 8. О отце Авраамии Нижегородском
• 9. О Исаии дворецком Салтыкова
• 10. О болярыни Феодосии Морозовых, и княгини Евдокии Урусовых, и проч. с ними
• 11. О отце Спиридоне Потемкиных
• 12. О Киприане благоуродивом
• 13. О отце Иоасафе Кириловском
• 14. О отце Филиппе певчем царском
• 15. О Козме Донском
• 16. О иереи Никите Суздальском
• 17. О Феодоре Токмачеве
• 18. О иереи Полиекте Боровицком
• 19. О отцех Вязниковских
• 20. О отце Прохоре
• 21. О отце Вавиле
• 22. О отце Леониде
• 23. О священнице Симеоне
• 24. О двух инокинях и о девице
• 25. О отце Иоанне наборщике печатнаго двора
• 26. О писаре Никите Владимирском
• 27. О Варлааме протопопе Псковском
• 28. О Иоанне купце Великолуцком
• 29. О дворянине Димитрии Хвостовых с проч.
• 30. О Василии Лисицыне
• 31. О Михаиле Лисицыне
• 32. О отце Григории казначее
• 33. О Лаврентии купце
• 34. О Самсоне Поповиче
• 35. О Андреи и Евфимии
• 36. О Василии и Симеоне Псковских
• 37. О Евсевии простом
• 38. О отце Иоасафе Чаплине
• 39. О Дионисии целомудрем
• 40. О Калиннике
• 41. О Олончанине и Александре
• 42. О Гаврииле Корелянине
• 43. О Григории и Софронии Корелянах
• 44. О Григории другом и Софронии
• 45. О Евдокии девицы
• 46. О Парасковии девицы
• 47. О Акулине и Ксении девицах
• 48. О воине Симеоне Саратовском
• 49. О отце Филиппе и с прочими
• 50. О дивнем отце Трифиллии
• 51. О Александре Гуттоеве пространнее
• 52. О Гаврииле Корелянине пространнее
• 53. О Марке Олончанине
• 54. О Елеазаре клирике
• 55. О Григории земледельце
• 56. О Артемии, Иоанне, Потапии и Викуле
• 57. О Григории хромом
• 58. О Симеоне Корелянине
• 59. О Иерофеи и его супружницы Евдокии
• 60. О Наталии служительницы Иерофеевой
• 61. О девяти Корелянах и Никифоре с проч.
• 62. О Аврамии Кагопольском
• 63. О Леонтии отце Авраамиеве
• 64. О Андрее брате Авраамиеве
• 65. О Иоанне Иулианине Каргапольском
• 66. О Евдокиме и Григории Чаранских
• 67. О писаре Козме Прокошеве
• 68. О писаре Иоанне Красулине
• 69. О воине Мартине и его супруге Мавре
• 70. О достопамятных старцех Силе, Алексии и Феодоре
• 71. О отце Андронике Дорском с прочими
• 72. О Кемлянине Иеремии Горлове
• 73. О Феодоре и Луке Мезенских
• 74. Повесть жития и страдания Мемнона

Коль предобре всепредобрый Бог того яко другий рай насади! Коль всеблагодатне всепрекрасным оплотом спасительных законов огради, коль всекрепце и широце благочестия корение углуби, елико концы вся, части вся, пределы вся российския всекрасне исполнити. аще на сень его пречудную воззриши, горы покры, над холмы вознесеся, над пустынныя верхи всеспасительно возвысися. аще на стеблие предивное зрение возведеши, тако изобильствоваху, яко всеблагодатныя кедры возвышахуся, яко добровонныя кипарисы благоухаша, аще на всекрасное всепрекраснаго благочестия рождие очеса обратиши, толико всебогатно разширишася, елико до Каспийскаго прострошася моря. и до Чернаго моря своя пределы протягоша. К востоку убо до хинский или китайских стран границы своя поставиша. к западу же до моря Варяжскаго в Лифляндии, и Эстляндии пределы всепрекрасныя всепрекрасно водрузиша. к северу Белаго моря, или великаго океана залив, грань поткоша. в полунощие море великое Ледовитое, и реку великую Обь, границу российския земли всеизрядне устроиша, преизрядными мужества храбростьми: Бяше убо российская земля, елико пределами, толико благочестием весьма изобильна, елико странами толико православием зело пребогата, от моря и до моря, от рек до конец вселенныя, всепрекрасно разширившися, великий убо и всехрабрый князь Владимир, муж, яко пречудныя храбрости, тако дивнаго тщания сый, иже своим доброподвижным тщанием взыска светлость пресветлаго благочестия сионскаго на востоце, и взыскав от восточных стран в Россию, всю Россию, привед во благочестие просвети. от Сиона бо рече изыде закон и слово Господне от Иросалима. от греческих стран прия благочестия доброту. отонуду всекрасныя доброты православныя веры, отонуду спасительныя предания предобрыя уставы: отонуду архиепископы и епископы, священники и весь церковный причет, и вкратце рещи: вся доброты православия, вся красоты церкве, вся благолепия христианская, от грек в российския страны преславно привлече. откуду преславная Россия, всепреславным благочестия просветившися светом: толь всепресветло многосияннаго православия свет во своя части вседивесне простре: елико концы вся, границы вся, пределы одержания своего вся преоблистательно просветивши, к невечернему и праведному солнцу Христу подверже. И тако всепребогатно пресветлыми догматы преоблиста: яко не бяше града, идеже благочестия свет не сияше, не бяше села, идеже православия луча не озаряше, не бяше веси, идеже благоверия сияние не облисташе. но всюду аможе позриши всепрекрасное церковное благолепие узриши, аможе посмотриши всеспасительную доброту монастырей увидеши, аможе очеса обратиши, тамо небесоподобную красоту киновий обрящеши, и якоже великое сие и великопротяженное небо, звездами пресветлыми яко чудными Маргаритами, яко многоценным камением преизмечтанно, всепредивно украшается; тако великопростертая и всепространная Россия, всепрекрасными обительми, всеблаголепными Божиими храмами: толь предивно украшена. толь всепребогато учащена, яко второе небо и бяше и нарицатися бысть достойна. но аще Россия множеством предивных и великих разделяшеся градов, аще и всепречудным безчислием всепрекрасных обителей разширяшеся. Аще и премножайшими благолепия пределами всепребогато разпространяшеся, обаче совокупляшеся предивным благочестия совокуплением. соглашашеся всепречудными пресветлаго православия единеньми. коль согласно таинство православныя веры имяше: коль согласно законы церковныя содержаше: коль согласно предания и уставы отеческия храняше; елико во многих пределах единому благочестия свету сияти в различных концех единей всепречудней зари, единаго немерцающаго солнца всепреизобильно блистати, и не в своих частех токмо, не в своих пределех и между собою точию благочестия согласием совокупляшеся; но и древлевосточней святей церкви от нея же православия всепрекрасно облияся светом златоплетенною того же согласия пленницею всепрекрасно сопривязана бе, едиными благоверия сиянием немерцательно освещашеся, едиными небесных учений непорочными осиявашеся догматы, едиными единыя церкве кафолическия святейшими окружашеся пределы. и яже на востоце православная, сия и в России бяше вера: и коя в Сионе святыя, сия и в России бяху законы: и яже в древлегрестей, сия и в российстей церкви бяху пределы и уставы святыя, яко сбыватися апостольскому всеосвященному гласу: един Господь, едина вера, едино крещение. аще бо Россия словесным академитов не зело прилежащее наукам, аще в высокотворных мудроплетениях софистических не искушашеся: но здравое веры, и простое благочестия, благоревностно и неоплазиво содержаше. и толь непоколебимо и твердо православия доброту содержавшее, яко в толико многочисленных летех не попусти, ниже уступи кому непотребными новшествами смущати и мясти российския благоверия пределы: но чисту всепресветлаго православия ниву от всякаго плевелоучения соблюде всепредивно всебогатыя класы преочищенныя пшеницы в небесныя мещуще житницы присно. и яко неложни суть написаннии глаголи, самыя свидетельствуют вещы, свидетельствуют явственно приезжавшии в Россию от восточных стран, от священных чинов. премногия духоносныя персоны, и от Иеросалима, и Синая, и Египта, и Константинополя, и Святыя Горы, в различная времена, самобывшии в России, и с российскими архиереями многолюбезно разглагольствующии, добросогласно. яко и с Макарием митрополитом московским, иже бысть при царе Иоанне довольно, о церковных чиноположениих, и о законех довольно беседовати и соглашатися, яко летописная история повествует, свидетельствуюта преблаженная вселенская патриарха восточная кир Иеремиа константинопольский, и кир Феофан Иеросалимский самобывшая в российском царстве, и своим всеблагодатным прибытием Россию патриаршеским удобрением всепрекрасно облагодатившая, от них же всесвятейший Иеремиа к царю Феодору Иоанновичу таковыя златословесныя источи глаголы. твое же царство богохранимый царю, есть третий Рим, благочестием всех превзыде: и вся благочестивая во твое царство собрашася. кормчая в предисловии. Свидетельствуют и православнии гречестии архиереи православно седящии на российских архиерейских престолех, иже согласно древлероссийстей весьма церкви и учаще и действующе и утвержающе явишася. Свидетельствуют иностраннии историографы российская действа описующии, согласие россий­ское древлевосточней церкви свободным гласом возвещаху. якоже Матфей стриковский польский историописатель (иже при царе Иоанне живший) сице повествует: яко от того времени (егда крестишася при князе Владимире) русский народ, в христианской вере, под властию патриарха константинопольскаго, и действами греческими твердо и непоколебимо пребывают. книга 4-я, глава 3-я. Явственно свидетельствуют российское благочестие, и российстии святии в различная времена возсиявшии, яко на востоце крещения России, тако и на западе ополчения, всепресветло облиставшии, и в той православней вере спасшиися, по гласу апостола Павла, вера есть спасающая человека. Аще быша неправе веровали, не быша угодили Богу: без веры бо рече апостол невозможно угодит Богу. А понеже святии российстии древнее благочестие держаще угодиша Богу: явственно есть, яко право благочестие содержаху, ими же коль обогатися российская земля: коль доброплодствова и облагоухася российский виноград. яко рай Божий, яко Едем сладости показася, не терние, не волчец, не гнилыя плоды, ниже безплодие злобы и греховнаго жития износящи: но всепресладкия плоды небеснаго саждения, всеблагоуханное рождие пребожественныя лозы пребогатно издаяше, и толико многоплодно елико на безчислие изливающися красно преизобильствоваше, не есть бо таковаго града, идеже святаго в нетленных мощех не является. суть же таковии гради, в них же и два и три, и десять. и множайшии святии многоцелебно почивают. не есть таковыя обители, идеже преподобнаго почивающаго не обретается, и не токмо в начале крещения в России, но и на самом конце пред изменением благочестия. Если при Владимире равноапостольном на время посмотрим, мно­жество святых узриши. Если и при Иосифе патриархе московском на лета позриши, и тогда святых преславно спасшихся и дивных мужей чудесне чудотворящих узриши, ЯЖЕ российския украшающе златоплетенно пределы, земная совокупляху с небесными, человеки российския с самем Богом всепресладце соединяху, едино тело всеблагочетанно, верою и добродетелию единей пресущественней привязуемо главе Христу, едино всеблагодатное стадо, на небесных пасомое небесными пажитей законы: по пресладкому небеснаго сосуда гласу: едино стадо бысть и ангелов и человеков, дивный и предивный мир всепречудныя сладости, всепрекрасное смешения сообщение воистинну превозжеленное превыспренняго спряжения, исполнено доброты божественныя, благолепия небеснаго, славы преестественныя, ею же не токмо человеци земнии превозжеленне насытишася, но и сами небеснии ангели всепрелюбезне насладишася, всесладкую ону песнь воспеваху: слава в вышних Богу, и на земли мир, в человецех благоволение.

Обаче[2] не до конца таковым пренебесным окружахомся веселием, не до конца всеблагодатнаго наслаждахомся преизобильно мира: оле твоея ядоносныя огнедыхательныя злобы на нас всепроклятый диаволе; что убо творит, что содевает, всепожирательный древний наветник, змий великий и чермный, змий седмоглавный и десяторожный, змий великоопашный и великохоботный, его же уста велика, великими хулами и смущеньми всесмрадно отрыгающая, язык всепреизостренная всеядовитая бритва, ноздри злосмрадный испущающия дым великия пещи, очеса злодыхательная геенскаго огня издающая пламы, чрево адская ненасыщаемая бездонная пропасть, сей многолетно связанный всеокаянный темничник, разрешен от темницы на пагубу вселенныя всеогнедыхательно грядый: всепреокаянный тресугубое горе земным носяй. коль велию яростию всесвирепо подвизается; коль гневным пламенем непостоянно дышет; коль всегорчайшими наскакании левски зверовидно наскачет, толь нестерпимыми язвами немилостивно поражает, толь всесмертными ранами неисцельно ранит: елико всю вселенную, вся концы мира всесмертною неисцельною уязви язвою. егда по тысящном лете седмотысящный оный зверь, попущением Божиим от уз темничных свободився: зверски на вселенную рыкнув: наскочи на запад и западныя страны вся смущения и мятежа исполнив в свое всенесытное поглоти чрево. ужасеся небо о сем. подвигошася звезды к плачу, и вся небесная вострепеташа преболезненно, и земная вся состояния, сетования черным вретищем облекошася, но что оный тмоглавный зверь мысленный иркан всеядовитый геенскаго пламене [г]идра: поядый западныя страны всепреужасно: еда насытися; еда исполнися того ненасыщенное чрево; никакоже. но и на восточныя страны всенагло подвизается яростию огнепальною, гневом злодыхательным: скверныя и нечистыя языки обреет яко некия всеядовитыя пруги, гога и магога, их же число песку морскому одолевает: сими грады востока поплени, царскую державу смири, страны разори, стан святых обиде, град возлюбленный Иеросалим прият, доброту Сиона искази, красная вселенныя пояде, агарянским безбожным насилием всю вселенную плача и рыдания наполни. Оле того неукрощаемаго свирепства. оле ненасыщаемаго злодыхания, не насытися пожер запад, не укротився смутив восток: но и на оставшая северная всесвирепо нагльствует, и нагло свирепеет, и на российскую всеблагодатную (увы) наскачет страну, яко прелютейший непрь лужный, на всепрекрасный Божий виноград: яко всепресвирепый дивий зверь, на благодатный Христов садL еже того зобати искоренити и пуста, и безплодна показати. Наскочив бо зверояростно и огнедыхательно пребогатая наша, крайняя вся, чпасительная вся обезобразив испроверже, аще догматы святоправославныя, аще законы церковныя, аще предания предобрая отеческая, аще чины и ограды христианолепная, яже от всеблагодатныя востока, древлесветлаго просиянныя Сиона, вся тмою новшественных мраков загустив помрачи, и вся во свое всепожирательное и бездонное поглоти чрево, презельнейшаго обуревания и мятежей, преужаснаго труса и смущения, вся российския части весьма преисполни. толики бо преужасными мятежи, толикими многотрепетными смущеньми, толикими многослезными кроволияньми российская исполнися мироположница, елико и небесным ужаснутися, и великим восплакати светилом, и пресветлым рыдати звездам, и земли многорыдательно стонати, и всей богозданней твари многоплачевными облагатися вретищи. пред оными убо многоскорбными случайми, яко святая писания, тако и учители церковнии: коль всекрепко нас остерегаху, коль всетрезвенным бытии советоваху: и увещеваху от всеяростнаго вражия находа всебодро соблюдатися, во еже подобно прочым во вселютейшая не впасти схизмы. рече бо дивный предивный православныя веры списатель: к сему же и сие воспомянути не отрекуся, еже и святый Иоанн евангелист во главе 20 пишет, о связании сатаны на тысящу лет, и потом о развязании, возвращается диявол на первое возлюбленное свое место, идеже еще из неба хотел, и от того времене поветрием тяжким поражен бысть запад. О сем пространно в главе 21 обрящеши. по тысящном лете, егда 595-е, дохождаше лето, явственнобысть отступление и прельщение нарицающихся юнитов, от святыя восточныя церкве к западному костелу. о сем чти главы на преди 23 и 24. А по исполнении лет числа тысящи 666 не непотребно и нам от сих вин опасение имети. Да не некое бы что зло пострадати, по преждереченных исполнению писания свидетельств. яко настоит день Христов, якоже рече апостол, и несть ли бытии готовым подобает, аще кто достигнет тех времен на брань с самим Диаволом. Книга о вере, друку московскаго. Глава 30.

Аще убо всежелательнии слышателие, всеусердно познати восхотят, откуду убо таковая всепреужасная и лютая восташа в России, и кая вина всепрезлейших схизматосмущений, и кто сих многоплачевных церковных трясений новосодетель; не отъинуду куду враг и неприятель пришедый, не варвар ниже скиф, толь прелютыми скорбьми и неисцельно уязвивый российская чада: но свой своея России воспитанный неблагодарный многодосадительный член (Никон глаголю патриарх) человек елико многокозненнаго ума толико всепредерзостнаго напрасньства, новинам и мятежам радуяся присно, уготованный от издревле на время оное и час, аще звезда спадшая по тайновидцу с церковнаго небесе на земное мудрование, аще огнь фиальный вверженный в российское море, аще ключь оный бездностуденичный на землю российскую испустивый мысленныя многосмущения пруги, глаголати о сем недоумею, иже не у от младенчества устранися, уже от волхвов проповедася великий государь: не у во иноческая вниде, абие от святых отец предвидеся смутитель российския земли многомятежный. О роде его, Корнилий старец поведует о нем, яко курмышанин бяше, с Волги реки, и о благополучии яко убог и сирот[3] бе, и о житии, и нраве в мире, яко острожелчив, яростен и злопамятен зело бяше. и о чине его яко иерей бе, и жену пиянчиву и оплазиву име, ея же ради ушед от нея пострижеся во мнихи, не в монастыре коем, ниже в пустыни и под повиновением: но в монастырстем дому, от скитающагося иеромонаха. оставляю сия ныне для продолжения писати. Егда же во мнишество вниде, егда скиташеся по местам, не веем киими случаи великому старцу преподобному Елеазару вниде и с ним во одном острове Анзерском, от времен некое проживе, о нем же духопросвещенный старец таковая о нем со живущими братиями прорече: о какова смутителя и мятежника Россия в себе питает, сей смутит тоя пределы, и многих трясений и бед наполнит. виде бо святый егда Никону служащу литургию, змия обвившася о выи его, страшна же и зело черна. Откуду святый старец Никона весьма не любляше, и тяжко нань гневашеся, яко и убежати Никону оттуду прилучися. не токмо единому: но и Соловецких двух мнихов прельсти в бежание с собою. прехожду прочее крадение монастырских припасов с собою. прехожду злобное воздаяние человеком за непровоз чрез реку. И в ссылку оных во время власти своея сослание. мимохожду пребывание его в Кожеозерской обители, игуменство, к Москве взятие, архимандритство онаго вся оная за продолжение оставляя прехожду. сие прочее воспомянути прихожду, еже на митропольство новгородское Никоново возшествие, и святаго архиерея Афония о нем проречение. егда бо всепредивному новоградскому митрополиту Афонию зело многодетельному мужу, за старость и очесное невидение, с престола в Хутынский монастырь отшедшу: тогда волею царевою и патриаршеским благословением, Никон на митрополию новгородскую рукоположен: в Новград приеде: и прибыв прежде к дивному оному отцу Афонию на Хутыню ради благословения поеде: и в келию пришед прошаше благословения учителя; оному вопрошающу: кто есть просящий; рекоша предстоящии: владыко святый, преосвященный Никон митрополит новорукоположен просит благословения. тогда дивный и памяти достойный глас, дивне возопи: прииде же время яко и Никон в митрополитах, воли Божией оставим о нас полезная предсмотряти. и тако предивный он архиерей и святый Никона не любляше: яко и по преставлении своем, Никону не повеле своего погребати тела, но псковский архиепископ по приказу его погребе его. и егда на митрополию утвердися Никон, тогда еже зачат во чреве прежде, роди болезнь неотеризмов, премногия беды и смущения наносящую, первое повеле написати образ благовещения пресвятыя Богородицы, необычным новшеством пресвятую Деву младенца имеющу совершена в недрах. (еже ни в коих древних иконоизображениих обретается, ниже в российских, ниже в греческих) сими себе показа Никон, благочестивым и духоносным отцем: яко он явися в России первый неотеризмов родитель. показа неотеризмос еще к сим. еже киевское пение нача в церковь вносити, согласное мирским гласоломательным песнем. показуя себе прившедшаго новшеств родителя в Россию. еже предвозгласиша о нем всепредивии предпомянутии отцы блаженный Елеазар Анзерский, и святый Афоний Новоградский, тое же о нем предвозвести, и духопросвещенный Варлаам митрополит Ростовский: иже пред некиими Никонова властительства леты своя люди учением утверждая, поведаша со слезами настатие мятежев, ущербления благочестия, которое проречение многочудесным утверди преставлением, егда бо Никону с мощми святаго Филиппа митрополита, их же ради на Соловки от самодержца послася, приближающуся к царствующему граду Москве, изыде царь на сретение с народы, и оный всепредивный архиерей Варлаам, иже моляся Господеви, якоже достовернии и ближнии неложно поведаша: Владыко всесвятый и Боже всех, не даждь ми видети сего многомятежника, и смутителя всероссийскаго, хотящаго новинами поколебати Твою всесвятую Церковь: но сотвори со мною знамение во благо, по Твоей велицей превеликих судеб милости, яко благословен еси во вся веки, аминь. что предивное отсюду творится, что всеславное содевается чудо, водиму чудному сему архиерею двема архидиаконома на сретение мощей. и мало Никону не дошедшу елико в видении друг друга бывшим, блаженному прилежно молящуся архиерею, подломишася того нозе, и на руках поддержащих свою душу Господеви предаде. Тело же онаго предивнаго архиерея полгодищнаго, обношения время на Москве лежаше, цело и нетленно весьма, в Ростов отвезеся.

Егда же[4] попущением Божиим всероссийскаго церквоправления корабль Никону вручися, на превысочайшим патиаршестем престоле, в лето 7160 [1652] недостойне на достойный оный седе, коея всемрачныя бури не возвея; коего многобурнаго треволнения на российское не впусти море; киих вихроколебательных трясений на всекрасный церковный не нанесе корабль, ветрила ли всеблагодатных духосошвенных догматов обрете предерзостне сия раздра: ядрила ли всепредобрых церковных уставов немилостиве сломи: стены ли всекрепких божественных законов, всеяростне разсече: весла ли отеческих всеблаголепных чиноположений всезлобне сломи, и в кратце рещи, всю ризу церковную пребезстудно разтерза. весь корабль церкве российския всегневно сокруши, все пристанище церковное пребезумно смути, всю Россию мятежа, смущения, колебания и кровопролития многоплачевне наполни. занеже древлецерковныя в России православная веления, и благочестивыя законы яже Россию всеблагостне украшаху, от церкве непреподобне отверже. вместо же сих иныя и новыя вседерзостне предаде.

1: Крестное знамение, еже в сложении перстов, еже все доброе таинство православныя веры являет, треми персты великими и двема малыми, святыя Троицы триипостасное и единосущное всепредобре показует: двема же указательным и великосредним тайну воплощения, единаго от Троицы Христа Бога двоестественное и единоипостасное всепрекрасне показует: сима двема и крест страдания Христова на себе изображати повелевается за распеншагося нас ради на кресте Христа Исуса. Еже и древлегречестии, и российстии учители в книгах, еже и древлегреческая и словенская иконоизображения, еже и святии апостоли образописанием, еже и сам Христос благословением всеявственно утвердиша, сие Никон предерзостно отверже, вместо же онаго православнаго сложения треми перстами знаменатися предаде, Троицы таинство сим образовати сказуя, сими треми крест страдания Христова на себе изображати повелевая: весьма неприличество и сопротивность в подобии являющими: не бо Троица: но един от Троицы на кресте распятся, воплощения же тайна в оном знаменовании треперстосложения нигдеже и никако правоизобразительно показатися может.

2: Благословение еже и архиереи и иереи тайно народы благословляху, яко и сами знаменовахуся, сие злодерзостно отверже, вместо сего предаде пятию перстами необычно благословляти.

3: Еже трисоставным крестом Христовым просфоры православно печатаху, на трисоставном кресте распятие Христово изображаху подобообразном первообразному, оное же от церкве злодерзостно отверже, вместо же сего двочастным крестом печатати просфоры повеле, на двочастном кресте распятие Христово воображати, двочастному кресту поклонятися ново и необычно завеща.

4: Святаго аллилуиа песнь: еже древле сугубо пояшеся яко в грецех и сербех, и болгарех, тако и в российстей велицей церкви. Сие пресмелостно отложи, вместо же онаго сопротивно древлеправославней церкви предаде три краты пети, четвертое же приглашати слава тебе Боже.

5: Исусово имя, еже прежде с единою иотою славословяше с Исус, сие ересию порече. вместо же сего с иотою и итою писати и нарицати пресомнительно завеща.

6: Во святей литургии, еже прежде на седми просфорах служиша, отложи от них две просфоры, яже за царя и все воинство выимашеся, яже за патриарха и все священство, сия отложив, и на пяти просфорах токмо литургию отправляти предаде.

7: Символ святыя веры приложеньми и отложеньми пред древним дерзостне премени.

8: Поклоны земныя во святую четыредесятницу и прочыя посты законно и обычно творимыя отверже. вместо же сих повеле поясныя и малыя токмо полагати.

9: На прежесвященней литургии и в вечер 50-цы глаы с коленами преклоняющым сице на земли лежащим молитися, древнее церковное законоположение отверже. вместо же сего на коленах стоящым срацинским обычаем молитися завеща.

10: В чине святаго крещения крещающихся святым миром по правилом помазовати очи, ноздри, уста, уши и перси повелено. он же ноги и колена иудейским обычаем помазати заповеда.

11: В церквосвящении, крещении и браковенчании окрест, еже по солнцу трижды обходити во уставех и типикох древних обычно и законно указано, сие без очиво отложи. вместо же сих единожды и противо солнцу обходити дерзостно приказа.

12: Партесное прегудническое пение с митушанием рук и ног, и всего тела безобразным движением бываемое в церковь непреподобне внесе.

13: Молитву Господи Исусе Христе Сыне Божий помилуй мя грешнаго, или помилуй нас, яже от древлекафолическия церкве и греческия и российския, и соборне, и особне, всем христианом творити завещася, и дивными похвалами засвидетельствовася. Сию святую молитву от церкве и от всенароднаго собрания предерзостно отверже. вместо же сея предаде глаголати: Господи Иисусе Христе Боже наш помилуй нас.

14: Иконная написания еже древлеправославная церковь писаше, благообразным и смиренным видением иконы святых: якови сами святии в жизни постницы, воздержницы, всесмиреннии быша, таковы и образы их всеговейно написоваше. Никон же со своими предаша образы святых писати не благоговейным видением, дебелы и насыщены аки в пире некоем утучнены, еже противно есть первообразным святым персонам.

15: Книги святыя древлепечатныя, яже при благочестивых царех, и при пятих святейших патриарсех на Москве православно печаташася. Сия Никон неправыми, погрешительными, и ереси имущими нарек от церкве отверже. вместо же сих новопечатныя книги с приложеньми, и отложеньми, и применами в церковь внести повеле.

И прочая премногая нововнесений превосходящая число, превышающая сочтение. Аще кто хощет отчасти изследовати, да прочтет книгу ответов от староверцев Синоду поданную: и увидит внесенныя явственно новины, и доводы праведныя на оныя сочиненныя: яже зде, краткость истории лобызающе оныя оставляем. Сия прежестокий Никон патриарх горчайшыя сады насади. Таковыя терновныя овощи возрасти, таковыя прегорькия плоды отрыгну; их же россияне вкусивше душами своими поболевше, едва не умертвишася. О коль преболезнено того новоначинания преужасное рождение. О коль премутно всесмущеннаго источника произведение. О коль всегорестно того фиала препелынное излияние, трегубое горе на российскую источающее землю: им же упившихся и упивающихсяЮ всепреболезненно и присно огорчаются утробы; аще бо и вознесеся на толь превелию высоту власти, яко ливанский кедр, обаче не показа доброты благия совести, не прорасти цветов всеблагодатнаго позлащения, ни израсти плодов предивныя и спасительныя сладости, но терние и волчец многомятежнаго смущения, овощие пренеполезных новодогматствований пргорчайших плодоносие лукаваго кроволиятельнаго древа, имиже показа себе быти злое и всегубительнейшее древо, износящее злыя и прегорчайшыя плоды всезлейшаго мучительства по гласу самого Спаса: не может древо злое добр плод творити; еже убо Никон патриарх зачат в себе многомятежное новин зачатие, не от Духа Святаго, не от Благодати Божественныя: но от сокровища многомутнаго сердца своего, сие и на среду произвести потщася. Прежде бо великаго государя царя Алексея Михайловича совесы лестными и мягкими подъиде, аки пастырское имый попечение печаль о овцах, тщание о церковных чинех являя, яд аспидин под языком нося, лукавная советует, советует собору быти о смотрении книжном и исправлении церковнаго благочестия: и тако с волею царскою в лето 7162 [1654] собор собирает во граде царствующем Москве, архиереи и архимандриты российския, и прочыя священнаго чина. что же на соборе предлагает: обычную лесть. что на соборе представляет; ножь развращения медом прелести помазан, предлагает на соборе, яко старопечатныя книги московския с древними книгами писменными и харатейными, словенскими и греческими весьма несогласны: дабы сие потщатися во едино согласие благоревностно привести. на кое осмотрение добротщательно сложися собор, непщующе истиннаго пастыря Никона быти о церковнем доброчинии пастырски боляща, но солгася о сем надежда, аще и мнози от собора познаша того всепрелесное лукавство, в пастырстей одежди зверонравное волка носяща: познаша того добре (Павле епископ Коломенский, Аввакум протопоп, Иоанн Неронов и прочии) обаче до времени удобна молчанием ношаху. Тогда приим дерзновение от собора Никон, многомутный источник своего лукавства абие отверзает: и напаяет россияны пития горькаго, пития пелыннаго, всесмущеннаго: не уьоявся пророческаго глаголющаго гласа: горе напаяющему ближняго своего пития мутна. отъемлет от печатнаго двора преждебывшия благоговейныя справщики, и поставляет вместо оных некоего Арсения монаха грека, мужа толикаго лукавства, толикия злобы исполнена, толикими злодействии пребогато кипящаго: елико и от преждебывшаго святейшаго патриарха Иосифа, во оземствование, и в темницу посажденнаго. глаголют же, и от греческих патриархов Иосифу патриарху московскому, того написашася премножайшая злобы, того злодействия и соловецтии отцы, в прошении к царю Алексею Михайловичу достаточне объявиша, и трижды благочестия отступити того показаша, и иныя злобы и мерзости непреподобнаго мнози от древних отец объявляху, но Никону достоин и добр обретеся, яко сосуд потребный того помышления, яко злодейственный орган того прелестных началотворений; его же обрет зело возвеселися, по общей присловице, обрете себе подобна. Глаголют же и из темницы того Никону свободити, егда в соловецтем ради мощей святителя Филиппа бывшу, егда оный Арсений о патриаршестве Никону неким волхвованием проуведев предвозвести. онаго Арсения на дворе печатнем предерзостне посадив откровенною главою прочее износити нача своих новшеств мерзости.

Первое[5] в лето 7162 [1654] во святую 40-цу во время человеческаго преподобнаго очищения неподобныя новины, непрподобный в народ издаяти повеле, коленопоклонения, си есть земныя поклоны в церкви во святый пост творити не повелеваше, кроме 4-х великих. таже мало покоснев и триперстное сложение в крестном знамении, утверждательно начат износити[6]. Увидеша тогда бывшии отцы, преосвященный Павел, епископ Коломенский, и священнии протопопи, Аввакум, Даниил, Логин, Иоанн Неронов, начаша ужасатися вельми, и всеплачевно рыдати, яко прейде лето всеспасительнаго плодоносия. и всеблагодатныя благочестия светлости, уже показася зима всемразная, новин студености ознобляющая недозрелыя плоды, не сваренныя Божия благодати всесовершенною теплотою. от них же единому пред образом Божиим о нашествии многосмущеннаго новшеств мятежа всерыдательно молящуся: глас от образа слышася тако вещающь: время приспе страдания, вам неослабно страдати подобает. таковый слышав глас той, своим предобрым советником предобре возвещает. и тако вси великодушне благодаривше Бога, великодушне в древлецерковнем православии укрепишася: и собрашася написаша общее прошение, на многомятежнаго Никона, и самому всежалобно царю подаша, и аще дивнии отцы подаваху царю жалобу на патриарха Никона: но ничтоже оных жалоба успеваше. Царь бо лису тому вера имяше, и вся по того воли творяше. тем же и прочая новшества на среду изнесе Никон, еже двочастным крестом просфоры печатати, еже аллилуиа трикраты пети, четвертое приглашати слава Тебе Боже; но аллилуиа в соборней церкве не вскоре трегубити начаша, занеже протопоп Иоанн Неронов начат в церковь оную присно ходити, и не даяше трегубити аллилуиа; многажды и патриархом Никоном благоревностно спирашеся: но патриарх без царева ведома озлобити не смеяше; яко муж бяше от честных и самому царю знаем, и не токмо сии дивнии отцы, но инии мнози, тако от священных яко от людских от того новин смущахуся, и великия молвы и мятежи в российстей земли совершахуся. откуду Никон с волею царевою, паки на собор собирает архиереов российских; в то же время и от греков Макарий Антиохийский; и Гавриил Сербский архиерей в Москву прибыша, никоново начинание подтверждающе. Предуготовишася бо уже во всяко слабо житие. и собору бывшу в лето 7163 [1655], Никон патриарх с прочими произнесенных на среду догмат новшество крепко подтверждаху, и клятвами страшными древлецерковное содержание крестнаго знамения, оле моих слез, облагаху; архиереов же российских патриарх Никон овых страхом мучения, овых прелестию ласкания, иных иными лукавства обстоянии, яко сетию паучинною вся объя: и тако свое плачевное соборище многорыдательнаго разорвания, многорыдательно совершиша. отсюду древлепечатныя книги святыя, аки бы погрешительныя, от церквей отбрати повелеша, отсюду новопечатныя на смущение по всем епархиям разслаша; не есть ли убо плачевный собор, на нем же древлецерковная благочестивая содержания проклинаются; не есть ли многоплачевный собор, на нем же апостольское многотаинственное предание анафематствуется; не есть ли плачевный собор, на нем же Христово всесвятейшее благословение клятве предается. аще и собор нарещися достоин есть, аще и собрание именоватися лепо есть, недоумею; толикий мятеж, толикое смущение, толикия беды нанесший: елико не токмо российским жителем соблазны и сомнения подаде, но и сами собора онаго члены архиереи аще и страхом неволи яти подписашася; но послежде раскаявшеся о содеянных зело тужахуся, якоже Макарий митрополит новгородский, тако скорбяше. тако сетоваше о оных новинах: яко и рукополагающихся священников укрепляше, еже новин не приимати. аще аз и подписахуся рече трепетом мучения объятый, но вы крепко держитеся древлецерковнаго благочестия, и не инако и сам служаше, и благословяше, но яко исперва прият, яко от млада научися: сице и во всем граде, при онаго бытности, не бе гонения, ниже нужди, но вси по первому обычаю совершаху службы, аще от Никона многажды оный архиерей зазираем и досаждаем бе, некогдаже и во узах терпяше: обаче аще и не явно за страх, но в тай древнее похваляше благочестие.

Тако и Маркел архиепископ Вологодский подписався на соборе оном страха ради Никонова, но послежде раскаявся вельми тужаше и зело печаловаше о сем; но и в своем граде никаковыя нужди, ниже гонения и насилия какова о древлецерковнем благочестии людем содела.

Тако и Александр епископ Вятский, аще и на соборе страхом преклонен подписася; но последи и плакаше и рыдаше о сем, и новин весьма ненавидяше. свидетельствует о сем явственно того писание жалобное к царю поданное на Никона во 171-м [1663] году: в нем же никоновы прегорчайшыя плоды, огорчившыя российскую землю, изрядно объявляет: како Никон печатныя книги издаде, мятежа и смущения полны: како служебники напечата шесть выходов, иже между собою согласия не имеют: како убивает верных души, и не хотящих последовати прелестному его мудрованию проклинает. и понеже неможе писаньми и доношениями своими. что блага сотворити: во свою епархию возвратився, и оставив престол епископский, в келию затворися, и плачем и рыданием в покаянии сконча живот свой.

И елико сии, толико и инии мнози, аще от иерейскаго чина, аще от простаго, аще от архиерейскаго: о новинах внесенных от непреподобнаго Никона в церковь, премного смущахуся, и велик мятеж и треволнение имяху, и на вседерзостнаго смутителя, пренеполезнаго новин родителя, всенародне и благодерзостне вопияху: обличающе того всепагубное новопредание, еже и сам Никон в своих ему посланиих к патриарху цареградскому Дионисию описует в лето 7174 [1666] народное на себе возвещает востание и ненависть, тако пиша, и сего ради от всех возненавиден бых без правды, не единою и дважды хотели убить: занеже помощию Божиею ищем и держим во всем нерозлучно греческаго закона предания. и еще пишет, и что нам от тех греческих книг благодатию Божией исправлено и преведено, и то называют новым новым уставом, и моим никоновым преданием. но и во служебнице новопечатном в лето 7174 [1666], в соборном свитце, сомнение народное и мятежи о новоправленных книгах ясно описует, яко народов простых, тако и священников и иноков, и постами и добродетельми цветущих, и ревностию украшенных: иже новоисправленных книг не приимаху, и священницы теми книгами начаша гнушатися и славословия по их не исполняти, и мнози христиане отлцчишася церковнаго входа и молитвы за новопреданныя чины и служения в церкви, и не токмо российстии архиереи, и народи смущахуся, колеблющеся о новопременении законов церковных: и зело зазираху новолюбителю продерзому: но и от греческих вселенских патриархов, Афанасий Пателарий Константинопольский партиарх пред Паисеем престол державый: за мятеж же и мсущение междуусобное оставив престол, и российских краев достиже: муж добраго жития и постоянства изряднаго: иже видя в России действующияся от Никона мятежи и смущения в церкви зазираше Никону и советноком его о дерзости нововнесения: ими же колебляху непреподобне смущающе российскую церковь. чесо ради и не прият быв от Никона, якоже подобает патриарху вселенскому прииматися, ниже чести достойныя, ниже на соборе председания и седалища сподоблен по чину архиерейства. во оное убо время собором составляемым Афанасий вселенский патриарх не звашеся, ниже на соборе бываше, в Москве присутствующ: якоже глаголют: во 163 [1655] году по седмотысящном времени, в неже и соборы о новосоставлении на Москве собираемы бываху, аще и глаголет творец новопечатныя Пращицы, яко Афанасий Пателарий, зазираше Никону о двоеперстном сложении, и о прочих древлецерковных содержаниих: но обличается отсюду, яко тогда Афанасий на Москве бяше. егда Никон новины завождаше, егда соборы собираше, егда Антиохийский, и Сербский, патриарси быша: Афанасий ниже на соборах, ниже советованиих бяше. аще убо зазираше Никону, по Пращице, о древлеправославных преданиих, вскую на соборы не призывашеся, вскую пределов онаго собора не подписываше, вскую на соборе не председаше вселенский и первый патриарх сущь. Антиохийскаго и Сербскаго патриархов имя проглашашеся, и рука подписоваше: Константинопольскаго же Афанасия ниже имя возглашашеся на соборе, ниже рука подтверждаше уставленая: Аще бы Афанасий соглашался с Никоном о новопреданиих, всяко бы на соборе председательствовал, всяко бы своеручно подписался, а понеже на соборе не бяше, и рукою писменно собора не подтверждаше, явственно есть, и зело явственно, яко не соглашашеся с Никоном, но зазираше тому о предерзостных начинаниих, самыя вещы отъезжения того преясно показуют: яко несогласия ради, и мятежа Никонова, отъеде во иныя страны и едучи патриарх оный на границах польских в местечке глаголемем Лубне преставися: глаголют же достовернии свидетели, яко по преставлении оный патриарх вселенский, и ныне тамо почивает седящи, и видимо, и десная рука его на благословение сложена двема перстома, по древлецерковному сложению: мнози от любителей древлецерковнаго предания начаша тамо приезжати, и смотрети онаго перстосложения; еже уведавше новолюбители, руку оную у новопреставльшагося патриарха Афанасия обвивше: невидимо и непознаваемо перстосложение оно устроиша. И сия убо о Афанасии Пателарии. Мы же паки к настоящему по долгу о никоновых прегорчайших трудоначинаниих возвратимся.

Сице убо никонова нововнесения начало: коль премногия мятежи породи: коль безчисленная смущения содея, коль прегорчайшыя овощи России приплоды. что же самое действие, еже есть правление книг, новоиздание друкарное, разослание во вся российския концы! каковы ужасны и многотрепетны российским концем показа виды, ими же концем российским сотвори плакати и стонати неутешно! егда бо никоновым неблагоговейным подвигом но рыданий достойным, древния святыя книги в патриархии и в типографии заградишася. и не токмо заградишася, и похулишася, и не похулишася токмо, но и ересьми порекошася. оле нестерпимыя хулы. оле вседерзостнаго безчестия отеческаго еже на своя отцы, отеческая недостойная чада дерзнуша, труды святыя отец, поты преподобныя подвиги всекрасныя, не постыдешася пребезумнии ересию порицати! о таковых непщую псалмопевцу предвозвещати, положиша на небеси уста своя, и язык их прейде по земли. Вместо же сих святых книг напечатал Никон новыя книги, нарече я новоисправныя: нанося сим наречением на древния книги неисправление и непотребность. Аще же кто оныя книги никоновы добре разсмотрит, и разсмотрив наречет новотравленныя, не погрешит истины. ибо премногия присеяшася в них исправления от иностранных обычаев. если кто хощет искати латинских догматствований, в них обрящет. если польских припеваний, в них обитают. если папежских обычаев, в них узаконишася. если сомнительных и ужасных чиноположений, в них довольно насадишася, не о падежах етимологийский, не о речениих синтаксических порицающе зазираем: яже и во иосифовской типографии книгах изрядне и всекрасне полагахуся, и ни един россиянин в порицании в грех впадающ явися; но о толиких премногих чиноположениих, о толь безчисленных древних законопременениих, о толь пренеизчетных церковных именах; яже всяческое человек изчисление превосходят, яже оныя новоисправныя книги в себе многоплачевно замыкают. не есть бо таковыя книги, яже в себе безчисленных новин не замыкают, не есть церковныя службы, яже премногими новинами не помазася. не есть чина церковнаго, иже нововнесениями не повредися. и что глаголю о книгах и чиноположениих, не есть псалма онаго, не есть канона онаго. стихер оных, яже новинами, изменении, отложении и приложении неразтлевшихся. таковыя убо книги, в них же яко предреченныя о сложении перстов, и прочыя нововнесенныя догматы, и предания тако прилоги и отмены напечаташася, во всероссийския земли одержание, во вся епархии, потщася многомятежия родитель многотщательне разслати. Елико бо миторполий, елико градов, елико великих обителей, елико монастырей, елико сел и весей: всюду указы царския от Никона разсылахуся, всюду новоправленныя посылахуся книги, и посыланием оным везде мятежи многия, смущения великия и треволнения содевахуся в народе; книги бо оныя новопечатныя служебники архиерейския и иерейския требники, псалтыри и часословцы и прочыя по всем церквам, елико градских и сельских и пустынных бяше, всюду раздаваху, по оным псалмы читати повелевающе. и не сие токмо, но и указы посылахуся и посланницы всюду архиерейстии разъезжаху: дорники от церквей древния ими же просфоры печаташа, на них же трисоставный крест воображен обирающе: о моих слез! Отъемлется крест от просфор, иже кровию Владычнею освященный, иже самого владыку на себе понесый: отъемлется крест страшное и превелие оружие Христово, прободшее диавола и всю силу его упразднившее. отъемлется крест небеснаго царя всепрекрасная печать, им же вси знаменающеся избавляемся лютых, вместо же онаго двочастный крест на просфорах вновополагатися повелевашеся. и не до сих токмо происходит новшество, но и благословляти священником инако предавашеся, и знаменоватися народом инако уставляшеся, и молитву творити Исусову инако учими бываху; древлецерковное же православное уставление вседерзостно от церкви отметашеся. увы многоплачевнаго российскаго безчестия. увы никогда же оплаканнаго великороссиян срама. по шестистех и множае летех по крещении прешедших, еще россияне новей вере учатся: учатся архиереи и священницы аки язычницы благословляти и служити, учатся народи знаменатися и молитву творити, аки варвари иностраннии, аки незнающии ниже Бога ниже закона. Всюду во многословущей России епархия всякая изобильствова мятежами, град всякий смущения наполнися, обитель всякая, село и место всякое возкипе многомятежными волнами. истее рещи, сердце всякое, душа всякая, печали несносныя, смущения нетерпимаго наполнени быша: на всяком месте говори и плищи всенародни, и безчисленни быша: новых бо книг прияти всюду не хотяху, старопечатных же держати запрещахуся; частыми указами и посылками; но обыкшии народи и священницы много исперва ревноваху, стояти и мужествовати в древлецерковнем благочестии, аще и не зело постоятельно, обаче держаху древлецерковныя законы: мнози же от священнаго чина и явственно сопротивишася Никону в новопременах, не токмо не приемлюще, но и обличающе его законопреступление и дерзость, яко предозназеннии архиерей Павел с прочими, яко соловецтии отцы, яко велиции пустыннии старцы, и инии многочисленнии, иже крепко держахуся благочестия, неуступающе в неуступаемых и в постоятельных крепкостоятельно стояху, и вси народи российстии елико держахуся древлецерковнаго всеспасительнаго благочестия; предобрым обычаем влекоми толико о никоновом всепечальном новоизменении, зело премного волновахуся, многосмущенными мятежами и всемрачными окружахуся обуреваньми.

Видев Никон патриарх со своими советники, яко своими хитростьми и кознодействы ничтоже успевает ниже увещаньми, ниже соборами, ниже царскими указами и посланиями не возможе российскаго народа к своей преклонити воли. наконец что дивно умышляет, что ужасно содевает; посылает повсюду проповедники, кия; узы. посылает благовестники, кия; темницы. учители, кия; биения, мучительства, томления, нестернпимая, мучения страшная, и ужасныя смерти, и неповестительная умертвия, ими же вся страны российския державы наполни, ими же велие трясения всеужасный трус на российскую землю преужасно восшуме. Аще кто наречет оную беду фиал излиянный на российское море кровопролитием, уморяющий немилостивно душы живыя: аще наречет трус великий, не бывый прежде толико и тако великий, елико предивныя России Божие ограждение, в три части разсекший многорыдательно. от онаго великаго многокроваваго фиала, от онаго всепреужаснаго труса, всю Россию престрашно восколебавшаго: который град не потресеся, кая епархия не вотрепета; кое село кровию не полияся, кая весь кровными каплями не обагрися, кое место струями не потече, неповинныя наполнившися крове, колици Божии священницы немилостивным прелютейшаго мучения преострешим мечем снедошася. колици велиции отцы сурово смерти предашеся, колици предобрии пустынницы всеизостренным мучительства серпом яростне пожати быша. о колики честныя и благородныя персоны безчестно и звероподобно томительною смертию кончани быша, колики народы безчисленныя преходящыя исчитание, различными образы и виды преужаснаго мучения всепрегорцей предашася смерти. о колици вымышлений показашася, нестерпимых мучений виды; иностранных языческих смертей наношения, ужас трепетный, колебание престрашное, плачь и рыдание превелие, не токмо человеком зрящым, но и нечувственней содевающая твари, кто убо таковая видяй, не восплачет болезнено; кая душа не ужаснется; кое сердце боголюбивое не вострепещет; кое око источников слез не источит. толикими прекровавых мучительств зрении преужасаемо; и кая вина толикаго и столь презеннаго мучения бяше; но еже древнее благочестие неущерблено храняху; кое устремление толь премногия ярости на неповинныя кипяше; но еже к никоновым новинам не пристаху, сих ради многообразным мучениям злодейственным казнем, смертем прежесточайшым немилостивно предаваеми, настоящаго живота злодейственно предобрии лишени быша, обаче мужественною душею, великодушным сердцем, неужасным дерзновением прелютая сия мучения, таковыя презельныя страсти, и самую нуждную смерть, всерадостно и благоревностно подъяша, за будущий пресладкий покой, вечнаго блаженства, по гласу всецарствующаго пророка: проидохом сквозе огнь и воду, и извел еси нас в покой.

О коих прежестоких новомучительств нынешних всероссийских пастырей, о коих многотерпеливых великомужественных страданий дивных и всехрабрых страдальцев, толико крепко, толико всехрабро, за древлецерковныя благочестивыя догматы ставших: елико не пощадевших за оныя, ниже своих плотей, ниже кровий, ниже самых душ, но вся себе всеусердно на раны и смерти отдавших да светлость благочестия всепрекрасно соблюдут целу. их же аще кто наречет всехрабрыя Ахиллесы не погрешит, аще мужественныя Екторы именует, не погрешит; аще великосильныя Самсоны глаголет, не будет посмеятелен: ибо не мнози на многия неприятели, ниже едини на единаго соперника: но едини противу толиким полком диявольским, противу толиким видимым мучителем, пртиву толиким ранам и скорбем обостившеся; толь всехрабро, толь премужественно вся супостаты одолеша: яко предивный позор, и всекрасное удивление всему миру, не токмо человеком, но и ангелом быша: по гласу предивнаго Божия сосуда, позор быхом миру и ангелом и человеком (Коринф. 131). О сих и глаголати, и писати настоящее историческое словотечение понуждает, страдания самая оных, веледушное терпение самое, крепкомужественныя храбрости самыя руку бренную воздвизающе, трость неодушевленную двизательне поостряют к написанию, откуду и в труд словособрания, на оных страдальческия уповающе молитвы, всежелательно всупихом. написати же возжелахом, не о всех именословне, ибо превыше исчисления суть: ниже о всех преславных действиях оных тонкочастне, занеже пребольше сочтения обретаются: но елицы начальнейшии во храбрстве преславнаго страдания быша, елицы дивнии во страдании, предивная показавше действа, сих настоящия повести всежелательное изъявление ищет, на свет всесладчайшаго зрения пресветлое оных мужества страдание всеясне представити. представляем же по чину изрядства преславных престолоначальствий каждыя епархии, в российстей земли утвержения, да тако предобрым чином, всепреизряднаго представления преславное и всепредивное позорище пречудных венечников всепрежалостно позорствовавше, всеусердно и преудивительно всепредивнаго в дивесех

Господа Бога восхвалим: с царепророком всесладостно возглашающе:
яко дивна сотвори Господь
(Псалом 97).

НАЧАЛО ИСТОРИИ

ЧАСТЬ 1.

О МОСКОВСКИХ СТРАДАЛЬЦЕХ

Гряди убо на царственнейшее тризнеще, в самое митроградное воинствования поле: и виждь начальный град российскаго царствия, не толико златом сияющ, елико кровию неповинною обагряющся преславных страдальцев; виждь никонова новосаждения суровое и кровавое изгнетение, виждь и крепкия Христа моего оруженосцы, за слово свидетельства того, всехрабро страдавшыя!

ГЛАВА 1.

О Павле епископе Коломенском

Начальник онаго добраго воинства не от простаго народа бяше, ниже от поселянска препутия, но пастырь Христова стада, страж бодрый церковныя доброты, труба златокованная благочестия, сосуду избранному яко ревностию, тако именем согласный, архиерей чудный Коломенска града: сего богатство ревности, изобилие разума, постоянство твердости, время оное на светильник явления изнесши, пресветло всем показа: егда бо Никон собор собравши коварством вся подъиде, якобы древлепечатныя книги с древлехаратейыми и с древлеписменными несогласны, исправити подобает, прочии архиереови и священнаго чина простою верою повериша тому, мняше истиннаго того пастыря быти: но не Павел тезоименный верховному, ему же очеса и внутренняя отверста; позна овчим одеянием прикрытаго волка, дивным дерзновением о древлецерковнем благочестии толико сопротивоста: елико Никону на онаго и ко вселенским патриархом писати жалобныя книги. глаголют же неции, яко по никонову принуждению тогда подписывахуся к свитку российстии архиереи, аще к написанному, аще к ненаписанному, известно о сем глаголати не хощу: дивный же Павел Коломенский архиерей дивное подписание предивно начерта, не сложение некое, не соглашение кое, от младенчества страха бываемое показа: но мужественный церковный глас пречудне назнамена. «Аще кто от обычных преданий святыя кафолическия церкве отъимет, или приложит к ним, или инако развратит, анафема да будет». Сим начертанием великомужественным никоново сердце яко оружием преострым тако всекрепко прободеся, откуду Никон не може презлобныя ярости удержати, но призвав предивнаго Павла своима того рукама (оле всезлобныя ярости) бияше по священному священнаго лицу: не усрамився священства великаго чина, не устыдевся святости честных седин мужа, ниже апостольских убоявся правил, извержение наносящих таковая дерзающим, отсюду себе показуя удобно являше; яко не пастырскою ревностию, но мучительскою лютостию, нововнесенныя ввождаше догматы; что убо доблий Павел, еда убоявся досады; еде смалодушествова о безчестии: никакоже. но непреклонен яко столп в древлецерковнем благочестии стояше, и многая тому предлагаше Никон патриарх увещания, и лестная словеса, и прежде, и тогда, и послежде, еже преклонити того к своему намерению: не улучи на малодушнаго, но на крепкаго и велико душнаго воина. предлагаше Никон древлепечатных книг простонаречие, неудобренное красотословие: пртиву полагаше Павел простое истинны евангельския, рыбарственное апостольския проповеди: Никон предлагаше правление книг новопечатных нуждно быти: яко по правилом грамматическа художества, действоватися происходит: Павел противу полагаше, не по правилом грамматикийским новшества полагаются: кия убо правила трисоставный крест с просфор отметают, кая грамматика двема перстома знаменатися возбраняет; кий синтаксис пятию перстами благословляти уставляет: кая пиитика аллилуиа трегубити узаконяет; не по правилом грамматики седмицу просфор в службе отмещете, символ приложеньми и отложеньми умножаете, поклоны в посты отъемлете. сих всех грамматика, ниже учит, ниже законополагает, но древнее предание святыя кафолическия церкве учительства и гласы святых церковных учителей, и греческих и российских, обычай всекрасный древлецерковный, неизменно от грек приятый, неизменно до нас сохраненный, неизменно до конца содержатися должный, по написанию святых отец: мы убо древнему законоположению церковному последуем, мы заповедания святых отец соблюдаем. Еще же и клятв отеческих и запрещений боятися должно глаголющих: проклят разоряяй уставы отеческия, и непременныя уставы церковныя, яже положиша отцы твои. Никон предлагаше греков новопечатныя книги, нынешния обычаи, днешняя чиносодержания, имже последовати увещеваше, Павел противополагаше греческия новопечатныя книги, древлеписменным греческим весьма не согласны: занеже печатаются в латинских странах, и растленне печатаются. в них же и Духа Святаго исхождение от Отца и сына догматствуется, и обливание в крещении[7], и ина латинская заблуждения првсеяшася, откуду и не суть достоверни: противополагаше и о грецех, яко нынешния обычаи греческия древним греческим обычаем и преданием несходны суть, триперстное их знамение, и пятиперстное благословение, несогласно древлегреческим учителем Феодориту, Мелетию, Петру Дамаскину, Никифору Панагиоту и Максиму Греку, словесы своими богодухновенными двема перстома и креститися и благословляти научающым: несогласно и всей древлевосточней кафоличестей церкви, иконными изображении, двоеперстное сложение всеобдержно изъявляющей, несогласно и святым апостолом, чрез дивнаго евангелиста и живописца Луку, иконным изображением, и самого Христа Бога двема перстома своя ученики благословивша показующым. предлагаше о грецех, яко под страхом агарянския державы живуще неволею, и нуждами стеснени, оным сообщаются, и многая чинов церковных, и преданий преступают. О чесом посланный от Иосифа патриарха Арсений Суханов свидетельствует. Показоваше Никону древлехаратейный устав словенский, писанный в лето 5900[?], в нем же яко о поклонех во святый великий пост, и в прочыя, тако и на прежеосвященной, и в вечер 50-цы с коленома главы преклоняти повелевается, и прочыя уставы и обычаи согласно старопечатным книгам. Сими и иными показании, Павлова богодухновенныя уста, Никона всего безгласна всего осрамлена показаша; иже не могий увещаньми духоносну одолети мужу, на ярость и гнев паки обращашеся: книгу оную устав отъяти повеле, самого богоносна Павла темнице предаде. писав на него Константинопольскому Паисию, стояние и крепость мужа поведая: и оттуду о сем безответсвие прият, еже в Скрижали в послании Паисиеве обретается. таже Никон патриарх, егда ниже страхом, ниже биеньми, ниже темницами и оковами того преклонити не возможе; во оземствие заточения посылает, во един от убогих монастырей именуем Палеостровский, к северным странам, в Олонецтем уезде, близ студенаго моря лежащий, тамо предивному Павлу на малое время долготерпительно препроводившу: и ясным гласом и светлою душею древлецерковнаго благочестия светлость свободно проповедающу, не возмогоша стерпети новинцы[8] ревности богоносна мужа: паки оттуду к новоградским странам отвезше (Оле немилостивыя суровости) по томлении многом священнаго епископа, несвященнии в срубе соделанном огненней смерти немилостивно предаша. Тако всесвященный павел, приносяй Господеви священныя жертвы, себе жертву преосвященную Владыце принесе, огнем вседобре испечесе, добрый бысть пастырь за догматы отеческия свою душу предаде всерадостно.

ГЛАВА 2.

О Данииле протопопе Костромском

Еще же и добрии советницы, и всеблагоревностнии свойственницы, предобляго Павла, яко в совете стояния о благочестии, тако и в терпении за христианския догматы, предивнии сострадальцы явишася, дивный и твердодушный муж Даниил протопоп Костромский: иже в самое начало новопремены, Никоново познавше коварство со Аввакумом протопопом вкупе. и от книг святых древлецерковных яко о двуперстном сложении крестнаго знамения, тако и о поклонех в великий пост благотщательно собравше, прошение царю подаша, жалобу на Никона приносяще. в нем же написаша, яко двема перстома клятвою осуждаются, тако и коленопреклонения не творящии во святыя посты, от церкве низлагаются, и с еретики анафематствуются: царь же прием оных прошение, ничтоже сотвори, имяше бо веру лестным Никона ухищрением. Никон егда услыша Данилову ревность, и к царю на себе жалобу, природною яростию возжегся посылает яти Даниила: его же приведена како ругательно обезчести, како немилостивно томи, како гневояростно умучи, при царе безчестно главу остриг, безчестно одеяние содрав, ругательно священнаго мужа непреподобный, в хлебницу Чудова монастыря отвести повеле: и тако великими томленьми того безочиво помучив, егда крепость того разслабити твердодушное низложити не возможе, наконец чт умышляет; в заточение небесных ищущаго селений посылает. и коим неслышанным безчестием, оле нрава безчеловечна венец терновый на дивнаго Даниила, яко на Христа моего иудеи, возложиша, и тако во оземствие во Астраханский град привезше, в земленую темницу посадиша, но великомужественный страдалец радуяся безчестие претерпе, веселяся язвы Христовы на теле своем ношаше, благодушно во всемрачней темнице седяше благодатию Владычней осияваем, в ней же гладом и нуждами довольно томим всеблагодарственно терпяше, и от всемрачныя темницы, к незаходимому солнцу Христу за Его же законы пострадав, радуяся взыде.

ГЛАВА 3.

О Логине протопрезвитере Муромском

Пречудный в ревности, и красный в страдании Логин протопрезвитер Муромский, во оноже новозакония Никона время, толикия предоблий исполнися храбрости[9]: елико всюду народы укрепляше, стояти твердо в древлецерковнем благочестии, Никоновых новин не приемлющым. откуду нестерпимо бяше Никону, того ревность слышати, но послав воины повеле того безчестно взяти, и тому приведену во время литургии в соборную церковь к Никону патриарху, ту сущу и самому царю, на своем царстем стоящу месте. и егда священный Логин к вопросам Никоновым благоревностно отвещеваше, мужественно древлецерковное благочестие защищаше, всехрабрственно обличаше непреподобныя новин премены: сими всеизрядными всеизрядныя ревности глаголы предивнаго Логина. Никон уязвися возкипе яростию, ниже места святаго устыдеся, ниже времене страшнаго: но во время великаго входа, остриже его, и не токмо се, но и одежду с него сняти повеле, и не токму едину, но и вторую, и во единой срачице остави его, благоревностный же Логин, дивным рвением яко лев возуповав, обличаше Никона, порицая непреподобная его начинания, ими же смущаше, колебля великороссийския народы, и распоясався снем с себя срачицу, верже чрез праг олтарный к Никону глаголя: отъял еси одежди моя верхния ругая мя, се и срачицу отдаю ти, не боюся безчестия: наг изыдох из чрева матери моея, наг и в землю возвращуся. откуду наипаче возгореся гневом патриарх, повеле в цепь предобляго Логина сковати, и тако из церкве скована ругательно влачити, метлами биющым, и даже до Богоявленскаго монастыря тако того влекоша, биюще, и ругающеся, во ужасный позор всем зрящим, и привлекше священнаго мужа, несвященнии воини в монастырь, иже за торгом, во едину храмину нага затвориша, ни единаго человеколюбия показавше; но и воины Никон пристави, еже твердо и неослабно стрещи его, дабы от человек или знаемых того посетил ничтоже. и понеже Христов страдалец, от всех оставлен и презрен бысть, и сродных и знаемых страха ради патриарша, и наг в затворении всеблагодарно терпяше. что творит чудодейственный Бог своею благодатию того согревает; во ону нощь невидимо страдальцу посылает и одежду теплую, и шапку на главу его; да священнаго Давыда, священное исполнится слово: сохранит Господь вся любящая Его. оно внезапное удивление, возвестиша стрегущии патриарху Никону: он же нисколько сему не удивися, ниже раскаяся о злобе, юже наведе блажнику. но разсмеявся рече: знаю аз оныя пустосвяты, и повеле шапку от крепкаго отъяти страдальца, теплую же одежду тому оставити, таже томленьми того различными немилосердно мучив безвестно сослав, живота настоящаго лиши. Предивный же страдалец радуяся нужды и скорби претерпе. и самыя горчайшия не устрашився смерти: но сладце вся за любовь Владычню долготерпеливно и благодарственно к безсмертному и присносущему Владыце востече всерадостно.

ГЛАВА 4[10].

О Аввакуме протопопе

Присовокупляется с сими и великоревностный и многотерпеливый Аввакум протопоп, муж елико добраго и воздержательнаго жития, толико великия и огнепальныя ревности: и коль великодушием изобильный, толь и многостраданием обогащенный, иже земному царю, князем и боляром за праведное жизни знаем и любим бяше: и небесному царю, ангелом и святым всем, за многострадальное терпение возжелен показася, иже всюду добры и прполезны клевреты писно имяше, в благопребывании други, в стоянии за благочестие советники, и в терпении сострадальцы: и всюду доброревностен предоблий обреташеся, колико убо премногая времена страдаше, в коликих премногих томлениих облагашеся, колико премножайшая оземствия, заточения и темницы великодушно терпяше: но неподвижимо при благочестии стоя пребываше. ибо от самаго начала новшеств внесения, всеизрядне к великим подвигом обострися, с предивными, Павлом, Даниилом и Логином всеблагоревностне советующе, и Никоново обличающе оплазство, и царскому величеству на онаго жалобныя подаяху книги. откуду Никон на благоревностнаго Аввакума всеяростным огнем возгореся. служащу оному всенощное бдение в церкви Пресвятыя Богородицы Казанскаго образа на площади, и множеству народа предстоящу со всежелательным молением, прискочиша посланнии патриархом воини яша блаженнаго яко злодея немилостивно, ничтоже зла сотворшаго: и тако немилостивно того яша: яко ниже пения скончати, ниже службы святыя совершити ослабивше, ниже народа предстоящаго пощадевше, сице всеяростному Никону повелевшу: но и от народа 60 человек поимавше, прочым разбежавшымся, в темницу отведоша. дивнаго же добропобедника на патриарший двор отведоша, узами обложиша. заутра Никон во Андроников монастырь отслав того в темную храмину затвори немилостивно, и гладом томити приказа. но что добрый страдалец, темницу яко многоценную светлицу, тяжкий глад яко всекрасное прохлаждение вменяше, от человек презираем Божиею благодатию питашеся. во оном монастыри четыре седмицы седяше скован, различныя озлобления, томления, немилостивная досаждения, присная ругания, подсмеятельная влачения, за влася терзания, заплевания от держащих досадительно приимаше. Но душею крепкий не изнемогаше с Павлом вопия: кто изнемогает, и аз не изнемогаю. оттуду паки на патриарший двор привезше того безчестно, патриарху представиша: колико убо Никон потщався, того крепость низложити: киих ласканий не изнесе; всяку кознь, всяку хитрость подвизая, да превратит твердодушнаго. но ничтоже успети возможе: вся бо ухищрения и кознодейства Никонова доблий яко паучину растерза, немощны и отнюд недейственны показа, паки отвозим бывает во оный же монастырь. и по времени некоем, хождению крестному в Москве сущу: паки приведен бяше доблий в соборный храм, ту сущу самому царю: и разгневався Никон повеле того безчестно и ругательно острищи: но заступлением царевым от сего свобожден бысть, любяше бо царь благоревностнаго Аввакума, и почиташе за доброе житие его: но Никоновыми хитростьми обязан веру емляше тому яко патриару. вместо же острижения великодушный страдалец в заточения оземствование в далечайшыя сибирския страны отвозится, в самыя глубочайшыя пределы за великим езером Байкалом сущыя, на самых границах варварских стоящыя, нарицаемыя Дауры, и с женою своею и с чады отводим бывает в толь далеко отстоящую страну, елико в пятилетнее время ему тамо достигнути, закосненое шествия, и по местом медления во оном немилостивом заточении. в таковом далечайшем путешествии, которыми не истесняшеся нуждами, которыми не облагашеся теснотами, которых томлений ругательных не претерпеваше, вседоблий страдалец. от воздушныя тягости, от путнаго труда, от возящих досаждения, и ругательства, елика тому наношаху несмысленнии. предан бо бысть некоему мужу от начальник, определенному на властительство в Дауры: безчеловечну сущу и вселютейшему томителю, зверю паче, а не человеку нарещися достойну: за всеяростное нрава к сему же и повеление тому от патриарха Никона бяше, всякое томление наносити священному страдальцу. Но кий язык изглаголет; кая уста исповедати возмогут: яже претерпе адамантская она душа, от всезлобнаго мучителя, яже руганий множества, яже по ланитом ударения, яже за власы терзания, яже по главе биения, яже по хребту, яже по прочим частем тела; оплевания лица, поругания и смеяния, некогда и в воду метания: и не токмо се, но и до толика возкипе дерзостию беззаконный мучитель, еже и обнажити священнаго страдальца на страдание повеле, не устыдеся священства великаго сана, не усрамися мзрядныя честности, и дивныя святости мужа, и како устыдитися приимет, егда толикая ругания, безчестне тому предпоказа. совлечену убо бывшу страдальцу (оле нрава безчеловечна) повелевает седмиюдесять и двема ударома кнутом того уязвити. и не токмо сам сие делаше Пашков, но и служащии тому раби подобонравни в мучительстве господину: многажды страстотерпца бияху и ругахуся, иногда же тако разъярившеся всегневно, яко и на кол ругательно посадити его уготовиша: но Бог своим премудрым промыслом сохрани своего раба от таковаго конечнаго ругания. Что убо благоревностный страдалец, во оных превеликих томлениих, в безчеловечных мучениих, како оная терпяше, яко неисповедимая мучительства носити благодарне можаше; яко всехрабрый воин, яко всепредобрый подвижник, сладце Господа Исуса язвы с Павлом на теле ношаше, пресладкий глас он присно глаголя: Христос моя жизнь, Христос мое утешение, Христос ми подтверждение: кого убоюся; аще и камения громаду на мене намещут, аз со отеческим преданием древлецерковнаго благочестия, и под камением лягу радостне. о ревности всекрасныя, о гласа всепресладкаго, о любве всепревозжеленныя, единому Павлу последовательныя, вопиющему: вся могу о укрепляющем мя Христе. время убо некое в заточении бывшу предивному страдальцу, аще шестолетное, аще пятолетное, глаголати не имам: прииде царево повеление свобождающее от заточения онаго, и к Москве возвратитися повелевающее. той же яко в заточении живый, тако и вспять возвращаяся: всюду свободным гласом, и благоревностною душею, древняго благочестия светлость пресветло проповедаше. Егда же в царствующий град прииде, князи и боляре тако любезно его прияша, яко ангела Божия, и самому царю о нем возвестиша. иже с любовию того призвав, главу свою ко благословению преклонив, и свою десницу на целование тому милостивне подав, словеса мирная и жалостная с воздыханием тому беседовав, благодарно и милостивно отпусти. И понеже добрый страдалец ревнуя о благочестии, всюду свободным языком сие проповедаше: духовныя власти державному государю словесы клеветаша, да запретит Аввакуму о учении  яко волит. Государь не хотяше добляго оскорбити, ведый жития онаго святость: посла болярина Иродиона Стрешнева, увещевати Аввакума, да не обличает новин Никоном утвержденных, но о себе яко хощет да содевает всякую милость к нему за сие обещевая. вмале уступившу в молчании страдальцу, царь и царица и вси царския крове превысочайшия персоны, и князи и боляре преизобильно того имением награждаху. но яко невозможно есть светильнику скрыватися под спудом, тако всеблагодатней ревности заграждатися молчанием. Паки язык Аввакумов вопиет, паки уста взывают, паки десница пишет! и что написует; прошение к царю, да Никона от патриаршества отставит, да древнее благочестие уставит, да патриарха инаго благочестива и богобоязнена устроит. и оное прошение чрез верных своих цареви подает. Откуду царь паки печален явися ко блаженному, и духовных властей наношеньми, и изостренными языки возбужден посылает наречие ко страдальцу, чрез болярина Петра Салтыкова: архиереи на тебе жалуются, яко опустошил еси церкви и отвратил еси люди от вхождения в Божия храмы, от ныне паки да пойдеши в заточение в поморския пределы, на Мезень сослан с женою и чады: лето тамо и пол пребысть, паки в Москву привезен. и понеже духовнии посылающе много того увещеваху, ласкаху и различная ухищрения показуеще, не могоша от стояния твердости ослабити, в соборную церковь приведше, ругательно того остригше от священства извергают: ниже сим насытившеся зверояростнии: но и проклинати добляго мужа и по всему православна не убояшася. что же той, в надежди Божии живый: толико мужественно оное безчестие радостно терпяше, елико ко извергающым вопияше: аще и извергаете мя беззаконна, не боюся вашего извержения, имам бо хиротонию от православных патриархов, юже и ношу православно. аще и проклинаете мя дерзостно, недейственна есть клятва ваша, понеже неправедна, неправедна же понеже за древлецерковное святое содержание, за святыя отеческия догматы, проклинаете безочиво: сами суще повинни тяжчайшым запрещением, и жесточайшым клятвам толикая смущения, толь премногия новины в церковь продерзостно вносящии; откуду власти духовнии, недуховныя ярости наполнившеся, со всяким безчестием блаженнаго из церкве извлекше в монастырь заточиша. и толико ругание соделаша непреподобнии, елико и браду священному страдальцу (оле нрва безсрамна) отрезаша, и лютыми томленьми тамо, и безчеловечными, седмьнадесять седмиц крепкаго томиша. во оной темнице в монастыре на Угреши седя предоблий, яко человек унынием объяся, яко сице обруган бысть, елико и варварстии языци не показуют, занеже и браду его власти остригоша, о колико предоблий о сем ко Владыце вопияше, колико слезы и вопли излия, милости и утешения в горцей прося печали! и что бывает дивное; что содевается преславное; восхоте всемилосердый Господь своего раба в велицей утешити печали, а полунощи поющу страдальцу утреню и чтущу святое евангелие в самый торжественный день Вознесения Владычня. явися ему ангел Господень светлым и радостным лицем, таже и пресвятая Владычица Богородица аки из облака, посем и сам всесладкий Владыка Христос явися, и всепресладостно ко предивному страдальцу возглашаше: не бойся, аз есмь с тобою. от сего видения колико премноги радости, какова неизглаголанна веселия, о каковы преестественны сладости страдальческая исполнися душа, на землю пад Владыце поклонися, и лотоле на земли лежаше, дондеже преестественное оно видение прейде. откуду вседоблий, всепредобляго мужества наполнився: предоблий Давыдов глас вопияше: аще ополчится на мя полк, не убоится сердце мое: аще востанет на мя брань, На Христа Бога аз уповаю. таже кровем неповинным радующиися духовнии, подходят царя, и многими клеветами и наносами возбуждают монарха дати ответ лютейшею смертию страдальца казнити: но прилежным молением царицы, и присным заступлением от сего избавлен бысть дивный победник: осужден бывает в заточение, в монастырь Пафнутия Боровскаго, идеже во узах целое годищное время всякую нужду и томление терпяше, посем паки в Москву взят, и по многом влачении и безчестии, и различных с духовными разговорех пред вселенскими патриархи представляется, Паисею Александрийским, и Макарием Антиохийским: и чрез преводчика многия разговоры, многая увещания, о церковных догматех тому быша. наконец вселенстии патриарси таковая к нему рекоша: вся страны вселенныя треми персты крестятся: ты един упорствовати противу всем ожесточаяся, двема перстома знаменаешися. что же страдалец противу сим ответствова; страны вселенныя уже мраком различных отступлений объяшася. Рим пред многими низвержеся леты, лютеране, и кальвиняне, всех отеческих обнажися преданий, вашя восточныя страны агарянским насилием опустошены, многая от церковных преданий испровергоша. с ними же и знаменование крестное, в сложении перстов. аз же научихся не ныне, и не от днешних непостоянных учителей, но от древних. учат мя восточнии святии, Мелетий, Феодорит, Петр Дамаскин, преподобный Максим Грек, учат гречестии древнии иконописцы на святых иконах изъявляюще, и сами святии апостоли, на образе Богоматере двоперстно Христа благословляюща изображающе. учат российстии святии, и соборне и особне: тако вси согласне и обще, и знаменатися и благословляти двема перстома научают. премолчаша вселенстии патриарси, росийстии же архиереи яко хамовы подражатели на своя святыя отцы, оле дерзостнаго языка, восташа глаголюще: неразумни и неучени российстии святии быша, и безграмотни. возревнова к сим страдалец о очестем безчестии, и словесы дерзновенными толико их дерзости великодушно поноси: елико всем собором воставше, сами архиереи и патриарси, торгати и бити блаженнаго начаша глаголюще: возми, возми, яко всех нас обезчести, таковыми поношеньми. по оном терзании о аллилуии и прочих преданиих разглагольствовати начаша, и о всех подобныя ответы приимаху от страдалбца. и многа убо разглагольствия, увещания и страхи предлагающе твердаго столпа поколебати не возмогоша. паки узам и темницам отсылают. начальника с воины стрещи страдальца определивше. паки царь посылает блаженному комнатныя своя боляры, Артемона и Доментия Башмакова с наречием: прося благословления и молитвы тому. и всему двору его царскому, и моляще страдальца да послушает его, и соединится со вселенскими патриархи, поне отчасти. на что всеблагоревностный страдалец державному убо благодарение посылает, о вселенских патриарсех, кое мне к ним приобщение рече, или кая часть отвергающым древлецерковныя догматы, и отеческая предания: никогдаже с таковыми аз сообщуся: сладчайши мне таковаго приобщения смерть, и любезнейши будет, часта убо и многа от царя наречия к великодушному мужу тогда быша посланы: конечное наречие страдальцу воздаде царь: идеже будеши отче, не забуди о нас ко Господу моляся. Но аще и милость царева и человеколюбие ко блаженному непременна бяше. обаче духовных злоба и языкоболие изостренно належаше, и властно премогаше. откуду и паки в дальнее заточение той страдалец, истее же рещи дивный великопобедник посылается. Во остров Пустозерский близ самаго Ледовитаго моря к полунощным странам лежащий, и тамо с прочими сострадальцы в земленую темницу осуждени, многое время, даже до самыя блаженныя кончины пребыша неисходно. коль премногая тамо, коль неизчетная озлобления всехрабрый подвижник претерпе, толикими премножайшими мучении томлен, толикими многчисленными заточении и оземствовании дручен, толикими премногими леты в страдании пребывая, и в претяжких озлоблениих, яко изчислятися страданию его двадесятим и осмим летом, но в сих и толь премногих летах, еда смалодушествова терпя: никакоже. но яко всехрабрый воин, яко всеблагоревностный Илиин подражатель, онаго предоблий глас возглашаше присно, ревнуя поревновах по Господе Бозе Вседержители. ревностно начало, ревностно многолетное страдания течение, благоревностен и конец терпения благоревностне показа, во 189 лете [1681] в Пустозерском острозе за древлее благочестие, на страстной неделе, в самый день страстей Христовых, страстотерпческою смертию огнесожжения осужден, ко всежелаемому Владыце огненною колесницею пламене восхищен от здешняго жития, всестрадальчески исходит. Аще и Димитрий Ростовский, и Пращицы списатель неправедными наношеньми неистинная баснословия сшивати на вседобляго тщится, аки о Троице и о смотрении неправомудрствующа вменяют. но разрешается отсюду наношение неправды. колико убо всепредоблий сей име разглагольствий, колико сопрений, колико о вере стязаний, с Никоном, со архиереи, со вселенскими патриархи. и ни един от сих прорече того, или обличи, во оном лжеплетенном по Пращице мудровании; аще быша узрели за ним сие не быша умолчали. и не токмо сии, но и послежде не быша умолчали Жезл собором сочиняющии, не быша уветотворцы оставили. А понеже вси сии ниже до мала о сем зазреша или прорекоша, явственно есть, яко солгася по притчи общеглаголания, ничтоже тако удобнейше есть солгати, якоже на умершаго. Занеже свидетельствует предобляго страдальца православие, священный символ веры, егоже повседневно глаголаше, яко единосущна Отцу Сына, тако и воплотившагося неложно исповедаше. свидетельствует того крестное знаменование в сложении перстов: в немже яко треми перстами, великим и двема малыми тайну святыя Троицы триипостасное и единосущное отцепреданне, присно исповедаше, тако двема перстома указательным и великосредним тайну всеспасителнаго воплощения православно изъявляше, единаго Христа во двою естеству, и единой ипостаси, последовательно отцем, и всей древлеправославней церкви, благочестно и вероваше и исповедоваше, и за сие всерадостно страдав, великодушно умрети изволи. свидетельствует и сам предоблий своеручным писанием, еже о своей жизни при скончании своем, све православие изъявив написа, в немже святый символ святаго Афанасия Великаго написав, в котором едино естество Святыя Троицы, едину волю и владычество еще и таинство вочеловечения Спасова, православно со святым Афанасием исповедав, на конце онаго исповедания таковая глаголет, по вышереченному Афанасию, сице: аз пртопоп Аввакум верую, сице исповедую, с сим живу и умираю. что убо сих словес благочестивейши; что сея веры православнейши; что исповедания сего святейши есть; свидетельствует наипаче оный дивный Феодор диакон: с нимже по баснословии прение бысть о Троице и прочем. явственно и преявственно разрешает недоумение пред самым и в самом часе кончания, простився благословися у предобляго Аввакума, и друг друга друголюбезне лобызавше, исходным целованием. сим благословением и святым целованием, дивный Феодор предобляго Аввакума православна и благочестива изъявив показа. аще бы ведал неправославна, не бы простился, не бы благословися у онаго, не бы исходным целованием лобызася. а понеже вся сия единодушно и любезно содеяша, явственно и зело явственно. елико от вышепоказанных свидетельств, сице и от сего, яко общее православие общекупно содержаша. за кое благочестие во едином срубе с предоблими сострадальцы всеблаженную огнепальную кончину всерадостне, единодушне подъяша, единомысленне во благочестии стоявше. единомысленно в небесный востекоша град: по реченному, Бог вселяет единомысленныя в дом.

[…]

ГЛАВА 10.

О болярыни Феодосии Морозовых, и княгини Евдокии Урусовых, и с прочими

Предивно тогда и некия от великоблагородных жен аще и женами их нарещи лепо: яко премужественно путь страдания претекоша, великая в страдательном терпении, великая в сигклитикиях Феодосия, великих боляр Морозовых, яже богатьством премногим тако кипящая, яко крестьян до осми тысящ, двора до четырех сот слуг имущи: славою толь премного сияющи, яко прочая царския державы бяше, и присно повседневно в царских дворех бывающи. и сестра ея благоревностная княгиня Евдокия, Урусовых князей: и благородная в женах Мария: с ними же предобрая сих начальница, и спасения учительница инокиня Иустина, славныя жены, преславно и всехрабро, тризнище страдальчества претекше победным увязошася венцем. их же страдание тако бысть. Понеже великая и предивная сигклитикия Феодосия, кравчая царския державы бяше присно водворяшеся в доме монаршестем. И егда новины Никоновы смущати и колебати Россию начаша, сия занеже древняго благочестия, всеблагодатная ревнительница бяше, нача помалу царских укланятися дворов и приметатися в домех древлецерковнаго благочестия любителей. отсюду в царстем доме, яко от царя, тако от царицы присно вопрошаема бяше: чесо ради не обретается присно в царстем дворе; и егда уведа монарх, яко сего ради не приходит, понеже древлецерковнаго благочестия держится, тогда призывает оную к себе, увещавая ю покаритися царстей воли, и архиерейским собором. киих увещаний не показа; коих обещаний не сотвори; которых словес ласкательных не издаде оней еже Никоновы новины приятии. Но что оная предивная в ревности, предивная и в разсуждении сигклитикия; дивне монарху отвещеваше: Вашему царскому величеству всегда покорны бехом и есмы и будем: от прародителей бо сему наказахомся, и от апостола учимся Бога боятися и царя почитати. к новинам же Никона патриарха пристати никогда же дерзнем. ибо от благочестивых родителей рождении во благочестии воспитахомся, измлада священных навыкохом писмен, от пелен Божиим научихомся законом; не отвержемся оных, ими же добре обучихомся. не преступим отеческих святых пределов, не загладим писмен, ими же священнее во священней церкви воспитани быхом: древлеправославно научени сущее, новопреучитися, и новыми сими водитися законы, никогда и никакоже смеем, отеческих запрещений и страшных клятв ужасающееся, зело боимся и трепещем. видев самодержец, яко преславная сия не покаряется сигклитикия и к новинам пристати не хощет. Архиереом о сих яко отцем предлагает. тии же обыкоша своя догматы дивным учением кровопролития утверждати, советуют и увещавают монарха, оную преславную болярыню, и с нею сущыя, гражданскому суду отдати. егда отданным сим в безмилосердное истязание, что страшное, что ужасное на них соделаша; како благородныя узами обругаша; како славныя темницами обезчестиша; како пречестныя мученьми немилостивно растерзаша; слышити: собравшымся честным и великим боляром, Долгорукову, Воротынскому, Сергиеву, и прочым, нощи сущей, привозится и дивная в терпении Феодосия, на двор испытания. уготовляются мучительныя сосуды, реброломательная предлагаются орудия, огнь великий возгнещается: сим уготовленным: князь Иоанн, Воротынской глаголаше: благородная сигклитикие Феодосие, видиши ли огнь, зриши ли орудия мучительная тебе ради и на тя уготованная! прочее послушай нас, прими новозданныя книги и догматы: да первую честь и славу от монарха и от нас приимеши. Что же всехрабрая душа; что великомужественная страстотерпица отвеща: о бедный княже Иоанне, что ми огнем угасающим и вещным грозиши, его же присно возгнещах в домашних потребах аще печение, аще варение, аще домосогретие, сим присно содействовах, откуду не толико сего огня обычнаго и угасающаго боюся, елико трепещу вечнаго и неугасающаго пламене, хотящаго безконечно вся палити законопреступныя. Сим реченным, судии повелеша прежде взятии сестру ея, благородную княгиню Евдокию, и на древе мучительнем повесити, нагу и мучити немилостивно. таже и самую великоблагородную сигклитикию, многотерпеливую Феодосию повесиша нагу: Оле свирепаго немилосердия судящих, не устыдешася толикаго благородия, не усрамишася честности оных, не помиловаша слабости женска пола; но всеяростно пролияша неповинныя крови, уязвиша праведныя плоти, раниша преподобных телеса, упестриша хребты их многокровавыми глубочайшими ранами, кроме всякаго студа зрения: и не дивно: архиереом на своя главы вземлющым пролияние праведныя крове! таже снемше с мучительнаго древа, наги на землю повергоша, зиме сущи велице, и снегу многу на земли лежащу. оле безчеловечия конечнаго, и каменосердечных утроб, христиане глаголющиися, христиан православных, и честных во благородии святыя законы соблюдающих, паче злодеев, паче разбойников, ненавистно и всеругательно мучат ниже малыя капли человеколюбия показующе. что же всеблагий Господь; еда презре, еда остави своя страстотерпицы тако в лютых безпомощны; никакоже. не призрело на сих человеческое око, но Божие милосердие призре. не согрела сих людская одежда в зимний мраз, но Божия благодать и кроме одежди и тако одея, тако тепло согре, яко и снег окрест сих растая, и благодатную теплоту страждущым всепремилостивно подаде. обаче не согреяшася милосердием архиерейския души, не растаяша жестокая судящых сердца. но по лютейших сих язвах, по многокроволиятельном мучении, осуждают неповинныя яко во гроб живы, яко в земленую, во граде Боровске немилостивно сия темницу скрывшее; яко ниже света сего, ниже солнца видимаго дают зрети достойным небеснаго светосияния. во оной темнице дивныя и многострадательныя жены, коль премужественно, коль всехрабро, коль всеблагоревностно претерпеша: яко даже до самыя смерти, до самаго исхода душевнаго, веледушно скорби и беды понесоша: четыри седяще пятолетное время обхождение. во оной темнице живущее, гладом, хладом и нуждами присно преболезненно томими и уморяеми, преставишася от всемрачныя и прегорькия темницы в присносущий и немерцающий свет будущаго блаженнаго наследия.

Предивны жены, како пострадаша, зрити;
Богатьство, славу тако попраша, блажити;
Преславну четверицу не держат полаты;
Доброт взявшее пленницу носят венцы златы.

ГЛАВА 11.

О отце Спиридоне Потемкиных

В кое время, и великий отец Спиридон пресветло сияше: елико благородием славный Потемкиных боляр рода сый, анексея имяше в царских водворяющася полатах: толико и великоразумием изобильный, четырьми языки всеизрядно книги чтяше. и художественнаго ведения не неискусен, наипаче жития добродетельнаго, ревности всеблагодатныя бяше. потязаше убо новшества, потязаше и книгоправления, потязаше и нововводимыя догматы и предания, свободнейшим языком. И понеже благороден сый и многоразумен, еще и сродники имый многомогущыя у монарха, терпяху тому архиереи потязающу. Колико той прошашеся на разглагольство ко архиереом, но не приемляху: колико моляше собор сотворити со онаго прибытием, но не повиновахуся: видящее того мужа многоискусна и научена. откуду всеизрядныя его не стерпевшее ревности, отсылают во убогий монастырь Покровский, неисходно ту житии повелевающе. И егда Новоградский митрополит Макарий умре: прииде анексей дивнаго Спиридона Феодор Ртищев от монарха к великому сему отцу, с наречием таковым: царское величество, тебе честнаго отца жалует, на Новгородскую митрополию, во архиереи. На сия богомудрый отец что отвещаваше; вижду Российскую землю смущаему, и архиерейския престолы новинами потрясаемы. зрю и отеческия клятвы, и древлецерковныя анафемы смотряю: имже вседерзский Никон Российскую церковь новопреданьми возмутив, под отеческая запрещения подверже. не хощу на престоле седети преступающем древлецерковное благочестие, не желаю чести привносящия отеческия клятвы; многоценнейши имам убогую сию храмину, обогащенную благочестием, паче пребогатаго архиерейства, лишеннаго древлеправославнаго предания, лучши во убожестве и заточении житии изволяю, со отеческими законы: неже в богатстве и прохладе под анафемою срамно ликовати. отвеща посланный: о коль мнози ищут имением многим и дарми, доступающе сего престола. ты же туне себе дарствуемаго отвращаешися. противу коим богомудрый рече страдалец: не ищу превысоких престолов чести, не желаю многоценных стяжаний, не взыскую пребогатых сокровищь, но вся сия уметы вменяю, да единаго Христа приобрящу. о всеблагодатныя ревности, о великаго разсуждения великаго Божия человека, имже всякия земныя чести и славы отрекся, во оном оземствовании убогаго монастыря, во убогой келлийце всеблагодарственно нищету и скудость терпя, всерадостно благочестным концем преставися; от нищия и убогия колибы в пребогатыя чертоги небеснаго царствия, их же желаше, преславно преселен бысть.

Спиридон дивны чести велика.
Ревности всепрекрасны разума толика:
Высоты чести презре на земли премноги:
В преславну церковь в небе, чудно вознесе ноги!

[…]

ГЛАВА 20.

О отце Прохоре

Дивное зде Божия благодати, на всепредивнем отце Прохоре показуется. егда бо слуху воинскому огласившу страхом пустынная жилища, обитателие пустыннии бежати и укрытися тщение имяху: тогда и спостницы и ученицы Прохоровы уготовльшеся на бежание, самаго старца зваху бежати. пречудный отец отлагаше некако бежание, но притужаху онии понуждающе того того изыти и укрытися. Что же богопросвещенныя очеса Прохорова предзряху: что богоблагодатная уста предивнаго отца провещаша: идите рече чада и укрыйтеся скоро, мене оставльше. Ибо аз прежде вас тако убежу, яко никогдаже постижен буду ловящими. отшедшым блаженнаго учеником, востав преподобный старец, возже свещу, кадило уготова, фимиам вложи в кадильницу. сотвори кажение, яко образом святым, тако и всю покадив келлию, таже что; молитвы и правило исходное многослезно совершив: воином уже приближающымся к келлии: той на одре возлег. Крестным знамением оградився. руце крестообразно к персем приложив, абие душу предаде Богови. оле дивнаго предзрения богоноснаго отца убежа гонителей видимых, утече и невидимых гонителей, ко всеблагому Владыце, в безсмертная покоища по нужднем и скорбнем пребывании вселяется. Вскочивше воини в келлию и видяще странную вещь, свщу возжену, кадило благоухания дымящеся: святолепна старца бездыхания благолепно лежаща; страхом объяти скоро от келлии отбегоша. еже уведавше послежде неции благочестивых христолюбцев, пришедше любовию, тело блаженнаго вземше, обычным погребением обычне землею тое покрывают, благодарственныя песни со удивлением Христу возсылающе, покрывшему удивительно своего раба.

Прохор отец крилато гонителей кова
Вселяется избежав в покой вышня крова.

ГЛАВА 21.

О отце Вавиле

Тогда и всепредивный отец Вавила, дивнаго Прохора ученик сый, дивными мужества острое поле страдания претерпе дивне. Бяше убо всекрасный Вавила рода иноземческа, веры люторския, учения художественна, вся художественныя науки прошед, аще грамматики правоглаголание, аще риторики красоторечение, аще логики словоплетение, аще философии любомудрие, аще богословия всеблагодатную высоту; вся добре ведый и без огреза, и глаголати и писати. в славней парижстей академии учився довольна лета. языки же многими греческим, латинским, еврейским, немецкими всеми. напоследок и славенским добре и всеизрядне ведый глаголати. в царство убо богоизбраннаго царя и самодержца Михаила, в сияющую православием пришед Россию, осиян быв всепресветлыми благочестия лучами; оставляет мрак отеческия прелести: и яко из лавиринфа некоего, тако от бездвернаго люторскаго вредословия изшед, банею паки бытия во имя Троицы порождается, треми погруженьми и возгруженьми тридневное погребение и востание Спасово изобразив всекрасне всепрекрасный животворнаго воскресения сын исходит, и всеблагодатное чадо света является. и яко всемрачныя люторовы избеже прелести в кафолическую святую церковь прибег: тако и мирскаго мятежа и многосуетствия отлучився, во пристанище спасения приходит всизрядный бывает любомудрец любомудрствует о добрых, познавает лучшая. творит философскую душу любомудрия святыми украшая нравы. от светскаго бывает инок, от мирожителя пустынножитель, от гордящагося и сластолюбца, смирен, воздержник, и терпения всекрасный адамант показася; и понеже убо толико естественною силою изобильствова, елико за три человека и множае можаше и носити и делати: железы свою силу самоизволительно смиряет, вериги тяжки на себе положив железами же чресла своя опоясав; тако крестоносно страдаше; тако терпение Владычне всекрасно собою изображаше; прежде же всех свою волю и своя желания, мечем послушания заклав умертви. Чудный послушник и ученик вышеявленнаго пречюднаго отца Прохора бывает: оттоле время течения своего все неотторжено с ним пребывая. Егда убо новины Никоновы, всероссийския церкве корабль прекрасный многобурно нашедше возволноваша, тогда в тишине безмолвия пребывая премудрый Вавила: коль предивными мудрости словесы, како всепреизостренными благодати стрелами, на церковныя смутители непогрешительно стреляя, всехрабро поражаше оныя. всяку коварства оных хитрость, яко паучины сеть удобно раздираше. стрелы бо сильнаго изощрены, вся в древлецерковнем благочестии непоколебимо пребывати учаше люди. откуду нестерпимо бяше понести волнующим новшествы всероссийское пристанище; яти Вавилу прежде всех начальницу с воины повелевают. егда же предивнаго отца онии зверонравнии воини поимавше: во град к прелютому и жестокому начальнику приводят: жестоко и гневно на того оный воззрев глаголаше: вскую, злый старче, царскаго величества указом противистеся, и от посланных взяти вас бегаете; На которая словеса дивный старец дивныя даяше ответы. не видехом убо, ниже познавахом, яко воини суть и иже нас взяти послани быша. понеже воинов не есть обычай иноческая жилища грабити. воинов не есть нрав разоряти пустынных обиталища, воинов не есть нрав брань и сражение ко мнихом, никогоже досадити, или обидети ведящым; но воинов ополчение, не на нищих и убогих старцев бывает, но противу неприятелем государства, противу варваром и язычником, оружия на христианы воздвизающым. еже бо грабити своя подданныя, еже пустынники нестяжательныя разоряти, еже иноки обижати, не есть воинов, но разбойников, злодейственных мужей обычай. откуду и мы бежахом видяще нрав лютости разбойническия, вменихом разбойники на нас пришедшая, а не воины; иже нравом злодейственнаго пришествия виде чина своего закрыша. Противу сим устыдевся судия, своею осуждаем совестию, на молчание уклонися. таже к дивному отцу кротко простирает увещевательную беседу, глаголя: предстателие церкве российския, святейший патриарх, преосвященнии митрополиты, со всеми церковными соборы молят твое преподобие приняти новоправленныя книги и новоутверженныя в России догматы. еже треми перстами креститися. еже двоечастному кресту покланятися. еже аллилуиа трегубити с приглашением слава Тебе Боже. И прочая православная предания в новопечатных изображенная книгах, яко сыну церковному всепокорно прияти. Что убо всепремудрый отец противу сим глагола; кая златостуйная изливаше речения; послушай: Аз, о судие, не зело в древних летех: к российстей кафолическаго православия приступих церкви, не мню бо вящьши тридесятих лет сему быти. не яко во младенчестве неразумия безиспытно прияху веру. Но испытуя испытах православия непорочность. испытав же познах чудное доброты, познав, всеверне приях, прием же очистихся, просветихся и обогатихся дивным православия богатством. еда убо неправославна бяше в России вера: ейже благовразумительно научихся: ей православна.. еда неправославно бяше крестное знамение, ему же всепрелюбезно от души привязахся: ей православно. еда догматы и предания неблагочестны беша, ими же мя тогда увериша, воистину благочестивы и православны. аще же православны якоже и суть: кая ина есть вера паче православныя; кия догматы ины паче благочестивых. кая церковь иная паче кафолическия, к ней же приступих. то ныне мя увещевает: яко един Господь, едина вера древлеправославная. едина церковь древлекафолическая. едино всеблагодатное крещение во оной совершаемое церкви. не солгу тебе святая и православная веро. не солгу тебе православно-кафолическая церкви. испытах единожды, веровах единожды, обещахся единожды. и приях претеплою всежелательне верою всерадостно и до ныне содержу богатсво онаго многоценнаго сокровища всерадостно и душею моею просвещаюся; аще же толикою верою прия и тако содержу еже веровах: лист ли ныне трясомый ветром буду; никакоже. облак ли безводный вихром преносимый явлюся; никогдаже. В научение ли странное и новое прилагатися возжелаю; не даждь ми Боже! се убо праведно и ясно тебе о судие извещаюся: не сломлю моих обетов, ими же всеблагодатне просветихся. не приемлю новаго сего вновоправленнаго вами благочестия, наводящаго ми отеческия клятвы и Божие негодование! ибо самое имя новости нетвердость основания являет. все бо новое, не есть древнее. Аще же не древнее есть: убо ниже отеческое. аще же не отеческое, убо ниже предание глаголатися может: но вымышление некое вновь смышленное. человеческими хитростьми изобретенное. откуду и всякия твердости отлучено есть, всякия же гнилости преполно. есть ли не твердо и гнило, убо ниже приятно быти может. верно слово и всякаго приятия достойно. И аще убо бысте имели благообучительна чувства к разсуждению добраго и вреднаго, показал бых вам новоправлений ваших многопорочную вредность, аще благоотверста слуха на послушание стяжали бысте изъявил бых нынешних догмат всепреоплазивое гнилости, и явственное сопротивления, ко отеческим всекрасным благочестия стопам; а понеже дебелостию смысла заграждаете слухи праведных глаголов слышати не хотяще: вкратце вам извествую: аз Никонова правления новин яко сам весьма соблюдаюся и бегаю, тако и прочым православным христианом всячески новин отвращатися советую всеблагодатно трепещущым отеческаго запрещения, иже соборне всеявственно вопиют: вся, яже кроме церковнаго предания, и воображения святых и приснопамятных отец содеянная, или по сем содеятися хотящая анафема. сими и прочими подобными глаголы богословесный богоноснаго Вавилы язык тако осрами безсрамие гонящих, тако затвори оных незатворяемая уста, яко весьма безгласны и немы аки рыбы показа. ничтоже ко ответу глаголати смыслящих. за стражу прочее судия повелевает положити блаженнаго, да разсмотрит, что подобает с ним сотворити. колико прошаше дивный Вавила, колико молительне притужаше судию, да отпустит его в Москву к патриарху и прочым архиереом на разглагольствие. еже видети и слышати оных некрепкия аргументы, ими же новины своя защищают, и своя православная утверждения сим предложити, ими же древлецерковное благочестие всекрепко защищается. о коем предивнаго отца прошении возвещает судия писменными листы и монаршеская и архиерейская предержащым седалища. Вскоре абие ответ приемлет, не милости излияние кое от духовных, не кротости благия к Божию человеку и мужу дивному показание, о содержащих апостольския престолы, но еже смерти предати прподобнаго отца и безвиннаго, яко злодея, мучительными орудии истязавшым огнем злодейственне испалити, всеяростно повелеша. Откуду мучительная орудия; откуду ужасныя мук виды; откуду трепетныя и кроволиятельныя инструменты, зело скоро приуготовляют; и дивный отец всепредоблий прочее приводится страдалец; таже что бывает; совлачится одежди, снимается риз. и наг к мучительным обостряется инструментом. касаются того плотей всеуранятельная орудия. Дробят преподобныя составы, члены священныя терзают. Не убо устыдешася изможденнаго постом отеческаго тела, не имущии стыда мучители, не пощадеша престарелых плотей, утвержденных подвигами святыми, не стяжавшии капли милосердия. но вся члены преподобника, вся составы праведнаго, немилостивно содробивше разтерзаша, яко плат раздранный, и яко вретище растерзано показаша; но не сломиша великодушнаго мужества, не растерзаша всекраснаго благочестия. Цело бо и неврежденно всепредивное православие сокровище, всепредивный отец соблюдаше, ураняем одолеваше, бием мучащыя побеждаше. и растерзаем немилостивно, яко камень анфраз всеблагодатно цветяше всеблагодатными добротами душу несоодоленну, сердце непобежденно, ум неподвижим, в страдании адамантски показа, устраши мучащыя, ужаси гонители, молчащыя и срамны всепреславно оныя сотвори. Что же по сем; огненную колесницу срубопаления тому соделаша, огня будущаго сынове. и яко огнеружнаго Илию огневидными конями, тако чуднаго отца Вавилу огнепламенными пламене возвышеньми, не яко на небо, но на самая небесная и пренебесная, страстотерпчски всепреславно вознесше к пренебесному Царю и Владыце всехрабра одолетеля, и всепресветла победника всекрасно представиша.

Мудрый отец Вавила коль мудро содела.
Временными изменив превечная села;
Огня колесницею взыде в небо дивно.
Покой безсмертный тамо приобрете видно.

ГЛАВА 29.

О дворянине Димитрии Хвостовых с проч

Предивнии всепредивнаго и всеблагодатнаго Иоанна ученицы, и всепредоблии клеврети и сострадальцы, благородный и честный муж Димитрий со двема единоутробныма сестрама, Матроною и Парасковиею, честныя и добропочтенныя фамилии сущее Хвостовых дворян звание имущее. Еще же и две служительнице с ними, благородия истиннаго праотеческаго всеусердно поискавшее, праотеческое и святых отец, древлецерковное благочестие возлюбльше, твердо на нем красныя своя стопы водрузиша, с ними же и доброподвижный Василий великоновоградец отечеством и усмошвец рукавичный художеством, и Тит подобоотечественный, и равнохудожный оному, и добросердный Феодор, и Василий и девицы, Пелагия и Иулиана, и прочии числом вси четыренадесять со многострадальным Иоанном, путь мучения претекше, темницу, узы, скорби и напасти, радостно претерпеша, ревностною душею, и великомужественным сердцем, паче же, и самую нужную смерть за древнее благочестие, всесладостно избраша. Огнепалительную храмину за отеческую веру, паче красных чертог, и сладкаго мирожития изволиша приятии, превесело в сруб внидоша, превесело с молитвами души своя страдальческия к Страстоположнику и Владыце предаша, во оное срубопаления и сожжения дивных страдальцев время, предивно знамения действо дивно показася. едина бо от страждущих младая отроковица летом девятим сущая с ними во узах великодушно терпяше, с ними в темнице мрачней пребываше, с ними и осуждена огнем скончатися бяше. Егда убо приведенную к срубу узреша архиерейстии приказнии и прочии благороднии дворян персоны, на милость естественно преклонишася, удержавшее увещати оную начаша различными ласканьми; мнози честнии во дщери себе приемлющее, и богатства многа, и сладость ей обещеваху. прочым страдальцем уже в сруб отведенным и затворенным, предобляя же отроковица, ниже краем ушес внимаше оных ласкательным обещанием, но ко клевретом и сострадальцем отрывашеся, аще и не можаше, понеже нуждею держима бяше. егда же срубу запалившуся, и пламени зело возвысившуся, тогда содержащии отроковицу мнящее пострашити ю, отпустившее глаголаху к ней: аще хощеши, иди отверстыма очима во огнь; она же трикраты крестным оградившися знамением (Оле веры претеплыя и великомужественныя, паче же предивныя Божия благодати), абие вскочи во огненный сруба пламень, всерадостно и доброревностно, яко всем позаратаем, и честным персонам, и самем мучителем, преудивительно почудитися. И тако с добрыми клевреты си и сострадальцы вседоброю кончиною страдания страдальчески скончася, вседобрый и дивный образ ревности, земнообитателем остави.

Сице всеблагоревностнии страдальцы, яко добрыя овцы предоброму многострадательному последующее Иоанну ко всепредоброму небесному красно присовокупишася Пастырю верою доброю, и терпением изрядным и смертию страдальческою, к тому самому небесному Подвигоположнику, предоблии востекоша венценосцы, своих страдальческих рукоятей пребогатыя плоды, пресладостно приимати.

ГЛАВА 33.

О Лаврентии купце

Добре пострада тогда Лаврентий купец, иже куплю деяше харчевыми припасы, послежде, многоценный бисер древлецерковнаго благочестия взыскав обрете, обрет же, всерадостно обогатися, и прочия всежелательно обогащаше. Аще и не учен бяше книгам, но книги в дому имея, и отвсюду собирая собираше человеки на книгочтение и спасительныя о словесех Божиих беседы. Откуду зависть приемлет велия, люди архиерейския, чин священный и наблюдаше Яша блаженнаго и в претор отводят, оттуду в царствующий град отпущают, тамо различныя мучения, нестерпимыя раны, неудобоносимыя преболезненныя язвы Христов всерадостно подъят страдалец. Наконец в Сергиев Троицкий монастырь отвезен бывает. и коль всепреболезненно и многолюто отвозится, слышите: дельву сиесть бочку, гвоздием острым наполнившее, во оную всекрепкаго Лаврентия влагают, и отвозят во оный монастырь. что же адамантское Христова страдальца сердце в таковой преужасней муце содеваше; еда изнеможе, или мало ослабе; никакоже: но тако всехрабро и мужественно терпяше острыми гвоздми бодом и ранимь многоболезненно: всеусердно Павлов глас Павлов последователь возглашаше: аз язвы Господа Иисуса на теле моем ношу. Таже конечное пламенем того Божественныя любве горяща, зрящее новолюбители и неотторженно в древлецерковнем благочестии стояша, пламень огня всеядна того от здешних всемучительно преселивше в будущий неболезненный живот всерадостно страдальца отпущают.

ГЛАВА 53.

О Марке Олончанине

По сих страдальцех, и третий их сострадалец и клеврет, мужественный Марко, красное поле преславнаго страдания претече, яко града Олонца и рождением и обитатели бяше, тако во своем граде и дивное тризнище страдания состави. По преднаписанном убо написании и отвезении в Нов град, и егда с предоблим Александром от узилища избежаста, и Александр вскоре явися, паки поиман, и отвезен скончася, якоже речеся. Мужественный же Марко седмь лет на свободе бяше, обо укрываяся, ово смотрением Божиим сохраняем. Таже приспевшу времени того страдания, при воеводе Ловчикове и при диаке Скворцове поиман бысть, и на истязание в претор к судиям представлен, и прежде увещаньми к новинам прекланяем бяше, но обретеся муж крепкодушен, ласкательная увещания яко ветр мимо слухи препущаше, древнее благочестие яко сокровище некрадомо в сердцы всесладостно содержаше, новин Никоновых яко пламене огненнаго всеблюдательно отскакаше. Откуду и на увещания весьма непреклонен бяше, прочее на ужасное тризнище изводится и на многотрепетную и преболезненную понуждается борьбу: и первее на древе злодейственнем яко злодей повешается, и злодейческия раны, и преболезненныя язвы, и прежестокия кроволияния, паче злодеев, паче разбойников всепреболезненно подъемлет, ниже когда помыслив злодейства: и опаления разжженными железы, и реброломания клещами, немилостивно на того страдальчестей сотвориша плоти: и не токмо единою, но и второе, такожде повешения и плещеломания, и кровавыя язвы, и уранения, и ребр и всея плоти опаления немилостивно на того священнем телеси немилостивии сотворяют. Но понеже крепок бяше и тверд страдалец, адамант к терпению многоценный, и наковально к биению невредное познавашеся, ниже ласканьями преклоняем, ниже биениями и муками утомляем, ко третьему испытанию равно первыма двема того отсылают равныя паче же рещи большия и излишния язвы и ранв, мучения же и биения сугубо от премногия ярости сотворяют, но аще и многомучения и раны, и многи язвы и кроволияния страдальцу судии нанесоша, но и страстотерпец многое мужество, и преславно великодушие, и крепко адамантское сердце изъяви; елико высочайши мучительных страшилищь, и томительных уранений являшеся, толико ревностен и благодерзновенен во отвещаниих показовашеся, свободными усты и языком древлецерковное благочестие на судищи, свято и благочестиво изъявляше, свободными усты новоправление Никоново, и новыя догматы потязаше и отглаголоваше, яко всякаго сомнения и омышления достойны, и всяким мятежем и толиким мучительствам и кроволияниям в России повинни. Жестоко весьма и нестерпительно судиям страдальца мужество показовашеся, к ярости ярость, и к лютым мучениям прелютейшую муку, в прмучительный хомут страдальца, о жестокости и всеяростнаго судей гнева ужасно повелевают, еже не токмо видети, но и слышати ужас и трепет мног наносит: колико же паче самым делом искуситися, томлением сим прелютейшим. В таковое же лютейшее томление, в таковую неудобостерпимую муку вложен бысть страдалец, колико болезни, колика неудобостерпимая приемляше наляцания, егда руце к ногам прислячене, и шия со главою к коленома оным хомутом прикорчена: тогда разступахуся составы, троскотаху кости, напрягахуся жилы: паче же рещи прерывахуся, сламляхуся члены, уды тела от нужды напряжения сокрушахуся, и самя кожа плоти ужасно разседашеся от тяжести преужаснаго наляцания, и весь страдалец яко клуб некий по земли валяяся бяше. О како таковая неудобостерпимая понесе мучения; о како толь прежестокая петерпе болезни, всяко преестественныя Божия благодати, неисчерпаемым богатством по вере того преизобильно влиянным. Аще бо сломишася страдальца составы, но не сломися вера, прервашася жилы, но не прервася благочестие, разседеся кожа, но не разседеся вседобрая ревность. валяшеся по земли телом, но душевным мужеством яко столп Сионский, всекрепок и красен стояше, яко усты Владыку неусыпно призывая, тако сердцем непремолцательно во уши Господа Саваофа вопия: откуду и неудобостерпимая стерпетельно, и преужасная безбоязненно храбрски пренесе мучения, яко и мучащии постыдешася, и судии посрамившееся удивишася чудному терпению и доблести мужа. Но аще и удивишася терпению страдальца, но не помилова неповиннаго, но иный вид мучения лютости смышляют, и не менший, темя главы страдальца бритвою догола обрившее, воду самую студеножестокую возливати на нагое темя повелевают. Коль убо нестерпима сия болезнь, коль преужасна, егда вся кровь подобно каменю застановившися охладнеет; егда животная теплота изсякнет; тогда жилы посиневшее ослабеют. И вся плоть, и мозги, и составы остуденевше и посиневшее весьма умертвятся: дрожит тело, трясутся составы, клокочут зубы, и весь человек вне себе, и без себе бывает, но не страдалец дивный и доблественный, той бо аще и дрожаше плотию, но не дрожаше душею, аще и трясашеся телом, но не трясашеся сердцем, аще и озябаше естеством вещественным, но согревашеся Божиею благодатию, не дольния страсти, но внешния почести смотря, всехрабро и мужески прелютейшую сию претерпе муку; на многи и долги часы преболезненно томим, обаче крепкодушно и благоревностно пренесе оное томлениею благоревностно древнее восхваляя православие. Видящее мучащии, яко не могоша крепкаго ослабити, непобедимаго страдальца победити ниже ласканьми, ниже муками, яже жестоко нанесоша. Но твердаго столпа поколебати не возмогоша; к тому что сотворити недоумеяхуся, конечное смышление смертным наношением печатствуют: повелевают вне града срубную храмину соградити, и лозием и сламою со смолою наполнити, и тако приведшее страдальца, народу всему со слезами провождающу, на срубную колибу поставляют, идеже всехрабрый Христа моего воин на восток обратився, и на небо чувственная и мысленная очи возвед, подобающая благодарения и молитвы воздав своему Владыце и Богу, таже к народу обратився поклонением конечное всем отдаде обычное целование. Таже в сруб нивешен, и запалену срубу огнем вещественным, вещественное испек тело, яко жертву чисту Богови угодну, за Божия всеблагочестивыя пострадав законы, душу же невещественну, к невещественному препустив Владыце, в небесная невещественная отслав села. По страданиих толиких, по премногих мучениих, безсмертнаго преславно покоя достиг со избиенными за слово Божие, и свидетельство Иисус Христово безсмертно и всерадостно упокояется.

Аще и в пламень Марко, на час осудися;
Но в царствие, на веки вселися.
Славно Марка Дух Святый, в муках утверждаше;
Претерпевша же сия, всекрасно венчаше.

ГЛАВА 67.

О писаре Козме Прокошеве

Во время страдания дивною страдальцу, и добропобедней кончине ею, пострада и всеблагоревностный страдалец, благоразумный муж Козма Тимофеев именуемый Прокошев, иже бяху рождением Каргопольския области, чина писарска прикупныя во граде полаты, славою нарочит, понеже в делех приказных худог муж и искусен бяше, к сим писания божественнаго ветхаго и новаго многотщательный читатель. Откуду и разума изряднаго всекрасное себе собра богатство, яко всем приходящым к нему сладок и полезен бяше советник и наставитель, вся к себе народы паче магнита привлачая, и коегождо нужды божественных и градских законов пресветлыми разрешая словесы. Откуду любим и честен всем познавашеся и бываше, яко воеводам, приказным, благородным, тако градожителем и селообитателем: понеже вси попремногу пользовахуся дивным того благоразумием. Егда же Никоновы новины, яко прочыя Российския грады, тако Каргопольский град нашедши премногаго смущения, и всемрачная мятежа исполниша: тогда дивный Козма занеже искусен, Божиих законов ведитель бяше, не поколебася новшествы, не соотведеся пестротами новоприникших преданий, но оставль градский мятеж, презре человеческую славу и честь, в весь отечественную отходит, и тамо елико житием добродетельным, толико и книжными прочитаньми души своей сокровище некрадомо всебогато снискует. Чесо ради мнози к нему стицахуся людие, богатство разума, сладости Божиих словес, ведения о древлецерковнем благочестии всеусердно от него научаются, ревнители того ревности и разума, паче же о древлеотечестем православии далече исхождаше, яко и до самаго градца Чаранды дойде, и до самого воеводы достиже. Воевода, ибо весь оная под того правлением бяше, не незнаем бяше яко о разуме и чести первей, тако о ревности благочестия дивнаго Козмы, посылает воины честнаго мужа взяти, и гражданскому представити судищу: сурово убо суровии воини веси оныя доходят, сурово и дивнаго вземше Козму, и связавше в ладейцу всажают, путь ко граду Чаранде женуще. Той же яко доблий и благоревностный Христов воин, кроме всякаго смущения премужественною душею на тсрадания подвиг возвожашеся, тако и везущым воином вопияше: мужие братие, чесо ради ослабно везете мя; привяжите мя ко упругам ладейцы сея, да не к тому о бежании помыслю. Аще и прешедшее время во отраде и утешении мирстем многопокоительно пожих, поне от ныне любве ради моего Владыки связан безчестие и нужду претерплю; да сподоблен буду со страждущими за имя его присносущныя и безсмертныя жизни. Слышавше сия воини удивишася, и вместо тесноты и скорби, со ослабою и отрадою того везяху. приведше во град представляют честнаго мужа связана воеводскому судищу. Воззрев воевода на дивнаго страдальца, таковая к нему начат глаголати: вскую, о Прокошев, люди от церкве Божия отторгаеши, раздор мятежный и разгласие посреде народа Российскаго вносиши. Что же страдалец; не аз, рече, раздор сотворяю, не аз разгласие посреде ввожу церкве, но иже новшествам радующиися, иже отеческая взаконения и пределы предерзостно движущии. И воевода: кий зазор, или кое несогласие мы внесохом в церковь; Тогда дивный Козма отверз уста возглашаше: воньми, о честный воеводо! приятыя церковныя пределы и дивныя православия законы, яже Владимир равноапостольный крестився от святыя восточныя церкве непорочно прия, яже чрез седмь сот лет в России недвижимы и нерушимы пребывающе, всекрасное спасение содеваху человеком: Никон патриарх оныя святыя уставы и пределы дерзостно предвиже и разруши, мятежа и смущения сими разрушениями Россию наполни. Ни есть ли убо раздор и разгласие, егда святый трисоставный крест, на нем же Христос плотию распятся, на нем же святую и животворящую кровь пролия, той животворящий крест от просфор и евхаристии предерзновенно отъясте; вместо же того двочастным крестом просфоры печатати повелесте. Не есть ли разгласие во святым, егда святое православное знамение креста в сложении перстов, еже святыми апостолами паче же самем Христом преданное; еже оба таинства православныя веры благочестиво изобразует Святыя глаголю Троицы, и смотрения Спасова единаго от Святыя Троицы; еже двема перстома на челе святый и животворящий крест животворнаго страдания, двоестественнаго Христа Бога Святаго и православно изображает; тое святое и многотаинственное сложение от церкве пресмело отъясте, и клятвами стршными, и анафемами вседерзостными оле дерзости обложисте, похулисте и отвергосте, вместо же онаго святаго апостольскаго паче же Спасова предания, триперстное знамение, и пятиперстное благословение внесосте, инако священником благословляти, инако простолюдином знаменатися предасте; не убоявшееся церковных запрещений глаголющих: иже не крестится двема перстома, якоже Христос, да будет проклят. Не есть ли разгласие и раздор, еже ангельское пение сугубаго аллилуия дерзновенно изменяти и трегубити: явственно отцем святым глаголющим, трегубое аллилуия несть православных предание, но латынская ересь. Не есть ли разгласие, еже в молитве. Сына Божия именование отставляти, чрез предание и обычай святых отец, и что много глаголати, безчисленная предания отеческая отметнусте, неудобосочтенныя новины в церковь внесосте всерыдательно; ими же клятвы и анафемы отеческия на ся воспалисте; ими же премногих мятежей и смущений, и мучительных кроволияний российскую наполнисте землю; о них же и словоответствия прю воздати имате в день страшнаго испытания на ужаснем Христовем суде. Таковыми и подобными тем глаголы, вседобльственный страдалец премного удивив воеводу и вся предстоящыя, наконец сложив персты по древлецерковному преданию, и двема прекрестився перстома, светлым вопияше гласом: аз, о воеводо, тако знаменаюся, сице древлецерковныя сладце держу законы, и тако святыя отеческия сохраняю пределы, яко не единожды, но тмами за оныя умрети готов есмь, и всесладце желаю. Новых же Никоновых законовнесений и обычаев весьма отвращаюся и не приемлю, и ниже края слуха к тем приклонити смею; гласов отеческих трепеща вопиющих: вся, яже кроме учительства и воображения святых и приснопамятных отец соделанная или по сем содеятися хотящая, анафема. Еже слышав воевода, ничтоже страдальцу жестоко или тяжестно содела ил изрече, но повелевает в темницу отслати. Сам же к царствующему граду пишет о дивнем муже, и о дивнем разуме того возвещая творительному просит научитися, и донележе посланному в царствующий град и вспять ездящу, во оно время воевода яростию воскипев, предреченных страдальцев Евдокима и Григория на мучение извед горкими муками настоящаго живота лиши, яко предречеся, дивный Козма, слышав доброю подвижнику страдальческую смерть, по премногу благодарив и прославив всемогущаго Бога и Владыку, давшаго толико терпение рабома своима. К воеводе наречие сицево посылает: вскую, о честный местоначальниче и царский управителю, мене грубаго оставляеши; вскую в темнице яко во гробе затворил еси, и лишаеши предобраго страдальцев пира; Чесо  ради теми же не искушаеши мученьми, яковыми страдальцы испытал еси; почто обленился еси от кроволияния, еще древо мучительное стоит, еще жилы волуи не прервашася, но крепки ранити обретаются, еще огнь не угасе, еще клещи и железа распаленная не охладнеша, и вся орудия мучительная готова, востани и подвигнися, вознесе мене агнца на жертву томления за любовь Христову. Се руце мои испревращай яко хощеши, се хребет ураняй его глубочайшими ранами, се тело пали е огнем без пощадения, се ребра ломай я без милости, се жилы и составы и кости изчитай я мучительными сочтеньми, се плоть моя, мучи томи яко хощеши, различным предавай смертем, ибо готов есмь последнюю каплю крове за любовь источити Христову. Сему наречию послану от страдальца к судии, Никий же ответ, или воздаяние получи, паки убо страдалец повторяет прошение и молительными глаголы подвизает на мучительство судию, сице глаголя: что тебе прилучися, честный судие, забвением о нас окружатися, и туне и безделием время препущати; не видиши ли, яко дни и часы текут, время быстро пребегает, а аз в темнице празден пребывая, страдальческих отлучен натрижнений. Донележе стоит позорище мучительства, изведи мя на борьбу мучений, искуси мя лютейшими пытками подвижника, да познаеши в немощней ми плоти всемогущую Христову силу; силу, юже аще оплошишися утечет борьбы позорище, аще умедлиши претечет тризма страдания; потерпиши ли мало не обрящеши в руках держимаго, помедлиши еще к тому не узриши подвижника, и раскаятися имаши о замедлении! Сим к воеводе наречием принесенным, ничтоже сотвори, ниже на ярость подвижеся, но токмо сие наречие ко страдальцу посла: потерпи мало Прокошев (глаголя) приуготовися к подвигом, придет время, и утешим тя довольно, яко хощеши. Малу времени прешедшу, прилучися воеводе мимо темницу шествовати, тогда благоревностный и вседоблий страдалец, от оконца темницы светло и ясно возглашает воеводе, паки просит, паки и молит, паки воздвизает онаго на мучительство, себе же предавает на раны и скорби и кровавыя язвы всежелательно. Обаче воевода ничтоже по желанию страдальца сотвори, но токмо остави его в темнице, темничными искушатися болезньми и скорбьми. Богу преественному преестественно полезная свыше смотряющу каждому, тако и всепредоблему и благоревностному страдальцу усмотри промысл Божий не искуситися ранами мук, но томлением терпения твердость явити. Малу времени прешедшу, и повеление от царствующаго прииде града, мучити не велящее страдальца, но темницею и гладом и хладом томити. Откуду воевода затворяет страдальца дивнаго в зломрачную темницу и гладными и хладными томит скорбьми, на многое время яко до трех седмиц. Обаче страдалец, яко многотерпеливый подвижник, благоревностно обострився и ко гладу и хладу и мраку, вся премужественно претерпевает, и удобоносно, с сосудом избранным вопия: вся могу о укрепляющем мя Христе. Всежелательно потече, всехрабро ратова, всеславно победы воздвиже, даже до самаго преставления премужествен и крепкодушен показася благодарственными гласы всеусердными хваленьми, всежелательными славословии всемогущаго Бога и Владыку благодарствоваше. Сице три седмицы, гладными удручаем томленьми, тако темничными мраки, и хладными оскорбляем прираженьми: но сердцем целым, но душею светлою, но совестию горящею, всерадостно и многосладостно, лютая и скорбная перенес. хвале Божии сущи во устех его, к Богу благочестно преставися, от всемрачныя темницы, во пречудный небеснаго царствия свет. От всетяжестнаго града во всесдадчайшее насыщение, и от всемразнаго дрожания во всеутешительную безсмертную преступи породу вечныя славы, вечных и прекрасных венцев от всецарствующаго подвигодателя, преизобильно и всеблагодатно восприимати.

Козма знатный подвижник явлься,
В привременных и вечных честный муж прославлься;
Мир вознебрег дольний, жизнь получи премирну;
Зрит ныне лучу сладку и незданну и дивну;
За нужды и глад лютый добру измень цену:
Восприят от всех Царя нетленну корону.

ГЛАВА 68.

О писаре Иоанне Красулине

Приспе ми время воспамянути и мужественнаго и дивнаго во страдальцех Иоанна, иже прозванием Красулин именоватися обыче, ибо красный страдания подвиг за всекрасныя отеческия законы красно совершати возусердствова.

Сей доблий и дивный муж града бяше Свияжска, чином писарь приказный, и первый от писарей, но обычая бяше благаго, и жития добродетельнаго, и нрава благоревнастнаго, и чтения в писании, и ведения благоискуснаго. Откуду, и времени пришедшу Никоновых новин, догматом новым и книгам новоправленным всюду разсылаемым, и народом к приятию оных понуждаемым: вси людие, аще и не хотящее в сети новшества увязаху, древлецерковное же благочестие святое, увы неразумия, неволею похуляюще. Дивный сей не низведеся в неразумие, не низпаде подобно прочым: но яко преднаучен бяше всепредобрыми отеческими законы, яко святыми церковными книгами, очеса души просветив всекрасно. тако познавает лучшее, избирает добрейшее, лобызает объемля древлецерковных благочестивых богатств всеизрядное сокровище. объемля же оное в сердечных всерадостно скрывает сокровищах. скрывая же обогащается преизобильно божественными благодатьми. обогатився же но явственно и светло, и языком свободным древлецерковнаго благочестия светлость благоревностно всюду возвещаше, идеже прилучашеся разглагольствовати. К сему прилучися вещь, яже наипаче ревность добляго Иоанна, новичинки же на мучительную на страдальца ярость воздвижеся. Вещь же сицевая: ко прочым новинам Никон патриарх сочини клятвы или присяги чин, имже вси властели воинствующии и приказнии, и пошлин и даней царских собиратели, присягающее кленутся пред олтарем и священником, в которой клятве таковая словеса сложи: Аще аз каковым либо происком содею или помыслю что похитити или утаити от государевых пошлин, да буду проклят и препроклят, и Каиново трясяние, и Гиозиева проказа, и Анании и Сапфиры смерть да придут на мя, и да буду отлучен Святыя Троицы. Сложившу Никону таковый чин клятвы, вси властели и даней царских собиратели, к присяге приводими бываху, и священствующии вси содеваху таковая, ничтоже о них познавающе. Предоблий же Иоаан видев таковая нелепыя и преужасныя клятвы: вся человеки отвращающия от Святыя Троицы, и в погибель предающия, нестерпимо вменяше молчати: но ревностию вседоблею предоблий разжжеся, послания ко архиереом и иереом написует зазирая оныя клятвы, поношает в таковыя клятвы понуждающих народы. в них же написует, аще и великое зло есть государевых даней, или пошлин что скрывати: обаче грех есть, аще и великий грех есть; Грех же по церковным законом епитимиями томится, запрещеньми подобающими мучится: а не от христианства и Бога отлучает весьма согрешающыя; казнятся ли таковии, но гражданскими законы, яко прочии грешницы; а не клятвам и анафемам подлагаются. Еще во оных Никоновых клятвах и за помышление, аще кто помыслит на государево пошлин или даней сокрытие клятва и отлучение Святыя Троицы положися. Но помысл есть невольное присеяние от врага присеваемое человеку или внезапное, или насильное, иже бывает не токмо о вещех случающихся, но и о безместных и изглаголатися весьма немогущих множицею же и хульнии и весьма несказаннии бывают помыслы. Обаче за помыслы епитимий и запрещений правильных не зрится; кий убо церковный помыслы запрещенми казнить, кое правило мысли паче же невольныя епитимиями томивши мучить! Аще же запрещений и епитимий за помыслы не обретается, како за помыслы от церкве отлучаете, како за мысли токмо анафеме и клятвам подлагаете христианы; како за помышления от Святыя Троицы отлучаете православныя, кроме Божиих и церковных законов! Сими клятвами и анафемами, вся народы российския вседерзостно связавшее отлучисте Бога и небеснаго наследия, тме и родству огненному наследники преокаянно сотворяете. Таковая и прочая сим подобная предоблий Иоанн в посланиих написуя, архиереом и иереом предлагаше, благоревностно зазираше Никонова новшества, добродерзновенно поношаше новосочиненным Никоном клятвам, везде и присно оныя укаряя премужественно поношаше. Чесо ради не стерпеша духовнии власти праведных праведнаго мужа словес, не себе зазреша и дерзости своей, не нововводныя догматы от зазора очистити потщашася, но на праведнаго и безвиннаго мужа неправедныя возложиша руки, поимавше его прелютейшему томлению вдаша, многотомительным оковам, всемрачным темницам, злодейственным мучениям немилостивно предают дивнаго страдальца: всяк вид безмилосерднаго томления, на того священней показующе плоти, склонити, или вмале ослабити того не возмогоша. ибо страдалец к скорбем и напастем яко столп, к томлениям и мукам яко многоценный адамант камень, к ранам и язвам яко всекрепкое наковально и бяше и познавашеся. Что по сем бывает и устрояется; в заточение многотерпеливый посылается подвижник, и во оземствование многоскорбейшее, во острог Кольский, прилежащий пучинам окианским, близ каянския земли и нордвенския, идеже зимним временем света мало есть зрети: солнечнаго светопролития не зрится. В таковем многоскорбнем заточении вседоблий много время преживе премужественно, яко лет 30, всерадостно вся лютая она и многосладостно ношаше: древлецерковное же благочестие, и отеческих законов всекрасную светлость, и тамо свободным проповедая возвещаше языком. Еже не бяше стерпительно, не бяше удобоносимо защитником новшеств: но и тамо к сущему тамо воеводе писательныя посылают указы прелютейшей смертней казни предивнаго повелевают подложити Иоанна. Бяше тогда воевода во остроге оном суров некако и злодействен, яже яростию и гневом на страдальца дыхая не почиваше. тогда же наипаче пламенем злодейственныя кипя ярости, многая прежде тому досаждения, многи язвы и раны немилостивно нанес преклонити не возможе: наконец смертней казни главнаго усечения всехрабраго подвергше Иоанна. Но смертная казнь знаменита некако и дивна устроися бытии, и преестественнаго чудесе полна, вся позоратаи премногаго удивления исполни, Богу прославляющу своего угодника пречудным прославлением. Егда бо уже повеление судищное изыде казнити блаженнаго страдальца, ведом бываше по обычаю на место, паче же сам мужественно и храбро течаше, яко на пир сладчайший, тако на смерть ступаше. Приведену на место усечения, плаха предложися, секира главоусекательная изострися, спекулатор уготовися, крововидныма очима, львояростное стремление показавшее. предивный страдалец на восток став, прилежно помолися, таже к народу обращься, конечное прощение всем сотворив, на древо главоусекательное сам возлеже. Что прочее преславное бывает; что ужасное показуется; спекулатор пришед отсече главу страдальца: отсеченная же глава отскочивши, и ставши прямо на выи, лицеем к востоку зряше. Оле преславнаго и преестественнаго видения! Кто таково чудо слыша когда: мертвая и отсеченная глава, живое и преславное показует действо; показует яко древлевосточнаго благочестия страдалец бяше, и за восточныя православныя законы пострада, тем же и по смерти глава его ко истинному востоку зряше, являя тем яко и душа онаго на небо небесное на востоки страдальчески и преславно взыде, вся позоратаи, вся собранныя народы преславно сим преславным видением удививши. Еще же к преславному чудеси, другое присовокупляется чудо и предивное: усекший страдальца спекулатор гневопопустною казнию от Бога поражен бывает ужасно, мзду своего мучительства многорыдательне подъят; ибо по главоусечении многострадательнаго Иоанна, спекулатору вострясошася руце, яко Каину древле по убийстве Авелеве; и тако всегда окаянно трясыйся, яко и самую пищу едва можаше с нуждею ко устом приносити, многажды же и не можаше; и сим трясением даже до смерти самыя колебаяся мучашеся, дерзости своея окаянно и многорыдательно плакаше. Сими дивными знаменьми, предивному Богу дивно показующу, яко древняго благочестия всепресветлую непорочность, тако предобляго страдальца неповинную и страстотерпческую кончину, приятну и любезну самому Господеви Богу. Сице всехрабрый и благоревностный Иоанн, чудную ревность показа, пречудною смертию благоревностне скончався; яко пречудный святаго восточнаго православия воин, ко всепречудному небесному воеводе и царю, цел на пренебесныя возлетает востоки.

ГЛАВА 69.

О воине Мартине и его супруге Мавре

В предреченном острозе Кольском и всеизряднии изрядно в преизрядных просияша страданиих боголюбезный Мартин и многотерпеливая Мавра, яже беста царствующаго града жителя, и чина воинска. доблий Мартин иже со иными воины определен бысть на сражение преславныя и многострадательныя сигклитикии Феодосии. Егда страдальческия натрижнения великодушно прохождаше, от тоя предивныя дивный Мартин и с супругою своею предоблею Маврою, елико о древлецерковнем благочестии добре известистася, толико к терпению страдания всехрабро помазастася: не уже к тому нощная богочетца, но ясная древлецерковнаго православия совершителя бываюта, яко крестное знамение, тако молитву Исусову и прочыя христианския православныя законы по староцерковным преданием безбоязненно всюду и ясно совершающим. Откуду и познана быста от новолюбительных священников, и духовнаго претора судиям представлена: и яко ласканьми и мягкими увещании, сице и жестокими словесы, и жесточайшими томленьми к новинам понуждаема бывша не покористася. во оземствование прочее в предреченный острог Кольский немилостивно посылаются: тако немалое время крепко прежиста, нужду заточения, стеснения глада, убожества и пустоты, премужественно и благодарственно носяща. Мартин добрый время некое прежив утаився всех, в пустынное житие благоревностно изыде, и тамо постом и молитвами, слезами и рыданьми душу свою очистив, ко Господеви и Владыце своему доброуповательно отходит. Блаженная же Мавра по того отшествии время некое преживши в Кольском острозе, подобнее теплыми молитвами и горящими моленьми, и прочими благоуханными добродетельми к Богови всекрасно приближающися, оклеветана бысть от защитников Никонова новшества иереов ко градскому воеводе Полозову тогда начальствующу, яко держится древлецерковнаго благочестия крепко, к новинам же не приставает весьма и в церкви их к новоправленным службам отнюд не приходит. Чесо ради воевода оный послав воины, повеле добропобедную Мавру взявшим представити того судищу. представленней оней, рече воевода: священницы на тя многократно доносят, яко к церкви Божией не приходиши, тако и к священником ко благословению не приступаеши. Блаженная отвеща: аз в церкви Божией яко православно родихомся, православно крестихся и воспитахся, тако до ныне всегда неотменно, православно в ней пребываю. Воевода: к нашей церкви и к нашему пению чесо ради не приходиши; Великодушная  же страдалица великодушно отвеща: в вашу церковь не прихожду ради новаго служения, и новаго пения, и не только не прихожду, но и впредь ходити в вашя церквы отнюд не желаю и новоправленнаго пения слушати не даждь ми Боже. Откуду воевода львояростно разъярився, на мучение оную предавает, и сам к мучительному месту подвигся исходит. приведенне блаженной на место испытания мучительное уготовася древо, орудия мучительныя, хомуты, бичи, клещи, и прочая предложишася, одежди совлачится страдалица, руце связуются, спекулатору приведену: трясашеся весь, руце того ослабевшее содрогасте, мучити дивныя страдалицы весьма не можаше. Иному спекулатору приведену, предается на мучение блаженная. И колико жестоко, коль немилостивно мучиша немилостивии блаженную: руце сломиша прежестоко, плещи разорваша сурово, окровавиша тело, прерваша жилы, растерзаша плоть яко плат. И понеже елико тии мучаху дивную страдалицу, толико оная крепчайши и благоревностнейши показовашеся, яко изнемогаше прочее воевода, и к тому недоумеяшеся что сотворити. Но иереи градстии, тепли заступницы новин, приступившее к воеводе, моляху онаго и прошаху да не отпустит блаженныя на живот. Аще сию отпустиши живу, многи превратит во свою веру, и вся жены гражданския отвратит от церкве. Слышав сия воевода, даде смертный ответ, еже в срубе сожещи блаженную страстотерпицу. И абие храмина сруба уготовася, и предивная приведеся Мавра, и много увещеваху ю народи, и воевода трижды посылаше увещевати ю, да покорится и примет новопреданныя догматы, но блаженная ниже краем ушес о сих слышати хотяше, всерадостно бо за древнее благочестие на смерть грядяше. Таже мучащии возжегшее храмину сруба еще убеждаху, еще моляху повинутися страдалицу архиереом и новыя принятии уставы. и яко великодушно и всехрабро отрече блаженная не точию делом, не точию словом, но ниже на мысль сие принятии хощу. Сие рекше ей в сруб прочее поведоша: но всехрабрая страстотерпица прекрестившися коль великодушно, коль благоревностно на смерть грядяше: сама дверь срубныя отверзшее вниде, сама дверь оную паки затвори. Таже крестным оградившися знамением, сама во пламень огненный, Оле крепкаго и всехрабраго мужества и неодолеемыя души, великодерзновенно и всерадостно вниде: и тако пламенем опалившися, Господеви и Владыце своему, своею душею непорочно и всежелательно предаде, за того святыя законы, и благочестивая предания церковная, огнем сожжена бывши, жертва свята и богоугодна, небесному Царю преславно принесеся.

Мавра дивно правило и образ явися;
Огнь попра и муки, о Христе убелися.
Весть убо всечестная за что умирати;
За крест Господа славы, свою жизнь скончати.
Так мудрых дев чертога, достигати получи;
Всекрасныя Божия весело зрит лучи.

[1] Хлуд. нет красной строки.

[2] Хлуд. добавлено: Опатриархе Никоне.

[3] Сиротск.

[4] О его пременах в церковном предании.

[5] В кое лето оные новины в церковь внесоша.

[6] Кто обличители тех новин быша.

[7] Нужно принять во внимание, что здесь составитель говорит от себя, вкладывая упомянутыя слова в уста Павла, епископа Коломенскаго, и притом основываясь на неправильном заявлении Арсения Суханова, будто греки в крещении обливали. Но чтобы епископ Павел имел такия мысли, как сочинитель «Винограда», — исторически не доказано (Ред.).

[8] новинницы.

[9] И дивнаго дерзновения.

[10] Хлуд. гл. 3.